ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ
ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๐๒ · หน้า 85a
གཟེར་དང་ན་བ་བྱུང་བར་གྱུར་བ་དེ་ལ་གཞང་ཁ་བསྐུ་བ་དང་དུགས་བྱས་པ་དང་། རླུང་འཇོམས་པའི་ཁ་ཟས་ཤ་ཁུ་ལ་སོགས་པ་སྦྱིན་པར་བྱའོ། །མྱུར་དུ་བཅུག་ཅིང་ཕྱུང་བའམ། །གློ་བུར་དུ་ནི་བཏེག་པ་ཡིས། །རྐེད་པ་གཞང་དང་བརླ་བྱིན་པ། །
ཆུ་སོར་རེངས་ཤིང་ན་བར་འགྱུར། །ཞེས་བྱ་བ་ལ། འཇམ་རྩིའི་གཅེའུ་དེ་རིངས་ཤིང་མྱུར་དུ་བཅུག་པ་དང་། མྱུར་དུ་ཕྱུང་བའམ། ཡང་ན་གློ་བུར་དུ་རྐུབ་ཀྱི་སྔས་ལས་བཏེག་པར་གྱུར་ན། རྐེད་པ་ལ་སོགས་བའི་ཡན་ལག་རྣམས་ན་བ་དང་རེངས་པར་འགྱུར་རོ། །དེ་ལ་རླུང་
འཇོམས་ཁ་ཟས་དང་། །དུགས་བསྐུ་འཇམ་རྩིར་བཅས་བ་ཕན། །ཞེས་བྱ་བ་ལ། རྐེད་པ་རེངས་པ་ལ་སོགས་པ་དེ་ལ་རླུང་འཇོམས་པ་སེལ་བར་བྱེད་པའི་ཁ་ཟས་སྦྱིན་པ་དང་། དུགས་ལ་སོགས་པ་རླུང་འཇོམས་པར་བྱེད་པ་བྱས་ན་ཕན་ནོ། །འཚིར་བའི་ཚེ་ན་བར་དུ་གྲོལ། །
རླུང་གིས་གཞང་ལ་གནོད་གྱུར་ནས། །བྲང་དང་མགོ་བོ་གཟེར་ཅིང་ན། །བརླ་ཡི་ནད་ནི་སྐྱེད་པར་བྱེད། །ཅེས་བྱ་བ་ལ། ལྒང་པ་འཚིར་བར་བྱེད་པའི་ཚེ་ན། ལེགས་པར་མ་བསྡམས་བས་བར་དུ་གྲོལ་བར་གྱུར་ན། རླུང་གིས་གཞང་ལ་གནོད་པ་སྐྱེད་པར་བྱེད་པས། བྲང་ན་བ་ལ་
སོགས་པ་བསྐྱེད་པར་བྱེད་དོ། །དེ་ལ་བིལ་བ་ལ་སོགས་དང་། །པོ་སོན་ཆ་དང་དུར་བིད་སོགས། །བ་གཅིན་དང་ནི་སྦྱར་བ་གཏང་། །ཞེས་བྱ་བ་ལ། ཉེས་པ་དེ་ལ་བིལ་བ་ལ་སོགས་པའི་རྩ་བ་ལྔ་དང་། པོ་སོན་ཆ་དང་དུར་བྱིད་ལ་སོགས་པའི་སྡེ་ཚན་བ་གཅིན་དང་སྦྱར་བ་གཏང་བར་བྱའོ། །
བཙིར་དྲགས་པ་ཡིས་ཁོང་པར་ནི། །མི་འདུག་ལྐོག་མར་འབྱུང་བར་འགྱུར། །ཞེས་བྱ་བ་ལ། ལྒང་པ་བཙིར་དྲགས་པར་གྱུར་པ་ལས་ཁོང་བའི་ནང་དུ་སྣུམ་དེ་མི་འཆགས་པའམ། ལྐོག་མར་གྱེན་དུ་འབྱུང་བར་འགྱུར་རོ། །དེ་ལ་མས་གཏོང་བཀྲུ་སྨན་དང་། །མགུལ་བ་བསྡམས་སོགས་ལས་
རྣམས་བྱ། །ཞེས་བྱ་བ་ལ། ཉེས་པར་གྱུར་པ་དེ་ལ་འཇམ་རྩིའི་ཁྱད་པར་མས་གཏོང་བ་དང་། བཀྲུ་སྨན་བཏང་བ་དང་མགུལ་བ་བསྡམས་པ་ལ་སོགས་པའི་ལས་གོང་དུ་བཤད་པ་རྣམས་བྱས་ན་ཕན་ནོ། །བཀྲུ་སྨན་སོགས་པས་དག་བྱས་ནས། །ལུས་དང་ཉམས་སྟོབས་མེ་དྲོད་ཆུང་། །
เล่ม ๒๐๒ · หน้า 85b
སྒོ་ང་གཞོན་ནུ་འམ་ཏིལ་མར་གྱི། །སྣོད་ནི་གང་བ་ཇི་བཞིན་དུ། །གནོད་པར་གྱུར་པ་ཐམས་ཅད་ལས། །སྨན་པས་འབད་དེ་བསྲུང་བར་བྱ། །ཞེས་བྱ་བ་ལ། བཀྲུ་སྨན་སོགས་ཞེས་བྱ་བ་སྐྱུགས་སྨན་བཀྲུ་སྨན་དྲག་པོ་མས་གཏོང་བའི་ལས་ཀྱིས་དག་ཅིང་ལུས་སྦྱངས་པར་གྱུར་
པས་ལུས་རིད་པ་དང་། ཉམས་སྟོབས་ཞན་པ་དང་མེ་དྲོད་ཆུང་བར་གྱུར་པ་ལ་གནོད་པར་གྱུར་པའི་ཟས་དང་སྤྱོད་ལམ་ཐམས་ཅད་ལ་སྨན་པས་འབད་པ་དང་བཅས་པས་བསྲུང་ཞིང་བསྐྱང་བར་བྱ་སྟེ། དཔེར་ན་བྱའི་སྒོ་ང་གཞོན་ནུ་མ་སྨིན་པའམ་ཏིལ་མར་གྱིས་སྣོད་གང་བ་བསྲུང་བ་ཇི་ལྟ་བ་
བཞིན་དུ་ནད་པ་དེ་སྨན་པས་ཉེ་བར་བསྲུང་བར་བྱའོ། །ཁ་ཟས་མངར་དང་ཡིད་འོང་སྦྱིན། །དེ་འོག་སྐྱུག་དང་ལན་ཚྭར་བཅས། །དེ་ནས་མངར་དང་ཁ་བ་སྤྱིན། །རོ་ནི་སྣུམ་དང་རྩུབ་པ་ལྟར། །ཕན་ཚུན་གཉེན་པོར་གྱུར་པ་ཡིན། །རིམ་པར་ཉེ་བར་སྦྱར་
བ་ཡི། །རིམ་པས་དེ་ནི་རྣལ་དུ་དབབ། །ཅེས་བྱ་བ་ལ། དེ་ལྟར་སྦྱང་བ་བྱས་ཤིང་དག་པར་གྱུར་པའི་ནད་དེ་ལ། དང་པོར་མངར་ཞིང་ཡི་གར་འོང་བའི་ཟས་དང་སྐོམ་དག་སྦྱིན་པར་བྱའོ། །དེའི་འོག་ཏུ་ནི་རོ་སྐྱུར་བ་དང་ལན་ཚྭ་དང་བཅས་པའི་ཟས་སྐོམ་སྦྱིན་བར་བྱའོ། །དེ་ནས་ནི་རོ་མངར་བ་དང་།
ཁ་བ་སྦྱིན་པར་བྱའོ། །དའི་འོག་ཏུ་ནི་ཡང་རོ་བསྐ་བ་དང་ཁ་བ་སྦྱིན་པར་བྱའོ། །རོ་དེ་དག་ནི་སྣུམ་པ་རྩུབ་པའི་ཚུལ་དུ་ཕན་ཚུན་གཅིག་ལ་གཅིག་གཉེན་པོར་གྱུར་པ་ཡིན་ཏེ། དེ་ལྟར་རིམ་པར་ཉེ་བར་སྦྱར་བ་དེ་རིམ་བཞིན་དུ་རང་གཞིན་རྣལ་མ་ལ་དབབ་པར་བྱའོ། །ཀུན་བཟོད་ཉམས་སྟོབས་
བརྟན་པ་ནི། །རྣལ་མར་གྱུར་པ་ཡིན་ཞེས་བྱ། །ཞེས་བྱ་བ་ལ། དེ་ལ་ནད་པས་ནམ་ཟས་དང་སྤྱོད་ལམ་ཐམས་ཅད་བསྟེན་བཟོད་ཅིང་ཉམས་སྟོབས་བརྟན་པ་ཉིད་དུ་གྱུར་ན་ནད་པ་དེ་རྣལ་མར་གྱུར་པ་ཡིན་པར་ཤེས་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་
ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཆོ་ག་གྲུབ་པའི་གནས་ཀྱི་ལེའུ་ལྔ་པའི་འགྲེལ་པའོ།། །།དེ་ནས་སྨན་གྱི་ཆོ་ག་བཤད་པར་བྱའོ། །ཞེས་བྱ་བ་ལ། སྨན་རྣམས་ཀྱི་སྤྱིའི་ཆོ་ག་བསྟན་པར་བྱ་བའི་ཕྱིར་ལེའུ་འདི་བརྩམས་པ་ཡིན་ནོ། །ས་ཕྱོགས་
เล่ม ๒๐๒ · หน้า 86a
སྐམ་ཞིང་ཆ་མཉམ་པ། །གཞི་མཉམ་གཙང་ཞིང་ས་གཞི་བཟང་། །དུར་ཁྲོད་ཤིང་ཆེན་ལྷ་གནས་དང་། །གཡང་ས་གྲོག་མ་ཅན་མ་གཏོགས། །འཇམ་ཞིང་ཆུ་ནི་གཡས་ནས་འབབ། །འཇག་མ་དཱུར་བ་དང་ལྡན་པ། །ཐོང་ལྕགས་ཀྱིས་ནི་
མ་སྣད་པ། །ལྗོན་ཤིང་གྲིབ་མས་མ་ཕོག་པ། །ཁ་དོག་བཅུད་ལ་སོགས་དང་ལྡན། །སྨན་སྐྱེས་པ་ནི་བསྔགས་པ་ཡིན། །འབུས་མ་ཟོས་ཤིང་མེས་མ་ཚིག །འབྱུང་བ་སོགས་ཀྱིས་གནོད་མ་གྱུར། །ཉི་གྲིབ་ཆུ་ལ་སོགས་མ་ཉེན། ཇི་བཞིན་དུས་སུ་བརྟེན་གྱུར་པ། །
རྩ་བ་ཆེ་ཞིང་གཏིང་དུ་ཟུག །བྱང་གི་ཕྱོགས་སུ་བརྟེན་པ་བཟང་། །ཞེས་བྱ་བ་ལ། སྨན་སྐྱེ་བའི་ས་ཕྱོགས་སྐམ་པར་གྱུར་ཅིང་རླན་གྱི་ཤས་ཆུང་བ་དྲོ་གྲང་གི་ཆ་མཉམ་པ་གཞི་མཉམ་ཞིང་མཐོན་དམན་མེད་པ་གཙང་ཞིང་དག་པས་ས་གཞི་བཟང་བ་སྟེ། སྣུམ་ཞིང་མདངས་དང་ལྡན་པ་དང་།
གནག་པ་དང་། གསེར་གྱི་མདོག་ཅན་ལ་རོ་མངར་པའི་ས་ཡོད་པ་དང་། དེ་བཞིན་དུ་དུར་ཁྲོད་ལ་སོགས་པ་མ་ཡིན་པའི་ས་ཕྱོགས་དང་། མཆོད་རྟེན་ནམ་ཤིང་ཆེན་ཏེ་གྲོང་གི་ཕྱི་རོལ་ན་ཤིང་ཆེན་པོ་གཅིག་བུ་གནས་པ་དང་། ལྷ་ཁང་སྟེ་ལྷ་རྣམས་ཀྱི་གནས་སུ་བྱས་པའི་ཁང་བ་དང་།
གཡང་ས་སྟེ། གད་ཁ་དང་། གྲོག་མ་ཅན་གྱིས་ལས་སྐྱེས་པ་མ་གཏོགས་པ། འཇམ་ཞིང་ས་ཕྱོགས་རྩུབ་ཤས་མེད་པ་དང་། ཆུ་གཡས་ཕྱོགས་ནས་འབབ་པ་དང་། དེ་བཞིན་དུ་འཇག་མ་དང་། དཱུར་བའི་ནེའུ་སིང་གིས་ཁྱབ་ཅིང་གདལ་པ་དང་། དེ་བཞིན་དུ་གཤོལ་གྱི་ཐོང་ལྕགས་
ཀྱིས་སྨས་ཤིང་སྣད་པར་མ་གྱུར་པ་དང་། ལྗོན་ཤིང་གི་གྲིབ་མས་ཁེབས་པར་མ་གྱུར་པ་དང་། གཞན་ཡང་སྤྲུལ་ལ་སོགས་པ་གདུག་པས་ཕོག་པར་མ་གྱུར་པ་སྟེ། དེ་ལྟ་བུའི་ས་ཕྱོགས་སུ་སྐྱེས་པར་གྱུར་བའི་སྨན་ནི། བསྔགས་ཤིང་ཤིས་བ་ཡིན་པར་བཤད་དོ། །ཡང་སྨན་དེ་ཡང་སྲིན་བུ་རྣམས་ཀྱིས་མ་ཟོས་
ཤིང་མ་སྨས་པ་དང་། ནགས་ཀྱི་མེས་མ་ཚིག་པ་དང་། གྲང་ལྷགས་ལ་སོགས་པ་འབྱུང་བའི་གནོད་པ་རྣམས་ཀྱིས་གནོད་པར་མ་གྱུར་པ་དང་། ཉི་མ་དང་། གྲིབ་མ་དང་། ཆུ་ལ་སོགས་པས་མ་ཉེན་ཅིང་གནོད་བར་མ་གྱུར་བའི་སྨན་དེ་དུས་ཇི་ལྟ་བ་བཞིན་དུ་བཏུས་པ་དང་། རྩ་བ་ཆེ་
เล่ม ๒๐๒ · หน้า 86b
ཞིང་སའི་གཏིང་དུ་ཟུག་པ་དང་། བྱང་གི་ཕྱོགས་ན་གནས་པ་གང་ཡིན་པ་དེ་བཟང་ངོ་། །དེ་ནས་དགེ་བ་ལ་སྤྱོད་ཅིང་། །དད་ལྡན་གཙང་སྦྲ་སྨྱུང་བ་བྱས། །སྨན་ནི་ལེགས་པར་གནས་བ་བཏུ། །འོ་མར་བཅས་པ་དུས་སུ་སྦྱར། །བུ་རམ་མར་དང་སྦྲང་རྩི་དང་། །པི་པི་ལིང་དང་བྱི་དང་ག །
འབྲུ་རྣམས་མ་གཏོགས་འོ་མ་མེད། །ལོ་གཅིག་འདས་པར་མ་གྱུར་སྦྱར། །ཞེས་བྱ་བ་ལ། དེ་ནས་ཞེས་བྱ་བ་ནི་བཀྲ་ཤིས་པའི་དོན་ཏེ། དེ་ལྟར་སྨན་བཏུ་བ་དེ་ཡང་སྨན་པ་དགེ་བ་ལ་སྤྱོད་ཅིང་གནས་པ་དང་། དད་པ་དང་ལྡན་ཞིང་ངང་ཚུལ་བཟང་བ་དང་། ཁྲུས་དང་། གཙང་སྦྲ་བྱས་
བ་དང་། སྨྱུང་བ་བྱས་པས་སྨན་ལེགས་བར་གནས་ཤིང་འདུག་པ་བཏུ་ཞིང་བླང་བར་བྱ་ལ། བཏུས་ནས་ཀྱང་ཡོན་ཏན་དང་ལྡན་ཞིང་དེ་དང་འཚམ་པའི་སྣོད་དུ་བཅུག་ལ། །དུས་སུ་འོ་མ་དང་བཅས་པ་སྦྱར་བར་བྱ་ལ། །འོ་མ་མེད་པའི་སྨན་ནི་ལོ་གཅིག་འདས་པར་མ་གྱུར་པ་སྤྱད་པར་བྱ་སྟེ།
དེ་ལ་བུ་རམ་ལ་སོགས་པ་ནི་མ་གཏོགས་ཏེ། དེ་དག་ནི་རྙིང་བ་ཉིད་བཟང་བ་ཡིན་ནོ། །འོ་མ་བ་ནི་ཡར་མ་ཡི། །གཅིན་དང་ལྕི་བ་སྐྱོན་མེད་ཡིན། །ན་ཚོད་སྟོབས་ལྡན་ལུས་ཟུངས་དང་། །རྭ་འཛུག་རྨིག་པ་ལ་སོགས་བཟང་། །ཞེས་བྱ་བ་ལ། བ་ཡར་ནི་བེའུ་བཙས་ནས་ཡུན་རིང་པོ་མ་
ལོན་པ་སྟེ། དེའི་འོ་མ་ནི་ལྷག་པར་བཟང་བ་ཡིན་ནོ། །བའི་གཅིན་དང་ལྕི་བ་ནི་ནད་ཀྱི་སྐྱོན་མེད་པ་གང་ཡིན་པ་དེ་གླང་བར་བྱའོ། །ལུས་ཟུངས་ལ་སོགས་པ་ནི་ན་ཚོད་དང་ལུས་ཀྱི་སྟོབས་དང་ལྡན་པའི་བླང་བར་བྱའོ། །སོགས་པའི་སྒྲས་ནི་སྤུ་དང་པགས་པ་ལ་སོགས་པ་བསྡུའོ། །ལན་ཚྭ་
མ་གཏོགས་རི་ལྔ་པོ། །སྨན་ཁུ་ཡི་ནི་སྐྱེ་གནས་ཡིན་། །ཞེས་བྱ་བ་ལ། མངར་བ་ལ་སོགས་པའི་རོ་ལན་ཚྭ་མ་གཏོགས་པར་རོ་ལྔ་པོ་ནི་སྨན་གྱི་ཁུ་བ་འབྱུང་བའི་གནས་ཡིན་ཞིང་སྨན་ཁུ་ཞེས་བཏགས་པ་ཡིན་ནོ། །སྨན་ཁུ་ལྡེ་གུ་བསྐོལ་དང་བསྒྲངས། །ཁཎྜ་ཞེས་ནི་བྱ་བ་སྟེ། །སྨན་ནི་རྣམ་པ་ལྔ་
རུ་བརྟག སྔ་མ་གཞིན་དུ་མཐུ་སྟོབས་ཆེ། །ཞེས་བྱ་བ་ལ། སྨན་ཁུ་ལ་སོགས་པ་ལྔ་པོ་མངར་བ་ལ་སོགས་པའི་དབྱེ་བས་ཕྱེ་བ་དག་ནི་དབྱེ་བ་རྣམ་པ་ལྔར་འགྱུར་ཏེ། སྨན་ཁུ་ནི་སྨན་གྱི་རང་གི་ཁུ་བ་སྟེ། མིང་གི་རྣམ་པར་སྨན་གྱི་བཅུད་ཅེས་ཀྱང་བྱའོ། །ལྡེ་གུར་ནི་གཤེར་བའི་རྫས་དང་བསྲེས་
เล่ม ๒๐๒ · หน้า 87a
ཏེ། རྡོ་ལེབ་ལ་བཏགས་པའོ། །བསྐོལ་ནི་བཙོས་པའི་ཁུ་བ་སྟེ། བསྐོལ་བའི་སྨན་གྱི་ཁུ་བ་ཞེས་བྱའོ། །བསྒྲངས་པ་ནི་སྨན་གྱི་ཁུ་བ་བསྐོལ་བ་སྟེ། མཚན་མོ་འདས་པར་བྱས་པའོ། །སྨན་གཏུགས་ཏེ་བཅུག་ནས་འཕྲལ་དུ་བཙགས་པ་ནི་ཁཎྜ་ཞེས་བྱ་སྟེ།
དེ་ལྟར་སྨན་གྱི་ཁུ་བའི་སྦྱོར་བ་ནི་རྣམ་པ་ལྔ་ཡིན་ནོ། །དེ་ལས་སྔ་མ་བཞིན་མཐུ་སྟོབས་ཆེ་བ་ཡིན་ཏེ། ཕན་བྒཾས་ནི་བསྒྲངས་པ་མཐུ་སྟོབས་ཆེ་ལ། བསྒྲངས་པ་བས་ནི་བསྐོལ་བའོ། །བསྐོལ་བ་བས་ནི་ལྡེ་གུའོ། །ལྡེ་གུ་བས་ནི་སྨན་ཁུ་མཐུ་སྟོབས་ཆེ་བ་ཡིན་ནོ། །འཕྲལ་དུ་བཏུས་ཏེ་
བརྡུངས་ནས་ནི། །ཚགས་ལས་བཙིར་ཏེ་བཙགས་པ་གང་། །དེ་ནི་ཁུ་བ་ཞེས་བཤད་དོ། །ཞེས་བྱ་བ་ལ། སྨན་འཕྲལ་དུ་བཏུས་མ་ཐག་རྡོ་ལེབ་སྟེང་དུ་བརྡུངས་ལ་རས་ལ་སོགས་པའི་ཚགས་ཀྱིས་བཙིར་བ་ལས། སྨན་གྱི་ཁུ་བ་གང་ཞིག་བྱུང་བ་དེ་ནི་སློབ་དཔོན་གྱིས་སྨན་གྱི་ཁུ་བ་ཡིན་ནོ་ཞེས་
བཤད་དོ། །ལྡེ་གུ་གཤེར་གྱིས་སྤྲུས་བཏགས་པའོ། །ཞེས་བྱ་བ་ལ། ལྡེ་གུ་ནི་སྨན་གྱི་ཕྱེ་མ་སྐམ་བ་ཉིད་ཆུ་ལ་སོགས་བའི་རྫས་གཤེར་བས་སྦྲུས་ཏེ་བཏགས་པ་དེ་ཉིད་ལ་ལྡེ་གུ་ཞེས་བྱའོ། །དེ་བསྐོལ་བ་ནི་བསྐོལ་བ་ཡིན། །ཞེས་བྱ་བ་ལ། བསྐོལ་བ་ནི་སྨན་དེ་ཉིད་ཕྲ་མོར་བླགས་ཤིང་བཏགས་པ་གཅད་
པར་བྱ་བ་ཡང་བཅད་དེ། ཆུའི་ནང་དུ་བསྐོལ་བའི་སྨན་གྱི་ཁུ་བ་དེ་ནི་བསྐོལ་བ་ཞེས་བྱའོ། །བསྒྲངས་པ་མཚན་མོ་གཞག་པ་ཡིན། །ཞེས་བྱ་བ་ལ། བསྒྲངས་པའི་སྨན་གང་ཆུ་གྲང་མོ་དང་སྦངས་ཏེ་མཚན་མོ་གཞག་པའི་ཞག་ལོན་པ་ནང་པར་བཙགས་པའོ། །ཁཎྜ་འཕྲལ་དུ་སྦྱར་བཙགས་
པ། །ཞེས་བྱ་བ་ལ། ཁཎྜ་ནི་སྨན་འཕྲལ་དུ་ཆུ་དྲོན་པོའི་ནང་དུ་སྦངས་ཤིང་མཉེས་ཏེ་བཙགས་པའོ། །དེ་དག་གི་ཚད་བརྟག་པ། །ནད་སོགས་སྟོབས་ལས་སྦྱར་བར་བྱ། །ཞེས་བྱ་བ་ལ། སྨན་གྱི་ཁུ་བ་ལ་སོགས་པ་དེ་དག་གི་ཚད་ཀྱི་ངེས་པར་བརྟགས་པ་ནི་ནད་དང་ནད་གཞི་
ལུས་ཟུངས་ལ་སོགས་པ་གནོད་པར་བྱེད་པ་ལ་དུས་དང་། ཁ་ཟས་དང་། རོ་དང་། གོམས་པ་དང་། དུས་ཚིགས་ལ་སོགས་པའི་སྟོབས་ལས་དཔགས་ཏེ། ཅི་ཙམ་རན་པའི་ཚད་སྦྱར་བར་བྱའོ། །གཞན་ཡང་སྨན་གྱི་རོ་དང་ནུས་པ་ལ་སོགས་པ་ཡང་ལེགས་པར་བརྟགས་ཏེ་
เล่ม ๒๐๒ · หน้า 87b
སྦྱར་བར་བྱའོ། །དེ་ཡང་དྲང་སྲོང་གིས་བཤད་པ། །ཚད་ཀྱི་ངེས་པ་ཡོད་མིན་ཏེ། །ནད་དང་ལྟོ་ཚད་ཉམས་དང་ནི། །དུས་དང་ཡུལ་ནི་རྣམ་བརྟགས་ཏེ། །དེ་ལྟར་སྨན་ནི་གཏང་བར་བྱ། །ཞེས་བྱ་བ་ལ། སྔར་བཤད་པའི་ཚིག་དེ་ཚད་མ་ལྡན་པ་ཉིད་དུ་བསྒྲུབ་པའི་ཕྱིར་
དྲང་སྲོང་སྟེ། རྒྱུན་ཤེས་ཀྱི་བུས་བཤད་པ་ནི་ཚད་ཀྱི་ངེས་པ་ཡོད་པ་མ་ཡིན་ནོ། །ཞེས་དམ་བཅས་པ་སྟེ། སྨན་གྱི་ཁུ་བ་ལ་སོགས་པ་ནི་ནད་ཀྱི་དུས་སུ་གཏང་བར་བྱ་ལ། དེ་ཡང་ནད་ཀྱི་དཀྱེལ་དང་། ལྟོ་སྲ་སྙིའི་ཚད་དང་། ཉམས་ཆེ་ཆུང་དང་། དུས་གྲང་དྲོ་དང་། ཐན་མོང་དང་།
ཡུལ་སྐབས་དང་། རླན་ཅན་དང་ཆ་མཉམ་བ་སྟེ། དེ་དག་གི་ཚུལ་ལས་བརྟགས་ནས་བློ་དང་ལྡན་པའི་སྨན་པས་སྨན་གཏང་བར་བྱའོ། །ཞེས་མཁས་བ་དག་གིས་སྨན་གཏང་བ་ཐམས་ཅད་ཀྱི་ཚད་བསྟན་པའི་ཕྱིར་འདི་སྐད་བཤད་པ་ཡིན་ལ། དེ་ལས་ཀྱང་ཕྱོགས་གཅིག་ཙམ་བཤད་པ་ནི། །སྨན་གྱི་ཁུ་
བ་སྲང་བཞི་ནི། །འབྲིང་ཚད་ཙམ་དུ་བཤད་པ་ཡིན། །ཞེས་བྱ་བ་ལ་སོགས་པ་ཡིན་ཏེ། སྨན་གྱི་ཁུ་བའི་འབྲིང་ཚད་ནི་སྲང་བཞི་ཙམ་ཡིན་ནོ། །ཞེས་སློབ་དཔོན་གྱིས་བཤད་པ་ཡིན་ནོ། །ལྡེ་གུ་ཞོ་གཉིས་དག་དང་བསྲེ། །དེ་ནི་ཆུ་སྲང་གསུམ་གྱི་ཚད། །ཅེས་བྱ་བ་ལ། སྨན་ལྡེ་གུར་
བཏགས་པ་དེ་དག་གི་འབྲིང་ཚད་ནི་ལྡེ་གུ་ཞོ་གཉིས་ཙམ་དུ་བྱས་ལ། ལྡེ་གུ་དེ་རྫས་གཤེར་བ་གང་དང་གཏོང་ཡང་གཤེར་སྲང་གསུམ་གྱི་ནང་དུ་བཅུག་ལ་དཀྲུགས་ཏེ་བླུད་པར་བྱའོ། །བསྐོལ་བའི་སྨན་ནི་སྲང་གཅིག་བྱ། །བྲེ་ཕྱེད་ཆུ་བསྐོལ་བཞི་ཆ་ལུས། །ཞེས་བྱ་བ་ལ། སྨན་བསྐོལ་བའི་འབྲིང་
ཚད་སྨན་སྲང་གཅིག་ཆུ་བྲེ་ཕྱེད་ཅེས་བྱ་བ་སྲང་བཅུ་དྲུག་གི་ནང་དུ་བསྐོལ་ལ་དེ་ལས་བཞི་ཆ་སྟེ། །སྲང་བཞི་ལུས་པ་ན་ཕབ་སྟེ་བླུད་པར་བྱའོ། །བསྒྲངས་བ་སྲང་གཅིག་སྲང་དྲུག་ནི། །ཞེས་བྱ་བ་ལ། བསྒྲངས་པའི་སྨན་ཁུ་ནི་སྨན་སྲང་གཅིག་ཆུ་ལ་སོགས་པ་གཤེར་བའི་རྫས་སྲང་དྲུག་གི་ནང་དུ་ནུབ་
མོ་སྦངས་ཏེ་བླུད་པར་བྱའོ། །དེ་ལས་གཞན་པ་སྲང་བཞི་ཡིན། །ཞེས་བྱ་བ་ལ། བསྒྲངས་པའི་སྨན་ཁུ་དེའི་ལས་གཞན་པ་སྟེ། དེའི་འོག་མ་ཁཎྜ་ཞེས་བྱ་བ་ནི་སྨན་སྲང་གཅིག་དང་ཆུ་སྲང་བཞི་སྦངས་ལ་བཙགས་ཏེ་བླུད་པར་བྱའོ། །སྨན་མར་བསྐོལ་ཚད་མ་སྨོས་པར། །ལྡེ་གུ་སྣུམ་
เล่ม ๒๐๒ · หน้า 88a
དང་གཤེར་རྫས་ནི། །བཞི་འགྱུར་དུ་ནི་བསྐྱེད་དེ་སྦྱར། །ཞེས་བྱ་བ་ལ། སྨན་མར་བསྐོལ་བ་དེ་དག་ཏུ་ཚད་མ་སྨོས་པ་དེར་ལྡེ་གུ་དང་སྣུམ་དང་ཆུ་ལ་སོགས་པ་གཤེར་བའི་རྫས་བཞི་འགྱུར་དུ་བསྐྱེད་ལ་སྦྱར་བར་བྱའོ། །མར་ལ་སོགས་བའི་སྣུམ་ནི་སྨན་གྱི་ལྡེ་
གུའི་བཞི་འགྱུར་བྱ་ལ། ཆུ་ལ་སོགས་པའི་གཤེར་བའི་རྫས་ནི། སྣུམ་གྱི་བཞི་འགྱུར་གཞུག་པར་བྱའོ། །ཤོ་ན་ཀ་ཡིས་བཤད་པ་ནི། །སྣུམ་བསྐོལ་ཆུ་ནི་འབའ་ཞིག་དང་། །ཁུ་བ་བསྐོལ་བ་རིམ་བཞིན་དང་། །ལྡེ་གུའི་ཆ་ནི་བཞི་དང་དྲུག །བརྒྱད་ནི་རིམ་བཞིན་སྦྱར་
བར་བྱ། །ཞེས་བྱ་བ་ལ། དྲང་སྲོང་ཤོ་ན་ཀ་ཞེས་བྱ་བས་བཤད་པའི་གཞུང་ནི་སྣུམ་གང་ཞིག་ཆུ་འབལ་ཞིག་དང་བསྐོལ་བ་དེར་ནི་སྣུམ་ལྡེ་གུའི་བཞི་འགྱུར་གཞུག་པར་བྱ་ལ་གང་སྨན་གྱི་ཁུ་བ་དང་བསྐོལ་བ་དེར་ནི་ལྡེ་གུའི་དྲུག་འགྱུར་དང་བསྐོལ་བར་བྱའོ། །གང་དུ་བསྐོལ་བའི་ཁུ་བ་དང་
བསྐོལ་བ་དེ་ནི་ལྡེ་གུ་བརྒྱད་འགྱུར་དང་བསྐོལ་བར་བྱའོ། །ལྡེ་གུ་སོར་མོར་མ་འབྱར་དང་། །སྣུམ་ནི་མེར་བཅུག་སྒྲ་མེད་དང་། །གང་ཚེ་ཁ་དོག་སོགས་ཕུན་ཚོགས། །དེ་ཚེ་དེ་ནི་མྱུར་དུ་དབབ། །ཅེས་བྱ་བ་ལ། སྨན་མར་བསྐོལ་བ་ན་ལྡེ་གུ་སོར་མོ་ལ་དྲིལ་བ་ནམ་འབྱར་བ་དང་། དེ་བཞིན་
དུ་སྣུམ་མེར་བཅུག་པ་ན། སྒྲ་ཚེག་ཚེག་ཟེར་བ་མི་འབྱུང་བ་དང་། དེ་བཞིན་དུ་ཁ་དོག་དང་། དྲི་དང་། རོ་ཕུན་སུམ་ཚོགས་པར་གྱུར་པ་དེའི་ཚེ། སྨན་མར་དེ་ཚོས་པ་ཡིན་པས་དབབ་པར་བྱའོ། །མར་ནི་ཝུ་བ་དངས་མ་དང་། །ཏིལ་མར་ལྦུ་བ་བྱུང་བ་དང་། །ལྡེ་གུ་ནལ་ནལ་པོར་གྱུར་ཅིང་། །
ཆུ་ནང་འབྱིང་ཞིང་གྱེས་མི་འགྲོ། །ཞེས་བྱ་བ་ལ། གཞན་ཡང་མར་བསྐོལ་བ་ལེགས་པར་ཚོས་པར་གྱུར་པ་ན། བསྐོལ་པའི་ཝུ་བ་དེ་དངས་ཤིང་མེད་པར་འགྱུར་རོ། །ཏིལ་མར་བསྐོལ་བ་ལེགས་པར་ཚོས་པ་ནི་ཝུ་བ་འབྱུང་བར་འགྱུར་རོ། །ལྡེ་གུ་བསྐོལ་བ་ཚོས་པ་ན་ནི་སོར་མོས་མཉེས་པ་ན།
རྒྱུན་ནལ་ནལ་པོར་འབྱུང་བར་འགྱུར་བ་དང་། དེ་བཞིན་དུ་ཆུའི་ནང་དུ་བཅུག་པ་འོག་ཏུ་འབྱིང་ཞིང་ཕན་ཚུན་གྱེས་པར་མི་འགྱུར་གྱི། གཅིག་ཏུ་ལུས་ཏེ་གནས་པར་འགྱུར་རོ། །ཚོས་པའི་ཚད་ནི་རྣམ་གསུམ་སྟེ། །འཇམ་ཚོས་འབྱར་བག་འབྱར་ལ་རྩུབ། །ཅེས་བྱ་བ་ལ། སྣུམ་ཚོས་པའི་
เล่ม ๒๐๒ · หน้า 88b
ཚད་ནི་རྣམ་པ་གསུམ་སྟེ། འཇམ་པོར་ཚོས་པ་དང་། འབྱར་བག་དང་། འབྱར་བག་རྩུབ་པའོ། །འཇམ་ཚོས་ཚིགས་མ་ལྡེ་གུ་འདྲ། །འབྱར་བག་སྦྲང་རྩི་ལྟ་བུ་ཡིན། །ཅུང་ཟད་ཚིག་ཅིང་མདོག་གནག་པར། །སྣང་འགྱུར་དེ་ནི་ཐ་མ་ཡིན། །ཞེས་བྱ་བ་ལ། གསུམ་
པོ་དེ་དག་ལས་ཀྱང་། འཇམ་པོར་ཚོས་པའི་འོག་གི་ཚིགས་མ་ལྡེ་གུ་འདྲ་བར་གྱུར་པ་ཡིན་ནོ། །བར་མ་འབྱར་བག་ཅན་ནི་བཙོས་པ་ན་སྦྲང་རྩི་ལྟར་འབྱར་བག་སྣང་བ་ཡིན་ནོ། །འབྱར་བག་རྩུབ་པོར་གྱུར་པ་ནི་ཅུང་ཟད་ཚིག་པར་འགྱུར་ཞིང་། གཟར་བུར་ཆགས་པ་རྩུབ་ལ་མདོག་
གནག་པར་གྱུར་པ་ཡིན་ནོ། །དེ་ལས་འདས་པ་དོན་མི་བྱེད། །མ་ཚོས་མེ་དྲོད་ཉམས་པར་བྱེད། །ཅེས་བྱ་བ་ལ། དེ་ལྟར་ཚོས་པ་ཐམས་ཅད་འབྱར་བག་རྩུབ་པོ་དེ་ལས་ཀྱང་འདས་པར་གྱུར་ཅིང་སྣུམ་ཚིག་པར་གྱུར་པ་ལ་ནི། སྨན་གྱི་དོན་བྱེད་པར་མི་ནུས་ཏེ། ནུས་པ་དང་
འབྲལ་བར་འགྱུར་རོ། །ཤིན་ཏུ་མ་ཚོས་པས་ནི་ཕོ་བའི་མེ་དྲོད་ཉམས་པར་བྱེད་དོ། །འཇམ་ཚོས་སྣར་བཏང་རྩུབ་པས་བསྐུ། །བཏུང་དང་འཇམ་རྩི་འབྱར་བག་བྱ། །ཞེས་བྱ་བ་ལ། སྨན་སྣ་ནས་གཏོང་བ་བསྐོལ་བའི་ཚད་ནི་དང་པོ་འཇམ་ཙམ་དུ་ཚོས་པ་གཏང་བར་བྱའོ། །ལུས་
བསྐུ་བ་ལ་ནི་ཐ་མ་སྨིན་པ་རྩུབ་པོར་གྱུར་པས་བསྐུ་བར་བྱའོ། །སྨན་མར་བཏུང་བ་དང་། འཇམ་རྩི་བཏང་བ་ལ་ནི་བར་མ་འབྱར་བག་ཅན་གཏང་བར་བྱའོ། །ཤ་ན་ཀར་ཤ་ལག་མཐིལ་དང་། །སྤར་གང་ཕུལ་བྲེ་ཨ་ད་ཀ །དྲོན་བ་ཧ་རི་མ་བཞིན་དུ། །བཞི་འགྱུར་ཡིན་པར་ཤེས་པར་
བྱ། །ཞེས་བྱ་བ་ལ། ཤ་ན་མ་ཤ་བཞི་སྟེ། འཇིག་རྟེན་པ་དག་ནི་མ་ཤ་དྲུག་ལ་ཤ་ན་གཅིག་ཏུ་འདོད་དོ། །ཤ་ན་དེ་བཞི་ལ་ཀར་ཤ་སྟེ། ཞོ་གཉིས་ཡོད་ལ། དེ་ཉིད་ནི་ལག་མཐིལ་ཞེས་བྱ་བའི་ཚད་ཡིན་ནོ། །ལག་མཐིལ་དེ་བཞི་ལ་ནི་སྦར་གང་ཞེས་བྱ་བ་ཡིན་ནོ། །སྦར་བ་བཞི་
ལ་ནི་ཕུལ་གང་ངོ་། །ཕུལ་བཞི་ལ་བྱེ་གང་ངོ་། །བྱེ་བཞི་ལ་ཨ་ད་ཀའོ། །ཨ་ད་ཀ་བཞི་ལ་ནི་དྲོ་ནའོ། །དྲོ་ན་བཞི་ལ་བ་ཧ་ཞེས་བྱའོ། །རློན་པ་ཉིས་འགྱུར་སྦྱར་བྱ་ཞིང་། །གཤེར་བ་ཕུལ་གང་སོགས་དེ་བཞིན། །ཞེས་བྱ་བ་ལ། སྨན་གཤེར་བ་རྣམས་ནི་ཇི་སྐད་སྨོས་པའི་ཚད་ཤ་
เล่ม ๒๐๒ · หน้า 89a
ན་ནས་བ་ཧའི་བར་དུ་ཉིས་འགྱུར་གཞུག་པར་བྱའོ། །དེ་ལ་ཡང་། །ཏུ་ལ་ཞེས་བྱ་བ་སྲང་བརྒྱ་དང་། བྷ་ར་ཞེས་བྱ་བ་ཁུར་གཅིག་སྟེ། དེ་གཉིས་ནི་སྲང་བརྒྱ་དང་ཁུར་གཅིག་ཁོ་ནར་བྱའི་རློན་པ་ཡང་ཉིས་འགྱུར་དུ་མི་བྱའོ། །ཨང་ཆུ་དང་འོ་མ་ལ་སོགས་
པ་གཤེར་པའི་རྫས་ནི་རློན་པ་ལ་སོགས་པ་ཡན་ཆད་ཀྱང་དེ་བཞིན་དུ་ཉིས་འགྱུར་དུ་སྦྱར་བར་བྱའོ། །བཏགས་ཏེ་སྐྲུས་ནས་གཤེར་མེད་པའི། །སྣུམ་བསྐོལ་བ་ལ་ཆུ་གཞུག་བྱ། །ཞེས་བྱ་བ་ལ། སྨན་བཏགས་ཏེ་སྦྲུས་པ་ལ་ནི་བཏགས་པ་སྟེ། སྦྲུ་བའི་ཕྱིར་ཆུ་གཞུག་པར་བྱས་ལ། དེ་བཞིན་དུ་
གཤེར་བའི་རྫས་མེད་པའི་སྣུམ་བསྐོལ་བ་ལ་ནི་ཆུ་ཉིད་དང་སྦྱར་ཞིང་གཞུག་པར་བྱའོ། །གང་དུ་ཚད་ནི་མ་བཤད་པ། །དེར་ནི་ཆ་མཉམ་སྦྱར་བར་བྱ། །ཞེས་བྱ་བ་ལ། སྨན་གྱི་སྦྱོར་བ་ཕྱེ་མ་དང་། སྨན་བསྐོལ་བའི་ཁུ་བ་དང་། མར་དང་། ཏིལ་མར་ལ་སོགས་པའི་སྨན་གྱི་
ཚད་ངེས་པ་མ་སྨྲོས་པ་དེར་ནི་སྨན་དག་ཆ་མཉམ་པ་ཁོ་ནར་བྱའོ། །ཤ་ན་གཉིས་ལ་བ་ཏ་ཀ །དེ་གཉིས་ཀར་ཤ་ཀོ་ལ་དང་། །བ་རུ་ར་དང་དྲང་འཁྲུ་མེད། །ཅེས་བྱ་བ་ལ། དེ་ལ་ཞོ་ཕྱེད་ལ་ནི་ཤ་ན་སྟེ། ཤ་ན་གཉིས་ནི་པ་ཏ་ཀ་གཅིག་གོ། །པ་ཏ་ཀ་གཉིས་ལ་ནི། ཀར་
ཤ་དང་། ཀོ་ལ་དང་། བ་རུ་ར་དང་། དྲང་འཁྲུ་མེད་ཅེས་བྱ་བའི་མིང་གི་རྣམ་གྲངས་ཀྱིས་བཤད་པ་ཡིན་ནོ། །ཨཀྵ་པི་ཙུ་སུ་བརྞ། །ལག་མཐིལ་ཁམ་ཚད་བི་ལའི་སྡེར། །ཏིན་དུ་ཀ་དང་ལག་པའི་ཚད། །སྒྲ་གཞན་དོན་ནི་གཅིག་པ་ཡིན། །ཞེས་བྱ་བ་ལ། ཡང་ཀར་ཤ་དེ་
ཉིས་ནི་ཨཀྵ་དང་བི་ཙུ་ནས་ལག་པའི་ཚད་ཅེས་བྱ་བའི་བར་གྱི་སྒྲས་བསྟན་པ་ཡིན་ཏེ། དེ་དག་ནི་དོན་གཅིག་ལ་མིང་གི་རྣམ་གྲངས་ཀྱིས་སྒྲ་གཞན་དུ་བསྟན་པ་ཡིན་གྱི་དོན་ཐ་དད་པ་ནི་མ་ཡིན་ནོ། །ཤུ་ཏི་བརྒྱད་པ་པི་ཙུ་ཡིན། །ཞེས་བྱ་བ་ལ། ཀར་ཤ་གཉིས་ལ་ནི་ཤུ་ཏི་སྟེ་དེ་ཉིད་ནི་མིང་
བརྒྱད་པ་དང་པི་ཙུ་ཞེས་བྱའོ། །སྲང་གཅིག་བིལ་བ་པྲ་ཀུ་ཛ། །སྦར་གང་ཨ་མྲ་བཞི་པོ་ཡིན། །ཞེས་བྱ་བ་ལ། སྲང་གི་རྣམ་གྲངས་ནི། བིལ་བ་དང་། པྲ་ཀུ་ཛ་དང་། སྦར་གང་དང་། ཨ་མྲ་དང་། བཞི་བོ་ཞེས་བྱ་བ་ཡིན་ནོ། །སྲང་གཉིས་ཁྱོར་གང་དེ་གཉིས་ལ། སྙིམ་
เล่ม ๒๐๒ · หน้า 89b
གང་དེ་གཉིས་མ་ནི་ཀ །ཞེས་བྱ་བ་ལ། ཁྱོར་གང་ལ་སྲང་གཉིས་ཡོད་པར་ཤེས་པར་བྱ་སྟེ། ཁྱོར་གཉིས་ལ་སྙིམ་པ་གང་ཡིན་ཏེ། སྙིམ་པ་གཉིས་ལ་ནི་མ་ནི་ཀ་ཞེས་བྱ་བའི་ཚད་ཡིན་ནོ། །ཨ་ད་ཀ་དང་སྣོད་ཀན་ས། །དྲོ་ན་ཀུམ་པ་བུམ་ཆེན་ཡིན། །ཞེས་བྱ་བ་ལ། ཨ་ད་ཀ་ཞེས་
བྱ་བ་བྲེ་བཞི་པའི་མིང་གི་རྣམས་གྲངས་ནི། སྣོད་དང་ཀ་ནས་ཞེས་བྱ་བ་ཡིན་ལ། དྲོ་ན་ཞེས་བྱ་བ། བྱེ་བཅུ་དྲུག་པའི་བྲེ་བོ་ཆེའི་ཚད་ཀྱི་མིང་གི་རྣམ་གྲངས་ནི། ཀུམ་པ་དང་། ག་ད་ཞེས་བྱ་བ་བུམ་པ་ཆེན་པོ་ཡིན་ནོ། །ཏུ་ལ་སྲང་ནི་བརྒྱ་ཡིན་ཏེ། །དེ་ཉི་ཤུ་ལ་ཁུར་དུ་བཤད། །
ཅེས་བྱ་བ་ལ། ཏུ་ལ་ཞེས་སྨོས་པ་ནི། སྨན་སྐམ་པ་འམ། རློན་པ་རྫས་གཤེར་བ་ཡིན་ཡང་རུང་སྟེ། སྲང་བརྒྱའི་ཚད་ཡིན་པར་ཤེས་པར་བྱའོ། །སྲང་བརྒྱ་ཕྲག་ཉི་ཤུ་ལ་ནི། བྷ་ར་ཞེས་བྱ་བ་ཁུར་བུའི་ཚད་ཡིན་པར་ཤེས་པར་བྱ་སྟེ། བྷ་ར་ཞེས་བྱ་བའི་ཚད་དེ་ནི་སྐམ་པོའམ་
རློན་པ་འམ། ཁུ་བའི་ཚད་གང་ཡང་རུང་སྟེ། ཏུ་ལ་དང་འདྲ་བར་སྲང་བརྒྱ་ཕྲག་ཉི་ཤུ་ཁོ་ན་ལ་བྱའི། ཉིས་ལྡབ་ཏུ་གཞན་ལྟར་མི་བགྲང་ངོ་། །གངས་ཅན་འབིགས་བྱེད་རི་ཡིས་ནི། །ས་གཞི་ཕལ་ཆེར་ཁྱབ་པ་ཡིན། །དེ་ལས་དང་པོ་བསིལ་ཞིང་ཕན། །འབིགས་བྱེད་
སྨན་ནི་མེའི་རང་བཞིན། །ཞེས་བྱ་བ་ལ། རི་བོ་གངས་ཅན་དང་། རི་བོ་འབིགས་བྱེད་གཉིས་ཀྱི་རང་བཞིན་གྱིས་ས་གཞི་འདི་ལ་ཕལ་ཆེར་ཁྱབ་པ་ཡིན་ལ། །དེ་གཉིས་ཀྱི་ནང་ནས་དང་པོ་སྟེ། རི་ཁ་བ་ཅན་ལས་སྐྱེས་པའི་སྨན་རྣམས་ནི་རང་བཞིན་བསིལ་ཞིང་ཕན་པ་ཡིན་ཏེ། དེ་ནི་
ཞི་ཞིང་གྲང་བའི་རང་བཞིན་ཅན་ཡིན་པའི་ཕྱིར་རོ། །འབིགས་བྱེད་ཀྱི་རིའི་རང་བཞིན་ནི་དྲོ་བ་ཡིན་པའི་ཕྱིར་མེའི་རང་བཞིན་ཅན་ཡིན་པར་ཤེས་པར་བྱའོ། །ཡན་ལག་བརྒྱད་པའི་སྙིང་བོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་པ་ལས།
ཆོ་ག་གྲུབ་པའི་གནས་ཀྱི་ལེའུ་དྲུག་པའི་འགྲེལ་པ་སྟེ། གནས་ལྔ་བའི་འགྲེལ་པ་རྫོགས་སོ།། །།དེ་ནས་བྱིས་པ་གསོ་པའི་ཆོ་གའི་ལེའུ་བཤད་པར་བྱའོ། །ཞེས་བྱ་བ་ལ། རྒྱུད་ཀྱི་གནས་ལྔས་ནི་ཡན་ལག་གི་གཙོ་བོ་ལུས་ཀྱི་གསོ་བ་བཤད་པ་ཡིན་ལ། ཡན་ལག་ལྷག་
เล่ม ๒๐๒ · หน้า 90a
མ་བདུན་པོའི་ནད་ནི་རྟག་ཏུ་འབྱུང་ཞིང་རྟོགས་ཤིང་ཤེས་པར་དཀའ་བ་ཡིན་པར་བཤད་ལ་དེས་ན་བྱིས་པ་གསོ་བ་ལ་སོགས་པའི་ཡན་ལག་ཅུང་ཟད་ཙམ་གསལ་བས་ངེས་པར་བསྟན་པར་བྱ་བའི་ཕྱིར་རྒྱུད་ཕྱི་མ་ཞེས་བྱ་བ་གནས་ཀྱི་མཆོག་བརྩམས་པ་ཡིན་ནོ། །དེ་
ལས་ཀྱང་བྱིས་པ་གསོ་ཞིང་རིམ་གྲོར་བྱ་བའི་ཕྱིར་ཐོག་མ་ཁོ་ནར་བྱིས་པ་གསོ་བ་བཤད་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་དུ་བཤད་པར་བྱའོ། །བྱིས་པ་གསོ་ཞིང་བསྙེན་བཀུར་བའི་དབང་དུ་བྱས་པའི་གཞུང་ནི་བྱིས་པ་གསོ་བའི་ཆོ་གའི་ལེའུ་སྟེ། དེ་བཤད་པར་བྱའོ། །
ཞེས་བྱ་བའོ། རྒྱུན་ཤེས་གྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་བཤད་དོ། །ཞེས་བྱ་བ་ལ། ཡང་སྔ་མ་བཞིན་བཤད་པར་བྱ་སྟེ། བདག་ཉིད་ཀྱིས་རང་བཟོར་ཐོར་བྱས་པ་མ་ཡིན་ནོ། །ཞེས་བསྟན་པའི་ཕྱིར་མདོའི་ཚིག་འདི་སྨོས་པ་ཡིན་ནོ། །བྱིས་པ་བཙས་མ་
ཐག་ཕྲུ་མ། །བསལ་ཏེ་རྒྱམ་ཚ་མར་བསྐུས་སྦྱང་། །དེ་འོག་བཙས་པས་སྡུག་བསྔལ་ལ། །བ་ལའི་ཏིལ་མར་བླུགས་པར་བྱ། །ཞེས་བྱ་བ་ལ། བྱིས་པ་མངལ་ནས་བཙས་མ་ཐག་ཏུ་ཕྲུ་མ་ཞེས་བྱ་བ་དེ་བསལ་ཞེས་ཕྱི་བར་བྱ་སྟེ། དེ་ཡང་གཞུང་ལས། །གང་གིས་དཀྲིས་ནས་བྱིས་པ་
སྐྱེས། །ཕྲུ་མ་ཞེས་ནི་བྱ་བ་ཡིན། །ཞེས་བཤད་པ་ཡིན་ཏེ། དེ་བསལ་ཞིང་ཕྱིས་ལ་རྒྱམ་ཚྭ་དང་མར་དུ་སྦྱར་བས་བསྐུ་ཞིང་ཕྱི་བར་བྱའོ། །དེའི་འོག་ཏུ་བཙས་པའི་ཚེ་སྡུག་བསྔལ་ཞིང་ཉམ་ཐག་པ་དེ་བསལ་བར་བྱ་བའི་ཕྱིར་བ་ལའི་ཏིལ་མར་ཇི་སྐད་བཤད་པ་དེ་ལུས་ལ་བླུགས་པར་བྱའོ། །
དེ་ནི་རྣ་བའི་དྲུང་དུ་ནི། །རྡོ་གཉིས་བརྡུང་བ་སྤྱད་པར་བྱ། །ཞེས་བྱ་བ་ལ། དེའི་འོག་ཏུ་རྣ་བ་སྦྱང་བའི་ཕྱིར་བྱིས་པ་དེའི་རྣ་བའི་དྲུང་དུ་རྡོ་གཉིས་བརྡབ་ཅིང་བརྡུང་བ་ཉེ་བར་སྤྱད་ཅིང་སྒྲ་བསྒྲགས་པར་བྱའོ། །དེ་ནས་དེ་ཡི་རྣ་བ་ནི། །གཡས་པར་སྔགས་འདི་བརྗོད་བར་བྱ། །ཞེས་བྱ་བ་ལ། དེ་ནས་
དེའི་འོག་ཏུ་བྱིས་པ་དེའི་རྣ་བ་གཡས་བའི་རྩ་བར་སྔགས་འདི་བརྗོད་པར་བྱའོ། །ཡན་ལག་ཡན་ལག་ལས་བྱུང་ཁྱོད། །སྙིང་ལས་མངོན་པར་སྐྱེས་པ་ཡིན། །བདག་ཉིད་བུ་ཞེས་བྱ་བ་ཁྱོད། །ལོ་བརྒྱར་ཡང་དག་འཚོར་གྱུར་ཅིག །ལོ་བརྒྱ་ཐུབ་ཅིང་སྟོན་བརྒྱ་འཚོ། །ཚེ་རིང་བ་ནི་ཐོབ་གྱུར་ཅིང་། །རྒྱུ་སྐར་
เล่ม ๒๐๒ · หน้า 90b
ཕྱོགས་དང་མཚན་མོ་དང་། །ཉིན་མོས་ཁྱོད་ནི་བསྲུང་བར་ཤོག །ཅེས་བྱ་བ་ནི་རིག་བྱེད་ལས་དེ་བཤད་པའི་སྔགས་ཀྱི་ཆིགས་སུ་བཅད་པ་ཡིན་ཏེ་དེ་བརྗོད་པར་བྱའོ། །བདེ་བར་གྱུར་ནས་ལྟེ་བ་ནི། །སོར་བཞིའི་འོག་ཏུ་སྲད་བུས་བཅིང་། །དེ་ཡི་འོག་ཏུ་བཅད་ནས་ནི། །ལྟེ་བ་ལ་ནི་
བརྟོད་དེ་གཞག །ཅེས་བྱ་བ་ལ། བྱིས་པ་དེ་མངལ་ནས་བཙས་པའི་སྡུག་བསྔལ་ཉེ་བར་ཞི་བའི་རང་བཞིན་རྣམ་པར་འདུག་པའི་བདེ་བ་ཐོབ་པར་གྱུར་པའི་འོག་ཏུ། ལྟེ་བ་འཕྱང་བའི་སོར་བཞིའི་འོག་ཏུ་སྲ་དབུས་ལེགས་པར་བཅིངས་བའི་གོང་དུ་མཚོན་རྣོན་བོས་བཅད་དེ་སྲད་བུས་
ལྟེ་བའི་ལྷག་པར་མདུད་དེ་བརྟོད་པར་བྱའོ། །དེ་འོག་ལྟེ་བ་རུ་རྟ་ཡི། །ཏིལ་མར་གྱིས་ནི་བསྐུ་བར་བྱ། །ཞེས་བྱ་བ་ལ། དེ་ནས་བྱིས་པ་དེའི་ལྟེ་བ་རུ་རྟ་དང་བསྐོལ་བའི་ཏིལ་མར་གྱིས་ནི་བསྐུ་བར་བྱའོ། །འོ་མ་ཅན་ཤིང་བསྐོལ་ཆུའམ། །དྲི་ཞིམ་བཅུད་ལྡན་ཆུ་དག་ནི། །
གསེར་རམ་དངུལ་ནི་བསྲེགས་པ་ཡིས། །བསྲོས་པའི་དྲོ་འཇམ་ཆུ་ཡིས་བཀྲུ། །ཞེས་བྱ་བ་ལ། །དེ་ལྟར་བསྐུས་ནས་དེའི་རྗེས་ལ། །འོ་མ་ཅན་གྱི་ཤིང་གང་ཡང་རུང་བ་བསྐོལ་བའི་ཁུ་བས་བཀྲུ་བར་བྱ་སྟེ། །འོ་མ་ཅན་གྱི་ཤིང་ནི། ཨུ་དུམ་བཱ་ར་ཨ་ཤྭད་ཐ། །བླག་ཤ་དང་
ནི་ནྱ་གྲོ་དྷ། །པི་པི་ལིང་སྟེ་ལྔ་པོ་འདི། །འོ་མ་ཅན་གྱི་ཤིང་དུ་བཤད། །ཅེས་བྱ་བ་ཡིན་ནོ། །ཡང་ན་དྲི་ཞིམ་པོ་ཐམས་ཅད་དང་སྦྱར་པའི་ཆུའི་ནང་དུ་གསེར་རམ་དངུལ་གང་ཡང་རུང་བ་བསྲེགས་པས་གསུང་ལ་དྲོ་འཇམ་ཙམ་དུ་བསྲོས་པས་བཀྲུ་བར་བྱའོ། །དེ་ནས་འཛུབ་མོ་གཡས་པ་ནི། །
དཀྲིས་པས་རྐན་ནི་བཏེག་ནས་ཀྱང་། །མགོ་བོར་རས་བལ་སྣུམ་ཅན་གཡོགས། །ཞེས་བྱ་བ་ལ། དེའི་འོག་ཏུ་སྨན་པའི་མཛུབ་མོ་གཡས་པ་རས་བལ་གྱི་ཡེའུས་དཀྲིས་པས་བྱིས་པའི་རྐན་ལེགས་པར་བཏེགས་ལ་མགོ་བོའི་སྟེང་ནས་རས་བལ་སྣུམ་གྱིས་བཀང་ཅིང་གཡོགས་པར་བྱའོ། །
བློ་དང་ཚེ་དང་སྟོབས་བསྐྱེད་ཕྱིར། །ཤུ་དག་ཕྲ་མ་བི་ཤ་ལི། །ཤཾ་ཀ་པུ་ཥྦའི་ལྡེ་གུ་ནི། །མར་དང་སྦྲང་རྩི་བཅས་པ་དག །སྔགས་བཏབ་ཧ་རེ་ཎུ་ཙམ་སྤྱིན། །ཞེས་བྱ་བ་ལ། དེ་ནས་བྱིས་པ་དེའི་བློ་དང་། ཚེ་དང་སྟོབས་བསྐྱེད་པའི་ཕྱིར་ཤུ་དག་དང་ཕྲ་མ་ལ་སོགས་པ་བཏགས་པའི་
เล่ม ๒๐๒ · หน้า 91a
ལྡེ་གུ་སྦྲང་རྩི་དང་མར་སྦྱར་བ་ཧ་རེ་ཎུའི་ཚད་ཙམ་འཇག་མའི་རྩེ་མོ་ལ་སྔགས་ཀྱིས་བཏབ་ཅིང་མངོན་པར་བཟླས་ཏེ། གསེར་གྱི་སྣོད་དུ་སྦྱིན་པར་བྱའོ། །གསེར་དང་ཤུ་དག་མུ་མེན་དང་། །མ་ནུ་ཨ་རུ་རའི་ཕྱེ་མ་འམ། །གསེར་དང་སྐྱུ་རུའི་ཕྱེ་མ་
དང་། །སྦྲང་རྩི་མར་བཅས་ལྡེ་གུ་སྦྱིན། །ཞེས་བྱ་བ་ལ། ཡང་ན་གསེར་ལ་སོགས་པ་ཕྱེ་མར་བཏགས་པ་སྦྲང་རྩི་དང་ལྡེ་གུར་སྦྱར་བ་འམ། ཡང་ན་གསེར་དང་སྐྱུ་རུ་རའི་ཕྱེ་མ་མར་དང་སྦྲང་རྩི་དང་སྦྱར་བ་གང་ཡང་རུང་བ་དེ་བློ་དང་ཚེ་དང་སྟོབས་བསྐྱེད་པའི་ཕྱིར་སྦྱིན་པར་བྱའོ། །
དེ་ནས་མངལ་ཆུ་རྒྱམ་ཚ་ནི། །མར་དང་བཅས་པར་སྐྱུག་ཏུ་གཞུག །ཅེས་བྱ་བ་ལ། དེ་ལྟར་ལྡེ་གུ་དེ་སྦྱིན་པའི་རྗེས་ལ་རྒྱམ་ཚ་དང་སྦྱར་བའི་མར་བྱིན་ལ། མངལ་གྱི་གནས་ན་གནས་པའི་ཚེ་ཆུ་གང་དག་སོགས་པ་དེ་སློན་དུ་གཞུག་པར་བྱའོ། །སྐྱེ་དགུའི་བདག་པོའི་ཆོ་ག་ཡིས། །
བཙས་པའི་ཆོ་ག་བྱེད་དུ་གཞུག །ཅེས་བྱ་བ་ལ། དེ་ནས་སྐྱེ་དགུའི་བདག་པོས་བཤད་པའི་ཆོ་ག་རིག་བྱེད་ཀྱི་གསང་ཚིག་ལས་བཤད་པའི་བཙས་པའི་ཆོ་ག་བྱེད་དུ་གཞུག་གོ །སྙིང་ལ་གནས་པའི་རྩ་རྣམས་ནི། །བཙས་ནས་ཁ་ནི་དབྱེ་བའི་ཕྱིར། །ཉི་མ་གསུམ་པའམ་བཞི་
པ་ལ། །བུད་མེད་ཀྱི་ནི་ནུ་ཞོ་འབྱུང་། །ཞེས་བྱ་བ་ལ། བུད་མེད་བུ་བཙས་པའི་སྙིང་ལ་གནས་པའི་རྩ་རྣམས་བཙས་པའི་དབང་གིས་ཁ་དབྱེ་བའི་ཕྱིར། བཙས་ནས་ཉི་མ་གསུམ་མམ་བཞི་པ་ལ་ནུ་ཞོ་འབྱུང་པར་འགྱུར་རོ། །དེ་ནས་ཉིན་ཞག་དང་པོ་ལ། །དུས་གསུམ་དུ་ནི་སྦྲང་རྩི་
མར་། །བྱི་ཚེར་བ་དང་སྦྱར་བ་ལ། །སྔགས་ཀྱིས་བཏབ་སྟེ་བྱིས་པར་སྦྱིན། །ཞེས་བྱ་བ་ལ། གང་གི་ཕྱིར་དེ་ལྟར་དེ་ཉིན་ཞག་དང་པོ་ལ་བྱི་ཚེར་བ་དང་སྦྱར་བའི་མར་དང་སྦྱང་རྩི་ལ་སྔགས་ཀྱིས་བཏབ་སྟེ། བྱིས་པ་ལ་དུས་གསུམ་དུ་སྦྱིན་པར་བྱའོ། །གཉིས་པ་དང་ནི་གསུམ་པ་
ལ། ལ་ཀྵི་མ་དང་བསྐོལ་མར་བླུད། །ཅེས་བྱ་བ་ལ། བཙས་ནས་ཉི་མ་གཉིས་པ་ལ། ལ་ཀྵི་མ་ཞེས་བྱ་བའི་སྨན་དང་བསྐོལ་བའི་མར་ལ་སྔགས་གྱིས་བཏབ་པ་དུས་གསུམ་དུ་ནི་སྦྱིན་པར་བྱའོ། །ཉི་མ་གསུམ་པ་ལ་ཡང་མར་དེ་ཉིད་ལ་སྔགས་ཀྱིས་བཏབ་པ་དུས་
เล่ม ๒๐๒ · หน้า 91b
གསུམ་དུ་སྦྱིན་པར་བྱའོ། །དེ་ནས་དང་པོའི་ནུ་ཞོ་ནི། །བཀག་པ་དེ་ལ་ལར་སར་ནི། །ཞོ་གཉིས་ཙམ་གྱི་ཚད་སྦྱིན་ཞིང་། །ནུ་ཞོ་དུས་གཉིས་བླུད་པར་བྱ། །ཞེས་བྱ་བ་ལ། དེའི་འོག་ཏུ་དང་པོར་ནུ་ཞོ་མི་བླུད་པར་བཀག་པའི་བྱིས་པ་དེ་ལ་མར་སར་ཞོ་གཉིས་ཙམ་གྱི་
ཚོད་བྱིན་ལ། དེའི་རྗེས་ལ་ནུ་ཞོ་ལྡགས་ཀྱིས་བཏབ་ལ་སྦྱིན་པར་བྱའོ། །མ་ཉིད་ཀྱི་ནི་ནུ་ཞོ་བླུད། །དེ་ཡི་ལུས་ནི་འཕེལ་བྱེད་ཡིན། །ཞེས་བྱ་བ་ལ། ནུ་ཞོ་དེ་ཡང་མ་ཁོ་ནའི་བླུད་པར་བྱའོ། །གཞན་གྱི་བླུད་པར་མི་བྱ་སྟེ། ཅིའི་ཕྱིར་ཞེ་ན། མའི་འོ་མ་དེ་ནི་བྱིས་པའི་ལུས་འཕེལ་
ཞིང་རྒྱས་པར་བྱེད་པ་ཡིན་ནོ། །དེ་མེད་མ་མ་ཤིན་ཏུ་བྱམས། །སྐྱོན་མེད་འཁྲིག་པ་སྤངས་པ་དང་། །རིགས་དང་རང་བཞིན་དེ་དང་མཉམ། །ནད་མེད་ན་ཚོད་དར་ལ་བབ། །བུ་མ་ཤི་ཞིང་བརྐམ་ཆགས་མེད། །གཉིས་ཀྱི་འོ་མ་བླུད་པར་བྱ། །ཞེས་བྱ་བ་ལ། མའི་འོ་མ་དེ་མེད་
པར་གྱུར་ན། མ་མ་བྱིས་པ་ལ་ཤིན་ཏུ་བྱམས་ཤིང་བརྩེ་བ་ལ་ལུས་ལ་སྐྱོན་མེད་ཅིང་འོན་པ་དང་ཞར་བ་མ་ཡིན་ཞིང་ཡན་ལག་མ་ཚང་བ་མེད་པ་དང་། འཁྲིག་པ་སྤངས་ཤིང་སྐྱེས་པ་དང་ཉལ་བོ་སྤོང་བ་དང་། རིགས་དང་རང་བཞིན་བྱིས་པ་དེ་དང་མཉམ་པ་དང་། ནད་མེད་ཅིང་བདེ་བར་
གནས་པ་དང་། དར་ལ་བབ་ཅིང་བྱིས་པ་དང་རྒས་པ་མ་ཡིན་པ། སྔོན་ཆད་བུ་ཤི་མ་མྱོང་ཞིང་བུ་འཚོ་བ་དང་། བརྐམ་ཆགས་ཀྱི་ཞེན་པ་ཆུང་བའི་མ་མ་གཉིས་བསྐོས་ལ། དེའི་འོ་མ་བླུད་པར་བྱའོ། །དེ་གཉིས་ཟས་དང་སྤྱོད་ལམ་ནི། །ཕན་པས་འབད་དེ་གསོ་བར་བྱ། །
ཞེས་བྱ་བ་ལ། མ་མ་གཉིས་ཟས་དང་སྤྱོད་ལམ་ཕན་ཞིང་གནོད་པ་མེད་པ་དག་གི་འབད་པས་གསོ་ཞིང་བསྟེན་བཀུར་བྱའོ། །མྱ་ངན་ཁྲོ་དང་མྱུང་བ་དང་། །ལུས་དུབ་ནུ་ཞོ་ཉམས་པའི་རྒྱུ། །ཞེས་བྱ་བ་ལ། མྱ་ངན་ལ་སོགས་བ་ནི་བུད་མེད་ཀྱི་ནུ་ཞོ་ཉམས་ཤིང་འཇིག་
པའི་རྒྱུ་ཡིན་བས་དེ་དག་ཀྱང་སྦང་པར་བྱའོ། །བུ་རམ་ཆང་མ་གཏོགས་ཆང་དང་། །རླན་ཅན་ཤ་ཁུ་འོ་མ་དང་། །འོ་མ་ཅན་སྨན་མྱ་ངན་སོགས། །གོ་བཟློག་ནུ་ཞོའི་རྒྱུ་ཡིན་ནོ། །ཞེས་བྱ་བ་ལ། ནུ་ཞོའི་རྒྱུ་ནི་བུ་རམ་ཆང་མ་གཏོགས་པའི་ཆང་དང་།
เล่ม ๒๐๒ · หน้า 92a
རླན་ཅན་གྱི་སྲོག་ཆགས་ཀྱི་ཤ་ཁུ་དང་། འོ་མ་དང་། འོ་མ་ཅན་གྱི་སྨན་ཛི་བན་ཏི་ལ་སོགས་པ་དང་། མྱ་ངན་ལ་སོགས་པ་ལས་གོ་བཟློག་པ་སྟེ་སེམས་དགའ་བ་དང་། འགྲངས་པར་ཟ་བ་དང་ལུས་དུབ་པར་མ་གྱུར་པ་ནི། ནུ་ཞོའི་རྒྱུ་
ཡིན་ནོ། །དེ་བས་ན་དེ་དག་ནི་སྦྱིན་པར་བྱའོ། །མི་མཐུན་ཟས་ནི་ཟོས་པ་དང་། །ལྟོགས་དང་སེམས་ནི་ཉམས་པ་དང་། །ལུས་ཟུངས་གནོད་བཅས་སྦྲུམ་མ་ཡི། །འོ་མ་བྱིས་པའི་ནད་སྐྱེད་བྱེད། །ཅེས་བྱ་བ་ལ། མ་འམ། མ་མས་ཁ་ཟས་མི་མཐུན་ཞིང་འཕྲོད་
པ་མ་ཡིན་པ་ཟོས་པ་དང་། དེ་བཞིན་དུ་ལྟོགས་ཤིང་བཀྲེས་པར་གྱུར་པ་དང་། སེམས་ཉམས་ཤིང་བརྒྱལ་བར་གྱུར་པ་དང་། ལུས་ཟུངས་རླུང་ལ་སོགས་པའི་གནོད་པ་དང་བཅས་པ་དང་། སྦྲུམ་མའི་ནུ་ཞོ་གང་ཡིན་པ་དེ་ནི་བྱིས་བའི་ནད་སྐྱེད་པར་བྱེད་པ་ཡིན་ནོ། །
ནུ་ཞོ་མེད་ན་ར་འམ་བའི། །འོ་མ་བྲི་ཧ་ཏི་སོགས་རྩ་འམ། །སྟི་ར་གཉིས་བསྐོལ་ཁ་རར་བཅས། །ཡོན་ཏན་དེ་ལྡན་བླུད་པར་བྱ། །ཞེས་བྱ་བ་ལ། གལ་ཏེ་མ་འམ་མ་མའི་ནུ་ཞོ་མེད་པར་གྱུར་ན། བྱིས་པ་ལ་བ་འམ་རའི་འོ་མ་བྲི་ཧ་ཏི་ལ་སོགས་པ་རྩ་བ་ཆེན་པོ་ལྔ་
དང་། ཆུང་ངུ་ལྔ་དང་བསྐོལ་བ་འམ། ཡང་ན་བ་འམ། རའི་འོ་མ་སྟི་ར་གཉིས་པོ་སྟེ། ས་ལ་པརྞི་དང་། ཀྲིཥྞ་པ་རྞི་དང་བསྐོལ་བ་འམ། ཁ་ར་དང་བཅས་པ་མའི་འོ་མའི་ཡོན་ཏན་དང་བཅས་པ་བླུད་པར་བྱའོ། །དྲུག་པའི་མཚན་མོར་ཁྱད་པར་དུ། །
བསྲུང་དང་གཏོར་མའི་བྱ་བ་བྱ། །དེ་ཡི་གཉེན་གྱིས་མེལ་ཙེ་བྱ། །ཤིན་ཏུ་དགའ་བ་ཉིད་ཀྱང་བྱ། །ཞེས་བྱ་བ་ལ། བཙས་ནས་ཉི་མ་དྲུག་པའི་མཚན་མོ་ལ་བབ་པ་ན་མཆོག་གམ་ཁྱད་པར་དུ་བསྲུང་བའི་སྦྱོར་བ་ཇི་སྙེད་པ་རྣམས་བྱ་བ་དང་། གཏོར་མའི་ཆོ་ག་བྱ་
བ་དང་། དེའི་ཉེ་དུའི་སྐྱེ་པོ་རྣམས་ཀྱིས་མཚན་མོ་མེལ་ཚེ་བྱ་ཞིང་དགའ་བར་འགྱུར་བའི་རོལ་མོ་སྣ་ཚོགས་ཀྱང་བྱའོ། །ཞག་བཅུ་རྫོགས་པར་གྱུར་པ་དང་། །རང་རིགས་འཚམ་པའི་ཆོ་ག་ནི། །བྱེད་དུ་གཞུག་ཅིང་བཙས་མ་བསླང་། །ལུས་ལ་ལྡོང་རོས་བ་བླ་དང་། །གི་ཝཾ་
เล่ม ๒๐๒ · หน้า 92b
ཙནྡན་ཨ་ཀར་གདགས། །རྒྱུ་སྐར་ལྷ་འམ་ཉེ་དུ་ལས། །དྲས་བའི་ཡི་གེ་མཉམ་པ་ཡི། །མིང་ནི་བྱིས་པ་ལ་གདགས་བྱ། །ཞེས་བྱ་བལ། བཙས་ནས་ཞག་བཅུ་རྫོགས་པར་གྱུར་པ་དང་། རང་གི་རིགས་དང་མཐུན་པའི་ཚོགས་བཅས་པའི་བུད་མེད་
བསླང་བའི་ལས་བྱ་ཞིང་དགའ་སྟོན་བྱས་ལ། བྱིས་པ་དེའི་ལུས་ལ་ལྡོང་རོས་ནས་ཨ་ག་རུའི་བར་གྱི་རྫས་གདགས་པ་དང་། བྱིས་པ་ལ་མིང་གདགས་པར་བྱ། །ཞེས་བྱ་བ་ལ། མིང་དེ་ཡང་རྒྱུ་སྐར་གྱི་ལྷ་ལས་དྲས་ནས་གདགས་པར་བྱ་བ་སྟེ། དེ་ཡང་བྲེ་ཉེའི་ལྷ་
ནི་ཐ་སྐར་གྱི་བུ་གཉིས་སོ། །སྨིན་དྲུག་ནི་མེ་ལྷའོ། །སྣར་མ་ནི་གཤིན་རྗེ་སྟེ། །དེ་དག་ལ་སོགས་པ་རྒྱུ་སྐར་རང་རང་གི་ལྷ་ཡོད་ལ། །དེ་ལས་དྲས་པའི་མིང་ནི་མེས་བྱིན་བྱ་བ་ལ་སོགས་པ་གདགས་པའོ། །ཡང་ན་ཉེ་དུ་ལས་དྲས་ནས་གདགས་པར་བྱ་སྟེ།
དེ་ཡང་ཉེ་དུའི་བདུན་བརྒྱུད་ཚུན་ཆད་དེ། དེ་ལས་དྲས་པའོ། །ཡི་གེ་མཉམ་པ་ནི་ཡི་གེ་ཚེག་བར་གྱི་གྲངས་མཉམ་པ་སྟེ། དེ་ལྟ་བུའི་ཚུལ་དུ་མིང་གདགས་པར་བྱའོ། །དེ་ནས་རང་བཞིན་དབྱེ་ལས་བཤད། །གཟུགས་ཀྱིས་ཚེ་ནི་ཡོངས་སུ་བརྟག །ཅེས་བྱ་བ་ལ།
དེའི་འོག་ཏུ་ལུས་ཀྱི་རང་བཞིན་གྱི་དབྱེ་བའི་ཆ་ཇི་ལྟ་བུ་དང་ལྡན་ན་བཟང་བ་དང་། ངན་པའི་བྱེ་བྲག་བཤད་པའི་ཚུལ་ལས་སྨོས་པའི་གཟུགས་ཀྱིས་བྱིས་པའི་ཚེའི་ཚད་ཇི་ཙམ་པ་ཡིན་པ་ཡོངས་སུ་བརྟག་པར་བྱའོ། །མཁའ་པས་བྱིས་པའི་མལ་སྟན་ནི། །བྱང་ངམ་ཤར་དུ་མགོ་
བསྟན་ལ། །སྔས་དང་གོས་ནི་གཙང་ཞིང་བཀྲུས། །འཇམ་ཞིང་གཉེར་མ་མེད་པ་ཡི། །གོས་ལ་གདོན་ནི་འཇོམས་བྱེད་པའི། །སྨན་གྱི་དུད་པས་བདུག་པར་བྱ། །ཞེས་བྱ་བ་ལ། །སྨན་པ་བསྟན་བཅོས་ཀྱི་དོན་ཤེས་པའི་མཁས་པས་བྱིས་པ་དེའི་མལ་བསྟན་ལས་སྔས་
བྱང་ཕྱོགས་སུ་བསྟན་ལ། །སྟན་དང་གོས་གཙང་ཞིང་དག་པ་དང་། །དྲི་མ་མེད་པར་བཀྲུས་པ་དང་། འཇམ་ཤིང་མཉེན་པ་དང་། གཉེར་མ་མེད་ཅིང་མ་འཁུམས་པ་དང་། སྔས་དང་བཅས་པ་ལ་གདོན་འཇོམས་པའི་སྨན་ཤུ་དག་དང་། ཡུངས་ཀར་ལ་སོགས་པའི་སྨན་
เล่ม ๒๐๒ · หน้า 93a
བསྲེགས་པས་བདུག་པར་བྱའོ། །བྱ་རོག་བསད་པ་སྣུམ་གསུམ་དང་། །བཅས་བའི་དུད་པར་བདུག་པ་བསྔགས། །ཞེས་བྱ་བ་ལ། ཁྭ་འམ་བྱ་རོག་བཟང་པོ་བདག་ཉིད་ཀྱིས་བསད་པ་འམ་རང་ཉིད་ཤི་བར་གྱུར་པ་དང་། །སྣུམ་གསུམ་
པོ་ཞུན་མར་དང་། རྐང་དང་། ཞག་ཅེས་བྱ་བ་དང་བཅས་པའི་དུད་པས་བདུག་པ་ཡང་བསྔགས་པ་ཡིན་ནོ། །བསེ་རུ་ལ་སོགས་གསོན་པོ་ཡི། །རྭར་བཏགས་ནོར་བུ་བཟང་པོའི་སྤུ། །བྲམྷི་འཚོ་བྱེད་ཨིན་དྲི་སོགས། །སྨན་ནི་བཟང་པོ་གདགས་པར་བྱ། །མཆོག་ཏུ་
རྟག་པར་ཤུ་དག་ནི། །ལག་གཉིས་མགུལ་དང་སྤྱི་བོ་གདགས། །དེས་ནི་ཚ་དང་ཡིད་གཞུངས་དྲན། །བདེ་བ་སྐྱེད་བྱེད་གདོན་ལས་སྲུང་། །ཞེས་བྱ་བ་ལ། ཡང་བྱིས་པ་ལ་སྲོག་ཆགས་བསེ་རུ་ལ་སོགས་གསོན་པོའི་རྭ་ཕུག་པའི་རྩེ་མོ་ལ་ནོར་བུ་བཟང་པོ་མ་རྒད་དང་། པདྨ་རཱ་
ག་ལ་སོགས་པ་བཏགས་ཤིང་གླན་པ་དག་ལག་པ་གཉིས་སམ་མགུལ་པ་འམ་སྤྱི་བོར་གདགས་པར་བྱ་བ་དང་། དེ་བཞིན་དུ་བྲ་མྷི་དང་། འཚོ་བྱེད་དང་ཨིན་དྲི་ལ་སོགས་པའི་སྨན་བསྔགས་ཤིང་བཟང་བ་དག་ལག་པ་ལ་སོགས་པར་གདགས་པར་བྱ་བ་དང་། དེ་བཞིན་དུ་མཆོག་གམ་
ཁྱད་པར་དུ་ཤུ་དག་རྟག་པར་དུས་ཐམས་ཅད་དུ་གདགས་པར་བྱ་སྟེ། དེས་ནི་ཚེ་འཕེལ་བ་ལ་སོགས་པའི་ཡོན་ཏན་སྐྱེད་པར་བྱེད་ཅིང་གདོན་ཐམས་ཅད་ལས་བསྲུང་བ་ཡིན་ནོ། །ཟླ་བ་བདུན་ནམ་བརྒྱད་པ་ན། །ནད་མེད་ཉིན་ཞག་ཤིས་པ་ལ། །མ་མའི་པང་དུ་སྤོ་བསྲིངས་ལ། །དགུན་གྱི་
དུས་སུ་རྣ་བ་དབུག །ཁྱེའུའི་དང་པོར་གཡས་པ་དབུག །བུ་མོའི་གཡོན་པ་དབུག་པར་བྱ། །སྨན་པས་ཁབ་ནི་གཡས་པས་བཟུང་། །གཡོན་པས་རྣ་ཤལ་བཟུང་ནས་ནི། །རྣ་བའི་ཁྱོན་གྱི་དབུས་ལས་ནི། །མཁུར་ཚོས་ཀྱི་ནི་ཕྱོགས་དག་ཏུ། །པགས་པ་དག་
ནི་ཕུག་ནས་སུ། །ཉི་མའི་འོད་ཟེར་སྣང་བར་དུ། །མི་འགྱུར་བརྟན་པོར་བཟུང་ནས་ནི། །རྒྱ་སྐྱེགས་ཀྱི་ནི་ཁུ་བས་བསྐུ། །དབུས་སུ་རང་བཞིན་གྱིས་གྲུབ་བའི། །བུ་ག་དྲང་པོར་ཅིག་ཅར་དབུག །ཅེས་བྱ་བ་ལ། དེ་ནས་ཟླ་བ་བདུན་ནམ་བརྒྱད་འདས་ནས་བྱིས་
เล่ม ๒๐๒ · หน้า 93b
པ་ནད་མེད་པ་ལ་ནི་ཉིན་ཞག་ཤིས་པའི་ཚེ། མ་མའི་པང་པར་བཞག་ལ་སྤྲོ་བསྲིངས་ཏེ། དགུན་གྱི་དུས་ཀྱི་ཚེ་རྣ་བ་དབུགས་པར་བྱ་ལ། དེ་དག་གི་དབུག་པའི་ཚུལ་ནི་གོ་བར་ཟད་དོ། དེ་ནས་རྩ་ནི་གནས་པའི་ཕྱིར། །སྟེང་འོག་ངོས་སུ་གཏང་མི་བྱ། །ནག་པོ་གནད་སྒྲ་དམར་
པོ་སྟེ། །རྩ་དེ་ཕུག་ན་དམར་ཞིང་ན། །སྐྲང་ཞིང་སྲ་ལ་ཚ་བ་དང་། །གཉེའུ་རེངས་གཞན་དབང་ཅན་སྐྱེད་བྱེད། །ཅེས་བྱ་བ་ལ། འདི་ནི་དབུག་པར་མི་བྱ་བའི་དམིགས་ནི་འདི་ཡིན་ཏེ། ཡང་གོ་བར་ཟད་དོ། །དེ་རྣམས་ནད་གཞི་ཇི་བཞིན་དུ། །གསོ་བདག་ནི་མྱུར་དུ་བྱ། །
ཞེས་བྱ་བ་ལ། ཕུག་པ་ལ་སྐྱོན་དུ་གྱུར་པའི་ནད་དེ་ལ་ཡང་ནད་གཞི་ཇི་ལྟ་བ་བཞིན་དུ་གསོ་བར་བྱའོ། །གནད་དུ་ཕུག་ན་ཁྲག་མེད་ཅིང་། །ན་དང་དམར་སོགས་འབྱུང་མི་འགྱུར། །ཁབ་རྗེས་སྐུད་པ་སྣུམ་ཅན་ནི། །རྗེས་སུ་གཞུག་པ་ཉིད་དུ་བྱ། །ཏིལ་མར་
རློན་པས་བསྐུ་བ་དང་། །རྒྱ་ཆེར་དེ་ནི་བསྐྱེད་པར་བྱ། །རྣ་ཤལ་ཕུག་ནས་ཕན་ཟས་སྦྱིན། །དེ་འོག་སྡོང་བུ་སྤོམ་པོ་གཞུག །ཞག་གསུམ་བཞག་ལ་རྨ་འཚོབ་ནས། །རིམ་གྱིས་དེ་ནི་བསྐྱེད་པར་བྱ། །ཞེས་བྱ་བ་ལ། འདི་དག་ནི་ལེགས་པར་དབུག་པ་དང་། བུ་ག་
བསྐྱེད་པའི་ཐབས་ཡིན་ནོ། །དེ་ནས་དེ་ཡི་སོ་སྐྱེས་ནས། །ནུ་ཞོ་འཐུངས་ལས་རིམ་གྱིས་བཟློག །སྔར་བཤད་འོ་མ་སྦྱིན་བྱ་ཞིང་། །ཁ་ཟས་ཡང་དང་རྟས་བྱེད་སྦྱིན། །ཞེས་བྱ་བ་ལ། བྱིས་པ་སོ་སྐྱེས་པར་གྱུར་ནས། ནུ་ཞོ་འཐུངས་པ་ལས་རིམ་གྱིས་བཟློག་པར་བྱ་ཞིང་
ཅིག་ཅར་བཟློག་པར་མི་བྱ་ལ། ཡང་དེ་ལ་སྔར་བཤད་བའི་བ་འམ་རའི་འོ་མ་སྦྱིན་པར་བྱ་པ་དང་། ཁ་ཟས་ཡང་བ་དང་རྟས་པར་བྱེད་པ་སྦྱིན་པར་བྱའོ། །ནུ་ཞོ་སྤངས་ནས་པི་ཡ་ལའི། །རྐང་དང་ཤིང་མངར་འབྲས་ཡོས་དང་། །ཁ་ར་དཀར་པོའི་ལ་དུ་སྦྱིན། །བིལ་བ་གཞོན་ནུ་སུག་སྨེལ་
དང་། །ཁ་ར་འབྲས་ཡོས་དྲོད་སྐྱེད་སྦྱིན། །ཞེས་བྱ་བ་ལ། བུད་མེད་ཀྱི་ནུ་ཞོ་སྤངས་ཤིང་དོར་བར་གྱུར་པའི་བྱིས་པ་ལ་པི་ཡ་ལའི་རྐང་པ་སོགས་པ་དང་ལ་དུའི་ཚུལ་དུ་སྦྲུས་པ་སྦྱིན་པར་བྱ་བ་དང་། བིལ་བ་གཞོན་ནུ་ལ་སོགས་པ་བྱིན་ན་མེ་དྲོད་སྐྱེད་པར་བྱེད་དོ། །འཁྲུ་གཅོད་ད་ཏ་ཀའི་མེ་ཏོག །ཁར་འབྲས་ཡོས་
เล่ม ๒๐๒ · หน้า 94a
སྐྱོ་མ་སྦྱིན། །ཞེས་བྱ་བ་ལ། ཡང་བྱིས་པ་དེ་ལ་འཁྲུ་བར་བྱེད་པའི་སྨན་ད་ཏ་ཀའི་མེ་ཏོག་ལ་སོགས་པའི་སྐྱོ་མ་སྦྱིན་པར་བྱའོ། །གནོད་པ་སྐྱེད་པར་མི་བྱེད་པའི། །སྨན་གྱིས་དེ་ཡི་ནད་བསལ་བྱ། །ཞེས་བྱ་བ་ལ། །ཡང་བྱེས་པ་དེའི་རིམས་ནད་ལ་སོགས་པའི་ནད་སྐྱེས་པར་གྱུར་
ན་གནོད་པ་སྐྱེ་བར་མི་འགྱུར་བའི་སྨན་འཇམ་པོ་མར་དང་། འོ་མ་དང་། ཁ་ར་དང་། རྒུན་འབྲུམ་ལ་སོགས་པ་དེ་བསལ་ཞིང་བཟློག་པར་བྱའོ། །ཤིན་ཏུ་དྲག་ནད་མ་གཏོགས་གཞན། །རྣོ་སྨན་བཀྲུ་སྨན་ཀུན་ཏུ་སྤང་། །ཞེས་བྱ་བ་ལ། ཤིན་ཏུ་དྲག་ཅིང་གནོད་པར་བྱེད་པ་མ་གཏོགས་པ་ནད་གཞན་དག་ལ་ནི་གོང་
དུ་སྨོས་བའི་སྨན་འཇམ་པོས་གསོ་བར་བྱ་ལ། ཤིན་ཏུ་དྲག་ཅིང་གསོ་དཀའ་བའི་ནད་ལ་ནི་སྨན་དྲག་ཅིང་རྣོ་བ་ཡང་གཏང་བར་བྱའོ། །བཀྲུ་སྨན་ནི་རྣམ་པ་ཐམས་ཅད་དུ་སྤང་བར་བྱའོ། །ཚུལ་མིན་སྐྲག་པར་མི་བྱ་སྟེ། །སྐྲག་ན་གདོན་ནི་འཇུག་པར་འགྱུར། །ཞེས་བྱ་བ་ལ། བྱིས་པ་དེ་ཚུལ་དང་མི་ལྡན་ཞིང་དབང་བར་མེད་པར་
གྱུར་ཀྱང་སྐྲག་པར་མི་བྱ་སྟེ། ཅིའི་ཕྱིར་ཞེ་ན། བྱིས་པ་འཇིགས་ཤིང་སྐྲག་པར་གྱུར་ན་སྐོམ་བྱེད་ལ་སོགས་པའི་གདོན་འཇུག་ཅིང་འཛིན་པར་འགྱུར་རོ། །གོས་ཀྱི་རླུང་དང་གཞན་རེག་དང་། །འགོམས་པ་ལ་ནི་དེ་བསྲུང་བྱ། །ཞེས་བྱ་བ་ལ། ཡང་བྱིས་པ་དེ་གོས་ཀྱིས་གཡབ་བའི་རླུང་གིས་མ་ཕོག་པར་བསྲུང་
བ་དང་། དེ་བཞིན་དུ་གཞན་གྱིས་རེག་པ་དང་། འགོམས་ན་གནོད་པར་འགྱུར་བས་དེ་ལས་བསྲུང་བར་བྱའོ། བྲམྷི་ཡུངས་ཀར་ཤུ་དག་དང་། །རྒྱམ་ཚ་རུ་རྟ་ཤ་རི་བ། །པི་པི་ལིང་བཅས་བསྐོལ་བ་ཡི། །སྨན་མར་དྲན་དང་ཡིད་གཞུངས་སྐྱེད། །ཚེ་འཕེལ་གདོན་ནི་མི་བཟད་འཇོམས། །འབྱུང་པོ་སྨྱོ་བྱེད་ཟློག་པར་བྱེད། །
ཅེས་བྱ་བ་ལ། བྲམྷི་ལ་སོགས་པའི་སྨན་ལྡེ་གུར་བྱས་པ་དང་། མར་དང་འོ་མར་བཅས་པར་བསྐོལ་བའི་སྨན་མར་བྱིན་ན་དྲན་པ་དང་ཡིད་གཞུངས་པ་སྐྱེད་པར་བྱེད་ཅིང་འཕེལ་བར་བྱེད་པ་དང་། གདོན་མི་བཟད་པ་རྣམས་འཇོམས་པར་བྱེད་ཅིང་འབྱུང་པོ་ལ་སོགས་པ་ཡང་ཟློག་པར་བྱེད་པ་ཡིན་ནོ། །སོ་མ་ར་ཛ་ཤུ་དག་དང་། །སྤལ་པ་ཉེའུ་
ཤིང་སླེ་ཏྲེས་དང་། །ཤང་ཀ་པུཥྤ་བྲམྷི་དང་། །བྲ་མ་སོ་མ་སྲང་རེ་ནི། །ལྡེ་གུ་བརྒྱད་ཆ་མར་བྲེ་གང་། །འོ་མ་བཞི་འགྱུར་ནང་དུ་ནི། །བསྐོལ་བ་དེ་བླུད་དཔལ་ཡོན་དང་། །ཚེ་བློ་ཡིད་གཞུངས་དྲན་པ་སྐྱེད། །ཅེས་བྱ་བ་ལ། སོ་མ་ར་ཛ་ལ་སོགས་པའི་སྣུམ་སྲང་རེ་ལྡེ་གུར་བྱས་པ་བརྒྱད་ཆ་མར་བྱེ་གང་དང་། འོ་མ་བཞི་
เล่ม ๒๐๒ · หน้า 94b
འགྱུར་དང་བཅས་པ་བསྐོལ་བ་དེ་བླུད་ན་དཔལ་ཡོན་ཏེ་ནོར་འཕེལ་ཞིང་བཀྲ་མི་ཤིས་པ་འཇིག་པར་བྱེད་པ་དང་། ཚེ་དང་བློ་གྲོས་དང་། ཡིད་གཞུངས་པ་དང་། དྲན་པ་མྱུར་པའི་ཡོན་ཏན་སྐྱེད་པར་བྱེད་དོ། །ར་ཡི་འོ་མ་ཨ་རུ་ར། །ཚ་བ་གསུམ་དང་པ་ཏ་དང་། །ཤི་ཀྲུ་ཤུ་དག་ལྕེ་མྱང་ཚ། །བསྐོལ་བའི་སྨན་མར་དབྱངས་ཅན་
དེ། །ཚིག་དང་བློ་གྲོས་དྲན་པ་དང་། །ངག་གསལ་མེ་དྲོད་སྐྱེད་པར་བྱེད། །ཅེས་བྱ་བ་ལ། མར་གྱི་བཞི་འགྱུར་གྱི་འོ་མ་དང་། ཨ་རུ་ར་ལ་སོགས་པའི་ལྡེ་གུ་བསྐོལ་བའི་སྨན་མར་ནི་མིང་དབྱངས་ཅན་གྱི་སྨན་མར་ཞེས་བྱ་སྟེ། དེས་ནི་ཚིག་དང་བློ་གྲོས་ལ་སོགས་པ་སྐྱེད་པར་བྱེད་དོ། །ཤུ་དག་སླེ་ཏྲེས་ཨ་རུ་ར། །ཉེའུ་ཤིང་དང་
ཤང་ཁི་ནི། །ཨ་བ་མརྒ་བསྐོལ་བ་ཡི། །སྨན་མར་ཡོན་ཏན་སྔ་མར་མཚུངས། །ཞེས་བྱ་བ་ལ། ཤུ་དག་ལ་སོགས་པའི་སྨན་ལྡེ་གུར་བྱས་པ་དང་། མར་གྱི་བཞི་འགྱུར་གྱི་ཆུ་དང་བསྐོལ་བར་བྱ་སྟེ། འདིར་གཤེར་བའི་རྫས་མ་སྨོས་པ་ཐམས་ཅད་ལ་ཆུ་གཞུག་པར་བྱ་བ་ཡིན་པས་ན་ཚུལ་དེ་ལྟར་བསྐོལ་བར་བྱ་སྟེ། སྨན་མར་
དེ་བླུད་ན་ཡོན་ཏན་ཚིག་དང་བློ་གྲོས་ལ་སོགས་པ་སྐྱེད་པར་བྱེད་པ་ཡིན་ནོ། །ཤུ་དག་དཀར་པོ་རུ་རྟ་གསེར། །ཨརྒའི་པུཥྤ་གསེར་དང་བཅས། །ལྕགས་རྐྱག་དང་ནི་དུང་དང་གསེར། །ཀརཉྫ་དང་ཤུ་དག་གསེར། །རྐང་པ་རེ་རེས་བཤད་པ་བཞི། །སྦྲང་རྩི་མར་དང་བཅས་
ལྡེ་གུ །ལོ་གཅིག་བྱིན་ན་ལུས་དང་བློ། །ཁ་དོག་ཉམས་སྟོབས་སྐྱེད་པར་བྱེད། །ཅེས་བྱ་བ་ལ། ཤུ་དག་དཀར་པོ་ནི་ཁ་བ་ཅན་གྱི་རི་ལ་སྐྱེས་པའོ། །གཞན་དག་ནི་གོ་བར་ཟད་དོ། །རྐང་པ་བཞི་བཤད་པའི་སྨན་གྱི་སྡེ་ཚན་བཞི་པོ་སྦྲང་རྩི་དང་མར་དང་སྦྱར་བའི་
ལྡེ་གུ་ལོ་གཅིག་གི་བར་དུ་བྱིན་ན་ལུས་ཀྱི་ཉམས་དང་། བློ་དང་ཁ་དོག་ལ་སོགས་པ་སྐྱེད་པ་ཡིན་ནོ། །ཤུ་དག་ཤིང་མངར་ལྕེ་མྱང་ཚ། །དོང་གྲ་ཤུ་ཏི་ཨ་རུ་ར། །རུ་རྟ་ཟི་ར་པི་པི་ལིང་། །མར་བཅས་ལྡེ་གུས་ངག་དག་བྱེད། །ཅེས་བྱ་བ་ལ། ཤུ་དག་ལ་
སོགས་པའི་ལྡེ་གུས་ངག་དག་པར་བྱེད་ཅིང་ཚིག་གསལ་བར་བྱེད་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། གནས་ཕྱི་མའི་ལེའུ་དང་པོའི་འགྲེལ་པའོ།། །།
เล่ม ๒๐๒ · หน้า 95a
དེ་ནས་བྱིས་པའི་ནད་གསོ་པའི་ལེའུ་བཤད་པར་བྱའོ། །ཞེས་བྱ་བ་ལ། བྱིས་པའི་ནད་གསོ་བ་ནི། ནད་བཅོས་པའི་ཐབས་ཏེ། དེ་སྟོན་པའི་ལེའུ་བཤད་པར་བྱའོ་ཞེས་སྟོན་པའོ། །འོ་མ་ཟས་དང་གཉི་གས་འཚོ། །བྱིས་པ་རྣམ་པ་གསུམ་དུ་བཤད། །
དེ་དག་གནོད་མེད་ལས་བདེར་འགྱུར། །གནོད་པ་ལས་ནི་ནད་རྣམས་འབྱུང་། །ཞེས་བྱ་བ་ལ། བྱིས་པ་ནི་འོ་མ་འཐུང་བ་དང་། ཁ་ཟས་ཟ་བ་དང་། ཟས་དང་འོ་མ་གཉིས་ཀས་འཚོ་ཞིང་གནས་པ་སྟེ། རྣམ་པ་གསུམ་དུ་བཤད་དོ། །དེས་ན་ནུ་ཞོའི་འོ་མ་དང་། ཁ་ཟས་
དེ་གཉིས་ལ་གནོད་པ་མེད་པ་ལས་ནི་བྱིས་པ་ནད་མེད་ཅིང་བདེ་བར་འགྱུར་ལ་དེ་གཉིས་གནོད་ཅིང་མི་འཕྲོད་པ་ལས་ནི་བྱིས་པའི་ནད་རྣམས་འབྱུང་བར་འགྱུར་རོ། །གང་ཞིག་ཆུ་དང་གཅིག་ཏུ་འདྲེས། །ཉེས་པ་ཡོད་པ་མ་ཡིན་ཏེ། །འོ་མ་དེ་ནི་སྐྱོན་མེད་ཡིན། །ཞེས་བྱ་བ་ལ། བུད་
མེད་ཀྱི་ནུ་ཞོ་གང་ཞིག་ཆུའི་ནང་དུ་བཅུག་པ་ན་གཅིག་ཏུ་འདྲེས་པར་གྱུར་པ་ནི་རླུང་ལ་སོགས་པའི་ནད་ཀྱི་ཉེས་པའི་སྐྱོན་མེད་པ་ཡིན་པར་ཤེས་པར་བྱའོ། །རླུང་གིས་གནོད་གྱུར་ཆུ་སྟེང་འཕྱོ། །བསྐ་ཞིང་རྩུབ་ལ་དབུ་བ་ཅན། །དེ་ཡིས་བཤང་གཅི་སྲི་བར་བྱེད།
ཅེས་བྱ་བ་ལ། འོ་མ་གང་རླུང་གིས་གནོད་ཅིང་མ་རུངས་པར་གྱུར་པ་ནི་ཆུའི་ནང་དུ་བཅུག་ན་སྟེང་དུ་འཕྱོ་བར་འགྱུར་གྱི་འོག་ཏུ་ནུབ་པར་མི་འགྱུར་བ་དང་། རོ་བསྐ་བ་དང་རང་བཞིན་རྩུབ་པ་དང་། དབུ་བ་ཅན་དུ་གནས་པ་ཡིན་ཞིང་དེ་འཐུངས་ན་བཤང་བ་དང་གཅིན་སྲི་ཞིང་འགག་པར་
བྱེད་པ་ཡིན་ནོ། །མཁྲིས་པས་གནོད་གྱུར་དྲོ་སྐྱུར་ཚ། །རི་མོ་སེར་སྣང་དེས་ཚ་སྐྱེད། །ཅེས་བྱ་བ་ལ། མཁྲིས་པས་གནོད་པར་གྱུར་བའི་ནུ་ཞོ་ནི་དྲོ་བར་འགྱུར་བ་དང་། རོ་སྐྱུར་ཞིང་ཚ་བ་དང་། མེའི་ནང་དུ་བཅུག་ན་རི་མོ་སེར་པོ་ལྟ་བུར་སྣང་བ་ཡིན་ཏེ། དེ་བླུད་ན་བྱིས་པ་
ཚ་བ་སྐྱེད་པར་བྱེད་པ་ཡིན་ནོ། །བད་ཀན་གྱིས་སྐ་ལན་ཚྭར་བཅས། །སྦྱིན་བག་ཅན་ལ་ཆུ་ནང་འབྱིང་། །ཞེས་བྱ་བ་ལ། བད་ཀན་གྱིས་གནོད་པར་གྱུར་པའི་འོ་མ་ནི་སྐ་བ་དང་རོ་ལན་ཚྭར་བྲོ་བ་དང་། སྤྱིན་བག་ནལ་ནལ་པོར་འདུག་པ་དང་། ཆུར་བཅུག་ན་འོག་ཏུ་འབྱིང་བ་ཡིན་ནོ། །
เล่ม ๒๐๒ · หน้า 95b
ལྡན་བའི་མཚན་མ་འདྲེན་མ་སྟེ། །འདུས་པའི་མཚན་ཉིད་གསུམ་དང་ལྡན། །ཞེས་བྱ་བ་ལ། བུད་མེད་ཀྱི་ནུ་ཞོ་ནད་གཞི་གཉིས་དང་འདྲེས་པའི་ལྡན་པས་གནོད་པར་འགྱུར་བ་ནི་མཚན་མ་འདྲེས་པར་སྣང་བ་ཡིན་ལ། ཉེས་པ་གསུམ་ཆར་འདུས་པར་གྱུར་བའི་ནུ་ཞོ་ནི་ནད་གཞི་གསུམ་
ཆར་གྱི་མཚན་ཉིད་དང་ལྡན་པ་ཡིན་ནོ། །རང་གི་མཚན་མ་ཅི་འདྲ་ལས། །དེ་འཐུངས་བས་ནི་ནད་སྐྱེད་འགྱུར། །ཞེས་བྱ་བ་ལ། འོ་མ་དེ་ནད་གཞི་རེ་རེ་དང་ལྡན་པ་དང་། འདུས་པའི་སྐྱོན་དང་ལྡན་པའི་མཚན་ཉིད་ཅི་འདྲ་བ་འཐུངས་པ་ལས་རང་གི་མཚན་ཉིད་དང་མཐུན་པའི་ནད་སོ་སོ་
དང་ལྡན་པ་དང་། འདུས་པ་དེ་སོགས་ཤིང་འཕེལ་བར་འགྱུར་རོ། །བྱིས་པ་རྟག་ཏུ་མི་བཟད་པར། །དུ་བ་ལ་ནི་ནད་ཤེས་བྱ། །ཞེས་བྱ་བ་ལ། བྱིས་པ་ན་བའི་མཚན་མ་ནི། བྱིས་པ་ཡང་དང་ཡང་དུ་རྟག་བར་ཤས་ཆེར་ངུ་བ་ལས་ནད་ཀྱིས་གཟིར་བ་ཡིན་པར་ཤེས་པར་བྱའོ། །
དེ་ནི་ཕྱོགས་གང་ཤས་ཆེར་འཛིན། །གང་དུ་རེག་པར་མི་བཟོད་པ། །དེ་ན་ནད་ཡོད་ཤེས་པར་བྱ། །ཞེས་བྱ་བ་ལ། ཡང་བྱིས་པ་དེ་ལུས་ཀྱི་ཕྱོགས་གང་དུ་ཤས་ཆེར་འཛིན་ཅིང་རེག་པར་བྱེད་པ་དང་། ལུས་ཀྱི་ཕྱོགས་གང་དུ་རེག་ཅིང་མནན་ན་ལུས་ཀྱི་ཕྱོགས་དེ་ན་ནད་ཡོད་པ་ཁོ་
ནར་ཤེས་པར་བྱའོ། །མགོ་ནད་མིག་འབྱེད་ལས་ཤེས་བྱ། །ཞེས་བྱ་བ་ལ། དེ་ལས་ཀྱང་ཁྱད་པར་དུ་མགོ་བོ་ན་བ་ནི་མིག་གཉིས་རྟག་ཏུ་འབྱེད་ཅིང་འཛུམས་མི་ཤེས་པས་མགོའི་ནང་ཡོད་པར་ཤེས་པར་བྱའོ། །སྙིང་ནད་ལྕེ་མཆུ་སོས་གནོན་དང་། །དབུགས་དང་ཁུ་ཚུར་བསྡམས་ཤེས་
བྱ། །ཞེས་བྱ་བ་ལ། ལྕེ་དང་མཆུ་སོས་གནོན་པ་ལ་སོགས་པ་ལས་ནི་བྱིས་པ་དེ་སྙིང་ནད་ཡོད་པར་ཤེས་པར་བྱའོ། །ཁོང་ནད་བཤང་གཅི་སྲི་དང་སློན། །ནུ་མ་སོས་འདེབས་རྒྱུ་མ་འཁྲུགས། །ལྟོ་སྦོ་རྒྱབ་ནི་འགུགས་དགྱེ་དང་། །ལྟོ་འགུགས་པས་ཀྱང་ཤེས་པར་བྱ། །ཞེས་བྱ་བ་ལ། བཤང་
གཅི་སྲི་བ་ལ་སོགས་བ་ལ་ནི་ཁོང་བ་སྟེ། །ལྟོ་བའི་ནང་ན་ནད་ཡོད་པར་བྱའོ། །ཆུ་སོ་མཚན་ནད་བཤང་གཅི་སྲི། །སྐྲག་ཅིང་ཕྱོགས་ལྟ་ལས་ཤེས་བྱ། །ཞེས་བྱ་བ་ལ། ཆུ་སོ་སྟེ་ལྒང་པ་དང་། གསང་བའི་མཚན་མ་ལ་ནད་ཡོད་པའི་རྟགས་ནི་བཤང་གཅི་སྲིབ་
เล่ม ๒๐๒ · หน้า 96a
ལ་སོགས་པ་ལས་ཤེས་པར་བྱའོ། །དེ་ནས་མ་མ་ནད་གཞི་དང་། །སྐྱོན་ནི་ཇི་བཞིན་གསོ་བར་བྱ། །ཞེས་བྱ་བ་ལ། དེ་ནས་དེའི་འོག་ཏུ་བྱིས་པ་ལ་ནུ་ཞོ་བླུད་བའི་མ་མ་ནད་གཞི་ཇི་ལྟ་བུ་ཡོད་པ་དང་། ནད་ཀྱི་སྐྱོན་ཇི་ལྟ་བུ་ཡོད་པའི་ཚུལ་ལས་གསོ་
ཞིང་བཅོས་པར་བྱའོ། །དེ་ལ་ནུ་ཞོ་རླུང་ཅན་ལ། །རྩ་བ་བཅུ་བསྐོལ་ཞག་གསུམ་བླུད། །ཅེས་བྱ་བ་ལ། རླུང་གིས་གནོད་པར་གྱུར་པའི་ནུ་ཞོ་ལ་ནི་རྩ་བ་བཅུ་པོ་བསྐོལ་བའི་ཁུ་བ་མ་མ་ལ་ཞག་གསུམ་གྱི་བར་དུ་བླུད་པར་བྱའོ། །ཡང་ན་རུ་རྟ་ཙི་ཏྲ་ཀ །པ་ཐ་ཤུ་དག་ཕུ་ཙེ་
ཤེལ། །ག་བྲའི་རྩ་བ་ལ་ལ་ཕུད། །ཐང་ཤིང་དང་ནི་ས་ར་ལ། །བྲི་ཤྩི་ཀ་ནི་པི་པི་ལིང་། །ན་ལེ་ཤམ་ནི་བསྐོལ་བ་བླུད། །ཅེས་བྱ་བ་ལ། །ཡང་ན་རླུང་གིས་གནོད་པར་གྱུར་པའི་ནུ་ཞོ་ལ་རུ་རྟ་དང་ཙི་ཏྲ་ཀ་བསྐོལ་བའི་ཁུ་བ་མ་མ་ལ་ཞག་གསུམ་གྱི་བར་དུ་བླུད་པར་བྱའོ། །
དེ་ནས་རླུང་ནད་འཇོམས་པ་ཡི། །སྨན་མར་གང་ཡང་རུང་བ་བླུད། །དེ་རྗེས་ཆང་གི་དངས་མ་བླུད། །སྣུམ་གྱུར་བཀྲུ་སྨན་འཇམ་པོ་གཏང་། །ཞེས་བྱ་བ་ལ། དེའི་འོག་ཏུ་སྨན་གྱི་ཁུ་བ་སྔར་སྨོས་པ་བླུད་པའི་རྗེས་ལ་སྨན་དེ་ཞུ་བར་གྱུར་པའི་སྐབས་སུ། །རླུང་གི་ནད་ལ་ཕན་
པར་བཤད་པའི་སྨན་མར་གང་ཡང་རུང་བ་ཅི་རིགས་པ་བླུད་པར་བྱ་ལ། །མར་དེ་འཐུངས་པའི་རྗེས་ལ་ཆང་གི་དངས་མ་བླུད་པར་བྱའོ། །དེ་ལྟར་ཚུལ་འདིས་མ་འམ་མ་མ་དེ་སྣུམ་གྱིས་ཞེན་པར་གྱུར་པ་དང་། བཀྲུ་སྨན་འཇམ་པོ་ཉུང་ཤས་བཏང་ལ་འཁྲུར་གཞུག་པར་བྱའོ། །དེ་འོག་
འཇམ་རྩིའི་ལས་བྱ་ཞིང་། །དུགས་སོགས་རླུང་ནད་འཇོམས་པ་བྱ། །ཞེས་བྱ་བ་ལ། དེའི་འོག་ཏུ་བཀྲུ་སྨན་བཏང་བའི་རྗེས་ལ་འཇམ་རྩི་མས་གཏོང་བར་བྱ་ཞིང་དུགས་དང་། བསྐུ་བ་དང་། བྱུག་པ་དང་། མཉེ་བ་ལ་སོགས་པ་རླུང་འཇོམས་པའི་གསོ་བ་བྱའོ། །བིལ་བར་
སྣ་ཏི་མུས། །ཐང་ཤིང་ས་ར་ལ་བཅས་ཕྱེ། །མར་དང་སྦྱར་བའི་ལྡེ་གུའམ། །དེ་བསྐོལ་ཁ་ར་དཀར་བཏབ་སྤྱིན། །ཞེས་བྱ་བ་ལ། བྱིས་པ་ལ་ནི་ར་སྣ་དང་ཏི་མུ་ས་ཞེས་བྱ་བ་ཨ་ཛ་མོ་ད་ལས་བཏགས་པའི་ཕྱེ་མ་མར་དང་སྦྱར་བའི་ལྡེ་གུ་འམ། ཡང་ན་ར་སྣ་ལ་སོགས་པ་དང་བསྐོལ་
เล่ม ๒๐๒ · หน้า 96b
བའི་མར་དང་ཁ་ར་དཀར་པོ་བསྲེས་པ་སྦྱིན་པར་བྱའོ། །མཁྲིས་པས་གནོད་ལ་སླེ་ཏྲེས་དང་། །ཉེའུ་ཤིང་ནིམ་པ་པ་ཏོ་ལ། །ཙནྡན་ཤ་རི་བ་བསྐོལ་བ། །མ་མ་དང་ནི་བྱིས་པར་བླུད། །ཅེས་བྱ་བ་ལ། མཁྲིས་པས་གནོད་པར་གྱུར་པའི་ནུ་ཞོ་ལ་ནི་སླེ་ཏྲེས་ལ་སོགས་པ་བསྐོལ་
བའི་ཁུ་བ་མ་མ་དང་བྱིས་པ་ལ་བླུད་པར་བྱའོ། །ཡང་ན་གླ་སྒང་འབྲས་བུ་གསུམ། །རྩ་མཁྲིས་པུ་ཙེ་ཤེལ་བླུད་བྱ། །ཞེས་བྱ་བ་ལ། ཡང་ན་མཁྲིས་པས་གནོད་པར་གྱུར་པའི་ནུ་ཞོ་ལ་གླ་སྒང་ལ་སོགས་པའི་སྣུམ་བསྐོལ་བ་བྱིས་པ་དང་། །མ་མ་ལ་བླུད་པར་བྱའོ། །ཐལ་ཏྲེས་ལ་
སོགས་ཤུག་པ་སོགས། །པ་ཏོ་ལ་སོགས་སྡེ་བསྐོལ་བླུད། །ཅེས་བྱ་བ་ལ། དེ་བཞིན་དུ་ཤ་རི་བ་ཞེས་བྱ་བ་ཐལ་ཏྲེས་ལ་སོགས་པའི་སྡེ་ཚན་བཀྲུ་སྨན་ལ་སོགས་པའི་སྐབས་ནས་བཤད་པ་འམ། ཤུག་པ་ལ་སོགས་པའི་སྡེ་ཚན་ནམ། པ་ཏོ་ལ་ལ་སོགས་པའི་སྡེ་ཚན་བསྐོལ་
བའི་ཁུ་བ་མ་མ་དང་། བྱིས་པ་ལ་ཅི་རིགས་པར་བླུད་པར་བྱའོ། །སྨན་ནི་འདི་བསྐོལ་མར་དང་ནི། །མཁྲིས་པ་སེལ་བའི་བཀྲུ་སྨན་དང་། །བསིལ་སྨན་གྱིས་བསྐུ་བྱུག་སོགས་སྦྱར། །ཞེས་བྱ་བ་ལ། ཡང་ན་མཁྲིས་པས་གནོད་པར་གྱུར་པའི་ནུ་ཞོ་ལ་ཕན་པའི་སྨན་འདི་རྣམས་
དང་། མར་བསྐོལ་ལ་བྱིས་པ་དང་མ་མ་ལ་བླུད་པར་བྱ་བ་དང་། མཁྲིས་པ་སེལ་བའི་བཀྲུ་སྨན་མ་མ་ཁོ་ན་ལ་གཏང་བར་བྱ་བ་འམ། དེ་བཞིན་དུ་བསིལ་སྨན་གྱིས་བསྐུ་བ་དང་བྱུག་པ་ལ་སོགས་པའི་སྦྱོར་བ་བྱའོ། །བད་ཀན་ཅན་གྱི་བདག་ཉིད་ལ། །ཤིང་མངར་རྒྱམ་ཚར་བཅས་
པ་འམ། །རྒྱམ་ཚར་ཤིང་མངར་པི་པི་ལིང་། །མར་སྦྱར་བྱིས་པ་ལ་བླུད་བྱ། །ཞེས་བྱ་བ་ལ། བད་ཀན་གྱིས་གནོད་པར་གྱུར་པའི་བདག་ཉིད་ཅན་ནི་ནུ་ཞོ་ལ་ཤིང་མངར་དང་། རྒྱམ་ཚ་དང་བཅས་པའི་མར་བྱིས་པ་ལ་བླུད་པར་བྱ་བ་འམ། ཡང་ན་རྒྱམ་ཚ་ཤིང་མངར་དང་། །
པི་པི་ལིང་དང་། མར་སྦྱར་བ་བྱིས་པ་ལ་བླུད་པར་བྱའོ། །དེ་ནས་པོ་སོན་ཆའི་མེ་ཏོག །བཏགས་པ་སྦྲང་རྩིར་བཅས་པ་ཡི། །ལྡེ་གུས་ནུ་མ་བྱིས་པའི་མཆུ། །བསྐུས་ལ་བྱིས་པ་བདེར་སློན་གཞུག །མ་མ་རྣོན་པོས་སློན་དུ་གཞུག །ཅེས་བྱ་བ་ལ། དེ་ནས་དེའི་འོག་
เล่ม ๒๐๒ · หน้า 97a
ཏུ་པོ་སོན་ཆའི་མེ་ཏོག་ཞིབ་ཏུ་བཏགས་ནས། སྦྲང་རྩི་དང་མར་སྦྱར་ཞིང་བཏགས་པའི་ལྡེ་གུས་མ་མའི་ནུ་མ་དང་། བྱིས་པའི་མཆུར་བསྐུས་ལ། ཚུལ་དེ་ལྟ་བུས་བྱིས་པ་བདེ་ཞིང་ཉམ་ང་བ་མེད་པར་སློན་དུ་བཅུག་ན། ནུ་མ་ལྷུད་པའི་མ་མ་ནི་སྨན་རྣོན་པོས་
སྐྱུག་ཏུ་གཞུག་པར་བྱའོ། །དེ་ནས་ཐུག་སོགས་རིམ་པར་སྤྱད། །གླ་སྒང་ལ་སོགས་བསྐོལ་བ་བླུད། །ཅེས་བྱ་བ་ལ། དེ་ནས་དེའི་འོག་ཏུ་མ་མ་ཐུག་པ་བླུད་པ་ལ་སོགས་པའི་རིམ་པ་སྤྱད་ཅིང་གླ་སྒང་ལ་སོགས་པའི་སྡེ་ཚན་གྱི་ནང་ནས་བཤད་པ་བླུད་པར་བྱའོ། །དེ་བཞིན་གོ་
སྙོད་རྒྱ་སྤོས་དང་། །ཐང་ཤིང་དུག་མོ་ཡུངས་བསྐོལ་བླུད། །ཅེས་བྱ་བ་ལ། དེ་བཞིན་དུ་གོ་སྙོད་ལ་སོགས་པ་དང་། བསྐོལ་བའི་ཐུག་པ་ལ་སོགས་པ་མ་མ་ལ་བླུད་པར་བྱའོ། །ཡང་ན་གླ་སྒང་བོང་ང་དཀར། །ཤུ་དག་ཚ་བ་ལྔ་བསྐོལ་བླུད། །ཅེས་བྱ་བ་ལ།
ཡང་ན་གླ་སྒང་ལ་སོགས་པའི་ཁུ་བ་མ་མ་དང་བྱིས་པ་ལ་བླུད་པར་བྱའོ། །ནུ་ཞོ་ཉེས་གསུམ་དྲི་མ་ཅན། །དྲི་མནམ་འཁྲུ་ཞིང་ཆུ་དང་འདྲ། །མཁྲེགས་ཤིང་སླ་ལ་རྒྱུན་བར་ཆད། །ཝུ་བ་ཅན་དུ་འཁྲུ་བར་གྱུར། །བཤང་བ་ཁ་དོག་སྣ་ཚོགས་འབྱུང་། །ན་ཞིང་གཅིན་སེར་དཀར་
ཞིང་སྐ། །རིམས་ནད་སྐོམ་དང་ཡི་ག་འཆུས། །སྒྲེགས་པ་སྐམ་པོ་འབྱུང་ཞིང་སླར། །ལུས་ན་ཡན་ལག་རྐྱོང་བ་དང་། །མཁུན་ཞིང་འདར་ལ་མགོ་འཁོར་དང་། །སྣ་མིག་ཁར་ནི་ཤུ་བ་སོགས། །ནད་ནི་གཞན་དག་དེ་ལས་འབྱུང་། །འོ་མའི་བེའུ་སྣབས་ཞེས་བཤད་དེ། །གནོད་
པའི་ནད་ནི་མི་བཟད་ཡིན། །ཞེས་བྱ་བ་ལ། བུད་མེད་ཀྱི་ནུ་ཞོ་ཉེས་པ་གསུམ་ཆར་གྱིས་གནོད་པར་གྱུར་ཅིང་དྲི་མ་ཅན་དུ་གྱུར་ནས། བྱིས་པ་ཤིན་ཏུ་དྲི་མ་མནམ་པར་འཁྲུ་ན། འཁྲུ་བ་དེ་ཡང་ཆུ་འདྲ་བ་ལ་སོགས་པའི་མཚན་ཉིད་ཅན་དུ་འབྱུང་བར་འགྱུར་བ་དང་། བཤང་བ་ཁ་
དོག་སྣ་ཚོགས་ཤིང་ན་བར་གྱུར་པ་དང་། གཅིན་ཡང་ཁ་དོག་དཀར་པ་འམ་སེར་བོར་གྱུར་པ་ལ་སྐ་བ་དང་། དེ་བཞིན་དུ་བྱིས་པའི་རིམས་ལ་སོགས་པའི་ནད་དང་། འདིར་མ་སྨོས་པའི་ནད་གཞན་དག་ཀྱང་འདི་ལ་འབྱུང་བར་འགྱུར་ཏེ། དེ་ལྟ་བུའི་ནད་དེ་ནི་འོ་མའི་ནད་བེའུ་སྣབས་
เล่ม ๒๐๒ · หน้า 97b
ཤེ་འམ། འོ་མ་མ་ཞུ་བ་ཞེས་བྱའོ། །ཞེས་དྲང་སྲོང་རྣམས་ཀྱིས་བཤད་དེ། དེ་ནི་བྱིས་པ་རྣམས་ལ་ཤིན་ཏུ་གནོད་པ་དང་། མི་བཟོད་ཅིང་གསོ་བར་དཀའ་བ་ཡིན་ནོ། །དེ་ལ་མ་མ་བྱིས་པ་ལ། །སློན་སྨན་བཏང་བས་མྱུར་དུ་གསོ། །ཞེས་བྱ་བ་ལ། དེ་ལྟ་བུའི་ནད་དེ་ལ་
ནུ་མ་ལྷུད་པའི་མ་མ་འམ། མ་དང་བུ་གཉིས་ཀ་སློན་སྨན་བཏང་བས་མྱུར་བ་ཁོ་ནར་གསོ་བར་བྱའོ། །ཐུག་སོགས་རིམ་པར་བཤད་པ་ནི། །ཤུ་དག་ལ་སོགས་སྡེ་ཚན་ནམ། །སྐྱེར་པ་ལ་སོགས་པའི་སྡེ་ཚན་ནམ། །པ་ཏ་དང་ནི་པི་པི་ལིང་། །གླ་སྒང་པུ་ཙེ་ཤེལ་བསྐོལ་
བླུད། །ཅེས་བྱ་བ་ལ། །སྔར་ཐུག་པ་ལ་སོགས་པའི་རིམ་པ་བཤད་པ་དག་ཏུ་ཤུ་དག་ལ་སོགས་པའི་སྨན་གྱི་སྡེ་ཚན་དང་སྦྱར་བ་དང་། དེའི་ཁུ་བ་བླུད་པར་བྱ་བ་འམ། སྐྱེར་པ་ལ་སོགས་པའི་སྡེ་ཚན་ནམ། ཡང་ན་བོང་ང་དཀར་པོ་ནས་པུ་ཙེ་ཤེལ་གྱི་བར་གྱི་སྨན་བསྐོལ་བ་བླུད་པར་
བྱའོ། །པ་ཐ་བཅའ་སྒ་པུ་ཙེ་ཤིལ། །སླེ་ཏྲེས་རྩ་མཁྲིས་ཤ་རི་བ། །ཐང་ཤིང་གླ་སྒང་མུར་བ་དང་། །དུག་མོ་ཡུངས་བཅས་བསྐོལ་བ་བླུད། །ནུ་ཞོའི་ཉེས་བ་སེལ་བའི་མཆོག །ཅེས་བྱ་བ་ལ། ཡང་ན་པ་ཏ་ལ་སོགས་པའི་སྨན་བསྐོལ་བ་བླུད་ན་ཡང་ནུ་ཞོའི་ཉེས་པ་
སེལ་པའི་མཆོག་ཡིན་ནོ། །རྗེས་འབྲེལ་ནད་ལ་ཇི་བཞིན་དུ། །དུས་ཤེས་པ་ཡིས་གསོ་བར་བྱ། །ཞེས་བྱ་བ་ལ། འོ་མའི་བེའུ་སྣབས་ཀྱི་ནད་དེ་དང་རྗེས་སུ་འབྲེལ་ཅིང་རྗེས་སུ་འབྲང་བའི་བླ་བརྣན་གྱི་ནད་རྣམས་ལ་ཡང་ནད་ཀྱི་དམིགས་ཇི་ལྟ་བ་བཞིན་དུ། དུས་ཤེས་པའི་སྨན་པས་
གསོ་བ་བརྩམ་པར་བྱའོ། །སོ་འབྱུང་བ་དག་ནད་རྣམས་ནི། །ཐམས་ཅད་ཀྱི་ཡང་རྒྱུ་ཡིན་ནོ། །མཆོག་ཏུ་རིམས་དང་འཁྲུ་བ་ཡི། །ལུད་པ་སློན་དང་མགོ་ནད་དང་། །བད་མིག་འཛག་པའི་ནད་དང་ནི། །ཤུ་བ་རྣམས་ནི་སྐྱེད་པར་བྱེད། །ཅེས་བྱ་བ་ལ། བྱིས་པའི་སོ་འབྱུང་
བ་ནི་བྱིས་པའི་ནད་ཐམས་ཅད་ཀྱི་རྒྱུ་དང་གནས་ཡིན་ནོ། །དེ་ལས་ཀྱང་ཁྱད་པར་དུ་རིམས་ལ་སོགས་པའི་ནད་རྣམས་སྐྱེད་པར་བྱེད་པའི་རྒྱུ་ཡིན་ནོ། །བྱི་ལའི་སྒལ་ཚིགས་བྱེ་བ་དང་། །རྨ་བྱའི་གཙུག་ནི་འབྱུང་བ་དང་། །བྱིས་པའི་སོ་ནི་སྐྱེ་བ་ན། །མི་ན་བ་ནི་ཅུང་ཟད་མེད། །
เล่ม ๒๐๒ · หน้า 98a
ཅེས་བྱ་བ་ལ། བྱི་ལའི་སྒལ་ཚིགས་བྱེ་ཞིང་འབུར་བའི་དུས་དང་། རྨ་བྱའི་གཙུག་གི་ཅོད་པན་འབྱུང་བའི་དུས་སུ་ཡན་ལག་ཐམས་ཅད་བརྡུང་ཞིང་ན་བར་མི་བྱེད་པ་ཅུང་ཟད་ཀྱང་མེད་དོ། །དེ་བཞིན་དུ་བྱིས་པའི་སོ་སྐྱེ་བ་ན་ཡང་ཡན་ལག་མི་ན་བ་ཅུང་ཟད་ཀྱང་མེད་ཀྱི་
ཐམས་ཅད་ན་བར་འགྱུར་རོ། །དེ་ལ་ནད་ནི་ཇི་བཞིན་དང་། །ནད་སྟོབས་ཇི་བཞིན་འཇིགས་ཇི་བཞིན། །ཡུལ་དང་དུས་སོགས་རྣམ་ཕྱེ་སྟེ། །སྨན་གྱི་སྦྱོར་བས་གསོ་བར་བྱ། །ཞེས་བྱ་བ་ལ། སོ་སྐྱེ་བ་ལས་བྱུང་བའི་ནད་དེ་ལ་ནད་ཀྱི་ཚུལ་ཇི་ལྟ་བ་དང་། ནད་གང་དང་གང་སྟོབས་
ཆེ་བའི་ཤས་ཇི་ལྟ་བ་དང་། འཇིགས་པ་གང་དང་གང་ལས་བྱུང་པ་ཇི་ལྟ་བ་དེ་བཞིན་དུ་ཡུལ་དང་དུས་ལ་སོགས་པའི་ཚུལ་ཤེས་པར་བྱས་ལ། སྨན་གྱི་སྦྱོར་བས་གསོ་བར་བྱའོ། །གནོད་དང་གནོད་བྱ་དེ་ཉིད་དང་། །རིམས་སོགས་ནད་ཀྱང་དེ་ཉིད་འབྱུང་། །དེ་བས་སྨན་ནི་དེ་ཉིད་དེ།
གཞོན་ཤ་ཅན་དང་ལུས་ཆུང་ཕྱིར། །ཟས་ཀུན་བསྟེན་པར་མི་བྱེད་པས། །འདི་ཡི་ཚད་ནི་ཆུང་དུ་སྦྱིན། །ཞེས་བྱ་བ་ལ། བྱིས་པའི་གནོད་པ་དེ་ཉིད་དེ་རླུང་དང་མཁྲིས་པ་དང་བད་ཀན་དེ་ཉིད་དང་། དངས་མ་ལ་སོགས་པའི་ལུས་ཟུངས་བདུན་པོའི་གནོད་བྱ་དེ་ཉིད་དང་། རིམས་ལ་
སོགས་པའི་ནད་ཀྱང་སྔར་ལུས་སྤྱིའི་གསོ་བར་བསྟན་པ་དེ་ཉིད་འབྱུང་བར་འགྱུར་རོ། །དེ་བས་ན་སྨན་ཡང་རིམས་ལ་སོགས་པའི་སྐབས་དེ་དག་ཏུ་སྨོས་པ་དེ་ཉིད་ཀྱིས་གསོ་བར་བྱའོ། །འོན་ཀྱང་བྱིས་པའི་སྐབས་སུ་ཁྱད་པར་འདི་ཡོད་དེ། བྱིས་པ་ནི་གཞོན་ཤ་ཅན་ཁུལ་ཞོ་པ་ཡིན་པའི་
ཕྱིར་དང་ལུས་ཆུང་བའི་ཕྱིར་དང་། ཟས་ཐམས་ཅད་བརྟེན་པར་མི་བྱེད་པའི་ཕྱིར་འདི་ལ་སྨན་གྱི་ཚད་ཆུང་དུ་སྦྱིན་པར་བྱའོ། །མར་དང་འོ་མ་ལ་བརྟེན་པས། །བྱིས་པ་རྟག་པར་ཁོང་སྣུམ་ཡིན། །དེ་བས་འཕྲལ་དུ་སྐྱུག་སྨན་ནི། །འཇམ་པོ་བློ་དང་ལྡན་པས་བླུད། །ཅེས་བྱ་བ་ལ།
བྱིས་པ་ནི་དུས་རྟག་ཏུ་མར་དང་། འོ་མ་ལ་བརྟེན་ཅིང་དེས་འཚོ་བ་ཡིན་པས། རྟག་པར་ཁོང་སྣུམ་པ་ཡིན་ལ། དེ་བས་ན་བྱིས་པ་དེ་ལ་ནི་འཕྲལ་དུ་དེའི་མོད་ལ་སྐྱུག་སྨན་འཇམ་པོ་སྨན་པ་བློ་དང་ལྡན་པས་བླུད་པར་བྱའོ། །འོ་མ་འོ་མ་ཟས་བརྟེན་ལ། །ནུ་ཞོ་ངོམས་པར་བྱས་པས་སློན། །
เล่ม ๒๐๒ · หน้า 98b
ཞེས་བྱ་བ་ལ། བྱིས་པ་འོ་མ་ལ་བརྟེན་པ་དང་། འོ་མ་དང་ཟས་གཉིས་ཀ་ལ་བརྟེན་པ་དག་ལ་ནི་ནུ་ཞོ་ངོམས་པར་བྱས་ནས་སློན་དུ་གཞུག་གོ། །ཟས་ཟ་བ་ལ་མར་བཅས་པའི། །ཐུག་པ་སླ་བ་བླུད་པར་བྱ། །ཞེས་བྱ་བ་ལ། ཟས་འབའ་ཞིག་གིས་གསོ་བའི་བྱིས་པ་ནི་ཐུག་པ་
སླ་བ་རྐྱང་རྐྱང་པོ་བླུད་པས་སློན་པར་བྱའོ། །བཀྲུ་སྨན་གྱིས་གསོ་མས་གཏོང་དང་། །ཚད་ཆུང་ཚད་ཕྲན་དག་གིས་བྱ། །ཞེས་བྱ་བ་ལ། བྱིས་པ་བཀྲུ་སྨན་གྱིས་གསོ་བར་བྱ་བའི་ནད་ཡོད་པ་ལ་ནི་བཀྲུ་སྨན་མས་གཏོང་བས་གསོ་བར་བྱའོ། །སྣ་སྨན་ཚད་ཆུང་དུ་བཏང་བའི་ནད་ཡོད་པ་
ལ་ནི་ཚད་ཕྲན་དག་གཏང་བར་བྱའོ། །བཀྲུ་སྨན་ལ་སོགས་ཇི་སྐད་བཤད། །མ་མ་ཉིད་ལ་གཏང་བར་བྱ། །ཞེས་བྱ་བ་ལ། མ་མ་འམ་མ་ལ་ནི་བཀྲུ་སྨན་ལ་སོགས་པ་ཇི་སྐད་དུ་སྨོས་པའི་སྦྱོར་བ་ཐམས་ཅད་སྦྱར་བར་བྱ་སྟེ། དེ་ལ་བྱིས་པ་ལ་ནི་བཀྲུ་སྨན་རྣམ་པ་ཐམས་ཅད་དུ་བཏང་དུ་མི་
རུང་ངོ་། །མུར་བ་རྒྱ་ཤུག་ཚ་བ་གསུམ། །འབྲས་བུ་གསུམ་དང་འཛམ་བུའི་ཤུན། །ཐང་ཤིང་པ་ཏ་ཡུངས་ཀར་བཅས། །སྦྲང་རྩིར་སྦྱར་བའི་ལྡེ་གུ་སྦྱིན། །ནུ་ཞོའི་ཉེས་པ་སེལ་མཆོག་ཡིན། །ཞེས་བྱ་བ་ལ། མུར་བ་ལ་སོགས་པའི་སྨན་སྦྲང་རྩི་དང་བཏགས་པའི་ལྡེ་གུ་ནི་ནུ་ཞོའི་
ཉེས་པ་སེལ་བའི་མཆོག་ཡིན་ནོ། །པི་པི་ལིང་དང་སྐྱུ་རུ་ར། །ད་ཏ་ཀ་ཡི་མེ་ཏོག་གི །ཕྱེ་མ་སྦྲང་རྩི་བཅས་པ་ཡི། །ལྡེ་གུས་རྙིལ་ནི་བྱུག་པར་བྱ། །ཞེས་བྱ་བ་ལ། པི་པི་ལིང་གི་ཕྱེ་མ་སྦྲང་རྩི་དང་སྦྱར་བའི་ལྡེ་གུས་རྙིལ་བསྐུ་བར་བྱ་བ་འམ། ཡང་ན་སྐྱུ་རུ་ར་དང་། ད་ཏ་ཀའི་མེ་ཏོག་གི་
ཕྱེ་མ་དང་། སྦྲང་རྩི་སྦྱར་བས་རྙིལ་བསྐུ་བར་བྱའོ། །འུར་བྱ་སྲེག་པའི་ཤ་སྐམ་གྱི། །ཕྱེ་མ་སྦྲང་རྩི་སྦྲུས་པ་ཡིས། །བྱིས་པའི་སོ་ཡི་མྱུ་གུ་ནི། །མྱུར་དུ་སྐྱེད་པར་བྱེད་པ་ཡིན། །ཞེས་བྱ་བ་ལ། འུར་བྱ་ཞེས་བྱ་བ་བྱ་ལ་བ་དང་། སྲེག་པའི་ཤ་སྐམ་གྱི་ཕྱེ་མ་སྦྲང་རྩི་སྦྲུས་པ་
བསྐུས་ན་བྱིས་པའི་སོའི་མྱུ་གུ་མྱུར་དུ་སྐྱེད་པར་བྱེད་དོ། །ཤུ་དག་བྲི་ཧ་ཏི་གཉིས་དང་། །བ་ཏ་གླ་སྒང་པུ་ཙེ་ཤེལ། །བོང་ང་མངར་བའི་སྨན་སྡེ་དག །བསྐོལ་བའི་སྨན་གྱིས་སོ་སྐྱེད་གྲུབ། །ཅེས་བྱ་བལ། ཤུ་དག་ལ་སོགས་པའི་སྨན་དང་། དེ་བཞིན་དུ་རྒུན་འབྲུ་ལ་སོགས་པ་
เล่ม ๒๐๒ · หน้า 99a
མངར་བའི་སྨན་གྱི་སྡེ་ཚན་དང་བསྐོལ་བའི་མར་གྱིས་བསྐུས་ན། སོ་མྱུར་དུ་སྐྱེད་པ་དེ་མངོན་དུ་གྲུབ་པས་ཡིད་ཆེས་པ་ཡིན་ནོ། །སྐྱེར་པ་ཐང་ཤིང་ས་ར་ལ། །བྲི་ཧ་ཏི་གཉིས་ཉེ་ཤིང་པ། །ཀྲྀཥྞ་པ་རྞིཤྲི་ཡ་སེ། །སྦྲང་རྩི་མར་སྦྱར་ལྡེ་གུ་ནི། །ཕོ་བའི་མེ་དྲོད་
སྐྱེད་པའི་མཆོག །རླུང་ནི་བདེ་བར་རྒྱུ་བར་བྱེད། །འཁྲི་བ་རིམས་དང་དབུགས་མི་བདེ། །མིག་སེར་སྐྱ་རྦབ་ལུད་བ་འཇོམས། །བྱིས་བའི་ནད་ནི་ཐམས་ཅད་ལ། །ཕན་ཞིང་མདོག་དང་ཉམས་སྟོབས་སྐྱེད། །ཅེས་བྱ་བ་ལ། ས་ར་ནི་ཙི་ཞེས་བྱ་བའི་ཤིང་ངོ་། །པི་ཧ་ཏི་གཉིས་ནི་
པྲི་ཧ་ཏི་དང་ཀཎྜ་ཀཱ་རི་འོ། །ཤྲི་ཡ་སེ་ནི་ཧ་ཏི་པི་པི་ལིང་ངོ་། །གཞན་དག་ནི་གྲགས་པར་ཟད་དོ། །སྨན་དེ་དག་བཏགས་པའི་ཕྱེ་མ་སྦྲང་རྩི་དང་མར་དང་སྦྱར་བའི་ལྡེ་གུ་ནི་ཕོ་བའི་དྲོད་བསྐྱེད་པ་ལ་སོགས་པའི་ཡོན་ཏན་དང་ལྡན་པས་ནད་ཐམས་ཅད་ལ་ཕན་ཞིང་ལུས་ཀྱི་མདོག་དང་ཉམས་
སྟོབས་སྐྱེད་པར་བྱེད་པ་ཡིན་ནོ། །བཙོད་དང་སིང་ཕྲོམ་ད་ཏ་ཀི །ཀུ་ཏན་ན་ཏ་པ་ལ་གཉིས། ས་ཧ་ཆེ་ཆུང་གཉིས་དང་ནི། །མུད་ག་བིལ་པ་གཞོན་ནུ་རྣམས། །རས་བ་ལ་ས་བོན་བཅས་པ་དག །ཆུ་བསྐོལ་པ་དང་མར་དང་ནི། །ཐལ་སྨན་ཞོ་ག་ཆུར་བསྐོལ་བས། །སོ་སྐྱེས་
ལས་བྱུང་སྣ་ཚོགས་ནད། །འདི་ཡིས་མྱུར་དུ་འཇོམས་བྱེད་དོ། །འོད་སྲུངས་རྒན་པོས་བཤད་པ་ཡིན། །ཞེས་བྱ་བ་ལ། བཙོད་ལ་སོགས་པའི་སྨན་ཆུ་དང་། བསྐོལ་བའི་སྨན་གྱི་ཁུ་བ་དང་། མར་དང་། ཐལ་སྨན་དང་། ཞོ་ག་ཆུར་སྦྱར་ཏེ་བསྐོལ་བས་ནི་སོ་སྐྱེས་པ་ལས་བྱུང་བའི་
ནད་སྣ་ཚོགས་འདིས་སེལ་བར་བྱེད་དོ། །སྦྱོར་བ་འདི་ནི་འོད་སྲུངས་རྒན་པོ་ཞེས་བྱ་བའི་དྲང་སྲོང་གིས་བཤད་པ་ཡིན་ནོ། །བྱིས་པ་སོ་སྐྱེའི་ནད་ལ་ནི། །སྔགས་ཀྱིས་མངོན་པར་གདབ་མི་བྱ། །སོ་སྐྱེས་པ་ཡི་ནད་གང་ཡིན། །གསོ་བས་རང་ཉིད་ཉེར་ཞིང་འགྱུར། །ཞེས་བྱ་བ་ལ།
བྱིས་པ་སོ་སྐྱེ་བའི་ནད་ལ་སྔགས་ཀྱིས་གདབ་པར་མི་བྱ་སྟེ། སོ་སྐྱེས་པའི་ནད་གང་ཡིན་པ་དེ་ནི་གསོ་བ་དེ་དག་བྱས་པས་རང་ཉིད་ཉེ་བར་ཞི་བར་འགྱུར་བས་སྔགས་གདབ་མི་དགོས་སོ། །ཉིན་པར་གཉིད་དྲགས་ཆུ་གྲང་དང་། །ནུ་ཞོ་བད་ཀན་ཅན་བརྟེན་བས། །བྱིས་པའི་དངས་མ་རྒྱུ་
เล่ม ๒๐๒ · หน้า 99b
བ་ཡི། །རྩ་རྒྱུན་བད་ཀན་གྱིས་བཀག་པས། །ཡི་ག་འཆུས་དང་ཆམ་པ་དང་། །རིམས་དང་ལུད་པ་འབྱུང་བར་འགྱུར། །དེ་ནས་བྱིས་པ་ལུས་བསྐམས་ཤིང་། གདོང་སྣུམ་མིག་ནི་དཀར་བར་འགྱུར། །ཞེས་བྱ་བ་ལ། ཉིན་པར་གཉིད་ལོག་དྲགས་པ་ལ་བརྟེན་པས་དངས་མ་རྒྱུ་
བའི་རྩ་སྦུབས་འགགས་པ་ལ་སོགས་པའི་ཕྱིར་ཡི་ག་འཆུས་པ་ལ་སོགས་པའི་ནད་བྱུང་ལ། དེས་ན་བྱིས་པ་ལུས་སྐམས་པར་འགྱུར་རོ། །རྒྱམ་ཚ་ཚ་གསུམ་ཤ་རང་ག །པ་ཐ་གི་རི་ཀ་དམ་པ། །མར་དང་སྦྲང་རྩི་སྦྱར་སྐམས་དང་། །ཡི་ག་འཆུས་པ་སོགས་ལ་གཏང་། །ཞེས་བྱ་བ་ལ།
བྱིས་པ་ལུས་སྐམས་ཤིང་ཡི་ག་འཆུས་པ་ལ་སོགས་པ་ལ་རྒྱམ་ཚ་ལ་སོགས་པའི་སྨན་གཏང་བར་བྱའོ། །པུ་ཙེ་ཤེལ་དང་ཨ་ཤོ་ཀ །ཚ་བ་ལྔར་བཅས་ཕྱེ་མ་ཕན། །ཞེས་བྱ་བ་ལ། ཡང་ན་ཕུ་ཙེ་ཤེལ་དང་ཨ་ཤོ་ཀ་དང་ཚ་བ་ལྔའི་ཕྱེ་མ་སྦྲང་རྩི་དང་། མར་དང་སྦྱར་བ་ཡང་བྱིས་པའི་ཡི་ག་འཆུས་
པ་ལ་སོགས་པའི་ནད་ལ་ཕན་ནོ། །ད་ཏ་ཀི་དང་སྐྱུ་རུ་ར། །རྒྱ་ཤུག་ཕྱེ་མ་མར་བཅས་ཕན། །ཞེས་བྱ་བ་ལ། ཡང་ན་ད་ཏ་ཀི་ལ་སོགས་པའི་ཕྱེ་མ་དང་། མར་དང་སྦྲང་རྩི་དང་སྦྱར་བ་ཡང་བྱིས་པ་སྐེམ་ཞིང་ཡི་ག་འཆུས་པ་ལ་སོགས་པ་ལ་ཕན་ནོ། །ས་ལ་པརྞི་ཤུ་དག་དང་། །བྲི་ཧ་ཏི་གཉིས་
རམ་ཉེ་བ། །པི་པི་ལིང་དང་རྒྱ་སྦོས་དང་། །ལྕང་མ་ཨུཏྤ་ལ་བ་སྤྲུ་བ། ག་བྲའི་རྩ་བ་གླ་སྒང་རྣམས། །སྲང་རེ་ཡི་ནི་ཚད་བྱས་པ། །མར་ནི་བྲེ་གང་བཅས་བསྐོལ་བ། །རྩ་རྒྱུན་སྦྱོང་བའི་དམ་པ་ཡིན། །ཞེས་བྱ་བ་ལ། ས་ལ་པརྞི་ལ་སོགས་པའི་སྨན་སྣ་རེ་རེ་སྲང་རེ་མར་བྲེ་གང་གི་ནང་དུ་བསྐོལ་
བ་བླུད་ན་ཡང་རྩ་རྒྱུན་བད་ཀན་གྱིས་འགགས་པ་སྦྱོང་བར་བྱེད་པ་ཡིན་ནོ། །ཨ་ཤྭ་གནྡྷ་བྱེའུ་རུ་ག་པ། །བྲི་ཧ་ཏི་དང་པི་པི་ལིང་། །བསྐོལ་བའང་ཡོན་ཏན་དེ་དང་འདྲ། །ཞེས་བྱ་བ་ལ། ཨ་ཤྭ་གནྡྷ་ལ་སོགས་པའི་སྨན་དང་བསྐོལ་བའི་མར་བླུད་ན་ཡང་ཡོན་ཏན་སྔ་མ་དང་འདྲ་སྟེ།
རྩ་རྒྱུད་སྦྱོང་བར་བྱེད་པ་ཡིན་ནོ། ཤིང་མངར་སེང་ཕྲོམ་པི་པི་ལིང་། །ཤུག་པ་ཙནྡན་ཨུཏྤ་ལ། །ལམ་བུའི་ལོ་མ་ཤ་རི་བ། །བསྐོལ་བའི་མར་གྱིས་སྐེམ་པ་ཡི། །ནད་ནི་འཇོམས་པར་བྱེད་པ་ཡིན། ཞེས་བྱ་བ་ལ། ཤིང་མངར་ལ་སོགས་བ་དང་། བསྐོལ་བའི་མར་གྱིས་ཀྱང་
เล่ม ๒๐๒ · หน้า 100a
བྱིས་པའི་སྐེམ་པའི་ནད་སེལ་བར་བྱེད་པ་ཡིན་ནོ། །ཤྲིང་གི་མ་ཏུ་ལུང་ག་དང་། །ག་བྲའི་རྩ་བ་པི་པི་ལིང་། །ཐང་ཤིང་ཨ་ཤྭ་གནྡྷ་དང་། །རམ་ཉེ་བ་གཉིས་ར་སྣ་དང་། །ཟངས་རྩི་བ་དང་ཛི་བ་ཀ །མ་ཤ་མུད་ག་པ་རྞི་དང་། །བྱི་དང་ག་ཡི་ལྡེ་
གུར་བྱས། །རི་བོང་མགོ་བསྐོལ་ཁུ་བ་དང་། །བསྐོལ་པའི་མར་ནི་བླུད་གྱུར་ན། །ལུས་སྐེམ་རྒྱས་པར་བྱེད་བའི་མཆོག །ཅེས་བྱ་བ་ལ། ཀར་ཀ་ཏ་ཤྲིང་གི་དང་མ་དུ་ལུང་ག་ལ་སོགས་པའི་སྨན་གྱི་ལྡེ་གུ་དང་། རི་བོང་གི་མགོ་བོ་བསྐོལ་བའི་ཁུ་བ་དང་། ལྷན་ཅིག་བསྐོལ་བའི་
མར་གྱིས་ནི་བྱིས་པའི་ལུས་སྐེམ་པར་གྱུར་པ་མཆོག་ཏུ་བརྟས་པར་བྱེད་པ་ཡིན་ནོ། །ཤུ་དག་སླེ་ཏྲེས་ཀ་ཡ་སྠ། །རྒྱ་སྤོས་ཙ་རོང་ར་ཐུག་གཅིན། །ཆང་བསྐོལ་ཏིལ་མར་འཐུངས་པ་ཕན། །ཞེས་བྱ་བ་ལ། ཤུ་དག་ལ་སོགས་པ་དང་། ཏིལ་མར་བསྐོལ་བ་ཡང་ལུས་སྐེམ་པ་ལ་
ཕན་ནོ། །རྒྱ་སྐྱེགས་ཁུ་བ་ཆ་མཉམ་དང་། །ཏིལ་མར་བྲེ་གང་ཞོ་ག་ཆུ། །བཞི་འགྱུར་ཨ་ཤྭ་གནྡྷ་དང་། །སྐྱེར་བ་ཐང་ཤིང་རུ་རྟ་དང་། །ཧ་རེ་ཎུ་ཀ་བ་ཏ་ལ། །ཙནྡན་མུར་བ་པུ་ཙེ་ཤེལ། །ར་སྣ་ཉེའུ་ཤིང་ཤིང་མངར་མཉམ། །བསྐོལ་བའི་ཏིལ་མར་རྒྱ་སྐྱེགས་སོགས་
ཞེས་བྱ་བསྐུས་ན་ཕན་པར་འགྱུར། །སྟོབས་སྐྱེད་རིམས་དང་ཟད་བྱེད་དང་། །སྨྱོ་བྱེད་བརྗེད་དབུགས་མི་བདེ། །རླུང་གི་ནས་རྣམས་སེལ་བར་བྱེད། །གནོད་སྦྱིན་སྲིན་པོ་འབྱུང་པོ་འཇོམས། །སྦྲུམ་མ་ལ་ཡང་བསྔགས་པ་ཡིན། །ཞེས་བྱ་བ་ལ། རྒྱ་སྐྱེགས་ཀྱི་ཁུ་བ་བྱེ་གང་
དང་། ཞོ་ག་ཆུ་བྲེ་བཞི་དང་། ཨ་ཤྭ་གནྡྷ་ལ་སོགས་པ་སྨན་ཆ་མཉམ་པར་བྱས་པ་དང་། བསྐོལ་བའི་ཏིལ་མར་ནི་རྒྱ་སྐྱེགས་ལ་སོགས་པའི་ཏིལ་མར་ཞེས་བྱ་སྟེ། དེ་བསྐུས་ན་ཡང་ལུས་སྐེམས་བ་ལ་ཕན་ཞིང་རྒྱས་པར་འགྱུར་བ་དང་། སྟོབས་སྐྱེད་པ་ལ་སོགས་པའི་
ཡོན་ཏན་དང་ལྡན་པ་ཡིན་ནོ། །བོང་ང་ཀར་ཀ་ཏ་སྲིང་གི །པི་པི་ལིང་དང་སྦྲང་རྩི་སྦྱར། །ལྡེ་གུ་བྱིས་པ་ལ་སྦྱིན་པ། །ཞེས་བྱ་བ་ལ། བོང་ང་དང་ཀར་ཀ་ཏ་ཤྲིང་གི་ལ་སོགས་པ་སྦྱར་བའི་ལྡེ་གུ་སྦྱིན་ན་ཡང་ཕན་ནོ། །བོང་ང་དཀར་བོ་གཅིག་པུ་ཡི། །ལྡེ་གུས་ལུད་པ་རིམས་
เล่ม ๒๐๒ · หน้า 100b
སློན་བྲོ། །བླ་བརྣན་གྱི་ནི་ནད་སེལ་བྱེད། །ཅེས་བྱ་བ་ལ། ཡང་ན་བོང་ང་དཀར་བོ་གཅིག་པུ་སྦྲང་རྩི་དང་སྦྱར་བའི་ལྡེ་གུས་ཀྱང་ལུད་པ་དང་རིམས་ལ་སོགས་པའི་ནད་སེལ་བར་བྱེད་དོ། །ནུ་ཞོ་འཐུང་ཞིང་སློན་པ་ལ། །དེ་ལ་ཞུན་མར་སྦྲང་རྩི་དང་། །ཀཎྜ་ཀཱ་རི་བྲི་ཧ་ཏི། །འབྲས་བུའི་
ཁུ་བ་ཚ་བ་ལྔ། །སྦྱར་བའི་ལྡེ་གུ་སྦྱིན་པར་བྱ། །ཞེས་བྱ་བ་ལ། བྱིས་པ་གང་མའི་ནུ་ཞོ་འཐུངས་ཤིང་སློན་པར་གྱུར་པ་དེ་ལ་ནི། མར་དང་སྦྲང་རྩི་དང་། ཀཎྜ་ཀ་རི་དང་། བྲི་ཧ་ཏིའི་འབྲས་བུའི་ཁུ་བ་དང་། ཚ་བ་ལྔའི་ཕྱེ་མ་དང་སྦྱར་བའི་ལྡེ་གུ་སྦྱིན་པར་བྱའོ། །པི་པི་ལིང་དང་ལན་
ཚྭ་ལྔ། །བ་རི་པ་ཏྲ་བྱི་དང་ག །དེ་བཞིན་ལྡེ་གུར་བཅས་པ་སྦྱིན། །ཞེས་བྱ་བ་ལ། པི་པི་ལིང་དང་། ལན་ཚྭ་ལྔ་དང་། བ་རི་པ་ཏྲ་དང་། བྱི་དང་གའི་ཕྱེ་མ་སྦྲང་རྩི་དང་སྦྱར་བའི་ལྡེ་གུ་སྦྱིན་ན་ཡང་སློན་པའི་ནད་ལ་ཕན་ནོ། །དེ་བཞིན་ཚ་བ་གསུམ་རེག་འཇམ། །ཤ་རི་ད་ཏ་རྨ་བྱ་སྲམ་
ཇི་སྙེད་པགས་པ་སྤུ་བསྲེགས་ལ། །སྣག་ཚ་སྦྲང་རྩི་མར་སྦྱར་ཕན། །ཞེས་བྱ་བ་ལ། ཡང་དེ་བཞིན་དུ་ཚ་བ་གསུམ་དང་། བྱ་རེག་འཇམ་ལ་སོགས་པ་ཇི་སྙེད་པའི་པགས་པ་དང་། སྦུ་བསྲེགས་ཏེ་སྣག་ཚར་བཅས་པ་མར་དང་སྦྲང་རྩི་སྦྱར་བའི་ལྡེ་གུ་བྱིས་པ་ལ་བྱིན་ན་ཡང་ནད་དེ་ལ་ཕན་
ནོ། །སེང་ལྡེང་བལ་བུ་ཨ་རྫུ་ན། །རུ་རྟ་ཏྭ་ཏ་ནའི་ཁུ་བ། །འོ་མ་མར་དང་བཅས་བསྐོལ་བས། །སློན་བྲོ་ཉེ་བར་སེལ་བར་བྱེད། །ཅེས་བྱ་བ་ལ། སེང་ལྡེང་ལ་སོགས་པ་འོ་མ་དང་མར་བཅས་པ་བསྐོལ་བ་བླུད་ན་ཡང་སློན་བྲོ་བ་སེལ་བར་བྱེད་དོ། །གང་ཞིག་སོ་དང་བཅས་
སྐྱེས་དང་། །གང་གི་དང་པོར་ཡ་སོ་སྐྱེས། །བཀྲ་མི་ཤིས་པ་དེ་ལ་ནི། །ཞི་བ་བྱ་ཞིང་བྲམ་ཟེ་ལ། །ཡོན་དང་བཅས་པ་སྦྱིན་པར་བྱ། །དེ་བཞིན་སྐེམ་བྱེད་མཆོད་པར་བྱ། །ཞེས་བྱ་བ་ལ། བྱིས་པ་གང་མའི་ཁོང་ནས་སོ་དང་བཅས་པར་སྐྱེས་པ་དང་། ཡང་བྱིས་པ་གང་ཡང་སོ་དང་པོར་
སྐྱེས་པའི་བཀྲ་མི་ཤིས་པའི་གནོད་པ་ཅན་དེ་ལ་ནི་ཞི་བའི་སྦྱིན་སྲེག་བྱ་བ་དང་། དགེ་སྦྱོང་དང་བྲམ་ཟེ་ལ་བྱིས་པ་དེ་ཡོན་དང་བཅས་པ་སྦྱིན་པར་བྱ་བ་དང་། དེ་བཞིན་དུ་གཞོན་ནུ་སྐེམ་བྱེད་མཆོད་པར་བྱའོ། །བད་ཀན་འཁྲུགས་པས་རྐན་གྱི་ཤར། །རྐན་གྱི་མཛེར་པ་ཞེས་བྱ་སྟེ། །
เล่ม ๒๐๒ · หน้า 101a
དེས་ན་རྐན་གྱི་ཕྱོགས་ཀྱི་ནི། །སྤྱི་བོ་དུ་མའི་བར་འབྱུང་བར་འགྱུར། །རྐན་ལྷུང་ནུ་ཞོ་འགྲས་པ་དང་། །སྐ་བ་འཐུངས་ཤིང་བཤང་བ་སླ། །སྐོམ་དད་ཁ་གཡའ་མིག་ན་ཞིང་། །གཉའ་བ་འདེགས་དཀའ་སློན་པར་འགྱུར། །ཞེས་བྱ་བ་ལ། བད་ཀན་འཁྲུགས་
པས་རྐན་གྱི་ཤར་རྐན་གྱི་མཛེར་པ་ཞེས་བྱ་བའི་ནད་སྐྱེ་བར་འགྱུར་རོ། །རྐན་གྱི་མཛེར་པ་དེས་རྐན་གྱི་ཕྱོགས་ཀྱི་སྤྱི་བོར་དམའ་ཞིང་ལྕོང་བར་འགྱུར་ལ། དེ་བཞིན་དུ་རྐན་ལྷུང་ཞིང་བབས་པ་དང་། ནུ་ཞོ་དང་འགྲས་ཤིང་འཐུང་བར་མི་དགའ་བ་དང་། དཀའ་ཞིང་སྡུག་བསྔལ་བས་འཇིགས་
པ་ལ་སོགས་པར་འགྱུར་རོ། །དེ་ལ་རྐན་བཏེག་ནས་ཚིག་འཁུས། །ཐལ་པ་སྦྲང་རྩིེར་སྦྱར་བ་བསྐུ། །ཡང་ན་བཅལ་སྒ་པི་པི་ལིང་། །བ་གླང་ལྕི་ཁུ་ལན་ཚྭ་བསྐུ། །ཞེས་བྱ་བ་ལ། རྐན་དུ་མཛེར་པ་བྱུང་བ་དེ་ལ་བཏེགས་ནས། ནས་ཚིག་འཁུས་པའི་ཐལ་བ་དང་། སྦྲང་རྩིར་བཅས་པའི་
ལྡེ་གུས་བསྐུ་བར་བྱ་བའམ། ཡང་ན་བཅའ་སྒ་ལ་སོགས་པའི་སྨན་སྦྲང་རྩི་དང་སྦྱར་བའི་ལྡེ་གུས་བསྐུ་བར་བྱའོ། །དོང་གྲ་སྐྱེར་པ་ཤིང་ཚ་ཡི། །ལྡེ་གུ་ནྱ་གྲོ་དྷའི་ལོ་མར། །གཏུམས་ལ་བ་ལང་ལྕི་བས་བྱུགས། །དེ་རྗེས་མེ་མ་མུར་ལ་བསྲེགས། །ཁུ་བས་རྐན་དང་ཁ་བསྐུ་ཞིང་། །མིག་
ཏུ་ཡང་ནི་བླུགས་པར་བྱ། །ཞེས་བྱ་བ་ལ། དོང་གྲ་དང་སྐྱེར་པ་དང་། ཤིང་ཚ་ལྡེ་གུར་བྱས་པ་བྱ་གྲོ་དྷའི་ལོ་མར་གཏུམས་ལ། །དེའི་འོག་ཏུ་བ་ལང་གི་ལྕི་བས་ཕྱི་རོལ་ནས་བསྐུས་ལ། དེའི་འོག་ཏུ་མེ་མ་མུར་གྱི་མདག་མེར་བསྲེགས་ལ། ཆོས་པ་དང་ཁུ་བ་བཙིར་ཏེ་བྱིས་པ་དེའི་རྐན་དང་། །
ཁའི་ཕྱོགས་བསྐུ་ཞིང་། མིག་ཏུ་སྨན་གྱི་ཐིགས་པ་བླུགས་པར་བྱའོ། །རུ་རྟ་ཤུ་དག་ཨ་རུ་ར། །སྦྲང་རྩིར་བཅས་པའི་ལྡེ་གུ་ནི། །ནུ་ཞོར་སྦྱར་བས་བྱིས་པ་བླུད། རྐན་གྱི་མཛེར་པ་ལས་ཐར་འགྱུར། །ཞེས་བྱ་བ་ལ། །རུ་རྟ་ལ་སོགས་པའི་ལྡེ་གུ་དང་ནུ་ཞོ་དང་ལྷན་ཅིག་བླུད་ན་ཡང་རྐན་གྱི་
མཛེར་པའི་ནད་ལས་ཐར་བར་འགྱུར་རོ། །དྲི་མས་གོས་སམ་རྔུལ་བ་ལས། །གཞང་ཁར་བད་ཀན་ཁྲག་ལས་བྱུང་། །རྨ་ནི་ནད་དམར་གཡའ་བ་དང་། །བླ་བརྣན་མང་པོ་འབྱུང་བར་འགྱུར། །ལ་ལས་མ་མོའི་ཉེས་པར་བཤད། །གཞན་དག་ལུས་སྲུལ་པོས་བྱས་ཟེར། །རྒྱབ་ཀྱི་ཐོར་བུ་གཞང་
เล่ม ๒๐๒ · หน้า 101b
བསྡེབས་ཟེར། །ལ་ལས་དེ་མིང་མེད་ཅེས་བཤད། །ཅེས་བྱ་བ་ལ། བཤང་བ་ཞེས་བྱ་བའི་དྲི་མས་གོས་པ་དང་། ལན་འགའ་རྔུལ་བར་གྱུར་པ་ལས་བད་ཀན་ཁྲག་ལས་གྱུར་པའི་རྨ་ནང་ན་དམར་ཞིང་གཡའ་བ་དང་བཅས་པ་དང་། བླ་བརྣན་མང་པོ་དང་ལྡན་པར་འབྱུང་བར་
འགྱུར་ལ། རྨ་དེ་ལ་ནི་ལ་ལས་ནི་མ་མོའོ་གདོན་གྱིས་ཉེན་པ་ལས་བྱུང་བ་ཡིན་པར་བཤད་ལ། དེ་བཞིན་དུ་གཞན་དག་ནི་ལུས་སྲུལ་པོའི་གདོན་གྱིས་ཉེན་པ་བྱས་ཟེར། ལ་ལས་ནི་རྒྱབ་ཀྱི་ཐོར་བུ་ཞེས་བྱ་བ་ཡིན་ཟེར་ལ། གཞན་དག་ནི་གཞང་བསྡེབས་པ་ཞེས་བྱ་བ་ཡིན་ནོ། །ཞེས་
ཟེར་བའོ། །ལ་ལས་ནི་ནད་དེ་མིང་མེད་ཅེས་བྱའོ། །ཞེས་ཟེར་རོ། །དེ་ལ་མ་མ་བད་མཁྲིས་དག །སེལ་བའི་སྨན་གྱིས་ནུ་ཞོ་སྦྱང་། །ཞེས་བྱ་བ་ལ། མིང་དུ་མ་དང་ལྡན་པའི་ནད་དེ་ལ་ནི་མ་མའི་མཁྲིས་པ་དང་། བད་ཀན་སེལ་བར་བྱེད་པའི་སྨན་གྱིས་དེའི་ནུ་ཞོ་སྦྱང་ཞིང་ཉེས་པ་མེད་པར་
བྱའོ། ཙནྡན་དཀར་ཆུ་བསིལ་བ་དང་། ལྡན་པའི་སྐོམ་ནི་ནང་ནས་བླུད། །ཅེས་བྱ་བ་ལ། མ་མ་དེ་ལ་ཙནྡན་དཀར་པོ་ཆུ་བསིལ་བ་དང་སྦྱར་བའི་སྐོམ་མ་མ་དང་བྱིས་པ་ལ་བླུད་པར་བྱའོ། །དེ་དང་སྐྱེར་པའི་ཁཎྜ་ནི། །སྦྲང་རྩིར་བཅས་པས་རྨ་བསྐུ་བྱ། །ཞེས་བྱ་བ་ལ། ཙནྡན་
དཀར་པོ་དང་སྐྱེར་པའི་ཁཎྜ་སྦྲང་རྩི་དང་བཅས་པའི་ལྡེ་གུས་རྨ་བསྐུ་བར་བྱའོ། །རྒྱ་ཤུགས་འབྲས་བུ་གསུམ་བླག་ཤའི། །ཤུན་པ་བསྐོལ་བའི་ཆུ་བླུགས་བྱ། །ནག་ཚུར་གི་ཝཾ་སྤངས་མ་དང་། །དངུལ་རྡོ་བ་བླ་ལྡོང་རོས་ནི། །སྐྱུར་དང་བཏགས་པས་བསྐུ་བྱ་ཞིང་། །ཞེས་བྱ་བ་ལ།
རྒྱ་ཤུག་ལ་སོགས་པ་བསྐོལ་བའི་ཁུ་བས་རྨ་དེ་ལ་བླུགས་པར་བྱ་བ་འམ། ནག་ཚུར་ལ་སོགས་པའི་སྨན་ཁུ་བ་སྐྱུར་པོ་དང་། སྦྱར་བའི་ལྡེ་གུས་རྨ་བསྐུ་བར་བྱའོ། །ཡང་ན་ཤིང་མངར་སྐྱེར་ཁཎྜ། །དུང་ནི་ཞིབ་ཏུ་བཏགས་པ་འམ། །དུང་གི་ལྟེ་བ་ཤ་རི་བ་འམ། །ཨ་ས་ན་ཡི་ཤུན་པ་ནི། །
ཕྱེ་མར་བཏགས་པས་གདབ་པར་བྱ། །ཞེས་བྱ་བ་ལ། ཡང་ན་རྨ་དེ་ཤིང་མངར་ལ་སོགས་པ་ཞིབ་ཏུ་བཏགས་པའི་ཕྱེ་མ་གདབ་བར་བྱ་བ་འམ། ཡང་ན་དུང་གི་ལྟེ་བ་དང་། །ཤ་རི་བ་ཞེས་བྱ་བ་ཐལ་ཏྲེས་ཀྱི་ཕྱེ་མས་གདབ་བར་བྱ་བ་འམ། ཡང་ན་ཨ་ས་ནའི་ཤུན་པ་ཕྱེ་མར་ཞིབ་ཏུ་བཏགས་
เล่ม ๒๐๒ · หน้า 102a
ནས་གདབ་པར་བྱའོ། །དམར་ཞིང་གཡའ་བའི་ཤས་ཆེ་ལ། །སྲིན་བུ་པད་པས་ཁྲག་དབྱུང་བྱ། །ཞེས་བྱ་བ་ལ། གཞང་བསྡེབས་པའི་ནད་དེ་མདོག་དམར་ཞིང་། གཡའ་བའི་ཤས་ཆེ་བར་གྱུར་པ་ནི་སྲིན་བུ་པད་པས་ཁྲག་དབྱུང་བར་བྱའོ། །གཞང་
བསྡེབས་ནད་ལ་མཁྲིས་པ་ཡི། །རྨ་ལ་ཕན་པ་ཐམས་ཅད་བསྔགས། །ཞེས་བྱ་བ་ལ། གཞང་བསྡེབས་པ་ཞེས་བྱ་བའི་ནད་ལ་མཁྲིས་པའི་རྨ་ལ་ཕན་པའི་ཟས་དང་། སྐོམ་དང་། སྨན་ཐམས་ཅད་ཕན་ནོ། །པ་ཐ་གླ་སྒང་སེར་པོ་གཉིས། །ག་བྲའི་རྩ་བ་བྱི་དང་ག །པུརྞ་རྣ་བར་
བིལ་བར་བཅས། །བྲི་ཤྩི་ཀ་ལི་ཚ་བ་གསུམ། །མར་བཅས་བསྐོལ་བ་ཚད་ཙམ་བལྡག །ས་ཟོས་ནད་ལས་ཐར་བར་འགྱུར། །ཞེས་བྱ་བ་ལ། བ་ཐ་ལ་སོགས་པ་སྨན་བསྐོལ་བའི་ཁུ་བ་མར་དང་བསྐོལ་བ་ཚད་ཙམ་བྱིས་པས་བལྡགས་ཤིང་ཟོས་ནས་ཟོས་པ་ལ་སོགས་པའི་
ནད་ལས་ཐར་བར་འགྱུར་རོ། །ནད་ནི་གང་གི་སྨན་གང་ཡིན། །དེ་ཡིས་ནུ་མ་བསྐུས་ནས་ནི། །ཡུད་ཙམ་འདུག་ལ་དེ་རྗེས་བཀྲུ། །བླུད་ན་ནད་ནི་དེ་དེས་སེལ། །ཞེས་བྱ་བ་ལ། རིམས་ལ་སོགས་པའི་སྨན་གང་དག་ཡིན་བར་བཤད་པའི་སྨན་དེས་ནད་གཞི་ཇི་ལྟ་བ་དང་སྦྱར་ཏེ་
བསྐུས་ནས་ཡུད་ཙམ་སྟེ། ཆུ་ཚོད་གཉིས་འདས་ཀྱི་བར་དུ་བསྡད་ལ། དེའི་རྗེས་ལ་ནུ་མ་བསྐུས་ཏེ། བྱིས་པ་ལ་ནུ་ཞོ་བླུད་ན་རིམས་ལ་སོགས་པའི་ནད་དེ་སྨན་དེས་འཇོམས་བར་འགྱུར་རོ། །ཡན་ལག་བརྒྱད་པའི་སྙིང་བོའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ་
སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། གནས་ཕྱི་མའི་ལེའུ་གཉིས་བའི་འགྲེལ་པའོ།། །།དེ་ནས་བྱིས་པའི་གདོན་གསོ་བ་བཤད་པར་བྱའོ། །ཞེས་བྱ་བ་ལ། ལེའུ་སྔ་མར། ཚུལ་མིན་སྐྲག་པར་མི་བྱ་སྟེ། །སྐྲག་ན་གདོན་ནི་འཇུག་པར་འགྱུར། །ཞེས་
བཤད་པའི་རིམ་པས་བྱིས་པའི་གདོན་གསོ་བ་བསྟན་པར་བྱ་བའི་ཕྱིར་ལེའུ་འདི་བརྩམས་པ་ཡིན་ནོ། །སྔོན་གྱི་སྐེམ་བྱེད་བསྲུང་བའི་ཕྱིར། །གདོན་ནི་སྐྱེས་པའི་གཟུགས་ཅན་ལྔ། །བུད་མེད་ཀྱི་ནི་གཟུགས་ཅན་བདུན། །ལྷ་ཆེན་པོ་ཡི་སྤྲུལ་པ་ཡིན། །ཞེས་བྱ་བ་ལ། སྔོན་གྱི་དུས་
เล่ม ๒๐๒ · หน้า 102b
སུ་ལྷ་ཆེན་པོའི་བུ་སྐེམ་བྱེད་ཅེས་བྱ་བ་གཞོན་ནུ་གདོང་དྲུག་པ་རིམས་ལས་བསྲུང་བའི་ཕྱིར། གདོན་སྐྱེས་པའི་གཟུགས་ཅན་ལྔ་དང་བུད་མེད་ཀྱི་གཟུགས་ཅན་བདུན་ལྷ་ཆེན་པོ་ཉིས་ཀྱིས་བསྐྱེད་པ་ཡིན་ནོ། །སྐེམ་བྱེད་ས་ག་ལུག་ཐུག་གདོང་། །ཁྱི་གདོང་ཡི་དགས་ཞེས་བྱ་དང་། །ཞེས་བྱ་བ་
ལ། སྐེམ་བྱེད་ཀྱི་གདོན་ལ་སོགས་པ་ལྔ་ནི་སྐྱེས་པའི་གཟུགས་ཅན་ཡིན་པར་ཤེས་པར་བྱའོ། །བྱ་གདོན་སྲུལ་མོ་གྲང་པ་ཡི། །སྲུལ་མོ་ལོང་མ་ལུས་སྲུལ་མོ། །དེ་བཞིན་བཞིན་གྱི་རྒྱན་ཅན་མ། །ནམ་གྲུ་ནམ་གྲུ་སྐེམ་མོ་ཡིན། །ཞེས་བྱ་བ་ལ། བྱའི་གདོན་ལ་སོགས་པའི་གདོན་བདུན་
པོ་ནི། བུད་མེད་ཀྱི་གཟུགས་ཅན་ཡིན་ནོ། །དེ་རྣམས་ཀྱིས་ནི་གཟུང་བའི་ཚུལ། །རྟག་ཏུ་ངུ་དང་རིམས་ཀྱིས་འདེབས། །ཞེས་བྱ་བ་ལ། གདོན་དེ་རྣམས་ཀྱིས་དང་པོ་གཟུང་ཞིང་འཇུག་པའི་ཚུལ་ལམ་རྟགས་ནི་རྟག་པར་རྒྱུན་དུ་ངུ་བ་དང་། རིམས་ཀྱིས་འདེབས་པར་བྱེད་
པ་ཡིན་ནོ། །སྤྱིའི་ཚུལ་སྐྲག་དང་གླལ་བ་དང་། སྨིན་མ་འདེགས་ཤིང་རྨྱ་བ་དང་། །དབུ་བ་སློན་ཞིང་གྱེན་དུ་བལྟ། །མ་མཆུ་སོས་འདེབས་གཉིད་ཡར་དང་། །ངུ་ཞིང་མཁུན་ལ་ནུ་ཞོ་ལ། །མི་དགའ་སྐད་ནི་འགྱུར་བ་དང་། །གློ་བུར་དུ་ནི་སེན་མོ་ཡིས། །རང་གི་མ་
མའི་ཡན་ལག་འབྲད། །ཅེས་བྱ་བ་ལ། གདོན་དེ་རྣམས་ཀྱི་སྤྱིའི་རྟགས་ནི། སྐྲག་ཅིང་འཇིགས་པ་དང་གླལ་བ་ལ་སོགས་པ་ནས་རང་གི་མ་མ་འམ་མ་ལ་རྒྱུ་མེད་པར་ཡན་ལག་ཐམས་ཅད་སེན་མོས་འབྲད་ཅིང་གནོད་པར་བྱེད་པའི་བར་ཡིན་ནོ། །དེ་ལ་སྐེམ་བྱེད་ཀྱིས་ཟན་རྟགས་
མིག་གཅིག་མཆི་མ་འཛག་པ་དང་། །ཡང་དང་ཡང་དུ་མགོ་བོ་རྡེབ། །ཕྱོགས་གཅིག་ཉམས་ཤིང་ལུས་རེངས་ལ། །རྔུལ་བཅས་སྐྱེ་བ་རེངས་བ་དང་། །སོ་འཆའ་ནུ་ཞོ་ལ་མི་དགའ། །སྔངས་ཤིང་ངུ་ལ་སྐད་གསང་ཉམས། །ཁ་ཡོ་ཁ་ཆུ་སྐྱུག་པ་དང་། །མི་བཟད་པར་ནི་
གྱེན་དུ་བལྟ། །ཚིལ་ཁྲག་དྲི་བྲོ་ཡིད་མི་དགའ། །བཤང་བ་ཁུ་ཚུར་ལ་བཅངས་ཤིང་། །མཁུར་ཚེས་མིག་དང་སྨིན་མ་གཅིག །གཡོ་ཞིང་མིག་ནི་གཉིས་ཀ་དམར། །དེས་ནི་ཡན་ལག་ཉེས་ཉམས་སམ། འཆི་བ་ཁོ་ནར་བྱད་པར་འགྱུར། །ཞེས་བྱ་བ་ལ། དེ་ལ་
เล่ม ๒๐๒ · หน้า 103a
གདོན་དེ་རྣམས་ཀྱི་ནང་ནས་སྐེམ་བྱེད་ཅེས་བྱ་བའི་གདོན་གྱིས་ཟིན་ཅིང་ཉེན་པའི་རྟགས་ནི་བྱིས་པའི་མིག་གཅིག་ནས་འཆི་མ་འཛག་པ་དང་། སྐད་ཅིག་མ་རེ་རེ་ཞིང་ཡང་དང་ཡང་དུ་མགོ་བོ་བརྡེགས་ཤིང་བསྐྱོད་པ་དང་། །ལུས་ཀྱི་གཞོགས་ཕྱེད་ཉམས་ཤིང་མ་
རུངས་པ་དང་། ལུས་ཤིང་ལྟར་རེངས་པ་དང་། རྔུལ་འབྱུང་བ་དང་། སྐེ་བ་གཉེའུ་རེངས་ཀྱིས་བཏབ་པ་ལ་སོགས་པ་དང་། ཚིལ་དང་ཁྲག་དྲི་མི་ཞིམ་པ་དང་། ཡིད་མི་དགའ་ཞིང་ལྟོ་བ་ལྟར་གནས་པ་དང་། བཤང་བ་ཁུ་ཚུར་གྱི་ནང་དུ་བཅངས་པ་དང་། མཁུར་ཚོས་དང་ཁ་ཡོ་
པར་གནས་པ་ལ་སོགས་པ་ཡིན་ཏེ། དེས་ནི་ཡན་ལག་ཉམས་ཤིང་མི་ཚང་པར་འགྱུར་བའམ། འཆི་བ་ཁོ་ན་འགྱུར་རོ། །སྐེམ་བྱེད་བརྗེད་བྱེད་མཚན་མ་ནི། །དྲན་པ་ཉམས་ཤིང་ཡང་དང་ཡང་། སྐྲ་འབལ་སྐེ་བ་འགུགས་པ་དང་། །རྣམ་པར་འདུད་ཅིང་གླལ་བཞིན་དུ། །
བཤང་དང་གཅི་བ་འབྱིན་པར་བྱེད། །ཝུ་བར་སྐྱུག་ཅིང་གྱེན་དུ་བལྟ། །རྐང་ལག་སྨིན་མས་གར་ཡང་བྱེད། །ནུ་མ་རང་ལྟེ་སོ་ཡིས་འདེབས། །ཀུན་ཏུ་གཡོ་ཞིང་གཉིད་ཡར་རིམས། །ཁྲག་ནི་རྣག་གི་དྲི་བྲོའོ། །ཞེས་བྱ་བ་ལ། སྐེམ་བྱེད་བརྗེད་བྱེད་ཅེས་བྱ་བ་གདོན་སོགས་བཟུང་
པའི་མཆན་མ་ནི་བྱིས་པའི་དྲན་པ་ཉམས་ཤིང་བརྒྱལ་བ་ལ་སོགས་པ་དང་། ལུས་རྣམ་པར་འགུགས་ཤིང་བཏུད་ནས་གླལ་བཞིན་དུ་བཤང་བ་དང་། གཅི་བ་འབྱིན་པར་བྱེད་པ་ལ་སོགས་པ་ཡིན་ནོ། །ལུག་ཐུག་གདོང་གིས་རྟགས་ཀྱི་ནད། །སྦོ་ཞིང་རྐང་པ་ལག་པ་དག །འདར་ཞིང་ཝུ་
བར་སྐྱུག་པ་དང་། །སྐོམ་དད་ཆེ་འཁྲུ་ཆང་པ་སྡོམ། །སྐད་གསང་དམའ་ཞིང་མདོག་མི་སྡུག །མཁུན་ཞིང་སློན་པར་བྱེད་པ་དང་། །ལུད་པ་སྐྱིགས་བུས་འདེབས་གཉིད་ཡང་། །སོ་ཡིས་མཆུ་གནོན་ཡན་ལག་སྡུད། །རེངས་ཤིང་ལུག་ཐུག་དྲི་བྲོ་ལ། །གྱེན་དུ་ལྟ་ཞིང་དགོད་པ་དང་། །
བར་དུ་འགུགས་ཤིང་རིམས་ཀྱིས་འདེབས། །བརྒྱལ་ཞིང་མིག་གཅིག་སྐྲངས་པ་ཡིན། །ཞེས་བྱ་བ་ལ། ལུག་ཐུག་གི་གདོང་ཞེས་བྱ་བས་ཟིན་པའི་རྟགས་ནི་བྱིས་པ་ལྟོ་སྦོ་བ་ལ་སོགས་པའི་ནད་ཀྱིས་འདེབས་པ་དང་། ལུས་ཀྱི་བར་དུ་གུགས་ཤིང་སྒུར་པོར་བྱེད་པ་ལ་སོགས་པ་ཡིན་ནོ། །
เล่ม ๒๐๒ · หน้า 103b
ཁྱི་ཡི་གདོང་གི་རྟགས་གྱུར་པ། །འདར་ཞིང་བ་སྤུ་ལྡང་བ་དང་། །རྔུལ་ཞིང་མིག་ནི་འཛུམས་པ་དང་། །རྒྱབ་ཏུ་གུག་ཅིང་ལྕེ་དང་སོ། །མཆུ་དང་རྐན་སྒྲ་འབྱིན་ཞིང་སྐྱུག །བཤད་པའི་དྲི་འབྱུང་ཁྱི་སྐད་འདོན། །ཞེས་བྱ་བ་ལ། ཁྱིའི་གདོང་གི་རྟགས་ནི་བྱིས་པ་ལུས་འདར་བ་ལ་
སོགས་པ་ནས་ཁྱིའི་སྐད་འབྱིན་པའི་བར་ཡིན་ནོ། །ཡི་དགས་ཀྱི་ནི་གདོན་གྱི་རྟགས། །བ་སྤུ་ལྡང་ཞིང་ཡང་ཡང་སྡང་། །གློ་བུར་ངུ་ཞིང་རིམས་ཀྱིས་འདེབས། །འཁྲུ་ཞིང་སློན་བྱེད་ལུད་པ་ལུ། །གླལ་སྐོམ་མི་རོའི་དྲི་དང་ལྡན། །ལུས་ནི་བསྐྱོད་ཅིང་གཡོ་བ་དང་། །སྐེམ་
ཞིང་རེངས་ལ་མདོག་མི་སྡུག །ཁུ་ཚུར་བསྡམ་ཞིང་མཆི་མ་འཛག །ཅེས་བྱ་བ་ལ། བྱིས་པ་ཡི་དགས་ཀྱི་གདོན་མཚུན་ལྷ་ཞེས་བྱ་བས་གཟུང་བའི་རྟགས་ནི་བ་སྤུ་ལྡང་ཞིང་ཡང་དང་ཡང་དུ་སྡང་བ་ཡིན་ནོ། །བྱ་གདོན་ལུས་ལྷོད་འཁྲུ་བར་བྱེད། །ལྕེ་རྐན་ལྐོག་མར་རྨ་བྱུང་ཞིང་། །ཐོར་བུ་
ན་ཞིང་ཚ་ལ་རྣགས། །ཚིགས་དག་ཏུ་ནི་ཡང་ཡང་འབྱུང་། །མཚན་མོ་སྐྱེ་ལ་ཉིན་མོ་འབྲི། །ཁ་འམ་བཤང་སྒོ་འགགས་པ་དང་། །འཇིགས་ཤིང་བྱ་ཡི་དྲི་དང་ལྡན། །རིམས་ཀྱིས་འདེབས་པར་བྱེད་པ་ཡིན། །ཞེས་བྱ་བ་ལ། བྱིས་པ་བྱའི་གདོན་གྱིས་ཟིན་པའི་རྟགས་ནི།
ལུས་ལྷོད་ཅིང་ཡན་ལག་ཤིག་ཤིག་པོར་གྱུར་པ་དང་། འཁྲུ་བར་བྱེད་པ་ལ་སོགས་པ་དང་། ལུས་དང་ཡན་ལག་ལ་རྨ་འབྱུང་བ་དང་། མཚན་མོ་སྐྱེ་ཞིང་མཆེད་ལ་ཉིན་མོ་ནི་བྲི་བ་ལ་སོགས་པ་ཡིན་ནོ། །སྲུལ་མོས་སློན་ཞིང་འདར་བ་དང་། །ལུས་སྙོམ་མཚན་མོ་གཉིད་ཡར་དང་། །
སྐྱིགས་བུ་ལྟོ་སྦོ་འཁྲུ་བ་དང་། །སྐོམ་ཞིང་གཅིན་ནི་སྲི་བ་དང་། །ལུས་ལྷོད་བ་སྤུ་གཤོར་བ་དང་། །ཁ་ལྟར་དྲི་ནི་མནམ་པ་ཡིན། །ཞེས་བྱ་བ་ལ། སྲུལ་མོ་ཞེས་བྱ་བའི་གདོན་བུད་མེད་ཀྱི་གཟུགས་ཅན་གྱི་གདོན་གྱིས་ཟིན་པའི་རྟགས་ནི་བྱིས་པ་སློན་ཞིང་སྐྱུག་པ་དང་། ལུས་འདར་བ་དང་
སྐོམ་ཞིང་གཉིད་ཀྱིས་ལོག་པ་ལྟར། ཡུལ་འཛིན་མི་ནུས་པ་དང་། མཚན་མོ་གཉིད་ཡར་བ་ལ་སོགས་པ་ཡིན་ནོ། །གྲང་བའི་སྲུལ་མོས་འདར་བ་དང་། །ངུ་ཞིང་ཟུར་གྱིས་ལྟ་བ་དང་། །སྐོམ་ཞིང་འཁྲུ་ལ་རྒྱུ་མ་འཁྲུགས། །ཞག་ལྟར་དྲི་ནི་མནམ་པ་དང་། །ཡན་ལག་ལོགས་
เล่ม ๒๐๒ · หน้า 104a
གཅིག་གྲང་བ་དང་། །ཅིག་ཤོས་དྲོ་བ་ཉིད་ཡིན་ནོ། །ཞེས་བྱ་བ་ལ། གྲང་བའི་ལུས་སྲུལ་མོ་ཞེས་བྱ་བའི་བུད་མེད་ཀྱི་གཟུགས་ཅན་གྱི་གདོན་གྱིས་ཟིན་པའི་རྟགས་ནི་བྱིས་པ་ལུས་འདར་བ་ལ་སོགས་པ་ནས་ལུས་ཀྱི་གཞོགས་གཅིག་ནི་དྲོ་བར་གྱུར་པ་ལ་སོགས་
པའི་བར་ཡིན་ནོ། །སྲུལ་མོ་ལོང་མས་སློན་པ་དང་། །རིམས་དང་ལུད་པ་གཉིད་ཆུང་དང་། །བཤང་བ་སླ་ཞིང་མདོག་མི་སྡུག །དྲི་ང་བསྐུས་པས་མྱུར་དུ་སྐམ། །མཐོང་བ་ཉམས་ཤིང་མིག་ན་གཡའ། །མིག་སྐྲང་གློ་བར་གྱུར་བ་དང་། །སྐྱིགས་བུ་མི་དགོད་ནུ་ཞོ་འགྲས། །མདོག་
མི་སྡུག་ཅིང་ང་རོ་རྩུབ། །མདོག་ཉམས་ཉ་ཡི་དྲི་དང་ལྡན། །ཡང་ན་དྲི་ནི་སྐྱུར་བཅས་ཡིན། །ཞེས་བྱ་བ་ལ། སྲུལ་མོ་ལོང་མའི་གདོན་གྱིས་ཟིན་པའི་རྟགས་ནི། བྱིས་པ་སློན་ཞིང་སྐྱུགས་པ་ལ་སོགས་པ་དང་ལུས་དྲི་ང་བ་དང་ལུས་ཀྱི་ལྡེ་གུ་མྱུར་དུ་བསྐམ་པ་ལ་སོགས་པའི་བར་ཡིན་ནོ། །
བཞིན་རྒྱན་ཅན་གྱིས་རྐང་པ་དང་། །ལག་པ་གདོང་ནི་མཛེས་པ་དང་། །རྩ་ནི་ནག་པོ་སྣང་བ་ཡིས། །ལྟོ་བ་ཁྱབ་ཅིང་རིམས་ཀྱིས་འདེབས། །ཡི་ག་འཆུ་ཞིང་ཡན་ལག་ན། །བ་གཅིན་ལྟ་བུའི་དྲི་འབྱུང་འགྱུར། །ཞེས་བྱ་བ་ལ། བུད་མེད་ཀྱི་གཟུགས་ཅན་གྱི་གདོན་བཞིན་རྒྱན་ཅན་
གྱིས་ཟིན་པའི་རྟགས་ནི་བྱིས་པའི་རྐང་པ་ལ་སོགས་པ་སྡུག་ཅིང་མཛེས་པར་གྱུར་པ་ལ་སོགས་པ་ཡིན་ནོ། །ནམ་གྲུས་གནག་ཅིང་སྔོ་བ་དང་། །མིག་དང་རྣ་བ་སྣ་མེད་ཅིང་། །མིག་འགུལ་སྐྱིགས་བུ་ལུད་པ་ལུ། །ཁ་ནི་ཡོ་ཞིང་དམར་བ་དང་། །ལུག་ཐུག་དྲིར་ལྡན་རིམས་འདེབས་སྐེམ།
བཤང་བ་སྔོ་ཞིང་སླ་བ་ཡིན། །ཞེས་བྱ་བ་ལ། ནམ་གྲུའི་བྱའི་གདོན་གྱིས་ཟིན་པའི་རྟགས་ནི། བྱིས་པའི་མདོག་གནག་ཅིང་སྔོ་བ་ལ་སོགས་པ་ཡིན་ནོ། །ནམ་གྲུ་སྐེམ་མོས་ལུས་ཀུན་ནི། །རིམས་ཀྱིས་འདེབས་བར་གྱུར་བ་དང་། །སྐྲ་འབྱི་ཟས་ལ་མི་དགའ་དང་། །སྐད་གསང་
ཞུམ་ཞིང་མདོག་མི་སྡུག །བཤང་བ་ཁ་དོག་སྣ་ཚོགས་དང་། །ལྟོ་བར་རྩ་ཡི་མདུད་པ་ཆགས། །ངུ་ཞིང་བྱ་རྒོད་དྲི་ལྡན་ལ། །ཡུན་རིངས་ན་བར་བྱེད་པ་ཡིན། །ཞེས་བྱ་བ་ལ། ནམ་གྲུ་སྐེམ་མོ་ཞེས་བྱ་བའི་གདོན་གྱི་རྟགས་ནི། །ལུས་ཀྱི་ཡན་ལག་ཐམས་ཅད་སྐམ་ཞིང་རངས་པ་ལ་
เล่ม ๒๐๒ · หน้า 104b
སོགས་པ་ནས་ནད་ཡུན་རིང་དུ་ན་ཞིང་རྗེས་སུ་འབྲེལ་པ་ལ་སོགས་པའི་བར་ཡིན་ནོ། །ལྟོ་བར་རྨེན་བུ་ཟླུམ་པོར་འབྱུང་། །བཤང་བ་ཁ་དོག་སྣ་ཚོགས་འབྱུང་། །ལྕེ་ཡི་དབུས་ནི་དམའ་བ་དང་། །རྐན་ནི་གནག་འགྱུར་དེ་སྤང་བྱ། །ཞེས་བྱ་བ་ལ། བྱིས་པ་གང་ལྟོ་བར་རྨེན་བུ་འམ།
ཐོར་བུ་ཟླུམ་པོ་བྱུང་བ་དང་བཤང་བ་ཁ་དོག་སྣ་ཚོགས་སུ་འབྱུང་བ་ལ་སོགས་པའི་བྱིས་པ་དེ་ནི་གསོ་བར་མི་རུང་བས་སྤང་བར་བྱའོ། །ཁ་ཟས་མང་པོ་ཟོས་ཀྱང་ནི། །བྱིས་པ་གང་ཞིག་ལུས་སྐེམ་བྱེད། །སྐེམ་པས་ཉེན་ཅིང་མིག་ཉམས་པ། །དེ་ནི་ནམ་གྲུ་སྐེམ་མོས་གསོད། །
ཅེས་བྱ་བ་ལ། བྱིས་པ་ཁ་ཟས་མང་ཞིང་སྣ་ཚོགས་ཟོས་སུ་ཟིན་ཀྱང་ལུས་སྐེམ་ཞིང་སྦེགས་པ་ལ་སོགས་པའི་མཚན་ཉིད་དང་ལྡན་པ་དེ་ཉིད་ནམ་གྲུའི་གདོན་གྱིས་ངེས་པར་གསོད་པར་འགྱུར་རོ། །འཚེ་བ་ལ་དགའ་མཆོད་པར་འདོད། །གདོན་རྣམས་འཛིན་པའི་རྒྱུ་ཡིན་ནོ། །ཞེས་བྱ་བ་
ལ། གདོན་འཇུག་པར་འགྱུར་བའི་རྒྱུ་ནི་འཚེ་བར་བྱེད་ཅིང་སྲོག་གཅོད་པ་ལ་དགའ་བ་དང་། །མཆོད་ཅིང་བརྗོད་པར་འདོད་པ་ཡིན་ནོ། །དེ་ལ་འཚེ་བའི་བདག་ཉིད་ཅན། །བྱིན་ཚེ་སྣ་ནས་འཛག་པ་དང་། །ལྕེ་ཉམས་མིག་ནི་གཏིང་དུ་འབྲོས། །བདེ་མེད་མིག་ནི་མཆི་མར་བཅས།
ཉམ་ཆུང་ཚིག་ནི་དམན་པ་དང་། །དྲི་ང་བ་ནི་འབྱུང་བར་འགྱུར། །སྐེམ་ཞིང་རང་གི་བཤང་དང་གཅི། །ལག་བས་ཉེད་ཀྱི་སྨོད་མི་བྱེད། །ལག་བས་བཏེག་སྟེ་འབད་པ་ཡིས། །བདག་དང་དེ་བཞིན་གཞན་ལ་བརྡེག །མཚོན་དང་ཤིང་སོགས་ཀྱིས་བརྡེགས་ཤིང་། །འབར་བའི་
མེ་ལ་འཇུག་པར་བྱེད། །ཆུ་ནང་འབྱིང་ཞིང་ཁྲོན་པར་ལྟུང་། །གཞན་ཡང་དེ་འདྲར་བྱེད་པར་འགྱུར། །སྐོམ་དད་ཆེ་ཞིང་ཚ་བས་གནག །སློན་པར་བྱེད་པར་འགྱུར་པ་དང་། །བུ་ག་ཀུན་ནས་ཁྲག་འཛག་ཅིང་། །འཆི་ལྟས་བྱུང་བ་དེ་སྦང་བྱ། །ཞེས་བྱ་བ་ལ། དེ་ལ་གདོན་
དེ་རྣམས་ཀྱི་ནང་ནས་གདོན་འཚེ་བའི་བདག་ཉིད་ཅན་ཞེས་བྱ་བས་ནི། །བྱིས་པ་འཚོ་བའམ། ཡང་ན་འཚེ་བའི་མཚན་ཉིད་དང་ལྡན་པ་དག་ལ་འཛིན་ཅིང་དེ་སྣ་ནས་འཛག་པ་དང་། །ལྕེ་ཉམས་པ་ལ་སོགས་པ་ནས་མཚོན་དང་ཤིང་ལ་སོགས་པའི་བར་གྱིས་ཀྱང་བདག་དང་
เล่ม ๒๐๒ · หน้า 105a
གཞན་ལ་རྡེག་པར་བྱེད་པ་དང་། མེ་ལ་འཇུག་པ་དང་། ཆུའི་ནང་དུ་ལུས་བྱིང་བ་དང་། ཁྲོན་པར་མཆོང་ཞིང་ལྟུང་བ་དང་། གཞན་ཡང་འཚེ་བའི་ལས་དེ་ལྟ་བུ་གཞན་ཡང་བྱེད་པར་འགྱུར་བ་དང་། སྐོམ་དད་ཆེ་བ་ལ་སོགས་པ་ཡིན་ཏེ། དེ་ལྟ་བུའི་འཚེ་
བའི་བདག་ཉིད་ཅན་གྱིས་ཟིན་པ་གང་ཡིན་པ་དེ་ནི་གསོར་མི་རུང་བས་སྤང་བར་བྱའོ། །དགའ་བ་འདོད་པས་གཟིར་གྱུར་པ། །དབེན་པར་བུད་མེད་འདོད་སྨྲ་དགའ། །དྲི་དང་མེ་ཏོག་ཕྲེང་རྒྱན་དགའ། །མགུ་ཞིང་ཞི་བ་གསོ་བར་དཀའ། །ཞེས་བྱ་བ་ལ། དགའ་བ་འདོད་པ་ཞེས་བྱ་
བའི་གདོན་གྱིས་མི་ཆེན་པོ་འམ། །བྱིས་པ་ཟིན་པར་གྱུར་པ་ནི། དབེན་པའི་གནས་སུ་བུད་མེད་དང་ལྷན་ཅིག་འདོད་པ་སྤྱོད་པ་དང་། སྨྲ་བ་ལ་དགའ་བར་འགྱུར་བ་དང་། དྲི་དང་མེ་ཏོག་ལ་སོགས་པ་ལ་དགའ་བར་འགྱུར་བ་དང་། །སེམས་མགུ་ཞིང་དགའ་བ་ལ་བརྟགས་པ་དང་།
སྤྱོད་ལམ་ཞི་བ་དང་། གདོན་དེ་གསོ་བར་དཀའ་བ་ཡིན་ནོ། །ལྕེས་ནི་ཁ་ལ་ཉུག་པ་དང་། །མཆུ་རྐན་གྲེ་བ་སྐམས་པ་དང་། །དོགས་པས་ལྟ་ཞིང་ངུ་བ་དང་། །སེམས་ཁོང་ཆུད་ཅིང་ཞུམ་པ་དང་། །ཟས་འདོད་ལྟོགས་པར་གྱུར་ཀྱང་ནི། །བྱིན་ན་ཟ་བར་མི་འདོད་པ། །གཏོར་མ་
འདོད་པས་ཟིན་པ་སྟེ། །དེ་ནི་གསོ་སླ་ཡིན་ཞེས་བྱ། །ཞེས་བྱ་བ་ལ། གཏོར་མ་འདོད་པ་ཞེས་བྱ་བའི་གདོན་ཡོད་དེ། །དེས་བྱིས་པ་འམ། མི་ཆེན་པོ་གང་དག་ཟིན་པར་གྱུར་པ་དེ་ནི་ལྕེས་ཁ་ལ་འབྱུག་ཅིང་འབྱུག་པ་དང་། མཆུ་ལ་སོགས་པ་བསྐམ་པར་འགྱུར་བ་དང་། །དོགས་པ་དང་
བཅས་བས་ཀུན་ལ་ལྟ་བ་དང་། ངུ་ཞིང་ང་རོ་འབྱིན་པ་དང་། སེམས་ཁོང་དུ་ཆུད་པ་དང་། ཡིད་ཞུམ་པར་འགྱུར་བ་དང་། ཟས་འདོད་ཅིང་ཤིན་ཏུ་བཀྲེས་པར་གྱུར་ཀྱང་ཟས་བྱིན་ན་ཟས་མི་འདོད་པར་གྱུར་པ་ནི་གཏོར་མ་འདོད་པ་ཞེས་བྱ་བའི་གདོན་གྱིས་ཟིན་པ་ཡིན་པར་ཤེས་པར་བྱ་སྟེ།
དེ་ནི་གསོ་སླ་བ་ཡིན་ནོ། །གསོད་འདོད་པ་ལས་གྲུབ་པ་ཡི། །སྔགས་བཟླས་སྦྱིན་སྲེག་བྱ་བས་གཞོམ། །ཞེས་བྱ་བ་ལ། གདོན་སྲོག་འདོད་པ་ཞེས་བྱ་བ་གསོད་པར་འདོད་པ་ཡོད་དེ། དེ་ལ་ནི་གྲུབ་ཅིང་འབྲས་བུ་མངོན་དུ་སྣང་བའི་མཐུ་དང་ལྡན་པས་སྔགས་བཟླས་ཤིང་སྦྱིན་སྲེག་བྱ་བས་
เล่ม ๒๐๒ · หน้า 105b
གཞོམ་ཞིང་གསོ་བར་བྱའོ། །ཅིག་ཤོས་ལ་ནི་ཅི་འདོད་པར། །དགའ་དང་གཏོར་མ་སོགས་སྦྱིན་པས། །ཞེས་བྱ་བ་ལ། གསོད་པར་འདོད་པས་ཅིག་ཤོས་སུ་གྱུར་པའི་གདོན་དགའ་པར་འདོད་པ་དང་། གཏོར་མ་འདོད་པ་ཞེས་བྱ་བ་ལ་ནི་དགའ་བ་དང་། །གཏོང་མ་སྦྱིན་པས་གསོ་
བར་བྱ་སྟེ། །དགའ་བར་འདོད་པ་ལ་ནི་རྩེ་དགའི་བྱ་བ་སྦྱིན་པས་གསོ་ལ། གཏོར་མ་འདོད་པ་ལ་ནི་གཏོར་མ་སྦྱིན་པས་གསོ་བར་བྱའོ། །སོགས་པ་སྨོས་པས་ནི་འོག་ནས་བཤད་པའི་ཆོ་ག་གཞན་དག་ཀྱང་སྦྱར་བར་བྱའོ། །དེ་ནས་གསོར་རུང་གདོན་ལ་ནི། །བྱིས་པ་ཁང་བ་དབེན་
པར་གཞག །ཞག་གསུམ་ཆག་ཆག་ཕྱག་དར་བྱས། །རྟག་ཏུ་མེ་ནི་བཞག་པ་ཡི། །པུ་ཏིའི་མེ་ཏོག་སིལ་མ་དང་། །འདབ་མ་ས་བོན་ཡུངས་ཀར་གཏོར། །གདོན་འཇོམས་ཏིལ་མར་སྦར་བ་ཡི། །མར་མེས་གདོན་ནི་འཇོམས་པར་བྱེད། །ནད་གཡོག་ཉལ་པོ་ཆང་དང་
ཤ། །ཡོང་སུ་སྤངས་པར་གྱུར་པ་ཡི། །མར་ནི་རྙིང་པས་བསྐུས་ནས་ནི། །པ་ལ་ནིམ་པ་ཏར་ཀ་རི། །དོང་གྲ་ཐང་ཤིང་ཀ་ཏབ་ག །འཛམ་བུ་དང་ནི་ཏ་མ་ལ། །ཀ་ཏྲི་ན་དང་ལྕམ་པ་དང་། །ཨ་པ་མརྒ་པ་ཏ་ལི། །མ་དུ་ཤི་ཀྲུ་ཞེས་བྱ་དང་། །ཀ་ཀ་ཛ་ཀ་ཤྲེ་ཏ་ཆེ། །བིལ་རྐང་འོ་མ་ཅན་
གྱི་ཤིང་། །ཀ་དམ་པ་བཅས་ཀརཉྫ། །ཆུ་ནི་དྲོ་འཇམ་དག་གིས་བཀྲུ། །ཞེས་བྱ་བ་ལ། དེ་ནས་གསོར་རུང་བའི་གདོན་གྱིས་ཟིན་པའི་བྱིས་པ་ཁང་པ་དབེན་ཞིང་ཡངས་པར་ཞག་གསུམ་གྱི་བར་དུ་ཆག་ཆག་དང་། ཕྱག་དར་ལན་གསུམ་བྱས་ལ་རྟག་པར་རྒྱུན་མི་འཆད་བར་མེ་
གཞག་པ་དང་། །པུ་ཏི་ལ་སོགས་པའི་མེ་ཏོག་གི་སིལ་མ་གཏོར་བར་བྱ་བ་དང་། དེ་བཞིན་དུ་གདོན་འཇོམས་པའི་རྫས་ཡུངས་མར་ལ་སོགས་པ་སྤར་བའི་མར་མེ་གཞག་པར་གྱུར་པ་དེར་ནད་པ་དེ་གཞག་ལ། ནད་གཡོགས་འཁྲིག་པ་ལ་སོགས་པ་སྤངས་པར་བྱུང་པ་དག་གིས་མར་རྙིང་པས་
ནད་པའི་ལུས་བསྐུས་ལ་བ་ལ་དང་ནིམ་པ་ལ་སོགས་པའི་སྨན་དང་། བསྐོལ་བའི་ཆུ་དྲོ་འཇམ་ཙམ་གྱིས་བླུགས་ཤིང་ནད་པ་བཀྲུ་བར་བྱའོ། །ཏར་ཀ་རི་ནི་ཨག་ནི་མན་ཏའོ། །ཀ་ཏང་ག་ནི་ཨ་རུ་ལ་ཀའོ། །ཏ་མ་ལ་ནི་བར་ནའོ། །ཀ་ཏྲི་ན་ནི་བུ་ཏྲི་ནའོ། །ལྕམ་པ་ནི་སུ་པར་ཙ་ལའོ། །མ་དུ་
เล่ม ๒๐๒ · หน้า 106a
ཤི་ཀྲུ་ནི་སོ་བན་ཛ་ནའོ། །ཤྭེ་ཏ་ཆེ་ནི་མ་ཧཱ་ཀཤྤེ་ཏ་སྟེ་གི་རི་ཀར་ཎིའོ། །འོ་མ་ཅན་གྱི་ཤིང་ནི་ནྱ་གྲོ་དྷའི་ཤིང་ལ་སོགས་པའོ། །ཀ་དམ་པ་ནི་ཨམ་པ་དན་པའོ། །སྟག་དང་གཟིག་དང་སེང་གེ་སྦྲུལ། །དོམ་གྱི་པགས་པ་མར་དང་བཅས། །བདུག་པས་ཁྲུས་བྱས་འོག་ཏུ་
འདུག །ཅེས་བྱ་བ་ལ། བྱིས་པ་ཁྲུས་བྱས་པའི་འོག་ཏུ་སྟག་ལ་སོགས་པའི་པགས་པ་བསྲེགས་པའི་དུད་པས་ལུས་ལ་བདུག་པར་བྱའོ། །པུ་ཏི་ཡུངས་ཀར་ཤ་རང་ག །ཤུ་དག་གོ་བྱེ་ལ་ལ་ཕུད། །རུ་རྟ་མར་བཅས་བདུག་པས་ནི། །གདོན་ཀུན་ལས་ནི་ཐར་བྱེད་ཡིན། །ཞེས་
བྱ་བ་ལ། པུ་ཏི་ཀ་རཉྫ་དང་། ཤ་རང་གའི་རྩ་བ་དང་། ལོ་མ་དང་། མེ་ཏོག་དང་། འབྲས་བུ་དང་། མྱུ་གུ་དང་། ཤིང་གི་ནང་གི་སྙིང་པོ་དང་། ཁུ་བ་དང་། ཚེར་མ་དང་། ཤུ་དག་ལ་སོགས་པའི་སྨན་གྱི་བདུགས་པས་ཀྱང་བྱིས་པའི་གདོན་ཐམས་ཅད་ལས་ཐར་བར་བྱེད་དོ། །
ཡུངས་ཀར་ནིམ་པའི་ལོ་མ་དང་། ཤུ་དག་ཀ་ར་བཱི་རའི་རྩ། །གྲོ་བ་མར་སྦྱར་བདུགས་པས་ནི། །གདོན་ནི་ཐམས་ཅད་སེལ་བར་བྱེད། །ཅེས་བྱ་བ་ལ། ཡུངས་ཀར་ལ་སོགས་པའི་སྨན་མར་དང་སྦྱར་བའི་དུད་པ་བྱིས་པ་ལ་བདུགས་ན་ཡང་གདོན་ཐམས་ཅད་སེལ་བར་བྱེད་དོ། །བ་ལང་
རྭ་དང་རུས་པ་སྤུ། །པགས་བ་བྱི་ལིའི་རྟུག་པ་དང་། །ནིམ་པའི་ལོ་མ་པུ་ཙེ་ཤེལ། །མར་དང་བྲི་ཧ་ཏི་གཉིས་དང་། །རས་བལ་ས་བོན་པོ་སོན་ཆ། །ནས་དང་ར་སྤུ་ཐང་ཤིང་དང་། །ཡུངས་ཀར་རྨ་བྱའི་སྒྲོ་དང་པོག །སྐྲ་དང་ཕུབ་མ་ཕ་བང་དང་། །རྫ་མར་ར་ཐུག་གཅིན་དང་སྦངས། །
ཞིབ་བཏགས་པ་ཡི་བདུགས་པས་ནི། །འབྱུང་པོའི་གདོན་ན་ཐམས་ཅད་དང་། །མི་བཟད་རིམས་ནི་འཇོམས་པར་བྱེད། །ཅེས་བྱ་བ་ལ། བ་ལང་གི་རྭ་ལ་སོགས་པའི་སྨན་རྫ་སྣོད་སར་པའི་ནང་དུ་ཪ་ཐུག་གི་གཅིན་དང་སྦངས་ཏེ། གཅིན་དེ་ཉིད་བཏགས་པའི་རེང་བུ་སྐམ་པོའི་དུད་
པས་ནི་གདོན་ཐམས་ཅད་དང་རིམས་ནད་ཐམས་ཅད་འཇོམས་པར་བྱེད་དོ། །བྱི་ཚེར་ཨ་མྲའི་ཚི་གུ་དང་། །རྒྱ་སྦོས་མངར་སྡེ་ན་ལེ་ཤམ། །ཀྲྀཥྞ་པརྞི་གླ་སྒང་རྣམས། །ལྡེ་གུར་བཅས་པ་མར་དང་ནི། །འོ་མ་རྩ་བ་བཅུ་བསྐོལ་ཁུར། །བཅས་བསྐོལ་དེ་ནི་གདོན་འཇོམས་མཆོག །ཅེས་
เล่ม ๒๐๒ · หน้า 106b
བྱ་བ་ལ། ཨ་མྲའི་ཚི་གུ་ནི་ཨ་མྲའི་འབྲས་བུའི་ནང་ན་ཡོད་པའོ། །མངར་བའི་སྡེ་ཚན་ནི་འཚོ་བྱེད་ཀྱི་སྡེ་ཚན་ནོ། །གཞན་ནི་གོ་བར་ཟད་དེ་རྫས་དེ་དག་ལྡེ་གུར་བྱས་པ་དང་། མར་ལ་སོགས་པ་བསྐོལ་ཏེ། མར་དེ་བླུད་ན་གདོན་ཐམས་ཅད་འཇོམས་པར་བྱེད་དོ། །ར་སྣ་ཨཾ་ཤུ་མ་ཏི་གཉིས། །
བ་ལ་རྩ་བ་ཆེན་པོ་ལྔ། །གླ་སྒང་བཏགས་ཏེ་མར་དང་བསྐོལ། །ཚ་བ་གསུམ་དང་ཙི་ཏྲ་ཀའི། །ཐལ་ཏེས་བ་ཏྲ་བྱི་དང་ག །ཤིང་མངར་ཤིང་ཀུན་པ་ཡ་སྱ། །ཐང་ཤིང་པི་པི་ལིང་རྩ་བ། །དུག་མོ་ཡུངས་དང་བཅས་པ་ཡི། །ལྡེ་གུ་མར་དང་བསྐོལ་བ་ཡིས། །རྟག་ཏུ་བྱིས་པ་ལ་ཕན་
ཞིང་། །ནད་དང་གདོན་ནི་ཐམས་ཅད་འཇོམས། །མེ་དྲོད་སྟོབས་དང་ཁ་དོག་སྐྱེད། །ཅེས་བྱ་བ་ལ། །ར་སྣ་དང་ཨཾ་ཤུ་མ་ཏི་གཉིས་ཀྱི་ལོ་མ་ལ་སོགས་པའི་སྨན་གྱི་ལྡེ་གུ་དང་བསྐོལ་བའི་མར་ནི་བྱིས་པ་ལ་རྟག་ཏུ་ཕན་ཞིང་རིམས་ལ་སོགས་པའི་ནད་དང་འབྱུང་པོ་ལ་སོགས་པའི་གདོན་ཐམས་
ཅད་འཇོམས་པར་བྱེད་ཅིང་མེ་དྲོད་སྐྱེད་པ་དང་། །ལུས་ཀྱི་སྟོབས་དང་། ཁ་དོག་སྐྱེད་པ་ཡིན་ནོ། །ཤ་རི་བ་དང་མུ་ར་དང་། །བྲ་ཧྨི་ཤུ་དག་ཤང་ཁི་ནི། །ཡུངས་ཀར་ཨཤྭ་གནྡྷ་དང་། བྱེ་རུག་པ་བཅས་མར་དང་བསྐོལ། །དེ་ནི་བཏུང་བ་འམ་བསྐུ་བ་ཡིས། །གདོན་རྣམས་ཐམས་ཅད་
འཇོམས་པར་བྱེད། །ཅེས་བྱ་བ་ལ། ཤ་རི་བ་ལ་སོགས་པ་ལྡེ་གུ་དང་མར་དུ་བསྐོལ་བའི་མར་དེ་བཏུང་བ་འམ་བསྐུ་བ་བྱས་ན་གདོན་ཐམས་ཅད་འཇོམས་པར་བྱེད་པ་ཡིན་ནོ། །མར་གང་འབྱུང་པོའི་རིག་པ་རུ། །འོག་ནས་བཤད་པ་དག་དང་ནི། །དེ་བཞིན་གཏོར་མ་སྦྱིན་སྲེག་དང་། །
ཁྲུས་ནི་སྔགས་རྒྱུད་ཤེས་པས་སྦྱར། །ཞེས་བྱ་བ་ལ། སྨན་མར་གང་འབྱུང་བོའི་རིག་པ་ཞེས་བྱ་བ། །འབྱུང་པོའི་ནད་གསོ་བའི་སྐབས་ནས་འབྱུང་བ་གང་ཡིན་པ་ཡང་བྱིས་པ་ལ་སྦྱར་བར་བྱ་ལ། དེ་བཞིན་དུ་འོག་ནས་བཤད་པའི་གཏོར་མ་དང་། གཞན་ཡང་སྦྱིན་སྲེག་གི་ལས་དང་
ཁྲུས་ཀྱི་ཆོ་ག་གང་ཡིན་བདག་ཀྱང་སྔགས་ཀྱི་རྒྱུད་ཤེས་པའི་སྔགས་བས་སྔགས་ལས་བཤད་པའི་ཆོ་ག་བཞིན་དུ་སྦྱར་བར་བྱའོ། །པུ་ཏི་ཀར་ཉྫའི་ཤུན་པ། །བར་བ་ར་ཡི་རྩ་བ་དང་། །ཀུ་བ་ཁ་བོ་བི་ཤ་ལ། །ཀ་ཏྲ་ཀ་དང་བིལ་པ་དང་། །ཀ་པིད་ཐ་བསྐོལ་དེས་མཚན་མོ། །བྱིས་པ་བཀྲུས་ན་ཤིས་
เล่ม ๒๐๒ · หน้า 107a
པ་ཡིན། །ཞེས་བྱ་བ་ལ། པུ་ཏི་ཀ་ར་ཉྫའི་ཤུན་པ་དང་། །ལོ་མ་དང་། ཤིང་མངར་བར་བ་རེའི་རྩ་བ་དང་། ཀུ་བ་ཁ་བོ་ནས་བིལ་པ་དང་། ཀ་པིད་ཐའི་བར་ཆ་མཉམ་པར་བྱས་པ་བསྐོལ་བའི་ཆུ་དེས་མཚན་མོ་བྱིས་པ་བཀྲུས་ན་ཤིས་ཤིང་དཔལ་བསྐྱེད་བ་ཡིན་
ནོ། །གདོན་དང་བྲལ་ཡང་བླ་བརྣན་ནད། །རྗེས་སུ་འབྲེལ་པ་ཐམས་ཅད་ལ། །བྱིས་པའི་ནད་གསོར་བཤད་པ་ཡི། །སྨན་གྱིས་ཇི་བཞིན་གསོ་བར་བྱ། །ཞེས་བྱ་བ་ལ། གནོད་པ་བསལ་ཞིང་དེ་དང་བྲལ་བར་གྱུར་ཀྱང་བླ་བརྣན་གྱི་ནད་དང་རྗེས་སུ་འབྲེལ་བར་གྱུར་ཅིང་ཡུན་རིང་དུ་གནས་
པར་གྱུར་པ་དེ་ཐམས་ཅད་ལ་ནད་དམིགས་ཇི་ལྟ་བ་བཞིན་དུ་བྱིས་པའི་ནད་གསོ་བར་བཤད་པའི་སྨན་གྱིས་གསོ་ཞིང་བཅོས་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། གནས་ཕྱི་མའི་
ལེའུ་གསུམ་པའི་འགྲེལ་པའོ། །བྱིས་པ་གསོ་བའི་བཤད་པ་རྫོགས་སོ།། །།དེ་ནས་འབྱུང་པོའི་གདོན་གྱི་ནད་དམིགས་ཤེས་པ་བཤད་པར་བྱའོ །ཞེས་བྱ་བ་ལ། བྱིས་པའི་གདོན་གྱི་རྗེས་ལ་འབྱུང་པོའི་གདོན་གྱི་དམིགས་ཤེས་པར་བྱ་བའི་ལེའུ་བཞི་པ་ནི་དེ་ཉིད་དུ་
བརྩམ་པར་འོས་པ་ཡིན་ནོ། །གདོན་ཕལ་ཆེར་ཕན་ཚུན་གཅིག་ལ་གཅིག་གསོ་བའི་ཚུལ་གཅིག་སྟེ་ཁྱད་པར་མེད་པ་ཡིན་པའི་ཕྱིར་རོ། །ཤེས་དང་རྣམ་ཤེས་ཚིག་དང་ནི། །སྤྱོད་པ་སྙིང་སྟོབས་རང་བཞིན་དག །གང་གི་རང་བཞིན་འགྱུར་བར་སྣང་། །དེ་ལ་འབྱུང་པོའི་གདོན་ཡོད་བཤད།
ཅེས་བྱ་བ་ལ། སྐྱེས་བུ་གང་ཤེས་པ་ལ་སོགས་པ་རང་བཞིན་འགྱུར་ཞིང་ཕྱིན་ཅི་ལོག་ཏུ་སྣང་ན། །མི་དེ་ལ་འབྱུང་པོའི་གདོན་ཡོད་ཅེས་ངེས་པར་བཤད་པར་བྱའོ། དེ་ལ་ཤེས་པ་ནི་འཇིག་རྟེན་པའི་སྒྲ་ཤེས་པས་བརྩམ་མོ། །རྣམ་པར་ཤེས་པ་ནི་སྐབས་འདིར་ཁྱད་པར་ཤེས་པས་དེ་ཁོ་ན་ཉིད་
རྟོགས་པའོ། །འབྱུང་པོའི་གཟུགས་དང་རང་བཞིན་དང་། །སྨྲ་དང་འགྲོ་སོགས་སྤྱོད་པ་དང་། །གང་ཞིག་འདྲེ་བར་བྱེད་པ་དག །དེ་ལ་དེ་ནི་ཞུགས་པར་བཤད། །ཅེས་བྱ་བ་ལ། །འབྱུང་པོ་ནི་ལྷ་དང་ལྷ་མ་ཡིན་དང་དྲི་ཟ་ལ་སོགས་པའི་དབྱེ་བས་ཕྱེ་བའི་སེམས་ཅན་རྣམས་ཏེ།
เล่ม ๒๐๒ · หน้า 107b
དེའི་གཟུགས་དང་རང་བཞིན་ལ་སོགས་པའི་ཚུལ་མཐུན་པར་བྱེད་པ་གང་ཡིན་པ་དེ་ནི་མི་དེ་ལ་གདོན་དེ་ཞུགས་པ་ཡིན་པར་ཤེས་པར་བྱའོ། །དེ་ནི་ལྷ་དང་ལྷ་མིན་སོགས། །དབྱེ་བ་རྣམ་པ་བཅོ་བརྒྱད་བཤད། །ཅེས་བྱ་བ་ལ། འབྱུང་པོའི་གདོན་ལྷ་དང་མི་དང་ལྷ་མ་ཡིན་དང་དྲི་ཟ་ལ་སོགས་པའི་དབྱེ་བས་
མདོར་བསྡུས་ན་གྲངས་བཅོ་བརྒྱད་ཡིན་པར་ཤེས་པར་བྱའོ། །དེ་འཛིན་རྒྱུ་ནི་འཕྲལ་གཏམ་ནི། །སྔོན་ཆད་ཤེས་རབ་འཚོལ་བ་ཡི། །བློ་ཡིས་ཉེས་པ་བྱས་གྱུར་ནས། །དེ་ཡི་ཆགས་པ་སོགས་བསྐྱེད་པས། །བརྟུལ་ཞུགས་སྤྱོད་དང་ཆོས་ལུགས་ཉམས། །མཆོད་འོས་རྣམས་ནི་བརྙས་པ་
དང་། །གཞུང་ལུགས་ཉམས་པ་དེ་དང་ནི། །སྡིག་དང་བདག་ཉིད་གསོད་བྱེད་ན། །གདོན་ནི་གླགས་སྐབས་ཚོལ་བྱེད་པས། །ལྷ་ལ་སོགས་པ་འང་རྗེས་གནོད་བྱེད། །ཅེས་བྱ་བ་ལ། གདོན་དེ་རྣམས་འཛིན་ཅིང་འཇུག་པའི་རྒྱུ་ནི་ཤེས་རབ་འཆལ་བའི་དབང་གིས་ཉེས་པའི་ལས་ཚེ་འདིར་འཕྲལ་
དུ་བྱས་པ་འམ། ཡང་ན་སྔོན་ཆད་བྱས་པར་གྱུར་ལ། །རྒྱུ་དེའི་དབང་གིས་ཆགས་པ་དང་། ཁྲོ་བ་དང་ང་རྒྱལ་ལ་སོགས་པ་སྐྱེས་པར་གྱུར་བས་སྐྱེས་བུ་བརྟུལ་ཞུགས་དང་སྤྱོད་པ་དང་རང་གི་ཆོས་ལུགས་ཉམས་པར་གྱུར་ཅིང་མཆོད་པར་འོས་པ་བླ་མ་ལ་སོགས་པ་ལ་བརྙས་པར་བྱེད་པ་དང་། དེ་བཞིན་
དུ་རང་གི་ཆོས་ལུགས་སམ། །འཇིག་རྟེན་པའི་ཁྲིམས་ཀྱི་གཞུང་ལས་ཉམས་པར་བྱེད་པ་དང་། སྡིག་པའི་ཚུལ་ལ་སོགས་པ་བྱེད་པར་འགྱུར་ལ། དེ་ལྟ་བུའི་གླགས་རྙེད་བ་དང་། གླགས་སྐབས་ཚོལ་བར་བྱེད་པའི་གདོན་གྱི་རིགས་ལྷ་ལ་སོགས་པ་རྣམས་ཀྱིས་དེ་ལ་གནོད་ཅིང་འཚེ་པར་བྱེད་དོ། །
གླགས་ནི་སྡིག་ལ་སོགས་པ་དང་། །མི་དགེའི་ལས་ནི་སྨིན་པ་དང་། །གཅིག་པུར་ཁང་སྟོང་གནས་པ་འམ། །དུར་ཁྲོད་སོགས་པར་མཚན་མོ་གནས། །གཅེར་བུར་རྒྱུ་བ་འམ་བླ་མ་སྨོད། །འཁྲིག་པ་ཚུལ་མིན་སྤྱོད་པ་དང་། །གཙང་སྦྲ་མེད་པར་ལྷ་མཆོད་དང་། །མི་གཙང་གཞན་དང་
འདྲེས་པ་དང་། །སྦྱིན་སྲེག་སྔགས་གཏོར་མཆོད་སྦྱིན་རྣམས། །ཕྱིན་ཅི་ལོག་ཏུ་བྱེད་པ་དང་། །མདོར་ན་ཉིན་རེ་སྤྱོད་སོགས་པས། །སྤྱོད་པ་བརྟན་པ་ལས་འདས་པའོ། །ཞེས་བྱ་བ་ལ། །གདོན་དེ་རྣམས་འཛིན་ཅིང་གླགས་སྐབས་ཚོལ་བའི་རྒྱུ་ནི་སྲོག་གཅོད་པ་ལ་སོགས་པའི་སྡིག་པ་ལ་བརྩོན་
เล่ม ๒๐๒ · หน้า 108a
པར་བྱེད་པ་དང་། སྔོན་ཆད་མི་དགེ་བའི་ལས་བྱས་པར་འགྱུར་པ་སྨིན་ཅིང་ཉམས་སུ་མྱོང་བའི་དུས་ལ་བབ་པ་དག་ནི་གདོན་དེ་ལ་འཇུག་པའི་གླགས་སྐབས་ཡིན་ནོ། །དེ་བཞིན་དུ་གཅིག་པུ་གྲོགས་མེད་པར་ཁང་སྟོང་ལ་སོགས་པར་གནས་པ་དང་། ཡང་ན་དུར་ཁྲོད་དང་། ཤིང་
ཆེན་པོའི་དྲུང་དང་། བས་མཐའ་ལ་སོགས་པར་མཚན་མོ་གནས་ཤིང་ཉལ་བ་དང་། དེ་བཞིན་དུ་དུས་སུ་ཕྱོགས་ཀྱི་གོས་འཆང་ཞིང་གོས་སྤང་པ་དང་། དེ་བཞིན་དུ་མཆོད་པར་འོས་པའི་བླ་མ་རྣམས་ལ་སྨོད་ཅིང་བརྙས་པ་དང་། དུས་ཚིགས་དག་ཏུ་སྤྱོད་པ་དང་། བུད་མེད་ཟླ་མཚན་དང་ལྡན་
པ་ལ་འཁྲིག་པ་སྤྱོད་པར་བྱེད་པ་དང་། གཙང་སྦྲའི་སྤྱོད་པ་མེད་པར་ལྷ་ལ་མཆོད་པར་བྱེད་པ་དང་། གཞན་བུ་བཙས་ཤིང་མི་གཙང་བ་དག་དང་འདྲེས་ཤིང་རེག་པ་དང་། སྦྱིན་སྲེག་ལ་སོགས་པའི་ལས་ཕྱིན་ཅི་ལོག་ཏུ་བྱེད་ཅིང་དེའི་བརྟུལ་ཞུགས་ཉམས་པ་སྟེ། མདོར་ན་ཉིན་རེ་ཞིང་རྟག་ཏུ་
སྤྱད་པའི་ལེའུ་ལས་སྨོས་པའི་སྤྱོད་པ་དག་ལས་འདས་པར་གྱུར་པ་དེ་ཐམས་ཅད་ནི་གདོན་འཇུག་པའི་གླགས་སྐབས་ཀྱི་རྒྱུ་ཡིན་ནོ། །ལྷ་ཡི་གདོན་གྱི་ཡར་ངོ་ཡི། །ཚེས་གཅིག་བཅུ་གསུམ་དག་ལ་འཛིན། །ཞེས་བྱ་བ་ལ། གདོན་དེ་དག་ལས་ལྷའི་གདོན་འཛིན་པའི་དུས་ནི་ཡར་ངོའི་ཚེས་
གཅིག་དང་བཅུ་གསུམ་པ་ལ་འཛིན་པར་བྱེད་དོ། །ལྷ་མིན་གདོན་ནི་ཡར་ངོ་ཡི། །བཅུ་གསུམ་མར་ངོའི་བཅུ་གཉིས་ལ། །ཞེས་བྱ་བ་ལ། ལྷ་མ་ཡིན་གྱི་གདོན་ཡར་ངོའི་ཚེས་བཅུ་གསུམ་དང་མར་ངོའི་ཚེས་བཅུ་གཉིས་ལ་འཛིན་པར་བྱེད་དོ། །དྲི་ཟའི་གདོན་ནི་བཅུ་བཞི་དང་། །བཅུ་གཉིས་དག་
ལ་འང་འཛིན་པར་བྱེད། །ཅེས་བྱ་བ་ལ། དྲི་ཟའི་གདོན་གྱིས་ནི་མར་ངོའི་ཚེས་བཅུ་བཞི་དང་བཅུ་གཉིས་ལ་འཛིན་པར་བྱེད་དོ། །ཀླུ་གདོན་ཚེས་ལྔ་ལ་འཛིན་བྱེད། །ཅེས་བྱ་བ་ལ། ཀླུའི་གདོན་ནི་ཟླ་བ་ཡར་ངོའི་ཚེས་ལྔ་ལ་འཛིན་ཏོ། །གནོད་སྦྱིན་གདོན་ནི་ཡར་ངོ་ཡི། །ཚེས་བདུན་བཅུ་གཅིག་དག་
ལ་འཛིན། །ཞེས་བྱ་བ་ལ། གནོད་སྦྱིན་གྱི་གདོན་ཞེས་བྱ་བ་ནོར་གྱི་བདག་པོའི་གདོན་ནི་ཟླ་བ་ཡང་ངོའི་ཚེས་བདུན་དང་བཅུ་གཅིག་དག་ལ་འཛིན་ནོ། །ཚངས་པ་སྲིན་པོ་ཡར་ངོ་ཡི། །ཚེས་བརྒྱད་བཅོ་ལྔ་དག་ལ་འཛིན། །ཞེས་བྱ་བ་ལ། ཚངས་པ་སྲིན་པོ་ཞེས་བྱ་བའི་གདོན་ནི་ཚེས་བརྒྱད་དང་
เล่ม ๒๐๒ · หน้า 108b
ཟླ་བ་ལ་མི་ལ་འཛིན་པར་བྱེད་དོ། །སྲིན་པོ་ཤ་ཟ་སོགས་མར་ངོའི། །ཚེས་གཅིག་ཚེས་དགུ་བཅུ་གཅིག་ལ། ཞེས་བྱ་བ་ལ། སྲིན་པོ་ལ་སོགས་པའི་གདོན་ནི་མར་ངོའི་ཚེས་གཅིག་དང་ཚེས་དགུ་དང་བཅུ་གཅིག་ལ་འཛིན་ཏོ། །མཚུན་ལྷ་གནམ་སྟོང་ཚེས་བཅུ་དང་། །བརྒྱད་དང་དགུ་པ་དག་
ལ་འཛིན། །ཞེས་བྱ་བ་ལ། མཚུན་ལྷར་གཏོགས་པའི་གདོན་ནི་གནམ་སྟོང་ལ་སོགས་པ་ལ་འཛིན་ནོ། །རྒན་པོ་ལ་སོགས་གཞན་དག་ནི། །ཕལ་ཆེར་དུས་དེའི་ཐུན་མཚམས་ལའོ། །ཞེས་བྱ་བ་ལ། རྒན་པོ་སྟེ། ཕ་མ་ལ་སོགས་པ་ལས་གདོན་དུ་གྱུར་པ་གཞན་དག་ལ་ནི་ཕལ་
ཆེར་ཚེས་བརྒྱད་དང་། ཚེས་དགུ་དག་ལ་ཉིན་མཚན་གྱི་ཐུན་མཚམས་ལ་འཛིན་པར་བྱེད་དོ། །ལྷ་ཡི་གདོན་གྱིས་དཔང་བྱས་ལ། །གདོང་ནི་པདྨ་ཁ་བྱེ་འདྲ། །ལྟ་སྟངས་ཞི་ཞིང་ཁྲོ་བ་མེད། །ཚིག་ཉུང་རྔུལ་དང་བཤང་གཅི་ཉུང་། ཁ་ཟས་ལ་ནི་གནོད་པ་མེད། །ལྷ་དང་བྲམ་ཟེ་ལ་རབ་དགའ། །
གཙང་ཞིང་སཾ་སྐྲྀ་ཏའི་སྐད་སྨྲ། །ཡུན་རིང་ནས་ནི་མིག་འཛུམས་ཤིང་། །ལུས་དྲི་ཞིམ་ཞིང་མཆོག་སྟེར་བྱེད། །གོས་ཕྲེང་དཀར་པོ་ཆུ་བོ་དང་། །རི་མཐོ་ཁང་པ་མཐོ་ལ་དགའ། །གཉིད་མེད་ཚུགས་པ་མེད་པ་ཡིན། །ཞེས་བྱ་བ་ལ། གདོན་དེ་དག་ལས་ལྷའི་གདོན་གྱིས་ཟིན་ཅིང་དབང་དུ་བྱས་
པའི་རྟགས་ནི་གདོང་པདྨ་ཁ་ཕྱེ་བ་འདྲ་བ་ལྟར་མདངས་དང་ལྡན་པ་དང་། ལྟ་སྟངས་ཞི་ཞིང་མི་སྡུག་པ་མེད་པ་དང་། ཁྲོ་ཞིང་འཁྲུག་པ་མེད་པ་དང་། ཚིག་ཉུང་ཞིང་རྔུལ་དང་བཤང་གཅི་ཉུང་བ་དང་། ཁ་ཟས་ལ་མི་གདུ་བ་དང་། ལྷ་དང་བྲམ་ཟེ་ལ་དགའ་ཞིང་མཆོད་པ་དང་། གཙང་ཞིང་
ཁྲུས་ལ་སོགས་བ་ལ་དགའ་བ་དང་། སཾ་སྐྲྀ་ཏའི་སྐད་དུ་སྨྲ་བ་དང་། མིག་ཡུན་རིང་ཞིག་ནས་འཛུམས་པར་བྱེད་པ་དང་། ལུས་ལ་དྲི་ཞིམ་པོའི་ངད་དང་ལྡན་པ་དང་། མཆོག་སྦྱིན་མཆོག་སྦྱིན་ནོ། །ཞེས་སྨྲ་བ་དང་། གོས་དཀར་པོ་ལ་སོགས་པ་ལ་དགའ་བ་དང་། མཚན་མོ་གཉིད་ཡར་
ཞིང་ཆུང་བ་དང་། གཞན་གྱིས་ཚུགས་པ་མེད་ཅིང་ཟིལ་གྱིས་མི་ནོན་ཏེ། དེ་ལྟ་བུའི་མི་དེ་ནི་ལྷའི་གདོན་གྱིས་དབང་དུ་བྱས་པ་ཡིན་པར་ཤེས་པར་བྱའོ། །ལྷ་མིན་གདོན་གྱིས་ཟིན་པ་ནི། །ཡོན་པོར་བལྟ་ཞིང་རང་བཞིན་དོན། །ལྷ་དང་བླ་མ་བྲམ་ཟེ་དང་། །འཇིགས་མེད་ཁེངས་ཤིང་དཔའ་བ་
เล่ม ๒๐๒ · หน้า 109a
དང་། །ཁྲོ་ཞིང་རྩོལ་བ་ཆེ་བ་དང་། །ད་ནི་དྲག་པོ་ཁྱབ་འཇུག་དང་། །སྐེམ་བྱེད་བརྒྱ་བྱིན་ཡིན་ཞེས་བཤད། །ཤ་དང་ཆང་ལ་དགའ་ཞེས་བྱ། །དྲི་ཟའི་གདོན་གྱིས་ཟིན་པའི་རྟགས། །རང་སྦྱོད་ལ་དགའ་ལུས་དྲི་ཞིམ། །སྙིང་དགའ་གླུ་དང་གར་ཡང་བྱེད། །
ཁྲུས་དང་སྐྱེད་མོས་ཚལ་ལ་དགའ། །གོས་ཕྲེང་བྱུག་པ་དམར་ལ་སྲེད། །སྒེག་དང་རྩེད་མོ་ལ་མངོན་དགའ། །ཀླུ་ཡི་གདོན་གྱིས་ཟིན་པའི་རྟགས། །མིག་དམར་ཁྲོ་ཞིང་མིག་འགྱུར་ལྟ། །ཡོན་པོར་འགྲོ་ཞིང་བལྟ་བ་དང་། །ཉིན་མཚན་དབུགས་རྒོད་ལྕེ་ལས་ནི། །ཁ་ཆུ་འཛག་
ཅིང་ཁ་འགྲམ་ལྷག །བུ་རམ་ལོ་མ་ཁྲུས་ལ་དགའ། །ཁ་བུབ་ཏུ་ནི་ཉལ་བར་བྱེད། །གདུགས་མཐོང་ན་ཡང་འཇིགས་པ་ཡིན། །ཞེས་བྱ་བ་ལ། དེ་ལ་ཀླུའི་གདོན་གྱིས་ཟིན་པའི་དབང་དུ་བྱས་པའི་རྟགས་ནི་མིག་དམར་ཞིང་ཁྲག་གིས་ཁྱབ་པ་དང་། ཁྲོ་ཞིང་ཞེ་སྡང་བའི་ངང་ཚུལ་དང་
ལྡན་པ་དང་། འགྱུར་བ་མེད་ཅིང་མིག་མི་འགྱུར་བར་ལྟ་བ་དང་། སྦྲུལ་ལྟར་ཡོན་པོར་འགྲོ་བ་དང་། གཡོ་ཞིང་མི་བརྟན་པ་དང་། ཉིན་དང་མཚན་དུ་རྒྱུན་དུ་དབུགས་རྒོད་ཅིང་འབྱིན་པ་དང་། ལྕེ་སྐྱོད་ཅིང་འབྱིན་པ་དང་། ཁ་ཆུ་འཛག་པ་དང་། མཆུ་གཉིས་ཀྱི་མཚམས་ཀྱི་ཁ་འགྲམ་
ལྷག་པ་དང་། བུ་རམ་ལ་དགའ་བ་དང་། འོ་མ་ལ་དགའ་བ་དང་། ཁྲུས་དང་གཙང་སྦྲ་ལ་དགའ་བ་དང་། །ཁ་བུབ་ཏུ་གདོང་ཕབ་སྟེ་ཉལ་བར་བྱེད་པ་དང་། གདུགས་མཐོང་ན་འཇིགས་ཤིང་སྐྲག་པར་བྱེད་པ་ཡིན་ནོ། །གནོད་སྦྱིན་གདོན་གྱིས་ཟིན་པའི་རྟགས། །མིག་དམར་བགྲང་ཅིང་
སྐྲག་ལ་འགུལ། །ལུས་དྲི་ཞིམ་ཞིང་གཟི་མདངས་ལྡན། །གཏམ་དང་གླུ་དང་ཁྲུས་དང་ནི། །ཕྲེང་བ་བྱུག་པ་ལ་དགའ་ཞིང་། །ཉ་ཡི་ཤ་སྲེད་དགའ་བ་དང་། །དགའ་མགུ་སྟོབས་ཆེ་ནད་མེད་ལ། །ལག་རྩེ་བསྐྱོད་ཅིང་སུ་ཞིག་ལ། །ཅི་ཞིག་སྦྱིན་ཞེས་སྨྲ་བར་བྱེད། །གསང་ཚིག་སྨྲ་ཞིང་སྨན་
པ་དང་། །བྲམ་ཟེ་ལ་ནི་བརྙས་པར་བྱེད། །ཁྲོ་བ་ཆུང་ཞིང་མགྱོགས་འགྲོ་བའོ། །ཞེས་བྱ་བ་ལ། དེ་ལ་གནོད་སྦྱིན་གྱི་གདོན་གྱིས་ཟིན་པའི་མཚན་མ་ནི་མིག་དམར་བ་བགྲད་ཅིང་སྐྲག་པའི་ཚུལ་དུ་འགུལ་བ་དང་། ལུས་ལ་བསོད་ནམས་ཀྱི་དྲི་ཞིམ་པོ་འབྱུང་བ་དང་། གཟི་མདངས་བཟང་པོ་
เล่ม ๒๐๒ · หน้า 109b
དང་ལྡན་པ་དང་། གཏམ་ལ་སོགས་པ་ལ་དགའ་བ་དང་། ཉའི་ཤ་ལ་སྲེད་ཅིང་མངོན་པར་འདོད་པ་དང་། དགའ་བ་དང་མགུ་བ་དང་བཅས་པ་དང་། ལུས་ཀྱི་སྟོབས་ཆེ་བ་དང་། ནད་མེད་པར་བདེ་བར་གནས་པ་དང་། ལག་པའི་རྩེ་མོ་བསྐྱོད་ཅིང་འགུལ་བ་དང་། །སྲོག་ཆགས་གང་
ཞིག་ལ་ནོར་ལ་སོགས་པ་ཅི་ཞིག་སྦྱིན་པར་བྱ་ཞེས་སྨྲ་བར་བྱེད་པ་དང་། གསང་ཞིང་སྦ་བར་བྱ་བའི་དངོས་པོ་སྨྲ་བ་བྱེད་པ་དང་། སྨན་པ་དང་བྲམ་ཟེ་ལ་སོགས་པ་ལ་བརྙས་པར་བྱེད་པ་དང་། ཁྲོ་བ་ཆུང་ཞིང་ཅུང་ཟད་ཙམ་ཁྲོ་བར་བྱེད་པ་དང་མགྱོགས་པར་འགྲོ་བ་སྟེ། །མཚན་མ་དེ་དག་དང་
ལྡན་པ་ཡིན་ནོ། །ཚངས་པ་སྲིན་པོས་ཟིན་པའི་རྟགས། །དགོད་ཅིང་གར་ལ་དགའ་བ་དང་། །སྤྱོད་པ་གཏུམ་ཞིང་གླགས་སྐབས་ཚོལ། །གཤེ་ཞིང་མྱུར་དུ་འགྲོ་བ་དང་། །སྨན་པ་བྲམ་ཟེ་ལྷ་ལ་སྡང་། རང་ལ་ཤིང་དང་མཚོན་སོགས་རྡེག །ཀྱེ་ཞེས་བྱ་བའི་སྒྲ་སྒྲོགས་ཤིང་། །བསྟན་
བཅོས་རིག་བྱེད་འདོན་པ་ཡིན། །ཞེས་བྱ་བ་ལ། ཚངས་པ་སྲིན་པོ་ཞེས་བྱ་འི་གདོན་གྱིས་ཟིན་པའི་མཚན་མ་ནི་དགོད་པ་ལ་དགའ་བ་དང་། གར་བྱེད་པ་ལ་དགའ་བ་དང་། ལུས་ངག་གི་སྤྱོད་པ་གཏུམ་ཞིང་འཇིགས་སུ་རུང་བ་དང་། གླགས་སྐབས་ཚོལ་ཞིང་དོར་ཐབས་བྱེད་པ་དང་། གཤེ་
ཞིང་ཚིག་ངན་པ་སྨྲ་བ་དང་། མགྱོགས་པར་འགྲོ་བ་དང་། སྨན་པ་ལ་སོགས་པ་ལ་སྡང་བ་དང་། རང་གི་ལུས་ལ་ཤིང་ལ་སོགས་པས་བརྡེག་པ་དང་། ཀྱེ་ཀྱེ་ཞེས་འབོད་པར་བྱེད་པ་དང་། བསྟན་བཅོས་ཀྱི་ཚིག་དང་། རིག་བྱེད་ཀྱི་ཚིག་འདོན་ཅིང་སྨྲ་བར་བྱེད་པ་ཡིན་པར་ཤེས་པར་བྱའོ། །
སྲིན་པོའི་གདོན་གྱི་ཟིན་པའི་རྟགས། །ཁྲོ་གཉེར་བཅས་ཤིང་ཁྲོ་བར་ལྟ། །སྟོབས་བག་ཏུ་ནི་བྱེད་པ་དང་། །རྡེག་ཅིང་རབ་ཏུ་རྒྱུག་པ་དང་། །ངུ་ཞིང་གདོང་ནི་འཇིགས་རུང་སྟོན། །ཟས་མ་ཟོས་ཀྱང་སྟོབས་དང་ལྡན། །གཉིད་མེད་མཚན་མོ་རྒྱུ་བ་དང་། །ངོ་ཚ་གཙང་སྦྲ་མེད་ཅིང་དཔའ། །
གདུག་ཅིང་ཚིག་རྩུབ་སྨྲ་བ་དང་། །ཁྲོ་ཞིང་ཕྲེང་བ་དམར་པོ་དང་། །བུད་མེད་ཤ་ཆང་ཁྲག་ལ་དགའ། །ཤ་འམ་ཁྲག་ནི་མཐོང་བ་ན། །མཆུ་ནི་ལྡག་པར་བྱེད་པ་དང་། །ཟས་ཟའི་ཚེ་ན་དགོད་པ་ཡིན། །ཞེས་བྱ་བ་ལ། སྲིན་པོའི་གདོན་གྱིས་ཟིན་པར་གྱུར་པའི་མཚན་མ་ནི་དཔྲལ་བར་ཁྲོ་གཉེར་
เล่ม ๒๐๒ · หน้า 110a
དང་བཅས་པའི་ཁྲོ་བས་ལྟ་བར་བྱེད་པ་དང་། བརྟགས་ཤིང་གཡོ་བ་དང་བཅས་པས་རྡེག་པར་བྱེད་པ་དང་། རབ་ཏུ་རྒྱུག་ཅིང་འགྲོ་བ་དང་། སྐད་ཀྱི་ང་རོ་ཆེན་པོས་ངུ་བ་དང་། གདོང་འཇིགས་སུ་རུང་བ་སྟོན་པ་དང་། ཁ་ཟས་མ་ཟོས་ཀྱང་ལུས་སྟོབས་དང་ལྡན་པ་
དང་། གཉིད་མེད་པ་དང་། མཚན་མོ་རྒྱུ་ཞིང་འགྲོ་བ་ལ་དགའ་བ་དང་། ངོ་ཚ་མེད་པ་དང་། གཙང་སྦྲ་མེད་ཅིང་ཁྲུས་ལ་སོགས་པ་ལ་མི་དགའ་བ་དང་། དཔའ་ཞིང་བརྟན་པ་དང་། གདུག་ཅིང་ལས་ངན་པ་བྱེད་པ་དང་། ཚིག་རྩུབ་ཅིང་རྣོ་བར་སྨྲ་བ་དང་ཁྲོ་ཞིང་འཁྲུག་པ་དང་། ཕྲེང་བ་
དམར་པོ་ལ་སོགས་པ་ལ་དགའ་བ་དང་། ཤ་འམ་ཁྲག་མཐོང་ན་མཆུ་ལྡག་ཅིང་འཇིབ་པར་བྱེད་པ་དང་། ཟས་ཟ་བའི་ཚེ་དགོད་པར་གྱུར་པ་སྟེ། །དེ་ལྟ་བུའི་མི་ནི་སྲིན་པོ་ཞེས་བྱ་བའི་གདོན་གྱིས་ཟིན་པ་ཡིན་པར་བརྗོད་པར་བྱའོ། །ཤ་ཟའི་གདོན་གྱིས་ཟིན་པའི་རྟགས། །སེམས་ནི་བདེ་བར་
མི་གནས་ཤིང་། །ཡོངས་སུ་རྒྱུག་པར་བྱེད་པ་དང་། །མི་གཙང་ལ་དགའ་གླུ་གར་དང་། །དགོད་དང་ཆང་དང་ཤ་རློན་དགའ། །སྤྱོས་ན་གདོད་ནི་ཞུམ་པ་དང་། །རྒྱུ་མེད་པར་ནི་ངུ་བ་དང་། །བདག་གཉིས་སེན་མོས་འབྲུད་པ་དང་། །ཁོང་རྩུབ་ལུས་ཉམས་སྐད་གསང་དམའ། སྡུག་བསྔལ་
བ་ནི་བརྡ་སྤྲོད་ཅིང་། །འབྲེལ་དང་མི་འབྲེལ་ཚིག་མང་སྨྲ། །དྲན་པ་ཉམས་ཞིང་གནས་སྟོང་དགའ། །མི་བརྟན་གཅེར་བུ་དྲི་མ་ཅན། །སྲང་བར་འཁྱམས་པའི་གོས་གྱོན་ཞིང་། །རྩྭ་ཡི་ཕྲེང་བ་རྒྱན་དུ་ཐོགས། །ཤིང་འཛེག་རྟ་ལ་ཞོན་པར་བྱེད། །དེ་བཞིན་ཕྱག་དར་ཐུང་པོར་འཛེག །
མང་དུ་ཟ་པར་བྱེད་པ་ཡིན། །ཞེས་བྱ་བ་ལ། ཤ་ཟའི་གདོན་གྱིས་ཟིན་ཅིང་དབང་དུ་བྱས་པའི་མཚན་མ་ནི་སེམས་མལ་ན་མི་གནས་ཤིང་སྡུག་བསྔལ་ལ་བློ་ཀུན་དུ་ཕྱོགས་པར་ཡུལ་ཐམས་ཅད་རྒྱུག་པར་བྱེད་པ་དང་། །མི་གཙང་པ་དང་སྦགས་པ་ལ་དགའ་བ་དང་། གླུ་ལ་སོགས་པ་ལ་
དགའ་བ་དང་། སྦྱོས་ཤིང་བརྒྱབ་ན་གདོང་ཞུམ་ཞུམ་པོར་གྱུར་ཅིང་སྤ་བཀོང་བ་དང་། གདུང་བའི་རྒྱུ་མེད་པར་ངུ་བ་དང་། རང་ཉིད་ཀྱི་ལུས་ལ་སེན་མོས་འབྲུད་པ་དང་ཁོང་རྩུབ་ཅིང་མདངས་ཉམས་ལ་སྐད་འགག་པར་འགྱུར་པ་དང་། སྡུག་བསྔལ་བརྡ་
เล่ม ๒๐๒ · หน้า 110b
སྤྲོད་ཅིང་སྨྲེ་བར་བྱེད་པ་དང་། །རིགས་པ་དང་མི་རིགས་པའི་ཚིག་འབྲེལ་པ་དང་མི་འབྲེལ་པ་མང་དུ་སྨྲ་བ་དང་དྲན་པ་ཉམས་ཤིང་བརྒྱལ་བ་དང་། སྐྱེ་བོ་མེད་པའི་གནས་སྟོང་པ་ལ་དགའ་བ་དང་། མི་བརྟན་ཞིང་གཡོ་བ་དང་། གཅེར་བུར་འདུག་ཅིང་གོས་མེད་པར་གནས་པ་དང་། །དྲི་མས་
སྦགས་པ་དང་། སྲང་བར་ན་འཁྱམ་ཞིང་ལྟུང་བའི་གོས་ངན་ངོན་གོན་པ་ལ་དགའ་བ་དང་། རྩྭ་ཕྲེང་བར་ལྷས་རྒྱན་དུ་ཐོགས་པ་དང་ཤིང་ལ་འཛེག་པ་ལ་སོགས་པ་ལ་དགའ་བ་དང་། ཁ་ཟས་མང་དུ་ཟ་བར་བྱེད་པ་སྟེ། །མི་དེ་ལྟ་བུ་ནི་ཤ་ཟའི་གདོན་གྱིས་བརླབས་པ་ཡིན་པར་ཤེས་པར་བྱའོ། །
ཡི་དགས་གདོན་གྱིས་ཟིན་པའི་རྟགས། །སྤྱོད་ཚུལ་དྲི་ནི་ཡི་དགས་འདྲ། །སྡར་ཞིང་ཟས་ལ་མི་དགའ་དང་། །རྩ་གཅོད་བྱེད་པ་ཞེས་ཀྱང་བྱ། །ཞེས་བྱ་བ་ལ། མི་ཡི་དགས་ཀྱི་གདོན་གྱིས་བརླབས་པའི་རྟགས་སམ་མཚན་མ་ནི་སྤྱོད་པ་དང་དབྱིབས་དང་། དྲི་ཡི་དགས་དང་འདྲ་བ་དང་
སྡར་ཞིང་འཇིགས་པ་དང་། ཁ་ཟས་མི་དགའ་བ་དང་། རྩ་གཅོད་པར་བྱེད་པ་ཡིན་ནོ། །གྲུལ་བུམ་གདོན་གྱིས་ཟིན་པའི་རྟགས། །ཚིག་མང་སྨྲ་ཞིང་ཁ་གདོང་གནག །དལ་གྱིས་འགྲོ་བར་བྱེད་པ་དང་། །རླིག་པ་སྐྲང་ཞིང་འཕྱང་བ་ཡིན། །ཞེས་བྱ་བ་ལ། མི་གྲུལ་བུམ་གྱི་གདོན་
གྱིས་ཟིན་པའི་མཚན་མ་ནི་ཚིག་འབྲེལ་པ་དང་མི་འབྲེལ་པ་དང་མང་དུ་སྨྲ་བ་དང་ཁ་གདོང་གི་མདོག་གནག་པ་དང་། རང་གི་གནས་ན་དལ་གྱིས་འགྲོ་ཞིང་འཁྱམས་པ་དང་། རླིག་པ་སྐྲངས་པ་དང་བཅས་ཤིང་ཤས་ཆེར་འཕྱང་བ་ཡིན་ནོ། མི་ནི་བྱེད་སྟེམས་ཟིན་པའི་རྟགས། །ཤིང་དང་བོང་
བ་སོགས་ཐོགས་ཤིང་། །ཚལ་པ་གྱོན་ཏེ་འགྲོ་བ་དང་། །གཅེར་བུར་རྒྱུག་ཅིང་འཇིགས་བག་ཏུ། །ལྟ་ལ་རྩ་ཡི་རྒྱན་དུ་བྱེད། །དུར་ཁྲོད་གནས་ནི་སྟོང་པ་དང་། །སྲང་བར་ཤིང་གཅིག་བརྟེན་པ་དང་། །ཏིལ་ཟས་ཤ་དང་ཆང་ལ་ནི། །རྟག་ཏུ་མིག་ནི་ཚག་པ་དང་། །ཚིག་རྩུབ་དེ་ནི་སྨྲ་
བ་ཡིན། །ཞེས་བྱ་བ་ལ། མི་བྱད་སྟེམས་ཞེས་བྱ་བའི་གདོན་གྱིས་ཟིན་པའི་མཚན་མ་ནི་ཤིང་ལ་སོགས་པ་ཐོགས་ཤིང་། གོས་ཀྱི་ཚལ་པ་དུམ་བུར་གྱོན་ཏེ། འགྲོ་བ་ལ་དགའ་བ་དང་། གཅེར་བུར་འགྲོ་བ་དང་། འཇིགས་ཤིང་རྟ་བས་བག་ཏུ་ལྟ་བ་དང་རྩའི་རྒྱན་ཐོགས་པ་དང་། དུར་ཁྲོད་
เล่ม ๒๐๒ · หน้า 111a
ལ་སོགས་པར་བརྟེན་ཅིང་འདུག་པར་དགའ་བ་དང་། ཏིལ་ལ་སོགས་པ་ལ་དགའ་ཞིང་རྟག་ཏུ་དེ་ལ་ལྟ་བ་དང་། ཚིག་རྩུབ་པར་སྨྲ་བ་སྟེ། དེ་ལྟ་བུ་ནི་བྱད་སྟེམས་ཀྱི་གདོན་གྱིས་ཟིན་པ་ཡིན་ནོ། །ཞེས་བརྗོད་པར་བྱའོ། །གཡེངས་བྱེད་ཀྱིས་ནི་ཟིན་པའི་རྟགས། །
ཆུ་འདོད་ཟས་ནི་མི་སློང་དང་། །དངངས་ཤིང་མིག་ནི་དམར་བ་དང་། །ཚིག་རྩུབ་སྨྲ་བ་ཤེས་པར་བྱ། །ཞེས་བྱ་བ་ལ། མི་གཡེངས་བྱེད་ཅེས་བྱ་བའི་གདོམ་གྱིས་ཟིན་པའི་མཚན་མ་ནི་རྟག་ཏུ་ཆུ་འདོད་ཅིང་སློང་གི་ཟས་སློང་བར་མི་བྱེད་པ་དང་། དངང་བག་དང་བཅས་པའི་མིག་དམར་པོས་
ལྟ་བ་དང་ཙིག་རྩུབ་ཅིང་གཞན་ལ་གནོད་པར་སྨྲ་བ་ཡིན་ནོ། །རོ་ལངས་གདོན་གྱིས་ཟིན་པའི་རྟགས། །དྲི་དང་ཕྲེང་བ་ལ་དགའ་ཞིང་། །ཚིག་བདེན་སྨྲ་ལ་ཡོངས་སུ་འདར། །གཉིད་ཆེ་བར་ནི་ཤེས་པར་བྱ། །ཞེས་བྱ་བ་ལ། མི་རོ་ལངས་ཞེས་བྱ་བའི་གདོན་གྱིས་ཟིན་པའི་མཚན་མ་ནི།
དྲི་དང་ཕྲེང་བ་བསྟེན་པར་དགའ་བ་དང་དམ་བཅས་པ་ལ་བརྟེན་ཅིང་ཚིག་བདེན་པར་སྨྲ་བ་དང་ལུས་འདར་བ་ལ་སོགས་པའི་མཚན་ཉིད་ཅན་ཡིན་པར་ཤེས་པར་བྱའོ། །ཡི་དགས་མཆུ་ན་ལྟའི་གདོན་གྱི་རྟགས། །མིག་ནི་གསལ་ཞིང་བཞིན་རས་ཞུམ། །རྐན་ནི་སྐམ་པར་བྱེད་པ་དང་། །མིག་
དང་རྫི་མ་སྐྱོད་པ་དང་། །གཉིད་ཆེ་མེ་དྲོད་ཆུང་བ་དང་། །གཡོན་ཕྱོགས་ནས་ནི་གོས་གོན་ཞིང་། །ཤ་དང་བུ་རམ་ཏིལ་ལ་དགའ། །ཚིག་འཁྲུལ་བ་ནི་ཡིན་ཞེས་བྱ། །ཞེས་བྱ་བ་ལ། ཡི་དགས་མཚུན་ལྷ་ཞེས་བྱ་བ་ཉེ་དུ་ཤི་བ་ལས་གདོན་དུ་གྱུར་པའི་མཚན་མ་ནི་མིག་མི་གསལ་ཞིང་རབ་རིབ་ཏུ་
འགྱུར་བ་དང་བཞིན་རས་ཞུམ་ཞིང་གསང་དམའ་བ་དང་། རྐན་གྱི་ཕྱོགས་སྐམ་པ་དང་། །མིག་གི་རྫི་མ་གཡོ་བ་དང་གཉིད་ཆེ་བ་ནས་ཚིག་འཁྲུལ་ཞིང་ཅལ་ཅོལ་དུ་སྨྲ་བའི་བར་གྱི་མཚན་ཉིད་དང་ལྡན་པར་ཤེས་པར་བྱའོ། །བླ་མ་དྲང་སྲོང་རྒན་དང་དྲུག །དམོད་པ་སེམས་ཀྱི་རྗེས་མཐུན་པ། །
སྤྱོད་ལམ་ཁ་ཟས་རང་བཞིན་ལ། །ཅི་འདྲ་གདོན་ནི་དེ་ཡིན་བཤད། །ཅེས་བྱ་བ་ལ། བླ་མ་དང་རྒན་པོ་ལ་སོགས་པ་བཞི་པོ་དག་གི་གདོན་གྱིས་ཟིན་པ་ནི་དམོད་པ་བཏབ་པ་དང་སེམས་ཀྱིས་བསམ་པ་དང་རྗེས་སུ་མཐུན་པ་དང་། དེ་བཞིན་དུ་དེའི་སྤྱོད་ལམ་དང་ཁ་ཟས་ཀྱི་རང་བཞིན་ཅི་འདྲ་བ་ལས་གདོན་
เล่ม ๒๐๒ · หน้า 111b
ཡང་དེ་འདྲ་བ་ཡིན་པར་ཤེས་པར་བྱའོ། །གཞོན་ནུའི་ཚོགས་ཀྱི་རྗེས་འབྲང་ཞིང་། །གཅེར་བུ་སྐྲ་ནི་གྱེན་དུ་བརྫེས། །ཡིད་མི་བདེ་ཞིང་དུས་ཡུན་རིང་། །གྱུར་པའི་གདོན་དེ་འང་སྤང་བར་བྱ། །ཞེས་བྱ་བ་ལ། བྱིས་པ་གཞོན་ནུའི་ཚོགས་ཀྱི་རྗེས་སུ་འབྲང་ཞིང་རྒྱུ་བ་དང་གཅེར་བུར་གནས་ཤིང་སྐྲ་
གྱེན་དུ་བརྫེས་པ་དང་ཡིད་མི་བདེ་ཞིང་སེམས་གནོད་པར་འགྱུར་བ་དང་། གདོན་གྱིས་ཟིན་ནས་དུས་ཡུན་རིང་པོར་ལོན་པའི་གདོན་དང་བཅས་པ་དེ་ནི་གསོར་མི་རུང་བས་ཡོངས་སུ་སྤང་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། །སློབ་དཔོན་
ཟླ་བ་ལ་དགའ་བས་ངེས་པར་སྦྱར་བ་ལས། །ཕྱི་མའི་གནས་ཀྱི་ལེའུ་བཞི་པའི་རྣམ་པར་འགྲེལ་པའོ།། །།དེ་ནས་གདོན་ནད་གསོ་བ་བཤད་པར་བྱའོ། །ཞེས་བྱ་བ་ལ། གང་དུ་གདོན་གྱིས་ཟིན་པའི་ནད་གསོ་བ་སྟོན་པའི་ལེའུ་གང་ཡིན་པ་དེ་བཤད་པར་བྱའོ། །ཞེས་བའོ། །འབྱུང་པོ་
འཚེ་བ་མི་འདོད་དང་། །བཟླས་དང་སྦྱིན་སྲེག་གཏོར་མ་དང་། །བརྟུལ་ཞུགས་ཚུལ་ཁྲིམས་མཉམ་འཇོག་དང་། །སྦྱིན་ཞེས་བརྩེ་བ་སོགས་པས་བསལ། །ཞེས་བྱ་བ་ལ། འབྱུང་པོའི་གདོན་ནི་གཞན་ལ་འཚེ་ཞིང་སྲོག་གཅོད་པ་མི་འདོད་པ་དང་གཏོར་མ་འདོད་པ་དང་། འདོད་པའི་དགའ་བ་
འདོད་པའི་གདོན་གསོར་མི་རུང་བ་དག་ནི་བཟླས་པ་ལ་སོགས་པ་དང་བརྟུལ་ཞུགས་ཀྱི་དཀའ་ཐུབ་དང་། ཚུལ་ཁྲིམས་ལ་སོགས་པ་བསྟེན་པས་དེ་བསལ་ཞིང་གཞོམ་པར་བྱའོ། །ཤིང་ཀུན་བ་ལ་ཚ་བ་གསུམ། །གླ་རྩི་སྒོག་སྐྱ་ཨ་རྒའི་རྩ། །སྤང་སྤོས་ཨ་ཟ་ལོ་མི་དང་། ལ་བ་འབམ་པོ་ཀུ་ཀུ་
ཏི། །ཤུ་དག་གནྡྷ་པྲི་ཡང་ཀུ། །སར་པ་གན་ད་ཏིལ་དང་ནི། །ཀ་ཀ་ཨན་ད་རམ་ཉེ་བ། །སྣུ་ཧ་ཀར་ཀ་ཏ་ཤིང་གི །སླེ་ཏྲེས་མ་ཧཱ་ན་བ་ལི། །ཡུངས་ཀར་དང་ནི་ལིག་བུ་མིག །གདོན་འཇོམས་སྨན་ནི་གཞན་དག་དང་། །བོང་བུ་རྟ་དང་ཁྱི་དང་ལུག །རྔ་མོ་ཁྲ་དང་དྲེད་དང་ནི། །སྲེ་མོ་རེག་
འཇོམ་བྱི་ལ་གུང་། །བ་གླང་སེང་གེ་སྟག་དང་ནི། །རྒྱ་མཚོ་ཡི་ནི་སྲོག་ཆགས་ཀྱི། །པགས་པ་མཁྲིས་པ་སེན་མོ་སོ། །སྡེ་ཚན་འདི་དང་མར་རྙིང་ངམ། །ཏིལ་མར་དག་ནི་བསྐོལ་བ་དང་། བཏུང་དང་སྣར་ནི་བླུགས་པ་དང་། །བསྐུ་བའི་དོན་དུ་སྦྱར་བྱ་ཞིང་། །འདི་དག་ཕྱེ་མས་བདུག་པ་བྱ། །ཞེས་
เล่ม ๒๐๒ · หน้า 112a
བྱ་བ་ལ། ཤིང་ཀུན་ལ་སོགས་པའི་སྨན་གྱི་སྡེ་ཚན་འདི་དང་མར་རྙིང་པ་འམ་ཏིལ་མར་བསྐོལ་ཏེ་མར་རམ་ཏིལ་མར་ཏེ་བཏུང་བ་དང་། སྣ་ནས་བཏང་པ་དང་ལུས་ལ་བསྐུ་བའི་དོན་དུ་སྦྱར་བར་བྱ་བ་དང་། །དེ་བཞིན་དུ་སྨན་འདི་དག་གི་ཕྱེ་མའི་དུད་པས་བདུག་པ་ཡང་སྦྱར་བར་
བྱའོ། །ཆ་བ་གསུམ་ནི་པི་པི་ལིང་ལ་སོགས་པའོ། །གླ་རྩི་ནི་ནེ་པ་ལི་སྟེ་ལ་ལ་ནི་ནེ་པ་ལི་ཞེས་བྱ་བ་གླ་རྩི་མ་ཡིན་གྱི་སྐབས་འདིར་ལྡོང་རོས་ལ་བྱའོ། །ཞེས་ཟེར་རོ། །ཨརྐའི་རྩ་བ་ནི་ཤིང་ཨརྐའི་རྩ་བའོ། །ཨ་ཟ་ལོ་མི་ནི་མི་ཤ་བྱི་ལོ་ཅན་ཞེས་བྱ་བའི་སྨན་ནོ། །ལ་བ་ནི་གོ་རོ་མིའོ། །འབམ་པོ་ནི་
འབུ་ཏ་ཀེ་ཤིའོ། །ཀུ་ཀུ་ཏི་ནི་ལག་མནའོ། །གནྡྷ་པྲི་ཡང་ཀུ་ནི་ལ་ཏཱ་ཞེས་བྱ་བའོ། །སར་པ་གན་ད་ནི་གན་ད་ན་གུ་ལིའོ། །ཀ་ཀན་ད་ནི་ཀ་ནའོ། །སྨུ་ཧ་ནི་ཤྲཱི་ཁཎྜའི་ཤིང་ངོ་། །སླེ་ཏྲེས་ནི་གུ་རྩེའོ། །གདོན་འཇོམས་སྨན་ནི་གདོན་སེལ་བའི་སྨན་ལ་སོགས་པ་ཇི་སྙེད་པའོ། །བོང་བུ་ལ་སོགས་
པའི་པགས་པ་ལ་སོགས་པ་ཇི་སྙེད་པ་གཞུག་པར་བྱའོ། །འདི་ཡི་རི་ལུ་བྱས་ནས་ནི། །མིག་སྨན་སྣ་སྨན་བྱ་བ་དང་། །འདི་ཡི་ལྡེ་གུས་བྱུག་པ་དང་། །བསྐོལ་བའི་ཁུ་བ་བླུགས་པར་བྱ། །ཞེས་བྱ་བ་ལ། ཤིང་ཀུན་ལ་སོགས་པའི་སྨན་གྱི་སྡེ་ཚན་འདི་དག་རི་ལུར་བྱས་ནས། མིག་སྨན་དུ་
བྱ་བ་དང་། སྣ་ནས་གཏང་བ་དང་། ཡང་ཤིང་ཀུན་ལ་སོགས་པའི་སྨན་འདི་དག་གི་ལྡེ་གུས་ལུས་ལ་བྱུག་པ་དང་། ཡང་སྨན་དེ་དག་བསྐོལ་བའི་ཁུ་བས་ལུས་ལ་བླུགས་པར་བྱའོ། །སྦྱོར་བ་འདིས་ནི་སྨྱོ་བྱེད་དང་། །བརྗེད་བྱེད་བཅས་པའི་གདོན་ཞི་བྱེད། །ཅེས་བྱ་བ་ལ། ཤིང་ཀུན་ལ་
སོགས་པའི་སྦྱོར་བ་འདིས་ནི་སྨྱོ་བྱེད་དང་བརྗེད་བྱེད་ཀྱི་གདོན་གང་དག་ཡིན་པ་དེ་ཞི་ཞིང་མེད་པར་འགྱུར་རོ། །ཡུངས་ཀར་ཧ་ཏི་བི་པི་ལིང་། །པི་པི་ལིང་རྩ་ཚ་བ་གསུམ། །སྐྱུ་རུ་ར་དང་གོ་ད་དང་། །སྲེ་མོ་བྱི་ལ་ཛ་ཤ་ཡི། །མཁྲིས་པ་དང་བཏགས་སྣ་སྨན་དང་། །བསྐུ་བྱུག་བྱུགས་སོགས་བྱས་
གདོན་འཇོམས། །ཞེས་བྱ་བ་ལ། ཡུངས་ཀར་ལ་སོགས་པའི་སྨན་སྲོག་ཆགས་གོ་ད་ལ་སོགས་པའི་མཁྲིས་པ་དང་བཏགས་ཏེ། སྣ་སྨན་ལ་སོགས་པའི་སྦྱོར་བ་བྱས་ན་ཡང་སྨྱོ་བྱེད་ལ་སོགས་པའི་གདོན་འཇོམས་པར་བྱེད་དོ། །ཡུངས་ཀར་ཤིང་ཀུན་ཤུ་དག་དང་། །པྲི་ཡང་ཀུ་དང་
เล่ม ๒๐๒ · หน้า 112b
སེར་པོ་གཉིས། །གི་རི་ཀར་ནི་དཀར་ནག་གཉིས། །འབྲས་བུ་གསུམ་དང་ཤྭེ་ཏ་དང་། །ནིམ་པའི་ལོ་མ་ཀརཉྫ། །ཤྲི་ཤ་གཉིས་དང་ས་བོན་དང་། །ཐང་ཤིང་དང་ནི་ཚ་བ་གསུམ། །མར་དང་བ་གཅིན་དེའི་བཞི་འགྱུར། །བསྐོལ་བ་དོན་གྲུབ་ཅེས་བྱ་སྟེ། །བཏུང་དང་སྣར་བླུགས་པ་སྦྱར་ན། །
གདོན་ནི་ཐམས་ཅད་མྱུར་འཇོམས་བྱེད། །མཆོག་ཏུ་ལྷ་མིན་གདོན་སེལ་བྱེད། །བརྗེད་བྱེད་དུག་དང་བཀྲ་མི་ཤིས། །སྨྱོ་བྱེད་གཤེད་བྱེད་རིམས་རྣམས་འཇོམས། །ཞེས་བྱ་བ་ལ། ཡུངས་ཀར་དང་ཤུ་དག་ལ་སོགས་པའི་སྨན་ལྡེ་གུར་བྱས་པ་དང་། མར་དང་མར་གྱི་བཞི་འགྱུར་གྱི་བ་
གཅིན་དང་། བསྐོལ་བའི་སྨན་མར་ནི་མིང་དོན་གྲུབ་ཅེས་བྱ་སྟེ། དེ་བཏུང་བ་ལ་སོགས་པར་སྦྱར་ན་གདོན་ཐམས་ཅད་མྱུར་དུ་འཇོམས་པར་བྱེད་དེ། མཆོག་གམ་ཁྱད་པར་དུ་ལྷ་མ་ཡིན་གྱི་གདོན་རྣམས་འཇོམས་པར་བྱེད་ལ། དེ་བཞིན་དུ་བརྗེད་བྱེད་ནས་རིམས་ཀྱི་བར་ཡང་འཇོམས་པར་བྱེད་པ་
ཡིན་ནོ། །སྨན་ཏེ་ཉིད་ནི་ར་ཐུག་གི གཅིན་དང་སྦྱར་ཏེ་བླུད་པ་དང་། །སྣར་བླུགས་མིག་སྨན་བྱུག་པ་དང་། །ཁྲུས་དང་དྲིལ་བ་ལས་སྦྱར་བ། །སྔར་བཤད་ཡོན་ཏན་དང་འདྲ་ཞིང་། །རྒྱལ་པོའི་སྒོར་ཡང་དོན་གྲུབ་བྱེད། །ཅེས་བྱ་བ་ལ། ཡུངས་ཀར་ལ་སོགས་པའི་སྨན་འདི་དག་ཉིད་ར་ཐུག་
གི་གཅིན་དང་སྦྱར་ཏེ་ལྡེ་གུར་བྱས་ལ་བླུད་པ་ལ་སོགས་པར་སྦྱར་ན་གདོན་ཐམས་ཅད་འཇོམས་པ་ལ་སོགས་པ་སྔར་བཤད་པའི་ཡོན་ཏན་དང་ལྡན་ཞིང་དེ་བཞིན་དུ་རྒྱལ་པོའི་སྒོར་ཡང་དོན་གྲུབ་པར་བྱེད་པ་ཡིན་ནོ། །ཡུངས་ཀར་ཤུ་དག་ཚ་བ་གསུམ། །ཨ་ཤྭོ་གནྡྷ་སེར་པོ་གཉིས། །ཤིང་ཀུན་ཀུན་
དོང་རྩ་བ་དང་། །ཀ་རཉྫ་ཡི་ས་བོན་དང་། །ཤི་རི་ཤ་ཡི་མེ་ཏོག་དང་། །ཀ་པིད་ཐ་ཡི་འབྲས་བུ་དང་། །རྒྱམ་ཚ་རུ་རྟ་རྒྱ་སྤོས་དང་། །གི་རི་ཀར་ནི་དཀར་པོ་དང་། །སོ་ན་ཀ་ཡི་རྩ་བར་བཅས། །ར་གཅིན་དག་དང་ལེགས་བསྒོས་ཤིང་། །བ་གླང་མཁྲིས་པ་བུ་རམ་དང་། །རི་ལུར་བྱས་པའི་
སྦྱོར་བ་དེ། །མིག་བསྐུས་སྣར་བླུགས་བསྐུ་བྱས་ན། །སྨྱོ་བྱེད་རྨ་ནི་རེད་པ་དང་། །མཚན་མོ་མི་མཐོང་མུན་ཐིབས་བྱེད། །བགེགས་དང་ལུས་ཆུར་ནུབ་པར་བརྒྱལ། །དུག་བསྐུས་མདའ་ཡིས་ཕོག་པ་དང་། །གདུག་པའི་སྦྲུལ་གྱིས་ཟིན་པ་སེལ། །ཞེས་བྱ་བ་ལ། སེར་པོ་གཉིས་ནི་ཡུང་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด