ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ
ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๐๒ · หน้า 141a
མ་ནི། །སྐྱུ་རུ་རའི་འབྲས་ཆུ་དང་བཏགས། །ལྡེ་གུ་ཟངས་མའི་སྣོད་ལ་བསྐུ། །ནས་མར་སྐྱུ་རུ་རའི་འོ་མ། །དུད་པས་དེ་འོག་མང་དུ་བདུག །དེ་ལས་རི་ལུར་བྱ་བ་ནི། །དེ་ནི་ཆུ་དང་སྦྲང་རྩིར་བཏགས། །མཐོན་ཀ་ཆེན་པོ་ཞེས་བྱ་སྟེ། །ལིང་ཐོག་
དཀར་བོ་སེལ་མཆོག་ཡིན། །ཞེས་བྱ་བ་ལ། ཤིང་མངར་ལ་སོགས་པའི་སྨན་སྐྱུ་རུ་རའི་འབྲས་བུ་བསྐོལ་བའི་ཆུ་དང་བཏགས་པའི་ལྡེ་གུས་ཟངས་མའི་སྣོད་བསྐུས་ལ་ནས་དང་མར་ལ་སོགས་པའི་དུད་པས་ཟངས་མའི་སྣོད་དེ་བསྐུས་པའི་འོག་ཏུ་མང་དུ་བདུག་པར་བྱའོ། །དེ་
ནས་ཟངས་མའི་སྣོད་དེ་ཆུ་དང་སྦྲང་རྩི་དང་སྦྱར་ཞིང་བཏགས་ཏེ་རི་ལུར་བྱས་པའི་མིག་སྨན་དེའི་མིང་མཐོན་ཀ་ཆེན་པོ་ཞེས་བྱ་སྟེ། ལིང་ཐོག་དཀར་པོ་སེལ་ཞིང་འཇོམས་པར་བྱེད་པའི་མཆོག་ཡིན་ནོ། །ལིང་ཐོག་བརྟན་ཞིང་མཐུག་པ་ལ། །ཁྲག་ནི་ལན་མང་དབྱུང་བར་བྱ། །མགོ་
དང་ལུས་ཀྱི་བཀྲུ་སྨན་དང་། །ཕུར་མ་བཙོས་པ་འང་ལན་མང་གཏང་། །ཞེས་བྱ་བ་ལ། ལིང་ཐོག་བརྟན་པ་ལ་སོགས་པ་ལ་ནི་གཏར་ག་ལ་སོགས་པས་ཁྲག་མང་དུ་དབྱུང་བར་བྱ་ཞིང་། །མགོ་བོའི་བཀྲུ་སྨན་ལ་སོགས་པ་ལན་མང་དུ་གཏང་བར་བྱའོ། །པི་པི་
ལིང་དང་ན་ལེ་ཤམ། །རྒྱམ་ཚ་ཤྲི་ཤའི་འབྲས་བུ་འམ། །འབྲས་བུ་གསུམ་བསྐོལ་རྒྱམ་ཚར་བཅས། །བླུད་པས་གནས་ལས་བསྟོད་པར་བྱ། །ཞེས་བྱ་བ་ལ། ལིང་ཐོག་དཀར་པོ་དེ་གནས་ནས་བསྐྱོད་ཅིང་བསྟོད་པར་བྱ་བའི་ཕྱིར་པི་པི་ལིང་ནས་ཤྲི་ཤའི་འབྲས་བུའི་བར་
གྱིས་སམ། ཡང་ན་རྒྱམ་ཚ་དང་འབྲས་བུ་གསུམ་བསྐོལ་ཏེ་ཞག་གསུམ་གྱི་བར་དུ་བླུད་པས་བསྟོད་པར་བྱའོ། །དུང་དང་རྒྱ་ཤུག་ཀ་ཏ་ཀ །རྒུན་འབྲུ་ཤིང་མངར་སྦྲང་རྩི་དང་། །མུ་ར་སོ་ཡི་དྲི་མ་ནི། །ཤི་རི་ཤ་ཡི་མེ་ཏོག་བཅས། །ཚིགས་བཅད་ཕྱེད་ཀྱིས་བཤད་
པ་ཡི། །མིག་སྨན་སྦྱོར་བ་གཏང་བར་བྱ། །ཞེས་བྱ་བ་ལ། ཡང་ན་ལིང་ཐོག་དཀར་པོ་དེ་བསྐྱོད་ཅིང་བསྟོད་པར་བྱ་བའི་ཕྱིར། དུང་ལ་སོགས་པ་དང་མུར་ལ་སོགས་པའི་ཚིགས་བཅད་ཕྱེད་ཕྱེད་ཀྱིས་བཤད་པའི་མིག་སྨན་གྱི་སྦྱོར་བ་འདི་གཏང་བར་བྱའོ། །སྐྱུ་རུ་ཕ་ནིད་
เล่ม ๒๐๒ · หน้า 141b
ཛའི་ཁུ་བར། །ལང་ཀ་ལི་ཡི་ཐལ་བ་ནི། །ནུབ་གཅིག་སྦངས་ཏེ་སྐམས་པའི་ཕྱེ། །ལིང་ཏོག་བསྐྱོད་པའི་མིག་སྨན་ཡིན། །ཞེས་བྱ་བ་ལ། སྐྱུ་རུ་ར་དང་ཕ་ནིད་ཛ་ཀ་བསྐོལ་བའི་ཁུ་བར་ལང་ག་ལིའི་ཐལ་བ་ནུ་བ་གཅིག་སྦངས་པ་དེ་སྐམས་ལ་ཕྱེ་མར་བྱས་པའི་མིག་
སྨན་དེ་ནི་ལིང་ཐོག་བསྐྱེད་པ་སྟོད་པར་བྱེད་པ་ཡིན་ནོ། །མུངྒ་སྦུན་པ་མེད་བཏགས་པ། །དུང་དང་སྦྲང་རྩིར་བཅས་པ་འང་ཕན། །ཞེས་བྱ་བ་ལ། ཡང་ན་སྲན་མུངྒ་སྦུན་པ་མེད་པར་བཏགས་པ་དང་། དུང་དང་སྦྲང་རྩི་དང་སྦྱར་བའི་མིག་སྨན་ནི་ལིང་ཐོག་སེལ་བ་ཡིན་ནོ། །
སྦྲང་རྩི་མ་དུ་ཀའི་སྙིང་པོ་འམ། །བ་རུ་ར་རྐང་སྦྲང་རྩིར་བཅས། །ཞེས་བྱ་བ་ལ། མ་དུ་ཀའི་སྙིང་པོ་སྦྲང་རྩི་དང་སྦྱར་བ་འམ། བ་རུ་རའི་རྐང་གི་ཚི་གུ་སྦྲང་རྩི་དང་སྦྱར་བ་ཡང་ལིང་ཐོག་སེལ་ཏོ། །བ་གླང་རྟ་བོང་རྔ་མོའི་སོ། །དུང་དང་རྒྱ་མཚོའི་ཝུ་བ་དང་། །ཨ་རྫུ་
ནའི་ཆུས་རི་ལུ་བྱས། །བསྐྱོད་པའི་ལིང་ཐོག་འཇིག་པར་བྱེད། །ཅེས་བྱ་བ་ལ། བ་གླང་ལ་སོགས་པའི་སོ་དང་དུང་ལ་སོགས་པ་ཨ་རྫུ་ནའི་ཆུ་དང་། རི་ལུར་བྱས་པས་ཀྱང་བསྐྱོད་ཅིང་བསྟོད་པའི་ལིང་ཐོག་འཇིག་པར་བྱེད་དོ། །བསྟོད་པ་འམ་ཟུག་རྔུར་
བཅས་བ་ཡི། །ལིང་ཐོག་སྤུ་ལ་སོགས་བས་ཕྱི། །ཞེས་བྱ་བ་ལ། ལིང་ཏོག་བསྟོད་པ་འམ་ཟུག་རྔུ་དང་བཅས་པ་ནི་སྤུ་ལ་སོགས་པས་ཕྱི་བར་བྱའོ། །རྩ་ཡི་ལིང་ཐོག་མཐོང་གནོད་མེད། །སྣད་པའི་ལིང་ཐོག་སྟ་བུར་གསོ། །ཞེས་བྱ་བ་ལ། རྩའི་ལིང་ཐོག་
མཐོང་བར་བྱེད་པ་ལ། གནོད་པ་མེད་པའི་རྨའི་ལིང་ཐོག་ལྟར་གསོ་པར་བྱའོ། །ཤིང་མངར་སྟག་ཚེར་རམ་ཉེ་བ། །བྲི་ཧ་ཏི་དང་ཨ་ཀ་རུ། །སྐྱེར་བའི་མིག་སྨན་རའི་འོ་མ། །བཏགས་པའི་ལྡེ་གུ་ནས་དང་མར། །བཅས་པའི་དུད་པས་བདུག་པར་བྱ། །སྐྱུ་རུ་ར་ཡི་
ལོ་མ་དང་། །རི་ལུར་བྱས་པ་མིག་སྨན་མཆོག །ཅེས་བྱ་བ་ལ། ཤིང་མངར་དང་སྟག་ཚེར་པ་ཞེས་བྱ་བ་པྲ་པུཎྜ་རཱི་ཀ་ལ་སོགས་པ་རའི་འོ་མ་དང་བཏགས་ཏེ་ལྡེ་གུར་བྱས་པ་དང་། ནས་དང་མར་དང་བཅས་པའི་དུད་པས་བདུགས་པ་དང་། སྐྱུ་རུ་རའི་ལོ་མས་རིམ་གྱིས་དུད་
เล่ม ๒๐๒ · หน้า 142a
པས་བདུགས་པའི་རི་ལུར་བྱས་པ་ནི་རྩའི་ལིང་ཐོག་སེལ་བའི་སྨན་གྱི་མཆོག་དམ་པ་ཡིན་ནོ། །མེ་སོས་ར་ཡི་རིལ་མ་འདྲ། །མཛེར་པ་ལྟ་བུར་མཚོན་གྱིས་གསོ། །ཞེས་བྱ་བ་ལ། ནད་དེ་གལ་ཏེ་ཞི་ཞིང་སོས་པར་མ་གྱུར་ན། །རྩའི་ལིང་ཐོག་ལ་མིག་
མཛེར་གྱི་དཔྱད་ལྟར་བྱ་བ་དང་། དེ་བཞིན་དུ་རའི་རིལ་མ་ལྟ་བུ་ཞེས་བྱ་བའི་མིག་ནད་ལ་ཡང་མཛེར་པ་ལྟར་མཚོན་གྱིས་གཅད་པར་བྱའོ། །ར་རིལ་གསོར་ནི་མི་རུང་དང་། །ལིང་ཐོག་དེ་འདྲ་དེ་བཞིན་གཞན། །ནད་མ་ཞི་ན་སྣུམ་བླུད་ཅིང་། །གཏར་ག་གདབ་པ་ལ་སོགས་
བྱ། །སྨད་བྱས་དེ་ནི་བསལ་བྱ་ཞིང་། །དཀར་ཞིང་མཐོ་བ་གསོ་བར་བྱ། །ཞེས་བྱ་བ་ལ། རའི་རིལ་མ་ལྟ་བུའི་མིག་ནད་གསོར་མི་རུང་བ་དང་། དེ་བཞིན་དུ་ལིང་ཐོག་ཀྱང་དེ་དང་འདྲ་བར་གསོར་མི་རུང་བ་དང་། མིག་ནད་གཞན་དག་རྟག་ཏུ་ནད་མ་ཞི་བར་གྱུར་པ་
ལ་སྣུམ་བླུད་པ་ལ་སོགས་པས་གསོ་བར་བྱ་ཞིང་དེ་བཞིན་དུ་སྨད་པར་བྱ་ཞིང་མིག་ནད་འཇིགས་པ་དེ་ཐབས་དེ་དག་གིས་བསལ་བར་བྱ་ཞིང་དཀར་བ་དང་མཐོ་ཞིང་འབུར་བའི་ནད་བསལ་བར་བྱའོ། །རྒྱ་སྟར་གོ་བྱེ་ལུང་ཏང་དང་། །ཏ་ལ་སྨྱིག་མ་ཀ་རི་ར། །བསྲེགས་པའི་
ཐལ་ཆུ་བཙགས་པ་དང་། །རྔ་མོའི་རུས་པའི་ཕྱེ་མ་བསྲེ། །མིག་སྨན་ལིང་ཐོག་གསོ་དཀའ་དང་། །མདོག་མི་སྡུག་པ་འཇོམས་པར་བྱེད། །ཅེས་བྱ་བ་ལ། རྒྱ་སྟར་ལ་སོགས་པ་བསྲེགས་པའི་ཐལ་བ་ཆུ་ལ་སྦངས་ཏེ། བཙགས་པ་ཐལ་ཆུ་དེ་དང་རྔ་མོའི་རུས་པའི་
ཕྱེ་མ་བསྲེས་ལ། མིག་སྨན་དེས་ནི་ལིང་ཏོག་གསོ་དཀའ་བ་དང་། མདོག་མི་སྡུག་པ་རྣམས་འཇོམས་ཤིང་སེལ་བར་བྱེད་དོ། །གསོ་སླ་ལ་ཡང་འདི་ཉིད་ནི། །བསྟེན་པས་སེལ་བར་ནུས་པ་ཡིན། །ཞེས་བྱ་བ་ལ། ལིང་ཏོག་གསོ་ཞིང་བཅོས་པར་སླ་བ་ལ་ཡང་བཤད་མ་
ཐག་པའི་ཕྱེ་མའི་མིག་སྨན་འདི་ཉིད་བསྟེན་ཞིང་བསྐུས་ན་ནད་དེ་སེལ་བར་ནུས་པ་ཡིན་ནོ། །ར་ཡི་རིལ་མ་ངོས་གཉིས་ནས། །ཁབ་ཀྱིས་ཕུག་སྟེ་ཆུ་གཟགས་ནས། །མཐེ་བོས་མཉམ་དུ་བཙིར་ནས་ནི། །རྨ་ཡི་ནང་ནི་ཤ་ཕྱེ་དང་། །ཚིལ་ནི་རློན་པས་བཀང་ནས་ནི། །དཀྲི་ཞིང་དཀྲི་ཞིང་དགང་
เล่ม ๒๐๒ · หน้า 142b
པར་བྱ། །ཞེས་བྱ་བ་ལ། རའི་རིལ་མ་ལྟ་བུ་ཞེས་བྱ་བའི་མིག་ནད་ལ་ངོས་གཉིས་ནས་ཁབ་ཕྲ་མོས་ཕུག་ལ་ཆུ་གཟགས་ནས་མཐེ་བོས་ཆ་མཉམ་དུ་ལེགས་པར་བཙིར་བ་དེའི་རྗེས་ལ་རྨའི་ནང་ན་བ་ལང་གི་ཤའི་ཕྱེ་མས་ལེགས་པར་བཀང་ནས་དེ་བཞིན་དུ་དཀྲིས་ཤིང་ཕྱིས་ཡང་བཀྲོལ་ལ་
དེའི་རྗེས་ལ་བ་ལང་གི་ཤའི་ཕྱེ་མ་དང་ཚིལ་རློན་པས་རྨ་དགང་བར་བྱའོ། །གཞན་བདུན་ནས་ནི་རྨ་འབྱོར་ནས། །མིག་འབྲས་ནག་པོ་མཉམ་བརྟན་ལ། །མིག་སྨན་སྣུམ་ཅན་གཏང་བྱ་ཞིང་། །མར་དང་འོ་མའི་སྣ་སྨན་བླུགས། །ཞེས་བྱ་བ་ལ། ཞག་བདུན་ལོན་པ་དང་། རྨ་འབྱོར་ཅིང་འཚོ་བས་
པའི་རྗེས་ལ་མིག་འབྲས་ནག་པོ་མཉམ་ཞིང་བརྟན་པར་གྱུར་པ་དང་། མིག་སྨན་སྣུམ་ཅན་མར་དང་སྦྱར་བ་གཏང་བར་བྱ་ཞིང་མར་དང་འོ་མ་བསྐོལ་བའི་སྣ་སྨན་བླུགས་པར་བྱའོ། །དེ་ལྟར་ན་ཡང་རྒྱས་གྱུར་ན། །དབུག་དང་གཅད་སོགས་བྱ་བ་བྱས། །བཅད་དྲགས་པ་ཡིས་
མིག་ནང་དུ། །ཞུགས་པར་མི་འགྱུར་ཅི་རིགས་བྱ། །ཞེས་བྱ་བ་ལ། དེ་ལྟར་སྔར་བཤད་པའི་ཚུལ་གྱིས་གསོ་བ་བྱས་སུ་ཟིན་ཀྱང་སླར་གང་ཞིང་རྒྱས་པར་གྱུར་ན་རའི་རིལ་མ་ལྟ་བུའི་མིག་ནད་དེ་ལ་དབུག་པ་དང་བཅད་པ་ལ་སོགས་པའི་གསོ་བ་ཅི་རིགས་པར་བྱ་སྟེ།
རྣམ་པ་གང་གིས་བཅད་དྲགས་པའི་རྒྱུས་མིག་ནང་དུ་ཞུགས་པར་མི་འགྱུར་བར་ལེགས་པ་ཁོ་ནར་བྱའོ། །ལིང་ཐོག་ལ་ནི་རྟག་པར་རང་གི་སྨན། །བསྐོལ་བའི་མར་བླུད་སྣ་སྨན་བསྟེན་པ་དང་། །ཅི་ནས་མཐོང་བ་ཉམས་པར་མི་འགྱུར་བར། །མིག་སྨན་རྣོན་པོ་རྟག་ཏུ་བསྟེན་
པར་བྱ། །ཞེས་བྱ་བ་ལ། ལིང་ཐོག་གི་མིག་ནད་ལ་ནི་དུས་རྟག་པར་རང་གི་མིག་ནད་དང་རྗེས་སུ་མཐུན་པའི་སྨན་དང་བསྐོལ་བའི་མར་བླུད་པ་དང་སྣ་སྨན་ཚད་ཕྲན་བསྟེན་པར་བྱས་སྟེ། དེ་ལྟར་བྱས་པས་ཅི་ནས་ཀྱང་མིག་གི་མཐོང་བ་ཉམས་པར་མི་འགྱུར་བར་མིག་སྨན་རྣོན་པོ་རྟག་ཏུ་
བསྟེན་ཞིང་གོམས་པར་བྱས་ན་ནང་དུ་ཞུགས་ཤིང་སྟོབས་ཉམས་པར་མི་འགྱུར་རོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་གཅིག་བའི་རྣམ་པར་འགྲེལ་པའོ།། །།
เล่ม ๒๐๒ · หน้า 143a
དེ་ནས་མཐོང་བར་བྱེད་པའི་མིག་ནད་ཀྱི་ནད་དམིགས་ཤེས་པར་བྱ་བ་བཤད་པར་བྱའོ། །ཞེས་བྱ་བ་ལ། གོ་རིམས་སུ་བབ་པའི་མཐོང་བར་བྱེད་པའི་མིག་གི་རྒྱལ་མོར་ནད་ཞུགས་པའི་ཚུལ་དུ་ཤེས་པར་བྱ་པའི་ལེའུ་བཤད་ཅིང་བརྩམས་པ་ཡིན་ནོ། །ནད་
ནི་རྩ་ཡི་ནང་ཞུགས་པ། རིམ་པ་དང་པོར་གནས་ནས་ནི། གཟུགས་ནི་མི་གསལ་མཐོང་འགྱུར་ཞིང་། རྒྱུ་མེད་པར་ཡང་གསལ་བར་མཐོང་། །ཞེས་བྱ་བ་ལ། རླུང་ལ་སོགས་པའི་ནད་གང་ཡང་རུང་བ་རྩའི་ནང་དུ་ཞུགས་ཤིང་འགྲོ་བར་གྱུར་པའི་ནད་དེས་རིམ་པ་དང་པོ་སྟེ་ཕྱི་རིམ་
དུ་གནས་ཤིང་བརྟེན་པར་གྱུར་པ་ན། མིག་གིས་གཟུགས་མི་གསལ་བར་མཐོང་བར་འགྱུར་བ་དང་། ལན་འགའ་ཞིག་ནི་དེ་ལྟར་འགྱུར་བའི་རྒྱུ་མེད་པར་གསལ་བ་ཉིད་དུ་ཡང་མཐོང་བར་འགྱུར་བ་ཡིན་ནོ། །རིམ་པ་གཉིས་པར་ཕྱིན་པ་ན། །མེད་པ་དག་ཀྱང་མཐོང་འགྱུར་ཞིང་། །ཡོད་ཅིང་
ཉེ་བར་བསྒྲིབས་ན་མཐོང་། །རིང་ནས་ཕྲ་བ་མཐོང་བར་འགྱུར། །ཉེ་དང་རིང་བར་གནས་པའི་གཟུགས། །ཕྱིན་ཅི་ལོག་ཏུ་ཤེས་པར་འགྱུར། །ཞེས་བྱ་བ་ལ། ནད་དེ་མིག་གི་རིམ་པ་གཉིས་པར་ཕྱིན་པར་གྱུར་པ་ན་མེད་པར་གྱུར་པའི་གཟུགས་དག་ཀྱང་མཐོང་བར་འགྱུར་བ་
དང་། གཟུགས་ཅན་དུ་ཡོད་ཅིང་གན་ན་གནས་ཏེ་ཉེ་བ་དག་ལ་བསྒྲིབས་ཏེ་བལྟས་ན་མཐོང་བར་འགྱུར་བ་དང་། ཐག་རིང་པོ་ནས་མཐོང་བར་འགྱུར་བ་ཡིན་ཏེ། ཉེ་བ་དང་རིང་བར་གནས་པའི་གཟུགས་ལ་ཕྱིན་ཅི་ལོག་ཏུ་ཤེས་པ་སྐྱེ་སྟེ། རིང་པོ་ན་ཡོད་པའི་གཟུགས་ནི་ཉེ་ཞིང་
གན་ན་ཡོད་པ་ལྟ་བུར་སྣང་བར་འགྱུར་ལ། ཉེ་བ་ན་ཡོད་པའི་གཟུགས་ནི་རིང་པོ་ན་གནས་པར་ཤེས་པར་འགྱུར་རོ། །ནད་ཀྱིས་ཟླུམ་པོའི་དབྱིབས་འདྲ་བར། །ཟླུམ་པོ་ཉིད་དུ་མཐོང་བར་འགྱུར། ཞེས་བྱ་བ་ལ། རིམ་པ་གཉིས་པ་ན་གནས་པར་གྱུར་པ་ན་སྐྱེས་བུས་གཟུགས་
ནས་ཀུན་ནས་ཟླུམ་པའི་དབྱིབས་འདྲ་བར་ཟླུམ་པོ་ཁོ་ནར་མཐོང་བར་འགྱུར་རོ། །མཐོང་བྱེད་དབུས་གནས་གཅིག་གཉིས་མཐོང་། །མང་དུ་གནས་ན་དུ་མ་མཐོང་། །ཞེས་བྱ་བ་ལ། ནད་མཐོང་བར་བྱེད་པའི་མིག་གི་རྒྱལ་མོའི་དབུས་ན་གནས་ན་དངོས་པོ་གཅིག་ལ་གཉིས་སུ་
เล่ม ๒๐๒ · หน้า 143b
མཐོང་བར་འགྱུར་ལ། མཐོང་བར་བྱེད་པ་དེར་ནད་མང་དུ་གནས་ན་གཟུགས་དུ་མ་སྟེ། སྣ་ཚོགས་པར་མཐོང་བར་བྱེད་པར་འགྱུར་རོ། །མཐོང་བྱེད་ནང་དུ་ཞུགས་པ་ནི། །ཆེ་ཆུང་གོ་ནི་བཟློག་པ་མཐོང་། །ཞེས་བྱ་བ་ལ། ནད་མཐོང་བར་བྱེད་པའི་མིག་གི་རྒྱལ་
མོའི་ནང་དུ་ཞུགས་ན་གཟུགས་ཆེ་བ་ཡང་ཆུང་བར་མཐོང་ལ་ཆུང་ངུ་ནི་ཆེ་བར་མཐོང་བར་འགྱུར་རོ། །འོག་ཏུ་གནས་པས་ཉེ་མི་མཐོང་། །སྟེང་དུ་གནས་པས་རིང་མི་མཐོང་། །ཞེས་བྱ་བ་ལ། མཐོང་བར་བྱེད་པའི་འོག་ན་ནད་གནས་པར་གྱུར་ན་གཟུགས་ཉེ་བར་གནས་པ་མཐོང་བར་
མི་འགྱུར་ལ། མཐོང་བར་བྱེད་པའི་སྟེང་ན་ནད་གནས་ན་གཟུགས་རིང་པོ་ན་གནས་པ་མཐོང་བར་མི་འགྱུར་རོ། །ངོས་ལ་གནས་པས་གཡས་གཡོན་མིན། །ནད་འདི་རབ་རིབ་ཅེས་བྱར་བཤད། །ཅེས་བྱ་བ་ལ། ནང་མཐོང་པར་བྱེད་པའི་ངོས་གཉིས་ལ་གནས་པར་གྱུར་
ན་གཡས་གཡོན་གྱི་ལོགས་ན་གནས་པའི་གཟུགས་མཐོང་བར་མི་འགྱུར་ཏེ། ནད་འདི་དག་ནི་རབ་རིབ་ཀྱི་ནད་ཅེས་བྱ་བར་བཤད་དོ། །ནད་ནི་རིམ་པ་གསུམ་པར་བརྟེན། །སྔོན་པོ་ཉིད་དུ་འགྱུར་བ་ཡིན། །དེ་ཡིས་སྟེང་མཐོང་འོག་མི་མཐོང་། །གོས་སྲབ་ཀྱིས་གཡོགས་
ལྟར་མཐོང་ཞིང་། །ཁ་དོག་ཇི་བཞིན་འགྱུར་བ་དང་། །རིམ་གྱིས་མཐོང་བ་ཉམས་པར་འགྱུར། །ཞེས་བྱ་བ་ལ། རླུང་ལ་སོགས་པའི་ནད་མིག་སྤྲིན་གྱི་རིམ་པ་གསུམ་པ་ལ་བརྟེན་ཅིང་གནས་པར་གྱུར་ན་མིག་མཆིང་བུ་ལྟར་སྔོན་པོར་འགྱུར་བ་ཡིན་ལ། སྔོན་པོར་གྱུར་པ་དེས་
སྟེང་ན་གནས་པའི་གཟུགས་མཐོང་བར་བྱེད་ཀྱི། འོག་ན་གནས་པ་མཐོང་བར་མི་འགྱུར་བ་དང་། གང་མཐོང་བ་དེ་གོས་སྲབ་མོས་གཡོགས་པ་ལྟར་མཐོང་བ་དང་། ཁ་དོག་ཇི་ལྟ་ཇི་ལྟར་མཐོང་བ་དེ་ལ་དེ་བཞིན་དུ་མེ་ལོང་ལྟར་རྣམ་པར་མཐོང་པར་བྱེད་པ་དང་། མཐོང་བ་དེ་རིམ་གྱིས་
ཉམས་ཤིང་ནུས་བ་ཆུང་བར་འགྱུར་རོ། །དེ་ལྟ་ན་ཡང་ཡལ་བར་དོར། །རིམ་པ་བཞི་བར་ཕྱིན་ནས་ནི། །མཐོང་བྱེད་མཚན་མོ་ཉམས་བྱེད་ཅིང་། །མིག་གི་རྒྱལ་མོ་ཁེབས་པར་བྱེད། །ཅེས་བྱ་བ་ལ། དེ་ལྟར་མིག་མཆིང་བུ་ལྟར་སྔོན་བོར་གྱུར་ན་ཡང་ཡལ་བར་དོར་ཏེ་མ་བཅོས་
เล่ม ๒๐๒ · หน้า 144a
ན་ནད་དེ་མིག་གི་རིམ་པ་བཞི་བར་ཕྱིན་ནས་མཐོང་བར་བྱེད་པའི་མིག་གི་མཚན་མའི་དང་པོ་ཉམས་པར་བྱེད་ཅིང་མིག་གི་རྒྱལ་མོ་ཁེབས་པས་ལོང་བར་བྱེད་བར་འགྱུར་རོ། །དེ་ལྟ་ན་དེ་ཡན་ཆད་ནི་རབ་རིབ་ལ་སོགས་པའི་སྤྱིའི་མཚན་ཉིད་བཤད་པ་ཡིན་
ནོ། །དེ་ལ་རླུང་གྱུར་རབ་རིབ་ནི། །ལོང་ལོང་པོར་ནི་མཐོང་བ་དང་། གཡོ་ཞིང་རྙོག་ཅན་རྩ་དམར་སྣང་། །ཆེད་འགའ་གསལ་བར་མཐོང་བ་དང་། །དྲ་བ་སྐྲ་ཤད་སྦྲང་བུ་དང་། །འོད་མཐོང་། ཞེས་བྱ་བ་ལ། རབ་རིབ་ཀྱི་ནད་དེ་ལ་རླུང་ལས་གྱུར་པའི་རབ་རིབ་ཀྱི་མཚན་ཉིད་
ནི་གཟུགས་འཁྲུགས་ཤིང་ལོང་ལོང་པོར་མཐོང་བ་དང་། གཡོ་ཞིང་མི་བརྟན་པ་དང་། རྙོག་པ་ཅན་དེ་མི་གསལ་བ་དང་། ཕལ་ཆེར་རྩ་དམར་བར་སྣང་བ་དང་། ཆེད་འགའ་ནི་གཟུགས་གསལ་བར་མཐོང་བ་དང་། དེ་བཞིན་དུ་དྲ་བས་གཡོགས་པ་དང་། སྐྲ་ཤད་འཛིངས་
པ་དང་། སྦྲང་བུ་ལྟ་བུ་དང་། འོད་འབར་བ་ལྟ་བུར་ཡང་ཆེད་འགའ་མཐོང་བ་ཡིན་ནོ། །དེ་ནི་ཡལ་བར་བོར། སྔོན་པོར་གྱུར་པ་མིག་དམར་ལ། །བཞིན་ལ་སྣ་ནི་མེད་པར་མཐོང་། །ཟླ་བ་མེད་སོགས་དུ་མར་མཐོང་། །ཡོན་པོའང་དྲང་པོར་མཐོང་བར་འགྱུར། །ཞེས་བྱ་བ་
ལ། དེ་ལ་རླུང་ལས་གྱུར་པའི་རབ་རིབ་དེ་ཡལ་བར་བོར་ཞིང་མ་བཙོས་ན་སྔོན་པོར་གྱུར་པ་ལས་ཐལ་ཏེ། མིག་དམར་བར་གྱུར་པ་དང་། མིག་ནད་སྤྲིས་གཡོགས་པས་ཉེན་པའི་མི་དེས་རང་གི་བཞིན་དེ་གདོང་ལ་སྣ་མེད་པར་མཐོང་བ་དང་། ཡང་ཟླ་བ་ལ་སོགས་པ་ལ་གཟུགས་
དུ་མ་མཐོང་བ་དང་། གཟུགས་ཡོན་པོ་ཡང་དྲང་པོར་ཤེས་ཤིང་མཐོང་བར་འགྱུར་རོ། །སྔོན་པོ་འཕེལ་ན་མཐོང་བྱེད་ནི། །རྡུལ་གྱིས་ཁེབས་བ་ལྟ་བུར་མཐོང་། །གསལ་ཞིང་དམར་བ་འམ་རྒྱ་ཆེ་བའམ། །ཕྲ་མོའམ་མཐོང་བ་ཉམས་པར་འགྱུར། །དེ་ནི་མཐོང་བ་ཉམས་པ་
ཡིན། །ཞེས་བྱ་བ་ལ། མིག་ནད་མཆིང་བུ་ལྟ་བུར་སྔོ་བ་དེ་ཉིད་འཕེལ་ཞིང་རྒྱས་པར་གྱུར་ན་མཐོང་བར་བྱེད་པའི་མིག་གི་དཀྱིལ་འཁོར་རྡུལ་གྱི་ཚོགས་ཀྱིས་ཁེབས་ཤིང་གཡོགས་པ་ལྟ་བུར་འགྱུར་བ་དང་། གསལ་བ་ལ་སོགས་པ་གང་ཡང་རུང་བ་མཐོང་ཞིང་མཐོང་བ་ཉམས་
เล่ม ๒๐๒ · หน้า 144b
པར་བྱེད་པར་འགྱུར་ཏེ། དེ་ལྟ་བུའི་མིག་ནད་དེ་ནི་མཐོང་བ་ཉམས་པའམ་མཚན་མ་ཉམས་པ་ཞེས་བྱའོ། །ཞེས་བཤད་དེ། དེ་ལ་ལོང་བ་དང་སྤྲིས་གཡོགས་པ་དང་མཚན་མ་ཉམས་པ་ཞེས་བྱ་བའི་མིང་ཡང་འཐོབ་པོ། །རླུང་གིས་མིག་གི་རྩ་འཁུམས་འགྱུར། །མཐོང་
བྱེད་གཏིང་དུ་ཞུགས་པ་དག །འདི་ནི་གཏིང་རིང་ཞེས་བྱར་བཤད། །ཅེས་བྱ་བ་ལ། རླུང་གི་ནད་ལས་གྱུར་པའི་མཐོང་བ་ཉམས་པའི་ནད་ལ་ནི་མིག་གི་རྩ་འཁུམས་པར་འགྱུར་བ་དང་། དེ་བཞིན་དུ་མཐོང་བར་བྱེད་པའི་མིག་གི་རྒྱལ་མོའི་གཏིང་དུ་ཞུགས་ཤིང་ནང་དུ་ཞེན་པ་ཡིན་
ཏེ། མིག་ནད་འདི་ནི་མིག་གཏིང་རིང་བ་ཞེས་བྱའོ། །ཞེས་དྲང་སྲོང་རྣམས་ཀྱིས་བཤད་དོ། །མཁྲིས་གྱུར་རབ་རིབ་གློག་དང་ནི། །སྲིན་བུ་མར་ཁྱེར་མེ་སྒྲོན་འོད། །རྨ་བྱ་སྲེག་བའི་སྒྲོ་དང་འདྲ། །ཕལ་ཆེར་སྔོན་པོ་མཐོང་བར་འགྱུར། །ཞེས་བྱ་བ་ལ། མཁྲིས་པ་ལས་
གྱུར་པའི་མིག་ནད་རབ་རིབ་ནི་གློག་དང་སྲིན་བུ་མེ་ཁྱེར་ལ་སོགས་པའི་འོད་ཀྱིས་སྣང་བར་བྱས་པ་ལྟ་བུར་གཟུགས་མཐོང་བར་འགྱུར་བ་དང་། དེ་བཞིན་དུ་རྨ་བྱའི་མཇུག་སྒྲོ་དང་། སྲེག་པའི་སྒྲོ་འདྲ་བར་གཟུགས་ཁ་དོག་སྣ་ཚོགས་སུ་མཐོང་བ་དང་། ཕལ་ཆེར་དེ་མང་དུ་
གཟུགས་སྔོན་པོར་མཐོང་བར་འགྱུར་རོ། །མཐོང་བྱེད་མིག་ནི་འཁར་གཡའ་འདྲ། །དེ་ལྟ་བུ་ནི་མཐོང་བ་དང་། །ཉི་ཟླ་འཁྱིམས་དང་མེ་དང་ནི། །སྨིག་རྒྱུ་འཇའ་ཚོན་མཐོང་བར་འགྱུར། །ཞེས་བྱ་བ་ལ། མཁྲིས་པ་ལས་གྱུར་པའི་མིག་སྔོན་པོར་གྱུར་པའི་ནད་ལ་ནི་
མིག་འཁར་བའི་གཡའ་ལྟར་སྔོ་བ་དང་གཟུགས་ཀྱང་འཁར་བའི་སྔོན་པོ་ལྟར་མཐོང་བ་དང་། དེ་བཞིན་དུ་ཉི་མ་དང་ཟླ་བ་འཁྱིམས་ཤིང་ཟླུམ་པོས་བསྐོར་བ་ལྟ་བུར་མཐོང་བ་དང་། དེ་བཞིན་དུ་མེ་དང་སྨིག་རྒྱུ་དང་འཇའ་ཚོན་ལྟ་བུར་གཟུགས་མཐོང་བར་འགྱུར་བ་ཡིན་ནོ། །བུང་བ་ལྟར་སྔོ་
མཐོང་བ་མེད། །འབྲས་བུ་སྣུམ་པ་མཐོང་ཉམས་ཡིན། །ཞེས་བྱ་བ་ལ། མཁྲིས་པ་ལས་གྱུར་པའི་མིག་ནད་བུང་བ་ལྟར་སྔོ་བའི་བུང་བའི་མདོག་ལྟར་སྔོ་ནག་ཏུ་སྣང་བ་དང་། དེ་བཞིན་དུ་མཐོང་བ་མེད་ཅིང་གཟུགས་མཐོང་བ་ལས་ཉམས་པ་དང་། འབྲས་བུ་སྣུམ་པ་དང་
เล่ม ๒๐๒ · หน้า 145a
གཟུགས་མཐོང་བ་ཉམས་པ་ཡིན་ནོ། །མཁྲིས་པས་མིག་ནི་ཆུང་ཞེས་བཤད། །ཆུང་མཐོང་དེ་ནི་ཐུང་ངུ་ཡིན། །ཞེས་བྱ་བ་ལ། མཁྲིས་པ་འཁྲུགས་པར་གྱུར་པ་ལས་མིག་གང་ཆུང་ངུར་མཐོང་བ་དེ་ནི་མིང་ཆུང་ངུ་མཐོང་བ་ཞེས་བྱའོ། །སེར་ཞིང་དངོས་པོ་
སེར་པོར་མཐོང་། །མཁྲིས་པས་ཚིག་པར་གྱུར་ཅེས་བྱ། །ཞེས་བྱ་བ་ལ། མཁྲིས་པ་ལས་གྱུར་པའི་མིག་ནད་མིག་སེར་ཞིང་དངོས་པོ་སེར་པོར་མཐོང་བ་དེ་ནི་མིང་མཁྲིས་པས་ཚིག་པ་ཞེས་བྱའོ། །བད་ཀན་རབ་རིབ་ཕལ་ཆེར་ནི། །སྣུམ་ཞིང་དཀར་བར་མཐོང་བ་དང་། །དུང་དང་
ཟླ་བ་ཀུན་ད་དང་། །ཀུན་དའི་མེ་ཏོག་ལྟ་བུས་ཁྱབ། །ཅེས་བྱ་བ་ལ། བད་ཀན་ལས་གྱུར་པའི་མིག་ནད་རབ་རིབ་ཅན་ཕལ་ཆེར་དེ་མང་དུ་ནི་གཟུགས་སྣུམ་པ་དང་། དཀར་པོར་མཐོང་བ་དང་། དེ་བཞིན་དུ་གཟུགས་དུང་དང་ཟླ་བ་ལ་སོགས་པ་ལྟ་བུས་ཁྱབ་ཅིང་གཡོགས་པ་ལྟ་བུར་
མཐོང་བ་ཡིན་ཏེ། དེ་ནི་མིག་ནད་དཀར་པོ་ཞེས་བྱའོ། །སྔོན་པོ་འོད་མེད་ཉི་ཟླ་དང་། །སྒྲོན་མེས་ཁྱབ་པ་ལྟ་བུར་མཐོང་། །མིག་འབྲས་དཀར་པོར་སྣང་བར་འགྱུར། །ཞེས་བྱ་བ་ལ། དེ་ཉིད་ཡལ་བར་བོར་ཞིང་མ་གསོས་ན་མཆིང་བུ་ལྟ་བུར་སྔོན་པོར་གྱུར་ཅིང་འོད་མེད་པའི་ཉི་མ་
དང་ཟླ་བ་དང་། སྒྲོན་མ་ལ་སོགས་པ་ལྟ་བུར་ཁྱབ་ཅིང་གཟུགས་མཐོང་བ་དང་། དེ་ནི་མིག་འབྲས་དཀར་པོ་ཉིད་དུ་སྣང་ཞིང་མངོན་པར་གྱུར་པ་ཡིན་ནོ། །བད་ཀན་མཐོང་ཉམས་དེས་མངོན་ཁྱབ། །སྣུམ་ཞིང་མཐོང་བ་ཉམས་འགྱུར་ལ། །ཆུ་ཡི་ཐིགས་པ་པདྨ་ཡི། །འདབ་
མའི་སྟེང་ན་གནས་ལྟར་གཡོ། །དྲོ་ན་ཞུམ་པར་གྱུར་པ་དང་། །གྲང་བས་ཡོངས་སུ་ཁྱབ་པར་བྱེད། །ཟླ་བ་མེ་ཏོག་ཀུན་ད་དུང་། །ཤེལ་ལྟར་སྣང་ཞིང་དཀར་བ་ཡིན། །ཞེས་བྱ་བ་ལ། བད་ཀན་ལས་གྱུར་པའི་སྦྲིས་གཡོགས་ཤིང་མཐོང་བ་ཉམས་པའི་མིག་ནད་ནི་
བད་ཀན་གྱིས་མངོན་སུམ་དུ་ཁྱབ་པ་ལྟ་བུར་སྣང་བ་དང་། མིག་སྣུམ་པར་སྣང་པ་དང་། མཐོང་བ་ཉམས་ཤིང་ལོང་བར་གྱུར་བ་དང་། དེ་བཞིན་དུ་ཆུའི་ཐིགས་པ་པདྨའི་འདབ་མའི་སྟེང་དུ་གནས་པ་ལྟ་བུར་གཡོགས་པར་སྣང་བ་དང་། ཐིགས་པ་དེ་དྲོ་བའི་གནས་སུ་
เล่ม ๒๐๒ · หน้า 145b
ནི་ཞུམ་ཞིང་འདུས་པར་གྱུར་ལ། གྲིབ་མ་དང་གྲང་བའི་གནས་སུ་ཡོངས་སུ་ཁྱབ་ཅིང་རྒྱས་པར་བྱེད་པ་དང་། ཡང་དེ་ཟླ་བ་ལ་སོགས་པ་འགའ་ཡང་རུང་བ་བས་ཀྱང་དཀར་བར་གྱུར་པར་སྣང་བ་ཡིན་ནོ། །ཁྲག་གི་རབ་རིབ་དམར་བ་དང་། །མུན་པར་གྱུར་པ་མཐོང་བ་ཡིན། །ཞེས་
བྱ་བ་ལ། ཁྲག་ལས་གྱུར་པའི་རབ་རིབ་ནི་སྦྲིས་གཡོགས་པ་དམར་བར་སྣང་བ་དང་། གཟུགས་མུན་པར་ཞུགས་པ་ལྟ་བུར་མཐོང་བ་ཡིན་ནོ། །སྔོན་པོ་དམར་བ་འམ་གནག་པར་ནི། །མིག་གིས་དེ་ལྟར་མཐོང་བ་ཡིན། །ཞེས་བྱ་བ་ལ། ཁྲག་ལས་མིག་ནད་མཆིང་བུ་ལྟར་
སྔོན་པོར་གྱུར་པ་ནི། མིག་དམར་པོ་འམ་ནག་པོར་གྱུར་ཅིང་མིག་གིས་ཀྱང་དམར་པོ་འམ་ནག་པོ་མཐོང་བར་གྱུར་པ་ཡིན་ནོ། །མཚན་མ་ཉམས་པ་འང་དེ་ལྟར་མཐོང་། །འོད་མེད་མཐོང་བ་ཉམས་པ་ཡིན། །ཞེས་བྱ་བ་ལ། དེ་ཡལ་བར་བོར་བས་མཚན་མ་ཉམས་
ཤིང་སྦྲིས་གཡོགས་པ་ཁྲག་ལས་གྱུར་པའང་མིག་དེ་དང་འདྲ་བ་སྟེ། དམར་པོ་འམ་ནག་པོར་གྱུར་ཞིང་གཟུགས་དེ་གཉིས་ལྟར་མཐོང་བ་དང་། དེ་བཞིན་དུ་མིག་གི་རྒྱལ་མོ་འོད་མེད་ཅིང་མཐོང་བ་ཉམས་ཤིང་ལོང་བར་འགྱུར་རོ། །ལྡན་པ་འམ་ནི་འདུས་བ་ཡི། །རབ་རིབ་
ལ་སོགས་མཚན་མ་ནི། །འདྲེན་མ་ཡིན་པར་ཤེས་པར་བྱ། །ཞེས་བྱ་བ་ལ། ནད་གཞི་གཉིས་འདྲེས་པའི་ལྡན་པ་འམ་གསུམ་འདུས་པར་འགྱུར་བའི་མཚན་མ་ནི། རབ་རིབ་དང་སྔོན་པོ་དང་། སྦྲིས་གཡོགས་པའི་མཚན་མ་འདྲེན་མར་སྣང་བ་ཡིན་པར་ཤེས་པར་བྱའོ། །
གློ་བུར་དུ་ནི་རབ་རིབ་དག །གསལ་དང་མི་གསལ་འཁྲུགས་པར་བྱེད། །ཅེས་བྱ་བ་ལ། ལྡན་པ་དང་འདུས་པ་ལས་རབ་རིབ་ཏུ་འགྱུར་བ་ནི་གློ་བུར་དུ་གསལ་བར་འཁྲུགས་པར་འགྱུར་ཏེ། ལན་འགའ་ནི་གསལ་བར་འགྱུར་ལ། ལན་འགའ་ནི་མི་གསལ་བར་གཟུགས་མཐོང་བར་
འགྱུར་རོ། །ལྷག་མ་དག་གིས་མཐོང་བྱེད་ནི། །དམར་ཞིང་སྣ་ཚོགས་དག་ཏུ་སྣང་། །ཞེས་བྱ་བ་ལ། སྔོན་པོ་དང་མཐོང་བ་ཉམས་པ་ལྷག་མ་འདུས་པ་དང་། ལྡན་པ་ལས་གྱུར་པ་ནི་མཐོང་བར་བྱེད་པའི་མིག་གི་དཀྱིལ་འཁོར་དམར་ཞིང་སྣ་ཚོགས་སུ་སྣང་པ་ཡིན་ཏེ། ལྡན་
เล่ม ๒๐๒ · หน้า 146a
པ་དང་འདུས་པའི་རབ་རིབ་གཅིག་ཏུ་བཤད་པ་ནི། ལྡན་པ་ལས་འགྱུར་པའི་རབ་རིབ་གཅིག་དང་། ལྡན་པ་ལས་གྱུར་པའི་མིག་སྔོན་པོ་གྱུར་པ་གཅིག་དང་། ལྡན་པ་ལས་གྱུར་པའི་མཐོང་བ་ཉམས་པ་གཅིག་དང་། དེ་བཞིན་དུ་ལྡན་པ་ལས་གྱུར་པའི་རབ་
རིབ་གཅིག་དང་། འདུས་པ་ལས་གྱུར་བའི་མིག་སྔོན་པོར་གྱུར་བ་གཅིག་དང་། འདུས་པ་ལས་གྱུར་པའི་མཐོང་བ་ཉམས་པ་གཅིག་ཡིན་ནོ། །གང་གིས་མཐོང་བྱེད་ནད་ཀྱིས་ཁྱབ། །སྲེ་མོའི་མིག་འདྲར་སྣང་བར་འགྱུར་། །དེ་ནི་ཉིད་མཐོང་མཚན་མོ་མིན། །ནེའུ་ལེ་ལོང་བ་ཞེས་
དེ་བཤད། །ཅེས་བྱ་བ་ལ། མིག་གང་གིས་མཐོང་བར་བྱེད་པའི་མིག་གི་དཀྱིལ་འཁོར་རླུང་ལ་སོགས་པའི་ནད་ཀྱིས་ཁྱབ་ཅིང་སྲེ་མོའི་མིག་དང་འདྲ་བར་འཚེར་བར་སྣང་བར་འགྱུར་བའི་ནད་དེ་ནི་མིང་ནེའུ་ལེ་ལོང་བ་ཞེས་བྱ་བར་བཤད་དེ། ནེའུ་ལེ་ལོང་བ་ཞེས་བྱ་བ་གང་ཡིན་
པ་དེའི་མཚན་ཉིད་དེ་ནི་ཉིན་མོར་དངོས་པོ་སྣ་ཚོགས་མཐོང་བར་འགྱུར་གྱི། །མཚན་མོ་མཐོང་བར་མི་འགྱུར་རོ། །ཉི་མ་ནུས་པར་གྱུར་པ་ན། །འོད་མི་སྣང་ཚེ་རེངས་འགྱུར་ཞིང་། །མཐོང་བྱེད་ཉམས་པར་བྱེད་པ་ནི། །ནད་ཀྱིས་ལོང་བ་གཉིས་པ་ཡིན། །ཉི་མའི་
ཟེར་གྱིས་ཕོག་པ་ན། །མཐོང་བའི་ལམ་ནས་དྲི་མ་ནི། །ཞུ་ཞིང་མེད་པར་གྱུར་ནས་ནི། །ཉིན་མོ་གསལ་བར་མཐོང་བར་བྱེད། །ཅེས་བྱ་བ་ལ། ཉི་མ་རིའི་རྩེ་ལས་ནུབ་པར་གྱུར་ཅིང་ཉིན་མོའི་མཐའ་མར་འོད་མི་སྣང་བར་གྱུར་པ་ན། མིག་གི་ནད་དེ་རེངས་ཤིང་སྲ་བར་གྱུར་
ནས་མཐོང་བར་བྱེད་པའི་མིག་གི་རྒྱལ་མོ་བསྒྲིབས་ཤིང་ཁེབས་པར་གྱུར་པས་མཐོང་བར་བྱེད་པ་ཉམས་པར་འགྱུར་ཏེ། དེ་ནི་ནད་ཀྱིས་མཚན་མོ་ལོང་བ་སྔ་མ་ལས་གཉིས་པར་གྱུར་པ་ཉིད་ཡིན་ཏེ་མཚན་མོ་ལོང་བ་འདི་ལ་ཉི་མའི་འོད་ཟེར་གྱིས་མཐོང་བར་བྱེད་པ་ན་ཡོད་པའི་ནད་མཐོང་བར་
བྱེད་པའི་ལམ་གྱི་མིག་ནས་དྲི་མ་དེ་ཞུ་ཞིང་མེད་པར་གྱུར་ནས། ཉིན་མོ་དངོས་པོ་གསལ་བ་ཁོ་ནར་མཐོང་བར་བྱེད་པ་ཡིན་ནོ། །ཚ་བས་གདུངས་ཏེ་མོད་ལ་ནི། །ཆུ་གྲང་ནང་དུ་ཞུགས་གྱུར་ན། །ནད་གཞི་གསུམ་དང་ཁྲག་འཁྲུགས་ཏེ། །དྲོད་ནི་གྱེན་འགྲོ་དེ་ནས་མིག་
เล่ม ๒๐๒ · หน้า 146b
ཚ་ཞིང་ནད་དཀར་དྲི་མ་ཅན། །ཉིན་མོ་ལོང་ལོང་པོར་མཐོང་ཞིང་། །མཚན་མོ་ལོང་བར་གྱུར་པ་དག །དེ་ནི་དྲོ་བས་ཚིག་ཅེས་བྱ། །ཞེས་བྱ་བ་ལ། མིག་གང་ཉི་མ་ལ་སོགས་པའི་ཚ་བས་གདུངས་ཤིང་ཉེན་པར་གྱུར་པ་དེ། མོད་ལ་དེ་འཕྲལ་དུ་ཆུ་གྲང་མོའི་ནང་དུ་ཞུགས་
ཤིང་ལུས་ནུབ་པར་བྱེད་པའི་རྒྱུས། ལུས་ཀྱི་ནང་ན་ཡོད་པའི་མེ་དྲོད་ཀྱི་ཚོགས་རླུང་ལ་སོགས་པའི་ནད་གཞི་གསུམ་དང་ཁྲག་འཁྲུགས་པར་གྱུར་ཅིང་དྲོད་དེ་ནད་དེ་དང་འདྲེས་པར་གྱུར་པས་གྱེན་དུ་འགྲོ་བར་འགྱུར་ལ་དེ་ནས་དེའི་འོག་ཏུ་རྒྱུ་དེས་མིག་ཚ་ཞིང་ན་བར་གྱུར་པ་དང་། མིག་
འབྲས་དཀར་པོ་དྲི་མ་ཅན་དུ་འགྱུར་ལ། དེས་ནི་ཉིན་མོ་ནི་མཐོང་བ་མི་གསལ་ཞིང་རྙོག་པ་ཅན་ལོང་ལོང་བོར་མཐོང་ལ་མཚན་མོའི་དུས་སུ་ནི་ལོང་ཞིང་ཅི་ཡང་མི་མཐོང་བར་འགྱུར་ཏེ། མིག་ནད་དེ་ནི་དྲོ་བས་ཚིག་པ་ཞེས་དྲང་སྲོང་རྣམས་ཀྱིས་བཤད་དོ། །ཤས་ཆེར་སྐྱུར་ཟོས་
ནད་དང་ནི། །ཁྲག་དང་བཅས་པས་མིག་ཁྱབ་འགྱུར། །འདྲུལ་ཞིང་གཡོ་བ་དྲི་མ་ཅན། །དེ་ནི་སྐྱུར་གྱིས་ཚིག་ཅེས་བྱ། །ཞེས་བྱ་བ་ལ། ཤས་ཆེར་དེ་ནི་མི་ཟད་པ་འམ། ཡང་དང་ཡང་དུ་ཁ་ཟས་སྐྱུར་བག་ཟོས་པ་ལས་རླུང་ལ་སོགས་པའི་ནད་ཁྲག་དང་བཅས་
པས་མིག་གི་ནང་ཁྱབ་བར་འགྱུར་ཞིང་ཁེབས་པར་གྱུར་པས་མིག་འདྲུལ་ཞིང་རྣགས་པ་དང་། ཤས་ཆེར་གཡའ་བ་དང་དྲི་མ་ཅན་དུ་གྱུར་པའི་མིག་ནད་དེ་ནི་མིང་སྐྱུར་གྱིས་ཚིག་པ་ཞེས་བྱའོ། །ཞེས་སློབ་དཔོན་དག་གིས་བཤད་དོ། །མྱ་ངན་རིམས་དང་མགོ་ནད་ཀྱིས། །རླུང་
སོགས་གདུངས་པར་གྱུར་པ་ལས། །རླུང་སོགས་འཁྲུགས་ཤིང་དུང་འཐུལ་མཐོང་། །དེ་ནི་དུད་པ་ཅན་ཞེས་བྱ། །ཞེས་བྱ་བ་ལ། སྐྱེས་བུ་མྱ་ངན་ལ་སོགས་པས་གདུངས་པར་གྱུར་པ་ལས་མིག་གིས་དུད་པ་ལྟ་བུར་མཐོང་ཞིང་ནང་ན་དུད་པ་བསྐུ་བ་ལྟར་འཁྲུགས་པའི་
མིག་ནད་དེ་ནི་དུད་པ་ཅན་ཞེས་བྱའོ། །སྙིང་སྟོབས་ཆུང་བས་གློ་བུར་དུ། །ངོ་མཚར་ཅན་གྱི་གཟུགས་མཐོང་བ་འམ། །ཉི་མ་འོད་ཅན་སོགས་མཐོང་ནས། །མིག་ལ་བརྟེན་བའི་རླུང་ལ་སོགས། །གཟི་བྱིན་ཉམས་པས་མིག་གི་ནི། །མཐོང་བ་ཉམས་པར་བྱེད་
เล่ม ๒๐๒ · หน้า 147a
པར་འགྱུར། །བཻ་ཌཱུརྱ་མདོག་མཁྲང་བག་དང་། །རང་བཞིན་གནས་ལྟར་ནད་མེད་འགྱུར། །འདི་ནི་འཕྲད་པ་ལས་བྱུང་བའི། །མཚན་མ་ཉམས་པ་ཞེས་བྱར་བཤད། །ཅེས་བྱ་བ་ལ། སྐྱེས་བུ་སྙིང་སྟོབས་ཆུང་ཞིང་བློ་ཞེན་པས་གློ་བུར་ཏེ་འཕྲལ་
དུ་ངོ་མཚར་དུ་གྱུར་ཅིང་རྨད་དང་ལྡན་པའི་གཟུགས་མཐོང་བར་འགྱུར་བ་དང་། ཡང་ན་ཉི་མ་ལ་སོགས་པ་འོད་དང་ལྡན་ཞིང་འཚེར་བའི་གཟུགས་མཐོང་བ་ལས་མིག་ལ་རྟེན་ཅིང་གནས་པའི་ནད་ཀྱིས་མིག་གི་གཟི་བྱིན་གྱིས་མདངས་ཉམས་པར་བྱས་ནས། མིག་གི་མཐོང་བ་ཉམས་
པར་འགྱུར་པ་དང་། བཻ་ཌཱུརྱའི་མདོག་ལྟར་སྔོ་བ་དང་། མཁྲང་ཞིང་གཏར་བག་ཏུ་འདུག་པ་དང་། རང་བཞིན་དུ་གནས་ཤིང་ཐ་མལ་པར་འདུག་པ་ལྟར་ན་ནད་མེད་པར་འགྱུར་ཏེ། ནད་འདི་ནི་འཕྲད་པ་ལས་བྱུང་བའི་མཚན་མ་ཉམས་པ་ཞེས་བྱའོ། །འདི་ལས་བད་
ཀན་མ་གཏོགས་མཚན། །ཉམས་དང་ཐུང་ངུ་གཏིང་ཞེན་སྤང་། །ཞེས་བྱ་བ་ལ། མིག་ནད་འདི་དག་གི་ནང་ནས་བད་ཀན་ལས་གྱུར་པའི་མཚན་མའམ། མཐོང་བ་ཉམས་པ་མ་གཏོགས་པ་རླུང་དང་མཁྲིས་པ་དང་ཁྲག་དང་ལྡན་པ་དང་འདུས་པ་དང་འཕྲད་པ་ལས་གྱུར་པའི་
མཐོང་བ་ཉམས་པ་དྲུག་པོ་སྤང་བར་བྱ་བ་དང་། དེ་བཞིན་དུ་ཐུང་ངུ་ཞེས་བྱ་བ་དང་། གཏིང་དུ་ཞེན་པ་ཞེས་བྱ་བའི་མིག་ནད་ཀྱང་གསོར་མི་རུང་བས་སྤང་བར་བྱའོ། །མིག་སྔོན་དྲུག་དང་ནེའུ་ལེ་ཡི། །ལོང་བ་འཚོ་ཙམ། །ཞེས་བྱ་བ་ལ། རླུང་དང་མཁྲིས་པ་དང་བད་ཀན་དང་།
ཁྲག་དང་ལྡན་པ་དང་། འདུས་པ་ལས་གྱུར་པའི་མིག་སྔོན་པོ་མཆིང་བུ་ལྟར་གྱུར་པ་དྲུག་པོ་དང་། ནེའུ་ལེ་ལོང་བ་སྟེ་བདུན་པོ་དེ་དག་ནི་རེ་ཞིག་འཚོ་བ་ཙམ་དུ་བྱར་རུང་བ་ཡིན་ནོ། །ལྷག་མ་ནི། བཅུ་གཉིས་པོ་ནི་གསོ་བར་བྱ། ཞེས་བྱ་བ་ལ། ལྷག་མ་མིག་ནད་
བཅུ་གཉིས་པོ་རླུང་དང་མཁྲེས་པ་དང་། བད་ཀན་དང་ཁྲག་དང་ལྡན་པ་དང་། འདུས་པ་ལས་གྱུར་པའི་རབ་རིབ་དྲུག་དང་། མཁྲིས་པས་ཚིག་པ་དང་། བད་ཀན་གྱིས་མཚན་མ་ཉམས་པ་དང་། མཚན་མོ་ལོང་བ་དང་དྲོ་བས་ཚིག་པ་དང་སྐྱུར་བས་ཚིག་པ་དང་། དུད་པ་
เล่ม ๒๐๒ · หน้า 147b
ཅན་ཏེ་བཅུ་གཉིས་པོ་ནི་བཅོས་སུ་རུང་བ་ཡིན་པས་གསོ་བར་བྱའོ། །དེ་ལྟར་མིག་ནད་ཉི་ཤུ་ནི། །རྩ་བདུན་དག་ཏུ་བསྟན་པ་ཡིན། །ཞེས་བྱ་བ་ལ། ཚུལ་དེ་ལྟར་ན་མཐོང་བར་བྱེད་པའི་མཚན་མ་ལ་གནོད་པའི་མིག་ནད་ཉི་ཤུ་རྩ་བདུན་དག་ཀྱང་བསྟན་ཅིང་བཤད་པ་ཡིན་
ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་གཉིས་པའི་རྣམ་པར་འགྲེལ་པའོ།། །།དེ་ནས་རབ་རིབ་གསོ་བ་བཤད་
པར་བྱའོ། །ཞེས་བྱ་བ་ལ། གོ་རིམས་ཀྱིས་ན་ལེའུ་འདི་བརྩམས་པ་ཡིན་ནོ། །རབ་རིབ་སྔོན་པོ་ཉིད་འགྱུར་ཞིང་། །སྔོན་པོ་མ་བཅོས་ལོང་བར་འགྱུར། །དེ་བས་མིག་ནད་ལ་རབ་རིབ། །མི་བཟད་མྱུར་དུ་གསོ་བར་བྱ། །ཞེས་བྱ་བ་ལ། དང་པོར་མིག་ནད་རབ་
རིབ་ཏུ་གྱུར་པ་དེ་མ་བཅོས་ཤིང་གསོ་བ་མ་བྱས་ན། རྒྱུ་དེས་སྔོན་པོ་ཞེས་བྱ་བའམ། སྤྲིས་གཡོགས་པ་ཞེས་བྱ་བར་འགྱུར་ལ། དེ་བཞིན་དུ་སྔོན་པོར་འགྱུར་ཞིང་སྤྲིས་གཡོགས་པ་མ་བཅོས་ན་ཡང་ལོང་བ་ཉིད་དུ་འགྱུར་རོ། །རྒྱུ་དེ་བས་ནི་མིག་ནད་ཐམས་ཅད་ཀྱི་ནང་
ནས་རབ་རིབ་ནི་མི་བཟད་ཅིང་འཇིགས་པ་ཡིན་པས་དེ་མྱུར་བ་ཁོ་ནར་གསོ་བར་བྱའོ། །འཚོ་བྱེད་སྲང་བརྒྱ་ཆུ་བྲེ་ནི། །བཅུ་དྲུག་གནང་བསྐོལ་བཞི་ཆ་ལུས། །ཁུ་བ་འོ་མ་བྲེ་དོ་དང་། །མར་ནི་བྲེ་གང་ལྷན་ཅིག་བཙོ། །སྟག་ཚེར་བ་དང་རམ་ཉེ་བ། །སེང་ཕྲོམ་རྒྱམ་ཚ་པི་པི་
ལིང་། །ཤུ་ཏི་ཤིང་མངར་རྒུན་འབྲུ་དང་། །ཐང་ཤིང་ཁ་ར་འབྲས་བུ་གསུམ། །ཞོ་ནི་གཉིས་གཉིས་བཏབ་བསྐོལ་ཏེ། །མཚན་འཐུངས་རབ་རིབ་སེལ་མཆོག་ཡིན། །ཞེས་བྱ་བ་ལ། སྨན་འཚོ་བྱེད་ཛི་བན་ཏི་ཞེས་བྱ་བ་སྲང་བརྒྱ་ཆུ་བྲེ་བཅུ་དྲུག་གི་ནང་དུ་བསྐོལ་
ལ་དེ་ལས་བཞི་ཆ་སྟེ་བྲེ་བཞི་ལུས་པའི་ཁུ་བ་དང་མར་བྲེ་གང་དང་། འོ་མ་བྲེ་དོ་དང་སྟག་ཚེར་བ་ཞེས་བྱ་བ་པྲ་པུཎྜ་རཱི་ཀ་དང་རམ་ཉེ་བ་ལ་སོགས་པའི་སྨན་ཞོ་གཉིས་བཏགས་པའི་ལྡེ་གུ་བཅུག་སྟེ་བསྐོལ་ལ་སྨན་མར་དེ་མཚན་མོ་ཉལ་ཁར་འཐུངས་ན་རབ་རིབ་སེལ་ཞིང་འཇོམས་པར་
เล่ม ๒๐๒ · หน้า 148a
བྱེད་པའི་མཆོག་ཡིན་ནོ། །རྒུན་འབྲུ་བཙོད་དང་ཙནྡན་དཀར། །རམ་ཉེ་བ་གཉིས་ཛི་བ་ཀ །ཁ་ར་ཉེའུ་ཤིང་མེ་ད་དང་། །ཤིང་མངར་ཨུཏྤལ་པུཎྜ་རཱི། །ཞོ་ནི་གཉིས་གཉིས་མར་རྙིང་ནི། །བྲེ་གང་འོ་མ་དེ་མཉམ་བསྐོལ། །དེ་ཡིས་མིག་སྔོན་
རབ་རིབ་དང་། །མར་གྱིས་མགོ་བོའི་ནད་རྣམས་འཇོམས། །ཞེས་བྱ་བ་ལ། རྒུན་འབྲུ་ལ་སོགས་པའི་སྨན་སྣ་རེ་རེ་ཞིང་ཞོ་གཉིས་གཉིས་དང་མར་རྙིང་པ་བྲེ་གང་དང་འོ་མ་དེ་དང་མཉམ་པ་སྟེ་བྲེ་གང་བསྐོལ་བའི་སྨན་མར་དེས་ནི་མིག་སྔོན་པོ་ལ་སོགས་པའི་ནད་རྣམས་འཇོམས་པར་བྱེད་
དོ། །ནིམ་པ་སྐྱེར་པ་པ་ཏོ་ལ། །པུ་ཙེ་ཤེལ་དང་པུ་ཤེལ་ཙེ། །འབྲས་བུ་གསུམ་དང་བ་ཤ་ཀ །བྱི་ཚེར་བ་དང་ཀྱི་ལྕེ་བ། །པར་པ་ཏ་ནི་སྲང་རེ་ཡིན། །སྐྱུ་རུ་ར་ནི་བྲེ་གང་དག །ཆུ་བྲེ་བཅུ་དྲུག་ནང་དུ་བསྐོལ། །བྲེ་བཞི་ལུས་པར་གླ་སྒང་དང་། །རྩ་མཁྲིས་ཤིང་མངར་དུག་མོ་
ཡུངས། །བ་ལུ་ཀ་དང་ཙནྡན་དང་། །པི་པི་ལིང་སྲང་ཕྱེད་ཕྱེད་དང་། །མར་བྲེ་གང་དང་བཅས་བསྐོལ་བ། །དེས་ནི་རྣ་མིག་སྣ་ནད་དང་། །ཁོང་འབྲས་རིམས་དང་མཛེར་པ་དང་། །འབྲུམ་ཕྲན་ཤུ་བ་མཛེ་ནད་སེལ། །མཆོག་ཏུ་ལིང་ཏོག་རབ་རིབ་དང་། །མཚན་ལོང་དྲོ་བས་ཚིག་
པ་འཇོམས། །ཞེས་བྱ་བ་ལ། ནིམ་པ་ནས་པར་པ་ཏའི་བར་སྲང་རེ་རེ་དང་། སྐྱུ་རུ་ར་བྲེ་གང་དང་། ཆུ་བྲེ་བཅུ་དྲུག་གི་ནང་དུ་བསྐོལ་བ་དེ་ལས་བྲེ་བཞི་ལུས་པའི་ཁུ་བ་དང་། གླ་སྒང་ལ་སོགས་པའི་མིག་སྨན་སྲང་ཕྱེད་ཕྱེད་བཏགས་པའི་ལྡེ་གུ་དང་མར་བྲེ་གང་དང་བཅས་པར་བསྐོལ་
ལ་སྨན་མར་དེ་བླུད་ན། རྣ་བ་དང་མིག་དང་སྣ་ལ་སོགས་པའི་ནད་སེལ་བར་འགྱུར་བ་དང་། མཆོག་ཏུ་ཡང་ལིང་ཏོག་ལ་སོགས་པ་འཇོམས་པར་བྱེད་པ་ཡིན་ནོ། །འབྲས་བུ་གསུམ་ནི་སྲང་བརྒྱད་དག །ཆུ་བྲེ་བཞི་བསྐོལ་བཞི་ཆ་ལུས། །འོ་མ་དེ་དང་ཆ་མཉམ་དང་། །འབྲས་
བུ་གསུམ་གྱི་ལྡེ་གུ་ནི། །སྲང་གཅིག་ཞུན་མར་བྲེ་ཕྱེད་བསྐོལ། །ཁ་རའམ་སྦྲང་རྩི་བཅས་པ་འམ། །འབྲས་བུ་གསུམ་གྱི་ཁུ་བར་བཅས། །འཐུངས་ན་རབ་རིབ་ཐམས་ཅད་འཇོམས། །ཞེས་བྱ་བ་ལ། འབྲས་བུ་གསུམ་སྲང་བརྒྱད། ཆུ་བྲེ་བཞིའི་ནང་དུ་བསྐོལ་ལ་དེ་ལས་
เล่ม ๒๐๒ · หน้า 148b
ཁུ་བ་བྲེ་གང་ལུས་པའི་ནང་དུ་འོ་མ་སྨན་གྱི་ཁུ་བ་དེ་དང་ཆ་མཉམ་པ་བྲེ་གང་བཅུག་ལ་འབྲས་བུ་གསུམ་སྲང་གཅིག་ལྡེ་གུ་དང་ཞུན་མར་བྲེ་ཕྱེད་བསྐོལ་ཏེ་མར་གྱི་ནང་ཁ་ར་འམ་སྦྲང་རྩི་བཏབ་ལ་རབ་རིབ་ཅན་ལ་བླུད་པར་བྱ་བ་འམ། ཡང་ན་མར་དེ་དང་འབྲས་བུ་གསུམ་གྱི་ཁུ་བ་དང་བཅས་པ་
བླུད་ན་རབ་རིབ་ཀྱི་ནད་ཐམས་ཅད་སེལ་བར་བྱེད་དོ། །ཤིང་མངར་རམ་ཉེ་བ་གཉིས་དང་། །ཀཎྜ་ཀ་རི་པི་པི་ལིང་། །ཨ་རུ་ར་དང་ཨུཏྤ་ལ། །ཁ་ར་རྒུན་འབྲུ་སྲང་རེ་བཅས། །ར་ཡི་འོ་མ་མར་བྲེ་རེ། །འབྲས་བུ་གསུམ་དང་བ་ཤ་ཀ །བྲིང་ག་ར་ཛའི་ཁུ་བར་བསྐོལ། །འདི་ནི་
འབྲས་བུ་གསུམ་ཆེན་མོའི། །མར་དེ་མིག་ནད་ཀུན་སེལ་མཆོག །ཅེས་བྱ་བ་ལ། ཤིང་མངར་ལ་སོགས་པའི་སྨན་སྲང་རེ་དང་། མར་དང་འོ་མ་ཆ་སྙོམས་པའི་བྲེ་རེ་རེ་བྱས་པ་དང་། འབྲས་བུ་གསུམ་ལ་སོགས་པའི་ཁུ་བ་བྲེ་གང་དང་བསྐོལ་བའི་སྨན་མར་འདི་ནི་འབྲས་བུ་གསུམ་
བསྐོལ་བའི་སྨན་མར་ཞེས་བྱ་བ་སྟེ། མིག་ནད་ཐམས་ཅད་སེལ་བའི་མཆོག་ཡིན་ནོ། །འབྲས་བུ་གསུམ་དང་མར་རམ་ནི། །འབྲས་བུ་གསུམ་དང་ཤིང་མངར་བཅས། །སྦྲང་རྩི་ཡིས་ནི་སྦྲུས་གྱུར་པ། །མཚན་མོ་ཟོས་པར་གྱུར་ནས་ནི། །ཟླ་གཅིག་ཕན་པའི་ཟས་བསྟེན་ཞིང་། །
སྐྱུ་རུ་ར་ཡི་ཆུ་མཐུངས་ན། །མཁའ་ལྡིང་ལྟ་བུའི་མིག་ཐོབ་ཅེས། །དྲང་སྲོང་མུ་ཁྱུད་ཀྱིས་བཤད་དོ། །ཞེས་བྱ་བ་ལ། འབྲས་བུ་གསུམ་དང་བསྐོལ་བའི་སྨན་མར་རམ། འབྲས་བུ་གསུམ་དང་ཤིང་མངར་དུ་བཅས་པར་སྦྲང་རྩིས་སྦྲུས་ཤིང་མཉེས་པ་དང་། འབྲས་བུ་གསུམ་
གྱི་སྨན་མར་དང་བཅས་པར་མཚན་མོ་ཉལ་ཀའི་དུས་སུ་ཟོས་པར་གྱུར་ཅིང་ཕན་ཞིང་འཕྲོད་པའི་ཟས་བསྟེན་པར་བྱེད་ཅིང་སྐྱུ་རུ་རའི་ཆུ་དེའི་རྗེས་ལ་འཐུངས་ན། དེའི་མིག་ནམ་མཁའ་ལྡིང་གི་མིག་ལྟ་བུར་ཤིན་ཏུ་གསལ་བར་འགྱུར་རོ། །ཞེས་དྲང་སྲོང་ཆེན་པོ་མུ་ཁྱུད་ཅེས་བྱ་བས་
བཤད་པ་ཡིན་ནོ། །ཏ་བྱ་ཤིང་མངར་ལྕགས་དང་གསེར། །ཁ་ར་སྦྲང་རྩི་མར་རྙིང་དང་། །འབྲས་བུ་གསུམ་དང་ཅི་འདོད་སྦྱར། །བསྟེན་པས་རབ་རིབ་འཇོམས་མཆོག་ཡིན། །ཞེས་བྱ་བ་ལ། ཏ་བྱ་ཞེས་བྱ་བ་དྲུབ་མར་ཅང་ཞེས་གྲགས་པ་རྡོ་གསེར་མདོག་ཅན་དང་ཤིང་མངར་
เล่ม ๒๐๒ · หน้า 149a
ལ་སོགས་པའི་སྨན་ཅི་འདོད་པ་སྦྱར་བ་སྟེ་སྨན་འདི་དག་རེ་རེ་འམ་གཉིས་སམ་གསུམ་མམ་བཞི་འམ་མ་ལུས་བར་སྦྱར་ཞིང་ཟོས་ན། རབ་རིབ་འཇོམས་པར་བྱེད་པའི་མཆོག་གཙོ་བོ་ཡིན་ནོ། །ཡང་ན་འབྲས་བུ་གསུམ་བསྐོལ་མར། །རབ་རིབ་ཅན་གྱིས་
བསྟེན་བྱ་འམ། །ཞེས་བྱ་བ་ལ། ཡང་ན་འབྲས་བུ་གསུམ་བསྐོལ་བའི་ཁུ་བ་མར་དང་བཅས་པ་རབ་རིབ་ཅན་གྱི་ནད་པས་བསྟེན་ཅིང་གོམས་པར་བྱའོ། །སྣུམ་ཁུར་ཕྱེ་འམ་སྲན་ཚོད་ནི། །འབྲས་བུ་གསུམ་གྱི་ཕྱེ་བཅས་པའམ། །ཞེས་བྱ་བ་ལ། ཡང་སྣུམ་ཁུར་ལ་སོགས་
པ་འབྲས་བུ་གསུམ་གྱི་ཕྱེ་མ་དང་བཅས་པ་དེ་རབ་རིབ་ཅན་གྱིས་བསྟེན་པར་བྱའོ། །འོ་ཐུག་འབྲས་བུ་གསུམ་བཅས་པ། །བསྒྲངས་ཏེ་ཁ་ར་སྦྲང་རྩི་གདབ། །ཅེས་བྱ་བ་ལ། ཡང་ན་འབྲས་ཆན་དང་འོ་མ་བསྐོལ་བའི་འོ་ཐུག་འབྲས་བུ་གསུམ་དང་བཅས་པ་དེ་བསྐངས་པ་དེའི་ནང་དུ་ཁ་
ར་དང་སྦྲང་རྩི་བཏབ་པ་རབ་རིབ་ཅན་གྱི་ནད་པས་བསྟེན་ན་ཡང་ཕན་ནོ། །ཟས་མ་ཟོས་པའམ་ནད་པར་ནི། །རྒུན་འབྲུ་ཁ་ར་སྦྲང་རྩི་དང་། །ཨ་རུ་ར་ནི་སོ་སོར་བཟའ། །རྟག་ཏུ་རབ་རིབ་ཅན་གྱིས་བསྟེན། །ཞེས་བྱ་བ་ལ། ཡང་ན་ཟས་མ་ཟོས་བའི་སྔོན་དུའམ། ནང་པར་ཐོ་རངས་
ཀྱི་དུས་སུ་རྒུན་འབྲུ་ལ་སོགས་པ་རྟག་ཏུ་སོ་སོར་བཟའ་བར་བྱ་ཞིང་། བསྟེན་ན་ཡང་རབ་རིབ་ཅན་ཐམས་ཅད་ཀྱི་ནད་ལ་ཕན་ནོ། །ལིག་བུ་མིག་ཆ་དྲུག་ཅུ་བཞི། །ཟངས་དང་དངུལ་དང་གསེར་གྱི་ཆ། །རེ་རེ་གཅིག་ཏུ་སྦྱར་བ་ནི། །ཀོང་བུ་ཁ་སྦྱར་ནང་དུ་གཞུག འདྲེས་པར་གྱུར་པའི་བར་
དུ་བུད། །དེ་ནས་དེ་ཡི་རོ་དྲུག་གི །ཚོགས་ཀྱི་ཁུ་བར་ལན་བདུན་དུ། །སོ་སོར་དེ་ལ་བླུགས་པར་བྱ། །མུ་ཏིག་དུང་དང་བཻཌཱུརྱ། །ཚ་བ་གསུམ་དང་དེ་ནས་བསྲེ། །ཕྱེ་མའི་མིག་སྨན་དེ་བཏང་ན། །རབ་རིབ་ཐམས་ཅད་སེལ་བྱེད་ཡིན། །ཞེས་བྱ་བ་ལ། ལིག་བུ་མིག་
ཅེས་བྱ་བ་སྟྲོ་ཏ་ཨ་ན་ཛ་ན་ཆ་དྲུག་ཅུ་རྩ་བཞི་ཟངས་དང་དངུལ་གསེར་སྣ་རེ་ཞིང་ཆ་རེ་གཅིག་ཏུ་བསྡུས་ལ་ཀོང་བུ་ཁ་སྦྱར་གྱི་ནང་དུ་བཅུག་ནས་དུ་བ་མ་ཤོར་བར་བྱས་ཏེ་མེ་བུས་ལ་འདྲེས་པར་གྱུར་གྱི་བར་དུ་བསྐོལ་ལོ། །རྡོ་ལ་བཏགས་ཏེ་དེའི་འོག་ཏུ་དེ་མངར་བ་དང་། སྐྱུར་པ་དང་། ལན་ཚྭ་དང་།
เล่ม ๒๐๒ · หน้า 149b
ཁ་བ་དང་། ཚ་བ་དང་། བསྐ་བའི་སྨན་གྱི་ཚོགས་ཀྱི་ཁུ་བའི་ནང་དུ་ལན་བདུན་གྱི་བར་དུ་དེ་སོ་སོར་བླུགས་པར་བྱ་ཞིང་དེ་ལ་སྦང་བར་བྱའོ། དེའི་འོག་ཏུ་མུ་ཏིག་དང་། དུང་དང་བཻ་ཌཱུརྱ་དང་། ཚ་གསུམ་མིག་སྨན་ཞེས་བྱ་སྟེ་བསྲེ་བར་བྱའོ། །དེ་ལྟ་བུ་དེ་ནི་ཕྱེ་མའི་མིག་སྨན་ཞེས་བྱ་
སྟེ། མིག་སྨན་དེ་བཏང་ཞིང་བསྐུས་པར་གྱུར་ན་རབ་རིབ་ཐམས་ཅད་སེལ་བར་བྱེད་པ་ཡིན་ནོ། །རྒུན་འབྲུ་པདྨའི་རྩ་བ་ཡི། ཁུ་བ་འོ་མ་ཆང་དང་ཞག །ཆར་པ་དེ་བཞིན་ལིག་བུ་མིག །བསྐོལ་ཞིང་བསྐུ་བ་བྱས་ནས་ནི། །ཕྱེ་མ་དེ་ནི་དུང་དང་གཞུག །མཐོང་བ་གསལ་བྱེད་མིག་
སྨན་ཡིན། །མིག་ནད་ཐམས་ཅད་ལ་བསྔགས་ཞེས། །ལུས་འཕགས་རྒྱལ་པོས་བཤད་པ་ཡིན། །ཞེས་བྱ་བ་ལ། རྒུན་འབྲུ་པདྨའི་རྩ་བ་བསྐོལ་བའི་ཁུ་བ་དང་འོ་མ་ལ་སོགས་པ་ལྷན་ཅིག་བསྐོལ་བ་དག་གིས་ལིག་བུ་མིག་བསྒོས་ཤིང་དེའི་ནང་དུ་བསྐོལ་བའི་ཕྱེ་མ་དུང་དང་
བཅས་པ་དེ་མིག་སྨན་དུ་བསྐུས་ན་རབ་རིབ་སེལ་ཅིང་མཐོང་བ་གསལ་བར་བྱེད་པ་དང་། མིག་གི་ནད་ཐམས་ཅད་ལ་ཡང་ཕན་པར་བྱེད་པ་ཡིན་ནོ། །ཞེས་ལུས་འཕགས་ཀྱི་རྒྱལ་པོས་བཤད་པ་ཡིན་ནོ། །སྤངས་མ་སྲང་གཉིས་རྒྱ་ཤུག་གི །སོལ་བར་བསྲེགས་ལ་ར་ཡི་ནི། །
འོ་མ་མར་དང་སྦྲང་རྩི་ཡི། །ནང་དུ་ལན་ནི་བདུན་བདུན་བཅུག །ཏ་བྱ་དང་ནི་ན་ལེ་ཤམ། །ལིག་བུ་མིག་དང་པུ་ཙེ་ཤེལ། །སྤང་སྤོས་རྒྱམ་ཚ་ཨ་རུ་ར། །སེང་ཕྲོམ་ལྡོང་རོས་པི་པི་ལིང་། །སུག་སྨེལ་རྒྱ་མཚོའི་ཝུ་བ་དང་། །སྟང་ཟིལ་ཞོ་ནི་གཉིས་གཉིས་དང་། །ཤིང་མངར་སྲང་
གཅིག་བཅས་པ་ནི། །ཀོང་བུ་ཁ་སྦྱར་ནང་བསྲེགས་བཏགས། །མིག་སྔོན་མཚན་མོ་ལོང་བར་བཅས། །དམར་རིས་དེ་བསྟེན་པ་ཡིས་འཇོམས། །ཕྱེ་མས་མཆོག་ཏུ་རབ་རིབ་ནད། །ཉི་མས་མུན་པ་བཞིན་དུ་སེལ། །ཞེས་བྱ་བ་ལ། སྤངས་མ་ཤིང་རྒྱ་ཤུག་གི་སོལ་བའི་ནད་
དུ་བསྲེགས་ལ་རའི་འོ་མ་ལ་སོགས་བའི་ནང་དུ་ལན་བདུན་བདུན་བཅུག་ལ་ཏ་བྱ་ལ་སོགས་པའི་སྨན་ཞོ་གཉིས་གཉིས་དང་ཤིང་མངར་ལ་སོགས་པ་སྲང་གཅིག་དང་བསྲེས་ཏེ། ཀོང་བུ་ཁ་སྦྱར་གྱི་ནང་དུ་བཅུག་ལ་དུ་བ་མ་ཤོར་བར་བསྲེགས་ཏེ་དེ་བཞིན་དུ་བཏགས་ཏེ་མིག་སྨན་དུ་བྱས་པས་ནི་མིག་
เล่ม ๒๐๒ · หน้า 150a
སྔོ་བ་ལ་སོགས་པའི་མིག་ནད་འཇོམས་པར་བྱེད་ཅིང་སྨན་གྱི་ཕྱེ་མ་དེས་ཇི་ལྟར་ཉི་མས་མུན་པ་བཞིན་དུ་རབ་རིབ་ཀྱི་ཚོགས་འཇོམས་བར་བྱེད་པ་ཡིན་ནོ། །སྤང་སྤོས་དྲི་བཟངས་གསུམ་དང་ལྕགས། །གུར་གུམ་ཨུཏྤལ་སྔོན་པོ་དང་། །ཁ་ར་སྤངས་མ་ཨ་རུ་
ར། །རྒྱ་མཚོའི་ཝུ་བ་མཆིང་བུ་དཀར། །ན་ལེ་ཤམ་དང་པི་པི་ལིང་། །སྟང་ཟིལ་ཤིང་མངར་དུང་དང་བཅས། །ཐ་སྐར་ཟླ་བའི་ཚེ་ན་ནི། །ཕྱེ་མ་མིག་གཉིས་ལ་བསྐུས་ན། །མིག་མཛེར་རབ་རིབ་དམར་རིས་དང་། །གཡའ་དང་མིག་སྔོན་སོགས་ཞི་བྱེད། །ཅེས་བྱ་བ་ལ། སྤང་
སྤོས་ལ་སོགས་པའི་སྨན་གྱི་ཕྱེ་མ་གཟའ་ཟླ་བ་དང་སྐར་མ་ཐ་སྐར་ལ་བབ་བའི་ཚེ་བསྐུས་ཤིང་མིག་གཉིས་ལ་བྱུགས་ན་རབ་རིབ་ལ་སོགས་པའི་མིག་ནད་ཐམས་ཅད་སེལ་བར་བྱེད་པ་ཡིན་ནོ། །ན་ལེ་ཤམ་དང་རྒྱམ་ཚ་ནི། །ཆ་རེ་པི་པི་ལིང་དང་ནི། །རྒྱ་མཚོའི་ཝུ་བ་ཆ་གཉིས་དང་། །སྐྱེར་
པའི་ཁཎྜ་ཆ་དགུ་ནི། །ནག་པ་ལ་བབ་ཚེ་ན་བཏགས། །མིག་བསྐུས་བད་ཀན་རབ་རིབ་འཇོམས། ཞེས་བྱ་བ་ལ། ན་ལེ་ཤམ་དང་རྒྱམ་ཚ་གཉིས་ཆ་རེ། །པི་པི་ལིང་དང་རྒྱ་མཚོའི་ཝུ་བ་ཆ་གཉིས་སྐྱེར་པའི་ཁཎྜ་ཆ་དགུ་སྐར་མ་ནག་པ་ལ་བབ་པའི་ཚེ་བཏགས་ལ་བསྐུས་ན་བད་ཀན་ལས་གྱུར་པའི་རབ་
རིབ་འཇོམས་པར་བྱེད་དོ། །སྦངས་མ་བསྲེགས་ནས་ལན་མང་དུ། །བ་གཅིན་ར་ཐུག་ཁུ་བ་དང་། །སྐྱུར་རྩབས་བུད་མེད་ནུ་ཞོ་དང་། །དུག་གི་ཁུ་བ་སྦྲང་རྩི་མར། །བཅུག་པར་གྱུར་པ་གང་ཡིན་པ། །ཕྱེ་མར་བྱས་དེས་མི་ཡི་མིག །མཁའ་ལྡིང་མིག་ལྟར་གསལ་བར་འགྱུར། །
ཞེས་བྱ་བ་ལ། སྦངས་མ་ལེགས་པར་བསྲེགས་ལ། བ་གཅིན་ལ་སོགས་པའི་ནང་དུ་ལན་མང་དུ་སོ་སོར་བཅུག་པར་གྱུར་པ་གང་ཡིན་པ་དེ་སྐམས་ལ་ཕྱེ་མར་བྱས་ཏེ། ཕྱེ་མ་དེས་མིག་ལ་བསྐུས་ན་མིའི་མིག་ནམ་མཁའ་ལྡིང་དང་འདྲ་བར་གསལ་བར་འགྱུར་རོ། །བྲིད་ག་ར་ཛ་འབྲས་བུ་
གསུམ། །དུག་དང་ཤིང་མངར་ཁུ་བ་དང་། །མར་དང་ར་ཡི་འོ་མར་ནི། །ཞ་ཉེ་ལན་ནི་བདུན་བདུན་དུ། །བསྲེགས་ཤིང་བསྲེགས་ཤིང་བཙོས་པ་ཡི། །མིག་སྨན་ཐུར་མར་བྱས་པ་དེ། །མིག་སྨན་བསྐོལ་བའམ་མ་བསྐོལ་བའམ། །བྱུགས་ན་རབ་རིབ་མིག་མཛེར་ནད། །ཆུ་སེར་
เล่ม ๒๐๒ · หน้า 150b
འཛག་དང་འབྱར་བག་ཅན། །གཡའ་དང་ཚོར་བ་མེད་པ་དང་། །རི་མོ་དམར་པོར་སྣང་བ་འཇོམས། །ཞེས་བྱ་བ་ལ། བྲིད་ག་ར་ཛའི་ཁུ་བ་དང་། འབྲས་བུ་གསུམ་གྱི་ཁུ་བ་དང་། དུག་གི་ཁུ་བ་དང་། ཤིང་མངར་གྱི་ཁུ་བ་དང་། མར་དང་རའི་འོ་མའི་
ནང་དུ་བསྲེགས་པ་དེ་སོ་སོར་ལན་བདུན་དང་། ཞ་ཉེ་ནག་པོ་ལན་བདུན་གྱི་བར་དུ་བསྲེགས་ཤིང་བཙོས་ལ། བསྣུར་བའི་ཞ་ཉེ་དེ་མིག་སྨན་གྱི་ཐུར་མར་བྱས་ལ། ཐུར་མ་དེ་མིག་སྨན་དང་བཅས་པའམ་མིག་སྨན་མེད་པར་ཡང་རུང་སྟེ། མིག་ཏུ་བྱུགས་ན་རབ་རིབ་ལ་སོགས་
པའི་མིག་ནད་དང་། གཡའ་བ་དང་ཚོར་བ་མེད་ཅིང་བེམ་པོར་འདུག་པ་དང་། རི་མོ་དམར་པོ་ཤར་ཤར་པོར་སྣང་བ་འཇོམས་ཤིང་སེལ་བར་བྱེད་དོ། །དངུལ་ཆུ་རོ་ཉེ་ཆ་མཉམ་བྱ། །དེ་གཉིས་སྟང་ཟིལ་མཉམ་བྱས་ལ། །ག་བུར་ཅུང་ཟད་བཏབ་པ་ཡི། །མིག་སྨན་རབ་རིབ་སེལ་
མཆོག་ཡིན། །ཞེས་བྱ་བ་ལ། དངུལ་ཆུ་དང་རོ་ཉེ་གཉིས་པོ་ཆ་མཉམ་པར་བྱས་ལ་གཉིས་པ་དེ་དང་སྟང་ཟིལ་ཞེས་བྱ་བ་དངུལ་རྡོ་ཆ་མཉམ་དུ་བྱས་ལ་ཞིབ་ཏུ་བཏགས་ཏེ་དེའི་ནང་དུ་ག་པུར་ཅུང་ཟད་བཏབ་པའི་མིག་སྨན་ནི། མིག་གི་བདུད་རྩི་ཞེས་བྱ་བ་སྟེ་རབ་རིབ་སེལ་བའི་མཆོག་ཡིན་ནོ། །
བྱ་རྒོད་དུས་སུ་ཤི་བའི་མགོ་བོ་ནི། །ཉི་མ་འཆར་ཀའི་མདོག་འདྲ་གང་ཡིན་དེ། །བ་ལང་ལྕི་བས་བསྲེགས་ཏེ་ཐལ་ལིག་བུ་མིག །ཆ་མཉམ་བཏགས་པར་གྱུར་པའི་ཕྱེ་མ་ཡི། །སྦྱོར་འདིས་མིག་གིས་གསལ་སྟོབས་བྱ་རྒོད་ལྟ་བུར་བྱེད། །ཅེས་བྱ་བ་ལ། བྱ་རྒོད་གང་མ་བསད་པར་
དུས་སུ་ཤི་བའི་མགོ་བོ་ཉི་མ་འཆར་ཀའི་མདོག་དང་འདྲ་བར་དམར་བ་གང་ཡིན་པ་དེ་བ་ལང་གི་ལྕི་བའི་མེས་བསྲེགས་ཏེ་ཐལ་བར་བྱས་པ་དང་ལིག་བུ་མིག་ཆ་སྙོམས་ཏེ་ཞིབ་ཏུ་བཏགས་པའི་ཕྱེ་མའི་མིག་སྨན་འདི་བསྐུས་ན་མིག་གི་མཐོང་བའི་སྟོབས་བྱ་རྒོད་ལྟ་བུར་གསལ་བར་མཐོང་བར་བྱེད་པ་
ཡིན་ནོ། །སྦྲུལ་ནག་མགོར་ནི་ལིག་བུ་མིག །མར་བཅས་དུད་པ་མ་ཤོར་བསྲེགས། །སྤང་སྤོས་གནྡྷ་བྷ་དྲ་དང་། །ལྷན་ཅིག་བཏགས་པས་མིག་འབྲས་ནི། །རྡོལ་ཡང་མིག་ནི་སྲུང་བར་བྱེད། །ཅེས་བྱ་བ་ལ། སྦྲུལ་ནག་པོ་ཤི་བའི་མགོ་བོའི་ཁའི་ནང་དུ་ལིག་བུ་མིག་མར་
เล่ม ๒๐๒ · หน้า 151a
དང་བཅས་པར་བཅུག་ལ། འཇིམ་པས་བསྐུས་ཏེ་དུད་པ་མ་ཤོར་བར་བསྲེགས་ནས། སྤང་སྤོས་དང་། གརྔྷ་བྷ་དྲ་དང་བཅས་པར་བཏགས་པའི་མིག་སྨན་གྱིས་མིག་གི་འབྲས་བུ་བརྟོལ་ཞིང་མཐོང་བར་བྱེད་པ་ཡིན་ནོ། སྦྲུལ་
ནག་ཤི་བའི་རོ་དང་ནི། སྡིག་པ་ཤི་བའི་རོ་བཞི་ནི། །འོ་མའི་བུམ་པར་ཞག་ཉི་ཤུ། །རྩ་གཅིག་བཅུག་སྟེ་བསྲུལ་ལ་བསྲུབ། །དེ་ལས་མར་སར་གང་བྱུང་བས། །ཁྱིམ་བྱ་གསོ་སྟེ་དེ་ཡི་ནི། རྟུག་པས་མིག་ནི་བསྐུས་གྱུར་ན། ལོང་བས་ཀྱང་ནི་ངེས་པར་མཐོང་། །ཞེས་བྱ་བ་
ལ། །སྦྲུལ་ནག་པོ་ཤི་བའི་རོ་གཅིག་དང་། སྡིག་པ་ཞེས་བྱ་བའི་འབུ་ཤི་བའི་རོ་བཞི་འོ་མ་བླུགས་པའི་བུམ་པའི་ནང་དུ་བཅུག་སྟེ་དེ་ཞག་ཉི་ཤུ་རྩ་གཅིག་གི་བར་དུ་བཞག་ལ་བསྲུལ་ནས་དེའི་འོག་ཏུ་བསྲུབ་མས་བསྲུབས་ཏེ། འོ་མ་ལས་མར་སར་པ་གང་ཞིག་བྱུང་བར་གྱུར་པའི་མར་དེས་
ཁྱིམ་བྱ་གསོ་སྟེ། ཁྱིམ་བྱ་དེའི་རྟུག་པ་མིག་ཏུ་བསྐུས་པར་གྱུར་ན་ལོང་བས་ཀྱང་ངེས་པར་གཟུགས་སུ་མཐོང་བར་འགྱུར་རོ། །སྦྲུལ་ནག་པོ་ཡི་ཞག་དང་དུག །སྟང་ཟིལ་ཀ་ཏ་ཀའི་འབྲས་བུ། །ཁུ་བར་བྱས་པའི་སྦྱོར་བ་ཡིས། ལོང་བའང་མྱུར་དུ་མཐོང་བར་བྱེད། །ཅེས་བྱ་བ་ལ།
སྦྲུལ་ནག་པོའི་ཞག་ལ་སོགས་པའི་སྨན་འདི་དག་ཐམས་ཅད་ཁུ་བའི་སྨན་འདི་དག་ཐམས་ཅད་ཁུ་བའི་སྦྱོར་བ་བྱས་ལ་དེ་གདུས་པའི་མིག་སྨན་གྱིས་བསྐུས་ན་ལོང་བས་ཀྱང་རིང་པོར་མི་ཐོགས་པར་མཐོང་བར་བྱེད་པ་ཡིན་ནོ། །ན་ལེ་ཤམ་ནི་རྡོག་པོ་བཅུ། དྲུབ་མར་ཅང་ནི་སྲང་ཕྱེད་དང་། །སྦངས་མ་སྲང་གཅིག་ཤིང་
མངར་ནི། །ཞོ་གཉིས་འོ་མའི་ནང་དུ་སྦངས། །དུ་བ་མ་ཤོར་བསྲེགས་མིག་སྨན། །ཁུ་བ་མཉམ་མེད་ཅེས་བྱ་སྟེ། །རབ་རིབ་འཇོམས་པའི་མཆོག་ཡིན་ནོ། །ཞེས་བྱ་བ་ལ། ན་ལེ་ཤམ་རྡོག་མ་བཅུ་དང་། དྲུབ་མར་ཅང་ཞེས་བྱ་བ་ཏ་བྱ་སྲང་ཕྱེད་དང་། སྦངས་མ་སྲང་གཅིག་
དང་། ཤིང་མངར་ནི་ཞོ་གཉིས་ཏེ་འདི་དག་འོ་མའི་ནང་དུ་སྦངས་ལ་དུ་བ་མ་ཤོར་བར་བསྲེགས་པའི་ཁུ་བ་མཉམ་པ་མེད་པ་ཞེས་བྱ་བའི་མིག་སྨན་ཡིན་ཏེ་རབ་རིབ་སེལ་བར་བྱེད་པའི་མཆོག་དམ་པ་ཡིན་ནོ། །བ་རུ་ར་ཡི་ཚེ་གུ་ན་ལེ་ཤམ། །སྐྱུ་རུ་ར་དང་སྦངས་མ་ཤིང་མངར་ནི། །ཆུ་
เล่ม ๒๐๒ · หน้า 151b
ཐགས་བྱས་པའི་རི་ལུ་གྲིབ་མར་བསྐམས། །རབ་རིབ་མྱུར་དུ་འཇོམས་པར་བྱེད་པ་ཡིན། །ཞེས་བྱ་བ་ལ། བ་རུ་རའི་ཚི་གུ་ལ་སོགས་པའི་སྨན་ཆུ་ཐགས་ལ་བཏགས་ལ་དེའི་རི་ལུ་གྲིབ་མ་ལ་བསྐམས་ཏེ། དེ་མིག་ཏུ་བསྐུས་ན་རབ་རིབ་ཀྱི་མིག་ནད་མྱུར་ཞིང་རིང་པོར་མི་ཐོགས་
པར་འཇོམས་པར་བྱེད་པ་ཡིན་ནོ། །ན་བེ་ཤམ་དང་སྐྱུ་རུ་ར། །རྒྱ་མཚོའི་ལྦུ་བ་སྦངས་མ་དང་། །དངུལ་རྡོ་དང་ནི་དྲུབ་མར་བཅས། །གོ་རིམས་བཞིན་དུ་ཆ་རེས་བསྐྱེད། །དྲུབ་མར་ཆ་ནི་དྲུག་པ་སྟེ། །སྦྱོར་འདིས་རབ་རིབ་ལིང་ཏོག་མཛེར། །རྣག་དང་མིག་སྔོ་གཡའ་བ་སེལ། །ཞེས་
བྱ་བ་ལ། ན་ལེ་ཤམ་ལ་སོགས་པའི་སྨན་ཆ་རེས་བསྐྱེད་དེ་སྦྱར་བའི་མིག་སྨན་འདི་ནི་མིང་དྲུབ་མར་ཆ་དྲུག་པ་ཞེས་བྱ་སྟེ། སྦྱོར་བ་འདིས་རབ་རིབ་དང་ལིང་ཐོག་ལ་སོགས་པའི་མིག་ནད་སེལ་བར་བྱེད་དོ། །དེ་ལ་ཆ་རེས་བསྐྱེད་པའི་ཚུལ་ནི་ན་ལེ་ཤམ་ཆ་གཅིག སྐྱུ་རུ་ར་ཆ་གཉིས།
རྒྱ་མཚོའི་ལྦུ་བ་ཆ་གསུམ། སྦངས་མ་ཆ་བཞི། དངུལ་རྡོ་ཆ་ལྔ། དྲུབ་མར་ཅང་ཆ་དྲུག་ཏུ་སྦྱར་རོ། །རིན་ཆེན་དངུལ་དང་ཤེལ་དང་གསེར། །ལིག་བུ་མིག་དང་ཟངས་ལྕགས་དང་། །ཙ་ནྡན་དམར་པོ་ཡུག་སྣམ་དམར། །ཕྱེ་མའི་མིག་སྨན་ནད་ཀུན་སེལ། །ཞེས་བྱ་བ་ལ། རིན་པོ་
ཆེ་ལ་སོགས་པའི་མིག་སྨན་དུ་བྱས་པས་ནི་མིག་གི་ནད་ཐམས་ཅད་སེལ་བར་བྱེད་དོ། །རིན་པོ་ཆེ་ནི་མར་གད་ལ་སོགས་པའོ། །ཏིལ་མར་བ་རུ་ར་ཡི་མར། །བྲིང་ག་ར་ཛ་ཨ་ས་ནའི། །ཁུ་བ་ལྕགས་ཀྱི་སྣོད་དུ་བསྐོལ། །སྣར་བླུགས་མིག་ནི་གསལ་སྟོབས་སྐྱེད། །ཅེས་བྱ་བ་ལ་སོགས་པའི་
སྨན་ལྕགས་ཀྱི་སྣོད་དུ་བསྐོལ་བའི་ཐིགས་པ་སྣར་བླུགས་ན་ཡང་མིག་གསལ་ཞིང་མཐོང་བའི་སྟོབས་སྐྱེད་པར་བྱེད་དོ། །བ་རུ་རའི་མར་ནི་དེའི་ཚི་གུ་བཙིར་བའི་མར་རོ། །བྲིང་ག་ར་ཛ་དང་། །ཨ་ས་ནའི་ཁུ་བ་ནི། དེ་གཉིས་བསྐོལ་བའི་ཁུ་བའོ། །ནད་ཀྱི་ཚུལ་ལས་དེ་ལ་ལན་མང་
དུ། །སྣུམ་བླུད་གཏར་ག་བཀྲུ་སྨན་སྣ་སྨན་དང་། །མིག་སྨན་མགོ་བོའི་བཀྲུ་སྨན་མས་གཏོང་དང་། །ཉམས་བརྟ་བྱུག་དང་བླུགས་པས་ཅི་རིགས་གསོ། །ཞེས་བྱ་བ་ལ། རབ་རིབ་ཀྱི་ནད་དེ་ནི་ནད་ཀྱི་ཚུལ་ཐ་དད་པ་དེ་ལ་གཅིག་མ་ཡིན་པར་ལན་དུ་མར་སྣུམ་བླུད་པ་དང་གཏར་ག་ལ་
เล่ม ๒๐๒ · หน้า 152a
སོགས་པ་ནས་སྨན་ཆུའི་ཐིགས་པ་བླུགས་པའི་བར་གྱིས་དེ་གསོ་བར་བྱའོ། །འདི་ནི་སྤྱི་ཡི་གསོ་བ་ཡིན། །ད་ནི་རེ་རེའི་མཉན་པར་གྱིས། །ཞེས་བྱ་བ་ལ། གསོ་བ་འདི་ནི་རབ་རིབ་ཐམས་ཅད་ཀྱི་སྤྱིའི་ཐུན་མོང་གི་གསོ་བ་བཤད་པ་ཡིན་ལ། ད་ནི་
འདི་མན་ཆད་ནི་རླུང་ལ་སོགས་པ་ནད་གཞི་རེ་རེ་ལས་གྱུར་པའི་རབ་རིབ་གསོ་བ་སྟོན་པས་དེ་མཉན་པར་གྱིས་ཤིག་པའོ། །དེ་ལས་རླུང་གྱུར་རབ་རིབ་ལ། །རྩ་བ་བཅུ་བསྐོལ་ཁུ་བ་མར། །འོ་མ་བཞི་འགྱུར་འབྲས་བུ་གསུམ། །ལྡེ་གུ་བསྐོལ་བ་བླུད་པར་བྱ། །དེ་འོག་འབྲས་
བུ་གསུམ་དང་ནི། །རྩ་བ་ལྔའི་ཁུ་འོ་མ་དང་། །ཨེ་རཎྡ་ཡི་ཏིལ་མར་བཅས། །བཀྲུ་སྨན་ཉེ་བར་གཏང་བར་བྱ། །ཞེས་བྱ་བ་ལ། དེ་ལ་རླུང་ལས་གྱུར་པའི་རབ་རིབ་ལ་ནི་རྩ་བ་བཅུ་པ་བསྐོལ་བའི་སྨན་གྱི་ཁུ་བ་དང་། །འོ་མ་མར་གྱི་བཞི་འགྱུར་དང་། །འབྲས་བུ་གསུམ་བཏགས་
པའི་ལྡེ་གུ་དང་། བསྐོལ་བའི་མར་བླུད་པར་བྱའོ། །དེའི་འོག་ཏུ་ནད་པ་དེ་སྨྱུང་བའི་ཆོ་ག་བྱས་ལ་འབྲས་བུ་གསུམ་དང་། རྩ་བ་ལྔ་བསྐོལ་བའི་ཁུ་བ་འོ་མ་དང་བཅས་པ་དང་། དེ་བཞིན་དུ་ཨེ་རཎྡའི་ཏིལ་མར་དང་བཅས་པའི་བཀྲུ་སྨན་བཏང་ལ་འཁྲུར་གཞུག་པར་བྱའོ། ཛི་བན་ཏི་ཡི་ཡལ་
གར་བཅས། །སྲང་བརྒྱ་ཆུ་བྲེ་བཅུ་དྲུག་བསྐོལ། །བརྒྱད་ཆ་ལུས་པ་དེ་ནང་དུ། །ཏིལ་མར་འོ་མ་བྲེ་རེ་དང་། །བ་ལ་གསུམ་དང་ཛི་བན་ཏི། །ཉེའུ་ཤིང་རྩ་བ་སྲང་རེ་དང་། །ཤིང་མངར་སྲང་ནི་བཞི་དང་བཅས། །ལྕགས་ཀྱི་སྣོད་དུ་བསྐོལ་བར་བྱ། །ལྕགས་སྣོད་ཉིད་དུ་ཟླ་གཅིག་བཞག །
སྣ་སྨན་ནམ་ཚོང་ཡན་ཆད་ཀྱི། །རླུང་དང་མཁྲིས་པའི་ནད་འཇོམས་ཤིང་། །མཆོག་ཏུ་མིག་ལ་གནས་པ་སེལ། །སྐྲ་གདོང་གཉའ་བ་ཕྲག་ནད་སེལ། །རྒྱས་ཤིང་བཞིན་མདངས་མཛེས་པར་བྱེད། །ཅེས་བྱ་བ་ལ། ཛི་བན་ཏིའི་ཡལ་ག་དང་། རྩ་བར་བཅས་པ་སྲང་
བརྒྱ་ཆུ་བྲེ་བཅུ་དྲུག་གི་ནང་དུ་བསྐོལ་ལ་ཆུ་དེའི་བརྒྱད་ཆ་ལུས་པའི་ནང་དུ་ཏི་ལ་མར་དང་འོ་མ་བྲེ་རེ་དང་བ་ལ་གསུམ་ཞེས་བྱ་བ་ཨ་ཏི་བ་ལ་དང་། ནཱ་ག་བ་ལ་ཞེས་བྱ་བ་ཛི་བན་ཏི་དང་། ཉིའུ་ཤིང་གི་རྩ་བ་སྲང་རེ་རེ་དང་ཤིང་མངར་སྲང་བཞི་ལྡེ་གུར་བྱས་པ་ལྕགས་ཀྱི་སྣོད་ཀྱི་ནང་དུ་
เล่ม ๒๐๒ · หน้า 152b
བསྐོལ་བའི་ཏི་ལ་མར་དེ་ལྕགས་སྣོད་དེ་ཉིད་དུ་ཟླ་བ་གཅིག་གི་པར་དུ་བཞག་ལ། སྣ་སྨན་དུ་བཏང་ན། ནམ་ཚོང་ཡན་ཆད་ཀྱི་རླུང་དང་། མཁྲིས་པ་ལས་གྱུར་བའི་ནད་ཐམས་ཅད་འཛོམས་པར་འགྱུར་རོ། །དེ་ལས་ཀྱང་མཆོག་གམ་ཁྱད་པར་དུ་མིག་ལ་གནས་པའི་རླུང་དང་མཁྲིས་
པ་སེལ་བར་བྱེད་པ་དང་། སྐྲ་དང་གདོང་ལ་སོགས་པའི་ནད་སེལ་བར་བྱེད་ཅིང་བཞིན་མདངས་མཛེས་པར་བྱེད་པ་ཡིན་ནོ། །ཨེ་རཎྜ་དཀར་རྩ་བ་དང་། །ཐང་ཤིང་བྲི་ཧ་ཏིའི་འབྲས་བུ། །ཤུ་དག་རྒྱ་སྤོས་ཙི་ཏྲ་དང་། །བིལ་བའི་རྩ་བ་ཏིལ་མར་དང་། །འོ་མར་བཅས་བསྐོལ་
སྣར་བླུགས་ན། །ནམ་ཚོང་ཡན་ཆད་རླུང་དང་ནི། །བད་ཀན་གྱི་ནི་ནད་ཀུན་སེལ། །ཞེས་བྱ་བ་ལ། ཨེ་རཎྜ་དཀར་པོའི་རྩ་བ་ལ་སོགས་པ་ལྡེ་གུར་བྱས་པ་ཏིལ་མར་དང་འོ་མ་དང་ལྷན་གཅིག་ཏུ་བསྐོལ་ཏེ་སྣ་སྨན་དུ་བླུགས་ན་ནམ་ཚོང་ཡན་ཆད་ཀྱི་རླུང་དང་བད་ཀན་གྱི་ནད་ཀྱིས་ཉེན་པ་
ཐམས་ཅད་སེལ་བར་འགྱུར་རོ། །སྟག་དང་ཕག་དང་བྱ་རྒོད་དང་། །སྦྲུལ་དང་ཁྱིམ་བྱའི་ཚིལ་དང་ནི། །ཤིང་མངར་སོ་སོར་སྦྱར་ཏེ་བསྐོལ། །མིག་སྨན་བསྐུས་པ་བསྡགས་པ་ཡིན། །ཞེས་བྱ་བ་ལ། སྟག་གི་ཞག་གམ། ཕག་གི་ཞག་གམ། བྱ་རྒོད་ཀྱི་ཚིལ་ལམ། །
སྦྲུལ་གྱི་ཚིལ་ལམ། ཁྱིམ་བྱའི་ཚིལ་ཤིང་མངར་དང་། སོ་སོར་སྦྱར་ཏེ་བསྐོལ་བ་མིག་སྨན་དུ་བསྐུས་ན་ཡང་ནད་དེ་ལ་བསྔགས་པ་ཡིན་ནོ། །དེ་རྗེས་མིག་སྨན་ལིག་བུ་མིག །ཤ་ཁུ་འོ་མ་མར་རིམ་བཞིན་། །སྔ་མ་བཞིན་དུ་བླུགས་ན་ནི། །རབ་རིབ་འཇོམས་བྱེད་མཆོག་ཡིན་ནོ། །
ཞེས་བྱ་བ་ལ། མིག་སྨན་ལིག་བུ་མིག་སྔ་མ་བཞིན་དུ་བསྐོལ་བ་ཤ་ཁུ་དང་། འོ་མ་དང་མར་གྱི་ནང་དུ་རིམ་བཞིན་དུ་ལན་བདུན་བདུན་སྦངས་ཤིང་བླུགས་ལ་མིག་ཏུ་བསྐུས་ན་རབ་རིབ་སེལ་བའི་མཆོག་ཡིན་ནོ། །དེ་ལྟར་བྱས་ཀྱང་མ་ཞི་ན། །དེ་འོག་བརྟ་བའི་ཆོ་ག་སྦྱད། །ཅེས་བྱ་
བ་ལ། གལ་ཏེ་དེ་ལྟར་བྱས་སུ་ཟིན་ཀྱང་རླུང་ལས་གྱུར་པའི་རབ་རིབ་དེ་ཞི་བར་མ་གྱུར་ན་དེའི་འོག་ཏུ་བརྟ་བའི་ཆོ་ག་ཇི་སྐད་བཤད་པ་སྤྱད་པར་བྱའོ། །ཤུ་ཏི་རུ་རྟ་སྤང་སྤོས་དང་། །ཤིང་མངར་རམ་ཉི་བ་གཉིས་དང་། །སྟག་ཚེར་བ་དང་ས་ར་ལ། །པི་པི་ལིང་དང་ཐང་ཤིང་ནི། །མར་
เล่ม ๒๐๒ · หน้า 153a
གྱི་བརྒྱད་འགྱུར་འོ་མར་བསྐོལ། མིག་བརྟ་བ་ཡི་མཆོག་ཡིན་ནོ། །ཞེས་བྱ་བ་ལ། ཤུ་ཏི་ལ་སོགས་པའི་སྨན་མར་གྱི་འོ་མ་དང་བསྐོལ་བའི་སྨན་མར་ནི་མིག་བརྟ་བའི་མཆོག་ཡིན་ནོ། །རི་དྭགས་ཨེ་ན་ཡའི་ཚིལ་ནི། །འོ་མར་བསྐོལ་ཏེ་
གཟར་བུས་དཀྲུགས། །དེ་ཡི་དངས་མ་ཤིང་མངར་དང་། །ཙནྡན་པུ་ཤེལ་ཙེ་དེ་བཞིན། །ཞེས་བྱ་བ་ལ། །རི་དྭགས་ཨེ་ན་ཡའི་ཚིལ་འོ་མ་དང་བཅས་པར་བསྐོལ་ཏེ་གཟར་བུས་དཀྲུགས་ལ་དེའི་དངས་མ་བླངས་ལ། ཤིང་མངར་ཙནྡན་དང་པུ་ཤེལ་ཙི་དང་། སོ་སོར་བསྐོལ་
བའི་ཁུ་བ་ཡང་མིག་བརྟ་བར་བྱེད་པའི་མཆོག་ཡིན་ནོ། །ཤྭ་བིད་རེག་འཇམ་གོ་ད་དང་། །ཁྱིམ་བྱ་སྲེག་པ་རྨ་བྱའི་ཚིལ། །རེ་རེ་ཞིང་ནི་ཆོ་ག་དག །འདི་ཉིད་ཀྱིས་ནི་བརྟ་བར་བྱ། །ཞེས་བྱ་བ་ལ། ཤྭ་བིད་ལ་སོགས་པའི་ཚིལ་ཡང་སྔར་བཤད་པའི་སྦྱོར་བའི་ཆོ་ག་ཉིད་ཀྱིས་བརྟག་
ཅིང་སྦྱར་བ་ཡང་མིག་བརྟ་བའི་མཆོག་ཡིན་ནོ། །བསལ་བར་བྱ་དང་སྣུམ་དང་ནི། །སྨན་ཕུར་བཙོས་པའི་ཐིགས་པ་བླུགས། །ཞེས་བྱ་བ་ལ། རབ་རིབ་དེ་བསལ་བར་བྱ་བ་དང་། སྣུམ་གྱི་ཆོ་གར་བྱས་པའི་སྦྱོར་བར་སྨན་གྱི་ཕུར་མ་བཙོས་པའི་ཐིགས་པ་ཡང་བླུགས་པར་བྱའོ། །
འདིར་ནི་རླུང་གྱུར་ཆམ་པ་བཞིན། །ནི་རུ་ཧ་དང་འཇམ་རྩི་བྱ། །ཞེས་བྱ་བ་ལ། རླུང་ལས་གྱུར་པའི་རབ་རིབ་འདི་ལ་གསོ་བ་རླུང་ལས་གྱུར་པའི་ཆམ་པ་དང་འདྲ་བར་བྱ་ཞིང་དེ་བཞིན་དུ་བཀྲུ་སྨན་དྲག་པོ་མས་གཏོང་བ་འཇམ་རྩི་དང་བཅས་པ་གཏང་བར་བྱའོ། །མཁྲིས་པ་ལས་གྱུར་
རབ་རིབ་ལ། །འཚོ་བྱེད་འབྲས་བུ་གསུམ་དང་ནི། །བསྐོལ་བའི་མར་ནི་བླུད་བྱ་ཞིང་། །སྣུམ་གྱིས་ཞེན་པར་གཏར་ག་གདབ། །ཅེས་བྱ་བ་ལ། མཁྲིས་པ་ལས་གྱུར་པའི་རབ་རིབ་ཀྱི་མིག་ནད་ལ་ནི་འཚོ་བྱེད་ཀྱི་སྡེ་ཚན་དང་། །འབྲས་བུ་གསུམ་བསྐོལ་བའི་སྨན་མར་བླུད་ལ། སྣུམ་
གྱིས་ཞེན་པར་གྱུར་པ་དང་དེའི་འོག་ཏུ་གཏར་ག་གདབ་ཅིང་ཁྲག་དབྱུང་བར་བྱའོ། །ཁ་ར་དུར་བྱིད་སུག་སྨེལ་ཕྱེ། །སྦྲང་རྩི་སྦྱར་བའི་བཀྲུ་སྨན་གཏང་། །ཞེས་བྱ་བ་ལ། ནད་མཁྲིས་པ་ལས་གྱུར་པའི་རབ་རིབ་ཀྱིས་ཉེན་པའི་ནད་པ་དེ་ལ་ཁ་ར་ལ་སོགས་པའི་བཀྲུ་སྨན་གཏང་བ་ཡང་
เล่ม ๒๐๒ · หน้า 153b
ཕན་ནོ། །རབ་བསིལ་སྨན་ཆུ་བླུགས་བྱུག་སོགས། །གདོང་དང་མིག་དང་སྤྱི་བོར་སྦྱར། །ཞེས་བྱ་བ་ལ། མཁྲིས་པ་དང་ཁྲག་ལས་གྱུར་པའི་རབ་རིབ་ཅན་ལ་ནི་རབ་ཏུ་བསིལ་པའི་ནུས་པ་དང་ལྡན་པའི་སྨན་གྱི་ཆུ་བསིལ་མོ་སྤྱི་བོ་ནས་བླུགས་པར་བྱ་ཞིང་བྱུག་པ་ལ་སོགས་
པས་གདོང་བསྐུ་བར་བྱའོ། །ཐལ་ཏྲེས་ཤུག་པ་པུ་ཤེལ་ཙེ། །མུ་ཏིག་སེང་ཕྲོམ་ཙནྡན་དཀར། །རི་ལུའི་མིག་སྨན་བསྐུས་ན་ཕན། །ཞེས་བྱ་བ་ལ། ཐལ་ཏྲེས་ལ་སོགས་པའི་མིག་སྨན་རི་ལུར་བྱས་པའི་སྨན་བསྐུས་ན་ཡང་། །མཁྲིས་པ་ལས་གྱུར་པའི་རབ་རིབ་ལ་
ཕན་ནོ། །དེ་བཞིན་གནྡྷ་བྷ་དྲ་དང་། །ནཱ་ག་པུ་ཥྥ་ཨུཏྤ་ལ། །ག་པུར་ཤིང་མངར་ཡུག་སྣམ་ཕན། །ཞེས་བྱ་བ་ལ། །དེ་བཞིན་དུ་མཁྲིས་པ་ལས་གྱུར་པའི་རབ་རིབ་ལ་གནྡྷ་བྷ་དྲ་ལ་སོགས་པའི་ཕྱེ་མའི་མིག་སྨན་བསྐུས་ན་ཡང་ཕན་ནོ། །སྐྱེར་ཁཎྜ་དང་སྤངས་མ་དང་། །ཀར་ཀ་ཏ་ཡི་
སྲིང་གི་དང་། །སྐྱུ་རུ་ར་ཡི་འབྲས་བུ་ཤེལ། །ག་བུར་ཆ་ནི་ལྔ་ལྔ་དང་། །ཆ་གསུམ་ཆ་རེ་སྦྱར་བ་ཡིན། །མིག་སྨན་རབ་རིབ་འཇོམས་པར་བྱེད། །ཅེས་བྱ་བ་ལ། །སྐྱེར་བའི་ཁཎྜ་ཆ་དང་སྤངས་མ་སྐྱེར་པ་ཁཎྜའི་ཆ་དང་། །ཀར་ཀ་ཏ་སྲིང་གི་དང་། །སྐྱུ་རུ་རའི་འབྲས་བུ་ཆ་
གསུམ། །ཤེལ་དང་ག་བུར་ཆ་གཅིག་སྦྱར་བའི་མིག་སྨན་ནི་རབ་རིབ་འཇོམས་པར་བྱེད་པ་ཡིན་ནོ། འཚོ་བྱེད་ཁ་ར་ཨུཏྤ་ལ། འོ་མ་མར་བསྐོལ་སྣ་སྨན་གཏང་། །ཞེས་བྱ་བ་ལ། འཚོ་བྱེད་ཀྱི་སྡེ་ཚན་དང་། ཁ་ར་དང་། །ཨུཏྤ་ལ་སྔོན་པོ་དང་། མར་དང་མར་གྱི་གཞི་འགྱུར་
གྱི་འོ་མ་དང་བསྐོལ་བའི་མར་སྣ་ནས་བཏང་ན་ཡང་ཕན་ནོ། །བད་ཀན་ལས་གྱུར་སླེ་ཏྲེས་དང་། །འབྲས་བུ་གསུམ་དང་པི་པི་ལིང་། །མར་བསྐོལ་སྣུམ་བླུད་གཏར་ག་གདབ། །དེ་རྗེས་དན་ད་དུར་བྱིད་བསྐོལ། །གླ་གོར་ཞོ་ཤ་ཨ་རུ་ར། །བཅའ་སྐ་པི་པི་ལིར་ཕྱེ་གདབ། །བཀྲུ་
སྨན་དག་ནི་གཏང་བར་བྱ། །ཞེས་བྱ་བ་ལ། །བད་ཀན་ལས་གྱུར་པའི་རབ་རིབ་ལ་ནི་སླེ་ཏྲེས་ལ་སོགས་པ་དང་། མར་བསྐོལ་བའི་ཁུ་བ་བླུད་པས་སྣུམ་གྱི་ཆོ་ག་བྱས་ལ་དེའི་རྗེས་ལ་གཏར་ག་གདབ་པར་བྱའོ། །དེའི་རྗེས་ལ་དན་ད་ལ་སོགས་པའི་བཀྲུ་སྨན་གཏང་བར་བྱའོ། །རྩ་བ་
เล่ม ๒๐๒ · หน้า 154a
བཅུ་པའི་ཁུ་བར་ནི། །བ་ལེ་ཀ་དང་སེར་པོ་གཉིས། །ཐང་ཤིང་པི་པི་ལིང་འོ་མ། །ཏིལ་མར་བསྐོར་བའི་སྣ་སྨན་གཏང་། །ཅེས་བྱ་བ་ལ། །ཡང་ན་བད་ཀན་ལས་གྱུར་པའི་རབ་རིབ་ལ་རྩ་བ་བཅུ་པ་ལ་སོགས་པའི་བཀྲུ་སྨན་གཏང་བར་བྱའོ། །དུང་དང་གླ་
རྩི་པྲི་ཡང་ཀུ། །རྩ་བ་གསུམ་དང་འབྲས་བུ་གསུམ། །དྲི་མེད་རི་ལུས་མིག་གསལ་བྱེད། །ཅེས་བྱ་བ་ལ། །དུང་ལ་སོགས་པ་བཏགས་ཏེ་རི་ལུར་བྱས་པ་ནི། །དྲི་མ་མེད་པའི་རི་ལུ་ཞེས་བྱ་བ་སྟེ། དེ་མིག་གསལ་བར་བྱེད་བའི་ཕྱིར་བསྐུ་བར་བྱའོ། །ལྕགས་ནག་ཕྱེ་མ་ཚ་བ་
གསུམ། །རྒྱམ་ཚ་འབྲས་བུ་གསུམ་མིག་སྨན། །རི་ལུ་ནག་པོས་མིག་གསལ་བྱེད། །ཅེས་བྱ་བ་ལ། །ལྕགས་ནག་པོའི་ཕྱེ་མ་ལ་སོགས་པ་བཏགས་ཏེ་རི་ལུར་བྱས་པའི་མིག་སྨན་ནི་རི་ལུ་ནག་པོ་ཞེས་བྱ་སྟེ། །དེས་ཀྱང་མིག་གསལ་བར་བྱེད་པ་ཡིན་ནོ། །རི་བོང་བོང་བུ་སེང་གེ་
གླང་། །རྔ་མོའི་སོ་དང་དཔྲལ་བའི་རུས། །བ་ལང་དཀར་སྤུ་ན་ལེ་ཤམ། །རྒྱ་མཚོའི་ལྦུ་བ་ཙནྡན་དུང་། །ནུ་ཞོ་ར་ཡི་འོ་མར་བཏགས། །རི་ལུས་རབ་རིབ་ལིང་ཏོག་སེལ། །ཅེས་བྱ་བ་ལ། །རི་བོང་ལ་སོགས་པའི་སོ་དང་། །བ་ལང་དཀར་པོའི་སྤུ་དང་
ན་ལེ་ཤམ་ལ་སོགས་པ་ཐམས་ཅད་བུད་མེད་ཀྱི་ནུ་ཞོ་དང་། རའི་འོ་མ་དང་བཏགས་ཏེ་རི་ལུར་བྱས་བས་ནི་རབ་རིབ་དང་ལིང་ཏོག་ཐམས་ཅད་སེལ་བར་བྱེད་དོ། །ཁྲག་གྱུར་མཁྲིས་པ་ལྟ་བུར་གསོ། །བསིལ་ཆོས་བྱ་ཞིང་གཏར་ག་གདབ། །ཅེས་བྱ་བ་ལ། །ཁྲག་ལས་གྱུར་པའི་རབ་རིབ་ནི་
མཁྲིས་པ་ལས་གྱུར་པའི་རབ་རིབ་དང་འདྲ་བར་གསོ་བར་བྱ་ཞིང་དེ་བཞིན་དུ་ཟས་དང་སྐོམ་དང་སྨན་དང་སྦྱོད་ལམ་ལ་སོགས་པ་བསིལ་བས་བྱ་ཞིང་གཏར་ག་གདབ་པར་བྱའོ། །རྒུན་འབྲུ་སྤང་སྤོས་སེང་ཕྲོམ་དང་། །ཤིང་མངར་ཙནྡན་ཟངས་མ་དུང་། །པདྨ་ཤུག་པ་ཨུཏྤ་ལ། །ར་
ཡི་འོ་མས་རི་ལུར་བྱས། །ཁྲག་གྱུར་རབ་རིབ་མྱུར་དུ་སེལ། །ཞེས་བྱ་བ་ལ། །རྒུན་འབྲུ་ལ་སོགས་པའི་སྨན་རའི་འོ་མ་དང་བཏགས་ཏེ། །རི་ལུར་བྱས་པའི་མིག་སྨན་བསྐུས་ན་ཁྲག་ལས་གྱུར་པའི་རབ་རིབ་སེལ་བར་བྱེད་དོ། །ལྡན་པ་འདུས་པ་ལས་གྱུར་པ། །ནད་གཞིའི་
เล่ม ๒๐๒ · หน้า 154b
ཆ་ནི་ཇི་བཞིན་གསོ། །ཞེས་བྱ་བ་ལ། །ལྡན་བ་ལས་གྱུར་པ་དང་། །འདུས་པ་ལས་གྱུར་པའི་རབ་རིབ་ལ་ནི་ནད་གཞིའི་ཆ་ཤས་གང་ཆེ་བ་བཞིན་དུ་བཤད་མ་ཐག་པའི་གསོ་བ་ཇི་ལྟ་བ་བཞིན་དུ་བྱའོ། །མ་དུ་ཀ་དང་བྱི་དང་ག །ན་ལེ་ཤམ་དང་སྒྲོན་ཤིང་དང་། །ལོ་མ་ཏིལ་མར་
བསྐོལ་བའམ། །བཏགས་པའི་སྣ་སྨན་གདོང་བསྐུ་བྱ། །ཞེས་བྱ་བ་ལ། །མ་དུ་ཀ་ལ་སོགས་པ་སྨན་དང་འོ་མ་དང་ཏིལ་མར་བསྐོལ་བའི་སྣ་སྨན་བཏང་ན་ལྡན་པ་དང་འདུས་པ་ལས་གྱུར་པའི་རབ་རིབ་སེལ་བར་བྱེད་དོ། །ཡང་ན་མ་དུ་ཀ་ལ་སོགས་པའི་སྨན་དེ་དག་ཉིད་ཆུ་
ཐགས་སུ་བྱས་པའི་ལྡེ་གུས་གདོང་བསྐུས་ན་ཡང་དེ་དང་འདྲ་བར་ཕན་ནོ། །རྒྱ་སྤོས་ཨུ་ཏྤལ་ཨ་ནན་ད། །ཤིང་མངར་སུ་ནི་ཤ་ན་ཀེེ །ཏིལ་མར་བསྐོལ་བའི་སྣ་སྨན་དང་། །མགོ་བསྐུ་འཇལ་རྩི་བྱ་བ་བསྔགས། །ཞེས་བྱ་བ་ལ། །ཡང་ན་རྒྱ་སྤོས་ལ་སོགས་པས་ལྡེ་གུར་བྱས་པ་
དང་། །ཏིལ་མར་བསྐོལ་བའི་སྣ་སྨན་བཏང་བའམ། །ཏིལ་མར་དེ་ཉིད་མགོ་ལ་བསྐུ་ཞིང་། འཇམ་རྩི་བྱ་བ་ཡང་བསྔགས་ཤིང་ཕན་པ་ཡིན་ནོ། །པུ་ཤེལ་ཙེ་བསྐོལ་ཁུ་བའི་ནང་། །རྒྱམ་ཚ་པི་པི་ལིང་ཕྱེ་གདབ། །དེ་བཙགས་སླར་ཡང་མར་བཅས་པར། །བསྐོལ་ལ་སྐ་གྱུར་
བསྒྲངས་ནས་ནི། །སྦྲང་རྩི་བཅུག་པའི་མིག་སྨན་ནི། །འདུས་པ་ལས་གྱུར་རབ་རིབ་སེལ། །ཞེས་བྱ་བ་ལ། པུ་ཤེལ་ཙེ་བསྐོལ་བའི་ཁུ་བའི་ནང་དུ་རྒྱམ་ཚ་དང་པི་པི་ལིང་གི་ཕྱེ་མ་བཏབ་སྟེ། །དེ་ཚགས་ཀྱིས་བཙགས་ལ་ཡང་བའི་མར་དང་བསྐོལ་ཏེ་སྐ་བར་གྱུར་པ་དང་བསྒྲངས་
པར་སྦྲང་རྩི་བཅུག་པའི་མིག་སྨན་འདིས་ཀྱང་འདུས་པ་ལས་གྱུར་བའི་རབ་རིབ་ཀྱི་མིག་ནད་ཐམས་ཅད་སེལ་བར་བྱེད་དོ། །ནུབ་མོ་རྒྱུ་བའི་སེམས་ཅན་གྱི། །རུས་པ་རྐང་གིས་གང་བ་དང་། །ལིག་བུ་མིག་དང་བཅས་པ་ནི། །འབབ་ཆུའི་ནང་དུ་ཟླ་གཅིག་གམ། །ཞིག་ནི་
ཉི་ཤུའི་བར་དུ་བཞག །དེ་ནས་ཕྱུང་སྟེ་བསྐམས་ནས་ནི། །ལུག་རུ་པ་ཡི་མེ་ཏོག་དང་། །ཤིང་མངར་བཅས་པའི་ཕྱེ་མར་བྱས། །མིག་བསྐུས་འདུས་པ་ལས་གྱུར་པའི། །རབ་རིབ་སེལ་བར་བྱེད་མཆོག་ཡིན། །ཞེས་བྱ་བལ། །ནུབ་མོ་རྒྱུ་བའི་སེམས་ཅན་འུག་པ་ལ་
เล่ม ๒๐๒ · หน้า 155a
སོགས་པ་དེ་རྣམས་ཀྱི་རུས་པ་རྐང་གིས་གང་བ་དང་། ཇི་སྐད་སྨོས་པ་བཞིན་དུ་ཕྱེ་མར་བྱས་པའི་མིག་སྨན་གྱི་འདུས་པ་ལས་གྱུར་པའི་རབ་རིབ་འཇོམས་པའི་མཆོག་ཡིན་ནོ། །མིག་སྔོན་གསོ་བ་འང་དེ་ཉིད་ལས། །གཏར་ག་གདབ་པར་མི་བྱ་སྟེ། །ནད་
དེས་ལོང་བར་གྱུར་པ་ཡིན། །སྲིན་བུ་པད་པས་ཁྲག་དབྱུང་བྱ། །ཞེས་བྱ་བ་ལ། མིག་སྔོ་བ་ཞེས་བྱ་བ་ལ་སྤྲིས་གཡོགས་པའི་ནད་ལ་ཡང་རབ་རིབ་ཀྱི་གསོ་བར་བཤད་པ་འདི་ཉིད་ནད་གཞི་ཇི་ལྟ་བ་བཞིན་དུ་སྦྱར་བར་བྱ་ལ། གསོ་བ་དེ་ལས་གཏར་ག་གདབ་ཅིང་བསྔམས་པ་
ནི་མི་བྱ་སྟེ། ཅིའི་ཕྱིར་ཞེ་ན། སྔོན་པོའི་སྤྲིས་གཡོགས་པའི་ནད་མིག་ལ་གནས་པར་བྱེད་པ་བསམས་པར་གྱུར་ན་ནི། དེ་སྐྱོན་དེས་ལོང་བར་འགྱུར་བའི་སྐྱོན་ཡོད་དོ། །གལ་ཏེ་ཁྲག་ངེས་པར་དབྱུང་དགོས་པ་ཡིན་ན་ནི་བསྡམ་ཞིང་གཏར་ག་མི་བྱའི། །སྲིན་བུ་པད་པས་ཁྲག་
གཞིབ་པའི་ཕྱིར་གླན་པར་བྱའོ། །བུ་རམ་རྒྱ་མཚོའི་ལྦུ་བ་དང་། །པི་པི་ལིང་དང་ན་ལེ་ཤམ། །གུར་གུམ་སྦྲང་རྩི་ལིག་བུ་མིག །སྤྲིས་གཡོགས་འཚོ་བ་ཙམ་མིག་སྨན། །ཞེས་བྱ་བ་ལ། །བུ་རམ་ལ་སོགས་པའི་མིག་སྨན་ནི། །སྤྲིས་གཡོགས་ཤིང་མིག་སྔོན་པོར་གྱུར་
པ་དེ་རེ་ཞིག་མིག་སྔོན་པོ་ལ་བ་ཙམ་དུ་འཚོ་བར་བྱེད་པའི་མིག་སྨན་ཡིན་ནོ། །འདུས་གྱུར་ནེའུ་ལེ་ལྟ་བུར་ལོང་། །རབ་རིབ་སྐབས་བཤད་ཆོ་གར་སྦྱར། །ཞེས་བྱ་བ་ལ། །ནེའུ་ལེ་ལྟ་བའི་ལོང་བ་ཞེས་བྱ་བ་འདུས་པ་ལས་གྱུར་པའི་མིག་ནད་ལ་ནི་རབ་རིབ་ཀྱི་སྐབས་སུ་གསོ་བ་
བཤད་པའི་ཆོ་ག་གང་དག་ཡིན་པ་སྦྱར་བར་བྱའོ། །མར་དང་སྦྲང་རྩི་བ་ལང་གི །ལྕི་པའི་ཁུ་བ་སྐྱེར་ཁནྜ། །ཡུག་སྣམ་བལ་བུའི་ཕྱེ་མར་སྦྱར། །མིག་སྨན་མཚན་མོ་ལོང་ལ་ཕན། །ཞེས་བྱ་བ་ལ། སྐྱེར་པའི་ཁཎྜ་ལ་སོགས་པའི་སྨན་མར་ལ་སོགས་པ་དང་སྦྱར་བའི་
མིག་སྨན་ནི་མིག་ནད་མཚན་མོ་ལོང་བ་ཞེས་བྱ་བ་ལ་ཕན་ནོ། །ན་ལེ་ཤམ་ནི་ཞོ་དང་སྦྱར། །མཚན་མོ་མི་མཐོང་མིག་སྨན་མཆོག །ཅེས་བྱ་བ་ལ། །ཡང་ན་ན་ལེ་ཤམ་ཞོ་དང་སྦྱར་བ་ཡང་ཕན་ནོ། །ཨུཏྤལ་ཡུག་སྣམ་ཀ་རཉྫ། །པདྨ་གེ་སར་བ་ལར་གི །ལྕི་བའི་ཁུ་བ་དང་སྦྱར་བའི། །རི་ལུས་མཚན་
เล่ม ๒๐๒ · หน้า 155b
མོ་ལོང་བ་སེལ། །ཞེས་བྱ་བ་ལ། ཨུཏྤལ་སྔོན་པོ་ལ་སོགས་པའི་ཇི་སྐད་བཤད་པ་བཞིན་དུ་སྦྱར་བའི་མིག་སྨན་ཡང་ཕན་ནོ། །ཧ་རེ་ཎུ་ཀ་པི་པི་ལིང་། །རྒྱམ་ཚ་དང་ནི་ལིག་བུ་མིག །ར་གཅིན་རི་ལུར་བྱས་པ་ཕན། །ཞེས་བྱ་བ་ལ། ཧ་རེ་ཎུ་ཀ་ལ་སེགས་པའི་རི་ལུ་ཡང་
མཚན་མོ་ལོང་བ་ཞེས་བྱ་བའི་མིག་ནད་ལ་ཕན་ནོ། །པྲི་ཡང་ཀུ་དང་ཚ་བ་གསུམ། །ལྡོང་རོས་བ་བླ་འབྲས་བུ་གསུམ། །རྒྱ་མཚོའི་ལྦུ་བ་རའི་འོ་མ། །རི་ལུར་བྱས་པའི་མིག་སྨན་གྱིས། །མཚན་མོ་ལོང་བའི་མིག་ནད་སེལ། །ཞེས་བྱ་བ་ལ། །པྲི་ཡང་ཀུ་ལ་སོགས་པའི་རི་
ལུ་ཡང་དེ་ལ་ཕན་ནོ། །མཆེར་པའི་ནང་དུ་པི་པི་ལིང་། །བཅུག་སྟེ་མ་ཚོས་བར་བཙོས་ལ། །དེ་སྐམས་སྦྲང་རྩིར་བཏགས་པ་ནི། །མཚན་མོ་མི་མཐོང་མིག་སྨན་མཆོག །ཅེས་བྱ་བ་ལ། །མཆེར་པའི་ནང་དུ་པི་པི་ལིང་བཅུག་སྟེ། ཇི་སྐད་བཤད་པ་བཞིན་དུ་སྦྱར་བའི་མིག་
སྨན་ཡང་མཚན་མོ་ལོང་བ་ལ་ཕན་ནོ། །མ་ཧེའི་མཆིན་པ་མཆེར་པ་དང་། །ཏིལ་མར་མར་ནི་ལྷན་ཅིག་བཟའ། །ཞེས་བྱ་བ་ལ། ཡང་ན་མ་ཧེའི་མཆིན་པ་ལ་སོགས་པ་ཇི་སྐད་བཤད་པ་བཞིན་དུ་ཟོས་ན་ཡང་ཕན་ནོ། །འཚོ་བྱེད་སྣ་བཅུའི་ལོ་མ་ནི། །མར་དང་ལྷན་ཅིག་བསྐོལ་བ་
བཟའ། །ཞེས་བྱ་བ་ལ། ཡང་འཚོ་བྱེད་སྣ་བཅུའི་ལོ་མ་མར་གྱི་ནང་དུ་བསྐོལ་ཏེ་ཟོས་ན་ཡང་ཕན་ནོ།། །ཨ་ཏི་མུག་ཏ་ཨེ་རཎྜ། །ཉེའུ་ཤིང་ལང་ག་ལིའི་ལོ་མ། །མར་དང་བརྔོས་པ་བཟའ་བར་བྱ། །ཞེས་བྱ་བ་ལ། ཡང་ན་ཨ་ཏི་མུག་ཏ་ལ་སོགས་པའི་ལོ་མ་མར་དང་བཙོས་ཏེ་ཟོས་
ན་ཡང་ཕན་ནོ། །དྲོ་ན་པུ་ཥྤ་མར་དང་བརྔོས། །བཟའ་དང་བཏུང་བར་སྦྱར་བའང་ཕན། །ཞེས་བྱ་བ་ལ། ཡང་ན་དྲོ་ན་པུཥྤ་ཞེས་བྱ་བའི་སྨན་ཇི་སྐད་སྨོས་པ་བཞིན་བསྟེན་ན་ཡང་ཕན་ནོ། །དུད་འཐུལ་མཁྲིས་པ་སྐྱུར་བྲོ་བས། །ཚིག་ལ་མར་ནི་རྙིང་པ་དག །སྣུམ་གྱུར་བསིལ་བའི་
བཀྲུ་སྨན་གཏང་། །བསིལ་སྨན་གྱིས་ནི་ཀུན་ཏུ་བྱུག །ཅེས་བྱ་བ་ལ། །མིག་སྨན་དུད་པ་འཐུལ་བ་ཞེས་བྱ་བ་དང་། མཁྲིས་བས་ཚིག་པ་དང་། སྐྱུར་གྱིས་ཚིག་པ་ཞེས་བྱ་བའི་མིག་ནད་ལ་སྣུམ་གྱི་ཆོ་ག་བྱས་ལ་སྨན་བསིལ་བས་བཀྲུ་སྨན་གཏང་བར་བྱ་ཞིང་། དེ་བཞིན་དུ་ལུས་ཀུན་
เล่ม ๒๐๒ · หน้า 156a
དུ་བསྐུ་ཞིང་བྱུག་པར་བྱའོ། །བ་ལང་ལྕི་ཁུ་འོ་མ་མར། །བསྐོལ་བ་ཡི་ནི་མིག་སྨན་ནམ། །བལ་བུའི་ལོ་མ་ཡུག་སྣམ་བསྐོལ། །ཕྱེ་མ་བཏབ་པའི་མིག་སྨན་ཕན། །ཞེས་བྱ་བ་ལ། །བའི་ལྕི་བ་བཙིར་བའི་ཁུ་བ་དང་འོ་མ་དང་མར་རམ། །ཡང་ན་
བལ་བུའི་ལོ་མ་དང་། བཙག་ཡུག་སྣམ་གྱི་ཕྱེ་མ་བསྐོལ་བའི་མིག་སྨན་ཕན་པ་ཡིན་ནོ། །མེ་ད་སེང་ཕྲོམ་ཨ་ནནྟ། །སྐྱེར་པ་བཙོད་དང་ཤིང་མངར་ནི། །མར་གྱི་བརྒྱད་འགྱུར་འོ་མ་བསྐོལ། །ཏིལ་མར་བསྐོལ་བའི་སྣ་སྨན་ཕན། །ཞེས་བྱ་བ་ལ། །མེ་ད་ལ་སོགས་པའི་
སྨན་མར་གྱི་བརྒྱད་འགྱུར་གྱི་འོ་མ་དང་། ཏིལ་མར་བསྐོལ་བའི་སྣ་སྨན་བཏང་ན་ཡང་ཕན་ནོ། །འོ་མ་མར་སར་གྱིས་བརྟ་བྱ། །དེས་མ་ཞི་ན་གཏར་ག་གདབ། །ཅེས་བྱ་བ་ལ། འོ་མ་ལས་བྱུང་བའི་མར་སར་ཡིན་པས་ན་འོ་མའི་མར་སར་ཏེ། །དེས་བརྟ་བར་བྱ་ལ། །དེ་ལྟར་བྱས་སུ་ཟིན་ཀྱང་ཞི་
བར་མ་གྱུར་ན། གཏར་ག་གདབ་ཅིང་ཁྲག་དབྱུང་བར་བྱའོ། །སེམས་ལས་ནད་དང་མྱ་ངན་འཇིགས། །ཟས་རྩུབ་ཙོག་ཙོག་པོར་འདུག་དང་། །སྐྱུག་སྨན་བཀྲུ་སྨན་སྣ་སྨན་དང་། སྨན་ཐིགས་བླུགས་སོགས་ཉེས་པ་དང་། །ཁ་ཟས་ཕྱེད་ཞུ་སློན་པ་དང་། །བཀྲེས་སྐོམ་ལ་
སོགས་བརྣག་པ་དང་། །མིག་ནད་མ་བཅོས་ཡུད་རིང་ལས། །རབ་རིབ་ནད་ལྡན་བརྟ་བར་བྱ། །ཞེས་བྱ་བ་ལ། །སེམས་ལས་ལ་སོགས་པ་བསྟེན་པ་དང་། སྐྱུག་སྨན་ལ་སོགས་པ་ཉེས་པ་དང་། དེ་བཞིན་དུ་ཁ་ཟས་ཕྱེད་ཙམ་མ་ཞུ་བ་ལས་སློན་པ་དང་། བཀྲེས་པ་ལ་
སོགས་པ་བརྣག་པ་ལས་མིག་རབ་རིབ་ཀྱི་ནད་དང་ལྡན་པར་བརྟ་བར་བྱའོ། །དེ་ལ་ནད་གཞི་སོགས་བརྟགས་ཏེ། །རང་གི་སྨན་ནི་ཇི་བཞིན་སྦྱར། །ཞེས་བྱ་བ་ལ། སེམས་ལས་ལ་སོགས་པའི་ནད་ཀྱི་རྒྱུ་དེ་དག་ལས་རབ་རིབ་དང་འདྲ་བར་ཉེས་པར་བརྟགས་ལ་ནད་གཞི་ཇི་
ལྟ་བ་ལས། རང་གི་སྨན་གང་དང་གང་ཡིན་པ་ལས་དེ་སྦྱར་ཞིང་གཏང་བར་བྱའོ། །ཉི་མ་གཟས་འཛིན་མེ་འོད་གློག་ལ་སོགས། །བལྟས་པས་མིག་ནི་ཉམས་བར་གྱུར་པ་དག །དེ་ལ་བསིལ་སྨན་ཚོགས་ཀྱིས་བརྟ་བྱ་ཞིང་། །དེ་ལྟར་གསེར་བདར་མར་གྱི་མིག་སྨན་གཏང་།
เล่ม ๒๐๒ · หน้า 156b
ཞེས་བྱ་བ་ལ། ཉི་མ་གཟས་འཛིན་པའི་ཚེ་མིག་གིས་ཤས་ཆེར་བལྟས་པ་དང་། དེ་བཞིན་དུ་མེའི་འོད་དང་གློག་ལ་སོགས་པ་འཚེར་བག་ཅན་བལྟས་པར་གྱུར་པ་ལས་མིག་ཉམས་པར་གྱུར་ཅིང་ནད་དེ་ལ་ནུས་པ་བསིལ་བའི་སྨན་གྱི་ཁུ་བ་ལ་སོགས་
པས་བརྟ་བར་བྱ་བ་དང་། དེ་བཞིན་དུ་སྣུམ་གྱི་སྦྱོར་བ་ལ་སོགས་པས་བརྟ་བར་བྱ་བ་དང་། དེ་བཞིན་དུ་གསེར་མར་གྱི་ནང་དུ་བདར་བའི་མིག་སྨན་གཏང་བར་བྱའོ། །མི་ཡིས་ཇི་སྲིད་འཚོ་ཡི་བར་དུ་ནི། །རྟག་ཏུ་མིག་བསྲུང་བ་ལ་འབད་པར་བྱ། །ཉིན་དང་མཚན་མོ་འདྲ་བར་
གྱུར་པ་ཡི། །མི་ལ་ནོར་ཡོད་གྱུར་ཀྱང་དོན་མེད་ཡིན། །ཞེས་བྱ་བ་ལ། །མི་རྣམས་ཇི་སྲིད་འཚོ་ཞིང་གནས་པར་གྱུར་གྱི་བར་དུ་རྟག་ཏུ་གནོད་པ་ཐམས་ཅད་ལས་མིག་བསྲུང་ཞིང་གནོད་པར་མི་འགྱུར་བ་ལ་འབད་པར་བྱའོ། །ཅིའི་ཕྱིར་ཞེ་ན། སྐྱེས་བུ་ལོང་བར་གྱུར་པ་ལ་
ནི། ནོར་དང་འབྱོར་པ་བདོག་ཅིང་ཡོད་པར་གྱུར་ཀྱང་འཇིག་རྟེན་འདིར་དོན་མེད་ཅིང་འབྲས་བུ་མེད་པ་ཡིན་ནོ། །འབྲས་བུ་གསུམ་བསྟེན་གཏར་ག་སྦྱང་བྱ་དང་། །སེམས་དགའ་མིག་སྨན་སྣ་སྨན་བཅས་བསྟེན་ན། །བྱ་ཤ་ཟ་ཞིང་རྐང་པའི་རིམ་གྲོ་དང་། །ཞུན་མར་བཏུང་བས་
རྟག་ཏུ་མིག་བསྲུང་བྱ། །ཁ་ཟས་མི་འཕྲོད་ཟ་བ་རྟག་ཏུ་སྤང་། །རབ་ཕྲ་འཚེར་དང་གཡོ་བ་མི་ལྟ་ཞེས། །སྐྱེས་བུའི་མིག་ནི་མཆོག་ཏུ་བསྲུང་པའི་ཐབས། །དྲང་སྲོང་ཆེན་པོ་མུ་ཁྱུད་ཀྱིས་བཤད་དོ། །ཞེས་བྱ་བ་ལ། མིག་བསྲུང་བར་བྱ་བའི་ཐབས་ནི་འདི་དག་སྟེ། རྟག་ཏུ་འབྲས་
བུ་གསུམ་བསྟེན་ཅིང་བཟའ་བ་དང་། །དེ་བཞིན་དུ་གཏར་ག་གདབ་པ་དང་། བཀྲུ་སྨན་དང་སྐྱུག་སྨན་གྱིས་སྦྱང་བ་བྱ་བ་དང་། རྟག་ཏུ་སེམས་དགའ་ཞིང་ཡིད་བདེ་བར་བྱ་བ་དང་། སྐྱེར་པའི་ཁཎྜ་ལ་སོགས་པའི་མིག་སྨན་བསྐུ་བ་དང་། དེ་བཞིན་དུ་ཏིལ་མར་ལ་སོགས་པའི་
སྣ་སྨན་བསྟེན་པ་དང་། སྲོག་ཆགས་བྱའི་ཤ་བསྟེན་ཏེ་བཟའ་ཞིང་སྤྱད་པ་དང་། རྐང་པའི་རིམ་གྲོ་བསྐུ་བ་དང་། དྲིལ་བ་དང་། བཀྲུ་བ་དང་། །མཉེ་བ་དང་། ལྷམ་བགོ་བ་ལ་སོགས་པས་གནོད་པ་མེད་པར་བྱ་བ་དང་། ཞུན་མར་རྟག་ཏུ་བཏུང་བས་མིག་བསྲུང་ཞིང་གནོད་
เล่ม ๒๐๒ · หน้า 157a
པ་མེད་པ་ལ་འབད་པར་བྱ་བ་དང་། གཞན་ཡང་མིག་ལ་གནོད་པའི་ཁ་ཟས་རྟག་ཏུ་སྤང་བ་དང་། དངོས་པོ་རབ་ཏུ་ཕྲ་ཞིང་བརྟག་དཀའ་བ་ལ་བལྟ་བ་དང་། །འཚེར་ཞིང་འོད་ཅན་ལ་བལྟ་བ་དང་། གཡོ་ཞིང་འགྱུར་པའི་དངོས་པོ་ལ་མི་ལྟ་བ་སྟེ་འདི་དག་ནི་
སྐྱེས་བུའི་མིག་བསྲུང་བར་བྱ་བའི་ཐབས་ཡིན་པས། ཐབས་དེ་དག་ལ་གནས་པར་བྱ་ཞིང་མིའི་མིག་བསྲུང་བ་ལ་འབད་པར་བྱའོ། །ཞེས་དྲང་སྲོང་ཆེན་པོ་མུ་ཁྱུད་ཀྱིས་བསྟན་ཅིང་བཤད་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་
བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་གསུམ་པའི་རྣམ་པར་འགྲེལ་པའོ།། །།དེ་ནས་མཐོང་བ་ཉམས་པ་གསོ་བ་བཤད་པར་བྱའོ། །ཞེས་བྱ་བ་ལ། མིག་གི་མཐོང་བ་ཉམས་པ་ལས་ནི་བཤད་པར་བྱ་བ་མང་
དུ་ཡོད་པས་རབ་རིབ་ཀྱི་གསོ་བ་ལས་ལོགས་ཤིག་ཏུ་བཤད་པ་ཡིན་ཏེ། མཐོང་བ་ཉམས་པ་ཞེས་བྱ་བ་དང་། །མཚན་མ་ཉམས་པ་ཞེས་བྱ་བ་དང་། མིག་སྔོན་པོར་གྱུར་པ་ཞེས་བྱ་བ་དང་། སྤྲིས་གཡོགས་པ་ཞེས་བྱ་བ་དང་། ལོང་བ་ཞེས་བྱ་བ་ནི་མིང་གི་རྣམ་གྲངས་ཡིན་ནོ། །
དོན་གཅིག་ལ། །དེ་འགགས་པར་བྱེད་པ་ཡིན་པས་ན། །འགགས་པ་ལ་གསོ་བྱ་བ་འམ། ཡང་ན་བཀག་ཅིང་བཟློག་ལ་བསལ་བའི་ཐབས་ཡིན་པས་ན་གསོ་བ་ཞེས་བྱ་སྟེ་དེའི་ལེའུ་བཤད་པར་བྱའོ། །ཞེས་བྱ་བའི་དོན་ཡིན་ནོ། །བད་ཀན་ལས་གྱུར་སྤྲིས་
གཡོགས་པ། །རྦ་ཀློང་ལ་སོགས་བླ་བརྣན་ནི། །དྲུག་པོ་མེད་པར་གྱུར་པ་དང་། །ལེགས་སྨིན་མཐོང་བ་མེད་པར་བྱེད། །ཞེས་བྱ་བ་ལ། མཐོང་བ་ཉམས་ཤིང་སྦྲིས་གཡོགས་པའི་མིག་ནད་རྦ་ཀློང་ལ་སོགས་པ་སྟེ། རྦ་ཀློང་པ་དང་། གསེག་མ་ལྟ་བུ་དང་། རི་མོ་ཅན་དང་
གྲམ་བཅད་པ་ལྟ་བུ་དང་། གདུགས་འདྲ་བའི་བླ་བརྣན་དྲུག་པོ་མེད་པར་གྱུར་པ་དང་། ལེགས་པར་སྨིན་པར་གྱུར་པ་སྟེ། མཐུག་པོ་ཁོ་ནར་གྱུར་ཅིང་བད་ཀན་གྱིས་གོང་པོ་ལྟར་སྣང་བར་གྱུར་པ་མེད་ཅིང་ལོང་བར་གྱུར་པ་གང་ཡིན་པ་དེ་ནི་ཐུར་མས་དབུག་ཅིང་དབྱེ་བར་བྱའོ། །དེ་སྨིན་མ་
เล่ม ๒๐๒ · หน้า 157b
གྱུར་མི་སྙོམས་ལ། །ཞོ་ག་ཆུ་འདྲ་སྲབ་པ་ནི། །ཐུར་མ་ཡིས་ནི་དྲངས་གྱུར་ཀྱང་། །སླར་ཡང་གྱེན་དུ་འབྱུང་བར་འགྱུར། །ནད་ནི་མི་བཟད་སྐྱེད་བྱེད་ཅིང་། །མཐོང་བྱེད་སླར་ཡང་འགེབས་པར་བྱེད། །དེ་ནི་ཟས་བཅས་བླ་བརྣན་བཅས། །བད་ཀན་ཅན་གྱིས་མྱུར་དུ་སྐྱེད། །
ཅེས་བྱ་བ་ལ། །སྤྲིས་གཡོགས་པའི་ནད་དེ་སྨིན་ཅིང་མཐུག་པར་མ་གྱུར་པ་དང་། མི་སྙོམས་ཤིང་དམའ་བར་གྱུར་པ་དང་། དེ་བཞིན་དུ་ཞོ་ག་ཆུ་འདྲ་བར་སྣང་ཞིང་དེའི་མདོག་དང་མཚུངས་པ་དང་སྲབ་པར་གྱུར་པ་དེ་ནི་ཐུར་མས་ཕུག་སྟེ་དྲངས་ཤིང་བསྡུས་སུ་ཟིན་ཀྱང་། སླར་ཡང་གྱེན་
དུ་འབྱུང་ཞིང་འབྱར་བར་གྱུར་པ་དང་། དེ་བཞིན་དུ་ནད་མི་བཟད་ཅིང་བརྣག་པར་དཀའ་བ་སྐྱེད་པར་བྱེད་པ་དང་། མཐོང་བར་བྱེད་པའི་མིག་གི་རྒྱལ་མོ་སླར་ཡང་འགེབས་ཤིང་སྒྲིབ་པར་བྱེད་པ་དེ་ནི་བད་ཀན་སྐྱེད་པར་བྱེད་པའི་ཟས་དང་། སྐོམ་དང་སྨན་གྱིས་མྱུར་བ་ཁོ་ནར་སྐྱེད་ཅིང་སྨིན་
བར་བྱ་ལ། རླུང་དང་མཁྲིས་པ་ཅན་གྱི་ཟས་སྐོམ་ལ་སོགས་པས་ཡུན་རིང་ཞིག་ན་སྨིན་པར་འགྱུར་རོ། །བད་ཀན་གྱིས་ནི་མཐོང་ཉམས་པ། །བད་ཀན་དཀར་བས་དཀར་བ་ཡིན། །ཞེས་བྱ་བ་ལ། བད་ཀན་ལས་གྱུར་པའི་མཚན་མ་འམ། མཐོང་བ་ཉམས་པ་དེའི་རྒྱུ་བད་ཀན་
གྱི་དཀར་བ་ཡིན་པས་ན་སྤྲིས་གཡོགས་པ་ཡང་དཀར་བ་ཡིན་ནོ། །དེ་ནི་ནད་གཞན་གྱིས་ཟིལ་གནོན། །ཀུན་ཏུ་སྔོ་བའི་ནད་དུ་འགྱུར། །ཞེས་བྱ་བ་ལ། བད་ཀན་ལས་གྱུར་པའི་མཐོང་བ་ཉམས་པ་དེ་རླུང་ངམ་མཁྲིས་པ་གཞན་གྱི་ཟིལ་གྱིས་མནན་ཅིང་དབང་དུ་གྱུར་ན། ཀུན་དུ་
སྔོ་བ་ཞེས་བྱ་བའི་ནད་མཆིང་བུ་ལྟ་བུར་འགྱུར་རོ། །དེ་ལ་རླུང་གྱུར་མིག་གཡོ་ཞིང་། །རྦ་ཀློང་གཡོ་ཞིང་དམར་སྐྱར་འདུག །ཅེས་བྱ་བ་ལ། དེ་རྦ་ཀློང་ཞེས་བྱ་བའི་མིག་ནད་ནི་རྦ་ཀློང་འཁྱིལ་བ་ལྟར་གཡོ་ཞིང་མི་བརྟེན་ལ་དམར་སྐྱ་སྟེ། །ཅུང་ཟད་དམར་བར་འདུག་པ་ཡིན་ནོ། །གསེག་
མ་ཨརྒའི་འོ་མ་ནི། །ཐིགས་ཕྲན་ཁྱབ་འདྲ་མཐུག་པ་ཡིན། །ཞེས་བྱ་བ་ལ། །གསེག་མ་ལྟ་བུའི་མིག་ནད་ནི་ཤིང་ཨརྒའི་འོ་མ་ཐིགས་པ་ཕྲ་མོ་ལྟ་བུས་ཁྱབ་པ་ཤིན་ཏུ་མཐུག་པ་ཡིན་ནོ། །གྲ་མ་ལྟ་བུའི་མིག་འབྲས་ནི། །འབྲས་ཀྱི་གྲ་མ་འདྲས་ཁྱབ་ཡིན་། །ཞེས་བྱ་བ་ལ། གྲ་མས་
เล่ม ๒๐๒ · หน้า 158a
ཁྱབ་པ་ལྟ་བུ་ནི། མིག་གི་ནང་འབྲས་ཀྱི་གྲ་མ་ལྟ་བུའི་རི་མོས་ཁྱབ་པར་གྱུར་པ་ཡིན་ནོ། །གྲ་མ་བཅད་པ་གྲ་མ་ཚིག །བཅད་པ་ལྟར་སྣང་ན་བ་ཡིན། །ཞེས་བྱ་བ་ལ། གྲ་མ་བཅད་པ་ལྟ་བུ་ཞེས་བྱ་བའི་མིག་ནད་ནི་གྲ་མ་བཅད་པ་དང་ཚིག་པ་དང་བཅད་པ་ལྟ་བུར་སྣང་ཞིང་ན་
བ་དང་བཅས་པ་ཡིན་ནོ། །རྨ་སྒྲོ་རྨ་བྱའི་འཇུག་སྒྲོ་འདྲ། །ཁར་བའི་མདོག་ཏུ་སྣང་བ་ཡིན། །ཞེས་བྱ་བ་ལ། རྨ་བྱའི་སྒྲོ་ལྟ་བུ་ཞེས་བྱ་བའི་མིག་ནད་ནི་རྨ་བྱའི་སྒྲོ་ལྟ་བུའི་དབྱིབས་ཅན་ལ་ཁར་བའི་རི་མོའི་མདོག་ལྟ་བུར་སྣང་བ་ཡིན་ནོ། །གདུགས་འདྲ་ཁ་དོག་སྣ་ཚོགས་པ། །སྤྲིས་
གཡོགས་གདུགས་ཅན་ཞེས་བྱའོ། །ཞེས་བྱ་བ་ལ། །གདུགས་འདྲ་བ་ཞེས་བྱ་བའི་སྤྲིས་གཡོགས་པའི་ནད་ནི་དབྱིབས་སུ་གདུགས་དང་འདྲ་བར་སྣང་ཞིང་ཁ་དོག་སྣ་ཚོགས་པར་སྣང་བ་དང་། །སྤྲིས་གཡོགས་པ་གདུགས་ཅན་ཞེས་བྱའོ། །གཏར་ག་མི་བྱ་ཆམ་པ་དང་། །ལུད་པ་
ཅན་ནི་དབྱེ་མི་བྱ། །མ་ཞུ་སྔར་མ་སྐྱུགས་པ་དང་། །རྣ་མིག་མགོ་གཟེར་ཅན་མི་དབྱེ། །ཞེས་བྱ་བ་ལ། སྤྲིས་གཡོགས་པ་གཏར་ག་བྱར་མི་རུང་བའི་ནད་ཡོད་པའི་མིག་དབྱེ་བར་མི་བྱའོ། །དེ་བཞིན་དུ་ཆམ་པས་བཏབ་པ་དང་། །ལུང་བ་ཅན་གྱི་མིག་དབྱེ་བར་མི་བྱ་བ་དང་། དེ་བཞིན་དུ་
མ་ཞུ་བ་དང་། སྔར་མ་དང་། སྐྱུགས་ཤིང་སློན་པ་དང་། རྣ་བ་གཟེར་བ་དང་། མིག་གཟེར་བ་དང་། མགོ་བོ་གཟེར་བའི་མིག་དབྱེ་བར་མི་བྱའོ། །དེ་ནས་ཐུན་མོང་དུས་སུ་ནི། །སྦྱང་བྱས་ཟས་ཟོས་པ་ལ་ནི། །ས་ཕྱོགས་གསལ་བར་སྔ་དྲོ་ནི། །སྨན་པ་པུས་མཉམ་ཁྲི་ལ་འདུག །ནད་
པ་འདུག་ཅིང་བསྡམས་བྱས་ལ། །ཁ་ཡི་དབུགས་ཀྱིས་དུགས་བྱ་ཞིང་། །མཐེ་བོས་མིག་ནི་མཉེས་བྱས་ནས། །ནད་ནི་གཡོས་པར་མཐོང་བ་དང་། །མི་འགུལ་བར་ནི་མགོ་ནས་གཟུང་། །རང་གི་སྣ་ལ་ལྟ་བཞིན་དུ། །ནག་པོ་སོར་ཕྱེད་མ་གཏོགས་ཤིང་། །མིག་འགྲམ་བཞི་ཆ་དོར་
བ་རུ། །མཛུབ་མོ་གུང་མོ་མཐེབ་མོ་ཡིས། །མིག་ཐུར་དམ་དུ་བཟུང་ནས་ནི། །རང་གྲུབ་བུ་ག་ནས་འཕྲེད་དུ། །གཟུག་ཅིང་གྱེན་མཉེ་དྲང་པོར་བྱས། །མིག་གཡོན་ལག་པ་གཡས་པས་དབུག །མིག་གཡས་ལག་པ་གཡོན་པས་དབུག །ཅེས་བྱ་བ་ལ། དེ་ནས་ཐུན་མོང་གི་
เล่ม ๒๐๒ · หน้า 158b
འདུ་ཤེས་ཞེས་བྱ་བ། སྟོན་ཟླ་འབྲིང་པོ་དང་། སྟོན་ཟླ་ཐ་ཆུངས་དང་། དཔྱིད་ཟླ་ཐ་ཆུངས་ཀྱི་དུས་སུ་སྦྱང་བ་བྱས་པས་ཏེ། སྣུམ་ཆོས་དང་དུགས་བྱས་ལ་བཀྲུ་སྨན་གྱིས་སྦྱངས་ཏེ། བརྟས་པའི་རྗེས་ལ། ཁ་ཟས་ཕན་ཞིང་འཕྲོད་པ་རན་པར་ཟོས་པར་གྱུར་ནས་ས་ཕྱོགས་མུན་པ་
མེད་ཅིང་གསལ་བར་སྔ་དྲོ་སྟེ་ཉི་མ་ཤར་བའི་ཆ་དང་པོ་ལ་སྨན་པ་མཁས་པ་པུས་མོ་དང་མཐོན་དམན་མཉམ་པའི་ཁྲི་ལ་འདུག་སྟེ། ས་ཕྱོགས་བྱི་དོར་བྱས་ཤིང་བདེ་བར་བྱས་པར་སྟན་བཏིང་ལ་ནད་གཡོག་སྒྲིན་པོ་རྒྱབ་ཏུ་ལེགས་པར་འདུག་པས་ལག་པ་གཉིས་ཀྱིས་མགོ་དམ་དུ་བཟུང་སྟེ་ཉི་
མ་ལ་ཁ་བསྟན་ལ་རྐང་པ་གཉིས་བརྐྱང་སྟེ་སྨན་པའི་ཁའི་དབུགས་ཀྱིས་ནད་པའི་མིག་དུགས་བྱས་ལ། དེའི་འོག་ཏུ་མིག་གོང་གཉིས་མཐེ་བོས་མཉེས་ནས་མིག་གི་ནད་སྤྲིས་གཡོགས་པ་དེ་གཡོས་ཤིང་། ཅུང་ཟད་འཕགས་པར་མཐོང་བ་དང་། ནད་པ་རང་གི་སྣའི་རྩེ་མོ་ལ་ལྟ་བར་བྱེད་
བཞིན་དུ་མགོ་བོ་མི་འགུལ་བར་དམ་དུ་བཟུང་སྟེ། ནག་པོ་ཞེས་བྱ་བ་མིག་འབྲས་ནག་པོ་ལས་སོར་ཕྱེད་དོར་ཞིང་དེ་མ་གཏོགས་པར་བྱས་ལ། མིག་འགྲམ་ཞེས་བྱ་བ་མིག་ཟུར་ནས་སོར་གྱི་བཞི་ཆ་དོར་ལ་མཛུབ་མོ་དང་། གུང་མོ་དང་མཐེ་བོས་མིག་ཐུར་དམ་དུ་མི་འགྱུར་བར་བཟུང་སྟེ་རང་
བཞིན་གྱིས་གྲུབ་པའི་མིག་གི་བུ་ག་ཕྲ་མོ་ཡོད་པའི་ངོས་ནས་གྱེན་དུ་མཉེ་ཞིང་མིག་དྲང་པོར་མ་ཡོ་བར་བཞག་ཅིང་། སྟེང་ངམ་འོག་ཏུ་མ་འགྱུར་བར་བྱས་ལ་མིག་གཡོན་པ་ནི་ལག་པ་གཡས་པས་ཕུག་པར་བྱས་ལ། མིག་གཡས་པ་ནི་ལག་པ་གཡོན་པས་དབུག་པར་བྱའོ། །ལེགས་པར་
ཕུག་ན་སྒྲ་འབྱུང་འགྱུར། །ནད་མེད་ཆུ་ནི་ཉུང་ཞིག་འབྱུང་། །ཞེས་བྱ་བ་ལ། དེ་ལྟར་འབིགས་པ་ན་ལེགས་ཤིང་མ་ནོར་བར་ཕུག་ན་ནི་ཕུག་པའི་ཚེ་སྒྲ་འབྱུང་བར་འགྱུར་བ་དང་། །དེ་བཞིན་དུ་ནད་མེད་པར་འགྱུར་བ་དང་། ཆུའི་ཐིགས་པ་ཉུང་ཞིག་འབྱུར་བར་འགྱུར་རོ། །དེ་རྗེས་ནད་པ་
སྤྲོ་བསྲིངས་ལ། །མིག་ཏུ་ནུ་ཞོ་བླུགས་པར་བྱ། །ཞེས་བྱ་བ་ལ། དེ་ལྟར་ཕུག་པའི་འོག་ཏུ་ནད་པ་ཚིག་གིས་ལེགས་པར་སྤྲོ་བསྲིངས་ལ། མིག་དམར་བ་དང་། ནད་མེད་པ་དང་། མཆི་མ་མི་འཛག་པར་བྱ་བའི་ཕྱིར་བུད་མེད་ཀྱི་ནུ་ཞོ་བླུགས་པར་བྱའོ། །དེ་ནས་ཐུར་མའི་རྩེ་མོ་ཡིས།།
เล่ม ๒๐๒ · หน้า 159a
གནོད་པ་མེད་པར་དལ་གྱིས་ནི། །མིག་གི་འབྲས་བུ་དབྱི་བྱས་ལ། །སྣ་ནས་དལ་གྱིས་ཕུལ་བར་བྱ། །མིག་ན་གནས་པའི་བད་ཀན་ནི། །སྣ་ནས་བརྔུབས་བས་བསལ་བར་བྱ། །ཞེས་བྱ་བ་ལ། དེའི་འོག་ཏུ་སྨན་པས་ཐུར་མའི་རྩེ་མོས་མིག་གི་འབྲས་བུ་ལ་
གནོད་ཅིང་འཚེ་བ་མེད་བར་དལ་གྱིས་མིག་གི་འབྲས་བུ་དབྱི་ཞིང་བསལ་བར་བྱ་ཞིང་། སྣ་ནས་ནད་དལ་གྱིས་ཕུལ་བར་བྱའོ། །དེའི་འོག་ཏུ་སྣ་ནས་བརྔུབས་པས་མིག་ལ་གནས་པའི་ནད་དབྱུང་ཞིང་བསལ་བར་བྱའོ། །ནད་མི་འགུལ་བ་འམ་འགྱུང་ན་ནི། །མིག་གི་ཕྱི་རོལ་ནས་དུགས་
བྱ། །ཞེས་བྱ་བ་ལ། མིག་གི་སྤྲིས་གཡོགས་པའི་ནད་མི་འགུལ་བར་གྱུར་པ་འམ། རླུང་གིས་འགྱུར་ཞིང་མལ་ན་མི་གནས་པར་གྱུར་ན་ནི། མིག་གི་ཕྱི་རོལ་ནས་དུགས་འཇམ་པོ་བྱའོ། །དེ་ནས་གཟུགས་ནི་མཐོང་གྱུར་ནས། །ཐུར་མ་རིམ་གྱིས་དབྱུང་བར་བྱ། །མར་ལ་
སྦངས་པའི་རས་བལ་གཞུག །མིག་དཀྲིས་ནས་ནི་དེ་འོག་ཏུ། །དེ་ལས་ལོགས་ནི་ཅིག་ཤོས་དབབ། །གཉིས་ཀ་ཕྱེ་ན་གན་རྐྱལ་བཞག །རླུང་མེད་མལ་དུ་མགོ་བོ་དང་། །རྐང་བསྐུ་ཕན་པའི་ཟས་བསྟེན་བྱ། །ཞེས་བྱ་བ་ལ། དེ་ནས་དེའི་འོག་ཏུ་གཟུགས་མཐོང་བར་གྱུར་ན་སྨན་
པས་ཐུར་མ་དེ་རིམ་གྱིས་དལ་བུས་དབྱུང་བར་བྱའོ། །དེ་ལྟར་ཕྱུང་ནས་དེའི་རྗེས་ལ་མར་གྱི་ཁུ་བ་ལ་སྦངས་པའི་རས་བལ་བཅུག་ལ་ནད་པ་དེའི་མིག་དཀྲི་སྟེ་ཉལ་དུ་གཞུག་ལ། དེ་ཡང་མིག་གཅིག་ཕུག་ཅིང་ཕྱེ་བ་ཡིན་ན་ནི། །ཕྱེ་བའི་མིག་སྟེང་དུ་ཕྱུང་ལ་མ་ཕྱེ་བའི་མིག་ཅིག་ཤོས་ཀྱི་
ལོགས་ཕབ་སྟེ་ཉལ་དུ་གཞུག་ལ། གལ་ཏེ་གཉི་ག་ཕྱེ་ན་ནི་གན་རྐྱལ་དུ་བ་ཀན་ཏེ་བསྙལ་བར་བྱ་ལ། དེ་ཡང་རླུང་མེ་པའི་གནས་མལ་དུ་བསྙལ་ཞིང་མགོ་བོ་དང་རྐང་པ་བསྐུ་བ་དང་། ཕན་པའི་ཟས་བསྟེན་དུ་གཞུག་པར་བྱའོ། །སྦྲིད་པ་ལུང་བ་སྒྲེགས་པ་དང་། །མཆིལ་མ་འདོར་
དང་ཆུ་འཐུངས་དང་། །ཐུར་དུ་གཏོང་བ་ཁྲུས་བྱེད་དང་། །སོ་ཤིང་འཆའ་བར་བྱེད་པ་དག །ཞག་བདུན་བར་དུ་སྤང་བྱ་ཞིང་། །སྣུམ་འཐུངས་ཆོ་ག་བཞིན་དུ་བསྡམ། །ཞེས་བྱ་བ་ལ། ནད་པ་དེ་སྦྲིད་པ་ལ་སོགས་པ་ཞག་བདུན་གྱི་བར་དུ་སྤང་ཞིང་བསྡམ་བར་བྱ་བ་དང་། །
เล่ม ๒๐๒ · หน้า 159b
འདིར་བསྡམ་པའི་ཆོ་ག་གཞན་དག་ཀྱང་སྣུམ་འཐུངས་པའི་ཆོ་གའི་སྐབས་སུ། ཆུ་དྲོན་གྱིས་ནི་ཉེར་སྦྱོད་བྱ། །ཞེས་བྱ་བ་ལ་སོགས་པ་ཇི་སྐད་སྨོས་པའི་བསྡམ་པའི་སྦྱོར་བ་དག་ཀྱང་བྱའོ། །ཅི་ནུས་སྨྱུང་བྱ་ན་གྱུར་ན། །མར་ཁུ་དྲོ་འཇམ་བླུགས་པར་བྱ། །ཞེས་བྱ་བ་ལ། ཡང་
ནད་པ་དེ་ཉམས་སྟོབས་ཅི་ཡོད་པ་ལས་སྨྱུང་བ་བྱ་བ་ལ་གལ་ཏེ་ན་བར་གྱུར་ན་མར་ཁུ་དྲོ་འཇམ་ཙམ་གྱི་ཐིགས་པ་བླུགས་པར་བྱའོ། །ནས་ཆན་སླ་བ་འམ་ཐུག་པ་སྐ། །ཚ་གསུམ་སྐྱུ་རུ་ར་མར་སྦྱིན། །ཞེས་བྱ་བ་ལ། ནད་པ་དེ་ལ་ནས་ཆག་ཚེར་བཏྲལ་བའི་ཆན་སླ་པ་ལ་མར་བཏབ་པ་
ཚ་བ་གསུམ་ལ་སོགས་པ་དང་བཅས་པ་སྦྱིན་པར་བྱ་བ་འམ། ཡང་འབྲས་ཐུག་གར་པོ་ཚ་བ་གསུམ་དང་སྐྱུ་རུ་ར་དང་མར་དང་བཅས་པ་སྦྱིན་པར་བྱའོ། །ཞག་གསུམ་ནས་ནི་དེ་བཀྲོལ་ལ། །རླུང་འཇོམས་པ་ཡི་སྨན་གྱི་ནི། །ཁུ་བ་མེག་ཏུ་བླུགས་པར་བྱ། །ཞེས་བྱ་བ་ལ། །
ཞག་གསུམ་ལོན་པ་དང་ནད་པ་དེའི་མིག་ཕྱེ། རླུང་འཇོམས་པའི་སྨན་གྱི་ཁུ་བའི་ཐིགས་པ་མིག་ཏུ་བླུགས་པར་བྱའོ། །ཞག་བདུན་ནས་ནི་མིག་དེ་ཉིད། །རྣམ་པ་ཀུན་ཏུ་དགྲོལ་བར་བྱ། །ཞེས་བྱ་བ་ལ། ཞག་བདུན་འདས་པ་དང་མིག་དེ་རྣམ་པ་ཐམས་ཅད་ཀྱི་ཐམས་ཅད་
དུ་བཅིང་བ་དགྲོལ་བར་བྱའི། །བཅིང་བར་ནི་མི་བྱའོ། །ཇི་སྲིད་མི་གསལ་བརྟན་གྱུར་པ། །བསྡམས་ལ་འབད་དེ་གནས་པར་བྱ། །ཞེས་བྱ་བ་ལ། ཇི་སྐད་དུ་བཤད་པའི་བསྡམས་པའི་སྤྱོས་པ་ནི་ཇི་སྐད་མི་གསལ་བར་མཐོང་བ་ཉམས་ཤིང་བརྟན་པར་གྱུར་པ་དེ་སྲིད་ཀྱི་བར་དུ་
ཆོ་ག་དེ་ལ་གནས་པར་བྱའོ། །གཟུགས་ནི་ཕྲ་དང་འཚེར་བ་དག །མོད་ལ་བལྟ་བར་མི་བྱའོ། །ཞེས་བྱ་བ་ལ། དེ་ལྟར་སྤྲིས་གཡོགས་པ་བསལ་ནས། དེས་གཟུགས་ཕྲ་ཞིང་བརྟག་པར་དཀའ་བ་དང་། འཚེར་ཞིང་འོད་འབར་བའི་དངོས་པོ་དག་ལ་མོད་ལ་སྟེ་འཕྲལ་ཁོ་ནར་
བལྟ་ཞིང་བརྟག་པར་མི་བྱའོ། །དབུག་ཉེས་མི་མཐུན་ཟོས་པ་ལས། །སྐྲངས་དང་ན་དང་དམར་ལ་སོགས། །མིག་ནད་གདུང་བ་འབྱུང་བར་འགྱུར། །ནད་ཚུལ་དེ་བཞིན་དེ་གསོ་བྱ། །ཞེས་བྱ་བ་ལ། །སྤྲིས་གཡོགས་པ་དབུག་ཅིང་བརྟོལ་བ་ཉེས་པ་དང་། ནད་དང་མི་འཕྲོད་
เล่ม ๒๐๒ · หน้า 160a
པའི་ཟས་སྐོམ་ཟོས་ཤིང་བསྟེན་པ་ལས་སྐྲངས་པ་ལ་སོགས་པ་དང་། མིག་ནད་གདུང་བ་ཞེས་བྱ་བ་འབྱུང་བར་འགྱུར་ལ། སྐྲངས་པ་ལ་སོགས་པ་དེ་དག་ལ་ནི། ནད་ཀྱི་ཚུལ་ཇི་ལྟ་བ་བཞིན་དུད་དང་འཚམ་པའི་སྨན་གྱིས་དེ་གསོ་ཞིང་བཅོས་པར་བྱའོ། །
ནད་དང་དམར་བ་ཞི་བྱའི་ཕྱིར། །དཱུར་བ་ནས་དང་ཡུག་སྣམ་དང་། །ཐལ་ཏྲེས་མར་དང་ལྡན་པ་ཡི། །ལྡེ་གུས་གདོང་ནི་བསྐུ་བར་བྱ། །ཞེས་བྱ་བ་ལ། ནད་དང་དམར་བ་སྣང་བ་ཞི་བར་བྱ་བའི་ཕྱིར། དཱུར་བ་ལ་སོགས་པའི་སྨན་ཆུ་ཐགས་སུ་བྱ་བའི་ལྡེ་གུ་མར་དང་ལྡན་པས་
གདོང་བསྐུ་ཞིང་བྱུག་པར་བྱའོ། །དེ་བཞིན་ཏིལ་དང་ཡུངས་ཀར་བཅས། །ཁ་ལུང་ཁུ་བས་སྦྲུས་པའང་ཕན། །ཞེས་བྱ་བ་ལ། དེ་བཞིན་དུ་ཏིལ་དང་། ཡུངས་ཀར་ལྡེ་གུར་བྱས་པ་ཁ་ལུང་ཞེས་བྱ་བ་བི་ཛ་པུ་རའི་ཁུ་བས་སྦྲུས་པས་གདོང་བསྐུས་ན། ཡང་ན་བ་དང་དམར་བ་ལ་ཕན་
ནོ། །ཐལ་ཏྲེས་ལོ་མ་པ་ཡ་སྱ། །བཙོད་དང་ཤིང་མངར་ར་ཡི་ནི། །འོ་མར་སྦྱར་བའི་ལྡེ་གུ་ནི། །དྲོ་འཇམ་བདེ་བར་བྱེད་མཆོག་ཡིན། །ཞེས་བྱ་བ་ལ། ཐལ་ཏྲེས་ལ་སོགས་པའི་སྨན་རའི་འོ་མ་དང་བསྐོལ་བ་དྲོ་འཇམ་ཙམ་གྱི་ལྡེ་གུས་མུག་ཏུ་བསྐུས་ན་ཡང་ན་བ་དང་དམར་བ་བདེ་
བར་བྱེད་པའི་མཆོག་ཡིན་ནོ། །སེང་ཕྲོམ་རྒྱམ་ཚ་རྒུན་འབྲུ་དང་། །ཤིང་མངར་ར་ཡི་འོ་མར་བསྐོལ། །ཐིགས་པ་མིག་ཏུ་བླུགས་པ་ནི། །ནད་དང་དམར་བ་འཇོམས་པར་བྱེད། །ཤིང་མངར་རུ་རྟ་ཨུཏྤ་ལ། །རྒུན་འབྲུ་རྒྱ་སྐྱེགས་ཁ་རར་བཅས། །ཞེས་བྱ་བ་ལ། སེང་ཕྲོམ་ལ་
སོགས་པ་རའི་འོ་མ་དང་བསྐོལ་བ་བླུགས་ན་ཡང་དེ་ལ་ཕན་ནོ། །རླུང་འཇོམས་སྨན་བསྐོལ་འོ་མ་ནི། །མར་གྱི་བཞི་འགྱུར་བསྐོལ་བ་དང་། །ཤུག་པ་ལ་སོགས་ལྡེ་གུས་བཏབ། །ལས་ཀུན་ལ་ནི་བསྔགས་པ་ཡིན། །ཞེས་བྱ་བ་ལ། རླུང་འཇོམས་པའི་སྨན་དང་བསྐོལ་པའི་འོ་
མའི་ནང་དུ་ཤུག་པ་ལ་སོགས་པའི་ལྡེ་གུས་བཏབ་ན་ཡང་བསྐོལ་བའི་སྨན་མར་ནི་ལས་ཀུན་ཏེ་བཏུང་བ་དང་སྣ་ནས་བཏང་བ་དང་། བསྐུ་བ་ལ་སོགས་པ་ཐམས་ཅད་ལ་བསྔགས་པ་ཡིན་ནོ། །དེས་མ་ཞི་ན་སྣུམ་ཆོས་དང་། །དུགས་བྱས་གཏང་ག་གདབ་པར་བྱ། །གདུང་བའི་
เล่ม ๒๐๒ · หน้า 160b
གསོ་བ་དག་ཀྱང་བྱ། །ཞེས་བྱ་བ་ལ། དེ་ལྟར་བྱས་སུ་ཟིན་ཀྱང་ཉེ་བར་ཞི་བར་མ་གྱུར་ན་ནད་པ་དེ་སྣུམ་ཆོས་དང་དུགས་བྱས་ལ། གཏར་ག་གདབ་པར་བྱ་བ་དང་། དེ་བཞིན་དུ་མིག་ནད་གདུང་བའི་གསོ་བ་བཤད་པའི་ཆོ་ག་དག་ཀྱང་འདིར་བཤད་པར་བྱའོ། །དབུག་འདྲུབ་
མིག་སྨན་འཇམ་པོ་བསྐུ། །ཞེས་བྱ་བ་ལ། མིག་དབུག་ཅིང་ཕྱེ་བ་དེ་ལེགས་པར་འདྲུབ་པར་གྱུར་ནས། མིག་སྨན་འཇམ་པོ་དག་བསྐུས་ན་ཕན་ནོ། །ཏུ་པ་རིའི་རྩ་ན་ལེ་ཤམ། །བ་བླ་སྐྱེར་པའི་ཁཎྜ་བསྐུ། །མིག་ཕྱེད་བུ་རམ་རི་ལུ་ནི། །ཆར་པའི་ཆུ་དང་བདར་བ་གཏང་། །
ཞེས་བྱ་བ་ལ། ཏུ་པ་རི་ཞེས་བྱ་བ་ཨ་ཏ་ཀའི་རྩ་བ་དང་ན་ལེ་ཤམ་ལ་སོགས་པ་ཆར་པའི་ཆུ་དང་བདར་བ་དག་ཀྱང་གཏང་བར་བྱའོ། །ཛཱ་ཏི་ད་པ་ཤ་ིརི་ཤ །ཀརྐཏ་སྲིང་གི་མེ་ཏོག །མུ་ཏིག་འབྲས་བུ་བེེ་ཌཱུརྱ། །ར་ཡི་འོ་མར་བཏགས་པ་ནི། །ཟངས་མའི་སྣོད་ལ་སླ་བར་བསྐུ། །
ཞག་བདུན་ནས་བཀོག་སླར་ཡང་ནི། །འོ་མ་དང་བཏགས་ལྡེ་གུར་བྱས། །རི་ལུ་གྲིབ་མ་ལ་བསྐམས་པ། །མིག་བསྐུས་ཕྱེ་པ་མཐོང་བ་ནི། །གསལ་ཞིང་སྟོབས་ནི་སྐྱེད་པར་བྱེད། །ཅེས་བྱ་བ་ལ། ཛཱ་ཏི་ལ་སོགས་པ་རའི་འོ་མ་དང་ཞིབ་ཏུ་བཏགས་ཏེ་ལྡེ་གུ་ཞིབ་མོ་དེས་ཟངས་
མའི་སྣོད་ལ་སྲབ་མོར་བསྐུས་ཏེ་ཞག་བདུན་འདས་པར་གྱུར་པ་དང་། སླར་བཀོག་སྟེ་འོ་མ་དང་ལྡེ་གུར་བྱས་ཏེ་རི་ལུར་བྱས་ཏེ། དེ་གྲིབ་མ་ལ་བསྐམས་ལ་མིག་ལ་བསྐུས་ན། དེ་ལྟར་མིག་ཕྱེ་ཞིང་ཕུག་པ་དེའི་མཐོང་བ་གསལ་བར་བྱེད་ཅིང་། མིག་རྣོ་བའི་སྟོབས་སྐྱེད་པར་བྱེད་པ་ཡིན་ནོ། །
བྱི་རུ་ལྡོང་རོས་ལིག་བུ་མིག །རྒྱ་མཚོའི་ཝུ་བ་ན་ལེ་ཤམ། །སྣ་ནས་བཏང་པའི་སྨན་སྦྱར་ན། །བཤད་པའི་ཡོན་ཏན་མཚུངས་པར་བསྟན། །ཞེས་བྱ་བ་ལ། བྱི་རུ་ལ་སོགས་པ་སྔ་མ་བཞིན་དུ་རའི་འོ་མ་དང་ཞིབ་ཏུ་བཏགས་ཏེ། དེས་ཟངས་མའི་སྣོད་དུ་བསྐུ་བ་ལ་སོགས་
པ་གོང་དུ་བཤད་མ་ཐག་པའི་སྦྱོར་བ་དང་ཡོན་ཏན་ཐམས་ཅད་མཚུངས་ཤིང་འདྲ་བར་སློབ་དཔོན་གྱིས་བསྟན་ཅིང་བཤད་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ། ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་
เล่ม ๒๐๒ · หน้า 161a
ལས། །ཕྱི་མའི་གནས་ཀྱི་ལེའུ་བཅུ་བཞི་བའི་རྣམ་པར་འགྲེལ་པའོ།། །།དེ་ནས་མིག་ནད་ཐམས་ཅད་ཀྱི་ནད་ཀྱི་དམིགས་བརྟག་པ་བཤད་པར་བྱའོ། །ཞེས་བྱ་བ་ལ། མིག་ནད་ཀྱི་ཡན་ལག་གི་ཆར་གཏོགས་པ་བཤད་ནས་མིག་ཐམས་ཅད་
ཀྱི་ནད་གང་ཡིན་པ་དེ་བསྟན་པར་བྱ་བའི་ཕྱིར་ལེའུ་འདི་བརྩམས་པ་ཡིན་ནོ། །རླུང་གི་མིག་ནས་མཆི་མ་འཛག །སྣ་རྒྱས་ཅུང་ཟད་སྐྲངས་པ་དང་། །མུར་འགྲམ་དཔྲལ་མིག་སྨིན་མ་ཁ། །ན་ཞིང་ཟུག་ལ་འབར་བ་དང་། །རྔུ་མ་སྐམ་ཞིང་མཆི་མ་གྲང་། །སླ་ཉུང་ན་བ་ལྡང་དུབ་ཅན། །
འབྱེད་དང་འཛུམས་པར་དཀའ་བ་དང་། །སྲིན་བུ་འགྲོ་བ་སྙམ་དུ་སེམས། །མིག་ནི་བུས་པ་ལྟ་བུར་སྣང་། །ཟུག་རྔུ་ཕྲ་མོས་ཁྱབ་སྙམ་བྱེད། །སྣུམ་དང་དྲོ་བས་ཉེར་ཞེར་འགྱུར། །མཆི་མ་འཛག་པ་ཞེས་བྱའོ། །ཞེས་བྱ་བ་ལ། རླུང་ལས་གྱུར་པའི་མིག་ནད་རླུང་གིས་མཆི་མ་
འཛག་པར་གྱུར་པ་ན། སྣ་རྒྱས་ཞིང་བུས་པའམ། གང་བ་ལྟ་བུར་གྱུར་པ་དང་། ཅུང་ཟད་སྐྲངས་པ་དང་། མུར་འགྲམ་ལ་སོགས་པ་ལྷང་ལྷང་པོར་ན་ཞིང་ཟུག་པ་དང་། མིག་འཕར་ཞིང་འགུལ་བ་དང་། རྔུ་མ་ཞེས་བྱ་བའི་མིག་གི་དྲི་མ་སྐམ་པོ་འབྱུང་བ་དང་། མཆི་མ་གྲང་ཞིང་
སླ་བ་དང་། ཉུང་ཞིང་འབྱུང་བ་དང་། ན་བ་ལྡང་དུབ་བྱེད་པ་ཅན་དུ་འགྱུར་ཞིང་མི་བརྟན་པ་དང་། མིག་དབྱེ་བ་དང་། འཛུམས་པར་དཀའ་ཞིང་སྡུག་བསྔལ་བ་དང་། གྲོག་མ་ལ་སོགས་པའི་སྲིན་བུ་སྟེང་ན་འགྲོ་བ་སྙམ་དུ་སེམས་པ་དང་། མིག་བུས་པ་ལྟར་རྒྱས་པར་སྣང་བ་
དང་། ཁབ་ཀྱིས་བཙགས་ཤིང་ཟུག་རྔུ་ཕྲ་མོས་ཁྱབ་པ་སྙམ་དུ་བྱེད་པ་དང་། སྣུམ་པ་དང་དྲོ་བས་བདེ་ཞིང་ནད་ཉི་བར་ཞི་བར་གྱུར་པ་ཡིན་ཏེ། ནད་དེ་ནི་རླུང་གིས་མཆི་མ་འཛག་པ་ཞེས་བྱའོ། །དེ་མ་བཙོས་ན་གདུང་བར་འགྱུར། །རྣ་བ་སྒྲ་འབྱུང་མགོ་འཁོར་དང་། །དཔྲལ་བ་
མིག་དང་སྨིན་མ་སོགས། །གཙུབ་ཤིང་གིས་ནི་གཙུབས་སྙམ་བྱེད། །ཅེས་བྱ་བ་ལ། །མཆི་མ་འཛག་པ་ཞེས་བྱ་བའི་ནད་དེ་མ་བཅོས་ཏེ་ཡལ་བར་དོར་ན་མིག་ནད་གདུང་བ་ཞེས་བྱ་བར་འགྱུར་ཏེ། གདུང་བདེ་ནི་རྣ་བ་ནས་སྒྲ་ཟིང་ཟིང་པོར་འབྱུང་བར་འགྱུར་པ་དང་། །མགོ་
เล่ม ๒๐๒ · หน้า 161b
བོ་འཁོར་བ་དང་། དཔྲལ་བ་ལ་སོགས་པ་གཙུབ་ཤིང་གིས་གཙུབས་ཤིང་དཀྲུགས་པ་སྙམ་དུ་སེམས་པར་བྱེད་པ་ཡིན་ནོ། །དེ་ཡང་བག་མེད་ཡལ་བར་བོར། །གདུང་བས་བཅོམ་གྱུར་ནད་དེ་ཡིས། །སྣ་ཚོགས་ཚུལ་ནི་འབྱུང་འགྱུར་ཞིང་། །མིག་མཐོང་ཉམས་བྱེད་རྨ་
འབྱུང་འགྱུར། །ཞེས་བྱ་བ་ལ། །ཡང་གདུང་བ་ཞེས་བྱ་བའི་ནད་དེ་བག་མེད་པས་ཡལ་བར་བོར་ན་མིག་ནད་གདུང་བས་བཅོམ་པ་ཞེས་བྱ་བའི་མིག་ནད་དུ་འགྱུར་ཏེ་གདུང་བས་བཅོམ་པ་ཞེས་བྱ་བའི་ནད་དེས་ནི་མིག་ནད་སྣ་ཚོགས་ཤིང་ཐ་དད་པའི་ཚུལ་དུ་མ་དག་འབྱུང་བར་འགྱུར་
ཞིང་མིག་གི་མཐོང་བ་ཉམས་ཤིང་ལོང་བའི་རྨ་འབྱུང་བར་བྱེད་པར་འགྱུར་རོ། །མུར་འགྲམ་ཁ་དང་འཇིང་པ་ལས། །རླུང་ནི་གཞན་དུ་འཇུག་འགྱུར་ཞིང་། །མི་བཟད་ན་ལ་གནག་པ་དང་། །དམར་ཞིང་སྐྲངས་ལ་མིག་མི་སྡུག །ཞུམ་ཞིང་ཀུན་ནས་མཆི་མ་འཛག །དེ་ནི་
རླུང་གིས་གཞན་གྱུར་ཡིན། །ཞེས་བྱ་བ་ལ། གདུང་བས་བཅོམ་པ་ཞེས་བྱ་བ་དེ་མ་བཅོས་ཏེ་ཡལ་བར་བོར་ན་མུར་འགྲམ་ལ་སོགས་པ་ལས་རླུང་གཞན་དུ་འཇུག་པར་འགྱུར་བ་དང་། དེ་བཞིན་དུ་མི་བཟད་པའི་གནག་པ་ལ་སོགས་པའི་ནད་སྐྱེད་པར་བྱེད་པ་དང་། མིག་
མི་སྡུག་ཅིང་མིག་ཀུན་ནས་ཞུམ་པར་འགྱུར་བ་དང་། ཐམས་ཅད་ནས་མཆི་མ་འཛག་པར་འགྱུར་ཏེ། དེ་ནི་རླུང་གིས་གཞན་དུ་གྱུར་པ་ཞེས་བྱ་བའི་མིག་ནད་ཡིན་ནོ། །དེ་བཞིན་མིག་ནི་ཡོན་པོ་དང་། །ཆུང་བ་རླུང་གིས་ཕྱིན་ཅི་ལོག །ཅེས་བྱ་བ་ལ། སྔ་མ་བཞིན་དུ་
རླུང་གིས་གཞན་དུ་འགྱུར་པ་དང་ནད་ཀྱི་ཚུལ་མཐུན་ཞིང་། གཞན་ཡང་ཡོན་པོ་དང་རང་གི་ཚད་ལས་ཆུང་བར་གྱུར་པ་ནི་རླུང་གིས་ཕྱིན་ཅི་ལོག་ཏུ་གྱུར་པ་ཞེས་བྱའོ། །མཁྲིས་པའི་མཆི་འཛག་མཚན་མ་ནི། །ཚ་གྲང་དུ་བ་འབྱུང་སྙམ་སེམས། །མིག་ཆུའི་ཕྱི་རོལ་གནག་པ་དང་། །
ནང་ན་རྣག་འདྲུལ་མཆི་མ་ཚ། །སེར་ཞིང་མིག་དམར་སེར་པོར་མཐོང་། །རྨ་ལ་ལན་ཚྭས་བཏབ་སྙམ་སེམས། །ཞེས་བྱ་བ་ལ། མཁྲིས་པ་ལས་གྱུར་པའི་མིག་ནད་མཆི་མ་འཛག་པའི་མཚན་ཉིད་ནི་ཚ་བར་གྱུར་བ་དང་། སྐྲངས་པ་དང་། དུ་བ་འབྱུང་བ་སྙམ་དུ་སེམས་པ་
เล่ม ๒๐๒ · หน้า 162a
ལ་སོགས་པ་འབྱུང་བ་དང་། དངོས་པོ་སེར་པོར་མཐོང་བར་འགྱུར་བ་དང་། རྨ་ལ་ལན་ཚྭས་བཏབ་པ་དང་འདྲ་བར་མིག་ན་བར་འགྱུར་པ་ཡིན་ནོ། །མེ་མདག་གཏོར་བ་འདྲ་བ་དང་། །མཆེར་པའི་གོང་བུ་ལྟ་བུར་སྣང་། །མིག་ནང་གདུང་བར་གྱུར་པ་
ཡིན་། །ཞེས་བྱ་བ་ལ། །མཁྲིས་པ་ལས་གྱུར་པའི་མཆི་མ་འཛག་པ་དེ་ཡལ་པར་བོར་ན། མིག་ནད་གདུང་བ་ཞེས་བྱ་བར་འགྱུར་ཏེ། དེ་ནི་མིག་ལམ་མེ་མདག་གཏོར་བ་སྣམ་དུ་སེམས་པ་དང་། མཆེར་བའི་གོང་བུ་ལྟར་གནག་པ་སྣང་བར་འགྱུར་བ་ཡིན་ནོ། །བད་ཀན་
ལས་གྱུར་མཆི་འཛག་ནི། །ཚོར་བ་མེད་སྐྲང་རབ་ཏུ་གཡའ། །གཤེར་ཞིང་སྣུམ་ལ་ཤས་ཆེར་དཀར། །མིག་གདུང་སྤྱི་བག་འཛག་པ་ཡིན། །ཞེས་བྱ་བ་ལ། བད་ཀན་ལས་གྱུར་པའི་མཆི་མ་འཛག་པ་ནི་མིག་ཚོར་བ་མེད་ཅིང་བེམ་བེམ་པོར་གྱུར་པ་དང་། ཤས་ཆེར་
སྐྲངས་པ་དང་། གཡའ་བ་ལ་སོགས་པ་ཡིན་ནོ། །གདུང་བ་དེས་ནི་ནག་པོ་དམའ། །འབྲས་བུ་དཀར་པོ་མཐོ་བ་དང་། །ཆམ་པས་ཐེབས་ཤིང་སྣ་རྒྱས་ལ། །མིག་ནི་རྡུལ་གྱིས་གང་སྙམ་བྱེད། །ཅེས་བྱ་བ་ལ། བད་ཀན་གྱིས་མཆི་མ་འཛག་པ་ནི་མིག་ཚོར་བ་མེད་ཅིང་ཡལ་
བར་བོར་བ་ན། གདུང་བ་ཞེས་བྱ་བར་འགྱུར་ལ། དེས་ནི་མིག་འབྲས་ནག་པོ་དམའ་བར་འགྱུར་པ་དང་། འབྲས་བུ་དཀར་པོ་མཐོ་ཞིང་འབུར་བར་འགྱུར་བ་དང་། དེ་བཞིན་དུ་ཆམ་པས་ཐེབས་པ་ལ་སོགས་པར་འགྱུར་རོ། །ཁྲག་གྱུར་དམར་རིས་མིག་ཏུ་དམར། །མིག་འབྲས་
དཀར་པོ་དམར་བ་དང་། །ཁྲག་འཛག་དམར་པོ་མཐོང་བ་དང་། །མཁྲིས་པའི་མཆི་འཛག་མཚན་ཉིད་ཡིན། །ཞེས་བྱ་བ་ལ། ཁྲག་ལས་གྱུར་པའི་མཆི་མ་འཛག་པར་གྱུར་པ་ནི། མིག་ལ་རི་མོ་དམར་བོ་ཤར་ཤར་པོར་སྣང་བ་ནས། མིག་འབྲས་དཀར་པོ་དམར་པོ་ཉིད་དུ་
སྣང་ཞིང་། དངོས་པོ་དམར་པོ་ཉིད་དུ་སྣང་བ་དང་། དེ་བཞིན་དུ་མཁྲིས་པ་ལས་གྱུར་པའི་མཆི་མ་འཛག་པའི་མཚན་ཉིད་གང་དག་ཡོད་པ་དེ་འདི་ལས་འབྱུང་བར་འགྱུར་རོ། །གདུང་བ་མིག་ནི་མཐའ་དམར་ཞིང་། །ཕྱུང་བ་དང་ནི་མཚུངས་པར་ན། །མེ་ཏོག་བནྡུ་ཀ་ལྟར་དམར། །
เล่ม ๒๐๒ · หน้า 162b
ཤིན་ཏུ་ན་ཞིང་རེག་མི་བཟོད། །ལུང་ཏང་ཁྲག་ཏུ་ནུབ་པ་འདྲ། །གནག་ཅིང་མེ་ལྟར་སྣང་བ་ཡིན། །ཞེས་བྱ་བ་ལ། ཁྲག་ལས་གྱུར་པའི་མཆི་མ་འཛག་པ་དེ་ཡལ་བར་བོར་ན་མིག་ནད་གདུང་བ་ཞེས་བྱ་བར་འགྱུར་ཏེ། དེའི་མཚན་མ་ནི་མིག་གི་མཐའ་མ་གཟགས་པ་ལྟར་དམར་
བར་འགྱུར་བ་དང་། དེ་བཞིན་དུ་མིག་ཕྱུང་བ་དང་མཚུངས་པར་མི་བཟད་བར་ན་པར་འགྱུར་བ་དང་། མེ་ཏོག་བནྡུ་ཀའི་མདོག་ལྟར་མིག་ཤིན་ཏུ་དམར་བ་དང་། ཤིན་ཏུ་ལྷང་ལྷང་པོར་ན་བ་དང་། རེག་མི་བཟོད་པ་དང་། ལུང་ཏང་ཁྲག་གི་ནང་དུ་ནུབ་པ་དང་འདྲ་བའི་མདོག་ཏུ་མིག་
འབྲས་ནག་པོར་སྣང་བར་འགྱུར་བ་དང་། དངོས་པོ་རྣམས་མེ་དང་འདྲ་བར་མཐོང་བ་ཡིན་ནོ། །གདུང་བ་རང་གི་ཇི་བཞིན་དུ། །ཐམས་ཅད་འཛག་པ་ལས་ལྷག་ན། །མུར་འགྲམ་སོ་དང་མཁུར་ཚོས་དང་། །མགོ་བོ་ལྷག་པར་ན་བར་བྱེད། །ཅེས་བྱ་བ་ལ། མིག་ནད་གདུང་
བ་ཞེས་བྱ་བའི་ནད་རླུང་དང་། མཁྲིས་པ་དང་། བད་ཀན་དང་། ཁྲག་ལས་གྱུར་པ་ཐམས་ཅད་ནི། རང་གི་མཚན་ཉིད་ཇི་ལྟ་བ་བཞིན་དུ་ན་པ་ཡིན་ནོ། །རླུང་ལ་སོགས་པ་ལས་གྱུར་པའི་མཆི་མ་འཛག་པ་ཐམས་ཅད་ལས་ལྷག་པར་མི་བཟད་པར་ན་བ་དང་། དེ་བཞིན་དུ་
མུར་འགྲམ་ལ་སོགས་པ་ལྷག་པར་ན་བར་བྱེད་པ་ཡིན་ནོ། །རླུང་མཁྲིས་ཤས་ཆེར་དྲུད་སྙམ་སེམས། །ཟག་ཅིང་ན་ལ་ཕུལ་སྙམ་སེམས། །ཤིན་ཏུ་རྩུབ་ཅིང་མིག་མཆུ་མིག །འཛུམས་དང་འབྱེད་པར་དཀའ་བ་དང་། །ན་ཞིང་སྐམས་པར་གྱུར་པ་དང་། །གྲང་འདོད་
སྨིན་ཅིང་སྐམ་དང་བཅས། །མིག་སྐམ་སྨིན་པ་ཞེས་བྱའོ། །ཞེས་བྱ་བ་ལ། མིག་ལ་རླུང་དང་མཁྲིས་པ་གཉིས་ཀྱི་ཤས་ཆེ་ཞིང་ལྷག་པར་གྱུར་ན་ནི། དྲུད་པ་སྙམ་དུ་སེམས་པ་ལ་སོགས་པ་འབྱུང་བར་འགྱུར་རོ། །ནད་གཞི་གསུམ་ནི་ཁྲག་བཅས་ལ། །སྐྲང་འགྱུར་དེ་
ནི་རབ་སྐྲངས་ཤིང་། །ན་དང་ཚ་དང་འཛག་དང་བཅས། །ཨུ་དུ་མླྭ་རའི་འབྲས་སྨིན་འདྲ། །མིག་འབྲས་དཀར་པོར་འབྱུང་བར་འགྱུར། །མཆི་མ་གྲང་ཞིང་དྲོ་བ་དང་། །སྤྱི་བག་སྐ་སླ་རས་ཀྱིས་འབྱུང་། །ཞེས་བྱ་བ་ལ། རླུང་ལ་སོགས་པའི་ནད་གཞི་གསུམ་པོ་ཁྲག་དང་བཅས་
เล่ม ๒๐๒ · หน้า 163a
པས་ནི་སྐྲངས་པ་དང་བཅས་པ་ཞེས་བྱ་བའི་མིག་ནད་དུ་འགྱུར་ཏེ། དེ་ནི་རབ་ཏུ་སྐྲངས་པ་དང་། ན་བ་ལ་སོགས་པར་འགྱུར་བ་དང་། དེ་བཞིན་དུ་མིག་འབྲས་དཀར་པོར་ཨུ་དུ་མྺཱ་རའི་འབྲས་བུ་སྨིན་པ་དང་འདྲ་བར་འགྱུར་བ་དང་། མཆི་མ་ཕྱེད་འགའ་ནི་གྲང་བར།
མཆི་མ་ཕྱེད་འགའ་ནི་དྲོ་བར་འབྱུང་། །ཕྱེད་འགའ་ནི་སྤྱི་བག་དང་། །ཕྱེད་འགའ་ནི་སྐ་བ་དང་། ཕྱེད་འགའ་ནི་སླ་བ་ལ་སོགས་པར་རེས་ཀྱིས་འབྱུང་བར་འགྱུར་རོ། །སྐྲང་ཆུང་ཅུང་ཟད་སྐྲངས་ཞེས་བྱ། །དེ་བཞིན་མཚན་ཉིད་གཞན་གྱིས་སྨིན། །ཞེས་བྱ་བ་ལ། ཅུང་ཟད་
སྐྲང་པ་ཞེས་བྱ་བའི་མིག་ནད་ནི་སྐྲངས་པ་ཅུང་ཟད་ཙམ་དུ་འགྱུར་བ་དང་། བཤད་མ་ཐག་པའི་མིག་ནད་སྐྲངས་པ་དང་བཅས་པ་ཞེས་བྱ་བ་དང་། མིག་ནད་འདིའི་ཁྱད་པར་ནི་འདི་ཡིན་ཏེ། གང་སྐངས་བ་ཅུང་ཟད་ཆུང་བ་དང་། དེ་བཞིན་དུ་སྔར་བཤད་པའི་མཚན་ཉིད་སྨིན་པ་དང་
ཚ་བ་དང་ན་བ་མེད་བར་གནས་ལ། དེ་བཞིན་དུ་ཨུ་དུ་མྺཱ་རའི་འབྲས་བུ་སྨིན་པ་དང་འདྲ་བ་ལ་སོགས་པ་ཡིན་ནོ། །མིག་སྨིན་པས་ཉེན་སྐྲངས་པ་ཡི། །རྩོམ་ཆེ་མཆི་མ་རྙོག་ཅན་འཛག །བད་ཀན་གྱིས་བསྒོས་མིག་འབྲས་ནི། །དཀར་པོ་དམར་ཞིང་འདྲུལ་བ་དང་། །ཚ་ཞིང་
མཐོང་བ་ཉམས་པ་དང་། །ནད་ནི་མལ་ན་མི་གནས་ཡིན། །ཞེས་བྱ་བ་ལ། མིག་སྨིན་པས་ཉེན་པ་ཞེས་བྱ་བའི་མིག་ནད་ནི་སྐྲངས་པའི་རྩོམ་པ་དང་པོར་ཆེ་བར་འགྱུར་པ་དང་། མཆི་མ་རྙོག་པ་ཅན་འཛག་པ་དང་། བད་ཀན་གྱིས་བསྒོས་ཤིང་བྱུགས་པ་འདྲ་བར་སྣང་བ་
དང་། མིག་གི་འབྲས་བུ་དཀར་པོ་མདོག་དམར་ཞིང་མིག་འཛག་ཅིང་འདྲུལ་བ་དང་ལྡན་པ་དང་། ཚ་བར་འགྱུར་བ་དང་། མཐོང་བ་ཉམས་ཤིང་ལོང་བ་དང་ནད་མལ་ན་མི་གནས་ཤིང་ཀུན་ཏུ་འཕོ་བར་གྱུར་པ་ཡིན་ནོ། །ཁྲག་མཁྲིས་ཤས་ཆེའི་ནད་ཀྱིས་ནི། །ཟས་ཀྱི་དངས་
མ་སྐྱུར་པོར་འགྱུར། །མིག་གི་རྩར་ནི་སོང་ནས་ནི། །མིག་ནི་དམར་པོར་བྱེད་པར་འགྱུར། །སྐྲང་ཚ་སྨིན་ཞིང་མཆི་མ་འཛག །ཤིན་ཏུ་ལོང་ལོང་པོར་མཐོང་ན། །སྐྱུར་གྱིས་སྐྱེད་པའི་ནད་ཅེས་བྱ། །ཞེས་བྱ་བ་ལ། ཁྲག་དང་མཁྲིས་པ་ཤས་ཆེ་བའི་རླུང་ལ་སོགས་པའི་
เล่ม ๒๐๒ · หน้า 163b
ནད་ཀྱིས་ཟས་ཀྱི་བཅུད་དངས་མ་ཞེས་བྱ་བ་སྐྱུར་པོར་གྱུར་ནས། དེ་ཉིད་ཀྱིས་ཁྲག་དང་མཁྲིས་པ་ཤས་ཆེར་བྱས་ལ། ཡང་མིག་གི་རྩར་སོང་བ་དང་། དེས་མིག་དམར་པོར་བྱེད་པར་འགྱུར་ལ། དེ་བཞིན་དུ་སྐྲང་ཞིང་ཚ་བ་ལ་སོགས་པར་འགྱུར་ཏེ། མིག་ནད་འདི་ནི་སྐྱུར་
གྱིས་སྐྱེད་པ་ཞེས་བྱའོ་ཞེས་དྲད་སྲོང་རྣམས་ཀྱིས་བཤད་དོ། །དེ་ལྡར་ཀུན་གཏོགས་ནད་བཅུ་དྲུག །ཅེས་བྱ་བ་ལ། དེ་ལྟར་བཤད་མ་ཐག་པའི་ཚུལ་གྱིས་མིག་ནད་དུ་གཏོགས་པའི་ནད་ནི་བཅུ་དྲུག་ཡོད་དོ། །དེ་ལ་གདུང་བས་བཅོམ་པ་ནི། །མིག་སྨིན་བཅས་པ་སྤང་
བར་བྱ། །ཞེས་བྱ་བ་ལ། མིག་ནད་འདི་དག་གི་ནང་ནས་གདུང་བས་བཅོམ་པ་ཞེས་བྱ་བའི་མིག་ནད་དང་། མིག་སྨིན་པ་ཞེས་བྱ་བའི་ནད་དང་བཅས་པ་ནི། གསོར་མི་རུང་བས་སྤང་བར་བྱའོ། །རླུང་གྱུར་ཞག་ལྔས་མིག་ལ་གནོད་པར་བྱེད། །བད་ཀན་ལས་གྱུར་གདུང་བས་
ཞག་བདུན་གྱིས། །དེ་བཞིན་ཁྲག་གྱུར་ཞག་གསུམ་གྱིས་འཇོམས་བྱེད། །མཁྲིས་གྱུར་འཕྲལ་དུ་ལོག་སྤྱོད་ཀྱིས་གནོད་སྐྱེད། །ཅེས་བྱ་བ་ལ། རླུང་ལས་གྱུར་པའི་མིག་ནད་གདུང་བ་ནི་ལོག་པའི་སྦྱོད་པ་སྟེ། ཁ་ཟས་དང་སྤྱོད་ལམ་ལ་སོགས་པ་མིག་ལ་གནོད་པར་བྱེད་པས་
ཞག་ལྔ་ལ་མིག་ལ་གནོད་ཅིང་ཉམས་པར་བྱེད་དོ། །བད་ཀན་ལས་གྱུར་པའི་གདུང་བ་ནི། སྤྱོད་ལམ་དང་ཁ་ཟས་ལོག་པས་ཞག་བདུན་གྱིས་མིག་ལ་གནོད་ཅིང་འཇོམས་པར་བྱེད་དོ། །ཁྲག་ལས་གྱུར་བའི་མིག་ནད་གདུང་བ་ནི་ཞག་གསུམ་གྱིས་མིག་འཇོམས་ཤིང་གནོད་པར་
བྱེད་དོ། །མཁྲིས་པ་ལས་གྱུར་པའི་མིག་ནད་གདུང་བ་ནི་ཁ་ཟས་དང་སྤྱོད་ལམ་ལ་སོགས་པ་ལོག་པས་འཕྲལ་དུ་གནོད་པ་སྐྱེད་ཅིང་མིག་འཇོམས་པར་བྱེད་དོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་
ངེས་པར་སྦྱར་བ་ལས། །ཕྱི་མའི་གནས་ཀྱི་ལེའུ་བཅོ་ལྔ་པའི་རྣམ་པར་འགྲེལ་པའོ།། །།དེ་ནས་མིག་ནད་ཐམས་ཅད་གསོ་བ་བཤད་པར་བྱའོ། །ཞེས་བྱ་བ་ནི། གོ་རིམས་ཀྱིས་ན་གསོ་བ་འདི་བརྩམས་པ་ཡིན་ནོ། །མཆི་འཛག་སྔར་བྱུང་ཚུལ་ཉིད་ལ། །མཁུར་བཀང་
เล่ม ๒๐๒ · หน้า 164a
སྣོ་སྨན་རྣོན་པོ་གཏང་། །རླུང་འཁྲུགས་མ་གཏོགས་ནད་བཞན་ལ། །སྨྱུང་བ་དག་ཀྱང་བྱ་བ་ཡིན། །ཞེས་བྱ་པ་ལ། མཆི་མ་འཛག་པའི་ནད་ཐམས་ཅད་ཀྱི་སྔར་བྱུང་བའི་ཚུལ་ལ་མཁུར་བ་བཀང་བ་རྣོན་པོ་དང་། སྣ་སྨན་རྣོན་པོ་གཏང་བར་བྱའོ། །དེའི་
རྗེས་ལ་རླུང་འཁྲུགས་པ་ལས་གྱུར་པའི་ནད་མ་གཏོགས་པ་ནད་གཞན་ལ་སྨྱུང་བ་བྱས་པས་གསོ་བར་བྱའོ། །ཚ་དང་དམར་དང་གོས་པ་དང་། །སྐྲང་སོགས་ཞི་ཕྱིར་ཀུན་ལ་ནི། །སུག་སྨེལ་གནྡྷ་བྷ་དྲ་དང་། །ན་ལེ་ཤམ་དང་བཙག་ཡུག་སྣམ། །ལྡེ་གུར་བྱས་པས་བསྐུ་
བར་བྱ། །ཞེས་བྱ་བ་ལ། མཆི་མ་འཛག་པ་ཐམས་ཅད་ཀྱིས་ཚ་བ་དང་། དམར་བ་དང་། ལྗན་ལྗིན་གྱིས་གོས་པ་ལ་སོགས་པ་ཞི་བར་བྱ་བའི་ཕྱིར། སུག་སྨེལ་ལ་སོགས་པའི་སྨན་གྱི་ལྡེ་གུས་མིག་གི་ཕྱི་རོལ་ནས་བསྐུ་བར་བྱ་སྟེ། དེ་ཡང་རྫི་མ་ལ་མི་གནོད་པར་བྱའོ། །
རླུང་གྱུར་རྒྱམ་ཚ་སྐྱེར་ཁཎྜ། །ཤིང་མངར་རྒྱ་སྤོས་ཙནྡན་ནམ། །རྒྱམ་ཚ་དོང་གྲ་སྐྱེར་ཁཎྜ། །མར་གྱི་ཉིང་གུ་བདར་བའམ། །ཡང་ན་སེང་ཕྲོམ་སྦྱར་བ་གཏང་། །ཞེས་བྱ་བ་ལ། དེ་ལ་རླུང་ལས་གྱུར་པའི་མིག་ནད་ལ་ནི་རྒྱམ་ཚ་ལ་སོགས་པའི་སྨན་མར་གྱི་ཉིང་གུ་ཞེས་བྱ་བ་
མར་གྱི་སྟེང་གི་དངས་མ་དང་བཅས་པ་བདར་བའི་ལྡེ་གུས་ཕྱུ་རོལ་ནས་བསྐུ་བར་བྱའོ། །ཡང་ན་སེང་ཕྲོམ་མར་དང་བདར་བའི་ལྡེ་གུས་ཕྱི་རོལ་ནས་བསྐུ་བར་བྱའོ། །ཁྲག་མཁྲིས་གྱུར་ལ་སྤང་སྤོས་དང་། །ཤུག་པ་ཤིང་མངར་ར་མཉེ་བ་། །ཞེས་བྱ་བ་ལ། ཁྲག་དང་མཁྲིས་
པ་ལས་གྱུར་པའི་མིག་ནད་ལ་ནི་སྤང་སྤོས་ལ་སོགས་པའི་ལྡེ་གུས་ཕྱི་རོལ་ནས་བསྐུ་བར་བྱའོ། །བད་ཀན་ལས་གྱུར་པྲི་ཡང་ཀུ། །ལྡོང་རོས་སྦྲང་རྩི་སྦྱར་བ་བསྐུ། །ཞེས་བྱ་བ་ལ། བད་ཀན་ལས་གྱུར་པའི་མིག་ནད་ལ་ནི། གནྡྷ་པྲི་ཡང་ཀུ་ལ་སོགས་པའི་ལྡི་གུས་ཕྱི་རོལ་
ནས་བསྐུ་བར་བྱའོ། །འདུས་པ་ལས་གྱུར་ཀུན་གྱིས་བསྐུ། །ཞེས་བྱ་བ་ལ། ནད་གཞི་གསུམ་ཆར་འདུས་པ་ལ་སོགས་པའི་མིག་ནད་ལ་ནི་རླུང་དང་། མཁྲིས་པ་དང་བད་ཀན་གྱི་སྨན་ཐམས་ཅད་བསྲེས་པའི་མིག་སྨན་གྱི་ལྡེ་གུས་ཕྱི་རོལ་ནས་བསྐུ་བར་བྱའོ། །ན་ལེ་
เล่ม ๒๐๒ · หน้า 164b
ཤམ་ནི་དཀར་པོ་ཆ་གཅིག་དང་། །ལྡོང་རོས་ཆ་བཞི་སེང་ཕྲོམ་ཆ་བཅུ་དྲུག །ཞིབ་ཏུ་བཏགས་ཏེ་རས་གཙང་ཕུར་མས་གཏུམས། །ནད་ལྡང་མེད་ལ་མིག་ཏུ་གདབ་པར་བྱ། །ཞེས་བྱ་བ་ལ། །ན་ལེ་ཤམ་དཀར་པོ་ཆ་གཅིག་ལྡོང་རོས་ཆ་བཞི་སྟེ། དེའི་བཞི་འགྱུར་སེང་ཕྲོམ་
ཆ་བཅུ་དྲུག་སྟེ། དང་པོའི་བཅུ་དྲུག་འགྱུར་ཏེ། དེ་དག་ཐམས་ཅད་ཞིབ་ཏུ་བཏགས་ཏེ། རས་གཙང་མའི་ནང་དུ་ཕུར་མར་གཏུམས་ལ། ནད་ལྡང་བའི་མོད་ལ་མིག་ཏུ་ཕུར་མ་སྤྲུག་ཅིང་གདབ་པར་བྱའོ། །རྒྱ་སྲན་ནག་པོ་བ་ལྕི་རའི་རིལ་ཁུ། །ལེགས་བཙོས་སེན་མོས་ཤུན་པ་
བཤུས་གྱུར་པ། །དེ་ཡིས་མཚན་མོ་ལན་ཅིག་བསྐུས་པ་ཡིས། །མིག་ནད་འཁྲུགས་པ་མོད་ལ་ཞི་བར་བྱེད། །ཅེས་བྱ་བ་ལ། རྒྱ་སྲན་ཀུ་ལདྠ་དགོན་པ་བའི་ལྕི་བ་དང་། རའི་རིལ་མའི་ཁུ་བར་ཚོས་བཙོས་ལ་སེན་མོས་ཤུན་པ་བཤུས་ཏེ་རྒྱ་སྲན་དེའི་ཕྱེ་མ་མཚན་མོའི་དུས་
སུ་ལན་ཅིག་བསྐུས་ཤིང་མིག་ཏུ་བཏབ་ན་མིག་ནས་འཁྲུགས་པ་མོད་ཁོ་ན་ལ་ཞི་བར་བྱེད་དོ། །ཤུ་ཏི་ཤིང་མངར་སྦངས་མ་ཨ་རུ་ར། །ཞིབ་བཏགས་རས་ཀྱི་ཐུམ་པོ་ལྷོད་པར་བཅིངས། །ཟངས་ཀྱི་སྣོད་དུ་སྐྱུར་རྩབས་ནང་དུ་བཅུག །མིག་ཏུ་བཞག་ན་མིག་ནད་སྣ་ཚོགས་
སེལ། །ཞེས་བྱ་བ་ལ། ཤུ་ཏི་ལ་སོགས་པ་ཇི་སྐད་བཤད་པའི་སྦྱོར་བས་འབྲས་ཀྱི་རང་སྐྱུར་རམ་སྐྱུར་ཁུའི་ནང་དུ་བཅུག་པ་དེ་མིག་ཏུ་བཞག་ཅིང་གླན་ན་མིག་ནད་རྣམ་པ་སྣ་ཚོགས་དག་སེལ་ཅིང་འཇོམས་པར་བྱེད་དོ། །སྐྱེར་པ་སྲང་གཅིག་ཆུ་བྲེ་ཕྱེད་དུ་ཡང་། །ཁུ་བ་བརྒྱད་
ཆ་ལུས་པར་སྦྲང་རྩི་བཏབ། །དེ་བཞིན་མིག་ཏུ་བསྐུས་པར་གྱུར་ན་ནི། །ནད་གཞི་ཐམས་ཅད་འཁྲུགས་པའི་མིག་ནད་སེལ། །ཞེས་བྱ་བ་ལ། སྐྱེར་པ་སྲང་གཅིག་ཆུ་སྲང་བཅུ་དྲུག་གི་ནང་དུ་བསྐོལ་ལ་བརྒྱད་ཆ་ལུས་པར་སྦྲང་རྩི་གཏབ་སྟེ། མིག་ཏུ་ཇི་ལྟ་བ་བཞིན་དུ་བསྐུས་
ན་མིག་ནད་སྣ་ཚོགས་པ་ནད་གཞི་སོ་སོ་དང་འདུས་པ་ལས་གྱུར་པ་སེལ་བར་བྱེད། །ཤི་ཀྲུའི་ལོ་མའི་ཁུ་བ་སྦྲང་རྩིར་བཅས། །མིག་ཏུ་བླུགས་ན་རླུང་དང་མཁྲིས་པ་དང་། །བད་ཀན་འདུས་པ་ལས་གྱུར་མིག་ནད་རྣམས། །མིག་ནད་མང་པོ་དག་ཀྱང་མྱུར་དུ་སེལ། །ཞེས་བྱ་
เล่ม ๒๐๒ · หน้า 165a
བ་ལ། ཤི་ཀྲུའི་ལོ་མ་བསྐོལ་བའི་ཁུ་བ་སྦྲང་རྩི་དང་སྦྱར་བའི་མིག་སྨན་གྱིས་ཀྱང་རླུང་ལ་སོགས་པ་ལས་གྱུར་པའི་མིག་ནད་སེལ་ཏོ། །ཨི་རཎྡ་ནི་གཞོན་ནུའི་ལོ་མ་དང་། །རྩ་བ་བརྡུངས་ཏེ་ར་ཡི་འོ་མར་བསྐོལ། །བླུགས་སམ་ཟན་དྲོན་མིག་ཏུ་གླན་པ་
ཡིས། །རླུང་གྱུར་མཆི་འཛག་ནད་ནི་མོད་ལ་འཇོམས། །ཞེས་བྱ་བ་ལ། །ཨེ་རཎྜ་གཞོན་ནུའི་ལོ་མ་དང་རྩ་བ་གཏུན་གྱི་ནང་དུ་བརྡུངས་ཏེ་རའི་འོ་མ་དང་བསྐོལ་ཏེ་ཐིགས་པ་མིག་ཏུ་བླུགས་པ་འམ། དེ་བཞིན་དུ་ཟན་དྲོན་མོ་མིག་ཏུ་གླན་ན། རླུང་ལས་གྱུར་པའི་མཆི་མ་འཛག་
པའི་ནད་གསར་པ་མོད་ལ་འཇོམས་པར་བྱེད་དོ། །རླུང་གྱུར་པ་ལ་བིལ་བ་སོགས། །བསྐོལ་བའི་སྨན་ཐིགས་བླུགས་པའམ། །ཨེ་རཎྜའི་རྩ་བྲི་ཧ་ཏི། །མ་དུ་ཤི་ཀྲུ་དྲོ་འཇམ་བླུགས། །ཞེས་བྱ་བ་ལས། རླུང་ལས་གྱུར་པའི་མིག་ནད་མཆི་མ་འཛག་པ་ལ་ནི་བིའ་བ་ལ་སོགས་པའམ། །
ཨེ་རཎྜའི་རྩ་བ་ལ་སོགས་པ་བསྐོལ་བའི་ཁུ་བ་དྲོ་འཇམ་ཙམ་གྱི་ཐིགས་པའི་རྒྱུན་མིག་ཏུ་བླུགས་ན་ཕན་ནོ། །ཤ་རང་གཥྚ་བ་ལ་ཀ །རྒྱ་སྤོས་ཨུ་དུམྺཱ་རའི་ཤུན། །ཆུ་དང་འོ་མར་བཅས་བསྐོལ་བའི། །ཐིགས་བླུགས་གཟེར་ནི་སེལ་མཆོག་ཡིན། །ཞེས་བྱ་བ་ལ། །ཤ་རང་ག་
ལ་སོགས་པའི་ཤིང་གི་ཤུན་པ་ཆུའི་ནང་དུ་བསྐོལ་བའི་ཐིགས་པ་བླུགས་ན་མིག་གཟེར་ཞིང་ན་བ་སེལ་བའི་མཆོག་དམ་པ་ཡིན་ནོ། །བཙོད་དང་སྐྱེར་པ་རྒྱ་སྐྱེགས་དང་། །རྒུན་འབྲུ་ཨུཏྤལ་ཤིང་མངར་གཉིས། །བསྐོལ་ཏེ་བསྒྲངས་པར་ཁ་ར་གདབ། །མིག་བླུགས་ཁྲག་
མཁྲིས་མིག་ནད་སེལ། །ཞེས་བྱ་བ་ལ། བཙོད་ལ་སོགས་པའི་སྨན་བསྐོལ་བའི་ཁུ་བ་བསྒྲགས་པར་ཁ་ར་བཏབ་པ་གྲང་མོའི་ཐིགས་པ་བླུགས་ན་ཡང་ཁྲག་དང་མཁྲིས་པ་ལས་གྱུར་པའི་མིག་ནད་འཇོམས་སོ། །ཤིང་མངར་ཀ་ཤི་རུའི་ཕྱེ་མ། །རས་མ་འཇམ་པོས་ལྷོད་པར་
བཅིང་། །ཆར་ཆུའི་ནང་དུ་སྦངས་པ་ནི། །ཁྲག་མཁྲིས་ལས་གྱུར་མཆི་འཛག་སེལ། །ཞེས་བྱ་བ་ལ། ཤིང་མངར་ལ་སོགས་པའི་སྨན་གྱི་སྦྱོར་བ་ཇི་སྐད་དུ་བཤད་པ་ལྟར་བྱས་པ་ཡང་ཡོན་ཏན་དེ་དང་འདྲའོ། །ཤིང་མངར་སྐྱེར་པ་སྟག་ཚེར་བ། །ཐུམ་པོ་ནུ་ཞོ་ཁ་རར་བཅས་
เล่ม ๒๐๒ · หน้า 165b
ར་ཡི་འོ་མར་སྦངས་པ་བླུགས། །ཚ་ན་མདོག་དམར་མཆི་འཛག་སེལ། །ཞེས་བྱ་བ་ལ། ཤིང་མངར་ལ་སོགས་པ་རས་གཙང་མའི་ཐུག་བུར་བྱས་ཏེ། བུད་མེད་ཀྱི་ནུ་ཞོ་དང་ཁ་རར་བཅས་པའམ། རའི་འོ་མ་སྦྱར་བའི་ཐིགས་པ་མིག་ཏུ་བླུགས་ན་ཚ་བ་ལ་སོགས་པ་སེལ་བར་བྱེད་
དོ། །སེང་ཕྲོམ་དཀར་པོ་ཤིང་མངར་བཅས། །མར་བརྔོས་ལེགས་པར་བཏགས་པ་ནི། །རས་ལ་གཏུམས་ཏེ་ནུ་ཞོར་མཉེ། །ཁྲག་མཁྲིས་སྣད་པའི་མིག་ནད་སེལ། །ཞེས་བྱ་བ་ལ། སེང་ཕྲོམ་དཀར་པོ་ཤིང་མངར་དང་བཅས་པ་མར་ལ་བརྔོས་པ་ལ་སོགས་པའི་སྦྱོར་བས་མིག་སྨན་དུ་
བཏང་ན་ཁྲག་དང་མཁྲིས་པ་དང་སྣད་པ་ལས་གྱུར་པའི་མིག་ནད་སེལ་ལོ། །དོང་གྲ་ནིམ་པ་འབྲས་བུ་གསུམ། །སེང་ཕྲོམ་བ་ཤ་ཀའེ་ཁུ་བ། །དྲོ་འཇམ་བླུགས་པས་བད་ཀན་སེལ། །ཞེས་བྱ་བ་ལ། དོང་གྲ་ལ་སོགས་པ་བསྐོལ་བའི་ཁུ་བ་དྲོ་འཇམ་ཙམ་གྱི་ཐིགས་པ་བླུགས་ན་ཡང་བད་
ཀན་ལས་གྱུར་པའི་མིག་ནད་སེལ་ཏོ། །འདུས་པར་འདི་དག་བསྲེས་པ་ཕན། །ཞེས་བྱ་བ་ལ། འདུས་པ་ལས་འགྱུར་པའི་མིག་ནད་ལ་ནི། སྨན་འདི་དག་བསྲེས་པ་བསྐོལ་བའི་ཐིགས་པ་བླུགས་ན་ཕན་ནོ། །རླུང་ལ་མར་ནི་རྙིང་པ་དང་། །མཁྲིས་པ་ཁ་རར་བཅས་པ་དང་། །བད་
ཀན་ལ་ནི་ཚ་བ་གསུམ། །བསྐོལ་དང་ཐལ་སྨན་བཅས་པ་བླུད། །དེ་འོག་ཁྲག་ཀྱང་དབྱུང་བ་དང་། །དེ་ནས་སྣམ་གྱུར་བཀྲུ་སྨན་གཏང་། །ཞེས་བྱ་བ་ལ། རླུང་ལས་གྱུར་པའི་མིག་ནད་ལ་ནི། །མར་རྙིང་པ་བཏུང་བར་བྱ་ལ། །མཁྲིས་པ་ལས་གྱུར་པ་ལ་ནི། །མར་རྙིང་པ་དེ་
ཉིད་ཁ་ར་དང་བཅས་པ་བླུད་པར་བྱ་ལ། བད་ཀན་ལས་གྱུར་པ་ལ་ནི་མར་རྙིང་པ་དེ་ཉིད་ཚ་བ་གསུམ་དང་བསྐོལ་ཅིང་། ཐལ་སྨན་གྱི་ཕྱེ་མ་བཏབ་པ་བླུད་ལ། དེའི་རྗེས་ལ་ཁྲག་དབྱུང་ཞིང་གཏར་ག་གདབ་པ་དང་། དེའི་རྗེས་ལ་ཡང་སྣུམ་གྱི་ཆོ་ག་བྱས་ལ་བཀྲུ་སྨན་གཏང་བར་
བྱའོ། །དྲོ་བས་ཚ་སྟེ་གཟེར་བ་ལ། །སྐམ་སའི་སྲོག་ཆགས་ཤ་བཏགས་པས། །མགོ་དང་གདོང་བསྐུ། ཞེས་བྱ་བ་ལ། མིག་དྲོ་ཞིང་ཚ་བས་གཟེར་བར་གྱུར་པ་ལ་ནི། སྐམ་སའི་སྲོག་ཆགས་ཀྱི་ཤ་ཞིབ་ཏུ་བཏགས་པས་མགོ་དང་གདོང་བྱུག་པར་བྱའོ། །ཚ་བ་ལ། འོ་
เล่ม ๒๐๒ · หน้า 166a
མ་མར་བཅས་གྲང་མོས་བསྐུ། །ཞེས་བྱ་བ་ལ། གལ་ཏེ་ཚ་བར་གྱུར་ན། འོ་མ་མར་དང་བཅས་པ་གྲང་མོས་མགོ་བོ་དང་། གདོང་བསྐུ་བར་བྱའོ། །རབ་རིབ་གསོ་བའི་ཆོ་ག་ཡང་། །བརྟགས་ཏེ་ཇི་བཞིན་གསོ་བར་བྱ། །ཞེས་བྱ་བ་ལ། རབ་རིབ་
གསོ་བའི་སྟོབས་ལས་ཀྱང་བརྟགས་ཏེ་དེའི་སྨན་རབ་རིབ་གསོ་བའི་སྐབས་སུ་ཇི་སྐད་བཤད་པ་དག་གཏང་བར་བྱའོ། །ཆོ་ག་འདི་དག་ཐམས་ཅད་ནི། །གདུང་བ་ལ་སོགས་རྣམས་ལའང་ཕན། །ཞེས་བྱ་བ་ལ། སྔར་བཤད་པའི་ཆོ་ག་འདི་དག་ཐམས་ཅད་ནི་
གདུང་བ་ལ་སོགས་པའི་མིག་ནད་ལྷག་མ་རྣམས་ལའང་ཕན་ཞིང་བསྔགས་པ་ཡིན་ནོ། །གདུང་བ་ཡོང་ཡེ་མ་ཞི་ན། །སྨིན་མའི་སྟེང་དུ་མེ་བཙའ་གདབ། །ཅེས་བྱ་བ་ལ། གདུང་བ་ཞེས་བྱ་བའི་མིག་ནད་རྣམ་པ་ཐམས་ཅད་དུ་ཞི་བར་མ་གྱུར་ན་སྨིན་མའི་སྟེང་དུ་ཇི་སྐད་བཤད་
པའི་ཆོ་གས་མེ་བཙའ་གདབ་པར་བྱའོ། །བ་ཞོ་སྣུམ་མེད་ཀྱིས་དངུལ་སྣོད། །བྱུགས་ཏེ་སྔོན་པོར་གྱུར་པ་དང་། །སྐམ་ནས་ཞོ་ག་ཆུ་རི་ལུར། །བྱས་པས་རླུང་གྱུར་མིག་ནད་འཇོམས། །ཞེས་བྱ་བ་ལ། བའི་ཞོ་སྣུམ་མེད་ཅིང་སྤྲིས་མ་བཤུས་པའམ། སྐྱུར་པོས་དངུལ་གྱི་
སྣོད་བྱུགས་ལ་དེ་སྔོན་པོར་གྱུར་ཅིང་སྐོམ་པ་དང་། །བསྡུས་ཏེ་ཞོ་ག་ཆུས་རུ་ལུར་བྱས་པས་བསྐུས་ན་རླུང་ལས་གྱུར་པའི་མིག་ནད་འཇོམས་པར་བྱེད་དོ། །ཛཱ་ཏའི་མེ་ཏོག་ཁ་འབུས་དུང་། །ཤིང་མངར་བ་ལ་འབྲས་བུ་གསུམ། །ཆར་ཆུ་དང་བཏགས་རི་ལུར་བྱས། །ཁྲག་
མཁྲིས་ལས་གྱུར་མིག་ནད་སེལ། །ཞེས་བྱ་བ་ལ། ཛཱ་ཏི་ཞེས་བྱ་བ་སྣ་མའི་མེ་ཏོག་ཁ་འབུས་པ་དང་། དུང་ལ་སོགས་པ་ཇི་སྐད་བཤད་པ་བཞིན་དུ་རི་ལུར་བྱས་པའི་མིག་སྨན་གྱིས་ནི་ཁྲག་མཁྲིས་ལས་གྱུར་པའི་མིག་ནད་སེལ་བར་བྱེད་དོ། །རྒྱམ་ཚ་འབྲས་བུ་ཚ་བ་གསུམ། །རྒྱ་མཚོའི་
ལྦུ་བ་དུང་སྙིང་པོ། །ཨེ་ལ་བ་ལུ་སྲ་རྩི་པོག །རི་ལུས་བད་ཀན་མིག་ནད་སེལ། །ཞེས་བྱ་བ་ལ། རྒྱམ་ཚ་དང་འབྲས་བུ་གསུམ་ལ་སོགས་པའི་མིག་སྨན་གྱིས་བད་ཀན་ལས་གྱུར་པའི་ནད་གང་དག་ཡིན་པ་སེལ་བར་བྱེད་དོ། །ཤིང་མངར་པྲ་པུཎྜ་རཱི་ཀ། །སྐྱེར་པ་སྲང་
เล่ม ๒๐๒ · หน้า 166b
ནི་བརྒྱད་བརྒྱད་དག །ཆུ་བྲེ་བཅུ་དྲུག་ནང་བསྐོལ་བཙགས། །སླར་བསྐོལ་སྐ་བར་གྱུར་པ་ནི། །ར་གན་དུད་པ་སྲང་བཅུ་དང་། །རྣ་ལེ་ཤམ་ཕྱེ་ཞོ་གཉིད་གཞུག །དེ་ལ་རི་ལུའམ་ཕྱེ་མར་བྱས། །བསྐུས་ན་མཆི་འཛག་ཐམས་ཅད་དང་། །དམར་ན་དྲུད་པ་བྱེད་སྙམ་
འཇོམས། །འཕྲལ་དུ་མིག་ནི་གསལ་བར་བྱེད། །སྦྱོར་འདི་ཕྱུགས་བདག་ཅེས་བྱ་སྟེ། །སྨན་པ་རྣམས་ཀྱི་གསང་བ་མཆོག །ཅེས་བྱ་བ་ལ། ཤིང་མངར་སོགས་པ་ཇི་སྐད་བཤད་པ་བཞིན་དུ་བསྐོལ་ལ་བཞི་ཆ་ལུས་པ་དང་བཙགས་ཏེ་ཡར་བསྐོལ་ལ། གཟར་བུ་ལ་
ཆགས་པ་ཙམ་གྱི་བར་དུ་སྐ་བར་གྱུར་པ་དང་། ར་གན་གྱི་དུད་པ་ལ་སོགས་པ་ཇི་སྐད་སྨོས་པ་བཞིན་དུ་བཅུག་སྟེ། དེའི་འོག་ཏུ་རི་ལུར་བྱས་པའམ། ཕྱེ་མར་བྱས་པས་བསྐུས་ན་མཆི་མ་འཛག་པ་ལ་སོགས་པ་འཇོམས་པར་བྱེད་པ་དང་། འཕྲལ་དུ་དེའི་མོད་ལ་མིག་གསལ་ཞིང་
དངས་པར་བྱེད་པ་ཡིན་ཏེ། མིག་སྨན་གྱི་སྦྱོར་བ་འདི་ནི་མིང་ཕྱུགས་བདག་ཅེས་བྱ་སྟེ། ཤིན་ཏུ་གསང་པར་བྱེད་པ་ཡིན་ནོ། །མིག་སྨིན་སྐམ་པ་མར་བླུད་ཅིང་། །འཚོ་བྱེད་ཀྱི་ནི་སྨན་མར་ནི། །བླུད་ཅིང་མིག་ནི་བརྟ་བྱ་དང་། །ཏིལ་མར་ཆུང་ངའི་སྣ་སྨན་གཏང་། །ཞེས་བྱ་བ་ལ། །
མིག་སྨིན་མ་སྐམ་པོའི་ནད་ལ་ནི་མར་བླུད་ན་ཕན་ནོ། །དེ་བཞིན་དུ་འཚོ་བྱེད་ཀྱི་སྡེ་ཚན་དང་བསྐོལ་བའི་སྨན་མར་བླུད་ཅིང་མིག་བརྟ་བ་དང་། དེ་བཞིན་དུ་སྨན་མར་དེ་ཉིད་ཀྱི་སྨན་གཏང་བ་དང་། ཏིལ་མར་གྱི་ཐིགས་པ་ཆུང་ངུའི་སྣ་སྨན་གཏང་བའོ། །འདི་ལ་འོ་མ་རྒྱམ་ཚར་
བཅས། །དྲོ་འཇམ་ཐིགས་པ་བླུགས་པའང་ཕན། །ཞེས་བྱ་བ་ལ། མིག་སྨིན་མ་སྐམ་པོ་འདི་ལ་འོ་མ་ལ་སོགས་པ་ཇི་སྐད་སྨོས་པ་བཞིན་བཏང་ན་ཡང་ཕན་ནོ། །བཅའ་སྒ་བུད་མེད་ནུ་ཞོར་བཏགས། །མར་སྦྱར་མིག་ཏུ་བསྐུས་ན་འང་ཕན། །ཞེས་བྱ་བ་ལ་
ལ། ཡང་ན་དེ་ལ་བཅལ་སྒ་ལ་སོགས་པའི་མིག་སྨན་བསྐུས་ན་ཡང་ཕན་ནོ། །ཡང་ན་རླན་ཅན་ཤ་ཡི་ཞག །དོང་གྲ་རྒྱམ་ཚ་ཅུང་ཟད་བཏབ། །ཅེས་བྱ་བ་ལ། ཡང་ན་རླན་ཅན་གྱི་སྲོག་ཆགས་ཀྱི་ཤའི་ཞག་དོང་གྲ་དང་རྒྱམ་ཚ་ཅུང་ཟད་བསྲེས་པའི་མིག་སྨན་ཡང་
เล่ม ๒๐๒ · หน้า 167a
ཕན་ནོ། །སྐྲ་ནི་མར་བསྐུས་མེ་ལོང་གིས། །མཉེས་ཏེ་ཁམ་ཕོར་ཁ་སྦྱོར་བཅུག །བསྲེགས་ཏེ་ལྕགས་སྣོད་མར་དང་བཅས། །སྣག་ཚ་དེ་ནི་མིག་སྨན་མཆོག །ཅེས་བྱ་བ་ལ། མིའི་སྐྲ་མར་བསྐུ་བ་ལ་སོགས་པའི་སྦྱོར་བ་ཇི་སྐད་སྨོས་པ་བཞིན་དུ་
བྱས་པའི་སྣག་ཚ་ནི་མིག་སྨིན་མ་སྐམ་པོའི་མིག་སྨན་གྱི་མཆོག་ཡིན་ནོ། །སྐྲངས་བཅས་ཅུང་ཟད་སྐྲངས་པ་ལ། །སྣུམ་ཆོས་བྱས་ཏེ་གཏར་ག་གདབ། །སྣུམ་བྱས་རྒུན་འབྲུ་ཨ་རུ་ར། །དུར་བྱིད་མར་བཅས་བཀྲུ་སྨན་བཏང་། །ཞེས་བྱ་བ་ལ། མིག་གི་ནང་སྐྲངས་པ་དང་
བཅས་པ་དང་། ཅུང་ཟད་སྐྲངས་པ་ལ་དང་པོར་སྣུམ་ཆོས་བྱས་ཏེ་དེའི་འོག་ཏུ་གཏར་ག་གདབ་བ་དང་། ཡང་སྣུམ་ཆོས་བྱས་ལ་ཇི་སྐད་སྨོས་པའི་བཀྲུ་སྨན་གཏང་བར་བྱའོ། །སེང་ཕྲོམ་དཀར་པོ་མར་ལ་བརྔོས། །ཕྱི་མར་བྱས་ཏེ་རས་ལ་གཏུམས། །ཆུ་དྲོན་ལ་མཉེས་ཐིགས་པ་
བླུགས། །གཟེར་འཇོམས་པ་ཡི་མཆོག་ཡིན་ནོ། །ཞེས་བྱ་བ་ལ། སེང་ཕྲོམ་ཇི་སྐད་སྨོས་པའི་སྦྱོར་བས་ཐིགས་པ་མིག་ཏུ་བླུགས་ན། མིག་ནད་ཀྱི་གཟིར་འཇོམས་པར་བྱེད་པའི་དམ་པ་ཡིན་ནོ། །སྐྱེར་པ་པྲ་པུཎྜ་རཱི་ཀ །བསྐོལ་བའི་ཐིགས་པ་བླུགས་པས་ཕན། །ཞེས་
བྱ་བ་ལ། ཡང་ན་མིག་གཟེར་བ་ལ་སྐྱེར་པ་འམ། པྲ་པུནྜ་རཱི་ཀ་བསྐོལ་བའི་ཐིགས་པ་མིག་ཏུ་བླུགས་ན་ཕན་ནོ། །མཆི་འཛག་ན་ཞིང་དྲུད་སྙམ་བྱེད། །སྦྱར་སྨན་འདི་དག་གཏང་བར་བྱ། །ཞེས་བྱ་བ་ལ། མཆི་མ་འཛག་པ་ལ་སོགས་པ་ལས་འོག་ནས་སྨོས་པའི་སྦྱར་སྨན་
འདི་དག་ཀྱང་གཏང་བར་བྱའོ། །ལྕགས་ཀྱི་སྣོད་དུ་ཟངས་མ་བ་གཅིན་སྦྱར། །མར་བདུགས་མིག་བསྐུས་གཟེར་ནི་འཇོམས་པར་བྱེད། །ཅེས་བྱ་བ་ལ། ལྕགས་ཀྱི་སྣོད་ཀྱི་ནང་དུ་ཟངས་མ་བ་གཅིན་དང་སྦྱར་ལ་མར་གྱི་དུད་པས་བདུགས་པ་མིག་ཏུ་བསྐུས་ན། མིག་གཟེར་
ཞིང་ན་བ་འཇོམས་པར་བྱེད་དོ། །ཟངས་མའི་སྣོད་དུ་བ་ཞོའི་སྦྲིས་མ་བདར། །རྒྱམ་ཚ་པི་པི་ལིང་དང་བཅས་པ་མཆོག །ཅེས་བྱ་བ་ལ། ཡང་ན་ཟངས་མའི་སྣོས་ཀྱི་ནང་དུ་བའི་ཞོ་དང་བདར་བ་དང་རྒྱམ་ཚ་དང་པི་པི་ལིང་སྦྱར་བའི་མིག་སྨན་ནི་མིག་ན་ཞིང་གཟེར་བ་འཇོམས་
เล่ม ๒๐๒ · หน้า 167b
པར་བྱེད་པའི་མཆོག་ཡིན་ནོ། །ཟངས་མའི་སྣོད་དུ་ནུ་ཞོ་དུང་བདར་ལ། །དོང་གའི་ལོ་མ་མར་བཅས་དུད་པས་བདུག །སྦྱར་སྨན་ཞེས་བྱ་མིག་ཏུ་བསྐུས་ན་ནི། །དྲུད་སྙམ་བྱེད་སོགས་མི་བཟང་ནད་མྱུར་སེལ། །ཞེས་བྱ་བ་ལ། ཟངས་མའི་སྣོད་ཀྱི་ནང་དུ་བུད་མེད་ཀྱི་ནུ་
ཞོ་དང་བདར་ཏེ། དོང་གའི་ལོ་མ་མར་གྱིས་བསྐུས་པས་བདུགས་ལ། མིག་ཏུ་བསྐུས་པའི་སྦྱར་སྨན་ནི་དྲུད་སྙམ་དུ་བྱེད་པ་དང་། ཚ་བ་ལ་སོགས་པའི་མིག་ནད་མི་བཟད་པ་མྱུར་དུ་སེལ་བར་བྱེད་དོ། །ཨུ་དུམ་ཝཱ་རའི་འབྲས་བུ་ནི། །ལྕགས་སྣོད་ནང་དུ་ནུ་ཞོ་བདར། །ཤ་
མའི་ལོ་མ་མར་དུད་བདུགས། །མཆི་འཛག་གཟེར་དམར་དྲུད་པ་འཇོམས། །ཞེས་བྱ་བ་ལ། ཨུ་དུམ་ཝཱ་རའི་འབྲས་བུ་ཇི་སྐད་སྨོས་པ་བཞིན་དུ་བྱས་པའི་མིག་སྨན་ཡང་སྦྱར་སྨན་ཞེས་བྱ་སྟེ། མཆི་མ་འཛག་པ་ལ་སོགས་པ་འཇོམས་པར་བྱེད་དོ། །ཤི་ཀྲུའི་ལོ་མའི་ཁུ་བ་ནི། །
ཟངས་མ་གཉིས་ཀྱི་བར་དུ་བདར། །མར་དུད་བདུགས་པས་སྐྲངས་པ་དང་། །གཡའ་དང་མཆི་འཛག་ནད་རྣམས་འཇོམས། །ཞེས་བྱ་བ་ལ། ཤི་ཀྲུ་ཞེས་བྱ་བ། ན་ལེ་ཤམ་དཀར་པོ་བསྐོལ་བའི་ཁུ་བ་ཟངས་མའི་སྣོད་གཉིས་ཁ་སྦྱར་བའི་ནང་དུ་བདར་ལ། མར་གྱི་དུད་པས་
བདུགས་པ་ཡང་སྦྱར་སྨན་ཞེས་བྱ་སྟེ། སྐྲངས་པ་ལ་སོགས་པའི་ནད་འཇོམས་པར་བྱེད་དོ། །ཏིལ་གྱི་ཆུ་དང་ཁར་བ་ནི། །ཁམ་ཕོར་བདར་ཏེ་ནིམ་པ་ཡི། །འོ་མ་མར་བསྐོལ་དུད་པས་བདུགས། །གཟེར་རམ་མཆི་འཛག་དྲུད་སྙམ་སེམས། །ཞེས་བྱ་བ་ལ། ཏིལ་གྱི་ཆུ་དང་
ཁར་བ་ཁམ་ཕོར་གྱི་ནང་དུ་བདར་ཏེ་ནིམ་པའི་ལོ་མ་མར་གྱིས་བསྐུས་པའི་ནང་དུ་དུད་པས་ལེགས་པར་བདུགས་པའི་མིག་སྨན་ཡང་སྦྱར་སྨན་ཞེས་བྱ་སྟེ། དེས་བསྐུས་ན་གཟེར་བ་ནས་དྲུད་པ་སྙམ་དུ་སེམས་པའི་མིག་ནད་སེལ་ལོ། །སྦྱར་སྨན་གྱིས་ནི་མིག་བསྐྲུས་ཏེ། །སྨན་
ཤུགས་ཟུག་གཟེར་དང་བྲལ་ནས། །བུད་མེད་ནུ་ཞོའི་ཐིགས་པ་བླུགས། །ལན་གསུམ་ཕན་ཆད་དེ་མི་བསྐུ། །ཞེས་བྱ་བ་ལ། སྦྱར་སྨན་ཞེས་བྱ་བའི་སྨན་དེ་དག་གིས་མིག་བསྐུས་ནས། །སྨན་གྱིས་བསྐྱེད་པའི་ཟུག་གཟེར་གྱི་རྩོམ་པ་ཞི་ཞིང་བྲལ་བར་འགྱུར་བ་དང་། དེའི་
เล่ม ๒๐๒ · หน้า 168a
འོག་ཏུ་བུད་མེད་ཀྱི་ནུ་ཞོའི་ཐིགས་བའི་རྒྱུན་བླུགས་པར་བྱས་ལ། སྦྱར་སྨན་དེ་དག་གིས་ལན་གསུམ་ཕན་ཆད་ནི་མིག་བསྐུ་བར་མི་བྱའོ། །བལ་བུའི་ལོ་མ་པི་པི་ལིང་། །རྒྱ་སྤོས་ལྕགས་ཕྱེ་སྟང་ཟིལ་དང་། །ཛཱ་ཏི་ཁ་འབུས་ནག་ཆུར་དང་། །
རྒྱམ་ཚ་བ་གཅིན་བཏགས་པ་ཡི། །ལྡེ་གུས་ཟངས་ཀྱི་སྣོད་བསྐུས་ལ། །ཞག་བདུན་བཞག་སྟེ་བ་གཅིན་དང་། །བཏགས་ཏེ་རི་ལུར་བྱས་ནས་ནི། །དེ་འོག་གྲིབ་མ་ལ་བསྐམས་ཏེ། །བུད་མེད་ནུ་ཞོ་དང་བདར་བསྐུ། །དྲུད་སྙམ་བྱེད་དང་མཆི་མ་འཛག །སྐྲང་དང་
གཡའ་བ་སེལ་བར་བྱེད། །ཅེས་བྱ་བ་ལ། བལ་བུའི་ལོ་མ་ལ་སོགས་པའི་སྨན་བ་གཅིན་དང་བཏགས་པས་ཟངས་ཀྱི་སྣོད་ལ་བསྐུས་ལ། ཞག་བདུན་གྱི་པར་དུ་བཞག་སྟེ། བཀོག་ལ་དེའི་འོག་ཏུ་བ་འམ་རེའི་གཅིན་དང་བཏགས་ཏེ་རི་ལུར་བྱས་ལ་གྲིབ་མ་ལ་
བསྐམས་ཏེ། རི་ལུ་དེ་བུད་མེད་ཀྱི་ནུ་ཞོ་དང་བདར་ཏེ། མིག་ཏུ་བསྐུས་ན་མིག་ནད་དྲུད་པ་སྙམ་དུ་སེམས་པ་ལ་སོགས་པ་སེལ་བར་བྱེད་དོ། །ཀཎྜཀ་རེའི་ཤུན་པ་དང་། །ཤིང་མངར་ཟངས་མའི་བྱེ་མ་ནི། །ང་ཡི་འོ་མས་ལྡེ་གུར་བྱས། །ཤ་མི་སྐྱུ་རུ་རའི་ལོ་
མ། །མར་གྱིས་བསྐུས་པའི་དུད་པས་བདུགས། །བསྐུས་ན་སྐྲངས་དང་གཟེར་ནད་སེལ། །ཞེས་བྱ་བ་ལ། ཀཎྜཀ་རེའི་ཤུན་པ་ལ་སོགས་པ་ཇི་སྐད་སྨོས་པ་བཞིན་དུ་ལྡེ་གུར་བྱས་པ་ལ་ཤ་མི་དང་སྐྱུ་རུ་རའི་ལོ་མ་མར་གྱིས་བསྐུས་པའི་དུད་པས་བདུགས་ཏེ་བསྐུས་ན་
སྐྲངས་པ་ལ་སོགས་པའི་ནད་སེལ་བར་བྱེད་དོ། །སྐྱུར་གྱིས་བསྐྱེད་ལ་མཁྲིས་པ་ཡི། །མཆི་མ་འཛག་པའི་ཆོ་གས་གསོ། །ཞེས་བྱ་བ་ལ། སྐྱུར་གྱིས་བསྐྱེད་པ་ཞེས་བྱ་བའི་མིག་ནད་ལ་ནི་མཁྲིས་བའི་མཆི་མ་འཛག་པའི་ཆོ་ག་ཇི་སྐད་སྨོས་པས་གསོ་བར་བྱའོ། །
བད་ཀན་ཁྲག་མཁྲིས་ཀྱིས་བསྐྱེད་དང་། །འདུས་པས་བསྐྱེད་དང་སྒྲ་ངན་དང་། །རྫི་མ་འགགས་དང་མིག་སྨིན་སྐམ། །རྣག་གི་ཆུ་སེང་པདྨའི་རྩ། །མིག་མཆུའི་ཤ་དང་སྐྱུར་སྐྱེད་ཅུང་། །མཆི་འཛག་གདུང་བ་རླུང་མ་གཏོགས། །བཅོ་བརྒྱད་པོ་དག་ཆག་པར་བཤད། །
เล่ม ๒๐๒ · หน้า 168b
ཡུན་རིང་དུ་ནི་ན་བ་ཡིན། །ཞེས་བྱ་བ་ལ། །བད་ཀན་གྱིས་བསྐྱེད་པ་དང་། ཁྲག་གིས་བསྐྱེད་པ་དང་། མཁྲིས་པས་བསྐྱེད་པ་དང་། འདུས་པས་བསྐྱེད་པ་དང་། སྒྲ་ངན་དང་། རྫི་མ་འགགས་པ་དང་། མིག་སྨིན་མ་སྐམ་པོ་དང་། རྣག་གི་ཆུ་སེར་ཅན་དང་། པདྨའི་
རྩ་བ་དང་། མིག་མཆུའི་ཤ་དང་། སྐྱུར་གྱིས་བསྐྱེད་པ་དང་། ཅུང་ཟད་སྐྲངས་པ་དང་། མཁྲིས་པའི་མཆི་མ་འཛག་པ་དང་། ཁྲག་གི་མཆི་མ་འཛག་པ་དང་། བད་ཀན་གྱི་མཆི་མ་འཛག་པ་དང་། མཁྲིས་པའི་མིག་ནད་གདུང་བ་དང་། ཁྲག་གིས་གདུང་བ་དང་། །
བད་ཀན་གྱིས་གདུང་བ་སྟེ། དེ་ལྟར་མིག་ནད་བཅོ་བརྒྱད་པོ་དག་ནི་ཡུན་རིང་དུ་ན་ཞིང་གནས་པར་བྱེད་པ་ཡིན་ཞིང་། ཐམས་ཅད་ཀྱང་མིག་ཚག་པར་བཤད་པ་ཡིན་ནོ། །འདི་དག་གསོ་བ་སོ་སོ་ཡི། །ལེའུའི་ནང་དུ་བཤད་པ་ཡིན། །དེའི་འོག་མིག་ཚག་སྤྱི་ཡི་བཤད། །
ཅེས་བྱ་བ་ལ། མིག་ཚག་པ་འདི་དག་གི་གསོ་བ་གང་དག་ཡིན་པ་དེ་སོ་སོའི་ལེའུའི་ནང་དུ་བཤད་ཅིང་བསྟན་པ་ཡིན་ཞིང་། རང་རང་གི་གང་དག་བཤད་པ་ཡིན་ལ། དེ་ལས་གཞན་ཡང་མིག་ཚག་པ་ཡུན་རིང་དུ་རྗེས་སུ་འབྲེལ་ཅིང་ན་བའི་ཐུན་མོང་གི་སྦྱིའི་གསོ་བ་ད་ལྟར་འདིར་སྟོན་
ཅིང་འཆད་པ་ཡིན་ནོ། །དེ་ནས་མིག་ཚག་ནད་པ་ནི། །སྣུམ་ཆོས་སློན་ནི་བྱས་ནས་ཀྱང་། །གཏར་ག་གདབ་ཅིང་ཁྲིག་དབྱུང་བྱ། །བཀྲུ་སྨན་བཏང་ཞིང་མིག་ཆུ་ནི། །དག་པར་གྱུར་གྱི་བར་དུ་བཞར། །ཞེས་བྱ་བ་ལ། དེ་ནས་དེའི་འོག་ཏུ་མིག་ཚག་པར་གྱུར་པ་དག །དང་
པོར་སྣུམ་ཆོས་བྱས་ལ་སྐྱུག་སྨན་གཏང་ཞིང་སློན་དུ་བཅུག་སྟེ། གཏར་ག་གདབ་པ་དང་། དེའི་འོག་ཏུ་སྣུམ་ཆོས་ཏེ་བཀྲུ་སྨན་བཏང་ལ། དེའི་འོག་མིག་གི་ཆུ་དག་ཅིང་ནད་མེད་པར་གྱུར་གྱི་བར་དུ་བཞར་ཞིང་ཞལ་ཞལ་གདབ་པའི་སྤྱད་ཀྱིས་བསལ་བར་བྱའོ། །སྤངས་མ་
སྲང་གཅིག་ན་ལེ་ཤམ། །དཀར་པོ་སྲང་ནི་ཉི་ཤུ་དང་། །སྐྱུར་རྩབས་སྲང་ནི་སུམ་ཅུ་དག །བཏགས་ཏེ་ཟངས་མའི་སྣོད་དུ་གཞུག །ལོ་མང་ལོན་པའི་མིག་ཚག་པའམ། །ཆུ་སེར་འཛག་སོགས་ཞི་བར་བྱེད། །གོས་དང་ཚ་དང་མཆི་མ་འཛག །གཡའ་སྐྲངས་དེ་བླུགས་
เล่ม ๒๐๒ · หน้า 169a
པ་ཡིས་སེལ། །ཞེས་བྱ་བ་ལ། །སྦངས་མ་སྲང་གཅིག་ལ་སོགས་པ་ཇི་སྐད་སྨོས་པ་བཞིན་དུ་བཏགས་ཏེ་ཟངས་མའི་སྣོད་དུ་བཅུག་ལ་དེའི་ཐིགས་པ་བླུགས་ན་ལོ་མང་དུ་ལོན་པའི་མིག་ཚག་པའམ་ཆུ་སེར་འཛག་པ་ལ་སོགས་པ་ཞི་བར་བྱེད་དོ། །
དེ་བཞིན་དུ་གོས་པ་ལ་སོགས་པའི་མིག་ནད་ཀྱང་དེ་བླུགས་པས་སེལ་བར་བྱེད་དོ། །བྱེའུ་རུག་ཀ་རཉྫའི་ས་བོན། །ཛཱ་ཏིའི་མེ་ཏོག་ཁ་འབུས་བ། །བརྡུངས་ཏེ་བསྐོལ་ལ་བཙགས་ནས་ནི། །ཁུ་བར་བྱས་པ་དེ་དང་ནི། །སྟང་ཟིལ་དང་སྦྱར་མིག་སྨན་ནི། །མིག་ཚག་གཡའ་
དང་ཆུ་སེར་འཛག །གཡའ་ཞིང་འདྲུལ་བ་སེལ་མཆོག་ཡིན། །ཞེས་བྱ་བ་ལ། བྱེའུ་རུག་པ་ལ་སོགས་པ་གཏུན་ལ་བརྡུངས་ཏེ་བསྐོལ་ལ། །རས་གཙང་མས་བཙགས་པའི་ཁུ་བ་དང་། སྟང་ཟིལ་སྦྱར་བའི་མིག་སྨན་གྱིས་ནི་མིག་ཚ་བ་ལ་སོགས་པ་སེལ་བར་བྱེད་དོ། །སྐྱེར་
པའི་ཁཎྜ་སྲ་རྩི་ཕོག །རག་ནང་དུད་པ་ལྡོང་རོས་དང་། །རྒྱམ་ཚོའི་ལྦུ་བ་རྒྱམ་ཚ་དང་། །ན་ལེ་ཤམ་དང་བཙག་ཡུག་སྣམ། །སྦྲང་རྩི་བཏགས་པས་མིག་སྨན་ནི། །མིག་ཚག་འདྲུལ་གཡའ་སེལ་བར་བྱེད། །ཅེས་བྱ་བ་ལ། སྐྱེར་པའི་ཁཎྜ་ལ་སོགས་པ་སྦྲང་རྩི་དང་ཞིབ་ཏུ་བཏགས་
པའི་མིག་སྨན་ནི་མིག་ཚག་པ་དང་། འདྲུལ་པ་ལ་སོགས་པ་སེལ་བར་བྱེད་པ་ཡིན་ནོ། །རྒྱ་སྤོས་ཨ་རུ་རའི་ཁུ་བར། །དངུལ་རྡོ་བཏགས་པས་མིག་ཚག་སེལ། །ཞེས་བྱ་བ་ལ། རྒྱ་སྤོས་དང་ཨུ་རུ་ར་བསྐོལ་བའི་ཁུ་བ་དང་། དངུལ་རྡོ་བཏགས་པའི་མིག་སྨན་གྱིས་ཀྱང་
མིག་ཚག་པ་སེལ་བར་བྱེད་དོ། །ཐང་ཤིང་སྣུམ་དང་བཅས་པ་ནི། །ར་གཅིན་ནང་དུ་སྦངས་པའང་ཕན། །ཞེས་བྱ་བ་ལ། ཐང་ཤིང་སྣུམ་དང་བཅས་པ་ར་གཅིན་གྱི་ནང་དུ་སྦངས་པའི་མིག་སྨན་ཡང་མིག་ཚག་པ་ལ་ཕན་ནོ། །རྒྱམ་ཚ་འབྲས་གསུམ་པི་པི་ལིང་། །དུང་གི་སྙིང་
པོ་པུ་ཙེ་ཤེལ། །ཟངས་མའི་བྱེ་མ་བཅས་རི་ལུ། །མིག་ཚག་ལིང་ཏོག་སེལ་བར་བྱེད། །ཅེས་བྱ་བ་ལ། རྒྱམ་ཚ་དང་འབྲས་བུ་གསུམ་ལ་སོགས་པ་ཟངས་མའི་ཕྱེ་མ་དང་བཅས་པ་རི་ལུར་བྱས་པས་ཀྱང་མིག་ཚག་པ་དང་། ལིང་ཏོག་སེལ་ཅིང་འཇིག་པར་བྱེད་དོ། །
เล่ม ๒๐๒ · หน้า 169b
ཡང་ན་ནག་ཚུར་ཕྱེ་མ་ནི། །བྱེའུ་རུག་པའི་ཁུ་བར་སྦངས། །ཟངས་མའི་སྣོད་དུ་ཞག་བཅུ་བཞག །དེ་ཡིས་མིག་ཚག་ཆུ་སེར་འཛག །རྫི་མ་འབྱི་བ་སེལ་བར་བྱེད། །ཅེས་བྱ་བ་ལ། ནག་ཚུར་གྱི་ཕྱེ་མ་བྱེའུ་རུག་པ་བསྐོལ་བའི་ཁུ་བར་སྦངས་པ་ཟངས་མའི་སྣོད་ཀྱི་ནང་
དུ་ཞག་བཅུའི་བར་དུ་བཞག་པའི་མིག་སྨན་དེས་ནི་མིག་དེས་ནི་མིག་ཚག་པ་ལ་སོགས་པ་སེལ་བར་བྱེད་དོ། །ལྡོང་རོས་དང་ནི་སྐྱེར་པའི་ཁཎྜ་དང་། །དེ་མཉམ་ཟངས་མའི་ཕྱེ་མ་ཞིབ་ཏུ་ཏགས། །ཕྱེ་མ་མིག་སྨན་ཐུར་མ་གཅིག་གིས་ཀྱང་། །རྫི་མ་སྐྱེད་ཅིང་མིག་ཚག་འདིས་སེལ་བྱེད། །
ཅེས་བྱ་བ་ལ། ལྡོང་རོས་དང་སྐྱེར་པའི་ཁཎྜ་ཆ་མཉམ་དུ་བྱས་ལ་དེ་གཉིས་ཇི་ཙམ་དུ་ཡོད་པ་དང་། ཟངས་མའི་ཕྱེ་མ་མཉམ་དུ་བྱས་པ་ཞིབ་ཏུ་བཏགས་ཏེ་ཕྱེ་མའི་མིག་སྨན་འདིས་བསྐུས་ན་མིག་སྨན་གྱི་ཐུར་མ་གཅིག་གིས་ཀྱང་མིག་ཚག་པའི་བ་སྤུ་སྐྱེད་ཅིང་སེལ་བར་བྱེད་
པ་ཡིན་ནོ། །རྒྱ་སྐྱེགས་བྲིང་ག་སྐྱེར་པ་ནི་རྒུན་ཏི། །ཁུ་བར་རས་ཀྱི་དུམ་བུ་ལན་བདུན་སྦངས། །སྡོང་བུ་མར་མེ་དེ་བུས་ལས་བྱུང་བའི། །སྣག་ཚ་མིག་ཚག་སེལ་པར་བྱེད་མཆོག་ཡིན། །ཞེས་བྱ་བ་ལ། རྒྱ་སྐྱེགས་ལ་སོགས་བའི་ཁུ་བར་རས་ཀྱི་དུམ་བུ་དྲི་མ་མེད་པ་བཟང་
པོ་ལན་བདུན་གྱི་བར་དུ་སྦངས་ལ། དེའི་སྡོང་བུ་མར་དང་བཅས་པར་སྦྱར་བ་ལས་བྱུང་བའི་སྣག་ཚས་ཀྱང་མིག་ཚག་པ་སེལ་བར་བྱེད་པ་ཡིན་ནོ། །མིག་མཆུ་མང་དུ་ཞལ་ཞལ་བྱ། །དེ་བཞིན་གཏར་ག་བྱ་བ་དང་། །བཀྲུ་སྨན་ཡང་ཡང་བྱ་བ་ནི། །མིག་ཚག་ཅན་གྱི་ནད་
པས་བསྟན། །ཞེས་བྱ་བ་ལ། མིག་ཚག་པའི་ནད་པས་ནི་མིག་མཆུ་ཞལ་ཞལ་བྱ་བ་ལ་སོགས་པ་ལན་མང་དུ་བསྟེན་པར་བྱའོ། །རྣག་གི་ཆུ་འཛག་མ་ཞིའི་མཐར། །ཐུར་མ་ཕྲ་མོས་བསྲེག་པར་བྱ། །ཞེས་བྱ་བ་ལ། རྣག་གི་ཆུ་སེར་འཛག་པ་ཞི་བར་མ་གྱུར་ན། དེའི་ཐམས་
ཐུར་མ་ཕྲ་མོས་བསྲེག་པར་བྱའོ། །དེ་ལྟར་མིག་ནད་དགུ་བཅུ་བཞི། །ནད་གཞི་མཚན་ཉིད་གསོ་བ་དག །ཕན་ཚུན་འདྲེས་པ་མེད་པར་ནི། །མ་ལུས་པར་ནི་བཤད་པར་ཡིན། །ཞེས་བྱ་བ་ལ། ཚུལ་དེ་ལྟར་ན་མིག་ནད་ཀྱི་རྒྱུ་དང་། མཚན་ཉིད་དང་། གསོ་བའི་ཚུལ་གྱིས་
เล่ม ๒๐๒ · หน้า 170a
ནད་དགུ་བཅུ་རྩ་བཞིར་བཤད་པ་ཡིན་ལ། དེ་དག་ཀྱང་ཕན་ཚུན་འདྲེས་ཤིང་འདོམ་པ་མེད་པའི་ཚུལ་གྱིས་མ་ལུས་པར་བཤད་པ་ཡིན་ནོ། །སྐྱེས་བུ་ནད་མེད་པ་ཡིས་ཀྱང་། །ནས་དང་གྲོ་རྙིང་དྲུག་ཅུ་བ། །སཱ་ལུ་ཁྲེ་རྒོད་རྙིང་པ་དང་། །མུངྒ་ལ་
སོགས་པད་མཁྲིས་འཇོམས། །ཞུན་མར་མང་དུ་བཏབ་པ་དང་། །ཚོད་མ་དེ་འདྲ་སྐམ་ས་ཡི། །ཤ་དང་སེའུ་འབྲུ་ཁ་ར་དཀར། །བསྟེན་ཞིང་ཆར་ཆུ་བཏུང་བ་དང་། །གདུགས་ཅིང་ལྷྭམ་ནི་བགོ་བ་དང་། །ཆོ་ག་བཞིན་དུ་ནད་སྦྱངས་པ། །རྣམ་པ་ཀུན་ཏུ་བསྟེན་པར་བྱ། །
ཞེས་བྱ་བ་ལ། སྐྱེད་བུ་ནད་མེད་པ་དག་གིས་ཀྱང་མིག་ལ་གནོད་པ་མེད་ཅིང་ཕན་པར་འདོད་ན་ནས་རྙིང་པ་ལ་སོགས་པ་རྣམ་པ་ཐམས་ཅད་དུ་བསྟེན་པར་བྱ་བ་དང་། དེ་བཞིན་དུ་སྲན་མུ་དྒ་ལ་སོགས་པ་བད་ཀན་དང་མཁྲིས་པ་འཇོམས་པའི་ཁ་ཟས་མར་མང་དུ་བཏབ་པ་དང་།
ཚོད་མ་དང་བད་ཀན་དང་མཁྲིས་པ་སེལ་བའི་མར་མང་དུ་བཏབ་པ་བསྟེན་པ་དང་། །སྐམ་སའི་ཤ་དང་། སེའུ་འབྲུ་ལ་སོགས་པ་ནས། ལྷྭམ་བགོ་པའི་བར་ཆོ་ག་ཇི་ལྟ་བ་བཞིན་དུ་རྣམ་པ་ཐམས་ཅད་དུ་བསྟེན་པར་བྱའོ། །ཤུགས་བཀག་པ་དང་མ་ཞུར་ཟ། །ཕྱེད་ཞུ་ཟ་
དང་རྟུག་འགག་ཟ། །ཚ་དང་ཕྱི་ས་འགག་བྱེད་པའི། །ཟས་དང་སྦྱོད་ལམ་སྨན་ཀུན་སྤང་། །ཞེས་བྱ་བ་ལ། ནད་མེད་པའི་མིས་ཀྱང་། མིག་ལ་ཕན་པར་འདོད་ན། ཤུགས་བཀག་པ་ལ་སོགས་པ་དང་། །ཕྱི་ས་འགག་པར་བྱེད་པའི་ཟས་ལ་
སོགས་པ་རྣམ་པ་ཐམས་ཅད་དུ་སྤང་བར་བྱའོ། །རྐང་པ་གཉིས་ཀྱི་དབུས་ན་རྩ་སྦོམ་པོ། །གཉིས་གནས་དེ་ཡིས་མིག་ནི་ནང་དུ་ཁྱབ། །དེ་བསྐུས་བྱུག་དང་དྲིལ་བ་ལ་སོགས་པ། །རྐང་པར་བྱས་ན་མིག་ཏུ་འགྲོ་བར་འགྱུར། །ཞེས་བྱ་བ་ལ། རྐང་པ་གཉིས་ཀྱི་དབུས་ན་
རྩ་སྦོམ་པོ་གཉིས་གནས་ལ་དེས་ཀྱང་མིག་ནང་དུ་ཁྱབ་པས་ན་རྩ་དེ་ལ་བསྐུ་བ་ལ་སོགས་པ་བྱས་ན་མིག་ཏུ་འགྲོ་བར་འགྱུར་ཞིང་ཕན་པར་འགྱུར་བ་ཡིན་ནོ། །དྲི་མ་ཚ་དང་སྣད་པ་ལ་སོགས་པས། །དེ་གནོད་གྱུར་ན་མིག་ལ་གནོད་པར་འགྱུར། །དེ་བས་མིག་ལ་ཕན་འདོད་ལྷྭམ་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด