ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ
ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๐๒ · หน้า 170b
དང་ནི། །བསྐུ་དང་དྲིལ་དང་བྱུག་པ་སོགས་སྟེན་བྱ། །ཞེས་བྱ་བ་ལ། རྩ་དེ་དྲི་མ་ལ་སོགས་བས་གནོད་པར་གྱུར་ན། མིག་ལ་གནོད་པར་འགྱུར་ལ། དེ་བས་ན་མིག་ལ་ཕན་པར་འདོད་པས་རྟག་པར་དུས་ཐམས་ཅད་དུ་ལྷྭམ་བགོ་བ་དང་། སྣུམ་གྱིས་བསྐུ་བ་དང་། བག་
ཟན་ལ་སོགས་པས་དྲིལ་བ་དང་། སྨན་གྱི་ལྡེ་གུས་བྱུག་པ་དང་། བསྐུ་བ་ལ་སོགས་པ་རྣམ་པ་ཐམས་ཅད་དུ་བསྟེན་པར་བྱའོ། །ཡན་ལག་བརྒྱ་པའི་སྙིང་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་
གནས་ཀྱི་ལེའུ་བཅུ་དྲུག་པའི་རྣམ་པར་འགྲེལ་པའོ།། །།དེ་ནས་རྣ་བའི་ནད་ཀྱི་དམིགས་ཤིས་པ་བཤད་པར་བྱའོ། །ཞེས་བྱ་བ་ལ། མིག་ནད་ཀྱི་ངེས་པ་བཤད་ནས་རྣ་བའི་ནད་ཀྱི་གཞི་ལ་སོགས་པ་བཤད་པར་བྱ་བའི་ཕྱིར་ལེའུ་འདི་བརྩམས་པ་ཡིན་ནོ། །ཆམ་པས་
བཏབ་དང་ཆུ་ལ་རྩེ། །རྣ་བ་བྲུད་པས་རླུང་འཁྲུགས་ཤིང་། །སྒྲ་ཡི་ལོག་པའི་སྦྱོར་བ་དང་། །ལྡང་བའི་རྒྱུ་གཞན་གྱིས་འཁྲུགས་ནས། །རྣ་བའི་རྩར་ནི་རླུང་ཞུགས་ཏེ། །རྣ་བའི་བུ་གར་ཤུགས་དྲག་གཟེར། །གཞོགས་ཕྱེད་ན་ཞིག་རེངས་པ་དང་། །གྲང་བ་དག་ནི་མི་འཕྲོད་ཅིང་། །
རིང་ནས་རྣགས་ཤིང་སྨིན་ནས་ཀྱང་། །ཆུ་སེར་ཅུང་ཟད་འཛག་པར་བྱེད། །རྒྱུ་མེད་རྣ་བ་སྟོང་སྙམ་སེམས། །ཞུམ་དང་རྒྱས་བ་སྙམ་དུ་བྱིད། །ཅེས་བྱ་བ་ལ། ཆམ་པ་ལ་སོགས་པ་དང་སྒྲ་ཡིད་དུ་མི་འོང་བ་ལོག་པའི་སྦྱོར་བ་ཐོས་པ་དང་རླུང་འཁྲུགས་པའི་རྒྱུ་ཟས་དང་སྦྱོད་ལམ་གཞན་
དག་གིས་ཀྱང་རླུང་འཁྲུགས་པར་གྱུར་ཅིང་། རྣ་བའི་རྩར་ཞུགས་ཏེ་རྣ་བའི་བུ་གར་ཤུགས་དྲག་ཏུ་གཟེར་བར་བྱེད་པ་དང་། དེ་བཞིན་དུ་མགོ་བོའི་གཞོགས་ཕྱེད་ན་བ་དང་། རེངས་ཤིང་འགྱུར་མི་ཤེས་པ་དང་། གྲང་བ་ལ་མངོན་པར་མི་དགའ་བ་དང་། ཡུན་རིང་ཞིག་ན་སྨིན་
ཅིང་རྣགས་པ་དང་། །རྣ་བའི་ནད་དེ་སྨིན་ནས་ཀྱང་། ཆུ་སེར་ཅུང་ཟད་འཛག་པར་གྱུར་པ་དང་། རྒྱུ་མེད་ཅིང་གཞི་མེད་པར་རྣ་བ་སྟོང་པ་སྙམ་དུ་སེམས་པ་དང་། ཐང་འགའ་ནི་ཞུམ་ཐང་འགའ་ནི་རྒྱས་པ་སྙམ་དུ་བྱེད་པ་ཡིན་ནོ། །མཁྲིས་གྱུར་ཚ་བཅས་ན་ཞིང་གཟེར། །གྲང་
เล่ม ๒๐๒ · หน้า 171a
འདོད་སྐྲང་ཞིང་རིམ་གྱིས་འདེབས། །མྱུར་དུ་སྨིན་ཞིང་སྨིན་ནས་ཀྱང་། །ཆུ་སེར་སེར་པོར་འཛག་པར་བྱེད། །ཆུ་སེར་དེས་ནི་གང་གང་དུ། །རེག་པ་དེ་དང་དེར་རྣགས་འགྱུར། །ཞེས་བྱ་བ་ལ། མཁྲིས་པ་རང་གི་རྒྱུས་འཁྲུགས་པར་གྱུར་པ་ལས་རྣ་
བའི་བུ་ག་ཚ་པ་ལ་སོགས་པ་དང་ལྡན་པ་དང་། དེ་མྱུར་དུ་སྨིན་ཅིང་རྣགས་པ་དང་། སྨིན་ནས་ཆུ་སེར་སེར་པོར་འཛག་པར་བྱེད་པ་དང་། ཆུ་སེར་དེ་གནས་གང་དང་གང་དུ་རེག་པ་དེ་དང་དེར་རྣམས་ཤིང་འདྲུལ་བར་འགྱུར་རོ། །བད་ཀན་ལས་གྱུར་མགོ་འགྲམ་པ། །མགྲིན་པ་ལྕི་ཞིང་
ནད་ཤུགས་དལ། །གཡའ་ཞིང་གྲང་ལ་དྲོ་བ་འདོད། །སྨིན་ནས་རྣག་དཀར་སྐ་བ་འཛག །ཅེས་བྱ་བ་ལ། །བད་ཀན་རང་གི་རྒྱུས་འཁྲུགས་པར་གྱུར་པ་ལས། རྣ་བའི་བུ་ག་དང་མགོ་ལ་སོགས་པ་ལྕི་བར་འགྱུར་བ་དང་། ནད་ཀྱི་ཤུགས་དལ་ཞིང་ཆུང་བ་དང་། གཡའ་བ་
ལ་སོགས་པ་མྱོང་བར་འགྱུར་བ་ཡིན་ནོ། །སྣད་ལ་སོགས་པས་གནོད་གྱུར་པ། །རྣ་བ་གཟེར་བར་བྱེད་པར་འགྱུར། །ཁྲག་དང་མཁྲིས་པ་ལྟར་ན་དང་། །མཚན་ཉིད་ཅུང་ཟད་ལྷག་པ་ཡིན། །ཞེས་བྱ་བ་ལ། སྣད་པ་ལ་སོགས་པས་གནོད་པར་གྱུར་པ་ནི། རྣ་བ་ཤས་
ཆེར་གཟེར་བར་བྱེད་པ་དང་། ཁྲག་དང་མཁྲིས་པ་དང་འདྲ་བར་ན་བར་བྱེད་པ་ཡིན་ལ། དེ་ལས་ཀྱང་མཚན་ཉིད་ཅུང་ཟད་ཙམ་གྱིས་ལྷག་པར་གྱུར་པ་ཡིན་ནོ། །ནད་གཞི་འདུས་པས་གཟེར་བ་དང་། །སྐྲངས་བཅས་རིམས་འདེབས་མི་བཟད་ན། །རེས་ཀྱིས་གྲང་དང་དྲོ་བ་འདོད། །
འོད་པ་ལྟ་བུ་ཉིད་དུ་འགྱུར། །སྨིན་ནས་རྣག་ནི་དཀར་དང་གནག །དམར་དང་སྐ་བ་འཛག་པར་འགྱུར། །ཞེས་བྱ་བ་ལ། རླུང་ལ་སོགས་པའི་ནད་ཀྱིས་རྣ་བ་གཟེར་བ་དང་། །སྐྲངས་པ་ལ་སོགས་པར་འགྱུར་བ་དང་། རེས་ཀྱིས་ཆེད་འགའ་གྲང་བ་དང་། ཆེད་འགའ་དྲོ་བ་
འདོད་པར་འགྱུར་བ་དང་། འོན་པ་ལྟ་བུ་སྒྲ་ཐོས་པ་མེད་པར་འགྱུར་བ་ལ་སོགས་པ་ཡིན་ནོ། །སྒྲ་ཐོས་རྩར་ནི་རླུང་ཞུགས་པ། །རྒྱུ་མེད་པར་ནི་སྣ་ཚོགས་པའི། །སྒྲ་ནི་ཡང་དང་ཡང་དུ་ཐོས། །དེ་ནི་རྣ་བའི་སྒྲ་ཞེས་བཤད། །ཅེས་བྱ་བ་ལ། རླུང་སྒྲ་ཐོས་པར་བྱེད་པའི་རྩའི་
เล่ม ๒๐๒ · หน้า 171b
ནང་དུ་ཞུགས་པར་གྱུར་ན། རྒྱུ་མེད་པར་སྒྲ་སྣ་ཚོགས་པ་ཡང་དང་ཡང་དུ་ཐོས་པར་འགྱུར་བ་ཡིན་ཏེ། ནད་དེ་ནི་རྣ་བའི་སྒྲ་ཞེས་བྱ་བར་དྲང་སྲོང་རྣམས་ཀྱིས་བཤད་དོ། །རླུང་ནི་བད་ཀན་དང་འདྲེས་པའི། །རྣ་སྒྲ་ཡལ་བར་བོར་ན་ནི། །སྐད་གསང་མཐོན་པོར་སྨྲས་པ་
ཐོས། །རིམ་གྱིས་འོན་པ་ཉིད་དུ་འགྱུར། །ཞེས་བྱ་བ་ལ། རླུང་རིམ་གྱིས་བད་ཀན་དང་འདྲེས་པ་ལས། སྒྲ་གྲག་པའི་ནད་ཡལ་བར་བོར་ཞིང་མ་གསོས་ན་སྐད་གསང་མཐོན་པོས་ཐོས་པར་འགྱུར་བ་འམ། ཡང་ན་རིམ་གྱིས་འོན་པ་ཉིད་དུ་འགྱུར་རོ། །རླུང་གིས་བད་
ཀན་བསྐམས་གྱུར་པས། །དེ་ལ་རྣ་བར་གོས་གྱུར་ན། །ན་ཞིང་ལྕི་ལ་འགགས་གྱུར་པ། །དེ་ནི་རྣ་པ་འགགས་ཞེས་བཤད། །ཅེས་བྱ་བ་ལ། བད་ཀན་རླུང་གིས་བསྐམས་པར་གྱུར་ན། དེས་རྣ་བར་གོས་ཤིང་ཆགས་ལ་བྱུགས་པ་ལྟ་བུར་འགྱུར་ལ་རྒྱུ་དེས་རྣ་བ་ན་བ་ལ་སོགས་པར་འགྱུར་
ཏེ་ནད་དེ་ནི་རྣ་བ་འགགས་པ་ཞེས་བྱའོ། །ཞེས་སློབ་དཔོན་གྱིས་བཤད་དོ། །བད་ཀན་ལས་ནི་རྣ་བ་གཡའ། །སྐྲང་སྲ་དེ་ཡི་མིང་གིས་བཤད། །ཅེས་བྱ་བ་ལ། བད་ཀན་ལས་རྣ་བར་གཡའ་བ་ལ་སོགས་པ་འབྱུང་བར་འགྱུར་བ་ཡང་སློབ་དཔོན་གྱིས་དེའི་མིང་གིས་བཤད་དེ་
གཡའ་ཞིང་སྐྲངས་ལ་སྲ་བ་ཞེས་བཤད་དོ། །མཁྲིས་པས་བད་ཀན་ཚིག་གྱུར་པ། །ནད་བཅས་པ་འམ་ནད་མེད་ཀྱང་། །རྣག་སྐ་འཛག་ཅིང་མང་དུ་འདྲུལ། །རྣ་བ་རྣག་ཅན་བྱེད་པར་འགྱུར། །ཞེས་བྱ་བ་ལ། མཁྲིས་པས་བད་ཀན་ཚིག་པར་བྱས་ཤིང་སྨིན་པའི་གནས་
སྐབས་སུ་གྱུར་པ་ན། རྣ་བ་རྣག་ཅན་ཞེས་བྱ་བའི་ནད་དུ་འགྱུར་ཏེ། དེ་ནི་ནད་དང་བཅས་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །རླུང་སོགས་པ་ཡིས་རྣ་བའི་ཤ། །ཁྲག་ལ་གནོད་གྱུར་འདྲུལ་བར་ཟ། །སྲིན་བུས་བསྐྱོད་ཅིང་མི་བཟོད་ན། །རྣ་ནད་སྲིན་བུ་ཅན་
ཞེས་བྱ། །ཞེས་བྱ་བ་ལ། རླུང་ལ་སོགས་པའི་ནད་རང་གི་རྒྱུས་བསྐྱེད་པ་དག་གིས་རྣ་བའི་ཤ་དང་ཁྲག་གཉིས་ལ་གནོས་པར་བྱས་ཤིང་འདྲུལ་བར་གྱུར་པའི་དབང་གིས་ཟ་ཞིང་འཆའ་བར་བྱེད་པའི་སྲིན་བུས་བསྐྱོད་པ་ན་མི་བཟད་པར་ན་བའི་ནད་དེ་ནི་མིང་སྲིན་བུ་ཅན་ཞེས་བྱའོ། །རྣ་བ་
เล่ม ๒๐๒ · หน้า 172a
ཕུག་པའི་རྨ་ལས་བྱུང་། །རྨ་ནི་སྔ་མའི་མཚན་ཉིད་ཅན། །ཁོང་འབྲས་འགྱུར་བའམ། །ཞེས་བྱ་བ་ལ། །རྣ་བ་ཕུག་པ་ལས་བྱུང་བའི་རྨ་བྱུང་བའི་མཚན་ཉིད་ནི། སྔར་བཤད་པའི་ནད་གཞིའི་སྐབས་ནས་སྨོས་པའི་མཚན་ཉིད་ཅན་གྱི་ཁོང་འབྲས་སུ་འགྱུར་
རོ། །གཞན་དུའང་འགྱུར། ཞེས་བྱ་བ་ལ། གཞན་དུའང་འགྱུར་ཞེས་བྱ་བ་ནི། ཁོང་འབྲས་རླུང་ལས་གྱུར་པ་ལ་སོགས་པ་གཞན་དག་ཀྱང་། ནད་གཞིའི་སྐབས་ནས་སྔར་བཤད་པ་ལྟ་བུར་གྱུར་པ་ལས་འདི་ཉིད་ནི་ཁོང་འབྲས་ཀྱི་དབྱེ་བ་ཙམ་དུ་ཟད་པས་དེའི་ཕྱིར་གྲངས་སུ་
ལོགས་ཤིག་ཏུ་མ་བགྲངས་པ་ཡིན་ནོ། །ཐོར་བུ་འབྲུམ་བུ་སྐྲངས་ལས་འབྱུང་། །དེ་ལས་རྣ་བ་རྣགས་པ་དང་། །འོན་པར་བྱེད་པས་གནོད་པར་འགྱུར། །ཞེས་བྱ་བ་ལ། རྣ་བ་ཐོར་བུ་དང་འབྲུམ་བུ་སྐྲངས་པ་ལས་ནད་གཞི་སོ་སོ་དང་འདུས་པ་དང་ལྡན་པ་དང་ཁྲག་ལས་གྱུར་པ་
རླུང་འབྱུང་བར་འགྱུར་ལ། ཐོར་བུ་འབྲུམ་བུ་དེ་ལས་རྣ་བ་རྣགས་པ་ལ་སོགས་པས་གནོད་པར་འགྱུར་རོ། །དེ་ལྟར་ན་འདི་ལས་ཐོར་བུ་དང་འབྲུམ་བུའི་རྣ་བའི་ནད་ཅེས་བྱ་བ་གཉིས་སུ་འགྱུར་རོ། །མངལ་དུ་རླུང་གིས་རྣ་བའི་ཤ། །ཞུམ་འགྱུར་འཁུམས་པ་ཞེས་བྱའོ། །ཞེས་བྱ་
བ་ལ། མངལ་གྱི་གནས་སྐབས་སུ་རླུང་ལས་རྣ་བའི་འགྲམ་གྱི་ཤ་འཁུམས་ཤིང་འདུས་པར་གྱུར་པ་ནི་རྣ་བ་འཁུམས་པ་ཞེས་བྱ་བ་ཡིན་ནོ། །མངལ་དུ་ཤ་མཛེར་སྲ་ན་མེད། །པི་པི་ལིང་འདྲ་མང་པོའང་གཅིག །ནད་མེ་པི་པི་ལིང་ཞེས་བྱ། །ཞེས་བྱ་བ་ལ། མངལ་གྱི་གནས་
སྐབས་ཉིད་དུ་ཤའི་མཛེར་པ་སྲ་ཞིང་ན་བ་མེད་པ་པི་པི་ལིང་གི་ཚད་ཙམ་མང་པོ་འམ་གཅིག་འབྱུང་བ་གང་ཡིན་པ་དེ་ནི་མིང་པི་པི་ལིང་ཞེས་བྱའོ། །འདུས་པ་ལས་གྱུར་གས་པ་ནི། །མདོག་འདྲ་ན་ཞིང་སྲ་བ་དང་། །སྐྲངས་གྱུར་དེ་ནི་མ་གསོས་ན། །སྨིན་ནས་ཡུངས་མར་ལྟ་བུར་ནི། །
འཛག་ཅིང་འཚོ་བ་དཀའ་བར་འགྱུར། །རྨ་འཚོབས་ནས་ཀྱང་ངེས་པར་ནི། །རྣ་བའི་ཤ་ནི་ཞུམ་པར་འགྱུར། །ཞེས་བྱ་བ་ལ། འདུས་པའི་རྒྱུ་ལས་སྐྲངས་པ་གང་ཁ་དོག་འདྲ་བ་ལ་སོགས་པར་འགྱུར་བ་དེ་ནི་མིང་གས་པ་ཞེས་བྱ་སྟེ། སྐྲངས་པ་དེ་མ་གསོས་ཏེ་ཡལ་བར་བོར་ནས་
เล่ม ๒๐๒ · หน้า 172b
སྨིན་ཅིང་རྣགས་པ་འགྱུར་ན་ཡུངས་མར་ལྟ་བུ་འཛག་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །རྩ་ལ་གནས་པའི་རླུང་གིས་ནི། །རྣ་ཤལ་སྐམ་པ་དེ་མིང་ཅན། །ཞེས་བྱ་བ་ལ། རླུང་རྣ་བའི་རྩ་ན་གནས་ཤིང་རྣ་རྩ་སྐམ་པར་བྱེད་པའི་ནད་དེ་ནི་དེའི་མིང་ཅན་དེ་རྣ་ཤལ་
སྐམ་པ་ཞེས་བྱའོ། །རྣ་ཤལ་པི་ལྦང་རྒྱུད་ལྟར་ཕྲ། །སྲ་བ་རྒྱུད་ཅན་ཞེས་བྱའོ། །ཞེས་བྱ་བ་ལ། རླུང་གིས་རྣ་ཤལ་པི་ལྦང་གི་རྒྱུད་ལྟར་སྲ་ཞིང་ཕྲ་བར་གྱུར་པ་དེ་ནི་མིང་རྒྱུད་ཅན་ཞེས་བྱའོ། །གཞོན་ཤ་ཅན་ནི་ཡུན་རིང་དུ། །བཏང་སྙོམས་བོར་ནས་འཕྲལ་དུ་བསྐྱེད། །རྣ་ཤལ་
སྐྲང་ཞིང་ནད་བཅས་ལ། །དམར་ཞིང་འབྱར་བར་གྱུར་པ་ནི། །དེ་ནི་རླུང་གིས་འབྱར་ཞེས་བྱ། །ཞེས་བྱ་བ་ལ། ཤིན་ཏུ་གཞོན་ཤ་ཅན་གྱི་རྣ་བ་འཇམ་པོ་ཡུན་རིང་དུ་བཏང་སྙོམས་སུ་བཞག་ནས། དེའི་རྗེས་ལ་འཕྲལ་དུ་དེའི་མོད་ལ་རྣ་བའི་བུ་གར་བསྐྱེད་ཅིང་བརྒྱངས་པར་
གྱུར་ན་རྣ་ཤལ་སྐྲངས་པ་དང་། ན་བ་དང་བཅས་ཤིང་དམར་ལ་སླར་འབྱར་བར་འགྱུར་ཏེ། དེ་ནི་རླུང་གིས་འབྱར་བ་ཞེས་བྱའོ། །གནོད་འགྱུར་རྒྱན་ལྕི་ཁུར་སོགས་ཀྱིས། །ཁྲག་དང་མཁྲིས་པ་འཁྲུགས་གྱུར་པས། །དམར་ཞིང་ཚ་ན་སྨིན་པ་དང་། །སྐྲང་དང་འབྲུམ་བུ་
འབྲུམ་ཕྲན་དང་། །དམར་ཞིང་ཚ་ལ་རྣགས་པ་ཡིན། །ཞེས་བྱ་བ་ལ། རྒྱན་ལྕི་བ་ལ་སོགས་པའི་རྒྱུས་ཁྲག་དང་མཁྲིས་པ་འཁྲུགས་པར་བྱས་པས་དམར་བ་ལ་སོགས་པ་དང་ལྡན་པའི་ནད་དེ་ནི་མིང་གནོད་པར་གྱུར་པ་ཞེས་བྱའོ། །རླུང་དང་བད་ཀན་གྱིས་རྣ་ཤལ། །
སྐྲང་ཞིང་ནད་མེད་སྲ་བ་དང་། །བརྟན་ཞིང་མདོག་འདྲ་གཡའ་བ་དང་། །དེ་ནི་མཉེ་བ་ཞེས་བྱར་བཤད། །ཅེས་བྱ་བ་ལ། རླུང་དང་བད་ཀན་གྱི་རྒྱུས་རྣ་ཤལ་སྐྲང་ཞིང་། །སྐྲངས་པས་ཀུན་ཏུ་ཁྱབ་ལ། །ན་ཚ་ཆུང་ཞིང་སྲ་བ་དང་། །བརྟན་པར་བྱས་པ་ལ་སོགས་པའི་ནད་དེ་ནི་
མཉེ་བ་ཞེས་བྱ་བ་དང་། གལ་ལི་རི་ཞེས་ཀྱང་བྱའོ། །ཕུག་ཉེས་རྣ་བ་བརྒྱངས་པ་ལས། །གཡའ་བཅས་ཚ་གྲང་སྨིན་ཅིང་ན། །འདུས་པ་ལས་གྱུར་སྐྲངས་པ་དེ། །སྡུག་བསྔལ་འཕེལ་བྱེད་ཅེས་བྱའོ། །ཞེས་བྱ་བ་ལ། རྣ་བ་ཕུག་པ་ཉིས་ཤིང་ནང་བརྒྱངས་དྲགས་པ་ལས་
เล่ม ๒๐๒ · หน้า 173a
གཡའ་བ་ལ་སོགས་པའི་ནད་དུ་འགྱུར་ཏེ། ནད་དེའི་མིང་ནི་སྡུག་བསྔལ་འཕེལ་བ་ཞེས་བྱའོ། །བད་ཀན་ཁྲག་གྱུར་སྲིན་བུ་ཕྲ། །གཡའ་ཞིང་གནག་ལ་རྣག་བཅས་པ། །སྲིན་བུ་ཕྲ་མོས་བལྡགས་ཞེས་བྱ། །དེ་མ་གསོས་ན་རྣ་ཤལ་བ། །ཞེས་
བྱ་བ་ལ། བད་ཀན་དང་ཁྲག་ལས་གྱུར་པའི་སྲིན་བུ་ཕྲ་མོ་གཡའ་པ་ལ་སོགས་པ་དང་བཅས་པ་ནི་རྣ་ཤལ་བལྡགས་པ་ཞེས་བྱ་སྟེ། །དེ་མ་བཅོས་ཤིང་ཡལ་བར་བོར་ན་རྣ་ཤལ་ཟ་ཞིང་བལྡགས་པར་འགྱུར་རོ། །དེ་ལས་འདུས་གྱུར་པི་པི་ལིང་། །གཟེར་ཅན་གས་
འཁུམས་གསོར་མི་རུང་། །རྒྱུད་ཅན་གཅིག་པུ་འཚོ་བ་ཙམ། །ལྷག་མ་རྣམས་ནི་གསོ་བར་བྱ། །ཞེས་བྱ་བ་ལ། རྣ་བའི་ནད་འདི་རྣམས་ཀྱི་ནང་ནས་པི་པི་ལིང་ཞེས་བྱ་བ་དང་། གཟེར་ཅན་ཞེས་བྱ་བ་དང་། གས་པ་ཞེས་བྱ་བ་དང་། །རྣ་བ་
འཁུམས་པ་ཞེས་བྱ་བ་དེ་ནི་གསོར་མི་རུང་ངོ་། །རྒྱུད་ཅན་གཅིག་པུ་ནི་རེ་ཞིག་འཚོ་བ་ཙམ་དུ་གསོར་རུང་ངོ་། །ལྷག་མ་ཉི་ཤུ་ནི་གསོར་རུང་བ་ཡིན་ནོ། །དེ་ལྟར་རྣ་བའི་ནད་ཀྱི་ནི། །དབྱེ་བ་ཉི་ཤུ་རྩ་ལྔར་བཤད། །ཅེས་བྱ་བ་ལ། དེ་ལྟར་བཤད་མ་ཐག་པའི་ཚུལ་གྱིས་རྣ་བའི་
ནད་ཀྱི་དབྱེ་བ་ནི་གྲགས་ཉི་ཤུ་རྩ་ལྔ་ཡོད་དོ་ཞེས་སློབ་དཔོན་གྱིས་བཤད་དོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་བདུན་པའི་རྣམ་པར་འགྲེལ་
པའོ།། །།དེ་ནས་རྣ་བའི་ནད་གསོ་བ་བཤད་པར་བྱའོ། །ཞེས་བྱ་བ་ལ། གོ་རིམས་ཀྱིས་ན་ལེའུ་འདི་བརྩམས་པ་ཡིན་ནོ། །རླུང་ལས་གྱུར་པའི་རྣ་ནདལ། །ཤ་ཁུ་བླུད་ཅིང་རླུང་འཇོམས་པའི། །སྨན་བསྐོལ་མར་ནི་མཚན་མོ་བླུད། །ཅེས་བྱ་བ་ལ། རླུང་
ལས་གྱུར་པའི་རྣ་བའི་ནད་ལ་ནི། མཚན་མོ་ཉལ་ཁར་ནད་པ་ལ་ཤ་ཁུ་བླུད་པར་བྱ་ཞིང་རླུང་འཇོམས་པའི་སྨན་རྩ་བ་བཅུ་པ་ལ་སོགས་པ་དང་བསྐོལ་པའི་མར་བླུད་པར་བྱའོ། །རྣ་བ་དུགས་བྱས་དེ་རྗེས་ལ། །ཨ་ཤཏྠ་དང་ཨེ་རཎྜ། །བིལ་བ་ཨརྐའི་ལོ་མ་དང་། །ཏིལ་མར་
เล่ม ๒๐๒ · หน้า 173b
རྒྱམ་ཚར་བཅས་པ་དང་། །ཕུར་མ་བཙོ་བ་བྱས་པ་ཡི། །ཁུ་བ་དྲོ་འཇོམ་ཙམ་མམ་ནི། །ལ་ཕུག་གུ་གུལ་རྣ་བ་དགང་། །ཞེས་བྱ་བ་ལ། རྣ་བ་དང་པོར་དུགས་བྱ་ཞིང་སྣུམ་ཆོས་ཀྱི་ཆོ་ག་བྱས་ནས་དེའི་རྗེས་ལ་ཨ་ཤྭཏྠ་ལ་སོགས་པའི་ལོ་མའི་སྨན་གྱི་ཕུར་མ་
བཙོ་བ་འམ་ཡང་ན་ལ་ཕུག་དང་གུ་གུལ་བསྐོལ་བའི་ཁུ་བ་གང་ཡང་རུང་བས་རྣ་བ་དགང་བར་བྱའོ། །རླུང་འཇོམས་སྡེ་ཚན་སྐྱུར་རྣམས་དང་། །གཅིན་གྱི་ནང་དུ་སྣུམ་ཆེན་ནི། །བསྐོལ་བ་དེ་ནི་རྣ་བའི་ནད། །མི་བཟད་པ་ཡང་མྱུར་དུ་སེལ། །ཞེས་བྱ་བ་ལ། རླུང་འཇོམས་
པའི་སྡེ་ཚན་ཐང་ཤིང་ལ་སོགས་པ་དང་། སྐྱུར་ཏེ་སྐྱུར་རྩབས་དང་། ཞོག་ཆུ་དང་དར་བ་ལ་སོགས་པ་རྣམས་དང་། མ་ཧེ་དང་བ་ལང་ལ་སོགས་པའི་གཅིན་གྱི་ནང་དུ་སྣུམ་ཆེན་པོ་སྟེ། ཞུན་མར་དང་ཏིལ་མར་དང་རྐང་དང་ཞག་ཅེས་བྱ་བ་བསྐོལ་བ་དེས་ནི་རྣ་བའི་ནད་མི་བཟད་
ཅིང་བརྣག་པར་དཀའ་བ་ཡང་སེལ་བར་བྱེད་དོ། །རྩ་བ་ཆེན་པོ་ལྔ་ཡི་ཤིང་། །གང་ཡང་རུང་བ་གསོ་མས་དཀྲི། །ཏིལ་མར་གྱིས་བསྐུས་འབར་བའི་རྩེ། །སྣུམ་འཛག་འཕྲལ་དུ་ནད་སེལ་བྱེད། །ཅེས་བྱ་བ་ལ། རྩ་བ་ཆེན་པོ་ལྔའི་ཤིང་གང་ཡང་རུང་བ་ཅིག་དང་། དེ་
བཞིན་དུ་ས་ར་ལ་ཞེས་བྱ་བའི་ཤིང་སོར་བཅུ་ཙམ་ལ་གསོ་མས་ཆ་གསུམ་དཀྲིས་ལ་ཏིལ་མར་གྱིས་བསྐུས་ཏེ་འབར་བའི་རྩེ་མོ་ལ་ཚིག་པའི་ཚེ་སྣུམ་གང་ཞིག་འཛག་པར་གྱུ་པ་དེས་ནི་འཕྲལ་དུ་རྣ་བའི་ནད་སེལ་ཞིང་འཇོམས་པར་བྱེད་དོ། །དེ་བཞིན་ཐང་ཤིང་རུ་རྟ་དང་། །སྒྲོན་ཤིང་
ལས་ཀྱང་དེ་བཞིན་བྱ། །ཞེས་བྱ་བ་ལ། དེ་བཞིན་དུ་ཐང་ཤིང་ལ་སོགས་པ་དག་ཀྱང་ཤིང་སོར་བཅུ་ཙམ་ལ་གསོ་མས་དཀྲི་ཞིང་ཏིལ་མར་གྱིས་བསྐུས་ལ་འབར་བའི་རྩེ་མོ་ནས་འཛག་པའི་སྣུམ་གང་ཞིག་བྱུང་བ་དེ་བསགས་པ་དྲོ་འཇོམ་ཙམ་དུ་བླུད་ན་ཡང་རྣ་བའི་ནད་འཕྲལ་དུ་སེལ་བར་
བྱེད་དོ། །རླུང་ནད་ཆམ་པ་ལ་བཤད་པའི། །གསོ་བས་འདིར་ཡང་ཕན་པ་ཡིན། །ཞེས་བྱ་བ་ལ། རླུང་ལས་གྱུར་པའི་ཆམ་པ་ལ་ཕན་པའི་སྨན་གང་ཡིན་པ་དེ་འདིར་རླུང་ལས་གྱུར་པའི་རྣ་བའི་ནད་ལ་ཡང་ཕན་པ་ཡིན་ནོ། །མགོ་བོ་བཀྲུ་དང་ཆུ་གྲང་བཏུང་། །ཉིན་མོའང་ཡོངས་
เล่ม ๒๐๒ · หน้า 174a
སུ་སྤང་བར་བྱ། །ཞེས་བྱ་བ་ལ། རྣ་བའི་ནད་དེ་ལ། མགོ་བོ་བཀྲུ་བ་དང་། ཆུ་གྲང་བཏུང་བ་ནི་ཉིན་མོ་ཡང་སྤང་བར་བྱའོ། །མཁྲིས་གྱུར་ཁ་ར་དཀར་པོར་བཅས། །མར་གྱིས་སྣུམ་བྱས་བཀྲུ་སྨན་གཏང་། །ཞེས་བྱ་བ་ལ། མཁྲིས་པ་ལས་གྱུར་
པའི་གཟེར་ནད་ལ་ནི། ཁ་ར་དཀར་པོ་དང་བཅས་པའི་མར་གྱིས་སྣུམ་གྱི་ཆོ་ག་བྱས་པ་ལ་མཁྲིས་པ་སེལ་བའི་བཀྲུ་སྨན་གཏང་བར་བྱའོ། །རྒུན་འབྲུ་ཤིང་མངར་ནུ་ཞོ་བསྐོལ། །རྣ་བ་བཀང་པའང་བསྔགས་པ་ཡིན། །ཞེས་བྱ་བ་ལ། རྒུན་འབྲུ་ལ་སོགས་པའི་སྦྱོར་བས་རྣ་བ་
བཀང་བ་ཡང་མཁྲིས་པ་ལས་གྱུར་པའི་རྣ་བ་གཟེར་བ་ལ་ཕན་ནོ། །ཤིང་མངར་ཙནྡན་དཱུར་བ་དཀར། །པུ་ཤེལ་ཙེ་དང་རམ་ཉེ་བ། །སེང་ཕྲོམ་པདྨའི་རྩ་བ་དང་། །པདྨའི་སྡོང་བུ་ཛི་བ་ཀ །བཙོད་དང་ཐལ་ཏྲེས་བསྐོལ་བ་དང་། །ཤིང་མངར་ཁུ་བ་བྲེ་གང་དང་། །འོ་མ་བྲེ་དོ་
བཅས་པ་དག །ཏིལ་མར་ཕུལ་གང་བསྐོལ་བ་དང་། །འདི་ཡིས་རྣར་བླུགས་རྣ་དགང་བསྐུ། །ཡང་ན་སྦྲང་རྩི་ཉི་ཚེས་དགང་། །གཟེར་དང་ཚ་དང་ན་བ་སེལ། །ཞེས་བྱ་བ་ལ། ཤིང་མངར་ལ་སོགས་པའི་ལྡེ་གུ་དང་། ཤིང་མངར་བསྐོལ་བའི་ཁུ་བ་བྲེ་གང་ལ་སོགས་པ་ཇི་
སྐད་སྨོས་པ་བཞིན་དུ་བསྐོལ་བ་ཏིལ་མར་འདི་རྣ་བར་བླུགས་པ་ལ་སོགས་པ་བྱས་ན། གཟེར་བ་ལ་སོགས་པ་སེལ་བར་འགྱུར་རོ། །ཡང་ན་སྦྲང་རྩི་ཉི་ཚེས་བཀང་ན་ཡང་གཟེར་བ་ལ་སོགས་པ་སེལ་བར་བྱེད་དོ། །ཤིང་མངར་ལ་སོགས་མར་དང་བཅས། །རྣ་བ་ཀུན་ཏུ་བྱུགས་ན་འང་
ཕན། །ཞེས་བྱ་བ་ལ། ཤིང་མངར་དང་ཙནྡན་ལ་སོགས་པ་བཤད་མ་ཐག་པའི་སྨན་མར་དང་བཅས་པའི་ལྡེ་གུས་རྣ་བ་ཀུན་ཏུ་བྱུགས་ཤིང་བསྐུས་ན་ཡང་གཟེར་བ་ལ་སོགས་པ་ལ་ཕན་ནོ། །བད་ཀན་ལས་གྱུར་པི་པི་ལིང་། །མར་བསྐོལ་སྣུམ་གྱུར་སྐྱུག་ཏུ་གཞུག །ཅེས་
བྱ་བ་ལ། བད་ཀན་ལས་གྱུར་བའི་རྣ་བའི་གཟེར་ལ་ནི། །པི་པི་ལིང་དང་ཞུན་མར་བསྐོལ་བའི་སྣུམ་གྱི་ཆོ་ག་བྱས་ལ་སྐྱུག་སྨན་གཏང་སྟེ་སློན་དུ་གཞུག་གོ། །བད་ཀན་སེལ་བའི་སྣ་སྨན་དང་། །མཁུར་བཀང་དུགས་དང་དུད་པ་བརྔུབ། །ཅེས་བྱ་བ་ལ། །བད་ཀན་ལས་གྱུར་པའི་
เล่ม ๒๐๒ · หน้า 174b
རྣ་བའི་གཟེར་ལ་ནི་བད་ཀན་སེལ་བའི་སྣ་སྨན་ལ་སོགས་པ་བྱའོ། །སྒོག་སྐྱ་སྒེའུ་གཤེར་ཤི་ཀྲུ་དང་། །ལ་ཕུག་ཆུ་ཤིང་མུ་རང་ག །བསྐོལ་བའི་ཁུ་བ་དམ་པ་ནི། །དྲོ་འཇམ་རྣ་བར་བླུགས་ནའང་ཕན། །ཞེས་བྱ་བ་ལ། སྒོག་སྐྱ་ལ་སོགས་པའི་ཁུ་བ་དྲོ་འཇམ་ཙམ་བླུགས་
ན་ཡང་མཆོག་ཏུ་ཕན་པ་ཡིན་ནོ། །ཨརྐའི་མྱུ་གུ་སྐྱུར་ཁུར་བཏགས། །ཏིལ་མར་རྒྱམ་ཚར་བཅས་པ་གང་། །སྣུ་ཧའི་ཤིང་བུ་བྲུས་པར་ནི། །བཅུག་ལ་ཨརྐའི་ལོ་མས་གཡོགས། །ཕུར་མ་བཙོས་པའི་ཚུལ་དུ་བསྲེགས། །དེ་ཡི་ཁུ་བ་གཟེར་འཇོམས་མཆོག །ཅེས་
བྱ་བ་ལ། ཤིང་ཨརྐའི་མྱུ་གུ་རང་སྐྱུར་ལ་སོགས་པ་ཁུ་བ་སྐྱུར་པོའི་ནང་དུ་བཏགས་ལ་ཇི་སྐད་སྨོས་པའི་ཕུར་མ་བཙོས་པའི་ཚུལ་དུ་བསྲེགས་པའི་ཁུ་བ་ནི་གཟེར་འཇོམས་པར་བྱེད་པའི་མཆོག་ཡིན་ནོ། །མ་དུ་ལུང་གའམ་ཀ་པིད་ཐའི། །ཁུ་བས་བཀང་བ་བྱས་ན་ཕན། །ཞེས་
བྱ་བ་ལ། ཡང་ན་མ་དུ་ལུང་གའི་ཁུ་བའམ་ཀ་པིད་ཐའི་ཁུ་བས་རྣ་བ་བཀང་ན་ཡང་གཟེར་བ་ལ་ཕན་ནོ། །ཡང་ན་ཚས་བཀང་དེ་རྗེས་ལ། །རྒྱ་མཚོའི་ཝུ་བའི་ཕྱེ་མས་གདབ། །ཅེས་བྱ་བ་ལ། ཡང་ན་རྣ་བ་ཚས་བཀང་ལ་དེའི་འོག་ཏུ་རྒྱ་མཚོའི་ཝུ་བའི་ཕྱེ་མ་བཏབ་ནའང་ཕན་ནོ། །ར་
ལུག་གཅིན་དང་འོ་མས་ཤུན། །ཏིལ་མར་བསྐོལ་བས་བཀང་ན་ཕན། །ཞེས་བྱ་བ་ལ། ཡང་ན་ར་ལུག་གི་གཅིན་ལ་སོགས་པའི་སྦྱོར་བའང་ཕན་ནོ། །ཡང་ན་ཡུངས་མར་ཤིང་ཀུན་དང་། གཡེར་མ་དོང་གྲ་བསྐོལ་བ་བླུགས། །ཞེས་བྱ་བ་ལ། ཡང་ན་ཡུངས་མར་ལ་
སོགས་པའི་སྦྱོར་བ་ཇི་སྐད་སྨོས་པ་ལྟར་བཏང་ན་འང་ཕན་ནོ། །ཁྲག་གྱུར་མཁྲིས་པ་ལྟ་བུར་གསོ། །གཏར་ག་མྱུར་དུ་གདབ་པར་བྱ། །ཞེས་བྱ་བ་ལ། ཁྲག་ལས་གྱུར་པའི་རྣ་བའི་ནད་ལ་མཁྲིས་པ་ལས་གྱུར་པའི་རྣ་བའི་གཟེར་ལྟར་གསོ་བར་བྱའོ། །སྨིན་ཅིང་
རྣ་བ་ཁྲག་འཛག་ལ། །དུད་པ་མཁུར་བཀང་སྣ་སྨན་སྦྱར། །སྦུ་གུའི་ཆོ་ག་དག་དང་ནི། །རྨ་རེད་ཆོ་ག་གང་ཡིན་བྱ། །ཞེས་བྱ་བ་ལ། རྣ་བའི་ནད་སྨིན་ཅིང་རྣག་འཛག་པར་གྱུར་ན་དུད་པ་བརྔུབ་པ་ལ་སོགས་པ་སྦྱར་བར་བྱ་ཞིང་། དེ་བཞིན་དུ་སྡུ་གུའི་ཆོ་ག་ཇི་
เล่ม ๒๐๒ · หน้า 175a
སྐད་བཤད་པ་དག་ཀྱང་སྦྱར་བར་བྱ་ལ། རྨ་རེད་པའི་གསོ་བ་གང་དག་ཡིན་པ་དེ་ཡང་སྦྱར་བར་བྱའོ། །གོས་པར་ཡེའུས་དུས་གཉིས་སུ། །རྣ་བ་ཕྱི་ཞིང་དག་པར་བྱ། །གུ་གུལ་དུད་པས་བདུགས་ནས་ཀྱང་། །སྦྲང་རྩི་ཡིས་ཀྱང་དགང་བར་བྱ། །ཞེས་
བྱ་བ་ལ། རྣ་བར་རྣག་ལ་སོགས་པ་ཆགས་ཤིང་གོས་པར་གྱུར་ན། རས་བལ་གྱི་ཡེའུས་ཉིན་རེ་ཞིང་དུས་གཉིས་སུ་ཕྱི་ཞིང་དག་པར་བྱས་ལ། དེའི་རྗེས་ལ་གུ་གུལ་གྱི་དུད་པས་བདུགས་ཏེ་སྦྲང་རྩིས་ཡོངས་སུ་དགང་པར་བྱའོ། །བྱེའུ་རུག་ཁུ་བ་བསྐོལ་བ་དང་། །བུ་རམ་
ཁུ་བས་བསྒོས་པ་ཡི། །རས་བལ་ཡེའུ་རབ་ཕྲས་བྱུག །དེ་ཡི་ཕྱེ་མ་གདབ་པར་བྱ། །ཞེས་བྱ་བ་ལ། ཡང་ན་རྣ་བ་རྣག་ཅན་དེ་བྱེའུ་རུག་པའི་ཁུ་བ་ལ་སོགས་པས་བསྒོས་པའི་རས་བལ་གྱི་ཡེའུ་ཕྲ་མོས་བྱུག་པར་བྱ་བ་དང་། ཕྱེ་མ་ལ་སོགས་པའི་སྨན་དེ་དག་ཞིབ་ཏུ་
བཏགས་པའི་ཕྱེ་མས་གདབ་པར་བྱའོ། །གཟེར་དང་རྣགས་དང་ལྕི་བ་ལ། །ཆོ་ག་འདིས་ནི་བཟློས་པར་བྱ། །ཞེས་བྱ་བ་ལ། བཤད་མ་ཐག་པའི་ཆོ་ག་འདི་ཉིད་ནི་གཟེར་ལ་སོགས་པ་ཡང་ཟློག་པར་བྱེད་པ་ཡིན་པར་དྲང་སྲོང་རྣམས་ཀྱིས་བཤད་དོ། །པྲི་ཡང་ཀུ་དང་
ཨམྤཤྠ། །ཤིང་མངར་དང་ནི་ད་ཏ་ཀི །ཨུཏྤ་ལ་ཡི་ལོ་མ་དང་། །བཙོད་དང་སེང་ཕྲོམ་རྒྱ་སྐྱེགས་དང་། །ཀ་པིད་ཐ་ཡི་ཁུ་བ་དང་། །ཏིལ་མར་བསྐོལ་ཏེ་དེ་བླུགས་ན། །རྣག་འཛག་པ་ནི་མྱུར་འཆད་བྱེད། ཅེས་བྱ་བ་ལ། པྲི་ཡང་ཀུ་ལ་སོགས་བའི་ལྡི་གུ་དང་། ཀ་པིད་
ཐ་ལ་སོགས་པ་བསྐོལ་བའི་ཏིལ་མར་དེ་རྣ་བར་བླུགས་ཤིང་བཀང་ན་རྣག་འཛག་པ་མྱུར་དུ་འཆད་པར་བྱེད་དོ། །སྒྲ་བཅས་འོན་པ་དག་ལ་ནི། །རླུང་གི་གཟེར་འཇོམས་སྨན་གཏང་བྱ། །ཞེས་བྱ་བ་ལ། རྣ་བ་སྒྲ་དང་བཅས་པས་འོན་པར་གྱུར་པ་གཉིས་ལ་ནི། རླུང་གི་རྣ་བའི་ནད་
ཀྱི་གཟེར་འཇོམས་པར་བཤད་པའི་སྨན་གང་དག་ཡིན་པ་གཏང་བར་བྱའོ། །བད་ཀན་ལས་གྱུར་བད་ཀན་ནི། །སློན་སྨན་སོགས་ཀྱིས་དང་པོར་བསལ། །ཞེས་བྱ་བ་ལ། །སྒྲ་དང་བཅས་པ་དང་འོན་པ་བད་ཀན་ལས་གྱུར་པ་དག་ལ་ནི་དང་པོར་སློན་སྨན་ལ་སོགས་པས་བད་ཀན་
เล่ม ๒๐๒ · หน้า 175b
བསལ་བར་བྱའོ། །ཨེ་རཎྜ་དང་ཤི་ཀྲུ་དང་། །ལ་ཕུག་གཞོན་ནུའི་འོ་མ་དང་། །ཁུ་བ་ཏིལ་མར་བཞི་འགྱུར་དང་། །ལོ་མ་བརྒྱད་འགྱུར་བཅས་པ་དང་། །ཤིང་མངར་རམ་ཉེ་བའི་ལྡེ་གུ། །བཅས་པར་བསྐོལ་བ་རྣར་བླུགས་དང་། །བསྐུ་དང་རྣ་བ་བཀང་བ་ཡིས། །སྒྲ་བཅས་
འོན་དང་གཟེར་བ་འཇོམས། །ཞེས་བྱ་བ་ལ། ཨེ་རཎྜ་ལ་སོགས་པའི་ལོ་མ་བསྐོལ་བའི་ཁུ་བ་དང་། ཏིལ་མར་དེའི་བཞི་འགྱུར་དང་། ལོ་མ་ཏིལ་མར་བརྒྱད་འགྱུར་དང་བཅས་པ་དང་ཤིང་མངར་དང་རམ་ཉེ་བའི་ལྡེ་གུ་བསྐོལ་ཏེ་ཏེལ་མར་ལུས་པ་རྣ་བར་བླུགས་པ་ལ་སོགས་པ་བྱས་ན་སྒྲ་ལ་
སོགས་པ་དང་བཅས་པའི་ནད་འཇོམས་པར་བྱེད་དོ། །ཤིང་ཀུན་བོང་ང་དཀར་པོ་དང་། །ཤུ་ཏི་སྐྱེར་ཤུན་སྭ་རྫི་ཀ །ཏིལ་མར་ཚ་དང་བཅས་བསྐོལ་བས། །བཀང་ན་གཟེར་དང་ཆུ་སེར་འཛག །སྒྲ་བཅས་ལོན་པ་སེལ་བར་བྱེད། །ཅེས་བྱ་བ་ལ། ཤིང་ཀུན་ལ་སོགས་པའི་ལྡེ་གུ་
དང་། ཏིལ་མར་གྱི་བཞི་འགྱུར་གྱི་ཚ་དང་བསྐོལ་བའི་ཏིལ་མར་གྱིས་རྣ་བ་བཀང་ན་རྣ་བ་གཟེར་བ་དང་བཅས་པ་ཡང་སེལ་བར་བྱེད་དོ། །རྣ་བ་སྒྲ་དང་བཅས་པ་ལ། །ཡུངས་མར་གྱིས་ནི་བཀང་ན་ཕན། །ཞེས་བྱ་བ་ལ། རྣ་བ་སྒྲ་ཟི་ཟི་པོ་དང་བཅས་པ་ལ་ནི། ཡུངས་
མར་བཙིར་བའི་མར་གྱིས་རྣ་བ་དགང་བར་བྱའོ། །ལ་ཕུག་སྐམ་པོའི་དུམ་བུ་ཡི། །ཐལ་བ་ཤིང་ཀུན་བཅའ་སྒ་དང་། །ཤུ་ཏི་རུ་རྟ་ཤུ་དག་དང་། །ཐང་ཤིང་ཤི་ཀྲུ་སྐྱེར་ཁཎྜ། །ཡ་བཀྵ་ར་རྩབས་རུ་ཚ། །རྒྱམ་ཚ་རྡུལ་ཚ་སྭ་རྫི་ཀ །སྟག་པའི་ཚེར་མ་ཁ་རུ་ཚ། །གླ་སྒང་རྒུན་
ཆ་བཞི་འགྱུར་དང་། །ཁ་ལུ་ཁུ་བ་དེ་དང་འདྲ། །ཆུ་ཤིང་ཁུ་བ་མཉམ་བསྐོལ་བའི། །ཏིལ་མར་བཀང་བས་རྣ་བའི་ནད། །གཡའ་དང་སྒྲ་བཅས་འོན་པ་དང་། །རྣག་འཛག་གཟེར་ཞིང་སྲིན་བུ་ཅན། །ཤིན་ཏུ་གསོ་དཀའ་ཐལ་སྨན་གྱི། །ཏིལ་མར་གྱིས་ནི་མྱུར་དུ་འཇོམས་
ཁ་དང་སོ་ཡི་ནད་ལའང་ཕན། །ཞེས་བྱ་བ་ལ། ལ་ཕུག་སྐམ་པོའི་དུམ་བུ་ཐལ་བར་བྱས་པ་དང་། ཤིང་ཀུན་ལ་སོགས་པའི་སྨན་གྱི་བཞི་འགྱུར་རྒུན་ཚ་དང་། ཁ་ལུང་གི་ཁུ་བ་བཞི་འགྱུར་དང་། ཆུ་ཤིང་གི་ཁུ་བ་བཞི་འགྱུར་དང་། ཏིལ་མར་བསྐོལ་ལ་རྣ་བ་བཀང་ན་རྣ་བའི་ནད་
เล่ม ๒๐๒ · หน้า 176a
གསོ་དཀའ་བ་ཡང་མྱུར་དུ་སེལ་བར་བྱེད་ལ། ཐལ་བའི་ཏིལ་མར་འདི་ནི་ཁ་དང་སོའི་ནད་ལ་ཡང་ཕན་ཞིང་བསྔགས་པ་ཡིན་ནོ། །དེ་ནས་ཚོར་བ་མེད་པ་ལ། །ཉེ་བ་ལ་ནི་གཏར་ག་གདབ། །ཅེས་བྱ་བ་ལ། དེ་ནས་རྣ་བ་ཚོར་བ་མེད་ཅིང་བེམ་བེམ་པོར་གྱུར་ན་དེ་
དང་ཉེ་བ་ལ་གཏར་ག་གདབ་ཅིང་ཁྲག་དབྱུང་བར་བྱའོ། །སྐྲང་ཞིང་རྣགས་ལ་ཐོས་པ་ནི། །མི་གསལ་གྱུར་ལ་སྐྱུག་སྨན་གཏང་། །ཞེས་བྱ་བ་ལ། རྣ་བ་སྐྲུང་ཞིང་རྣག་འཛག་པ་དང་ཐོས་པ་མི་གསལ་ཞིང་འོན་པ་ལ་ནི་སྐྱུག་སྨན་བླུད་དེ་སློན་དུ་གཞུག་པར་བྱའོ། །བྱིས་པ་རྒན་དང་
ཡུན་རིང་དུ། །ལོན་པའི་འོན་པ་སྤང་བར་བྱ། །ཞེས་བྱ་བ་ལ། བྱིས་པའི་ཚེ་ནས་འོན་པ་དང་། རྒས་ནས་འོན་པ་དང་། ཡུན་རིང་དུ་འོན་ཞིང་ལོ་མང་དུ་ལོན་པའི་འོན་པ་ལ་ནི། གསོར་མི་རུང་བས་སྤང་བར་བྱའོ། །སྒྲ་བཅས་རྣགས་པར་གྱུར་པ་ལ། །སྣུམ་དང་དུགས་བྱས་དག་
པར་བྱ། །རྣ་བ་སྦྱངས་ནས་དེ་རྗེས་ལ། །རྣ་བ་སྦྱངས་པའི་ཏིལ་མར་དག །ཁ་ལུང་ཁུ་བ་རྒྱམ་ཚ་དང་། །ཚ་དང་སྦྲང་རྩིར་བཅས་པའང་བླུགས། །ཞེས་བྱ་བ་ལ། རྣ་བ་སྒྲ་དང་བཅས་ཤིང་རྣགས་པར་གྱུར་པའི་རྣ་ནད་ལ་ནི་སྣུམ་དུགས་བྱས་པས་རྣ་བ་སྦྱངས་ཤིང་གཤེར་བར་བྱས་ལ།
དེའི་འོག་ཏུ་རྣ་བའི་ཡེའུས་སྦྱང་ཞིང་དག་པར་བྱའོ། །དེ་ལྟར་རྣ་བ་སྦྱངས་ནས། དེའི་རྗེས་ལ་རྣ་བ་སྦྱང་བའི་ཏིལ་མར་ཇི་སྐད་སྨོས་པས་དགང་བ་འམ། ཡང་ན་ཁ་ལུང་ལ་སོགས་པའི་སྨན་རྣ་བར་བླུགས་པར་བྱའོ། །དག་བྱས་རྩུབ་པར་གྱུར་ན་ནི། །མར་གྱི་ཉིང་ཁུས་དགང་བར་
བྱ། །ཞེས་བྱ་བ་ལ། སྦྱང་བས་སྦྱངས་ཤིང་དག་པར་བྱས་པས་རྣ་བ་རྩུབ་པར་གྱུར་ན། མར་གྱི་ཉིང་ཁུས་རྣ་བ་གཉིས་བཀང་བ་ཕན་ནོ། །རིམ་འདི་རྣ་སྤབས་གང་ལའང་བྱ། །ཞེས་བྱ་བ་ལ། རྣ་བ་རྣ་སྤབས་ཀྱིས་གང་བ་ལ་ཡང་སྔར་བཤད་པའི་རིམ་པ་འདི་ཉིད་ཕན་ནོ། །གཡའ་
དང་སྐྲང་ལ་རྣ་སྨན་སོགས། །བད་ཀན་སེལ་བར་བྱེད་པ་ཕན། །སྐྲང་ལ་ཚ་དང་དྲོ་བས་བྱུག །ཅེས་བྱ་བ་ལ། རྣ་བ་གཡའ་བ་ཞེས་བྱ་བའི་རྣ་ནད་ལ་ནི། རྣ་སྨན་དང་། དུད་བརྔུབ་པ་དང་། བཟའ་བ་དང་བཏུང་བ་ལ་སོགས་པ་བད་ཀན་སེལ་བ་དག་ཕན་ནོ། །དེ་བཞིན་དུ་སྐྲང་
เล่ม ๒๐๒ · หน้า 176b
པ་ལ་ཡང་རྣ་སྨན་དུད་པ་བརྔུབ་པ་ལ་སོགས་པས་ཕན་ནོ། །འདིར་སྐྲང་པ་ལ་ནི་ཁྱད་པར་དུ་ཚ་བ་དང་། དྲོ་བའི་སྨན་གྱི་ལྡེ་གུས་བྱུག་པས་ཕན་ནོ། །རྣ་བ་རྣག་འཛག་འབུ་ཅན་ལ། །རྣ་བ་ཆུ་འཛག་གསོ་བར་བྱ། །ཞེས་བྱ་བ་ལ། རྣ་བ་རྣག་ཅན་དང་རྣ་བ་སྲིན་བུ་ཅན་ལ་ནི་རྣ་བ་ཆུ་འཛག་
པའི་གསོ་བ་ཐམས་ཅད་བྱས་ན་ཕན་ནོ། །མཆོག་ཏུ་རྣ་ནད་སྲིན་ཅན་ལ། །ཡུངས་མར་དྲོན་པོ་བླུགས་པར་བྱ། །ཞེས་བྱ་བ་ལ། རྣ་ནད་སྲིན་བུ་ཅན་ལ་ནི་ཁྱད་པར་དུ་ཡུངས་མར་དྲོན་པོས་དགང་བར་བྱའོ། །རྣ་བའི་འབྲས་ལ་ཁོང་འབྲས་ཀྱི། །གསོ་བ་དང་ནི་སྐྱུག་སྨན་གཏང་། །
ཞེས་བྱ་བ་ལ། རྣ་བའི་ཁོང་འབྲས་སྨིན་པ་དང་། །མ་སྨིན་པ་ལ་ནི་སྔར་བཤད་པའི་ཁོང་འབྲས་ཀྱི་གསོ་བ་ཇི་སྐད་བཤད་པ་བཞིན་བྱ་ཞིང་སྐྱུག་སྨན་གཏང་བས་གསོ་བར་བྱའོ། །སྣད་པའི་ཁོང་འབྲས་གསོ་བ་ནི། །མཁྲིས་གྱུར་རྣ་གཟེར་གསོ་བར་བྱ། །ཞེས་
བྱ་བ་ལ། སྣད་པའི་ཁོང་འབྲས་ལ་ནི་མཁྲིས་པ་ལས་གྱུར་པའི་རྣ་བ་གཟེར་བའི་གསོ་བ་ཐམས་ཅད་བྱའོ། །འབྲུམ་པ་ཐོར་བུ་སྣ་ལྟར་བྱ། །ཞེས་བྱ་བ་ལ། རྣ་བའི་འབྲུམ་བུ་དང་རྣ་བའི་ཐོར་བུ་ལ་ནི་སྣའི་འབྲུམ་བུ་དང་ཐོར་བུ་ལྟར་གསོ་བར་བྱའོ། །རྣ་བ་
གས་པ་མ་སྨིན་ལ། །རྣ་བའི་ཁོང་འབྲས་ལྟར་གསོ་ཞིང་། །ནད་གཞི་ཇི་བཞིན་ལས་ཀྱང་བྱ། །ཞེས་བྱ་བ་ལ། རྣ་བ་གས་པ་ཞེས་བྱ་བའི་ནད་མ་སྨིན་པ་ལ་ནི་རྣ་བའི་ཁོང་འབྲས་ཀྱི་གསོ་བ་ཇི་སྐད་སྨོས་པ་ལྟར་བྱ་ཞིང་། དེ་བཞིན་དུ་ནད་གཞི་ཇི་ལྟ་བུའི་ཚུལ་ཀྱང་གསོ་བར་བྱའོ་། །རྣ་ཤལ་
སྐམ་ལ་རླུང་གཟེར་ལྟར། །རྣ་སྨན་བསྐུ་བ་ལ་སོགས་བྱ། །དུགས་བྱ་སྙི་བར་གྱུར་པ་ན། །རྣ་ཤལ་ཏིལ་མར་བསྐུས་ཤིང་མཉེ། །ཤིང་མངར་པི་ལ་ཡའི་ས་བོན། །ཨ་ཤྭ་གནྡྷ་ནས་བཅས་བསྐུ། །ཞེས་བྱ་བ་ལ། རྣ་ཤལ་སྐམ་པ་ཞེས་བྱ་བའི་རྣ་བའི་ནད་ལ་ནི་རླུང་ལས་གྱུར་པའི་རྣ་
བའི་གཟེར་ལྟར་རྣ་སྨན་དང་བསྐུ་བ་དང་དུགས་ལ་སོགས་པ་བྱའོ། །དེ་ལྟར་དུགས་ཀྱིས་སྙི་བར་གྱུར་པ་དང་། རྣ་ཤལ་ཏིལ་མར་གྱིས་བསྐུས་ལ་པི་ལ་ཡའི་ས་བོན་ལ་སོགས་པ་བསྐུ་ཞིང་མཉེ་བར་བྱའོ། །དེ་ནས་རྒྱས་བྱེད་སྣུམ་གྱིས་ནི། །བསྐུ་བ་རྟག་ཏུ་བསྟེན་པར་བྱ། །ཞེས་
เล่ม ๒๐๒ · หน้า 177a
བྱ་བ་ལ། དེ་ནས་དེའི་འོག་ཏུ་རྣ་ཤལ་མཉེས་པའི་རྗེས་ལ་རྒྱས་པར་བྱེད་པའི་སྣུམ་གྱིས་རྟག་ཏུ་བསྐུ་བར་བྱའོ། །ཉེའུ་ཤིང་ཨ་ཤྭ་གནྡྷ་དང་། །ཨེ་རཎྜ་དང་པ་ཡ་སྱ། །ཛི་བ་ཀ་དང་འོ་མར་བཅས། །ཏིལ་མར་བསྐོལ་བས་བསྐུ་བ་ནི། །རྣ་ཤལ་རྒྱས་
བྱེད་མཆོག་ཡིན་ནོ། །ཞེས་བྱ་བ་ལ། ཉེའུ་ཤིང་ལ་སོགས་པ་བསྐོལ་བའི་ཏིལ་མར་གྱིས་བསྐུ་བ་ནི་རྣ་ཤལ་མཆོག་ཏུ་རྒྱས་པར་བྱེད་པ་ཡིན་ནོ། །འཚོ་བྱེད་སྡེ་ཚན་ལྡེ་གུ་དང་། རླན་ཅན་ཤ་ནི་བསྐོལ་བ་དག །རྣ་ཤལ་འཕེལ་ཞིང་རྒྱས་བྱེད་ཡིན། །ཞེས་བྱ་བ་ལ། འཚོ་
བྱེད་ཀྱི་སྡེ་ཚན་གྱི་ལྡེ་གུ་ལ་སོགས་པ་དང་བསྐོལ་བ་ཡང་ཕན་ནོ། །རྣ་ཤལ་རབ་ཟད་བཅད་པས་ནི། །ལྷག་མ་སྦྱར་ལ་གསོ་ཞིང་བསྐྱེད། །ཅེས་བྱ་བ་ལ། རྣ་ཤལ་ཤིན་ཏུ་ཟད་ཅིང་ཆད་དུ་ཉེ་བ་ལ་ནི། གཙགས་བུས་བཅད་ལ་རྣ་ཤལ་ལྷག་མ་སྦོམ་པོ་དེ་ཇི་སྐད་བཤད་པའི་རིམ་
པ་བཞིན་དུ་སྦྱར་ལ། དེའི་འོག་ཏུ་གསོ་ཞིང་བསྐྱེད་པར་བྱའོ། །དེ་བཞིན་རྒྱུད་འདྲ་འཚོ་ཙམ་བྱ། །ཞེས་བྱ་བ་ལ། ཚུལ་དེ་བཞིན་དུ་པི་ཝང་གི་རྒྱུད་འདྲ་བ་ཞེས་བྱ་བའི་རྣ་བའི་ནད་ཀྱང་འདི་བཞིན་དུ་རེ་ཞིག་མི་ལ་བ་ཙམ་དུ་གསོ་བར་བྱའོ། །འབྱར་བ་ཞེས་བྱ་བའི་མིག་ནད་ལ་ཡང་
བཤད་མ་ཐག་པའི་ཆོ་ག་འདི་ཉིད་བྱའོ། །འབྱར་བ་ལ་ཡང་ཆོ་ག་འདི། །གནོད་གྱུར་བསིལ་སྨན་བསྐུ་བ་དང་། སྲིན་བུ་པད་པས་ཁྲག་དབྱུང་བྱ། །ཞེས་བྱ་བ་ལ། །གནོད་པར་གྱུར་པ་ཞེས་བྱ་བའི་རྣ་ནད་ལ་ནི་བསིལ་སྨན་བསྐུ་ཞིང་སྲིན་བུ་པད་པས་གཏར་ག་བྱའོ། །འཛམ་བུ་ཨ་
མྲའི་ལོ་མ་དང་། །བ་ལ་ཤིང་མངར་སེང་ཕྲོམ་ཏིལ། །བཙོད་དང་ཨུཏྤལ་ཀ་དམ་པ། །ཐལ་ཏྲེས་ཏིའི་མར་བཅས་པ་དང་། །སྐྱུར་རྩབས་བཅས་པར་བསྐོལ་བ་འདི། །ཏིལ་མར་བསྐུ་བར་བྱ་བ་དང་། །མེ་དབལ་སྐབས་བཤད་མར་གྱིས་བསྐུ། །ཞེས་བྱ་བ་ལ། གནོད་
པར་གྱུར་པ་ཞེས་བྱ་བའི་རྣ་ནད་ལ་ནི། འཛམ་བུ་ལ་སོགས་པའི་ལྡེ་གུ་དང་། ཏིལ་མར་དང་དེའི་བཞི་འགྱུར་གྱི་སྐྱུར་རྩབས་དང་བསྐོལ་བའི་ཏིལ་མར་བསྐུས་ན་ཕན་ནོ། །ཡང་ན་མེད་བལ་གྱི་སྐབས་སུ་བཤད་པའི་སྨན་མར་གྱིས་བསྐུ་བར་བྱའོ། །མཉེ་བགོ་ཏ་རྐ་ཏ། །ཞག་དང་
เล่ม ๒๐๒ · หน้า 177b
བཅས་པའི་ཏིལ་མར་དང་། ཏཱ་ལའི་ལོ་མ་ཨ་རྐ་དང་། །ཨ་ཤྭ་གནྡྷ་བྱེའུ་རུག་པ། །སོ་མ་ར་ཛ་འབྲས་བུ་དང་། །རྒྱམ་ཚ་ལང་ཀ་ལིར་བཅས་བསྐོལ། །ཏིལ་མར་བསྐུ་བར་བྱ་བ་དང་། །རྣ་སྨན་རྣོན་པོ་གཏང་བར་བྱ། །ཞེས་བྱ་བ་ལ། མཉེ་བ་ཞེས་བྱ་བའི་རྣ་བའི་ནད་ལ་ནི་གོ་
ཏ་དང་། ཀརྐ་ཏ་ཞེས་བྱ་བ་ཀུ་ཏ་ལིར་གཉིས་ཀྱི་ཞག་དང་བཅས་པའི་ཏིལ་མར་ལ་སོགས་པ་བསྐོལ་བས་བསྐུ་བར་བྱ་བ་དང་། དེ་བཞིན་དུ་རྣ་སྨན་རྣོན་པོ་དག་ཀྱང་གཏང་བར་བྱའོ། །དབུག་ཉེས་པ་ལ་ཨ་སྨན་ཏ། །འཛམ་བུ་ཨ་མྲའི་ལོ་མ་ནི། །བསྐོལ་བའི་ཁུ་བ་བླུགས་པར་
བྱ། །རྣ་ཤལ་ཏིལ་མར་གྱིས་བསྐུ་ཞིང་། །ཤིང་མངར་བཙོད་དང་སྟག་ཚེར་བ། །ཡུང་བའི་ཕྱེ་མ་ཞིབ་པོ་གདབ། །རྒྱ་སྐྱེགས་བྱི་དང་ག་བསྐོལ་བའི། །ཏིལ་མར་གྱིས་ནི་བསྐུས་ན་ཕན། །ཞེས་བྱ་བ་ལ། དབུག་ཉེས་པའི་རྣ་བའི་ནད་ལ་ནི། ཨ་སྨན་ཏ་ཀ་ལ་སོགས་
པ་བསྐོལ་བའི་ཁུ་བ་བླུགས་པར་བྱ་བ་ལ་སོགས་པའི་སྦྱོར་བ་བྱའོ། །ཡང་ན་རྒྱ་སྐྱེགས་ལ་སོགས་པ་དང་བསྐོལ་བའི་ཏིལ་མར་གྱིས་བསྐུས་ན་དབུག་ཉེས་པའི་ནད་སྡུག་བསྔལ་འཕེལ་པ་ཞེས་བྱ་བ་སེལ་བར་བྱེད་དོ། །སྲིན་བུས་ཟོས་ལ་བའི་ལྕི་བས། །ལན་མང་དུ་ནི་དུགས་བྱས་ལ། །
བྱི་དང་ག་ཡི་སྙིང་པོ་ནི། །ལུག་གི་གཅིན་སྦྱར་ལྡེ་གུས་བསྐུ། །ཞེས་བྱ་བ་ལ། སྲིན་བུས་ཟོས་པའི་ནད་རྣ་བ་ལྷགས་པ་ཞེས་བྱ་བའི་ནད་ལ་ནི་བའི་ལྕི་བས་དུགས་བྱ་བ་ལ་སོགས་པའི་སྦྱོར་བ་བྱའོ། །དུག་མོ་ཉུང་དང་ཨིང་གུ་དང་། ཀ་རཉྫ་ཡི་ས་བོན་དང་། །དང་གའི་
ཤུན་པའི་ལྡེ་གུས་བསྐུ། །ཞེས་བྱ་བ་ལ། ཡང་ན་དུག་མོ་ཉུང་ལ་སོགས་པའི་ལྡེ་གུས་བསྐུས་ན་ཡང་ནད་དེ་ལ་ཕན་ནོ། །ཡང་ན་དེ་དང་ནིམ་པ་ཡི། །ལོ་མ་ན་ལེ་ཤམ་དང་བཅས། །སྦྲང་རྩིའི་ལྡེ་གུས་རྨ་ལ་བསྐུ། །ཞེས་བྱ་བ་ལ། ཡང་ན་འབུས་བ་ལྡགས་པ་ཞེས་
བྱ་བའི་ནད་དེ་ལ། སྔར་བཤད་པའི་སྨན་དུག་མོ་ཉུང་ལ་སོགས་པ་དེ་དག་ཀུན་དང་ནིམ་པའི་ལོ་མ་ལ་སོགས་པའི་སྨན་ལུག་གི་གཅིན་དང་སྦྱར་བའི་ལྡེ་གུས་བསྐུ་བར་བྱའོ། །རྣ་བ་ཆད་ལ་སྦྱང་བྱས་ཏེ། །སྐྱོན་མེད་ཁྲག་དང་དེ་འཚམ་པའི། །བཅིང་བ་དག་གིས་སྦྱར་
เล่ม ๒๐๒ · หน้า 178a
བར་བྱ། །སྦྱར་ནས་འཕྲལ་བཅང་སྦྱང་བར་བྱ། །ཞེས་བྱ་བ་ལ། རྣ་བའི་ནད་ཀྱིས་ཆད་པའམ་སྟོབས་ཀྱིས་དྲངས་ཏེ་རྣ་བ་ཆད་པ་ལ་སློན་དང་ཁྲུས་ཀྱིས་སྦྱར་བ་བྱས་ཏེ། ནད་ཀྱི་སློན་མེད་པའི་ཁྲག་དང་། དེ་དང་འཚམ་པའི་བཅིང་བདག་གིས་བཅིངས་
ཏེ་སྦྱར་བར་བྱ་ལ། དེ་ལྟར་སྦྱར་ནས་ནི་བཅད་མ་ཐག་པའི་དག་པར་བྱ་བའི་ཚོགས་སྦྱང་བར་བྱའོ། །དེ་ནས་སྐྲ་མཐར་མདུད་བྱས་ཏེ། །རྣ་ཤལ་བཅད་དང་ཞལ་ཞལ་བྱ། །བཅད་པ་དང་ནི་བསྲུང་བ་བྱ། །མཚམས་ནི་མཉམ་པར་སྦྱར་བྱ་ཞིང་། །མཐོན་དམན་མེད་པ་ཉིད་དུ་བྱ། །
ཞུན་མར་དང་ནི་སྦྲང་རྩིས་བྱུག །རས་བལ་གྱིས་ནི་གླན་པ་དང་། །སྐུད་པས་དམ་ལྷོད་རན་པར་བཅིངས། །རྨ་ཡི་ཁྲག་ནི་བཅད་པ་ཡི། །སྨན་གྱི་ཕྱེ་མས་གདབ་བྱ་ཞིང་། །སྤྱོད་པ་དེ་ལ་བསྟན་པར་བྱ། །ཞེས་བྱ་བ་ལ། དེ་ནས་དེའི་རྗེས་ལ་ནད་པའི་སྐྲའི་ཐ་མའི་མཚམས་སུ་
མདུད་པ་བྱས་ལ། །རྣ་ཤལ་བཅད་པ་དང་། ཞལ་ཞལ་བྱ་བ་དག་བྱས་ནས་རྣ་བའི་མཚམས་ཤིན་ཏུ་མཉམ་ཞིང་ལེགས་པར་སྦྱར་ལ། མཐོན་དམན་མེད་པ་ཉིད་དུ་བྱས་ཏེ་བཞག་ལ། དེའི་འོག་ཏུ་ཞུན་མར་དང་སྦྲང་རྩིས་བྱུགས་པའི་རས་བལ་གྱི་གླན་ལ། སྐུད་པས་ཤིན་ཏུ་
དམ་པར་ཡང་མ་ཡིན་ལ། ཤིན་ཏུ་ལྷོད་པ་ཡང་མ་ཡིན་པར་རན་པར་བཅིངས་ལ། ཁྲག་བཅད་པའི་ཕྱེ་མ་གཏར་གའི་སྐབས་ནས་སྨོས་པའི་ཕྱེ་མས་གདབ་པར་བྱ་ལ། དེའི་འོག་ཏུ་རྨ་ལ་ཕན་ཞིང་གནོད་པ་མེད་པའི་སྦྱོད་པ་གང་དག་ཡིན་པ་དེ་ལ་བསྟན་ཅིང་བསླབ་པར་བྱའོ། །
ཞག་བདུན་ནས་ནི་མ་བཙོས་པའི། །ཏིལ་མར་བསྐུས་ལ་རས་བལ་དགྲོལ། །ལེགས་འབྱོར་སྤུ་ནི་སྐྱེས་པ་དང་། །མཚམས་འབྱོར་མཉམ་ཞིང་བརྟན་པ་དང་། །ཚད་ལྡན་ནད་ནི་མེད་པ་དང་། །རིམ་གྱིས་རྣ་བ་སྐྱེད་པར་བྱེད། །ཅེས་བྱ་བ་ལ། ཞག་བདུན་གྱི་རྗེས་ལ་ཏིལ་མར་སྨན་
མ་བཙོས་པས་བསྐུས་ལ། རས་བལ་དལ་གྱིས་བཀྲོལ་ཏེ། །རྣ་བ་ལེགས་པར་འབྱོར་ཞིང་སྤུ་སྐྱེས་པ་དང་། མཚམས་འབྱོར་ཞིང་མཉམ་པ་ལ་སོགས་པ་དང་ལྡན་ནས་རིམ་གྱིས་རྣ་བ་དེ་སྐྱེད་ཅིང་འཕེལ་བར་བྱེད་དོ། །ཉ་ལྕིབས་ཁ་སྲལ་ཕྲེའུ་དང་། །བྲི་ཧཏི་འབྲས་སེར་པོ་གཉིས། །
เล่ม ๒๐๒ · หน้า 178b
བ་ལ་ཧ་ཏི་པི་པི་ལིང་། །ཨ་ཤྭ་གནྡྷ་ཡུངས་དཀར་སེར། །ཀོ་ཤཏ་ཀའི་རྩ་བ་དང་། །ཀར་བཱི་ར་རུ་ཤི་ཀ །ལོ་མ་བདུན་པ་པི་པི་ལིང་། །ས་ནག་སྦྲང་མའི་གནས་དང་ནི། །བྱེའུ་ཆུ་སྐྱེས་སྲིན་བུའི་ཤ། །དེ་བཞིན་སེང་ཕྲོམ་སྡོང་བུ་རྣམས། །འདི་དག་ལྡེ་གུ་ཏིལ་མར་བཅས། །
མ་ཧེའི་མར་དང་གླང་པོ་རྟའི། །གཅིན་དང་བཅས་པར་བསྐོལ་བ་ནི། །བསྐུས་ན་རྣ་བ་འཕེལ་བྱེད་མཆོག །ཅེས་བྱ་བ་ལ། །ཉ་ལྕིབས་ལ་སོགས་པ་དང་སྦྲང་མས་བརྩིགས་ཤིང་རང་གི་གནས་སུ་བྱས་པའི་ས་དང་། བྱིའུ་ལ་སོགས་པ་འདི་དག་བཏགས་ཏེ་ལྡེ་གུར་བྱས་ལ་
ཏིལ་མར་དང་བཅས་པའི་མ་ཧེའི་གཅིན་ལ་སོགས་པ་ཐལ་ཆེས་པ་ཙམ་གྱི་བར་དུ་བསྐོལ་བས་བསྐུས་ན་ཡང་རྣ་བ་འཕེལ་བར་བྱེད་པའི་སྨན་གྱི་མཆོག་ཡིན་ནོ། །དེ་ནས་ན་ཚོད་ལྡན་པ་ཡི། །སྦྱང་བ་བྱས་ནད་རྣ་ཆད་གསོ། །སྣ་དང་མཉམ་པའི་ཤ་ལྤགས་ནི། །མཁུར་ཚོས་ལས་
ནི་བཅད་ནས་ཀྱང་། །རྣ་དང་ཉེ་བའི་ཤ་ལྤགས་ནི། །སྲབ་མོ་ཉིད་དུ་བཞར་བར་བྱ། །དེ་ནས་རས་བལ་བཅས་པ་ཡི། །ཁབ་ཀྱིས་མཁུར་བ་བཙེམ་པར་བྱ། །ཞེས་བྱ་བ་ལ། དེ་ནས་མི་ན་ཚོད་དང་ལྡན་ཞིང་གཞོན་པར་གྱུར་པ་སྦྱང་བ་བྱས་ནད་རྣ་བ་ཆད་པ་དེ་གསོ་བར་བསྟེ། །དེ་ཡང་
ནད་པ་དེ་ཉིད་ཀྱི་སྣ་དང་མཉམ་པའི་ཤིང་ལ་སོགས་པའི་ཤུན་པ་བཅད་ལ། དེ་དང་མཉམ་པའི་པགས་པ་དང་ཤ་མཁུར་ཚོས་ལས་བཅད་དེ་རྣ་བ་དང་ཉེ་བའི་ཤ་དང་པགས་པ་དེ་སྲབ་མོར་བྱའོ། །དེ་ནས་རས་བལ་གྱིས་སྐུད་པ་དང་ལྡན་པའི་ཁབ་ཀྱིས་མཁུར་བ་ནས་མཁུར་བར་བཙེམས་ཏེ་
བརྟོད་པར་བྱའོ། །སྣ་བཅད་མཚོན་གྱིས་བཞར་ནས་ནི། །མཁུར་ཚོས་ལས་བཅད་པགས་པ་ཡིས། །སྣ་ནི་ལེགས་མེར་བཙེམ་པར་བྱ། །ཁ་ཡི་དབུགས་ནི་དབྱུང་བའི་ཕྱིར། །སྣར་ནི་སྦུ་གུ་ཅན་གཞུག་བྱ། །ཞེས་བྱ་བ་ལ། སྣ་དེ་བས་དེའི་འོག་སྣ་བཅད་པའི་འཕྲོ་དེ་
མཚོན་གྱིས་བཞར་ནས་མཁུར་ཚོས་ལས་བཅད་པའི་པགས་པ་རློག་སྟེ། པགས་པ་སྟེང་དུ་ཕྱུང་ལ་སྣ་དང་ལེགས་པར་བཙེམས་ལ་གླན་ནས་ལེགས་པར་དྲུབ་པར་བྱའོ། །དེ་ནས་ཁའི་དབུགས་དབྱུང་བར་བྱ་བའི་ཕྱིར་སྣའི་ནང་དུ་སྦུབས་ཅན་སྨྱིག་མ་ལ་སོགས་པ་གཉིས་གཞུག་
เล่ม ๒๐๒ · หน้า 179a
བར་བྱའོ། །དེ་རྗེས་ཏིལ་མར་སློན་པར་བསྐུ། །རྨ་ནི་སྦྲང་རྩིར་སྦྱར་བས་བསྐུ། །ཁྲག་བཅད་པ་ཡི་སྨན་གཞན་ཡང་། །ཞིབ་ཏུ་བཏགས་པའི་ཕྱེ་མས་གདབ། །དེ་ནས་མར་དང་སྦྲང་རྩིས་བསྐུ། །བཅིངས་ལ་སྤྱོད་པ་བསྟན་པར་བྱ། །ཞེས་བྱ་བ་ལ། །
དེའི་འོག་ཏུ་ཏིལ་མར་སློན་པར་བསྐུས་ལ། །རྨ་ཤིང་དང་སྦྲང་རྩིར་སྦྱར་བས་བསྐུ་པ་དང་། །གཞན་ཡང་ཁྲག་བཅད་པའི་སྨན་ཞིབ་ཏུ་བཏགས་པའི་ཕྱེ་མས་བསྐུ་བར་བྱའོ། །དེ་ནས་སྦྲང་རྩིས་བསྐུས་ཏེ་རས་མས་དཀྲིས་ལ་ཆུ་དྲོན་གྱིས་ཉེར་སྦྱོད་བྱ་བ་ལ་སོགས་པ་སྤྱོད་པ་བསྟན་པར་བྱའོ། །
དེ་ནས་གནས་སྐབས་ཤེས་བྱས་ནས། །རྨ་གསར་གསོ་བའི་ཆོ་ག་བྱ། །ཞེས་བྱ་བ་ལ། དེ་ནས་དེའི་འོག་ཏུ་གནས་སྐབས་ཀྱི་ཁྱད་པར་ཤེས་པར་བྱས་ལ། རྨ་གསར་པ་གསོ་བའི་ཆོ་ག་འོག་ནས་བཤད་པ་དག་བྱའོ། །རྨ་འབྱོར་སྣ་ཡི་ཉེ་འཁོར་གྱི། །ཤ་ལྷག་ལེགས་པར་
གཅད་པར་བྱ། །དེ་ནས་ཤིན་ཏུ་ཞིབ་ཏུ་བཙེམ། །དམའ་བ་དག་ཀྱང་བསྐྱེད་པར་བྱ། །ཞེས་བྱ་བ་ལ། རྨ་དེ་འབྱོར་ནས་སྣའི་ཉེ་འཁོར་གྱི་ཤ་ལྷག་གང་དག་ཡོད་པ་གཅད་པར་བྱའོ། །དེ་ནས་ཡང་དེ་བཞིན་དུ་ལེགས་པར་བཙེམས་ཤིང་དམའ་བར་གྱུར་པ་ནི་ཤ་སྐྱེད་
པའི་ཆོ་གས་སླར་ཤ་བསྐྱེད་པར་བྱའོ། བཅད་མ་ཐག་ལ་ཅི་རིགས་པར། །བཞག་སྟེ་ཆོ་ག་འདི་ཉིད་བྱ། །ཞེས་བྱ་བ་ལ། འཕྲལ་དུ་སྣ་བཅད་མ་ཐག་པ་ལ་ནི་ཅི་རིགས་པར་སྣ་དེ་ཉིད་གླན་ཏེ་གསོ་པའི་ཆོ་ག་འདི་ཉིད་བྱའོ། །མཆུ་བཅད་པ་ལ་སྦུ་གུ་དག །མ་གཏོགས་སྣ་སྦྱར་
བཞིན་དུ་བྱ། ཞེས་བྱ་བ་ལ། མཆུ་བཅད་པ་ལ་ཡང་སྣའི་ནང་དུ་སྦུ་གུ་གཞུག་པ་མ་གཏོགས་པ་སྣ་སྦྱར་བའི་ཆོ་ག་ཐམས་ཅད་འདི་ཉིད་ལ་སྦྱར་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་
སྦྱར་བ་ལས། ཕྱི་མའི་གནས་ཀྱི་ལེའུ་བཅོ་བརྒྱད་པའི་རྣམ་པར་འགྲེལ་པའོ།། །།དེ་ནས་སྣ་ནད་ཀྱི་དམིགས་ཤེས་པ་བཤད་པར་བྱའོ། །ཞེས་བྱ་བ་ལ། ནམ་ཚོང་ཡན་ཆད་ཀྱི་ནད་བཤད་པའི་སྐབས་ཀྱིས་ན། སྣ་ནད་ཀྱི་ནད་གཞི་ལ་སོགས་པ་བསྟན་པར་བྱ་བའི་
เล่ม ๒๐๒ · หน้า 179b
ཕྱིར་ལེའུ་འདི་བརྩམས་པ་ཡིན་ནོ། །བ་མོ་རླུང་དང་རྡུལ་དང་ནི། །སྨྲ་དྲགས་གཉིད་ལོག་གཉིད་གཡར་དྲགས། །སྔས་ནི་མཐོ་དང་དམའ་དྲགས་དང་། ཆུ་གཞན་འཐུངས་པར་གྱུར་པ་དང་། །ཆུ་མང་འཐུངས་དང་ཉལ་པོ་དང་། །སྐྱུགས་དང་མཆི་མ་བཀག་པ་ཡིས། །
རླུང་ཤས་ཆེ་བའི་ནད་འཁྲུགས་ནས། །སྣ་ནི་སྲ་བ་ཉིད་འགྱུར་ཞིང་། །ཆམ་པ་སྐྱེད་པར་བྱེད་པ་ཡིན། །འཕེལ་ན་ཟད་པ་སྐྱེད་པར་བྱེད། །ཅེས་བྱ་བ་ལ། བ་མོ་ལ་སོགས་པའི་ཉེས་པ་ལས། རླུང་ཤས་ཆེ་བའི་ནད་འཁྱུགས་ཤིང་ལྡང་བར་གྱུར་ནས། སྣ་སྲ་ཞིང་འཐས་
ལ་རྒྱས་པར་གྱུར་པས། ཆམ་པ་ཞེས་བྱ་བའི་ནད་སྐྱེད་པར་བྱེད་པ་ཡིན་ནོ། །དེ་འཕེལ་པ་ན་མ་བཅོས་ཤིང་ཡལ་བར་བོར་ན་ཟད་པ་ཞེས་བྱ་བའི་ནད་སྐྱེད་པར་བྱེད་དོ། །དེ་ལ་བ་མོ་ནི་མཚན་མོའི་དུས་སུ་ནམ་མཁའ་ལས་བབ་པའི་ཆུ་གྲང་མོ་བ་བས་པའོ། །དྲགས་པ་ནི་གཉིད་
ལོག་པ་དང་། མ་ལོག་པ་གཉིས་ཀ་དང་སྦྱར་རོ། །སྔས་ནི་མལ་གྱི་མགོ་བོའི་ཕྱོགས་སུ་བཞག་པ་གང་ཡིན་པའོ། །ཆུ་གཞན་འཐུངས་པ་ནི་སྔར་བསྟན་པ་དང་མི་འདྲ་བའི་ཆུ་གཞན་འཐུངས་པའོ། །གཞན་དག་ནི་གོ་བར་ཟད་དོ། །དེ་ལ་རླུང་གྱུར་ཆམ་པ་ནི། །ཁ་སྐམ་
སྦྲིད་པ་དྲག་ཏུ་འབྱུང་། །སྣ་འགགས་ཟུག་ཅིང་ན་བ་དང་། །མུར་འགྲམ་སོ་དང་ཀླད་པ་དང་། །སྨིན་མ་ནས་ནི་སྣ་རྩེའི་བར། །སྲིན་བུ་རྒྱུ་བ་སྙམ་དུ་སེམས། །སྐད་འགགས་རིང་ནས་སྨིན་པ་དང་། །མཆིལ་སྣབས་གྲང་བར་འཛག་པ་ཡིན། །ཞེས་བྱ་བ་ལ། དེ་ལ་སྣ་ནད་ཆམ་
པ་དེ་དག་གི་ནང་ནས་རླུང་ལས་གྱུར་པའི་ཆམ་པ་ནི་ཁ་སྐམ་པ་ལ་སོགས་པ་ནས། མཆིལ་སྣབས་གྲང་མོ་འཛག་པར་བྱེད་པའི་བར་ཡིན་ནོ། །མཁྲིས་གྱུར་སྐོམ་དང་རིམས་ཀྱིས་འདེབས། །མགོ་འཁོར་སྣ་ནང་འབྲུམ་པ་འབྱུང་། །རྣ་རྩེ་གནག་ཅིང་དྲོ་ལ་རྩུབ། །མཆིལ་སྣབས་
དམར་སེར་འཛག་པ་ཡིན། །ཞེས་བྱ་བ་ལ། མཁྲིས་པ་ལས་གྱུར་པའི་ཆམ་པ་ནི། སྐོམ་དད་ལ་སོགས་པ་ནས་མཆིལ་མ་དང་སྣབས་རྩུབ་པ་དང་དམར་བ་དང་སེར་བ་འཛག་པའི་བར་ཡིན་ནོ། །བད་ཀན་ལུད་པ་དབུགས་མི་བདེ། །སློན་ཞིང་ལུས་ལྕི་ཡི་ག་འཆུས། །ཁ་མངར་
เล่ม ๒๐๒ · หน้า 180a
བྲོ་ཞིང་གཡའ་བ་དང་། །མཆིལ་སྣབས་སྣུམ་དཀར་སྐ་བ་འཛག །ཅེས་བྱ་བ་ལ། བད་ཀན་ལས་གྱུར་པའི་ཆམ་པ་ནི་དབུགས་མི་བདེ་བ་ལ་སོགས་པ་ཡིན་ནོ། །འདུས་གྱུར་མཚན་ཉིད་ཀུན་དང་ལྡན། །རྒྱུ་མེད་འཕེལ་དང་འགྲིབ་པར་བྱེད། །ཅེས་བྱ་
བ་ལ། ནད་གཞི་གསུམ་ཆར་འདུས་པ་ལས་བྱུང་བའི་ཆམ་པ་ནི། རླུང་དང་། མཁྲིས་པ་དང་། བད་ཀན་དང་གསུམ་ཆར་གྱི་མཚན་ཉིད་དང་ལྡན་པ་དང་། དེ་གློ་བུར་དུ་རྒྱུ་མེད་པར་ཆེད་འགའ་ནི་འཕེལ། ཆེད་འགའ་ནི་འབྲི་བར་བྱེད་པ་ཡིན་ནོ། །ནད་ཁྲག་སྣ་ཡི་རྩར་ཞུགས་ནས། །
ཆམ་པས་འདེབས་པར་བྱེད་འགྱུར་བ། །བྲང་ན་ཚོར་བ་མེད་པ་དང་། །མིག་དམར་དབུགས་ཀྱི་དྲི་མི་ཞིམ། །མིག་དང་རྩ་བ་སྣ་གཡའ་ཞིང་། །འདི་ནི་མཁྲིས་གྱུར་མཚན་ཉིད་ལྡན། །ཞེས་བྱ་བ་ལ། ནད་ཁྲག་ལས་གྱུར་པའི་ཆམ་པ་ནི། བྲང་ཚོར་བ་མེད་ཅིང་བེམ་བེམ་
པར་འདུག་པ་དང་། མིག་དམར་པོ་ལ་སོགས་པ་དང་། མཁྲིས་པ་ལས་གྱུར་པའི་ཆམ་པའི་མཆན་ཉིད་དང་ལྡན་པ་ཡིན་ནོ། །ཆམ་པ་ཐམས་ཅད་མ་གསོས་ན། །གནོད་པ་མི་བཟད་སྐྱེད་བྱེད་འགྱུར། །ཞེས་བྱ་བ་ལ། བཤད་མ་ཐག་པའི་ཆམ་པ་ཐམས་ཅད་ཡལ་བར་
བོར་ན། ནད་མི་བཟད་ཅིང་དྲག་པོ་སྐྱེད་པར་བྱེད་དོ། །ཇི་སྐད་བཤད་པའི་བླ་བརྣན་ནི། །འཕེལ་བས་དབང་པོ་ཀུན་གནོད་བྱེད། །མེ་དྲོད་ཉམས་ཉེས་དབུགས་མི་བདེ། །ལུད་པ་བྲང་དང་རྩིབ་ལོགས་ཟུག །གློ་བུར་དུ་ནི་ཤས་ཆེར་འཁྲུགས། །ཁྲ་དྲི་ང་ཞིང་སྐམ་པར་བྱེད། །སྣ་
ནང་འདྲུལ་ཞིང་སྐམ་པ་དང་། །ཡང་ཡང་སྣ་འགགས་དག་པར་བྱེད། སྣབས་ནི་རྣག་འདྲ་དཀར་ཞིང་དམར། །དུད་པ་ཅན་ནི་འཛག་པར་འགྱུར། །འདི་ལ་སྲིན་བུ་སྣུམ་ཞིང་རིང་། །དཀར་ཞིང་ཕྲ་བ་འབྱུང་བར་འགྱུར། །ཞེས་བྱ་བ་ལ། ཆམ་པས་གནོད་ཅིང་མ་རུངས་པར་གྱུར་པ་དེ་ངི་
སྐད་བཤད་པའི་བླ་བརྣན་འཕེལ་ཞིང་རྒྱས་པས་དབང་པོ་ཀུན་ལ་གནོད་ཅིང་གདུང་བར་བྱེད་པ་དང་། །དེ་བཞིན་དུ་མེ་དྲོད་ཉམས་པ་ལ་སོགས་པ་བྱེད་པ་དང་། །དེ་བཞིན་དུ་ཡང་དང་ཡང་དུ་སྣ་འདྲུལ་བ་དང་། སྐམ་པར་བྱེད་པ་དང་། སྣ་འགགས་པ་དང་དག་པར་ཡང་དང་ཡང་དུ་བྱེད་པ་ལ་
เล่ม ๒๐๒ · หน้า 180b
སོགས་པ་དང་། འདི་ལ་སྲིན་བུ་སྣུམ་པ་ལས་སྐྱེ་ཞིང་འབྱུང་བར་བྱེད་པ་ཡིན་ནོ། །དེ་སྨིན་མཚན་པ་ལུས་ཡང་ཞིང་། །སྦྲིད་པ་ཞི་བར་གྱུར་པ་དང་། །སྣབས་ནི་སྤྱིན་ཞིང་སེར་བ་དང་། །དྲི་དང་རོ་ནི་ཚོར་བ་ཡིན། །ཞེས་བྱ་བ་ལ། ཆམ་པ་དེ་སྨིན་པར་གྱུར་པའི་མཚན་མ་ནི། ལུས་ཡང་
པས་དྲི་དང་རོ་ཚོང་བའི་བར་ཡིན་ནོ། །སྣབས་སྦྱིན་ཞིང་སེར་བ་ནི་སྤྲ་ཚིལ་ལྟ་བུར་འབྱུང་བའོ། །སྣར་ནི་རྣོན་པོ་བརྔུབས་པ་དང་། །ཉི་འོད་སྐུད་པ་རྩ་སོགས་དང་། །རླུང་འཁྲུགས་བྱེད་པ་གཞན་གྱིས་ཀྱང་། །སྣ་ཡི་མཚུལ་པར་ཞུགས་གྱུར་པས། །བསྐྱོད་དེ་རླུང་ནི་འཁྲུགས་གྱུར་པ། །
སུམ་མདོར་ཞུགས་འགྱུར་འགགས་ནས་ནི། །ལྡོག་ནས་མི་བཟད་སྦྲིད་པ་ནི། །སྣབས་འཛག་བཅས་པར་སྐྱེད་པར་བྱེད། །ཅེས་བྱ་བ་ལ། སྣ་ཚ་ཞིང་དྲོ་བ་བརྔུབས་པས་རླུང་འཁྲུགས་པར་བྱེད་པ་དང་། དེ་བཞིན་དུ་དེ་དང་འདྲ་བ་གཞན་གྱིས་ཀྱང་འཁྲུགས་ནས་སྣའི་མཚུལ་པའི་རུས་པ་
འཇམ་པ་གཞོན་ནུ་བསྐྱོད་ཅིང་བསྒུལ་བས་རླང་འཁྲུགས་པར་གྱུར་ལ། དེ་མཚུལ་པའི་སུམ་མདོར་ཞུགས་པ་དང་། རྒྱུ་བ་འགགས་ཏེ་སླར་ལྡོག་ནས་སྦྲིད་པ་མི་བཟད་པ་སྐྱེད་པར་བྱེད་པ་སྟེ། དེའི་མིང་ནི་ཆམ་པ་མ་རུངས་པ་ཞེས་བྱའོ། །སྣ་ཡི་བུ་ག་སྐེམ་བྱེད་ཅིང་། །རླུང་གིས་བད་ཀན་
སྐྱེད་པར་བྱེད། །སྣ་ནང་གྲ་མས་གང་སྙམ་སེམས། །དབུགས་འབྱུང་དཀར་བར་གྱུར་པ་དེ། །སྣ་སྐམས་པ་ཞེས་བྱ་བར་བཤད། །སྣ་རྒྱས་པ་ནི་འབྱུང་འགྱུར་བ། །སྣ་ནི་བཀག་པ་འདྲར་སེམས་ཤིང་། །རླུང་གིས་འགག་པར་བྱེད་པར་འགྱུར། །དབུགས་འབྱུང་དབུགས་རྔུབ་
འགགས་པ་ལས། །བུ་ག་གདངས་པ་ལྟབུ་ཡིན། །ཞེས་བྱ་བ་ལ། རླུང་གིས་སྣའི་བུ་སྐམས་ཏེ་བད་ཀན་སྐྱེད་པར་བྱེད་པ་ལ་སོགས་པའི་ནད་དེ་ནི་སྐམས་པ་ཞེས་བྱའོ་དྲང་སྲོང་རྣམས་ཀྱིས་བཤད་དོ། །སྣ་རྒྱས་པ་ཞེས་བྱ་བའི་སྣ་ནད་ནི་སྣ་བུས་ཤིང་བརྒྱངས་པ་ལྟ་བུར་
འབྱུང་བར་འགྱུར་བ་ལ་སོགས་པ་ཡིན་ནོ། །མཁྲིས་པས་སྣ་ཁུང་རྣགས་གྱུར་པ། །ཤ་ལྦགས་ཚ་ཞིང་གཟེར་དང་བཅས། །དེ་ནི་སྣ་ཡི་ཤུ་བར་བཤད། །ཅེས་བྱ་བ་ལ། མཁྲིས་པ་འཕེལ་བས་སྣ་ཁུང་གི་ནང་རྣགས་པར་གྱུར་ཅིང་སྨིན་ལ་དེའི་ཤ་དང་ལྤགས་པ་ཚ་བ་དང་གཟེ་བ་དང་
เล่ม ๒๐๒ · หน้า 181a
བཅས་པར་འགྱུར་ཏེ། ནད་དེའི་མིང་ནི་སྣའི་ཤུ་བ་ཞེས་བྱའོ། །བད་ཀན་ལས་གྱུར་ཆུ་སེར་ནི། །ཆུ་འདྲ་རྒྱུན་དུ་འཛག་པ་དང་། །མཆོག་ཏུ་མཚན་འཛག་དེ་མིང་ཅན། །ཞེས་བྱ་བ་ལ། བད་ཀན་གྱུར་པའི་ཆུ་སེར་ནི་ཆུ་དང་འདྲ་བ་རྒྱུན་དུ་འཛག་ཅིང་། ཁྱད་པར་དུ་མཚན་
མོ་འཛག་པ་ནི་དེའི་མིང་ཅན་དེ་སྣ་ཆུ་འཛག་པ་ཞེས་བྱའོ། །བད་ཀན་འཕེལ་བས་སྣ་ཁུང་དུ། །བུ་ག་འགགས་ཤིང་ཆམ་པ་སྐྱེད་། །དབུགས་ནི་ངར་ངར་པོར་འབྱིན་ཅིང་། །ཆམ་པ་ལས་ཀྱང་ནད་ཚབས་ཆེ། །སྣ་ལས་ལུག་ལྟར་རྣག་འཛག་ཅིང་། །རྒྱུན་དུ་སྤྱི་བག་སེར་པོ་དང་། །
སྨིན་མའི་རྣག་ནི་འཛག་འགྱུར་ཞིང་། །དེ་ཡི་སྣ་ནི་སྣབས་བཅས་ཡིན། །ཞེས་བྱ་བ་ལ། སྣའི་ནང་དུ་བད་ཀན་འཕེལ་བས་སྣ་ཁུང་གི་བུ་ག་འགགས་པར་བྱས་ཏེ་དབུགས་ངར་ངར་པོར་འབྱིན་པར་བྱེད་ལ། ཆམ་པ་བས་ནད་ཚབས་ཆེ་ཞིང་ལྷག་པ་དང་སྣའི་ནང་ནས་ལུག་ལྟར་རྣག་
འཛག་པ་དང་། རྣག་དེ་ཡང་རྒྱུན་དུ་འཛག་ཅིང་། སྤྱི་བག་ལ་སོགས་པར་འབྱུང་བར་འགྱུར་བ་སྟེ་ནད་དེ་ནི་ལུག་གི་ཆམ་པ་ཞེས་བྱའོ། །ཁྲག་གི་སྣ་ནི་ཚིག་སྙམ་སེམས། །ཕྱི་དང་ནང་དུ་རེག་མི་བཟོད། །དུ་བ་ལྟ་བུའི་དབུགས་འབྱིན་པ། །བསྲེགས་འདྲ་དེ་ནི་འབར་བ་ཡིན། །ཞེས་
བྱ་བ་ལ། །ཁྲག་འཁྲུགས་པས་སྣའི་ནང་ནས་ཚིག་པ་སྙམ་དུ་སེམས་ཤིང་སྣའི་ནང་དང་། ཕྱི་རོལ་དུ་རེག་མི་བཟོད་པ་དང་། དུ་བ་ལྟ་བུ་འབྱིན་པའི་ནད་དེ་ནི་བསྲེགས་པ་དང་འདྲ་བ་ཡིན་པས་ན་སྣ་ནད་འབར་བ་ཞེས་བྱའོ། །རྐན་གྱི་ཕུགས་སུ་ནད་འཁྲུགས་པས། །རླུང་ནི་ཁ་དང་སྣ་ནས་
འབྱུང་། །མཆིལ་སྣབས་དྲི་ང་འབྱུང་འགྱུར་བ། །དེ་ནི་སྣ་ནད་རུལ་པ་ཡིན། །ཞེས་བྱ་བ་ལ། རྐན་གྱི་རྩ་བའི་ཕུགས་སུ་རླུང་ལ་སོགས་པའི་ནད་འཁྲུགས་པས་རླུང་ཁ་དང་སྣ་ནས་རླུང་འབྱུང་ཞིང་མཆིལ་སྣབས་དྲི་མ་ནམ་པ་འབྱུང་པའི་ནད་དེ་ནི་སྣ་ནད་རུལ་པ་ཞེས་བྱ་བ་ཡིན་ནོ། །འདུས་པ་
འམ་སྣད་པ་ལས་གྱུར་པའི། །རྣག་དང་ཁྲག་ནི་སྣ་ནས་འཛག །མགོ་བོ་ཚ་ཞིང་ན་བྱེད་པ། །དེ་ནི་རྣག་ཁྲག་ཅན་ཞེས་བཤད། །ཅེས་བྱ་བ་ལ། སྣད་ཅིང་རྨ་བྱུང་པ་ལས་གྱུར་པའི་རྣག་དང་ཁྲག་འདྲེས་པ་འཛག་པ་ལ་སོགས་པ་དེ་ནི་མིག་རྣག་ཁྲག་ཅན་ཞེས་བྱའོ། །རླུང་གིས་མཁྲིས་པ་
เล่ม ๒๐๒ · หน้า 181b
བད་ཀན་དག །སྣ་ནི་སྐམས་པར་གྱུར་པ་ལས། །བད་ཀན་སྐམས་ཏེ་གོང་པོར་གྱུར། །དེ་ནི་བསྒོངས་པ་ཞེས་བྱའོ། ཞེས་བྱ་བལ། རླུང་གིས་མཁྲིས་པ་དང་བད་ཀན་སྣའི་ནང་དུ་སྐམས་ཤིང་། གོང་གོང་པོར་གྱུར་པ་དག་ནི་སྣ་ནད་བསྒོངས་པ་ཞེས་བྱའོ། །འབྲུམ་བུ་ཐོར་
བུ་ནད་གཞི་ཡི། །མཚན་ཉིད་ཅི་འདྲ་དག་ལས་དབྱེ། །ཞེས་བྱ་བ་ལ། །སྣའི་འབྲུམ་བུ་དང་། སྣའི་ཐོར་བུ་ནི་ནད་གཞི་གསུམ་གྱི་མཚན་ཉིད་ལས་ཇི་ལྟ་བ་བཞིན་དུ་ཤེས་པར་བྱ་ཞིང་དབྱེ་བར་བྱའོ། །ཀུན་ལས་དབུགས་འབྱུང་དཀའ་པ་དང་། །རྒྱུན་དུ་ཆུ་འཛག་སྦྲིད་པ་འབྱུང་། །སྣ་འགགས་
ལྟ་བུར་སྨྲ་བ་དང་། །སྣ་ནས་རྣག་འཛག་ཀླད་པ་ན། །ཞེས་བྱ་བ་ལ། འབྲུམ་བུ་དང་ཐོར་བུའི་ནད་ཀུན་ལས་ཀྱང་དབུགས་འབྱུང་བར་དཀའ་བ་ནས། ཀླད་པ་ན་བའི་བར་གྱི་ནད་འབྱུང་བར་འགྱུར་རོ། །དེ་ལྟར་རྣམ་པ་བཅོ་བརྒྱད་ལས། །ཆམ་པ་མ་རུངས་འཚོ་བ་ཙམ། །ཞེས་བྱ་བ་ལ །
ཚུལ་དེ་ལྟར་སྣ་ནད་རྣམ་པ་བཅོ་བརྒྱད་ལས་ཆམ་པ་མ་རུངས་པ་ཞེས་བྱ་བ་ནི་རེ་ཞིག་འཚོ་བ་ཙམ་དུ་གསོར་རུང་པ་ཡིན་ལ་ལྷག་མ་རྣམས་ཀྱང་གསོར་རུང་ཉིད་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་
པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་དགུ་པའི་རྣམ་པར་འགྲེལ་པའོ།། །།དེ་ནས་སྣད་ནད་གསོ་བ་བཤད་པར་བྱའོ། །ཞེས་བྱ་བ་ལ། གོ་རིམས་སྔ་མའི་ཚུལ་གྱིས་ན་ལེའུ་འདི་བརྩམས་པ་ཡིན་ནོ། །སྣ་ནད་ཀུན་ལ་དང་པོར་ནི། །རླུང་མེད་ཁང་པར་འདུག་ནས་
ནི། །སྣུམ་ཆོས་དུགས་དང་སྐྱུག་སྨན་དང་། དུད་པ་བརྔུབ་དང་མཁུར་བཀང་བསྟེན། །གོས་ནི་ལྕི་ཞིང་དྲོ་བ་བགོ། །མགོ་བོ་ཤིན་ཏུ་མཐུག་པས་དཀྲི། །ཁ་ཟས་ཡང་སྐྱུར་ལན་ཚྭ་སྣུམ། །དྲོ་བ་དང་ནི་བསྐ་བ་བཟའ། །བུ་རམ་འོ་མ་སྐམ་སའི་ཤ། །ལན་ཚྭ་ཚ་བ་གསུམ་ཤས་ཆེ། །
ནས་དང་གྲ་ནི་མང་པོ་དང་། །ཞོ་དང་སེ་འབྲུའི་ཁུ་བ་བསྟེན། །ཞེས་བྱ་བ་ལ། སྣ་ནད་ཆམ་པ་ཐམས་ཅད་ལ་ནི་ཁོ་ནར་རླུང་མེད་པའི་ཁང་པར་འདུག་པ་དང་། དེ་བཞིན་དུ་སྣུམ་ཆོས་ལ་སོགས་པ་བསྟེན་པ་དང་། གོས་ལྕི་བ་བགོ་བ་ལ་སོགས་པ་དང་། ཁ་ཟས་ཡང་ཞིང་སྐྱུར་བ་ལ་
เล่ม ๒๐๒ · หน้า 182a
སོགས་པ་བཟའ་དང་། བུ་རམ་ལ་སོགས་པའི་བཟའ་བཏུང་བསྟེན་པར་བྱའོ། །ལ་ཕུག་གཞོན་ནུའི་ཁུ་བ་དང་། །ཀུ་ལདྠ་ཡི་ཁུ་བའང་བསྔགས། །ཞེས་བྱ་བ་ལ། ཆམ་པ་དེ་དག་ལ་ལ་ཕུག་བསྐོལ་བའི་ཁུ་བ་དང་། རྒྱ་སྲན་ཀུ་ལདྠ་བསྐོལ་བའི་ཁུ་བ་ཡང་ཕན་
པ་ཡིན་ནོ། །རྩ་བཅུའི་ཁུ་བ་དྲོ་འཇམ་མམ། །ཆང་སྙིང་དངས་མ་བླུད་པར་བྱ། །ཞེས་བྱ་བ་ལ། གལ་ཏེ་སྐོམ་པར་གྱུར་ན་རྩ་བ་བཅུ་བསྐོལ་བའི་ཁུ་བ་ལ་སོགས་པ་བླུད་པར་བྱའོ། །ཙ་རོང་ཨགྣི་མནྠ་དང་། །ཤུ་དག་ཟིར་གོ་སྙོད་སྣོམ། །ཞེས་བྱ་བ་ལ། ཡང་ན་ཙ་རོང་ཞེས་བྱ་བ་སྨན་ཙོར་
ཀ་དང་། ཨགྣི་མནྠ་ལ་སོགས་པ་བཏགས་པའི་ཐུམ་པོ་ཆམ་པ་ཅན་གྱིས་སྣོམ་པར་བྱའོ། །བལ་བུའི་ལོ་མ་ཚ་བ་གསུམ། །དབྱི་མོ་ད་ཏྲིག་སྟར་བུ་དང་། །ཟིར་ཙི་ཏྲ་སྲང་གཉིས་གཉིས། །ཤིང་ཚ་གནྡྷ་བྷ་དྲ་དང་། །སུག་སྨེལ་ཞོ་ནི་གཉིས་གཉིས་དང་། །བུ་རམ་རྙིང་པ་སྲང་ལྔ་
བཅུ། །བསྐོལ་ཏེ་རི་ལུར་བྱས་པ་ནི། །ཟོས་ན་ཆམ་པ་དབུགས་མི་བདེ། །ལུད་པ་ལུ་བ་འཇོམས་བྱེད་ཅིང་། །སྐད་སྙན་ཡི་ག་འབྱེད་མཆོག་ཡིན། །ཞེས་བྱ་བ་ལ། བལ་བུའི་ལོ་མ་ལ་སོགས་པ་ཇི་སྐད་སྨོས་པའི་སྦྱོར་བས་བསྐོལ་ཏེ། དེ་ཐམས་ཅད་ལས་རི་ལུར་བྱས་པ་ཟོས་ན་
ཆམ་པ་ལ་སོགས་པ་འཇོམས་ཤིང་སྐད་སྙན་པར་བྱེད་པ་དང་། ཡི་ག་འབྱེད་པར་བྱེད་པའི་མཆོག་ཡིན་ནོ། །ཤུ་ཏིའི་ཤུན་པ་བ་ལ་དང་། །སོ་ན་ཀ་དང་ཨེ་རཎྜ། །བིལ་བའི་རྩ་པ་དོང་གྲར་བཅས། །ཞག་མར་སྤྲ་ཚིལ་དུད་པ་བརྔུབ། །ཅེས་བྱ་བ་ལ། ཤུ་ཏི་ལ་སོགས་པའི་སྨན་
ཞག་དང་མར་དང་སྤྲ་ཚིལ་དང་བསྲེས་པའི་དུད་པ་བརྔུབས་ན་ཡང་ཆམ་པ་ལ་ཕན་ནོ། །ཡང་ན་ཕྱེ་དང་མར་དང་བཅས། །ཁམ་ཕོར་སྦྱར་བའི་ནང་དུ་བཅུག །བསྲེགས་པའི་དུད་པ་བརྔུབ་པར་བྱ། །ཞེས་བྱ་བ་ལ། ཡང་ན་ཕྱེ་དང་མར་སྦྱར་བ་ཁམ་ཕོར་ནང་དུ་བཅུག་པའི་དུད་པས་
བརྔུབས་ན་ཡང་ཕན་ནོ། །ཁྲུས་དང་མྱ་ངན་ཁྲོ་བ་དང་། །ཤས་ཆེར་གཉིད་ལོག་ཆུ་གྲང་སྤང་། །ཞེས་བྱ་བ་ལ། ཆམ་པ་ཅན་གྱིས་སྤང་བར་བྱའོ། །དེ་ཡན་ཆད་ནི་ཐམས་ཅད་སྦྱིའི་གསོ་བ་བཤད་པ་ཡིན་ནོ། །རླུང་གྱུར་ཆམ་པ་རླུང་འཇོམས་པའི། །སྨན་ནི་བསྐོལ་བའི་ཁུ་བ་
เล่ม ๒๐๒ · หน้า 182b
འམ། །ཞེས་བྱ་བ་ལ། རླུང་ལས་གྱུར་པའི་ཆམ་པ་ལ་ནི་རླུང་འཇོམས་པའི་སྨན་དང་བསྐོལ་བའི་ཁུ་བ་བླུད་པར་བྱའོ། །ལན་ཚྭ་ལྔ་ནི་བསྐོལ་བ་འམ། །བི་ད་རི་སོགས་སྡེ་བསྐོལ་བླུད། །ཅེས་བྱ་བ་ལ། ཡང་ན་སྨན་གྱི་ཁུ་བ་གཉིས་པོ་འདི་ལས་གང་ཡང་རུང་བ་དང་བསྐོལ་བའི་མར་
བླུད་ན་ཡང་ཕན་ནོ། །དུགས་དང་སྣ་སྨན་ལ་སོགས་བྱ། །གཞོགས་ཕྱེད་ནར་བཤད་གསོ་བའང་བྱ། །ཞེས་བྱ་བ་ལ། ཡང་ན་རླུང་ལས་གྱུར་པའི་ཆམ་པ་ལ་དུགས་ལ་སོགས་པའམ་གཞོགས་ཕྱེད་ན་པའི་གསོ་བ་གང་དག་ཡིན་པ་དེ་བཤད་པར་བྱའོ། །ཁྲག་མཁྲིས་ལས་གྱུར་
ཐུག་པ་ནི། །མར་སར་མངར་བའི་སྨན་བསྐོལ་བླུད། །ཅེས་བྱ་བ་ལ། ཁྲག་དང་མཁྲིས་པ་ལས་གྱུར་པའི་ཆམ་པ་ལ་ནི་སྨན་མངར་བ་དང་མར་དང་བསྐོལ་བའི་ཐུག་པ་བླུད་པར་བྱའོ། །སྨན་ཆུ་བླུགས་ཤིང་བྱུག་པ་དང་། །ནུས་བསིལ་གྲང་མོ་དག་གིས་བྱ། །ཞེས་བྱ་བ་ལ། །ཡང་
ན་ཁྲག་དང་མཁྲིས་པ་ལས་གྱུར་པའི་ཆམ་པ་ལ་ནི་ནུས་པ་བསིལ་བའི་སྨན་བསྐོལ་བའི་ཆུ་གྲང་མོ་བླུགས་པ་དང་། དེའི་ལྡེ་གུས་བསྐུ་བལ་སོགས་པ་བྱའོ། །དྭ་བའི་ཤུན་པ་འབྲས་བུ་གསུམ། །ཤི་རི་པརྞི་པྲི་ཡང་ཀུ། །ཤིང་མངར་སེང་ཕྲོམ་ཏིལ་མར་གྱི། །བཅུ་འགྱུར་འོ་མ་སྐྱེར་
པར་བཅས། །བསྐོལ་བའི་སྣ་སྨན་གཏང་བར་བྱ། །ཞེས་བྱ་བ་ལ། ཤིང་དྭ་བ་ལ་སོགས་པའི་ལྡེ་གུ་དང་། ཏིལ་མར་གྱི་བཅུ་འགྱུར་གྱ་ིའོ་མ་དང་སྐྱེར་པར་བསྐོལ་བའི་སྣ་སྨན་གཏང་བར་བྱའོ། །བད་ཀན་ལས་གྱུར་སྨྱུང་བ་དང་། །ཡུངས་ཀར་ལྡེ་གུས་མགོ་བསྐུ་འམ། །ཞེས་བྱ་
བ་ལ། །བད་ཀན་ལས་གྱུར་པའི་ཆམ་པ་ལ་ནི་སྨྱུང་བའམ་ཡུངས་ཀར་གྱི་ལྡེ་གུས་བསྐུ་བར་བྱའོ། །ཐལ་སྨན་བཅས་པའི་བླུད་དེ། །སློན་གཞུག །ཅེས་བྱ་བ་ལ། ཡང་ན་བད་ཀན་ལས་གྱུར་པའི་ཆམ་པ་ལ་ནི་ཐལ་སྨན་དང་བཅས་པའི་མར་བླུད་ལ་དེའི་འོག་ཏུ་སློན་དུ་གཞུག་
པར་བྱའོ། །རྒྱམ་ཚ་ཚ་བ་གསུམ། །བྱི་དང་ག་དང་དུག་མོ་ཉུང་། །ཟི་ར་ར་གཅིན་སྦྱར་བ་ཡི། །སྣ་སྨན་དག་ན་གཏང་བར་བྱ། །ཞེས་བྱ་བ་ལ། རྒྱམ་ཚ་ལ་སོགས་པ་རའི་གཅིན་དང་སྦྱར་ཏེ་བཙགས་པའི་སྣ་སྨན་བཏང་ན་ཡང་བད་ཀན་ལས་གྱུར་པའི་ཆམ་པ་ལ་ཕན་ནོ། །འདུས་
เล่ม ๒๐๒ · หน้า 183a
གྱུར་ཚ་དང་རྣོ་སྦྱར་བའི། །མར་གྱི་སྣ་སྨན་བླུགས་པས་གསོ། །ཞེས་བྱ་བ་ལ། འདུས་པ་ལས་གྱུར་པའི་ཆམ་པ་ལ་ནི་སྨན་ཚ་བ་དང་རྣོ་བ་དང་སྦྱར་བའི་སྨན་མར་ལ་སོགས་པས་གསོ་བར་བྱའོ། །གཅོང་ཆེན་སྲིན་གསོའི་རིམ་གྱིས་ནི། །ཆམ་པ་མ་
རུངས་འཚོ་ཙམ་བྱ། །ཞེས་བྱ་བ་ལ། གཅོང་ཆེན་པོ་དང་སྲིན་བུ་གསོ་བའི་རིམ་གྱིས་ནི། ཆམ་པ་མ་རུངས་པ་རེ་ཞིག་འཚོ་བ་ཙམ་དུ་བྱའོ། །ཚ་བ་གསུམ་དང་ཨེ་རཎྜ། །ཐང་ཤིང་རུ་རྟ་བྱི་དང་ཀ །བོང་ང་དཀར་པོ་ཨིངྒུ་དང་། །དུར་བྱིད་པ་རྟ་ཀའི་ས་བོན། །ཡུངས་ཀར་
ཉེའུ་འཕྲལ་རུས་པ། །ཨགྣི་མནྠའི་མེ་ཏོག་དང་། །པི་ལུ་ཤི་ཀྲུའི་ས་བོན་དང་། །རྟ་སྦངས་ཁུ་བ་གཅིན་དང་ནི། །གླང་པོའི་གཅིན་དང་གཅིན་ཏུ་སྦྱར། །ཟར་མའི་སྐུད་དཀྲིས་རེང་བུ་ཡི། །དུད་པ་ཁ་དང་སྣ་ནས་བརྔུབ། །ཅེས་བྱ་བ་ལ། ཚ་བ་གསུམ་ལ་སོགས་པའི་སྨན་རྟ་སྦངས་བཙིར་བའི་ཁུང་
དང་གཅིན་དང་གླང་པོ་ཆེའི་གཅིན་དང་གཅིག་ཏུ་སྦྱར་བའི་རེང་བུ་ཟར་མའི་སྐུད་པས་དཀྲིས་པའི་དུད་པ་བརྔུབ་པར་བྱའོ། །སྨིན་དང་སྦྲིད་པ་འབྱུང་ཞེས་པ། །སྣ་སྨན་རྣོན་པོ་བུད་པས་ཕན། །ཞེས་བྱ་བ་ལ། སྨིན་པ་ཞེས་བྱ་བ་དང་སྦྲིད་པ་འབྱུང་བ་ཞེས་བྱ་བའི་སྣ་ནད་ལ་ནི་སྣ་སྨན་རྣོན་པོའི་ཕྱེ་མ་
བུད་པར་བྱའོ། །བཅའ་སྒ་རུ་རྟ་པི་པི་ལིང་། །རྒུན་འབྲུ་བྱི་དང་གའི་ལྡེ་གུ། །མར་རམ་ཏིལ་མར་བཅས་བསྐོལ་བའི། །སྣ་སྨན་སྦྲིད་པ་རྣགས་པ་སེལ། །ཞེས་བྱ་བ་ལ། བཅའ་སྒ་ལ་སོགས་པའི་ལྡེ་གུ་དང་། མར་རམ་ཏིལ་མར་བསྐོལ་བའི་སྣ་སྨན་བཏང་ན་སྦྲིད་པ་དང་རྣགས་པ་སེལ་
བར་བྱེད་དོ། །སྣ་སྐམ་པ་ལ་བ་ལའི་མར། །བཏུང་སོགས་ཤ་ཁུར་སྦྱར་བ་བཟའ། །སྣུམ་གྱི་དུད་པ་དུགས་ཀྱིས་གསོ། །ཞེས་བྱ་བ་ལ། སྣ་སྐམས་པ་ཞེས་བྱ་བའི་སྣ་ནད་ལ་ནི་བ་ལའི་ཏིལ་མར་རླུང་ནད་གསོ་བའི་སྐབས་སུ་བཤད་པ་བཏུང་པ་དང་སྣ་ནས་གཏང་བ་ལ་སོགས་པ་བྱ་
བ་དང་། །དེ་བཞིན་དུ་ཤ་ཁུ་དང་སྦྱར་བའི་ཁ་ཟས་བཟའ་བ་དང་། །སྣུམ་གྱི་དུད་པ་བརྔུབ་པ་དང་། །དུགས་བྱ་བས་གསོ་བར་བྱའོ། །སྣ་རྒྱས་ལ་ཡང་ཆོ་ག་འདིའོ། །ཞེས་བྱ་བ་ལ། སྣ་རྒྱས་པ་ཞེས་བྱ་བའི་སྣ་ནད་ལ་ཡང་སྣ་སྐམས་པའི་གསོ་བ་འདི་ཉིད་སྦྱར་བར་བྱའོ། །སྣ་རྣགས་
เล่ม ๒๐๒ · หน้า 183b
འབར་ལ་མཁྲིས་འཇོམས་སྨན། །ཆུ་འཛག་སྣ་སྨན་སོགས་རྣོས་བྱ། །ཞེས་བྱ་བ་ལ། སྣ་རྣགས་པ་དང་སྣ་འབར་བ་སྙམ་དུ་སེམས་པའི་སྣ་ནད་གཉིས་ལ་ནི་མཁྲིས་པ་འཇོམས་པའི་སྨན་བསྟེན་ཅིང་། ཕན་ཚུན་ནས་ཆུ་འཛག་པའི་སྣ་ནད་ལ་ནི་སྣ་སྨན་དང་མཁུར་བ་བཀང་བ་ལ་སོགས་
པ་རྣོན་པོས་བྱའོ། །རྣག་ཅན་ལ་ནི་བད་ཀན་གྱི། །གསོ་བ་དང་ནི་འདྲ་བར་བྱའོ། །ཞེས་བྱ་བ་ལ། སྣ་ནད་རྣག་ཅན་དང་སྣ་ནད་ཆམ་པ་ལ་ནི་བད་ཀན་གྱི་ཆམ་པ་དང་འདྲ་བར་གསོ་བར་བྱའོ། །རྒྱ་སྐྱེགས་དང་ནི་ཀ་རཉྫ། །ན་ལེ་ཤམ་དང་བྱི་དང་ག །ཤིང་ཀུན་བུ་རམ་པི་པི་ལིང་། །
ལུག་ཐུག་གཅིན་སྦྱར་སྣ་སྨན་ནི། །སློན་བྱས་འོག་ཏུ་གཏང་བར་བ། །ཞེས་བྱ་བ་ལ། སྣ་ནད་རྣག་ཅན་དང་ཆམ་པ་ལ་ནི་སློན་སྨན་བཏང་ནས་རྒྱ་སྐྱེགས་ལ་སོགས་པ་ལུག་གི་གཅིན་དང་སྦྱར་བའི་སྣ་སྨན་གཏང་བར་བྱའོ། །ཤི་ཀྲུ་དན་ད་བྲི་ཧ་ཏི། །ཚ་བ་གསུམ་དང་ལྕེ་མྱོང་ཚ། །
བྱེའུ་རུག་པ་དང་བྱི་དང་ག །ཏིལ་མར་བསྐོལ་བའི་སྣ་སྨན་ཡང་། །བཏང་ན་མཆོག་ཏུ་ཕན་པ་ཡིན། །ཞེས་བྱ་བ་ལ། ཤི་ཀྲུ་ཞེས་བྱ་བ་ན་ལེ་ཤམ་དཀར་པོ་དང་། དན་ད་དང་བྲི་ཧ་ཏིའི་ས་བོན་ཚ་བ་གསུམ་ལ་སོགས་པ་དང་བཅས་པའི་ཏིལ་མར་དང་བསྐོལ་བའི་སྣ་སྨན་ནི་སྣ་ནད་རྣག་ཅན་
དང་ཆམ་པ་ལ་མཆོག་ཏུ་ཕན་པ་ཡིན་ནོ། །རྣག་དང་ཁྲག་ཅན་སར་པ་ནི། །ཁྲག་གི་ཆམ་པ་ལྟ་བུར་གསོ། །ཞེས་བྱ་བ་ལ། རྣག་དང་ཁྲག་ཅན་གྱི་སྣ་ནད་སར་པ་སྐྱེས་མ་ཐག་པ་ལ་ནི་ཁྲག་ལས་གྱུར་པའི་ཆམ་པ་ལྟར་གསོ་བར་བྱའོ། །ཤིན་ཏུ་འཕེལ་ལ་རྨ་འཁྱིམས་ལྟར། །ཞེས་བྱ་བ་
ལ། རྣག་དང་ཁྲག་ཤིན་ཏུ་འཕེལ་བ་ལ་ནི་རྨ་འཁྱིམས་པ་ལྟར་གསོ་བར་བྱའོ། །འབྲུམ་བུ་རྨེན་བུ་ཚ་བ་ལ། །དན་ཏི་དུར་བྱིད་ལྕེ་མྱོང་ཚ། །ལྡོང་རོས་དང་ནི་པི་པི་ལིང་། །ཙི་ཏྲ་ཀ་ཡི་ལྡེ་གུ་ནི། །མར་དང་སྦྲང་རྩིར་སྦྱར་བ་ཡི། །རེང་བུ་སྣར་ནི་གཞུག་པར་བྱ། །ཞེས་བྱ་བ་ལ། སྣའི་
འབྲུམ་བུ་དང་རྨེན་བུ་ཚ་བར་གྱུར་པ་ལ་ནི་དན་ཏི་ལ་སོགས་པའི་ལྡེ་གུ་མར་དང་སྦྲང་རྩི་དང་སྦྱར་བའི་རེང་བུ་སྣར་གཞུག་པར་བྱའོ། །ཤི་ཀྲུ་ལ་སོགས་སྣ་སྨན་ཡང་། །རྣག་ཅན་གསོ་བའི་སྐབས་སུ་བཤད། །ཅེས་བྱ་བ་ལ། འབྲུམ་བུ་རྨེན་བུའི་སྣ་ནད་འདི་ལ་ནི། །ཤི་ཀྲུ་ལ་སོགས་པའི་
เล่ม ๒๐๒ · หน้า 184a
སྣ་སྨན་ཡང་ཕན་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་ཉི་ཤུ་པའི་རྣམ་པར་འགྲེལ་པའོ།། །།དེ་ནས་
ཁ་ནད་ཀྱི་དམིགས་ཤེས་པ་བཤད་པར་བྱའོ། །ཞེས་བྱ་བ་ལ། །སྟོད་ཀྱི་ཡན་ལག་ཡིན་པའི་ཕྱིར། །གོ་རིམས་ཀྱིས་ན་ཁ་ནད་ཀྱི་ནད་གཞི་དང་རྒྱུ་ལ་སོགས་པ་བསྟེན་པར་བྱ་བའི་ཕྱིར་ལེའུ་འདི་བརྩམས་པ་ཡིན་ནོ། །ཉ་དང་མ་ཧེ་ཕག་གི་ནི། །ཤ་དང་ལ་ཕུག་རྗེན་པ་དང་། །མ་ཤའི་
སྲན་ཚོད་འོ་མ་ཞོ། །ཚ་དང་བུ་རམ་ཤིང་ཀུན་དང་། །བུར་བྲན་ཁ་སྦུབ་ཉལ་བསྟེན་དང་། །སོ་ཤིང་གིས་སྣད་གོམས་པ་སྤོང་། །དུད་པ་མཁུར་བཀང་སྐྱུགས་པ་དང་། །གཏར་ག་དབུག་ནི་ཉེས་པ་ཡིས། །བད་ཀན་ཤས་ཆེའི་ནད་འཁྲུགས་པས། །ཁ་ཡི་ནང་གི་ནད་སྐྱེད་
འགྱུར། །ཞེས་བྱ་བ་ལ། ཉ་དང་མ་ཧེའི་ཤ་ལ་སོགས་པ་ཟ་ཞིང་བསྟེན་པར་བྱེད་པ་དང་། ཁ་སྦུབ་ཏུ་ཉལ་བ་དང་། སོ་ཤིང་གིས་སྣད་ཅིང་མ་རུངས་པར་གྱུར་པ་དང་། ཁ་ཟས་གོམས་པ་ལ་མི་དགའ་ཞིང་སྤོང་བ་དང་། དུད་པ་བརྔུབས་པ་ལ་སོགས་པ་ཉེས་པར་གྱུར་པ་
དག་གིས་བད་ཀན་ཤས་ཆེ་བར་གྱུར་པའི་རླུང་ལ་སོགས་པའི་ནད་འཁྲུགས་ཤིང་ལྡང་བར་གྱུར་ནས་ཁའི་ནང་གི་ནད་སྣ་ཚོགས་པ་དག་འབྱུང་བར་འགྱུར་རོ། །དེ་ལ་རླུང་གིས་མཆུ་གས་འགྱུར། །མཆུ་རལ་བ་ཡི་ནད་ཅེས་བཤད། །ཅེས་བྱ་བ་ལ། དེ་ལ་ཁའི་ནད་དེ་དག་གི་ནང་
ནས་རླུང་གིས་མཆུ་གང་གསར་ཤིང་གཉིས་སུ་བྱས་པ་དེ་ནི་མིང་མཆུ་རལ་བ་ཞེས་བྱའོ་ཞེས་དྲང་སྲོང་རྣམས་ཀྱིས་བཤད་དོ། །རླུང་གིས་མཆུ་ལ་གནོད་གྱུར་པ། །མཆུ་སྲ་ནད་ཚབས་ཆེ་བ་ཡིན། །མཆུ་འགས་རྡོལ་བར་འགྱུར་བ་དང་། །གནག་ཅིང་རྩུབ་པ་མཆུ་འཁྲུགས་ཡིན། །
ཞེས་བྱ་བ་ལ། རླུང་གིས་མཆུ་ལ་གནོད་པར་གྱུར་པའི་ནད་ནི་མཆུ་སྲ་ཞིང་རྒྱས་ཏེ་ཤིང་ལྟར་འདུག་པ་དང་། ཤས་ཆེར་ན་བ་དང་། མཆུ་འགས་ཤིང་ཞིག་པ་དང་། རྡོལ་ཞིང་ཟགས་པར་འགྱུར་བ་དང་། མདོག་གནག་ཅིང་རྩུབ་པར་གྱུར་པ་ནི། །མཆུ་འཁྲུགས་པ་ཞེས་བྱའོ། །
เล่ม ๒๐๒ · หน้า 184b
མཁྲིས་པས་ཚ་བ་མི་བཟོད་སེར། །འབྲུམ་ཕྲན་ཡུངས་ཀར་འདྲ་བས་ཁྱབ། །མྱུང་སྨིན་མང་དུ་རྣགས་པ་ཡིན། །ཞེས་བྱ་བ་ལ། མཁྲིས་པ་ལས་གྱུར་པའི་མཆུ་ནད་ཚ་བའི་དངོས་པོ་མི་བཟོད་པ་དང་ཁ་དོག་སེར་བ་དང་། ཡུངས་ཀར་འདྲ་བའི་འབྲུམ་ཕྲན་གྱིས་ཀུན་ཏུ་ཁྱབ་ཅིང་
གཡོགས་པ་དང་། མྱུར་དུ་སྨིན་ཅིང་རྣགས་པ་དང་། རྣག་དང་ཆུ་སེར་མང་བ་དང་ལྡན་པ་ནི་མཁྲིས་པས་གནོད་པའི་མཆུ་ནད་ཡིན་ནོ། །བད་ཀན་ལས་གྱུར་གྲང་བ་ཡིས། །མི་བཟོད་པ་དང་ལྕི་ཞིང་སྐྲང་བ་དང་། །འབྲུམ་ཕྲན་དཀར་པོས་ཁྱབ་པ་ཡི། །ཞེས་བྱ་བ་ལ། བད་ཀན་
ལས་གྱུར་པའི་མཆུ་ནད་ལ་ནི་གྲང་བས་རེག་ན་མི་བཟོད་པ་དང་ལྕི་ཞིང་སྐྲང་བ་དང་། འབྲུམ་ཕྲན་ཁ་དོག་དཀར་པོས་ཙེམ་ཙེམ་པོར་ཁྱབ་པ་ཡིན་ནོ། །འདུས་གྱུར་སྣ་ཚོགས་པར་སྣང་ཞིང་། །དྲི་ངའི་སྤྱི་བག་འཛག་པ་དང་། །གློ་བུར་ཤས་ཆེར་སྐྲང་ཞིང་ཞུམ། །ན་དང་མིན་རྣག་
མི་སྙོམས། །ཞེས་བྱ་བ་ལ། འདུས་པ་ལས་གྱུར་པའི་མཆུ་ནད་དོག་སྣ་ཚོགས་པར་སྣང་བ་དང་། མཆུའི་ལྗན་ལྗིན་དྲི་མི་ཞིམ་པ་དང་། །སྤྱི་བག་ནལ་ནལ་པོར་འཛག་པ་དང་། གློ་བུར་དུ་རྒྱུ་མེད་པར་ལན་འགའ་ནི་ཤས་ཆེར་སྐྲངས་པ་དང་། ཕྱེད་འགའ་ནི་ཞུམ་ཞིང་
སྐྲང་། ལན་འགའ་ནི་ན། ལན་འགའ་ནི་ན་བར་མི་བྱེད་པ་དང་། རྣག་ཅིང་སྨིན་པ་མི་སྙོམས་ཏེ། ལན་འགའ་ནི་མྱུར་དུ་སྨིན་ལ། ལན་འགའ་ནི་རིང་ནས་སྨིན་པ་ཡིན་ནོ། །ཁྲག་ལས་གྱུར་པ་ཁྲག་འཛག་ཅིང་། །ཁྲག་གི་མདོག་དང་འདྲ་བ་དང་། །འདི་ལ་འབྲ་གོ་ལྟ་བུ་ཡི། །
ཁྲག་ཟད་ཆུ་བུར་འབྱུང་བ་ཡིན། །ཞེས་བྱ་བ་ལ། ཁྲག་ལས་གྱུར་པའི་མཆུ་ནད་ནི་རྒྱུན་དུ་ཁྲག་འཛག་པ་དང་ཁྲག་གི་མདོག་ཅན་དུ་སྣང་བ་དང་མཆུ་ནད་འདི་ལ་ཁྲག་ཟད་པར་གྱུར་པ་དང་། ཆུ་བུར་འབྲ་གོ་ལྟ་བུ་འཕྱང་བ་ཡིན་ནོ། །ཤ་གྱུར་ཤ་ཡི་གོང་པོ་འདྲ། །རིམ་གྱིས་
སྲིན་བུ་སྐྱེ་ཞིང་འགུལ། །ཞེས་བ་ལ། ཤ་ལས་གྱུར་པའི་མཆུ་ནད་ནི་ཤའི་གོང་པོ་འདྲ་བར་གྱུར་པ་དང་རིམ་གྱིས་སྲན་བུ་སྐྱེ་ཞིང་འགུལ་བར་གྱུར་པ་ཡིན་ནོ། །ཚིལ་གྱུར་གཡའ་ཞིང་འདྲུལ་བ་དང་། །སྐྲང་འཇམ་ཏིལ་མར་ལྟ་བུར་འཛག །ཅེས་བྱ་བ་ལ། །ཚིལ་གྱི་གནོད་
เล่ม ๒๐๒ · หน้า 185a
པ་ལས་གྱུར་པའི་མཆུ་ནད་གཡའ་ཞིང་འདྲུལ་པ་དང་། སྐྲང་ཞིང་ལྗན་ལྗིན་དང་ཆུ་སེར་ཏིལ་མར་ལྟ་བུ་འཛག་ཅིང་འཇམ་པོར་འདུག་པ་ཡིན་ནོ། །སྣད་པ་ལས་གྱུར་གས་པ་དང་། །ཡང་དང་ཡང་དུ་འབྱེད་འགྱུར་ལ། །སླར་ཡང་འདྲུབ་པར་འགྱུར་པ་དང་། །མཆུ་
ནི་གཡའ་བར་བྱེད་པ་ཡིན། །ཞེས་བྱ་བ་ལ། སྣད་ཅིང་རྨ་བྱུང་བ་ལས་མཆུ་ནད་དུ་གྱུར་པ་ནི། ཡང་དང་ཡང་དུ་གས་པར་འགྱུར་བ་དང་། ཡང་དང་ཡང་དུ་འབྱེ་པར་འགྱུར་བ་དང་། །སླར་ཡང་དེ་ལས་འདྲུབས་ཏེ་རྨེན་བུར་འགྱུར་པ་དང་། མཆུ་དེ་ཡང་དང་ཡང་དུ་གཡའ་བར་བྱེད་
པ་ཡིན་ནོ། །རླུང་དང་བད་ཀན་འདྲེས་པ་ལས། །ཆུ་ཡི་ཆུ་བུར་ལྟ་བུར་འབྱུང་། །ཞེས་བྱ་བ་ལ། རླུང་དང་བད་ཀན་འདྲེས་པར་གྱུར་པ་ལས་མཆུ་ནད་ཆུའི་ཆུ་བུར་ལྟ་བུར་མཐོ་བ་དག་འབྱུང་བ་ནི། མཆུ་ནད་ཆུའི་ཆུ་བུར་ཞེས་བྱ་སྟེ། །དེ་ལྟར་ན་མཆུའི་ནད་བཅུ་གཅིག་ཏུ་བཤད་པ་ཡིན་ནོ། །
མཁུར་བའི་འབྲས་འབྱེད་སྐྲང་ཞིང་བརྟན། །མཁུར་བ་ཚ་ཞིང་རིམས་དང་བཅས། །ཞེས་བྱ་བ་ལ། མཁུར་ཚོས་སུ་སྐྲང་ཞིང་བརྟན་པ་དང་། མཁུར་བ་ཚ་བ་འུར་འུར་པོར་གྱུར་ཅིང་རིམས་དང་བཅས་པ་གང་ཡིན་པ་དེ་ནི་མཁུར་བར་འབྲས་འབྱེད་པའི་ནད་ཅེས་བྱ་སྟེ། དེ་ལྟར་ན་མཁུར་
པའི་ནད་ནི་གཅིག་ཡིན་ནོ། །རླུང་གྱུར་སོ་ནད་དྲོ་ལ་སྲེད། །གྲང་བས་རེག་ན་ལྷག་པར་ན། །གཟེར་ཞིང་བཅག་པ་སྙམ་དུ་སེམས། །གྲང་བས་ཞིག་པར་དེ་བཤད་དོ། །ཞེས་བྱ་བ་ལ། རླུང་ལས་གྱུར་པའི་སོའི་ནད་དྲོ་བ་ལ་སྲེད་ཅིང་བསྟན་པ་བཟོད་པ་དང་། གྲང་བས་རེག་ན་
ལྷག་པར་ན་ཞིང་ལྷང་ལྷང་པོར་ཟུག་པ་དང་། དེ་བཞིན་དུ་གཟེར་བ་དང་ན་བས་བཅག་ཅིང་འབྲུལ་པ་སྙམ་དུ་སེམས་པའི་སོ་ནད་དེ་གྲང་བས་ཞིག་པ་ཞེས་བྱའོ། །རླུང་དང་ཆུ་ཡིས་སོ་བརྩེ་བ། །གྲང་དང་སྐྱུར་བ་མི་བཟོད་པར། །སྐྱུར་བ་ཟོས་པ་ཉིད་ཀྱིས་འགྱུར། །ནད་བཅས་འགུལ་པར་
བྱེད་པ་ཡིན། །ཞེས་བྱ་བ་ལ། སོ་བརྩེ་བ་ཞེས་བྱ་བའི་ནད་ནི་རླུང་དང་གྲང་བ་ལ་སོགས་པ་སོས་བསྟེན་པར་མི་བཟོད་པ་དང་། ནད་དེ་ཡང་སྐྱུར་པ་ཟོས་པ་ཉེད་ལས་གྱུར་པ་དང་དེ་བཞིན་དུ་ནད་དང་བཅས་ཤིང་འགུལ་བར་བྱེད་པ་ཡིན་ནོ། །སོགས་སོ་ནི་ཟེགས་པ་དང་། །ན་ཞིང་ཟུག་ལ་
เล่ม ๒๐๒ · หน้า 185b
གཡོ་བ་ཡིན་། །ཞེས་བྱ་བ་ལ། སོ་ཟེགས་ཤིང་ན་བ་ལ་སོགས་པ་ཡིན་ནོ། །སོ་འགུལ་སོ་ནི་གཡོ་བ་དང་། །ཟ་བའི་ཚ་ན་ལྷག་པར་ན། །ཞེས་བྱ་བ་ལ། སོ་འགུལ་བ་ཞེས་བྱ་བའི་ནད་ནི་སོ་གཡོ་ཞིང་ལྡེག་པ་དང་། ལྷག་པར་ཡང་ཟས་ཟ་བའི་ཚེ་ན་ན་པར་གྱུར་པ་ཡིན་ནོ། །སོ་སྟོ་སོ་ནི་
མི་སྡུག་པར། །སོ་རྣམས་སྐྱེ་བར་འགྱུར་པ་ཡིན། །ཞེས་བྱ་བ་ལ། སོ་སྟོ་ཞིང་མི་སྡུག་པར་གྱུར་པ་སྐྱེ་བར་འགྱུར་བ་ཡིན་ནོ། །སོ་ལྷག་སོ་ནི་སྐྱེས་པ་སྟེ། །དེ་ནི་འཕེལ་བ་ཞེས་ཀྱང་བཤད། །ཅེས་བྱ་བ་ལ། སོ་རྣམས་ལས་གང་ལྷག་པའི་སོ་སྐྱེས་པར་གྱུར་པ་དེ་ནི། སོ་ལྷག་
ཅེས་བྱ་བའི་སོ་ནད་ཡིན་ཏེ་དེ་ནི་སློབ་དཔོན་ལ་ལས་དེ་སོ་འཕེལ་བའི་ནད་ཡིན་ནོ་ཞེས་ཟེར་རོ། །སྐྱེ་བར་འགྱུར་བའི་ཚེ་ན་ནི། །ན་ཞིང་སྐྱེས་ནས་དེ་ཞི་བྱེད། །ཅེས་བྱ་བ་ལ། སོ་ལྷག་དེ་སྐྱེ་བར་འགྱུར་པའི་ཚེ་ན་ནི་ཤིན་ཏུ་ན་བར་འགྱུར་ལ། དེ་སྐྱེས་ཟིན་ནས་ནི་ཞེ་བར་འགྱུར་བ་ཡིན་ནོ། །མ་
བཀྲུས་སོ་ཡི་དྲི་མ་འམ། །བད་ཀན་རླུང་གིས་སྐམས་པ་ལས། །དྲི་ང་བརྟན་གྱུར་སོ་དྲེག་ཡིན། །ཞེས་བྱ་བ་ལ། ཁ་མ་སྦྱངས་ཤིང་མ་བཀྲུས་ལ་སོ་ཤིང་ལ་སོགས་པས་དག་པ་རམ་བྱས་པའི་སོའི་དྲི་མ་གང་དག་ཡོད་པ་དེ་རླུང་གིས་སྐམ་པར་བྱས་པ་ལས་སོ་དྲེག་དྲི་མི་ཞིམ་ཞིང་བརྟན་
པར་ཆགས་པའི་ནད་དེ་ནི་མིང་སོ་དྲེག་ཅེས་བྱའོ། །དེ་ནི་ཡལ་བར་བོར་བ་ལས། །སོ་ནི་དུམ་བུར་ཟེགས་གྱུར་པ། །གྲུགས་ཤིང་སོ་ནི་གོགས་པ་ཡིན། །ཞེས་བྱ་བ་ལ། དེ་ཉིད་ཡལ་བར་བོར་ན་སོ་ནད་ཁར་ལྟ་བུ་ཞེས་བྱ་བ་འབྱུང་ངོ་། །ཡང་གང་གིས་སོ་དུམ་བུ་དུམ་བུར་ཡང་དང་ཡང་
གོགས་པ་དེ་ནི་དུམ་བུར་གོགས་པའི་སོ་ནད་ཅེས་བྱའོ། །ཁྲག་དང་མཁྲིས་པ་རླུང་གིས་སོ། །སྔོན་པོར་གྱུར་པ་སོ་སྔོན་ཡིན། །ཞེས་བྱ་བ་ལ། སོ་ཁྲག་དང་མཁྲིས་པ་དང་། །རླུང་གི་ནད་ཞུགས་པར་གྱུར་པས་སོའི་མདོག་སྔོན་པོར་གྱུར་པ་ནི་སོ་སྔོན་གྱི་ནད་ཅེས་བྱའོ། །ནད་ཀྱི་
རླུང་ནི་ཤས་ཆེར་འགྱུར། །རྩ་བར་བཅས་པའི་སོ་ལ་བརྟེན། །སོ་དབུས་སྐམས་ཏེ་སྟོང་པར་བྱས། །སོ་ནི་ཟས་ཀྱི་དྲི་མས་གང་། །རུལ་བས་སྲིན་བུ་ཕྲ་མོ་ནི། །སྐྱེ་བར་འགྱུར་ཏེ་དེ་འོག་ཏུ། །རྒྱུ་མེད་བ་རྣག་དཀའ་ལྡང་དུ་བ་ཅན། །སྦོམ་ཆེ་གནས་ལ་ཤས་ཆེར་ན། །བཅད་པ་འདྲར་
เล่ม ๒๐๒ · หน้า 186a
སྣང་རྣག་ཁྲག་འཛག །དེ་ནི་སོ་སྲིན་ཅན་ཞེས་བྱ། །ཞེས་བྱ་བ་ལ། རླུང་ལ་སོགས་པའི་ནད་ཀྱི་ཚོགས་རླུང་གི་ཤས་ཆེ་ཞིང་རྒྱས་པར་གྱུར་བ་རྩ་བ་དང་བཅས་པའི་སོ་ལ་བརྟེན་ཅིང་གནས་པས་སོའི་དབུས་སྐམས་པར་གྱུར་པ་ལས་སོ་དེའི་ནང་ཁོང་སྟོང་དུ་བྱས་
ལ། ཁོང་སྟོང་གི་སོ་དེར་ཟས་ཀྱི་དྲི་མས་གང་བ་དེ་རུལ་བར་གྱུར་པ་དང་། སྲིན་བུའི་རིགས་ཕྲ་མོ་སྐྱེ་བར་འགྱུར་ལ་དེའི་འོག་ཏུ་ནད་པ་དེ་ལ་རྒྱུ་མེད་པར་སོའི་ནད་ཆེད་འགའ་འབྱུང་ཞིང་ཆེད་འགའ་འབྱུང་ཞིང་ཆེད་འགའ་ཞི་བའི་ལྡང་དུབ་ཅན་དུ་འབྱུང་བ་དང་། ནད་ཀུན་འབྱུང་བ་དང་ནད་ཀུན་གཡོ་ཞིང་བསྐྱོད་པ་དང་། །
མདོག་གནག་པ་དང་། ཤས་ཆེར་ན་བ་དང་། སོ་བཅད་པ་ལྟ་བུར་སྣང་བ་དང་། རྣག་དང་ཁྲག་གི་ཚོགས་འཛག་པར་གྱུར་པའི་ནད་དེ་ནི་སོ་སྲིན་བུ་ཅན་གྱི་ནད་ཅེས་བཤད་དོ། །དེ་ལྟར་ན་སོའི་ནད་ནི་གྲངས་བཅུར་བཤད་པ་ཡིན་ནོ། །བད་ཀན་དང་ནི་ཁྲག་གིས་རྙིལ། །རྣགས་
ཤིང་རུལ་པར་གྱུར་པ་དང་། །མཉེན་ལ་ཟགས་ཤིང་གནག་པ་དེ། །གྲང་བས་ཉེན་པ་ཡིན་པར་བཤད། །ཅེས་བྱ་བ་ལ། བད་ཀན་དང་ཁྲིག་གི་ནད་དེ་གཡོས་པར་གྱུར་པས་རྙིལ་རྣགས་ཤིང་དྲི་ང་བར་གྱུར་ལ། རུལ་ཞིང་འདྲུལ་ལ་རྒྱུ་མེད་པར་ཁྲག་རྒྱུན་དུ་འཛག་པ་དང་། །
དེ་མཉེན་ཞིང་འཇམ་པ་དང་། ཁྲག་ཟགས་པར་གྱུར་པ་དང་། མདོག་གནག་པར་གྱུར་པ་དེ་ནི་རྙིལ་ནད་གྲང་བས་ཉེན་པ་ཞེས་བྱ་བར་བཤད་དོ། །ཁྲག་མཁྲིས་རྣགས་པ་ལས་བྱུང་བ། །རྙིལ་ནི་ཚ་བར་བྱེད་པ་དང་། །ཁྲག་གིས་སྐྲངས་བ་མཐོ་བ་དང་། །གཡའ་ཞིང་ཁྲག་ནི་འཛག་པ་
དང་། །ཁྲག་ཆད་ནས་ནི་རྒྱས་པར་འགྱུར། །སོ་ན་འགུལ་ཞིང་ནད་ཚབས་ཆུང་། །ཁ་དྲི་མནམ་འགྱུར་ཉེར་བདར་ཡིན། །ཞེས་བྱ་བ་ལ། ཁྲག་དང་མཁྲིས་པ་ལས་གྱུར་པའི་རྙིལ་གྱི་ནད་ཉེ་བར་བདར་བ་ཞེས་བྱ་བ་ནི་རྙིལ་ཚ་བ་འུར་འུར་པོས་ཁྱབ་པར་གྱུར་པ་དང་། དེ་བཞིན་དུ་ཁྲག་ལས་
གྱུར་པའི་སྐྲངས་པ་དེ་མཐོན་པོར་འགྱུ་བ་དང་། དེ་བཞིན་དུ་ཁྲག་འཛག་པ་དང་། ཤས་ཆེར་གཡའ་བ་དང་། དེ་བཞིན་དུ་ཁྲག་དེ་ཆད་ཅིང་འཁྱིལ་བར་གྱུར་པ་ན་ནི་རྙིལ་གྱི་ཤ་དེ་རྒྱས་པར་འགྱུར་བ་དང་། སོ་ན་ཞིང་འགུལ་བར་འགྱུ་བ་དང་། ནད་ཚ་བས་ཅུང་ཟད་ཆུང་བར་འགྱུར་པ་དང་།
เล่ม ๒๐๒ · หน้า 186b
ཁའི་ནང་དྲི་མི་ཞིམ་ཞིང་མནམ་པར་འགྱུར་པའི་རྙིལ་གྱི་ནད་དེ་ནི་ཉེ་བར་བདར་བའི་ནད་ཅེས་བྱའོ། །སོ་ནི་གཉིས་སམ་གསུམ་ཐད་ཀར། བད་ཀན་ལས་གྱུར་རྒྱ་ཤུག་ཙམ། །སྐྲངས་པ་སྲ་ཞིང་མི་བཟད་ན། །མྱུར་དུ་སྨིན་པ་སོ་འབུད་ཡིན། །ཞེས་བྱ་བ་ལ། སོ་གཉིས་སམ་གསུམ་
གྱི་ཐད་ཀར་བད་ཀན་འཁྲུགས་པར་གྱུར་པ་ལས་རྒྱ་ཤུག་གི་ཚི་གུ་ཙམ་དུ་སྐྲང་ཞིང་སྲ་བ་དང་། སྐྲངས་པ་དེ་མི་བཟད་པར་ན་ཞིང་མྱུར་དུ་སྨིན་པར་འགྱུར་བ་དེ་ནི་སོའི་ཤ་འབུར་བ་ཞེས་བྱ་བའི་ནད་ཅེས་བྱའོ། །རྙིལ་ནི་ནད་བཅས་ཁྲག་གིས་ནི། །ཕྱི་དང་ནང་དུ་སྐྲང་ཞིང་ལྕི། །ན་ཞིང་
ཆ་ལགས་པ་ལས། །རྣག་ཁྲག་འཛག་སོའི་ཁོང་འབྲས་ཡིན། །ཞེས་བྱ་བ་ལ། རླུང་ལ་སོགས་པའི་ནད་དང་བཅས་པའི་ཁྲག་གིས་རྙིལ་གྱི་ཤ་ཕྱི་དང་ནང་དུ་སྐྲངས་པ་དང་། ལྕི་བར་འདུག་པ་དང་། ན་ཞིང་ཚ་བ་འུར་འུར་པོས་གནས་པ་དང་། དེགས་པར་གྱུར་པ་ལས་རྣག་དང་
ཁྲག་འཛག་པར་གྱུར་པ་ནི་སོའི་ཁོང་འབྲས་ཞེས་བྱའོ། །སོ་རྩར་ཁྲག་མཁྲིས་ལས་གྱུར་ན། སྐྲང་ཞིང་ནད་དང་བཅས་པ་དང་། །ཁ་ཆུ་འཛག་ཅིང་རྙིལ་འདྲུལ་བ། །ཁོང་སྟོང་གི་ནི་ནད་ཅེས་བྱ། །ཞེས་བྱ་བ་ལ། སོ་རྣམས་ཀྱི་རྩ་བར་ཁྲག་དང་མཁྲིས་པ་ལས་གྱུར་པའི་ནད་སྐྲངས་པ་
དང་། ཁ་ཆུ་འཛག་པ་ལ་སོགས་པ་ནི་ཁོང་སྟོང་གི་ནད་ཅེས་བྱའོ། །འདུག་པ་ལས་གྱུར་རིམས་དང་བཅས། །རྣག་དང་བཅས་པའི་ཁྲག་འཛག་ལ། །སོ་ཡི་སྦྲེལ་མཚམས་ཞིག་པ་ནི། །ཁོང་སྟོང་ཆེན་པོ་ཞེས་བཤད་དོ། །ཞེས་བྱ་བ་ལ། སྐྲངས་དེ་ཉིད་འདུས་པའི་ནད་
ལས་གྱུར་ཅིང་སྐྲངས་པ་དང་། རིམས་ཀྱིས་འདེབས་པ་དང་། དེ་བཞིན་དུ་རྣགས་དང་བཅས་པ་ལ་སོགས་པའི་མཚན་ཉིད་དང་ལྡན་པ་ནི། མིང་ཁོང་སྟོང་ཆེན་པོ་ཞེས་བྱའོ་ཞེས་དྲང་སྲོང་ཆེན་པོ་རྣམས་ཀྱིས་བཤད་དོ། བད་ཀན་གྱིས་ནི་སོ་ཡི་མཐར། །ཤ་མཛེར་ལྟར་སྐྲང་འགྲམ་པ་
དང་། །རྣ་བ་ན་བྱེད་སྦྱོད་ལ་མཉམས། །དེ་ནི་ཤ་ལྷག་ཅེས་བྱར་བཤད། །ཅེས་བྱ་བ་ལ། བད་ཀན་འཁྲུགས་པར་གྱུར་པས་ཤའི་མཛེར་པ་ལྟ་བུའི་སྐྲངས་པ་འབྱུང་བར་འགྱུར་ཞིང་། །དེས་འགྲམ་པ་དང་རྣ་བ་ན་བར་བྱེད་པ། རང་གི་སྤྱོད་ལམ་ཁ་ཟས་ཟབ་ཉམས་པར་བྱེད་པའི་ནད་དེ་ནི་
เล่ม ๒๐๒ · หน้า 187a
ཤ་ལྷག་སྐྱེས་པའམ། ཤའི་རྨེན་བུ་ཞེས་བྱ་བར་བཤད་དོ། །རྙིལ་ནི་བདར་བར་གྱུར་པ་ལས། །ནད་ཚབས་ཆེན་པོར་འབྱུང་འགྱུར་ཞིང་། །གང་ཞིག་སོ་ནི་འགུལ་གྱུར་བ། །དེ་ནི་སྣད་པ་ལས་བྱུང་ཡིན། །ཞེས་བྱ་བ་ལ། སོ་ཤིང་ལ་སོགས་པས་
བདར་ཅིང་བྲུད་པར་གྱུར་པ་ལས་ཤས་ཆེར་ན་བ་ལ་སོགས་པར་གྱུར་པའི་ནད་དེ་ནི་སོ་སྣད་པ་ལས་བྱུང་བ་ཞེས་བྱའོ། །རྙིལ་ལ་བརྟེན་པར་བྱེད་པའི་ནད། །གསོར་རུང་ཡལ་བར་བོར་བ་གང་། །ནང་དུ་དེ་ནི་ནད་འཛག་པས། །དེས་ནི་རྒྱུན་ལམ་ཕྲ་བ་སྐྱེད། །དེ་ནི་ཡང་ཡང་རྣག་འཛག་ཅིང་། །
པགས་པ་ཤ་དང་རུས་པ་འབིགས། །ཞེས་བྱ་བ་ལ། མི་གང་གི་རྙིལ་ལ་བརྟེན་པ་ལ་ནི་ནད་གསོར་རུང་ཞིང་བཅོས་སུ་འདོད་པ་གང་ཡིན་པ་དག་ཡལ་བར་བོར་བར་གྱུར་ན་ནད་དེའི་སྐྱོན་ནང་དུ་འཛག་པས་དེའི་ནང་གི་རྒྱུན་ལམ་གྱི་བུ་ག་ཕྲ་མོ་བསྐྱེད་ལ་བུ་ག་དེ་ལས་ཡང་དང་ཡང་དུ་རྣག་
འཛག་ཅིང་པགས་པ་དང་ཤ་དང་རུས་པ་འབིགས་པར་བྱེད་དོ། །དེ་ཡང་རང་རང་མཚན་ཉིད་ནི། །ཇི་སྐད་བཤད་པས་ལྔར་ཤེས་བྱ། །ཞེས་བྱ་བ་ལ། ཕྲ་མོར་འབིགས་པའི་ནད་དེ་ཡང་ནད་རང་རང་གི་མཚན་ཉིད་ཀྱིས་རྣམ་པར་ལྔར་འགྱུར་བ་ཡིན་པར་ཤེས་པར་བྱའོ། །དེ་ལྟར་
ན་རྙིལ་གྱི་ནད་ནི་བཅུ་གསུམ་དུ་ཤེས་པར་བྱའོ། །ལྕེ་ནི་ཤ་ཁའི་ལོ་ལྟར་རྩུབ། །ཚོར་བ་མེད་གས་རླུང་གནོད་ཡིན། །ཞེས་བྱ་བ་ལ། རླུང་གི་ནད་ཀྱིས་གནོད་པར་གྱུར་པའི་ལྕེའི་ནད་ནི། ཤིང་ཤ་ཁ་ཞེས་བྱ་བའི་ལོ་མ་ལྟར་རེག་ན་རྩུབ་པ་དང་། ཚོར་བ་མེད་ཅིང་བེམ་བེམ་པོར་
འདུག་པ་དང་། ཁ་མང་དུ་གས་པ་ཡིན་ནོ། །མཁྲིས་པས་ཚ་ཞིང་ནད་བཅས་འགྱུར། །མཛེར་པ་དམར་པོས་ཁྱབ་པ་ཡིན། །ཞེས་བྱ་བ་ལ། མཁྲིས་པས་གནོད་པར་གྱུར་པའི་ལྕེ་ནི་ཚ་བ་འུར་འུར་པོར་འདུག་པ་དང་། ནད་དང་བཅས་པ་ཡིན་ལ། དེ་བཞིན་དུ་མཛེར་པ་དམར་
པོས་ཁྱབ་པར་གྱུར་པ་ཡིན་ནོ། །བད་ཀན་ལས་གྱུར་ཤལ་མ་ལིའི། །ཚེར་མས་ཁྱབ་གྱུར་ལྕི་ཞིང་མཐུག །ཅེས་བྱ་བ་ལ། བད་ཀན་གྱིས་གནོད་པར་གྱུར་པའི་ལྕེ་ནི་ཤལ་མ་ལིའི་ཚེར་མ་འདྲ་བའི་ཤའི་མཛེར་པས་ཁྱབ་པར་གྱུར་པ་དང་། རང་བཞིན་ལྕི་ཞིང་མཐུག་པར། །
เล่ม ๒๐๒ · หน้า 187b
གྱུར་པ་ཡིན་ནོ། །བད་ཀན་མཁྲིས་པས་འོག་ཏུ་སྐྲང་། །མཐོ་ཞིང་གྱོང་བར་བྱེད་པ་དང་། །སྨིན་ན་ཉ་ཡི་དྲ་འདྲ་ལ། །ཤ་འདྲུལ་ཆུ་སེར་ཅན་ཞེས་བྱ། །ཞེས་བྱ་བ་ལ། བད་ཀན་དང་མཁྲིས་པ་ལས་གྱུར་པའི་ནད་ཀྱིས་འོག་ཏུ་སྐྲང་ཞིང་མཐོ་བ་དང་། དེ་ཉིད་ཀྱིས་ནི་ལྕེ་གྱོང་ཞིང་སྲབ་པར་བྱེད་པ་
དང་། སྨིན་ཅིང་རྣགས་པར་གྱུར་ན་ཉ་རུལ་བའི་དྲི་འདྲ་ལ། ལྕེའི་ཤ་འདྲུལ་ཅིང་ཞིགས་པ་དེ་ནི་ལྕེ་ནད་ཆུ་སེར་ཅན་ཞེས་བྱའོ། །ལྕེ་རྩའི་འོག་དང་འབྲེལ་པ་ནི། །སྐྲང་ཞིང་ལྕེ་ཡི་རྩེ་མོ་འདྲ། །མཛེར་པ་བྱུང་ཞིང་ཁ་ཆུ་འཛག །ལྕེ་ནི་རིངས་ཤིང་རྩུབ་པ་དང་། །གཡའ་དང་ནད་བཅས་ཚིག་
མི་ཐོན། །ཟ་བར་མི་ནུས་ལྕེ་ལྷག་ཡིན། །ཞེས་བྱ་བ་ལ། ལྕེའི་ཕུགས་ཀྱི་རྩའི་འོག་དང་འབྲེལ་པ་དེ་སྐྲང་ཞིང་ལྕེའི་མོ་འདྲ་བའི་མཛེར་པ་བྱུང་བ་དང་། ཁ་ཆུ་དང་ཁྲག་འཛག་པ་དང་། །ལྕེ་རེངས་ཤིང་གྱོང་བ་དང་། ཁ་ཟས་ཟ་མི་ནུས་པ་དེ་ནི་མིང་ལྕེ་ལྷག་ཅེས་བྱ་བ་ཡིན་ནོ། །
དེ་དང་འདྲ་བ་ལྕེ་སྟེང་ན། །གནས་པ་ཉེ་བའི་ལྕེ་ཞེས་བྱ། །ཞེས་བྱ་བ་ལ། བཤད་མ་ཐག་པའི་མཚན་ཉིད་དང་འདྲ་བའི་སྐྲངས་པའི་ནད་ལྕེའི་སྟེང་ན་གནས་པ་ནི་ཉེ་བའི་ལྕེ་ཞེས་བྱ་བའི་མིང་འདིས་བཤད་པ་ཡིན་ནོ། །དེ་ལྟར་ན་ལྕེའི་ནད་ནི་དྲུག་ཡོད་པ་ཡིན་ནོ། །རླུང་འཁྲུགས་
པ་ནི་རྐན་གྱི་ཤར། །འབྲུམ་ཕྲན་སྲ་ཞིང་ནད་བཅས་འགྱུར། །མང་ཞིང་མཐུག་ལ་འཛག་པར་བཅས། །རྐན་གྱི་འབྲུམ་ཕྲན་ཞེས་དེ་བཤད། །ཅེས་བྱ་བ་ལ། རླུང་གི་ནད་འཁྲུགས་པས་རྐན་གྱི་ཤལ་གནོད་པར་གྱུར་ན་འབྲུམ་ཕྲན་སྲ་ཞིང་ན་བ་དང་བཅས་པ་དང་། མང་
བ་དང་། མཐུག་ཅིང་འབྲུམ་བུ་འདུས་པ་དང་། ཆུ་སེར་འཛག་པ་དང་བཅས་པར་འབྱུང་སྟེ། །འབྲུམ་བུ་དེ་ནི་མིང་བད་ཀན་གྱི་འབྲུམ་ཕྲན་ཞེས་དྲང་སྲོང་རྣམས་ཀྱིས་བཤད་དོ། །བད་ཀན་ཁྲག་གིས་རྐན་ཕུགས་སུ། །ཉ་ཡི་ལྒང་པ་འདྲ་ཞིང་འཇམ། །འཕྱང་ཞིང་
སྐྲངས་ལ་སྤྱི་བག་ཅན། །ཁ་ཟས་སྣ་ནས་འབྱུང་བར་བྱེད། །ལྐོག་འགགས་སྐོམ་དང་ལུད་པ་དང་། །སློན་བྱེད་ལྐོག་མའི་ཤ་ལྷག་ཡིན། །ཞེས་བྱ་བ་ལ། བད་ཀན་ཁྲག་དང་འདྲེས་པས་རྐན་གྱི་ཕུགས་སུ་ཉའི་ལྒང་པ་འདྲ་བ་འཇམ་ཞིང་རབ་ཏུ་འཕྱང་ལ་སྦྱི་བག་ཅན་དུ་
เล่ม ๒๐๒ · หน้า 188a
སྐྲངས་པ་དང་། དེའི་དབང་གིས་ཁ་ཟས་སྣ་ནས་འབྱུང་བར་བྱེད་པ་དང་། ལྐོག་མ་འགགས་པ་ལ་སོགས་པ་སྐྱེད་པར་བྱེད་དོ། །ནད་དེ་ནི་ལྐོག་མའི་ཤ་ལྷག་ཅེས་བྱ་བ་ཡིན་ནོ། །རྐན་གྱི་དབུས་སུ་ནད་མེད་ཤ། །འདུས་པ་རྐན་འདུས་ཞེས་བྱའོ། །ཞེས་
བྱ་བ་ལ། རྐན་གྱི་དབུས་ཀྱི་ཕྱོགས་སུ་ཤ་འདུས་ཤིང་སྤུངས་པ་ནད་མེད་པར་སྐྱེས་པ་གང་ཡིན་པ་པ་དེ་ནི་མིང་རྐན་འདུས་པ་ཞེས་བྱའོ། །རྐན་གྱི་དབུས་སུ་པདྨ་འདྲ། །ཁྲག་ལས་སྐྱེས་པ་ཆུ་བུར་ཡིན། །ཞེས་བྱ་བ་ལ། རྐན་གྱི་དབུས་ཀྱི་ཕྱོགས་སུ་པདྨ་འདྲ་བར་སྐྲངས་པ་ཁྲག་
ལས་སྐྱེས་པའི་ནང་གང་ཡིན་པ་དེ་ནི་མིང་ཆུ་བུར་ཞེས་བྱའོ། །བད་ཀན་ལ་འཁྲུགས་པས་རིང་ནས་འཕེལ། །ནད་མེད་རུས་སྦལ་འདྲ་ཞེས་བྱ། ཞེས་བྱ་བ་ལ། བད་ཀན་འཁྲུགས་པར་གྱུར་པ་ལས་སྐྲངས་པའི་ནད་གང་ཡང་ཡུན་རིང་ཞིག་ནས་འཕེལ་བ་གང་ཡིན་པ་དེ་ནི་མིང་རུས་སྦལ་
འདྲ་བ་ཞེས་བྱའོ། །བད་ཀན་ཚིལ་གྱིས་རྒྱ་སྲན་འདྲ། །ནད་མེད་བརྟན་པ་འབུར་བ་ཡིན། །ཞེས་བྱ་བ་ལ། བད་ཀན་དང་ཚིལ་འཕེལ་བར་གྱུར་པ་ལས་སྐྲང་ནད་གང་རྒྱ་སྲན་གྱི་དབྱིབས་འདྲ་ཞིང་ཡུན་རིང་དུ་གནས་པར་འབྱུང་བ་གང་ཡིན་པ་དེ་ནི་མིང་འབུར་བ་ཞེས་བྱའོ། །མཁྲིས་
པས་རྣགས་པ་སྨིན་ཞེས་བྱ། །རྣག་འཛག་ནད་དཀྱེལ་ཆེ་བ་ཡིན། །ཞེས་བྱ་བ་ལ། མཁྲིས་པ་འཁྲུགས་པས་རྐན་གྱི་ནང་དུ་རྣགས་པར་གྱུར་པ་ནི་སྨིན་པ་ཞེས་བྱའོ། །དེ་ནི་རྣག་འཛག་པ་དང་ནད་ཀྱི་དཀྱིལ་ཆེ་བ་ཡིན་ནོ། །རླུང་མཁྲིས་ལས་གྱུར་ཆ་ཉོན་མོངས། །རྐན་སྐམ་དེ་ཡི་མིང་
ཅན་ཡིན། །ཞེས་བྱ་བ་ལ། རླུང་དང་མཁྲིས་པ་ལས་གྱུར་པའི་རྐན་གྱི་ནད་ཚ་ཞིང་སྐྲངས་པ་དེ་ཤས་ཆེར་སྡུག་བསྔལ་བ་དང་། རྐན་གྱི་ཕྱོགས་སྐམ་པ་གང་ཡིན་པ་དེ་ནི་དེའི་མིང་ཅན་ཏེ་རྐན་སྐམ་པ་ཞེས་བྱའོ། །དེ་ལྟར་ན་རྐན་གྱི་ནད་རྣམ་པ་བརྒྱད་ཡིན་ནོ། །ལྕེ་དང་འབྲེལ་པ་ལྐོག་
མའི་ནད། །ཤ་ཡི་མྱུ་གུ་མྱུར་འཕེལ་ཞིང་། །མི་བཟད་ལམ་ནི་འགོག་བྱེད་པ། །མྱུར་གསོད་བྱེད་པ་གག་པ་ཡིན། །ཞེས་བྱ་བ་ལ། ལྐོག་མའི་ཕྱོགས་སུ་ལྕེ་དང་འབྲེལ་ཅིང་ལྕེ་རྩ་ལས་བྱུང་བ་ལྐོག་མའི་ནང་ཤའི་མྱུ་གུ་ལྟ་བུའི་ཤ་ལྷག་སྐྱེ་ཞིང་འཕེལ་བར་བྱེད་ལ། མི་བཟད་
เล่ม ๒๐๒ · หน้า 188b
ཅིང་བརྣག་པར་དཀའ་བ་ལྐོག་མའི་ལམ་འགོག་པར་བྱེད་པ་མྱུར་དུ་གསོད་ཅིང་འཇོམས་པར་བྱེད་པ་གང་ཡིན་པ་དེ་ནི་མིག་གག་པ་ཞེས་བྱའོ། །དེ་ནི་རླུང་གྱུར་ལྐོག་མ་ཁ། །སྐམ་བྱེད་འགྲམ་བ་རྣ་ནད་སྐྱེད། །ཅེས་བྱ་བ་ལ། གག་པ་དེ་རླུང་ལས་གྱུར་པ་ལ་ནི་ལྐོག་མ་དང་ཁ་
སྐམ་པར་བྱེད་པ་དང་། འགྲམ་པ་དང་རྣ་བའི་ནད་སྐྱེད་པར་བྱེད་པ་ཡིན་ནོ། །མཁྲིས་པས་རིམས་སྐོམ་རྨོངས་བག་ཅན། །ལྐོག་འགགས་དུད་བས་བདུགས་སྙམ་སེམས། །མྱུར་སྨིན་མྱུར་དུ་འཕེལ་བ་དང་། །དམར་ཞིང་རེག་ན་མི་བཟོད་བྱེད། །ཅེས་བྱ་བ་ལ། མཁྲིས་
པ་ལས་གྱུར་པའི་གག་པ་ནི་རིམས་དང་སྐོམ་དད་ལ་སོགས་པ་དང་ལྡན་པར་འགྱུར་ཞིང་ལྐོག་མ་འགགས་པ་ལ་སོགས་པའི་མཚན་ཉིད་ཅན་ཡིན་ནོ། །བད་ཀན་གྱིས་དཀར་འབྱར་བག་ཅན། །ཞེས་བྱ་བ་ལ། བད་ཀན་ལས་གྱུར་པའི་གག་པའི་མཚན་ཉིད་ནི་དཀར་ཞིང་མདོག་
སྐྱ་བ་དང་སྦྱིན་ཞིང་འབྱར་བག་ཅན་དུ་འདུག་པ་ཡིན་ནོ། །ཁྲག་གྱུར་འབྲུམ་བུས་ཁྱབ་པ་དང་། །མེ་མདག་འདྲ་ཞིང་རྣ་ནད་སྐྱེད། །མཁྲིས་པ་ལས་གྱུར་མཚན་ཉིད་མཚུངས། །ཞེས་བྱ་བ་ལ། ཁྲག་འཁྲུགས་པ་ལས་གྱུར་པའི་གག་པ་ནི་འབྲུམ་བུ་ཕྲ་མོས་ཁྱབ་པ་དང་། མེ་མདག་
དང་རེག་པའི་ཚུལ་འདྲ་བའམ་མདོག་འདྲ་བ་དང་། རྣ་བ་གཉིས་ན་བར་བྱེད་པ་དང་། མཁྲིས་པ་ལས་གྱུར་པའི་གག་པའི་མཚན་ཉིད་དང་མཐུན་པ་ཡིན་པར་ཤེས་པར་བྱའོ། །འདུས་གྱུར་རྣག་ཕུགས་གཏིང་རིང་ཞིང་། །མཚན་མ་ཀུན་དང་ལྡན་པ་ཡིན། །ཞེས་བྱ་བ་ལ། ནད་གཞི་
གསུམ་འདུས་པ་ལས་གྱུར་པའི་གག་པ་ནི་རྣག་ཕུགས་གཏིང་རིང་ཞིང་ཟབ་སྟེ་མི་མངོན་པ་དང་། རླུང་ལ་སོགས་པའི་མཚན་པ་ཐམས་ཅད་དང་ལྡན་པ་ཡིན་ནོ། །བད་ཀན་ཤས་ཆེར་སྐྲངས་བ་དང་། །རྨེན་བུ་རྒྱ་ཤུག་འདྲ་ཞིང་མཐོ། །གྲ་མ་ཚེར་མས་གང་སྙམ་བྱེད། །ལམ་
འགག་བྱེད་པ་རྩ་བ་ཡིན། །ཞེས་བྱ་བ་ལ། རླུང་ལ་སོགས་པའི་ནད་ལས་བད་ཀན་ཤས་ཆེ་བར་གྱུར་པས་ནི། ལྐོག་མའི་ཕྱོགས་སྐྲངས་པ་དང་། །རྨེན་བུ་ཤ་ཁྱུད་རྒྱ་ཤུག་གི་དབྱིབས་འདྲ་ཞིང་མཐོ་བ་སྐྱེ་བ་དང་། གྲ་མ་འམ་ཚེར་མས་ནང་དུ་གང་བ་སྙམ་བྱེད་པ་དང་།
เล่ม ๒๐๒ · หน้า 189a
ལྐོག་མའི་ངོས་ན་འགག་པར་བྱེད་པ་ནི། །མིང་པདྨ་འམ། ཀུ་མུདའི་རྩ་བ་འདྲ་པའི་ཕྱིར་རྩ་བ་ཞེས་བྱའོ། །བླུམ་ཞིང་མཐོ་ལ་ཚ་བ་དང་། །ལྐོག་མའི་ངོས་གནས་འདུས་པ་ཡིན། །ཞེས་བྱ་བ་ལ། ལྐོག་མའི་ངོས་ན་གནས་པའི་སྐྲངས་པའི་ནད་ཟླུམ་པ་ལ་
སོགས་པའི་མཚན་ཉིད་ཅན་དེ་ནི་མིང་འདུས་པ་ཞེས་བྱའོ། །འགྲམ་པའི་མཚམས་གནས་མགུལ་པའི་ནད། །རས་བལ་ས་བོན་ལྟ་བུར་ཟླུམ། །སྤྱི་བག་ནད་ཚབས་ཆུང་བར་སྐྲང་། །སྲ་བ་མཆུ་རྩེ་ཅན་ཞེས་བྱ། །ཞེས་བྱ་བ་ལ། མགུལ་པའི་ཕྱོགས་སུ་སྐྲངས་པའི་ནད་དགང་
བལ་གྱི་ས་བོན་དང་དབྱིབས་འདྲ་བའི་ཟླུམ་པོ་སྤྱི་བག་ཅན་ཤས་ཆེར་མིན་བ་སྐྲང་ཞིང་སྲ་པ་དེ་ནི་མིང་མཆུ་རྩེ་ཅན་ཞེས་བྱའོ། །ཕྱི་དང་ནད་དུ་མི་བཟད་སྐྲང་། །ལྐོག་མའི་ལམ་གྱི་གཏན་པ་འདྲ། །མགོ་ལྕི་སྣུམ་དང་ཁ་ཆུ་འཛག །རིམས་སྐྱེད་ལྐོག་མཆུ་འཛིངས་པ་ཡིན། །ཞེས་
བྱ་བ་ལ། ལྐོག་མའི་ཕྱོགས་སུ་སྐྲངས་པའི་ནད་གང་ཕྱི་ནང་དུ་ཤས་ཆེར་སྐྲང་ཞིང་ལྐོག་མའི་རྒྱུན་ལམ་གྱི་གཏན་པ་འདྲ་བར་སྐྱེ་ཞིང་མགོ་བོ་ལྕི་བ་ལ་སོགས་པ་གང་ཡིན་པ་དེ་ནི། ལྐོག་མའི་མཆུ་འཛིངས་པ་ཞེས་བྱའོ། །སྐྲངས་པ་ཤས་ཆེར་མིན་ཞིང་། །ཆུ་ཞེང་དེ་དར་གདུ་བུ་
ཡིན། །ཞེས་བྱ་བ་ལ། ལྐོག་མའི་ཕྱོགས་སུ་སྐྲངས་པ་གང་ནད་ཚབས་ཆུང་ཞིང་དཔངས་རྒྱར་ཆུ་དང་ཞེང་གདུ་བུ་དང་འདྲ་བར་སྐྲངས་པའི་ནད་གང་ཡིན་པ་དེ་ནི་མིང་གདུ་བུ་ཞེས་བྱ་སྟེ། །གདུ་བུ་དང་དབྱིབས་འདྲ་བའི་ཕྱིར་རོ། །ནད་ཀྱིས་ལྐོག་མར་ཤ་མཛེར་ནི། །གཅིག་གམ་མང་
སྐྱེས་ནད་ཚབས་ཆུང་། །དབུགས་འབྱིན་དཀའ་ཞིང་ཟས་མིང་དཀའ། །རྩ་བ་ཆེ་བ་ལྐོག་མའི་མཚན། །ཞེས་བྱ་བ་ལ། རླུང་ལ་སོགས་པའི་ནད་འཁྲུགས་པར་གྱུར་པས་ལྐོག་མའི་གནས་སུ་ཤའི་མཛེར་པ་གཅིག་གམ། མང་པོ་འབྱུང་བར་གྱུར་ཅིང་དབུགས་འབྱིན་པར་དཀའ་བ་
ལ་སོགས་པའི་མཚན་ཉིད་ཅན་གང་ཡིན་པ་དེ་ནི་ལྐོག་མའི་མཚོན་ཞེས་བྱའོ། །ཤ་ཡི་མཛེར་པ་མང་པོས་ཁྱབ། །རབ་སྐམ་ཚ་ལ་མགོ་པོ་ན། །མདུང་ལྟར་ཤིན་ཏུ་ནད་སྐྱེད་བྱེད། །མཛེར་པས་ཁྱབ་པས་མདུང་འདྲ་ཡིན། །ཞེས་བྱ་བ་ལ། ཤའི་མཛེར་པ་མང་པོས་ཁྱབ་ཅིང་གཡོགས་
เล่ม ๒๐๒ · หน้า 189b
པ་རབ་ཏུ་སྐོམ་པ་ལ་སོགས་པ་དང་ལྡན་པའི་མཛེར་པ་མར་པོ་མདུང་ལྟར་ཤིན་ཏུ་ནད་སྐྱེད་པར་བྱེད་པའི་ལྐོག་མའི་ནད་དེ་ནི་མདུང་ལྟ་བུའི་ནད་ཅེས་བྱའོ། །ལྐོག་མ་ཀུན་ནི་མྱུར་ཁྱབ་ཅིང་། །མྱུར་སྐྱེ་མྱུར་སྨིན་ཤས་ཆེར་ན། །རུལ་བའི་རྣག་འདྲ་འཛག་གྱུར་པ། །སྐྲགས་པ་ལྐོག་
མའི་ཁོང་འབྲས་ཡིན། །ཞེས་བྱ་བ་ལ། ལྐོག་མར་སྐྲངས་པས་ཁྱབ་པའི་ནད་གང་ལྐོག་མ་ཐམས་ཅད་ཁྱབ་པར་བྱེད་པ་དང་། དེ་བཞིན་དུ་མྱུར་དུ་སྨིན་པར་བྱེད་པ་དང་། དེ་བཞིན་དུ་ཤས་ཆེར་ན་བ་ལ་སོགས་པའི་ནད་དེ་ནི་ལྐོག་མའི་ཁོང་འབྲས་ཞེས་བྱའོ། །ལྕེ་ཡི་
མཐའ་མ་ལྐོག་མ་སོགས། །སྐྲང་ཞིང་སྨིན་པ་མེད་པའི་ནད། །སྐྲང་ཞིང་སྨིན་པ་མེད་པའི་ནད་། །བརྟན་པ་ཁྲག་གིས་སྐྱེད་བྱེད་པ། །ནད་མེད་ལྐོག་མའི་རྨེན་བུ་ཡིན། །ཞེས་བྱ་བ་ལ། ལྕེའི་མཐའ་མ་དང་ལྐོག་མའི་ཕྱོགས་ལ་སོགས་པར་སྐྲངས་པ་ལ་སོགས་པའི་མཚན་ཉིད་དང་ལྡན་པ་དེ་ནི་ལྐོག་མའི་རྨིན་བུ་
ཞེས་བྱའོ། །རླུང་དང་བད་ཀན་ཚིལ་གྱིས་ནི། །ལྐོག་མའི་ཕྱི་རོལ་ལྦ་བ་སྐྱེས། །དེ་ནི་འཕེལ་བར་གྱུར་པའི་ཚེ། །རླིག་པར་ལྟར་འཕྱང་ན་བ་མེད། །ཅེས་བྱ་བ་ལ། རླུང་དང་བད་ཀན་དང་ཚིལ་གྱིས་ནད་འཁྲུགས་པར་གྱུར་པ་ལས། ལྐོག་མའི་ཕྱི་རོལ་དུ་ལྦ་བ་སྐྱེས་པར་གྱུར་ཅིང་། །
དེ་ཤས་ཆེར་ན་བ་མེད་ལ་རླིག་པ་ལྟར་འཕྱང་བ་ཡིན་ནོ། །དེ་ནི་རླུང་གྱུར་དམར་བའམ་གནག །ན་ཟུག་རྩ་རིས་ནག་པོར་བཅས། །འཕེལ་བས་ལྐོག་མ་ཁ་སྐམ་ཞིང་། །ལྕེ་ཡིས་རོ་མི་ཚོར་བར་བྱེད། །ཅེས་བྱ་བ་ལ། ལྐོག་མའི་ལྦ་བ་དེ་རླུང་ཤས་ཆེ་བ་ལས་གྱུར་པ་ཡིན་ན་ནི། །
དམར་བ་འམ་ཤས་ཆེར་གནག་པར་སྣང་ཞིང་ན་ཞིང་ཟུག་པ་ཤས་ཆེ་བར་གྱུར་པ་དང་། རྩའི་རི་མོ་ནག་པོ་དང་བཅས་པ་དང་། དེ་འཕེལ་བར་གྱུར་ན་ལྐོག་མ་སྐམས་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །བད་ཀན་ལས་ལྕི་རེག་ན་གྲང་། །བརྟན་ཞིང་སྐྱ་ལ་གཡའ་
དང་བཅས། །འཕེལ་ན་རྐན་དང་ལྐོག་མར་ཆགས། །ཁ་ནི་མངར་བ་བྲོ་བར་བྱེད། །ཅེས་བྱ་བ་ལ། ལྐོག་མའི་ལྦ་བ་དེ་བད་ཀན་ལས་གྱུར་པའི་རང་བཞིན་ལྕི་བ་དང་། རེག་ཅིང་མྱ་ངན་གྲང་བ་ལ་སོགས་པ་ཡིན་ལ། དེ་འཕེལ་བར་གྱུར་ན་བད་ཀན་དང་ལྐོག་མའི་ཕྱོགས་སུ་སྤྱི་བག་
เล่ม ๒๐๒ · หน้า 190a
ཅན་ཆགས་པར་འགྱུར་བ་དང་། ཁའི་ནང་རོ་མངར་བ་བྲོ་བར་བྱེད་པ་ཡིན་ནོ། །ཚིལ་གྱུར་བད་ཀན་ལྟ་བུར་ན། །དེ་ནི་འཕེལ་འབྲི་ལུས་འདར་བྱེད། །འཕེལ་བར་བྱེད་བའི་ཚེ་ན་ནི། །ལྐོག་མར་སྒྲ་བཅས་སྐད་གསང་ཉམས། །ཞེས་བྱ་བ་ལ། ཚིལ་
འཕེལ་བ་ལས་གྱུར་པའི་ལྦ་བ་ནི་བད་ཀན་གྱི་ལྦ་བ་དང་རང་བཞིན་འདྲ་ཞིང་དེ་ཆེད་འགའ་ནི་འཕེལ་ལ། ཆེད་འགའ་ནི་འབྲི་བར་བྱེད་དེ། ཚིལ་རྒྱས་ན་ནི་འཕེལ་ལ། ཚིལ་བྲིན་འདྲི་བར་ཤེས་པར་བྱའོ། །གཞན་ཡང་ལྦ་བ་འཕེལ་བར་བྱེད་བའི་ཚེ་ན་ནི་ལྐོག་མར་སྒྲ་ངར་ངར་པོ་དང་བཅས་པ་
དང་། སྐད་གསང་ཉམས་ཤིང་ཆུང་བར་འགྱུར་རོ། །བད་ཀན་གྱིས་ནི་རླུང་རྒྱུན་བཀག །ལྐོག་སྐམ་སྐད་གསང་ཉམས་པ་དང་། དཀའ་བས་དབུགས་འབྱིན་མུན་ཞུགས་སྙམ། །རླུང་ལས་སྐད་ཉམས་གང་ཡིན་འགྱུར། །ཞེས་བྱ་བ་ལ། བད་ཀན་འཁྲུགས་པར་གྱུར་པ་
ལས་གང་གི་ཚེ་རླུང་རྒྱུ་བའི་རྒྱུན་བཀག་པར་འགྱུར་ཞིང་། དེ་བཞིན་དུ་མི་དེ་ལྐོག་མ་སྐམས་པ་དང་། སྐད་གསང་ཤིན་ཏུ་ཉམས་པར་འགྱུར་བ་དང་། དབུགས་ཉམ་ཐག་པར་འབྱིན་པ་དང་། མུན་པར་ཞུགས་པ་སྙམ་དུ་མུན་འཐིབས་ཞེས་བྱེད་པར་འགྱུར་བ་དང་། རླུང་གི་ནད་
གང་གིས་སྐད་གསང་ཉམས་པ་ཞེས་བྱ་བར་ཉམས་པར་འགྱུར་ཏེ། དེ་ལྟར་ན་ལྐོག་མའི་ནད་བཅོ་བརྒྱད་ཡིན་ནོ། །རླུང་ནི་ཀུན་ཏུ་འགྲོ་བྱེད་པས། །ཁ་ནང་རྨ་ནི་འཕོ་བར་བྱེད། །དམར་ལ་རྩུབ་པ་སྐྱེད་བྱེད་ཅིང་། །མཆུ་དམར་པགས་པ་ལྷོད་པ་དང་། །ལྕེ་ཡིས་གྲང་བ་མི་བཟོད་
ལྕི། །གས་ཤིང་ཚེར་མས་ཁྱབ་འདྲར་སྣང་། །ཁ་མནམ་གདངས་པར་དཀའ་བ་ནི། །ཁ་ཡི་ཤུ་བ་ཞེས་བྱར་བཤད། །ཅེས་བྱ་བ་ལ། རླུང་ཀུན་འགྲོ་བ་གཡོ་བར་བྱེད་པས་ཁའི་ནང་དུ་རྨ་འཕོ་ཞིང་ཡན་མན་དུ་གནས་འཕོ་བར་བྱེད་བ་དང་། མདོག་དམར་ཞིང་རྩུབ་པ་སྐྱེད་པར་བྱེད་
པ་དང་། དེ་བཞིན་དུ་མཆུ་ཟངས་ལྟར་དམར་བ་དང་། པགས་བ་ལྷོད་ཅིང་འགུལ་བ་དང་། །ལྕེས་གྲང་བ་མི་བཟོད་ཅིང་རང་བཞིན་ལྕི་བ་དང་། མཆུ་གས་ཤིང་ཚེར་མས་ཁྱབ་པ་ལྟར་སྣང་བ་དང་། རྣགས་ཤིང་ཤུ་བ་བྱུང་བས་ཁ་གདངས་པ་བཀའ་བར་གྱུར་པའི་ནད་དེ་ནི་མིང་
เล่ม ๒๐๒ · หน้า 190b
ཁའི་ཤུ་བ་ཞེས་བཤད་དོ། །བད་ཀན་བཞང་འབྲུམ་སྐྲན་སོགས་ཀྱིས། །འོག་ཏུ་གནོད་བར་བྱས་པའི་རླུང་། །གྱེན་འབྱུང་ཁ་ནི་དྲི་མི་ཞིམ། །དེ་ནི་སྟེང་གི་རྐུབ་ཅེས་བྱ། །ཞེས་བྱ་བ་ལ། བད་ཀན་ལ་སོགས་པས་རླུང་འོག་ཏུ་རྒྱུ་བ་བཀག་པར་གྱུར་པས་གནོད་པར་གྱུར་ན། རླུང་
དེ་གྱེན་དུ་འབྱུང་བས་ཁ་དེ་དྲི་མི་ཞིམ་པར་འགྱུར་ཏེ། དེའི་མིང་ནི་སྟེང་གི་རྐུབ་ཅེས་བྱ་སྟེ། འཕྱེན་གྱི་རླུང་སྟེང་དུ་འབྱུང་བར་འགྱུར་བའི་ཕྱིར་རོ། །མཁྲིས་གྱུར་ཁ་ཤུ་ཀ་རྣག་ཅིང་། །ཚ་ན་ཁ་ནི་ཆ་བྲོ་ལ། །རྨ་ལ་ལན་ཚྭས་བྱུགས་སྙམ་སེམས། །ཞེས་བྱ་བ་ལ། མཁྲིས་པ་ལས་གྱུར་པའི་
ཁའི་ཤུ་བ་ནི་ཁ་རྣགས་པར་འགྱུར་བ་དང་། ཚ་བ་དང་། ན་བ་དང་། ཁའི་ནད་ཚྭ་བྲོ་བར་འགྱུར་བ་དང་། རྨ་ལན་ཚྭ་བྱུགས་ཤིང་བསྐུས་པ་དང་འདྲ་བར་འགྱུ་བ་ཡིན་ནོ། །ཁྲག་ལས་གྱུར་པའང་དེ་དང་འདྲ། །ཞེས་བྱ་བ་ལ། ཁྲག་ལས་གྱུར་པའི་ཁ་ཤུ་ནི་མཁྲིས་པ་ལས་
གྱུར་པའི་ཁ་ཤུ་དང་མཚན་ཉིད་འདྲ་བར་ཤེས་པར་བྱའོ། །བད་ཀན་ལས་གྱུར་ཁ་མངར་བྲོ། །གཡའ་ཞིང་རྨ་ནེ་འབྱིལ་བག་ཅན། །ཞེས་བྱ་བ་ལ། བད་ཀན་ལས་གྱུར་པའི་ཁ་ཤུ་ནི། ཁའི་ནང་རོ་མངར་བ་བྲོ་བ་དང་། ཤུ་པའི་རྨ་དེ་གཡའ་བ་ལ་སོགས་པའི་མཚན་ཉིད་ཅན་
ཡིན་ནོ། །མཁུར་ཚོས་ནང་དུ་བརྟན་ནས་ནི། །འབྲུམ་བུ་གནག་ཅིང་སྐྱེ་བ་འབྱུང་། །དེ་ནི་མཉེ་ཞིང་བཅད་པ་དང་། །བསྐྱོད་ན་འཕེལ་བར་བྱེད་པ་ཡིན། །ཞེས་བྱ་བ་ལ། བད་ཀན་འཕེལ་བར་བྱེད་པ་མཁུར་ཚོས་ཀྱི་ནང་དུ་བརྟེན་ཅིང་གནས་ན་འབྲུམ་བུ་གནག་ཅིང་སྐྱ་བ་འབྱུང་བར་
འགྱུར་ཏེ། འབྲུམ་བུ་དེ་ལག་པས་མཉེ་ཞིང་བསྐྱོད་པ་ལ་སོགས་པ་བྱས་ན། སླར་འཕེལ་ཞིང་རྒྱས་པར་འགྱུར་རོ། །ནད་ནི་ཁྲག་བཅས་གྱུར་ཁ་ཤུ། །ཁ་ཤུ་ནད་ནི་ཁྲག་བཅས་འགྱུར། །འདུས་པའི་མཚན་ཉིད་ཀུན་དང་ལྡན། །ཞེས་བྱ་བ་ལ། རླུང་ལ་སོགས་པའི་ནད་ཁྲག་དང་
བཅས་པ་ལས་གྱུར་པའི་ཁ་ཤུ་ནི། མཚན་ཉིད་སྔར་སྨོས་པ་ཐམས་ཅད་དང་ལྡན་པ་ཡིན་ནོ། །དེ་ཉིད་སོ་ཤིང་ལ་སོགས་ལ། །མི་དགའ་ཁ་དྲི་མི་ཞིམ་འགྱུར། །ཞེས་བྱ་བ་ལ། ནད་ཁྲག་དང་བཅས་པ་དེ་ཉིད་སོ་ཤིང་ལ་སོགས་པ་ལ་མི་དགའ་ཞིང་བསྟེན་པར་མི་བྱེད་པས། ཁ་དྲི་མི་
เล่ม ๒๐๒ · หน้า 191a
ཞིམ་ཞིང་དྲི་མ་ནམ་པར་འགྱུར་རོ། །མཆུ་དང་མཁུར་ཚོས་སོ་རྩ་དང་། །ལྕེ་དང་རྐན་དང་མགུལ་པ་དང་། །ཁ་དང་ཐམས་ཅད་དག་གི་ནི། །ནད་ནི་བདུན་ཅུ་རྩ་ལྔ་ཡིན། །བཅུ་གཅིག་གཅིག་དང་བཅུ་དང་ནི། །བཅུ་གསུམ་དེ་བཞིན་དྲུག་དང་བརྒྱད། །བཅོ་བརྒྱད་
བརྒྱད་པོ་དག་དང་ནི། །དེ་དག་གོ་རིམས་བཞིན་དུ་སྦྱར། །ཞེས་བྱ་བ་ལ། མཆུའི་ནང་ནི་བཅུ་གཅིག་ཡིད་པར་བཤད་དོ། །མཁུར་ཚོས་ལ་ནི་གཅིག་ཡོད་དོ། །སོ་ལ་ནི་བཅུ་ཡོད་དོ། །སོ་རྩ་ལ་ནི་བཅུ་གསུམ་ཡོད་དོ། །ལྕེ་ལ་ནི་དྲུག་ཡོད་དོ། །རྐན་ལ་ནི་བརྒྱད་ཡོད་དོ། །མགུལ་པ་ལ་ནི་བཅོ་བརྒྱད་
ཡོད་དོ། །ཁ་ལ་ནི་བརྒྱད་ཡོད་དོ། །དེ་ལྟར་ན་ཁ་ནད་ནི་སྤྱིར་བདུན་ཅུ་རྩ་ལྔ་ཡོད་པ་ཡིན་ནོ། །སོ་སྟོ་ཤ་དང་ཁྲག་གྱུར་མཆུ། །ཆུ་བུར་ཆུ་ནི་མེད་པ་དང་། །རྐན་གྱི་རུས་སྦལ་འབྲུམ་ཕྲན་དང་། །མིད་ཁོང་སྟོང་སྟོང་ཆེ་མཆུ་འཛིངས། །སྐད་ཉམས་སོ་སྔོན་སྟེང་གི་རྐུབ། །མདུང་འདྲ་གདུ་བུ་ཆུ་
སེར་ཅན། །འདུས་གྱུར་མིད་པ་མཆུ་ནད་དང་། །ཁྲག་དང་འདུས་གྱུར་གག་པ་དང་། །སོ་གོགས་སོ་ནི་ཆག་པ་དང་། །སྨིན་པའི་ཉེ་བའི་ལྕེ་དང་ནི། །ལྐོག་མའི་ལྦ་བ་སྐད་ཉམས་དང་། །དབུགས་མི་ཐོན་པ་ལོ་གཅིག་ལོན། །ཞེས་བྱ་བ་ལ། ནད་དེ་རྣམས་ཀྱི་ནང་ནས། །སོ་སྟོ་
བ་ལ་སོགས་པའི་ནང་ནི་གསོར་མི་རུང་བ་ཡིན་ཏེ། སོ་ནད་ལས་ནི་སོ་སྟོ་བའོ། །མཆུ་ནད་ལས་ནི་ཤ་ལས་གྱུར་པ་དང་། །ཁྲག་ལས་གྱུར་པའོ། །ཆུ་བུར་རམ་རྨེན་བུ་ལས་ནི་ནང་ན་ཆུ་ཡོད་པའི་ཆུ་བུར་མ་གཏོགས་པར་འབྲུམ་བུའི་ཆུ་བུར་ལྟ་བུ་དང་། །རླུང་གི་ཆུ་བུར་དང་། བད་ཀན་གྱི་
ཆུ་བུར་དང་སྐྲང་པ་གསོར་མི་རུང་ངོ་། །བད་ཀན་གྱི་ནད་ལས་ནི་རུས་སྦལ་ལྟ་བུ་དང་། འབྲུམ་ཕྲན་ཞེས་བྱ་བ་དག་གསོར་མི་རུང་ངོ་། །ཡང་སོ་ནད་ལས་ནི་ཁོང་སྟོང་དང་ཁོང་སྟོང་ཆེན་པོ་གསོར་མི་རུང་ངོ་། །མིད་པའི་ནད་ལས་ནི་མཆུ་འཛིངས་དང་། སྐད་འགགས་པ་དང་། ཡང་སོའི་ནད་
ལས་ནི་སྔོན་པོ་དང་། ཁའི་ནད་ལས་སྟེང་གི་རྐུབ་དང་། མགུལ་པའི་ནད་ལས་མདུང་འདྲ་བ་དང་། གདུ་བུ་ལྟ་བུ་དང་། ལྕེའི་ནད་ཆུ་སེར་ཅན་དང་། འདུས་པ་ལས་གྱུར་པའི་མིད་པ་དང་། མཆུ་ནད་དང་། ཁྲག་དང་འདུས་པ་ལས་གྱུར་པའི་གག་པ་དང་། སོ་གོགས་བ་དང་ཆག་པར་གྱུར་
เล่ม ๒๐๒ · หน้า 191b
པ་དང་། སྨིན་པའི་ཉེ་བའི་ལྕེ་ཡང་གསོ་དཀའོ། །ལྐོག་མའི་ལྦ་བ་ལ་སོགས་པ་ལོ་གཅིག་ལོན་པ་ཡང་གསོ་དཀའ་བ་ཡིན་ནོ། །སོ་བརྩེ་སོགས་འཚོ་བ་ཙམ། །ཞེས་བྱ་བ་ལ། སོ་བརྩེ་བ་དང་གས་པའི་ནད་གཉིས་ནི་རེ་ཞིག་འཚོ་བ་ཙམ་དུ་བྱ་བ་ཡིན་ནོ། །ལྷག་མ་མཚོན་དང་སྨན་
གྱིས་གསོ། །ཞེས་བྱ་བ་ལ། མཆུ་ལ་སོགས་པའི་ནད་ལྷག་མ་རྣམས་ནི་འོག་ནས་བཤད་པའི་ཚུལ་དུ་མཚོན་དང་སྨན་གྱི་སྦྱོར་བས་གསོ་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་
སྦྱར་བ་ལས། ཕྱི་མའི་གནས་ཀྱི་ལེའུ་ཉེ་ཤུ་རྩ་གཅིག་པའི་རྣམ་པར་འགྲེལ་པའོ།། །།དེ་ནས་ཁ་ནད་གསོ་བ་བཤད་པར་བྱའོ། །མཆུ་རལ་བ་ཡི་མཐའ་བྲུད་དེ། །བཙེམས་ལ་རྨ་ལྟར་གསོ་བར་བྱ། །ཞེས་བྱ་བ་ལ། མཆུ་རལ་བ་ཞེས་བྱ་བའི་མཆུ་ནད་ཀྱི་མཐའ་མ་བྲུད་
དེ། གཙགས་བུས་བྲུད་ཅིང་ཞལ་ཞལ་བྱས་ཏེ་སྦྱར་ལ་ལེགས་པར་བཙེམས་ཏེ་རྨ་གསོ་བའི་ཚུལ་ལྟར་གསོ་བར་བྱའོ། །ཤིང་མངར་སེང་ཕྲོམ་ཀྲ་ཀུ་ནི། །ཐལ་ཏྲེས་ཨུཏྤ་ལ་ཤྲ་པ་ནི། །མོན་སྣེའུ་དམེ་རུ་པ་ཏོ་ལ། །ཏིལ་མར་བསྐོལ་བས་བསྐུ་བར་བྱ། །ཞེས་བྱ་བ་ལ། ཡང་ན་
མཆུ་རལ་བ་ལ་ཤིང་མངར་ལ་སོགས་པའི་སྨན་གྱི་ལྡེ་གུ་དང་། ཏིལ་མར་བསྐོལ་བས་བསྐུ་བར་བྱའོ། །རླུང་འཇོམས་མངར་བའི་སྡེ་ཚན་དང་། །བསྐོལ་བའི་ཏིལ་མར་སྣ་སྨན་གཏང་། །ཞེས་བྱ་བ་ལ། ཡང་དེ་ལ་རླུང་འཇོམས་པའི་སྨན་གྱི་སྡེ་ཚན་དང་། མངར་བའི་སྨན་གྱི་སྡེ་ཚན་དང་
བསྐོལ་བའི་ཏིལ་མར་སྣ་ནས་གཏང་བར་བྱའོ། །རླུང་གྱུར་མཆུ་ནད་སོ་རྩི་པོག །སྦྲ་ཚིལ་གུ་གུལ་ཐང་ཤིང་ནི། །སྣུམ་ཆེན་བསྐོལ་བའི་རས་བལ་དག །སྦངས་པའི་ཡེའུས་གླན་པར་བྱ། །ཞེས་བྱ་བ་ལ། རླུང་ལས་གྱུར་པའི་མཆུ་ནད་ལ་ནི་སྲ་རྩི་པོག་ལ་སོགས་པ་དང་སྣུམ་ཆེན་པོ་
གང་ཡང་རུང་བ་བསྐོལ་པའི་ནང་དུ་སྦངས་པའི་རས་བལ་གྱི་ཡིའུས་གླན་པར་བྱའོ། །ཤིང་མངར་ཕྱི་མར་བཅས་པ་དང་། །དེ་ཉིད་ཀྱིས་ནི་བསྐུ་བར་བྱ། །ཞེས་བྱ་བ་ལ། ཡང་ན་ཤིང་མངར་གྱི་ཕྱེ་མ་དང་། སྣུམ་ཆེན་པོ་དེ་ཉིད་སྦྱར་བས་བསྐུས་ན་ཡང་རླུང་ལས་གྱུར་པའི་མཆུ་ནད་ལ་
เล่ม ๒๐๒ · หน้า 192a
ཕན་ནོ། །ཨེ་རཎྜ་ཡི་ལོ་མ་ནི། །འོ་མར་བསྐོལ་བས་སྦུ་བས་དུགས་བྱ། །ཞེས་བྱ་བ་ལ། ཡང་ན་རླུང་ལས་གྱུར་བའི་མཆུ་ནད་ལ། ཨེ་རཎྜའི་ལོ་མ་འོ་མར་བསྐོལ་བའི་སྦུ་གུ་ལས་དུགས་བྱའོ། །མཆུ་རལ་སྐབས་བཤད་སྣ་སྨན་དང་། །མགོ་བོ་བརྟ་བ་དག་
ཀྱང་བྱ། །ཞེས་བྱ་བ་ལ། ཡང་ན་གོང་དུ་མཆུ་རལ་བའི་སྐབས་སུ་བཤད་པའི་སྣ་སྨན་དང་། དེ་བཞིན་དུ་མགོ་བོ་བརྟ་ཞིང་བསྐུ་བ་དག་ཀྱང་བྱའོ། །མཁྲིས་པས་སྣད་པའི་མཆུ་ནད་ལ། །སྲིན་བུ་པད་པས་ཁྲག་དབྱུང་བྱ། །ཞེས་བྱ་བ་ལ། མཁྲིས་པ་ལས་གྱུར་པའམ། སྣང་པ་ལས་
གྱུར་པའི་མཆུ་ནད་ལ་ནི་སྲིན་བུ་པད་པ་ལ་སོགས་པས་གཏར་ག་གདབ་ཅིང་ཁྲག་དབྱུང་བར་བྱའོ། །སེང་ཕྲོམ་སྦྲང་རྩི་སྲ་རྩི་པོག །ཤིང་མངར་བཅས་པའི་ཕྱེ་མ་གདབ། །ཅེས་བྱ་བ་ལ། ཡང་ནད་དེ་ལ་སེང་ཕྲོ་མལ་སོགས་པའི་ཕྱེ་མ་འམ་ལྡེ་གུས་བསྐུས་ན་ཕན་ནོ། །སླེ་ཏྲེས་ཤིང་
མངར་རྨ་ཤིང་དང་། །བསྐོལ་བའི་མར་གྱིས་བསྐུས་ན་འང་ཕན། །ཞེས་བྱ་བ་ལ། ཡང་ན་ཁྲག་དང་སྣད་པའི་མཆུ་ནད་ལ་སླེ་ཏྲེས་ལ་སོགས་པ་དང་བསྐོལ་བའི་མར་གྱིས་བསྐུས་ན་ཡང་ཕན་ནོ། །མཁྲིས་པའི་ཁོང་འབྲས་ལྟར་ཡང་གསོ། །ཞེས་བྱ་བ་ལ། འདིར་མཁྲིས་པ་
དང་ཁ་སྣད་པ་ལས་གྱུར་པའི་མཆུ་ནད་ལ་ནི་མཁྲིས་པའི་ཁོང་འབྲས་ཀྱི་གསོ་བ་ཇི་སྐད་སྨོས་པ་དག་ཀྱང་བྱའོ། །ཁྲག་ལས་གྱུར་པ་སར་པ་ལ། །དེ་དག་ཉིད་ཀྱིས་གསོ་བར་བྱ། །ཞེས་བྱ་བ་ལ། ཁྲག་ལས་གྱུར་པའི་མཆུ་ནད་སར་པ་ཡུན་རིང་དུ་མ་ལོན་པ་ལ་ནི་མཁྲིས་པའི་གསོ་
བར་བཤད་པ་འདི་དག་ཉིད་ཀྱིས་གསོ་བར་བྱའོ། །བད་ཀན་ལས་གྱུར་མཆུ་ནད་ལ། པ་ཏོའི་ཐལ་བ་ཚ་བ་གསུམ། །སྦྲང་རྩི་དང་ནི་སྦྱར་བས་བསྐུ། །གཏར་ག་བྱས་ནས་ཕྱེ་མ་གདབ། །བད་ཀན་འཇོམས་པར་བྱེད་པ་ཡིན། །དུད་བརྔུབས་སྣ་སྨན་མཁུར་བཀད་བྱ། །ཞེས་
བྱ་བ་ལ། བད་ཀན་ལས་གྱུར་པའི་མཆུ་ནད་ཀྱིས་ཉེན་པ་ལ་ནི་པ་ཏོ་ལ་ལ་སོགས་པའི་སྨན་གྱི་ལྡེ་གུས་བསྐུ་བ་དང་། །གཏར་ག་གདབ་པ་ལ་སོགས་བ་བྱའོ། །ཚིལ་གྱུར་དུགས་བྱས་དབྲལ་ནས་ནི། །མེ་ཡིས་ངེས་པར་བསྲེག་པར་བྱ། །ཞེས་བྱ་བ་ལ། ཚིལ་ལས་གྱུར་པའི་
เล่ม ๒๐๒ · หน้า 192b
མཆུ་ནད་ལ་ནི་དུགས་བྱས་ལ་དབྲལ་བ་ལ་སོགས་པ་བྱའོ། །པྲི་ཡང་ཀུ་དང་འབྲས་བུ་གསུམ། །སེང་ཕྲོམ་སྦྲང་རྩིར་སྦྱར་བས་བསྐུ། །ཞེས་བྱ་བ་ལ། ཚིལ་ལས་གྱུར་བའི་མཆུ་ནད་ལ་ནི་པྲི་ཡང་ཀུ་ལ་སོགས་པས་བསྐུ་བར་བྱའོ། །ཆུ་ཡི་ཆུ་བུར་བརྟོལ་ནས་སྦྱང་། །སྨན་རྣོན་
སྦྲང་རྩིས་བསྐུ་བར་བྱ། །ཞེས་བྱ་བ་ལ། ཆུའི་ཆུ་བུར་ནི་དང་པོར་བརྟོལ་ནས་སྦྱང་ཞིང་དག་པར་བྱས་ལ། སྨན་རྣོན་པོ་པི་པི་ལིང་ལ་སོགས་པས་བསྐུ་བར་བྱའོ། །གཏིང་རིང་པ་འམ་རབ་འཕེལ་ལ། །ཐང་སྨན་དག་གམ་མེ་བཙས་གསོ། །ཞེས་བྱ་བ་ལ། ཆུའི་ཆུ་བུར་
གཏིང་རིང་ཞིང་ནང་དུ་ཞུགས་པའམ་རབ་ཏུ་འཕེལ་བ་ལ་ནི་ཐང་སྨན་ནམ་མེ་བཅས་བསྲེག་པར་བྱའོ་ཞེས་བྱའི་དོན་ཏོ། །མཁུར་བའི་ཆུ་སེར་སྨིན་སྐབས་སུ། །སྐྲངས་པའི་ནད་ལྟར་གསོ་བར་བྱ། །ཞེས་བྱ་བ་ལ། མཁུར་བ་ཆུ་སེར་འབྱུང་བ་སྨིན་ཅིང་རྣགས་པར་གྱུར་པའི་
སྐབས་སུ་ནི་མདོའི་གནས་སུ་བཤད་པའི་སྐྲངས་པའི་ནད་ལྟར་གསོ་བར་བྱའོ། །སོ་གྲང་བ་ལ་དུགས་བྱ་སྟེ། །སོ་རྩ་བྲུད་དེ་ཏིལ་མར་བསྲེག །ཅེས་བྱ་བ་ལ། སོ་གྲང་བར་གྱུར་པ་ལ་ནི་དང་པོར་དུགས་བྱས་ལ། རྩེ་མོ་དཀྱིལ་འཁོར་འདྲ་བའི་གཙགས་བུས་བྲུད་དེ་ཏིལ་མར་
བསྐོལ་བས་བསྲེག་པར་བྱའོ། །གླ་སྒང་རྒྱམ་ཚ་སྦྲང་རྩི་དང་། །སེ་འབྲུའི་ཤུན་པ་འབྲས་བུ་གསུམ། །སྐྱེར་པའི་ཁཎྜ་འཛམ་བུའི་རྐང་། །བཅའ་སྒ་སྦྱར་བས་བསྐུ་བར་བྱ། །ཞེས་བྱ་བ་ལ། ཡང་སོའི་ཕྲེང་བ་དེ་གླ་སྒང་ལ་སོགས་པའི་སྨན་སྦྱར་བའི་ལྡེ་གུས་བསྐུ་བར་བྱའོ། །
འོ་མ་ཅན་བསྐོལ་མཁུར་བ་བཀང་། །ཨེ་རཎྜཔར་སྣ་སྨན་གཏང་། །ཞེས་བྱ་བ་ལ། འོ་མ་ཅན་གྱི་ཤིང་བསྐོལ་བའི་ཁུ་བས་མཁུར་བ་དགང་བ་འམ། ཨེ་རཎྜའི་མར་གྱི་སྣ་སྨན་གཏང་བར་བྱའོ། །སོ་བརྩེ་དེ་བཞིན་བྱེ་བ་ལ། །རླུང་འཇོམས་གསོ་བ་ཐམས་ཅད་བྱ། །ཞེས་བྱ་བ་ལ། །
སོ་བརྩེ་བ་དང་པོ་གས་ཤིང་བྱེ་བ་ལ་ནི་རླུང་འཇོམས་པའི་ཟས་དང་སྐོམ་དང་སྨན་ཐམས་ཅད་ཀྱིས་གསོ་བར་བྱའོ། །ཏིལ་དང་ཤིང་མངར་སྦྲང་རྩི་ནི། །འོ་མར་བསྐོལ་བའི་མཁུར་བཀང་བཅང་། །ཞེས་བྱ་བ་ལ། ཡང་ན་ནད་དེ་གཉིས་ལ་ཏིལ་ལ་སོགས་པ་དང་བསྐོལ་བའི་ཁུ་བ་
เล่ม ๒๐๒ · หน้า 193a
མཁུར་བར་བཅངས་ན་ཕན་ནོ། །སོ་འགུལ་བ་ལ་བ་བཅུའི། །ཁུ་བ་མར་བསྐོལ་མཁུར་བ་བཀང་། །ཞེས་བྱ་བ་ལ། སོ་འགུལ་བའི་ནད་ལ་ནི་རྩ་བ་བཅུ་བསྐལ་བའི་ཁུ་བ་དང་། ཞུན་མར་རམ་ཏིལ་བསྐོལ་བ་མཁུར་བར་བཅངས་ན་ཕན་ནོ། །སྤངས་མ་
སེང་ཕྲོམ་པི་པི་ལིང་། །འབྲས་བུ་གསུམ་དང་རྨ་ཤིང་དང་། །རྒྱམ་ཚ་ཡིས་ནི་བདར་བར་བྱ། །ཞེས་བྱ་བ་ལ། ཡང་སོ་འགུལ་བ་ལ་སྤངས་མ་ལ་སོགས་པས་སོ་བདར་ན་ཡང་ཕན་ནོ། །སྣུམ་བག་གིས་ནི་སྣ་སྨན་དང་། །མཁུར་བཀང་གནས་སྐབས་ཇི་བཞིན་བསྟེན། །
ཞེས་བྱ་བ་ལ། ཡང་སོ་འགུལ་བ་ལ་སྣུམ་བག་ཅན་གྱི་སྣ་སྨན་ལ་སོགས་པ་གནས་སྐབས་ཇི་ལྟ་བ་བཞིན་དུ་བསྟེན་པར་བྱའོ། །སོ་ལྷག་སྐྱེས་ལ་འབྲས་སྨན་གྱིས། །བསྐུས་ཏེ་གོགས་པར་གྱུར་པ་དང་། །སྲིན་ཅན་སོ་ལྟར་ཕྱུང་ནས་ནི། །དེ་ཚེ་དེ་དང་འདྲ་བར་གསོ། །ཞེས་
བྱ་བ་ལ། སོ་ལྷག་སྐྱེས་པ་ཞེས་བྱའི་སོ་ནད་ལ་ནི་ཐལ་སྨན་གྱིས་བསྐུས་ཏེ་གོགས་ཤིང་བྱེ་བར་གྱུར་པ་དང་། སྲིན་བུས་ཟོས་པའི་སོ་ལྟར་ཕྱུང་ལ། དེ་དང་འདྲ་བ་ཁོ་ནར་གསོ་བར་བྱའོ། །ཁྲག་ནི་ཆོད་པར་མ་གྱུར་ན། །བསྲེགས་ལ་རྨ་ལྟར་གསོ་བར་བྱ། །ཞེས་བྱ་བ་ལ། སོ་
ལྷག་སྐྱེས་པ་དེ་ཕྱུང་བའི་ཚེ་ཁྲག་ཆོད་པར་མ་གྱུར་ན་གནས་དེ་བསྲེགས་ལ། དེའི་འོག་ཏུ་རྨ་ལྟར་གསོ་བར་བྱའོ། །སོ་དྲེག་ཆགས་ལ་སོ་རྩ་ལ། །གནོད་པ་མེད་པར་བསལ་བར་བྱ། །ཞེས་བྱ་བ་ལ། སོ་དྲེག་ཆགས་པ་ལ་ནི་སོའི་རྩ་བ་ལ་གནོད་པ་མེད་པར་བྱས་ཏེ། སོ་
བྲུད་པའི་གཙགས་སྤྱད་ཀྱིས་དེ་བྲུད་ཅིང་བསལ་བར་བྱའོ། །ཐལ་སྨན་སྦྲང་རྩིར་བཅས་པས་ནི། །དེ་ཡི་འོག་ཏུ་བསྐུ་བར་བྱ། །ཞེས་བྱ་བ་ལ། དེ་ལྟར་སོ་དྲེག་བཞར་ནས་ཐལ་སྨན་གྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུས་སོ་ལ་བསྐུ་བར་བྱའོ། །སོ་གོགས་པ་ལའང་འདི་
ཉིད་དང་། སོ་བརྩེར་བཤད་པའི་གསོ་བ་བྱ། །ཞེས་བྱ་བ་ལ། སོ་གོགས་པའི་ནད་ལ་ཡང་སོ་དྲེག་ཆགས་པའི་གསོ་བ་འདི་ཉིད་དང་། སོ་བརྩེ་པ་ལ་བཤད་པའི་གསོ་བ་ཐམས་ཅད་བྱའོ། །སྲིན་ཅན་སོ་ནི་མི་འགུལ་ལ། །དུགས་བྱས་ནས་ནི་ཁྲག་དབྱུང་བྱ། །སྣུམ་གྱིས་
เล่ม ๒๐๒ · หน้า 193b
བསྐུ་ཞིང་མཁུར་བཀང་དང་། །སྣ་སྨན་ཁ་ཟས་རླུང་འཇོམས་སྦྱིན། །ཞེས་བྱ་བ་ལ། སོ་སྲིན་བུས་ཟོས་པ་མི་འགུལ་བར་གནས་པ་ལ་ནི་དང་པོར་དུགས་བྱས་ལ་ཁྲག་དབྱུང་བར་བྱ་ལ་རླུང་ལ་ཕན་པའི་སྣུམ་གྱིས་བསྐུ་བ་ལ་སོགས་པས་གསོ་བར་བྱའོ། །ཁོང་སྟོང་
བུར་མ་སྦྲ་ཚིལ་གྱིས། །གང་བའི་ཐུར་མས་བསྲེག་པར་བྱ། །ཞེས་བྱ་བ་ལ། སོ་ཁོང་སྟོང་དུ་འདུག་པ་ལ་ནི་བུ་རམ་མམ་སྤྲ་ཚིལ་གྱིས་གང་བའི་ཐུར་མས་དེ་བསྲེག་པར་བྱའོ། །ལོ་མ་བདུན་པ་ཨ་རྐ་ཡི། །ལོ་མས་བཀང་ན་སྲིན་གཟེར་འཇོམས། །ཞེས་བྱ་བ་ལ། ཡང་ཁོང་
སྟོང་དེ་ལ་ལོ་མ་བདུན་པའམ། ཨརྐའི་ལོ་མས་བཀང་ན་སྲིན་བུས་ཟོས་པའི་ཟེར་འཇོམས་པར་བྱེད་དོ། །ཤིང་ཀུན་ནག་ཚུར་ཀད་པ་ལ། །སྭ་རྫི་ཀ་དང་བྱི་དང་ག །རུ་རྟི་ཕྱེ་མ་རས་ལ་གཏུམས། །སོར་གླན་ཟུག་གཟེར་མྱུར་དུ་འཇོམས། །ཞེས་བྱ་བ་ལ། ཤིང་ཀུན་ལ་སོགས་པའི་
ཕྱེ་མ་རས་གཙང་མར་གཏུམས་ཏེ་སོའི་སྟེང་དུ་བཞག་ན་ཡང་ཟུག་གཟེར་གྱི་ནད་མྱུར་དུ་སེལ་པར་བྱེད་དོ། །ཡང་ན་འདི་ཉིད་བསྐོལ་བ་ཡི། །ཏིལ་མར་མཁུར་བར་དགང་བར་བྱ། །ཞེས་བྱ་བ་ལ། ཡང་ན་ཤིང་ཀུན་ལ་སོགས་པ་འདི་ཉིད་དང་། བསྐོལ་བའི་ཏིལ་མར་གྱིས་མཁུར་བ་
བཀང་བར་བྱའོ། །ཡང་ན་བྲི་ཧ་ཏི་རྣམ་གཉིས། །བུ་ག་དམ་པ་ཨེ་རཎྜ། །བསྐོལ་བའི་ཁུ་བས་མཁུར་བ་བཀང་། །ཞེས་བྱ་བ་ལ། ཡང་ན་བྲི་ཧ་ཏི་གཉིས་ནི་ཀཎྜ་ཀ་རི་དང་། བྲི་ཧ་ཏི་དང་། དེ་ལ་སོགས་པ་སྨན་གྱི་སྦྱོར་བ་བྱའོ། །དེ་ལྟར་གསོ་བ་མང་པོ་ཡིས། །ནང་ནི་ཞི་བར་
མ་གྱུར་ན། །སྐམ་པ་ཕྲ་མོ་དག་གིས་སམ། །སོ་དབྱུང་བ་ཡི་ཆ་སྤྱད་ཀྱིས། །དང་པོར་རྩ་བ་ནས་བསླངས་ཏེ། །གཏན་ནས་དེ་ནི་དབྱུང་བར་བྱ། །ཞེས་བྱ་བ་ལ། རྣམ་པ་དེ་ལྟ་བུའི་སྨན་གྱི་གསོ་བ་སྣ་ཚོགས་པ་དག་གིས་ནད་དེ་ཞི་ཞིང་མེད་པ་རམ་སོང་ན་སྐམ་པ་ཕྲ་མོ་
འམ། ཡང་སོ་དབྱུང་བའི་ཆ་སྤྱད་དུ་བྱས་པས་དེ་མི་འགུལ་བ་ཡིན་ཡང་དབྱུང་བར་བྱའོ། །ཏིལ་མར་ཤིང་མངར་ཕྱེད་བཅས་པའམ། །སྦྲང་རྩིས་དེའི་མཁུར་བཀང་བྱ། །ཞེས་བྱ་བ་ལ། དེ་ལྟར་སོ་ཕྱུང་ནས་ཏིལ་མར་དང་ཤིང་མངར་གྱི་ཕྱེ་མ་སྦྱར་བ་འམ། ཡང་ན་ཤིང་
เล่ม ๒๐๒ · หน้า 194a
མངར་གྱི་ཕྱེ་མ་དང་སྦྲང་རྩིར་སྦྱར་བས་མཁུར་བ་བཀང་བར་བྱའོ། །དེ་འོག་ཤིང་མངར་བི་ད་རི། །བྲིད་ཏ་ག་དང་ཀ་ཤི་རུ། །ཏིལ་མར་བཅུ་འགྱུར་འོ་མ་དང་། །བསྐོལ་བའི་སྣ་སྨན་གཏང་བར་བྱ། །ཞེས་བྱ་བ་ལ། དེའི་འོག་ཏུ་བི་ད་རི་ལ་སོགས་པ་དང་བསྐོལ་བའི་སྣ་
སྨན་གཏང་བར་བྱའོ། །རིད་ཅིང་ཉམ་ཆུང་རྒན་པོ་དང་། །རླུང་ནད་ཀྱིས་ཉེད་སོ་མི་དབྱུང་། །ཡ་སོ་དབྱུང་བར་མི་བྱ་སྟེ། །དེ་ནི་བླ་བརྣན་མང་པོ་སྐྱེད། །ཅེས་བྱ་བ་ལ། རིད་པ་ལ་སོགས་པ་དང་། དེ་བཞིན་དུ་གཞན་དག་གི་ཡ་སོ་ནི་དབྱུང་བར་མི་བྱ་སྟེ། ཅིའི་ཕྱིར་ཞེ་ན། དེ་ནི་ནད་ཀྱི་བླ་
བརྣན་སྐྱེད་པར་བྱེད་པ་ཡིན་པའི་ཕྱིར་རོ། །དེ་ཡང་འབྱིན་ན་སྣུམ་པ་དང་། མངར་དང་བསིལ་བའི་རིམ་པས་གསོ། །ཞེས་བྱ་བ་ལ། །དེ་ལྟར་དབྱུང་དུ་མི་རུང་བ་དེ་ཡང་འབྱིན་ན་སྣུམ་པ་ལ་སོགས་པས་གསོ་བར་བྱའོ། །གྲང་བས་ཉེན་ལ་ཁྲག་དབྱུང་ཞིང་། །སྦྲང་རྩིར་བཅས་པས་
བསྐུ་བར་བྱ། །གླ་སྒང་ཨརྫུ་ནའི་ཤུན་པ། །པྲི་ཡང་ཀུ་དང་སྐྱེར་ཁཎྜ། །བཅའ་སྒ་སྦྲང་རྩིར་སྦྱར་བ་བསྐུ། །ཞེས་བྱ་བ་ལ། གྲང་བས་ཉེན་པའི་སོ་ནད་ལ་ནི་ཁྲག་ཕྱུང་ལ་གླ་སྒང་ལ་སོགས་པའི་སྨན་སྦྲང་རྩི་དང་སྦྱར་བའི་ལྡེ་གུས་བསྐུ་བར་བྱའོ། །དེ་བསྐོལ་བས་ནི་མཁུར་བཀང་དང་། །
མངར་སྨན་ཏིལ་མར་བསྐོལ་སྣར་བླུགས། །ཞེས་བྱ་བ་ལ། གླ་སྒང་ལ་སོགས་པའི་མཁུར་བ་བཀང་བ་བཅང་བ་དང་། དེ་བཞིན་དུ་མངར་བའི་སྨན་གྱི་སྡེ་ཚན་དང་ཏིལ་མར་བསྐོལ་བའི་སྣ་སྨན་གཏང་བར་བྱའོ། །རྙིལ་ནི་ཉེ་བར་བདར་བལ། །ཆུ་ཚན་མཁུར་བཀང་བས་དུགས་བྱ། །
དཀྱིལ་འཁོར་འདྲ་བའམ་ཤ་ཁ་ཡི། །ལོ་མས་མང་དུ་བྲུད་པར་བྱ། །ཞེས་བྱ་བ་ལ། རྙི་ལ་ཉེ་བར་བདར་བཞེས་བྱ་བའི་སོ་ནད་ལ་ནི། ཆུ་ཚན་མཁུར་བ་བཀང་བས་དུགས་བྱ་བ་དང་། གཙགས་བུའི་རྩེ་མོ་དཀྱིལ་འཁོར་འདྲ་བའམ། །ཤིང་ཤ་ཁ་ལ་སོགས་པའི་ལོ་མ་རྩུབ་
མོས་མང་དུ་བྲུད་པར་བྱའོ། །རྒྱ་སྐྱེགས་རྨ་ཤིང་པྲི་ཡང་ཀུ། །རྒྱམ་ཚ་རུ་རྟ་བཙག་ཡུག་སྣམ། །ན་ལེ་ཤམ་དང་བཅའ་སྒ་དང་། །ཤིང་མངར་སྐྱེར་པའི་ཁཎྜ་དང་། །མར་གྱི་སྙིང་པོ་སྦྲང་རྩི་དང་། །སྦྱར་བ་དེ་འོག་བསྐུ་བར་བྱ། །ཞེས་བྱ་བ་ལ། དེའི་འོག་ཏུ་རྒྱ་སྐྱེགས་ལ་
เล่ม ๒๐๒ · หน้า 194b
སོགས་པའི་སྨན་མར་ཁུའི་སྙིང་པོ་དངས་མ་དང་སྦྱར་བས་བསྐུ་བར་བྱའོ། །མར་ཁུ་འམ་ཏིལ་མར་མཁུར་སྤོ་བ། །དྲོ་འཇམ་དེ་ཡི་རྗེས་ལ་བྱ། དེ་ལྟར་བྱས་པའི་རྗེས་ལ་མར་ཁུའམ་ཏིལ་མར་དྲོ་འཇམ་ཙམ་གྱིས་དེ་མཁུར་བ་བཀང་ཞིང་སྤོ་བར་བྱའོ། །མངར་
བའི་སྡེ་དང་བསྐོལ་བའི་མར། །མཁུར་བཀང་སྣ་སྨན་བྱས་ན་ཕན། །ཞེས་བྱ་བ་ལ། ཡང་ན་མངར་བའི་སྨན་གྱི་སྡེ་ཚན་བསྐོལ་བའི་ཁུ་བའམ། ལྡེ་གུ་དང་བསྐོལ་བའི་མར་གྱིས་མཁུར་བ་བཀང་བའམ་སྣ་སྨན་བྱའོ། །སོ་འབུར་བལ་དུགས་བྱས་ལ། །བཅད་དང་དབུག་དང་བྲུད་བར་
བྱ། །ཤིང་མངར་བཅའ་སྒ་སྭརྫི་ཀ །རྒྱམ་ཚའི་ཕྱེ་མ་བསྐུ་བར་བྱ། །ཞེས་བྱ་བ་ལ། སོ་འབུར་བའི་ནད་ལ་ནི་དུགས་བྱ་སྟེ། བཅད་པ་ལ་སོགས་པ་བྱས་ལ། དེའི་འོག་ཏུ་ཤིང་མངར་ལ་སོགས་པའི་ལྡེ་གུས་བསྐུ་བར་བྱའོ། །སོ་ཡི་ཁོང་འབྲས་ཚ་རྣོ་དྲོ། །རྩུབ་པའི་
མཁུར་བཀང་བསྐུ་བར་བྱ། །ཞེས་བྱ་བ་ལ། སོའི་ཁོང་འབྲས་ཞེས་བྱ་བའི་ནད་བྱུང་བ་ལ་ནི་སྨན་ཚ་བ་ལ་སོགས་པའི་ཁུ་བས་མཁུར་བ་བཀང་བ་དང་། ལྡེ་གུས་བསྐུ་བར་བྱའོ། །པུ་ཙེ་ཤེལ་དང་བ་སྤྲུ་བ། །རུ་རྟ་ནས་ཚིག་འཁུས་ཕྱེས་བདར། །ཞེས་བྱ་བ་ལ། སོའི་ཁོང་འབྲས་དེ་ལ་པུ་ཙེ་
ཤེལ་དང་བཏགས་པའི་ཕྱེས་བདར་ན་ཡང་ཕན་ནོ། །བསིལ་སྨན་གྱིས་ནི་སྨིན་མི་གཞུག །སྨིན་ནས་དྲལ་ལ་གཏིང་རིང་བསྲེག །ཅེས་བྱ་བ་ལ། སོའི་ཁོང་འབྲས་དེ་ནུས་པ་བསིལ་སྨན་ཕྱི་དང་ནང་ནས་བཏང་བས་སྨིན་དུ་མི་གཞུག་པར་རྣགས་པ་ལས་ཟློག་པའི་ཕྱིར་
བསྲུང་བར་བྱ་ལ། སྨིན་ཅིང་རྣགས་ནས་གཙགས་བུས་དྲལ་ལ་གཏིང་རིང་བར་འདུག་ན་བསྲེག་པར་བྱའོ། །ཁོང་སྡོང་བཅད་དེ་བྲུང་ནས་ནི། །གླ་སྒང་སེང་ཕྲོམ་འབྲས་བུ་གསུམ། །ཤུ་ཏི་རྨ་ཤིང་སྐྱེར་ཁཎྜ། །རྒྱ་སྐྱེགས་ཤིང་མངར་ཀ་པ་ལ། །སྦྲང་རྩིར་སྦྱར་བས་བསྐུ་བར་བྱ། །
ཞེས་བྱ་བ་ལ། སོ་ཁོང་སྟོང་དུ་གྱུར་པ་ལ་ནི། །དང་པོར་བྲུད་ཅིང་བཞར་ལ། དེའི་འོག་ཏུ་གླ་སྒང་ལ་སོགས་པས་བསྐུ་བར་བྱའོ། །དེ་ཉིད་ཁུ་བས་མཁུར་བ་བཀང་། །ཞེས་བྱ་བ་ལ། ཡང་ན་གླ་སྒང་ལ་སོགས་པའི་སྨན་དེ་དག་གཉིད་ཀྱི་ཁུ་བས་མཁུར་བ་བཀང་ན་ཕན་ནོ། །
เล่ม ๒๐๒ · หน้า 195a
ཤིང་མངར་སེང་ཕྲོམ་ངཱུར་བ་དཀར། །ཐལ་ཏྲེས་ཙནྡནཨ་ག་རུ། །ཁུར་དཀར་པོ་བཙག་ཡུག་སྣམ། །པདྨ་དཀར་པོ་སྟག་ཚེར་བ། །བསྐོལ་བའི་ཏིལ་མར་སྣ་སྨན་གཏང་། །ཞེས་བྱ་བ་ལ། ཡང་ན་ཁོང་སྟོང་གི་ནད་དེ་ལ་ཤེང་མངར་ལ་
སོགས་པའི་ལྡེ་གུ་དང་བསྐོལ་བའི་ཏིལ་མར་སྣ་སྨན་བཏང་ན་ཡང་ཕན་ནོ། །ཤ་ལྷག་སྐྱེས་པ་བཅད་ནས་ནི། །ཤུ་དག་ཏེ་ཛོ་བ་ཏི་དང་། །པ་ཐ་ནས་ཚིག་འཁུས་ཐལ་བ། །སྭརྫི་ཀ་དང་སྦྲང་རྩིས་བསྐུ། །ཞེས་བྱ་བལ། ཤ་ལྷག་སྐྱེས་པའི་ནད་ལ་ནི་ཤུ་དག་ལ་
སོགས་པའི་སྨན་གྱི་ལྡེ་གུས་བསྐུ་བར་བྱའོ། །འབྲས་བུ་གསུམ་དང་པ་ཏོ་ལ། །ནིམ་པ་བསྐོལ་བས་མཁུར་བ་བཀང་། །ཞེས་བྱ་བ་ལ། ཤ་ལྷག་སྐྱེས་པ་དེ་བཅད་ནས་འབྲས་བུ་གསུམ་ལ་སོགས་པ་བསྐོལ་བའི་ཁུ་བ་བླུད་ན་ཡང་ཕན་ནོ། །སྣད་པ་ལས་བྱུང་ནད་ལ་ནི། །
དཀྱིལ་འཁོར་རྩེ་མོ་འདྲ་བས་སྦྱངས། །དེ་ནས་ཐལ་སྨན་སྣ་སྨན་གཏང་། །མཁུར་བཀང་ལ་སོགས་བསིལ་སྨན་གཏང་། །ཞེས་བྱ་བ་ལ། སྣད་པ་ལས་བྱུང་བ་ཞེས་བྱ་བའི་སོ་ནད་ལ་ནི་དཀྱིལ་འཁོར་གྱི་རྩེ་མོ་འདྲ་བའི་གཙགས་བུས་སོའི་རྩ་བ་སྦྱངས་ཤིང་དག་པར་བྱས་
ལ། དེའི་འོག་ཏུ་ཐལ་སྨན་གྱིས་བསྐུས་ལ་སྨན་བསིལ་པའི་ནུས་པ་དང་ལྡན་པའི་སྣ་སྨན་དང་མཁུར་བ་བཀང་བ་དག་བྱའོ། །ལུས་ཀྱི་གོང་འོག་ནས་སྦྱང་བྱ། །དེ་འོག་མགོ་བོའི་བཀྲུ་སྨན་བྱ། །སོ་ཡི་རྩ་ནི་གསོས་ནས་ཀྱང་། །ཕྱུང་སྟེ་ནད་དང་ལྡན་པ་ཡི། །བུ་རམ་
སྤྲ་ཚིལ་བཀང་བས་བསྲེག །ཅེས་བྱ་བ་ལ། ལུས་ཀྱི་གོང་འོག་སྐྱུག་སྨན་དང་བཀྲུ་སྨན་གྱིས་སྦྱངས་ལ། དེའི་འོག་ཏུ་སོའི་རྩར་རྒྱུ་བའི་རྩ་སྦུབས་ལ་གནོད་པ་མེད་པར་གསོས་ལ་སོ་ཕྱུང་སྟེ། ནད་སྣ་ཆོགས་དང་ལྡན་པའི་རྩ་སྦུབས་ཡན་མན་ཀུན་ཁྱབ་པར་བྱེད་པ་བུ་རམ་
མམ། སྤྲ་ཚིལ་གྱིས་བཀང་བའི་ཐུར་མས་བསྲེག་པར་བྱའོ། །ཛཱ་ཏི་སེང་ལྡེང་སྦྲ་ཚིལ་དང་། །གཟེ་མ་བསྐོལ་བའི་ཁུ་བས་བཀྲུ། །ཞེས་བྱ་བ་ལ། ཡང་རྩ་དེ་སེང་ལྡེང་ལ་སོགས་པ་བསྐོལ་བའི་ཁུ་བས་བཀྲུ་བར་བྱའོ། །འོ་མ་ཅན་ཤིང་ཆུས་མཁུར་
เล่ม ๒๐๒ · หน้า 195b
བཀང་། །དེ་བསྐོལ་ཏིལ་མར་སྣ་སྨན་གཏང་། །ཞེས་བྱ་བ་ལ། འོ་མ་ཅན་གྱི་ཤིང་བསྐོལ་བའི་ཁུ་བས་མཁུར་བཀང་བར་བྱ་བའམ། ཡང་ན་འོམ་ཅན་གྱི་ཤིང་གི་ལྡེ་གུ་དང་བསྐོལ་བའི་ཏིལ་མར་སྣ་སྨན་གཏང་བར་བྱའོ། །རླུང་གྱུར་ལྕེ་ནི་རྩུབ་པ་ལ། །
རླུང་གི་མཆུ་ནད་གསོ་བར་བྱ། །ཞེས་བྱ་བལ། རླུང་ལས་བྱུང་བའི་ལྕེའི་ནད་ཚེར་མ་ལྟར་རྩུབ་པ་ལ་ནི། རླུང་གི་མཆུ་ནད་ཀྱི་གསོ་བ་གང་ཡིན་པ་དག་བྱའོ། །མཁྲིས་པ་ལས་གྱུར་ལྕེ་ནད་ལ། །བཞར་ཏེ་ཁྲག་ནི་དབྱུང་བར་བྱ། །བསྐུ་དང་མཁུར་བ་བཀང་བ་དང་། །
སྣ་སྨན་མངར་བ་དག་ཀྱང་བྱ། །ཞེས་བྱ་བ་ལ། མཁྲིས་པ་ལས་གྱུར་བའི་ལྕེའི་ནད་ཚེར་མ་ལྟ་བུ་བྱུང་བ་ལ་ནི་གཞར་ཞིང་གཏར་ག་བྱ་སྟེ་ཁྲག་ཕྱུང་ལ། དེའི་འོག་ཏུ་མངར་བའི་སྨན་གྱི་སྡེ་ཚན་གྱི་ལྡེ་གུས་བསྐུ་བ་དང་། སྨན་དེ་དག་བསྐོལ་བའི་ཁུ་བས་མཁུར་བ་བཀང་བ་
དང་སྣ་སྨན་བྱའོ། །དེ་བཞིན་བད་ཀན་ལས་གྱུར་ལ། །ཡུངས་ཀར་ཚ་བ་གསུམ་ལ་སོགས། །སྨན་ནི་རྣོན་པོས་གསོ་བར་བྱ། །ཞེས་བྱ་བ་ལ། དེ་བཞིན་དུ་བད་ཀན་ལས་གྱུར་པའི་ལྕེའི་ནད་ཚེར་མས་ཁྱབ་པ་ལྟ་བུ་ལ་ནི་སྔ་མ་བཞིན་དུ་བདར་ལ། ཡུངས་ཀང་
ལ་སོགས་པའི་སྨན་རྣོན་པོས་བསྐུ་བ་དང་། མཁུར་བ་བཀང་བ་ལ་སོགས་པ་བྱའོ། །ལྕེ་ལས་ཆུ་སེར་འཛག་པ་གསར། །མཚོན་མི་རེག་པར་དེ་བཞིན་གསོ། །ཞེས་བྱ་བ་ལ། ཆུ་སེར་འཛག་པ་ཞེས་བྱ་པའི་ལྕེ་ནད་ལས་སྐྱེས་ནས་རིང་པོར་མ་ལོན་པའི་སར་པ་ལ་
ཡུངས་ཀར་ལ་སོགས་པའི་སྨན་བསྐུ་བ་ལ་སོགས་པ་སྔ་མ་བཞིན་དུ་བྱས་ལ། ཆུ་སེར་འཛག་པའི་ནད་དེ་ལ་ཁྱད་པར་དུ་མཚོན་གྱིས་བཞར་བ་དང་གཏར་ག་མི་བྱའོ། །ལྕེ་ལྷག་སྐྱེས་པ་ལྕེ་བཏེག་སྟེ། །ལྕགས་ཀྱུས་ལྕེ་ལྷག་དྲངས་ནས་ནི། །རྩེ་མོ་དཀྱིལ་འཁོར་འདྲ་
བས་བཅད། །རྣོ་དང་དྲོ་བས་བདར་སོགས་བྱ། །ཞེས་བྱ་བ་ལ། ལྕེ་ལྷག་སྐྱེས་པ་ནི་ལྕེ་བཏེག་སྟེ་ལྕགས་ཀྱུས་ལྕེ་ལྷག་དེ་ཕྱིར་དྲངས་ནས། རྩེ་མོ་དཀྱིལ་འཁོར་འདྲ་བའི་གཙགས་སྤྱད་ཀྱིས་བཅད་པར་བྱ་ཞིང་། སྨན་རྣོ་བ་དང་དྲོ་བས་གཏར་ག་ལ་སོགས་པ་
เล่ม ๒๐๒ · หน้า 196a
བྱའོ། །ཉེ་བའི་ལྕེ་ལ་ཁྲག་གཟགས་ཏེ། །ནས་ཚིག་འཁུས་པའི་ཐལ་བས་བདར། །ཞེས་བྱ་བ་ལ། ཉེ་བའི་ལྕེ་ལ་ནི་ཤ་ཁ་ལ་སོགས་པའི་ལོ་མ་རྩུབ་པོ་འམ། སོར་གདུབ་ལྟ་བུའི་མཚོན་གྱིས་གཏར་ཞིང་ཁྲག་གཟགས་ལ། དེའི་འོག་
ཏུ་ནས་ཚིག་འཁུས་པའི་ཐལ་བས་བདར་ཞིང་བྲུད་པར་བྱའོ། །ཤ་ལྷག་སྐྱེས་ལ་བད་ཀན་འཇོམས། །སྣ་སྨན་མཁུར་བཀང་བདར་བར་བྱ། །ཞེས་བྱ་བ་ལ། ལྐོག་མ་ཤ་ལྷག་གམ་རྨེན་བུ་སྐྱེས་པ་ལ་ནི་བད་ཀན་འཇོམས་པར་བྱེད་པའི་སྨན་ལ་སོགས་པ་བཏང་བས་གསོ་
བར་བྱའོ། །ག་གོ་ནས་པོན་ལྟ་བུར་ནི། །འཕེལ་ཞིང་རྩ་ནི་མི་མངོན་དང་། །རྩེ་མོས་ལྕེ་ཡི་རྩ་བར་སླེབས། ལྕགས་ཀྱུ་ཡིས་ནི་བཟུང་ནས་ཀྱང་། །རྩེ་མོ་དཀྱིལ་འཁོར་འདྲ་བ་ཡིས། །རྩེ་མོ་རྩ་བ་རན་པར་གཅད། །ཅེས་བྱ་བ་ལ། ལྐོག་མར་ཤ་ལྷག་
སྐྱེས་པ་འཕེལ་བར་གྱུར་ཅིང་། ག་གོན་གྱི་ས་བོན་དང་འདྲ་བར་སྐྱེས་པ་དང་། རྩ་རིས་མི་མངོན་པར་གྱུར་པ་དང་། ལྕེ་དེའི་རྩེ་མོ་ལྕེའི་རྩ་བར་བབས་ཤིང་སླེབས་པ་ནི་མུ་ཙུ་ཏྲི་འམ་ལྕགས་ཀྱུས་བཟུང་ལ། རྩེ་མོ་དཀྱིལ་འཁོར་འདྲ་བའི་བཙགས་བུས་དེ་རན་བར་གཅད་
པར་བྱའོ། །བཅད་དྲགས་ཁྲག་ཟགས་འཆི་བར་བྱེད། །བཅད་ཆུང་ནད་ནི་འཕེལ་བར་བྱེད། །ཅེས་བྱ་བ་ལ། ལྕེ་ཆུང་ངམ་ཤ་ལྷག་སྐྱེས་པ་བཅད་དྲགས་ན་ནི་ཁྲག་ཟགས་པར་བྱས་ནས་འཆི་བར་འགྱུར་ལ། རྩེ་མོ་ནས་བཅད་དམ་ཆུང་ན་ནི་ནད་ཞར་ལ་འཕེལ་ཞིང་
སྐྱེ་བར་འགྱུར་རོ། །བོང་ང་པ་ཐ་ན་ལེ་ཤམ། །ཤུ་དྲག་རུ་རྟ་པ་རི་ལ། །རྒྱམ་ཚ་སྦྲང་རྩིར་བཅས་པ་ཡིས། །བཅད་པ་དག་ནི་བདར་བར་བྱ། །ཞེས་བྱ་བ་ལ། ལེགས་པར་བཅད་ནས་བོང་ང་ལ་སོགས་པའི་སྨན་སྦྲང་རྩི་དང་སྦྱར་བས་བདར་
ཞིང་བསྐུས་ན་ཕན་ནོ། །པ་རི་པེ་ལ་ནི་ཀུན་ཏན་ན་ཏའོ། །པུ་ཙེ་ཤེལ་དང་བོང་ང་དཀར། །པ་ཏ་ནིམ་པར་སྣ་དང་། །ཤུ་དག་ཆུ་ཡིས་མཁུར་བཀང་བྱ། །ཞེས་བྱ་བ་ལ། བུ་ཙེ་ཤེལ་ལ་སོགས་པ་དེ་བསྐོལ་བའི་ཁུ་བས་མཁུར་བ་དག་དབར་བྱའོ། །འདུས་དང་སོ་འདུར་
เล่ม ๒๐๒ · หน้า 196b
རུས་སྦལ་འདྲ། །དེ་བཞིན་བཞར་ཏེ་གསོ་བར་བྱ། །ཞེས་བྱ་བ་ལ། སོ་འདུས་པ་དང་འབུར་བ་དང་རུས་སྦལ་འདྲ་བའི་ནད་ལ་ཡང་སྔ་མ་བཞིན་དུ་བཞར་ཏེ་གསོ་ཞིང་བཅོས་པར་བྱའོ། །རྐན་རྣགས་མ་སྨིན་པ་ལ་ནི། །ནག་ཚུར་སྦྲང་རྩི་སྐྱེར་ཁཎྜ། །བསྐུ་བར་བྱའོ། །
ཞེས་བྱ་བ་ལ། རྐན་གྱི་རྣགས་པའི་ནད་སྨིན་པར་མ་གྱུར་པ་ལ་ནི་ནག་ཚུར་ལ་སོགས་པའི་སྨན་གྱིས་བདར་བར་བྱའོ། །བསིལ་དང་མདར། སྨན་བསྐོལ་ཁུ་བས་མཁུར་བཀང་བྱ། །ཞེས་བྱ་བ་ལ། ནུས་པ་བསིལ་བ་དང་། རོ་མངར་བའི་སྨན་དང་། བསྐོལ་བའི་ཁུ་
བས་མཁུར་བ་བཀང་བ་བྱས་ན་ཡང་ཕན་ནོ། །སྨིན་ནས་ན་ཡའི་གཞི་ལྟར་དྲས། །དྲོ་དང་རྣ་བས་བསྐུ་བར་བྱ། །ཞེས་བྱ་བ་ལ། རྐན་རྣགས་པ་སྨིན་ནས་ནི་མཚོན་གྱིས་ན་ཡའི་གཞི་ལྟར་དྲས་ལ་མར་སར་དང་། སྨན་དྲོ་བ་དང་རྣོ་བ་སྦྱར་བས་བསྐུ་བར་བྱའོ། །ན་ཡའི་
གཞི་ནི་གང་དུ་ན་ཡང་རྩེ་བའི་གཞི་སྤང་ལེབ་ལ་སོགས་པར་མིག་མངས་རིས་སུ་བྲིས་པ་སྟེ། དེ་དང་འདྲ་བར་དཀྱིལ་འཁོར་འདྲ་བའི་གཙགས་བུས་རི་མོ་མང་པོར་དྲ་ཞིང་དགས་པར་བྱའོ། །བ་ཤ་ཀ་དང་པ་ཏོ་ལ། །ནིམ་པ་ལ་སོགས་རྣོ་བ་ཡི། །སྨན་གྱི་ཁུ་བས་མཁུར་
བ་དགང་། །ཞེས་བྱ་བ་ལ། རྐན་རྣགས་པའི་སྨན་རྣོག་པོ་ནི། བ་ཤ་ཀ་ལ་སོགས་པའི་སྣན་ཁ་བ་ལ་བྱ་སྟེ། དེའི་ཁུ་བ་མཁུར་བར་བཅངས་ན་ཡང་ཕན་ནོ། །རྐན་སྐམ་སྐོམ་དད་གདུང་མེད་པ། །ཟས་ཟོས་རྗེས་ལ་ཞུན་མར་ནི། །བཅའ་སྒ་པི་པི་ལིང་བསྐོལ་བླུད། །སྐྱུར་
བསེ་མཁུར་བ་སྤོབ་བཅང་། །ཞེས་བྱ་བ་ལ། ཡང་རྐན་སྐམ་པའི་ནད་སྐོམ་དད་ཀྱི་གདུང་བ་མིད་པ་ལ་ནི། ཟས་ཟོས་བའི་འོག་ཏུ་ཞུན་མར་བཅའ་སྒ་ལ་སོགས་པ་བསྐོལ་བ་བླུད་ལ། དེ་བཞིན་དུ་ཆང་དངས་མ་ལ་སོགས་པ་སྐྱུར་བས་མཁུར་བ་སྤོ་བ་བཅངས་ན་ཡང་ཕན་
ནོ། །སྐམ་སའི་ཤ་ཁུ་སྣུམ་པ་དང་། །ཞུན་མར་འོ་མའི་སྣ་སྨན་གཏང་། །ཞེས་བྱ་བ་ལ། ཡང་རྐན་སྐམ་པའི་ནད་དེ་ལ། སྐམ་སའི་སྲོག་ཆགས་ཀྱི་ཤ་ཁུ་སྣུམ་དང་བཅས་པ་ཟས་ཀྱི་རྗེས་ལ་བླུད་ན་ཕན་ལ། དེ་བཞིན་དུ་ཞུན་མར་ལ་སོགས་པའི་སྣ་སྨན་བཏང་ན་ཡང་
เล่ม ๒๐๒ · หน้า 197a
ཕན་ནོ། །ལྐོག་མའི་ནད་ལ་གཏར་ག་གདབ། །སྣ་སྨན་ལ་སོགས་རྣོན་པོ་བྱ། །ཞེས་བྱ་བ་ལ། ལྐོག་མའི་ནད་ཐམས་ཅད་ལ་ནི་གཏར་གདབ་ཅིང་ཁྲག་དབྱུང་བ་དང་། སྨན་རྣོན་པོའི་སྣ་སྨན་དང་། མཁུར་བ་བཀར་བ་དང་བསྐུ་བ་ལ་སོགས་
པའི་ལས་བྱས་ན་ཕན་ནོ། །སྐྱེར་པའི་ཤུན་པ་སྐྱེར་ཁཎྜ། །དུག་མོ་ཉུང་བསྐོལ་ཁུ་བ་བླུད། །ཅེས་བྱ་བ་ལ། སྐྱེར་པའི་ཤུན་པ་ལ་སོགས་པའི་སྨན་བསྐོལ་བའི་ཁུ་བ་རྐན་གྱི་ནད་ལ་བླུད་པར་བྱའོ། །ཨ་རུ་ར་ཡི་ཁུ་བ་ནི། །སྦྲང་རྩིར་ལྡན་པ་སྦྱིན་པར་བྱ། །ཞེས་བྱ་བ་ལ།
ཡང་ན་ཨ་རུ་ར་བསྐོལ་བའི་ཁུ་བ་སྦྲང་རྩི་དང་ལྡན་པ་བླུད་ན་ཡང་ལྐོག་མའི་ནད་ལ་ཕན་ནོ། །འབྲས་བུ་གསུམ་དང་ཚ་བ་གསུམ། །ནས་ཚིག་འཁུས་ཐལ་སྐྱེར་པ་དང་། །ཙི་ཏྲ་ཀ་དང་སྐྱེར་ཁཎྜ། །པ་ཏ་ཏེ་ཛོ་བ་ཏི་དང་། །ནིམ་པ་ཚ་དང་ར་གཅིན་བསྐོལ། །མཁུར་བ་སྤོ་དང་རི་ལུ་
དང་། །ཕྱེ་མ་གདབ་པ་དག་ཀྱང་བྱ། །ཞེས་བྱ་བ་ལ། དེ་ལ་ལྐོག་མའི་ནད་དེ་དག་ལ་འབྲས་བུ་གསུམ་ལ་སོགས་པ་དང་། ཚ་བ་གསུམ་ལ་སོགས་པ་དང་བསྐོལ་བའི་མཁུར་བ་སྤོ་བ་དང་། རི་ལུ་བཅང་བ་དང་། ཕྱེ་མས་གདབ་པ་དག་ཀྱང་བྱའོ། །ལྕང་མ་གི་རི་ཀརྞ་དང་
གླ་སྒང་ཐང་ཤིང་བཅའ་སྒ་དང་། །ཤུ་དག་དན་ད་མུར་བ་ཡི། །ལྡེ་གུ་དྲོ་བསྐུས་སྐྲངས་ནད་སེལ། །ཞེས་བྱ་བ་ལ། ལྕང་མ་ལ་སོགས་པའི་ཕྱེ་མ་དང་སྦྱར་བའི་ལྡེ་གུ་དྲོ་འཇམ་ཙམ་བསྐུས་ན་ལྐོག་མའི་ནད་ཀྱི་སྐྲངས་པ་དང་ན་བ་སེལ་བར་བྱེད་པའི་ན་ནོ། །དེ་ནས་ཕྱི་ནང་དུགས་
བྱས་ཏེ། །སོར་གདུབ་ཆ་སྤྱད་དག་གིས་སམ། །རྒྱམ་ཚ་ལྡན་པའི་སེན་མོ་ཡིས། །རླུང་གྱུར་གག་པ་བཞག་བར་བྱ། །ཞེས་བྱ་བ་ལ། །དེ་ནས་རླུང་ལས་གྱུར་པའི་གག་པ་ལ་ཕྱི་དང་ནང་ནས་དུགས་ལེགས་པར་བྱས་ལ། སོར་གདུབ་ལྟ་བུའི་ཆ་སྤྱད་དམ་རྒྱམ་ཚ་དང་བཅས་པའི་སེན་
མོས་བྲུད་ཅིང་བཞར་བར་བྱའོ། །རྩ་བ་ལྔ་བསྐོལ་མཁུར་བཀང་དང་། །ཏིལ་མར་མཁུར་སྤོ་སྣ་སྨན་གཏར། །ཞེས་བྱ་བ་ལ། རླུང་ལས་གྱུར་པའི་གག་བ་དེ་ལ་རྩ་བ་ལྔ་པ་ཆེན་པོ་བསྐོལ་བའི་ཁུ་བས་མཁུར་བ་བཀང་བ་དང་། དེ་བཞིན་དུ་ཏིལ་མར་གྱིས་མཁུར་བ་སྤོ་བ་དང་། །
เล่ม ๒๐๒ · หน้า 197b
སྣ་སྨན་དག་བྱས་ན་ཕན་ནོ། །མཁྲིས་པ་ལས་གྱུར་གཏར་ག་གདབ། །ཁ་ར་སྦྲང་རྩི་བྲི་ཡང་ཀུ། །སེང་ཕྲོམ་རྨ་ཤིང་བཅས་པ་བདར། །དེ་བསྐོལ་ཁུ་བ་མཁུར་བར་བཅད། །ཞེས་བྱ་བ་ལ། མཁྲིས་པ་ལས་གྱུར་པའི་གག་པ་ལ་ནི། དང་བོ་གཏར་ག་གདབ་ཅིང་
ཁྲག་ཕྱུང་ལ། ཁ་ར་ལ་སོགས་པའི་སྨན་གྱིས་བསྐུས་ཤིང་བདར་བ་དང་། ཁ་ར་ལ་སོགས་བ་དེ་དག་བསྐོལ་བའི་ཁུ་བ་ཉིད་མཁུར་བར་བཅང་བར་བྱའོ། །རྒུན་འབྲུ་བ་རུ་ཤ་ཀ་བསྐོལ། །མཁུར་བ་བཀང་པའང་ཕན་པ་ཡིན། །ཞེས་བྱ་བ་ལ། ཡང་ན་མཁྲིས་པ་ལས་
གྱུར་པའི་གག་པ་ལ་རྒུན་འབྲུ་ལ་སོགས་པའི་སྦྱོར་བ་འདི་བྱས་ན་ཡང་ཕན་ནོ། །ཁྲག་ལས་གྱུར་པའང་དེ་བཞིན་དུ། །གཏར་ག་གདབ་སྟེ་གསོ་བར་བྱ། །ཞེས་བྱ་བ་ལ། ཁྲག་ལས་གྱུར་པའི་གག་པ་ལ་ནི་དེ་བཞིན་དུ་མཁྲིས་པ་ལས་གྱུར་པ་དང་འདྲ་བར་གསོ་ཞིང་གཏར་ག་
བདབ་པ་དང་ཁྲག་དབྱུང་བར་བྱའོ། །བད་ཀན་ལས་གྱུར་གག་པ་ཡི། །དུད་པ་ཚ་བའི་སྨན་བཅས་གདབ། །ཨ་པ་མརྒའི་འབྲས་བུ་དང་། །གི་རི་ཀརྞི་བྱི་དང་ག །རྒྱམ་ཚ་ཙནྜན་ཏིལ་མར་བསྐོལ། །སྣ་སྨན་མཁུར་བཀང་བྱ་བ་བསྔགས། །ཞེས་བྱ་བ་ལ། བད་
ཀན་ལས་གྱུར་པའི་གག་པ་ལ་ནི། ཁང་པའི་དུད་པ་ལ་སོགས་པའི་སྨན་གྱིས་བཏབ་ཅིང་། །ཨ་པ་མལ་སོགས་པའི་སྨན་བསྐོལ་པའི་ཁུ་བ་མཁུར་བར་བཅང་བར་བྱའོ། །དེ་བཞིན་འདུས་དང་རྩ་བ་དང་། །མཆུ་རྩེ་ལྐོག་མའི་མཚོན་ལའང་བྱ། །ཞེས་བྱ་བ་
ལ། ལྐོག་མའི་ནད་འདུས་པ་དང་རྩ་ལ་སོགས་པ་བཞི་པོ་དག་ལ་ཡང་། བད་ཀན་ལས་གྱུར་པའི་གག་པ་དང་འདྲ་བར་གསོ་བར་བྱའོ། །ཁོང་འབྲས་ཁྲག་གཟགས་འབྲས་བུ་གསུམ། །གི་ལྦང་ཡུག་སྣམ་སྐྱེར་ཁཎྜ། །སེང་ཕྲོམ་རྒྱམ་ཚ་རྨ་ཤིང་དང་། །པི་པི་ལིང་
བསྐུ་མཁུར་བཀང་བྱ། །ཞེས་བྱ་བ་ལ། ལྐོག་མའི་ཁོང་འབྲས་ལ་ནི་འབྲས་ལ་ནི་གཏར་གས་ཁྲག་ཕྱུང་ལ། འབྲས་བུ་གསུམ་ལ་སོགས་པའི་སྨན་གྱི་ལྡེ་གུས་བསྐུ་ཞིང་བསྐོལ་བའི་ཁུ་བས་མཁུར་བ་བཀང་བ་བཅང་བར་བྱའོ། །རླུང་ལས་གྱུར་པའི་ལྦ་བ་ལ། །དུགས་བྱས་ནས་ནི་
เล่ม ๒๐๒ · หน้า 198a
ཁྲ་གང་བྱུང་ཞིང་། །ཏིལ་དང་ཟར་མ་ལེ་བརྒན་རྩི། །པི་ལ་ཡ་དང་གསོ་འབྲས་ཀྱིས། །རྨ་འདྲུབས་ནས་བསྐུས་དཀྲི་བར་བྱ། །ཞེས་བྱ་བ་ལ། རླུང་ལས་གྱུར་པའི་ལྐོག་མའི་ལྦ་བལ་ནི་དུགས་བྱ་ཞིང་གཏར་གས་ཁྲག་ཕྱུང་ལ་རྨ་འདྲུབས་
པར་གྱུར་བ་དང་། ཏིལ་ལ་སོགས་པའི་ས་བོན་གྱིས་བསྐུས་ཏེ་དཀྲི་བར་བྱའོ། །ཤི་ཀྲུ་སེང་ཕྲོམ་ཏ་རྐ་རི། །ཏ་ལ་ཧ་ཏི་པི་པི་ལིང་། །བ་སྤྲུ་བ་དང་ཨ་རུ་ར། །ཨརྐའི་རྩ་བ་པོ་སོན་ཆ། །ཨེ་ཀེེཥིཀར་བཅས་པ་ནི། །ཆང་ངམ་རང་སྐྱུར་བཏགས་པས་བསྐུ། །ལྡེ་གུས་
ཡང་དང་ཡང་དུ་བསྐུ། །ཞེས་བྱ་བ་ལ། རླུང་ལས་གྱུར་པའི་ལྦ་བ་དེ་ལ་ཤི་ཀྲུ་ལ་སོགས་པའི་སྨན་ཆང་ངམ་རང་སྐྱུར་ཀཉྫི་དང་བཏགས་པའི་ལྡེ་གུས་ཡང་ནས་ཡང་དུ་བསྐུ་བར་བྱའོ། །སླེ་ཏྲེས་ནིམ་པ་དུག་མོ་ཉུང་། །ཧ་ན་ས་པ་ཏི་བལ་གཉིས། །ཐང་ཤིང་དང་ནི་པི་པི་
ལིང་། །བསྐོལ་བའི་ཏིལ་མར་བླུད་པར་བྱ། །ཞེས་བྱ་བ་ལ། རླུང་ལས་གྱུར་པའི་ལྦ་བ་ལ་སླེ་ཏྲེས་ལ་སོགས་པ་དང་བསྐོལ་བའི་ཏིལ་མར་བསྐུས་ན་ཡང་ཕན་ནོ། །བད་ཀན་ལ་ཡང་འདི་དག་ནི། །བྱ་ཞིང་ལྷག་པར་དུགས་བསྐུ་བྱ། །ཞེས་བྱ་བ་ལ། བད་ཀན་ལས་
གྱུར་པའི་ལྦ་བ་ལ་ཡང་རླུང་ལས་གྱུར་པའི་གསོ་བ་འདི་དག་ཉིད་བྱ་ཞིང་། དེ་ལས་ཀྱང་ལྷག་པར་དུགས་དང་ལྡེ་གུས་བསྐུ་བ་དག་ཤས་ཆེར་བྱའོ། །ཨ་ཟ་གནྷ་བོང་ང་དཀར། །ཨ་ཟ་ཤིང་གི་བི་ཤ་ལྱ། །ཀུ་བ་ཁ་བོ་འོལ་མ་སེ། །ཤི་རེ་ཤ་དང་རྒྱ་སྐྱེགས་ཤིང་། །ཐལ་
ཆུའི་ལྡེ་གུ་བསྐུ་བར་བྱ། །ཞེས་བྱ་བ་ལ། བད་ཀན་ལས་གྱུར་པའི་ལྦ་བ་ལ་ནི་ཨ་ཟ་གནྡྷ་ལ་སོགས་པའི་སྨན་གྱི་ཕྱེ་མ་རྒྱ་སྐྱེགས་ཀྱི་ཤི་དང་མཐལ་བའི་ཆུ་དང་ལྡེ་གུར་བྱས་ལ་བསྐུ་བར་བྱའོ། །ཐལ་བ་དྲག་པོ་གཅིན་བསྐོལ་བཙགས། །ཁྲོ་རྒོད་བཟའ་ཞིང་བཏུང་
བར་བྱ། །ཞེས་བྱ་བ་ལ། ཐལ་བ་དྲག་པོ་ནི་རྩའི་ཐལ་བ་དང་ཆུ་བཙགས་པ་ལས་བྱས་པ་སྟེ། མིང་གི་རྣམ་གྲངས་ཆུའི་ཐལ་བ་ཞེས་ཀྱང་བྱའོ། །དེ་གཅིན་དང་བསྐོལ་བ་བཙགས་ཏེ་ཁྲེ་རྒོད་ཟ་ཞིང་དེ་བླུད་ན་བད་ཀན་ལས་གྱུར་པའི་ལྔ་བ་སེལ་ཏོ། །དུག་མོ་ཉུང་སོགས་
เล่ม ๒๐๒ · หน้า 198b
ལན་ཚྭ་ལྔ། །ཏིལ་མར་ལྷན་ཅིག་བསྐོལ་བ་བླུད། །ཅེས་བྱ་བ་ལ། ཡང་ན་དུག་མོ་ཉུང་གི་སྡེ་ཚན་ལ་སོགས་པའི་སྨན་དང་ལན་ཚྭ་ལྔ་པོ་དང་བཅས་བར་ཏིལ་མར་བསྐོལ་ལ། ཁྲེ་རྒོད་བཟའ་ཞིང་དེ་བླུད་པར་བྱའོ། །བད་ཀན་འཇོམས་པའི་དུད་པ་དང་། །སློན་སྨན་སྣ་
སྨན་ལ་སོགས་བསྟེན། །ཞེས་བྱ་བ་ལ། བད་ཀན་ལས་གྱུར་པའི་ལྤ་བ་ལ་དུད་པ་བརྔུབ་པ་ལ་སོགས་པ་བད་ཀན་སེལ་བ་རྣམས་བསྟེན་པར་བྱའོ། །ཚིལ་གྱུར་པ་ལ་གཏར་ག་གདབ། །བད་ཀན་འཇོམས་པའི་ཆོ་ག་བསྟེན། །ཞེས་བྱ་བ་ལ། ཚིལ་ལས་གྱུར་པའི་ལྦ་བ་ལ་ནི།
སྣུམ་ཆོས་བྱས་ལ་གཏར་ག་གདབ་པ་དང་། བད་ཀན་བསལ་བའི་སྦྱོར་བ་བྱའོ། །འདི་ལ་ཨ་ས་ལ་སོགས་པའི། །ཁུ་བ་གཅིན་ནི་སྔ་དྲོ་བླུད། །ཅེས་བྱ་བ་ལ། ཚིལ་ལས་གྱུར་པའི་ལྦ་བ་ལ་ཨ་ས་ན་ལ་སོགས་པའི་སྡེ་ཚན་བསྐོལ་བའི་ཁུ་བ་གཅིན་དང་སྦྱར་བ་སྔ་དྲོ་དང་པོའི་ཆ་
ལ་བླུད་པར་བྱའོ། །དེས་མ་ཞིན་ཐམས་ཅད་ནི། །སྨིན་བྱས་རྨ་ལྟར་གསོ་བར་བྱ། །ཞེས་བྱ་བ་ལ། ལྐོག་མའི་ནད་ཐམས་ཅད་གསོ་བའི་སྦྱོར་བ་དེ་དག་བྱས་སུ་ཟིན་ཀྱང་ཞི་ཞིང་མེད་པར་མ་གྱུར་ན། དེ་སྨིན་པར་བྱས་པ་རྨའི་གསོ་བ་ལྟར་བྱའོ། །ཁ་ཤུལ་ནི་འབྲས་བུ་གསུམ་
པ་ཏ་རྒུན་འབྲུ་ཛཱ་ཏི་ནི། །འོ་མར་བསྐོལ་བའི་སྦྲང་རྩིར་བཅས། །ཁ་ནི་བསྐུ་ཞིང་བཅང་བར་བྱ། །ཞེས་བྱ་བ་ལ། ཁ་ཤུའི་ནད་ཐམས་ཅད་ལ་འབྲས་བུ་གསུམ་ལ་སོགས་པ་བསྐོལ་བའི་ཁུ་བ་བསྒྲངས་པའི་ནང་དུ་སྦྲང་རྩི་བཏབ་པ་སྟེ། ཁ་ར་བཅང་ཞིང་བསྐུ་བར་བྱའོ། །ཡང་ན་
ཟིན་ཐིག་ལ་སོགས་སྡེ། །གཟའ་ཞིང་བསྟེན་པ་ཉིད་དུ་བྱ། །ཞེས་བྱ་བ་ལ། ཡང་ན་ཁའི་ཤུ་བ་ལ་འབྲས་བུ་གསུམ་ལ་སོགས་བཟོས་ནས་ཟིན་ཐིག་ལ་སོགས་པའི་སྡེ་ཚན་བཟའ་བར་བྱའོ། །རླུང་གི་ཁ་ཤུར་པི་པི་ལིང་། །རྒྱམ་ཚ་སུག་སྨེལ་ཕྱེ་མ་གདབ། །ཅེས་བྱ་བ་ལ། །
རླུང་ལས་གྱུར་པའི་ཁ་ཤུལ་ནི་པི་པི་ལིང་ལ་སོགས་པའི་ཕྱི་མས་གདབ་པའམ། འདེ་གུས་བསྐུ་བར་བྱའོ། །ཡང་ན་རླུང་འཇོམས་སྨན་བསྐོལ་བའི། །ཏིལ་མར་སྣ་སྨན་མཁུར་བཀང་ཕན། །ཞེས་བྱ་བ་ལ། ཡང་རླུང་ལས་གྱུར་བའི་ཁ་ཤུལ་རླུང་སེལ་བའི་སྨན་གྱི་སྡེ་ཚན་
เล่ม ๒๐๒ · หน้า 199a
བསྐོལ་བའི་ཏིལ་མར་སྣ་སྨན་དང་མཁུར་བ་བཀང་བ་བྱས་ན་ཕན་ནོ། །ཁྲག་མཁྲིས་གྱུར་ལ་ཁྲག་མཁྲིས་འཇོམས། །བད་ཀན་ལས་གྱུར་དེ་འཇོམས་བསྟེན། །ཞེས་བྱ་བ་ལ། ཁྲག་དང་མཁྲིས་པ་ལས་གྱུར་པའི་ཁ་ཤུ་ལ་ནི་ཁྲག་དང་མཁྲིས་པ་སེལ་བའི་ཆོ་གས་ཕན་
ནོ། །བད་ཀན་ལས་གྱུར་པའི་ཁ་ཤུ་ལ་ནི་བད་ཀན་སེལ་བར་བྱེད་པའི་ཆོ་ག་བསྟེན་པར་བྱའོ། །འབྲུམ་ཕྲན་སྲ་ཞིང་བརྟན་པ་ལ། །ཤ་ཁའི་ལོ་མ་སོགས་ཀྱིས་བཞར། །ཞེས་བྱ་བ་ལ། བད་ཀན་ལས་གྱུར་པའི་ཤུར་འབྲུམ་བུ་ཕྲ་མོ་བརྟན་ཞིང་མི་འགྱུར་བར་གནས་པ་གང་ཡིན་པ་དེ་ལ་
ནི་ཤ་ཁའི་ལོ་མ་ལ་སོགས་པས་བཞར་ཞིང་བསལ་བར་བྱའོ། །འདུས་པ་ལས་གྱུར་གསོ་བ་ནི། །ནང་གཞི་ཇི་བཞིན་ཤས་ཆེར་བྱ། །ཞེས་བྱ་བ་ལ། འདུས་པ་ལས་གྱུར་པའི་ཁ་ཤུལ་ནི་ནད་གཞི་གང་ཤས་ཆེ་བའི་དབང་དུ་བྱས་ཏེ་གསོ་བར་བྱའོ། །ཆུ་བུར་གསར་ཞིང་མ་འཕེལ་བ། །
བཅད་ལ་སྭརྫི་ཀའི་ཐལ་བ། །བཅའ་སྒ་སྦྲང་རྩི་གདབ་པར་བྱ། །ཞེས་བྱ་བ་ལ། མཛེར་པ་ཆུ་བུར་གསར་དུ་བྱུང་ཞིང་རིང་པོ་མ་ལོན་པ་མ་འཕེལ་བ་ལ་ནི་དཀྱིལ་འཁོར་འདྲ་བའི་གཙགས་བུས་བཅང་ལ། སྭརྫི་ཀ་ལ་སོགས་པའི་ཕྱི་མས་གདབ་པར་བྱའོ། །དེ་བསྐོལ་མཁུར་བ་བཀང་བར་བྱ། །
སླེ་ཏྲེས་ནིམ་པའི་ལྡེ་གུ་ནི། །སྦྲང་རྩི་ཏིལ་མར་བཅས་པའང་རུང་། །ཞེས་བྱ་བ་ལ། དེ་ལྟར་ཆུ་བུར་བཅད་ནས་སྨན་སྔ་མ་དེ་བསྐོལ་བའམ། སླེ་ཏྲེས་ལ་སོགས་པའི་ཁུ་བས་མཁུར་བ་བཀང་བར་བྱའོ། །ནས་ཟན་ཟ་ཞིང་ཏིལ་མར་རྣོས། །སྣ་སྨན་དང་ནི་བསྐུ་བྱུག་བྱ། །ཞེས་བྱ་བ་ལ། ཡང་ཆུ་བུར་
ཅན་དེ་ལ་ནས་ཀྱི་ཟན་བཟའ་བ་ལ་སོགས་པའི་སྦྱོར་བར་བྱའོ། །ཁ་དྲི་ང་ལ་སློན་སྨན་དང་། །དུད་པ་སྣ་སྨན་རྣོན་པོ་གཏང་། །ཞེས་བྱ་བ་ལ། །ཁ་དྲི་མི་ཞིམ་པ་ལ་སློན་སྨན་བཏང་ལ། སློན་པའི་འོག་དུ་དུད་པ་བརྔུབ་པ་རྣོན་པོ་དང་སྣ་སྨན་གཏང་བར་བྱའོ། །བཙོད་དང་སེང་ཕྲོམ་ད་ཏ་ཀི། །ཤུག་པ་པྲི་ཡང་ཀུ་ཡི་ཆུས། །ཁ་ཡི་ནང་ནི་
བཀྲུ་བ་དང་། །ཕྱེ་མས་ཁ་ནི་དག་པར་བྱ། །ཞེས་བྱ་བ་ལ། ཡང་ཁའི་ནང་དྲི་ང་ཞིང་མནམ་པ་ལ་སོགས་པའི་ཕྱེ་མ་དང་བཅས་པའི་ཆུ་དང་ཁ་བཀྲུ་ཞིང་དག་པར་བྱའོ། །གྲང་ཉེན་ཉེ་བར་བདར་བཤད་པའི་། །སྣ་སྨན་ལ་སོགས་བསྟེན་པར་བྱ། །ཞེས་བྱ་བ་ལ། ཡང་ཁ་དྲི་ང་བ་ལ་ནི་གྲང་བས་ཉིན་པ་དང་ཉེ་བར་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด