ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ
ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๐๒ · หน้า 227a
ཆུ་སེར་སླ་བ་དང་། །ལྦུ་བ་ཅན་ནི་རྒྱུན་དུ་འཛག །ཀོ་ཚགས་ཁ་བརྒྱ་པ་ཞེས་བྱ། །ཞེས་བྱ་བ་ལ། རླུང་ལས་གྱུར་པའི་འབྲུམ་བུ་ནི་ཁ་ཤིན་ཏུ་ཕྲ་ཞིང་མངར་བས་ཁྱབ་པར་བྱེད་དེ། ཀོ་ཚགས་ཀྱི་བུ་ག་དང་འདྲ་བ་ཡིན་ལ། རིམ་གྱིས་འཕེལ་ཞིང་ཆུ་སེར་སླ་བ་
ལ་སོགས་པ་འཛག་པ་ཡིན་ཏེ། དེའི་མིང་ནི་ཀོ་ཚགས་ཁ་བརྒྱ་པ་ཞེས་བྱའོ། །མཁྲིས་པ་ལས་གྱུར་རྔ་མོའི་མགྲིན། །ཞེས་བྱ་བ་ལ། མཁྲིས་པ་ལས་གྱུར་པའི་མཚན་བར་རྡོལ་བ་ནི་མིང་རྔ་མོའི་མགྲིན་ཞེས་བྱའོ། །བད་ཀན་ལས་གྱུར་སྤྱི་བག་ནི། །མང་འཛག་ཡོངས་སུ་
འཛག་ཅེས་བྱ། །ཞེས་བྱ་བ་ལ། བད་ཀན་ལས་གྱུར་པའི་མཚན་བར་རྡོལ་ནི་སྤྱི་བག་ཅན་གྱི་ཆུ་སེར་མང་དུ་འཛག་སྟེ། དེ་ནི་ཡོངས་སུ་འཛག་པ་ཞེས་བྱའོ། །རླུང་མཁྲིས་ལས་གྱུར་བ་ཤང་སྒོར་ནི། །ཡོངས་སུ་མཆེད་པ་ཀུན་ཁྱབ་ཅིང་། །དེར་ནི་ར་བའི་འོབས་ཀྱིས་ནི། །བསྐོར་
བལྟ་བུ་འབྱུང་བར་འགྱུར། །ཞེས་བྱ་བ་ལ། །རླུང་དང་མཁྲིས་པ་ལས་གྱུར་པའི་གཞང་འབྲུམ་ནི་འོབས་ཞེས་བྱ་སྟེ། དེས་ནི་བཤང་སྒོའི་ཉེ་འཁོར་ཀུན་ཏུ་ར་བས་བསྐོར་བ་ལྟ་བུ་འབྱུང་སྟེ། ཇི་ལྟར་ར་བའི་ཕྱི་རོལ་འོབས་ཀྱིས་བསྐོར་བ་དང་འདྲའོ། །རླུང་དང་བད་ཀན་ལས་གྱུར་
དང་། །གཞན་དུ་དྲང་པོར་སོང་འགས་བྱེད། །ཅེས་བྱ་བ་ལ། རླུང་དང་བད་ཀན་ལས་གྱུར་པའི་མཚན་བར་རྡོལ་ནི་དྲང་པོ་ཞེས་བྱ་སྟེ། གཞང་གི་ནང་དྲང་པོར་སོང་ནས་འགས་ཤིང་འཇིག་པར་བྱེད་པ་ཡིན་ནོ། །བད་མཁྲིས་ལས་གྱུར་སྔར་བཤད་བའི། །གཞང་འབྲུམ་
ལ་བརྟེན་དེ་ལྡང་ཞིང་། །དེ་ལས་གཞང་འབྲུམ་རྩ་བར་གཡའ། །སྐྲང་དང་ཚ་བ་ལ་སོགས་སྐྱེད། །དེ་ནི་མྱུར་སྨིན་རྡོལ་གྱུར་ན། །གཞང་འབྲུམ་རྩ་བ་རྣག་ཅན་ཡིན། །རྒྱུན་མི་ཆད་པར་འཛག་བྱེད་དེ། །གཞང་འབྲུམ་འདི་ནི་མཚན་བར་རྡོལ། །ཞེས་བྱ་བ་ལ། གཞང་འབྲུམ་
སྔར་བྱུང་བ་ལ་བརྟེན་ནས་བད་ཀན་དང་མཁྲིས་པ་འཁྲུགས་པར་གྱུར་བ་དང་། གཞང་འབྲུམ་གྱི་རྩ་བ་གཡའ་བ་ལ་སོགས་པ་སྐྱེད་དེ་སྐྲགས་པ་དེས་གཞང་འབྲུམ་གྱི་རྩ་བ་རྣག་པར་བྱེད་དེ། རྣགས་ཤིང་བརྟོལ་ནས་ཁྲག་རྒྱུན་མི་འཆད་པར་འཛག་པར་བྱེད་དེ། འདི་ནི་གཞང་འབྲུམ་
เล่ม ๒๐๒ · หน้า 227b
གྱི་མཚན་བར་རྡོལ་བ་ཞེས་བྱའོ་ཞེས་དྲང་སྲོང་རྣམས་ཀྱིས་བཤད་དོ། །འདུས་པ་ལས་གྱུར་དུང་འདྲ་བ། །དུང་ནི་འཁྱིལ་བའི་དབྱིབས་དང་འདྲ། །འདི་ཡིས་གཞང་ནི་ཞིག་བྱེད་ཅིང་། །མི་བཟད་ལམ་ནི་ཞིག་པར་བྱེད། །ཅེས་བྱ་བ་ལ། འདུས་པ་ལས་གྱུར་པའི་མཚན་བར་
རྡོལ་བའི་ནད་ནི་དུང་འདྲ་བ་ཞེས་བྱ་སྟེ། དེ་ནི་དབྱིབས་དུང་འདྲ་བ་ཡིན་ལ། མཚན་བར་རྡོལ་བ་འདིས་ནི་མི་བཟད་པར་ནད་ཀྱི་ཤུགས་ཀྱིས་དེའི་ལམ་ཞིག་ཅིང་འདྲུལ་བར་བྱེད་པ་ཡིན་ནོ། གང་ཚེ་ཤ་ལ་བརྐམ་པ་ཡིས། །རུས་པའི་དུམ་བུ་ཟོས་གྱུར་པས། །ཐད་ཀར་སོང་བས་ལམ་
ལོག་ཞུགས། །རྡོལ་ཞིང་སྣད་པར་བྱེད་པ་ཡིན། །དེ་ཚགས་པས་རྣགས་པ་དང་། །ཤ་ནི་འདྲུལ་བར་བྱེད་པ་ཡིན། །དེར་ནི་སྲིན་བུ་སྐྱེ་འགྱུར་ཞིང་། །གཞང་ནི་ཀུན་ཏུ་ཟ་བར་བྱེད། །རིང་པོར་མི་ཐོགས་དེས་འཇིག་བྱེད། །དེ་ནི་ལམ་ལོག་རྨ་སྐྱེས་ཡིན། །ཞེས་བྱ་བ་ལ།
ཤ་ལ་བརྐམ་ཞིང་ཆགས་པའི་དབང་གིས་གང་གི་ཚེ་རུས་བའི་དུམ་བུ་ཟོས་ཤིང་མིད་པར་གྱུར་པ་དེའི་ཚེ་རུས་པ་དེ་ལམ་ལོག་པར་ཞུགས་ཏེ་ཐད་ཀར་འཕྲེད་དུ་སོང་བས་རྡོལ་ཞིང་སྣད་པར་བྱེད་ལ། དེས་ན་ནང་དུ་གས་ཤིང་རྣགས་པར་གྱུར་པ་དང་། ཤ་རུལ་ཞིང་འདྲུལ་བར་འགྱུར་ལ།
དེས་ན་གཞང་གི་ཕྱོགས་དེར་སྲིན་བུ་སྐྱེ་བར་འགྱུར་ཞིང་། སྲིན་བུ་དེས་ནད་པ་དེའི་གཞང་ཀུན་ཏུ་ཟ་བར་བྱེད་དེ། དེས་ནི་རིང་པོ་མི་ཐོགས་པར་གཞང་འཇིག་པར་བྱེད་དེ། མཚན་བར་རྡོལ་བ་དེ་ནི་ལམ་ལོག་པར་ཞུགས་པ་དང་། རྨ་ལས་སྐྱེས་པའི་མིང་གཉིས་ཀྱིས་བསྟན་པ་
ཡིན་ནོ། །དེ་ལས་ན་ཚ་གཡའ་ལ་སོགས། །རྨ་གསོ་བ་ལས་ཤེས་པར་བྱ། །ཞེས་བྱ་བ་ལ། མཚན་བར་རྡོལ་དེ་ཐམས་ཅད་ལས་ན་བ་དང་། ཚ་བ་ལ་སོགས་པའི་མཚན་མ་ནི་རྨ་གསོ་བའི་ལེའུ་ལས་ཇི་ལྟ་བ་བཞིན་དུ་ཤེས་བར་བྱའོ། དེ་ལས་དྲུག་པོ་གསོ་དཀའ་ཡིན།
འདུས་གྱུར་རྨ་སྐྱེས་སྤང་བར་བྱ། །སེལ་བའི་གཉེར་མར་ཕྱིན་པ་དང་། །སྲུབས་མཚམས་ལ་ནི་བརྟེན་པ་སྤང་། །ཞེས་བྱ་བ་ལ། མཚན་བར་རྡོལ་དེ་རྣམས་ཀྱི་ནང་ནས་ནད་གཞི་རེ་རེ་ལས་གྱུར་པ་གསུམ་དང་ལྡན་པ་ལས་གྱུར་པ་གསུམ་སྟེ། དྲུག་ནི་གསོ་དཀའ་བ་ཡིན་ནོ། །
เล่ม ๒๐๒ · หน้า 228a
འདུས་པ་ལས་གྱུར་པ་དང་། རྨ་ལས་སྐྱེས་པ་ནི་སྤང་བར་བྱའོ། །དེ་བཞིན་དུ་ཕྱིར་སེལ་བའི་གཉེར་མར་ཕྱིན་པ་ཡང་སྤང་བར་བྱ་ལ། དེ་བཞིན་དུ་མདོམས་ཀྱི་སྲུབས་མཚམས་ལ་བརྟེན་པ་ཡང་སྤང་བར་བྱའོ། །དེ་ནས་འབྲུམ་བུའི་ཚེ་ཉིད་ནི། །འདི་ནི་འབད་
དེ་གསོ་བར་བྱ། །སྦྱང་དང་གཏར་ག་ཆུ་བླུགས་སོགས། །ཅི་ནས་སྨིན་པར་མི་འགྱུར་བར། །འདི་ནི་འབད་དེ་གསོ་བར་བྱ། །ཞེས་བྱ་བ་ལ། དེ་ནས་མཚན་བར་རྡོལ་འདི་འབྲུམ་བུའི་ཚེ་ཉིད་ནི་སྤད་པ་ལ་སོགས་པས་གསོ་བར་བྱ་ཞིང་ཅི་ནས་ཀྱང་སྨིན་པར་མི་འགྱུར་བ་དེ་ལྟར་
གསོ་བར་བྱའོ། །སྨིན་ནས་སླར་ཡང་སྣུམ་ཆོས་དང་། །དུགས་བྱས་ནས་ནི་ལུས་སྤྱིང་བྱ། །གཞན་འབྲུམ་ལྟ་བུར་བསྡམས་ནས་ནི། །གཏིང་རིང་ལེགས་པར་བརྟན་བྱ་ཞིང་། །རྩ་བ་འམ་ནི་རྩེ་མོ་འམ། །ཕྱི་བལྟས་ནང་དུ་བལྟས་བ་བརྟག ཅེས་བྱ་བ་ལ། ཡང་ནད་པ་
དེ་ལ་སྣུམ་ཆོས་ལ་སོགས་པ་བྱས་ལ། གཞང་འབྲུམ་ལྟ་བུར་ལེགས་པར་བསྡམས་ནས་སྟེད་དུ་སོང་བའམ་འོག་ཏུ་སོང་བའི་རྩ་བ་དང་རྩེ་མོ་དང་། དེ་བཞིན་དུ་ཁ་ཕྱི་རོལ་དུ་བལྟས་པ་དང་། ནང་དུ་བལྟས་པ་ལེགས་པར་བརྟག་ཅིང་ཤེས་པར་བྱའོ། །དེ་ལ་ནད་བལྟས་བཙས་ནས་
ནི། །གཙགས་བུས་ལེགས་པར་གཅད་པར་བྱ། །ཕྱིར་བལྟས་མ་ལུས་པར་བཅད་ལ། །ཐལ་སྨན་དག་གིས་གསོ་བར་བྱ། །ཞེས་བྱ་བ་ལ། དེ་ལས་མཚན་པར་རྡོལ་བ་ནང་དུ་བལྟས་པ་ནི་ལེགས་པར་བཙལ་ཅིང་བརྟགས་ནས་གཙགས་བུས་གཅད་ཅིང་དྲལ་བར་
བྱའོ། །ཕྱི་རོལ་དུ་བལྟས་པ་ནི་མཚན་བར་རྡོལ་བ་མ་ལུས་པར་བཅད་ལ། དེའི་འོག་ཏུ་ཐལ་སྨན་གྱིས་གསོ་བར་བྱའོ། །དེ་ནས་ཐལ་སྨན་བཏབ་པ་འམ། །ཡང་ན་སྨན་པས་མེ་བཙའ་གདབ། །ཅེས་བྱ་བ་ལ། དེའི་འོག་ཏུ་མཚན་བར་རྡོལ་གཉི་གཡང་སྨན་པས་ཐལ་
སྨན་གྱིས་གསོ་བའམ། མེ་བཙའ་གདབ་པར་བྱའོ། །རྔ་མོའི་མགྲིན་ལ་ཐལ་སྨན་བསྐུ། །ཞེས་བྱ་བ་ལ། རྔ་མོའི་མགྲིན་པ་ལྟ་བུ་ཞེས་བྱ་བའི་མཚན་བར་རྡོལ་ནི་ཐལ་སྨན་ཉིད་ཀྱིས་གསོ་བར་བྱའོ། མེ་བཙས་ནིམ་ཡིན་ནོ། །ཀོ་ཚགས་ཁ་བརྒྱ་སྦུགས་གཅིག་པ། །
เล่ม ๒๐๒ · หน้า 228b
བཅུག་ནས་ལེགས་པར་གཅད་བར་བྱ། །ཞེས་བྱ་བ་ལ། མཚན་བར་རྡོལ་ཀོ་ཚགས་ཁ་བརྒྱ་པ་ནི། སྦུ་གུ་སྦུབས་གཅིག་པའི་ནང་ན་བར་མཚམས་གཅིག་པའི་ནང་དུ་བར་མཚམས་གཅིག་ཡོད་པ་བཅུག་ནས་གཅད་པར་བྱའོ། །དེ་འདྲུབས་ནས་ནི་ལྷག་མའང་བཅད། །གཞན་
དུ་གཞང་ནི་ཞེ་གནས་འཆི། །ཞེས་བྱ་བ་ལ། རྨ་དེ་འདྲུབས་པར་གྱུར་ན་ལྷག་མ་གཅད་པར་བྱ་སྟེ། གཞན་དུ་དུས་གཅིག་ཏུ་བཅད་ན་ནི་གཞང་ཞིག་ནས་འཆི་བར་འགྱུར་རོ། །འོབས་ལྟར་ཁྱབ་པའམ་དེ་བཞིན་དུ། །ཐལ་སྨན་བ་གཅིན་སྦུ་གུས་གསོ། །ཞེས་བྱ་བ་ལ། དེ་
བཞིན་དུ་འོ་བས་ལྟ་བུས་ཁྱབ་པ་ཞེས་བྱ་བའི་མཚན་བར་རྡོལ་ལ་ཡང་ཐལ་སྨན་དང་བ་གཅིན་དང་། སྦུ་གུའི་སྦྱོར་བས་གསོ་བར་བྱའོ། །གཞང་འབྲུམ་མཚན་མར་རྡོལ་ལ་སྔར། །གཞང་འབྲུམ་ལ་ནི་སྨན་ཕྱེ་གདབ། །རྨ་སྐྱེས་པ་ལ་རེ་ཐག་བཅད། །ཟུག་རྔུ་དབྱུང་བའི་ཆོ་ག་བཞིན། །
ཟུག་རྔུ་ཕྱུང་སྡེ་སྲིན་འཇོམས་པའི། །བཟའ་དང་བྱུག་པ་སྦྱར་བར་བྱ། །ཞེས་བྱ་བ་ལ། གཞང་འབྲུམ་ལས་གྱུར་པའི་མཚན་བར་རྡོལ་བ་ལ་ནི་དང་པོར་གཞང་འབྲུམ་ཉིད་གསོ་བར་བྱའོ། །རྨ་ལས་སྐྱེས་པའི་མཚན་བར་རྡོལ་ལ་ནི་དང་པོར་རེ་ཐག་བཅད་ལ། དེའི་འོག་ཏུ་ཟུག་རྔུ་
དབྱུང་བའི་ཆོ་ག་བཞིན་དུ་གསོ་བར་བྱ་སྟེ། དེའི་འོག་ཏུ་འབུ་འཇོམས་པའི་བཟའ་བཏུང་དང་བསྐུ་བྱུག་སྦྱར་བར་བྱའོ། །གླན་དུགས་སྦུ་གུ་ཅན་ལ་སོགས། །སྣུམ་ཆོས་ལེགས་སྦྱར་ནད་ལ་ཕན། །ཞེས་བྱ་བ་ལ། མཚན་བར་རྡོལ་གྱི་ནད་ན་བ་ལ་ནི་གླན་པའི་དུགས་ལ་
སོགས་པས་ཕན་ནོ། །ཀོ་ཚགས་འདྲ་དང་ཐམས་ཅད་ལ། །བ་ལང་རོགས་དང་ཀུན་ཏུ་བཟང་། །གཤོལ་ཕྱེད་པ་དང་གཤོལ་གྱིས་བྱ། །བརྟགས་ཏེ་ཉེ་བར་སྦྱར་བར་བྱ། །ཞེས་བྱ་བ་ལ། ཀོ་ཚགས་འདྲ་བ་དང་མཚན་བར་རྡོལ་བ་ཐམས་ཅད་ལ་བ་ལང་གི་ངོགས་ཞེས་བྱ་བ་
ལ་སོགས་པ་སྤྱད་བཞི་བོ་ངེས་པར་བརྟགས་ཏེ་སྦྱར་བར་བྱའོ། །ངོས་སུ་འདེབས་པར་བྱེད་པའི་མཚོན། །བ་ལང་ངོགས་ཞེས་བྱ་བར་བཤད། །ཅེས་བྱ་བ་ལ། ངོས་སུ་མཚོན་གང་ངོས་སུ་འདེབས་ཤིང་གཅོད་པར་བྱེད་པ་དེ་ནི་མིང་བ་ལང་གི་ངོགས་ཞེས་བྱའོ། །ཀུན་ཏུ་
เล่ม ๒๐๒ · หน้า 229a
གཏོང་བ་ཀུན་ཏུ་བཟང་། །ཞེས་བྱ་བ་ལ། ཐམས་ཅད་གཏོང་ཞིང་སྤྱོད་པའི་ཆ་སྤྱད་ནི་ཀུན་ཏུ་བཟང་པོ་ཞེས་བྱའོ། །ངོས་ལ་གཅོད་པ་གཤོལ་ཕྱེད་པ་། །ངོས་གཉིས་སུ་ནི་གཤོལ་གྱིས་བཅད། །ཅེས་བྱ་བ་ལ། ངོས་ཕན་ཚུན་གཅིག་གཅོད་པར་
བྱེད་པའི་ཆ་སྤྱད་ནི་གཤོལ་ཕྱེད་པ་ཞེས་བྱའོ། །ངོས་གཉིས་ཀར་གཅོད་པར་བྱེད་པ་ནི་གཤོལ་ཞེས་དྲང་སྲོང་རྣམས་ཀྱིས་བཤད་དོ། །འཛག་པའི་ལམ་ནི་མ་ལུས་པ། །ཐམས་ཅད་མེ་ཡིས་བསྲེག་པར་བྱ། །སླར་ཡང་འདི་ལྟའི་གནོད་མི་སྐྱེད། །ཅེས་བྱ་བ་ལ། འཛག་པར་
བྱེད་པའི་ལམ་མ་ལུས་པ་ཐམས་ཅད་ལ་ཡང་མེས་བསྲེགས་པར་བྱ་སྟེ། དེ་ལྟར་བྱས་ན་མཚན་བར་རྡོལ་གྱིས་སླར་གནོད་པར་མི་བྱེད་དོ། །སྨན་པས་དེ་ཡི་བར་བར་དུ། །དེ་ལྟོ་སྦྱང་ལ་འབད་པར་བྱ། །ཞེས་བྱ་བ་ལ། ཡང་མཚན་བར་རྡོལ་དང་ལྡན་པའི་ནད་པ་དེ་ལ་བར་བར་རམ།
སྐབས་སྐབས་སུ་སྐྱུག་སྨན་ལ་སོགས་པས་སྦྱང་བར་བྱའོ། །བྱི་ལའི་རུས་པ་འབྲས་བུ་གསུམ། །ཁུ་བ་ལྡེ་གུར་བྱས་པས་བསྐུ། །ཞེས་བྱ་བ་ལ། མཚན་བར་རྡོལ་ལ་བྱི་ལའི་རུས་པ་ལ་སོགས་པའི་ལྡེ་གུས་བསྐུས་ན་ཡང་ཕན་ནོ། །ཛོ་ཏི་སྨྲ་ཏི་མ་ལ་ཡུ། །སླེ་སྨན་ཏ་ཀ་བི་ཤ་ལྱ། །
དུར་བྱིད་པ་ཏི་བ་ཏྲ་ཀ། །ཀ་ར་བཱི་ར་སྲ་རྩི་ཕོག །ཤུ་དག་སུ་དྷཱ་ཀྵི་ར་དང་། །ཨ་རྐའི་ལོ་མ་ཏིལ་མར་བསྐོལ། །མཚན་བར་རྡོལ་ལ་བསྐུས་ན་ནི། །འདི་ནི་ཕན་བྱེད་མཆོག་ཏུ་བཤད། །ཅེས་བྱ་བ་ལ། ཛོ་ཏི་སྨན་ཏི་ལ་སོགས་པའི་ལྡེ་གུ་དང་ཏིལ་མར་བསྐོལ་ལ། ཏིལ་མར་
དེ་མཚན་བར་རྡོལ་བའི་ནད་དང་ལྡན་པ་ལ་བསྐུས་ན་ཡང་མཆོག་ཏུ་ཕན་པ་ཡིན་ནོ། །ཛོ་ཏི་སྨ་ཏི་ནི་ཀ་ཀ་ད་ནའོ། །མ་ལ་ཡུ་ནི་སོ་མ་ར་ཛའ་མ་ཕལ་གུའོ། །སླེ་སྨན་ཏ་ཀ་ནི་སེ་ལུའོ། །བི་ཤ་ལྱ་ནི་ལང་ག་ལིའོ། །དུར་བྱིད་ནི་ཏྲི་བྱིད་དོ། །ཤིང་མངར་སེང་ཕྲོམ་པི་པི་ལིང་། །སུག་
སྨེལ་ཧ་རེ་ཎུ་ཀ་དང་། །སེར་པོ་གཉིས་དང་པྲི་ཡང་གུ །རྒྱམ་ཚ་ཐལ་ཏེས་ཤུག་པ་དང་། པདྨའི་སྙིང་པོ་ད་ཏ་ཀི། །སྤྲ་ཚིལ་རུ་རྟ་སྲ་རྩི་ཕོག །ཁ་ལུང་འོ་མར་བཅས་པ་དང་། །ཏིལ་མར་ལྷན་ཅིག་བསྐོལ་བ་ཡིས། །བསྐུས་ན་འབྲུམ་བུ་མཛེ་དང་རྨ། །གཅིན་ནད་སྦྲང་རྩི་
เล่ม ๒๐๒ · หน้า 229b
འདྲ་པ་འཇོམས། །ཞེས་བྱ་བ་ལ། ཤིང་མངར་ལ་སོགས་པའི་སྨན་ལྡེ་གུ་བྱས་པ་དང་། ཏིལ་མར་ལྷན་ཅིག་བསྐོལ་བས་བསྐུས་ན་འབྲུམ་བུ་ལ་སོགས་པའི་ནད་སེལ་བར་བྱེད་དོ། བྱི་དང་ག་སྙིང་འབྲས་བུ་གསུམ། །པི་པི་ལིང་རྩ་པི་པི་ལིང་། །སྦྲང་རྩི་ཏིལ་མར་སྦྱར་བ་ཡི། །
ལྡེ་གུ་ཟོས་ན་སྲིན་བུའི་ནད། །མཚན་བར་རྡོལ་དང་མཛེ་ནད་དང་། །གཅིན་སྙི་བ་དང་སྨས་པ་དང་། །རྨ་འཁྱིམས་འཚོ་བར་བྱེད་པ་ཡིན། །ཞེས་བྱ་བ་ལ། བྱི་དང་གའི་སྙིང་པོ་ལ་སོགས་པའི་ལྡེ་གུ་ཟོས་ན་སྲིན་བུའི་ནད་ལ་སོགས་པ་སེལ་བར་བྱེད་དོ། །སླེ་ཏྲེས་སུག་
སྨེལ་བྱི་དང་ག །དུག་མོ་ཉུང་དང་བ་རུ་ར། །སྐྱུ་རུ་ར་དང་ཨ་རུ་ར། །གུ་གུལ་རིམ་གྱིས་ཆ་རེས་བསྐྱེད། །སྦྲང་རྩིར་སྦྱར་བ་འདི་ཟོས་ན། །འབྲུམ་བུ་སྦོམ་དང་མཚན་བར་རྡོལ། །ནད་ནི་སེལ་བར་བྱེད་པ་ཡིན། །ཞེས་བྱ་བ་ལ། སླེ་ཏྲེས་ལ་སོགས་པའི་སྨན་ཆ་རེ་རེས་
བསྐྱེད་དེ་སྦྱར་བའི་ལྡེ་གུ་ཟོས་ན་འབྲུམ་བུ་སྔོན་པོ་ལ་སོགས་པའི་ནད་སེལ་བར་བྱེད་དོ། །པི་པི་ལིང་དང་ཙི་ཏྲ་ཀ། །བྱི་དང་ག་དང་དུག་མོ་ཉུང་། །ཆ་སྙོམས་ཕྱེད་ཀྱི་འབྲས་བུ་གསུམ། །ཀུན་དང་ཆ་མཉམ་གུ་གུལ་དང་། །སྦྲང་རྩིར་སྦྱར་བའི་ལྡེ་གུ་ཡིས། །ནད་ནི་ཐམས་
ཅད་འཇོམས་པར་བྱེད། །ཅེས་བྱ་བ་ལ། པི་པི་ལིང་ལ་སོགས་པ་སྲང་རེ་དང་། འབྲས་བུ་གསུམ་སྲང་དྲུག་དང་། གུ་གུལ་སྨན་དེ་དག་ཀུན་དང་ཆ་མཉམ་པར་བྱས་པ་དང་། སྦྲང་རྩིར་སྦྱར་བའི་ལྡེ་གུ་ཚད་དང་ལྡན་པར་ཟོས་ན་ཡང་མཚན་བར་རྡོལ་བའི་ནད་ཐམས་
ཅད་འཇོམས་པ་ཡིན་ནོ། །གུ་གུལ་སྲང་ལྔ་པི་པི་ལིང་། །འབྲས་བུ་གསུམ་ནི་སྲང་རེ་དང་། །ཤིང་ཚ་སུག་སྨེལ་ཞོ་གཉིས་གཉིས། །སྦྲང་རྩིར་སྦྱར་བའི་ལྡེ་གུ་ནི། །ཟོས་ན་མཚན་བར་རྡོལ་བ་དང་། །མཛེ་ནད་སྐྲན་ནད་འཇོམས་པར་བྱེད། །ཅེས་བྱ་བ་ལ། གུ་གུལ་སྲང་
ལྔ་དང་། པི་པི་ལིང་འབྲས་བུ་གསུམ་སྨན་སྣ་རེ་ཞིང་སྲང་རེ། ཤིང་ཚ་དང་། སུག་སྨེལ་སྣ་རེ་ཞིང་ཞོ་གཉིས་གཉིས་སྦྲང་རྩི་དང་སྦྱར་བའི་ལྡེ་གུ་ཟོས་ན་ཡང་མཚན་བར་རྡོལ་བ་ལ་སོགས་པའི་ནད་སེལ་བར་བྱེད་དོ། །དེ་ཉིད་དང་ནི་བཅའ་སྒའི་ཕྱེ། །ལེགས་པར་བསྲེས་
เล่ม ๒๐๒ · หน้า 230a
པར་གྱུར་པ་དང་། །རྩ་བ་བཅུ་ཡི་ཁུ་བར་བསྲེས། །མཆོག་ཏུ་རླུང་གི་ནད་སེལ་བྱེད། །ཅེས་བྱ་བ་ལ། བཤད་མ་ཐག་པའི་སྨན་དེ་དག་ཉིད་བཅའ་སྒའི་ཕྱེ་མ་ལ་སོགས་པ་དང་བསྲེས་པས་ཀྱང་མཆོག་ཏུ་རླུང་ལས་གྱུར་པའི་མཚན་བར་རྡོལ་བ་སེལ་
བར་བྱེད་དོ། །སེང་ལྡེང་སྙིང་པོ་འབྲས་བུ་གསུམ་གྱི་ཕྱེ། །ཨ་ས་ན་བསྐོལ་ཁུ་བ་དང་བསྲེས་དང་། །ཆ་མཉམ་གུ་གུལ་སྦྲང་རྩི་ལྡེ་གུར་བྱས། །མཛེ་འབྲུམ་གཅིན་སྙི་མཚན་བར་རྡོལ་ནད་སེལ། །ཞེས་བྱ་བ་ལ། སེང་ལྡེང་གི་སྙིང་བོ་ལ་སོགས་པ་དང་། གུ་གུལ་ཆ་
མཉམ་པར་ཨ་ས་ན་བསྐོལ་བའི་ཁུ་བ་དང་བསྲེས་ཏེ་ཟོས་ན་འཛེ་ལ་སོགས་པའི་ནད་སེལ་ཏོ། །འདི་ནི་མཚན་བར་རྡོལ་གསོའི་བྱེ་བྲག་བཤད། །སྨན་གྱི་མཚན་ཉིད་ལྷག་པ་གང་ཡིན་པ། །རྨ་ཡི་དབང་བྱས་ཡོངས་སུ་བསྟན་པ་དང་། །གསོ་ཐབས་དགོས་པ་ལེགས་པར་
བརྟགས་ཏེ་སྦྱར། །ཞེས་བྱ་བ་ལ། སྔར་བཤད་པའི་མཚན་བར་རྡོལ་གྱི་གསོ་བ་བྱེ་བྲག་གམ་ཁྱད་པར་ཙམ་སྨྲས་པ་ཡིན་གྱི། སྤྱིའི་བཤད་པ་ནི་མ་ཡིན་ཏེ། སྔོན་གྱི་མཚན་ཉིད་དེ་ལ་ཕན་པ་ལྷག་པ་གང་ཡིན་པ་ནི་རྨའི་དབང་དུ་བྱས་པ་ཡོངས་སུ་བརྟགས་ཏེ་བསྟན་པ་དང་། །
དེ་དང་འཚམ་པའི་གསོ་ཐབས་གང་ཡིན་པ་དག་གིས་གསོ་བར་བྱའོ། །རྟ་ཞོན་སྟོབས་འགྱེད་ཤུགས་ནི་འགེགས་པ་དང་། །ཆང་འཐུངས་ཉལ་པོ་མ་ཞུ་མ་གོམས་དང་། །དྲག་ཤུལ་ལས་ནི་སྣ་ཚོགས་རྨ་འདྲུབས་ནས། །ལོ་གཅིག་བར་རམ་དེ་ལས་ལྷག་པ་སྤང་། །ཞེས་
བྱ་བ་ལ། མཚན་བར་རྡོལ་གྱི་རྨ་འཚོབས་སུ་ཟིན་ཀྱང་། །རྟ་ཞོན་པ་ལ་སོགས་པ་ལོ་གཅིག་གམ། །དེ་ལས་ལྷག་པའི་བར་དུ་ཡོངས་སུ་སྤང་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་
བས་ངེས་བར་སྦྱར་བ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་བརྒྱད་པའི་རྣམ་པར་འགྲེལ་པའོ།། །།དེ་ནས་རྨེན་བུ་དང་རྐང་བམ་དང་འབྲས་ཀྱི་ཕྲེང་བའི་ནད་དམིགས་ཤེས་པ་བཤད་པར་བྱའོ། །ཞེས་བྱ་བ་ལ། རྨ་དང་འབྲུམ་བུའི་སྐབས་ཀྱི་གོ་
เล่ม ๒๐๒ · หน้า 230b
རིམས་ཀྱིས་ན་ལེའུ་འདི་ཉིད་བརྩམས་པ་ཡིན་ནོ། །ནད་ནི་བད་ཀན་ཤས་ཆེ་བ། །ཁྲག་དང་ཤ་དང་ཚིལ་ལ་བརྟེན། །ཟླུམ་ཞིང་མཐོ་བར་སྐྲངས་བ་དེ། །མདུད་པ་འདྲ་བས་རྨེན་བུར་བཤད། །ཅེས་བྱ་བ་ལ། རླུང་ལ་སོགས་པའི་ནད་བད་ཀན་གྱི་ཤས་ཆེ་བ་གང་ཡིན་པ་
ཤ་དང་ཁྲག་ལ་བརྟེན་ཅིང་གནས་པ་དེ་ལས་སྐྲངས་པ་གང་ཟླུམ་ཞིང་མཐོ་བར་གྱུར་པ་དེ་རྣག་འཛག་པའི་རྗེས་ལ་མདུད་པ་འདྲ་བའི་རྨེན་བུས་ཁྱབ་པར་འགྱུར་བས་དེ་ལ་མིང་རྨེན་བུ་ཞེས་བྱའོ། །དེ་ནི་ནད་གཞི་ཁྲག་ཤ་ཚིལ། །རུས་རྩ་རྨ་ལས་གྱུར་པ་དགུ། །ཞེས་བྱ་བ་ལ། རྨེན་
བུ་དེ་ནི་ནད་གཞི་སོ་སོ་ལས་གྱུར་པ་གསུམ་དང་། ཁྲག་ལས་གྱུར་པ་དང་། ཤ་དང་ཚིལ་དང་རུས་པ་དང་རྩ་དང་། རྨ་ལས་གྱུར་པ་དང་དགུའོ། །དེ་ལ་རླུང་གྱུར་རྒྱ་ཆེ་ཞིང་། །ཟུག་ཅིང་བྱེ་བ་སྙམ་སེམས་ན། །གནས་ནས་གནས་གཞན་དག་ཏུ་འཕོ། །རྒྱུ་མེད་པར་
ནི་འཕེལ་ཞིང་འབྲི། །འཇམ་ཞིང་ལྒང་པ་ལྟ་བུར་རྒྱས། །བརྟོལ་ན་ཁྲག་ནི་སླ་བར་འཛག །ཅེས་བྱ་བ་ལ། དེ་ལ་རྨེན་བུ་དེ་དག་གི་ནང་ནས་རླུང་ལས་གྱུར་པའི་རྨེན་བུ་ནི་རྒྱ་ཆེ་ཞིང་ལྷུན་མཐུག་པ་དང་། ཟུག་པ་ལ་སོགས་ནས། ཁྲག་སླ་བ་འཛག་པའི་བར་དུ་ཡིན་ནོ། །
མཁྲིས་གྱུར་ཚ་ཞིང་མདོག་སེར་ལ། །དམར་ཞིང་མྱུར་དུ་སྨིན་པ་ཡིན། །བརྟོལ་ན་ཁྲག་ནི་དྲོན་མོ་འཛག །ཅེས་བྱ་བ་ལ། མཁྲིས་པ་ལས་གྱུར་པའི་རྨེན་བུ་ནི་ཚ་བ་དང་བཅས་པ་དང་ཁ་དོག་སེར་པོ་ཡིན་ལ། དེ་བཞིན་དམར་བ་ལ་སོགས་པ་ཡིན་ནོ། །བད་ཀན་
ལས་གྱུར་ནད་མེད་སྲ། །རེག་ན་གྲང་ཞིང་དཀའ་ལ་གཡའ། །སྨིན་ན་རྣག་ནི་སྐ་བ་འཇག་ །ཅེས་བྱ་བ་ལ། བད་ཀན་ལས་གྱུར་པའི་རྨེན་བུ་ནི་ནད་ཚབས་ཆུང་ཞིང་རེག་ན་གྲང་བ་ལ་སོགས་པ་ཡིན་ནོ། །ནད་འཁྲུགས་ཁྲག་ལས་གྱུར་རྨེན་བུ། །སྲིན་བུ་དང་ནི་བཅས་པར་འགྱུར། །
ཤ་དང་རྩ་ལ་གནས་པ་ཡི། །རྨེན་བུ་ཚོར་བ་ཆུང་བ་དང་། །མཁྲིས་པའི་མཚན་ཉིད་འདྲ་བ་ཡིན། །ཞེས་བྱ་བ་ལ། རླུང་ལ་སོགས་པའི་ནད་འཁྲུགས་པའི་ཁྲག་ལས་རྨེན་བུར་གྱུར་པ་ནི་ཁྲག་དེ་སྲིན་བུ་སྐྱེ་བ་ལ་ཕྱོགས་པར་འགྱུར་བ་དང་བཅས་པ་དང་། ཤ་དང་རྩ་ལ་གནས་
เล่ม ๒๐๒ · หน้า 231a
པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །ཤ་ཆེའི་གནོད་གྱུར་ཤ་ལས་ནི། །ཤ་སྐྱེད་ཟས་ལ་རྨེན་བུ་འབྱུང་། །སྣུམ་ཞིང་ཆེ་ལ་སྲ་བ་དང་། །རྩ་ཡིས་ཁྱབ་ཅིང་བད་ཀན་འདྲ། །ཞེས་བྱ་བ་ལ། ཤ་སྐྱེད་པར་བྱེད་པའི་ཁ་ཟས་ཀྱིས་ཤ་ལ་
གནོད་པར་གྱུར་པ་ལས་བྱུང་བའི་རྨེན་བུ་ནི་སྣུམ་པ་ནས་བད་ཀན་དང་མཚན་ཉིད་འདྲ་བའི་བར་ཡིན་ནོ། །ཚིལ་སྐྱེད་པ་ཡིས་ཚིལ་འཕེལ་བ། །ཤ་འམ་པགས་པར་ཕྱིན་གྱུར་པ། །རླུང་གི་རྨེན་བུ་ཤིན་ཏུ་སྣུམ། །འཇམ་དང་བརྟན་པར་བྱེད་པ་ཡིན། །བད་ཀན་དང་ནི་
མཚན་ཉིད་མཚུངས། །ལུས་འཕེལ་འབྲི་བ་མཚུངས་པ་ཡིན། །དེ་བརྟོལ་ཚིལ་མཐུག་དམར་བ་དང་། །དཀར་དང་ནག་པ་འཛག་པར་འགྱུར། །ཞེས་བྱ་བ་ལ། ཚིལ་སྐྱེད་པར་བྱེད་པའི་ཁ་ཟས་ཀྱིས་ཚིལ་འཕེལ་བར་འགྱུར་བ་ཤ་འམ་པགས་པ་ཕྱིན་པར་གྱུར་པ་ལས་རླུང་གི་རྨེན་བུ་
ཤིན་ཏུ་སྣུམ་པ་ལ་སོགས་པའི་མཚན་ཉིད་ཅན་ལུས་འཕེལ་ཞིང་ཚོན་ནི་འཕེལ་བར་འགྱུར་ལ། སྦེག་ན་འགྲིབ་པར་འགྱུར་བར་འབྱུང་ལ། དེ་བརྟོལ་ན་ཚིལ་མཐུག་ཅིང་མདོག་དམར་བ་ལ་སོགས་པ་འཛག་པར་འགྱུར་རོ། །རུས་པ་ཆག་དང་སྣད་པ་ལས། །མཐོ་དང་དམའ་
བར་གྱུར་པ་དེ། །རུས་པའི་རྨེན་བུ་ཞེས་བྱའོ། །ཞེས་བྱ་བ་ལ། རུས་པ་ཆག་གྲུགས་སུ་གྱུར་པ་ལས་རུས་པ་གང་མཐོ་བའམ་དམའ་བར་གྱུར་པ་དེ་ནི་རུས་པའི་རྨེན་བུ་ཞེས་བྱའོ། །རྐང་གིས་སོང་བའམ་དྲག་ཤུལ་གྱིས། །དུབ་པར་གྱུར་ནས་ཆུ་བརྒལ་བས། །རླུང་གིས་
རྩ་གྲང་ཁྲག་བཅས་པ། །རླུང་གིས་བཙིར་ཏེ་འཁྲུགས་ནས་ནི། །ཡོན་པོར་བྱས་ཏེ་སྐམས་པ་དང་། །མི་འཕར་ནད་བྱུང་རྨེན་བུ་ཆགས། །དེ་ནི་རྩ་ཡི་རྨེན་བུར་བཤད། །ཅེས་བྱ་བ་ལ། རྐང་གིས་ལམ་དུ་ཞུགས་པ་ལས་འཕྲལ་དུ་ཆུ་བརྒལ་བར་གྱུར་པ་དང་། ཡང་ན་དེ་
བཞིན་དུ་དྲག་ཤུལ་གྱིས་དུབ་པར་གྱུར་པ་ལས་མོད་ལ་ཆུ་བརྒལ་བར་གྱུར་པས། རླུང་འཁྲུགས་པར་གྱུར་ཏེ། རླུང་དེས་རྩ་ལ་གནོད་པར་བྱས་ཤིང་བཙིར་ཏེ་འཁུམས་པར་བྱས་ཤིང་སྐམས་པ་ལས་མི་འཕར་པར་ནད་བྱུང་བའི་རྨེན་བུ་ཆགས་པར་འགྱུར་ཏེ་དེ་ནི་མིང་རྩའི་རྨེན་བུ་
เล่ม ๒๐๒ · หน้า 231b
ཞེས་བྱའོ། །རྨ་ནི་མ་འདྲུབས་འདྲུབས་མ་ཐག །རོ་ནི་ཐམས་ཅད་ཟོས་གྱུར་པའམ། །རློན་པ་དཀྲིས་པ་མེད་པ་འམ། །ཡང་ན་ལུས་ནི་སྣད་གྱུར་པས། །རླུང་ནི་ནད་ཁྲག་མ་ཕྱུང་པ། །མ་སྦྱངས་རྨ་ནི་བསྲུབས་པ་ལས། །ཚ་ཞིང་གཡའ་དང་བཅས་གྱུར་པ། །
རྨ་ཡི་རྨེན་བུར་དེ་བཤད་དོ། །ཞེས་བྱ་བ་ལ། རྨ་ཤ་མ་འདྲུབས་པ་འམ། འདྲུབས་མ་ཐག་རོ་ཐམས་ཅད་དང་ཟས་འཆོལ་བར་ཟོས་པའམ། །ཡང་ན་རྨ་རློན་པ་དཀྲིས་པ་མེད་པར་གཞག་པའམ། ཡང་ན་ལུས་སྣད་པར་གྱུར་པས་རླུང་འཁྲུགས་པར་གྱུར་ནས་ནད་ཁྲག་མ་
ཕྱུང་བ་འམ་མ་སྦྱངས་པར་གྱུར་པ་ལས་རྨ་བསྲུབས་ཤིང་འཚོབས་པ་ལས་ནི་ཚ་ཞིང་གཡའ་བ་དང་བཅས་པའི་རྨེན་བུར་འགྱུར་ཏེ། དེ་ནི་རྨའི་རྨེན་བུ་ཞེས་དྲང་སྲོང་དག་གིས་བཤད་དོ། །གསོར་རུང་ནད་གཞི་ཁྲག་ཚིལ་གྱུར། །ཞེས་བྱ་བ་ལ། རྨེན་བུ་དེ་དག་ལས་
གསོར་རུང་བ་ནི་རླུང་དང་མཁྲིས་པ་དང་བད་ཀན་དང་ཁྲག་དང་ཚིལ་ལས་གྱུར་པ་སྟེ། ལྔ་པོ་ཡིན་ནོ། །སྲ་ཞིང་འགྱུར་དང་སྦོམ་པ་དང་། །གནད་དང་མགུལ་པ་ལྟོར་གནས་ཡིན། །ཞེས་བྱ་བ་ལ། རྨེན་བུ་གང་སྲ་བར་འགྱུར་ཞིང་གཡའ་བ་དང་། སྦོམ་པ་ལ་སོགས་པ་
ནི་གསོར་མི་རུང་བ་ཡིན་ནོ། །མདུད་པ་ཆེར་ཆགས་ཐོར་བུ་སྟེ། །རྨེན་བུ་དེ་ཡི་མཚན་ཉིད་ཅན། །ནད་གཞི་ལ་སོགས་གྱུར་དྲུག་ཡིན། །ཕལ་ཆེར་བད་ཀན་ཚིལ་རྒྱས་ཡིན། །བརྟན་པས་སྨིན་པར་མི་འགྱུར་རོ། །ཞེས་བྱ་བ་ལ། སྔར་བཤད་པའི་རྨེན་བུ་ལས་
ཆེན་པོར་གྱུར་པ་གང་ཡིན་པ་དེ་ནི་ཐོར་བུ་ཞེས་བྱ་སྟེ། དེ་ཡང་རྨེན་བུའི་མཚན་ཉིད་དང་ལྡན་པ་ཡིན་ལ། དེ་ཡང་ནད་གཞི་ཐ་དད་པ་དང་། །ཚིལ་ལས་གྱུར་པའི་བར་རྣམ་པ་དྲུག་ཡོད་ལ། དེ་ཡང་ཕལ་ཆེར་བད་ཀན་དང་ཚིལ་རྒྱས་པ་ཡིན་པའི་ཕྱིར་དང་། བརྟན་ཞིང་སྲ་
བས་སྨིན་པར་མི་འགྱུར་རོ། །རྩ་ལ་གནས་པའི་ཁྲག་ནད་ཀྱིས། །འཁུམས་པའི་རྗེས་ལ་གནོད་འགྱུར་ཞིང་། །སྨིན་པ་དེ་ཚེ་རྒྱར་པར་འགྱུར། །ཤ་ཡི་གོང་པོ་བཅས་པར་འགྱུར། །ཤ་ཡི་མྱུ་གུས་ཁྱབ་གྱུར་ཞིང་། །སྐྱེས་པ་དེ་ལས་ནད་ཁྲག་ནི། །རྒྱུན་མི་ཆད་
เล่ม ๒๐๒ · หน้า 232a
པར་མང་དུ་འཛག །དེ་ནི་ཁྲག་གི་ཐོར་བུ་ཡིན། །ཞེས་བྱ་བ་ལ། རྩ་ལ་གནས་པའི་ཁྲག་ནི་ནད་ཁྲག་རླུང་ལ་སོགས་པའི་ནད་ཀྱིས་འཁུམས་པར་གྱུར་པ་ན་ཁྲག་དེ་རྒྱས་པར་འགྱུར་ལ། ཤའི་གོང་པོ་རིལ་པོ་དང་བཅས་པར་འགྱུར་བ་དང་། ཤའི་མྱུ་
གུས་ཁྱབ་ཅིང་དེ་འཕེལ་བར་གྱུར་པ་ལས་ཁྲག་གི་རྒྱུན་མང་པོ་རྒྱུན་དུ་འཛག་པ་ཡིན་ཏེ། །དེ་ནི་ཁྲག་གི་ཐོར་བུ་ཞེས་བྱའོ། །དེ་ལས་ཤ་ཁྲག་ལས་གྱུར་སྤང་། །བཞི་བོ་གཞན་དག་གསོ་བར་བྱ། །ཞེས་བྱ་བ་ལ། ཐོར་བུ་དེ་དག་གི་ནང་ནས་ཁྲག་དང་ཤ་ལས་གྱུར་པའི་ཐོར་བུ་
གཉིས་པོ་ནི་སྤང་བར་བྱ་ལ། རླུང་ལས་གྱུར་པ་ལ་སོགས་པ་བཞི་པོ་ནི་གསོ་བར་བྱའོ། །དང་པོར་ཆུ་སོར་གནས་པའམ། །རོ་སྨད་ལ་བརྟེན་བད་ཀན་རྒྱས། །ཤ་ཁྲག་ནད་ཀྱིས་རྐང་པར་ནི། །དུས་སུ་སྐྲངས་པར་བྱེད་འགྱུར་ཞིང་། །རིམ་གྱིས་སྟུག་པོ་ཉེད་དུ་འགྱུར། །དེ་ནི་
རྐང་བམ་ཞེས་བྱའོ། །ཞེས་བྱ་བ་ལ། བད་ཀན་གྱི་ཤས་ཆེ་བའི་ནད་དང་པོར་ཆུ་སོ་འམ་རོ་སྨད་གང་ཡང་རུང་བ་ལ་གནས་ནས་ཤ་དང་ཁྲག་ལ་བརྟེན་ཏེ། དེ་ལྟ་བུའི་ནད་དེ་རིམ་གྱིས་སྐྲང་ཞིང་རྐང་པའི་བར་དུ་འབྱེར་བ་འམ། རྐང་པ་འབའ་ཞིག་སྐྲང་པར་བྱེད་པ་དེ་ནི་རྐང་བམ་ཞེས་
བྱའོ། །རླུང་གྱུར་གས་ཤིང་གནག་པ་དང་། །རྒྱུ་མེད་ན་ཞིང་རྩུབ་ཅིང་ན། །ཞེས་བྱ་བ་ལ། རླུང་ལས་གྱུར་པའི་རྐང་བམ་ནི་རྐང་པ་གས་པར་བྱེད་པ་དང་། མདོག་གནག་པ་ལ་སོགས་པ་ཡིན་ནོ། །མཁྲིས་པ་ལས་གྱུར་སེར་བ་དང་། །ཚ་དང་རིམས་ཀྱིས་འདེབས་པ་
ཡིན། །ཞེས་བྱ་བ་ལ། མཁྲིས་པ་ལས་གྱུར་པའི་རྐང་བམ་ནི་ཚ་བ་མདོག་སེར་བ་ལ་སོགས་པ་ཡིན་ནོ། །བད་ཀན་སྣུམ་ལྕི་ནད་ཚབས་ཆུང་། །ཤ་ཡི་འཛེར་པ་ཆེན་པོས་ཁྱབ། །ཅེས་བྱ་བ་ལ། བད་ཀན་ལས་གྱུར་པའི་རྐང་བམ་ནི་སྣུམ་པོ་དང་ལྕི་བ་ལ་སོགས་པ་ཡིན་ནོ། །
དེ་ནི་མང་དུ་འཛག་པ་དང་། །ལོ་གཅིག་འདས་པ་སྤང་བར་བྱ། །ཞེས་བྱ་བ་ལ། རྐང་བམ་གྱི་ནད་དེ་ནི་ཆུ་སེར་མང་དུ་འཛག་པ་དང་། ལོ་གཅིག་ལོན་པའི་རྙིང་བ་སྦང་བར་བྱའོ། །ཁ་ཅིག་ལག་པ་སྣ་དང་མཆུ། །རྣ་བ་རྐང་པ་ལྟར་འབྱུང་གཟེར། །རྐང་བམ་སྐྱེས་
เล่ม ๒๐๒ · หน้า 232b
པར་གྱུར་པ་དེ། །རླན་ཅན་གནས་སུ་མི་བཟད་སྐྱེ། །ཞེས་བྱ་བ་ལ། དྲང་སོང་ལ་ལ་ལ་ནི་ལག་པ་གཉིས་དང་སྣ་དང་མཆུ་དང་རྣ་བ་བ་དང་རྐང་པ་དང་འདྲ་བར་རྐང་བམ་འབྱུང་བར་འགྱུར་རོ་ཞེས་ཟེར་ལ། རྐང་བམ་གྱི་ནད་དེ་ནི་རླན་གྱི་གནས་སུ་ཡང་དང་ཡང་དུ་ཤས་ཆེར་སྐྱེ་བར་འགྱུར་
རོ། །ནད་ནི་ཚིལ་མགྲིན་མཇིང་བ་མིག །མཆན་ཁུང་ཆུ་སོར་གནས་པ་དག། །མདོག་འདྲ་སྲ་ཞིང་སྣུམ་པ་དང་། །བར་ཏ་སྐྱུ་རུ་ར་འདྲ་དང་། །གཏིང་ཟུག་འབྲས་ནི་ཆེར་འབྱུང་བ། །རིང་ཞིག་ལོན་ན་སྨིན་པར་བྱེད། །ཅེས་བྱ་བ་ལ། རླུང་ལ་སོགས་པའི་ནད་ཚིལ་ལ་
གནས་ཤིང་མགྲིན་པ་དང་མཇིང་པ་ལ་སོགས་པར་བརྟེན་པ་དག་ནི་མདོག་འདྲ་ཞིང་སྲ་བ་ལ་སོགས་པའི་མཚན་ཉིད་དང་ལྡན་པ་པར་ཏ་ཀ་འམ། སྐྱུ་རུ་ར་འདྲ་བ་གཏིང་ཟུག་ཅིང་ནང་དུ་ཆུད་པའི་འབྲས་ཆེན་པོ་འབྱུང་ཞིང་དུས་ཡུན་རིང་ཞིང་ལོན་ན་སྨིན་པར་བྱེད་པ་ཡིན་ནོ། །དེ་ལས་ཁ་
ཅིག་ནད་མེད་སྨིན། །ཁ་ཅིག་འཛག་དང་གཡའ་བ་ཡིན། །ཁ་ཅིག་སྐམ་ཞིང་ཁ་ཅིག་སྐྱེ། །ཡུན་རིང་དུ་ནི་གནས་པར་བྱེད། །དཱུར་བ་བཞིན་དུ་འབྲི་ཞིང་འཕེལ། །འབྲུམ་ཆེན་འབྲས་ཕྲེང་ཞེས་བྱའོ། །ཞེས་བྱ་བ་ལ། འབྲས་ཀྱི་ནད་དེ་ཁ་ཅིག་ནི་ནད་ཆེན་པོ་མེད་པར་སྨིན་
པར་གྱུར་ལ། །ཁ་ཅིག་ནི་གཡའ་བར་བྱེད་པ་ཡིན་ལ། ཁ་ཅིག་ནི་སྐམ་ཞིང་འཛག །ཁ་ཅིག་ནི་སྐྱེ་ཞིང་འབྱུང་བར་བྱེད་དེ། དེ་དག་ཀྱང་ཡུན་རིང་དུ་གནས་པར་བྱེད་པ་དང་། རྩ་དཱུར་བ་དང་འདྲ་བར་འཕེལ་ཞིང་རྒྱས་པར་བྱེད་དེ། ཇི་ལྟར་དཱུར་བ་ནི་འབྲི་བར་གྱུར་ནས་སླར་འཕེལ་
བར་འགྱུར་ཏེ། འབྲས་ཀྱི་ཕྲེང་པ་ཡང་དེ་དང་འདྲའོ། །དེ་འབྲུམ་ཆེན་དང་འབྲས་ཀྱི་ཕྲེང་བ་ཞེས་བྱ་བ་སྟེ། མིང་གཉིས་ཐོབ་པར་འགྱུར་བ་ཡིན་ནོ། །དེ་ནི་རིམས་བཅས་སྐྱུགས་པ་དང་། །ཆམ་ལུད་རྩིབ་ལོགས་ཟུག་པ་སྤང་། །ཞེས་བྱ་བ་ལ། འབྲས་ཀྱི་ཕྲེང་བ་དེ་རིམས་
ལ་སོགས་པའི་བླ་བརྣན་དང་བཅས་པ་སྤང་བར་བྱའོ། །རྨ་ལ་མི་འཕྲོད་བསྟེན་པ་ཡིས། །སྐྲང་དང་སྨིན་པ་ཁྱད་པར་མེད། །ཤ་སོགས་ནང་དུ་རྣག་ཞུགས་འགྱུར། །རིང་དུ་འགྲོ་བར་བྱེད་པ་ཡིན། །དེ་ནི་རིང་དུ་འགྲོ་བས་འགྲོ། །སྦུབས་ལྟར་འཛག་པ་སྦུ་གུ་ཡིན། །ཞེས་བྱ་བ་ལ། །
เล่ม ๒๐๒ · หน้า 233a
སྨིན་པ་དང་མ་སྨིན་པ་ཁྱད་པར་རྨ་ལ་མི་འཕྲོད་པ་བསྟེན་པར་གྱུར་བས་ཤ་ལ་སོགས་པའི་ནང་དུ་རྣག་ཞུགས་པར་གྱུར་ཅིང་རིང་དུ་ཕུག་ཅིང་འགྲོ་བར་བྱེད་པ་ཡིན། དེའི་རིང་དུ་འགྲོ་བས་ན་མིང་བ་ཞེས་བྱ་ལ། དེ་བཞིན་དུ་སྦུ་གུ་ལྟར་འཛག་པས་ན་སྦུ་གུ་
ཞེས་བྱའོ། །དྲང་པོ་སྦུ་གུ་གཅིག་ཡིན་ཏེ། །དེ་ཉིད་སྣ་ཚོགས་འགྲོ་བས་འགྲོ། །ཞེས་བྱ་བ་ལ། སློབ་དཔོན་གཞན་དག་གི་གཞུང་གིས་ནི་དྲང་པོར་འདུག་པ་ལ་ནི་སྦུ་གུ་གཅིག་པ་ཞེས་བྱ་བ་ལ་དེ་ཉེད་སྣ་ཚོགས་སུ་འགྲོ་ཞེས་བྱའོ། །དེ་ནི་ནད་གཞི་རེ་རེ་འདུས། །ཟུག་རྔུའི་རྒྱུས་
འབྱུང་ལྔར་འགྱུར་རོ། །ཞེས་བྱ་བ་ལ། སྦུ་གུ་འདྲ་བ་དེ་ནི་ནད་གཞི་རེ་རེ་ལས་གྱུར་པ་དང་། འདུས་པ་ལས་གྱུར་པ་དང་། ཟུག་རྔུས་ཟུག་པར་གྱུར་པ་སྟེ། རྣམ་པ་ལྔར་འགྱུར་རོ། །རླུང་གྱུར་ནད་བཅས་རྨ་སྒོ་སྲ། །མདོག་མི་སྡུག་ཅིང་ལྦུ་བ་འཛག །ནུང་མོ་ལྷག་པར་འཛག་
པ་དང་། །ཞེས་བྱ་བ་ལ། རླུང་ལས་གྱུར་པའི་སྦུ་གུ་ནི་ནད་དང་བཅས་བ་ལ་སོགས་པ་ཡིན་ནོ། །མཁྲིས་གྱུར་སྐོམ་ཚ་རིམས་གྱིས་འདེབས། །སེར་དྲོ་རྣག་ནི་དྲི་མནམ་འཛག །ཉིན་པར་ལྷག་པར་འཛག་པ་ཡིན། །ཞེས་བྱ་བ་ལ། མཁྲིས་པ་ལས་གྱུར་བ་ནི་སྐོམ་ནད་ཆེ་བ་
དང་། ཚ་བ་ལ་སོགས་པ་ལྡན་པ་ཡིན་ནོ། །བད་ཀན་སྐ་ཞིང་སྦྱི་བག་འཛག །གཡའ་ཞིང་སྲ་བར་གྱུར་པ་དང་། །མཚན་མོ་ལྷག་པར་འཛག་པ་ཡིན། །ཞེས་བྱ་བ་ལ། །བད་ཀན་ལས་གྱུར་པ་ནི་སྐ་ཞིང་སྤྱི་བག་འཛག་པ་ལ་སོགས་པའི་མཚན་ཉིད་ཅན་ཡིན་ནོ། །འདུས་
གྱུར་མཚན་མ་ཀུན་ལྡན་སྤང་། །ཞེས་བྱ་བ་ལ། འདུས་པ་ལས་གྱུར་པ་ནི་ནད་གཞི་སུམ་ཆར་གྱི་མཚན་ཉིད་དང་ལྡན་པ་ཡིན་ཏེ། དེ་ནི་གསོར་མི་རུང་བས་སྤང་བར་བྱ་བ་ཡིན་ནོ། །ནང་ན་གནས་པའི་ཟུག་རྔུ་མ་ཕྱུང་ཞིང་། །སྦུ་གུ་སྐྱེད་པར་བྱེད་པ་གང་ཡིན་དེ། །ལྦུ་བ་
ཅན་ལ་སླ་ཞིང་དྲོ་བ་དང་། །ཁྲག་བཅས་རྣག་ནི་ནད་བཅས་རྟག་ཏུ་འབྱུང་། །ཞེས་བྱ་བ་ལ། རྨའི་ནང་ན་གནས་པའི་ཟུག་རྔུ་མ་ཕྱུང་ན་རྨའི་སྦུ་གུ་སྐྱེད་པར་བྱེད་དེ། སྦུ་གུ་དེ་ནི་ནད་པ་དེ་ལྦུ་ཅན་གྱི་རྣག་སླ་ཞིང་དྲོ་བ་དང་ཁྲག་དང་བཅས་པ་དང་། ནད་སྐྱེད་པར་བྱེད་པ་རྟག་ཏུ་འབྱུང་
เล่ม ๒๐๒ · หน้า 233b
བ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་དགུ་པའི་རྣམ་པར་འགྲེལ་པའོ།། །།དེ་ནས་རྨེན་བུ་ལ་སོགས་པའི་
ནད་གསོ་བ་བཤད་པར་བྱའོ། །རྨེན་བུ་མ་སྨིན་པ་ལ་ནི། །རང་རང་སྐྲག་པའི་ནད་ལྟར་གསོ། །ཞེས་བྱ་བ་ལ། རྨེན་བུ་མ་སྨིན་ཞིང་རྣགས་པར་མ་གྱུར་པ་ལ་ནི་སྐྲངས་པའི་ནད་ཇི་ལྟར་གསོ་བ་དེ་བཞིན་དུ་གསོ་བར་བྱའོ། །ཀ་ཎྜ་ཀའི་བྲི་ཧ་ཏི། །ཙི་ཏྲ་ཀ་དང་པི་པི་ལིང་། །
བསྐོལ་བའི་མར་གྱིས་ལུས་སྦྱང་བར། །འདོད་པ་དག་གིས་སྣུམ་ཆོས་བྱ། །སྦྱང་བྱས་སྨན་རྣོན་ལྡེ་གུས་བསྐུ། །ཞེས་བྱ་བ་ལ། རྨེན་བུའི་ནད་སྦྱོང་བར་བྱེད་པར་འདོད་པས་ནི། ཀཎྜ་ཀ་རི་ལ་སོགས་པའི་སྨན་མར་གྱིས་སྣུམ་ཆོས་བྱས་ལ། བཀྲུ་སྨན་དང་སྐྱུག་སྨན་གྱིས་
སྦྱང་བར་བྱས་ཏེ། དེའི་འོག་ཏུ་སྨན་རྣོན་པོའི་ལྡེ་གུས་བསྐུ་བར་བྱའོ། །རྨེན་བུ་ལན་མང་དུགས་བྱས་ཏེ། །ཡང་དང་ཡང་དུ་མཉེ་བར་བྱ། །ཞེས་བྱ་བ་ལ། ཡང་རྨེན་བུ་ལ་དུགས་མང་དུ་བྱས་ཏེ་སོར་མོ་ལ་སོགས་པས་ཡང་དང་ཡང་དུ་མཉེ་བར་བྱའོ། །འདི་ནི་མཆོག་ཏུ་རླུང་
ལ་བྱ། །ཞེས་བྱ་བ་ལ། བཤད་མ་ཐག་པའི་ཆོ་ག་འདི་དག་ནི་མཆོག་ཏུ་ཡང་རླུང་ལས་གྱུར་པ་ལ་བྱའོ། །ཁྲག་དང་མཁྲིས་པ་ལས་གྱུར་པའང་། །གཏར་ག་བསིལ་བའི་སྦྱོར་ཀུན་བྱ། །ཞེས་བྱ་བ་ལ། ཁྲག་ལས་གྱུར་པ་དང་མཁྲིས་པ་ལས་གྱུར་པའི་རྨེན་བུ་ལ་ནི་གཏར་
གའི་སྦྱོར་བ་དང་། བསིལ་སྨན་གྱིས་བསྐུ་བ་དང་། །སྨན་ཆུ་བླུགས་པ་ལ་སོགས་པའི་སྦྱོར་བ་བྱའོ། །བད་ཀན་ལས་གྱུར་རླུང་ལྟར་གསོ། །ཞེས་བྱ་བ་ལ། བད་ཀན་ལས་གྱུར་པའི་རྨེན་བུ་ལ་ནི་རླུང་ལས་གྱུར་པའི་གསོ་བ་ཇི་སྐད་སྨོས་པ་བྱའོ། །འོན་ཀྱང་སྨིན་ན་དེ་བཅད་
དེ། །ཁྲག་ཡོད་པ་ནི་མེས་བསྲེག་བྱ། །ཞེས་བྱ་བ་ལ། དེ་ལྟར་གསོ་བ་བྱས་སུ་ཟིན་ཀྱང་། སྨིན་པར་གྱུར་ན་རྨེན་བུ་གཅད་ཅིང་གཤགས་ལ་ཁྲག་ཡོད་པའི་རྗེས་སུ་མེས་བསྲེག་པར་བྱའོ། །མ་ལུས་པར་བཅད་ལུས་གྱུར་ན། །སླར་ཡང་འཕེལ་བར་བྱེད་པར་འགྱུར། །
เล่ม ๒๐๒ · หน้า 234a
ཞེས་བྱ་བ་ལ། དེ་བཅད་པ་ན་མ་ལུས་པར་གཅད་པར་བྱ་སྟེ། །ལུས་ན་སླར་འཕེལ་བའི་སྐྱོན་ཡོད་པའི་ཕྱིར་རོ། །ཤ་ཡི་རྨ་ལས་གྱུར་རྨེན་བུ། །དེ་བཞིན་འཚོ་བ་ཙམ་དུ་བྱ། །ཞེས་བྱ་བ་ལ། ཤའི་རྨེན་བུ་ནི་གོང་དུ་བཤད་པ་བཞིན་དུ་གསོས་
ལ་རེ་ཞིག་འཚོ་བ་ཙམ་དུ་བྱའོ། །ཚིལ་ལས་གྱུར་པའང་འདི་ཉིད་དང་། །ཏིལ་དང་འོ་མའི་ལྡེ་གུས་བསྐུ། །རས་ནི་ཉིས་རིམ་དག་གིས་དཀྲི། །ཏོག་ལྕགས་ལ་སོགས་བསྲེགས་པས་བསྲོ། །ཞེས་བྱ་བ་ལ། ཚིལ་ལས་གྱུར་པའི་རྨེན་བུ་ལ་ནི་ཚིལ་ལས་གྱུར་པའི་
གསོ་བ་འདི་ཉིད་དང་། ཏིལ་དང་འོ་མའི་ལྡེ་གུས་བསྐུས་ལ་རས་ཉིས་རིམ་གྱིས་དཀྲིས་ཏེ་ཏོག་ལྕགས་ལ་སོགས་པ་བསྲེགས་པས་བསྲོ་བར་བྱའོ། །ཡང་ན་མཚོན་གྱིས་དབྲལ་ནས་ནི། །ཚིལ་ཕྱུང་ནས་ནི་ལེགས་པར་བསྲེག །ཅེས་བྱ་བ་ལ། ཡང་ན་ཚིལ་ལས་གྱུར་
བའི་རྨེན་བུ་གཙགས་བུས་དབྲལ་ལ། ཚིལ་ཕྱུང་སྟེ་བསྲེག་པར་བྱའོ། །རྩ་ཡི་ཐོར་བུ་སར་བ་ལ། །ས་ཧ་ར་ཛའི་ཏིལ་མར་བླུད། །རླུང་འཇོམས་སྨན་གྱིས་དཀྲི་དུགས་བྱ། །འཇམ་རྩི་དང་ནི་གཏར་ག་བྱ། །ཞེས་བྱ་བ་ལ། རྩའི་ཐོར་བུ་ལ་ནི་ས་ཧ་ར་ཛ་དང་
བསྐོལ་བའི་ཏིལ་མར་བླུག་པར་བྱའོ། །ཡང་ན་དེ་ལ་རླུང་སེལ་བའི་སྨན་གྱིས་དཀྲི་བའི་དུགས་ལ་སོགས་པ་བྱའོ། །ཐོར་བུ་རྨེན་བུ་ལྟ་བུར་ནི། །རང་གི་ཇི་བཞིན་བྱས་རབ་ཕན། །ཞེས་བྱ་བ་ལ། ཐོར་བུའི་ནད་ལ་ནི་རྨེན་བུ་རླུང་ལས་གྱུར་པ་ལ་སོགས་པ་ཇི་ལྟར་གསོ་
བ་བཞིན་དུ་ཐོར་བུ་ཡང་དེ་ལྟར་གསོ་བར་བྱའོ། །རྐང་བམ་རླུང་གྱུར་འཕེལ་བ་ལ། །སྣུམ་ཞིང་དུགས་བཅས་དཀྲི་བ་དང་། །ལོང་མོའི་སོར་གཉིས་གོང་དུ་ནི། །གཏར་ག་གདབ་པར་བྱ་བ་དང་། །ཨེརཎྜའི་མར་འོ་མ་དང་། །བ་གཅིན་སྦྱར་བཟླ་གཅིག་བླུད། །ཅེས་བྱ་བ་ལ། །
རླུང་ལས་གྱུར་པའི་རྐང་བམ་ལ་ནི་སྣུམ་ཆོས་ལ་སོགས་པ་བྱས་ཏེ། ལོང་མོའི་གོང་དུ་སོར་གཉིས་གཞལ་བར་གཏར་ག་གདབ་པར་བྱ་ཞིང་། ཨེ་རཎྜའི་མར་ལ་སོགས་པ་སྦྱར་ལ་ཟླ་བ་གཅིག་གི་བར་དུ་བླུད་པར་བྱའོ། །ཞུ་ནས་འབྲུ་རྙིང་བཅའ་སྒ་དང་། །འོ་མ་དང་སྦྱར་ཁ་ཟས་
เล่ม ๒๐๒ · หน้า 234b
སྦྱིན། །ཞེས་བྱ་བ་ལ། ཨེ་རཎྜའི་མར་དེ་ཞུ་ནས་འབྲས་རྙིང་པའི་ཆན་་བཅའ་སྒ་དང་འོ་མ་དང་སྦྱར་བ་སྦྱིན་པར་བྱའོ། །དེ་བཞིན་དུར་བྱིད་འོ་མ་བླུད། །ཅེས་བྱ་བ་ལ། ཡང་ན་རླུང་ལས་གྱུར་པའི་རྐང་བམ་ལ་ནི་དུར་བྱིད་དང་འོ་མ་བསྐོལ་བ་བླུད་པར་བྱའོ། །དེས་མ་ཞི་ན་མེས་
བསྲེག་བྱ། །ཞེས་བྱ་བ་ལ། དེ་ལྟར་བྱས་སུ་ཟིན་ཀྱང་སོས་བར་མ་གྱུར་ན་རྐང་བམ་དེ་མེས་བསྲེག་པར་བྱའོ། །མཁྲིས་གྱུར་ལོང་མོའི་འོག་དུ་ནི། །ཁྲག་དབྱུང་མཁྲིས་པ་སེལ་ཀུན་སྦྱར། །ཞེས་བྱ་བ་ལ། མཁྲིས་པ་ལས་གྱུར་པའི་རྐང་བམ་ལ་ནི་ལོང་མོའི་འོག་ཏུ་གཏར་ག་
བྱ་བ་དང་། དེ་བཞིན་དུ་མཁྲིས་པ་སེལ་བའི་ཟས་དང་སྨན་ལ་སོགས་པ་ཐམས་ཅད་སྦྱར་བར་བྱའོ། །བད་ཀན་ལས་གྱུར་མཐེ་བོ་ལས། །ཁྲག་གཏང་ནས་ཀྱི་ཁ་ཟས་ནི། །སྦྲང་རྩི་བཅས་པའི་སྨན་ཁུ་བླུད། །འཕེལ་བའི་ཚེ་ན་པི་པི་ལིང་། །ཨ་རུ་ར་ནི་བསྟེན་པར་བྱ། །
ཞེས་བྱ་བ་ལ། བད་ཀན་ལས་གྱུར་པའི་རྐང་བམ་ལ་ནི་རྐང་པའི་མཐེ་བོ་ལས་ཁྲག་གཏང་བ་དང་། ཁ་ཟས་སྦྲང་རྩི་དང་བཟའ་ཞིང་སྨན་གྱི་ཁུ་བ་བླུད་པ་དང་། །འཕེལ་བའི་ཚེ་ན་པི་པི་ལིང་ལ་སོགས་པ་བཟའ་བར་བྱའོ། །ཡུངས་ཀར་བྲི་ཧ་ཏི་གཉིས་ཀྱི། །རྩ་བའི་ལྡེ་གུས་
བྱུག་པར་བྱ། །ཞེས་བྱ་བ་ལ། ཡང་བད་ཀན་ལས་གྱུར་པའི་རྐང་བམ་ལ་ཡང་ཡུངས་ཀར་དང་། །བྲི་ཧ་ཏིའི་རྩ་བའི་ལྡེ་གུས་བྱུག་པར་བྱའོ། །ཡང་ན་འུ་སུའི་ལྡེ་གུས་བྱུག །ཅེས་བྱ་བ་ལ། ཡང་ན་འུ་སུའི་འབྲས་བུའི་ལྡེ་གུས་བསྐུ་བྱའོ། །འབྲས་ཀྱི་ཕྲེང་བ་སྟེང་
འོག་ནས། །སྦྱང་ཞིང་དན་ད་ཏྲ་བ་ན་ཏི། །དུར་བྱིད་ཀོ་ཤ་ཏ་ཀི་དང་། །དེ་བ་ཏ་ལའི་མར་བསྐོལ་བླུད། །ཅེས་བྱ་བ་ལ། འབྲས་ཀྱི་ཕྲེང་བ་ཞེས་བྱ་བའི་ནད་ལ་ནི་བཀྲུ་སྨན་དང་སྐྱུགས་སྨན་གཏང་བ་དང་། །དན་ད་ལ་སོགས་པ་དང་བསྐོལ་བའི་མར་བླུད་པར་བྱའོ། །བད་ཀན་
ཚིལ་ནི་འཇོམས་པ་ཡི། །དུད་པས་མཁུར་བཀང་སྣ་སྨན་གཏང་། །ཞེས་བྱ་བ་ལ། ཡང་ན་འབྲས་ཀྱི་ཕྲེང་བ་ལ་སྦྱོར་བ་འདི་དག་བྱས་ན་ཡང་ཕན་ནོ། །གཏར་གས་ཁྲག་ནི་དབྱུང་བ་དང་། །སྐྱེར་པའི་ཁཎྜ་གཅིན་ཡང་བླུད། །ཅེས་བྱ་བ་ལ། ཡང་ན་འབྲས་ཀྱི་ཕྲེང་བ་
เล่ม ๒๐๒ · หน้า 235a
ལ་གཏར་ག་ལ་སོགས་པའི་སྦྱོར་བ་བྱའོ། །རྨེན་བུ་མ་སྨིན་པ་ལ་ནི། །རྒྱམ་ཚ་བཅའ་སྒ་ན་ཀུ་ལི། །བསྐུ་ཞིང་སྲ་བར་རྒྱམ་ཚ་ཡི། །ཐུམ་བུས་དུགས་བྱས་མཉེ་བར་བྱ། །ཞེས་བྱ་བ་ལ། རྨེན་བུ་མ་སྨིན་པ་ལ། །རྒྱམ་ཚ་ལ་སོགས་པ་བསྐུ་བར་བྱའོ། །
སྲ་བ་ལ་ནི་རྒྱམ་ཚ་གཏུམས་པའི་ཐུམ་བུས་མཉེ་བར་བྱའོ། །ཤ་མི་ལ་ཕུག་ཤི་ཀྲུ་ཡི། །ས་བོན་ནས་དང་ཡུངས་ཀར་བཅས། །དར་བ་སྐྱུར་པོ་བཏགས་བསྐུས་ན། །རྨེན་བུའི་མདུན་པ་ཞི་བར་བྱེད། །ཅེས་བྱ་བ་ལ། ཡང་ཤ་མི་ལ་སོགས་པའི་ལྡེ་གུས་བསྐུས་ན་རྨེན་བུའི་འདུད་
པ་ཆགས་པ་ཞི་བར་འགྱུར་རོ། །སྨིན་པར་འཁྲིགས་ན་ཁྲག་འབྱུང་ཞིང་། །བད་ཀན་མཁྲིས་པ་སེལ་བས་གསོ། །ཞེས་བྱ་བ་ལ། རྨེན་བུ་སྨིན་པར་བསྐྱོད་པ་ལ་ནི་གཏར་ག་གདབ་པ་ལ་སོགས་པ་བྱའོ། །མ་སྨིན་པ་ནི་ཕྱུང་ནས་ཀྱང་། །ཐལ་སྨན་མེ་བཙས་གསོ་བར་བྱ། །
ཞེས་བྱ་བ་ལ། རྨེན་བུ་མ་སྨིན་པ་ནི་རྩ་ནས་ཕྱུང་སྟེ་ཐལ་སྨན་གདབ་པ་དང་། མེ་བཙའ་གདབ་པས་གསོ་བར་བྱའོ། །ཛོ་ཏི་ཤྨ་ཏི་ལངྒ་ཡི། །ཤུ་ཀ་ན་སའི་འབྲས་བུ་དང་། །ཀ་ཀ་ཏི་ག་ཏ་ཀ་རྐོ་ཊི། །དེ་བ་ཏ་ལའི་ས་བོན་དང་། །བི་ཤ་ལྱ་དང་ནི་རྒུན་ཐི། །ཀོ་ཤ་ཏ་ཀི་པ་ཐ་རྣམས། །
སྲང་ནི་ཕྱེད་ཕྱེད་དུག་ཞོ་གཉིས། །ཀ་རཉྫའི་མར་བྲེ་གང་དང་། །ནི་རྒུན་ཐི་ཡི་ཁུ་བ་ནི། །བྲེ་བཞི་བསྐོལ་བར་གྱུར་པ་འདིའི། །བཏུང་དང་བསྐུ་བྱུག་སྣར་བཏང་ན། །འབྲས་ཀྱི་ཕྲེང་བ་གསོར་མི་རུང་། །ཡུན་རིང་ལོན་ཞིང་རྣག་འཛག་སེལ། །ཞེས་བྱ་བ་ལ། ཛོ་ཏི་ཤྨ་ཏི་ནི་ཀ་ཏ་ནའོ། །
ལང་ག་ལི་ནི་པི་ཤ་ལྱའོ། །ཤུ་ཀ་ནས་ནི་ན་ཧི་ཀའོ། །ཀ་ཀ་ཏིག་ཏ་ནི་ཨུ་དུམ་དི་ཀའོ། །དེ་བ་ཏ་ལ་ནི་ཇི་མུ་ད་ཀའོ། །ཀོ་ཤ་ཏ་ཀི་ནི་ཀྲི་ཏ་བེ་ད་ནེའོ། །སྨན་དེ་དག་སྲང་ཕྱེད་ཕྱེད་དང་དུག་ལས་ཞོ་གཉིས་དང་སྦྱར་ལ། །ཀ་རཉྫའི་མར་བྲེ་གང་དང་ནི་རྒུན་ཐིའི་ཁུ་བ་བྲེ་བཞི་བསྐོལ་
བར་གྱུར་པའི་མར་འདི་བཏུང་པ་ལ་སོགས་པ་བཏང་ན་འབྲས་ཀྱི་ཕྲེང་བ་ལ་སོགས་པ་སེལ་བར་འགྱུར་རོ། །ལངྒ་ལི་ཡི་སྡོང་བུ་ཡི། །ལྡེ་གུ་ཏིལ་མར་དེ་བཞི་འགྱུར། །ནི་རྒུན་ཐི་ཡི་ཁུ་བར་བསྐོལ། །སྣ་སྨན་སོགས་བཏང་འབྲས་ཕྲེང་སེལ། །ཞེས་བྱ་བ་ལ། ལངྒ་ལིའི་སྡོང་
เล่ม ๒๐๒ · หน้า 235b
བུའི་ལྡེ་གུ་ཏིལ་མར་གྱི་བཞི་ཆ་དང་། ནི་རྒུན་ཐིའི་ཁུ་བ་ཏིལ་མར་གྱི་བཞི་འགྱུར་དང་བསྐོལ་ཏེ་སྣ་སྨན་ལ་སོགས་པར་བཏང་ན་འབྲས་ཀྱི་ཕྲེང་བ་སེལ་བར་བྱེད་དོ། །ཙནྡན་ཐང་ཤིང་ན་ལེ་ཤམ། །དུར་བྱེད་གླ་སྒང་སེར་པོ་གཉིས། །སྲང་རེ་དུག་ནི་སྲང་ཕྱེད་དང་། །བ་གཅིན་
སྦྱར་ཏེ་ཞིབ་ཏུ་བཏགས། །བྲ་མྷིའི་ཁུ་བ་ཨ་རྐ་ཡི། །ལོ་མ་བ་ལང་ལྕི་ཁུར་བཅས། །ཡུངས་མར་བྲེ་གང་བཅས་བསྐོལ་བ། །བཏུང་བ་ལ་སོགས་པར་བསྟེན་ན། །མཛེ་དང་རྨ་ནི་འཁྱིམས་པ་དང་། །འབྲས་ཀྱི་ཕྲེང་བ་མྱུར་དུ་སེལ། །ཞེས་བྱ་བ་ལ། །ཙནྡན་དཀར་པོ་
ལ་སོགས་པ་ཇི་སྐད་སྨོས་པའི་སྦྱོར་བ་བསྐོལ་བ་བཏུང་བ་ལ་སོགས་པར་བསྟེན་ན་ཡང་མཛེ་ལ་སོགས་པ་སེལ་བར་བྱེད་དོ། །ཤུ་དག་རྒྱ་སྐྱེགས་ཨ་རུ་ར། །པུ་ཙེ་ཤེལ་དང་ཙནྡན་དང་། །ཏིལ་མར་བསྐོལ་བ་བླུད་ན་ནི། །འབྲས་ཕྲེང་རྩ་བར་བཅས་བ་སེལ། །ཞེས་བྱ་བ་ལ།
ཤུ་དག་ལ་སོགས་པའི་ལྡེ་གུ་དང་བསྐོལ་བའི་ཏིལ་མར་གྱིས་ཀྱང་འབྲས་ཀྱི་ཕྲེང་བ་སེལ་བར་བྱེད་དོ། །ཤ་ར་པུང་ཀའི་རྩ་བ་ནི། །འབྲས་ཀྱི་ཆུ་དང་བཏགས་གྱུར་པ། །སྣ་སྨན་བསྐུ་བས་འབྲུམ་བུ་དང་། །དུག་སྲིན་འབྲས་ཀྱི་ཕྲེང་བ་འཇོམས། །ཞེས་བྱ་བ་ལ། ཤ་ར་པུང་
ཀའི་རྩ་བ་ལ་སོགས་པ་སྦྱོར་བ་ཇི་སྐད་སྨོས་པ་བཞིན་དུ་བཏང་ན་ཡང་དུག་ལ་སོགས་པ་སེལ་བར་བྱེད་དོ། །ཨུ་ཏ་ད་མ་ཀ་རིའི་རྩ་བ་དང་། །པི་ལུའི་ལོ་མ་སེང་ཕྲོམ་དང་། །ས་ཧ་ར་ཛ་ཨ་རུ་ར། །ཤིང་མངར་ཤུ་ཏི་ཙི་ཏྲ་ཀ །ཐང་ཤིང་ཏིལ་མར་འོ་མ་མཉམ། །སྣ་སྨན་བསྐུ་
བྱུག་བྱས་པའང་ཕན། །ཞེས་བྱ་བ་ལ། ཨུ་ཏ་ད་མ་ཀ་རིའི་རྩ་བ་ལ་སོགས་པའི་ལྡེ་གུ་དང་ཏིལ་མར་དང་འོ་མ་ཆ་མཉམ་དུ་བྱས་ཏེ། བསྐོལ་བའི་སྦྱོར་བ་ནི་འབྲས་ཀྱི་ཕྲེང་བ་ལ་ཕན་པ་ཡིན་ནོ། །བ་ལང་ར་ལུག་རྟ་རྨིག་བསྲེགས། །ཡུངས་མར་སྦྱར་ཏེ་བསྐུ་བའམ། །ཞེས་
བྱ་བ་ལ། །བ་ལང་ལ་སོགས་པའི་རྨིག་པ་བསྲེགས་པའི་སྣག་ཚ་དང་། ཡུངས་མར་སྦྱར་ཏེ་བསྐུས་ན་ཕན་ནོ། །སྦྲུལ་ནག་བྱ་རོག་རང་ཉིད་ཤི། ཨིང་གུ་དང་ནི་སྦྱར་བ་བསྐུ། །ཞེས་བྱ་བ་ལ། ཡང་སྦྲུལ་ནག་པོ་རང་ཉིད་ཀྱིས་ཤི་བ་འམ། །བྱ་རོག་རང་ཉིད་ཤི་བ་གང་
เล่ม ๒๐๒ · หน้า 236a
ཡང་རུང་བ་བསྲེགས་པ་ཨིང་གུ་དང་སྦྱར་ཏེ་བསྐུས་ན་ཡང་ཕན་ནོ། །དེ་ལྟར་མ་ཞི་ནད་ཀྱི་ནི། །ལོགས་གཞན་བྱིན་པ་ལ་གནས་པའི། །ཆུ་སོའི་སྟེང་ངམ་འོག་ནས་ནི། །ཚིལ་ཕྱུང་ནས་ནི་མེས་བསྲེག་བྱ། །ཞེས་བྱ་བ་ལ། སྦྱོར་བ་དེ་དག་གིས་མ་ཞི་
ན་ནད་ཀྱི་ལོགས་གཞན་པ་སྟེ། གཡོན་ལོགས་སུ་ནན་གཡས་ལོགས་སུ་གནས་པོའི་ཆུ་སོའི་སྟེང་ངམ་ལོག་ནས་ཉའི་སྒོ་ངའི་ཚོགས་ལྟ་བུའི་ཚིལ་ཕྱུང་ནས་མེས་བསྲེག་པར་བྱའོ། །གྱེན་དུ་འགྲེང་བའི་རྐང་པ་གཞལ། །དེ་ཡི་ཚད་ཀྱིས་རྟིང་བ་རུ། །དེ་ལས་རྨིན་
བུ་དབྱུང་བྱ་ཞེས། །དྲང་སྲོང་མུ་ཁྱུད་ཀྱིས་བཤད་དོ། །ཞེས་བྱ་བ་ལ། སྐྱེས་བུ་གྱེན་དུ་འགྲེང་བའི་རྐང་གཞལ་ལ་དེའི་ཚད་ཀྱིས་རྟིང་པ་ནས་བྱིན་པ་གཞལ་ལ་དེ་ནས་རྨེན་བུ་དབྱུང་བར་བྱའོ་ཞེས་དྲང་སྲོང་ཆེན་པོ་མུ་ཁྱུད་ཀྱིས་བཤད་དོ། །རྟིང་པ་ནས་བཟུང་སོར་ནི་བཅུ་
གཉིས་ན། །དབང་པོའི་ཆུ་སོ་ཡོད་སྤང་ནད་ཀྱི་ནི། །གཡོན་དུ་དབྲལ་ཏེ་ཉ་སྒོང་འདྲ་དབུས་ནས། །དྲ་བ་དྲང་ཞེས་ལེགས་ཐོས་ཀྱིས་བཤད་དོ། །ཞེས་བྱ་བ་ལ། རྟིང་པ་ནས་སོར་བཅུ་གཉིས་དོར་བ་དང་དེ་བཞིན་དུ་དབང་པོའི་ཆུ་སོ་ཞེས་བྱ་བ་བྱིན་སྙིང་ཡང་དོར་ལ། ནད་ཀྱི་
ལོགས་ཅིག་ཤིས་སུ་དགྲ་ལ་ཏེ། ཉའི་སྒོང་འདྲ་བ་རིས་སུ་འདུག་པ་དབུས་ནས་དྲང་བར་བྱའོ་ཞེས་དྲང་སྲོང་ལེགས་ཐོས་ཀྱིས་བཤད་དོ། །མི་ཡི་ལོང་མོ་རྣ་བའི་བར་དུ་གཞལ། །དེ་ཡིས་བརྒྱད་པ་རྟིང་པའི་ཆ་བགོས་ཏེ། །བྱིན་སྙིང་གནད་ཀྱི་དྲང་ཐད་མ་གཏོགས་དབྲལ། །ཚིལ་
ནི་དབྱུང་བར་བྱ་ཞེས་གཞན་དག་འཆད། །ཅེས་བྱ་བ་ལ། མིའི་ལོང་མོ་ནས་རྣ་བའི་རྩེ་མོའི་བར་གཞལ་ལ་དེའི་རྟིང་པ་ནས་བརྒྱད་ཆ་དོར་ཏེ་བྱིན་སྙིང་གི་གནད་ཀྱི་དྲང་ཐད་མ་གཏོགས་པ། དེའི་ཚད་གཉིས་ཙམ་གཙགས་བུས་དབྲལ་ལ་ཚིལ་དབྱུང་བར་བྱའོ་ཞེས་དང་སྲོང་གཞན་
དག་སྨྲའོ། །རླུང་གྱུར་སྦུ་གུར་དུགས་བྱས་ལ། །དབྲལ་ཏེ་ཨ་པ་མརྒ་ཡི། །སྦུ་གུའི་ཏིལ་དང་རྒྱམ་ཚར་བཅས། །བཏགས་པའི་ལྡེ་གུས་ལེགས་པར་བསྐུ། །ཞེས་བྱ་བ་ལ། རླུང་ལས་གྱུར་པའི་སྦུ་གུའི་རྨ་ལ་ནི་དུགས་བྱས་ལ་དབྲལ་ཏེ་ཨ་པ་མརྒ་ལ་སོགས་པའི་ལྡེ་གུས་
เล่ม ๒๐๒ · หน้า 236b
བསྐུ་བར་བྱའོ། །མཁྲིས་པ་ལས་གྱུར་ཏིལ་དང་བཙོང་། །ནཱ་ག་དནྟི་སེར་པོ་གཉིས། །ཞེས་བྱ་བ་ལ། མཁྲིས་པ་ལས་གྱུར་པའི་རྨ་སྦུབས་སུ་གྱུར་པ་ལ་ནི་ཏུལ་ལ་སོགས་པའི་ལྡེ་གུས་བསྐུ་བར་བྱའོ། །བད་ཀན་ལས་གྱུར་རྒྱམ་ཚ་ཏིལ། །དན་ད་ནིམ་པ་ལན་ཚྭས་བསྐུ། །
ཞེས་བྱ་བ་ལ། བད་ཀན་ལས་གྱུར་པ་ལ་ནི་རྒྱམ་ཚ་ལ་སོགས་པའི་སྨན་བཏགས་པའི་ལྡེ་གུས་བསྐུ་བར་བྱའོ། །ཟུག་རྔུ་ལས་བྱུང་དབྲལ་ཏེ་དབྱུང་། །ཏིལ་དང་མར་དང་སྦྲང་རྩིས་བསྐུ། །ཞེས་བྱ་བ་ལ། ཟུག་རྔུ་ལས་གྱུར་པའི་རྨ་འཁྱིམས་པ་ལ་ནི་དབྲལ་ཏེ་ཟུག་རྔུ་ཕྱུང་ལ་ཏིལ་
དང་མར་དང་སྦྲང་རྩིའི་ལྡེ་གུས་བསྐུ་བར་བྱའོ། །མཚོན་དབྲལ་མི་རུང་ཆུ་ཚོད་ཀྱིས། །ལེགས་པར་བཙལ་ཏེ་ནང་དུ་དབུག །ཐལ་སྨན་ལ་སྦངས་སྐུད་པ་ཡིས། །རྨ་ཚོལ་ཁ་ནི་ཤས་ཆེར་དྲལ། །ཞེས་བྱ་བ་ལ། མཚོན་གྱིས་དབྲལ་དུ་མི་རུང་བའི་རྨ་འཁྱིམས་པ་ལ་ནི་ཆུ་
ཚོད་ཀྱིས་རྨ་ལེགས་པར་བཙལ་ཏེ་ནང་ནས་ཕུག་ལ་ཐལ་སྨན་ལ་སྦངས་པའི་སྐུད་པས་རྨ་ཚོལ་གྱིས་བཙལ་པའི་ཁ་དེ་ཤས་ཆར་བསྐྱེད་པར་བྱའོ། །རྨ་རེད་ཁ་ནི་དོག་པ་དང་། །ཕུགས་རིང་ལ་ཡང་སྦྱར་བར་བྱ། །རེང་བུ་གང་དང་ཏིལ་མར་གང་། །དེ་ནི་རྨ་འཁྱིམས་ལ་ཡང་
བསྔགས། །ཞེས་བྱ་བ་ལ། རྨ་རིད་ཅིང་ཁ་ཕྲ་བ་ལ་སོགས་པ་ལ་རྨ་ལ་ཕན་པར་བཤད་པའི་ཏིལ་མར་དང་རེང་བུ་གང་དག་ཡིན་པ་དེ་འཁྱིམས་ཤིང་སྦུ་གུར་ཆགས་པ་ལ་བསྔགས་པ་ཡིན་ནོ། །ཨེ་རཎྜའི་འབྲས་ལྡེ་གུས་བསྐུ། །སྦུ་གུའི་རྨ་སྦྱོར་བྱེད་མཆོག་ཡིན། །ཞེས་བྱ་
བ་ལ། ཨེརཎྜའི་འབྲས་བུ་ཆུ་ཐིགས་སུ་བྱས་པའི་ལྡེ་གུས་བསྐུས་ན་ཡང་སྦུ་གུའི་རྨ་སྦྱོར་བར་བྱེད་པའི་མཆོག་ཡིན་ནོ། །རྒྱ་ཤུག་འབྲས་བུ་ཤུན་པ་དང་། །ལན་ཚྭ་རྒྱ་སྐྱེགས་བཅས་པ་དང་། །གླ་གོར་ཞོ་ཤའི་ལོ་མ་དང་། །པྲི་ཡང་ཀུ་དང་ནུ་ཞོ་དང་། །ཨ་རྐ་སྣུ་ཧའི་འོ་མར་
སྦྱར། །རེང་བུས་རྨ་འཁྱིམས་མྱུར་འཚོབ་བྱེད། །ཅེས་བྱ་བ་ལ། རྒྱ་ཤུག་གི་འབྲས་བུ་ལ་སོགས་པའི་སྨན་དང་བུད་མེད་ཀྱི་ནུ་ཞོ་དང་། །ཨ་རྐ་དང་། ཤིང་སྣུ་ཧའི་འོ་མ་དང་སྦྱར་བའི་རེང་བུས་ཀྱང་རྨ་འཁྱིམས་ཤིང་སྦུ་གུར་ཆགས་པ་མྱུར་དུ་འཚོབ་བར་བྱེད་དོ། །རྒྱ་མཚོའི་ཚ་དང་
เล่ม ๒๐๒ · หน้า 237a
རྩབས་རུ་ཚ། །ལྕེ་མྱང་ཚ་ནི་ལེགས་པར་བསྲེགས། །གླ་གོར་ཞོ་ཤ་ཁྱིམ་དུད་པ། ཨ་མྲ་ད་ཀ་སེང་ལྡེང་གི །ལོ་མ་ཛི་ན་སྐྱེར་བ་གཉིས། །ལྡེ་གུས་བསྐུ་བ་སོགས་བསྟེན་ན། །སྐྱབས་མེད་མི་བརྟན་སྐྱེས་བུ་ཡི། །འབྱོར་པ་བཞིན་དུ་འགྲིབ་པར་བྱེད། །
ཅེས་བྱ་བ་ལ། རྒྱ་མཚོའི་ལན་ཚྭ་དང་རྩ་བས་རུ་ཚ་ལ་སོགས་པ་ནས་སེར་པོ་རྣམ་གཉིས་ཀྱི་བར་ལྡེ་གུར་བྱས་ཏེ་བསྐུས་ན་ཡང་རྨ་འཁྱིམས་པའི་སྦུབས་སེལ་བར་བྱེད་དེ། དཔེར་ན་སྐྱེས་བུ་རང་བཞིན་མི་བརྟན་ཞིང་བག་མེད་པར་གྱུར་པ་དེའི་འབྱོར་པ་ཤིན་ཏུ་འགྲིབ་པར་བྱེད་པ་དང་
མཚུངས་སོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། །ཕྱི་མའི་གནས་ཀྱི་ལེའུ་སུམ་ཅུ་པའི་རྣམ་པར་འགྲེལ་པའོ།། །།དེ་ནས་ནད་ཕྲ་མོའི་དམིགས་ཤེས་པ་བཤད་
པར་བྱའོ། །བད་རླུང་ལས་གྱུར་འབྲུམ་ཕྲན་ནི། །སྣུམ་ཞིང་མདོག་འདྲ་དྲུད་པ་ཅན། །ནད་མེད་མུངྒ་འདྲ་བ་ནི། །བྱིས་པ་ལས་སྐྱེས་རའི་འགྲམ་པ། །ཞེས་བྱ་བ་ལ། བད་ཀན་དང་རླུང་ལས་གྱུར་པའི་འབྲུམ་ཕྲན་སྣུམ་པ་ལ་སོགས་པའི་མཚན་ཉིད་ཅན་བྱིས་པ་དག་ལས་གང་
ཞིག་འབྱུང་བ་དེ་ནི་མིང་རའི་འགྲམ་པ་ཞེས་བྱའོ། །དེ་གཉིས་ལས་བྱུང་ཤར་གནས་མཐུག །ནས་འདྲ་ནས་ཞེས་བྱ་བ་ཡིན། །ཞེས་བྱ་བ་ལ། བད་ཀན་དང་རླུང་དེ་གཉིས་ལས་བྱུང་པའི་འབྲུམ་ཕྲན་ལ་གནས་པ་མཐུག་པོ་ནས་འདྲ་བ་ནི་མིང་ཡང་ནས་འདྲ་བའི་འབྲུམ་ཕྲན་
ཞེས་བྱའོ། །འབྲས་བྱེར་ཟླུམ་པོ་རྩེ་མོ་མེད། །རྣག་ཉུང་རྟག་མཐོ་འབྲས་བྱེར་ཡིན། །ཞེས་བྱ་བ་ལ། འབྲུམ་ཕྲན་ཟླུམ་པོ་ལ་སོགས་པའི་མཚན་ཉིད་དང་ལྡན་པ་ནི་མིང་འབྲས་བྱེར་ཞེས་བྱའོ། །རྨེན་བུ་ལྔའམ་དྲུག་འབྱུང་ཞིང་། །རུས་སྦལ་ལྟར་མཐོ་རུས་སྦལ་
ཡིན། །ཞེས་བྱ་བ་ལ། རྨེན་བུའི་འབྲུམ་ཕྲན་ལྔ་འམ་དྲུག་འབྱུང་ཞིང་། དབྱིབས་རུས་སྦལ་ལྟར་འདུག་པ་དེ་ནི་མིང་རུས་སྦལ་ཞེས་བྱའོ། །རྣ་བའི་སྟེང་ངམ་ཀུན་ཏུ་ནི། །འབྲུམ་ཕྲན་སྲ་ཞིང་མི་བཟད་ན། །ཨུཏྤལ་རྩ་འདྲ་བ་ནས། །ཞེས་བྱ་བ་ལ་འབྲུམ་ཕྲན་གང་རྣ་བའི་སྟེང་ངམ་རྣ་
เล่ม ๒๐๒ · หน้า 237b
བའི་ཐོག་ཏུ་སྲ་ཞིང་ཤས་ཆེ་ར་ན་པ་དང་། །ཨུཏྤ་ལའི་རྩ་བ་ལྟ་བུར་སྐྱེས་པ་དེ་མིད་པ་ནས་ཞེས་བྱའོ། །སྐྲང་ཞིང་ཅུང་ཟད་ན་ལ་བརྟན། །འགྲམ་པའི་མཚམས་སུ་དེ་གཉིས་ལས། །བྱུང་བ་རྡོ་ཡི་བོང་བུ་ཡིན། །ཞེས་བྱ་བ་ལ། ཡང་བད་ཀན་དང་རླུང་གཉིས་ལས་སྐྲང་ཞིང་ནད་ཚབས་
ཆུང་ལ་བརྟན་ཞིང་སྲ་བ་འགྲམ་པའི་མཚམས་སུ་བྱུང་བ་ནི་མིང་རྡོའི་བོང་བུ་ཞེས་བྱའོ། །ཤ་ལམ་ལི་ཡི་ཚེར་མ་འདྲ། །འབྲུམ་ཕྲན་ནད་བཅས་མཐུག་པོ་ནི། །ནང་ན་ཚིལ་ཡོད་ལང་ཚོ་ལ། །བྱུང་བ་བཞིན་ནི་མ་རུངས་བྱེད། །ཅེས་བྱ་བ་ལ། ཡང་བད་ཀུན་དང་རླུང་ལས་བྱུང་པའི་
འབྲུམ་ཕྲན་ཤིང་ཤལ་མ་ལའི་ཚེར་མ་འདྲ་བ་ལ་སོགས་པའི་མཚན་མ་ཅན་ལང་ཚོ་དང་ལྡན་པ་ལ་བྱུང་བ་གང་ཡིན་པ་དེ་ནི་བཞིན་མ་རུངས་པར་བྱེད་པ་ཞེས་བྱའོ། །བད་ཀན་རླུང་གྱུར་པདྨ་ཡི། །ཚེར་མ་འདྲ་བས་ཁྱབ་གྱུར་ཅིང་། །དཀའ་ཞིང་ནད་ནི་མེད་པ་དག །པདྨའི་ཚེར་མ་
ཅན་ཞེས་བྱ། །ཞེས་བྱ་བ་ལ། ཡང་བད་ཀན་དང་རླུང་ལས་གྱུར་པ་པདྨའི་ཚེར་མ་འདྲ་བས་ཁྱབ་པར་གྱུར་བ་དེ་ནི་མིང་པདྨའི་ཚེར་མ་ཞེས་བྱ་བ་སྟེ། ཇི་ལྟར་པདྨའི་ཚེར་མ་དཀར་པོ་ཕྲ་མོས་ཁྱབ་པ་ལྟ་བུའོ། །མཁྲིས་པ་ལས་གྱུར་འབྲུམ་ཕྲན་ཟླུམ། །ཨུ་དུམ་ཝཱ་རའི་འབྲས་
སྨིན་འདྲ། །ཤས་ཆེར་ཚ་ཞིང་རིམས་འདེབས་བྱེད། །གས་པ་ཁ་བྱེ་ཞེས་བྱའོ། །ཞེས་བྱ་བ་ལ། འབྲུམ་ཕྲན་གང་མཁྲིས་པ་ལས་གྱུར་པ་ཨུ་དུམ་ཝཱ་རའི་འབྲས་བུ་སྨིན་པ་འདྲ་བ་ལ་སོགས་པའི་མཚན་ཉིད་ཅན་ནི་མིང་ཁ་བྱེ་བ་ཞེས་བྱའོ། །ལུས་ཀྱི་ནད་དང་གདོང་ལ་ནི། །
ཚ་ཞིང་ནད་དང་རིམས་སྐྱེད་ཅིང་། །སྲན་ཆུང་ཙམ་ལ་དེ་མདོག་ཅན། །འབྲུམ་ཕྲན་མཐུག་པོ་སྲན་ཆུང་ཡིན། །ཞེས་བྱ་བ་ལ། ལུས་ཀྱི་ཡན་ལག་རྣམས་དང་། གདོང་ལ་ཚ་བ་ལ་སོགས་པའི་མཚན་ཉིད་ཅན་གྱི་འབྲུམ་ཕྲན་བྱུང་བ་དེ་ནི་མིང་སྲན་ཆུང་ཞེས་བྱའོ། །དེ་བས་འབྲུམ་
བུ་ནད་ཚབས་ཆེ། །སྡུག་བསྔལ་བྱེད་པ་འབྲུམ་བུ་ཡིན། །ཞེས་བྱ་བ་ལ། སྲན་ཆུང་དེ་བས་ཀྱང་འབྲུམ་བུ་ནད་ཚབས་ཆེ་བ་ལ་སོགས་པའི་མཚན་ཉིད་ཅན་ནི་མིང་འབྲུམ་བུ་ཞེས་བྱ་བ་ཡིན་ནོ། །རླུང་མཁྲིས་ལས་གྱུར་འབྲུམ་བུའི་ནད། །པདྨའི་སྙིང་པོ་ལྟ་བུ་ཡི། །འབྲུམ་
เล่ม ๒๐๒ · หน้า 238a
ཕྲན་གྱིས་ནི་ཕུག་པ་ཡིན། །ཞེས་བྱ་བ་ལ། རླུང་དང་མཁྲིས་པ་ལས་གྱུར་པའི་པདྨའི་སྙིང་པོའི་དབྱིབས་འདྲ་བའི་འབྲུམ་བུ་ཕྲ་མོས་ཁྱབ་པ་ནི་མིང་ཕུག་པ་ཞེས་བྱའོ། །དེ་དག་ཉིད་སྐྱེད་བོང་བུ་ཡིན། །ཟླུམ་ཞིང་རྒྱ་ཆེ་མཐོ་བ་དང་། །མདོག་དམར་འབྲུམ་
ཕྲན་དག་གིས་ཁྱབ། །ཅེས་བྱ་བ་ལ། རླུང་དང་མཁྲིས་པ་དེ་གཉིས་ལས་ཐོར་བུ་གང་ཟླུམ་ཞིང་ལྷུན་ཆེ་བ་ལ་སོགས་པ་འབྱུང་པ་གང་ཡིན་པ་དེ་ནི་མིང་བོང་བུ་ཞེས་བྱའོ། །ཕལ་ཆེར་རླུང་ལས་མཆན་ཁུང་དུ། །ཉེ་བར་སྐྱེས་པ་མཆན་ཁུང་འབྲུམ། །ཞེས་བྱ་བ་ལ། འབྲུམ་ཕྲན་གང་
ཕལ་ཆེར་རླུང་ལས་གྱུར་ཅིང་མཆན་ཁུང་གི་ཕྱོགས་སུ་བྱུང་བར་གྱུར་པ་དེ་ནི་མིང་མཆན་ཁུང་ཞེས་བྱའོ། །མཁྲིས་པ་ལས་གྱུར་འབྲུམ་ཕྲན་ནི། །ཕྲ་ཞིང་མཐུག་པ་འབྲས་ཡོས་འདྲ། །ཞེས་བྱ་བ་ལ། མཁྲིས་པ་ལས་གྱུར་པའི་འབྲུམ་ཕྲན་གང་ཕྲ་ཞིང་མཐུག་ལ་འབྲས་ཡོས་དང་
དབྱིབས་འདྲ་བ་ནི་མིང་འབྲས་ཡོས་ཞེས་བྱའོ། །དེ་འདྲའི་ཆེན་པོ་གཅིག་བྱུང་པ། །དྲི་ཅན་ཞེས་ནི་གྲགས་པ་ཡིན། །ཞེས་བྱ་བ་ལ། འབྲུམ་བུའི་ཐོར་བུ་གང་ཆེན་པོ་གཅིག་བྱུང་ཞིང་འབྲས་ཡོས་དང་དབྱིབས་འདྲ་བ་དེ་ནི་མིང་དྲི་ཅན་ཞེས་བྱའོ། །ཚ་བའི་རྡུལ་གྱིས་ལུས་གདུངས་
ལ། །འབྲུམ་ཕྲན་ནད་བཅས་སྟུག་པོ་ནི། །དབྱིབས་དང་ཚད་མདོག་སྐེ་ཚེ་འདྲ། །དེ་ནི་སྐེ་ཚེ་ཞེས་བྱའོ། །ཞེས་བྱ་བ་ལ། འབྲུམ་ཕྲན་གང་རྡུལ་དང་ཚ་བ་ལས་བྱུང་བ་ནད་དང་བཅས་པ་ལ་སོགས་པའི་མཚན་ཉིད་ཅན་ནི་མིང་སྐེ་ཚེ་ཞེས་བྱའོ། །མཁྲིས་པ་ཤས་ཆེའི་ནད་ཀྱིས་ནི། །
མེད་པ་ལ་ལྟ་བུར་དལ་གྱིས་མཆེད། །སྐྲང་ཞིང་སྣུམ་ལ་སྲ་བཅིང་དམར། །རིམ་སྐྱེད་དྲ་བའི་བོང་བུ་ཡིན། །ཞེས་བྱ་བ་ལ། རླུང་ལ་སོགས་པའི་ནད་མཁྲིས་པའི་ཤས་ཆེ་བ་ལས་མེད་པ་ལ་ལྟ་བུས་རིམ་གྱིས་དལ་བུའི་མཆེད་པ་ལ་སོགས་པའི་མཚན་ཉིད་ཅན་ནི་མིང་དྲ་བའི་བོང་བུ་
ཞེས་བྱའོ། །མཁྲིས་ཤས་ཆེ་བའི་འབྲུམ་བུ་ནི། །རིམ་སྐྱེད་ཤལ་གནོད་བྱེད་པ། །མཆན་ཁུང་ཕྱོགས་བྱུང་མེའི་མདོག་ཅན། །འདྲ་བ་དེ་ནི་མེ་སྐྱེད་ཡིན། །ཞག་ལྔའམ་ནི་ཞག་བདུན་ནམ། །ཟླ་བ་ཕྱེད་ནས་སྲོག་འཕྲོག་བྱེད། །ཅེས་བྱ་བ་ལ། །ནད་གཞི་གསུམ་
เล่ม ๒๐๒ · หน้า 238b
མཁྲིས་པའི་ཤས་ཆེ་བ་ལ་མཆན་ཁུང་གི་ཕྱོགས་སུ་འབྲུམ་བུ་མེའི་མདོག་དང་འདྲ་བ་ལ་སོགས་པའི་མཚན་ཉིད་ཅན་སྐྱེད་པ་གང་ཡིན་པ་དེ་ནི་མེ་སྐྱེད་པ་ཞེས་བྱ་སྟེ། དེས་ནི་ཞག་ལྔ་ལ་སོགས་པ་ནས་སྲོག་འཕྲོག་པར་བྱེད་དོ། །ནད་གཞི་གསུམ་སྐྱེས་འབྲུམ་བུ་ཟླུམ། །ནམ་ཚོང་ཡན་ཆད་
སྐྱེས་ས་སྐོར། །ཞེས་བྱ་བ་ལ། ནད་གཞི་འདུས་པ་ལས་གྱུར་པའི་འབྲུམ་བུ་གང་ཟླུམ་པ་ལ་སོགས་པའི་མཚན་ཉིད་ཅན་དེ་ནི་མིང་ས་སྐོར་ཞེས་བྱའོ། །མཆན་ཁུང་ཆུ་སོར་བི་ད་རིའི། །རྩ་བ་ལྟར་སྲ་བིད་རི། །ཞེས་བྱ་བ་ལ། མཆན་ཁུང་དང་ཆུ་སོར་བིད་རིའི་རྩ་བ་ལྟར་འབྲུམ་ཕྲན་བྱུང་བ་དེའི་མིང་ནི་བི་
ད་རི་ཞེས་བྱའོ། །ཚིལ་དང་བད་རླུང་ལས་གྱུར་པའི། །རྨེན་བུ་རྩ་རྒྱུས་ཤ་ལ་གནས། །བརྟོལ་ན་མར་ཞག་སྦྲང་རྩི་འདྲ། །འཛག་གྱུར་དེ་ལ་རླུང་ཤས་ཆེ། །ཤ་སྐམ་རྨེན་བུར་བྱས་ནས་ནི། །གསེ་གམ་ལྟ་བུར་སྐྱེད་པར་བྱེད། །ཁྲག་ནི་དྲི་མནམ་རྣགས་པ་དང་། །ཁ་དོག་སྣ་ཚོགས་འབྱུང་བ་ཡི། །
ནད་ཀྱིས་དེ་ལ་ཁྲག་འཛག་པ། །དེ་ནི་འབྲུམ་བུ་གསེག་མ་ཅན། །ཞེས་བྱ་བ་ལ། ཚིལ་ལ་སོགས་པ་ལས་གྱུར་པའི་རྨེན་བུ་གང་རྩ་ལ་སོགས་པ་ལ་གནས་པ་འབྱུང་ལ། དེ་བརྟོལ་ན་མར་དང་། ཞག་དང་སྦྲང་རྩི་འདྲ་བ་འཛག་པར་འགྱུར་ལ། །དེ་དག་གི་ནང་ནས་གལ་ཏེ་རླུང་གི་ཤས་ཆེ་ན་ནི་
ཤ་སྐམ་པར་བྱེད་པ་ནས་ཤའི་རྨེན་བུ་གསེག་མ་ལྟ་བུ་སྐྱེད་པར་བྱེད་ཅིང་། དེར་དྲི་མ་ལ་སོགས་པས་ཁྲག་དྲི་མནམ་པ་ལ་སོགས་པའི་མཚན་ཉིད་ཅན་དེ་ལས་འཛེག་པར་འགྱུར་བའི་ནད་དེ་ནི་འབྲུམ་བུ་གསེག་མ་ཅན་ཞེས་བྱའོ། །ལག་པ་རྐང་མཐིལ་ཚིགས་དང་ནི། །ནམ་ཚོང་ཡན་ཆད་
གྲོག་མོ་ཡི། །མགོ་ལྟར་རིམ་གྱིས་རྨེན་བུ་ནི། །ཕྲ་མོ་མང་པོས་ཁྱབ་བྱེད་ལ། །ན་ཞིང་ཚ་ལ་གཡའ་ཞིང་འདྲུལ། །ཀུན་དུ་སྐྱེས་ཏེ་གྲོག་མོའི་མགོ །ཞེས་བྱ་བ་ལ། ལག་པ་དང་རྐང་པའི་མཐིལ་ལ་སོགས་པར་འབྲུམ་ཕྲན་གྱིས་ཁྱབ་ནས་རིམ་གྱིས་རྨེན་བུར་འབྱུང་ཞིང་དེ་ལྟ་བུ་མང་པོས་ཁྱབ་པར་
འགྱུར་ལ་ན་བ་ལ་སོགས་པའི་མཚན་ཉིད་ཅན་སྐྱེས་པ་གང་ཡིན་དེ་ནི་ནད་གཞི་གསུམ་ལས་བྱུང་བའི་ནད་གྲོག་མོའི་མགོ་བོ་ཞེས་བྱའོ། །རྐང་མཐིལ་གཤགས་མས་ཐུད་པའམ། །ཚེར་མ་སོགས་ཀྱིས་སྣད་པ་ཡི། །འབྲུམ་བུ་ཕུར་བ་ལྟར་མཐོ་བ། །སྐྱེས་ཏེ་མཛེར་བ་འདྲ་ཞེས་བྱ། །ཞེས་བྱ་བ་ལ།
เล่ม ๒๐๒ · หน้า 239a
ཚེར་མ་ལ་སོགས་པས་རྐང་པ་བྲུད་པའམ། སྣད་པས་ཕུར་པ་ལྟ་བུའི་ཐོར་བུ་སྐྱེས་པ་དེའི་མཛེར་པ་འདྲ་བ་ཞེས་བྱའོ། །ཤུགས་བཀག་པ་ཡིས་རླུང་དག་ནི། །གཞང་དང་རྐང་པ་ལ་གནས་པ། །ཕྱི་དང་ནང་དུ་རྒྱུ་བྱེད་པ། །ལམ་རྒྱུ་དེ་ལས་བཤད་པ་ནི། །དཀའ་བས་འབྱུང་བར་
བྱེད་པའི་ནད་། །གཞང་འགགས་པ་ཞེས་བྱ་བར་འདོད། །ཅེས་བྱ་བ་ལ། ཤུགས་བཀག་པའི་དབང་གིས་གཞང་གི་ཕྱི་དང་ནང་དུ་འཁྲུགས་པས། བཤང་བ་ཤིན་ཏུ་དཀའ་བས་འབྱུང་བར་བྱེད་པ་ནི་གཞང་འགགས་པ་ཞེས་བྱ་བར་སློབ་དཔོན་རྣམས་འདོད་དོ། །རླུང་མཁྲིས་ཀྱིས་ནི་སེན་མོ་ཡི། །
ནང་གི་ཤ་སྨིན་ནད་སྐྱེད་པ། །མ་སྣད་ནད་དང་ཚིམ་པ་དང་། །ཉེ་བའི་སེན་མོ་ཞེས་བྱའོ། །ཞེས་བྱ་བ་ལ། རླུང་དང་མཁྲིས་པ་འཁྲུགས་པ་ལས་སེན་མོའི་ནང་གི་ཤ་སྨིན་ཅིང་ནད་སྐྱེད་པ་ནི་མ་སྣད་པའི་ནད་དང་། །ཚིམ་པ་དང་། ཉེ་བའི་སེན་མོ་ཞེས་བྱའོ། །སྣད་པས་གནད་ཅིང་རྩུབ་པ་དང་། སྲ་
བ་སེན་མོ་ངན་ཞེས་བྱ། །ཞེས་བྱ་བ་ལ། །སེན་མོ་གང་སྣད་པས་གནག་པ་ལ་སོགས་པར་གྱུར་པ་ནི་མིང་སེན་མོ་ངན་པ་ཞེས་བྱའོ། །འདམ་ནི་གནོད་བྱེད་ལ་རེག་ལས། །ནད་ནི་གཡའ་ཞིང་རྣག་བཅས་པ། །སོར་མོའི་འབྲས་འབྱེར་ཞེས་བྱའོ། །ཞེས་བྱ་བ་ལ། སོར་མོའི་འདམ་གནོད་པར་བྱེད་པ་ལ་རེག་པས་
གཡའ་བ་ལ་སོགས་པའི་མཚན་ཉིད་ཅན་འབྱུང་པ་གང་ཡིན་པ་དེ་ནི་མིང་འབྲས་འབྱེར་བ་ཞེས་བྱའོ། །པགས་པ་ཏིལ་འདྲ་གནག་པ་ལ། །ནད་མེད་བྱུང་གྱུར་རྨེ་པ་སྟེ། །དེ་ཉིད་འབུར་བ་མཛེར་པ་ཡིན། །ཞེས་བྱ་བ་ལ། པགས་པ་ལ་གནས་ཤིང་ཏིལ་འདྲ་བ་ལ་སོགས་པའི་མཚན་ཉིད་ཅན་དེ་ནི་རྨེ་བ་ཞེས་བྱའོ། །
རྨེ་བ་དེ་ཉིད་ཆེར་འབུར་བར་གྱུར་པ་ནི་འཛེར་པ་ཞེས་བྱའོ། །མཛེར་པ་ལས་ཀྱང་ཆེན་པོར་གྱུར། །དཀར་ནག་པགས་པའི་མཛེར་པ་ཡིན། །ཞེས་བྱ་བ་ལ། མཛེར་པ་ལས་ཀྱང་ཤས་ཆེར་མཐོ་བར་གྱུར་ཅིང་མདོག་དཀར་ནག་ཏུ་གནས་པ་དེའི་མིང་པགས་པའི་མཛེར་བ་ཆེན་པོ་ཅན་ཞེས་བྱའོ། །དེ་འདྲའི་འབྲུམ་བུ་
སྐྱེས་པ་ནི། །དམར་པོ་རྒྱ་སྐྱེགས་ནོར་བུ་ཡིན། །ཞེས་བྱ་བ་ལ། ཡང་ཚུལ་མཛེར་པ་སྦོམ་པོ་འདྲ་བ་འབྲུམ་བུ་ཆེན་པོའི་མདོག་དམར་སྐྱེས་པའི་མིང་ནི་རྒྱ་སྐྱེགས་ཀྱི་ནོར་བུ་ཞེས་བྱའོ། །དཀར་བ་འམ་གནག་པར་ལྷན་ཅིག་སྐྱེས། །ཟླུམ་པ་འམ་མཚན་མ་ཞེས་བྱའོ། །ཞེས་བྱ་བ་ལ། ཟླུམ་པོ་ལ་མདོག་དཀར་པའམ་
เล่ม ๒๐๒ · หน้า 239b
གནག་པར་གནས་པར་སྐྱེས་པ་ནི་མིང་མཚན་མ་ཞེས་བྱའོ། །མྱ་ངན་ཁྲོ་དང་རླུང་མཁྲིས་སོགས། །འཁྲུགས་ཏེ་གདོང་ནི་སྲབ་འགྱུར་ཅིང་། །ཐིག་ལེ་ནག་པོ་ངོ་ཤིག་ཅན། །ཞེས་བྱ་བ་ལ། མྱ་ངན་དང་ཁྲོ་བ་དང་རླུང་མཁྲིས་པ་ལ་སོགས་པ་ལས་གདོང་ལ་སྲབ་ཅིང་ཟླུམ་པ་བྱུང་བ་གང་ཡིན་པ་དེ་ནི་མིང་བོ་ཤིག་
ཅན་ཞེས་བྱའོ། །གདོང་ལས་གཞན་བྱུང་ཁབས་ཞེས་བྱ། །ཞེས་བྱ་བ་ལ། ཐིག་ལེ་ཏལ་ཏིལ་ཏེ་གདོང་ལས་གཞན་དུ་བྱུང་བ་ནི་ཁབས་ཞེས་བྱའོ། །རླུང་གྱུར་ངོ་ཤིག་རྩུབ་པར་སྣང་། རེག་ན་རྩུབ་ཅིང་གནག་པ་ཡིན། །ཞེས་བྱ་བ་ལ། རླུང་ལས་གྱུར་པའི་ངོ་ཤིག་ནི་རྩུབ་པར་སྣང་ཞིང་རེག་ན་ཡང་
རྩུབ་པ་དང་གནག་པ་ཡིན་ནོ། །མཁྲིས་གྱུར་མཐའ་མ་ཅུང་ཟད་སྔོ། །ཞེས་བྱ་བ་ལ། མཁྲིས་པ་ལས་གྱུར་བའི་ངོ་ཤིག་ནི་མཐའ་མ་དམར་ཞིང་ཅུང་ཟད་སྔོ་བ་ཡིན་ནོ། །བད་ཀན་ལས་གྱུར་མཐའ་དཀར་གཡའ། །ཞེས་བྱ་བ་ལ། བད་ཀན་ལས་གྱུར་པའི་ངོ་ཤིག་མཐའ་མ་དཀར་ཞིང་གཡའ་བ་ཡིན་ནོ། །
ཁྲག་གྱུར་མཐའ་མ་ཟངས་མདོག་ཅན། །སྐམ་ཞིང་ཚ་བ་ཙག་ཙག་བྱེད། །ཅེས་བྱ་བ་ལ། ཁྲག་ལས་གྱུར་པའི་ངོ་ཤིག་ནི་མཐའ་དམར་བ་ལ་སོགས་པའི་མཚན་ཉིད་ཅན་ཡིན་ཞིང་ཡུངས་ཀར་གྱི་ལྡེ་གུས་བསྐུས་པ་ལྟར་ཚ་བ་ཙག་ཙག་པོར་བྱེད་པ་ཡིན་ནོ། །རླུང་གིས་བད་ཀན་བསླངས་གྱུར་པ། །པགས་
པར་ཕྱིན་ཏེ་སྐམས་གྱུར་ནས། །དེ་ལས་པགས་པ་སྐྱ་འགྱུར་ཞིང་། །རིམ་གྱིས་ཚོར་བ་མེད་འགྱུར་ལ། །གཡའ་བ་ཆུང་ཞིང་འདྲུལ་བ་མེད། །བེམ་པོ་དེ་ནི་ཚོར་མེད་ཡིན། །ཞེས་བྱ་བ་ལ། རླུང་གིས་བད་ཀན་བསླངས་ཤིང་སྐྱེད་པར་གྱུར་པ་དང་། དེའི་འོག་ཏུ་པགས་པར་ཕྱིན་ནས་སྐམས་པར་གྱུར་པ་
དང་། །པགས་པ་སྐྱ་བར་འགྱུར་ལ་རིམ་གྱིས་ཚར་བ་མེད་པར་འགྱུར་ཞིང་། །འདྲུལ་བ་མེད་པ་དེ་ནི་བེམ་པོ་ལྟ་བུར་འདུག་པའི་ཕྱིར་ཚོར་བ་མེད་པ་ཞེས་བྱའོ། །སྐྱུག་སྨན་ཉེས་དང་མ་ཞུ་དང་། །བད་མཁྲིས་ལུས་ལ་གནས་བསླངས་བས། །རབ་གཡའ་ཟླུམ་པོ་གོར་གོར་པོ། །དམར་པོ་མང་དུ་འབྱུང་འགྱུར་
ཞིང་། རྗེས་འབྲེལ་ལྡན་པ་ཟླུམ་པོར་བཤད། །ཅེས་བྱ་བ་ལ། སྐྱུག་སྨན་གྱི་སྦྱོར་བ་ཉེས་པས་མ་ཞུ་བ་དང་། །བད་ཀན་ལ་སོགས་པ་ལུས་ལ་གནས་པ་བསླངས་ཤིང་བསྐྱོད་པས་ལུས་རབ་ཏུ་གཡའ་ཞིང་ཟླུམ་པོ་གོར་གོར་པོ་མདོག་དམར་བ་མང་དུ་འབྱུང་བར་གྱུར་པ་དེ་ནི་རྗེས་སུ་འབྲལ་བའི་ནད་
เล่ม ๒๐๒ · หน้า 240a
ཟླུམ་པོ་ཞེས་བྱ་བར་དྲང་སྲོང་དག་གིས་བཤད་དོ། །དེ་ལྟར་ནད་ནི་ཕྲ་མོ་ཡི། །དབྱེ་བ་སུམ་ཅུ་དྲུག་ཏུ་བསྟན། །ཞེས་བྱ་བ་ལ། དེ་ལྟར་ན་ནད་ཕྲ་མོའི་དབྱེ་བ་ནི་སྤྱིར་སུམ་ཅུ་རྩ་དྲུག་ཡོད་དོ། །ཞེས་སློབ་དཔོན་གྱིས་བཤད་ཅིང་བསྟན་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་
པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་པས་ངེས་པར་སྦྱར་བ་ལས། །ཕྱི་མའི་གནས་ཀྱི་ལེའུ་སུམ་ཅུ་རྩ་གཅིག་པའི་རྣམ་པར་འགྲེལ་པའོ།། །།དེ་ནས་ནད་ཕྲ་མོའི་གསོ་བ་བཤད་པར་བྱའོ། །ར་ཡི་འགྲམ་པ་མ་སྨིན་པ། །སྲིན་བུ་པད་པས་ཁྲག་དབྱུང་
ངོ་། །ཞེས་བྱ་བ་ལ། ར་ཡི་འགྲམ་པ་ཞེས་བྱ་བའི་འབྲུམ་བུ་མ་སྨིན་པ་ལ་ནི། །སྲིན་བུ་པད་པའི་གཏར་གས་ཁྲག་དབྱུང་བར་བྱའོ། །ནས་འདྲ་དུགས་ནི་བྱས་ནས་སུ། ཐང་ཤིང་རུ་རྟ་ལྡོང་རོས་དང་། །བ་བླའི་ལྡེ་གུ་བསྐུས་ཏེ་བཞུ། །ཞེས་བྱ་བ་ལ། ནས་འདྲ་བ་ཞེས་བྱ་བ་ནི་དང་པོ་དུགས་བྱས་ནས་བཞུ་བར་
བྱ་བའི་ཕྱིར་ཐང་ཤིང་ལ་སོགས་པའི་ལྡེ་གུས་བསྐུ་བར་བྱའོ། །རྡོ་ཡི་བོང་བུའང་དེ་ལྟར་གསོ། །སྨིན་པར་འགྲམ་རྨ་ལྟར་གསོ། །ཞེས་བྱ་བ་ལ། རྡོའི་བོང་བུ་ཞེས་བྱ་བ་ནི་བཤད་མ་ཐག་པའི་ཚུལ་དུ་གསོའོ། །རའི་འགྲམ་པ་ཞེས་བྱ་བ་སྨིན་པའི་རྨ་དང་འདྲ་བར་གསོ་བར་བྱའོ། །བཞིན་གནོད་སེང་ཕྲོམ་
འུ་སུ་དང་། །ཤུ་དག་བཏགས་པའི་ལྡེ་གུ་འམ། །ཞེས་བྱ་བ་ལ། །བཞིན་ལ་གནོད་པའམ་མ་རུངས་པར་བྱེད་པ་ཞེས་བྱ་བའི་ནད་ནི་སེང་ཕྲོམ་ལ་སོགས་པའི་ལྡེ་གུས་བསྐུ་བར་བྱའོ། །ནྱ་གྲོ་དྷ་ཡི་འོ་མ་འམ། །རྒྱ་སྟར་ལོ་མ་ཚ་སྦྱར་བསྐུ། །ཞེས་བྱ་བ་ལ། ཡང་ན་བཞིན་མ་རུངས་པར་བྱེད་པ་ལ་ནྱ་གྲོ་དྷ་ལ་སོགས་པའི་ལྡེ་
གུས་བསྐུ་བར་བྱའོ། །དེས་མ་ཞི་ན་སྐྱུག་སྨན་དང་། །སྣ་སྨན་དཔྲལ་བར་གཏར་ག་གདབ། །ཅེས་བྱ་བ་ལ། སྦྱོར་བ་དེས་ཀྱང་མ་ཞི་ན་སྐྱུག་སྨན་ལ་སོགས་པའི་སྦྱོར་བ་བྱའོ། །པདྨའི་ཚེར་མ་ནིམ་པ་ཡི། །ཁུ་བ་འམ་ནིམ་པ་མར་བསྐོལ་བར། །སྦྲང་རྩི་དང་ནི་བཅས་པ་བླུད། །ནིམ་པ་དོང་གར་སྦྱར་བས་བྱུག །ཅེས་བྱ་བ་ལ། པདྨའི་
ཚེར་མ་ལྟ་བུ་ཞེས་བྱ་བ་ལ་ནི་ནིམ་པའི་ཁུ་བ་དང་། ནིམ་པ་དང་མར་བསྐོལ་བའི་ནང་དུ་སྦྲང་རྩི་དང་བཅས་པ་བླུད་པར་བྱ་བ་འམ། ནིམ་པ་དང་དོག་གར་སྦྱར་བའི་ལྡེ་གུས་བསྐུ་བར་བྱའོ། །ཁ་བྱེ་སོགས་ནས་དྲ་བོད་པར། །ས་སྐོལ་བཅས་པ་མཁྲིས་པ་ཡི། །མེ་དཔལ་ལྟ་བུར་གསོ་བར་བྱ། །མེ་སྐྱེད་པ་ནི་སྤང་བར་བྱ། །ཞེས་བྱ་
เล่ม ๒๐๒ · หน้า 240b
བ་ལ། ཁ་བྱེ་བ་ནས་སྔོ་བའི་བོང་བུའི་བར་གྱི་འབྲུམ་ཕྲན་ས་སྐོར་དང་བཅས་པ་ནི་མཁྲིས་པ་ལས་གྱུར་པའི་མིང་མེ་དཔལ་ལྟ་བུར་གསོ་བར་བྱ་ལ། མེ་སྐྱེད་པ་ཞེས་བྱ་བ་ནི་སྤང་བར་བྱའོ། །དྲ་བའི་བོང་བུ་སྨྱུང་བ་དང་། །གཏར་ག་གདབ་དང་རྩུབ་ཆོས་དང་། །ལུས་ཀྱི་སྦྱང་བ་སྐྱུ་རུ་རའི། །སྦྱོར་བའི་བསིལ་སྨན་བྱུག་པས་
གསོ། །བི་ད་རི་ལ་ཁྲག་གཏར་ཞིང་། །བད་ཀན་རྨེན་བུ་ལྟ་བུར་གསོ། །ཞེས་བྱ་བ་ལ། དྲ་བའི་བོང་བུ་ཞེས་བྱ་བ་ནི་རྟག་ཏུ་སྨྱང་བ་བྱས་པ་དང་། གཏར་ག་གདབ་ཅིང་ཁྲག་དབྱུང་བ་དང་། ཟས་དང་སྨན་གྱིས་རྩུབ་ཆོས་བྱ་བ་དང་། སྐྱུག་སྨན་ལ་སོགས་པའི་སྦྱོར་བ་ལ་སོགས་པས་གསོ་བར་བྱའོ། །བི་ད་རི་ལ་ནི་རྔབས་རྭ་ལ་
སོགས་པས་ཁྲག་དབྱུང་ཞིང་བད་ཀན་གྱི་རྨེན་བུ་ལྟར་གསོ་བར་བྱའོ། །གསེག་མ་ལྟ་བུའི་འབྲུམ་ཕྲན་ལ། །ཚིལ་གྱི་རྨེན་དུ་ལྟ་བུར་གསོ། །ཞེས་བྱ་བ་ལ། གསེག་མ་ལྟ་བུའི་འབྲུམ་བུ་ལ་ནི་ཚིལ་གྱི་རྨེན་བུ་དང་འདྲ་བར་གསོ་བར་བྱའོ། །གྲོག་མའི་མགོ་འདྲ་བུ་ག་མང་། །ཆེར་སྐྱེས་སྐྲང་ཞིང་གནད་ལ་གནས། །
རྐང་པ་ལག་པར་བྱུང་བ་སྤང་། །ཞེས་བྱ་བ་ལ། གྲོག་མའི་མགོ་འདྲ་ཞིང་ཕུག་མང་བ་ལ་སོགས་པ་ནི་སྤང་བར་བྱའོ། །ཅིག་ཤོས་ལས་ནི་ཁྲག་དབྱུང་ལ། །རྒྱམ་ཚྭ་དོང་ག་སླེ་ཏྲེས་དང་། །ཙི་ཙེ་རྒྱ་སྲན་རྩ་བ་དང་། །དན་ད་ཏིལ་བཏགས་ནས་ཕྱེས་བསྐུ། །ཞེས་བྱ་བ་ལ། །སྔ་མ་དང་མི་མཐུན་པར་གནས་པའི་
གྲོག་མ་ལྟ་བུའི་འབྲུམ་ཕྲན་ནི་གཏར་ག་བྱས་ལ་རྒྱམ་ཚ་ལ་སོགས་པས་བསྐུ་པར་བྱའོ། །སྨིན་པ་ལ་ནི་ནད་ཅན། །ཐམས་ཅད་ལེགས་པར་སྦྱང་བར་བྱ། །མཚོན་གྱིས་བཅད་ལ་དེ་རྗེས་ལ། །ཐལ་སྨན་ཡང་ན་མེ་ཡིས་བསྲེག །ཅེས་བྱ་བ་ལ། གྲོག་མ་འདྲ་བའི་སྨིན་པ་ལ་ནི་ཐམས་ཅད་ལེགས་
པར་སྦྱར་བ་ལ་སོགས་པ་བྱའོ། །མཛེར་བ་འདྲ་བ་གཙགས་བུ་ཡིས། །མ་ལུས་བཅད་ལ་སྣུམ་གྱིས་བསྲེག །ཅེས་བྱ་བ་ལ། མཛེར་བ་འདྲ་པའི་ནད་ལ་ནི་གཙགས་བུས་ཀུན་བཅད་ལ། དེའི་འོག་ཏུ་མར་བསྐོལ་བས་བསྲེག་པར་བྱའོ། །གཞང་འགགས་པ་ལ་ནོར་བུ་ནི། །འགགས་པ་ལྟ་བུར་
གསོ་བར་བྱ། །ཞེས་བྱ་བ་ལ། གཞང་འགགས་པའི་ནད་ལ་ནི་ནོར་བུ་འགགས་པ་ལྟར་གསོ་བར་བྱའོ། །ཉེ་བའི་སེན་མོ་སྦྱང་བ་ཡིས། །ཚ་པ་བསལ་ཏེ་མཚོན་གྱིས་གསོ། །ཞེས་བྱ་བ་ལ། ཉེ་བའི་སེན་མོ་ཞེས་བྱ་བའི་ནད་ནི་སྐྱུག་སྨན་ལ་སོགས་པར་སྦྱང་བ་བྱས་ལ། །ཚ་བ་བསལ་ཏེ། མཚོན་གྱིས་བཅད་
เล่ม ๒๐๒ · หน้า 241a
པའི་ལས་ཀྱིས་གསོ་བར་བྱའོ། །སེན་མོ་ངན་ལའང་དེ་བཞིན་བྱ། །ཞེས་བྱ་བ་ལ། །སེན་མོ་ངན་པ་ཞེས་བྱ་བའི་ནད་ལ་ཡང་བཤད་མ་ཐག་པའི་སྦྱོར་བས་གསོ་བར་བྱའོ། །རྐང་པའི་ཆུ་སེར་དག་ལ་ཡང་། །འབྲས་བུ་སྐྱུར་བོ་ནག་ཚུར་བཅས། །ཏིལ་དང་གིའུ་ཝང་ནིམ་པ་ཡི། །
ལོ་མའི་ལྡེ་གུས་བསྐུ་བར་བྱ། །ཞེས་བྱ་བ་ལ། རྐང་པའི་ཆུ་སེར་གྱི་ནད་ལ་ནི་འབྲས་བུ་སྐྱུར་པོ་ཀཉྫི་ཞེས་བྱ་བས་བཀྲུས་ལ་ནག་ཚུར་ལ་སོགས་པས་བསྐུ་བར་བྱའོ། །སྨེ་བ་མཛེར་པར་བཅས་པ་ནི། །མེ་ཤེལ་ཐལ་སྨན་དག་གིས་བསྲེག །ཡང་ན་མེ་བཙའ་གདབ་པར་བྱ། །ཞེས་བྱ་བ་
ལ། སྨེ་བ་དང་མཛེར་པ་དག་ནི་མེ་ཤེལ་ལམ། ཐལ་སྨན་ནམ་མེ་བཙས་བསྲེག་པར་བྱའོ། །དེ་བཞིན་ལྤགས་མཛེར་རྒྱ་སྐྱེགས་ནོར། །མཚོན་གྱིས་བཅད་དེ་དེ་བཞིན་གསོ། །ཞེས་བྱ་བ་ལ། དེ་བཞིན་དུ་མཛེར་པ་ཆེན་པོ་དང་རྒྱ་སྐྱེགས་ཀྱི་ནོར་བུ་ཞེས་བྱ་བ་ནི་གཙགས་བུས་བཅད་
དེ་མེ་ཤེལ་ལ་སོགས་པས་བསྲེག་པར་བྱའོ། །མཚན་མ་ཅན་སོགས་གསུམ་པོ་ལ། །ཉེ་བའི་ཕྱོགས་ལ་གཏར་ག་གདབ། །ཅེས་བྱ་བ་ལ། མཚན་མ་ཅན་དང་ཁྱེ་མ་ཡང་འདིར་བསྡུ། ངོ་ཤིག་དང་ཁ་བས་ཏེ་གསུམ་པོ་ནི་ནད་གང་ན་ཡོད་པ་དང་ཉེ་བའི་ཕྱོགས་ལ་གཏར་ག་གདབ་བར་
བྱའོ། །འོ་མ་ཅན་ཤིང་མྱུ་གུ་ཤུན། །འོ་མར་བཏགས་པས་བསྐུ་བར་བྱ། །ཞེས་བྱ་བ་ལ། མཚན་མ་ཅན་ལ་སོགས་པ་གསུམ་པོ་ལ་ནི་འོ་མ་ཅན་གྱི་ཤིང་གི་མྱུ་གུ་དང་ཤུན་པ་འོ་མ་དང་བཏགས་པས་བསྐུ་བར་བྱའོ། །ངོ་ཤིག་ཨ་རྫུ་ནའི་ཤུན་པའམ། །བཙོད་དང་སྦྲང་རྩི་སྦྱར་བ་ཡི། །ལྡེ་
གུ་འམ་རྟ་དཀར་རྨིག་པ་ནི། །བསྲེགས་པའི་སྣག་ཚ་མར་སྦྱར་བསྐུ། །ཞེས་བྱ་བ་ལ། ངོ་ཤིག་ལ་ནི་ཨ་རྫུ་ནའི་ཤུན་པའི་ལྡེ་གུ་ལ་སོགས་པས་བསྐུ་བར་བྱའོ། །ཙནྡན་དམར་པོ་བཙོད་དང་ནི། །རུ་རྟ་སེང་ཕྲོམ་པྲི་ཡང་ཀུ །སྲན་ཆུང་ནྱ་གྲོ་དྷའི་མྱུ་གུ། །ལྡེ་གུས་ངོ་ཤིག་སེལ་བྱེད་ཅིང་། །བཞིན་
མདངས་གསལ་པར་བྱེད་པ་ཡིན། །ཞེས་བྱ་བ་ལ། ཙནྡན་དམར་པོ་ལ་སོགས་པའི་ལྡེ་གུས་བསྐུས་ན་ངོ་ཤིག་ལ་སོགས་པ་སེལ་བར་བྱེད་དོ། །ཟི་ར་གཉིས་དང་ཏིལ་ནག་དང་། ཡུངས་ཀར་འོ་མ་བཅས་པ་ནི། །བཏགས་པའི་ལྡེ་གུས་གདོང་བསྐུས་ན། །ངོ་ཤིག་སེལ་ཞིང་ཟླ་འདྲར་བྱེད། །
เล่ม ๒๐๒ · หน้า 241b
ཅེས་བྱ་བ་ལ། ཟ་ིར་གཉིས་ནི་ཟི་ར་ནག་པོ་དང་དཀར་པོའི་དབྱིབས་གཉིས་ཏེ། །དེ་ལ་སོགས་པའི་ལྡེ་གུས་བསྐུས་ན་ངོ་ཤིག་དང་མཚན་མ་ཅན་གྱི་སྐྱོན་མེད་པར་བྱེད་དེ་ཟླ་བ་དང་འདྲ་བར་འགྱུར་རོ། །སྲན་ཆུང་ཕུབ་མ་མེད་པ་བརྡོས་པ། །འོ་མ་སྦྲང་རྩི་མར་བཏགས་བསྐུ། །ཞེས་བྱ་བ་ལ། ཡང་ན་སྲན་
ཆུང་སྦུན་པ་མེད་པར་བྱས་ཏེ་བརྔོས་པ་འོ་མ་དང་བཏགས་ཏེ་སྦྲང་རྩི་དང་མར་དང་སྦྱར་བས་བསྐུས་ན་ཡང་གདོང་གི་ངོ་ཤིག་ལ་སོགས་པའི་སྐྱོན་སེལ་བར་བྱེད་དོ། །ཚེར་མ་རྣོ་བའི་ཤལ་མ་ལིའི། །འོ་མར་བཏགས་པས་བསྐུས་ནའང་ཕན། །ཞེས་བྱ་བ་ལ། ཡང་ན་ཤལ་མ་ལིའི་ཚེར་མ་རྣོན་པོ་འོ་མ་དང་
བཏགས་ལ། །གདོང་བསྐུས་ནས་ཡང་ངོ་ཤིག་ལ་སོགས་པ་སེལ་ཞིང་བཞིན་ཟླ་བ་དང་འདྲ་བར་བྱེད་དོ། །རྒྱ་ཤུག་ཚི་གུ་བུ་རམ་བཅས། །སྦྲང་རྩི་རི་བོང་ཁྲག་སྦྱར་བསྐུ། །ཞེས་བྱ་བ་ལ། ཡང་ན་རྒྱ་ཤུག་གི་ཚི་གུ་ལ་སོགས་པའི་ལྡེ་གུས་བསྐུས་ན་ཡང་ཡོན་ཏན་སྔ་མ་དང་འདྲའོ། །རུ་རྟ་ཁ་ལུང་
ཁུ་བ་ཡི། །ནང་སྦངས་སྦྲང་རྩིར་བཅས་པའམ། །ཞེས་བྱ་བ་ལ། ཡང་ན་རུ་རྟ་ཁ་ལུང་གི་ཁུ་བའི་ནང་དུ་ཞག་བདུན་སྦངས་པའི་ལྡེ་གུ་དང་སྦྲང་རྩིར་སྦྱར་བ་བསྐུས་ན་ཡང་ཡོན་ཏན་དང་འདྲའོ། །རྐང་མར་རྩ་བ་རའི་འོ་མ། །སྦྲང་རྩིར་བཅས་བའི་ལྡེ་གུའང་ཕན། །ཞེས་བྱ་བ་ལ། ཡང་ན་རྐང་
མར་ལ་སོགས་པའི་ལྡེ་གུས་བསྐུས་ན་ཡང་ཕན་ནོ། །རྐང་མར་རྩ་བ་བ་ལང་རུས། །སྦྲང་རྩི་མར་དང་བཅས་པས་བསྐུ། །ཞེས་བྱ་བ་ལ། ཡང་ན་རྐང་མར་གྱི་རྩ་བ་དང་བ་ལང་གི་སོ་ལྡེ་གུར་བྱས་ལ། སྦྲང་རྩི་མར་དང་སྦྱར་བས་བསྐུས་ན་ཡང་ཕན་ནོ། །འཛམ་བུ་ཨ་མྲའི་ལོ་མ་དང་། །སེར་
པོ་རྣམ་གཉིས་ཞོ་ག་ཆུ། །བུ་རམ་ས་རབ་སྦྱར་བའམ། །ཏིན་དུ་ཀ་ཡི་ལོ་མ་ཡི། །ཁུ་བར་བཏགས་པའང་མདོག་གསལ་བྱེད། །ཅེས་བྱ་བ་ལ། འཛམ་བུ་དང་ཨ་མྲའི་ལོ་མ་དང་སེར་པོ་རྣམ་གཉིས་ལ་སོགས་པ་སྦྱར་བའི་ལྡེ་གུའམ་ཡང་ན་ཏིན་དུ་ཀའི་ལོ་མ་དང་། ཤུན་པ་རང་གི་
ཁུ་བ་དང་བཅས་པའི་ལྡེ་གུས་བསྐུས་ན་ཡང་བཞིན་གྱི་ཁ་དོག་གསལ་བར་བྱེད་དོ། །ཨུཏླལ་སྔོ་དང་རུ་རྟ་དང་། །ཙནྡན་སེར་པོ་བྲི་ཡང་ཀུ། །རྒྱ་ཤུག་ཚིག་གུའི་ལྡེ་གུ་ཡིས། །གདོང་ནི་བསྐུས་ཞིང་དྲིལ་གྱུར་ན། །པདྨའི་མདོག་དང་འདྲ་བར་བྱེད། །ཅེས་བྱ་བ་ལ། ཨུཏླལ་སྔོ་པོ་ལ་
เล่ม ๒๐๒ · หน้า 242a
སོགས་པའི་ལྡེ་གུས་གདོང་བསྐུས་ཤིང་དྲི་ལན་ཡང་། །གདོང་པདྨའི་མདོག་དང་འདབ་མ་འདྲ་བར་འགྱུར་རོ། །ཙནྡན་སེར་པོ་ནི་ཀ་ལི་ཡི་ཀ་སྟེ། །ཙནྡན་གསུམ་པའོ། །སྨན་ནི་འདི་དག་བཏགས་པ་དང་། །ཤིང་མངར་དང་བཅས་བསྐོལ་སྣུམ་ནི། །ནད་གཞི་ཇི་བཞིན་མ་ལུས་ལ། །
བཏུང་དང་བསྐུ་བ་ལ་སོགས་བྱ། །ཞེས་བྱ་བ་ལ། ལྡེ་གུའི་དོན་སྨོས་པའི་སྨན་གོང་དུ་སྨོས་པ་འདི་དག་ཉིད་དང་། ཤིང་མངར་དང་བཅས་བར་བསྐོལ་བའི་སྣུམ་ནད་གཞི་དང་དུས་ལ་སོགས་པ་ཇི་ལྟ་བ་བཞིན་དུ་བཏུང་བ་དང་། བསྐུ་བ་ལ་སོགས་པའི་སྦྱོར་བ་བྱའོ། །ནས་དང་སེང་ཕྲོམ་སྲ་རྩི་ཕོག །
སྦྲ་ཚིལ་སྦྲང་རྩི་པུ་ཤིལ་ཙེ། །མར་དང་བུ་རམ་བ་གཅིན་ནི། །གཟར་བུར་ཆགས་ཀྱི་བར་དུ་བསྐོལ། །དེ་བསྐུས་པ་ཡིས་སྨེ་པ་དང་། །ངོ་ཤིག་མཛེར་པ་མྱུར་སེལ་བྱེད། །གདོང་ནི་པདྨ་འདྲར་བྱེད་ཅིང་། །རྐང་པ་པདྨའི་འདབ་འདྲར་བྱེད། །ཅེས་བྱ་བ་ལ། ནས་ལ་སོགས་པ་ནས་བ་གཅིན་གྱི་
པར་གཟར་བུ་ལ་ཆགས་ཀྱི་བར་གྱི་ལྡེ་གུས་བསྐུས་ན་ངོ་ཤིག་སེལ་བར་བྱེད་པ་ལ་སོགས་པའི་ཡོན་ཏན་སྐྱེད་པར་བྱེད་དོ། །གུར་གུམ་ཤིང་མངར་བུ་ཤེལ་ཙེ། །ཙནྡན་སེར་དང་རྒྱ་སྐྱེགས་དང་། །ཙནྡན་དཀར་དང་ནྱ་གྲོ་དྷའི། །རྐང་པ་གཞོན་ནུ་ཤུག་པ་དང་། །དེ་བཞིན་པདྨ་གེ་སར་དང་། ཨུཏྤལ་
སྔོན་པོ་བཙོད་དང་བཅས། །སྲང་རེ་ཆུ་བྲེ་བཞི་ནང་དུ། །བསྐོལ་ཏེ་བཞི་ཆ་ལུས་པ་རུ། །རྒྱ་སྐྱེགས་བཙོད་དང་ལེ་བརྒན་རྩི། །ཤིང་མངར་གུར་གུམ་ཞོ་གཉིས་གཉིས། །ཕྱེ་མ་ཏིལ་མར་སྲང་བརྒྱ་དང་། །དེ་ཡི་ཉིས་འགྱུར་འོ་མ་བསྐོལ། །དེ་ནི་སྣ་སྨན་ཚུལ་བསྟེན་ན། །སྨེ་བ་ངོ་ཤིག་སྐྲ་དཀར་
དང་། །གཉེར་མ་གདོང་གི་དྲི་མ་སེལ། །གདོང་གི་ཤ་རྒྱས་མདོག་གསལ་བྱེད། །ཅེས་བྱ་བ་ལ། །གུར་གུམ་ལ་སོགས་པ་སྲང་རེ་ཇི་སྐད་སྨོས་པ་བཞིན་དུ་བསྟེན་ན་སྨེ་བ་ལ་སོགས་པ་སེལ་བར་བྱེད་ཅིང་གདོང་གི་ཤ་རྒྱས་པ་དང་། མདོག་གསལ་བར་བྱེད་པ་
ཡིན་ནོ། །བཙོད་དང་སེང་ཕྲོམ་ཤ་བ་རི། །རྒྱ་སྐྱེགས་ལྡོང་རོས་དུ་བ་རི། །གུར་གུམ་རུ་རྟ་སེར་པོ་གཉིས། །གིའུ་ཝང་ཙནྡན་རྣམ་གཉིས་དང་། །ནྱ་གྲོ་དྷ་ཡི་ལོ་མ་དང་། །དངུལ་ཆུ་རྨ་ཤིང་ཙནྡན་སེར། །དྷ་དུ་ར་ཡི་ཤུན་པ་ཡི། །ས་བོན་པདྨ་གེ་སར་དང་། །སྦྲ་ཚིལ་སྤངས་མ་ཤུག་པ་
เล่ม ๒๐๒ · หน้า 242b
སོགས། །ཞག་དང་འོ་མ་རྐང་དང་མར། །འོ་མ་ཅན་ཤིང་འོ་མ་ནི། །བསྐོལ་བའི་མར་ནི་བསྐུས་གྱུར་ན། །ངོ་ཤིག་གཉེར་མ་སོགས་འཇོམས་ཤིང་། །བཞིན་ནི་པདྨའི་མདངས་འདྲར་འགྱུར། །ཞེས་བྱ་བ་ལ། ཤ་བ་རི་ནི་བ་ཏི་ཀ་རི་འདྲའོ། །དུ་པ་རི་ནི་ཨ་ད་ཀའོ། །གཞན་ནི་གོ་བར་ཟད་དེ།
བཙོད་ལ་སོགས་པའི་སྨན་མར་བསྐོལ་བའི་ཚུལ་དུ་བསྐོལ་བའི་སྨན་མར་དེ་བཏུང་བ་དང་། སྣ་སྨན་ལ་སོགས་པར་བསྟེན་ངོ་ཤིག་དང་ཁབས་དང་གཉེར་མ་ལ་སོགས་པ་སེལ་བར་བྱེད་ཅིང་། བཞིན་རས་ཟླ་བའི་མདངས་དང་ལྡན་པར་བྱེད་དོ། །བྲིང་ག་ར་ཛའི་ཁུ་བར་ནི། །འོ་མ་ཆུ་བསྐོལ་སྣ་སྨན་
བསྔགས། །ཞེས་བྱ་བ་ལ། བྲིང་ག་ར་ཛའི་ཁུ་བ་ལ་སོགས་པའི་སྣ་སྨན་བཏང་ན་ཡང་ཕན་ནོ། །པགས་པ་ཚོར་མེད་ལ་རླུང་གི །གསོ་བ་དང་ནི་མེ་བཙའ་བྱ། །ཞེས་བྱ་བ་ལ། པགས་པ་ཚོར་བ་མེད་པའི་ནད་ལ་ནི་རླུང་ལས་གྱུར་པའི་མཛེ་ནད་ཀྱི་གསོ་བ་དང་། མེ་བཙའ་གདབ་པར་བྱས་ན་ཕན་ནོ། །ལྤགས་
ནད་ཟླུམ་པོར་བད་མཁྲིས་བཤད། །མཛེ་ནད་སེལ་བ་ཐམས་ཅད་ཕན། །ཞེས་བྱ་བ་ལ། ལྤགས་ནད་ཟླུམ་པོ་ཀོར་ཀོར་པོར་ན་བ་ལ་ནི། བད་ཀན་དང་མཁྲིས་པ་ལ་ཕན་པའི་སྨན་ཐམས་ཅད་དང་། དེ་བཞིན་དུ་མཛེ་ནད་ལ་ཕན་པའི་སྨན་དང་ཁ་ཟས་ལ་སོགས་པ་ཐམས་ཅད་ཕན་ནོ། །ཡན་
ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་གཉིས་པའི་རྣམ་པར་འགྲེལ་པའོ།། །།དེ་ནས་གསང་བའི་གནས་ཀྱི་ནད་དམིགས་ཤེས་པ་བཤད་པར་བྱའོ། །
བུད་མེད་ཉལ་པོ་སྤངས་པ་ལས། །མོད་ལ་བསྟེན་པར་གྱུར་པའམ། །ནད་དང་བཅས་ཤིང་དོག་པ་ལ། །དྲི་མ་ཅན་དང་ཟླ་མཚན་ནམ། །སྐྱེ་གནས་གཞན་དང་མི་འདོད་དང་། །འགྲོད་མིན་གསར་དུ་བཙས་པ་དང་། །དགའ་བའི་མཐར་ནི་དུག་ཅན་སོགས། །ཆུས་རེག་པའམ་
མ་བཀྲུས་དང་། །བསྐྱེད་པའི་བསལ་བས་སྨན་རྣོན་པོའི། །ལྡེ་གུ་ལ་སོགས་བསྐུས་པ་དང་། །ཁུ་ཚུར་སོ་དང་སེན་མོ་དང་། །གྲ་མ་དུག་ཅན་གྱིས་རེག་དང་། །ཤུགས་དག་པ་དང་ཡུན་རིང་དུ། །རེག་པ་རྩུབ་པས་བདར་པའམ། །ནད་གཞི་འཁྲུགས་པས་གསང་བར་ཞུགས། །
เล่ม ๒๐๒ · หน้า 243a
སོས་འཛིན་ལྟ་བུ་ལ་སོགས་ནད། །ཉི་ཤུ་རྩ་གསུམ་འབྱུང་བར་འགྱུར། །ཞེས་བྱ་བ་ལ། སྐྱེས་པ་བུད་མེད་ལ་འཁྲིག་པ་སྤྱོད་པའི་ཉལ་པོ་སྤངས་པར་གྱུར་པ་ལས་མོད་ལ་འཕྲལ་དུ་བུད་མེད་བསྟེན་ཅིང་སྤྱོད་པར་གྱུར་པའམ། ཡང་བུད་མེད་ནད་དང་བཅས་
པའམ། མཚན་དོག་པའམ། དྲི་མ་ཅན་ཟླ་མཚན་འཛག་བཞིན་པའམ། ཡང་ན་སྐྱེ་གནས་མི་མཐུན་པར་གྱུར་པ་གཞན་དག་གམ། བུད་མེད་མི་འདོད་བཞིན་དུ་ནན་གྱིས་འཇུག་པའམ། ཡང་ན་བགྲོད་པར་བྱ་བ་མ་ཡིན་པ་སྟེ་སློབ་དཔོན་ཀྱི་ཆུང་མ་ལ་སོགས་པ་ལྟ་བུའམ། གསར་དུ་
བུ་བཙས་པར་གྱུར་པ་དང་། ཡང་ན་དགའ་བའི་མཐའ་སྟེ། འཁྲིག་པ་སྤྱད་པའི་རྗེས་ལ་དུག་ལ་སོགས་པ་དང་འདྲེས་པའི་ཆུས་བཀྲུས་ཤིང་རེག་པར་གྱུར་པའམ། ཆུས་བཀྲུས་པར་མ་གྱུར་པའམ། ཡང་ན་ཕོ་མཚན་བསྐྱེད་པར་བྱ་བའི་བསམ་པས་སྨན་རྣོན་པོའི་ལྡེ་གུས་ཕོ་མཚན་ལ་བསྐུས་
པ་དང་། དེ་བཞིན་དུ་ཁུ་ཚུར་རམ་སོ་འམ་སེན་མོ་དང་གྲ་མ་དུག་ཅན་གྱིས་རེག་པར་བྱས་པ་དང་། དེ་བཞིན་དུ་བཤད་པ་ལ་སོགས་པའི་ཤུགས་དགག་པ་དང་ཡང་ན་ཡུན་རིང་དུ་རེག་པ་ཤིན་ཏུ་རྩུབ་པས་བདར་བར་གྱུར་པའམ། རླུང་ལ་སོགས་པའི་གནད་གཞི་འཁྲུགས་པས་གསང་བ་ཞེས་
བྱ་བ་མཚན་གྱི་ནང་དུ་ཞུགས་པ་སྟེ། རྒྱུ་དེ་དག་གིས་སོས་འཛིན་པ་ལ་སོགས་པའི་ནད་ཉིད་ཤུ་རྩ་གསུམ་སྐྱེད་པར་བྱེད་དོ། །སོས་འཛིན་ལྟ་བུ་འདིར་ལྔ་སྟེ། །ནད་གཞི་རེ་རེ་ཁྲག་ལས་གྱུར། །འདུས་པའི་ནད་ལས་གྱུར་བའོ། །ཞེས་བྱ་བ་ལ། འདིར་དེ་དག་གི་ནང་ནས་སོས་འཛིན་པའི་
ནད་རྣམ་པ་ལྔ་སྟེ། རླུང་ལ་སོགས་པ་ནད་གཞི་རེ་རེ་ལས་གྱུར་པ་གསུམ་དང་། ཁྲག་ལས་གྱུར་པ་དང་། འདུས་པ་ལས་གྱུར་པའོ། །དེ་ཡང་རླུང་གྱུར་ཕོ་མཚན་སྐྲངས། །ནད་མང་རྟག་ལྡང་ལྤགས་གས་པའོ། །ཞེས་བྱ་བ་ལ། དེ་ལ་སོས་འཛིན་པ་ཞེས་བྱ་བ་རྣམ་པ་ལྔ་ལས་
རླུང་ལས་གྱུར་པའི་སོས་འཛིན་པ་ནི་སྐྲངས་པ་དང་། །ནད་མང་པོ་སྣ་ཚོགས་ཀྱིས་འདེབས་པ་དང་། རྟག་ཏུ་ལྡང་བ་དང་། པགས་པ་གས་པར་འགྱུར་པ་ཡིན་ནོ། །མཁྲིས་པ་ལས་གྱུར་སྐྲངས་རིམས་འདེབས། ཨུ་དུམྺཱ་རའི་འབྲས་སྨིན་འདྲ། །ཞེས་བྱ་བ་ལ། མཁྲིས་པ་ལས་གྱུར་
เล่ม ๒๐๒ · หน้า 243b
པའི་སོས་འཛིན་པ་ནི་སྐྲངས་པ་དང་། རིམས་ཀྱིས་འདེབས་པ་དང་། སྐྲངས་པའི་མདོག་ཨུ་དུམྺཱ་རའི་འབྲས་བུ་སྨིན་པ་འདྲ་བ་ཡིན་ནོ། །བད་ཀན་གྱིས་མཁྲང་སྣུམ་པ་དང་། །གཡའ་ཞིང་སྐྲངས་ལ་ལྕི་བ་ཡིན། །ཞེས་བྱ་བ་ལ། བད་ཀན་ལས་གྱུར་པའི་སོས་འཛིན་པ་ནི་ཕོ་མཚན་ནམ་མཁྲང་པ་དང་
སྣུམ་པ་ལ་སོགས་པ་ཡིན་ནོ། །ཁྲག་གྱུར་འབྲུམ་དུ་ནག་པོ་འབྱུང་། །ཁྲག་འཛག་རིམས་ཀྱིས་འདེབས་པར་བྱེད། །ཅེས་བྱ་བ་ལ། ཁྲག་ལས་གྱུར་པའི་སོས་འཛིན་པ་ནི་འབྲུམ་བུ་ཕྲ་མོ་ནག་པོ་འབྱུང་བར་འགྱུར་པ་དང་། དེ་བཞིན་དུ་ཁྲག་འཛག་པ་ལ་སོགས་པ་ཡིན་ནོ། །
འདུས་གྱུར་མཚན་ཉིད་ཀུན་དང་ལྡན། །རླིག་འབྲས་གཉིས་ཀྱང་སྐྲངས་པར་བྱེད། །མི་བཟད་ན་ཞིང་ལྟུང་བ་དང་། །གས་ཤིང་སྲིན་བུ་སྐྱེ་བ་ཡིན། །ཞེས་བྱ་བ་ལ། ནད་གཞི་གསུམ་ཆར་འདུས་པ་ལས་གྱུར་པའི་སོས་འཛིན་པའི་མཚན་མ་ནི་ནད་གཞི་གསུམ་ཆར་གྱི་མཚན་ཉིད་དང་
ལྡན་པ་དང་། དེ་བཞིན་དུ་རླིག་པའི་འབྲས་བུ་གཉིས་ཀྱང་སྐྲངས་པར་བྱེད་པ་དང་། དེ་བཞིན་བརྣག་པར་དཀའ་ཞིང་མི་བཟད་པར་ན་ལ་ལྟུང་བར་འགུར་བ་དང་། སྲིན་བུ་རྣམས་སྐྱེ་བར་འགྱུར་བ་ཡིན་ནོ། །དེ་ལས་ཁྲག་གྱུར་འཚོ་བ་ཙམ། །འདུས་པ་ལས་གྱུར་འཆི་བར་བྱེད། །ཅེས་བྱ་བ་
ལ། ལྔ་བ་དེ་དག་ལ་ཁྲག་ལས་གྱུར་པའི་སོས་འཛིན་པ་མི་ལ་བཙམ་དུ་རེ་ཞིག་འཚོར་རུང་བ་ཡིན་ལ། འདུས་པ་ལས་གྱུར་པ་ནི་གསོར་མི་རུང་བ་ཡིན་ནོ། །ནང་འཁྲུགས་པ་ལས་ཕོ་མཚན་གནས། །ཤ་ཁྲག་ལས་ནི་ཕོ་མཚན་གྱི། །ཕྱི་འམ་ཡང་ན་ནང་དུ་ནི། །མཛེར་པ་གཡའ་
བར་བྱེད་པ་འབྱུང་། །ཁྲག་ནི་སྤྱི་བག་འཛག་པར་བྱེད། །ཅེས་བྱ་བ་ལ། རླུང་ལ་སོགས་པའི་ནད་འཁྲུགས་པ་ལས་ཕོ་མཚན་གྱི་གནས་སུ་ཤ་ཁྲག་ལ་བརྟེན་ཏེ། དེའི་ཕྱི་རོལ་བམ་ནང་དུ་ཤའི་འཛེར་པ་གཡའ་བར་བྱེད་པ་ལ་སོགས་པ་འབྱུང་བར་བྱེད་པ་ཡིན་ནོ། །མོ་མཚན་དེ་
འདྲ་གདུགས་ལྟར་འདུག །དེ་ནི་འབྲུམ་ནད། །ཅེས་བྱ་བ་ལ། དེ་བཞིན་དུ་མོ་མཚན་དུ་ཡང་ཤའི་མཛེར་པ་སྔ་མ་དེ་དང་འདྲ་བར་འཛེར་པ་དང་གཡའ་བར་བྱེད་པ་ལ་སོགས་པ་ལ་དབྱིབས་གདུགས་ལྟར་འདུག་པར་འགྱུར་ཏེ། མཛེར་པའི་ནད་དེ་ནི་འབྲུམ་ནད་
เล่ม ๒๐๒ · หน้า 244a
ཅེས་བྱའོ། །མ་གསོས་ན། ཕོ་མོའི་ཁུ་ཁྲག་ཉམས་བྱེད་གསོད། །ཅེས་བྱ་བ་ལ། ནད་དེ་དག་གསོ་བར་མ་བྱས་ན་སྐྱེས་པའི་ཕོ་མཚན་ཉམས་ཤིང་ཁུ་བ་འབྱུང་བར་མི་བྱེད་པར་གསོད་པ་དང་། །བུད་མེད་ཀྱི་ཁྲག་ཉམས་ཤིང་གསོད་པར་བྱེད་དོ། །ཕོ་མཚན་གྱི་
ནི་ཕྱི་འམ་ནང་། །བད་ཀན་ཁྲག་གྱུར་འབྲུམ་ཕྲན་ནི། །ཚད་དང་དབྱིབས་ནི་ཡུངས་ཀར་འདྲ། །སྟུག་པོའི་ཡུངས་ཀར་ཞེས་བྱར་བཤད། །ཅེས་བྱ་བ་ལ། ཕོ་མཚན་གྱི་ཕྱི་རོལ་ལམ་ནང་དུ་བདྨ་ཀན་དང་། ཁྲག་ལས་གྱུར་པའི་འབྲུམ་ཕྲན་ཚད་དང་དབྱིབས་ཡུངས་ཀར་འདྲ་བ་སྟུག་པོར་བྱུང་བ་
དེ་ནི། ཡུངས་ཀར་ལྟ་བུའི་འབྲུམ་ཕྲན་ཞེས་བྱའོ་ཞེས་དྲང་སྲོང་རྣམས་ཀྱིས་བཤད་དོ། །བད་ཀན་ཁྲག་གྱུར་འབྲུམ་བུ་ནི། །རིང་ཞིང་མང་པོར་གྱུར་པ་ལ། །དབུས་ནས་གས་པ་གང་ཡིན་པ། །དེ་ནི་ངེས་པ་འཇོམས་ཞེས་བྱ། །ན་ཞིང་བ་སྦུ་བརྩེ་བར་བྱེད། །ཅེས་བྱ་བ་ལ། བད་ཀན་དང་
ཁྲག་འཁྲུགས་པར་གྱུར་པ་ལས། འབྲུམ་བུ་ཕྲ་མོ་དབྱིབས་རིང་ཞིང་མང་པོར་འབྱུང་བར་འགྱུར་ལ། དེས་མཚན་ཀྱི་དབུས་ནས་གས་པར་གྱུར་པ་གང་ཡིན་པ་དེ་ནི་མིང་ངེས་པར་འཇོམས་པ་ཞེས་བྱ་སྟེ། དེ་ནི་ན་བ་དང་བ་སྤུ་བརྩེ་བར་བྱེད་པ་ཡིན་ནོ། །ཁྲག་མཁྲིས་ལས་གྱུར་འཛམ་བུ་ཡི། །
རུས་པ་ལྟར་འདུག་ཁོང་སྟོང་ཅན། །ཞེས་བྱ་བ་ལ། ཕོ་མཚན་ཁྲག་དང་མཁྲིས་པ་ལས་གྱུར་པའི་འབྲུམ་བུ་འཛམ་བུའི་རུས་པའམ། ཚི་གུ་འདྲ་བ་མྱུར་དུ་སྨིན་པར་བྱེད་པ་འབྱུང་བ་གང་ཡིན་པ་དེ་ནི་མེད་ཁོང་སྟོང་ཅན་ཞེས་བྱའོ། །འབྲས་བྱེར་གཅིན་སྙི་འདྲ་ཤེས་བྱ། །ཞེས་བྱ་བ་ལ། འབྲས་བྱེར་བ་ཞེས་བྱ་
བའི་མཚན་ཉིད་ཀྱི་ནད་ནི་རང་བཞིན་གཅིན་སྙི་བ་དང་འདྲ་བར་ཤེས་པར་བྱའོ། །ཁྲག་མཁྲིས་ལས་གྱུར་འབྲུམ་ཕྲན་ནི། །མ་ཤ་མུངྒ་འདྲ་མཆོག་ཡིན། །ཞེས་བྱ་བ་ལ། ཁྲག་དང་མཁྲིས་པ་ལས་གྱུར་པའི་འབྲུམ་ཕྲན་མོན་སྲན་རྡེའུའི་དབྱིབས་འདྲ་བ་སྐྱེས་པ་གང་ཡིན་པ་དེ་ནི་མཆོག་ཅེས་བྱ་བ་ཡིན་པར་ཤེས་
བར་བྱའོ། །པདྨའི་སྟེང་དུ་གེ་སར་བཞིན། །འབྲུམ་བུ་འབྲུམ་ཕྲན་གྱིས་ཁྱབ་པ། །དེ་ནི་པདྨ་ཅན་ཞེས་བྱ། །ཞེས་བྱ་བ་ལ། །འབྲུམ་བུ་གང་མཚན་གྱི་སྟེང་དུ་པདྨ་ལ་གེ་སར་བྱུང་བ་ལྟ་བུའི་འབྲུམ་ཕྲན་གྱིས་ཁྱབ་པ་གང་ཡིན་པ་དེ་ནི་པདྨ་ཅན་ཞེས་བྱའོ། །ལག་པ་གཉིས་ཀྱིས་རབ་མཉེས་པ། །དེ་ནི་མཉེས་
เล่ม ๒๐๒ · หน้า 244b
པའི་འབྲུམ་བུར་འགྱུར། །ཞེས་བྱ་བ་ལ། མཚན་ལག་པ་གཉིས་ཀྱིས་ཤིན་ཏུ་མཉེས་པ་ལས་འབྲུམ་བུར་གྱུར་པ་ནི་མཉེས་པའི་འབྲུམ་བུ་ཞེས་བྱའོ། །མཚན་ནི་མཉེས་པར་གྱུར་པ་ལས། །རླུང་འཁྲུགས་གྱུར་པ་མཉེས་པ་ཡིན། །ཞེས་བྱ་བ་ལ། མཚན་མ་ལག་པས་ཡང་དང་ཡང་
དུ་མཉེས་ཉེས་པར་གྱུར་པ་ལས་རླུང་འཁྲུགས་པར་གྱུར་པའི་ནད་ནི་མིང་མཉེས་པ་ཞེས་བྱའོ། །མི་མཉམ་སྲ་ཞིང་ཡོན་པོར་ནི། །རླུང་འཁྲུགས་གྱུར་པ་གཏུན་ཤིང་ཡིན། །ཞེས་བྱ་བ་ལ། རླུང་ལས་གྱུར་པའི་མཚན་ནད་རང་བཞིན་མི་མཉམ་པ་དང་། སྲ་བ་དང་ཡོན་པོར་གྱུར་པ་ནི་དྲང་སྲོང་
རྣམས་ཀྱིས་གཏུན་ཤིང་ཞེས་བཤད་དོ། །རླུང་གིས་མཉེས་པ་ལ་སོགས་པའི། །ནད་འཁྲུགས་མཚན་གྱི་པགས་པ་ནི། །ལྡོག་ཅིང་ཚ་ལ་ནད་བཅས་ཤིང་། །ལ་ལར་ཤུ་བ་དག་ཏུ་འགྱུར། །འདུས་ཤིང་མདུད་པ་ཆགས་པ་ནི། །དེ་ཡི་ནོར་བུ་ཐུར་དུ་འཕྱང་། །པགས་པ་ལྡོག་པའི་ནད་
ཅེས་བྱ། །ཞེས་བྱ་བ་ལ། རླུང་ལས་མཉེས་པ་ལ་སོགས་པའི་ནད་འཁྲུགས་པར་འགྱུར་པ་དང་། ཕོ་མཚན་གྱི་པགས་པ་ཕྱིར་ལྡོག་ཅིང་ནད་དང་བཅས་པར་གྱུར་པ་དང་། ལ་ལར་པགས་པ་དེ་ཤུ་བ་བྱུང་བར་གྱུར་ལ། དེ་ཡང་ཕྱོགས་གཅིག་ཏུ་འདུས་ཤིང་མདུད་པའམ། རྨེན་བུ་
ཆགས་པས་མཚན་དེའི་མགོ་བོ་ནོར་བུ་ཞེས་བྱ་བ། ཐུར་དུ་འཕྱང་བར་གྱུར་པ་དེ་ནི་པགས་པ་ལྡོག་པའི་ནད་ཅེས་བྱའོ་ཞེས་དྲང་སྲོང་རྣམས་ཀྱིས་བཤད་དོ། །བད་ཀན་བཅས་ལས་གཡའ་ཞིང་སྲ། །རྨ་འཚོབ་དཀའ་ཞིང་པགས་པ་གས། །གས་པའི་ནད་ཅེས་བྱ་བར་བཤད། །ཅེས་བྱ་བ་
ལ། པགས་པ་དེ་བད་ཀན་དང་བཅས་པས་གཡའ་བ་དང་སྲ་བ་ལ་སོགས་པའི་མཚན་ཉིད་དང་ལྡན་པའི་ནད་དེ་ནི་གས་པ་ཞེས་བྱའོ། །རླུང་གིས་པགས་པ་གནོད་འགྱུར་ཞིང་། །ནོར་བུ་འབྱར་ཞིང་གཅིན་འགག་འགྱུར། །དེ་ལས་རྒྱུན་ཕྲན་ནད་མེད་འབྱུང་། །ནོར་བུའི་ཁ་ནི་འགགས་གྱུར་
པས། །དེ་ནི་ནོར་བུའི་ནད་ཅེས་བྱ། །ཞེས་བྱ་བ་ལ། ཕོ་མཚན་གྱི་པགས་པ་ལ་རླུང་གིས་གནོད་ཅིང་མ་རུང་བར་གྱུར་པས། ནོར་བུའི་ཕྱོགས་སུ་འབྱར་ཅིང་གཅིན་གྱི་རྒྱུན་འགགས་པར་གྱུར་པ་དེ་ནས་གཅིན་གྱི་རྒྱུན་ཕྲ་ཞིང་ནད་མེད་པར་འབྱུང་བར་འགྱུར་ལ། ནོར་བུ་ཁ་འགགས་པར་
เล่ม ๒๐๒ · หน้า 245a
གྱུར་པ་ནི་ཕོ་མཚན་གྱི་རྩེ་མོའི་ནོར་བུའི་ནད་ཅེས་བྱའོ། །བད་ཀན་ལས་གྱུར་མཚན་གྱི་ནང་། །གྲ་མས་གང་སྙམ་མདུད་པའི་ནད། །ཅེས་བྱ་བ་ལ། ཕོ་མཚན་གྱི་ནང་གྲ་མས་གང་བ་སྙམ་དུ་སེམས་པའི་ནད་དེ་ནི་བད་ཀན་ལས་གྱུར་པ་ཡིན་ཏེ། དེ་ནི་མདུད་པ་ཅན་གྱི་ནད་
ཅེས་བྱའོ། །གྲ་མས་གནོད་པའི་ཁྲག་གི་ནད། །ཚོར་བ་ཉམས་པ་དེ་མིང་ཅན། །ཞེས་བྱ་བ་ལ། གྲ་མས་གང་བ་ལྟ་བུའི་ནད་ཀྱིས་ཁྲག་ལ་གནོད་པར་གྱུར་ལ། དེས་ན་ཚོར་བ་ཉམས་པར་གྱུར་པ་དེ་ནི་དེའི་མིང་ཅན་ཏེ་ཚོར་བ་ཉམས་པ་ཞེས་བྱའོ། །རླུང་དང་ཁྲག་མཁྲིས་ལས་གྱུར་
པ། །བུ་གའི་རྩེ་མོ་ཕྲ་བ་ཡིས། །མཚན་གྱི་ནང་ནི་ཀུན་ཏུ་ཁྱབ། །དེ་ནི་ཁ་བརྒྱ་པ་ཞེས་བྱ། །ཞེས་བྱ་བ་ལ། མཚན་གྱི་ནང་ན་བུ་ག་ཕྲ་མོ་དང་ལྡན་པས་ཀུན་ཏུ་ཁྱབ་པར་གྱུར་པའི་ནད་རླུང་དང་ཁྲག་དང་མཁྲིས་པ་ལས་གྱུར་པ་དེའི་མིང་ནི་ཁ་བརྒྱ་བ་ཞེས་བྱའོ། །ཁྲག་
མཁྲིས་ལས་གྱུར་པགས་པ་རྣམས། །ཚ་ཞིང་རིམས་བཅས་པགས་པ་སྨིན། །ཞེས་བྱ་བ་ལ། ཕོ་མཚན་གྱི་པགས་པར་ཁྲག་དང་མཁྲིས་པ་ལས་གྱུར་པའི་ནད་རྣགས་པ་ལ་སོགས་པ་གང་ཡིན་པ་དེ་ནི་པགས་པ་སྨིན་པ་ཞེས་བྱའོ། །འདུས་པ་ལས་གྱུར་ཤ་རྣམས་
ནི། །ཐམས་ཅད་ངན་པས་སྨིན་པ་ཡིན། །ཞེས་བྱ་བ་ལ། ནད་གཞི་གསུམ་འདུས་པ་ལས་གྱུར་པའི་ནད་པགས་པ་རྣགས་ཤིང་ནད་སྣ་ཚོགས་པ་ཐམས་ཅད་དང་ལྡན་པ་ནི་མིང་ཤ་སྨིན་པ་ཞེས་བྱའོ། །འབྲུམ་བུ་གནག་ཅིང་དམར་པ་ཡི། །འབྲུམ་བུ་དག་གིས་གནོད་གྱུར་ཞིང་། །ཕོ་
མཚན་ཤིན་ཏུ་ན་བ་གང་། །དེ་ནི་ཁྲག་གི་འབྲུམ་བུ་ཡིན། །ཞེས་བྱ་བ་ལ། མཚན་གང་ལ་འབྲུམ་བུ་གནག་པ་ལ་སོགས་པ་དག་གིས་གནོད་པར་གྱུར་པ་གང་ཡིན་པ་དེ་ནི་མིང་ཁྲག་གི་འབྲུམ་བུ་ཞེས་བྱའོ། །ཤ་ཡི་མཛེར་པ་སྔར་བཤད་དོ། །ཞེས་བྱ་བ་ལ། མཚན་ལ་ཤ་ཡི་མཛེར་
པ་སྐྱེས་པ་གང་ཡིན་པ་དེ་ནི་སྔར་བཤད་པ་ཡིན་ནོ། །ཁོང་འབྲས་ནད་གཞི་གསུམ་ལས་སྐྱེས། །ཞེས་བྱ་བ་ལ། མཚན་ལ་ཁོང་འབྲས་ནད་གཞི་གསུམ་ལས་གྱུར་པ་འབྱུང་སྟེ། །དེ་ཡང་སྔར་བཤད་པ་ཡིན་ནོ། །འདུས་པས་མཚན་ནི་རྣགས་གྱུར་ཞིང་། །ཤ་ནི་
เล่ม ๒๐๒ · หน้า 245b
ནག་པོར་གྱུར་པ་དང་། །ཀུན་ནས་ཞིག་པར་བྱེད་པ་གང་། །དེ་ནི་ཏིལ་ནག་ཅེས་བརྗོད་བཤད། །ཅེས་བྱ་བ་ལ། འདུས་པའི་ནད་འཁྲུགས་པ་ལས་ཕོ་མཚན་རྣགས་པ་ལ་སོགས་པར་གྱུར་པ་གང་ཡིན་པ་དེ་ནི་ཏིལ་ནག་ཅེས་བྱའོ། །ཤ་ལས་གྱུར་པའི་འབྲུམ་བུ་
རྣགས། །ཁོང་འབྲས་ཏིལ་ནག་ཅེས་བྱའོ། །བཞི་པོ་འདི་དག་སྤང་བར་བྱ། །ལྷག་མ་རྣམས་ནི་མྱུར་དུ་གསོ། །ཞེས་བྱ་བ་ལ། མཚན་གྱི་ནད་དེ་རྣམས་ཀྱི་ནང་ནས་ཤའི་འབྲུམ་བུ་ལ་སོགས་པ་བཞི་བོ་དག་ནི་ཡོངས་སུ་སྤང་བར་བྱའོ། །ལྷག་པ་ནད་བཅུ་དྲུག་པ་ནི་མྱུར་
དུ་གསོ་བར་བྱའོ། །ཁ་ཟས་གནོད་པ་ཟོས་པ་དང་། །མལ་སྟན་མི་བདེར་ཉལ་བ་དང་། །ཉལ་པོ་བསྟེན་ནི་དྲགས་པ་དང་། །ནང་ན་ནད་ཁྲག་སྨན་གནོད་དང་། །ས་བོན་ཉེས་པ་རྣམ་སྨིན་པས། །མངལ་གྱི་ནད་ནི་ཉི་ཤུར་འགྱུར། །ཞེས་བྱ་བ་ལ། ཁ་ཟས་མི་འཕྲོད་པ་ལ་སོགས་པའི་རྒྱུས་མངལ་གྱི་ནད་ཉི་ཤུ་
འབྱུང་བར་འགྱུར་ཏེ། ཁ་ཟས་གནོད་པ་ཟོས་པ་དང་། མལ་སྟན་མི་བདེ་བ་ལ་གནོད་པ་དང་བཅས་པར་ཉལ་བ་དང་། འཁྲིག་པའི་ཉལ་པོ་ཧ་ཅང་བསྟེན་དྲགས་པ་དང་། དེ་བཞིན་དུ་ནད་ཁྲག་ཅན་གྱི་ཟླ་མཚན་འཛག་པ་དང་། གནོད་པར་བྱེད་པའི་སྨན་བསྟེན་པ་
དང་། ས་བོན་ཉེས་པ་དང་ལྡན་པ་དང་། སྔོན་གྱི་ལས་ནི་མི་དགེ་བ་བྱས་པའི་རྣམ་པར་སྨིན་པས་ནད་དུ་འགྱུར་རོ། །རླུང་གིས་མངལ་ལ་གནོད་གྱུར་བས། །ན་ཟུག་ཡངས་ཤིང་ཚོར་བ་མེད། །གྲོག་མས་ཁྱབ་པ་སྙམ་དུ་སེམས། །སྲ་ཞིང་རྩུབ་པ་
སྒྲ་དང་བཅས། ཟླ་མཚན་སླ་ཞིང་ལྦུ་བ་ཅན། །ཉུང་ཞིང་གནག་པ་འཛག་པར་བྱེད། །ཆུ་སོ་རྩིབ་ལོགས་ལྷོད་པ་དང་། །ན་ཞིང་རིམ་གྱིས་སྐྲན་བསྐྱེད་ལ། །རང་ངན་ཉེས་པ་དེ་དང་དེ། །དེ་ནི་རླུང་ཅན་ཡིན་ཞེས་བཤད། །ཅེས་བྱ་བ་ལ། །རླུང་
གིས་ནད་འཁྲུགས་པར་གྱུར་པ་ལས་མོ་མཚན་ནམ་མང་དུ་ན་ཞིང་ཟུག་པར་འགྱུར་པ་དང་། ཡངས་ཤིང་ཁ་འབྱེ་བ་དང་། ཚོར་བ་མེད་ཅིང་བེམ་པོར་འདུག་པ་དང་། གྲོག་མས་ཁྱབ་ཅིང་རྒྱུ་བ་སྙམ་དུ་སེམས་པ་དང་། སྲ་ཞིང་རེངས་པ་དང་། རྩུབ་པ་
เล่ม ๒๐๒ · หน้า 246a
དང་། སྒྲ་དང་བཅས་པར་བྱེད་པ་དང་། ཟླ་མཚན་སླ་བ་ལ་སོགས་པ་འཛག་པ་དང་། ཆུ་སོ་ལ་སོགས་པ་ལྷོད་པ་དང་། ལྷང་ལྷང་པོར་ན་བ་དང་། རིམ་གྱིས་གནས་དེར་སྐྲན་སྐྱེ་བར་འགྱུར་པ་དང་། དེ་བཞིན་དུ་རླུང་ལས་གྱུར་པའི་ནད་
ཀྱི་ཉེས་པ་འདིར་མ་སྨོས་པས་གཞན་ཡང་བྱེད་དེ། ནད་དེ་ནི་མིང་རླུང་ཅན་ཞེས་བྱའོ། །དེ་ཉིད་ཤས་ཆར་སྤྱད་ན་སྐྲང་། །བཅས་པ་ཉལ་པོ་དྲགས་ཞེས་བྱ། །ཞེས་བྱ་བ་ལ། རླུང་ཅན་གྱི་ནད་དེ་ཉིད་ལ་ཤས་ཆེར་ཉལ་པོ་སྤྱད་ཅིང་བསྟེན་དྲགས་ན་སྐྲང་བ་དང་བཅས་པར་
འགྱུར་ཏེ། དེ་ནི་ཉལ་པོ་དྲགས་པའི་ནད་ཅེས་བྱའོ། །ཤིན་ཏུ་གཞོན་ལ་འཁྲིག་པ་སྤྱད། །རྒྱབ་དང་ཆུ་སོ་བྱིན་པར་ནི། །ན་ཞིང་མངལ་ལ་གནོད་བྱེད་པ། །དེ་ནི་སྤྱད་སྔས་པ་ཞེས་བྱ། །ཞེས་བྱ་བ་ལ། བུད་མེད་ཤིན་ཏུ་གཞོན་པ་ལ་འཁྲིག་པ་སྤྱད་པས། རྒྱབ་དང་། ཆུ་སོ་དང་།
བྱིན་པ་ན་ཞིང་། མངལ་ལམ་མོ་མཚན་ལ་གནོད་པར་བྱེད་པ་དེ་ནི་སྤྱད་སྔས་པའི་ནད་ཅེས་བྱའོ། །ཤུགས་འཁྱིལ་པ་ཡི་མངལ་དུ་ནི། །རླུང་གིས་གནོད་པར་གྱུར་པ་ལས། །ཟླ་མཚན་ལྦུ་བ་ཅན་འབྱུང་བ། །འཁྱིལ་པ་ལྟ་བུར་སྣང་གྱུར་པ། །ནད་འདི་འཁྱིལ་བ་ཅན་ཞེས་བྱ། །ཞེས་
བྱ་བ་ལ། གང་གི་ཚེ་ཤུགས་བཀག་པ་ལ་སོགས་པའི་རྒྱུས་མངལ་དུ་རླུང་གིས་གནོད་པ་སྐྱེད་པར་གྱུར་པས་ཟླ་མཚན་ལྦུ་བ་ཅན་འབྱུང་བར་འགྱུར་ཞིང་། དེ་ཡང་དབའ་འཁྱིལ་བ་ལྟར་སྣང་བ་འདི་ནི་འཁྱིལ་པ་ཅན་ཞེས་བྱའོ། །གང་ཚེ་རླུང་ནི་རྩུབ་པོས་བུ། །སྐྱེ་ཞིང་སྐྱེ་ཞིང་གསོད་
བྱེད་པ། །སྐྱེས་ནས་གསོད་པ་ཞེས་བྱར་བཤད། །ཅེས་བྱ་བ་ལ། གང་གི་ཚེ་རླུང་འཁྲུགས་པའི་རྩུབ་པའི་དབང་གིས་མངལ་གྱི་ནང་དུ་སྐྱེ་ཞིང་སྐྱེ་ཞིང་འཆི་བར་བྱེད་པ་དེ་ནི་སྐྱེས་ནས་གསོད་པ་ཞེས་བྱའོ། །འགྲངས་དྲགས་མི་མཉམ་གནས་པར་ནི། །འདོད་པ་སྤྱད་པས་
རླུང་འཁྲུགས་ཤིང་། །གཞན་གྱིས་གནོད་པར་གྱུར་པ་ལས། །མཚོན་གྱི་བུ་ག་ཤ་རུས་ལ། །གནོད་གྱུར་མངལ་ནི་ཡོན་པོར་འགྱུར། །ན་གྱུར་ནང་དུ་ཁ་བལྟས་ཡིན། །ཞེས་བྱ་བ་ལ། བུད་མེད་ཁ་ཟས་ཀྱིས་འགྲངས་དྲགས་པ་མི་མཉམ་པར་གནས་པ་ལ་འདོད་པ་སྦྱད་པས་
เล่ม ๒๐๒ · หน้า 246b
རླུང་ནད་གཞན་གྱིས་བསྐྱོད་ཅིང་གནོད་པར་གྱུར་བ་ལས། མོ་མཚན་གྱི་བུ་ག་དང་ཤ་དང་རུས་པས་གནོད་པར་གྱུར་པས་ཡོན་པོར་འགྱུར་ཏེ། ནད་དེའི་མིང་ནི་ནང་དུ་ཁ་བལྟས་པ་ཞེས་བྱའོ། །ཁ་ཟས་རླུང་ཅན་བསྟེན་པ་ཡིས། །ཟླ་མཚན་རླུང་གིས་གནོད་གྱུར་ཞིང་། བུད་
མེད་མོ་མཚན་ཞུམ་གྱུར་བར། །བྱེད་པ་དེ་ནི་ཁབས་མིག་ཡིན། །ཞེས་བྱ་བ་ལ། ཁ་ཟས་རླུང་ཅན་བསྟེན་པའི་དབང་གིས་རླུང་འཁྲུགས་པར་འགྱུར་ཞིང་། བུད་མེད་ཀྱི་མོ་མཚན་ཞུམ་པར་གྱུར་པ་དེ་ནི་མིང་ཁབས་མིག་ཅན་ཞེས་བྱའོ། །དུས་སུ་ཤུགས་བཀག་རླུང་འཕེལ་
བས། །བཤང་དང་གཅི་བ་འགག་བྱེད་ཅིང་། །མོ་མཚན་སྐམ་པར་བྱེད་པ་དང་། །ཤས་ཆེར་ན་བ་མངལ་སྐམས་ཡིན། །ཞེས་བྱ་བ་ལ། དགའ་བར་སྦྱོད་པའི་དུས་སུ་ཤུགས་བཀག་པས་རླུང་འཁྲུགས་ཏེ། བཤང་བ་དང་གཅི་བ་འགག་པར་བྱེད་པའི་ནད་དེ་ནི་མོ་མཚན་
སྐམ་ཞིང་ཤིན་ཏུ་ན་བར་བྱེད་པ་ཡིན་པས་ན་མངལ་སྐམས་པ་ཞེས་བྱའོ། །ཞག་དྲུག་གམ་ནི་ཞག་འདུན་ནས། །རླུང་གིས་མངལ་གནས་ཁུ་བ་འབྱིན། །ནད་བཅས་པ་འམ་ནད་མེད་པ། །དེ་ནི་ཁུ་བ་སློན་ཞེས་བྱ། །ཞེས་བྱ་བ་ལ། བུད་མེད་གང་འདོད་པ་སྦྱད་ནས་ཞག་དྲུག་
གམ་བདུན་རླུང་གིས་མངལ་གྱི་གནས་ནས་ཁུ་བ་ནད་མེད་པ་འམ་ནད་དང་བཅས་པ་འབྱིན་པར་བྱེད་པའི་ནད་དེ་ནི་ཁུ་བ་སློན་པ་ཞེས་བྱའོ། །བུད་མེད་མངལ་དང་ས་བོན་གྱི། །ཉེས་པ་རླུང་གིས་གནོད་གྱུར་ཞིང་། །འཁྲིག་པར་མི་དགའ་ནུ་མ་མེད། །མ་ནིང་ཡིན་ཏེ་གསོར་མི་རུང་། །
ཞེས་བྱ་བ་ལ། བུད་མེད་ཀྱི་མངལ་དུ་སྐྱེས་པའི་ས་བོན་གྱི་ཉེས་པར་རླུང་གིས་ནད་སྐྱེད་དེ་འཁྲིག་པ་ལ་མི་དགའ་ཞིང་སྐྱེས་པ་མི་འདོད་པ་གྱུར་པ་དང་། ནུ་མ་མེད་པར་གྱུར་པ་ནི་མིང་མ་ནིང་ཞེས་བྱ་སྟེ། དེ་ནི་གསོར་མི་རུང་བ་ཡིན་ནོ། །མངལ་གྱི་ནང་དུ་རླུང་གིས་ནི། །གནོད་གྱུར་མོ་མཚན་
ཁོང་ཁར་གནས། །བྱེ་བའམ་ལྷོད་པར་གྱུར་པ་དང་། །རླུང་ཅན་བཞིན་དུ་ན་གྱུར་པ། །ཤ་ནི་མཐོ་བར་གྱུར་པ་སྟེ། །མོ་མཚན་ཆེ་ནད་ཚབས་ཆེ་བྱ། །ཞེས་བྱ་བ་ལ། མངལ་གྱི་ནང་དུ་རླུང་གིས་གནོད་པ་བྱས་ནས། མངལ་གྱི་ཁ་དང་ཁོང་བར་གནས་ཏེ་མོ་མཚན་བྱེ་བའམ། །ལྷོད་
เล่ม ๒๐๒ · หน้า 247a
ལྷོད་པོར་གྱུར་ཅིང་རླུང་ཅན་གྱི་ནད་ལྟར་ན་བ་དང་། ཤ་མཐོལ་མོ་མཚན་ཆེ་ཞིང་རྒྱས་པར་གྱུར་པ་ནི། མོ་མཚན་ཆེ་བ་དང་ནད་ཚབས་ཆེ་བ་ཞེས་བྱའོ། །མཁྲིས་པ་མངལ་ན་གནས་པ་ཡི། །ནང་གི་ནད་གཞིས་གནོད་གྱུར་པ། །ཚ་བའམ་རྣགས་པར་བྱེད་འགྱུར་
ཞིང་། །དྲི་མནམ་རིམས་ཀྱིས་འདེབས་པ་དང་། །ཤིན་ཏུ་ཚ་ཞིང་རོ་ལྟར་མནམ། ཟླ་མཚན་སྔོ་ནག་སེར་པོར་འཛག །ནད་དེ་མཁྲིས་པ་ཅན་ཞེས་བྱའོ། །ཞེས་བྱ་བ་ལ། མཁྲིས་པ་རང་གི་གནོད་པའི་རྒྱུས་འཁྲུགས་པར་གྱུར་པ་མངལ་ན་གནས་པ་དེ་ཚ་བ་ལ་སོགས་ཟླ་མཚན་འཛག་པར་འགྱུར་ཏེ། །
ནད་དེ་ནི་མཁྲིས་པ་ཅན་ཞེས་བྱའོ། །ཟླ་མཚན་ཆེར་འཛག་ཁྲག་ཅན་ཡིན། །ཞེས་བྱ་བ་ལ། ཟླ་མཚན་ཤས་ཆེར་འཛག་པ་ནི་མིང་ཁྲག་ཅན་ཞེས་བྱའོ། །བད་ཀན་སྐྱེད་པར་བྱེད་པ་ཡིས། །མོ་མཚན་གནོད་གྱུར་ན་བ་མེད། །གྲང་ཞིང་གཡའ་ལ་དཀར་བ་དང་། །སྤྱི་བག་ཏུ་ནི་འཛག་པར་བྱེད། །ནད་དེ་བད་ཀན་ལས་
གྱུར་ཡིན། །ཞེས་བྱ་བ་ལ། བད་ཀན་སྐྱེད་པར་བྱེད་པའི་ཁ་ཟས་ལ་སོགས་པས་བད་ཀན་འཁྲུགས་ཏེ། དེའི་དབང་གིས་མོ་མཚན་ན་བ་མེད་ཅིང་གྲང་པ་ལ་སོགས་པའི་ནད་དང་ལྡན་པ་ནི་བད་ཀན་ཅན་གྱི་མངལ་ནད་ཅེས་བྱའོ། །རླུང་མཁྲིས་འཁྲུགས་པས་ཟླ་མཚན་ཟད། །ཚ་ཞིང་ལུས་སྐེམས་མདོག་
མི་སྡུག །དེ་ནི་ཁྲག་ཟད་པ་ཞེས་བྱ། །ཞེས་བྱ་བ་ལ། རླུང་དང་མཁྲིས་པ་འཁྲུགས་པས་ཟླ་མཚན་ཟད་པ་ལ་སོགས་པ་ཁྲག་ཟད་པའི་ནད་ཅེས་བྱའོ། །མཁྲིས་པ་ཤས་ཆེ་ཉལ་པོ་བསྟེན། །སྦྲིད་པ་སྒྲེགས་པ་བཀག་པ་ལས། །མཁྲིས་པར་བཅས་པའི་རླུང་གིས་ནི། །མངལ་དུ་གནོད་པ་སྐྱེད་
པར་འགྱུར། །སྐྲང་ཞིང་ཉམ་ཐག་རེག་མི་བཟོད། །ཟླ་མཚན་སྔོ་དང་སེར་པོ་འབྱུང་། །ཕོ་བའི་ལྟོ་ནི་ལྕི་བ་དང་། །འཁྲུ་ཞིང་ཡི་ག་འཆུས་པར་བྱེད། །ཆུ་སོ་བརླན་ནི་ཞིང་ཟུག །རིམས་སྐྱེད་ཡོངས་རྒྱས་ནད་ཅེས་བྱ། །ཞེས་བྱ་བ་ལ། བུད་མེད་མཁྲིས་པ་ཤས་ཆེ་བ་ལ་ཉལ་པོ་བསྟན་པར་འགྱུར་བ་
དང་། སྦྲིད་པ་སྒྲེགས་པ་བཀག་པར་གྱུར་པའི་རྒྱུ་ལས་མཁྲིས་པ་དང་རླུང་འཁྲུགས་པར་གྱུར་པས་མངལ་དུ་ནད་སྐྱེད་པར་བྱེད་དོ། །དེ་ནི་སྐྲངས་པ་ལ་སོགས་པའི་མཚན་ཉིད་ཅན་གང་ཡིན་པ་དེ་ནི་ཡོངས་སུ་རྒྱས་པའི་ནད་ཅེས་བྱའོ། །རླུང་དང་བད་ཀན་ནད་ཀྱིས་ཁྱབ། །མངལ་
เล่ม ๒๐๒ · หน้า 247b
ནས་སྐྱ་ཞིང་སྦྱི་བག་འཛག །ཉེ་བར་འཛག་པ་ཞེས་བྱའོ། །ཞེས་བྱ་བ་ལ། མངལ་དུ་རླུང་དང་བད་ཀན་གྱི་ནད་ཀྱིས་ཁྱབ་པར་གྱུར་པ་ལས་སྐྱ་བ་ལ་སོགས་པ་འཛག་པའི་ནད་དེ་ནི་ཉེ་བར་འཛག་པ་ཞེས་བྱའོ། །སྲིན་བུ་སྐྱེས་ཞིང་གཡའ་བས་འདོད་པ་
ལ། །རབ་གདུངས་དེ་ནི་རྣམ་པར་གཡེང་ཞེས་བྱ། །ཞེས་བྱ་བ་ལ། མངལ་དུ་སྲིན་བུ་སྐྱེས་ཤིང་གཡའ་བ་ལ་སོགས་པའི་མཚན་ཉིད་དང་ལྡན་པ་དེ་ནི་རྣམ་པར་གཡེང་བ་ཞེས་བྱའོ། །དུས་མིན་སྦྱོད་པར་གྱུར་པས་རླུང་། །བད་ཀན་ཁྲག་དང་འདྲེས་གྱུར་ཏེ། །ཟླ་
མཚན་ལམ་ནི་འགགས་བྱེད་དེ། །མངལ་དུ་ལྟེ་བ་སྐྱེད་པར་བྱེད། །དེ་ནི་པདྨའི་སྙིང་པོ་ཡི། །ཞེས་བྱ་བ་ལ། དུས་མ་ཡིན་པར་སྤྱད་པའི་རྒྱུས་རླུང་འཁྲུགས་ཤིང་བད་ཀན་དང་ཁྲག་འདྲེས་པར་གྱུར་པ་ལས་མངལ་དུ་ཟླ་མཚན་འགགས་པར་བྱས་
ནས་ལྟེ་བ་ལྟ་བུར་སྐྱེད་པར་བྱེད་པ་དེ་ནི་པདྨའི་སྙིང་པོ་ཅན་ཞེས་བྱའོ། །ནད་གཞི་གསུམ་ནི་མོ་མཚན་གྱི། །མངལ་གནས་རང་རང་གནོད་པ་སྐྱེད། །འདུས་པ་ལས་གྱུར་ཉེས་པ་ཡིན། །ཞེས་བྱ་བ་ལ། རླུང་ལ་སོགས་པའི་ནད་གཞི་གསུམ་པོ་མོ་མཚན་དང་མངལ་དུ་
གནས་པ་ལས་རང་རང་གི་གནོད་པ་སྐྱེད་ཅིང་ནད་འབྱིན་པ་ནི་འདུས་པ་ལས་གྱུར་པ་ཞེས་བྱའོ། །དེ་ལྟར་བུད་མེད་མངལ་ནད་ཀྱིས། །ཁུ་བ་འཛིན་པར་མི་བྱེད་དེ། །དེས་ན་མངལ་དུ་བུ་མི་ཆགས། །མི་བཟད་ནད་ཀྱང་སྐྱེ་འགྱུར་ཞིང་། །ཁྲག་འབྱུང་གཞང་འབྲུམ་སྐྲན་ལ་སོགས། །རླུང་སོགས་
ནད་ནི་ཀུན་སྐྱེད་བྱེད། །ཅེས་བྱ་བ་ལ། ཚུལ་དེ་ལྟར་ན་མངལ་གྱི་ནད་རྣམ་པ་ཉི་ཤུར་བཤད་པ་ཡིན་ལ། དེས་ན་བུད་མེད་ཀྱི་མངལ་དུ་ས་བོན་འཛིན་པར་མི་བྱེད་དེ། དེའི་ཕྱིར་བུ་མི་ཆགས་པ་དང་། མི་བཟད་པའི་ནད་ཁྲག་འབྱུང་བ་དང་། གཞང་འབྲུམ་ལ་སོགས་པའི་ནད་དང་རླུང་ལས་གྱུར་པའི་
ནད་ཐམས་ཅད་སྐྱེད་པར་བྱེད་དོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་གསུམ་པའི་རྣམ་པར་འགྲེལ་བའོ།། །།
เล่ม ๒๐๒ · หน้า 248a
དེ་ནས་གསང་བའི་གནས་ཀྱི་ནད་གསོ་བ་བཤད་པར་བྱའོ། །སོས་འཛིན་འདྲ་བ་གསར་བྱུང་ལ། །ཕོ་མཚན་དབུས་ནས་གཏར་ག་གདབ། །བསིལ་བའི་གསོ་བས་སྦྱང་བར་བྱ། །ཁྱད་པར་དུ་ནི་བཀྲུ་སྨན་གཏང་། །ཞེས་བྱ་བ་ལ། །སོས་འཛིན་པའི་ནང་དུ་སྐྱེས་མ་ཟུག་པ་ལ་ནི་
རྣགས་པར་མི་འགྱུར་བར་བྱ་བའི་ཕྱིར། །ཕོ་མཚན་གྱི་དབུས་ནས་གཏར་ག་གདབ་པ་ལ་སོགས་པའི་གསོ་བ་བྱའོ། །སྨིན་ན་ཏིལ་གྱི་ལྡེ་གུ་ནི། །སྦྲང་རྩི་མར་དང་བཅས་པ་བསྐུ། །ཞེས་བྱ་བ་ལ། ནད་དེ་གལ་ཏེ་སྨིན་པར་གྱུར་ན་གཙགས་བུས་བརྟོལ་ནས་ཏིལ་གྱི་ལྡེ་གུ་དང་སྦྲང་རྩི་དང་མར་
སྦྱར་བས་བསྐུ་བར་བྱའོ། །འཛམ་བུ་ཨ་མྲ་ཀླུ་ཤིང་དང་། །ནིམ་པ་ཀམ་པོ་ཛའི་མྱུ་གུ། །རྒྱ་ཤུག་བིལ་པས་ལི་ཀ། །རྒྱ་སྐྱེགས་ཏི་ནི་ཤ་ཤིང་ཤུན། །འོ་མ་ཅན་གྱི་ཤིང་གི་ཤུན། །འབྲས་བུ་གསུམ་ནི་ཆུར་བསྐོལ་བའི། །ཁུ་བ་དེ་ནི་བཀྲུ་བ་དང་། །དེ་བསྐོལ་ཏིལ་མར་གྱིས་རྨ་འཚོབ། །
ཅེས་བྱ་བ་ལ། །གཞན་ཡང་འཛམ་བུ་ལ་སོགས་པའི་མྱུ་གུ་དང་། རྒྱ་ཤུག་ལ་སོགས་པའི་ཤུན་པ་དང་། འོ་མ་ཅན་གྱི་ཤིང་གི་ཤུན་ལྤགས་དང་། འབྲས་བུ་གསུམ་སྨན་ཁུ་བ་བསྐོལ་བའི་སྦྱོར་བས་བསྐོལ་ལ། དེས་སོས་འཛིན་པའི་ནད་ལ་བཀྲུ་བར་བྱ་ཞིང་། དེ་དང་བསྐོལ་པའི་ཏིལ་མར་
གྱིས་བསྐུ་བར་བྱའོ། །སྤངས་མ་སེང་ཕྲོམ་བཙག་ཡུག་སྣམ། །སུག་སྨེལ་ལྡོང་རོས་བ་བླ་དང་། །ནག་ཚུར་རྒྱ་ཚ་སྐྱེར་ཁཎྜ། །རྒྱམ་ཚ་ཧ་རེ་ཎུ་ཀ་ཡི། །ཕྱེ་མ་སྦྲང་རྩི་སྦྱར་བས་བསྐུ། །སོས་འཛིན་ལྟ་བུའི་རྨ་འཚོབ་བྱེད། །ཅེས་བྱ་བ་ལ། སྤངས་མ་ལ་སོགས་པའི་སྨན་ཇི་སྐད་སྨོས་
པའི་སྦྱོར་བས་ལྡེ་གུ་བྱས་པས་བསྐུས་ན་ཡང་ནད་དེའི་རྨ་འཚོབ་པར་བྱེད་དོ། །ཁམ་ཕོར་སྦྱར་བར་འབྲས་བུ་གསུམ། །བསྲེགས་པ་མར་བཅས་རྨ་འཚོབ་བྱེད། །ཅེས་བྱ་བ་ལ། འབྲས་བུ་གསུམ་ཁམ་ཕོར་ཁ་སྦྱར་གྱི་ནང་དུ་བསྲེགས་པའི་ཕྱེ་མ་མར་དང་བཅས་ཏེ་བསྐུས་ན་ཡང་རྨ་འཚོབ་པར་བྱེད་
དོ། །འདི་ནི་སྤྱི་ཡི་གསོ་བ་ཡིན། །རེ་རེ་སྐྲང་པ་ལྟ་བུར་གསོ། །ཞེས་བྱ་བ་ལ། གསོ་བ་འདི་ནི་སོས་འཛིན་པ་ལྟ་བུའི་སྤྱིའི་ཡིན་གྱི། །ནད་གཞི་ཐ་དད་པ་ལས་གྱུར་བ་ནི་སྐྲང་པའི་ནད་ལྟར་གསོ་བར་བྱའོ། །སྨན་པས་ཅི་ནས་རྣགས་པར་ནི། །མི་འགྱུར་དེ་ལྟར་འབད་པར་བྱ། །རྣགས་
เล่ม ๒๐๒ · หน้า 248b
ན་རྒྱུས་པ་རྩ་དང་ཤ །ཞིག་པས་ཕོ་མཚན་མ་རུང་འགྱུར། །ཞེས་བྱ་བ་ལ། སྨན་པས་སྦྱོར་བ་ཐམས་ཅད་ཀྱིས་ནད་དེ་རྣགས་པར་མི་འགྱུར་བ་ལ་འབད་པར་བྱ་སྟེ། རྣགས་ན་ནི་ཐམས་ཅད་དུ་མ་རུངས་པར་འགྱུར་པའི་སྐྱོན་ཡོད་དོ། །འབྲུམ་པ་བཅད་དང་བསྲེགས་པ་ཡི། །གསོ་བ་སོས་
འཛིན་ལྟ་བུར་བྱ། །ཞེས་བྱ་བ་ལ། མཚོན་གྱིས་འབྲུམ་པ་བཅད་པ་དང་། བསྲེགས་པའི་རྨ་གསོ་བ་ཡང་སོས་འཛིན་པ་དང་འདྲ་བར་བྱའོ། །བྲུད་ནས་ཡུངས་ཀར་བྱེ་ཞིབ་དང་། །བསྐོལ་སྨན་ཕྱེ་མས་གདབ་པར་བྱ། །ཞེས་བྱ་བ་ལ། ཡང་ན་དེ་ལ་དང་པོར་བྲུད་ཅིང་བཞར་ལ། ཡུངས་
ཀར་གྱི་ཕྱེ་མ་ཞིབ་ཏུ་བཏགས་པ་བཏབ་པར་བྱ་བ་དང་། བསྐོལ་སྨན་སྔ་མའི་ཕྱེ་མས་གདབ་པར་བྱའོ། །ཏིལ་མར་དེ་ཉིད་ཀྱིས་བསྐུ་ཞིང་། །རྨ་འཚོབ་པ་ཡི་གསོ་བ་བྱ། །ཞེས་བྱ་བ་ལ། ཡང་སྨན་གྱི་ཕྱེ་མ་དེ་དང་བསྐོལ་པའི་ཏིལ་མར་གྱིས་བསྐུ་ཞིང་རྨ་གསོ་བར་བྱའོ། །མཉེ་གསོ་
བ་ནི་འདི་ཉིད་བྱ། །དེ་དག་གཉི་གར་གཏར་ག་གདབ། །ཅེས་བྱ་བ་ལ། ཡང་སྦྱོར་བ་འདི་ཉིད་ནི་མཉེ་བ་ཞེས་བྱ་བ་མཚན་གྱི་ནད་ལ་ཡང་བྱ་ལ། དེ་བཞིན་དུ་མཉེ་བ་ཡུངས་ཀར་ལྟ་བུ་ཞེས་བྱ་བ་གཉི་ག་ལ་གཏར་གདབ་པར་བྱའོ། །ཁོང་སྟོང་ལ་ནི་གཏར་ག་བྱ། །རྣགས་ལ་རྨ་ནི་དག་
པར་བྱ། །ཏིན་ཏུ་ཀ་དང་འབྲས་བུ་གསུམ། །སེང་ཕྲོམ་ལྡེ་གུ་ཏིལ་མར་བསྐུ། །ཞེས་བྱ་བ་ལ། ཁོང་སྟོང་ཞེས་བྱ་བ་ལ་ནི་དང་པོར་གཏར་ག་གདབ་པར་བྱ་ལ། རྣགས་པ་ལ་ནི་བརྟོལ་ཏེ་རྨ་དག་པར་བྱས་ནས། ཏིན་ཏུ་ཀ་ལ་སོགས་པའི་ལྡེ་གུས་བསྐུ་བར་བྱ་བ་དང་། ཡང་ན་སྨན་དེ་ཉིད་དང་
བསྐོལ་བའི་ཏིལ་མར་གྱིས་བསྐུས་ན་རྨ་འཚོབ་པར་བྱེད་དོ། །འབྲས་བྱེར་ལ་ནི་གཏར་ག་གདབ། །གསོ་བའི་རིམ་པ་འདི་ཉིད་བྱ། །ཞེས་བྱ་བ་ལ། །འབྲས་བྱེར་བ་ལ་ནི་གཏར་ག་གདབ་ཅིང་། །བཤད་མ་ཐག་པའི་གསོ་བ་འདི་ཉིད་བྱའོ། །མཆོག་ཅེས་བྱ་བའི་འབྲུམ་བུ་ནི། །བརྟོལ་ཏེ་ལྕགས་
ཀྱུས་བླངས་ཏེ་གཅད། །ལྡེ་གུ་ཕྱེ་མ་སྨན་ཁུ་ནི། །སྦྲང་རྩིར་བཅས་པས་གསོ་བར་བྱ། །ཞེས་བྱ་བ་ལ། མཆོག་ལ་ནི་གཅད་པ་དང་། །ལྡེ་གུས་གསོ་བར་བྱའོ། །མཉེ་དང་པདྨ་ཅན་ལ་ནི། །མཁྲིས་པའི་མེ་དབལ་གསོ་བར་བྱ། །ཞེས་བྱ་བ་ལ། མཉེ་བ་དང་པདྨ་ཅན་ཞེས་བྱ་བ་ལ་ནི། །
เล่ม ๒๐๒ · หน้า 249a
མཁྲིས་པ་ལས་གྱུར་པའི་མེ་དབལ་གྱི་གསོ་བ་ཇི་སྐད་སྨོས་པ་བྱའོ། །པགས་སྨིན་ཚོར་བ་མེད་པ་ལའང་། །ཕོ་མོའི་གསོ་བ་འདི་ཉིད་བྱ། །ཞེས་བྱ་བ་ལ། པགས་པ་སྨིན་པ་དང་ཚོར་བ་མེད་པའི་ནད་སྐྱེས་པ་དང་། བུད་མེད་གཉིག་ལ་ཡང་མཁྲིས་པའི་མེ་དབལ་
གསོ་བ་ཇི་སྐད་སྨོས་པ་བྱའོ། །མཉེ་ལ་དུགས་ནི་བྱ་བ་དང་། །བ་ལའི་སྨན་མར་དྲོ་འཇམ་བླུགས། །མངར་བའི་སྨན་སྦྱར་དཀྲི་དུགས་བྱ། །ཞེས་བྱ་བ་ལ། མཉེ་བ་ཞེས་བྱ་བའི་མཚན་གྱི་ནད་ལ་ནི་དུགས་བྱ་བ་དང་། བ་ལའི་སྨན་མར་དྲོ་འཇམ་ཙམ་བླུགས་པ་དང་། མངར་བའི་སྨན་གྱི་སྡེ་ཚན་
སྦྱར་བའི་དཀྲི་བའི་དུགས་བྱའོ། །གཏུན་ཤིང་འདྲ་ལ་གཏར་ག་གདབ། །བད་ཀན་རྨེན་བུ་ལྟ་བུར་གསོ། །ཞེས་བྱ་བ་ལ། གཏུན་ཤིང་འདྲ་བ་ལ་ནི་རྔབས་རྭ་ལ་སོགས་པས་ཁྲག་དབྱུང་ལ། དེའི་འོག་ཏུ་བད་ཀན་ལས་གྱུར་པའི་རྨེན་བུ་དང་ཚུལ་མཐུན་པར་གསོ་བ་བྱའོ། །པགས་པ་ལྡོག་ལ་
མར་གྱིས་བསྐུ། །ས་ལྦ་ལ་སོགས་སྣུམ་གྱུར་པས། །ཞག་གསུམ་མམ་ནི་ཞག་ལྔ་རུ། །དཀྲི་བའི་དུགས་ནི་སྦྱད་པར་བྱ། །ཞེས་བྱ་བ་ལ། པགས་པ་ལྡོག་པའི་མཚན་གྱི་ནད་ལ་ནི་མར་གྱིས་བསྐུས་ལ། དེའི་འོག་ཏུ་ས་ལྦ་ལ་སོགས་པ་དུགས་ཀྱི་ལེའུ་ལས་བཤད་པ་བཞིན་དུ་
སྣུམ་ལས་ཞག་ལྔའམ་ཞག་གསུམ་གྱི་བར་དུ་དཀྲི་བའི་དུགས་བྱའོ། །དུགས་བྱ་དེ་ཡི་འོག་ཏུ་ནི། །སྣུམ་གྱུར་པགས་པ་དྲང་བར་བྱ། །ནོར་བུ་རིམ་གྱིས་བཙིར་ནས་ནི། །ཆུད་ནས་ཉེ་བར་དཀྲི་བར་བྱ། །ནོར་བུ་ཡང་ཡང་སྣུམ་ཚེས་བྱ། །ཁ་ཟས་སྣུམ་ཅན་སྦྱིན་པའང་ཕན། །ཞེས་བྱ་བ་
ལ། དེའི་འོག་ཏུ་ཡང་དུགས་བྱས་ལ། མར་གྱི་སྣུམ་ཆོས་བྱས་ཏེ། པགས་པ་དྲངས་ལ་ནོར་བུ་ཆུད་པར་བྱའོ། །ཆུད་ནས་ཀྱང་ཡང་དཀྲི་བར་བྱའོ། །ཡང་ན་འདི་ལ་ཁ་ཟས་སྣུམ་པ་དང་བཅས་པ་ཡང་སྦྱིན་པར་བྱའོ། །གས་པ་ལ་ཡང་ཆོ་ག་ཡི། །རིམ་པ་ཇི་བཞིན་བྱས་པའང་ཕན། །ཞེས་
བྱ་བ་ལ། བཤད་མ་ཐག་པའི་སྦྱོར་བ་འདི་ནི་གས་པ་ཞེས་བྱ་བའི་ནད་ལ་ཡང་སྦྱར་བར་བྱའོ། །འགགས་པ་སྦུ་གུ་ཁ་གཉིས་པ། །རྒྱ་སྐྱེགས་ཀྱིས་ནི་དཀྲིས་པ་ལ། །སྣུམ་བསྐུས་བུ་གར་བཅུག་ནས་ནི། །རླུང་འཇོམས་སྣུམ་ནི་བླུགས་པར་བྱ། །ཞེས་བྱ་བ་ལ། ནོར་བུ་འགགས་པར་གྱུར་
เล่ม ๒๐๒ · หน้า 249b
བ་ལ་ནི། སྦུ་གུ་ཁ་གཉིས་པ་རྒྱ་སྐྱེགས་ཀྱིས་བསྒོས་པ་ལ་སྣུམ་བསྐུས་པ་བཅུག་ལ། རླུང་འཇོམས་པའི་སྨན་བླུགས་པར་བྱའོ། །སྦུ་གུ་ཞག་ནི་གསུམ་གསུམ་ནས། །ལེགས་པར་སྐྱེད་དེ་སྤང་བར་བྱ། །ཞེས་བྱ་བ་ལ། དེའི་འོག་ཏུ་ཞག་གསུམ་གསུམ་ནས་སྦུ་གུ་དེ་བསྐྱེད་དེ་སྤང་བར་
བྱའོ། །སྦུ་གུའི་སྦྱོར་བས་མ་གྲུབ་ན། །མཁས་པས་མདོམས་ཀྱི་སྲུབས་ཅན་ནི། །བོར་ཏེ་མཚོན་གྱིས་དྲལ་ནས་ཀྱང་། །དེ་འོག་རྨ་གསར་ཆོ་ག་བྱ། །ཞེས་བྱ་བ་ལ། དེ་ལྟ་བུ་སྦུ་གུའི་སྦྱོར་བ་ནི་གསོ་བས་གྲུབ་ཅིང་། སོས་པར་མ་གྱུར་ན། སྨན་པ་མཁས་པས་སྲུབས་ཅན་མ་གཏོགས་པར་མཚོན་
གྱིས་དྲལ་ལ། དེའི་འོག་ཏུ་རྨ་གསར་པ་གསོ་བའི་ཆོ་ག་ལྟར་གསོ་བར་བྱའོ། །རྨེན་བུར་སྦུ་གུའི་དུགས་བྱས་ལ། །སྣུམ་ཞིང་དྲོ་བས་དཀྲི་བར་བྱ། །ཞེས་བྱ་བ་ལ། རྨེན་བུ་མདུན་པ་ཅན་གྱི་མཚན་གྱི་ནད་ལ་ནི་སྦུ་གུའི་དུགས་ཀྱིས་དུགས་བྱས་ལ། སྣུམ་པ་བྲོ་བའི་དུགས་ཀྱིས་དཀྲི་བར་བྱའོ། །ཁ་
བརྒྱ་བ་ནི་བཞར་ནས་ཀྱང་། །བསྐ་བ་སྦྲང་རྩིར་སྦྱར་བས་བསྲུ། །ཞེས་བྱ་བ་ལ། ཁ་བརྒྱ་པ་ཞེས་བྱ་བའི་མཚན་གྱི་ནད་ལ་ནི་གཙགས་བུས་བཞར་ལ་སྨན་རོ་བསྐ་བ་དང་སྦྲང་རྩིས་བསྐུ་བར་བྱའོ། །ཁྲག་གི་འབྲུམ་བུ་ཁྲག་གི་ནི། །ཁོང་འབྲས་བཞིན་དུ་གསོ་བར་བྱ། །ཞེས་བྱ་བ་ལ། ཁྲག་གི་
འབྲུམ་བུ་ཞེས་བྱ་བའི་ནད་ལ་ནི་ཁྲག་ལས་གྱུར་པའི་ཁོང་འབྲས་དང་འདྲ་བར་གསོའོ། །ཀུན་ལ་རྨ་ཡི་གསོ་བ་ནི། །གནས་སྐབས་ཇི་བཞིན་སྦྱར་བར་བྱ། །ཞེས་བྱ་བ་ལ། མཚན་གྱི་ནད་ཐམས་ཅད་ལ་ཡང་གནས་སྐབས་དང་སྦྱར་ཏེ། རྨ་གསོ་བའི་ཚིག་སྦྱར་བ་དང་། །ལྡེ་གུས་བསྐུ་བ་ལ་
སོགས་པའི་གསོ་བ་བྱའོ། །མངལ་གྱི་ནད་ལ་མང་དུ་ནི། །སྣུམ་ཆོས་དུགས་དང་མས་གཏོང་སོགས། །རླུང་འཇོམས་པ་ཡི་གསོ་བ་བསྔགས། །རླུང་ལས་གྱུར་ལ་མཆོག་ཏུ་སྦྱར། །ཞེས་བྱ་བ་ལ། མངལ་གྱི་ནད་ཐམས་ཅད་ལ་ནི་ཕལ་ཆེར་སྣུམ་ཆོས་དང་། དུགས་ལ་སོགས་པའི་རླུང་
གསོ་བའི་སྦྱོར་བ་བྱའོ། །དེ་ལས་ཀྱང་ཁྱད་པར་དུ་རླུང་ལས་གྱུར་པ་ལ་ནི་ལྷག་པར་བྱའོ། །བུད་མེད་ཀྱི་ནི་མངལ་གྱི་ནད། །རླུང་མ་གཏོགས་པར་འབྱུང་མི་འགྱུར། །དེ་བས་རླུང་ནི་བསལ་བྱས་ལ། །ནད་གཞན་གྱིས་ནི་གསོ་སྨན་བྱ། །ཞེས་བྱ་བ་ལ། གང་གི་ཕྱིར་ནད་དེ་ནི་རླུང་མ་ཡིན་པ་གཞན་
เล่ม ๒๐๒ · หน้า 250a
ལས་ཤས་ཆེར་མི་འབྱུང་བས། དེའི་ཕྱིར་དང་པོར་དེ་བསལ་ལ། དེའི་འོག་ཏུ་གཞག་གསོ་བར་བྱའོ། །བ་ལའི་ཏིལ་མར་བླུད་བྱ་ཞིང་། །འདྲེན་མ་སྐྱེ་དེའི་འོ་མ་བླུད། །ཅེས་བྱ་བ་ལ། ཡང་བུད་མེད་དེ་ལ་བ་ལའི་ཏིལ་མར་ལ་སོགས་པ་བླུད་པར་བྱའོ། །སྣུམ་ཆོས་དུགས་
བྱས་ཏེ་མངལ། །ཉེས་པར་གནས་པ་མཉམ་དུ་གཞག །ཡོན་པོ་ལག་པས་དྲང་པོར་བསྲང་། །ཞུམ་པ་སླར་ནི་བསྐྱེད་པར་བྱ། །བྱུང་བ་སླར་ནི་གཞུག་བྱ་ཞིང་། །གྱེས་པ་ཡོངས་སུ་བཟློག་པར་བྱ། །མངལ་ནི་གནས་ནས་གཡོས་གྱུར་པ། །བུད་མེད་ཟུག་རྔུར་གྱུར་པར་འདོད། །
ཅེས་བྱ་བ་ལ། མངལ་ཉེས་པར་གནས་པ་ལ་སྣུམ་ཆོས་ལ་སོགས་པ་བྱ་སྟེ། དེའི་འོག་ཏུ་ལག་པས་མཉམ་དུ་ལེགས་པར་གཞག་པ་དང་། ཡོན་པོ་ནི་དྲང་བོར་བསྲང་བར་བྱ་བ་དང་། ཞུམ་པ་བསྐྱེད་པ་ལ་སོགས་པ་བྱ་སྟེ། གང་གི་ཕྱིར་བུད་མེད་ཀྱི་མངལ་རང་གི་གནས་ལས་
གཡོས་བར་གྱུར་པ་དེ་ནི་ཟུག་རྔུ་དང་འདྲ་བའི་ཕྱིར་རོ། །བུད་མེ་ལ་ནི་སློན་སྨན་སོགས། །འཇམ་པོས་ཡོངས་སུ་སྦྱར་བར་བྱ། །ཞེས་བྱ་བ་ལ། བུད་མེད་མངལ་གྱི་སྐྱོན་ཡོད་པ་ལ་ནི་སློན་སྨན་ལ་སོགས་པའི་ལས་རྣམ་པ་ལྔ་པོ་འཇམ་པོས་གསོ་བར་བྱའོ། །རྣམ་པ་ཀུན་ཏུ་དག་གྱུར་
ནས། །འཇམ་རྩི་བསྐུ་བྱུག་སྨན་བུ་བླུགས། །བྱུག་དང་ཡེའུ་གཞུག་པ་སོགས། །གསོ་བའི་ལས་ནི་ལྷག་མ་སྦྱད། །ཅེས་བྱ་བ་ལ། བུད་མེད་ལ་རྣམ་པ་ཐམས་ཅད་དུ་སྦྱང་བ་བྱས་ནས། དེའི་འོག་ཏུ་འཇམ་རྩི་ལ་སོགས་པའི་གསོ་བ་ལྷག་མ་རྣམས་བྱའོ། །རྒུན་འབྲུམ་
ཏང་བ་ལ་འབྲས་བུ་གསུམ། །ཀ་ས་མར་དང་སེར་པོ་གཉིས། །སླེ་ཏྲེས་ཉེའུ་ཤིང་ཤེརྱ་ཀ །ཤུ་ཀ་ན་ཡ་བ་སྤྲུ་བ། །པ་རུ་ཤ་ཀ་ཞོ་གཉིས་གཉིས། །མར་ནི་བྲེ་གང་བཅས་པར་བསྐོལ། །དེ་བླུད་མངལ་གྱི་རླུང་ནད་དང་། །བུ་སྐྱེད་བྱེད་པའི་མཆོག་ཡིན་ནོ། །ཞེས་བྱ་བ་ལ།
རྒུན་འབྲུམ་ལ་སོགས་པའི་སྨན་གྱི་སྦྱོར་བ་ཇི་སྐད་བཤད་པའི་སྨན་མར་བླུད་ན་ཡང་མངལ་གྱི་རླུང་ནད་སེལ་བ་ལ་སོགས་པའི་ཡོན་ཏན་དང་ལྡན་པ་ཡིན་ནོ། །ཟི་ར་གོ་སྙིད་པི་པི་ལིང་། །ཤུ་དག་རྒྱམ་ཚ་བ་ཤ་ཀ། །ནས་ཚིག་འཁུས་ཐལ་ཏི་མུས། །ཙི་ཏྲ་ཀ་དང་ཁ་རར་བཅས། །བཏགས་ཏེ་
เล่ม ๒๐๒ · หน้า 250b
ཆང་གི་དངས་མར་སྦྱར། །མར་བརྔོས་དེ་ནི་བྱིན་གྱུར་ན། །མངལ་ནད་རྩིབ་ལོགས་སྙིང་ནད་དང་། །སྐྲང་དང་གཞང་འབྲུམ་སེལ་བར་བྱེད། །ཅེས་བྱ་བ་ལ། ཟིར་ལ་སོགས་པའི་སྨན་གྱི་སྦྱོར་བ་ཇི་སྐད་སྨོས་པ་བཏང་ན་ཡང་མངལ་ནད་ལ་སོགས་པ་སེལ་བར་བྱེད་དོ། །ཁ་ལུང་ཁུ་བ་ཤ་ཀའི་
རྩབ། །ཟིར་ནག་པོ་གོ་སྣོད་དང་། །སེན་རྩི་རྒྱམ་ཚའི་ཕྱེ་མ་ནི། །ཆང་དང་སྦྱར་ཏེ་བླུད་པར་བྱ། །ཞེས་བྱ་བ་ལ། ཁ་ལུང་ལ་སོགས་པའི་ཕྱེ་མཆང་དང་སྦྱར་ཏེ་བླུད་ན་ཡང་ཕན་ནོ། །ར་སྣ་གཟེ་མ་བ་ཤ་ཀ །བསྐོལ་བ་གཟེར་འཇོམས་མཆོག་ཡིན་ནོ། །ཞེས་བྱ་བ་ལ། ཡང་ན་ར་སྣ་ལ་
སོགས་པའི་ཁུ་བ་བླུད་ན་ཡང་ཕན་ནོ། །སླེ་ཏྲེས་དན་ད་འབྲས་བུ་གསུམ། །བསྐོལ་བའི་ཁུ་བ་འང་བླུགས་པར་བྱ། །ཞེས་བྱ་བ་ལ། ཡང་སླེ་ཏྲེས་ལ་སོགས་པའི་སྨན་གྱི་ཁུ་བ་བསྐོལ་བའི་ཆུ་བླུགས་ན་ཡང་ཕན་ནོ། །རྒྱ་སྤོས་ཀཎྜ་ཀ་རི་དང་། །རུ་རྟ་རྒྱམ་ཚ་ཐང་ཤིང་རྣམས། །བསྐོལ་
བའི་ཁུ་བ་ཏིལ་མར་བསྐོལ། །སྦངས་པའི་ཡེའུས་མངལ་ནད་སེལ། །ཞེས་བྱ་བ་ལ། ཡང་རྒྱ་སྤོས་ལ་སོགས་པའི་སྨན་དང་། ཏིལ་མར་བསྐོལ་བའི་ཏིལ་མར་ལ་སྦངས་པའི་ཡེའུ་མངལ་གྱི་ནང་དུ་བཅུག་ན་ཡང་ཕན་ནོ། །མངལ་ནད་མཁྲིས་པ་ལས་གྱུར་ལས། །ཆུ་བླུགས་བསྐུ་
བྱུག་ཡེའུ་ཡི། །གསོ་བ་བསིལ་ཞིང་མཁྲིས་འཇོམས་པ། །སྣུམ་ཆོས་དོན་དུ་མར་གྱིས་བྱ། །ཞེས་བྱ་བ་ལ། མཁྲིས་པ་ལས་གྱུར་པའི་མངལ་གྱི་ནད་པ་ནི་བསིལ་ཞིང་མཁྲིས་པ་སེལ་བའི་སྨན་ཆུ་བླུགས་པ་ལ་སོགས་པ་བྱ་བ་དང་། དེ་བཞིན་དུ་སྣུམ་གྱི་ཆོ་ག་ཡང་ཞུན་མར་གྱིས་བྱའོ། །
ཉེའུ་ཤིང་རྩ་བ་སྲང་བཞི་བརྒྱ། །བརྡུངས་ཏེ་བཙིར་བའི་ཁུ་བ་དང་། །འོ་མ་དེ་མཉམ་མར་བྲེ་ནི། །བཞི་ཡིན་ནང་དུ་བསྐོལ་བར་བྱ། །འཚོ་བྱེད་སྡེ་ཚན་ཉེའུ་ཤིང་དང་། །པ་རུ་ཤ་ཀ་རྒུན་འབྲུམ་དང་། །བི་ལ་ཡ་དང་བ་ལ་གཉིས། །ཤིང་མངར་ཞོ་ནི་གཉིས་གཉིས་ཕྱེ། །བསྐོལ་ཏེ་བསྒྲངས་པར་
སྦྲང་རྩི་དང་། །པི་པི་ལིང་ནི་སྲང་བརྒྱད་བརྒྱད། །ཁ་ར་དཀར་པོ་སྲང་བཅུ་གཞུག། །དེ་ལས་སྲང་ནི་ཕྱེད་བྱེད་སྦྱིན། །མངལ་ཁྲག་ཁུ་བའི་ནད་སེལ་ཞིང་། །རོ་ཙ་བུ་སྐྱེད་བྱེད་མཆོག་ཡིན། །གློ་རྡོལ་ཟད་བྱེད་ཁྲག་མཁྲིས་དང་། །ལུད་པ་དབུགས་མི་བདེ་བ་དང་། །མིག་སེར་རླུང་དང་ཁྲག་དང་
เล่ม ๒๐๒ · หน้า 251a
ནི། །མེ་དབལ་དང་ནི་སྙིང་ནད་དང་། །བརྗེད་བྱེད་ཀྱིས་ཉེན་ད་རྒན་དང་། །མྱོས་བྱེད་སྐེམ་བྱེད་འཇོམས་པར་བྱེད། །ཅེས་བྱ་བ་ལ། ཉེའུ་ཤིང་སྲང་བཞི་བརྒྱའི་ཁུ་བ་དང་། འོ་མ་དེ་དང་ཆ་མཉམ་པར་བྱ་བ་དང་། འཚོ་བྱེད་ཀྱི་སྡེ་ཚན་དང་། ཉེའུ་ཤིང་ལ་སོགས་པ་ཞོ་
གཉིས་གཉིས་དང་། མར་བྲེ་བཞི་བསྐོལ་ལ་བསྒྲུངས་པའི་ནང་དུ་སྦྲང་རྩི་སྲང་བརྒྱད་དང་། པི་པི་ལིང་སྲང་བརྒྱད་དང་། ཁ་ར་སྲང་བཅུ་བཅུག་སྟེ། དེ་ལས་སྲང་ཕྱེད་ཕྱེད་བྱིན་ན་མངལ་གྱི་ཁུ་བཁྲག་གི་ནད་སེལ་བ་ལ་སོགས་པ་དང་། སྨྱོ་བྱེད་ཀྱི་བར་གྱི་ནད་ངེས་པར་འཇོམས་པར་བྱེད་པ་
ཡིན་ནོ། །དེ་བཞིན་འོ་མ་ཞུན་མར་དང་། །འཚོ་བྱེད་སྡེ་ཚན་བསྐོལ་བ་ནི། །བུ་སྐྱེད་མཁྲིས་ལས་གྱུར་པའམ། །མངལ་ནད་སེལ་བའི་དམ་པ་ཡིན། །ཞེས་བྱ་བ་ལ། དེ་བཞིན་དུ་འོ་མ་དང་ཞུན་མར་དང་། འཚོ་བྱེད་ཀྱི་སྡེ་ཚན་དང་བསྐོལ་བའི་སྨན་མར་བྱིན་ན་ཡང་ཡོན་ཏན་དེ་དང་འདྲ་ཞིང་
བུ་སྐྱེད་བ་དང་མཁྲིས་པའི་མངལ་ནད་སེལ་བའི་མཆོག་ཡིན་ནོ། །བ་ལ་བྲེ་ནི་སུམ་ཅུ་གཉིས། །བསྐོལ་བའི་ཏིལ་མར་མར་བྲེ་བཞི། །འོ་མ་བཞི་འགྱུར་པི་པི་ལིང་། །ཀ་ཀ་ན་མི་ཀ་ར་དཀར། ཛི་བན་ཏི་དང་རམ་ཉེ་བ། །སྠི་ར་ཉེའུ་ཤིང་ཟིར་གཉིས། །མོན་སྲན་གྲེའུ་བ་ཡ་སྱ། །
མ་ཤ་བ་རྞི་སྲ་བ་ནི། །པི་ལུའི་ལོ་མ་ལྷན་ཅིག་བསྐོལ། །བླུད་ན་རླུང་མཁྲིས་ལས་གྱུར་བའི། །མངལ་ནད་སེལ་ཞིང་བུ་སྐྱེད་བྱེད། །ཅེས་བྱ་བ་ལ། བ་ལ་བྲེ་སུམ་ཅུ་རྩ་གཉིས་ལ་སོགས་པ་ཇི་སྐད་བཤད་པ་བཞིན་དུ་བསྐོལ་བའི་མར་དང་ཏིལ་མར་དེ་བླུད་ན་རླུང་དང་མཁྲིས་པ་ལས་གྱུར་པའི་
མངལ་ནད་སེལ་བར་བྱེད་ཅིང་བུ་སྐྱེད་པར་བྱེད་པ་ཡིན་ནོ། །ཁྲག་གི་མངལ་ནད་ཁྲག་མདོག་ལས། །རྗེས་སུ་འབྲེལ་བ་བརྟགས་ནས་ཀྱང་། །ནད་གཞི་བསགས་པའི་ཚུལ་ལས་ནི། །ཁྲག་བཅད་པ་ཡི་སྨན་གཏང་བྱ། །ཞེས་བྱ་བ་ལ། ཁྲག་གི་མངལ་ནད་ལ་ནི་གཏར་གའི་ཆོ་ག་ལས་བཤད་
པའི་ཚུལ་གྱིས་ནད་གཞིའི་མཚན་ཉིད་ཤེས་པར་བྱས་ལ་ནད་གཞི་དང་རྗེས་སུ་མཐུན་པའི་ཁྲག་གཅོད་པའི་སྨན་གཏང་བར་བྱའོ། །ཤིང་མངར་སྦྲང་རྩི་ཆུ་ཤིང་རྩ། །ཏ་ལའི་ས་བོན་སྐྱེར་པའི་རྩ། །དྲི་ཡང་ཀུ་དང་འབྲས་དྲུས་ཆུ། །སྦྱར་བ་བླུད་ན་ཁྲག་འཛག་པ། །མདོག་སྐྱ་དམར་པོ་སེལ་བར། །
เล่ม ๒๐๒ · หน้า 251b
བྱང་། །ཅེས་བྱ་བ་ལ། ཤིང་མངར་ལ་སོགས་པ་སྦྱར་བའི་ཆུ་བླུད་ན་ཡང་ཁྲག་འཛག་པ་སེལ་བར་བྱེད་དོ། །པ་ཐ་འཛམ་བུ་ཨ་མྲ་ཡི། །ཚི་གུ་དང་ནི་བྲ་གཞུན་དང་། །སྐྱེར་པའི་ཁཎྚ་ཨམ་བཥྚ། །བཙོད་དང་ཤལ་མ་ལིའི་ཐང་ཆུ། །དུག་མོ་ཉུང་གི་ཤུན་ལྤགས་དང་། །གུར་གུམ་བིལ་བ་བོང་
ང་དཀར། །སེང་ཕྲོམ་གླ་སྒང་བཙག་ཡུག་སྣམ། །ཤིང་མངར་ཙནྡན་དམར་པོ་དང་། །ཀད་པ་ལ་དང་མཱ་ཙི་ཀ། །ཀ་ཊངྐ་དང་དུག་མི་ཉུང་། །བྱི་ཚེར་བ་དང་ད་ཏ་ཀི། །མ་དུ་ཀ་དང་སྟང་ཟིལ་ནི། །སྐར་མ་རྒྱལ་ལ་བབ་པ་ལ། །བཏུས་ཤིང་བཏགས་ཏེ་སྦྲང་རྩི་དང་། །འབྲས་ཀྱི་ཆུར་སྦྱར་བླུད་
ན་ནི། །གཞང་འབྲུམ་ཚ་དང་པར་འཁྲུ་བ་དང་། །གང་ཡང་ཁྲག་ཏུ་འཁྲུ་བ་དང་། །གང་ཡང་སྲིན་བུའི་ནད་རྣམས་དང་། །བྱིས་པའི་ནད་གང་ཡིན་པ་འཇོམས། །མངལ་གྱི་ནད་དང་ཟླ་མཚན་ནད། །གནག་ཅིང་དཀར་དང་དམར་བ་སེལ། །ཕྱེ་མ་རྒྱལ་གྱི་རྗེས་འགྲོ་བ། །ཕན་ཞེས་རྒྱུན་ཤེས་
བུ་ཡིས་བཤད། །ཅེས་བྱ་བ་ལ། འཛམ་བུ་དང་ཨ་མྲའི་ཚི་གུ་ནི་ཤ་བོར་བའི་རུས་པའོ། །ཨ་མ་བཥྚ་ནི་མ་ཡོ་ར་ཤ་ཁའོ། །ཤལ་མ་ལིའི་ཐང་ཆུ་ནི་མོ་ཙ་རས་འོ། །ཀ་ཊདྐ་ནི་སོ་ན་ཀའོ། །གཞན་དག་གི་གོ་བར་ཟད་དེ། བ་ཏ་ལ་སོགས་པའི་སྨན་དེ་དག་སྐར་མ་རྒྱལ་ལ་བབ་པའི་ཚེ་བཏུས་ལ་
བཏགས་ཏེ་སྦྲང་རྩི་དང་འབྲས་ཀྱི་ཆུར་སྦྱར་ཏེ་བླུད་ན་ནི་གཞང་འབྲུམ་ལ་སོགས་པའི་ནད་སེལ་པར་བྱེད་ཅིང་། །མངལ་གྱི་ནད་ཟླ་མཚན་ནག་པོ་འཛག་པ་ལ་སོགས་པ་སེལ་བར་བྱེད་དོ། །ཕྱེ་མ་འདི་ནི་རྒྱལ་གྱི་རྗེས་སུ་འགྲོ་བ་ཞེས་བྱ་སྟེ། །ནད་ཐམས་ཅད་ལ་ཕན་པ་ཡིན་ནོ། །བད་ཀན་ལས་གྱུར་མངལ་
ནད་ལ། །རྩུབ་དང་དྲོ་བའི་སྨན་ཀུན་སྦྱར། །ཞེས་བྱ་བ་ལ། བད་ཀན་ལས་གྱུར་པའི་མངལ་ནད་ལ་ནི་ཟས་དང་སྐོམ་དང་སྨན་དང་སྤྱོད་ལམ་ལ་སོགས་པ་རྩུབ་བ་དང་། །དྲོ་བའི་ཕྱོགས་སྦྱར་བར་བྱའོ། །སྐྱ་རུའི་ལོ་མ་ད་ཏ་ཀི། །ཤིང་མངར་ཨུཏྤལ་ལིག་བུ་མིག། །འཛམ་བུ་ཨ་མྲའི་ཚི་གུ་དང་། །
སེང་ཕྲོམ་ས་ནག་ཀད་པ་ལ། །སེའུ་འབྲུ་ཤིང་ཚ་ཏིནྡུ་ཀ །ཨུ་དུམ་ལྦཱར་བིལ་བ་གཞོན། །ཞོ་ནི་གཉིས་གཉིས་བཏགས་པའི་ཕྱི། །རག་ཅིན་འོ་མ་ཉིས་འགྱུར་དང་། །ཏིལ་མར་བྲེ་གང་བསྐོལ་བར་བྱ། །ཏིལ་མར་བྲེ་གང་བསྐོལ་བར་བྱ། །དེ་བསྐུ་བ་དང་འཇམ་རྩི་དང་། །རས་བལ་ཡེའུ་གཞུག་པར་བྱ། །སྐྲང་ཞིང་ཕྱིར་ལོགས་མཐོ་
เล่ม ๒๐๒ · หน้า 252a
ཞིང་སྲ། །དེ་བཞིན་སྤྱི་བག་འཛག་པ་དང་། །ཕྱིར་འབུར་ནད་དུ་ཞུམ་པ་དང་། །འབྲུམ་བུ་གཟེར་དང་བཅས་ལ་ཕན། །ཞེས་བྱ་བ་ལ། སྐྱུ་རུ་རའི་ལོ་མ་ལ་སོགས་པའི་སྦྱོར་བ་ཇི་སྐད་སྨོས་པའི་ཚུལ་དུ་བསྐོལ་བའི་ཏིལ་མར་བསྐུ་བ་ལ་སོགས་པའི་སྦྱོར་བ་བྱས་ན་མངལ་
སྐྲང་བ་ལ་སོགས་པའི་ནད་ལ་ཕན་ནོ། །ནས་ཟན་ཨི་རུ་སྦྱར་ཆང་དང་། །བུ་རམ་ཆང་དང་ཏིལ་མར་བསྟེན། །པི་པི་ལིང་དང་ལྕགས་ཕྱེ་དང་། །ཨ་རུ་ར་སྦྱར་སྦྲང་རྩི་ཕན། །ཞེས་བྱ་བ་ལ། །ནས་ཟན་དང་ཨ་རུ་ར་སྦྱར་བའི་ཆང་བསྟེན་ཞིང་། །བུ་རམ་ཆང་ལ་སོགས་པ་བསྟེན་པ་དང་། །པི་པི་
ལིང་གི་སྦྱོར་བ་དང་། །ལྕགས་ཕྱེའི་སྦྱོར་བ་དང་། །ཨ་རུ་རའི་སྦྱོར་བ་སྦྲང་རྩི་དང་བཅས་པ་བཏང་ན་ཡང་ཕན་ནོ། །ནག་ཚུར་རྒྱམ་ཚ་འབྲས་བུ་གསུམ། །ཨ་མྲ་འཛམ་བུའི་ཚི་གུ་བཅས། །དཏ་ཀའི་ཕྱེ་སྦྲང་རྩིར་སྦྱར། །སྦྱི་བག་འཛག་པ་དག་པར་བྱེད། །ཅེས་བྱ་བ་ལ། ནག་ཚུར་ལ་སོགས་
པའི་ཕྱེ་མ་སྦྲང་རྩི་དང་སྦྱར་བ་བྱིན་ན་ཡང་མངལ་ནས་སྤྱི་བག་འཛག་པ་དག་པར་བྱེད་དོ། །རྒྱ་སྐྱེགས་འཛམ་བུ་ད་ཏ་ཀི། །མོ་ཙ་ར་ས་ལ་མང་གི། །སྲ་རྩི་པོག་གི་ཕྱེ་མ་ཡིས། །དྲི་མི་ཞིམ་དང་སྤྱི་བག་འཛག །རྣགས་ཤིང་སྲ་བ་སེལ་བར་བྱེད་། །ཅེས་བྱ་བ་ལ། རྒྱ་སྐྱེགས་ལ་སོགས་པའི་
སྦྱོར་བས་ནི་དྲི་མི་ཞིམ་བ་ལ་སོགས་པའི་སྦྱོར་བ་སེལ་བར་བྱེད་དོ། །དོང་ག་ལ་སོགས་སྡེ་ཚན་ནི། །བསྐོལ་བའི་ཁུ་བ་བླུགས་པར་བྱ། །ཞེས་བྱ་བ་ལ། ཡང་དོང་ག་ལ་སོགས་པའི་སྡེ་ཚན་གྱི་ཁུ་བ་བླུགས་ན་དྲི་མི་ཞིམ་པ་ལ་སོགས་པ་སེལ་བར་བྱེད་དོ། །སྲ་ཞིང་རྩུབ་པར་གྱུར་པ་ལ། །མཉེན་པའི་
ཆོ་ག་བྱ་བ་དང་། །ཤ་བརྡུངས་པ་ཡིས་གླན་པ་དང་། །ཀྲི་ས་ར་དང་འོ་ཐུག་གཞུག །ཅེས་བྱ་བ་ལ། །མངལ་སྲ་བ་ལ་སོགས་པ་ལ་ནི་ཤ་བརྡུངས་ཏེ་བཙོས་ཤིང་སྤོད་བཏབ་སྟེ་གླན་པ་དང་། །དེ་བཞིན་དུ་ཏིལ་དང་འབྲས་ལ་སོགས་པའི་ཀྲི་ས་ར་དང་། །འོ་མ་དང་འབྲས་བཙོས་པའི་འོ་ཐུག་གཞུག་
ཅིང་གླན་པར་བྱའོ། །དྲི་ངར་ཏིལ་མར་དྲི་ཞིམ་པའམ། །ལྡེ་གུ་དྲི་ཞིམ་བསྐུ་བའམ། །དྲི་བཟངས་ཀུན་གི་ཕྱེ་མའམ། །རུལ་བའི་དྲི་ནི་སེལ་བྱེད་བཞུག །ཅེས་བྱ་བ་ལ། མངལ་དྲི་མི་ཞིམ་པར་གྱུར་པ་ལ་ནི་དྲི་ཞིམ་པའི་སྨན་ཐམས་ཅད་དང་སྦྱང་བའི་ཏིལ་མར་རམ་ལྡེ་གུའམ་ཕྱེ་མས་བསྐུས་ཤིང་བཏང་
เล่ม ๒๐๒ · หน้า 252b
པས་དྲི་ང་བ་སེལ་བར་བྱེད་དོ། །བད་ཀན་ཅན་ལ་ཕལ་ཆེར་སྨན། །ཚ་བ་བ་གཅིན་མས་གཏོང་ཕན། །ཞེས་བྱ་བ་ལ། མངལ་བད་ཀན་གྱི་ནད་ཤས་ཆེ་བ་ལ་ནི་སྨན་ཚ་བའི་ཤས་ཆེ་བ་བ་གཅིན་དང་བཅས་ཤིང་སྦྱར་བ་མས་གཏོང་བ་ཕན་ནོ། །མཁྲིས་པ་ཤིང་མངར་འོ་མར་བཅས། །རླུང་གྱུར་སྐྱུར་
བཅས་ཏིལ་མར་ཕན། །ཞེས་བྱ་བ་ལ། མཁྲིས་པ་ཤས་ཆེ་བའི་མངལ་གྱི་ནད་ལ་ནི་ཤིང་མངར་དང་འོ་མར་སྦྱར་བ་མས་གཏོང་བ་ཕན་ནོ། །རླུང་གི་ཤས་ཆེ་བའི་ནད་ལ་ནི་སྐྱུར་བའི་བག་དང་ལྷན་ཅིག་བསྐོལ་བའི་ཏིལ་མར་གྱི་མས་གཏོང་བ་ཕན་ནོ། །འདུས་པ་ལས་གྱུར་ནད་ལ་ནི། །ཐུན་མོང་གིས་
ནི་གསོ་བ་ཕན། །ཞེས་བྱ་བ་ལ། འདུས་པ་ལས་གྱུར་པའི་མངལ་ནད་ལ་ནི་གསོ་བའི་སྦྱོར་བ་ཐུན་མོང་བྱས་ན་ཕན་ནོ། །དེ་ལྟར་མངལ་ནད་དག་གྱུར་ན། །ས་བོན་སྐྱོན་མེད་ཐ་མལ་བར། །རྣམ་པར་ཤེས་པ་འཇུག་པས་ན། །བུད་མེད་ལ་ནི་བུ་ཆགས་འགྱུར། །ཞེས་བྱ་བ་ལ། འདུས་བ་ལས་
གྱུར་པའི་མངལ་དག་པ་དང་ལྡན་པ་དང་། ས་བོན་ཟླ་མཚན་ཉེས་པའི་སྐྱོན་མེད་བ་ཐ་མལ་བ་དང་ལྡན་པ་ལ་ནི་སྲིད་པ་བར་མའི་རྣམ་པར་ཤེས་པ་འཇུག་པས་ན། །བུད་མེད་གལ་ཏེ་ནད་དང་བཅས་པ་ཡིན་ན་དེ་ལྟ་བུ་ལ་བུ་ཆགས་པར་འགྱུར་རོ། །སྐྱེས་པ་ཡི་ནི་དབང་པོ་ཡང་། །ལས་རྣམ་ལྔ་ཡིས་
དག་བྱ་ཞིང་། །མདོག་ལས་ནད་གཞི་བརྟགས་ནས་ནི། །ནད་བཅས་དེ་འཇོམས་སྨན་གྱིས་གསོ། །ཞེས་བྱ་བ་ལ། སྐྱེས་བའི་དབང་པོ་ཡང་ལས་རྣམ་པ་ལྔས་སྦྱང་བར་བྱ་ཞིང་། ཁུ་བའི་མདོག་ལས་ནད་གཞི་བརྟགས་ལ། གལ་ཏེ་ནད་དང་བཅས་པ་ཡིན་ན་ནི། ནད་རང་རང་སེལ་ཞིང་འཇོམས་
བའི་སྨན་གྱིས་གསོ་བར་བྱའོ། །རུ་རྟ་རྒྱ་སྤོས་ཤུ་དག་བཙོད། །འབྲས་བུ་གསུམ་དང་ཁ་ར་དཀར། །ཤིང་མངར་མེ་ད་སེར་པོ་གཉིས། །ལ་ལ་ཕུད་དང་པུ་ཙེ་ཤེལ། །ཤིང་མངར་རམ་ཉེ་པ་ཡ་སྱ། །ཨ་ཤྭ་གནྦྷ་ཉེའུ་ཤིང་པ། །ཞོ་ནི་གཉིས་གཉིས་བཏགས་པའི་ཕྱེ། །མར་བྲེ་གང་དང་འོ་མ་ནི། །བཞི་
འགྱུར་དང་ནི་བཅས་པ་བསྐོལ། །བླུད་ན་མངལ་དང་ཁུ་བ་ཡི། །ཉེས་པ་ཐམས་ཅད་སེལ་བྱེད་ཅིང་། །ཚེ་རིང་ལུས་ནི་རྒྱས་བྱེད་ལ། །ཡིད་གཞུངས་པ་དང་བཀྲ་ཤིས་དང་། །བུ་སྐྱེད་པར་ནི་བྱེད་མཆོག་ཡིན། །འབྲས་བུའི་སྨན་མར་ཞེས་བྱར་བཤད། །ཟླ་མཚན་རྒྱུ་ཚེ་འཐུངས་གྱུར་ན། །བུ་ནི་
เล่ม ๒๐๒ · หน้า 253a
འཆི་བར་བྱེད་པ་ཡང་། །འཚོ་ཞིང་སྒྲུམ་མ་རྣམས་ལ་བསྔགས། །འདི་ནི་མཆོག་ཏུ་བྱིས་པ་ཡི། །ལུས་རྒྱས་གདོན་འཇོམས་བྱེད་པ་ཡིན། །ཞེས་བྱ་བ་ལ། རུ་རྟ་དང་རྒྱ་སྤོས་ལ་སོགས་པའི་སྨན་སྣ་རེ་ཞོ་གཉིས་གཉིས་ཞིབ་ཏུ་བཏགས་པའི་ཕྱེ་མ་མར་བྲེ་གང་དང་འོ་མ་བྲེ་
བཞི་དང་བསྐོལ་ཏེ། མར་འབའ་ཞིག་ལུས་པ་བླུད་ན་མངལ་དང་ཁུ་བའི་ཉེས་པ་ཐམས་ཅད་སེལ་བར་བྱེད་ཅིང་ཚེ་རིང་བ་ནས་མངལ་དུ་བུ་ཆགས་པར་བྱེད་པའི་མཆོག་ཡིན་ཏེ། འདི་ནི་མིང་འབྲས་བུའི་སྨན་མར་ཞེས་བྱ་བར་བཤད་དོ། འདི་ཟླ་མཚན་རྒྱུ་ཞིང་མངལ་ཆགས་པར་བྱེད་པའི་དུས་སུ་
བླུད་ན་བུ་འཆི་བར་བྱེད་ན་ཡང་འཚོ་ཞིང་མངལ་ཆགས་པར་འགྱུར་བ་འམ། སྦྲུམ་མ་རྣམས་ལ་ཡང་བསྔགས་ཤིང་ཕན་པ་དང་མར་འདི་ཁྱད་པར་དུ་བྱིས་པ་རྣམས་ཀྱི་ལུས་རྒྱས་ཤིང་བརྟས་པ་དང་། གདོན་འཇོམས་པར་བྱེད་པའི་མཆོག་ཡིན་ནོ། ཡན་ལག་བརྒྱད་པའི་སྙིང་པོའི་རྣམ་པར་འགྲེལ་
པའི་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་བཞི་པའི་རྣམ་པར་འགྲེལ་པའོ།། །།མཚོན་སྤྱད་ཀྱིས་གསོ་བའི་རྒྱུད་རྫོགས་སོ།། །།དེ་ནས་དུག་ནད་གསོ་བ་བཤད་པར་བྱའོ། །སྔོན་ནི་ལྷ་དང་ལྷམ་
ཡིན། །བདུད་རྩི་འདོད་པས་བསྲུབས་པ་ན། །བདུད་རྩི་འབྱུང་བའི་སྔོན་རོལ་དུ། །སྐྱེས་བུ་ཤིན་ཏུ་འཇིགས་པའི་གཟུགས། །མཆེ་བ་བཞི་པ་གཟི་བརྗིད་འབར། །སྐྲ་སེར་མིག་ནི་མེ་འབར་བ། །ངེ་མཐོང་འགྲོ་བ་སྡུག་བསྔལ་གྱུར། །དེས་ན་འདི་ནི་དུག་ཅེས་བྱ། །ཞེས་བྱ་བ་ལ། སྔོན་
ཐོག་མར་ལྷ་དང་ལྷ་མ་ཡིན་བདུད་རྩི་འདོད་པའི་ཕྱིར་འོ་མ་ཅན་གྱི་རྒྱ་མཚོ་བསྲུབས་པ་ལས། །བདུད་རྩི་འབྱུང་བའི་སྔོན་དུ་སྐྱེས་བུ་ཤིན་ཏུ་འཇིགས་པའི་གཟུགས་ཅན་མཆེ་བ་བཞི་པ་ལུས་ཀྱི་གཟི་བརྗིད་ཆེ་བ། །སྐྲ་སེར་ཞིང་ཁམ་པ། །མིག་མེ་ལྟར་འབར་བ་ཞིག་བྱུང་བར་གྱུར་ལ། །དེ་མཐོང་བས་འགྲོ་
བ་རྣམས་སྡུག་བསྔལ་བར་གྱུར་ཏེ། དེས་ན་འདི་ལ་མིང་དུ་དུག་ཅེས་བྱ་བ་ཡིན་ལ། དེའི་ཕྱིར་དེའི་ཆ་ལས་བྱུང་བ་སྡུག་བསྔལ་སྐྱེད་པར་བྱེད་པ་ཐམས་ཅད་ལ་ཡང་དུག་ཅེས་བྱ་བ་ཡིན་ནོ། །ཚངས་པས་ཧཱུཾ་ཞེས་བརྗོད་པ་དང་། །བསླུ་བའི་བདག་ཉིད་ཅན་སྤོངས་ཏེ། །གཟུགས་དེ་རྒྱུ་དང་མི་རྒྱུ་བའི་
เล่ม ๒๐๒ · หน้า 253b
གཟུགས་ལ་དེ་ནི་ཞུགས་པར་གྱུར། །ཞེས་བྱ་བ་ལ། དེའི་འོག་ཏུ་ཚངས་པས་ཧཱུཾ་ཞེས་བརྗོད་དེ་ཚར་བཅད་པ་དང་། །སྡུག་བསྔལ་བར་བྱེད་པའི་བསླུ་བའི་བདག་ཉིད་ཅན་དེ་རང་གཟུགས་སྦངས་ཏེ་གནོད་པར་བྱེད་པའི་གཟུགས་དེ་རྒྱུ་བ་དང་མི་རྒྱུ་བའི་གཟུགས་ལ་ཞུགས་པར་གྱུར་ཏོ། །བརྟན་དུག་
ནུས་པ་མི་བཟད་པར། །སྡོང་བུ་ལ་ནི་གནས་པ་གང་། །ཀ་ལ་ཀུ་ཏ་དབང་པོའི་བུ། །བཙན་དུག་ཧ་ལ་ཧ་ལ་སོགས། །ཞེས་བྱ་བ་ལ། དུག་དེ་སྡོང་བུ་ལ་སོགས་པ་ལ་གནས་པར་གྱུར་བ་གང་ཡིན་པ་དེ་ནི་ནུས་པ་མི་བཟད་ཅིང་རང་བཞིན་བརྟན་པར་གྱུར་པ་ཀ་ལ་ཀུ་ཏ་དང་། །དབང་པོའི་བུ་
སྟེ་ཨི་ནྡྲ་བད་ཚ་དང་། །བཙན་དུག་སྟེ་སྲིང་གི་དང་། །ཧ་ལ་ཧ་ལ་ལ་སོགས་པའི་དུག་ཏུ་གྱུར་པ་ནི་སེམས་མེད་ཅིང་བརྟན་ལ་མི་གཡོ་བའི་གཟུགས་ལ་གནས་པས་ན། །བརྟན་པའི་དུག་ཅེ་འམ་མི་རྒྱུ་བའི་དུག་ཅེས་བྱའོ། །རྒྱུ་བའི་དུག་ནི་མི་བཟད་གྱུར། །སྦྲུལ་དང་ཕག་དང་མཆེ་བ་ཅན། །
ཞེས་བྱ་བ་ལ། དུག་མི་བཟད་པ་གང་སྦྲུལ་དང་སྲོག་ཆགས་ཕག་དང་། །མཆེ་བ་ཅན་ལ་སོགས་པ་ལ་གནས་པའི་དུག་དེ་ནི་སེམས་ཅན་ལ་བརྟེན་པ་ཡིན་པས་རྒྱུ་བའི་དུག་ཅེས་བྱའོ། །རྒྱུ་བ་དང་ནི་མི་རྒྱུ་བའི། །བཅོས་མ་མ་ཡིན་དུག་ཏུ་བཤད། །ཅེས་བྱ་བ་ལ། དེ་ལྟར་རྒྱུ་བ་དང་མི་རྒྱུ་བའི་དུག་
ནི་བཅོས་མ་མ་ཡིན་པའི་དུག་ཅེས་བྱ་སྟེ། རང་བཞིན་གྱི་དུག་ཡིན་བའི་ཕྱིར་རོ། །བཅོས་མ་སྣ་ཚོགས་སྨན་ལ་ནི། །སྦྱར་བ་སྦྱར་བའི་དུག་ཅེས་བྱ། །ཞེས་བྱ་བ་ལ། གང་དུག་ཏུ་གྱུར་བའི་སྨན་སྣ་ཚོགས་པ་ལ་སོགས་བ་སྦྱར་བ་ནི་བྱ་བའི་ལས་ཀྱིས་བསྒྲུབས་པ་ཡིན་པས་ན། སྦྱར་བའི་དུག་
ཅེས་བྱ་སྟེ། བཅོས་མའི་དུག་ཀྱང་དེ་ཉིད་ཡིན་ནོ། །དེ་ནི་སྦྱོར་བའི་དབང་ལས་ནི། །ཤིན་ཏུ་རིང་ནས་གསོད་པའམ། །སྐྲང་དང་སྐྱ་རྦབ་དམུ་རྫིང་དང་། །སྨྱོ་བྱེད་གཞང་འབྲུམ་ལ་སོགས་སྐྱེད། །ཅེས་བྱ་བ་ལ། སྦྱར་བའི་དུག་དེ་ནི་སྦྱོར་བའི་དབང་གིས་དུག་ཡུན་རིང་ཞིག་ན་གསོད་པར་བྱེད་པའམ་
སྐྲང་བ་ལ་སོགས་པའི་ནད་སྐྱེད་པར་བྱེད་བ་ཡིན་ནོ། །རྣོ་དྲོ་རྩུབ་ཅིང་དང་བ་དང་། །ཁྱབ་ཅིང་མྱུར་གསོད་ཡང་བ་དང་། །འདར་ཞིང་ཕྲ་ལ་རོ་མི་གསལ། །འཇུ་བར་མི་བྱེད་པ་ཡིན་ནོ། །ཞེས་བྱ་བ་ལ། དུག་དེ་ནི་རྣོ་བ་ལ་སོགས་པའི་མཚན་ཉིད་བཅུ་པོ་དེ་དང་ལྡན་ཞིང་འཇུ་བར་མི་བྱེད་པ་ཡིན་ནོ་
เล่ม ๒๐๒ · หน้า 254a
རྣོ་སོགས་ཡོན་ཏན་དང་ལྡན་པས། །དེ་ནི་མདངས་ལས་གོ་བཟློག་ཡིན། །མི་ནི་རླུང་མཁྲིས་ཤས་ཆེ་བ། །སྲོག་ནི་འཕྲལ་དུ་འཕྲོག་པར་བྱེད། །ཅེས་བྱ་བ་ལ། དུག་དེ་ནི་རྣོ་བ་ལ་སོགས་པ་ཡོན་ཏན་བཅུ་དང་ལྡན་པས་མདངས་ཀྱི་ཡོན་ཏན་ལས་གོ་བཟློག་པར་
གྱུར་པ་ཡིན་ལ། །དེ་བཞིན་དུ་མི་རླུང་དང་མཁྲིས་པ་ཤས་ཆེ་བ་དག་ནི་སྲོག་མོད་ལ་འཕྲོག་པར་བྱེད་པ་ཡིན་ནོ། །དུག་གིས་ལུས་སུ་ཕྱིན་པ་དང་། །དང་པོར་ཁྲག་ལ་གནོད་པར་བྱེད། །བད་ཀན་མཁྲིས་པ་རླུང་རྗེས་ལ། །ནད་གཞི་གྲོགས་དང་ལྷན་ཅིག་འབྱུང་། །ཞེས་བྱ་བ་ལ། །གང་གི་
ཕྱིར་དུག་གིས་ལུས་ལ་ཕྱིན་ཅིང་སོང་བ་ན། །དང་པོར་ཁྲག་ལ་གནོད་པར་བྱེད་ནས། །དེའི་རྗེས་ལ་བད་ཀན་དང་མཁྲིས་པ་དང་རླུང་ལ་གནོད་པར་བྱེད་དེ། །ནད་གཞི་གསུམ་ཆ་མཉམ་པ་ལ་ནི་བད་ཀན་ལ་སོགས་པ་ལ་གནོད་ཅིང་ལྷན་ཅིག་འབྱུང་བར་བྱེད་དོ། །དེ་ནས་སྙིང་ལ་གནས་
ནས་ནི། །ལུས་ལ་གནོད་པ་བྱེད་པར་འགྱུར། །ཞེས་བྱ་བ་ལ། དེ་ནས་དུག་དེ་སྙིང་ལ་གནས་ནས་ལུས་འཇོམས་ཤིང་གནོད་པར་བྱེད་པར་འགྱུར་རོ། །མི་རྒྱུའི་དུག་ནི་བཏང་གྱུར་ན། །ལྕེ་གནག་ལུས་ནི་རེངས་པ་དང་། །བརྒྱལ་དང་སློན་དང་སྡང་དང་ངལ། །གནས་སྐབས་དང་
པོར་འབྱུར་བར་འགྱུར། །ཞེས་བྱ་བ་ལ། དེ་ནས་དུག་དེ་སྙིང་ལ་གནས་ནས་ལུས་འཇོམས་ཤིང་གནོད་པར་བྱེད། །འདུག་པར་གྱུར་ནས་དུག་གི་ཤུགས་དང་པོ་ལ་ལྕེ་གནག་ཅིང་ལུས་རེངས་པ་ལ་སོགས་པར་འགྱུར་རོ། །གཉིས་པར་འདར་ཞིང་རྔུལ་བ་དང་། །ཚོ་ཞིང་ལྐོག་མ་ན་བ་
དང་། །དུག་གིས་མ་ཞུའི་གནས་ཕྱིན་ན། །སྙིང་ནི་ན་བར་བྱེད་པར་འགྱུར། །ཞེས་བྱ་བ་ལ། དུག་གི་ཤུགས་གཉིས་པ་ལ་ནི་ལུས་འདར་བ་དང་། །རྔུལ་ལ་སོགས་པ་འབྱུང་ཞིང་ཤུགས་དེའི་ཚེ་དུག་གིས་མ་ཞུ་བའི་གནས་སུ་ཕྱིན་པས་ལྷག་པར་ཡང་སྙིང་ན་བར་བྱེད་དོ། །གསུམ་པར་རྐན་
ནི་སྐམས་པ་དང་། །མ་ཞུའི་གནས་སུ་ཤིན་ཏུ་གཟེར། །དེའི་མིག་ཉམ་ཆུང་སེར་བ་དང་། །སྐྲང་བ་ཉིད་དུ་འགྱུར་བ་དང་། །ཞུ་བའི་གནས་ཕྱིན་ཟུག་པ་དང་། །སྐྱིགས་བུ་ལུད་པ་རྒྱུ་མ་འཁྲུགས། །ཞེས་བྱ་བ་ལ། དུག་གི་ཤུགས་གསུམ་པར་ནི་རྐན་སྐམས་པ་ལ་སོགས་པ་དང་། །ནད་
เล่ม ๒๐๒ · หน้า 254b
པ་དེའི་མིག་ཉམ་ཆུང་ཞིང་སེར་བ་ལ་སོགས་པར་འགྱུར་བ་ཡིན་ནོ། །དུག་གི་ཤུགས་ནི་བཞི་པ་ལ། །མགོ་བོ་ལྷག་པར་ལྕི་བར་འགྱུར། །ཞེས་བྱ་བ་ལ། དུག་གི་ཤུགས་བཞི་པ་ལ་ནི་མགོ་བོ་ལྷག་པར་ལྕི་བར་འགྱུར་རོ། །ལྔ་པར་མཆིལ་སྣབས་འཛག་པ་དང་། །ལྷུ་ཚིགས་ནབ་འབྱུང་
འགྱུར་ལ། །མདོག་མི་སྡུག་ཅིང་ནད་ཀུན་འཁྲུགས། །ཞུ་བའི་གནས་ཀྱི་འོག་ཏུ་ན། །ཞེས་བྱ་བ་ལ། དུག་གི་ཤུགས་ལྔ་པར་ནི་ལྷུ་ཚིགས་ན་བ་ལ་སོགས་པ་དང་། །རླུང་ལ་སོགས་པའི་ནད་ཀུན་འཁྲུགས་པ་དང་། །ཞུ་བའི་གནས་ཀྱི་འོག་ཏུ་ལྷག་པར་ན་བར་འགྱུར་རོ། །དྲུག་པར་
འདུ་ཤེས་ཉམས་པ་དང་། །ཤིན་ཏུ་འཁྲུལ་བར་བྱེད་པར་འགྱུར། །ཞེས་བྱ་བ་ལ། དྲུག་པར་ནི་འདུ་ཤེས་ཉམས་པ་ལ་སོགས་པར་འགྱུར་རོ། །བདུན་པར་ཕྲག་གོང་རྒལ་ཚིགས་དང་། །དཔྱི་ཚིགས་བྱེ་ན་འཆི་འགྱུར་ཡིན། །ཞེས་བྱ་བ་ལ། དུག་གི་ཤུགས་བདུན་པ་ལ་ནི་རྒལ་
ཚིགས་ན་བ་ལ་སོགས་པར་འགྱུར་རོ། །དུག་གི་ཤུགས་ནི་དང་པོ་ལ། །སློན་ཞིང་ཆུ་གྲང་དག་གིས་གཏོར། །མར་དང་སྦྲང་རྩིར་བཅས་པ་ཡི། །དུག་གི་སྨན་ནི་མྱུར་དུ་བླུད། །ཅེས་བྱ་བ་ལ། དུག་གི་ཤུགས་དང་པོ་ལ་ནི་སློན་སྨན་ལ་སོགས་པ་བྱའོ། །གཉིས་པར་སྐྱུག་སྨན་
བཀྲུ་སྨན་གཏང་། །སྔ་མ་བཞིན་དུ་དུག་སྨན་བླུད། །ཅེས་བྱ་བ་ལ། དུག་གི་ཤུགས་གཉིས་པ་ལ་ནི་བཀྲུ་སྨན་དང་སྐྱུག་སྨན་བཏང་ལ་སྔ་མ་བཞིན་དུ་དུག་གི་སྨན་ཞུན་མར་དང་། །སྦྲང་རྩི་དང་སྦྱར་བ་སྦྱིན་པར་བྱའོ། །གསུམ་བར་དུག་གི་སྨན་བླུད་ཅིང་། །དེ་བཞིན་མིག་སྨན་སྣ་སྨན་གཏང་། །
ཞེས་བྱ་བ་ལ། དུག་གི་ཤུགས་གསུམ་པ་ལ་ནི་དུག་སྨན་བླུད་པ་ལ་སོགས་པ་བྱའོ། །བཞི་པར་སྣུམ་དང་བཅས་པ་ཡི། །དུག་གི་སྨན་ནི་བཏང་ན་ཕན། །ཞེས་བྱ་བ་ལ། བཞི་པ་ལ་ནི་དུག་གི་སྨན་ལ་སོགས་པ་སྦྱིན་པར་བྱའོ། །ལྔ་པར་ཤིང་མངར་ཁུ་བ་དང་། །སྦྲང་རྩིར་སྦྱར་བ་བླུད་ན་
ཕན། །ཞེས་བྱ་བ་ལ། དུག་གི་ཤུགས་ལྔ་པ་ལ་ནི་དུག་སྨན་ཤིང་མངར་ལ་སོགས་པ་བླུད་པར་བྱའོ། །དྲུག་པར་འཁྲུ་བ་ལྟ་བུར་གསོ། །ཞེས་བྱ་བ་ལ། དུག་གི་ཤུགས་དྲུག་པ་ལ་ནི་འཁྲུ་བའི་གསོ་བ་ཇི་སྐད་སྨོས་པ་ལྟར་བྱའོ། །བདུན་པར་སྣ་སྨན་དུད་པ་དང་། །སྦྱི་བོར་རྒྱ་གྲམ་བྱས་
เล่ม ๒๐๒ · หน้า 255a
ནས་ནི། །ཤ་འམ་ཁྲག་ནི་གཞུག་བར་བྱ། །ཞེས་བྱ་བ་ལ། དུག་གི་ཤུགས་བདུན་པ་ལ་ནི་སྣ་སྨན་གྱི་དུད་པ་བདུག་པ་དང་། སྦྱི་བོར་རྒྱ་གྲམ་བྱས་ཏེ་བཏྲལ་ལ་ཤ་དང་ཁྲག་དེར་གཞག་པར་བྱའོ། །ཀོ་ཤ་ཏ་ཀི་ལང་ག་ལི། །པ་ཐ་ལྕམ་པ་ཨ་རུ་ར། །སཱ་ལུ་སླེ་ཏྲེས་
ཤི་རི་ཤ །གི་རི་ཀར་ནི་ཡུང་བ་དང་། །ཨ་ཧཱ་སྦྲང་རྩི་བ་སྤྲུ་བ། །བྲི་ཧ་ཏི་གཉིས་ཚ་བ་གསུམ། །ཤི་རི་བ་དང་བ་ལ་སྟེ། །འདི་རྣམས་བསྐོལ་བའི་ཁུ་བ་དང་། །བསྐོལ་བའི་ནས་ཐུག་བསྒྲངས་པར་ནི། །སྦྲང་རྩི་མར་དང་བཅས་པ་གཞུག །གནས་སྐབས་གཞན་ལ་དུག་འཇོམས་བའི། །སྨན་
དང་གསོ་པ་ཐམས་ཅད་བྱ། །ཞེས་བྱ་བ་ལ། །ཀོ་ཤ་ཏ་ཀི་ལ་སོགས་པ་བསྐོལ་བའི་ཁུ་བ་དང་། །ནས་ཐུག་བྱས་པ་ལས་བསྒྲངས་ཏེ་སྦྲང་རྩི་ལ་སོགས་པ་བཅུག་ནས། །སྐབས་གཞན་དུ་ཞེས་བྱ་བ་ནས་སྐབས་ཀྱི་བར་དུ་དུག་འཇོམས་པའི་སྨན་ནས་ཐུག་དེ་དང་། །སྐྱུག་སྨན་ལ་
སོགས་པ་ཐམས་ཅད་བྱའོ། །ཤིང་མངར་ཙནྤན་མ་དུ་ཀ །པདྨ་གེ་སར་དེ་བཞིན་བྱ། །ཞེས་བྱ་བ་ལ། དེ་བཞིན་དུ་ཤིང་མངར་ལ་སོགས་པ་བསྐོལ་བའི་ཁུ་བ་དང་ནས་ཐུག་བྱས་ཏེ་བསྒྲངས་པར་སྦྲང་རྩི་དང་། །མར་བཅུག་པའི་དུག་སྨན་གནས་སྐབས་ཀྱི་བར་དུ་གཏང་བར་བྱའོ། །
དངུལ་རྡོ་རྒྱ་སྤོས་རུ་རྟ་དང་། །བ་བླ་ལྡོང་རོས་པྲི་ཡང་ཀུ། །ཚ་བ་གསུམ་དང་འབུ་སུ་ཧང་། །ནཱ་ག་པུཥྤ་གེ་སར་བཅས། །ཤིང་མངར་སྤང་སྤོས་ཧ་རེ་ཎུ། །གིའུ་ལྦང་མོན་སྣེའུ་རྨེ་རུ་དང་། །ཤི་རི་བེཥྚ་སྲ་རྩི་པོག། །ཤུ་ཏི་གུར་གུམ་བ་ལ་དང་། །བལ་བུ་ཏ་མ་ལིའི་ལོ་མ། །སྟག་པ་དང་ནི་མེ་
ཤེལ་ལྕི། །སེར་བོ་གཉིས་ནི་སྦྲང་རྩིར་སྦྱར། །བུ་མོ་ཁྲུས་དང་སྨྱུང་བ་བྱས། །གོས་དཀར་བགོས་པ་བྱས་ནས་ནི། །དགེ་སྦྱོང་བྲམ་ཟེ་མཆོད་བྱས་ཏེ། །དུག་སྨན་མཆོག་ནི་སྦྱར་བར་བྱ། །དེ་ཚེ་སྨན་པས་སྔགས་འདིས་ནི། །བདག་ཉིད་བསྔགས་ཏེ་བརྗོད་པར་བྱ། །སྐྱེས་བུ་སེང་གེར་
ཕྱག་འཚལ་ལོ། །སྲེད་མེད་བུ་ལ་ཕྱག་འཚལ་ལོ། །ཇི་ལྟར་ཁྱབ་འཇུག་གཡུལ་ངོར་ནི། །གཞན་གྱིས་ཕམ་པར་མ་མཐོང་སྟེ། །བདེན་པའི་ཚིག་ནི་འདི་ཡིས་ཀྱང་། །བདག་ལ་དུག་མེ་གྲུབ་པར་ཤོག །ན་མོ་བེེཌཱུ་རྱ་ཡ་མ་དེ། །ཧུ་ཊྱ་ཧུ་ཊྱ་རཀྵ་མཱཾ། །སརྦ་བི་ཤེ་བྷྱཿགོོ་རི་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด