ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ

ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๒๐๒ · หน้า 255b

གནྔྷ་རི་ཙ་ཎྜ་ལི་མ་ཏང་གི་སྭཱ་ཧཱ། །འཐག་པའི་སྔགས་གཉིས་པ་ནི། ཧ་རི་མ་ཡེ་སྭཱ་ཧཱ། །ཞེས་བྱ་བ་ལ། དངུལ་རྡོ་ལ་སོགས་པ་སྨན་བུ་མོ་ཁྲུས་དང་གཙང་སྦྲར་བཅས་པ་སྨྱུང་བར་གནས་པ་གོས་དཀར་པོ་བགོས་པས་དང་པོ་དགེ་སྦྱོང་དང་བྲམ་ཟེ་ལ་མཆོད་པ་བྱས་ཏེ། སྐར་མ་རྒྱལ་ལ་བབ་

པ་ན། དུག་སྨན་གྱི་མཆོག་འདི་སྦྱར་བར་བྱ་ཞིང་སྦྲང་རྩི་དང་བསྲེ་བར་བྱའོ། །དེ་ནས་དེའི་སྨན་པས་སྔགས་དང་ཚིགས་སུ་བཅད་པ་འདི་དག་གིས་བསྔགས་ཏེ། སྐྱེས་བུ་སེང་གེ་ཞེས་བྱ་བ་ནས་སྭཱཧཱའི་བར་དུ་བརྗོད་པར་བྱའོ། །དེ་བཞིན་དུ་འཐག་པའི་ཚེ་ཡང་སྔགས་གཉིས་པ་བ་

ཧ་མཱ་ཡེ་སྭཱ་ཧཱ། །ཞེས་བྱ་བ་བརྗོད་པར་བྱའོ། །མ་ལུས་དུག་དང་རོ་ལངས་དང་། །གདོན་གྱི་ལས་དང་སྡིག་པ་དང་། །གསོད་བྱེད་ནད་དང་མུ་གེ་དང་། །འཐབ་པར་འདོད་དང་འཇིགས་པ་ལ། །སྨན་བཏུང་སྣ་སྨན་མིག་སྨན་བསྐུ། །གདུ་བུ་ལ་སོགས་ལ་སྦྱར་བྱ། །འདི་ནི་ཟླ་ཤར་ཞེས་

བྱ་སྟེ། །ཞི་དང་བདེ་ལེགས་བྱེད་མཆོག་ཡིན། །ཞེས་བྱ་བ་ལ། དུག་སྨན་འདི་ནི་མིང་ཟླ་བ་ཤར་བ་ཞེས་བྱ་སྟེ། མ་ལུས་པའི་དུག་དང་རོ་ལངས་ལ་སོགས་པ་ཞི་བར་བྱེད་པ་ནས། འཇིགས་བའི་བར་ལ་སྣ་སྨན་ལ་སོགས་པས་བཏང་ན། ཞི་བ་དང་བདེ་ལེགས་དམ་པའི་མཆོག་

ཡིན་ནོ། །དུག་རྙིང་དུག་སེལ་སྨན་གྱིས་ཟིལ་མནན་པ། །ནགས་མེ་རླུང་དང་ཉི་ཚན་གྱིས་སྐམས་པ་འམ། །རང་བཞིན་གྱིས་ནི་ཡོན་ཏན་མི་ལྡན་པས། །ཉམས་པའི་དུག་ཅེས་བྱ་བའི་དུག་ཏུ་འགྱུར། །ཞེས་བྱ་བ་ལ། དུག་གང་རྙིང་པར་གྱུར་པ་འམ། དུག་སེལ་བའི་སྨན་གྱི་

ཟིལ་གྱིས་མནན་པའམ། ཡང་ན་ནགས་ཀྱི་མེ་དང་རླུང་ལ་སོགས་པས་སྐམས་པའམ། ཡང་ན་རང་བཞིན་གྱིས་རྣོ་བ་ལ་སོགས་པའི་ཡོན་ཏན་དང་མི་ལྡན་པ་ནི་ཉམས་པའི་དུག་ཅེས་བྱ་བར་འགྱུར་བ་ཡིན་ནོ། །འདི་ནི་ནུས་པ་ཆུང་བས་མི་རྟོགས་ཏེ། །བད་ཀན་དང་འདྲེས་ལོ་ནི་མང་

པོར་གནས། །ཞེས་བྱ་བ་ལ། ཉམས་པའི་དུག་ཅེས་བྱ་བ་འདི་ནི་ནུས་པ་ཆུང་བའི་ཕྱིར་འདི་ནི་འཕྲལ་དུ་གསལ་བར་མི་རྟོགས་ཏེ། །གལ་ཏེ་བད་ཀན་དང་འདྲེས་ན་ནི་ལོ་མང་པོའི་བར་དུ་ཡང་གནས་པར་འགྱུར་པ་ཡིན་ནོ། །དེས་ཉེ་ན་གྱུར་པ་མདོག་ངན་འཁྲུ་བར་བྱེད། །ནད་ཁྲག་སྐོམ་དང་

เล่ม ๒๐๒ · หน้า 256a

ཡི་ག་འཆུས་པས་ཉེན། །བརྒྱལ་ཞིང་སློན་ལ་རྣམ་རྨོངས་སྐད་འཛེར་དང་། །དུག་གི་དམུ་རྫིང་མཚན་མས་གནོད་པར་འགྱུར། །ཞེས་བྱ་བ་ལ། ཉམས་པའི་དུག་དེས་ཉེན་པར་གྱུར་པའི་སྐྱེས་བུ་ནི་མདོག་ངན་པ་དང་། བཤང་བ་འཁྲུ་བར་གྱུར་པ་དང་། །

ནད་ཁྲག་དང་བཅས་པ་དང་། སྐོམ་དད་དང་ཡི་ག་འཆུས་པའི་ནད་གཉིས་ཀྱིས་ཉེན་པ་དང་། བརྒྱལ་ཞིང་མྱོས་པ་དང་། སློན་ཞིང་སྐྱུགས་པ་དང་། སེམས་རྣམ་པར་རྨོངས་ཞིང་སྐད་ངར་ངར་པོར་འཛེར་བ་དང་། དུག་ལས་གྱུར་པའི་དམུ་རྫིང་གི་མཚན་མ་གང་དག་ཡིན་པ་དག་

དང་ལྡན་པར་འགྱུར་རོ། །མ་ཞུའི་གནས་བརྟེན་བད་ཀན་རླུང་ནད་སྐྱེད། ཞུ་བའི་གནས་བརྟེན་མཁྲིས་དང་རླུང་ནད་སྐྱེད། །མི་ཡི་ཡན་ལག་ཞིག་ཅིང་སྐྲ་འབྱི་བས། །ཇི་ལྟར་བྱ་ནི་སྤུ་བཏོགས་པ་ལྟ་བུར་བྱེད། །ཅེས་བྱ་བ་ལ། ཉམས་པའི་དུག་དེ་མ་ཞུ་བའི་གནས་ལ་བརྟེན་པ་ནི་

བད་ཀན་དང་རླུང་གི་ནད་སྐྱེད་པར་བྱེད་ལ། ཞུ་བའི་གནས་ལ་བརྟེན་ན་ནི་མཁྲིས་པ་དང་རླུང་གི་ནད་སྐྱེད་པར་བྱེད་པ་དང་། །མིའི་ཡན་ལག་ཞིག་ཅིང་སྐྲ་འབྱི་བས་ན། ཇི་ལྟར་བྱ་སྒྲོ་གཤོག་དང་སྤུ་བཏོགས་པ་ལྟ་བུར་བྱེད་པ་ཡིན་ནོ། །དངས་མའམ་ཁྲག་ལ་གནས་པར་

བྱེད་ན་ནི། །ལུས་ཟུངས་ལས་བྱུང་ནད་ནི་སྣ་ཚོགས་སྐྱེད། །ཅེས་བྱ་བ་ལ། ཡང་ན་གནོད་པའི་དུག་དེ་དངས་མ་ལ་སོགས་པ་ལ་གནས་ན་ནི་ལུས་ཟུངས་ལ་བརྟེན་པའི་ནད་རྣམ་པ་ཐ་དད་པ་སྐྱེད་པར་བྱེད་དོ། །མདུན་གྱི་རླུང་དང་མ་ཞུ་གྲང་། །ཡུལ་དམུས་གནོད་ཟས་ཉིལ་པར་

ཉལ། །ལུས་ཟུངས་གནོད་པར་བྱས་པ་ན། །དེ་བས་གནོད་པའི་དུག་ཅེས་བཤད། །ཅེས་བྱ་བ་ལ། མདུན་ནས་ལྡང་བའི་རླུང་དང་མ་ཞུ་བ་དང་། གྲང་བ་ལ་སོགས་པས་ལུས་ཟུངས་ལ་གནོད་པ་ན་དུག་དེ་ལྷག་པར་གནོད་པར་བྱེད་པས་ན། དེའི་ཕྱིར་ཉམས་པའི་དུག་ལ་གནོད་

པའི་དུག་ཅེས་ཀྱང་བྱའོ། །གནོད་པའི་དུག་ཉེན་དུགས་བྱས་ལ། །སྟེང་དང་འོག་ནས་སྦྱང་བར་བྱ། །གནོད་པའི་དུག་ནི་སེལ་བའི་སྨན། །སྦྲང་རྩི་སྦྱར་ཏེ་ལྡེ་གུ་སྦྱིན། །ཞེས་བྱ་བ་ལ། གནོད་པའི་དུག་གམ་ཉམས་པའི་དུག་གིས་ཉེན་པའི་མི་ནི་དང་པོར་ལེགས་པར་དུགས་བྱས་

เล่ม ๒๐๒ · หน้า 256b

ལ། སྐྱུག་སྨན་དང་བཀྲུ་སྨན་གྱིས་སྟེང་འོག་སྦྱངས་ལ། གནོད་པའི་དུག་འཇོམས་པའི་སྨན་སྦྲང་རྩི་དང་སྦྱར་བ་སྦྱིན་པར་བྱའོ། །པི་པི་ལིང་དང་བྱ་མ་ཀ། །སྦང་སྤོས་སེང་ཕྲོམ་སུག་སྨེལ་དང་། །ཀུ་ཏན་ན་ཏ་ས་རྫི་ཀ །རུ་རྟ་ཤིང་མངར་ཙནྡན་དང་། །ཡུག་སྣམ་བཙག་དང་

བཅས་བའི་སྨན། །གནོད་པའི་དུག་སེལ་ཞེས་བྱ་སྟེ། །གཞན་ཡང་ཟློག་པར་བྱེད་པ་ཡིན། །ཞེས་བྱ་བ་ལ། པི་པི་ལིང་ལ་སོགས་པའི་དུག་སྨན་ནི་གནོད་བའི་དུག་སེལ་ཞེས་བྱ་སྟེ། དེས་ནི་དུག་གཞན་ཡང་སེལ་བར་བྱེད་པ་ཡིན་ནོ། །དུག་མདས་ཕོག་པར་གྱུར་པ་

དག། ཡང་དང་ཡང་དུ་མུན་ཐིབས་བྱེད། །མདོག་ནི་མི་སྡུག་གྱུར་པ་དང་། །མྱུར་དུ་ཡིད་འབྱུང་སྡུག་བསྔལ་འཐོབ། །འདིས་ནི་སྲིན་བུས་ཁྱབ་པ་ལྟར། །ལུས་ཚ་ཙག་ཙག་པོར་འགྱུར་རོ། །གདོང་མོ་རྒྱབ་དང་ཕྲག་པ་མགོ། །ལྷུ་ཚིགས་རྣམས་སུ་ན་བར་བྱེད། །ཁྲག་ནི་

ནད་ཅན་གནག་པ་འཛག །སྐོམ་དད་བརྒྱལ་ཚ་རིམས་ཀྱིས་འདེབས། །མིག་ནི་གནག་ཅིང་སློན་པ་དང་། །བཏུད་མར་ལུད་པ་དབུགས་མི་བདེ། །རྨ་དམར་མཐའ་མར་སེར་བ་དང་། །དབུས་ན་གནག་ཅིང་ཤིན་ཏུ་ན། །འཕྲལ་དུ་སྐྲངས་ཤིང་རྣགས་པ་དང་། །ཤ་ཡང་

ནག་པོར་གྱུར་ནས་ནི། །གནག་ཅིང་ཤིན་ཏུ་འདྲུལ་བར་བྱེད། །སྦྱི་བག་ཅན་དུ་འཛག་པར་བྱེད། །ཅེས་བྱ་བ་ལ། སྐྱེས་བུ་དུག་མདས་ཕོག་པ་ནི་ཡང་དང་ཡང་དུ་མུན་ཐིབས་ཞེས་བྱེད་ཅིང་མུན་པར་ཞུགས་པ་སྙམ་དུ་སེམས་པ་དང་། མདོག་མི་སྡུག་པ་ལ་སོགས་པར་འགྱུར་བ་དང་། །

རྨའི་མཐའ་ཤིན་ཏུ་སེར་ཅིང་དབུས་ན་དུག་གི་གནོད་པས་གནག་པ་དང་། འཕྲལ་དུ་སྐྲངས་ཤིང་རྣགས་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །གནད་དུ་ཕོག་པར་མ་གྱུར་བ། །མྱུར་དུ་སྙིང་ལ་ཕན་བྱེད་བྱ། །ཞེས་བྱ་བ་ལ། གནད་ཀྱི་སྟེང་དུ་མ་ཕོག་པ་ལ་ནི་མྱུར་དུ་སྙིང་

ལ་ཕན་པར་བྱེད་པའི་སྦྱོར་བ་མར་ལ་སོགས་པ་གང་དག་ཡིན་པ་བྱའོ། །ཟུག་རྡུ་ཕྱུང་ལ་ལྕགས་བསྲེགས་པས། །རྨ་ནི་ལེགས་པར་བསྲེག་པར་བྱ། །ཞེས་བྱ་བ་ལ། ལུས་ལ་ཟུག་རྡུ་ཕྱུང་ལ། དེའི་འོག་ཏུ་ལྕགས་བསྲེགས་པས་རྨ་བསྲེག་པར་བྱའོ། །ཡང་ན་མུ་ཀ་ཀ་དང་ནི། །

เล่ม ๒๐๒ · หน้า 257a

གི་རི་ཀརྞི་དཀར་པོ་དང་། །ཀད་པ་ལ་ཡི་ཤུན་པ་དང་། །བཙོད་དང་ཤིར་ཤ་བྱ་རྒོད་སེན། །བསྲེགས་པའི་ཐལ་བས་བསྐུ་བར་བྱ། །ཞེས་བྱ་བ་ལ། ཡང་ན་རྨ་དེ་མུ་ཀ་ཀ་ལ་སོགས་པ་བསྲེགས་པའི་ཐལ་བས་བསྐུ་བར་བྱའོ། །ཤུ་ཀ་ན་ས་བོང་ང་དཀར། །ཀཎྜ་

ཀ་རིའི་རྩ་བས་བསྐུ། །ཞེས་བྱ་བ་ལ། ཡང་ན་རྨ་དེ་ཤུ་ཀ་ན་ས་ལ་སོགས་པའི་རྩ་བའི་ལྡེ་གུས་བསྐུ་བར་བྱའོ། །དུག་འཐུང་སོས་བཏབ་གསོ་བ་དག། །ཅི་རིགས་པར་ནི་དེ་ལ་བྱ། །ཞེས་བྱ་བ་ལ། དུག་མདས་ཕོག་པ་དེ་ལ་དུག་འཐུངས་པའི་གསོ་བ་དང་སྦྲུལ་ལ་སོགས་པས་སོས་

བཏབ་པའི་གསོ་བ་དག་གིས་ཀྱང་ཅི་རིགས་པར་གསོ་པར་བྱའོ། །རྨ་ཡི་ཤ་ནི་རྣགས་པ་དེ། །མཁྲིས་པའི་མེ་དབལ་ལྟ་བུར་གསོ། །ཞེས་བྱ་བ་ལ། རྨའི་ཤ་རྣགས་པ་ལ་སོགས་པ་ལ་ནི་མཁྲིས་པའི་མེ་དབལ་དང་འདྲ་བར་གསོ་བར་བྱའོ། །བདེ་ཕྱིར་ཁྱོ་ལ་བུད་མེད་དང་། །

རྒྱལ་པོ་ལ་ནི་དགྲས་བསླབས་ཏེ། །ཟས་དང་སྦྱར་བའི་དུག་བསྲེས་པ། །ཉེ་འཁོར་སྐྱེ་བོར་སྟེར་བར་འགྱུར། །ཞེས་བྱ་བ་ལ། རང་གི་བདེ་བ་བསྐྱེད་པའི་ཕྱིར་དགྲ་བོས་བུད་མེད་ལ་བསླབས་ཏེ་དུག་སྟེར་དུ་འཇུག་པ་དང་། དེ་བཞིན་དུ་རྒྱལ་པོ་ལ་དེའི་དགྲ་བོས་ཉེ་འཁོར་གྱི་སྐྱེ་བོ་ལ་

བསླབས་ཏེ་ཁ་ཟས་དང་སྦྱར་བའི་དུག་བསྲེས་ཏེ་སྟེར་བར་བྱེད་པར་འགྱུར་རོ། །སྣ་ཚོགས་ལུས་ཀྱི་དྲི་མར་བཅས། །མི་མཐུན་སྨན་དང་ཐལ་བ་དང་། །ནུས་པ་ཆུང་བར་གྱུར་པའི་དུག །སྦྱར་བའི་དུག་ནི་སྦྱར་མ་ཡིན། །ཞེས་བྱ་བ་ལ། སྲོག་ཆགས་སྣ་ཚོགས་པའི་ལུས་ཀྱི་དྲི་མ་དང་མི་

མཐུན་ཞིང་མི་འཕྲོད་པའི་སྨན་དང་ཐལ་བ་དང་། ནུས་པ་ཆུང་བར་བྱེད་པའི་དུག་གཅིག་ཏུ་བསྲེས་ཏེ་སྦྱར་བ་ནི་དུག་སྦྱར་མ་ཞེས་བྱའོ། །དེས་ཉེན་མདོག་སྐྱ་རིད་པ་དང་། །མེ་དྲོད་ཉམས་ཤིང་ལུད་པ་དང་། །དབུགས་མི་བདེ་དང་རིམས་ཀྱིས་ཉེན། །རླུང་ནི་མི་མཐུན་རྒྱུ་བ་དང་། །གཉིད་

ཆེ་ཡིད་ནི་ཞུམ་པར་བྱེད། །གཅིན་སྙི་ལྟོ་བ་མཆིན་པ་དང་། །མཆེར་པ་ན་ཞིང་སྐད་གསང་དམའ། །ཉམ་ཆུང་སྒྱིད་ནི་ཞན་པ་དང་། །སྐྲངས་ཤིང་རྟག་ཏུ་སྦོ་བ་དང་། །རྐང་པ་ལག་པ་སྐམ་ཞིང་ཟད། རྨི་ལམ་དུ་ནི་ཅེ་སྤྱང་དང་། །བྱི་ལ་སྦྲུལ་དང་ནེའུ་ལེ་དང་། །སྤྲེའུ་མཐོང་ཞིང་

เล่ม ๒๐๒ · หน้า 257b

ཕལ་ཆེར་ནི། །ནགས་ཚལ་མཚོ་ནི་སྐམས་པར་མཐོང་། །བདག་ཉིད་ནག་པོར་མཐོང་འགྱུར་ཞིང་། །སེར་པོ་ནག་པོར་མཐོང་བར་བྱེད། །མིག་སྣ་རྣ་བ་མེད་པ་དང་། །དེ་ཡི་དབང་པོ་ཉམས་པར་མཐོང་། །འདི་དང་གཞན་ཡང་གནོད་པ་ཡི། །བླ་བརྣན་མི་བཟད་མང་པོས་གཅེས། །

ཞེས་བྱ་བ་ལ། །སྦྱར་བའི་དུག་དེས་གཟིར་བར་གྱུར་པའི་མི་ནི་མདོག་སྐྱ་བོ་བསེང་བསེང་པོར་གྱུར་པ་དང་། །ལུས་རིད་ཅིང་རྗུད་པ་ལ་སོགས་པ་དང་། །སྒྱིད་ཞན་ཞིང་ལས་ལ་སྤྲོ་བ་ཆུང་བ་ལ་སོགས་པ་དང་། ཟད་བྱེད་ཀྱིས་བཏབ་པ་དང་། རྨི་ལམ་དུ་ཡང་ཕལ་ཆེར་ཅེ་སྦྱང་ལ་སོགས་

པ་མཐོང་བ་དང་། བདག་ཉིད་ནག་པོ་ལ་སོགས་པ་མཐོང་བར་འགྱུར་བ་དང་། རྣ་བ་དང་མིག་ལ་སོགས་པའི་དབང་པོ་ཉམས་པར་མཐོང་བ་དང་། འདི་དག་དང་གཞན་ཡང་གནོད་པའི་བླ་བརྣན་མི་བཟད་པ་རྣམ་པ་མང་པོས་གཙེས་པར་འགྱུར་བ་ཡིན་ནོ། །འགའ་ཞིག་འཕྲལ་དུ་མ་གསོས་

ན། །སྦྱར་དུག་གིས་ཉེན་འཆི་བར་འགྱུར། །ཞེས་བྱ་བ་ལ། སྦྱར་བའི་དུག་གིས་ཉེན་པ་ལས་འཕྲལ་དུ་གསོ་བ་མ་བྱས་ན་ངེས་པར་འཆི་བར་འགྱུར་རོ། །དབྱིག་དུག་སློན་བྱས་ཁ་ཟས་ནི། །དེ་ལ་ཕན་པའི་བཟའ་བཏུང་སྦྱིན། །སྦྱངས་ནས་གསེར་ནི་བསྟེན་བྱ་ཞིང་། །མདོ་ནས་བསྟན་

པ་བཞིན་དུ་བྱ། །ཞེས་བྱ་བ་ལ། དབྱིག་དུག་གིས་ཟིན་པ་ལ་ནི་དང་པོར་སྐྱུག་སྨན་བཏང་སྟེ། དེ་ལ་ཕན་པའི་ཁ་ཟས་བྱིན་ལ་ཁོང་པ་སྦྱངས་ནས་གསེར་ལ་སོགས་པའི་བསྟེན་པའི་ཆོ་ག་མདོའི་གནས་ལས་བསྟན་པ་བཞིན་དུ་བྱའོ། །གསེར་དང་ཟངས་ཀྱི་ཕྱེ་མ་ནི། །སྦྲང་རྩི་ཁ་ར་དཀར་པོར་

སྦྱར། །ལྡེ་གུས་དུག་ནི་མི་བཟད་དང་། །དབྱིག་དུག་ཐམས་ཅད་སེལ་བར་བྱེད། །ཅེས་བྱ་བ་ལ། གསེར་དང་ཟངས་མའི་ཕྱེ་མ་སྦྲང་རྩི་དང་ཁ་རར་སྦྱར་ཏེ། ལྡེ་གུ་བྱས་པ་ཟོས་ན་ཡང་མི་བཟོད་པའི་སྦྱར་བའི་དུག་སེལ་བར་བྱེད་དོ། །མུར་བ་སླེ་ཏྲེས་པི་པི་ལིང་། །རྒྱ་སྤོས་དབྱི་མོ་པ་ཏོ་ལ། །

གླ་སྒང་ཤུ་དག་ཙི་ཏྲ་ཀ། །བྱི་དང་ཀ་ནི་དར་བ་དང་། །ཆུ་དྲོན་ཞོ་ག་ཆུར་སྦྱར་བ། །སྐྱུར་ཁུ་དང་སྦྱར་བླུད་ན་ནི། །དབྱིག་དུག་གིས་བཅོམ་མེ་དྲོད་སྦྱོང་། །ཞེས་བྱ་བ་ལ། དབྱིག་དུག་གིས་མེ་དྲོད་ཉམས་བར་གྱུར་པ་ལ་ནི་མུར་བ་ལ་ནི་མུར་བ་ལ་སོགས་པའི་སྨན་ཆུ་དྲོན་ལ་སོགས་པ་གང་རུང་དང་སྦྱར་བ་

เล่ม ๒๐๒ · หน้า 258a

བླུད་པར་བྱའོ། །ཟུར་པ་མ་ནུ་ཕུག་རོན་གྱི། །ཤ་བསྐོལ་ཁུ་བ་བསྒྲངས་པ་ནི། །དབྱིག་དུག་སྐོམ་དང་ལུད་པ་ན། །སྐྱིགས་བུ་དབུགས་མི་བདེ་རིམས་སེལ། །ཞེས་བྱ་བལ། ཟུར་པ་དང་མ་ནུ་ཞེས་བྱ་བ་པུཥྐར་མཱུ་ལ་ཤ་ཁུ་དང་སྦྱར་ཏེ་བསྐོལ་བའི་ཁུ་བ་བསྒྲངས་པ་བླུད་ན་ཡང་

དབྱིག་དུག་ལས་གྱུར་པའི་སྐོམ་དད་ལ་སོགས་པ་སེལ་བར་བྱེད་དོ། །དུག་གི་རང་བཞིན་དུས་དང་ཟས། །ནད་གཞི་ལུས་ཟུངས་ཚོགས་འདུས་པ། །དུག་གི་ཉམ་ང་ཞེས་བཤད་དོ། །ཞེས་བྱ་བ་ལ། དུག་གི་རང་བཞིན་མི་བཟད་པ་དང་། དེ་མཐུན་རྐྱེན་དུ་བྱད་པའི་དུས་དང་ཁ་ཟས་ལ་

སོགས་པ་འདུས་ཤིང་གཅིག་ཏུ་ཕྲད་པ་ནི་དུག་གི་ཉམ་ང་བ་ཞེས་བྱ་སྟེ། ཚོགས་པ་དེ་དང་ལྡན་པ་བརྒྱ་ལས་གཅིག་ཅིག་འཚོ་བར་གྱུར་བ་ཡིན་ནོ། །བཀྲེས་སྐོམ་ཉམ་ནི་ཆུང་བ་དང་། །ཁྲོ་དང་མྱ་ངན་འཇིགས་ངལ་དང་། །མ་ཞུ་བ་དང་འཁྲུ་བ་དང་། །མཁྲིས་པ་རླུང་ནི་འཕེལ་བ་དང་། །ཏིལ་

གྱི་མེ་ཏོག་འབྲས་བུ་སྣུམ། །ས་ཡི་རླངས་པ་འབྲུག་སྒྲ་དང་། །གླིང་བུ་པི་ལྦང་རོལ་མོ་ཡི། །སྒྲ་དང་མདུན་གྱི་སེར་བུ་དང་། །ཨུཏྤལ་དྲི་དང་མྱོས་པ་ཡི། །དུག་གི་ཉམ་ང་འཕེལ་བར་བྱེད། །དབྱར་ནི་ཆར་གྱི་དུས་ཡིན་པས། །བུ་རམ་ལྟ་བུར་རླན་ཅན་འགྱུར། །ལུས་ལ་ཁྱབ་བྱེད་དབྱར་

འདས་ནས། །རི་བྱི་འཆར་བས་དེ་མེད་བྱེད། །དེ་བས་སྤྲིན་བྲལ་དུས་སུ་ནི། །ནུས་པ་ཆུང་བ་ཉིད་དུ་འགྱུར། །ཞེས་བྱ་བ་ལ། དུག་ནི་བཀྲེས་སྐོམ་ལ་སོགས་པ་འཕེལ་བར་བྱེད་ཅིང་སྤྲིན་ལས་བྱུང་བ་ཡིན་པའི་ཕྱིར་དབྱར་བུར་མ་རླན་ཅན་ལྟ་བུར་ཞུ་ཞིང་ལུས་ལ་ཁྱབ་པར་བྱེད་ལ་དབྱར་

འདས་ནས་སྐར་མ་རི་བྱི་འཆར་བ་དེའི་ཚེ་ནི་ནུས་པ་དེ་འབྲི་ཞིང་མེད་པར་བྱེད་དོ། །དེ་བས་ན་སྤྲིན་དང་བྲལ་བའི་དུས་སྟོན་གྱི་ཚེ་ནི་དུག་གི་ནུས་པ་ཆུང་བར་འགྱུར་རོ། །དེ་ལྟར་རང་བཞིན་གོམས་པ་དང་། །གནས་དུས་ཤུགས་སྟོབས་ཆེ་ཆུང་བ། །བརྟགས་ཏེ་མཁས་པས་ཤེས་བྱས་

ལ། །དེ་རྗེས་གསོ་བའི་ལས་སྤྱད་བྱ། །ཞེས་བྱ་བ་ལ། དེ་ལྟར་ཚུལ་འདིས་ནི་རང་བཞིན་དང་གོམས་པ་དང་གནས་དང་དུས་དང་ཤུགས་དང་སྟོབས་ཆེ་བ་དང་། ཆུང་བ་བློས་བརྟགས་ཏེ་དེ་ལ་མཁས་པར་བྱས་ནས། དེའི་འོག་ཏུ་གསོ་བའི་ལས་ལ་འཇུག་པར་བྱའོ། །བད་ཀན་ཅན་ནི་

เล่ม ๒๐๒ · หน้า 258b

སློན་དང་དྲོ། །རྩུབ་དང་རྣོ་བའི་སྨན་བསྐུ་ཞིང་། །བསྐ་དང་ཁ་དང་ཚ་བ་ཡི། །ཟས་ཀྱི་དུག་ནི་བསལ་བར་བྱ། །ཞེས་བྱ་བ་ལ། བད་ཀན་གྱི་དུག་ནི་སློན་པ་ལ་སོགས་པས་བསལ་བར་བྱའོ། །མཁྲིས་ཅན་བཀྲུ་སྨན་སྨན་ཆུ་བླུགས། །ཤིན་ཏུ་བསིལ་བའི་སྨན་བསྐུ་ཞིང་། །བསྐ་དང་ཁ་

དང་མངར་བ་དང་། །མར་བཅས་ཁ་ཟས་སྦྱིན་པས་གསོ། །ཞེས་བྱ་བ་ལ། མཁྲིས་པ་ཅན་གྱི་དུག་ནི་བཀྲུ་སྨན་དང་། །ཤིན་ཏུ་བསིལ་པའི་སྨན་གྱི་ཆུ་བླུགས་པ་ལ་སོགས་པས་བསལ་པར་བྱའོ། །རླུང་གི་བདག་ཉིད་ཅན་མངར་དང་། །སྐྱུར་དང་ལན་ཚྭ་མར་བཅས་པའི། །བཟའ་

བ་མར་བཅས་བསྐུ་བྱུག་དང་། །དེ་བཞིན་ཤ་ནི་བཟའ་བས་གསོ། །ཞེས་བྱ་བ་ལ། རླུང་གི་བདག་ཉིད་ཅན་གྱི་དུག་ནི་ཁ་ཟས་མངར་བ་ལ་སོགས་པ་མར་དང་བཅས་པ་དང་། དེ་བཞིན་དུ་བསྐུ་བྱུག་དང་བཅས་པས་གསོ་བར་བྱའོ། །བཀྲུ་སྨན་བསྐུ་བྱུག་ཁ་ཟས་སྨན། །

མར་མེད་བསྔགས་པ་མ་ཡིན་ནོ། །ཞེས་བྱ་བ་ལ། དུག་གི་ནད་ལ་བཀྲུ་སྨན་ལ་སོགས་པའི་སྦྱོར་བ་གང་ཡང་རུང་བ་ལ་མར་མེད་པ་ནི་བསྔགས་པ་མ་ཡིན་ཏེ། གཞན་དུ་ནི་དེ་ཐམས་ཅད་ལ་མར་དང་བཅས་པ་མཆོག་ཏུ་ཕན་པ་ཡིན་ནོ། །དུག་ཀུན་གནས་སྐབས་ཐམས་ཅད་དུ། །དུག་

འཇོམས་མར་དང་འདྲ་བ་ཡི། །སྨན་ནི་གཞན་དག་ཡོད་མིན་ཏེ། །མཆོག་ཏུ་རླུང་ཤས་ཆེ་ལ་ཕན། །ཞེས་བྱ་བ་ལ། དུག་ཐམས་ཅད་ལ་གནས་སྐབས་ཐམས་ཅད་དུ་དུག་འཇོམས་པར་བྱེད་པའི་ཁ་ཟས་ནི་མར་དང་འདྲ་བ་གཞན་མེད་ལ། །ཁྱད་པར་དུ་ཡང་རླུང་གི་ཤས་ཆེ་བ་ལ་མཆོག་ཏུ་

ཕན་ནོ། །བད་ཀན་གནས་ཞུགས་གསོ་བར་སླ། །མཁྲིས་པའི་གནས་བརྟེན་འབད་པས་གསོ། །རླུང་གི་གནས་སུ་ཞུགས་པའི་དུག །ཤིན་ཏུ་གསོ་དཀའ་གསོར་མི་རུང་། །ཞེས་བྱ་བ་ལ། བད་ཀན་གྱི་གནས་སུ་ཞུགས་པའི་དུག་ནི་གསོ་བར་སླ་བ་ཡིན་པས་ན་འབད་པ་མེད་

པས་འཚོ་བར་འགྱུར་རོ། །མཁྲིས་པའི་གནས་ལ་བརྟེན་པའི་དུག་ནི་ཤིན་ཏུ་འབད་པས་གསོ་བར་བྱ་བ་ཡིན་ནོ། །རླུང་གི་གནས་སུ་ཞུགས་པའི་དུག་ནི་ཤིན་ཏུ་གསོ་དཀའ་བའམ་གསོར་མི་རུང་བ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་

เล่ม ๒๐๒ · หน้า 259a

ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་ལྔ་པའི་རྣམ་པར་འགྲེལ་པའོ།། །།དེ་ནས་སྦྲུལ་གྱིས་ཟིན་པ་གསོ་བ་བཤད་པར་བྱའོ། །མདོར་ན་ས་ཡི་སྟེང་ན་སྦྲུལ། །གསུམ་སྟེ་གདངས་ཀ་ཅན་

ལུས་བསྐྱིལ། །ཁྲ་བོ་ཡིན་ཏེ། །ཞེས་བྱ་བ་ལ། སའི་སྟེང་ན་སྦྲུལ་གྱི་ཚོགས་མདོར་བསྡུས་ན་རྣམ་པ་གསུམ་སྟེ། ལ་ལ་ནི་གདེངས་ཀ་ཅན་གཟར་བུའི་མགོ་ལྟ་བུ་ཡིན་ནོ། །ལ་ལ་ནི་ལུས་བསྐྱིལ་བ་ཡིན་ནོ། །ལ་ལ་ནི་ཁྲ་བོ་ཡིན་ནོ། །དེ་ཡི་ནི། དབྱེ་བ་མཐའ་ཡས་གྱུར་

པ་དག །སྐྱེ་གནས་དབྱེ་བས་རྒྱས་པར་ནི། །དགོས་པ་མེད་ཕྱིར་མ་བཤད་དོ། །ཞེས་བྱ་བ་ལ། གདེངས་ཀ་ཅན་ལ་སོགས་པའི་དབྱེ་བས་ཕྱེ་བའི་སྦྲུལ་དེ་དག་ནི་སྐྱེ་གནས་ཀྱི་དབྱེ་བས་རྒྱས་པར་ཕྱེ་ན་དབྱེ་བ་མཐའ་ཡས་མོད་ཀྱི། དེ་ནི་སྐབས་འདིར་དགོས་པ་མེད་པའི་ཕྱིར་བདག་གིས་

འདིར་མ་བཤད་དོ། །མཆོག་ཏུ་རྩུབ་དང་ཚ་བ་དང་། །སྐྱུར་དྲོ་མངར་བསིལ་དག་ལས་ནི། །གདེངས་ཀ་ཅན་ལ་སོགས་པའི་དུག །རིམ་གྱིས་རླུང་སོགས་འཁྲུག་པར་བྱེད། །ཅེས་བྱ་བ་ལ། གདེངས་ཀ་ཅན་གྱི་དུག་ནི་མཆོག་ཏུ་རྩུབ་པ་དང་ཚ་བ་ཡིན་པས་རླུང་ནད་སྐྱེད་པར་བྱེད་པ་ཡིན་

ནོ། །ལུས་བསྐྱིལ་བའི་དུག་ནི་སྐྱུར་བ་དང་དྲོ་བ་ཡིན་པས་མཁྲིས་པ་སྐྱེད་པར་བྱེད་པ་ཡིན་ནོ། །སྦྲུལ་ཁྲ་བོའི་དུག་ནི་ཁྱད་པར་དུ་མངར་བ་དང་བསིལ་བ་ཡིན་པས་བད་ཀན་སྐྱེད་པར་བྱེད་པ་ཡིན་ནོ། །གཞོན་དང་རྒན་པོ་བར་མ་དང་། །དབྱར་དང་དགུན་དང་སོས་ཀར་ནི། །འདི་དག་དུག་

ནི་འཕེལ་འགྱུར་ཞིང་། །གཞན་དག་དུས་ཚིགས་རྣམས་སུ་འགྱུར། །ཞེས་བྱ་བ་ལ། དེ་ལྟར་ན་གདེངས་ཀ་ཅན་དང་། ལུས་འཁྱིལ་བ་དང་། ཁྲ་བོ་ནི་རིམ་གྱིས་གཞོན་པ་དང་རྒན་པོ་དང་བར་མ་ན་ཚོད་ཀྱི་རིམ་པ་དང་། དབྱར་དང་དགུན་དང་སོས་ཀའི་དུས་དག་ཏུ་འཕེལ་

ཞིང་ཤས་ཆེ་བ་ཡིན་ཏེ། དེ་ཡང་གདེངས་ཀ་ཅན་ནི་གཞོན་པ་དང་། དབྱར་གྱི་ཚེ་ནི་དུག་གི་ཤས་ཆེ་བ་ཡིན་ལ། ལུས་འཁྱིལ་པ་ནི་རྒན་པ་དང་། དགུན་སྟོད་དང་། དགུན་སྨད་ཀྱི་དུས་ཏེ། དགུན་སྨད་ཀྱི་ཚེ་དུག་བདོ་བ་ཡིན་ལ། ཁྲ་བོན་བར་མ་དང་

เล่ม ๒๐๒ · หน้า 259b

སོས་ཀའི་ཚེ་དུག་བདོ་བ་ཡིན་ནོ། །སྦྲུལ་དེ་དག་ལས་གཞན་པ་ཐམས་པ་ནི་དུས་ཚིགས་རྣམས་ལ་དུག་གི་ཤས་ཆེ་བ་ཡིན་ནོ། །འཁོར་ལོ་གཤོལ་དང་གཡུང་དྲུང་གདུགས། །ལྕགས་ཀྱུའི་མཚན་མར་ལྡན་པ་ཡིན། །གདེངས་ཀ་ཅན་ནི་མྱུར་འགྲོ་བ་དང་། །ཐམས་ཅད་གདེངས་ཀ་ཅན་ཞེས་

བྱ། །ཞེས་བྱ་བ་ལ། སྦྲུལ་གདེངས་ཀ་ཅན་ནི་འཁོར་ལོ་དང་གཤོལ་ལ་སོགས་པའི་མཚན་མ་དང་ལྡན་ཞིང་། མགོ་པོའི་གདེངས་ཀ་ཅན་ཡོད་པ་དང་མྱུར་དུ་འགྲོ་བར་བྱེད་པ་ཡིན་ནོ། །ལུས་འཁྱིལ་སྣ་ཚོགས་པ་ཡི་ནི། །ཟླུམ་པོར་འདུག་པ་ལུས་འཁྱིལ་ཞིང་། །རིང་ཞིང་འགྲོས་

ནི་བུལ་བ་ཡིན། །ཞེས་བྱ་བ་ལ། ལུས་འཁྱིལ་བཞེས་བྱ་བའི་སྦྲུལ་ནི་རི་མོ་ཟླུམ་པོ་སྣ་ཚོགས་པས་ཁྱབ་པ་དང་། དེ་བཞིན་དུ་གཟུགས་རིང་ཞིང་འགྲོས་བུལ་བ་ཡིན་ནོ། །རི་མོ་སྣ་ཚོགས་ལྡན་པ་དང་། །སྣུམ་ཞིང་ཁ་དོག་སྣ་ཚོགས་པས། །ཆུ་ཞེང་བྲིས་འགྱུར་

ཁྲ་བོ་ཡིན། །ཞེས་བྱ་བ་ལ། སྦྲུལ་ཁྲ་བོ་ནི་རི་མོ་སྣ་ཚོགས་དང་ལྡན་པ་ཁ་དོག་སྣ་ཚོགས་པས་འཕྲེད་དང་གྱེན་དུ་ཆུ་ཞེང་དུ་བྲིས་པ་ཡིན་ནོ། །གོ་དྷའི་བུ་ནི་གོ་དྷ་ཅན། །དུག་ནི་གདེངས་ཀ་ཅན་མཉམ་ལ། །རྐང་བཞི་བ་ཡི། ཞེས་བྱ་བ་ལ། །གོ་ངྷའི་བུ་མིང་གོ་ངྷ་ཅན་ཞེས་བྱ་བའི་

སྦྲུལ་གྱི་བྱེ་བྲག་སྟེ། དེ་ནི་གདེངས་ཀ་ཅན་གྱི་དུག་དང་མཉམ་པར་ལྡན་པའམ། ཡང་ན་རྐང་བཞི་པ་ཡིན་ནོ། །སྦྲུལ་གཞན་ནི། འདི་དག་ཉིད་ནི་འདྲེས་པ་ལས། །འདྲེན་མའི་མཚན་ཉིད་ཅན་ཏེ་དེས། །འདུས་བའི་ནད་ནི་ལྡང་བར་བྱེད། །ཅེས་བྱ་བ་ལ། གདེངས་ཀ་ཅན་དང་།

ལུས་བསྐྱིལ་བ་དང་། སྦྲུལ་ཁྲ་བོ་འདི་དག་གི་མཚན་ཉིད་འདྲེན་མ་ཡིན་པར་ཤེས་པར་བྱེད་པ་སྟེ། དེ་དག་གིས་ནི་འདུས་བའི་ནད་སྐྱེད་པར་བྱེད་བ་ཡིན་ནོ། །ཟས་ཀྱི་དོན་དང་འཇིགས་པ་དང་། །རྐང་པས་རེག་ལས་དུག་རབ་འཁྲུགས། །རྐང་གི་རྒྱུ་དང་འདྲེས་པ་དང་། །ལྷ་དང་

དྲང་སྲོང་གཤིན་རྗེས་བསྐུལ། །སྦྲུལ་གྱིས་ཟིན་པར་གང་བཤད་པ། །ཕྱི་མ་བཞིན་དུ་དུག་ཤས་ཆེ། །ཞེས་བྱ་བ་ལ། སྦྲུལ་གྱི་རིགས་ཐ་མལ་པ་དེ་དག་ནི་ཟས་ཀྱི་དོན་དང་རྣམ་པར་འཇིགས་པ་ལ་སོགས་པའི་རྒྱུས་སམ། ལྷ་དང་དྲང་སྲོང་དང་གཤིན་རྗེས་བསྐུལ་ཞིང་རྦད་པའི་

เล่ม ๒๐๒ · หน้า 260a

དབང་གིས་སྦྲུལ་གྱིས་འཛིན་པར་བྱེད་ལ། དེ་ཡང་ཕྱི་མ་བཞིན་དུ་དུག་གི་ཤས་ཆེ་བ་ཡིན་ནོ། །དེས་ན་ཐམས་ཅད་པས་ཀྱང་གཤིན་རྗེའམ་འཆི་བདག་གིས་བསྐུལ་བས་འཛིན་པར་བྱེད་པ་དེའི་དུག་མི་བཟད་པ་ཡིན་ནོ། །འཇུག་བའི་རྒྱུ་ནི་ཤེས་བྱས་ནས། །

གསོ་བ་ཇི་བཞིན་བྱ་བ་ཡིན། །ཞེས་བྱ་བ་ལ། སྦྲུལ་རྣམས་ཀྱི་འཇུག་པའི་རྒྱུ་ཤེས་པར་བྱས་ནས། རང་གི་གསོ་བ་ཇི་ལྟ་བ་བཞིན་དུ་བྱའོ། །ཕལ་པ་སྡིག་ཅན་ངང་ཚུལ་བས། །ལམ་བཀག་ནས་ནི་གནས་པ་ཡིན། །གང་དུ་ཁ་ཆུ་གཤེར་བ་ཙམ། །ལུས་ལ་སྣང་བར་བྱེད་

འགྱུར་ཞིང་། །མཆེ་བའི་རྨ་ནི་མི་མངོན་གང་། །དེ་ནི་མཆུས་གནོད་བྱེད་ཅེས་བྱ། །ཞེས་བྱ་བ་ལ། སྦྲུལ་ཕལ་པ་ནི་རང་བཞིན་ངན་པ་ཅན་ཡིན་པས་ལམ་བཀག་ནས་འདུག་པ་ཡིན་ལ། ལུས་ཀྱི་ཕྱོགས་གང་དུ་ཁ་ཆུའམ་གཤེར་བ་ཙམ་སྣང་བར་འགྱུར་གྱི། མཆེ་བས་ཟིན་པའི་

རྨ་མི་མངོན་པར་གྱུར་པ་གང་ཡིན་པ་དེ་ནི་མཆུས་གནོད་པར་བྱེད་པ་ཞེས་བྱའོ། །མཆེ་བ་གཅིག་ལས་རྗེས་གཉིས་མངོན། །ཁྲག་མེད་གྱུར་པ་བལྡགས་ཞེས་བྱ། །ཞེས་བྱ་བ་ལ། སྦྲུལ་གང་གིས་ཟིན་པ་ན་ལུས་ལ་མཆེ་བ་གཅིག་གི་རྗེས་ལས་གཉིས་སུ་མངོན་ཞིང་དེ་ཡང་ཁྲག་མེད་

པར་གྱུར་པ་ནི་མིང་བལྡགས་པ་ཞེས་བྱའོ། །མཆེ་བའི་རྗེས་ནི་ཁྲག་བཅས་གཉིས། །རྣམ་པར་གཅད་པའོ། །ཞེས་བྱ་བ་ལ། ལུས་ལ་སྦྲུལ་གྱི་མཆེ་བའི་རྗེས་གཉིས་ཁྲག་དང་བཅས་པར་སྣང་བ་ནི་རྣམ་པར་གཅད་པ་ཞེས་བྱའོ། །དེ་གསུམ་ནི། ཤ་བཅད་ཤིན་ཏུ་ཕུག་པ་

དང་། །ཁྲག་དབྱུང་སོ་ཡིས་ཟིན་ཞེས་བྱ། །ཞེས་བྱ་བ་ལ། མཆེ་བས་ཟིན་པ་གསུམ་པོ་དེ་དག་ནི་ཤ་བཅད་པ་ལས་ཁྲག་རྒྱུན་དུ་འཛག་པ་ནི་སོས་འཛིན་པ་ཞེས་བྱའོ། །མཆེ་བའི་རྗེས་ནི་བཞི་སྣང་བ། །དེ་བཞིན་སོས་འཛིན་བཙིར་བར་བཤད། །ཅེས་བྱ་བ་ལ། མཆེ་བའི་

རྗེས་གང་ལ་ལུས་ལ་རྗེས་བཞི་སྣང་ཞིང་། དེ་བཞིན་དུ་ཁྲག་རྒྱུན་མི་ཆད་པར་སྣང་བ་དེ་ནི་སོས་འཛིན་པ་བཙིར་བ་ཞེས་བྱའོ། །དེ་ལ་དང་པོ་དུག་མེད་གཉིས། །ཕྱི་མ་གཉིས་པོ་གསོར་མི་རུང་། །ཞེས་བྱ་བ་ལ། སོས་བཏབ་པ་དེ་དག་གི་ནང་ནས་མཆུས་གནོད་པར་བྱེད་པ་དང་

เล่ม ๒๐๒ · หน้า 260b

བལྡགས་པ་ཞེས་བྱ་བ་གཉིས་ནི་དུག་མེད་པ་ཡིན་ནོ། །ཕྱི་མ་སོས་འཛིན་པ་དང་། སོས་འཛིན་པ་བཙིར་བ་ཞེས་བྱ་བ་ནི་གསོར་མི་རུང་བ་ཡིན་ནོ། །སྦྲུལ་གྱི་དུག་ནི་ཁྲག་དག་ལ། །མ་བརྟན་ལུས་ལ་གནོད་མི་བྱེད། །ཅེས་བྱ་བ་ལ། སྦྲུལ་གྱི་དུག་ནི་ཁྲག་ལ་མ་བརྟེན་པར་ལུས་ལ་

གནོད་པར་མི་བྱེད་ཀྱི། དེ་ལ་བརྟེན་ནས་གནོད་པར་བྱེད་པ་ཡིན་ནོ། །ཁྲག་ནི་ཆུང་ཟད་ལ་བརྟེན་ཡང་། །ཏིལ་མར་ཐིགས་པ་བཞིན་དུ་མཆེད། །ཅེས་བྱ་བ་ལ། དུག་ནི་ཁྲག་ཅུང་ཟད་ལ་བརྟེན་ཡང་ཏིལ་མར་གྱི་ཐིགས་པ་ཆུ་ལ་བླུགས་པ་བཞིན་དུ་མཆེད་པར་འགྱུར་རོ། །

སྡར་མ་སྦྲུལ་གྱིས་རེག་པ་ལས། །འཇིགས་པས་རླུང་ནི་འཁྲུག་པར་བྱེད། །ལན་འགའ་སྐྲང་བར་བྱེད་པ་དེ། །སྦྲུལ་གྱིས་ལུས་ནི་བཅོམ་ཞེས་བྱ། །ཞེས་བྱ་བ་ལ། སྐྱེས་བུ་སྡར་མ་སྦྲུལ་གྱིས་རེག་སྟེ་སྔངས་པ་ལས་རླུང་འཁྲུག་པར་འགྱུར་ཞིང་། ལན་འགའ་

སྐྲང་བར་བྱེད་པ་ཡང་ཡིན་ཏེ། དེ་ནི་སྦྲུལ་གྱིས་ལུས་བཅོམ་པ་ཞེས་བྱའོ། །བགྲོད་དཀའ་མུན་པར་ཟུག་གྱུར་བ། །ལ་ལ་རྟོག་པས་ཟིན་པ་དང་། །དུག་གི་ཤུགས་དང་སློན་དང་རིམས། །བརྒྱལ་བའམ་ཚ་བ་སྐྱེ་བའམ། །ན་ཞིང་རྨོངས་བག་འཁྲུ་བར་འགྱུར། །དེ་ནི་རྟོག་པའི་དུག་

ཅེས་བྱ། །ཞེས་བྱ་བ་ལ། སྐྱེས་བུ་ལ་ལ་ལམ་བགྲོད་དཀའ་བར་མུན་པའི་ནད་དུ་རྒྱུ་བ་ལས་ཚེར་མ་ལ་སོགས་པ་འགའ་ཞིག་གིས་ཟུག་པར་གྱུར་པ་དང་། དེ་སྦྲུལ་གྱིས་ཟིན་པའི་རྟོག་པ་སྐྱེས་ཏེ། དེའི་དབང་གིས་དུག་གི་ཤུགས་སློན་བ་ལ་སོགས་བ་འབྱུང་བར་འགྱུར་ཏེ། དེ་ལྟ་

བུ་དེ་ལ་ནི་རྟོག་པའི་དུག་ཅེས་བྱའོ། །དུག་བཅས་ནད་ཀྱིས་ཟུག་པ་དང་། །སྐྲང་དང་གཡའ་དང་རིམས་བཅས་པ། །ལ་ལ་ཚ་ཞིང་རྨེན་བུར་འགྱུར། །དེ་ལས་བཟློག་པ་དུག་མེད་ཡིན། །ཞེས་བྱ་བ་ལ། མཆེ་བའི་དུག་དང་བཅས་པ་ནི་ཤས་ཆེར་ཟུག་པ་དང་སྦངས་པ་ལ་སོགས་

པ་དང་ལྡན་བ་ཡིན་ནོ། །དུག་མེད་པ་ནི་ཟུག་པ་ལ་སོགས་པའི་མཚན་མ་མེད་པ་ཡིན་ནོ། །གདེངས་ཀ་ཅན་ཤུགས་དང་པོ་ལ། །ནད་ཁྲག་ནག་པོར་འཛག་པར་འགྱུར། །མིག་དང་གདོང་སོགས་གནག་པ་དང་། །སྲིན་བུ་རྒྱུ་བ་སྙམ་དུ་སེམས། །ཞེས་བྱ་བ་ལ། གདེངས་ཀ་ཅན་

เล่ม ๒๐๒ · หน้า 261a

གྱི་ཤུགས་དང་པོ་ལ་ནི་ནད་ཁྲག་ནག་པོར་འཛག་པར་འགྱུར་བ་དང་། གདོང་གནག་པ་དང་། ལུས་ལ་སྲིན་བུ་རྒྱུ་བ་སྙམ་དུ་སེམས་པ་ཡིན་ནོ། །ཤུགས་གཉིས་པར་ནི་རྨེན་བུ་སྐྱེ། །གསུམ་བར་མགོ་ནི་ལྕི་བར་འགྱུར། །ཞེས་བྱ་བ་ལ། དུག་གི་ཤུགས་

གཉིས་པ་ལ་ནི་རྨེན་བུ་སྐྱེ་བར་འགྱུར་བ་དང་། ཤུགས་གསུམ་པར་མགོ་བོ་ལྕི་བར་འགྱུར་བ་ཡིན་ནོ། །བཞི་པར་མིག་འབྱེད་དཀའ་བ་དང་། །སོས་བཏབ་རྣགས་ཤིང་མཆིལ་མ་སློན། །ཞེས་བྱ་བ་ལ། གདེངས་ཀ་ཅན་གྱིས་ཟིན་པའི་ཤུགས་བཞི་པ་ལ་ནི་མིག་འབྱེད་པར་

དཀའ་བ་ལ་སོགས་བ་ཡིན་ནོ། །ལྔ་བར་ཚིགས་འབྱེ་སྙམ་སེམས་དང་། །རྒྱུད་གཞན་ཚིགས་ནི་འཇིག་པ་དང་། །ལུས་ཚ་སྐྱིགས་བུ་འབྱུང་བ་ཡིན། །ཞེས་བྱ་བ་ལ། དེའི་ཤུགས་ལྔ་པ་ལ་ནི་ལྷུ་ཚིགས་འབྱེ་བ་སྙམ་དུ་སེམས་པ་ལ་སོགས་པ་ཡིན་ནོ། །དྲུག་པར་སྙིང་ན་ལུས་ལྕེ་

ཞིང་། །བརྒྱལ་ཞིང་འཁྲུ་ལ་ཟས་མི་འཇུ། །ཞེས་བྱ་བ་ལ། ཤུགས་དྲུག་པ་ལ་ནི་སྙིང་ན་བ་ལ་སོགས་པ་ཡིན་ནོ། །བདུན་པར་ཁུ་བའི་གནས་ཕྱིན་ནས། །ཕྲག་གོང་རྒྱབ་དང་རྒལ་ཚིགས་དང་། །རྐེད་པ་ཞིག་པ་སྙམ་སེམས་ཞིང་། །སྤྱོད་ལམ་ཐམས་ཅད་ལས་

ཉམས་འགྱུར། །ཞེས་བྱ་བ་ལ། གདེངས་ཀ་ཅན་གྱི་ཤུགས་བདུན་པ་ལ་ནི་ཁུ་བའི་གནས་སུ་དུག་དེ་ཕྱིན་པར་འགྱུར་ཏེ། ཕྲག་གོང་ན་བ་ལ་སོགས་པར་འགྱུར་རོ། །དེ་ནས་ལུས་བསྐྱིལ་བས་ཟིན་ན། །ནད་ཁྲག་སེར་པོར་འགྱུར་བ་དང་། །དེ་ཡི་ལུས་སེར་ཚ་བ་

སྐྱེད། །ཅེས་བྱ་བ་ལ། སྦྲུལ་ལུས་འཁྱིལ་པ་ཞེས་བྱ་བས་ཟིན་པ་ནི་ཁྲག་སེར་པོར་གྱུར་པ་ལ་སོགས་པ་ཡིན་ནོ། །གཉིས་པར་སྐྲང་བར་འགྱུར་བ་ཡིན། །ཞེས་བྱ་བ་ལ། ལུས་བསྐྱིལ་བའི་ཤུགས་གཉིས་པ་ནི་ལུས་སྐྲང་བར་འགྱུར་རོ། །གསུམ་པར་སོས་བཏབ་རྣགས་

པ་དང་། །རྡུལ་དང་སྐོམ་དད་སྐྱོ་བར་འགྱུར། །ཞེས་བྱ་བ་ལ། ཤུགས་གསུམ་པ་ལ་ནི་སོས་བཏབ་བའི་རྗེས་རྣགས་པ་ལ་སོགས་པར་འགྱུར་རོ། །བཞི་པར་ཁོང་ཚ་རིམས་ཀྱིས་འདེབས། །ལྔ་པར་ལུས་ཀུན་ཁྱབ་པར་ཚ། །ཞེས་བྱ་བ་ལ། བཞི་བ་དང་ལྔ་པའི་དུག་གི་ཤུགས་

เล่ม ๒๐๒ · หน้า 261b

ནི་ཁོང་ཚ་བ་ལ་སོགས་པར་འགྱུར་རོ། །སྦྲུལ་ནི་ཁྲ་བོས་ཟིན་གྱུར་ན། །ཁྲག་ནི་སྐྱ་བོར་འགྱུར་བ་དང་། །དེས་ནི་ལུས་མདོག་སྐྱ་བོར་འགྱུར། །ཞེས་བྱ་བ་ལ། སྦྲུལ་ཁྲ་བོས་ཟིན་པར་གྱུར་ན་ཁྲག་གི་ཚོགས་སྐྱ་བར་འགྱུར་ལ། རྒྱུ་དེས་ན་ལུས་ཀྱང་མདོག་སྐྱ་བོར་འགྱུར་རོ། །གཉིས་

པར་ལུས་ནི་ལྕི་བར་འགྱུར། །ཞེས་བྱ་བ་ལ། ཤུགས་གཉིས་པ་ལ་ནི་ལུས་ཤིན་ཏུ་ལྕི་བར་འགྱུར་རོ། །གསུམ་པར་སོས་བཏབ་རྣགས་པ་དང་། །མིག་དང་ཁ་སྣ་ལས་འཛག་འགྱུར། །ཞེས་བྱ་བ་ལ། ཤུགས་གསུམ་བ་ལ་ནི་རྣགས་པ་ལ་སོགས་པར་འགྱུར་རོ། །བཞི་

པར་མགོ་ལྕི་གཉེའུ་རེངས་འགྱུར། །ཞེས་བྱ་བ་ལ། དུག་གི་ཤུགས་བཞི་པ་ལ་ནི་མགོ་བོ་ལྕི་བ་ལ་སོགས་པར་འགྱུར་རོ། །ལྔ་པར་ལུས་ཚིགས་ན་བ་དང་། །གྲང་བའི་རིམས་ཀྱིས་འདེབས་པར་བྱེད། །ཅེས་བྱ་བ་ལ། ཤུགས་ལྔ་པ་ལ་ནི་ལུས་ཚིགས་ན་བ་ལ་སོགས་པར་

འགྱུར་རོ། །ལྷག་མ་གཉིས་པོ་སྔ་མར་མཚུངས། །ཞེས་བྱ་བ་ལ། ཤུགས་དྲུག་པ་དང་བདུན་པ་ལ་ནི་གདེངས་ཀ་ཅན་གྱི་མཚན་ཉིད་དང་ལྡན་པ་ཡིན་ནོ། །ཤུགས་ནི་ལྔ་པར་གསོ་བ་དག། །བྱ་ཡིས་དེ་ལས་ཕན་ཆད་མིན། །ཞེས་བྱ་བ་ལ། དེ་དག་གི་ཤུགས་ལྔ་པའི་བར་

གྱིས་གསོ་བར་བྱའི། དྲུག་པ་དང་བདུན་པ་ལ་ནི་གསོ་བར་མི་བྱའོ། །ཆུ་ཡིས་གཡེངས་དང་ཆགས་པ་ཟད། །སྐྲག་དང་ནེའུ་ལེས་འཕེན་པ་དང་། །གྲང་ལྷགས་ཉི་ཚན་རླུང་དང་ནད། །བཀྲེས་སྐོམ་ངལ་བས་གཟིར་བ་དང་། །ཕྱོགས་གཞན་ནས་ནི་རིང་པར་འོང་། །དུག་

སྤངས་ལྤགས་པ་བརྗེས་པ་དང་། །འཇག་མ་སྨན་དང་ཚེར་མ་ཅན། །ནགས་ན་རྒྱུ་བ་གང་ཡིན་དང་། །རིག་པ་ལ་སོགས་བརྟེན་ཕྱོགས་གནས། །སྦྲུལ་དེ་དུག་ནི་ཆུང་བར་འདོད། །ཅེས་བྱ་བ་ལ། སྦྲུལ་གང་ཆུས་གཡེངས་པ་དང་། ཆགས་པ་སྤྱོད་པ་ཟད་པ་དང་། སྐྲག་

པ་ལ་སོགས་པ་དང་། ཡུལ་ཕྱོགས་གང་རིག་སྔགས་ལ་སོགས་པ་གང་རིགས་བརྟེན་ཞིང་གྲུབ་བའི་ཕྱོགས་ན་གནས་པ་སྟེ། སྦྲུལ་དེ་དག་ནི་དུག་ཆུང་བ་ཡིན་ནོ། །དུར་ཁྲོད་བསྟི་གནས་ཤིང་གཅིག་སོགས། །ཚེས་ལྔ་དང་ནི་དུས་ཚིགས་དང་། །ཚེས་བརྒྱད་ཚེས་དགུ་ཐུན་

เล่ม ๒๐๒ · หน้า 262a

མཚམས་དང་། །ནམ་ཕྱེད་དང་ནི་ཉི་མའི་གུང་། །བྲ་ཉི་སྨིན་དྲུག་མཆུ་དང་སྐག །ས་ག་ཆུ་སྟོད་ཁྲུམས་སྟོད་དང་། །སྣུབས་དང་བྲ་ཉེ་ཡུད་ཙམ་ལ། །གནད་དུ་བཟུང་བ་སྦང་བར་བྱ། །ཞེས་བྱ་བ་ལ། དུར་ཁྲོད་ལ་སོགས་པའི་གནས་སུ་སྤྲུལ་གྱིས་ཟིན་པ་དང་

ཚེས་ལྔ་ལ་སོགས་པའི་དུས་དང་། བྲ་ཉེ་ལ་སོགས་པའི་སྐར་མ་ལ་བབས་པ་དང་། དེ་བཞིན་དུ་ཡུད་ཙམ་ཞེས་བྱ་བའི་དུས་ལ་ཟིན་པ་དང་། གནད་དུ་བཟུང་བ་གང་ཡིན་པ་དེ་ནི་གསོར་མི་ནུས་པས་སྤང་བར་བྱའོ། །ཟིན་པའི་མོད་ལ་བཞིན་སྐྱ་ཞིང་། །སྐྲ་ནི་འབྱི་བར་བྱེད་པ་དང་། །

ལྕེ་འཁུམས་ཡང་དང་ཡང་དུ་བརྒྱལ། །དབུགས་གྲང་གང་ཡིན་དེ་མི་འཚོ། །ཞེས་བྱ་བ་ལ། སྐྱེས་བུ་གང་སྦྲུལ་གྱིས་ཟིན་མ་ཐག་བཞིན་སྐྱ་བོར་གྱུར་པ་དང་། སྐྲ་འབྱི་བར་བྱེད་པ་ལ་སོགས་པ་གང་ཡིན་པ་དེ་མི་འཚོའོ། །སྐྱིགས་བུ་དབུགས་མི་བདེ་ཞིང་སློན། །ལུས་

ཅན་ཟིན་པའི་མོད་ལ་ནི། །སྙིང་ནས་གཟེར་བར་འགྱུར་བ་དང་། །ཅིག་ཅར་འབྱུར་བ་དེ་མི་འཚོ། །ཞེས་བྱ་བ་ལ། ཡང་སྐྱིགས་བུ་ལ་སོགས་པས་ཟིན་པའི་མོད་ལ་དུས་གཅིག་ཏུ་འབྱུང་བ་དེ་ཡང་མི་འཆོའོ། །འདུ་ཤེས་སྟོར་ཅིང་ལྦུ་བར་སྐྱུགས། །རྐང་པ་ལག་པ་བཞིན་གནག་

ཅིང་། །སྣ་ཞོམ་ཡན་ལག་ཞིག་པ་དང་། །ཚིགས་ལྷོད་བཤང་བ་འཁྲུ་བ་ཡི། །དུག་འཐུངས་པ་དང་སྦྲུལ་གྱིས་ཟིན། །དུག་ཅན་མདའ་ཡིས་ཕོག་གྱུར་པ། །ཚུལ་ནི་འདི་དག་སྣང་གྱུར་ན། །སྲོག་ཟད་པར་ནི་འགྱུར་བ་ཡིན། །ཞེས་བྱ་བ་ལ། སྐྱེས་བུ་གང་སྦྲུལ་གྱིས་

ཟིན་པའམ། །དུག་མདས་ཕོག་པ་འདུ་ཤེས་སྟོད་ཅིང་ལྦུ་བ་སློན་པ་ལ་སོགས་པའི་མཚན་ཉིད་དང་ལྡན་པ་དེ་ནི་ཉེ་བར་འཆི་བར་འགྱུར་རོ། །སྣ་སྨན་རྣོན་པོ་མི་ཚོར་ཞིང་། །རྨ་ནས་ཁྲག་ནི་མི་འབྱུང་ལ། །དབྱིག་བས་བསྣུན་ན་རྗེས་མི་མངོན། །གཤིན་རྗེའི་ཐད་དུ་འགྲོ་པ་ཡིན། །

ཞེས་བྱ་བ་ལ། སྣ་སྨན་རྣོན་པོ་བཏང་ཡང་ཚོར་བ་མེད་པ་ལ་སོགས་པ་དེ་ཡང་མི་འཚོའོ། །དེ་ལས་གཞན་དུ་སྨན་པ་ཡིས། །འབར་བའི་ཁྱིམ་ནས་འབྱུང་བ་བཞིན། །ལྐོག་མར་ཕྱིན་པའི་སྲོག་བསྲུང་ཞིང་། །དུག་ནི་མྱུར་དུ་བསལ་བར་བྱ། །ཞེས་བྱ་བ་ལ། །སྔར་བཤད་པའི་མཚན་

เล่ม ๒๐๒ · หน้า 262b

ཉིད་དང་མི་ལྡན་པ་གཞན་དག་ནི་སྨན་པས་ངེས་བར་བསྲུང་བར་བྱ་སྟེ། ཇི་ལྟར་འབར་བའི་ཁྱིམ་ནས་འབྱུང་བ་བཞིན་དུ་ལྐོག་མར་ཕྱིན་ཞིང་འགགས་སུ་ཉེ་བའི་སྲོག་དེ་བསྲུང་བར་བྱའོ། །ལུས་ཅན་དུག་གིས་ཟིན་གྱུར་པ། །གྲངས་བརྒྱའི་བར་དུ་གནས་ནས་ནི། །ལུས་ཟུངས་ཁྲག་སོགས་

ལ་གནོད་ཅིང་། །ལུས་ལ་ཁྱབ་པར་བྱེད་པ་ཡིན། །ཞེས་བྱ་བ་ལ། མི་སྦྲུལ་གྱི་དུག་གིས་ཟིན་པར་གྱུར་ན་རྨའི་སྒོར་གྲངས་བརྒྱ་བགྲངས་པའི་དུས་ཚིགས་ཙམ་དུ་གནས་ནས། དེའི་འོག་ཏུ་ཁྲག་ལ་སོགས་པའི་ལུས་ཟུངས་ལ་གནོད་པར་བྱེད་ཅིང་ལུས་ལ་ཁྱབ་པར་བྱེད་དོ། །དུས་འདིའི་

བར་དུ་གདུག་པ་ཡི། །མཆེ་བས་ཟིན་པ་བཅད་སོགས་ལས། །བྱ་ཞིང་ཅི་ནས་ལུས་ལ་ནི། །དུག་གི་ཡལ་ག་མ་འཕྲོས་བྱ། །ཞེས་བྱ་བ་ལ། གྲངས་བརྒྱ་རྫོགས་པའི་དུས་འདིའི་བར་དུ་དུག་གིས་ཟིན་པ་ལ། བསྲེགས་པ་ལ་སོགས་པ་བྱ་ཞིང་དུག་གི་ཡལ་གས་ལུས་ལ་ཁྱབ་པར་

མི་འགྱུར་བར་བྱའོ། །ཟིན་པའི་མོད་ལ་མྱུར་དུ་ནི། །སྦྲུལ་ནི་དེ་ཉིད་ཟ་པའམ། །ས་འམ་བོང་པ་གཅོད་བྱེད་ན། །རིངས་པ་ཁོ་ནར་སྨན་པ་ཡི། །མཆིལ་མས་བྱུག་པར་བྱ་བའམ། །རྣ་སྦབས་ཀྱིས་ནི་སོ་རྗེས་བསྐུ། །ཞེས་བྱ་བ་ལ། །མི་སྦྲུལ་གྱིས་ཟིན་མ་ཐག་སྦྲུལ་དེ་ཉིད་མྱུར་དུ་ཟ་བར་

བྱེད་པའམ། ས་འམ་བོང་བ་སོས་འདེབས་པར་གྱུར་ན་སྨན་པས་རིངས་པ་ཁོ་ནར་མཆིལ་མས་བྱུག་པ་ལ་སོགས་པ་བྱའོ། །མཆེ་བས་བཏབ་པའི་གོང་དུ་ནི། །སོར་བཞིར་རས་མ་ལས་བྱས་པ། །གསོ་མའམ་འོད་མ་ལ་སོགས་བཅིང་། །སྔགས་ཤེས་པ་ཡིས་གྲུབ་སྔགས་བཟླ། །

ཞེས་བྱ་བ་ལ། སྨན་པས་སྦྲུལ་གྱི་མཆེ་བས་བཏབ་པའི་སོར་བཞིའི་ལྟག་ཏུ་རས་མ་ལས་བྱས་པའམ། གསོ་མ་ལ་སོགས་པ་ལས་བྱས་པའི་ཆིངས་མས་བཅིང་ཞིང་། སྔགས་ཞེས་བྱ་བའི་གསང་སྔགས་བཟླ་བར་བྱའོ། །ཆུ་ལོན་གྱིས་ནི་ཆུ་ལྟབ་ུར། །བཅིངས་པས་དུག་ནི་འཕྲོས་

མི་འགྱུར། །དུག་གི་བཅིང་སོགས་ཉེན་པ་ཡིན། །རྩ་ལས་རྒྱུ་བར་མི་འགྱུར་རོ། །ཞེས་བྱ་བ་ལ། དུག་བཅིངས་པ་གང་ཡིན་པ་དེས་བཀག་པར་གྱུར་ན་ཆུ་ལོན་གྱིས་ཆུ་བཟློག་པ་དང་འདྲ་བ་རྩའི་སྒོ་ལས་དུག་དེ་རྒྱུ་བར་མི་འགྱུར་རོ། །བཙིར་ནས་སོས་བཏབ་དབྱུང་བྱ་ཞིང་། །ཚིགས་དང་གནད་དུ་

เล่ม ๒๐๒ · หน้า 263a

མ་ཆུད་དེ། །ས་བོན་ཉམས་བའི་མྱུ་གུ་བཞིན། །དུག་ཤུགས་དེ་ནི་འབྱུང་མི་འགྱུར། །ཞེས་བྱ་བ་ལ། སོས་བཏབ་པ་དེ་བཙིར་ཞིང་བསྡམས་ནས་ཚིགས་དང་གནད་དུ་མ་སོང་བར་དེ་དབྱུང་བར་བྱ་སྟེ། དེ་ལྟར་བྱས་ན་ས་བོན་ཉམས་པ་དང་འདྲ་བར་དུག་གི་ཤུགས་འབྱུང་བར་

མི་འགྱུར་རོ། །ལུས་འཁྱིལ་སོ་རྗེས་མཁྲིས་བསྐྱེད་པས། །དེ་མ་གཏོགས་པ་གཞན་དག་ནི། །ལྕགས་དང་གསེར་ལ་སོགས་པས་སམ། །མགལ་མེ་ཡིས་ནི་མྱུར་དུ་བསྲེག །མེ་ཡིས་ཐལ་བར་བྱེད་འགྱུར་ན། །ཅི་ཕྱིར་དེ་ནི་འབྱུར་བར་འགྱུར། །ཞེས་བྱ་བ་ལ། ལུས་འཁྱིལ་པ་ཞེས་བྱ་

པའི་སོ་རྗེས་ནི་མཁྲིས་བ་སྐྱེད་པར་བྱེད་པ་ཡིན་པས། དེ་མ་གཏོགས་པ་གདེངས་ཀ་ཅན་དང་ཁྲ་བ་སྟེ་གཞན་དག་གི་དུག་ནི་ལྕགས་ལ་སོགས་པ་མེར་བསྲེགས་པའམ། མགལ་མེ་ཞེས་བྱ་བ་ཤིང་ཕྱེད་ཚིག་པའི་མེས་བསྲེག་པར་བྱ་སྟེ། དེ་ལྟ་བུས་ནི་མྱུར་བར་ཐལ་བ་ཉིད་དུ་བྱེད་པར་འགྱུར་

གྱི། །མི་བྱེད་པ་མ་ཡིན་ནོ། །ས་དང་ལྕི་བ་སྨན་སོགས་ཀྱིས། །ཁ་བཀང་ནས་ནི་གཞིབ་པར་བྱ། །ཞེས་བྱ་བ་ལ། ཡང་ན་རྨ་དེ་ལ་ས་ལ་སོགས་པ་གང་ཡང་རུང་བས་ཁ་བཀང་དང་གཞིབ་པར་བྱའོ། །ཆིངས་མའི་ནང་དུ་ཤ་ཆེའི་ཕྱོགས། །མཆོག་ཏུ་ཞལ་ཞལ་བྱ་བ་དང་། །ཡན་

ལག་མཆེ་བས་ཟིན་བཅས་པ། །དུག་སྨན་གྱིས་ནི་ཡང་ཡང་བསྐུ། །ཙནྡན་པུ་ཤེལ་ཙེ་ལྡན་པའི། །ཆུ་ཡིས་ཀྱང་ནི་བླུགས་པར་བྱ། །ཞེས་བྱ་བ་ལ། རྨའི་སོར་བཞིའི་གོང་དུ་བཅིངས་པའི་ནང་དུ་ཤ་ཆེ་བའི་ཕྱོགས་སུ་ཞལ་ཞལ་བྱས་ལ་དེ་དུག་སྨན་བསྐུ་ཞིང་ཙནྡན་ལ་སོགས་

པའི་སྨན་གྱི་ཆུ་བླུགས་པར་བྱའོ། །དུག་གིས་ཁྱབ་པར་གྱུར་པ་ལ། །གཏར་ག་གདབ་པ་གསོ་མཆོག་སྟེ། །ཁྲག་ནི་ཕྱུང་བར་གྱུར་པ་ན། །མ་ལུས་དུག་ནི་འབྱུང་བར་འགྱུར། །ཞེས་བྱ་བ་ལ། དུག་གིས་ལུས་ལ་ཁྱབ་པས་གཏར་གས་ཁྲག་གདོན་པ་ནི་གསོ་པའི་མཆོག་ཡིན་ཏེ། །

ཁྲག་ཕྱུང་བས་དུག་འབྱུང་བའི་ཕྱིར་རོ། །དུག་བཅས་ཁྲག་ནི་དྲི་མི་ཞིམ། །མེར་བསྲེགས་སྒྲ་ནི་ཙེག་ཙེག་ཟེར། །ཞེས་བྱ་བ་ལ། དུག་དང་བཅས་པའི་ཁྲག་ནི་དྲི་མི་ཞིམ་པར་འགྱུར་བ་དེ་བཞིན་དུ་མེར་བསྲེགས་ན་སྒྲ་འཚག་ཅིང་ཙེག་ཙེག་ཟེར་བ་འབྱུང་པར་འགྱུར་རོ། །ནད་གཞི་ཇི་བཞིན་དག་

เล่ม ๒๐๒ · หน้า 263b

གྱུར་པ། །ཁྲག་ནི་སྔ་མ་བཞིན་ཤེས་བྱ། །ཞེས་བྱ་བ་ལ། སྐྱོན་མེད་བའི་ཁྲག་ཇི་ལྟ་བུ་ཡིན་པ་ཡང་སྔར་བཤད་པའི་ཚུལ་ལས་ཤེས་པར་བྱའོ། །རྩ་ནི་སྣང་བར་མ་གྱུར་ན། །རྔབས་རྭ་སྲིན་བུ་པད་བས་གཏར། །ཞེས་བྱ་བ་ལ། གལ་ཏེ་རྩ་མི་མངོན་ན་རྔབས་རྭ་ལ་སོགས་པས་ཁྲག་དབྱུང་

བར་བྱའོ། །ཁྲག་ཕྱུང་བ་ཡི་ལྷག་མ་ནི། །དུག་གི་དྲོད་ཀྱིས་ཞུ་གྱུར་པ། །ཤིན་ཏུ་བསིལ་བའི་སྨན་བསྐུ་དང་། །བླུགས་པ་ཡིས་ནི་བསལ་བར་བྱ། །ཞེས་བྱ་བ་ལ། གཏར་གས་ཁྲགས་ཕྱུང་བའི་ལྷག་མ་དུག་གི་དྲོད་ཀྱིས་ལུས་ལ་ཞུ་ཞིང་ཁྱབ་པར་གྱུར་པ་ནི་བསིལ་སྨན་བསྐུ་བ་ལ་སོགས་

པས་བསལ་བར་བྱའོ། །དུག་གི་ཤུགས་ཀྱིས་མ་ཞུ་བས། །བརྒྱལ་དང་མྱོས་དང་སྙིང་འཛག་འབྱུང་། །དེ་ནི་བསིལ་སྨན་བླུགས་པ་དང་། །རླུང་ཡབ་སྤུ་ལྡང་བྱེད་པས་བསལ། །ཞེས་བྱ་བ་ལ། གང་གི་ཕྱིར་དུག་གི་ཤུགས་ཀྱིས་ཁྲག་མ་ཞུ་ཞིང་འཐས་པར་གྱུར་ན་བརྒྱལ་བ་ལ་

སོགས་པ་འབྱུང་བར་འགྱུར་ཏེ། དེ་ལས་དང་པོ་ནི་བསིལ་སྨན་ལ་སོགས་པས་བསལ་བར་བྱའོ། །ཁྲག་ནི་སླ་བར་གྱུར་ན་དུག །འཕྲལ་དུ་ཤུགས་ནི་ཞི་བར་འགྱུར། །ཞེས་བྱ་བ་ལ། གལ་ཏེ་དུག་ནི་སླ་ཞིང་ཟག་པར་གྱུར་ན། མོད་ལ་ཤུགས་ཞི་བར་འགྱུར་རོ། །དུག་ནི་རྣོ་བས་སྙིང་འདར་བྱེད། །

དེ་བསྲུང་ཕྱིར་ནི་ཞུན་མར་དང་། །མར་དང་བཅས་བའི་སྦྲང་རྩི་འམ། །དུག་སྨན་མར་དང་སྦྲུས་པ་བླུད། །ཅེས་བྱ་བ་ལ། དུག་ནི་ཤིན་ཏུ་རྣོ་བ་ཡིན་བའི་ཕྱིར་སྙིང་ལ་གནོད་ཅིང་འདར་བར་བྱེད་ལ། དེ་བས་ན་སྙིང་དེ་བསྲུང་བའི་ཕྱིར་ཞུན་མར་ལ་སོགས་པ་བླུད་པར་བྱའོ། །དེ་ཡི་སྙིང་ནི་འགག་

བྱེད་པས། །སྙིང་གར་བད་ཀན་སོགས་པར་བྱེད། །ཅེས་བྱ་བ་ལ། སྐྱེས་བུ་དེ་ལ་སྙིང་གི་གནས་སུ་ནད་ཀྱིས་འགག་པར་བྱེད་ཅིང་། བད་ཀན་སོགས་པར་བྱེད་པར་འགྱུར་རོ། །ལུས་ལྕི་ནད་ནི་བསླངས་པ་དང་། །སྙིང་འཕར་དེ་ནི་སློན་དུ་གཞུག །གཤེར་རྫས་སྐྱུར་རྩབས་རྒྱ་སྲན་དང་། །ཏིལ་

དང་ཆང་སོགས་མ་གཏོགས་པ། །དུག་སེལ་བ་ཡི་སློན་སྨན་གཏང་། །དེས་ནི་ལུས་ལ་ཁྱབ་མི་འགྱུར། །ཞེས་བྱ་བ་ལ། དེའི་འོག་ཏུ་ལུས་ལྕི་བ་ལ་སོགས་པ་འབྱུང་བར་འགྱུར་ལ། དེས་ན་སྐྱུར་རྩ་བས་ཀན་ཛི་ལ་སོགས་པ་མ་གཏོགས་པ་དུག་སེལ་བའི་སྨན་གྱི་སློན་སྨན་གཏང་བར་བྱ་སྟེ།

เล่ม ๒๐๒ · หน้า 264a

དེ་ལྟར་བྱས་ན་དུག་དེས་ལུས་ལ་ཁྱབ་པར་མི་འགྱུར་རོ། །སྦྲུལ་དང་ཉེས་པ་རང་བཞིན་དང་། །གནས་དང་ཤུགས་ཀྱི་ཁྱད་པར་ནི། །ཕྲ་མོ་ཡན་ཆད་ལེགས་བརྟགས་ལ། །གསོ་བ་ཁྱད་པར་ཅན་བྱའོ། །ཞེས་བྱ་བ་ལ། སྦྲུལ་གྱི་ཁྱད་པར་དང་། ཉེས་པ་ནས་ཤུགས་ཀྱི་ཁྱད་

པར་ཕྲ་མོ་ཡན་ཆད་ཀྱང་ལེགས་པར་བརྟགས་ལ། དེ་དང་འཚམ་པའི་གསོ་བ་ཁྱད་པར་ཅན་བྱའོ། །སྲིན་བུ་བ་རེའི་རྩ་བ་དང་། །གི་རི་ཀར་ཎི་དཀར་པོའི་ཆུ། །བཏུང་བ་གདེངས་ཀ་ཅན་བཞིན་སྦྱར། །སྣ་སྨན་རུ་རྟ་སྦྲང་རྩི་གཏང་། །ཞེས་བྱ་བ་ལ། སྲིན་བུ་བ་རིའི་རྩ་བ་ལ་སོགས་པའི་

སྨན་ནི་གདེངས་ཀ་ཅན་གྱིས་ཟིན་པ་ལ་བླུད་པར་བྱའོ། །དེ་བཞིན་དུ་རུ་རྟའི་སྣ་སྨན་ཡང་གཏང་བར་བྱའོ། །སྦྲུལ་ནག་གིས་ནི་ཟིན་པ་ལ། །ཁྲག་གཏར་ནས་ནི་བཅའ་བ་དང་། །ན་གོ་ལི་ནི་སྦྱར་བ་བསྐུ། །ཞེས་བྱ་བ་ལ། མི་སྦྲུལ་ནག་པོས་ཟིན་པ་ལ་གཏར་ག་

གདབ་པ་དང་བཅའ་བ་ལ་སོགས་པའི་ལྡེ་གུ་དང་། རྩ་རྣོ་བའི་དུག་གིས་སོས་འཛིན་པ་གསོ་བར་བྱའོ། །བཏུང་བར་བཙོད་དང་སྦྲང་རྩི་དང་། །ཁང་པའི་དུད་པ་མར་སྦྱར་བླུད། །ཅེས་བྱ་བ་ལ། སྦྲུལ་ནག་པོས་ཟིན་པ་ལ་བཙོད་ལ་སོགས་པ་བླུད་ན་ཕན་ནོ། །གདེངས་ཀ་ཅན་དང་རི་མོ་ཅན། །

མི་བཟད་དུག་གིས་ཟིན་པ་ལ། །ཏནྡུ་ལི་ཡ་ཏང་པ་ལ་དང་། །གི་རི་ཀར་ཎི་རྣམ་གཉིས་དང་། །ཁ་ལུང་ཁཎྣ་སེ་འབྲུ་ནི། །བཏུང་དང་སྣ་སྨན་མིག་སྨན་བྱ། །ཞེས་བྱ་བ་ལ། གདེངས་ཀ་ཅན་དང་རི་མོ་ཅན་གྱི་དུག་མི་བཟད་པ་ལ་ཏནྡུ་ལི་ཡ་ལ་སོགས་པའི་དུག་སྨན་བཏུང་བ་ལ་སོགས་པ་བཏང་ན་ཕན་ནོ། །

ཨ་ཤྭ་གནྔྷ་རྒུན་འབྲུ་དང་། །གི་རི་ཀར་ཎི་ས་ནག་དང་། །ཧ་ཏི་པི་པི་ལིང་དང་ནི། །བྱེའུ་རུག་པའི་ལོ་མ་དང་། །བིལ་བ་སེའུ་འབྲུ་ཀ་པིདྠ། །ཆ་ནི་ཕྱེད་ཕྱེད་སྦྲང་རྩིར་སྦྱར། །དུག་སྨན་ཡིན་ཏེ་ཁྱད་པར་དུ། །ལུས་འཁྱིལ་སྦྲུལ་གྱི་དུག་ལ་ཕན། །ཞེས་བྱ་བ་ལ། ཨ་ཤྭ་གནྡྷ་ལ་སོགས་པའི་ཆ་ཕྱེད་ཕྱེད་དང་

སྦྲང་རྩི་དང་སྦྱར་བའི་དུག་སྨན་ནི་དུག་ཐམས་ཅད་སེལ་ཞིང་མཆོག་ཏུ་གདེངས་ཀ་ཅན་གྱི་དུག་ལ་ཕན་ནོ། །ལོ་མ་ལྔ་དང་འབྲས་བུ་གསུམ། །ཤིང་མངར་ནཱ་ག་པུཥྤ་དང་། །ཨེ་ལ་བ་ལུ་ཛི་བ་ཀ །ཟངས་རྩི་བ་དང་པུ་ཤེལ་ཙེ། །ཁར་ཤུག་པ་ཨུཏྲལ། །སྦྲང་རྩི་དང་སྦྱར་ཁ་བ་ཅན། །ཞེས་

เล่ม ๒๐๒ · หน้า 264b

བྱ་ལུས་འཁྱིལ་དུག་འཇོམས་སོ། །བསྐུས་ན་སྐྲང་དང་ཤུ་བ་མཆེད། །འབྲུམ་བུ་རིམས་དང་ལུས་ལྕི་སེལ། །ཞེས་བྱ་བ་ལ། ལོ་མ་ལྔ་བ་ལ་སོགས་པའི་དུག་སྨན་དུ་སྦྱར་བ་ནི་མིང་ཁ་བ་ཅན་ཞེས་བྱ་སྟེ། དེས་ནི་ལུས་འཁྱིལ་པའི་དུག་སེལ་བ་དང་བསྐུས་ན་སྐྲང་བ་ལ་སོགས་པ་སེལ་བར་

བྱེད་དོ། །ཏང་པ་ལ་ནྱ་གྲོ་ངྷའི་མྱུ་གུ། །ཛི་བ་ཀ་དང་ཟངས་རྩི་བ། །ཀ་ར་དཀར་པོ་ཤིང་མངར་བཙོད། །ཁུ་བ་ལུས་འཁྱིལ་དུག་ལ་བླུད། །ཅེས་བྱ་བ་ལ། །ལུས་འཁྱིལ་བའི་དུག་གིས་ཟིན་པ་ལ་ནི་ཏང་བལ་ལ་སོགས་པའི་སྨན་ཆུ་དང་སྦྱར་བ་བླུད་པར་བྱའོ། །འོད་མའི་ཤུན་པ་ས་བོན་དང་། །

བཅའ་སྒ་པ་ཏོ་ལའི་ས་བོན། །ཤིར་ཤའི་ས་བོན་བུ་ཙེ་ཤེལ། །འབྲས་ཀྱི་རྩ་བ་བོང་ང་དཀར། །ཤུ་དག་བ་གཅིན་བཅས་པར་བཏགས། ཡན་ལག་བརྒྱད་པ་ཞེས་བྱ་སྟེ། །གོ་ན་ས་ཡི་དུག་འཇོམས་སོ། །ཞེས་བྱ་བ་ལ། འོད་མའི་ཤུན་པ་དང་ས་བོན་ལ་སོག་པ་སྨན་གྱི་ཡན་ལག་

བརྒྱད་པོ་བ་གཅིན་དང་སྦྱར་བ་བཏགས་ཏེ་བྱིན་ན་གོ་ན་སའི་དུག་སེལ་བར་འགྱུར་རོ། །རུ་རྟ་བོང་ང་པུ་ཙེ་ཤེལ། །ཧ་ར་ེཎུ་ཀ་ཁྱིམ་དུད་པ། །རྒྱ་སྤོས་སྦྲང་རྩི་ཚ་བ་གསུམ། །སྦྱར་བས་རི་མོ་ཅན་དུག་སེལ། །ཞེས་བྱ་བ་ལ། །རུ་རྟ་ལ་སོགས་པའི་དུག་སྨན་གྱིས་སྦྲུལ་རི་མོ་ཅན་གྱི་དུག་སེལ་བར་བྱེད་དོ། །

འདམ་བུ་ཁྲ་བོ་འདྲས་ཟིན་ན། །ས་བརྐོས་འོག་ཏུ་ཐུན་གཉིས་གཞུག །ཕྱུང་སྟེ་བཞར་ལ་མར་སར་དང་། །འབྲས་དངས་ཡི་ལྡེ་གུས་བྱུག། །ཅེས་བྱ་བ་ལ། འདམ་བུ་ཁྲ་བོ་ཞེས་བྱ་བའི་དུག་གིས་ཟིན་པ་ལ་ནི་ས་བརྐོས་པའི་འོག་ཏུ་ཐུན་གཉིས་ཀྱི་བར་རྨ་དེ་བཅུག་ལ། །དེའི་འོག་ཏུ་ཕྱུང་སྟེ། །

གཙགས་བུས་བཞར་ལ་མར་སར་དང་འབྲས་དང་སའི་ལྡེ་གུས་བསྐུ་བར་བྱའོ། །འབྲས་བུ་གསུམ་གྱི་བྱེ་བཏབ་པའི། །མར་ནི་རྙིང་པ་བླུད་པར་བྱ། །ཞེས་བྱ་བ་ལ། ཡང་ན་སྦྲུལ་གྱིས་ཟིན་པ་ལ་འབྲས་བུ་གསུམ་ལ་སོགས་པའི་མར་བླུད་པར་བྱའོ། །ཞུ་ཞིང་བཀྲུས་ནས་ནས་ཟན་ནི། །སྲན་ཚོད་

དང་ནི་བཅས་པ་སྦྱིན། །ཞེས་བྱ་བ་ལ། མར་དེ་ཞུ་ནས་བཀྲུ་སྨན་བྱ་སྟེ། ནས་ཟན་ལ་སོགས་པ་སྦྱིན་པར་བྱའོ། །ཀ་ར་བཱི་ར་ཨརྐ་ཡི། །མེ་ཏོག་ལངྒ་ལིའི་རྩ་བ། །པི་པི་ལིང་དང་ན་ལེ་ཤམ། །པ་ཐ་སྐྱུར་རྩབས་ལྡེ་གུར་བྱས། །འདི་ནི་སྦྲུལ་གཞན་གྱིས་ཟིན་པའི། །སྦྲུལ་གྱི་དུག་ཀུན་སེལ་

เล่ม ๒๐๒ · หน้า 265a

བ་ཡིན། །ཞེས་བྱ་བ་ལ། ཀ་ར་བཱི་ར་ལ་སོགས་པ་སྐྱུར་རྩབས་དང་ལྡེ་གུར་བྱས་ཏེ་བསྐུས་པའི་སྨན་འདི་ནི་སྦྲུལ་གཞན་གྱིས་ཟིན་བ་ཐམས་ཅད་ཀྱི་དུག་སྨན་ཡིན་ནོ། །ཤྲི་ཤའི་མེ་ཏོག་ཁུ་བ་དང་། །ན་ལེ་ཤམ་དཀར་ཞག་བདུན་སྤངས། །བཏུང་དང་སྣ་སྨན་བྱས་གྱུར་

ན། །སྦྲུལ་གྱི་མཆེ་བས་ཟིན་པ་སེལ། །ཞེས་བྱ་བ་ལ། ན་ལེ་ཤམ་དཀར་པོ་ཞེས་བྱ་བ་ཤི་ཀྲུའི་ས་བོན་ཤིརི་ཤའི་མེ་ཏོག་བསྐོལ་བའི་ཁུ་བའི་ནང་དུ་ཞག་བདུན་སྤངས་ཏེ་སྦྲུལ་གྱིས་ཟིན་པ་ལ་བཏུང་བ་ལ་སོགས་བྱིན་པས་ཕན་ནོ། །རྒྱ་སྤོས་རུ་རྟ་སྲང་གཉིས་གཉིས། །མར་དང་སྦྲང་རྩི་སྲང་བཞི་

བཞི། །འདི་བླུད་འཇོག་བོས་ཟིན་པ་ཡང་། །བདེ་བ་སྐྱེད་པར་བྱེད་པ་ཡིན། །ཞེས་བྱ་བ་ལ། ཡང་ན་རྒྱ་སྤོས་ལ་སོགས་པ་ཡང་ཇི་སྐད་སྨོས་བའི་ཡོན་ཏན་དང་ལྡན་པ་ཡིན་ནོ། །དེ་ནས་གདེངས་ཀ་ཅན་གྱི་ཤུགས། །དང་པོར་ཁྲག་ནི་དབྱུང་བར་བྱ། །དུག་སྨན་སྦྲང་རྩི་ཞུན་མར་དང་། །བཅས་པ་མྱུར་དུ་

བླུད་པར་བྱ། །ཞེས་བྱ་བ་ལ། གདེངས་ཀ་ཅན་གྱིས་ཟིན་པའི་ཤུགས་དང་པོ་ལ་ནི་ཁྲག་དབྱུང་བ་ལ་སོགས་པའི་སྦྱོར་བ་བྱའོ། །གཉིས་པར་སློན་སྨན་བཏང་ནས་ནི། །དེ་བཞིན་དུག་སྨན་བླུད་པར་བྱ། །ཞེས་བྱ་བ་ལ། ཤུགས་གཉིས་པ་ལ་ནི་སློན་སྨན་བཏང་བ་དང་། གཏར་ག་ལ་སོགས་པ་སྔ་

མ་བཞིན་དུ་བྱའོ། །གསུམ་པར་དུག་སྨན་སྤྱར་བྱ་ཞིང་། །མིག་སྨན་དང་ནི་སྣ་སྨན་གཏང་། །ཞེས་བྱ་བ་ལ། གསུམ་པར་ནི་དུག་སྨན་གྱི་མིག་སྨན་ལ་སོགས་པ་སྦྱར་བར་བྱའོ། །བཞི་པར་སྐྱུག་སྨན་བཏང་ནས་ན། །སྔར་བཤད་པ་ཡི་ནས་ཐུག་བླུད། །ཅེས་བྱ་བ་ལ། ཤུགས་བཞི་པ་ལ་ནི་དང་པོར་

སྐྱུག་སྨན་བཏང་ནས་གོང་དུ་བཤད་པའི་ནས་ཐུག་བླུད་པར་བྱའོ། །ལྔ་པ་དྲུག་པར་བསིལ་སྨན་གྱིས། །བསྐུ་ཞིང་སྨན་ཆུ་ཡང་ཡང་བླུགས། །སློན་སྨན་རྣོན་པོ་གཏང་བྱ་ཞིང་། །དུག་སེལ་ནས་ཐུག་བླུད་པར་བྱ། །ཞེས་བྱ་བ་ལ། ཤུགས་ལྔ་པ་དང་དྲུག་པ་ལ་ནི་དེ་ལ་བསིལ་སྨན་བསྐུ་བ་ལ་སོགས་

པའི་སྦྱོར་བ་རྣམས་བྱའོ། །བདུན་པར་དུག་སྨན་རྣོག་པོ་ཡི། །མིག་སྨན་དང་ནི་སྣ་སྨན་གཏང་། །ཞེས་བྱ་བ་ལ། ཤུགས་བདུན་པར་ནི་དུག་སྨན་གྱི་སྦྱོར་བ་ལ་སོགས་པ་བྱའོ། །དེ་ནས་སྦྱི་བོར་རྒྱ་གྲམ་དུ། །ཟབ་མོའི་མཚོན་གྱིས་བཏྲལ་ནས་ནི། །དེར་ནི་ཤ་འམ་ཁྲག་གམ་ནི། །པགས་པ་ངག་ནི་

เล่ม ๒๐๒ · หน้า 265b

གཞུག་པར་བྱ། །ཞེས་བྱ་བ་ལ། དེའི་འོག་ཏུ་མི་དེའི་མགོ་བོར་རྒྱ་གྲམ་བྱ་རོག་རྗེས་འདྲ་བར་བཏྲལ་ལ་དེར་ཤ་འམ་ཁྲག་གམ་པགས་པ་གཞུག་པར་བྱའོ། །ལུས་བསྐྱིལ་ཤུགས་ནི་གསུམ་པལ། །སློན་སྨན་བཏང་ལ་ནས་ཐུག་བླུད། །ཅེས་བྱ་བ་ལ། ལུས་བསྐྱིལ་བའི་དུག་གི་ཤུགས་

གསུམ་པ་ལ་སློན་སྨན་བཏང་བའི་རྗེས་ལ་ནས་ཐུག་བླུད་བར་བྱའོ། །དྲུག་པར་སྨན་ནི་རྟུལ་པོ་འམ། །ཤུག་པ་ལ་སོགས་སྡེ་ཚན་བླུད། །ཅེས་བྱ་བ་ལ། ལུས་བསྐྱིལ་བའི་ཤུགས་དྲུག་པར་སྨན་རྣོན་པོ་མ་ཡིན་པ་འམ། ཤུག་པ་ལ་སོགས་པའི་སྡེ་ཚན་བསྐོལ་བ་བླུད་པར་བྱའོ། །ཁྲ་བོའི་ཤུགས་ནི་དང་པོ་

ལ། །ཞལ་ཞལ་ཟབ་ཏུ་གདབ་བྱ་ཞིང་། །ཀུ་བས་ཁྲག་ནི་བཏོན་ནས་ནི། །སྔ་མ་བཞིན་དུ་དུག་སྨན་བླུད། །ཅེས་བྱ་བ་ལ། སྦྲུལ་ཁྲ་བོས་ཟིན་བའི་ཤུགས་དང་པོ་ལ་ནི་ཞལ་ཞལ་གཏིང་ཟབ་ཏུ་གདབ་ལ། དེའི་འོག་ཏུ་ཀུ་བ་བཏབ་པས་ཁྲག་དབྱུང་བའམ་སྔ་མ་བཞིན་དུ་དུག་སྨན་བླུད་པར་བྱའོ། །དྲུག་

པར་མིག་སྨན་རྣོན་པོ་དང་། །སྣ་སྨན་ཕྱེ་མ་བུད་པ་གཏང་། །ཞེས་བྱ་བ་ལ། ཁྲ་བོས་ཟིན་པའི་ཤུགས་དྲུག་པ་ལ་མིག་སྨན་ཤིན་ཏུ་རྣོན་པོ་ལ་སོགས་པ་བྱའོ། །མ་སྨོས་པ་ཡི་ཤུགས་ལས་ནི། །གདེངས་ཀ་ཅན་སྐབས་བཤད་ལྟར་གསོ། །ཞེས་བྱ་བ་ལ། མ་སྨོས་པའི་ཤུགས་དང་པོ་དང་

གཉིས་པ་དང་བཞི་པ་ལ་སོགས་པ་ལ་ནི་གདེངས་ཀ་ཅན་གྱི་སྐབས་སུ་བཤད་པ་ལྟར་བྱའོ། །སྦྲུམ་མ་བྱིས་པ་རྒན་པོ་ལ། །གཏར་ག་མི་གདབ་འཇམ་པོས་གསོ། །ཞེས་བྱ་བ་ལ། སྦྲུམ་མ་ལ་སོགས་པ་སྦྲུལ་གྱིས་ཟིན་པ་ལ་ནི་གཏར་ག་མི་གདབ་པར་གསོ་པ་འཇམ་པོས་བྱའོ། །ཤིང་ཚ་

ལྡོང་རོས་རྒྱ་སྤོས་ཡུང་། །ཀུ་ཤའི་ཁུ་བ་ཆུ་སྲིན་སེན། །ཏ་མ་ལ་ཡི་གེ་སར་དང་། །འབྲས་བུ་ཆུ་གྲང་སྦྱར་བ་བླུད། །འདི་ཡིས་དབང་པོའི་རྡོ་རྗེས་ནི། །ལྷ་མིན་ལྟ་བུར་དུག་འཇོམས་བྱེད། །ཅེས་བྱ་བ་ལ། ཤིང་ཚ་ལ་སོགས་པའི་སྨན་འདི་དག་འབྲས་བཀྲུས་པའི་ཆུ་དང་སྦྱར་ཏེ་བླུད་པ་ནི་མིང་རྡོ་

རྗེ་ཞེས་བྱ་སྟེ། ཇི་ལྟར་བརྒྱ་བྱིན་གྱི་རྡོ་རྗེས་ལྷ་མ་ཡིན་འཇོམས་པ་ལྟར་དུག་སེལ་བར་བྱེད་དོ། །བིལ་བའི་རྩ་བ་བྱེའུ་རུག་པའི་མེ་ཏོག །རྒྱ་སྤོས་ཐང་ཤིང་ཀ་རཉྫའི་འབྲས་བུ། །སེར་པོ་རྣམ་གཉིས་འབྲས་བུ་གསུམ་དང་ནི། །ཚ་བ་གསུམ་པོ་ར་གཅིན་ཞིབ་བཏགས་པ། །བཏུང་དང་སྣ་སྨན་མིག་སྨན་

เล่ม ๒๐๒ · หน้า 266a

སྦྱར་བ་ཡིས། །སྦྲུལ་དང་ལུ་དབྱི་བ་སྡིག་པ་སོགས། །དུག་དང་དབྱིག་དུག་མ་ཞུ་གསུད་དང་རིམས། །མི་ནི་གདོན་གྱིས་ཟིན་པ་བདེ་བར་བྱེད། །ཅེས་བྱ་བ་ལ། བིལ་བའི་རྩ་བའི་སྨན་ར་གཅིན་དང་ཞིབ་ཏུ་བཏགས་ཏེ་བཏུང་བ་ལ་སོགས་པར་བཏང་ན་སྦྲུལ་ལ་སོགས་པས་ཟིན་པ་དང་། མ་ཞུ་

བ་དང་། གདོན་གྱིས་ཟིན་པ་ལ་སོགས་པ་རྣམས་བདེ་བར་བྱེད་དོ། །སོས་བཏབ་བསྐུ་བ་ལ་སོགས་ཀྱིས། །མ་ལུས་བཏོན་པར་གྱུར་ཀྱང་ནི། །ཉམས་པའི་དུག་ནི་ཇི་བཞིན་དང་། །སླར་ཡང་ཤུགས་ནི་སྐྱེ་བར་བྱེད། །ཅེས་བྱ་བ་ལ། མཆེ་བའི་དུག་གིས་ཟིན་པ་ལ་བསླུ་བ་ལ་སོགས་པས་མ་ལུས་པར་བཏོན་

པར་གྱུར་ཀྱང་སླར་གནོད་པའི་ཤུགས་བསྐྱེད་པར་གྱུར་བ་ནི་ཉམས་པའི་དུག་གམ་དུག་ཐ་མལ་པ་ལ་སོགས་པ་དང་འདྲ་བར་བྱེད་པ་ཡིན་ནོ། །དུག་དང་བྲལ་ནས་རླུང་འཁྲུགས་ན། །སྣུམ་ལ་སོགས་པས་གསོ་བྱ་ཞིང་། །ཏིལ་མར་ཆང་དང་རྒྱ་སྲན་ཆུ། །མ་གཏོགས་རླུང་ནི་སེལ་བ་སྦྱིན། །ཞེས་བྱ་བ་ལ།

དུག་གི་ཤུགས་དང་བྲལ་ནས་རླུང་གི་ནད་འཁྲུགས་པར་གྱུར་ན་སྣུམ་གྱི་མར་ལ་སོགས་པས་སོག་བར་བྱའོ། །མཁྲིས་པར་མཁྲིས་པའི་རིམས་སེལ་བའི། །སྨན་ཁུ་སྨན་མར་འཇམ་རྩིས་གསོ། །ཞེས་བྱ་བ་ལ། གལ་ཏེ་མཁྲིས་པ་འཁྲུགས་ན་ནི་མཁྲིས་པ་སེལ་བར་བྱེད་པ་དང་། རིམས་སེལ་བར་བྱེད་པའི་

སྨན་གྱིས་སེལ་བར་བྱེད་དོ། །བད་ཀན་སྦྲང་རྩིར་བཅས་པ་ཡི། །དོང་ཀ་ལ་སོགས་སྡེ་ཡིས་གསོ། །ཞེས་བྱ་བ་ལ། དུག་དང་བྲལ་ནས་བད་ཀན་འཁྲུགས་པར་གྱུར་ན་དོང་ཀ་ལ་སོགས་པའི་སྡེ་ཚན་སྦྲང་རྩི་དང་སྦྱར་བ་བླུད་པར་བྱའོ། །སྦྲུལ་གྱི་རུས་པས་གནོད་གྱུར་དང་། །དེ་བཞིན་རྟོག་པའི་དུག་

གིས་ཉེན། །ཀ་ར་རྒུན་འབྲུམ་པ་ཡ་སྱ། །ཤིང་མངར་ཁ་ར་སྦྲང་རྩིར་སྦྱར། །སྔགས་ཀྱིས་བཏབ་པའི་ཆུ་དང་བཅས། །གཏོར་ཞིང་སྤྲོ་བསྲིད་དགའ་བར་བྱ། །ཞེས་བྱ་བ་ལ། སྦྲུལ་གྱི་རུས་པས་ཟུག་པ་ལ་སོགས་པ་ལ་ནི་ཀ་ར་དང་། རྒུན་འབྲུམ་ལ་སོགས་པའི་སྨན་ལ་སོགས་པས་གསོ་བར་བྱའོ། །

ཀེ་ཀེ་རུ་དང་མུ་ཏིག་མརྒད་དང་། །བེེརཱུདྱ་དང་རྡོ་རྗེ་མཐོན་ཀ་ཆེ། །རས་བལ་ས་བོན་དུག་གིས་གནོད་བའམ། །ཁ་བ་ཅན་གྱི་རི་ལས་སྐྱེས་པ་ཡི། །སོ་མ་ར་ཛ་དང་ནི་བ་སྤྲུ་བ། །དེ་བཞིན་དྲོ་ན་མ་ཧཱ་དྲོ་ན་དང་། །སྦྲུལ་ལ་ཡོད་པའི་ནོར་བུ་མ་ན་སི། །ནུས་པ་དང་ནི་ལྡན་པར་གྱུར་པ་ཡི། །དུག་ནི་དུག་གཞོམ་བྱ་

เล่ม ๒๐๒ · หน้า 266b

ཕྱིར་བཅང་བར་བྱ། །ཞེས་བྱ་བ་ལ། ཀེ་ཀེ་རུ་དང་མུ་ཏིག་ལ་སོགས་པའི་རིན་པོ་ཆེ་དང་། སྨན་སྦྲུལ་གྱི་དུག་སེལ་བའི་ནུས་པ་དང་ལྡན་པ་རྐང་པ་དང་ལག་པ་དང་། མགུལ་དང་མགོ་ལ་གདགས་པར་བྱའོ། །ནུབ་མོའི་དུས་སུ་རྒྱུ་ཚེ་ཁྱད་པར་དུ། །གདུགས་དང་ཁར་སིལ་སྒྲ་དང་བཅས་པ་བཅང་། །དེ་ཡི་གྲིབ་

མ་སྒྲ་ཡི་སྐད་ཕྱུང་ནས། །སྦྲུལ་གྱི་ཚོགས་ནི་འབྱེར་བར་བྱེད་པར་འགྱུར། །ཞེས་བྱ་བ་ལ། མི་ནུབ་མོའི་དུས་སུ་རྒྱུ་བའི་ཚེ་གདུགས་དང་ཁར་བ་སྒྲ་དང་བཅས་པ་བཅང་བར་བྱ་སྟེ། གདུགས་དེའི་གྲིབ་མ་དང་ཁར་སིལ་དེའི་སྒྲ་སྐད་ཀྱིས་སྦྲུལ་གྱི་ཚོགས་འབྱེར་ཞིང་མཐོང་བའི་ཡུལ་ལས་འདས་པར་འགྱུར་རོ། །ཡན་

ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་དྲུག་པའི་རྣམ་པར་འགྲེལ་པའོ།། །།དེ་ནས་སྲིན་བུའི་དུག་གསོ་བ་བཤད་པར་བྱའོ། །སྤྲུལ་ཉིད་ཀྱི་ནི་བཤང་གཅི་དང་། །ཁ་ཆུ་

སྒོ་ང་ལུས་རུལ་སྐྱེས། །ནད་ནི་རེ་རེ་འདུས་པ་དང་། །ལྡན་པའི་སྲིན་བུའི་དུག་རྣམ་བཞི། །ཞེས་བྱ་བ་ལ། འབུ་གང་སྦྲུལ་ཉིད་ཀྱི་བཤང་གཅི་ལ་སོགས་པ་རུལ་པ་ལས་སྐྱེས་པར་གྱུར་ཅིང་། །དེ་དག་ཀྱང་ནད་སྣ་རེ་རེ་དང་འདུས་པ་ལས་གྱུར་པའི་སྲིན་བུའི་དུག་རྣམ་པ་བཞི་ཡིན་ནོ། །རླུང་གི་སྲིན་བུས་ཟིན་

གྱུར་ན། །ཤས་ཆེར་ན་ཞིང་ཟུག་པར་བྱེད། །ཅེས་བྱ་བ་ལ། རླུང་གི་རང་བཞིན་ཅན་གྱི་སྲིན་བུས་ཟིན་པར་གྱུར་ན། ཚ་བ་ལ་སོགས་པས་མཚན་ལྷག་པར་ན་བ་དང་ཟུག་པར་བྱེད་པ་ཡིན་ནོ། །མེ་ཡི་སྲིན་བུས་འཛག་པ་ཆུང་། །ཚ་ཞིང་དམར་ལ་ཤུ་བ་མཆད། །བ་ལུའི་འབྲས་བུ་སྨིན་པའམ། །འབྲ་

གོའི་འབྲས་བུ་སྨིན་པ་འདྲ། །ཞེས་བྱ་བ་ལ། མེའི་རང་བཞིན་ཅན་གྱི་སྲིན་བུས་ཟིན་པ་ན་མཆུའི་རྗེས་འཛག་པ་ཆུང་བ་དང་། ཚ་བ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །བད་ཀན་ཤས་ཆེས་ནད་ཚབས་ཆུང་། །ཨུ་དུམྺཱ་ར་སྨིན་པ་འདྲ། །ཤས་ཆེར་འཛག་པའོ། །ཞེས་བྱ་བ་ལ། བད་ཀན་གྱི་རང་བཞིན་

ཅན་གྱི་འབུས་ཟིན་པར་གྱུར་ན་མཆུས་བཏབ་པས་ནད་ཚབས་ཆུང་བ་ལ་སོགས་པ་ཡིན་ནོ། །འདུས་པ་ཡི། མཚན་ཉིད་ཐམས་ཅད་ལྡན་པ་དང་། །ཤུགས་ནི་སྦྲུལ་དང་འདྲ་བ་དང་། །སྐྲང་པ་འཕེལ་ཞིང་ཁྲག་དྲི་མནམ། །མགོ་དང་མིག་ལྕི་བརྒྱལ་མགོ་འཁོར། །དབུགས་མི་བདེན་སྤང་བར་བྱ་

เล่ม ๒๐๒ · หน้า 267a

ཞེས་བྱ་བ་ལ། འདུས་པའི་རང་བཞིན་ཅན་གྱི་འབུས་ཟིན་པ་ནི་མཆུ་རྗེས་མཚན་ཉིད་ཐམས་ཅད་དང་ལྡན་པ་དང་། སྦྲུལ་གྱི་ཤུགས་བདུན་དང་ལྡན་པ་དང་། སྐྲང་པ་ལ་སོགས་པ་དང་ལྡན་པ་ཡིན་ཏེ། དེ་ནི་གསོར་མི་རུང་བས་སྦང་བར་བྱའོ། །ཀུན་ཏུ་སྐྲངས་པ་ལྟེ་བ་ཅན་

ཚ་བ་གཡོ་ཞིང་ཡི་ག་འཆུས། །ཞེས་བྱ་བ་ལ། འབུ་ཐམས་ཅད་ཀྱིས་ཟིན་པ་ནི་དབུས་ལྟེ་བ་ཅན་དུ་མཐོ་བར་སྐྲངས་པ་དང་། ཚ་བ་ལ་སོགས་པ་དང་ལྡན་པ་ཡིན་ནོ། །སྡིག་པའི་དུག་ནི་རྣོ་བ་སྟེ། །དང་པོར་མེ་ལྟར་སྲེག་པར་བྱེད། །སྟེང་དུ་མྱུར་དུ་མཆེད་བྱེད་ཅིང་། །མཆེ་བ་འོག་ཏུ་འདུག་པ་ཡིན། །

ཞེས་བྱ་བ་ལ། སྡིག་པ་ཞེས་བྱ་བའི་འབུས་ཟིན་པའི་དུག་ནི་རང་བཞིན་རྣོ་བ་དང་། དང་པོར་མེ་ལྟར་སྲེག་པར་བྱེད་པ་དང་། སོས་བཏབ་པའི་སྟེང་དུ་མྱུར་དུ་མཆེད་ཅིང་འཕེལ་བ་དང་། མཆེ་བ་འོག་ཏུ་འདུག་པ་ཡིན་ནོ། །ཟིན་མ་ཐག་ནི་རབ་ཏུ་གནག །གས་པ་སྙམ་དུ་སེམས་ཤིང་ཟུག །ཅེས་

བྱ་བ་ལ། སྡིག་པའི་མཆེ་བས་ཟིན་པ་ནི་འཕྲལ་དུ་ཤས་ཆེར་ན་བར་འགྱུར་བ་དང་། དེ་བཞིན་དུ་རབ་ཏུ་ན་ཞིང་གནག་པ་དང་། གས་ཤིང་གྱེས་པ་སྙམ་དུ་སེམས་པ་ཡིན་ནོ། །དེ་ནི་ལྕི་བ་སོགས་རུལ་དང་། །དུག་གིས་ཕོག་སོགས་རུལ་བ་དང་། །སྦྲུལ་རུལ་བ་ལས་སྐྱེས་པ་ནི། །དུག་ཚབས་

ཆུང་དང་འབྲིང་དང་ཆེ། །ཞེས་བྱ་བ་ལ། སྡིག་པ་དེ་དག་གི་ལྕི་བ་ལ་སོགས་པ་རུལ་བ་ལས་བྱུང་བ་དེ་ནི་དུག་གི་ཚབས་ཆུང་བ་ཡིན་ནོ། །དུག་གིས་ཕོག་པའི་ཤ་རུལ་བ་ལ་སོགས་པ་ལས་འབྱུང་བ་ནི་འབྲིང་ཡིན་ནོ། །སྦྲུལ་གྱི་ཤ་རུལ་པ་ལས་སྐྱེས་པ་ནི་དུག་གི་ཚབས་ཆེ་བ་ཡིན་ནོ། །ཚབས་

ཆུང་སེར་ཞིང་དཀར་དང་གནག །རྩུབ་དང་ཁྲ་ཞིང་གཟིག་མདོག་ཅན། །སྤུ་དང་ཚིགས་ནི་དམར་བ་དང་། །དམར་ཞིང་ལྟོ་བ་དཀར་བ་ལིན། །ཞེས་བྱ་བ་ལ། དུག་གི་ཚབས་ཆུང་བའི་སྡིག་པ་ནི་སེར་བ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །བར་མ་ལྟོ་རུ་ཚིགས་གསུམ་པ། །རྐེད་

པ་སེར་སྐྱ་དམར་བ་ཡིན། །ཞེས་བྱ་བ་ལ། སྡིག་པའི་དུག་བར་མའི་ལྟོ་བར་དུད་ཀ་ཅན་ལ་སོགས་པ་ཡིན་ནོ། །དུག་ཆེ་སེར་སྐྱ་ཁྲ་བ་དང་། །རི་མོ་ཅན་ལ་ཁྲག་འདྲ་ཞིང་། མེ་འདྲ་ཚིགས་ནི་གཉིས་སམ་གཅིག །ལྟོ་བ་དཀར་ཞིང་དམར་རམ་གནག །ཅེས་བྱ་བ་ལ། སྡིག་པ་ཆེ་བ་ནི་སེར་སྐྱ་

เล่ม ๒๐๒ · หน้า 267b

ལ་སོགས་པའི་མཚན་ཉིད་ཅན་ཡིན་ནོ། །དེས་ཟིན་ལྕེ་ནི་སྐྲངས་པ་དང་། །ལུས་རེངས་རིམས་ཀྱིས་ཉེན་པ་དང་། །བུ་ག་ལས་ནི་ཁྲག་རྣག་སློན། །དབང་པོའི་དོན་ནི་མི་ཤེས་ཤིང་། །རྡུལ་ཞིང་བརྒྱལ་ལ་ཁ་སྐོམ་དང་། །རྨོངས་ཞིང་ནད་ཀྱིས་ཉེན་པ་དང་། །ཤ་ནི་ཞིག་པར་བྱེད་པ་སྟེ། །

ཕལ་ཆེར་སྲོག་ནི་འདོར་བར་བྱེད། །ཅེས་བྱ་བ་ལ། སྡིག་པ་དེས་ཟིན་པའི་མཚན་མ་ནི་ལྕེ་སྐྲངས་པ་ལ་སོགས་པ་དང་། དེ་བཞིན་དུ་དབང་པོའི་དོན་གྱི་ཡུལ་མི་ཤེས་ཤིང་རྟོགས་པར་མི་འགྱུར་པ་དང་། ཤ་ཞིག་པའི་བར་ཡིན་ཏེ། དེ་ལྟ་བུའི་ནད་ཀྱིས་ཟིན་པའི་མི་ནི་ཕལ་ཆེར་སྲོག་དང་

བྲལ་བར་གྱུར་རོ། །མཆུ་སྦོམ་པས་ནི་ཁ་ཡིས་ནི། །འདེབས་ཤིང་གསོར་རུང་སྡིག་པ་ལས། །ལྷག་པར་ན་བྱེད་ལུས་རེངས་ཤིང་། །མཚན་གྱི་སྦུབས་ནི་ལྡང་བ་དང་། །ལུས་ནི་རྔུལ་བར་བྱེད་འགྱུར་ཞིང་། །སོས་འདེབས་ཆུ་གྲང་སྙམ་དུ་སེམས། །ཞེས་བྱ་བ་ལ། མཆུ་སྦོམ་པ་

ཞེས་བྱ་བའི་འབུ་ནི་མཆུས་འདེབས་པར་བྱེད་ལ། །དེ་ཡང་གསོར་རུང་བའི་སྡིག་པའི་ནད་ལས་ལྷག་པར་ན་བར་བྱེད་པ་དང་ལུས་རེངས་པ་ལ་སོགས་པར་བྱེད་པ་ཡིན་ནོ། །དེ་ཉིད་རྔ་མོའི་དུད་ཀ་དང་། །མཚན་མོ་རྒྱུ་བས་མཚན་མོ་ཅན། །ཞེས་བྱ་བ་ལ། དེ་ཉིད་ནི་རྔ་མོའི་དུད་ཀ་དང་། མཚན་

མོ་རྒྱུ་བ་དང་མཚན་མོ་ཅན་ཞེས་སློབ་དཔོན་གྱིས་མིང་དུ་བཏགས་པ་ཡིན་ནོ། །སྲིན་བུ་རླུང་མཁྲིས་ཤས་ཆེ་ཞིང་། །རྔ་མོ་བྱི་བ་བད་ཀན་ཅན། །རྔ་མོའི་དུད་པ་ཞེས་བྱ་བ། །ཕལ་ཆེར་རླུང་ཤས་ཆེ་བ་ཡིན། །ཞེས་བྱ་བ་ལ། འབུ་སྲིན་བུ་ཞེས་བྱ་བ་ནི་ཕལ་ཆེར་རླུང་དང་མཁྲིས་པའི་ཤས་ཆེ་བ་ཡིན་ལ། །

རྔ་མོ་དང་བྱི་བ་ཞེས་བྱ་བ་ནི་ཕལ་ཆེར་བད་ཀན་གྱི་ཤས་ཆེ་བ་ཡིན་ལ། རྔ་མོའི་དུད་པ་ཞེས་བྱ་བ་ནི་ཕལ་ཆེར་རླུང་གི་ཤས་ཆེ་བ་ཡིན་ནོ། །ནད་ནི་གང་དང་གང་གི་ནི། །མཚན་མ་ཤས་ཆེ་བ་ལས་བརྟག །དེ་དང་དེ་ལས་གསོ་བའི་སྨན། །ཡོན་ཏན་མི་མཐུན་པ་ཡིས་གསོ། །ཞེས་བྱ་བ་ལ། །

རླུང་ལ་སོགས་པའི་ནད་གང་དང་གང་གི་ཤས་ཆེ་བ་ཤེས་པར་བྱས་ལ། ནད་དེ་དང་དེའི་ཡོན་ཏན་དང་མི་མཐུན་པའི་སྨན་གྱིས་གསོ་བར་བྱའོ། །སྙིང་གཟེར་སྟོད་རླུང་གིས་རེངས་ཤིང་། །རྩ་མི་སྣང་ཞིང་རུས་ཚིགས་ན། །མགོ་འཁོར་ལུས་བཅིངས་སྙམ་དུ་སེམས། །མདོག་གནག་རླུང་ལས་གྱུར། །

เล่ม ๒๐๒ · หน้า 268a

པའི་དུག །ཅེས་བྱ་བ་ལ། རླུང་གི་ཤས་ཆེ་བའི་དུག་ནི་སྙིང་གཟེར་བ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །དྲན་ཉམས་དབུགས་ནི་ཚ་བར་བྱེད། །སྙིང་ཚ་ཁ་ནི་ཁ་བྲོ་ལ། །ཤ་འགས་སྐྲང་པར་བྱེད་པ་དང་། །ཁྲག་སེར་བ་ནི་མཁྲིས་པ་ཅན། །ཞེས་བྱ་བ་ལ། མཁྲིས་

པ་ཅན་གྱི་དུག་གིས་ཟིན་པའི་མཚན་མ་ནི་དྲན་པ་ཉམས་པ་དང་། དབུགས་ཚ་བ་ལ་སོགས་པ་ཡིན་ནོ། །སློན་ཞིང་སྙིང་ན་ཡི་ག་འཆུས། །ཁ་ཆུ་འཛག་ཅིང་ཆམ་པས་འདེབས། །གྲང་བཅས་ཁ་ནི་མངར་བར་བྲོ། །བད་ཀན་ཤས་ཆེའི་དུག་ནད་ཡིན། །ཞེས་བྱ་བ་ལ། བད་ཀན་གྱི་བདག་

ཉིད་ཅན་གྱི་དུག་གིས་ཟིན་པ་ནི་སློན་པ་ལ་སོགས་པའི་མཚན་ཉིད་དང་ལྡན་པ་ཡིན་ནོ། །འབའ་ཆས་རྨ་ནི་བསྐུ་བ་དང་། །རླུང་སེལ་ཏིལ་མར་གྱིས་བསྐུ་དང་། །སྦུ་གུ་མ་སྨིན་འབྲུ་དུགས་དང་། །བརྟ་བར་བྱ་བའི་ཆོ་གས་ཕན། །ཞེས་བྱ་བ་ལ། དེ་དག་གི་གསོ་བ་ནི་རླུང་གི་བདག་ཉིད་ཅན་གྱི་

དུག་ལ་ནི་ཏིལ་ལ་སོགས་པའི་འབའ་ཆས་བསྐུ་བ་དང་། ཏིལ་མར་གྱིས་བསྐུ་བ་ལ་སོགས་པ་བྱས་ན་ཕན་ནོ། །མཁྲིས་པ་ཅན་ལ་སྨན་ཆུ་བླུགས། །ཤིན་ཏུ་གྲང་བའི་ལྡེ་གུས་བསྐུ། །ཞེས་བྱ་བ་ལ། མཁྲིས་པ་ཅན་གྱི་དུག་ལ་ནི་ཤིན་ཏུ་བསིལ་བའི་སྨན་གྱི་ཆུ་བླུགས་པ་དང་ལྡི་གུས་བསྐུ་

པར་ཕན་ནོ། །བད་ཀན་ཅན་ལ་བཞར་ཞིང་བཅད། །དུགས་དང་སྐྱུག་སྨན་བཏང་བས་གསོ། །ཞེས་བྱ་བ་ལ། བད་ཀན་ཅན་གྱི་དུགས་ནི་བཞར་བ་ལ་སོགས་པར་བསལ་བར་བྱའོ། །སྲིན་བུ་རྣམ་པ་གསུམ་པོ་ལ། །གསོ་བ་རྣམ་པ་གསུམ་པོས་ཕན། །ཞེས་བྱ་བ་ལ། འབུའི་

རིགས་གསུམ་པོ་ལ་ནི་གསོ་བ་རྣམ་པ་གསུམ་པོ་བྱས་ན་ཕན་ནོ། །དུགས་དང་བསྐུ་དང་སྨན་ཆུ་བླུགས། །ཕལ་ཆེར་དྲོ་འཇམ་གཏང་བར་བྱ། །གཞན་དུ་བརྒྱལ་དང་མཆེ་བ་ཡི། །རྣགས་དང་འདྲུལ་བར་བྱེད་མ་གཏོགས། །ཞེས་བྱ་བ་ལ། འབུའི་དུག་ཕལ་ཆེར་ལ་དུགས་ལ་སོགས་བ་དྲོ་

འཇམ་ཙམ་བྱ་བ་སྟེ། གཞན་དུ་ན་བརྒྱལ་བ་ལ་སོགས་པ་ལ་ནི་དེ་དག་བྱར་མི་རུང་ངོ་། །མི་སྐྲ་ཡུངས་ཀར་སེར་པོ་དང་། །བུ་རམ་རྙིང་པའི་དུད་པས་བདུག །དུག་དང་མཆེ་བའི་དུག་ཀུན་ལ། །མཆོག་ཏུ་ཕན་པར་འདྲོབ་སྐྱོང་འཆད། །ཅེས་བྱ་བ་ལ། དུག་གིས་ཟིན་པ་ཐམས་ཅད་ལ་མིའི་སྐྲ་ལ་

เล่ม ๒๐๒ · หน้า 268b

སོགས་པའི་དུད་པས་བདུག་པ་ཕན་པར་དྲང་སྲོང་འདྲོབ་སྐྱོང་གིས་བཤད་དོ། །དུག་སེལ་སྨན་ནི་ཐམས་ཅད་དང་། །སྦྱང་བའི་ལས་ཀྱང་བྱ་བ་ཡིན། །ཞེས་བྱ་བ་ལ། མཆེ་བ་དུག་ཅན་གྱིས་ཟིན་པ་ཐམས་ཅད་ལ་སྦྱོར་བ་འདི་དག་བྱས་ན་ཡང་ཕན་ནོ། །སྲིན་བུ་སྡིག་པ་མི་བཟད་དུག །འབུས་

ཟིན་སྦྲུལ་གྱིས་ཟིན་ལྟར་གསོ། །ཞེས་བྱ་བ་ལ། སྲིན་བུ་རྣམས་ཀྱི་དུག་ལ་ནི་སྦྲུལ་གྱི་དུག་ལྟར་གསོས་ན་ཡང་ཕན་ནོ། །ཏན་དུ་ལི་ཡ་ཆ་མཉམ་པའི། །དུར་བྱིད་དང་ནི་ཞུན་མང་བླུད། །འབུ་ཡི་དུག་གིས་གངས་ཅན་ལྟར། །བསྐྱོད་པར་ནུས་པ་མ་ཡིན་ནོ། །ཞེས་བྱ་བ་ལ། སྐྱེས་བུས་

ཏན་དུ་ལི་ཡ་ལ་སོགས་པའི་སྨན་འཐུངས་ན་ཡང་སྲིན་བུའི་དུག་གིས་གངས་ཅན་བསྐྱོད་པར་མི་ནུས་པ་དང་འདྲ་བར་བསྐྱོད་མི་ནུས་བར་བྱེད་དོ། །འོ་མ་ཅན་ཤུན་ལྡེ་གུས་བསྐུ། །སྦྱངས་བྱས་སྲིན་བུའི་དུག་སེལ་བྱེད། །ཅེས་བྱ་བ་ལ། མི་སྦྱངས་པ་བྱས་ནས་འོ་མ་ཅན་གྱི་ཤིང་གི་ཤུན་པའི་

ལྡེ་གུས་བསྐུས་ན་ཡང་སྲིན་བུའི་དུག་སེལ་བར་བྱེད་དོ། །མུ་ཏིག་ལྡེ་གུས་བསྐུས་ན་ཡང་། །སྐྲང་དང་དུག་དང་ཚ་བ་སེལ། །ཞེས་བྱ་བ་ལ། མུ་ཏིག་བཏབ་པའི་ལྡེ་གུས་བསྐུས་ན་ཡང་སྐྲང་བ་དང་། ཟུག་པ་ལ་སོགས་པ་སེལ་བར་བྱེད་པའི་མཆོག་ཡིན་ནོ། །ཤུ་དག་ཤིང་ཀུན་བྱི་དང་ཀ །

རྒྱམ་ཚ་ཧ་ཏི་པི་པི་ལིང་། །པ་ཐ་བོང་ང་ཚ་བ་གསུམ། །འདྲོ་བ་སྐྱོང་གིས་ནི་བཤད་པ་ཡིན། །ཡན་ལག་བཅུ་པའི་དུག་སྨན་ནི། །འདྲོ་བ་སྐྱོང་གིས་ནི་བཤད་པ་དག །བླུད་ན་སྲིན་བུའི་དུག་ཀྱང་སེལ། །ཞེས་བྱ་བ་ལ། ཤུ་དག་ལ་སོགས་པའི་དུག་སྨན་ཡན་ལག་བཅུ་པ་ནི་འདྲོ་བ་སྐྱོང་

གིས་བཤད་པ་ཡིན་ཏེ། དེས་ཀྱང་སྲིན་བུའི་དུག་ཐམས་ཅད་སེལ་བར་བྱེད་དོ། །སྡིག་པའི་དུག་གིས་འཕྲལ་ཟིན་ལ། །འཁོར་ལོས་བཙིར་བའི་ཏིལ་མར་བསྐུ། །ས་ལ་པརྞི་བསྐོལ་བ་ཡི། །དྲོ་འཇམ་ཡང་ན་གཞན་དག་བླུགས། །ཞེས་བྱ་བ་ལ། །སྡིག་པའི་མཆེ་བའི་དུག་གིས་ཟིན་བ་ལ། །

འཁོར་ལོས་བཙིར་བའི་ཏིལ་མར་སར་པ་དང་། ས་ལ་པར་ཎི་དྲོ་འཇམ་ཙམ་མམ། ཡང་ན་ཏིལ་གཞན་དག་ལས་བྱུང་བའི་ཏིལ་མར་བླུགས་པར་བྱའོ། །རྒྱམ་ཚ་དང་ནི་བཅས་པ་ཡི། །ཞུན་མར་ཡང་དང་ཡང་དུ་བླུགས། །ཞེས་བྱ་བ་ལ། །ཡང་ན་མར་དང་རྒྱམ་ཚ་སྦྱར་བ་བླུགས་པར་བྱའོ། །ཡང་

เล่ม ๒๐๒ · หน้า 269a

ན་སྐྱུར་རྩབས་དྲོ་འཇམ་མམ། །རྒྱམ་ཚ་འོ་མར་བཅས་པ་བླུགས། །ཞེས་བྱ་བ་ལ། གཞན་དུ་ན་སྦྱོར་བ་འདི་ཉིད་བྱས་ན་ཡང་ཕན་ནོ། །མར་དང་བརྔོས་པའི་གོ་སྙོད་དང་། །རྒྱམ་ཚར་བཅས་པས་དཀྲི་བར་བྱ། །ཞེས་བྱ་བ་ལ། ཡང་གོ་སྙོད་དང་རྒྱམ་ཚོའི་ལྡེ་གུ་མར་

དང་བརྔོས་པས་དཀྲིས་ན་ཕན་ནོ། །མཆེ་བས་ཟིན་པ་དུགས་བྱས་ལ། །ཞལ་ཞལ་བཏབ་སྟེ་འབྲས་བུ་གསུམ། །སེར་པོ་གཉིས་དང་ཚ་བ་གསུམ། ཤིར་ཤའི་མེ་ཏོག་བསྐུ་བར་བྱ། །ཞེས་བྱ་བ་ལ། མཆེ་བས་ཟིན་པ་ལ་ནི་དང་པོར་དུགས་བྱས་ལ། གཙགས་བུས་ཞལ་ཞལ་བྱས་ཏེ་

འབྲས་བུ་གསུམ་པོ་ལ་སོགས་པའི་ཕྱེ་མས་བཏབ་པའམ། ལྡེ་གུས་བསྐུ་བར་བྱའོ། །རྒྱམ་ཚ་ཁ་ལུང་བ་གཅིན་སྐྱུར། །བྱེའུ་རུག་པའི་རྩེ་མོ་བཏགས། །འབའ་ཆའམ་ལྕི་བ་དྲོ་འཇོམ་ཙམ། །བསྐུས་ན་འང་ཕན་པར་འགྱུར་བ་ཡིན། །ཞེས་བྱ་བ་ལ། ཡང་ན་རྒྱམ་ཚ་ལ་སོགས་པའི་

ལྡེ་གུ་འམ་འབའ་ཆའམ། བའི་ལྕི་བ་དྲོ་འཇམ་ཙམ་བསྐུས་ན་ཡང་ཕན་ནོ། །བཏུང་བ་ཞུན་མར་སྦྲང་རྩིར་བཅས། །ཡང་ན་འོ་མར་ཁ་ར་བཏབ། །ཅེས་བྱ་བ་ལ། ཡང་ན་ཞུན་མར་ལ་སོགས་པའི་བཏུང་བ་བྱིན་ན་ཡང་ཕན་ནོ། །ཕུག་རོན་རྟུག་པ་ཨ་རུ་ར། །རྒྱ་སྔོས་བཅའ་སྒ་ཁ་ལུང་གི །

ཁུ་བ་དང་སྦྱར་བླུད་པ་ནི། །སྡིག་པས་ཟིན་པའི་སྨན་མཆོག་ཡིན། །ཞེས་བྱ་བ་ལ། ཡང་ཕུག་རོན་གྱི་རྟུག་པ་ལ་སོགས་པ་ཡང་མཆོག་ཏུ་ཕན་པ་ཡིན་ནོ། །རྔ་མོའི་སོ་ནི་ཆུ་བལ་བཅས། །སྡིག་པའི་དུག་ནི་འཇོམས་པར་བྱེད། །ཅེས་བྱ་བ་ལ། ཡང་ན་རྔ་མོའི་སོ་ལ་སོགས་པ་ཡང་ཕན་ནོ། །ཤིང་

ཀུན་བ་ལ་ཁ་ལུང་གི །ཁུ་བ་དང་སྦྱར་ལྡེ་གུ་དང་། །མིག་སྨན་རི་ལུར་བྱས་ན་ནི། །སྡིག་པའི་དུག་ནི་སེལ་མཆོག་ཡིན། །ཞེས་བྱ་བ་ལ། ཡང་ན་ཤིང་ཀུན་ལ་སོགས་པའི་སྨན་གྱི་སྦྱོར་བས་ཕན་ནོ། །ཀ་རཉྫ་དང་ཨརྫུ་ན། །གི་རི་ཀརྞི་སེ་ལུ་དང་། །ཤིར་ཤའི་མེ་ཏོག་དུག་མོ་ཡུངས། །ཞོག་

ཆུ་དང་བཏགས་བསྐུས་ན། །སྡིག་པའི་དུག་ནི་སེལ་བར་བྱེད། །ཅེས་བྱ་བ་ལ། ཡང་ན་ཀར་ཉྫ་ལ་སོགས་པའི་སྦྱོར་བ་ཡང་ཕན་ནོ། །གང་ཞིག་རྨུགས་ཤིང་རྔམ་པ་འཐོན། །བླ་ཞིང་མི་བཟད་ན་གྱུར་པ། །དེ་ལ་ཡུང་དང་ཨ་རུ་ར། །བཙོད་དང་བོང་ང་པི་པི་ལིང་། །བིལ་བ་གཞོན་ནུ་ན་ལ་ཤམ། །

เล่ม ๒๐๒ · หน้า 269b

ཏ་ཀ་ཡི་ཁུ་བར་བཏགས། །ལྡེ་གུས་བྱུགས་ན་ཕན་པ་ཡིན། །ཞེས་བྱ་བ་ལ། མི་གང་སེམས་རྨུགས་པ་དང་། རྔམ་པ་འཐོན་པ་དང་། བླ་ཞིང་འབྲེལ་བ་དང་། འབྲེལ་པའི་ཚིག་མང་དུ་སྨྲ་བ་དང་། བརྣག་པར་དཀའ་བ་ན་བར་གྱུར་པ་གང་ཡིན་པ་དེ་ལ་ཡུང་བ་ལ་སོགས་པའི་ལྡེ་གུས་

བསྐུ་བར་བྱའོ། །སྦྲང་མ་གདུག་པའི་དུག་ཀུན་ལ། །ཞོ་དང་མར་ནི་བླུད་བྱ་ཞིང་། །གཏར་ག་གདབ་ཅིང་སྣ་སྨན་དང་། །མིག་སྨན་གྱི་ནི་ཆོ་ག་བྱ། །དྲོ་ཞིང་སྣུམ་དང་སྐྱུར་བ་དང་། །རླུང་འཇོམས་ཁ་ཟས་སྦྱིན་པར་བྱ། །ཞེས་བྱ་བ་ལ། སྦྲང་མ་གདུག་པའི་དུག་གིས་ཟིན་པ་ལ་ནི་ཞོ་དང་

མར་བླུད་པ་ལ་སོགས་པའི་སྦྱོར་བ་དང་། ཁ་ཟས་དྲོ་བ་ལ་སོགས་པ་རླུང་སེལ་བ་སྦྱིན་པར་བྱའོ། །དོང་གྲ་བྱི་བའི་རྟུག་པ་དང་། །ཁ་ལུང་ཁུ་བ་བ་བླ་དང་། །རྒྱམ་ཚ་པུ་ཤེལ་ཙེ་སྦྱར་བའི། །ལྡེ་གུས་སྦྲང་མའི་དུག་མྱུར་འཇོམས། །ཞེས་བྱ་བ་ལ། དོང་གྲལ་སོགས་པའི་ལྡེ་གུས་བསྐུས་

ན་སྦྲང་མ་གདུག་པའི་རིགས་ཐམས་ཅད་ཀྱི་དུག་འཇོམས་པར་བྱེད་དོ། །སྡིག་པས་ཟིན་པའི་ཐ་མར་ནི། །དུག་གི་ཤས་ཆེར་ལངས་གྱུར་པ། །ཟིན་པའི་རྨ་ལ་དུག་གིས་བསྐུ། །ཨུ་ཙྪཊི་ཀའི་གསོ་བའང་འདི། །ཞེས་བྱ་བ་ལ། སྡིག་པས་ཟིན་པའི་མི་ལ་གསོ་བ་ཐམས་ཅད་བྱས་པའི་ཐ་མར་

དུག་མི་བཟད་པ་ལངས་པར་གྱུར་ན་རྨ་དེ་ལ་དུག་གིས་བསྐུ་བར་བྱའོ། །ཨུ་ཙྪེ་ཊ་ིཾཀ་ཞེས་བྱ་བའི་འབུས་ཟིན་པ་ཡང་ཆོ་ག་འདི་ཉིད་བྱའོ། །གླང་པོ་ཆེ་ཡི་རྟུག་པའི་སྟེང་། །རོ་ཧེ་ཤའི་རྩ་སེ་འུའི་ཆུ། །ལྡེ་གུར་བྱས་བཏགས་བསྐུས་ན་ནི། །འདི་ནི་སྦྲང་མའི་དུག་འཇོམས་མཆོག །ཅེས་བྱ་བ་

ལ། གླང་པོ་ཆེའི་རྟུག་པའི་སྟེང་དུ། རོ་ཧི་ཤའི་རྩ་བ་དང་། སེའུའི་ཆུ་ལྡེ་གུར་བྱས་ལ་བསྐུས་ན་སྦྲང་མའི་དུག་ཐམས་ཅད་འཇོམས་པའི་མཆོག་ཡིན་ནོ། །ཤིར་ཤའི་ས་བོན་ཨ་རྒ་ཡི། །འོ་མས་ལན་གསུམ་བསྒོས་པ་ནི། །པི་པི་ལིང་གི་ཕྱེ་མར་བསྲེས། །དུག་སྨན་འདིས་ནི་སྲིན་བུའི་

དུག། །སྦྲུལ་དང་ལུ་ཏ་བྱི་བ་ཡི། །དུག་ནི་སེལ་བར་བྱེད་པ་ཡིན། །ཞེས་བྱ་བ་ལ། ཤིར་ཤའི་ས་བོན་པི་པི་ལིང་གི་ཕྱེ་མ་དང་བསྲེས་ལ། ཨརྒའི་འོ་མས་ལན་གསུམ་བསྒོས་ཏེ་སྦྱར་བའི་སྨན་འདིས་ནི་སྲིན་བུའི་དུག་ཐམས་ཅད་སེལ་བར་བྱེད་དོ། །ཤིར་ཤ་ཀ་རཉྫ་ཡི་ས་བོན་དང་། །གུར་གུམ་

เล่ม ๒๐๒ · หน้า 270a

རུ་རྟ་ལྡོང་རོས་བཅས་པ་ཡི། །དུག་སྨན་འདིས་ནི་མཚན་རྒྱུའི་སྡིག་པས་ཟིན། །སེལ་བར་བྱེད་པ་ཡིན་པར་རྒྱལ་བས་གསུངས། །ཞེས་བྱ་བ་ལ། ཤིར་ཤའི་ས་བོན་ལ་སོགས་པ་སྦྱར་བའི་དུག་སྨན་འདིས་ནི་མཚན་མོ་རྒྱུ་བའི་སྡིག་པས་ཟིན་པ་སེལ་བར་བྱེད་པའི་དམ་པ་ཡིན་པར་

རྒྱལ་བ་སྟེ། སངས་རྒྱས་བཅོམ་ལྡན་འདས་ཀྱིས་གསུངས་སོ། །སྲིན་བུ་ལས་ནི་རབ་གདུག་པ། །བ་ནི་བཅུ་དྲུག་ཡིན་པར་བཤད། །གཞན་དག་ཉི་ཤུ་རྩ་བརྒྱད་འདོད། །ཁ་ཅིག་དེ་བས་མང་བར་འདོད། །ཉི་མའི་འོད་ཀྱི་རྗེས་འབྲང་བ། །སྟོང་ཕྲག་ཡོད་ཅེས་གཞན་དག་འཆད། །

ཅེས་བྱ་བ་ལ། །སྲིན་བུ་རྣམས་ལས་རབ་ཏུ་གདུག་ཅིང་གསོ་དཀའ་བ་ནི་སྲོག་ཆགས་བ་ཞེས་བྱ་བ་ཡིན་ལ། དེའི་དབྱེ་བ་ཡང་བཅུ་དྲུག་ཡོད་པར་སློབ་དཔོན་གྱིས་བཤད་དོ། །ཁ་ཅིག་ནི་དེ་ཉི་ཤུ་རྩ་བརྒྱད་ཡོད་པར་འདོད་དོ། །དྲང་སྲོང་གཞན་དག་ནི་དེ་བས་ཀྱང་མང་བར་འདོད་དོ། །

དྲང་སྲོང་ཁ་ཅིག་ནི་ཉི་མའི་འོད་ཀྱི་རྗེས་སུ་འབྲང་ཞིང་སྐྱེ་བ་སྟོང་ཕྲག་དུ་མ་ཡོད་པར་འཆད་དོ། །བླ་བརྣན་གཟུགས་ནི་མར་གྱུར་པ། །དུག་ཅན་པ་ནི་གཅིག་པུར་འདོད། །ཅེས་བྱ་བ་ལ། སྲོག་ཆགས་བ་ནི་བླ་བརྣན་མང་ཞིང་གཟུགས་མང་བའི་དུག་ཅན་ནི་གཅིག་པུ་ཁོ་ནར་འདོད་དོ། །

དེ་ཡི་གཟུགས་དང་མིང་དག་ནི། །ཤིན་ཏུ་འདྲིས་པས་ཤེས་པར་དཀའ། །གནས་ཀྱི་ངེས་པ་ཡོད་མིན་པས། །དེ་ཕྱིར་ནད་ལས་བཤད་པར་བྱ། །ཞེས་བྱ་བ་ལ། བ་དེའི་གཟུགས་ལ་སོགས་པ་ནི་ཤིན་ཏུ་ཤེས་པར་དཀའ་ཞིང་། །གནས་ཀྱི་ངེས་པ་ཡང་ཡོད་པ་མ་ཡིན་པས་དེའི་རང་བཞིན་ནི་ནད་ཀྱི་

ཚུལ་ལས་བཤད་པར་བྱའོ། །ནད་གཞི་སོ་སོའི་གསོ་བ་དཀའ། །འདུས་པ་ལས་གྱུར་གསོར་མི་རུང་། །ཞེས་བྱ་བ་ལ། བདེ་ནི་ནད་གཞི་ཐ་དད་པ་ལས་གྱུར་པ་ནི་གསོ་དཀའ་བ་ཡིན་ལ། འདུག་པ་ལས་གྱུར་བ་ནི་གསོར་མི་རུང་བ་ཡིན་ནོ། །དེས་ཟིན་མཁྲིས་གྱུར་ཚ་བ་དང་། །སྐོམ་དང་ཆུ་བུར་

རིམས་ཀྱིས་འདེབས། །རྨོངས་བག་ར་བ་ཚ་དམར་སེར་མདོག །རྣགས་ཤིང་རྒུན་འབྲུའི་འབྲས་བུ་འདྲ། །ཞེས་བྱ་བ་ལ། བ་དེས་ཟིན་པའི་མཁྲིས་པ་ལས་གྱུར་པའི་མཚན་མ་ནི་ཚ་པ་ལ་སོགས་པ་ཡིན་ནོ། །བད་ཀན་ལས་གྱུར་སྲ་ཞིང་སྐྱེ། །པ་རུ་ཤ་ཀའི་འབྲས་བུ་འདྲ། །གཉིད་ཆེ་གྲང་རིམས་

เล่ม ๒๐๒ · หน้า 270b

ལུད་པ་ལུ། །ཤིན་ཏུ་གཡའ་བར་བྱེད་པ་ཡིན། །ཞེས་བྱ་བ་ལ། བས་ཟིན་པའི་བད་ཀན་ཅན་གྱི་མཚན་ཉིད་ནི་སྲ་ཞིང་མདོག་སྐྱ་བ་ལ་སོགས་པ་ཡིན་ནོ། །རླུང་གྱུར་རྩུབ་ཅིང་གནག་པ་དང་། །ཚིགས་ན་རིམས་ཀྱིས་འདེབས་པར་བྱེད། །ཅེས་བྱ་བ་ལ། དེ་ལ་རླུང་ལས་གྱུར་པ་ནི། །རེག་

ན་རྩུབ་ཅིང་ཁ་དོག་གནག་པ་ལ་སོགས་པ་ཡིན་ནོ། །དེ་ཡིད་བྱེ་བ་ནད་ཀྱི་ནི། །རང་གི་མཚན་ཉིད་ལས་ཤེས་བྱ། །ཞེས་བྱ་བ་ལ། བ་དེའི་དབྱེ་བ་ནི་དེ་ལྟར་ནད་ཀྱི་རང་གི་མཚན་ཉིད་ལས་ཤེས་པར་བྱའོ། །གསོར་མི་རུང་བ་སྙིང་ཚ་ཞིང་། །ལུད་པ་སྐྱིགས་བུ་མགོ་ནད་དང་། །འབྲུམ་ཕྲན་

དཀར་དང་སེར་དང་གནག །དམར་དང་སྐྱ་བ་ལས་འབྱུང་འགྱུར། །འདར་ཞིང་སྐྲངས་ལ་ཚ་བ་དང་། །སྐོམ་དད་ལང་ཞིང་སྣ་འཆུས་ལ། །མཆུ་གནག་སོ་ནི་གཡོ་བ་དང་། །རྒྱབ་དང་མིད་པ་བཅོམ་སྙམ་སེམས། །འཛོམ་བུའི་འབྲས་བུ་སྨིན་འདྲ་བའི། །ཁྲག་ནི་མཆུས་བལྡགས་རྨ་

ལས་འཛག །ཅེས་བྱ་བ་ལ། བས་བལྡགས་པ་གསོ་བར་མི་རུང་བ་ནི། སྙིང་ཚ་བ་ལ་སོགས་པ་དང་། འབྲུམ་ཕྲན་མདོག་དཀར་བ་ལ་སོགས་པ་འབྱུང་བར་འགྱུར་བ་དང་། འདར་བ་ལ་སོགས་པའི་མཚན་ཉིད་ཅན་ནས་མཆུས་བལྡགས་པ་ལས་འཛམ་བུ་སྨིན་པའི་འབྲས་བུ་འདྲ་བའི་

ཁྲག་འཛག་པར་འགྱུར་བའི་བར་ཡིན་ནོ། །འདུས་གྱུར་མཚན་ཉིད་ཀུན་ལྡན་ཞིང་། །མིང་ནི་མང་པོར་གྱུར་པ་ཡིན། །ཞེས་བྱ་བ་ལ། བ་ཐམས་ཅད་ཀྱང་འདུས་པ་ལས་གྱུར་པ་ཡིན་ཞིང་། ནད་སྐྱེད་པར་བྱེད་པ་ཡིན་ལ། དེའི་མིང་ཡང་དུ་མར་གྱུར་པ་ཡིན་ནོ། །དེའི་དུག་རྣོན་པོ་བར་མ་དང་། །

དམན་པའི་དབྱེ་བས་གསུམ་དུ་འགྱུར། །ཞེས་བྱ་བ་ལ། བ་དེ་ནི་དུག་རྣོན་པོ་ལ་སོགས་པའི་དབྱེ་བས་རྣམ་པ་གསུམ་དུ་འགྱུར་རོ། །མ་བཅོས་ཞག་བདུན་ཞག་བཅུ་དང་། །ཟླ་བ་ཕྱེད་ཀྱི་རིམས་ཀྱིས་གསོད། །ཅེས་བྱ་བ་ལ། བ་དེའི་དུག་ནི་མ་བཅོས་ཤིང་གསོ་བ་མ་བྱས་ན་དུག་རྣོན་

པོས་ནི་ཞག་བདུན་ནས་གསོད་དོ། །དུག་བར་མས་ནི་ཞག་བཅུ་ནས་གསོད་དོ། །དུག་དམན་པས་ནི་ཟླ་བ་ཕྱེད་ཀྱིས་གསོད་དོ། །བ་དང་མཆུ་རིངས་ཐམས་ཅད་ཀྱང་། །གླང་ཤུ་ཀོར་ཀོར་པོར་བྱེད་ཅིང་། །དཀར་དང་གནག་དང་དམར་དང་སེར། །གནག་པའམ་འཇམ་ཞིང་མཐོ་བ་

เล่ม ๒๐๒ · หน้า 271a

དང་། །དབུས་སུ་གནག་པའམ་སྔོ་བ་ལ། །མཐའ་མ་དྲ་བ་ལྟ་བུས་ཁེབས། །མཆེད་ཅིང་སྐྲང་བར་བྱེད་པ་དང་། །ཚ་ཞིང་མང་དུ་ན་བ་དང་། །རིམས་འདེབས་མྱུར་དུ་རྣགས་ཤིང་འདྲུལ། །རུལ་ཞིང་གས་པར་བྱེད་པ་དང་། །རྣག་གིས་གང་དུ་རེག་གྱུར་བའི། །

ཕྱོགས་དེར་ཡང་ནི་རྨ་སྐྱེད་བྱེད། །ཅེས་བྱ་བ་ལ། བ་དང་སྦྲང་བུ་མཆུ་རིང་ལ་སོགས་པ་ཐམས་ཅད་ཀྱང་གླང་ཤུ་ཟླུམ་པོ་ཀོར་ཀོར་པོ་དང་འདྲ་བ་སྐྱེད་པར་བྱེད་ཅིང་། མདོག་ནི་དཀར་པོ་ལ་སོགས་པ་གང་ཡང་རུང་བར་གྱུར་ལ། དེ་བཞིན་དུ་འཇམ་པ་ལ་སོགས་པའི་མཚན་ཉིད་དང་

ལྡན་པ་དང་། ཤུ་བ་མཆེད་པ་ལ་སོགས་པ་དང་། རིམས་ལ་སོགས་པ་སྐྱེད་པར་བྱེད་པ་ཡིན་ནོ། །དབུགས་དང་མཆེ་བ་བཤང་གཅི་དང་། །ཁུ་ཆུ་ཁ་ཆུ་སེན་མོ་ཁྲག །བརྒྱད་པོ་གནོད་བྱེད་ཁྱད་པར་དུ། །དུག་ནི་ཁ་ལ་གནས་པ་ཡིན། །ཞེས་བྱ་བ་ལ། བ་ལ་སོགས་པའི་སྲིན་

བུ་གདུག་པ་འདི་དག་ནི། དབུགས་ལ་སོགས་པ་བརྒྱད་ལ་དུག་ཡོང་པས་གནོད་པར་བྱེད་ལ། ཁྱད་པར་དུ་ནི་དུག་དེ་ཁ་ལ་གནས་པ་ཡིན་ནོ། །བ་ནི་ལྟེ་བ་ཡན་ཆད་འཛིན། །སྲིན་བུ་སྟོད་སྨད་ཀུན་ཏུ་གནོད། །ཅེས་བྱ་བ་ལ། བ་ནི་ལྟེ་བ་ཡན་ཆད་དུ་གནོད་ཅིང་དུག་འདེབས་པར་བྱེད་

ལ། སྲིན་བུ་ནི་ལུས་ཀྱི་སྟོད་སྨད་ཀུན་ཏུ་གནོད་པར་བྱེད་དོ། །དེས་གནོད་བྱས་པའི་གོས་ལ་སོགས། །ལུས་ལ་རེག་ན་ནད་སྐྱེད་བྱེད། །ཅེས་བྱ་བ་ལ། བ་དང་སྲིན་བུ་གདུག་པ་དེས་གནོད་ཅིང་གོས་པར་བྱས་པའི་གོས་ལ་སོགས་པས་ལུས་ལ་རེག་ན་ཡང་དུག་གི་ནད་སྐྱེད་པར་བྱེད་

ངོ་། །བ་དང་སྲིན་བུ་ལས་གྱུར་དུག །ཉིན་ཕྱེད་བར་དུ་ཚོར་མི་འགྱུར། །ཞེས་བྱ་བ་ལ། བ་དང་སྦྲང་བུ་གདུག་པ་ལ་སོགས་པས་ཟིན་པའི་དུག་ནི་ཉི་མ་ཕྱེད་ཀྱི་བར་དུ་ཚོར་བར་མི་འགྱུར་རོ། །དེ་ནས་དང་པོའི་ཉིན་ཞག་ལ། །ཁབ་ཀྱིས་གཙགས་པ་སྙམ་དུ་སེམས། །མདོག་མི་གསལ་

ཞིང་གསོ་བ་དང་། །ཅུང་ཟད་གཡའ་ཞིང་ནད་དང་ལྡན། །ཞེས་བྱ་བ་ལ། དེའི་འོག་ཏུ་སྲིན་བུས་ཟིན་པ་དེ་དང་པོའི་ཉིན་ཞག་ལ་ཁབ་ཀྱིས་གཙགས་པ་སྙམ་དུ་སེམས་པ་ལ་སོགས་པར་འགྱུར་རོ། །གཉིས་པར་མཐའ་མ་ཤིན་ཏུ་མཐོ། །འབྲུམ་བུ་ཕྲ་མོས་ཁྱབ་པ་འདྲ། །མདོག་

เล่ม ๒๐๒ · หน้า 271b

གསལ་གྱུར་ནས་དབུས་དམའ་ཞིང་། །གཡའ་ཞིང་རྨེན་བུ་ལྟ་བུར་སྣང་། །ཞེས་བྱ་བ་ལ། སྦྲང་བུ་གདུག་པས་ཟིན་ནས་ཞག་གཉིས་པའི་མཐའ་ནི་ཤིན་ཏུ་མཐོ་བ་ལ་སོགས་པར་འགྱུར་རོ། །གསུམ་པར་རིམས་བཅས་སྦུ་ལྡང་ཞིང་། །འཁོར་ལིང་དམར་པོར་སྣང་བ་དང་། །ཁམ་

ཕོར་གཟུགས་འདྲ་ཕལ་ཆེར་ནི། །བ་སྤུའི་བུ་ག་འཛག་པར་འགྱུར། །ཞེས་བྱ་བ་ལ། ཞག་གསུམ་པར་ནི་རིམས་དང་བཅས་པ་ལ་སོགས་པར་འགྱུར་ཞིང་། བ་སྤུའི་བུ་ག་ནས་ཆུ་སེར་ལ་སོགས་པ་འཛག་པར་འགྱུར་རོ། །ཉིན་ཞག་བཞི་པར་རབ་སྐྲང་ཞིང་། །མགོ་འཁོར་ལུས་ཚ་

དབུགས་མི་བདེ། །ཞེས་བྱ་བ་ལ། དེའི་ཉིན་ཞག་བཞི་པ་ལ་ནི་དེ་ལས་གྱུར་པའི་ནད་སྐྲང་བ་ལ་སོགས་པར་འགྱུར་རོ། །ལྔ་པར་དུག་ལྡང་ལས་གྱུར་པའི། །ནད་ནི་དེ་དང་དེ་དག་སྐྱེད། །དྲུག་པར་གནད་དུ་ཁྱབ་པར་བྱེད། །བདུན་པར་སྲོག་ནི་འཇོམས་པར་བྱེད། །ཅེས་བྱ་བ་ལ། གདུག་པའི་

དུག་དེས་དྲུག་པ་ལ་ནི་གནད་རྣམས་ལ་ཁྱབ་བར་བྱེད་ལ། ཞལ་བདུན་པ་ལ་ནི་གསོད་པར་བྱེད་དོ། །དེ་ལྟར་དུག་ནི་རྣོན་པོ་དང་། །བར་མ་དམན་བ་དབྱེ་བར་བྱ། །ཞེས་བྱ་བ་ལ། ཚུལ་དེ་ལྟར་ན་རྣོན་པོ་ལ་སོགས་པའི་དུག་གི་དབྱེ་བ་སྟན་པ་ཡིན་ནོ། །དེ་ནས་ཉིན་ཞག་ཉི་ཤུ་ནི། །གཅིག་ན་

ཡོང་ཡེ་ཞི་བར་འགྱུར། །ཞེས་བྱ་བ་ལ། དེ་ནས་ཉིན་ཞག་ཉི་ཤུ་རྩ་གཅིག་འདས་ནས་ནི་རྣམ་པ་ཐམས་ཅད་དུ་ཞི་བར་འགྱུར་རོ། །དེ་ནས་བ་ཡིས་ཟིན་པ་ནི། །མཚོན་གྱིས་རྨ་ནི་གནོད་པར་བྱ། །འཛམ་བུའི་མཆུ་ལ་སོགས་པས་བསྲེག །མཁྲིས་པ་ལས་གྱུར་བསྲེག་མི་བྱ། །ཞེས་བྱ་བ་ལ། །

དེའི་འོག་ཏུ་བས་བལྡགས་པའི་རྨ་མཚོན་གྱིས་བཅད་དེ་གནོད་པ་དང་།

ཚིགས་ལ་སོགས་པ་ནས། །ཟིན་ནས་ཀུན་ཏུ་ཁྱབ་གྱུར་པ། །གཅད་པར་མི་བྱ་བསྲེག་མི་བྱ། །ཞེས་བྱ་བ་ལ། རྩུབ་པ་ལ་སོགས་པའི་མཚོན་གྱིས་གཅད་དུ་ཡང་མི་རུང་ལ་མེས་བསྲེག་ཏུ་ཡང་མི་རུང་ངོ་། །བསྲེག་པ་དུག་སྨན་རྒྱམ་ཚ་དང་། །སྦྲང་རྩིར་སྦྱར་བས་བསྐུ་བར་བྱ། །ཞེས་

เล่ม ๒๐๒ · หน้า 272a

བྱ་བ་ལ། མཆེ་བས་ཟིན་པ་བསྲེག་པ་ལ་ནི་རྒྱམ་ཚ་དང་སྦྲང་རྩིར་སྦྱར་པའི་དུག་སྨན་བསྐུ་བར་བྱའོ། དེ་རྗེས་འོ་མ་ཅན་ཤིང་བསྐོལ། །སྨན་ཁུ་ཤིན་ཏུ་བསིལ་མོ་བླུགས། །ཞེས་བྱ་བ་ལ། འབུས་ཟིན་པའི་རྨ་བསྲེགས་པ་དེའི་འོག་ཏུ་སྨན་གྱི་ཁུ་བ་ཡང་བླུགས་པར་བྱའོ། །རྔབས་རྭ་

སོགས་སམ་གཏར་ག་ཡིས། །ཐམས་ཅད་ལ་ནི་ཁྲག་དབྱུང་བྱ། །ཞེས་བྱ་བ་ལ། གདུག་པའི་སྲིན་བུས་ཟིན་པ་ཐམས་ཅད་ལ་རྔབས་རྭ་ལ་སོགས་པས་ཁྲག་དབྱུང་བར་བྱའོ། །དེ་ནས་བསིལ་སྨན་བསྐུ་བླུགས་བྱ། །ཞེས་བྱ་བ་ལ། དེ་ནས་དེའི་འོག་ཏུ་བསིལ་བའི་སྨན་གྱི་ལྡེ་གུས་བསྐུ་བ་

དང་། ཤིན་ཏུ་བསིལ་བའི་སྨན་གྱི་ཆུ་བླུགས་པར་བྱའོ། །སླེ་སྨན་ཏ་ཀ་ཨ་ཤྭད་ཐ། །བ་རུ་ར་དང་པྲི་ཡང་ཀུ། །ཤུག་པ་སེར་གཉིས་སྦྲང་རྩིར་སྦྱར། །བ་དང་སྲིན་བུ་ལ་སོགས་པའི། །དུག་འཇོམས་ལས་ནི་ཐམས་ཅད་བྱེད། །ཅེས་བྱ་བ་ལ། སླེ་སྨན་ཏ་ཀ་ལ་སོགས་པ་སྦྲང་རྩི་དང་སྦྱར་

བའི་ལྡེ་གུས་བས་བལྡགས་པ་དང་། སྲིན་བུ་གདུག་པས་ཟིན་པ་ལ་སོགས་པའི་དུག་སེལ་ཞིང་ལས་ཐམས་ཅད་བྱེད་པ་ཡིན་ནོ། །སེར་པོ་རྣམ་གཉིས་རྨ་ཤིང་བཙོད། །པདྨ་གེ་སེར་རྒྱ་སྤོས་ནི། །སྦྲང་རྩི་མར་སྦྱར་ཙམ་པ་ཀ །སྔ་མ་བས་ཀྱང་ཡོན་ཏན་ལྷག །ཅེས་བྱ་བ་ལ། སེར་པོ་རྣམ་

གཉིས་ལ་སོགས་པ་སྤྱར་བའི་དུག་སྨན་ནི་ཙམ་པ་ཀ་ཞེས་བྱ་སྙེ། སྔ་མ་བས་ཡོན་ཏན་ཆེ་བ་ཡིན་ནོ། །ལྕི་ཁུ་བཙིར་དང་ཀ་ར་དཀར། །ཨ་པ་མརྒ་ལྡོང་རོས་དང་། །བ་བླ་སྐྱེར་པ་བྱ་མ་ཀ །ཡུག་སྣམ་སྦྲང་རྩི་མར་དེ་བཞིན། །ཞེས་བྱ་བ་ལ། །ལྕི་ཁུ་བཙིར་བ་ལ་སོགས་པའི་སྨན་ནི་དེ་བཞིན་ཏེ། །

བ་ལ་སོགས་པའི་དུག་འཇོམས་ཤིང་ལས་ཐམས་ཅད་བྱེད་པ་ཡིན་ནོ། །རྒྱ་སྤོས་ན་ལེ་ཤམ་སུག་སྨེལ། །རུ་རྟ་ཤིང་མངར་སྦྲང་རྩི་མར། །སྦྱར་བའི་སྨན་ནི་མན་ད་ར། །ཞེས་བྱ་བ་ལ། རྒྱ་སྤེས་ལ་སོགས་པ་སྦྱར་བའི་སྨན་ནི་མིང་མན་ད་ར་ཞེས་བྱ་སྟེ། དེའི་ཡོན་ཏན་ཡང་དེ་དང་འདྲའོ། །

རྒྱ་སྤོས་སེང་ཕྲོམ་པུ་ཙེ་ཤེལ། །ཤུ་དག་པ་ཐ་སུག་སྨེལ་དང་། །གུར་གུམ་སྤོས་ངད་ལྡང་དེ་བཞིན། །ཞེས་བྱ་བ་ལ། གཞན་ཡང་རྒྱ་སྤོས་ལ་སོགས་པ་སྦྱར་བའི་སྨན་ནི་སྤོས་ངད་ལྡང་བ་ཞེས་བྱ་སྟེ། ཡོན་ཏན་ཡང་སྔ་མ་དང་འདྲ་བ་ཡིན་ནོ། །ནད་གཞི་མང་ལ་དུག་འཇོམས་པའི། །སྦྱང་བ་བྱས་

เล่ม ๒๐๒ · หน้า 272b

པས་གསོ་བར་བྱ། །ཞེས་བྱ་བ་ལ། སྐྱེས་བུ་ནད་གཞི་མང་བ་ལ་དུག་འཇོམས་པའི་སྨན་གྱིས་དང་པོར་སྦྱང་བར་བྱའོ། །ཤིང་མངར་དང་ནི་པོ་སོན་ཆ། །ཀོ་ཤ་ཏ་ཀི་ཨང་ཀོ་ལ། །སིན་དུ་བ་ར་འབྲས་ཆུར་སྦྱར། །འཐུངས་ན་བད་ཀན་ལས་གྱུར་དུག །མྱུར་དུ་སློན་བར་བྱེད་པ་ཡིན། །ཞེས་བྱ་བ་

ལ། བད་ཀན་གྱི་ཤས་ཆེ་བ་ལ་ནི་ཤིང་མངར་ལ་སོགས་པའི་སྨན་འབྲས་ཀྱི་ཆུ་དང་བླུད་ན། དུག་མྱུར་དུ་འབྱིན་པར་བྱེད་དོ། །ཤིར་ཤའི་ལོ་མ་མེ་ད་དང་། །རྩ་བ་འབྲས་བུ་ཨང་ཀོ་ལའི། །རྩ་བར་བཅས་པའང་དེ་བཞིན་ནོ། །ཞེས་བྱ་བ་ལ། ཤི་རི་ཤའི་ལོ་མ་དང་རྩ་བ་དང་འབྲས་བུ་དང་། ཨང་

ཀོ་ལའི་རྩ་བ་དང་བཅས་པ་འབྲས་ཀྱི་ཆུ་དང་སྦྱར་ཏེ་འཐུངས་ན་ཡང་བད་ཀན་ལས་གྱུར་བའི་སྲིན་བུའི་དུག་དེ་མྱུར་དུ་སློན་པར་བྱེད་དོ། །འབྲས་བུ་གསུམ་དང་ནི་ལི་ནི། །དུར་བྱིད་ལ་སོགས་བཀྲུ་སྨན་གཏང་། །ཞེས་བྱ་བ་ལ། གལ་ཏེ་བཀྲུ་སྨན་གྱིས་གསོ་བར་འོས་པ་ཡིན་ན་ནི། འབྲས་བུ་གསུམ་ལ་

སོགས་པའི་བཀྲུ་སྨན་གཏང་བར་བྱའོ། །སྐྲང་དང་ཚ་སོགས་ཞི་གྱུར་ན། །རྨ་ཡི་ལྟེ་བ་དཔོག་པར་བྱ། །ཞེས་བྱ་བ་ལ། གལ་ཏེ་སྐྲུང་པ་ལ་སོགས་པ་ཞི་བར་གྱུར་ན་འོག་ནས་བཤད་པའི་སྨན་གྱིས་རྨའི་ལྟེ་བ་དཔོག་པར་བྱའོ། །བ་བླ་ལེ་བརྒན་རྩའི་མེ་ཏོག། །ཁྲོན་བུ་བྱི་བའི་རྟུག་པ་དང་། །དུར་བྱིད་དན་

ད་རྒྱམ་ཚར་སྦྱར། །ལྟེ་བ་འབྱིན་པར་བྱེད་པ་ཡིན། །ཞེས་བྱ་བ་ལ། བ་བླ་ལ་སོགས་པའི་སྨན་སྦྱར་ཏེ་བསྐུས་ན་ཡང་ལྟེ་བ་འབྱིན་པར་བྱེད་དོ། །དེ་བཞིན་ཨུ་ཏ་མ་ཀ་རིའི། །རྩ་བ་སྨིན་པའི་ཤུན་བཅས་པའི། །ཞེས་བྱ་བ་ལ། དེ་བཞིན་དུ་ཨུ་ཏ་མ་ཀ་རིའི་རྩ་བ་དང་། སྨིན་པའི་ཤུན་པ་གཉིས་ཀྱིས་ཀྱང་ལྟེ་བ་

འབྱིན་པར་བྱེད་དོ། །རྒྱམ་ཚ་རུ་རྟ་པུ་ཙེ་ཤེལ། །དན་ད་པ་ཡ་སྱ་སྦྱར་བ་འམ། །རཱཛ་ཀོ་ཤ་ཏ་ཀིའི་རྩར། །དར་བའི་ཚིགས་མ་སྦྱར་བར་བྱ། །ཞེས་བྱ་བ་ལ། ཡང་ལྟེ་བ་མཐོ་བ་དེ་དབྱུང་བའི་ཕྱིར་རྒྱམ་ཚ་ལ་སོགས་པའི་སྦྱོར་བ་འམ། རཱ་ཛ་ཀོ་ཤ་ཏ་ཀིའི་རྩ་བ་དང་། དར་བའི་ཚིགས་མ་སྐ་བ་དང་སྦྱར་བས་ཀྱང་བྱའོ། །

ལྟེ་བ་བཅད་པའི་དུས་སུ་ནི། །དུག་སིལ་བ་ཡིས་བརྟ་བར་བྱ། །ཞེས་བྱ་བ་ལ། ལྟེ་བ་བཅད་པའི་དུས་སུ་དུག་སེལ་བར་བྱེད་པའི་ཁ་ཟས་དང་། །སྨན་གྱིས་བརྟ་བར་བྱའོ། །སྣུམ་ཆོས་མ་ལུས་བྱ་བ་ནི། །ཞུན་མར་ཉིད་ཀྱིས་བྱ་བ་ཡིན། །ཞེས་བྱ་བ་ལ། །སྲིན་བུའི་དུག་གི་སྣུམ་ཆོས་ལ་ནི་ཀུན་ཀྱང་ཞུན་མར་

เล่ม ๒๐๒ · หน้า 273a

གྱིས་བྱའོ། །ཏིལ་མར་གྱིས་ནི་རྩ་སོགས་ལ། །མེ་མཆེད་ལྟ་བུར་དུག་འཕེལ་བྱེད། །ཅེས་བྱ་བ་ལ། གལ་ཏེ་ཏིལ་མར་གྱིས་སྣུམ་ཆོས་བྱས་ན་ནི། རྩྭ་སྔོན་པོར་མེ་མཆེད་པ་ལྟར་དུག་དེ་འཕེལ་བར་འགྱུར་རོ། །བེ་ཀོཾ་ཀ་ཏ་བ་ལི་ཀ། །ཐལ་

ཏྲེས་གླ་སྒང་སྤྲི་ཀ་དང་། །ཙནྡན་ཉ་ལྕིབས་སོ་ན་ཀ། །ཨུཏྤལ་རྒྱ་སྦོས་ཤིང་མངར་དང་། །ཤིང་ཚ་ཤུག་པ་ན་གུ་ལི། །པོ་སོན་ཆའི་རྐང་ལྷན་ཅིག་སྦྱར། །སྐྱེར་པ་གླ་སྒང་སར་པ་ཀྵི། །བཅའ་སྒ་པི་པི་ལིང་རྩ་བ། །པི་པི་ལིང་དང་ཙི་ཏྲ་ཀ །བ་རུ་ན་དང་ཨ་ག་རུ། །

བིལ་བ་ནིམ་པ་བ་ཏ་ལི། །རུ་རྟ་ནཱ་ག་གེ་སར་དང་། །སེའུ་ལུ་ལྷན་ཅིག་སྦྱར་བ་དང་། །བིལ་བ་ཙནྡན་ཨུཏྤ་ལ། །རྒྱ་སྤོས་བཅའ་སྒ་པི་པི་ལིང་། །ལྕང་མ་ནིམ་པ་རུ་རྟ་དང་། །ཆུ་སྲིན་སྡེར་མོ་ཛི་བན་ཏི། །ག་བྲའི་རྩ་བ་པ་ཏ་ལི། །ཛི་བན་ཏི་དང་པོ་སོན་ཆ། །

ཤིང་ཚ་སྦྱར་བ་དེ་དག་ནི། །མིག་སྨན་སྣར་བླུགས་བྱུག་པ་དང་། །སྨན་ཆུ་བླུགས་པའི་སྦྱོར་བ་ཡིས། །མཁྲིས་པ་བང་ཀན་རླུང་གྱུར་པའི། །ལུ་ཏའི་དུག་ནི་ཇི་སྙེད་པ། །ཚུལ་ཁྲིམས་ལ་གནས་ངན་འགྲོ་བཞིན། །འདི་ཡིས་དུག་ནད་ཀུན་འཇོམས་བྱེད། །

ཅེས་བྱ་བ་ལ། །བེ་ཀང་ཀ་ཏ་ལ་སོགས་པའི་དུག་སྨན་གྱི་མཆོག་འདི་ནི་སྨན་གྱི་སྡེ་ཚན་གསུམ་པོས་མཁྲིས་པ་ལ་སོགས་པའི་སྲིན་བུའི་ནད་གསུམ་པོ་འཇོམས་པར་བྱེད་དོ། །ཇི་ལྟར་ཚུལ་ཁྲིམས་ལ་གནས་པའི་མིས་ངན་འགྲོའི་ཚོགས་ཟློག་པར་བྱེད་པ་དང་འདྲའོ། །སྤྲི་

ཀ་ནི་ཤ་རྩིའོ། །ཉ་ལྕིབས་ནི་ཆུ་བལ་ལོ། །ཀུ་ལི་ནི་གནྦྷན་ཀུ་ལིའོ། །སེའུ་ལུ་ནི་སླེ་སྨན་ཏ་ཀའོ། །གཞན་ནི་གོ་བར་ཟད་དོ། །སྦྱོར་བ་ཚན་གསུམ་ནི་བེ་ཀོཾ་ཀ་ཏ་ནས་པོ་སོན་ཆའི་རྐང་གི་བར་དུ་སྦྱོར་བ་གཅིག་གོ། །གཉིས་པ་ནི་སྐྱེར་པ་ནས་སེའུ་ལུའི་བར་

རོ། །གསུམ་བ་ནི་བིལ་བ་ནས་ཤིང་ཚའི་བར་རོ། །སེང་ཕྲོམ་ཤུག་པ་པདྨ་གེ་སར་དང་། །ཙནྡན་དམར་སེར་ཕྲི་ཡང་ཀུའི་མེ་ཏོག །པདྨ་པུ་ཤེལ་ཙེ་དང་པ་ཡ་སྱའི། །སྦྱོར་བ་ཀུན་གྱིས་བ་ཡི་དུག་རྣམས་འཇོམས། །ཞེས་བྱ་བ་ལ། །སེང་ཕྲོམ་ལ་

เล่ม ๒๐๒ · หน้า 273b

སོགས་པའི་སྨན་གྱི་སྦྱོར་བ་སྟེ། བཏུང་བ་དང་། སྣ་སྨན་དང་། མིག་སྨན་དང་། བསྐུ་བ་དང་། སྨན་ཆུ་བླུགས་པའི་སྦྱོར་བས་སྦྱར་ན་ནི་བའི་དུག་ཐམས་ཅད་འཇོམས་པར་བྱེད་དོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་

ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་བདུན་པའི་རྣམ་པར་འགྲེལ་པའོ།། །།དེ་ནས་བྱི་བ་དང་ཨ་ལང་གའི་དུག་གསོ་བ་བཤད་པར་བྱའོ། །ཁ་ཆུ་ཅན་དང་མི་བརྟན་བུ། །རྒོད་དང་སྒྲ་ཅན་པགས་པ་དང་། །རྙིང་པའི་

སོ་དང་ཁུ་བྱུག་དང་། །སེར་སྐྱ་དང་ནི་ནག་པོ་དང་། །དམར་སེར་ཁྲ་བོ་དཀར་པོ་དང་། །ཐི་བ་སྐྲ་དཀར་བྱི་བ་དང་། །ཕུས་པ་དང་ནི་བྲ་བྱི་སྟེ། །བྱི་བའི་དབྱེ་བ་བཅོ་བརྒྱད་ཡིན། །ཞེས་བྱ་བ་ལ། བྱི་བའི་དབྱེ་བས་ནི། ཁ་ཆུ་ཅན་ལ་སོགས་པའི་དབྱེ་བས་

བསྟན་པ་གྲངས་བཅོ་བརྒྱད་ཡིན་ནོ། །གང་དུ་འདི་ཡི་ཁུ་ཆུས་ཕོག །ཁུ་བས་ཕོག་དང་རེག་པ་ནི། །ལུས་ཀྱིས་ལུས་ལ་རེག་པ་དེར། །ཁྲག་ལ་གནོད་ཅིང་མདོག་སྐྱ་ལ། །ཐོར་བུ་རྨེན་བུ་དྲི་མནམ་དང་། །ཤུ་བ་འཁོར་ལིང་ཡི་ག་འཆུས། །མགོ་འཁོར་

སྐྲང་རིམས་རབ་ཏུ་ན། །ཉམ་ཆུང་འདར་ཞིང་ལྷུ་ཚིགས་ན། །སྦུ་ལྡང་དྲན་ཉམས་ཁྲག་འཛག་དང་། །ཡུན་རིང་དུ་ནི་གནས་བར་བྱེད། །བད་ཀན་ཅན་གྱི་བྱི་བ་ཡི། །ཕྲུ་གུ་མང་རེག་སྐོམ་སློན་འགྱུར། །ཞེས་བྱ་བ་ལ། བྱི་བ་འདི་དག་གི་ཁུ་ཆུས་

ལུས་གང་ལ་ཕོག་པ་དང་། ཡང་ན་ཁུ་བས་ཕོག་པའི་ལུས་དང་རིག་པར་གྱུར་ན་དེར་མདོག་སྐྱ་བ་ལ་སོགས་པའི་ནད་དང་། ཡུན་རིང་དུ་འབྲེལ་ཞིང་གནས་པར་བྱེད་པའི་བར་དུ་འགྱུར་ལ། བད་ཀན་ཅན་གྱི་མི་བྱི་བའི་ཕྲུ་གུ་མང་པོས་རེག་ན་སྐོམ་དང་ཆེ་

བ་དང་། སློན་པར་འགྱུར་རོ། །བྱི་བ་འཁྲིག་སྤྱོད་དུག་གསོ་དཀའ། །ཡང་དང་ཡང་དུ་ལྡང་བར་བྱེད། །ཅེས་བྱ་བ་ལ། འཁྲིག་པ་སྤྱོད་པའི་དུག་གིས་རེག་པ་ནི་ཤིན་ཏུ་གསོ་དཀའ་ཞིང་། དེ་ཡང་དང་ཡང་དུ་ལྡང་ཞིང་འཁྲུག་པར་བྱེད་པ་ཡིན་ནོ། །ཡན་

เล่ม ๒๐๒ · หน้า 274a

ལག་ཀུན་སྐྲངས་མདོག་མི་སྡུག །རྣགས་ཤིང་འོན་ལ་རིམས་ཀྱིས་འདེབས། །མགོ་ལྕི་ཁ་ཆུ་ཁྲག་འབྱུང་ཞིང་། །སློན་པ་གསོ་དཀའི་མཚན་ཉིད་ཡིན། །ཞེས་བྱ་བ་ལ། བྱི་བའི་དུག་གསོར་མི་རུང་བས་ཟིན་པའི་མཚན་མ་ནི་

ཡན་ལག་ཀུན་སྐྲངས་པ་ནས། སློན་པའི་བར་ཡིན་པར་ཤེས་པར་བྱའོ། །ཕུས་པས་ཟིན་པ་དེ་དྲི་བྲོ། །ལྒང་པ་སྐྲངས་ཤིང་ཆུ་མདོག་ཉམས། །སྦྲང་རྩི་འདྲ་བའི་རྨེན་བུས་ཁྱབ། །ཅེས་བྱ་བ་ལ། མི་ཕུས་པའི་དུག་གིས་ཟིན་པའི་མཚན་མ་ནི་དེའི་

དྲི་བྲོ་བ་ནས་རྨེན་བུས་ཁྱབ་པའི་བར་ཡིན་ཏེ། དེ་ནི་གསོར་མི་རུང་བས་སྦང་བར་བྱའོ། །ཁྱིའི་དུག་བད་ཀན་ཤས་ཆེར་འཁྲུགས། །འདུ་ཤེས་རྒྱུ་བའི་རྩ་མང་གནས། །གནོད་ཅིང་འཁྲུག་པར་བྱེད་པ་དང་། །ལུས་ཟུངས་ལ་ནི་མི་བཟད་གནོད། །

ཅེས་བྱ་བ་ལ། ཁྱིའི་མཆེ་བའི་དུག་གིས་ཟིན་པ་ནི། བད་ཀན་གྱི་ནད་ཤས་ཆེར་ལྡང་ཞིང་འཁྲུགས་པ་དང་། འདུ་ཤེས་རྒྱུ་བའི་རྩ་མང་པོ་ལ་གནས་ནས་འདུ་ཤེས་སྟོང་ཅིང་བརྒྱལ་བར་བྱེད་པ་དང་། ལུས་ཟུངས་རྣམས་ལ་ལྷག་པར་གནོད་པར་

བྱེད་པ་ཡིན་ནོ། །ཁ་ཆུ་འཛག་དང་ལོང་དང་འོན། །ཀུན་ཏུ་རྒྱུག་པར་བྱེད་པ་དང་། །མཇུག་མ་འགྲམ་པ་ཕྲག་གོང་ལྷོད། །མགོ་ན་གདོང་ནི་དུད་པ་ཡིན། །ཞེས་བྱ་བ་ལ། ཁྱི་ཁ་ཆུ་འཛག་ཅིང་ལོང་བ་དང་འོན་པ་དང་། ཕྱོགས་ཀུན་ཏུ་རྒྱུག་པར་

བྱེད་པ་དང་། མཇུག་མ་ལྷོད་ཅིང་རང་གི་གནས་ནས་བསྐྱོད་པ་དང་། འགྲམ་པ་དང་། ཕྲག་པ་ཡང་ལྷོད་པ་དང་། མགོ་ན་ཞིང་ཚ་བ་དང་། གདོང་དུད་པར་བྱེད་པ་ནི་ཁྱི་གདུག་པ་ཡིན་ནོ། །དེ་ཡི་སོ་ཡིས་ཟིན་ན་རྨ། །ཚོར་བ་ཆུང་ཞིང་ཁྲག་ནག་

འཛག །མགོ་སྙིང་ན་ཞིང་རིམས་འདེབས་རེངས། །དེ་རྗེས་སྐོམ་དང་བརྒྱལ་བར་འགྱུར། །ཞེས་བྱ་བ་ལ། དེ་ཁྱིའི་སོས་ཟིན་པར་གྱུར་པའི་མི་ནི་རྨའི་ཚོར་བ་ཆུང་བ་དང་། དེ་བཞིན་དུ་ཁྲག་ནག་པོ་འཛག་པ་ལ་སོགས་པ་ཡིན་ནོ། །འདི་ཡིས་

เล่ม ๒๐๒ · หน้า 274b

གདུག་ཅིང་མཆེ་བ་ཅན། །ཅེ་སྦྱང་དོམ་དང་དྲེད་དང་གུང་། །སྟག་དང་སྤྱང་ཀི་ལ་སོགས་པ། །གཞན་དག་ཀྱང་ནི་ཤེས་པར་བྱ། །ཞེས་བྱ་བ་ལ། ཚུལ་འདིས་ནི་གཅན་གཟན་གདུག་ཅིང་མཆེ་བ་དང་ལྡན་པའི་མཆེ་བ་ཅན་ཅེ་སྦྱང་ལ་སོགས་པ་གཞན་དག་

ཀྱང་ཤེས་པར་བྱའོ། །གཡའ་ཞིང་ཟུག་ལ་མདོག་མི་སྡུག། །ཚེར་བ་མེད་གནས་རིམས་མགོ་འཁོར། །ཚ་ཞིང་དམར་ལ་ན་ཞིང་རྣགས། །སྐྲང་ཞིང་རྨེན་བུ་སྐྱེ་ཟུག་འཁུམས། །རྨ་ནི་འགགས་ཤིང་འབྲུམ་བུ་འབྱུང་། །ལྟེ་བ་ཅན་དུ་ཟླུམ་པོར་

འགྱུར། །ཀུན་ཏུ་དུག་བཅས་མཚན་མ་འདི། །དུག་མིད་དེ་ལས་བཟློག་པ་ཡིན། །ཞེས་བྱ་བ་ལ། ཐམས་ཅད་དུ་དུག་དང་ལྡན་པ་ནི། གཡའ་བ་ལ་སོགས་བའི་མཚན་ཉིད་དང་ལྡན་པར་ཤེས་པར་བྱ་ལ། དུག་མེད་པ་ནི་གཡའ་བ་ལ་སོགས་པའི་

མཚན་ཉིད་དེ་དག་མེད་ཅིང་སྔ་མ་ལས་གོ་བཟློག་པ་ཡིན་པར་ཤེས་པར་བྱའོ། །གང་གིས་བཟུང་བ་དེའི་སྦྱོད་ཚུལ། །སྒྲ་སྒྲོགས་རྒྱུ་མེད་པར་དེའི་གཟུགས། །ཆུ་དང་མེ་ལོང་སོགས་མཐོང་འཆི། །ཞེས་བྱ་བ་ལ། མི་ཅེ་སྦྱང་ལ་སོགས་པ་དག་གིས་

བཟུང་བར་གྱུར་པ་གང་ཡིན་པ་དེ་མོད་ལ་དེའི་སྤྱོད་ཚུལ་དེ་ཅེ་སྦྱོད་ཚུལ་དེ་ཅེ་སྦྱང་ལ་སོགས་པའི་སྦྱོད་ཚུལ་བྱེད་ཅིང་། དེ་ལྟར་མཐོང་བའི་རྒྱུ་མེད་པར་ཆུ་ལ་སོགས་པར་དེའི་གཟུགས་མཐོང་ན་འཆི་བར་འགྱུར་བ་ཡིན་ནོ། །མ་བཟུང་བར་ཡང་སྒྲ་དང་ནི། །མཐོང་བས་

སྔངས་པར་བྱེད་པ་ནི། །ཆུ་ཡིས་སྐྲག་ཅེས་བྱ་བ་སྟེ། །ཟིན་པ་དེ་ཡང་སྤང་པར་བྱ། །ཞེས་བྱ་བ་ལ། མི་གང་སྲོག་ཆགས་དེ་དག་གིས་མ་བཟུང་དུ་ཟིན་ཀྱང་སྒྲ་ལ་སོགས་པས་སྔངས་ཤིང་ཆུས་སྐྲག་པར་བྱེད་པའི་མི་དེ་ནི་ཆུས་སྐྲག་པ་ཞེས་བྱ་བའི་ནད་

ཀྱིས་ཟིན་པ་ཡིན་ཏེ། དེ་ཡང་སྤང་བར་བྱའོ། །བྱི་བའི་དུག་གིས་ཟིན་མ་ཐག །རྨ་ནི་མདེའུ་བསྲེགས་པས་བསྲེག །ཡང་ན་མེ་ལོང་དག་གིས་བྱ། །གཞན་དུ་ལྟེ་བར་མི་བཟོད་ན། །ཞེས་བྱ་བ་ལ། བྱི་བས་ཟིན་མ་ཐག་པའི་མིའི་རྨ་ལ་

เล่ม ๒๐๒ · หน้า 275a

མདེའུ་བསྲེགས་པའམ། ཡང་ན་མེ་ལོང་བསྲེགས་པས་དེ་བསྲེགས་པས་དེ་བསྲེག་པར་བྱའོ། །གཞན་དུ་མ་བསྲེགས་ན་རྨའི་ལྟེ་བ་མི་བཟོད་པར་ན་བར་འགྱུར་རོ། །བསྲེགས་ནས་རྨ་ལས་ཁྲག་དབྱུང་ཞིང་། །ཞལ་ཞལ་བྱས་ལ་ཤིར་ཤ་དང་། །ཡུང་བ་རྒྱ་སྤོས་

གུར་གུམ་དང་། །སླེ་ཏྲེས་ཀྱི་ནི་ལྡེ་གུས་བསྐུ། །ཞེས་བྱ་བ་ལ། སོས་བཟུང་བ་བསྲེགས་པའི་རྨ་ལ་རྔབས་རྭ་ལ་སོགས་པས་ཁྲག་དབྱུང་བ་དང་། ཞལ་ཞལ་བྱས་ལ་ཤི་རི་ཤ་ལ་སོགས་པའི་ལྡེ་གུས་བསྐུ་བར་བྱའོ། །ཁྱིམ་གྱི་དུག་པ་སྐྱེར་པ་དང་། །རྒྱམ་ཚ་དང་ནི་

བཙོད་དག་གི །ལྡེ་གུས་བྱི་བའི་དུག་སེལ་ཞིང་། །ལྟེ་བ་འབུར་བའང་འཇོམས་པར་བྱེད། །ཅེས་བྱ་བ་ལ། ཁྱིམ་གྱི་དུད་པ་ལ་སོགས་པའི་སྨན་གྱི་ལྡེ་གུས་བསྐུས་ན་བྱི་བའི་དུག་སེལ་བར་བྱེད་ཅིང་། དེ་ཉིད་ཀྱིས་རྨའི་ལྟེ་བ་འབུར་བ་ཡང་སེལ་བར་བྱེད་དོ། །དེ་

ནས་སྐྱུར་བས་བཀྲུས་ནས་ནི། །གི་རི་ཀར་ཎི་པ་ལིན་ཏི། །བིལ་བའི་རྩ་བ་སླེ་ཏྲེས་དང་། །ཆུ་དང་བཏགས་པའི་ལྡེ་གུས་བསྐུ། །ཞེས་བྱ་བ་ལ། དེའི་འོག་ཏུ་ཀན་ཛ་དང་དར་བ་ལ་སོགས་པ་ཁུ་བ་སྐྱུར་བས་བཀྲུས་ལ། དེའི་རྗེས་ལ་གི་རི་ཀར་ཎི་ལ་སོགས་པ་ཆུ་

དང་བཏགས་པའི་ལྡེ་གུས་བསྐུ་བར་བྱའོ། །དུག་དང་སྐྲང་སེལ་སྨན་གཞན་དང་། །ཡང་ན་གཏར་ག་མྱུར་དུ་གདབ། །ཅེས་བྱ་བ་ལ། དེ་བཞིན་དུ་དེ་ལ་དུག་དང་སྐྲང་པ་སེལ་བའི་སྨན་གཞན་དག་གིས་ཀྱང་བསྐུ་བ་དང་། གཏར་ག་གདབ་པར་ཡང་བྱའོ། །ནི་ལི་ནི་

བསྐོལ་ཤི་རི་ཤ། །ཨང་ཀོ་ལ་ཡི་ཁུ་བས་སློན། །ཞེས་བྱ་བ་ལ། བྱི་བའི་དུག་དེ་ལ་ནི་ལི་ནི་བསྐོལ་བའི་ཁུ་བ་བླུད་པའམ། ཤི་རི་ཤ་དང་ཨང་ཀོ་ལའི་ཁུ་བ་བླུད་དེ་སློན་པར་བྱའོ། །ཀོ་ཤ་ཏ་ཀི་ཤིར་ཤ་དང་། །ཛི་མུ་ཏ་ཀའི་འབྲས་བུ་དང་། །པོ་སོན་ཆ་ནི་ཕྱེ་མར་

བཏགས། །ཞོ་སྦྱར་བླུད་ལ་དུག་སློན་གཞུག །ཅེས་བྱ་བ་ལ། ཡང་ན་ཀོ་ཤ་ཏ་ཀི་ལ་སོགས་པའི་སྨན་བཞིའི་ཕྱི་མ་དང་ཞོར་སྦྱར་ཏེ་བླུད་ལ་བྱི་བའི་དུག་སློན་དུ་གཞུག་པར་བྱའོ། །ཤུ་དག་རུ་རྟ་པོ་སོན་ཆའམ། །ཛི་བན་ཏི་ནི་བ་གཅིན་བཏགས། །ཆོ་ག་སྔ་མ་བཞིན་བླུད་

เล่ม ๒๐๒ · หน้า 275b

ན། །དུག་གི་ནད་ནི་ཐམས་ཅད་སེལ། །ཞེས་བྱ་བ་ལ། ཤུ་དག་ལ་སོགས་པའི་སྨན་བ་གཅིན་དང་བཏགས་པའི་ལྡེ་གུ་དང་སྔ་མ་བཞིན་དུ་ཞོ་དང་སྦྱར་ཏེ་བླུད་ན་ཡང་བྱི་བའི་དུག་གི་ནད་ཐམས་ཅད་སེལ་བར་བྱེད་དོ། །དུར་བྱིད་ནི་ལི་ནི་དང་ནི། །འབྲས་བུ་གསུམ་གྱི་བཀྲུ་སྨན་བསྔགས། །ཞེས་བྱ་བ་ལ། །

ཡང་ནང་དུར་བྱིད་ལ་སོགས་པའི་བཀྲུ་སྨན་ཡང་བསྔགས་སོ། །ཤི་ར་ཤའི་སྙིང་པོའི་འབྲས་བུ་ཡིས། །མགོ་བོའི་བཀྲུ་སྨན་དག་ཀྱང་ཕན། །ཞེས་བྱ་བ་ལ། ཡང་ན་ཤིར་ཤའི་ནང་གི་སྙིང་པོ་དང་། དེ་ཉིད་ཀྱི་འབྲས་བུ་མགོ་བོའི་བཀྲུ་སྨན་བཏང་ན་ཡང་ཕན་ནོ། །བ་ལྕིའི་ཁུ་བ་ཚ་བ་གསུམ། །ཕྱེ་མ་

ཞིབ་བཏགས་ལྡེ་གུས་ཕན། །ཞེས་བྱ་བ་ལ། ཡང་ན་བའི་ལྕི་བ་ལ་སོགས་པའི་མིག་སྨན་ཡང་ཕན་ནོ། །བ་ལང་ལྕི་བ་ཀ་པིད་ཏའི། །ཕྱེ་མ་སྦྲང་རྩིའི་ལྡེ་གུ་བཟའ། །ཞེས་བྱ་བ་ལ། ཡང་ན་བ་ལང་གི་ལྕི་བ་ལ་སོགས་པའི་ལྡེ་གུ་ཟོས་ན་ཡང་ཕན་ནོ། །ཏཎྜུ་ལི་ཡི་རྩ་བ་དང་། །བསྐོལ་བའི་

མར་ནི་བླུད་ན་འང་ཕན། །ཞེས་བྱ་བ་ལ། ཡང་ན་ཏཎྜུ་ལིའི་རྩ་བའི་སྨན་མར་ཡང་ཕན་ནོ། །གི་རི་ཀར་ཎི་སེར་པོ་གཉིས། །ཤིང་མངར་བཙོད་དང་སླེ་ཏྲེས་ཕན། །ཞེས་བྱ་བ་ལ། ཡང་ན་གི་རི་ཀརྞི་ལ་སོགས་པའི་མར་བླུད་ན་ཡང་ཕན་ནོ། །ཐལ་ཏྲེས་རྩ་བ་མར་བསྐོལ་བ། །ཀ་པིད་ཏ་ཡི་

རྣམ་ལྔའང་ཕན། །ཞེས་བྱ་བ་ལ། ཡང་ན་ཐལ་ཏྲེས་ཞེས་བྱ་བ་ཤ་རི་བ་དང་བསྐོལ་བའི་སྨན་མར་རམ། ཡང་ན་ཀ་པིད་ཏ་ལྔ་པ་ཞེས་བྱ་བ་ཀ་པིད་ཐའི་ཤུན་པ་དང་། ལོ་མ་དང་རྩ་བ་ལ་སོགས་པ་དང་བསྐོལ་བའི་མར་ཡང་ཕན་ནོ། །སིན་དུ་བ་ར་རྒྱ་སྤོས་དང་། །ཤི་ཀྲུ་བིལ་བའི་རྩ་བ་དང་། །ཤུ་དག་གཟེ་

མ་བ་སྤྲུ་བ། །ཛི་མུ་ཏ་དང་བཅས་པ་སྟེ། །དེ་རྣམས་ཁུ་བ་སྦྲང་རྩིར་བཅས། །བླུད་ནས་འབྲས་ཆན་སཱ་ལུ་ཞོ། །བྱིན་ན་ཕྱི་བའི་དུག་ནད་སེལ། །ཞེས་བྱ་བ་ལ། ཡང་བྱི་བའི་དུག་གིས་ཉིན་པ་ལ་ནི་སིན་དུ་བ་ར་ལ་སོགས་པའི་ཁུ་བ་སྦྲང་རྩི་དང་བཅས་པ་བླུད་པ་ལ་སོགས་པའི་སྦྱོར་བ་བྱས་ན་ཡང་ཕན་ནོ། །

ཤར་པུང་གའི་ཕྱེ་མ་ནི། །དར་བར་སྦྱར་བ་བླུད་པའང་ཕན། །ཞེས་བྱ་བ་ལ། ཡང་ན་ཤ་ར་པུང་གའི་ས་བོན་བཏགས་པའི་ཕྱེ་མ་དར་བ་དང་སྦྱར་ཏེ་བླུད་ན་ཡང་ཕན་ནོ། །ཨང་ཀོ་ལ་ཡི་རྩ་བ་ནི། །ར་ཐུག་གཅིན་སྦྱར་ལྡེ་གུས་ནི། །བཏུང་དང་བསྐུ་བ་ལ་སྦྱར་ན། །བྱི་བའི་དུག་ཀུན་སེལ་བར་བྱེད། །ཅེས་

เล่ม ๒๐๒ · หน้า 276a

བྱ་བ་ལ། ཡང་ན་ཨང་ཀོ་ལའི་རྩ་བ་ཇི་སྐད་སྨོས་པ་བཞིན་དུ་བཏང་བ་ཡང་ཕན་ནོ། །ཀ་པིད་ཏ་ཡི་སྙིང་པོ་དང་། །ཏི་ལ་ཀ་དང་ཏིལ་དང་ནི། །ཨང་ཀོ་ལ་ཡི་རྩ་བ་ནི། །འ་ཡི་འོ་མའམ་གཅིན་སྦྱར་བླུད། །ཅེས་བྱ་བ་ལ། །ཡང་ན་ཀ་པིད་ཏའི་སྙིང་པོ་ལ་སོགས་པ་གཅིན་དང་སྦྱར་བ་

བླུད་ན་ཡང་ཕན་ནོ། །ཏི་ལ་ཀའི་སྡོང་ཡལ་ག་ནི། །བ་ཡི་འོ་མ་སྦྱར་བ་བླུད། །ཅེས་བྱ་བ་ལ། ཡང་ན་སྦྱོར་བ་འདི་བྱས་ན་ཡང་ཕན་ནོ། །ཡང་ན་ཤེརྱ་ཀའི་རྩ་བ། །སྦྲང་རྩི་འབྲས་བུ་སྦྱར་བ་བླུད། །ཅེས་བྱ་བ་ལ། ཡང་ན་ཤེརྱ་ཀ་ཞེས་བྱ་བ་ཧ་ཙ་རའི་རྩ་བ་དང་། སྦྲང་རྩི་དང་འབྲས་བཀྲུས་པའི་ཆུ་དང་སྦྱར་ཏེ་བླུད་ན་ཡང་ཕན་

ནོ། །ཀུ་བ་ཁ་བོ་ཞག་གཅིག་ནི། །ཆུ་ལ་སྤངས་པའང་བླུད་པར་བྱའོ། །ཞེས་བྱ་བ་ལ། ཡང་ན་ཀུ་བ་ཁ་བོ་ཞག་གཅིག་ཆུར་སྦངས་པའི་ཁུ་བ་བླུད་པར་བྱའོ། །སིན་དུ་བ་རའི་རྩ་དང་། །བྱི་བའི་རུས་པ་བོང་ང་དཀར། །རྒྱ་སྤོས་ཆུར་བཏགས་སྣ་སྨན་སོགས། །སྦྱར་བས་བྱི་བའི་དུག་སེལ་བྱེད། །ཅེས་བྱ་བ་

ལ། །ཡང་སིན་དུ་བ་རའི་རྩ་བ་ལ་སོགས་པའི་སྨན་སྣ་སྨན་ལ་སོགས་པ་བྱས་ན་ཡང་ཕན་ནོ། །བྱི་བའི་དུག་ནི་ལྷག་ལུས་པ། །སྤྲིན་མཐོང་བས་ནི་ལྡང་བྱེད་པའམ། །ནད་ནི་འཕེལ་བར་བྱེད་པའི་རྒྱུ། །ཇི་ལྟ་བར་ནི་འཕེལ་བར་བྱེད། །ཅེས་བྱ་བ་ལ། བྱི་བའི་དུག་ལུས་ལ་ལྷག་པར་ལུས་པ་གནས་ན་སྤྲིན་

མཐོང་ན་ལྡང་བར་བྱེད་པའམ། ཡང་ན་འཕེལ་བར་བྱེད་པའི་དུས་དབྱར་ལ་སོགས་པའི་ཚེ་འཕེལ་ཞིང་ལྡང་བར་བྱེད་པ་ཡིན་ནོ། །དེ་ལ་གནས་སྐབས་ཐམས་ཅད་དུ། །གསོ་བ་ཐམས་ཅད་སྦྱར་བྱ་ཞིང་། །རང་གི་གསོ་བར་གང་བཤད་དང་། །དེ་བཞིན་ཉམས་པའི་དུག་སེལ་སྦྱོར། །ཞེས་བྱ་བ་

ལ། དེ་ལ་རང་གི་འཕེལ་བར་བྱེད་པའི་གནས་སྐབས་སུ་ལྡང་བར་བྱེད་ན་གནས་སྐབས་ཐམས་ཅད་དུ་ཇི་སྐད་དུ་བསྟན་པའི་གསོབ་སྦྱར་བར་བྱ་ཞིང་། རང་གི་གསོ་བའི་སྨན་གང་དག་ཡིན་པ་དང་ཉམས་པའི་དུག་སེལ་བའི་སྦྱོར་བ་དག་བྱའོ། །ཨ་ལང་ཀ་ཡི་སོ་ཡིས་ཟིན། །མར་བསྐོལ་

བ་ཡིས་བསྲེག་པར་བྱ། །དུག་སྨན་དེ་དང་དེ་བསྐུ་ཞིང་། །མར་གྱི་སྙིང་པོ་བླུད་པར་བྱ། །ཞེས་བྱ་བ་ལ། །ཨ་ལང་ཀའི་སོས་ཟིན་པའི་མི་ལ་ནི་མར་བསྐོལ་བས་སོས་བཏབ་པའི་རྗེས་བསྲེག་པར་བྱའོ། །འདི་ལ་ཨརྐའི་འོ་མར་བཅས། །བཀྲུ་སྨན་དག་ཀྱང་མྱུར་དུ་གཏང་། །ཞེས་

เล่ม ๒๐๒ · หน้า 276b

བྱ་བ་ལ། ཨ་ལང་ཀའི་དུག་གིས་ཟིན་པ་འདི་ལ་ཨརྒའི་འོ་མ་དང་སྦྱར་བའི་སྨན་གཏང་བར་བྱའོ། །ཨང་ཀོ་ལའི་རྩ་བྱང་ཕྱོགས་ཆུ། །སྲང་གསུམ་མར་ནི་སྲང་གཅིག་བླུད། །ཅེས་བྱ་བ་ལ། ཨང་ཀོ་ལ་བྱང་ཕྱོགས་ན་གནས་པའི་རྩ་བ་བསྐོལ་བའི་ཆུ་སྲང་གསུམ་དང་མར་སྲང་

གཅིག་བསྲེས་ཏེ་བླུད་ན་ཡང་ཕན་ནོ། །ངྷ་དུ་ར་ཡི་འབྲས་བུ་དང་། །གི་རི་ཀར་ཎི་བ་སྦྲུ་བ། །བསྐོལ་བའི་ཁུ་བ་བླུད་པར་བྱ། །ཞེས་བྱ་བ་ལ། ངྷ་དུ་རའི་འབྲས་བུ་དང་གི་རི་ཀརྞི་དཀར་པོ་བསྐོལ་ཏེ་བླུད་པའམ། ཡང་ན་ངྷ་དུ་རའི་འབྲས་བུ་དང་། བ་སྦྲུ་བ་དཀར་པོ་བསྐོལ་ཏ་ེབླུད་པར་བྱའོ། །

ཏིལ་བཏགས་ལྡེ་བུ་ཨརྐ་ལྕགས། །འོ་མ་བུ་རམ་བསྲེས་བྱིན་ན། །སྤྲིན་ཚོགས་རླུང་གིས་གཏོར་བ་བཞིན། །ཨ་ལང་ཀ་ཡི་དུག་འཇོམས་བྱེད། །ཅེས་བྱ་བ་ལ། ཏིལ་བཏགས་པའི་ལྡེ་གུ་ལ་སོགས་པའི་སྨན་གཅིག་ཏུ་བསྲེས་ཏེ་བྱིན་ན་ཡང་ཇི་སྐད་སྨོས་པའི་ཡོན་ཏན་སྐྱེད་པར་བྱེད་

དོ། །སྔགས་བཅས་སྨན་དང་རིན་ཆེན་བཅས། །ཞི་བར་བྱེད་པ་དག་ཀྱང་སྦྱར། །ཞེས་བྱ་བ་ལ། ཨ་ལང་ཀས་ཟིན་པ་དེ་ལ་སྔགས་ལ་སོགས་པ་དེས་ཞི་བར་བྱེད་པའི་སྦྱོར་བ་དག་ཀྱང་བྱའོ། །རྐང་བཞི་པ་དང་རྐང་གཉིས་པའི། །སོ་འམ་སེན་མོས་སྣད་གྱུར་པ། །སྐྲང་ཞིང་

རྣགས་ལ་མདོག་དམར་ཞིང་། །ཚ་ན་ཆུ་སེར་འཛག་པ་ལ། །ཞེས་བྱ་བ་ལ། རྟ་དང་གླང་པོ་ཆེ་ལ་སོགས་པ་རྐང་བཞི་པ་དང་། རྐང་གཉིས་པ་སྟེ་མི་དང་། རྨ་བྱ་དང་ཁྱིམ་བྱ་ལ་སོགས་པའི་སོའམ་སེན་མོས་སྣད་པར་གྱུར་ནས་སྐྲངས་པ་དང་རྣགས་པ་ལ་སོགས་པའི་ནད་ལ་ནི་འོག་ནས་

བཤད་བའི་སྨན་གྱི་སྦྱོར་བ་བྱའོ། །ཨ་ཤྭ་ཀར་ཎ་ཀད་པ་ལ། །ཧ་ན་ས་ཏི་གོ་ཛི་ཧ། །ཡུག་སྣམ་སེར་པོ་གཉིས་ཀྱིས་བསྐུ། །སོ་དང་སེན་མོའི་དུག་འཇོམས་བྱེད། །ཅེས་བྱ་བ་ལ། ཨ་ཤྭ་ཀར་ཎ་ལ་སོགས་པའི་ལྡེ་གུས་བསྐུས་ན་སོ་ལ་སོགས་པས་སྣད་པའི་དུག་སེལ་བར་བྱེད་

དོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་བྱར་བ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་བརྒྱད་པའི་རྣམ་པར་འགྲེལ་པའོ།། །།དུག་གསོ་བའི་རྒྱུད་རྫོགས་སོ།།

เล่ม ๒๐๒ · หน้า 277a

དེ་ནས་བཅུད་ཀྱིས་ལེན་གྱི་ལེའུ་བཤད་པར་བྱའོ། །དེ་ལྟར་རེ་ཞིག་ནད་ཀྱིས་ཉེན་པ་དག་གི་སྨན་གྱི་སྦྱོར་བ་བཤད་ན། བདེ་ཞིང་ནད་མེད་པར་གནས་པའི་ལུས་ཀྱི་སྟོབས་དང་གཟི་བྱིན་སྐྱེད་པ་སྟོན་པ་ཡིན་ལ་དེ་ཡང་བཅུད་ཀྱིས་ལེན་དང་རོ་ཙ་བར་བྱེད་པ་ཡིན་པ་ལས་

བཅུད་ཀྱིས་ལེན་ནི་དེ་དག་ལས་ཀྱང་མཆོག་ཏུ་གྱུར་པ་ཡིན་པས་དེ་སྔར་བཤད་པ་ཡིན་ནོ། །ཚེ་རིང་དྲན་དང་ཡིད་གཞུངས་དང་། །ནད་མེད་གཞོན་དང་ལང་ཚོ་དང་། །གཟུགས་བཟང་མདོག་དང་སྐད་གསལ་དང་། །ལུས་དང་དབང་པོའི་སྟོབས་སྐྱེད་ཅིང་། །ཚིག་འགྲུབ་རོ་ཙ་མདངས་ལྡན་པ། །

བཅུད་ཀྱིས་ལེན་གྱིས་འཐོབ་པར་འགྱུར། །ཞེས་བྱ་བ་ལ། །བཅུད་ཀྱིས་ལེན་གྱི་ཆོ་ག་ཡང་དག་པར་གྱུར་པའི་སྐྱེས་བུས་ནི། ཚེ་རིང་བ་ལ་སོགས་པ་འཐོབ་པར་འགྱུར་བ་ཡིན་ནོ། །དངས་མ་ལ་སོགས་ཡོན་ཏན་ཅན། །ཐོབ་གནས་ཡིན་ཕྱིར་བཅུད་ཀྱིས་ལེན། །ཞེས་བྱ་བ་ལ།

དངས་མ་དང་ཁྲག་དང་ཤ་ལ་སོགས་པ་ཡོན་ཏན་དང་ལྡན་པ་ཁྱད་པར་ཅན་ཐོབ་ཅིང་རྙེད་པར་འགྱུར་བའི་རྒྱུ་ཡིན་པས་ན་བཅུད་ཀྱིས་ལེན་ཅེས་བྱའོ། །ན་ཚོད་དང་པོའམ་བར་མའི་ཚེ། །དབང་པོ་ཐུལ་བས་དེ་སྦྱར་ཏེ། །སྣུམ་ཆོས་བྱ་ཞིང་གཏར་ག་གདབ། །རྣམ་པ་ཀུན་ཏུ་སྦྱང་བྱས་གཏང་། །

ཞེས་བྱ་བ་ལ། བཅུད་ཀྱིས་ལེན་དེ་ཡང་ན་ཚོད་དང་པོའི་ཚེ་འམ། ན་ཚོད་བར་མའི་ཚེ་གཏང་བར་བྱས་ལ། དེ་ཡང་སྐྱེས་བུ་དབང་པོ་ཐུལ་ཅིང་ཡུལ་གྱིས་སེམས་མ་ཕྲོགས་པས་དེ་བསྟེན་ཅིང་སྦྱར་བར་བྱ་ལ། དེ་ཡང་སྣུམ་ཆོས་བྱས་ཤིང་གཏར་ག་གདབ་པ་དང་། སློན་སྨན་དང་བཀྲུ་སྨན་ལ་

སོགས་པ་ལས་རྣམ་པ་ལྡས་ལུས་སྦྱངས་ནས་གཏང་བར་བྱའོ། །མ་སྦྱངས་པ་ཡི་ལུས་ལ་ནི། །བཅུད་གྱིས་ལེན་དང་རོ་ཙ་བའི། །སྦྱོར་བྱས་དྲི་མ་ཅན་གྱི་ནི། །གོས་ཀྱི་ཚོན་ལྟར་དོན་མེ་འགྱུར། །ཞེས་བྱ་བ་ལ། གང་གི་ཕྱིར་ལུས་མ་སྦྱངས་ཤིང་དག་པར་མ་བྱས་པ་ལ། བཅུད་ཀྱིས་

ལེན་གྱི་སྦྱོར་བའམ། རོ་ཙ་བ་བྱས་ན་དེ་དོན་མེད་པར་འགྱུར་ཏེ། དཔེར་ན་དྲི་མ་ཅན་གྱི་གོས་ལ་ཚོན་གྱིས་ཁ་བསྒྱུར་ན་དེ་ལེན་དུ་མི་བཏུབ་པ་དང་འདྲའོ། །བཅུད་ཀྱིས་ལེན་གྱི་སྦྱོར་བ་ནི། །རྣམ་པ་གཉིས་སུ་དྲང་སྲོང་འདོད། །སྤྱིལ་པོར་འདུག་པ་གཙོ་བོ་སྟེ། །རླུང་དང་ཐན་པས་ཉེན་

เล่ม ๒๐๒ · หน้า 277b

ཅིག་ཤོས། །ཞེས་བྱ་བ་ལ། བཅུད་ཀྱིས་ལེན་གྱི་སྦྱོར་བ་ནི་དྲང་སྲོང་རྣམས་ཀྱིས་རྣམ་པ་གཉིས་སུ་བཤད་དེ། སྤྱིལ་པོའམ་ཁང་པར་ཞུགས་ཏེ་བསྒྲུབ་པ་ནི་གཙོ་བོ་ཡིན་ལ། རླུང་དང་ཐན་པས་ཉེན་པའི་སྦྱོར་བ་ནི་ཅིག་ཤོས་ཏེ་གཙོ་བོ་མ་ཡིན་པའོ། །ཁང་པ་རླུང་མེད་འཇིགས་པ་མེད། །

ཆོས་ལྡན་ཡོ་བྱད་འབྱོར་བའི་གྲོང་། །ས་ཕྱོགས་ཤིས་པའི་བྱང་ཕྱོགས་སུ། །ཁང་པ་སུམ་རིམ་དཀར་ཁུང་ཆུང་། །དུད་པ་ཉི་ཚན་སྦྲུལ་དང་རྡུལ། །བུད་མེད་གླེན་མས་མ་བགྲོད་པར། །ཡོ་བྱད་སྨན་པ་སྟ་གོན་བྱས། །ཁང་པ་ལེགས་པར་བྱི་དོར་བྱའོ། །ཞེས་བྱ་བ་ལ། སྨན་བསྟེན་པའི་

ཁང་པར་རླུང་མེད་པ་དང་། འཇིགས་ཤིང་བག་ཚ་བ་མེད་པ་དང་། ཆོས་དང་མི་འགལ་བའི་སྤྱོད་པ་དང་ལྡན་པ་དང་། སྨན་ལ་སོགས་པའི་ཡོ་བྱད་འབྱོར་པ་དང་གྲོང་གི་བྱང་ཤར་གྱི་མཚམས་ཀྱིས་ཕྱོགས་ཤིས་པར་ཁང་པ་སུམ་རིམ་དུ་བརྩིགས་པ་སྐར་ཁུང་ཆུང་ངུ་དང་ལྡན་པ་དང་། དུད་བལ་སོགས་

པས་མཉེན་པ། ཡོ་བྱད་དང་སྨན་པ་སྟ་གོན་བྱས་པ་ཁང་པ་སྐྱང་ནུལ་ལ་སོགས་པ་བྱི་དོར་བྱའོ། །དེ་ནས་ཚེས་གྲངས་བཟང་ཁྲུས་བྱས། །མཆོད་འོས་མཆོད་ནས་འཇུག་པར་བྱ། །ཞེས་བྱ་བ་ལ། དེའི་འོག་ཏུ་བཅུད་ཀྱིས་ལེན་བསྒྲུབ་པར་འདོད་པ་དེས་ཟླ་བ་ཡང་ངོའི་ཚེས་གྲངས་བཟང་པོར་ཁུས་

དང་གཙང་སྦྲ་བྱས་ཏེ། མཆོད་པར་འོས་པ་ལྷ་དང་བླ་མ་ལ་མཆོད་པ་བྱས་ཏེ་དེར་འཇུག་པར་བྱའོ། །དེར་ནི་སྦྱང་བྱས་དག་གྱུར་ནས། །བདེ་ཞིང་སྟོབས་ནི་སྐྱེད་པ་དང་། །ཚངས་པར་སྤྱོད་དང་བརྟན་པར་ལྡན། །དད་པར་ལྡན་ཞིང་དབང་པོ་ཐུལ། །སྦྱིན་དང་ཚུལ་ཁྲིམས་བདེ་བ་དང་། །

བརྟུལ་ཞུགས་ཆོས་ལ་མཆོག་ཏུ་གཞོལ། །ལྷ་ནི་རྗེས་སུ་དྲན་པར་ལྡན། །རིགས་པས་གཉིད་ལོག་གཉིད་མི་ལོག །སྨན་ལ་དགའ་ཞིང་ཚིག་འཇམ་པས། །བཅུད་ཀྱིས་ལེན་ནི་བརྩམ་པར་བྱ། །ཞེས་བྱ་བ་ལ། དེ་ནས་ཁང་པར་དེར་བཀྲུ་སྨན་དང་། སྐྱུག་སྨན་ལ་སོགས་པས་སྦྱང་བར་

བྱ་ཞིང་། དེ་བཞིན་དུ་ཉམས་བརྟ་བ་ལ་སོགས་པས་སྟོབས་ཐོབ་ཅིང་ནུས་པ་རྙེད་པའི་མི་ཚངས་པར་སྤྱོད་པ་དང་ལྡན་ཞིང་བུད་མེད་ལ་ཉལ་པོ་བྱ་བ་སྤང་བ་བརྟན་ཞིང་སྲན་ཐུབ་པ། དད་པ་དང་ལྡན་ཞིང་མོས་པ་ཆེ་བ། དབང་པོ་ཐུལ་ཞིང་ཡུལ་གྱིས་སེམས་མི་ཕྲོགས་པ་སྦྱིན་པ་དང་ཚུལ་ཁྲིམས་ལ་

เล่ม ๒๐๒ · หน้า 278a

སོགས་པའི་ཡོན་ཏན་གྱི་ཚོགས་ལ་མཆོག་ཏུ་གཞོལ་བ། དེ་བཞིན་དུ་ལྷ་རྗེས་སུ་དྲན་ཞིང་ཡིད་ལ་བྱེད་པའི་གཏམ་དང་ལྡན་པ་དང་། དེ་བཞིན་དུ་རིགས་ཤིང་རན་པར་གཉིད་ལོག་པ་དང་། མ་ལོག་པ་དང་ལྡན་པ་དང་། དེ་བཞིན་དུ་སྨན་གྱི་སྦྱོར་བ་ལ་དགའ་ཞིང་མོས་པ་

དང་། ཚིག་འཇམ་ཞིང་དེས་པའི་ངང་ཚུལ་དང་ལྡན་པ་དེ་ལྟ་བུས་བཅུད་ཀྱིས་ལེན་གྱི་ཆོ་ག་བརྩམ་པར་བྱ་ཞིང་དེ་ལ་འཇུག་པར་བྱའོ། །དེ་ཉིད་སྣུམ་ཆོས་དུགས་བྱས་ནས། །ཨ་རུ་ར་དང་སྐྱུ་རུ་ར། །རྒྱམ་ཚ་བཅའ་སྒ་པི་པི་ལིང་། །ཤུ་དག་ཡུང་བ་བྱི་དང་ག །བུ་རམ་ཆུ་དྲོན་སྦྱར་བ་ནི། །བླུད་ན་

ལེགས་པར་འཁྲུ་བར་འགྱུར། །ཞེས་བྱ་བ་ལ། སྐྱེས་བུ་དེ་དང་པོ་སྣུམ་ཆོས་དང་དུགས་བྱས་ནས། ཨ་རུ་ར་དང་བུ་རམ་གྱི་བར་དུ་ཆུ་དྲོན་དང་སྦྱར་ཏེ་བླུད་ན། མི་དེ་ལེགས་ཤིང་བདེ་བར་འཁྲུ་བར་འགྱུར་རོ། །དེ་ནས་ལུས་ནི་དག་འགྱུར་ཞིང་། །ཐུག་སོགས་རིམ་པར་སྤྱད་ནས་ཀྱང་། ཞག་གསུམ་

མམ་ནི་ཞག་ལྔའམ། །ཞག་བདུན་བར་དུ་ཞུན་མར་བཅས། །ནས་ཐུག་དག་པར་གྱུར་གྱི་བར། །སྦྱིན་ཞིང་བཤང་རྙིང་དག་པར་བྱ། །ཞེས་བྱ་བ་ལ། དེའི་འོག་ཏུ་ལུས་ཀྱི་སྦྱང་བ་བྱས་པའི་སྐྱེས་བུ་དེས་ཐུག་པ་ལ་སོགས་པའི་རིམ་པ་ཇི་སྐད་བཤད་པ་སྤྱད་ནས། ཞག་གསུམ་མམ། ཞག་

ལྔའམ། ཞག་བདུན་གྱི་བར་དུ་ཞུན་མར་དང་བཅས་པའི་ནས་ཐུག་སྦྱིན་པར་བྱ་བའམ། ཡང་ན་སྔར་གྱི་བཤང་བ་རྙིང་པ་དེ་དག་པར་གྱུར་གྱི་བར་དུ་ནས་ཐུག་སྦྱིན་པར་བྱའོ། །དེ་ལྟར་ལྟོ་ནི་སྦྱང་བྱས་ནས། །གོམས་པར་ཤེས་པས་གང་ཞིག་ལ། །གང་ཞིག་འཚམ་པ་དེ་ཀུན་བརྟགས། །བཅུད་

ཀྱིས་ལེན་ནི་སྦྱིན་པར་བྱ། །ཞེས་བྱ་བ་ལ། ཚུལ་དེ་ལྟར་ལྟོ་སྦྱང་བ་བྱས་པའི་སྐྱེས་བུ་གོམས་པའི་སྦྱོར་བ་ཤེས་པའི་སྨན་པས་ལུས་ཟུངས་ནད་གཞི་ལ་སོགས་པའི་ཚུལ་ཐམས་ཅད་བརྟགས་ཏེ། གང་ལ་ཇི་ལྟར་འཚམ་པའི་བཅུད་ཀྱིས་ལེན་དེ་སྦྱིན་པར་བྱའོ། །ཨ་རུ་ར་སྟོང་དེའི་སུམ་འགྱུར། །

སྐྱུ་རུ་ར་དང་བཅས་པ་དང་། །རྩ་བ་ལྔ་པོ་ལྔ་རྣམས་ནི། །སྲང་ནི་ཉིས་བརྒྱ་ལྔ་བཅུ་དག །ཆུ་ནི་བཅུ་འགྱུར་ནང་དུ་བསྐོལ། །ཁུ་བ་བཅུ་ཆ་ལུས་པ་རུ། །ཨ་རུ་རྣམ་རྒྱལ་སྐྱུ་རུ་ར། །བརྡུངས་ལ་རུས་པ་ཕྱུག་ནས་ནི། །ཁུ་བ་དེ་ཡི་ནང་དུ་ནི། །ཤིང་ཚ་སུག་སྨེལ་པི་པི་ལིང་། །གདུར་སྐྱེར་

เล่ม ๒๐๒ · หน้า 278b

པ་ཨ་རུ་ར། །ཙནྡན་མ་དུ་ཀ་པར་ནི། །ཤང་ཀ་པུཥྤཀ་ན་ཡ། །ཤུ་དག་གླ་བ་ཤིང་མངར་དང་། །བྱི་དང་ག་ནི་ཕུལ་རེའི་ཚད། །ཁ་ར་དཀར་སྲང་སྟོང་ཆིག་བརྒྱ། །ཞུན་མར་བྲེ་ནི་བཅུ་གཉིས་དང་། །ཏིལ་མར་བྲེ་ནི་བརྒྱད་བཅས་པ། །ལྡེ་གུར་གྱུར་གྱི་བར་དུ་བསྐོལ། །ཕབ་ལ་བསྒྲངས་པར་སྦྲང་

རྩི་ནི། །སྲང་ནི་སུམ་བརྒྱ་ཉི་ཤུ་གཞུག །དེ་ནས་གཟར་བུས་དཀྲུགས་ནས་ནི། །མར་གྱི་སྣོད་དུག་ཞུག་པར་བྱ། །གང་ཞིག་ཟས་གཅིག་ལ་མི་གནོད། །དེ་ནི་འདི་ཡི་ཚད་དུ་བཤད། །ཞུ་བའི་ཚེ་ན་དྲུག་ཅུ་པ། །འོ་མར་བཅས་པའི་ཁ་ཟས་སྦྱིན། །བཅུད་ཀྱས་ལེན་འདི་ཚངས་པས་བཤད། །

དགེ་ཞིང་དཔལ་ཡོན་ཅན་ཡིན་ཞིང་། །མཁའ་ལ་གནས་དང་བྱིས་པ་རྩེ། །དེ་བཞིན་དཀའ་ཐུབ་པས་བསྟེན་བྱས། །ལུས་སྙོམ་ངལ་དང་སྐྲ་དཀར་དང་། །གཉེར་མའི་སྐྱོན་ནི་སྤང་འགྱུར་ཞིང་། །ཡིད་གཞུངས་དྲན་དང་སྟོབས་ལྡན་ཞིང་། །ཚེ་རིང་པར་ཡང་འགྱུར་བ་ཡིན། །ཞེས་བྱ་བ་

ལ། ཨ་རུ་ར་རྡོག་མ་སྟོང་དང་། དེའི་སུམ་འགྱུར་གྱི་སྐྱུ་རུ་ར་དང་བཅས་པ་སྟེ་སྐྱུ་རུ་ར་སུམ་སྟོང་དང་། སྨན་གྱི་སྡེ་ཚན་སྣ་ཚོགས་ནས་བཤད་པའི་རྩ་བ་ལྔ་ངོ་ལྔ་སྤྱིར་སྲང་ཉིས་བརྒྱ་ལྔ་བཅུ་སྟེ། འདི་དག་ནི་སྨན་རེ་རེ་ཞིང་བཅུ་བཅུ་གཞུག་པར་བྱ་སྟེ། དེ་དག་ཐམས་ཅད་བསྡུས་པ་སྲང་གིས་བསྡུས་

ཏེ། དེའི་བཅུ་འགྱུར་གྱི་ཆུའི་ནང་དུ་བསྐོལ་ལ་དེའི་ཁུ་བ་བཅུ་ཆ་ལུས་པ་དང་། དེའི་འོག་ཏུ་ཨ་རུ་ར་རྣམ་པར་རྒྱལ་བ་དང་། སྐྱུ་རུ་ར་བརྡུངས་ལ་རུས་པ་ཕྱུང་སྟེ། ཁུ་བ་དེའི་ནང་དུ་ཤིང་ཚ་ནས་བྱི་དང་གའི་བར་དུ་སྨན་སྣ་རེ་ཞིང་ཕུལ་རེ་གཞུག་པར་བྱའོ། །དེ་བཞིན་དུ་ཁ་ར་དཀའ་བོ་སྲང་སྟོང་ཆིག་

བརྒྱ་དང་། དེ་བཞིན་དུ་ཞུན་མར་བྲེ་བཅུ་གཉིས་དང་། དེ་བཞིན་དུ་ཏིལ་མར་བྲེ་བརྒྱད་དེ། དེ་དག་ཐམས་ཅད་གཅིག་ཏུ་བསྲེས་ལ། གཟར་བུ་ལ་ཆགས་ཤིང་ལྡེ་གུར་གྱུར་གྱི་བར་དུ་བསྐོལ་ལ་ཐབ་ལས་ཕབ་སྟེ་བསྒྲངས་པའི་ནང་དུ་སྦྲང་རྩི་སྲང་སུམ་བརྒྱ་ཉི་ཤུ་གཞུག་པར་བྱའོ། །དེ་ནས་

དེའི་འོག་ཏུ་གཟར་བུས་ལེགས་པར་དཀྲུགས་ལ་དེ་མར་གྱི་སྣོད་དུ་བཅུག་ཅིང་བཞག་པར་བྱ་ལ། དེ་ལས་ཚད་ནི་ཇི་ཙམ་ཞིག་ཟོས་བཟའ་བའི་དུས་ལ་མི་གནོད་ཅིང་བདེ་བར་འཇུ་ནུས་པ་དེ་ཙམ་དུ་བཟའ་པར་བྱའོ། །སྨན་དེ་ཞུ་བའི་ཚེ་

เล่ม ๒๐๒ · หน้า 279a

ན་འབྲས་དྲུག་ཅུ་པའི་ཆན་འོ་མ་དང་བཅས་པའི་ཁ་ཟས་སྦྱིན་པར་བྱའོ། །བཅུད་ཀྱིས་ལེན་པ་འདི་ནི་ཚངས་པས་བཤད་པ་ཡིན་ཏེ། དགེ་ཞིང་དཔལ་སྐྱེད་པ་ལ་སོགས་པའི་ཡོན་ཏན་དང་ལྡན་ནོ། །དྲང་སྲོང་མཁའ་ལ་གནས་པ་དང་། བྱིས་པ་དང་རྩེ་བ་དང་། དེ་བཞིན་དུ་དཀའ་

ཐུབ་པ་གཞན་རྣམས་ཀྱིས་ཀྱང་བསྟེན་ཅིང་གོམས་པར་བྱས་པ་ཡིན་ལ། དེ་དག་ཀྱང་བཅུད་ཀྱིས་ལེན་འདི་ལུས་ཀྱི་སྙིམ་པ་དང་། ངལ་བ་ལ་སོགས་པ་སྤང་བར་འགྱུར་བ་དང་། ཡིད་གཞུངས་པ་དང་། དྲན་པ་ལ་སོགས་པ་དང་ལྡན་པ་ནས་ཚེ་ཤིན་ཏུ་རིང་བ་ལ་སོགས་པའི་ཡོན་ཏན་དང་ལྡན་པར་འགྱུར་

བ་ཡིན་ནོ། །སྐྱོན་མེད་ཨ་རུ་ར་དང་སྐྱུ་རུ་ར། །སྟོང་དང་པི་པི་ལིང་ནི་སྟོང་དང་བཅས། །རྒྱ་སྐྱེགས་ཤིང་གཞོན་ཐལ་བའི་ཆུ་སྦྱར་བ། །སྣོད་དུ་བཞག་སྟེ་ལེགས་པར་སྤངས་ནས་ནི། །སླར་ཕྱུང་གྲིབ་མར་སྐམས་ཏེ་ཕྱེ་མར་བྱས། །ཁ་ར་དཀར་པོ་བཞི་ཆ་མར་དང་ནི། །སྦྲང་རྩི་བཞི་འགྱུར་བཅས་པ་

མར་གྱི་ནི། །བུམ་པར་བཅུག་སྟེ་ས་བརྐོས་པར་བཞག་ལ། །ཟླ་བ་དྲུག་ལོན་ནས་ནི་སླར་ཕྱུང་སྟེ། །སྔ་དྲོའི་དུས་སུ་མེ་དྲོད་ཇི་བཞིན་བཟའ། །རྟག་ཏུ་མཐུན་པའི་ཟས་ན་ལོ་བརྒྱ་འཚོ། །ནད་མེད་པ་དང་སྐྲ་དཀར་གཉེར་མ་མེད། །ལུས་ཀྱི་སྟོབས་འཕེལ་རྒྱས་

པར་འགྱུར་བ་དང་། །མཆོག་ཏུ་དྲན་གསལ་ཡིད་ནི་གཞུངས་པར་འགྱུར། །ཞེས་བྱ་བ་ལ། ཨ་རུ་ར་དང་སྐྱུ་རུ་ར་སྐྱོན་མེད་ཅིང་ཁུ་བ་དང་སྨན་གྱི་ནུས་པ་ལ་སོགས་པ་རྫོགས་པར་གྱུར་པ་དང་། དེ་བཞིན་དུ་པི་པི་ལིང་སྟོང་དང་བཅས་པ་དང་། དེ་བཞིན་དུ་རྒྱ་སྐྱེགས་ཤིང་པ་ལ་ཤ་ཞེས་བྱ་བ་ཐལ་

བར་བྱས་ཏེ་ཆུར་གཟགས་པ་དང་སྦྱར་ཏེ། སྣོད་དུ་བཞག་ལ་སྤངས་པར་གྱུར་ནས་སླར་ཕྱུང་སྟེ་གྲིབ་མའི་ནང་དུ་སྐམས་ནས་ཕྱེ་མར་བྱས་པ་དང་། ཁ་ར་དཀར་པོ་ཕྱེ་མའི་བཞི་ཆ་ལས། དེ་བཞིན་དུ་མར་དང་སྦྲང་རྩི་སྨན་གྱི་བཞི་འགྱུར་དང་བཅས་པ་དེ་དག་ཐམས་ཅད་གཅིག་ཏུ་བསྡོམས་ཏེ་མར་གྱི་

བུམ་པར་བཅུག་ནས་ས་བརྐོས་པའི་ནང་དུ་བཞག་ལ། ཟླ་བ་དྲུག་ལོན་པ་དང་། དེའི་འོག་ཏུ་སླར་ཕྱུང་སྟེ་སྔ་དྲོའི་དུས་སུ་ཇི་ཙམ་དུ་རན་པར་ཟོས་ལ། དེ་ཞུ་བ་དང་རྗེས་སུ་མཐུན་པའི་ཁ་ཟས་སཱ་ལུའི་ཆན་ལ་སོགས་པ་བཟའ་བར་བྱའོ། །དེ་ལྟ་བུའི་སྦྱོར་བས་སྨན་ཐམས་ཅད་ཟོས་ན། ལོ་བརྒྱའི་

เล่ม ๒๐๒ · หน้า 279b

བར་དུ་འཚོ་བར་འགྱུར་ཞིང་ནད་དང་སྐྲ་དཀར་དང་གཉེར་མ་མེད་པར་འགྱུར་བ་དང་། ལུས་ཀྱི་སྟོབས་འཕེལ་བ་ལ་སོགས་པར་འགྱུར་རོ། །སྐྱོན་མེད་རྒྱ་སྐྱེགས་ཤིང་རློན་པ། །ཐོར་ཏོ་བཅད་ལ་བཞོག་པ་ཡི། །སྡོད་བུ་ཁྲུ་གཉིས་བརྐོས་པའི་ནང་། །སྐྱུ་རུ་ར་ནི་སར་པས་དགང་། །རྩ་བའི་

བར་དུ་འཇག་མས་དཀྲི། །པདྨ་སྐྱེས་པའི་འདམ་གྱིས་བསྐུ། །དེ་ནས་རླུང་མེད་གནས་སུ་ནི། །ལྕི་བ་སར་པ་གཙང་མས་བཙོ། །ཚོས་ཤིང་སྐྱུ་རུ་ར་སྤངས་ནས། །སྦྲང་རྩི་མར་བཅས་མི་ཡིས་བཟའ། །དེ་རྗེས་འོ་མ་མར་བཅས་པ། །ཅི་འདོད་པར་ནི་བཏུང་བར་བྱ། །དེ་ཉིད་ཀྱིས་ནི་ཟླ་གཅིག་

པར། །བསྟེན་ཞིང་སྤང་བར་བྱ་བ་རྣམས། །དེ་ནི་འབད་དེ་སྤང་བར་བྱ། །ཆུ་ནི་གྲང་མོ་ལག་པ་ཡིས། །རེག་པ་ཙམ་ཡང་མི་བྱའོ། །དེ་ལྟར་ཞག་ནི་བཅུ་གཅིག་འདས། །སྐྲ་སོ་སན་མོ་ལྷགས་པར་འགྱུར། །དེ་ནས་ཉིན་ཞག་ཉུང་ཟད་ནས། །གཟུགས་བཟང་བུད་མེད་ལ་ཕོད་ཅིང་། །སྟོབས་

ནི་གླང་པོ་དང་འདྲར་འགྱུར། །མཆོག་ཏུ་ཡིད་གཞུངས་སྙིང་སྟོབས་དང་། །བློ་ལྡན་ལོ་སྟོང་འཚོ་བར་འགྱུར། །ཞེས་བྱ་བ་ལ། པ་ལ་ཤ་རུལ་པ་ལ་སོགས་པའི་སྐྱོན་མེད་པ་རློན་པའི་ཐོར་ཏོ་བཅད་ལ་བཞོག་པའི་ནད་གི་སྡོང་བུ་ཁྲུ་གཉིས་པ་བརྐོས་ལ། དེའི་ནང་དུ་སྐྱུ་རུ་ར་སར་པས་བཀང་ལ།

དེའི་འོག་ཏུ་འཇག་མས་རྩ་བའི་བར་དུ་དཀྲི་བར་བྱའོ། །དེ་ནས་པདྨ་སྐྱེས་པའི་འདམ་གྱི་བསྐུ་བར་བྱའོ། །དེའི་འོག་ཏུ་རླུང་མེད་པའི་གནས་སུ་དགོན་པའི་ལྕི་བ་སར་པའི་མེས་བཙོས་ལ། དེ་ནས་སྐྱུ་རུ་ར་དེ་སྦྲང་རྩི་དང་མར་དང་བཅས་པར་བཟའ་བར་བྱའོ། །དེའི་འོག་ཏུ་སྐོམ་དུ་འོ་མ་ངོམས་པར་བླུད་

པར་བྱ་ཞིང་། འོ་མ་དེ་ཉིད་དང་ཟླ་བ་གཅིག་གི་བར་དུ་གནས་པར་བྱ་ཞིང་། ཟས་གཞན་མི་བཟའ་བར་བྱ་བ་དང་། དེའི་བཅུད་ཀྱིས་ལེན་གྱི་སྦང་བར་བྱ་བའི་སྤྱོད་ལམ་ནི། འབད་དེ་སྤང་བར་བྱ་བ་དང་། ཆུ་གྲང་མོ་ནི་ཐ་ན་ལག་པས་ཀྱང་མི་རེག་པར་བྱའོ། དེ་ལྟ་བུའི་ཚུལ་གྱིས་ཞག་བཅུ་གཅིག་

འདས་པར་གྱུར་པ་དང་། སྐྲ་དང་སོ་ལ་སོགས་པ་ལྷགས་པར་འགྱུར་རོ། །དེ་ནས་ཉིན་ཞག་གི་དུས་ཉུང་ཟད་ཅིག་ན་གཟུགས་བཟང་པོ་འབྱུང་བར་འགྱུར་བ་དང་། བུད་མེད་ལ་ཕོད་པལ་སོགས་པའི་ཡོན་ཏན་རྣམས་འབྱུག་བར་འགྱུར་རོ། །རྩ་བ་བཅུ་པ་བ་བླ་དང་། །གླ་སྒང་ཐལ་ཏྲེས་ཛི་བ་ཀ།།

เล่ม ๒๐๒ · หน้า 280a

ཨུཏྤ་ལ་དང་པ་རྞི་གཉིས། །ཀར་ཀ་ཏ་སྲིང་པི་པི་ལིང་། །མེད་སུག་སྨེལ་ཏ་མ་ལ། །འཚོ་བྱེད་རྒུན་འབྲུམ་ཨ་ག་རུ། །མ་ནུ་ཟུར་བ་སྦྲུ་བ། །རམ་ཉེ་བ་གཉིས་སླེ་ཏྲེས་དང་། །ཀ་ཀ་ནས་ཨ་རུ་ར། །བ་ཤ་ཀའི་རྩ་བི་ད་རི། །སྲང་རེ་གཅིག་ཏུ་བསྲེས་ནས་

ནི། །སྐྱུ་རུ་རའི་འབྲུ་ལྔ་བརྒྱ་ནི། །ཆུ་བྲེ་བཅུ་དྲུག་ནང་དུ་བསྐོལ། །དེ་ཡི་ཁུ་བ་བཞི་ཆ་ལུས། །སྐྱུ་རུ་ར་ཡི་རུས་པ་བསལ། །མར་དང་ཏིལ་མར་སྲང་བཅུ་གཉིས། །ནང་དུ་ལེགས་པར་བརྔོས་ནས་ནི། །ཁ་ར་དཀར་པོ་སྲང་ལྔ་བཅུ། །བཏགས་ཏེ་ལྡེ་གུའི་ཚུལ་དུ་བསྐོལ། །སྣུམ་ཕྱེད་

ཀྱི་ནི་སྦྲང་རྩི་གཞུག །སྨིག་རྐང་སྲང་ནི་བཞི་དག་དང་། །པི་པི་ལིང་ནི་སྲང་གཉིས་དང་། །དྲི་བཟངས་བཞི་ནི་སྲང་གཅིག་གཞུག །དེ་ལས་ཚད་ཙམ་བཟའ་བྱ་ཞིང་། །ཁང་པར་གནས་ཤིང་འཕྲོད་ཟས་བསྟེན། །འདི་ནི་དྲང་སྲོང་འཕོ་བས་བསྟེན། །དྲང་སྲོང་འཕོ་བས་གང་ཟོས་པས། །

རྒས་པས་ཉེན་པར་གྱུར་པ་ཡང་། །བུད་མེད་ཀྱི་ནི་མིག་ཏུ་སྡུག །ཆོ་ག་བཞིན་དུ་བསྟེན་གྱུར་ན། །ལུད་པ་དབུགས་མི་བདེ་རིམས་དང་། །སྐེམས་དང་སྙིང་ནད་དྲེག་ནད་དང་། །གཅིན་དང་ཁུ་ཆུ་ལ་གནས་དང་། །སྐད་འགགས་པ་ཡང་སེལ་བར་བྱེད། །བྱིས་པ་རྒན་དང་གློ་འགྲམ་གཅོད། །

རིད་པའི་ཉམས་སྟོབས་འཕེལ་བར་བྱེད། །ཡིད་གཞུངས་དྲན་དང་མདངས་ལྡན་དང་། །ནད་མེད་ཉིད་དང་ཚེ་འཕེལ་དང་། །རླང་ནི་བདེ་བར་རྒྱུ་བྱེད་ཅིང་། །བུད་མེད་ལ་ཕོད་སྟོབས་དང་ནི། །དབང་པོ་གསལ་ཞིང་མེ་དྲོད་སྐྱེད། །ཅེས་བྱ་བ་ལ། རྩ་བ་བཅུ་དང་བ་བླ་ལ་སོགས་པའི་སྨན་སྣ་རེ་ཞིང་

སྲང་རེ་གཅིག་ཏུ་བསྲེས་པ་དང་། སྐྱུ་རུ་རའི་རྡོག་མ་ལྔ་བརྒྱ་ཆུ་བྲེ་བཅུ་དྲུག་གི་ནང་དུ་བསྐོལ་ལ། དེའི་ཁུ་བ་བཞི་ཆ་ལུས་པ་དང་། དེ་ལས་སྐྱུ་རུ་ར་བཏུས་ཏེ་རུས་པ་བསལ་ལ་མར་དང་ཏིལ་མར་སྲང་བཅུ་གཉིས་ཀྱི་ནང་དུ་བརྔོས་ལ། དེའི་འོག་ཏུ་ཁ་ར་དཀར་པོ་སྲང་ལྔ་བཅུ་དང་བཅས་པ་དེ་ལྡེ་གུའི་སྦྱོར་

བས་བསྐོལ་ལ་ཚོས་ནས་བསྒྲངས་ལ། སྦྲང་རྩི་སྣུམ་གྱི་ཕྱེད་དེ་སྲང་དྲུག་ལ་སོགས་པ་བཅུག་ལ། ལྡེ་གུ་དེ་ལས་ཚད་ཙམ་བཟའ་ཞིང་། ཁང་བར་གནས་ཏེ་ཁ་ཟས་འཕྲོད་པ་བསྟན་པར་བྱའོ། །འདི་ནི་དྲང་སྲོང་འཕོ་བས་བསྟེན་ཞིང་ཟོས་པ་ཞེས་བྱ་བའི་བཅུད་ཀྱིས་ལེན་ཡིན་ཏེ། བཅུད་

เล่ม ๒๐๒ · หน้า 280b

ཀྱིས་ལེན་གང་ཞིག་ཟོས་པས་དེ་རྒས་འཁོགས་པར་གྱུར་པ་ཡང་གཟུགས་བཟང་ཞིང་བུད་མེད་ཀྱི་མིག་ཏུ་སྡུག་པར་འགྱུར་རོ། །འདི་ཆོ་ག་བཞིན་བསྟེན་པར་གྱུར་ན། ལུད་པ་དང་དབུགས་མི་བདེ་བ་ལ་སོགས་པ་ནས། དབང་པོ་གསལ་ཞིང་མེ་དྲོད་སྐྱེད་པར་བྱེད་པའི་པར་གྱི་ཡོན་ཏན་དང་ལྡན་པ་

ཡིན་ནོ། །ཤིང་མངར་སྨིག་རྐང་པི་པི་ལིང་། །ལྕེ་མྱང་ཚ་དང་བཅས་པ་དང་། །ལྕགས་ནི་སྣ་རེ་གསེར་དང་ནི། །ཤུ་དག་སྦྲང་རྩི་ཞུན་མར་རམ། །ཁ་ར་དཀར་པོ་འབྲས་བུ་གསུམ། །ལོ་གཅིག་བསྟེན་ན་བཅུད་ལེན་འགྱུར། །ནད་ཀུན་འཇོམས་ཤིང་དྲན་པ་དང་། །ཡིད་གཞུངས་

བློ་ནི་སྐྱིད་པར་བྱེད། །ཅེས་བྱ་བ་ལ། ཤིང་མངར་རམ། སྨིག་རྐང་ངམ། པི་པི་ལིང་ངམ། ལྕེ་མྱང་ཚའམ། ལྕགས་ལྔ་པོ་རེ་རེའམ། སོ་སོར་རམ། གསེར་རམ། ཤུ་དག་གམ། མར་དང་སྦྲང་རྩིའམ། ཁ་ར་དཀར་པོ་འབྲས་བུ་གསུམ་དང་བཅས་པ་ལོ་གཅིག་ཏུ་བསྟེན་ན།

བཅུད་ཀྱིས་ལེན་དུ་འགྱུར་ཞིང་ནད་ཐམས་ཅད་འཇོམས་པར་བྱེད་པ་ཡིན་ནོ། །མ་དུ་ཀ་པརྞ་ཡི་ཁུ་བའམ། །ཤིང་མངར་ཕྱེ་མ་འོ་མར་བཅས་པ་ནི། །ལྷན་ཅིག་སྦྱར་བ་མེ་དྲོད་ཇི་བཞིན་སྦྱིན། །སླེ་ཏྲེས་ཤང་ཀ་པུཥྤའི་མེ་ཏོག་བཅས། །ལྡེ་གུར་སྦྱར་བ་མེ་དྲོད་ཇི་བཞིན་དུ། །བསྟེན་ན་ཚེ་ནི་

སྦྱིན་པར་བྱེད་པ་དང་། །ནད་འཇིག་སྟོབས་སྐྱེད་མདོག་ནི་གསལ་བྱེད་ཅིང་། །མེ་དྲོད་སྐད་གསལ་ཡིད་གཞུངས་སྐྱེད་པར་བྱེད། །བཅུད་ཀྱིས་ལེན་གྱི་སྦྱོར་བ་འདི་དག་ལས། །ཤང་ཀ་པུཥྤའི་སྦྱོར་འདི་ཡི་དག་ཞུངས་མཆོག །ཅེས་བྱ་བ་ལ། མ་དུ་ཀ་པརྞི་ཞེས་བྱ་བ་བསྐོལ་བའི་ཁུ་བ་

འམ། ཤིང་མངར་གྱི་ཕྱེ་མ་འམ། སླེ་ཏྲེས་ཀྱི་ཕྱེ་མ་འམ། ཤང་ཀ་པུཥྤའི་རྩ་བའི་ལྡེ་གུ་མེ་དྲོད་ཇི་ལྟ་བ་བཞིན་དུ་བསྟེན་ན་བཅུད་ཀྱིས་དུ་འགྱུར་ཞིང་། ཚེ་སྦྱིན་པར་བྱེད་པ་ལ་སོགས་པ་ཡིན་ནོ། །བཅུད་ཀྱིས་ལེན་གྱི་སྦྱོར་བ་འདི་དག་ལས་ཤང་ཀ་པུཤཥྤའི་སྦྱོར་བ་ནི་མཆོག་ཏུ་ཡང་ཡིད་

གཞུངས་པར་བྱེད་པ་ཡིན་ནོ། །སྤངས་མ་པུ་ཙེ་ཤེལ་དང་པ་ཡ་སྱ། །ཤིང་མངར་ཐལ་ཏྲེས་ཙནྡན་འབྲས་བུ་གསུམ། །ཤུ་དག་ཚ་བ་གསུམ་དང་སེར་པོ་གཉིས། །པ་ཏོ་ལིའི་རྩ་རྒྱམ་ཚ་ཞིབ་ཏུ་བཏགས། །མར་དང་འོམ་བྲེ་ནི་བཅུ་དྲུག་དང་། །ཤང་ཀ་བཥྤལི་བུ་བསུམ་འགྱུར་བསྐོལ། །

เล่ม ๒๐๒ · หน้า 281a

བླུད་ན་གླེན་པའང་ཚིག་ལ་དབང་འགྱུར་ཞིང་། །ཐོས་འཛིན་སྤོབས་པ་ཆེ་ཞིང་ནད་མེད་འགྱུར། །ཞེས་བྱ་བ་ལ། སྤངས་མ་ལ་སོགས་པ་དེ་དག་ཞིབ་ཏུ་བཏགས་ལ་མར་དང་འོ་མ་བྲེ་བཅུ་དྲུག་དང་། ཤང་ཀ་པུཥྤའི་ཁུ་བ་མར་གྱི་སུམ་འགྱུར་དང་བསྐོལ་ཏེ་བླུད་ན་སྐྱེས་

བུ་བླུན་པོ་དག་ཀྱང་ཚིག་གསལ་ཞིང་དག་ལ་དབང་བ་དང་། ཐོས་པ་འཛིན་པ་དང་། ནད་མེད་པ་ཉིད་དུ་འགྱུར་རོ། །པདྨའི་རྩ་བ་སྡོང་བུ་དང་། །གེ་སར་ནང་གི་ས་བོན་རྣམས། །གསེར་བཅས་མར་དང་འོ་མ་ནི། །བྲེ་ནི་བཅུ་དྲུག་ནང་དུ་བསྐོལ། །བངྨ་ལྔ་པའི་ཐིག་ལེ་ཞེས། །ས་སྟེང་དག་དུ་

གྲགས་པ་ཡིན། །ཚུལ་བཞིན་བསྟེན་ན་སྐྱེས་བུ་ནི། །ཉམས་སྟོབས་ཟད་པ་འཕེལ་བར་བྱེད། །ཅེས་བྱ་བ་ལ། པདྨའི་རྩ་བ་ལ་སོགས་པ་ཚུལ་བཞིན་དུ་བསྐོལ་བའི་བཅུད་ཀྱིས་ལེན་ནི་མིང་པདྨ་ལྔ་པ་ཞེས་གྲགས་པ་ཡིན་ཏེ། དེ་ཚུལ་བཞིན་དུ་བསྟེན་ན་མཆོག་ཏུ་སྐྱེས་བུའི་ཉམས་སྟོབས་སྐྱེད་

པར་བྱེད་པ་ཡིན་ནོ། །གང་ཞིག་ཨུཏྤལ་སྡོང་བུ་ལོ། །རྩ་བ་གེ་སར་ལྡན་བསྐོལ་བ། །ཨུཏྤལ་བཞི་བར་གྲགས་པ་ཡིན། །གསེར་དང་བཅས་པའི་བཅུད་ལེན་གྱི། །སྦྱོར་བ་བསྟེན་ན་བ་ལང་ཡང་། །ཡིད་གཞུངས་འགྱུར་ན་མིར་ཅི་སྨོས། །ཞེས་བྱ་བ་ལ། སྨན་མར་གང་ཨུདྤ་ལའི་སྡོང་བུ་དང་ལོ་མ་

དང་རྩ་བ་དང་ལྡན་པར་བསྐོལ་ཞིང་གསར་དང་བཅས་པ་སྦྱར་བའི་བཅུད་ཀྱིས་ལེན་ནི་ཨུཏྤ་ལ་བཞི་པ་ཡིན་ཏེ། དེ་བསྟེན་ན་བ་ལང་ཡང་ཡིད་གཞུངས་ཤིང་བློ་དང་ལྡན་པར་འགྱུར་བ་ཡིན་ན། མི་སྐྱེས་ནས་ལྟ་སྨོས་ཀྱང་ཅི་དགོས། །པྲམྷི་ཤུ་དག་ཤང་ཀ་པུཥྤ་དང་། །རྒྱམ་ཚ་མང་ཚ་ཀྵར་བི་ཤལ། །

བྲམྷི་སོ་བར་ཙ་ལ་པི་པི་ལིང་། །རེ་རེ་ནས་ནི་གསུམ་གསུམ་ཙམ་གྱི་ཚད། །གསེར་ནི་ནས་གཉིས་དུག་ནི་ཏིལ་འབྲུ་ཙམ། །ཞུན་མར་སྲང་གཅིག་འདི་དག་ཞིབ་ཏུ་སྦྱར། །ལེགས་པར་བཏང་སྟེ་ཞུ་བར་གྱུར་ནས་ནི། །མར་བཅས་ཁ་ཟས་ལོ་གཅིག་བར་དུ་བསྟེན། །དྲན་དང་ཡིད་གཞུངས་བློ་ནི་

འཕེལ་འགྱུར་ཞིང་། །ན་དང་རྒས་པ་དང་གད་ལས་འདས་པ་དང་། །སྙོམ་དང་ངལ་དུབ་སེལ་བྱེད་ལོ་བརྒྱར་འཚོ། །དཔལ་དང་གཟི་བརྗིད་མདངས་དང་ལྡན་པར་འགྱུར། །ཁྱད་པར་དུ་ནི་མཛེ་ནད་ཤ་བཀྲ་སྐྲན། །དུག་དང་དབྱིག་དུག་རིམས་དང་སྨྱོ་བྱེད་དང་། །སྲིང་སྐུང་རིག་བྱེད་སྔགས་བྱས་གཤེད་

เล่ม ๒๐๒ · หน้า 281b

བྱེད་དང་། །རླུང་ནད་སྟོབས་ཆེན་འདིས་ནི་ཞི་བར་བྱེད། །ཅེས་བྱ་བ་ལ། བྲ་མྷི་ནས་པི་པི་ལིང་གི་སྨན་སྣ་རེ་རེ་ཞིང་ནས་གསུམ་གྱི་ཚད་དང་། གསེར་ནི་གཉིས་ཀྱི་ཚད་དང་། དུག་ཏིལ་འབྲུ་གཅིག་ཙམ་དང་། ཞུན་མར་སྲང་གཅིག་སྟེ། དེ་དག་ཐམས་ཅད་གཅིག་ཏུ་སྦྱར་ནས་ཟོས་ཏེ། དེ་ཞུ་བར་གྱུར་

བ་དང་། ཁ་ཟས་མར་དང་སྦྲང་རྩི་མང་པོ་ཟོས་ལ་ཚུལ་དེ་ལྟར་ལོ་གཅིག་གི་བར་དུ་བསྟེན་ན་དྲན་པ་དང་། །ཡིད་གཞུངས་པ་རྣམ་པར་འཕེལ་བར་འགྱུར་ཞིང་། ནད་ལ་སོགས་པ་ལས་འདས་པ་དང་། ལོ་བརྒྱ་ཚང་བའི་བར་དུ་འཚོ་ཞིང་དཔལ་ལ་སོགས་པ་དང་ལྡན་པར་འགྱུར་བ་དང་། ཁྱད་པར་

དུ་ཡང་བཅུད་ཀྱིས་ལེན་འདིས་མཛེ་ལ་སོགས་པ་སེལ་བར་བྱེད་པ་དང་། དེ་བཞིན་དུ་སྲིད་སྲུང་གི་རིག་བྱེད་ལས་བཤད་པའི་ཆོ་གས་གཤེད་བྱེད་དང་། གནོད་པའི་ལས་ཀྱི་སྦྱོར་བ་བྱས་པ་དང་། རླུང་ནད་ཤིན་ཏུ་མི་བཟད་པ་དག་ཀྱང་ཞི་བར་བྱེད་པ་ཡིན་ནོ། །ནག་པ་ལ་སྟོན་གྱི་ཚེ། །སྐར་མ་རྒྱལ་

ལ་བབ་པར་བཏུ། །དེ་ཡི་རྩ་བ་ཞོ་གཉིས་ཙམ། །ཕྱེར་བཏགས་འོ་མ་སྦྱར་ཏེ་བཏུང་། །ཡང་ན་མར་དང་སྦྲང་རྩིར་སྦྱར། །བལྡག་ཅིང་ཟས་མེད་འོ་མས་འཚོ། །དེ་ལྟར་ལོ་གཅིག་ཟོས་གྱུར་ན། །ལོ་བརྒྱད་འཚོ་ཞིང་སྟོབས་ལྡན་འགྱུར། །ཞེས་བྱ་བ་ལ། ནག་བལ་ཞེས་བྱ་བའི་སྨན་སྟོན་གྱི་དུས་

ལ་བབ་པ་དང་། སྐར་མ་རྒྱལ་དང་གཟའ་ཟླ་བ་ལ་བབས་པའི་དུས་སུ་བཏུས་ཏེ། དེའི་རྩ་བ་ཞོ་གཉིས་ཙམ་གྱི་ཕྱེ་མ་འོ་མ་དང་སྦྱར་ཏེ་བཏུང་བའམ། ཡང་ན་མར་དང་སྦྲང་རྩི་སྦྱར་ཏེ་བལྡག་ཅིང་འོ་མས་འཚོ་བར་བྱས་ཏེ། དེ་ལྟར་ལོ་གཅིག་གི་ནང་དུ་བསྟེན་ན་ལོ་བརྒྱའི་བར་དུ་འཚོ་བ་དང་། སྟོབས་

ཤིན་ཏུ་ཆེ་བར་འགྱུར་རོ། །གཟེ་མ་འབྲས་བུ་སྐྱེས་པ་རྩ་བར་བཅས། །གྲིབ་མར་སྐམས་ཏེ་ཞིབ་ཏུ་བཏགས་ནས་ནི། །རང་གི་ཁུ་བར་སྦངས་བ་དེ་ལས་ནི། །ཆེ་ཚད་ཁྱོར་གང་ཙམ་དུ་བྱས་གྱུར་གང་། །དེ་དང་འོ་མ་སྦྱར་ནས་བཟའ་བྱ་ཞིང་། །ཞུ་ནས་འོ་མ་སྲང་ནི་ཉིས་བརྒྱ་ཟོས། །གཟུགས་

བཟང་སྐལ་ལྡན་ལོ་བརྒྱ་ཐུབ་པ་དང་། །འདོད་སྤྱོད་ཁྱུ་མཆོག་བ་ལང་ཚོགས་གནས་འདྲ། །ཞེས་བྱ་བ་ལ། གཟེ་མ་འབྲས་བུ་སྐྱེས་པ་རྩ་བ་དང་བཅས་པ་གྲིབ་མར་སྐམས་ཏེ་ཞིབ་ཏུ་བཏགས་པའི་ཕྱེ་མ་རང་གི་ཁུ་བའི་ནང་དུ་སྦངས་ཏེ། གཟེ་མ་དེ་ལས་ཆེ་ཚང་རང་གི་ཁྱོར་གང་ཙམ་སྟེ་སྲང་

เล่ม ๒๐๒ · หน้า 282a

གཉིས་ཀྱི་ཚད་ཙམ་ཡང་འོ་མ་དང་སྦྱར་ཏེ། བཟའ་ཞིང་ལོངས་སྤྱོད་ལ། སྨན་དེ་ཁུ་བར་གྱུར་ནས་འོ་མ་ཉིད་སྲང་ཉིས་བརྒྱ་དང་། འབྲས་ཆན་བསྲེས་བཟོས་བར་གྱུར་ན་གཟུགས་བཟང་བ་ལ་སོགས་པ་འཐོབ་པར་འགྱུར་ཞིང་། ཇི་ལྟར་བ་ལང་གི་ཚོགས་ཀྱི་

ནང་ན་ཁྱུ་མཆོག་འདོད་པ་སྤྱོད་པ་དང་འདྲ་བར་འདོད་པ་སྤྱོད་ནུས་པར་འགྱུར་རོ། །བར་ཧི་ཡི་སྡོང་བུ་རློན་པ་ནི། །འོ་མར་སྦྱར་བཟོས་ཤིང་འོ་མ་བཏུང་། །ཟླ་གཅིག་བར་དུ་ཁ་ཟས་འོ་མས་འཚོ། །རྒས་པའི་ཚོགས་ལས་ངེས་པར་རྒྱལ་འགྱུར་རོ། །ཞེས་བྱ་བ་ལ། སྨན་བར་ཧིའི་སྡོང་བུ་རློན་པ་འོ་མ་དང་

སྦྱར་བ་བསྟེན་ཅིང་ཟླ་བ་གཉིས་པ་ལ་ཡང་སྡོང་བུ་དེ་ཟས་གཞན་མི་བཟའ་བར་འོ་མ་དང་བཅས་པར་བསྟེན་ན་སྐྱེས་བུ་དེ་སྦྱོར་བ་དེས་རྒས་པ་ལས་ངེས་པར་རྒྱལ་བར་འགྱུར་རོ། །ཡང་ན་དེ་ཡི་སྡོད་བུའི་ཕྱེ་ཞིབ་མོ། རང་གི་ཁུ་བ་དང་ནི་ལེགས་སྦྱར་ཏེ། །མར་དང་སྦྲང་རྩིར་སྦྱར་བའི་ལྡེ་གུ་བཟའ། །ཡང་

ན་དེ་བསྐོལ་མར་ནི་བཏུང་བར་བྱ། །ཞེས་བྱ་བ་ལ། ཡང་ན་དེའི་སྡོང་བུ་ཕྱེ་མ་ཞིབ་མོར་བཏགས་ལ་རང་ཉིད་བསྐོལ་བའི་ཁུ་བ་དང་སྦྱར་ཏེ། ཇི་སྐད་སྨོས་པའི་ལྡེ་གུའམ། སྨན་མར་ཟོས་ན་ཡང་ཡོན་ཏན་སྔ་མ་དང་འདྲའོ། །དེ་བཞིན་ཨ་ཏི་བལ་བི་ད་རི། །ཤིང་མངར་དང་ནི་མོན་སྣེའུ་དམེ་རུ་དང་། །

ཛི་བན་ཏི་དང་ར་སྣ་ཨ་རུ་ར། །ས་ལ་པརྞི་སླེ་ཏྲེས་སྐྱུ་རུ་ར། །ཤང་ཀ་པུཥྤ་མན་དུ་ཀ་པརྞི། །ཨ་ཤྭ་གནྟྷ་དང་ནི་ཉེའུ་ཤིང་རྣམས། །སྦྱར་བ་བཏང་ན་ཡིད་གཞུངས་བློ་དང་ནི། །རྒས་སྲན་ཚོད་བརྟན་ཞིང་སྟོབས་སྐྱེད་བྱེད་། །ཅེས་བྱ་བ་ལ། དེ་བཞིན་དུ་ཨ་ཏིབ་ལ་ལ་སོགས་པ་ཡང་བར་ཧའི་སྦྱོར་བ་

དང་འདྲ་བར་སྨན་སྣ་དང་ཡང་རུང་བ་རེ་རེ་བཏང་བར་གྱུར་ན་ཡིད་གཞུངས་པ་ལ་སོགས་པར་འགྱུར་རོ། །སྠི་ར་ནི་ས་ལ་པ་རྞིའོ། །མན་དུ་ཀ་པ་རྞི་མན་དུ་ཀིའོ། །གཞན་ནི་གོ་བར་ཟད་དོ། །ཙི་ཏྲ་ཀ་ཡི་མེ་ཏོག་ནི། །སེར་བོ་དཀར་ནག་ལས་ཤེས་བྱ། །ཆོ་ག་བཞིན་དུ་བཅུད་ལེན་སྦྱར། །གོ་

རིམས་བཞིན་དུ་ཡོན་ཏན་ཆེ། །ཞེས་བྱ་བ་ལ། ཙི་ཏྲ་ཀའི་མེ་ཏེ་རྣམ་པ་གསུམ་པོ་སེར་པོ་དང་དཀར་པོ་དང་ནག་པོ་ཇི་ལྟ་བ་བཞིན་དུ་ཤེས་པར་བྱས་ལ། དེ་བཅུད་ཀྱིས་ལེན་དུ་སྦྱར་ན་གོ་རིམས་ཇི་ལྟ་ན་བ་བཞིན་དུ་ཡོན་ཏན་ཆེ་བ་ཡིན་ཏེ། མེ་ཏོག་སེར་པོ་ཅན་བས་ནི་དཀར་པོ་ཡོན་ཏན་དང་ལྡན་ལ་

เล่ม ๒๐๒ · หน้า 282b

དཀར་པོ་བས་ནི་ནག་པོ་ཡོན་ཏན་ཆེ་བ་ཡིན་ནོ། །དེ་ཡི་རྩ་བ་གྲིབ་མར་སྐམ། །ཕྱེ་མར་བཅས་པ་སྦྲང་རྩི་མར། །འོ་མ་ཆུ་དང་ཟླ་གཅིག་བར། །བརྟུལ་ཞུགས་ཅན་གྱིས་བསྟེན་བྱས་ལ། །ཕན་པའི་ཟས་ནི་ཟ་བྱེད་ན། །ལོ་བརྒྱར་འཚོ་ཞིང་ནད་མེད་ལ། །ཡིད་གཞུངས་སྟོབས་དང་མདངས་ལྡན་ཞིང་། །

ལུས་རྒྱས་མེ་དྲོད་འབར་བར་འགྱུར། །ཞེས་བྱ་བ་ལ། ཙི་ཏྲ་ཀ་དེའི་རྩ་བའི་ཕྱེ་མ་མར་དང་སྦྲང་རྩི་གཉི་གའམ། འོ་མའམ། ཆུ་དང་བཅས་པར་ཟླ་བ་གཅིག་གི་བར་དུ་བསྟེན་ནས་འཕྲོད་པའི་ཟས་ཟོས་ན་ལོ་བརྒྱར་འཚོ་བ་ལ་སོགས་པའི་ཡོན་ཏན་སྐྱེད་པར་འགྱུར་རོ། །ཏིལ་མར་ལྡེ་གུ་ཟླ་གཅིག་པར། །

བསྟེན་ན་རླུང་ནད་གསོ་དཀའ་འཇོམས། །གཅིན་སྦྱར་ཤ་བཀྲ་མཛེ་ནད་འཛོམས། །དར་བར་སྦྱར་བས་གཞང་འབྲུམ་སེལ། །ཞེས་བྱ་བ་ལ། ཙི་ཏྲ་ཀ་དེ་ཏིལ་མར་དང་བཅས་པ་ཟླ་བ་གཅིག་གི་བར་དུ་བསྟེན་ན་རླུང་ནད་མི་བཟད་པ་དག་ཀྱང་སེལ་བར་བྱེད་ལ། དེ་གཅིན་དང་སྦྱར་ཏེ་ཟླ་བ་གཅིག་གི་བར་

དུ་བསྟེན་ན་ནི་མཛེ་དང་ཤ་བཀྲ་འཇོམས་བར་བྱེད་དོ། །ཙི་ཏྲ་ཀ་དང་སྦྱར་ཏེ་ཟླ་གཅིག་གི་བར་བསྟེན་ན་ནི་གཞང་འབྲུམ་སེལ་བར་བྱེད་དོ། །གོ་བྱེ་ལེགས་པར་སྨིན་པ་ནི། །འབྲས་ཀྱི་ཕུང་པོའི་ནང་དུ་གཞུག །སོ་གའི་ཚེ་བཏུས་དགུན་ཚེ་ཕྱུང་། །མངར་ཞིང་སྣུམ་དང་བསིལ་བ་ཡི། །སྨན་སྦྱར་དེ་

ཡི་རྡོག་མ་བརྒྱད། །བརྒྱད་འགྱུར་ཆུར་ནི་བསྐོལ་ནས་ནི། །ཁུ་བ་དེ་ཡི་བརྒྱད་ཆུ་ལུས། །འོ་མ་སྦྱར་བ་གྲང་མོ་བཏུང་། །དེ་རྗེས་ཉི་མ་རེ་རེས་བསྐྱེད། །ཉི་ཤུ་རྩ་གཅིག་བར་དུ་ནི། །གསུམ་གསུམ་གྱིས་བསྐྱེད་དེ་ཕན་ཆད། །བཞི་བཅུའི་བར་བསྐྱེད་དེ་འོག་ཏུ། །

བསྐྱེད་པ་བཞིན་དུ་དབྲི་བར་བྱ། །བདུན་ཕྲག་བདུན་གྱི་བར་དུ་ནི། །སྟོང་གི་བར་དུ་གཏང་བར་བྱ། །བདག་ཉིད་བསྡམས་ཤིང་འོ་མ་མར། །སཱ་ལུ་དྲུག་ཅུའི་འབྲས་ཆན་བཟའ། །དེ་བཞིན་དུས་ནི་སུམ་འགྱུར་བྱ། །དེ་བཞིན་དུས་ནི་སུམ་འགྱུར་བྱ། །སྦྱོང་བའི་མཐའ་ཡང་སྦྱད་པར་བྱ། །སྔོན་གྱི་ལེགས་སྨོན་ཐོབ་འགྱུར་ཞིང་། །ཁྱད་

བར་དུ་ནི་མེ་དྲོད་སྐྱེད། །གཅིན་སྙི་སྲིན་བུ་གཞང་འབྲུམ་མཛེ། །ཚིལ་ལས་གྱུར་བའི་གཞང་འབྲུམ་འཇོམས། ཞེས་བྱ་བ་ལ། གོ་བྱེ་ཞེས་བྱ་བ་བསེ་ཤིང་གི་འབྲས་བུ་སོ་གའི་དུས་སུ་ལེགས་པར་སྨིན་ཞིང་ཁུ་བཅུད་ཡོངས་སུ་རྫོགས་པར་གྱུར་པ་བཏུས་ལ་འབྲས་ཀྱི་ཕུང་པོའི་ནང་དུ་བཅུག་སྟེ། །

เล่ม ๒๐๒ · หน้า 283a

དེ་དགུན་གྱི་དུས་སུ་ཕྱུང་ལ་རོ་མངར་བ་དང་རང་བཞིན་སྣུམ་ཞིང་བསིལ་བའི་སྨན་དང་ལེགས་པར་སྦྱར་ཏེ། དེའི་རྡོག་པ་བརྒྱད་ཆུ་བརྒྱད་འགྱུར་གྱི་ནང་དུ་བསྐོལ་ལ་ཁུ་བ་བརྒྱད་ཆ་ལུས་པར་བྱས་ཏེ། དེ་འོ་མ་དང་སྦྱར་བ་གྲང་མོ་བཏུང་ཞིང་གོ་བྱེ་རྡོག་མ་བརྒྱད་པོ་དེ་དག་ཞག་བདུན་གྱི་

བར་དུ་རྡོག་མ་རེ་རེས་བསྐྱེད་པར་བྱའོ། །དེའི་འོག་ཏུ་གོ་བྱེ་ལས་ཉི་མ་རེ་ཞིང་གསུམ་གསུམ་གྱིས་བསྐྱེད་ལ་བཞི་བཅུའི་བར་དུ་བསྐྱེད་བར་བྱའོ། །དེའི་འོག་ཏུ་གོ་བྱེ་དེ་སྔར་བསྐྱེད་བའི་ཚུལ་གྱི་གྲངས་དང་འདྲ་བར་གསུམ་གསུམ་གྱིས་དབྲི་ཞིང་བསྟེན་པར་བྱའོ། །དེའི་འོག་ཏུ་ནི་རེ་རེས་དབྲི་བར་བྱའོ། །

ཚུལ་དེ་ལྟར་ཞག་བདུན་ཕྲག་བདུན་གྱི་བར་དུ་གཏང་ཞིང་། རྡོག་མ་སྟོང་གི་བར་དུ་གཏད་བར་བྱའོ། །དེའི་ཚེ་བདག་ཉིད་བསྡམས་པ་ལ་སོགས་པའི་སྦྱོད་པ་དང་ལྡན་པར་བྱ་ཞིང་སྦྱོར་བའི་མཐའ་ཡང་སྤྱོད་ལམ་བསྡམས་པའི་དུས་སུ་མ་འགྱུར་དུ་བྱས་ལ་སྔོན་གྱི་ལེགས་པར་སྨོན་པ་ཙི་ཏྲ་ཀའི་སྐབས་སུ་

བཤད་པའི་ནད་མེད་པ་དང་། ཡུན་རིང་དུ་འཚོ་བ་ལ་སོགས་པ་འཐོབ་པར་འགྱུར་ལ། ཁྱད་པར་དུ་ནི་མེ་དྲོད་བསྐྱེད་པ་དང་། གཅིན་སྙི་བ་ལ་སོགས་པའི་ནད་འཇོམས་པ་ཡིན་ནོ། །གོ་བྱེའི་འབྲས་བུ་སྐྱོན་མེད་པ། །བརྡུངས་ཤིང་ཞི་བཏུ་བཏགས་པ་ནི། །བུམ་པར་བཅུག་སྟེ་ས་ནག་

བསྐུས། །ས་བརྐོས་པ་ཡི་ནང་དུ་གཞུག །ཀུན་ནས་བ་ཡི་ལྕི་བས་བསྐོར། །དེ་སྦྱར་མེ་ལ་བཙོས་ནས་ནི། །དེ་ལས་འཛག་པའི་ཁུ་བ་གང་། །བླངས་པ་ཉིན་ཞག་གཞན་ལ་ནི། །དེ་ཡི་བརྒྱད་འགྱུར་སྦྲང་རྩི་དང་། །ཉིས་འགྱུར་མར་དང་སྦྱར་བ་ནི། །ཆོ་ག་སྔ་མ་བཞིན་བསྡམས་ཏེ། །བསྟེན་ན་ཡོན་

ཏན་དེ་ཉིད་ཐོབ། །ཅེས་བྱ་བ་ལ། གོ་བྱེའི་འབྲས་བུ་སྐྱོན་མེད་པར་འགྱུར་བ་ལ་སོགས་པའི་སྦྱོར་བ་བྱས་ལ་དེ་ཚུལ་བཞིན་དུ་བཙོས་ལ། དེ་ལས་ཁུ་བ་གང་ཞིག་འཛག་པ་དེ་ཉི་མ་གཉིས་པ་ལ་བླངས་ལ། རང་གི་ཁུ་བ་དེའི་བརྒྱད་འགྱུར་གྱི་སྦྲང་རྩི་དང་ཉིས་འགྱུར་གྱི་མར་དང་སྦྱར་ཏེ། ཆོ་ག་སྔ་མ་བཞིན་

དུ་བསྡམས་པ་དང་བཅས་པས་བསྟེན་ན་ཡང་སྐྱེས་བུ་དེ་སྔར་བཤད་པའི་ཡོན་ཏན་དེ་ཉིད་འཐོབ་པར་འགྱུར་རོ། །གོ་བྱེའི་འབྲས་བུ་སྨིན་ཏེ་ལྷུང་གྱུར་པ། །བྲེ་བཞིའི་ཚད་ཙམ་དང་ནི་སོ་ཕག་དང་། །བདར་བའི་ཕྱེ་མ་དག་དང་ཆུ་དང་མཉེ། །བཀྲུས་ཏེ་རླུང་ལ་ལེགས་པར་བསྐམས་ནས་ནི། །བརྡུངས་ཏེ་ཆུ་

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด