ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ

Sanskrit title (Tibetan script, as in the text) པྲ་མཱ་ཎ་བཱརྟི་ཀཱ་ལང་ཀ་ར་ཊཱི་ཀཱ་སུ་པ་རི་ཤུདྡྷ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 185 · folio 180a

སྣང་བ་ལ་ནི་རང་གི་ངོ་བོ་རྟོགས་པ་ཉིད་མེད་པར་དེ་སྦྱོར་བར་ཅི་ལྟར་འགྱུར། དེ་དང་དོན་གཅིག་ན་ཞེས་བྱ་བ་ནི་སྒྲ་དེ་དང་དོན་གཅིག་པ་དེ་རྟོགས་པ་གང་ལ་ཡོད་པ་དེ་ལ་དེ་སྐད་ཅེས་བྱ་བའོ། །དེའི་དོན་ཞེས་བྱ་བ་ནི་སྤྱོད་པ་པའིའོ། །དེ་ལྟ་ཡིན་ན་ནི་འདི་བ་ལང་ངོ་སྙམ་པའི་རྣམ་པ་དང་།

བཅས་པ་སྒྲའི་རྣམ་པ་དང་། འདྲེས་པའི་ཤེས་པ་ནི་ཁྱད་པར་ཏེ་རང་གི་མཚན་ཉིད་འཛིན་པ་མ་ཡིན་ནོ། །ཁྱད་པར་སྒྲ་དང་སྦྱོར་བ་མེད་པའི་ཕྱིར་རོ། །རྒྱུ་ཐ་དད་པ་ཉིད་སྟོན་པ་ནི་འདི་ལྟར་ཞེས་བྱ་བ་ཡིན་ནོ། །བརྡའི་དུས་དེ་བརྡའི་ཚེ་ཉམས་སུ་མྱོང་བའི་སྒྲ་གང་ཡིན་པ་དེས་གོམས་པ་ཞེས་བྱ་བའི་བག་ཆགས་གཞན་

པ་གང་ཡིན་པ་དེའི་སྟོབས་ཉིད་ལ་སྟེ། པདྨའི་དབང་གིས་སྐྱེ་བའང་ཡིན་ནོ། །ཉིད་ཀྱི་སྒྲའི་རྣམ་པར་གཅད་པར་བྱ་བ་བརྗོད་པ་ནི་མིག་ལ་སོགས་པ་ཞེས་བྱ་བའོ། །སྤྱིའི་རྣམ་པ་ཉིད་ཀྱང་ཞེས་བྱ་བ་ནི་མི་འདྲ་བ་རྣམས་ལ་ཡང་བ་ལང་བ་ལང་ཞེས་ནང་གི་བའི་མཚན་ཉིད་དོ། །དེ་མིག་ལ་སོགས་པ་ལས་མི་

འབྱུང་བ་ཅིའི་ཕྱིར་ཞེ་ན། བཤད་པ་མིག་ལ་སོགས་པ་ཡོད་ཀྱང་ཞེས་བྱ་བའོ། །དེ་དང་རྗེས་སུ་མཐུན་པའི་བག་ཆགས་གང་ཡིན་པ་དེ་དང་བྲལ་བའི་སེམས་གང་ལ་ཡོད་པའི་སྐྱེས་བུ་ལ་སྒྲ་དང་སྤྱིའི་རྣམ་པ་དེ་མེད་པའི་ཕྱིར་རོ། །མིག་ལ་སོགས་པའི་རྒྱུ་རྗེས་སུ་འབྲེལ་པ་ལ་སྣང་བས་དོན་གང་ཡིན་པ་དེ་དང་ལྷན་

ཅིག་འདི་བ་ལང་ཞེས་བྱ་བའི་རྣམ་པ་འདིས་གཞི་མཐུན་པའོ། །དེ་དང་ཞེས་བྱ་བ་ནི་མངོན་སུམ་གྱི་གཟུང་བ་དང་ངོ་། །དེ་འཛིན་པའི་ཤེས་པ་མངོན་སུམ་གྱི་མཚན་ཉིད་དང་། མིག་ལ་སོགས་པའི་རྒྱུན་གཅིག་ལ་རག་ལས་པའི་ཤེས་པ་གང་ཡིན་པ་དེ་འདིའོ་སྙམ་པས་དེས་གཟུང་བ་མ་ཡིན་པར་མངོན་སུམ་ལ་

སྣང་བའི་གེག་ལ་སོགས་པར་མི་འགྱུར་ཏེ། གཞན་གྱི་གཟུང་བ་དེ་དང་ཡང་གཞི་མཐུན་པ་ཅན་ཉིད་སྲིད་པའི་ཕྱིར་རོ། །ད་ནི་གཞི་མཐུན་པ་ཉིད་མི་སྲིད་དོ་ཞེས་བརྗོད་པ་ནི། རྣམ་པ་གཉིས་ཞེས་བྱ་བ་སྟེ་གསལ་བ་དང་མི་གསལ་བའི་རྣམ་པ་གཉིས་ཉམས་སུ་མྱོང་བ་དེ་ལས་མ་གཏོགས་པའིའོ། །ཁྱད་

པར་མེད་པ་ཉིད་བསྟན་པའི་དོན་དུ་གཞན་གྱི་བརྗོད་པ་ནི་རང་བཞིན་གཉིས་ཞེས་བྱ་བའོ། །འདི་ལྟར་ཞེས་བྱ་བ་ལ་སོགས་པས་ནི་དོན་དམ་པར་གཞི་མཐུན་པ་མེད་པ་ཉིད་དུ་སྟོན་པར་བྱེད་དོ། །ཤེས་པ་འདི་གཉིས་པོ་འབའ་ཞིག་ཅེས་བྱ་བ་ལ། དེ་ཞེས་བྱ་བ་ནི་ཤེས་པ་གཅིག་ཡིན་ལ་འདི་ཞེས་བྱ་བ་ནི་ཤེས་པ་

Vol. 185 · folio 180b

གཉིས་པ་ཡིན་ནོ། །གཉིས་སུ་སྣང་བ་གཞན་ལ་ཞེས་བྱ་བ་ནི་བུམ་པ་དང་སྣམ་བུ་ལ་སོགས་པའོ། །བག་ཆགས་ཞེས་བྱ་བ་ནི་ལན་ནོ། །བག་ཆགས་སད་པ་ཡང་གཞན་ལ་ཅི་སྟེ་མེད་སྙམ་ན་དོན་བྱ་བའི་ཞེས་གསུངས་སོ། །ཤེས་པ་གཉིས་ཞེས་བྱ་བ་ནི་གཞན་སྨྲས་ལའོ། །ལན་ནི་བག་ཆགས་ཞེས་

བྱ་བའོ། །རྣམ་པར་རྟོག་པ་དང་བཅས་པ་དང་། ལྷན་ཅིག་རྐྱེན་རྒྱུ་གཅིག་མངོན་སུམ་གང་ལ་ཡོད་པ་དེའི་དངོས་པོ་ཉིད་དོ། །རྟོགས་པ་མེད་པར་མེད་པ་ནི་ཁྱད་པར་གང་གིས་རྟོགས་པར་འགྱུར་ཞེས་བྱ་བ་འདི་ལ་གཞན་གྱི་ལན་གྱི་དོགས་པ་བསུ་བ་ནི་ཅི་སྟེ་ཞེས་བྱ་བའོ། །བདག་ཉིད་ཐམས་ཅད་དམ་རྣམ་པ་

འགའ་ཡང་སྤྱི་ལས་ཁྱད་པར་ཐ་དད་པ་མེད་པ་གང་ཡིན་པ་དེའི་ཕྱིར་གལ་ཏེ་ཁྱད་པར་རྣམ་པར་རྟོག་པ་དང་བཅས་པའི་ཤེས་པའི་རིགས་པ་ཡིན་ན། དེའི་ཚེ་ཤེས་པ་ཀུན་གཅིག་ཏུ་འགྲོ་བར་འགྱུར་ཏེ། ཤེས་པ་ཐམས་ཅད་སྤྱི་དང་ཁྱད་པར་གྱི་རྣམ་པ་ཅན་དུ་རྟོགས་པར་འགྱུར་རོ་ཞེས་དགོངས་པའོ། །དེ་དང་ཐ་མི་

དད་པའི་ཕྱིར་རོ་ཞེས་བྱ་བ་ནི་སྤྱི་ལས་ཐ་མི་དད་པའི་ཕྱིར་རོ། །ཁྱད་པར་དང་བཅས་པའི་སྤྱི་སྒྲའི་ཤེས་པ་ལ་མི་སྣང་བ་ཡིན་ནོ་ཞེ་ན་འདི་ལ་བརྗོད་པ་ནི་དེ་ཉིད་ཅེས་བྱ་བའོ། །ཁྱད་པར་དེ་དང་ལྷན་ཅིག་རྗེས་སུ་ཞུགས་པ་མ་ཡིན་ཏེ་འདྲེས་པ་མ་ཡིན་པ་ནིའོ། །ཕྱིས་ནི་མངོན་སུམ་གྱི་འཛིན་པའི་དུས་ནའོ། །འདི་

ལ་བ་བརྗོད་པ་ནི་འདི་ཉིད་ཅེས་བྱ་བ་སྟེ། སྔར་འབའ་ཞིག་རྟོགས་པ་གང་ཡིན་པའོ། །དེའི་ཚེ་ནི་འདྲེས་པར་གྱུར་པའི་དུས་ནའོ། །སྔར་འབའ་ཞིག་རྟོགས་པ་དེ་རྗེས་སུ་འཇུག་པ་ནི་མ་ཡིན་ནོ། །དེ་ཕྱིས་རྗེས་སུ་འཇུག་པར་མི་འགྱུར་བ་ཅིའི་ཕྱིར་ཞེ་ན། དེ་ནི་ཞེས་གསུངས་སོ། །ཁྱད་པར་དང་མི་འདྲེ་

བའི་རང་བཞིན་གང་གི་རང་གི་ཤེས་པ་སྒྲ་ལས་བྱུང་བ་ལ་སྤྱི་སྣང་བར་འགྱུར་བའི་རང་བཞིན་དེ་ཉིད་ཀྱི་སྤྱི་དེ་དེ་ཁོ་ན་སྟེ། རང་བཞིན་ཡིན་ནོ། །དཔེར་ན་ཨུཏྤ་ལ་སྔོན་པོའི་རང་བཞིན་གང་གི་རང་གི་ཤེས་པ་ལ་སྣང་བ་དེ་ཉིད་དེའི་དེ་ཁོ་ན་ཡིན་ཏེ། སེར་པོའི་རང་བཞིན་གྱིས་ནི་མ་ཡིན་པ་

བཞིན་ནོ། །ཁྱད་པར་དང་མ་འདྲེས་པ་འབའ་ཞིག་པའི་རང་བཞིན་དེ་མངོན་སུམ་གྱི་དུས་ན་མེད་ན་ནི་སྤྱི་ཉིད་མེད་པར་འགྱུར་ཏེ། སྔོན་པོ་མེད་ན་ཨུཏྤ་ལ་བཞིན་ནོ། །འདི་ཉིད་སྟོན་པ་ནི། གལ་ཏེ་སྤྱི་དེ་སྒྲ་ལས་བྱུང་བ་ཤེས་པས་མཐོང་བའི་རང་བཞིན་དེར། མངོན་སུམ་

Vol. 185 · folio 181a

ལ་སྣང་ན་དེའི་ཚེ་ཇི་ལྟར་རྗེས་སུ་འཇུག་པར་རྟོགས་ཏེ། འབའ་ཞིག་སྣང་བའི་ཕྱིར་མ་རྟོགས་པ་ཁོ་ནའོ། །གལ་ཏེ་སྔར་མཐོང་བའི་རང་བཞིན་འབའ་ཞིག་པ་དེར་སྣང་བ་མ་ཡིན་གྱི། འོན་ཏེ་འདྲེས་པ་ཉིད་དུ་སྣང་བ་ཡིན་པ་དེའི་ཚེ་ཡང་།

ཇི་ལྟར་རྗེས་སུ་འཇུག་པ་རྟོགས་ཏེ་སྔར་མཐོང་བའི་རང་བཞིན་ཏེ། ཞིག་པས་ནི། འདྲེན་པ་གཞན་ཁོ་ན་ཞིག་སྣང་བའི་ཕྱིར་རོ། །གལ་ཏེ་སྣང་བ་མེད་ན་དེ་ནི་གཅིག་མ་ཡིན་ལ་དུ་མ་ཡང་མ་ཡིན་ཏེ། གཅིག་དང་དུ་མ་ཉིད་ལ་དུ་མ་ཡང་མ་ཡིན་ཏེ། གཅིག་

དང་དུ་མ་ཉིད་ནི་སྣང་བ་ལ་སེམས་པའི་ཕྱིར་རོ། །སྤྱི་ཡང་མངོན་སུམ་གྱི་དུས་ན་སྣང་བ་མ་ཡིན་ཏེ། དེས་ན་ཇི་ལྟར་འགྱུར་ཞེས་དགོང་པའོ། །དེས་ན་རྒྱུ་མིག་ལ་སོགས་པ་མེད་པས་སྒྲ་ལས་བྱུང་བའི་ཤེས་པ་ལ་གཅིག་ཏུ་སྣང་བ་མེད་པའི་ཁྱད་པར་ཡང་དུ་མ་

ཉིད་ཡིན་ནོ། །འོན་ཏེ་ཁྱད་པར་ཁོང་དུ་ཆུད་པར་ཁས་ལེན་ཏེ། མིག་ལ་སོགས་པས་ཁྱད་པར་སྐྱེས་པ་ག་ལ་ཡོད་པའི་རིག་པ་སྟེ་རིག་པ་དེ་ལས་སོ། །རྟོག་པ་དང་བཅས་པ་དང་། རྟོག་པ་མེད་པ་དག་གི་རྒྱུ་གཅིག་ཁོ་ན་ཡིན་ཏེ། དེས་ན་དེ་དང་རྒྱུ་མཚུངས་པ་ན་

གཞན་དག་ཀྱང་རྣམ་པར་རྟོག་པ་དང་བཅས་པར་འོས་པ་ཁོ་ནའོ་སྙམ་ན། རྣམ་པར་རྟོག་པ་དང་བཅས་པའི་ཞེས་གསུངས་སོ། །ཕན་ཚུན་སྤངས་ཏེ་གནས་པའི་ངོ་བོ་གང་དག་ཡིན་པའི་ཚོགས་པ་དེ་དག་གི་སྟོབས་ཀྱིས་བསྐྱེད་པའི་དབང་པོའི་རྣམ་པར་ཤེས་པ་ཉིད་ཀྱི་ངོ་བོར་གྱུར་པའི་རྟོགས་པ་གང་ཡིན་པ་དེ་

གཉིས་ལ་དེ་སྐད་ཅེས་བརྗོད་དོ། །རང་གི་ངོ་བོ་སྟེ་རང་བཞིན་གྱི་ཚོགས་པ་གང་ཡིན་པ་དེ་ལས་འབྱུང་བ་སྐྱེས་པ་དེ་ལ་བརྟེན་པ་ལ་དེ་སྐད་ཅེས་བྱ་བའོ། །གཅིག་ནི་རང་བཞིན་དང་ཞེས་བྱ་བའི་དོན་ཏོ། །ཚོགས་པ་ཐ་དད་པ་བརྗོད་པ་ནི་སྦྱོར་བ་ནི་ཞེས་བྱ་བའི་དོན་ཏོ། །དེ་ལ་ནི་ཞེས་བྱ་བ་ནི་དབང་པོའི་རྣམ་པར་ཤེས་

པ་ལའོ། །རྒྱུ་མེད་པ་ཉིད་བརྗོད་པ་ནི། རྒྱུ་མེད་པ་ཞེས་བྱ་བའོ། །ཕྱི་རོལ་སྒྲ་དང་སྤྱི་ལ་སོགས་པ་དང་འབྲེལ་པར་ཁས་བླངས་ནས་རྣམ་པར་རྟོག་པ་མེད་པ་ཉིད་སྒྲུབ་པ་དོན་དུ་བརྗོད་པ་ནི་དེ་ཡང་མི་བདེན་ཏེ་ཞེས་བྱ་བའོ། །གང་ཞིག་དང་འབྲེལ་པ་དེ་ནི་དེར་སྣང་བ་ཁོ་ན་ཡིན་ན། དེས་ན་ཅི་སྟེ་ཚད་མའི་ཡུལ་དུ་

Vol. 185 · folio 181b

འགྱུར་བ་མ་ཡིན་སྙམ་ན། དེ་ལྟ་ཡིན་ན་ཞེས་གསུངས་སོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །ཕྱོགས་འདི་ལ་ཡང་རེ་ཞིག་སྒྲ་དང་འདྲེས་པ་ནི་མེད་དོ་ཞེས་བརྗོད་པ་ནི། དེ་ཡང་མི་བདེན་ཏེ་སྒྲ་མི་འཛིན་པ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་སྣམ་བུ་ལ་སོགས་པ་ལ་སྒྲ་ཡོད་ནའོ། །

ཐེ་ཚོམ་ཟ་བར་མཐོང་བ་ཉིད་དུ་སྒྲུབ་པ་ནི་དོན་ཏེ་ཞེས་བྱ་བ་སྟེ། སྣམ་བུའི་མཚན་ཉིད་ཀྱི་དོན་ཏེ་མངོན་སུམ་གྱིས་གྲུབ་ཀྱང་རྗོད་པར་བྱེད་པའི་བྱེ་བྲག་སྣམ་བུ་ལ་སོགས་པའི་སྒྲ་མི་དྲན་པའི་ཕྱིར་རོ། །གལ་ཏེ་སྣམ་བུ་ལ་སོགས་པ་ལ་མེད་པའི་ཕྱིར་སྒྲ་ལ་སོགས་པ་མངོན་སུམ་ལ་མི་སྣང་མོད་མཚུངས་པའི་རྣམ་པ་

ཉིད་ནི་འགྱུར་རོ་སྙམ་པ་ནི་མཚུངས་པའི་རྣམ་པ་ཉིད་དུ་ན་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །གང་གི་ཚེ་དང་པོ་ཁོ་ནར་བ་ལང་མཐོང་བ་དེའི་ཚེ་མཚུངས་པའི་རྣམ་པ་ཉིད་དུ་ངེས་པ་ཡང་མེད་དོ་ཞེས་བྱ་བར་བསམས་པའོ། །འདི་བ་ལང་ངོ་སྙམ་པ་ལ་སོགས་པའི་ཤེས་པ་རྣམ་པར་རྟོག་པ་དང་བཅས་

པ་ནི་སྐྱེད་པར་བྱེད་པ་ཡིན་ནོ་ཞེས་འབྲེལ་ཏེ་མ་ལྟོས་པར་ནི་ཞེས་བྱ་བ་ནི་བརྡ་དྲན་པ་ལ་ཞེས་འབྲེལ་ཏོ། །ལྷན་ཅིག་བྱེད་པ་གཞན་དག་ཀྱང་བསྟན་པའི་ཕྱིར་བརྗོད་པ་ནི་གང་གི་ཚེ་ཞེས་བྱ་བའོ། །རྒྱུ་དེས་ན་བརྡ་མ་བཟུང་བ་དང་སྔོན་མཐོང་བ་དང་བྲལ་བ་ལ་ནི་འདི་བ་ལང་ངོ་སྙམ་པའི་ཤེས་པ་མི་འགྱུར་བ་ཉིད་དེ། བརྡ་འཛིན་པ་

དང་སྔོན་མཐོང་བ་ལྷན་ཅིག་བྱེད་པ་མེད་པའི་ཕྱིར་རོ། །དེ་དང་ཞེས་བྱ་བ་ནི་སྔོན་མཐོང་བ་དང་ངོ་། །རེ་ཞིག་སྔར་ཉམས་སུ་མྱོང་བ་ཡོད་པ་ཡིན་ནོ་ཞེས་བསྒྲུབས་ནས་དྲན་པ་ཡང་ཡོད་དོ་ཞེས་སྟོན་པ་ནི་སོ་སོར་པའི་ཞེས་བྱ་བའོ། །སྔོན་གྱི་སེམས་སུ་མྱོང་བ་དང་དྲན་པ་དག་སྲིད་པར་བརྗོད་ནས་ཕྱོགས་ཀྱི་ཆོས་ཉིད་

ཡོད་པར་སྒྲུབ་པའི་དོན་དུ། ད་ལྟར་བའི་རྟགས་མཐོང་བ་སྟོན་པ་ནི་སོ་སོར་ངེས་པའི་ཞེས་བྱ་བའོ། །མཐོང་བ་ཁོ་ནར་སད་བྱེད་དུ་འགྱུར་རོ་སྙམ་ན། སོ་སོར་ངེས་པའི་ཞེས་གསུངས་སོ། །རྒྱུ་དེས་མངོན་སུམ་གྱིས་གཟུང་བའི་དོན་དེ་མཐོང་བ་ནའོ། །དེ་དྲན་པ་ན་ཞེས་བྱ་བ་ནི་རྗོད་པར་བྱེད་པ་དྲན་པའི་བྱ་

བ་ལའོ། །འོན་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །འགའ་ཞིག་མངོན་སུམ་གྱི་ཁྱབ་པ་གདོན་མི་ཟ་བར་རྟོགས་དགོས་ཏེ། དེ་ལྟ་མ་ཡིན་ན་རྗེས་སུ་དཔག་པ་ཐུག་པ་མེད་པར་འགྱུར་བའི་ཕྱིར་རོ་ཞེས་བསམས་པའོ། །ཆ་ཤས་ཞེས་བྱ་བ་ནི་ལན་ནོ། །ཆ་ཤས་རྣམ་པ་ཉིད་ཇི་ལྟར་ཅི་ཡིན་ཞེ་ན། ཆ་

Vol. 185 · folio 182a

ཤས་རྣམས་ཀྱི་མཚུངས་པ་ཡང་ཞེས་བྱ་བ་ནི་དེ་འདྲ་བའི་ཞེས་བྱ་བའོ། །ཡན་ལག་ཆ་ཤས་ཀྱི་བྱེ་བྲག་རྣམས་སོ། །ཇི་ལྟར་ཞེ་ན་ཇི་སྲིད་དུ་ཞེས་བྱ་བའོ། །དབང་པོའི་བྱེད་པས་སྦྱོར་བ་ནི་ཞེས་བྱ་བ་ནི་བ་ལང་ཞེས་བྱ་བ་དེ་ལྟ་བུ་ལ་སོགས་པ་སྟེ། དེ་ནི་མངོན་སུམ་ཁོ་ནའོ། །དེ་ལྟ་ཡིན་ན་

ཞེས་བྱ་བ་ནི་ལན་ནོ། །ཕྱོགས་འདི་ན་ནི་མེའོ་ཞེས་བྱ་བའི་རྣམ་པ་འདིས་ས་ཕྱོགས་དང་མེ་སྦྱོར་བར་བྱེད་པ་གང་ཡིན་པ་དེ་ནི་དབང་པོའི་བྱེད་པ་དང་བྲལ་ན་འགྱུར་བ་མ་ཡིན་ནོ། །གལ་ཏེ་དབང་པོའི་བྱེད་པ་དང་མ་བྲལ་བར་མངོན་སུམ་གྱིས་སྦྱོར་བ་ཡིན་ན་རྗེས་སུ་དཔག་པ་ཇི་ལྟར་མངོན་སུམ་ཉིད་མི་འགྱུར་ཏེ། འགྱུར་

བ་ཉིད་དོ་ཞེས་བྱ་བའི་ཐ་ཚིག་གོ། །སྦྱོར་བ་ནི་ཞེས་བྱ་བ་ནི་ཕྱོགས་དང་མེ་སྦྱོར་བ་ནའོ། །ཕྱོགས་ཙམ་ལ་ནི་ཞེས་བྱ་བ་ནི་ཕྱོགས་ཙམ་གྱི་ཡུལ་ལ་མངོན་སུམ་སྐྱེ་བ་ཡིན་ལ། ཕྱོགས་དང་མེ་སྦྱོར་བ་ནི་རྗེས་སུ་དཔག་པ་ལས་ཡིན་ནོ། །ཡང་ཇི་ལྟར་མེ་སྦྱོར་བ་ཉིད་མངོན་སུམ་མ་ཡིན་ཞེ་ན། མེ་ལ་ཞེས་

གསུངས་ཏེ། གང་གི་ཕྱིར་མེའི་ཡུལ་ལ་དབང་པོའི་ཤེས་པ་མེད་པ་དེའི་ཕྱིར། ཇི་ལྟར་དེ་སྦྱོར་བ་མངོན་སུམ་དུ་འགྱུར། གལ་ཏེ་མངོན་སུམ་གྱིས་མེ་མ་བཟུང་བ་དེ་ལྟ་ན་ཡང་དེ་སྦྱོར་བ་ནི་མངོན་སུམ་དུ་འགྱུར་རོ་ཞེ་ན། གང་གི་ཕྱིར་མ་བཟུང་བ་ནི་སྦྱོར་བ་མ་ཡིན་ནོ། །རྗེས་སུ་དཔག་པ་ཁོ་ན་ལས་ཞེས་བྱ་བ་ནི།

མངོན་སུམ་ལས་མ་ཡིན་པའོ། །མངོན་སུམ་གྱིས་མ་བཟུང་བ་ཞེས་བྱ་བ་ནི་མེ་ལ་སོགས་པའོ། །དེ་དང་ཞེས་བྱ་བ་ནི་ས་ཕྱོགས་དང་མེ་རྟོགས་པ་ནི་མེ་ལ་སོགས་པ་སྟེ་མངོན་སུམ་གྱིས་སོ། །དེ་དང་ལྡན་པས་ནི་ཕྱོགས་དང་ལྡན་པར་རྟོགས་སོ་ཞེས་བྱ་བ་ནི་རང་གི་ཚིག་དང་འགལ་བ་ཡིན་ནོ། །གང་

ལ་རྟོགས་པ་ཙམ་ཉིད་མེད་པ་དེ་ལ་རྟོགས་པའི་ཁྱད་པར་ཇི་ལྟར་ཡོད་ཅེས་བྱ་བའི་ཐ་ཚིག་གོ། །དེ་ལྟར་ན་རེ་ཞིག་གྲུབ་པའི་མཐའ་བས་མངོན་སུམ་གྱིས་ནི་སྦྱོར་བ་མི་སྲིད་དོ་ཞེས་བསྟན་པ་ན། གཞན་དག་རྗེས་སུ་དཔག་པས་མི་སྲིད་དོ་ཞེས་བརྗོད་པ་ནི། རྗེས་སུ་དཔག་པའི་ཞེས་བྱ་བ་ལ་སོགས་པའོ། །

རི་ལ་སོགས་པའི་ཕྱོགས་ལ་ནི་རྗེས་སུ་དཔག་པ་འཇུག་པ་མ་ཡིན་ནོ། །གལ་ཏེ་ཕྱོགས་སུ་དཔག་པས་མ་རྟོགས་ཀྱང་མེ་དང་སྦྱོར་རོ་སྙམ་ན་མ་བཟུང་བ་ནི་ཞེས་སྨྲས་སོ། །འོ་ན་ཕྱོགས་ཀྱང་རྗེས་སུ་དཔག་པས་རྟོགས་སོ་སྙམ་ན། མངོན་སུམ་དོན་ནི་ཞེས་བྱ་བའོ། །ས་ཕྱོགས་རྗེས་སུ་དཔག་པར་བྱ་བར་

Vol. 185 · folio 182b

ཁས་ལེན་ན་ནི་མངོན་སུམ་ཉིད་དུ་མི་འགྱུར་རོ། །འོན་ཏེ་ཚད་མའི་རྣམ་པར་གཞག་པ་ཚོལ་བའི་ཕྱིར་ན་མངོན་སུམ་གྱི་ཡུལ་གང་ཡིན་པ་དེ་ཉིད་རྗེས་སུ་དཔག་པར་བྱ་བ་ཡིན་ནོ་སྙམ་ན་ཚད་མའི་རྣམ་པར་གཞག་པ་ཉམས་པར་ནི་མི་འདོད་དོ་ཞེས་གསུངས་སོ། །འདི་ལ་གྲུབ་པའི་མཐའ་བས་བརྗོད་པ་ནི་དོན་དམ་

དུ་ནི་ཞེས་བྱ་བའོ། །འོ་ན་ཕྱོགས་དང་མེ་ཇི་ལྟར་སྦྱོར་སྙམ་ན། རྣམ་པ་དེ་ལྟའི་ཞེས་བྱ་བའོ། །གཉི་གའི་ཞེས་བྱ་བ་ནི་མངོན་སུམ་དང་རྟགས་ངེས་པའིའོ། །མངོན་སུམ་ནི་རི་ལ་སོགས་པ་ཙམ་འཛིན་པ་ཡིན་ལ་རྗེས་སུ་དཔག་པ་ནི་རྟགས་ཉིད་དེ་རྗེས་སུ་དཔག་པའི་རྒྱུ་ཡིན་པའི་ཕྱིར་དང་ཤེས་པར་བྱེད་

པའི་རྒྱུའི་སྐབས་ཡིན་པའི་ཕྱིར་རོ། །ངེས་པ་ཡང་ཤུགས་ཀྱིས་འཐོབ་སྟེ། དེས་མངོན་སུམ་དང་རྟགས་ངེས་པའི་རྗེས་སུ་བྱུང་བ་ཞེས་བྱ་བའི་དོན་ཏོ། །རྣམ་པར་རྟོག་པ་རྣམ་པར་བརྗོད་པ་ནི། འདི་ནི་འདི་ལའོ་ཞེས་བྱ་བའོ། །དེ་ཡང་ཞེས་བྱ་བ་ནི་རྣམ་པར་རྟོག་པའོ། །འདིའི་རྒྱུ་མཚན་བརྗོད་པའི་དོན་དུ་ཕྱོགས་

སྔ་མ་འགོད་པ་བརྗོད་པ་ནི་རྗེས་སུ་དཔག་པ་ཡང་ཇི་ལྟར་སྦྱོར་བར་བྱེད་པའི་རང་བཞིན་དུ་སྐྱེ་བ་ཡིན་ཞེས་བྱ་བའོ། །ལན་བརྗོད་པ་ནི་མངོན་སུམ་གྱིས་དེ་ལྟར་གཟུང་བའི་ཕྱིར་རོ་ཞེས་བྱ་བ་སྟེ། ཆད་པ་ལ་སོགས་པ་གཞན་དུ་གཉི་གའི་རང་བཞིན་མཐོང་བའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་དབང་པོའི་རྣམ་པར་ཤེས་

པ་དྲན་པ་ལས་ཀྱང་འགྱུར་བ་ནི། དེའི་ཚེ་དུས་གཞན་དུ་ཞེས་བྱ་བ་དོན་མེད་པའི་དུས་སུ་ཡང་དབང་པོའི་བློ་འབྱུང་བར་འགྱུར་རོ། །འོན་ཏེ་དུས་གཞན་དུ་ནི་དྲན་པ་ཡང་མེད་པ་ཁོ་ན་ཡིན་པ་དེས་ན་ཇི་ལྟར་དབང་པོའི་རྣམ་པར་ཤེས་པ་སྐྱེ་སྟེ། རྒྱུ་མེད་པར་ཕྱིར་རོ་ཞེ་ན། འབའ་ཞིག་ལ་ཞེས་གསུངས་སོ། །དེའི་ཚེ་

སྲིད་པའི་ཕྱིར་རོ་ཞེས་བྱ་བ་ནི་དོན་མེད་པའི་དུས་ནའོ། །གང་གི་ཕྱིར་དབང་པོའི་རྣམ་པར་ཤེས་པའི་རྒྱུར་གྱུར་པ་དྲན་པའི་མཚན་ཉིད་ཀྱི་རྣམ་པར་རྟོག་པ་ཅན་གཞན་སྲིད་པའི་ཕྱིར་ཞེས་བྱ་བ་ལ་སོགས་པར་བསྡེབས་སོ། །དེ་ཁོ་ན་དེ་ལྟར་ཞེས་བྱ་བ་ནི་རྣམ་པར་རྟོག་པ་མེད་པའི་ཤེས་པའི་རྒྱུ་ཉིད་དུའོ། །གཉིས་

ཞེས་པ་ནི་རྣམ་པར་རྟོག་པ་དང་བཅས་པ་དང་རྟོག་པ་མེད་པའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་དྲན་པ་དང་བྲལ་བས་སོ། །དེ་ལྟར་ཞེས་བྱ་བ་ནི་ལྷན་ཅིག་པ་ཉིད་དུའོ། །མངོན་སུམ་སྐྱེད་པ་ན་དྲན་པ་དབང་པོ་ལ་ལྷན་ཅིག་པ་ཉིད་དུ་མཐོང་བ་ཁོ་ནའོ་ཞེ་ན་དྲན་པས་ནི་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་

Vol. 185 · folio 183a

གྱིའོ། །མིག་ལ་སོགས་པའི་ཤེས་པ་དྲན་པ་ངེས་པའི་རང་བཞིན་དུ་བྱེད་པ་ཡིན་ནོ་ཞེས་སྦྱར་རོ། །ལན་ནི་དེ་ཡང་ཞེས་བྱ་བའོ། །རང་བཞིན་དེ་ཞེས་བྱ་བ་ནི་མངོན་སུམ་གྱིས་གཟུང་བའི་རང་བཞིན་ལྷག་ཆད་མེད་པར་རོ། །ཐ་དད་མེད་ཕྱིར་ཞེས་བྱ་བ་ནི་མངོན་སུམ་སྔ་མའི་ཡུལ་དེའོ། །

དེ་དངོས་མེད་ན་ཞེས་བྱ་བ་ནི་ངེས་པའོ། །འོན་ཏེ་དེ་ལ་ཞེས་བྱ་བ་ནི་ངེས་པ་ལའོ། །དེ་ཞེས་བྱ་བ་ངེས་པའི་ཤེས་པའོ། །དབང་པོའི་ཤེས་པ་ལས་རང་བཞིན་གཞན་དུའོ། །དེ་ཉིད་ལ་ཞེས་བྱ་བ་ནི་མངོན་སུམ་གྱི་མཐོང་བ་ཉིད་ལ་འཇུག་པའོ། །འདིའི་ཞེས་བྱ་བ་ནི་རྣམ་པ་འདིས་འཇུག་པའི་རྣམ་རྟོག་མེད་

པ་ཉིད་དུ་འགྱུར་ཏེ། ཡིད་ཀྱི་མངོན་སུམ་ཉིད་དུ་འགྱུར་རོ་ཞེས་བྱ་བ་ནི་ཐ་དད་དོ། །དོན་བྱ་དང་སོགས་པའི་སྒྲས་ནི་རིགས་ལ་སོགས་པ་དང་འབྲེལ་པ་གང་ཡིན་པ་དང་། དེ་ཉིད་ཀྱི་སྔ་མ་དང་ཕྱི་མར་ཏེ་གཉིས་པོ་དེར་མི་རྟོགས་པའི་ཕྱིར་རོ། །གལ་ཏེ་དོན་དང་འབྲེལ་པ་ལ་སོགས་པ་རྣམ་པར་རྟོག་པར་མི་བྱེད་

མོད། དེ་ལྟ་ན་ཡང་འདི་ནི་རྣམ་པར་རྟོག་པ་ཉིད་ཡིན་ནོ་ཞེ་ན། རྣམ་པར་རྟོག་པར་མི་བྱེད་པ་ཉིད་ནི་ཞེས་སྨོས་སོ། །དེ་ནི་ཞེས་བྱ་བ་ནི་གསལ་བའི་རྣམ་པ་ཅན་མངོན་སུམ་གྱི་ཡུལ་ནི་དེ་ལྟར་ཞེས་བྱ་བ་རྣམ་པ་གསལ་བ་ཉིད་དུའོ། །དེ་མེད་ན་ཞེས་བྱ་བ་ནི་དྲན་པ་མེད་ནའོ། །དེའི་རང་བཞིན་དུ་ཤེས་པ་

ཞེས་བྱ་བ་ནི། དེའི་རྣམ་པ་གསལ་བར་འཛིན་པའི་ཤེས་པའོ། །ཡོད་ཀྱང་ཞེས་བྱ་བ་ནི་ཡོད་པ་མིན་ཡང་འདིའོ་ཞེས་བྱ་བར་སྣང་བ་དེས་ནི་ཁྱད་པར་གཞན་ཡོད་པ་མ་ཡིན་པའི་ཕྱིར་ཞེས་བྱ་བ་ནི། ཐ་དད་པར་རྟོགས་པའི་ཁྱད་པར་གཞན་རྟོགས་པ་མེད་པའི་ཕྱིར་རོ། །འཇུག་པ་ལ་ཞེས་བྱ་བ་ནི་དོགས་པ་

བསུ་བ་སྟེ། འདི་ཞེས་བྱ་བར་སྣང་བ་ཞེས་འབྲེལ་ཏོ། །ལན་ནི་དེ་མེད་ཀྱང་ཞེས་བྱ་བ་སྟེ་ཞེས་བྱ་བ་ནི་སྣང་བ་མེད་ཀྱང་ངོ་། །འབྲེལ་པ་གྲུབ་པ་སྟེ་སྒྲ་དང་འདྲེས་པ་ངེས་པར་བྱ་བའི་དོན་དུའོ། །དེ་ཞེས་བྱ་བ་ནི་མངོན་སུམ་གྱི་ཡུལ་གྱི་དོན་ཏོ། །དེ་ལྟར་ཞེས་བྱ་བ་ནི་སྒྲ་དང་འདྲེས་

པ་ཉིད་དུ་མ་གྲུབ་ན། དེའི་ཚེ་མངོན་སུམ་གྱི་ཡུལ་གྱི་དོན་དེ་རྟོགས་པ་ལ་དྲན་པ་མི་མཁོ་བར་འགྱུར་རོ། །འཇུག་པ་ལ་མཁོ་བ་ཡིན་ནོ་ཞེས་སྨྲས་ཟིན་ཏོ་ཞེ་ན་དང་པོའི་ཞེས་སྨོས་སོ། །འཇུག་པར་བྱེད་པ་ཡང་ཞེས་བྱ་བ་ནི། འཇུག་པ་ལ་ཡང་བྱེད་པ་ཡོད་པ་མ་ཡིན་ནོ་

Vol. 185 · folio 183b

ཞེས་བྱ་བའི་དོན་ཏོ། །གལ་ཏེ་རྣམ་པར་རྟོག་པས་དགོས་པ་མེད་ན་དེའི་ཚེ་འདི་ཅིའི་དོན་དུ་འཇུག་ཅེ་ན། འདི་ནི་ཞེས་གསུངས་སོ། །དེས་ཞེས་བྱ་བ་ནི་མིག་ལ་སོགས་པའི་བློས་སོ། །སྤྱི་གཟུང་བ་ན་ཡང་བ་ལང་ཇི་ལྟ་བུ་ཞིག་ཅེས་ཁྱད་པར་འཛིན་པ་ལ་ལྟོས་པར་རྟོགས་པ་ནི་འཇིག་

རྟེན་ན་མཐོང་བ་ཡིན་ནོ། །དེ་ལ་ནི་དབང་པོའི་རྣམ་པར་ཤེས་པ་ལའོ། །མདུན་ན་གནས་པའི་གཟུགས་ཙམ་ལ་མི་འཇུག་པར་རྟོགས་ཏེ་ཤེས་པ་ཡིན་ནོ། །མདུན་ན་གནས་པ་ཙམ་ལ་མི་འཇུག་པ་མཐོང་གི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ཡིན་མོད་དེ་ལྟ་ན་ཡང་བྱེད་པ་

གཞན་ལ་འཇུག་གོ་སྙམ་ན། གཞན་དུ་ཞེས་གསུངས་སོ། །དྲན་པའི་འོག་རོལ་གྱི་དུས་སུའམ་དྲན་པ་ལས་སྔར་མངོན་སུམ་སྐྱེས་ཀྱང་རུང་སྟེ། རྣམ་པར་རྟོག་པ་མ་ཡིན་པ་ཉིད་དོ། །ཅིའི་ཕྱིར་ཞེ་ན། ཡུལ་ཞེས་གསུངས་ཏེ། རྣམ་པར་རྟོག་པ་དང་བཅས་པ་དང་། རྟོག་པ་མེད་པའི་ཡུལ་

གང་ཡིན་པ་དེ་ཐ་དད་པ་ཉིད་ཀྱི་ཕྱིར་རོ། །གལ་ཏེ་མིག་ལ་སོགས་པ་ལ་བརྟེན་ནས་སྐྱེས་པ་གང་ཡིན་པ་དེ་ཁོ་ན་མངོན་སུམ་ཡིན་ན། འོ་ན་ནི་དེའི་ཚེ་ཡིད་ལ་སོགས་པ་མངོན་སུམ་དུ་མི་འགྱུར་ཏེ། མིག་ལ་སོགས་པ་ལ་མི་བརྟེན་པའི་ཕྱིར་རོ་སྙམ་ན། གང་ཞིག་ཅེས་གསུངས་སོ། །གཞན་ལས་ཞེས་

བྱ་བ་ནི་གོམས་པ་ལ་སོགས་པ་ལའོ། །ཡང་ན་ཞེས་བྱ་བ་ལ་སོགས་པའོ། །ཡིད་ལ་སོགས་པ་ཡང་མངོན་སུམ་གྱི་སྒྲས་བརྗོད་པར་བྱ་བ་ཉིད་དུ་བྱེ་བྲག་ཏུ་བཤད་པ་གཞན་གྱི་སྒོ་ནས་སྟོན་ཏོ། །ཅིའི་ཕྱིར་དབང་པོའི་སྒོ་ནས་བསྙད་པར་མི་འཐད་སྙམ་ན། དབང་པོའམ་ཞེས་སྨྲས་སོ། །ཟླ་བ་གཉིས་ལ་

སོགས་པའི་ཤེས་པ་ཡང་དབང་པོ་ལས་སྐྱེས་པས་ན། མངོན་སུམ་དུ་ཐལ་བར་འགྱུར་རོ་ཞེས་བྱ་བའི་དོན་ཏོ། །གལ་ཏེ་ཡུལ་གྱི་རང་བཞིན་འཛིན་པ་ཐམས་ཅད་ཀྱང་མངོན་སུམ་མ་ཡིན་ཏེ། དེས་ན་དེས་ཀྱང་ཇི་ལྟར་བསྙད་སྙམ་ན། ཡུལ་གྱི་ཞེས་སྨྲས་སོ། །གལ་ཏེ་དབང་པོ་ལ་བརྟེན་པ་ཉིད་མངོན་

སུམ་ཉིད་ལས་འཁྲུལ་པ་ཡིན་མོད། དེ་ལྟ་ན་ཡང་དེས་ཐ་སྙད་བྱེད་པར་འགྱུར་རོ་ཞེ་ན། འཁྲུལ་པ་མེད་པའི་རྒྱུ་མཚན་ཞེས་སྨོས་སོ། །འདི་ལ་ནི་འཁྲུལ་པ་ཡོད་པ་དེས་ན་ཐ་སྙད་དུ་བྱ་བ་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའ་བརྗོད་པ་ནི་ཡུལ་གྱི་ཞེས་བྱ་བའོ། །གཞན་གྱི་དོགས་པ་བསུ་བ་ནི་དེ་

Vol. 185 · folio 184a

ནི་ཞེས་བྱ་བའོ། །ཡུལ་ནི་རྣམ་པར་འཇོག་པར་ནུས་པའི་རྒྱུ་ཡིན་ན་ཟླ་བ་གཅིག་ནི་དེ་ལྟ་མ་ཡིན་ཏེ། དེས་ན་ཡུལ་དུ་ཇི་ལྟར་འགྱུར། །གྲུབ་པའི་མཐའ་བརྗོད་པ་ནི་འོ་ན་ནི་ཞེས་བྱ་བའོ། །དེ་ནི་ཞེས་བྱ་བ་ནི་ཟླ་བ་གཉིས་སུ་ཤེས་པ་སྐྱེད་པར་བྱེད་དོ། །ཉམས་ཀྱང་ཅི་སྟེ་

དབང་པོ་མ་ཡིན་སྙམ་ན། དབང་པོ་ནི་ཞེས་བྱ་བའོ། །དེ་ལྟར་རེ་ཞིག་དབང་པོ་ལས་སྐྱེད་པ་དང་ཡུལ་གྱིས་བསྐྱེད་པ་ཐམས་ཅད་མངོན་སུམ་ཡིན་པར་གྲུབ་པའི་མཐའ་མཚུངས་པས་བྱས་ན་གཞན་དག་གི་ཕྱོགས་སྔ་མ་འགོད་པ་ནི་དེ་ལྟ་ན་ནི་འོ་ན་ཞེས་བྱ་བའོ། །རྒྱུ་ཉིད་དུ་ཞེས་བྱ་བ་ནི་མངོན་སུམ་གྱི་

ཤེས་པའི་རྒྱུ་ཉིད་དུ་མཚུངས་པ་ཡིན་ན་དེ་ཁོ་ནར་མིག་ལ་སོགས་པས་ཐ་སྙད་བྱེད་ཀྱི་ཡུལ་གྱི་ནི་མ་ཡིན་ནོ་ཞེ་ན། རྟོག་པ་མངོན་དུ་ཞེས་སྨོས་སོ། །སྦྱར་བར་བྱ་བ་ཡང་དེའི་ཆོས་ཞེས་བྱ་བ་ནི། སྦྱར་བར་བྱ་བ་ནི་གོ་བར་བྱེད་པ་ཉིད་དེའི་ཆོས་ཏེ། ཁྱད་པར་བྱ་བ་ཡིན་ནོ། །གོ་བར་བྱེད་པ་ཉིད་སྟོན་པ་ནི་གང་

དབང་པོ་ལ་བརྟེན་པ་དེ་ཞེས་བྱ་བའོ། །གལ་ཏེ་དབང་པོ་ལ་བརྟེན་པ་ཉིད་ཡིན་ཞིང་། མངོན་སུམ་ཉིད་དུ་མི་འགྱུར་ཏེ། ཟླ་བ་གཉིས་ལ་སོགས་པའི་ཤེས་པ་བཞིན་ནོ། །དེས་ན་ཇི་ལྟར་གོ་བར་བྱེད་པ་ཡིན་སྙམ་ན། ཉམས་པས་ཞེས་གསུངས་ཏེ་དབང་པོས་སོ། །འཁྲུལ་པ་ཞེས་བྱ་བ་ནི་ཡུལ་གྱིས་བསྐྱེད་

ཀྱང་མངོན་སུམ་མ་ཡིན་པའི་མཚན་ཉིད་དོ། །དེ་ནི་ཞེས་བྱ་བ་ནི་ཟླ་བ་གཉིས་ཀྱི་ཤེས་པ་སྐྱེད་པར་བྱེད་པ་སྟེ་ཟླ་བ་གཅིག་པའོ། །ལན་བརྗོད་པ་ནི་དེ་ནི་ཞེས་བྱ་བའོ། །དེ་ནི་ཞེས་བྱ་བ་ནི་ཟླ་བ་གཅིག་པའོ། །དེའི་ཚེ་དབང་པོ་མ་ཉམས་པའི་མངོན་སུམ་དུ་ཟླ་བ་གཅིག་པོ་ཇི་ལྟར་འགྱུར། དབང་པོ་ཡང་དེ་

བཞིན་དུ་འགྱུར་རོ་ཞེ་ན། དབང་པོ་ཉིད་ནི་ཞེས་སྨོས་སོ། །དེར་ཡང་ཞེས་བྱ་བ་ནི་ནས་མ་ཡིན་པའི་མྱུ་གུར་ཡང་ངོ་། །འོན་ཏེ་ཞེས་བྱ་བ་ནི་དོགས་པའོ། །ཟླ་བ་གཉིས་ཀྱི་ཤེས་པ་ལ་ནི་ཡུལ་གྱི་རང་བཞིན་འཛིན་པ་ཡོད་པ་མ་ཡིན་ནོ་ཞེས་བསམས་པའོ། །ཡུལ་འཛིན་པའི་ཕྱིར་རོ་ཞེས་བྱ་བ་ནི་མིང་དང་

མཚན་མའི་རང་བཞིན་གྱི་ཡུལ་གྱི་རང་གི་ངོ་བོ་ཉིད་འཛིན་པའི་ཕྱིར་རོ་ཞེས་བཤད་པ་ཡིན་ནོ་ཞེས་བྱ་བ་ནི་སློབ་དཔོན་ཆོས་ཀྱི་གྲགས་པས་སོ། །མ་ངེས་པའི་ཕྱིར་ཏེ་ཞེས་བྱ་བ་ནི་དོན་གྱི་མཐུ་ལས་སྐྱེས་པ་ཡང་དེའི་རྣམ་པའི་རྗེས་སུ་མི་བྱེད་པའི་ཕྱིར་རོ། །དེ་ཉིད་བརྗོད་ན་ཟླ་བ་གཉིས་ཀྱི་ཤེས་པའོ། །རིགས་

Vol. 185 · folio 184b

པ་འདིས་ཞེས་བྱ་བ་ནི་དོན་གྱི་མཐུ་ལས་སྐྱེས་པའི་མཚན་ཉིད་ཀྱིས་སོ། །དེ་ནི་དོན་གྱི་མཐུ་ལས་སྐྱེས་པ་མ་ཡིན་པའི་ཕྱིར་རོ། །འོ་ན་སློབ་དཔོན་གྱི་གཞུང་ཇི་ལྟར་གཞུང་གཟུགས་སྙམ་ན་དེའི་ཕྱིར་ཞེས་གསུངས་སོ། །འདིར་ཞེས་བྱ་བ་ནི་དོན་གྱི་མཐུ་ལས་ན། ཡང་དག་སྐྱེ་བ་ཡིན་ཕྱིར་རོ། །ཞེས་བྱ་བ་ནི་

འདིར་རོ་ཇི་ལྟར་ན་དབང་པོ་ལ་དོན་གྱི་ཐ་སྙད་དུ་བརྗོད་ཅེ་ན། བཤད་པ་དོན་དུ་མངོན་པར་ཞེན་པའི་ཕྱིར་རོ། །གང་གི་ཕྱིར་དབང་པོ་ལ་དོན་དུ་མངོན་པར་ཞེན་པ་ཡིན། དོན་གྱི་ཡུལ་ཅན་ཡིན་པའི་ཕྱིར། དེ་སྐད་བརྗོད་པ་ཡིན་ནོ་ཞེས་བྱ་བའི་དོན་ཏོ། །དབང་པོའི་རྣམ་པར་ཤེས་པ་དེ་ནི་གཟུགས་འཛིན་པར་

སོ་སོར་ངེས་པར་བྱེད་པའི་མིག་གི་སྟོབས་ཀྱིས་སྐྱེ་བ་ན་སྔོན་པོ་ལ་སོགས་པའི་རང་བཞིན་ཁོ་ནའི་རྗེས་སུ་བྱེད་པར་འགྱུར་གྱི་སྒྲའི་རྣམ་པར་ནི་མ་ཡིན་ནོ། །དེ་ལྟ་ན་ཡང་སྒྲའི་རྣམ་པ་དང་བྲལ་བའི་ཕྱིར་རོ། །རྣམ་པར་རྟོག་པ་མེད་པ་ཡིན་ནོ་ཞེས་བྱ་བའི་དོན་དུ་འོན་ཏེ་གཞན་གྱི་སྟོབས་ཀྱིས་གཟུགས་ཀྱི་ངོ་བོ་

རྗེས་སུ་བྱེད་པའི་ཤེས་པ་ནི་སྒྲའི་རྣམ་པ་ཅན་དུའང་འགྱུར་ཏེ། གཟུགས་ཉིད་སྒྲའི་བདག་ཉིད་ཅན་ཡིན་པའི་ཕྱིར་རོ་ཞེས་དོགས་པ་བསུ་ནས་གང་གིས་དེ་སྣང་བ་ན་དེ་དག་ཀྱང་སྣང་བར་འགྱུར་བ་དོན་ལ་སྒྲའི་ཡོད་པའམ་དེའི་བདག་ཉིད་ནི་མ་ཡིན་ནོ་ཞེས་གསུངས་ཏེ། དེ་ལྟར་བཤད་པར་བྱ་བ་ཡིན་ནོ། །ཁྱབ་

པར་བྱེད་པའི་ཞེས་བྱ་བ་ནི་གོ་བར་བྱེད་པའི་རང་བཞིན་ནོ། །ལོག་པའི་ཕྱིས་ཞེས་བྱ་བ་ནི་ཡུལ་ལ་བརྟེན་པ་ཞེས་བྱ་བའི་ཐ་སྙད་འདི་ལ་གོ་བར་བྱེད་པ་ཉིད་ལྡོག་པ་ཡོད་པ་ཡིན་ཏེ་དེས་ནའོ། །དེའི་བདག་ཉིད་བརྗོད་པ་ནི་རྟོག་པ་སྔོན་དུ་ཞེས་བྱ་བའོ། །དེ་ཉིད་ཅེས་བྱ་བ་ནི་སྦྱར་བ་ཉིད་དོ། །བདེན་པ་དེ་གང་ཡིན་ཞེ་ན་

སྐྱེས་བུ་ཞེས་སྨོས་སོ། །སྐྱེས་བུ་ཚད་མ་ཡིན་པ་ཉིད་དུ་ངེས་པར་མི་ནུས་པའི་ཕྱིར་རོ་ཞེས་བྱ་བའི་དོན་ཏོ། །རྟགས་ཉིད་ཡིན་པ་ལ་ཁྱབ་བྱར་བརྗོད་པ་ཞེས་བྱ་བ་ནི་དོན་དམ་པར་ནི་མ་ཡིན་ནོ། །ཅིའི་ཕྱིར་ཞེ་ན། གང་གིས་ཞེས་གསུངས་སོ། །རྣམ་པར་རྟོག་པ་དང་བཅས་པའི་ཡུལ་ནི་སྔ་མ་དང་། ཕྱི་མར་

གྱུར་པ་ཡིན་ལ་དེ་ཡང་དེ་ཁོ་ནར་རྣམ་པ་དེ་ལྟར་ཡོད་པ་མ་ཡིན་ཏེ། དངོས་པོའི་ཚོགས་ནི་སྐད་ཅིག་མར་འཇིག་པའི་ཕྱིར་རོ། །དེས་ན་ཡུལ་མེད་པའི་ཕྱིར་ན། ཡུལ་ལ་སྟོན་པ་ཞེས་བྱ་བའི་ཐ་སྙད་དུ་ཇི་ལྟར་འགྱུར་སྙམ་ན། རྣམ་པར་རྟོག་པ་དང་བཅས་པའི་མངོན་སུམ་གྱི་ཞེས་སྨོས་སོ། །འཇིག་རྟེན་ན་དེ་ལྟར་

Vol. 185 · folio 185a

ན་གྲགས་པ་མེད་དོ་ཞེ་ན་འདི་ནི་ཞེས་གསུངས་སོ། །དེ་ཉིད་གཞུང་འཛུགས་པ་ནི་འདི་ལྟར་ཞེས་བྱ་བའོ། །གལ་ཏེ་འཇིག་རྟེན་ན་དེ་ལྟར་རྟོགས་མོད། དེ་ལྟ་ན་ཡང་ཚད་མ་མ་ཡིན་ནོ་ཞེ་ན། གནོད་པ་མེད་པའི་ཞེས་གསུངས་སོ། །མངོན་དུ་བྱེད་པའི་རྣམ་པས་འཇུག་པ་ཉིད་

ཤེས་པ་ཡིན་པ་དེས་ན། ཇི་ལྟར་རྗེས་སུ་དཔག་པ་ཡིན་སྙམ་ན། མངོན་དུ་བྱེད་པ་ནི་ཞེས་གསུངས་སོ། །སྔ་མ་དང་ཕྱི་མ་དང་སྡོམ་པའི་རང་བཞིན་གྱི་ངོ་ཤེས་པ་ནི་མངོན་དུ་བྱེད་པ་མ་ཡིན་ནོ། །མངོན་དུ་བྱེད་པའི་དེ་ཉིད་ལ་ཡུལ་ལ་བརྟེན་པ་ཞེས་བྱོས་ཤིག་དབང་པོ་ལ་བརྟེན་པའི་ཐ་སྙད་ཀྱིས་ཅི་བྱ་སྙམ་

ན་དེ་ན་ཞེས་གསུངས་སོ། །དེ་ལྟར་ཐ་སྙད་བྱ་བ་ལ་ནི་ཞེས་བྱ་བ་ནི་ཡུལ་ལ་བརྟེན་པ་ཞེས་བྱ་བ་འདིས་བརྗོད་པའི་བྱ་བའི་ཡུལ་ལའོ། །ཡུལ་བརྟེན་པ་ཟླ་བ་གཅིག་གིས་ཤེས་པ་ཡང་མངོན་སུམ་དུ་ཐལ་བའི་ཕྱིར་རོ། །དེ་ལྟ་ན་ཡུལ་ལ་བརྟེན་ནོ་ཞེ་ན། མངོན་སུམ་ཁོ་ནར་བརྗོད་ལ་རག་མོད། ཉེས་

པ་ཅི་ཡོད་སྙམ་ན་མངོན་སུམ་ལ་ཡང་ཞེས་བྱ་བའོ། །ཟླ་བ་གཉིས་པའི་ཤེས་པ་ནི་ཚད་མ་ཉིད་མ་ཡིན་ན་མངོན་དུ་ལྟ་ག་ལ་ཞེས་བསམས་པའོ། །གལ་ཏེ་དབང་པོ་ལ་བརྟེན་པས་ཀྱང་མངོན་དུ་བྱེད་པ་ཙམ་དུ་མཚོན་གྱི་མངོན་སུམ་ཉིད་དུ་ནི་མ་ཡིན་ནོ། །དེས་ན་དབང་པོ་ལ་བརྟེན་པ་ཉིད་ཉེ་བར་

མཁོ་བ་ཇི་ལྟར་ཡིན་སྙམ་ན། མངོན་དུ་བྱེད་པ་ལས་ཞེས་གསུངས་སོ། །མངོན་དུ་བྱེད་པ་ཉིད་མཚོན་པ་ན་མཉམ་པའི་དབང་པོ་ལ་བརྟེན་པ་ཉིད་ཀྱིས་མངོན་སུམ་ཉིད་དུ་མཚོན་པ་ཡིན་ནོ་ཞེས་བྱ་བའི་དོན་ཏེ། འདི་སྐད་ཅེས་ཞེས་བྱ་བ་ནི་སློབ་དཔོན་ཕྱོགས་ཀྱི་གླང་པོས་སོ། །དེ་དང་འགལ་བའི་

ཕྱིར་ཞེས་བྱ་བ་ནི་རྟོག་པ་མེད་པ་དང་འགལ་བའི་ཕྱིར་རོ། །དེ་ཁོ་ན་ལྟར་ཞེས་བྱ་བ་ཕན་ཚུན་སྤངས་པའི་རང་བཞིན་ཉིད་དུའོ། །སྤྱི་འཛིན་པ་རྣམ་པར་རྟོག་པ་དང་བཅས་པ་ཉིད་རང་དབང་དུ་བསྒྲུབ་པའི་དོན་དུ་རྣམ་པར་རྟོག་པར་བྱེད་པ་ནི་ཚོགས་ལས་ཞེས་བྱ་བའོ། །དེ་ལས་ཐ་དད་པར་ཞེས་བྱ་བས་

ནི། སྤྱིའི་རྟེན་གྱིས་གསལ་བ་ལས་མ་གཏོགས་པར་ཚོགས་པ་གཞན་སྣང་བ་མེད་པའི་ཕྱིར་རོ། །འདིས་ནི་མི་དམིགས་པ་ཉེ་བར་བཀོད་དོ། །གཞན་ཞེས་བྱ་བ་ནི་གསལ་བ་རྣམས་ལས་ཐ་དད་པའི་ཚོགས་པའི་སྤྱི་ཞེས་བྱ་བའི་མིང་ཅན་ནོ། །གལ་ཏེ་སྣང་བར་འདོད་དུ་ཟིན་ཀྱང་གཞན་ཏེ་སྣང་བ་མེད་དེ་ཚོགས་པ་ནི་

Vol. 185 · folio 185b

མ་ཡིན་ཏེ། རང་དབང་དུ་རྟོགས་པ་ནི་ཚོགས་པ་ཉིད་དུ་མི་འཐད་པའི་ཕྱིར་ཏེ། དེ་ནི་འབྲེལ་བ་ཅན་གྱི་རང་བཞིན་ཡིན་པའི་ཕྱིར་རོ། །དེ་ཡིན་པ་ཉིད་ན་ཡང་ཞེས་བྱ་བ་ནི་རང་དབང་དུ་སྣང་བ་ཡང་གལ་ཏེ་གསལ་བ་ལ་ལྟོས་ཏེ་སྤྱིའི་རང་བཞིན་ཡིན་པ་དེའི་ཚེ་ཡང་དེ་དག་ཉིད་ཅེས་བྱ་བ་སྤྱིའི་རྟེན་དུ་གྱུར་པའི་གསལ་བ་

རྣམས་ཉིད་དོ། །རྣམ་པར་རྟོག་པ་གཉིས་པ་དགོངས་པ་ནི་འོན་ཏེ་ཞེས་བྱ་བའོ། །དེ་ཡང་ཞེས་བྱ་བ་ནི་ལན་ཏེ། རང་བཞིན་གཞན་བརྟགས་དེ་ཡང་ངོ་། །རྟོག་པའི་ཡུལ་གྱི་ཚོགས་པ་ཉིད་མངོན་སུམ་གྱི་ཡུལ་ཡིན་ནོ་ཞེ་ན་བརྟགས་པའི་ཞེས་སྨོས་སོ། །གཞན་ལས་ཞེས་པ་ལ་ལྟོས་ཏེ། རྒྱུར་གྱུར་པའི་

ནས་པ་མ་སྐྱེས་པའི་རྡུལ་གང་ཡིན་པ་དེ་དག་ལ་དེ་སྐད་ཅེས་བྱ་བའོ། །ཕྲ་མོ་མ་ཡིན་པ་རགས་པ་ནི་དེ་མཐོང་བ་དག་ལ་དེ་སྐད་ཅེས་བྱའོ། །དེས་ན་ཞེས་བྱ་བ་ནི་དེས་ན་གཞན་ཡོད་པ་ནའོ། །ཐམས་ཅད་ཀྱིས་བསྐྱེད་མོད། དེས་ཅིར་འགྱུར་སྙམ་ན་ཤེས་པ་དེ་ནི་ཞེས་གསུངས་སོ། །ཚུན་ཞེས་བྱ་བ་ནི་དོགས་

པའོ། །གྲུབ་པའི་མཐའ་ནི་སྒྲ་ལ་སོགས་པས་ཞེས་བྱ་བའོ། །རང་གི་རྒྱུ་ལ་སོགས་པ་གང་ཡིན་པ་རང་གི་རྣམ་པ་གཏོད་པའི་ནུས་པ་མེད་པ་དེའི་ཕྱིར་ཏེ། དེ་ལས་མི་སྣང་བ་ཡིན་ནའོ། །འོ་ན་ཞེས་བྱ་བ་ལ་སོགས་པས་ནི་འཁྲུལ་པ་ཉིད་དུ་བསྒྲུབས་པ་མངོན་སུམ་ཉིད་དང་འགལ། གཞན་རྟོག་པ་དང་བཅས་

པ་ཉིད་དུ་ཡང་སྒྲུབ་པ་ནི་ལྷག་པར་ཞེས་བྱ་བའོ། །འོན་ཏེ་དེར་ཞེས་བྱ་བ་ནི་མངོན་སུམ་ལའོ། །རྟོག་པ་ལ་ལྟོས་ཏེ་སྣང་བ་ཤར་བ་མེད་པ་གར་ཡིན་པ་དེ་དག་ལ་དེ་སྐད་ཅེས་བརྗོད་དོ། །དེ་ལྟར་གྱུར་ན་རྣམ་པར་རྟོག་པ་དང་བཅས་པ་ནི་མངོན་སུམ་ལ་བརྗོད་པ་མ་ཡིན་ནོ། །འཛིན་པ་ཡིས་ནི་ཞེས་བྱ་བ་ནི་མངོན་

སུམ་གྱིས་སོ། །དེ་ཞེས་བྱ་བ་རྣམ་པར་རྟོག་པའི་རང་བཞིན་ཉིད་སེལ་ཏེ་འདིར་རོ། །ཅིའི་ཕྱིར་ཞེ་ན། མངོན་སུམ་ནི་མངོན་དུ་བྱེད་པའི་རང་བཞིན་ཡིན་པའི་ཕྱིར་རོ། །མངོན་དུ་བྱེད་པ་ཉིད་ལྷག་པར་ཞེན་པར་འགྱུར་རོ་ཞེ་ན། མངོན་དུ་བྱེད་པ་ཉིད་ནི་ཞེས་གསུངས་སོ། །དེ་ཉིད་དུ་ནི་ཞེས་བྱ་བ་ནི་ལྷག་པར་ཞེན་

པ་ཉིད་དུའོ། །དེ་ལས་བཟློག་པ་ནི་མངོན་དུ་བྱེད་པ་ལས་བཟློག་པར་འགྱུར་རོ། །བཤད་ཅེས་བྱ་བ་ནི་སློབ་དཔོན་དབྱིག་གཉེན་གྱིས་སོ། །འདི་དག་ནི་ཞེས་བྱ་བ་ནི་རྣམ་པར་ཤེས་པའི་ཚོགས་ལྔ་པའོ། །རྫས་ཀྱི་རང་གི་མཚན་ཉིད་ཅེས་བྱ་བ་ནི་རྡུལ་ཕྲ་རབ་ཀྱི་རང་གི་མཚན་ཉིད་དོ། །འདི་ནི་ཞེས་བྱ་བ་ནི་སྐྱེ་མཆེད་

Vol. 185 · folio 186a

ཀྱི་རང་གི་མཚན་ཉིད་ཅེས་བྱ་བ་ལ་སོགས་པའོ། །གཏན་ཚིགས་དེའི་ཕྱིར་ན་ཡུལ་ཅན་ཉིད་ཡིན་པར་འགལ་བ་མེད་དོ། །ད་ནི་རྣམ་པར་རྟོག་པ་དང་བཅས་པར་འགྱུར་རོ་ཞེ་ན། གང་ཡང་ཞེས་གསུངས་སོ། །འོ་ན་གང་ཞིག་རྣམ་པར་གཅོད་པའི་དོན་དུ་རྟོག་པ་དང་བྲལ་བ་ཉིད་བརྗོད་པ་རྣམ་

པར་རྟོག་པ་དང་བཅས་པར་བརྗོད་པ་གང་ཡིན་ཞེ་ན། གཞན་ལ་གྲགས་པ་ལ་བརྟེན་ནས་ཞེས་སྨོས་སོ། །གཞན་ལ་རིགས་པ་ཅན་ལ་སོགས་པ་ལའོ། །རྗེས་སུ་དྲན་པའི་རྣམ་པར་རྟོག་པ་ཞེས་བྱ་བ་འདི་སྔར་མཐོང་བའོ་ཞེས་བྱ་བ་ལྟ་བུའི་རྣམ་པ་ཅན་མ་འདི་ནི་སྔོན་པོ་སྙམ་པ་ལ་སོགས་པའི་རང་བཞིན་ཅན་གྱིས་

སོ། །དེ་ཞེས་བྱ་བ་ནི་དེ་ལྟ་བུར་གྱུར་པའི་རྟོག་པ་ཉིད་དོ། །བཟློག་པར་དཀའོ་ཞེས་བྱ་བ་ནི་རྣམ་པར་རྟོག་པ་དང་བཅས་པ་ཉིད་དོ། །གཅིག་གི་ཚེ་ཁོ་ནར་ཞེས་བྱ་བ་གཅིག་ཉིད་ཀྱིས་དུ་མ་མཐོང་ངོ་སྙམ་ན། ཤེས་པ་ཞེས་གསུངས་སོ། །དེ་ལྟར་ན་རེ་ཞིག་གཅིག་གི་ཚེ་རྡུལ་ཕྲ་རབ་དུ་མ་འཛིན་པ་མེད་པའི་ཕྱིར་རྣམ་

པར་རྟོག་པ་ཉིད་དུ་བསྒྲུབས་ནས་རྣམ་པར་མི་རྟོག་པ་ཉིད་གྲུབ་པའི་དོན་དུ་རྡུལ་ཕྲ་རབ་རྣམས་ལ་ཡན་ལག་ཅན་གྱི་རྫས་གཅིག་ཉིད་ཁོ་ནར་ངེས་དགོས་སོ་ཞེས་སྟོན་པ་ནི་ཡང་ན་ནི་ཞེས་བྱ་བའོ། །འདི་ལ་བརྗོད་པ་ནི་དངོས་པོ་དུ་མ་ཤེས་པ་གཅིག་གིས་མི་འཛིན་པ་ག་ལས་ཡིན་ཞིང་། དེའི་ཡན་ལག་གཅིག་པ་

ཡང་ག་ལས་ཡིན། ཅིག་ཅར་འཛིན་པའི་ཕྱིར་ཡན་ལག་ཅན་ཉིད་ཡིན་ཏེ། དེ་ལྟ་མ་ཡིན་ན་ཡིད་གཅིག་ཡིན་པའི་ཕྱིར། དུ་མ་ལ་བྱེད་པ་ཇི་ལྟར་འཇུག་སྙམ་ན། ཏིལ་ཞེས་གསུངས་སོ། །ཡིད་ལ་བྱེད་པ་ཞེས་བྱ་བ་ནི། སྔར་གྱི་ཡིད་ལ་བྱེད་པ་ཙམ་ཉིད་ལ་ཡིད་ཉིད་དུ་གྲགས་ཀྱི། ཡིད་གཞན་ནི་

ཡོད་པ་མ་ཡིན་ནོ། །དེ་ཡང་རྣམ་པར་ཤེས་པ་དུ་མ་བསྐྱེད་པ་ཉིད་བཟློག་པར་མི་ནུས་ཏེ། གཅིག་གིས་ཀྱང་ཤེས་པ་དུ་མ་བསྐྱེད་པ་ལ་འགལ་བ་མེད་པའི་ཕྱིར་རོ། །མགྱོགས་པ་ནི་ཞེས་བྱ་བ་ཅིག་ཅར་འཛིན་པ་སྣང་བ་བསྐྱེད་པ་ནི་མེད་པའི་ཕྱིར་རོ། །ཅིའི་ཕྱིར་མེད་ཅེ་ན་བཤད་ཟིན་པའི་ཕྱིར་རོ་ཞེས་

གསུངས་སོ། །གནོད་བྱེད་གཞན་དག་ཀྱང་བརྗོད་པ་ནི་མགྱོགས་པའི་ཕྱིར་ཞེས་བྱ་བའོ། །འོན་ཏེ་གཅིག་ལ་རིམ་པ་མཐོང་བས་ཐམས་ཅད་ལ་རྟོགས་པ་ཡིན་ནོ་ཞེས་དོགས་པ་བསུ་ནས་བརྗོད་པ་ནི། དེ་ལྟར་ན་ནི་ཞེས་བྱ་བའོ། །གཅིག་ལ་ཟླ་བ་གཉིས་ཀྱི་ཤེས་པ་འཁྲུལ་པའི་ཕྱིར་ཐམས་ཅད་

Vol. 185 · folio 186b

འཁྲུལ་པ་ཁོ་ནར་ཐལ་ལོ་ཞེས་བྱ་བ་ལ་སོགས་པའི་ནི་ཧ་ཅང་ཐལ་བའོ། །དེ་ལྟར་ཞེས་བྱ་བ་ནི། མགྱོགས་པ་ལས་རིམ་མ་ཡིན་པར་གཟུང་བར་རློམ་པ་ཉིད་དུའོ། །འདི་ལ་ཡང་ཞེས་སྐབས་སུ་བབ་པའི་ཏིལ་དང་འབྲས་ལ་སོགས་པ་ལའོ། །དེ་ཞེས་བྱ་བ་ནི་མགྱོགས་པའོ། །ཅིག་ཅར་

ཞེས་བྱ་བ་ནི་དོགས་པའོ། །དེ་ཉིད་ཀྱང་ཞེས་བྱ་བ་ནི་ལན་ནོ། །འདི་ནི་ཅིག་ཅར་འཛིན་པར་རློམ་པ་ཡིན་གྱི་ཅིག་ཅར་འཛིན་པ་མ་ཡིན་ནོ་ཞེས་བྱ་བ་འདིའོ། །དེ་མ་གྲུབ་པ་ཞེས་བྱ་བ་ནི་འཛིན་པ་མྱུར་བར་མ་གྲུབ་པའོ། །གལ་ཏེ་བློ་རིམ་པ་དང་ལྡན་པ་དང་། སྐད་ཅིག་མ་ཡིན་པ་དེ་ལྟ་ན་ཡང་དོན་ནི་

རིམ་གྱིས་སྣང་བ་ཡིན་ཏེ། དོན་ནི་སྐད་ཅིག་མ་ཡིན་པའི་ཕྱིར་རོ། །དེས་ན་ཐམས་ཅད་ལ་ཅིག་ཅར་འཛིན་པར་རློམ་པ་ཇི་ལྟར་ཡིན་སྙམ་ན། གསལ་བྱ་སྣང་བ་ནི་ཞེས་གསུངས་སོ། །གལ་ཏེ་དོན་སྐད་ཅིག་མ་ཡིན་པ་དེ་ལྟ་ན་ཡང་དུས་ཇི་སྲིད་བློ་གནས་པ་དེ་སྲིད་ཁོ་ནར་དེ་ལྟར་སྣང་བ་ཡིན་ནོ་ཞེས་བྱ་

བའི་དོན་ཏོ། །དེ་ཁོ་ན་ལྟར་ནི་ཅིག་ཅར་ཁོ་ནའོ། །གལ་ཏེ་ཤེས་པ་ཅིག་ཅར་ཁོ་ན་སྐྱེ་ན། འོ་ན་དེའི་ཚེ་ཐམས་ཅད་དུ་ཅིག་ཅར་ཁོ་ན་སྣང་བར་འགྱུར་རོ་ཞེ་ན། གང་དུ་ཞེས་གསུངས་སོ། །ཤེས་པ་རྣམས་ཅིག་ཅར་ཁོ་ན་སྐྱེའོ་ཞེས་བྱ་བར་ཇི་ལྟར་ཤེས་ཤེ་ན་རིམ་གྱིས་འཛིན་པ་ཁས་ལེན་ན་རྣམ་པར་རྟོག་

པ་མེད་པའི་སྣང་བ་མི་སྲིད་པ་ཁོ་ནར་འགྱུར་ཏེ་སྔ་མ་འཛིན་པ་ནི་ཕྱི་མ་འཛིན་པའི་དུས་ན་རྣམ་པར་རྟོག་པ་དང་བཅས་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །ཐམས་ཅད་རྣམ་པར་རྟོག་པ་དང་བཅས་པ་ཡིན་མོད། ཁོ་བོ་ཅག་གི་འདོད་པ་ཁོ་ན་ཡིན་ནོ་ཞེ་ན་བཤད་པ་རྟོག་མེད་ཉིད་དུ་འགྱུར་ན། དོན་གསལ་

བའི་འཛིན་པ་མི་སྲིད་པར་འགྱུར་ཏེ། ཐམས་ཅད་མི་གསལ་བར་སྣང་བ་ཉིད་དུ་འཛིན་པར་འགྱུར་རོ་ཞེས་བྱ་བའི་དོན་ཏོ། །ཡང་ཇི་ལྟར་ན་དྲན་པར་རྟོགས་པ་ལ་གསལ་བར་སྣང་བ་ཉིད་མི་འཐད་ཅེ་ན། སྔོན་པོ་མཐོང་བའི་དངོས་པོ་སྒྲོ་བཏགས་པ་གང་ཡིན་པ་གསལ་བར་སྣང་བ་ཇི་ལྟར་འགྱུར་ཏེ།

སྒྲོ་བཏགས་པ་གསལ་བར་སྣང་བ་དང་འགལ་བའི་ཕྱིར་རོ། །གཞན་གྱིས་སྨྲས་པ་ཤིན་ཏུ་གོམས་པར་གྱུར་པ་ལས་སྒྲོ་བཏགས་པ་ཡང་གསལ་བར་སྣང་བར་འགྱུར་རོ་སྙམ་ན། འདི་ལ་བརྗོད་པ་ནི་སྒྲོ་བཏགས་པ་གསལ་བར་སྣང་མེད་ནི་རྟོག་པ་མེད་པ་ཁོ་ནར་འགྱུར་ཏེ། གསལ་བར་སྣང་བ་ནི་

Vol. 185 · folio 187a

རྟོག་པ་དང་བཅས་པར་མི་འཐད་པའི་ཕྱིར་རོ། །དེ་བཞིན་ཉིད་ཅེས་བྱ་བ་ནི་གསལ་བར་སྣང་བ་ཉིད་ལས་ཡིན་ནོ། །གལ་ཏེ་དེ་ལྟར་ནི་རིམ་གྱིས་སྐྱེ་བ་ཡིན་ཡང་རྣམ་པ་གསལ་བའི་ཕྱིར། རྟོག་པ་མེད་པ་ཉིད་དུ་འགྱུར་མོད། རིམ་གྱིས་སྐྱེ་བ་འགག་པ་ནི་མི་འགྲུབ་པོ་ཞེ་ན། དེ་ལྟ་ཡིན་

དང་ཞེས་གསུངས་སོ། །སྔོན་གྱི་རང་བཞིན་འཛིན་པ་མེད་པའི་ཕྱིར་ཞེས་བྱ་བ་ནི། སྔོན་གྱི་རང་བཞིན་དུ་འཛིན་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཕྱེ་མ་ལེབ་ཁྲ་བོ་ལ་སོགས་པ་ཉིད་ངོ་མཚར་བ་ཡང་མཚན་སྐྱེ་བ་ཡིན་ལ་དེ་བས་ཆེས་སོ། །ཁྲ་བོ་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་

ཁྲ་བོའི་བདག་ཉིད་དོ། །རྣམ་པར་དབྱེ་བ་དང་ལྡན་པ་ནི་སོ་སོར་བྱེད་པ་དང་ལྡན་པའོ། །དེ་ལ་ཡང་ཞེས་བྱ་བ་ནི་བཅོས་བུ་མ་ཡིན་པའི་ཕྱེ་མ་ལེབ་ཁྲ་བོ་ལ་སོགས་པ་ལ་ཡང་ངོ་དེ་ལ་ནི་རིན་པོ་ཆེའི་ཕུང་པོ་ལའོ། །ཐམས་ཅད་ལ་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་ཁྲ་བོ་ལ་སོགས་པ་ལ་ཡང་

ངོ་། །དེའི་ཚེ་ན་ནི་བཅད་པ་དང་ཕུག་པ་ལ་སོགས་པའི་དུས་ན་ཕྱེ་མ་ལེབ་ཁྲ་བོ་ལ་སོགས་པ་ལ་ཡན་ལག་ཅན་གྱི་རྫས་ཞིག་མ་ཡིན་པ་ན་ཞེ་ན། ལན་ནི་འདི་སྔ་ཀུན་ལ་ཞེས་བྱ་བ་སྟེ། རིན་པོ་ཆེའི་ཕུང་པོ་ཡང་མ་འབྱར་བའི་དུས་ན་རྫས་ཞིག་ཡིན་ཏེ། དེས་ན་དེར་ཡང་གཅིག་ཉིད་ཡིན་པར་འགྱུར་རོ། །དེ་ལྟ་ཞེས་

བྱ་བ་ནི་མ་འདྲེས་པའོ། །དེ་ལ་ནི་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་ཁྲ་བོ་ལ་སོགས་པའོ། །དེའི་རེག་པ་རང་བཞིན་གཅིག་ཡིན་པའི་ཕྱིར་ཞེས་བྱ་བ་ནི་སྔོན་པོའི་རེག་པ་ཅི་འདྲ་བ་སོར་རེག་པ་དེ་ཡང་དེ་འདྲ་བ་ཡིན་ནོ། །སྔོན་པོ་ལ་སོགས་པའི་རྣམ་པར་དབྱེ་བ་བཞིན་གྱི་ཁྱད་པར་རོ། །རྣམ་པར་དབྱེ་བ་

མེད་པར་ཁྱད་པར་མེད་པའི་རེག་པ་སོགས་པ་གང་ཡིན་པ་དེ་དང་ལྷན་ཅིག་རྒྱུ་བ་ནིའོ། །གཅིག་མ་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་ཁྲ་བོ་ལའོ། །གཞན་ལ་ཞེས་བྱ་བ་ནི་བཅོས་མ་ལའོ། །དེ་ལ་གཅིག་ཏུ་མངོན་པར་ཞེན་པ་ཉིད་སྐྱབས་སུ་གྱུར་པ་ཡིན་ན་ཞེས་བྱ་བ་ནི། གལ་ཏེ་དེ་ལ་གཅིག་ཏུ་

མངོན་པར་ཞེན་པ་ཡོད་ན། དེས་ན་དེ་ལ་ཡན་ལག་གཅིག་ཉིད་ཡོད་པ་ཡིན་ནོ་ཞེས་རྣམ་པ་དེ་ལྟ་བུའི་རང་བཞིན་དུའོ། །དེ་ནི་ཞེས་བྱ་བ་ནི་གཅིག་ཏུ་མངོན་པར་ཞེན་པ་མཚན་ཉིད་ཀྱི་སྐབས་སོ། །དེས་ན་ཇི་ལྟར་དེར་ཡན་ལག་ཅན་མེད་ཀྱང་གཅིག་ཏུ་མངོན་པར་ཞེན་པ་དེ་བཞིན་དུ་བཅོས་མ་མ་ཡིན་པ་

Vol. 185 · folio 187b

རྣམས་ལ་ཡང་འགྱུར་རོ་ཞེས་དགོངས་པའོ། །གལ་ཏེ་ཡན་ལག་ཅན་གཅིག་མེད་ན། དེའི་ཚེ་གཅིག་དྲངས་ན་ཐམས་ཅད་འོངས་པ་ཇི་ལྟར་འགྱུར་ཞེ་ན། གཅིག་དྲངས་པ་ཞེས་གསུངས་སོ། །དེར་ཡང་ཞེས་བྱ་བ་ནི། ཁབ་ལོང་དང་ལྕགས་དག་ལའོ། །བཅོས་མའི་དངོས་པོ་རྣམས་ལ་ཡོད་པའི་

ཡོན་ཏན་སྔོན་པོ་ལ་སོགས་པ་གང་ཡིན་པ་དེ་གང་གི་དམིགས་པ་ནི་རིམ་གྱིས་ཁོ་ནར་འགྱུར་བ་ཡིན་ལ། དེ་ལས་གཞན་བཅོས་མ་མ་ཡིན་པ་རྣམས་ལ་ནིའོ། །བློ་གཅིག་ནི་ཞེས་བྱ་བ་བཅོས་བུའི་ཡུལ་ཅན་ནོ། །གཞན་ནི་ཞེས་བྱ་བ་ནི་བཅོས་བུ་མ་ཡིན་པའི་ཡུལ་ཅན་ནོ། །གཅིག་དང་དུ་མའི་རྣམ་

པར་དབྱེ་བ་ཞེས་བྱ་བ་ནི་བཅོས་བུ་མ་ཡིན་པའི་སྣ་ཚོགས་ཀྱང་གཅིག་ཁོ་ན་ཡིན་ལ། བཅོམ་བུའི་ནི་དུ་མ་ཡིན་ནོ་ཞེས་བྱ་བ་དེ་ལྟ་བུའི་རྣམ་པའོ། །དེའི་ངོ་བོར་རྣམ་པར་འཇོག་པ་ལ་ཞེས་བྱ་བ་ནི། གཅིག་དང་དུ་མའི་རང་བཞིན་དུ་རྣམ་པར་འཇོག་པ་ལའོ། །དེ་ལྟར་ཞེས་བྱ་བ་གཅིག་དང་དུ་མའི་རང་བཞིན་

རྣམ་པར་འཇོག་པ་ལ་རྩོམ་པ་གེགས་མེད་པ་སྟེ། གེགས་དང་བྲལ་བའི་རྩོམ་པ་གང་ལ་ཡོད་པའི་བློ་དེ་དག་ཀྱང་སྟེ། གཅིག་དང་དུ་མ་སྣང་བ་དང་ལྡན་པ་དག་ཀྱང་ངོ་། །གཅིག་ཏུ་མངོན་པར་ཞེན་པ་ལ་སོགས་པ་ཆོས་མཐུན་པ་ཙམ་དེ་ཉིད་ཀྱིས་རྒྱུ་མཚན་དེས་ཉེ་བར་བཏགས་པའི་ཚད་མ་གང་ལ་ཡོད་ཀྱི་

བློ་གཞན་དེས་སོ། །བྱེད་ན་དེའི་ཚེ་ཞེས་ཁོང་ནས་ཕྱུང་ལ། ཆོས་མཐུན་པ་འདི་ཞེས་བྱ་བ་ལ་སོགས་པར་སྦྱར་རོ། །འདི་ཉིད་ཚིག་ལེའུར་བྱས་པ་གཉིས་ཀྱིས་སྡུད་པ་ནི་དེའི་ཕྱིར་ཞེས་བྱ་བའོ། །དོན་རང་བཞིན་སྣ་ཚོགས་པ་དང་འབྲེལ་པ་གྲུབ་པའི་བློ་དེ་དག་ནི་སྣང་བ་གཞན་དག་ལས་ནི་ཞེས་བྱ་བ་མངོན་པར་

སྣང་བའི་ཁྱད་པར་གཅིག་ལས་སྣང་བ་གཞན་སེར་པོའི་རང་བཞིན་ཅན་དོན་མེད་ཅེས་བྱ་བར་བརྗོད་པ་སྟེ། སྣང་བ་གང་ལ་དོན་སྣ་ཚོགས་པ་ཡོད་པ་དེ་ནི་དོན་མེད་དེ་དོན་དུ་མ་ཡོད་པའོ། །དེའི་དངོས་པོ་ནི་དོན་མེད་དེ་དོན་ཐ་དད་པ་ཅན་ཞེས་བྱ་བའི་དོན་ཏོ། །འོན་ཏེ་གཅིག་ཏུ་མངོན་པར་ཞེན་པ་ཡོད་པའི་ཕྱིར་

ན་དེ་འདྲ་བའི་བློ་ཡོད་པ་དག་ལ་ཡང་། གཅིག་ཉིད་ཡིན་ནོ་ཞེ་ན། གལ་ཏེ་ཞེས་བྱ་བའོ། །དེ་ཞེས་བྱ་བ་ནི་ཆོས་མཚུངས་པ་ཙམ་མོ། །འགར་ཡང་མིན་ཞེས་བྱ་བ་ནི། གཅིག་ལ་ཆོས་མཐུན་པ་ཙམ་གྱིས་མི་འགྲུབ་ན་ཐམས་ཅད་ལ་མི་འགྲུབ་སྟེ། ཆོས་མཚུངས་པ་ཙམ་ནི་ཐུན་མོང་ཡིན་པའི་ཕྱིར་རོ། །འགལ་

Vol. 185 · folio 188a

ཟླ་དང་སྟེ་མི་མཐུན་པའི་ཕྱོགས་དང་ལྡན་པ་ཞེས་བྱ་བ་འབྲེལ་པ་དེ་འཛིན་པས་སོ། །སྟོབས་མཚུངས་པའམ་མི་མཚུངས་པ་ཞིག་སེལ་གྲང་ན། དང་པོ་ལ་བརྗོད་པ་ནི་སྟོབས་མཚུངས་པ་ཉིད་ཡིན་ན་ཞེས་བྱ་བའོ། །གཉིས་པ་ལ་བརྗོད་པ་ནི་སྟོབས་མི་མཚུངས་ན་ཡང་ཞེས་གསུངས་

སོ། །སེལ་བར་བྱེད་པ་གང་ཡིན་པ་དེ་ལྟོས་ཏེ། སྟོབས་མི་མཚུངས་པ་ཉིད་ཡིན་ན་ཡང་ཇི་ལྟར་ཚད་མ་ཡིན་ཏེ། དེས་ཚད་མ་ནི་སེལ་བ་མི་སྲིད་དོ་ཞེས་དགོངས་པའོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །ལན་ནི་གང་ཞིག་ཅེས་བྱ་བའོ། །དེས་ན་ཞེས་བྱ་བ་ནི་དོན་མེད་ན་མི་འབྱུང་བས་ནའོ། །

དེ་ཉིད་ནི་རྗེས་སུ་དཔག་པའོ། །གཞལ་བྱའོ་ཞེས་བྱ་བ་ནི་ཐ་དད་པའིའོ། །རྒྱུ་ཉེས་པས་གཞལ་བྱ་གཞན་ལ་བློ་རྣམ་པ་གཞན་དུ་ཡང་སྐྱེའོ་ཞེས་བྱ་བ་འདི་ནི་རིགས་པ་ཁོ་ན་ཡིན་ན། ཤེས་པ་ཡོངས་སུ་གསལ་བའི་ངོ་བོ་ཉིད་ལ་ནི། རྒྱུའི་རྐྱེན་སྐྱོ་བ་བརྒྱ་ཕྲག་གིས་ཀྱང་བློ་རྣམ་པ་གཞན་དུ་ཇི་ལྟར་འཐད་དེ།

མི་འཐད་པ་ཁོ་ནའོ། །རིམ་པ་དང་ལྡན་པའི་སྣང་བའི་རང་གི་ངོ་བོ་བཅོས་མའི་ཕྱེ་མ་ལེབ་ཁྲ་བོ་ལ་སོགས་པ་དག་ལ་ནི། རིམ་པ་མེད་པར་འགྱུར་རོ་ཞེས་མི་རིགས་སོ། །ཅིའི་ཕྱིར་ཞེ་ན། རང་བཞིན་གཅིག་ལ་ནི་ཞེས་བྱ་བའོ། །དེ་ལྟར་ཞེས་བྱ་བ་ནི་དུ་མ་ཉིད་དུའོ། །གལ་ཏེ་སྣང་བ་འདི་རང་བཞིན་དུ་མ་

ཉིད་ཡིན་པ་དེ་ལྟ་ན་ཡང་གཅིག་ཅེས་བྱ་བ་ཁྱེད་གཅིག་ཉིད་མངོན་པར་འདོད་པ་ནི་དུ་མ་ཉིད་དུ་སྣང་བ་ཡིན་ནོ་ཞེས་བྱ་བ་ནི་གཞན་གྱི་རྩོད་པའོ། །འགོག་པ་ནི་མ་ཡིན་ཏེ་ཞེས་བྱ་བའོ། །གལ་ཏེ་རིམ་མ་ཡིན་པ་མི་སྣང་ན་དེའི་ཚེ་རང་གི་ངོ་བོ་ཉིད་མ་ཡིན་ནོ་ཞེས་དགོངས་པའོ། །དེ་ལ་ཞེས་བྱ་བ་ནི་

བཅོས་མའི་ཕྱེ་མ་ལེབ་ཁྲ་བོ་ལ་སོགས་པས་སོ། །རིམ་པ་ཡང་སྣང་བའམ་མ་ཡིན། གལ་ཏེ་རེ་ཞིག་མི་སྣང་བ་འཁྲུལ་པ་ཡིན་ན། དེའི་ཚེ་དངོས་པོ་ཐམས་ཅད་ལ་གཉིད་ལོག་པའི་གནས་སྐབས་ན་འཁྲུལ་པར་འགྱུར་བ་བཟློག་པ་མེད་དོ། །ཕྱོགས་དང་པོ་ལ་བརྗོད་པ་ནི་དེ་ལྟར་དེ་ཉིད་ཅེས་བྱ་བ་སྟེ་རིམ་

པའི་རང་བཞིན་ཉིད་དུའོ། །རྣམ་པ་གཞན་དུ་ཡང་རྣམ་པར་བརྟག་པར་བྱས་ནས་སུན་འབྱིན་པ་ནི་གལ་ཏེ་གཞན་སྣང་ཞེས་བྱ་བའོ། །གལ་ཏེ་ཚུལ་གཞན་གང་ཡིན་མེད་སྣང་ཉིད་བརྗོད་པར་འདོད་པའི་ཚུལ་ལ་འཁྲུལ་པར་བརྗོད་ན། དེའི་ཚེ་བརྗོད་པར་འདོད་པ་དེའི་རང་གི་ངོ་བོར་སྣང་བར་ཇི་ལྟར་

Vol. 185 · folio 188b

འགྱུར། རང་གི་ངོ་བོ་མི་སྣང་ན་ཡང་སྣང་བ་དེ་མེད་པས་ཇི་ལྟར་འཁྲུལ། འཆད་པ་ནི་གལ་ཏེ་ཞེས་བྱ་བའོ། །དེའི་ནི་བརྗོད་པར་འདོད་པའིའོ། །འོན་ཏེ་བརྗོད་པར་འདོད་པའི་སྣང་བ་ཡོད་པ་ཉིད་དོ། །འོན་ཀྱང་མ་དམིགས་པ་ཡིན་ནོ་སྙམ་ན། གལ་ཏེ་མི་སྣང་ན་ཡང་ཞེས་བྱ་བའོ། །འཁྲུལ་པ་

ཡང་བརྗོད་པར་བྱ་བ་སྟེ་བློ་གཞན་སྣང་བ་ལ་ཡང་བློ་ཐམས་ཅད་ཡོད་པའི་ཕྱིར་རོ། །དེ་ཞེས་བྱ་བ་ནི་བརྗོད་པར་འདོད་པའི་ཚུལ་གྱི་ཡུལ་ཅན་ནོ། །དེ་ཞེས་བྱ་བ་ནི་རིམ་པ་ཡིན་པའོ། །གཞན་དུ་སྣང་བའི་ཕྱིར་ཞེས་བྱ་བ་ནི་རིམ་མ་ཡིན་པའི་ཡུལ་དག་ལ་རིམ་པའི་རང་བཞིན་དུ་སྣང་བའི་ཕྱིར་རོ། །

རིམ་པའི་བློ་ཉིད་འཁྲུལ་པར་འགྱུར་རོ་ཞེས་བྱ་བར་བསམས་པའོ། །འོན་ཏེ་ཏིལ་ལ་སོགས་པ་ཡང་རིམ་པ་ཡིན་པར་མི་འགྱུར་ན། འདི་ལ་བརྗོད་པ་ནི་འོ་ན་ནི་ཞེས་བྱ་བའོ། །གལ་ཏེ་རིམ་མ་ཡིན་པ་ཞེས་བྱ་བ་དངོས་པོ་ཉིད་ཡིན་ན། དེའི་ཚེ་བློའི་རང་བཞིན་ཡང་རིམ་ཡིན་པར་འགྱུར་བ་མ་ཡིན་གྱི།

འོན་ཀྱང་རིམ་པ་དང་ལྡན་པ་ཁོ་ནར་འགྱུར་ཏེ། རིམ་མ་ཡིན་པ་ནི་འགར་ཡང་མི་སྲིད་པའི་ཕྱིར་རོ། །དེ་ལྟ་ན་ཡུལ་ཡང་རིམ་པ་དང་བཅས་པ་ཡིན་ལ་བློ་ཡང་དེ་བཞིན་དུ་ཡིན་པས་ན་འཁྲུལ་པར་མི་འགྱུར་རོ། །གལ་ཏེ་དངོས་པོའི་རང་གི་ངོ་བོའི་བློ་གང་ཡིན་པ་དེ་ལ། བློ་གཞན་འཛིན་པར་བྱེད་པ་ཡིན་ན་སྟེ།

དངོས་པོ་འཛིན་པར་བྱེད་པའི་བློ་ནི་རིམ་ཅན་གྱི་རང་བཞིན་ལ་རིམ་མ་ཡིན་པར་འཛིན་པར་བྱེད་པའི་བློ་གཞན་འབྱུང་བ་ཡིན་ནོ་ཞེས་བྱ་བའི་དོན་ཏོ། །བློ་གཞན་དེ་ཡང་རིམ་ཅན་གྱི་དངོས་པོ་འཛིན་པར་བྱེད་པའི་བློ་འཛིན་པར་བྱེད་པ་ཡིན་ན་སྟེ། རིམ་པར་འཛིན་པར་བྱེད་པའི་ངོ་བོ་དེ་ཡང་ཇི་ལྟར་རིམ་པ་མ་ཡིན་པར་

སྣང་བར་འཐད་པར་འགྱུར། འདི་ནི་མ་འཁྲུལ་པའི་ཕྱོགས་ལ་བརྗོད་པ་ཡིན་ལ། འཁྲུལ་པའི་ཕྱོགས་ལ་ནི་གནོད་བྱེད་མདུན་དུ་འཆད་པར་འགྱུར་རོ། །ཡང་ན་གལ་ཏེ་དངོས་པོའི་ཡུལ་ཅན་གྱི་བློ་ལས་དེ་བཞིན་དུ་བློ་གཞན་སྐྱེ་བ་ཡིན་ན། དེའི་ཚེ་རིམ་འཛིན་པའི་རང་བཞིན་ནི་ཞེས་བྱ་བ་རིམ་པ་དང་ལྡན་

པའི་དངོས་པོ་འཛིན་པར་བྱེད་པའི་རང་བཞིན་ནི་རིམ་མ་ཡིན་པར་སྣང་བར་མི་འཐད་དེ། བློ་གཞན་ཉིད་རིམ་མ་ཡིན་པར་སྣང་མོད་དངོས་པོའི་ཡུལ་ཅན་རིམ་པ་དང་ལྡན་པའི་བློ་གོ་ཇི་ལྟར་རིམ་མ་ཡིན་པར་སྣང་བར་འགྱུར། དེས་ན་དངོས་པོ་རྣམས་ཀྱི་རིམ་པ་མེད་པར་འགྱུར་ཏེ། དེའི་བློའི་རིམ་པ་དང་བཅས་པ་ཁོ་

Vol. 185 · folio 189a

ནར་སྣང་བའི་ཕྱིར་ཏེ། བློའི་སྣང་བ་ཇི་ལྟ་བ་བཞིན་ཡུལ་རྣམ་པར་འཇོག་པའི་ཕྱིར་རོ། །འདི་ཉིད་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །དེ་འཛིན་པའི་ཞེས་བྱ་བ་ནི་ནོར་བུ་དང་མུ་ཏིག་ལ་སོགས་པར་འཛིན་པར་བྱེད་པའོ། །གལ་ཏེ་བློ་རིམ་མ་ཡིན་པར་སྣང་ན་དངོས་པོ་ཡང་དེ་བཞིན་དུ་

སྣང་བར་འགྱུར་རོ་ཞེ་ན། བློ་འཛིན་པར་བྱེད་པ་ཡང་ཞེས་བྱ་བའོ། །བློའི་བློ་གང་ཞིག་གཞལ་བྱ་ལ་རྣམ་པ་ཐམས་ཅད་དུ་མི་འཇུག་པ་དེའི་སྣང་བའི་དབང་གིས་ཇི་ལྟར་གཞལ་བྱ་དེའི་རང་བཞིན་དུ་ཐ་སྙད་བྱེད་ཅེས་བསམས་པའོ། །རིམ་མ་ཡིན་པར་ཞེས་བྱ་བ་ལ་སོགས་པ་ནི། བཤད་པ་དང་པོ་གནོད་བྱེད་གཞན་

བརྗོད་པའོ། །གལ་ཏེ་དངོས་པོའི་བློ་རིམ་ཅན་ཁོ་ན་ཡིན་ན། དེའི་ཚེ་དེའི་བློའི་བློ་ལ་ཡང་རིམ་མ་ཡིན་པར་སྣང་བའི་ཕྱིར་མི་འཐད་དོ་ཞེས་བྱ་བའི་དོན་ཏོ། །གལ་ཏེ་འཁྲུལ་པས་རིམ་མ་ཡིན་པ་དེ་བློའི་བློ་ལ་སྣང་བ་ཡིན་ནོ་ཞེ་ན། དེའི་ཚེ་སྔར་བཤད་པ་དེ་ཉིད་དེ། འཁྲུལ་མེད་ཡིན་པར་ཐལ་ཏེ་ང་རང་གི་ངོ་བོར་

འཛིན་པའི་ཕྱིར་རོ། །ཇི་ལྟར་བློའི་བློས་རིམ་མིན་པར་འཛིན་པ་དེ་བཞིན་དུ་དངོས་པོའི་བློ་དེའི་གཞལ་བྱ་འཛིན་པ་དེ་དེ་ལྟར་དེ་རིམ་མ་ཡིན་པའི་རང་བཞིན་དུ་ཡིན་པ་གང་གིས་བཟློག །གཞལ་བྱ་ཡང་རིམ་མ་ཡིན་པ་ཁོ་ནར་འཛིན་པར་འགྱུར་རོ་ཞེས་དགོངས་པའོ། །ཚིག་ལེའུར་བྱས་པ་བཤད་པའི་ཕྱིར། རེ་

ཞིག་སྔར་བཤད་ཟིན་པ་ཉིད་བརྗོད་པ་ནི། གལ་ཏེ་ཞེས་བྱ་བའོ། །དེ་ལྟར་ཞེས་བྱ་བ་ནི་རིམ་རང་བཞིན་དུའོ། །གཅིག་གིས་ནི་བློའི་བློས་སོ། །དངོས་པོའི་ཡུལ་ཅན་གྱི་བློའི་རང་བཞིན་དུ་མི་འཛིན་པར་ཐལ་ལོ། །འོན་ཏེ་དངོས་པོའི་ཡུལ་ཅན་གྱི་བློ་ནི་རང་བཞིན་དུ་མི་འཛིན་པར་ཐལ་ལོ། །འོན་ཏེ་དངོས་པོའི་

ཡུལ་ཅན་གྱི་བློ་ནི་རང་བཞིན་གཅིག་ཉིད་དུ་བློའི་བློས་རྟོགས་པ་དེས་ན། དུ་མ་འཛིན་པར་ཇི་ལྟར་ཐལ་སྙམ་ན། སྔ་མ་དང་ཞེས་གསུངས་སོ། །དངོས་པོའི་ཡུལ་ཅན་སྔ་མ་དང་ཕྱི་མའི་འཛིན་པ་དག་ལ་ནི། གཅིག་ཉིད་ཡོད་པ་མ་ཡིན་ནོ། །ཅིའི་ཕྱིར་ཞེ་ན། གཅིག་ཉིད་དུ་རྟོགས་པ་མེད་པའི་ཕྱིར་རོ། །རང་གི་

ངོ་བོས་གཅིག་ཉིད་མ་ཡིན་མོད། དེ་ལྟ་ན་ཡང་བློ་ཕྱི་མས་གཅིག་ཉིད་རྟོག་པ་ཡིན་ནོ་ཞེས་བྱ་བའི་རྩོད་པ་ལ་ལན་བརྗོད་པ་ནི། རིམ་པ་དང་ལྡན་པ་དེ་ཡང་ཞེས་བྱ་བ་སྟེ་བློ་ཕྱི་མའོ། །གཅིག་ཏུ་ཞེས་བྱ་བ་ནི་འཛིན་པ་སྔ་མ་དང་ཕྱི་མ་རྣམས་སོ། །གལ་ཏེ་རིམ་པ་དང་ལྡན་པ་ཡིན་ན་དེ་ལྟ་ན་ཡང་སྔ་མ་དང་ཕྱི་མའི་འཛིན་པ་

Vol. 185 · folio 189b

ཐམས་ཅད་དེ་ལྟར་སྣང་བ་དེས་ན། གཅིག་ཉིད་དུ་རྟོགས་པར་འགྱུར་བ་ཡིན་ནོ་ཞེ་ན། འཛིན་པར་བྱེད་པ་རིམ་པ་དང་ལྡན་པ་བློ་ཕྱི་མའི་མཚམས་ཉིད་གང་ཡིན་པ་དེའི་དུས་ལས་འདའ་བ་མ་ཡིན་ནོ། །འཛིན་པ་ཐམས་ཅད་ཀྱང་མཚན་ཉིད་ཐ་དད་པ་ཡིན་ཏེ། དེས་ན་གཅིག་ཉིད་གང་གིས་རྟོགས་

པ་ཞེས་དགོངས་པའོ། །འདི་ནི་ཞེས་དབྱེ་བ་ནི་བློ་ཕྱི་མའོ། །རིམ་མེད་པ་ཉིད་དོ་ཞེས་བྱ་བ་ནི། དེ་ནི་བློ་གཅིག་སྒྲིབ་པ་དེ་ལ་ཞེས་བྱ་བའོ། །དབང་པོས་སོང་ནས་དོན་གཟུང་བར་བྱ་བ་ནི་མ་ཡིན་ཏེ། འོན་ཀྱང་འདུག་བཞིན་དུའོ། །དེའི་ཚེ་བསྒྲིབས་པ་ལ་ཡང་འགྱུར་ཏེ། བསྒྲིབས་པ་དང་མི་བསྒྲིབས་

པ་དག་ལ་དབང་པོ་མི་འགྲོ་བར་ཁྱད་པར་མེད་པའི་ཕྱིར་རོ། །གཞན་རང་གི་ཕྱོགས་ལ་སྒྲིབ་པ་འཐད་པར་སྟོན་པ་ནི། ཕྲད་ནས་ཞེས་གསུངས་སོ། །དབང་པོ་ནི་སྒྲིབ་པ་ལ་ཐོགས་པའི་ཕྱིར་ན། སྒྲིབ་པ་ལས་བརྒལ་ནས་འགྲོ་བར་མི་ནུས་པའི་ཕྱིར་རོ། །གལ་ཏེ་དབང་པོ་མ་སོང་བ་བཞིན་དུ་འཛིན་

ན་ནི། དེའི་ཚེ་ཇི་ལྟར་ཉེ་བར་འཛིན་པ་བཞིན་དུ་ཆོད་པ་ཡང་འཛིན་པར་འགྱུར་ཏེ། ཁྱད་པར་མེད་པའི་ཕྱིར་རོ་ཞེས་བྱ་བའི་དོན་ཏོ། །རང་གི་ཕྱོགས་ལ་ཉེས་པ་མེད་པར་བརྗོད་པ་ནི། ཤིན་ཏུ་ཐག་རིང་པོར་ཡང་འགྲོ་བ་མེད་པའི་ཕྱིར། ཉམས་པ་འཐད་པ་ཡིན་ནོ་ཞེས་འབྲེལ་ཏོ། །འདི་ཐམས་ཅད་སུན་

འབྱིན་པ་ནི། དེ་ནི་མ་ཡིན་ཏེ་ཞེས་བྱ་བའོ། །རུང་བ་ལ་ལྟོས་པའི་ཕྱིར་སྒྲིབ་པ་ཡོད་ན་ཉམས་པར་འཐད་དོ་ཞེས་སྦྱར་རོ། །དཔེ་ཉིད་འཆད་པ་ནི་ཁབ་ལོང་ནི་ཞེས་བྱ་བའོ། །ཐམས་ཅད་ཅེས་བྱ་བ་ནི་དཔག་ཚད་དང་རྒྱང་གྲགས་ན་གནས་པ་རྣམས་ཀྱང་ངོ་། །འོན་ཏེ་དེ་ལ་ཡང་ཞེས་བྱ་བ་ནི་ཁབ་ལོང་ལ་

ཡང་ངོ་། །ལྕགས་དང་ཁབ་ལོང་རེག་པ་ཡོད་པའོ། །ཅི་སྟེ་མ་མཐོང་སྙམ་ན་ཕྲ་བའི་ཕྱིར་ཞེས་བྱ་བའོ། །གྲུབ་པའི་མཐའ་བརྗོད་པ་ནི་འདི་སྐད་ཅེས་བྱ་བའོ། །མིག་གི་འོད་ཟེར་མེད་པ་ཉིད་དོ། །གཞན་གྱིས་ཞེས་བྱ་བ་ནི་སངས་རྒྱས་པས་སོ། །དེ་ཉིད་ཅེས་བྱ་བ་ནི་མིག་གི་འོད་ཟེར་གྱིས་རེག་པ་ཉིད་དོ། །

འདི་ཞེས་བྱ་བ་ནི་མིག་ཕྲད་ནས་འཛིན་པའི་མཚན་ཉིད་དོ། །ཤིན་ཏུ་ཡང་ཞེས་བྱ་བ་ནི། ཤིན་ཏུ་ཡང་ཆད་པ་གཞན་དག་གིས་ཞེས་བྱ་བ་དང་། ཤིན་ཏུ་ཡང་ཚོགས་ཆེན་པོར་བརྟགས་པ་ཞེས་བྱ་བ་དང་། ཤིན་ཏུ་ཡང་བཞད་གད་ཉིད་དུ་འགྱུར་རོ་ཞེས་གསུམ་ཀ་ལ་འབྲེལ་ཏོ། །ཡང་དག་རིག་པ་ནི་དམ་

Vol. 185 · folio 190a

བཅས་པའི་དོན་བསྒྲུབ་པའི་ཆེད་དུ་འཇུག་པ་མ་ཡིན་ཏེ། དམ་བཅས་པའི་དོན་སྒྲུབ་པར་བྱེད་པ་མ་ཡིན་ནོ་ཞེས་བྱ་བའི་ཐ་ཚིག་གོ། །འདྲེན་པར་མཐོང་བ་ནི་སྐམ་པ་དང་ལྕགས་སྒོམ་ལ་སོགས་པ་ལའོ། །སྔགས་ཀྱི་བདེན་པ་ལ་འགྱུར་མོད་ཉེས་པ་ཅི་ཡོད་སྙམ་ན། དེས་འགུགས་པ་སྟེ་སྔགས་

ཀྱི་འབྲས་བུ་ལ་སོགས་པ་འགུགས་པ་ལ་ཡང་སྔགས་དང་རེག་པར་ཐལ་བས་ན་འདྲེན་པ་ལ་ཐལ་ཆེས་པར་འགྱུར་རོ། །དེར་ཡང་ཞེས་བྱ་བ་ནི་སྔགས་ཀྱིས་དྲངས་པ་ལ་ཡང་ངོ་། །སྔགས་དང་རེག་པར་གྱུར་པ་ཁོ་ནའོ་ཞེ་ན། འདི་ལ་ལན་བཏབ་པ་ནི་སྒྲ་ནི་ཞེས་བྱ་བའོ། །ཡོན་ཏན་ཡིན་པའི་ཕྱིར་རོ་ཞེས་

བྱ་བ་ནི། ནམ་མཁའི་ཡོན་ཏན་ཡིན་པའི་ཕྱིར་རོ། །རེག་པ་ནི་ཁྱེད་ཀྱི་ལྟར་ན་ལྡན་པའི་མཚན་ཉིད་ཀྱི་ཡོན་ཏན་གྱི་ངོ་བོ་ཡིན་ན། དེ་གོ་ཡོན་ཏན་སྒྲ་ལ་ཇི་ལྟར་འགྱུར་ཏེ། ཡོན་ཏན་ནི་ཡོན་ཏན་མེད་པ་ཡིན་པའི་ཕྱིར་རོ་ཞེས་དགོངས་པའོ། །འདི་ཉིད་ཅེས་བྱ་བ་ནི་བསྒྲུབ་པར་བྱ་བ་མཚན་ཉིད་ཀྱི་ཆོས་

སྦྱོར་ན་སྟེ། ཁས་ལེན་ན་དེའི་ཚེ་འགར་ཡང་མ་ངེས་པར་ཡོད་པར་མི་འགྱུར་རོ། །ཡིན་ན་དེའི་ཚེ་ཅིའི་ཕྱིར། དཔག་ཚད་ལ་སོགས་པར་ཤིན་ཏུ་ཐག་རིང་པོ་ན་གནས་པ་མི་མཐོང་ངོ་། །དེ་ལ་ནི་བར་ན་འགའ་ཡང་མེད་པའི་ཕྱིར་ན་ཐོགས་པར་བྱེད་པ་མེད་པ་ཁོ་ནའོ། །དེས་ན་མཐོང་ན་བཟློག་པར་དཀའོ་

ཞེས་དགོངས་པའོ། །འདིར་གཞན་གྱིས་སྨྲས་པ་ནི། མར་མེའི་འོད་བཞིན་དུ་ཞེས་བྱ་བ་སྟེ། མར་མེའི་འོད་མ་ཆོད་པ་རེག་པར་བྱེད་པ་བཞིན་དུ་མིག་གི་འོད་ཁོ་ན་དུས་སུ་མ་ཁྱབ་ན། རྣམ་པར་གནས་པ་མ་ཡིན་ནོ། །འོ་ན་སྔ་མ་དང་ཕྱི་མའི་རང་བཞིན་གྱི་བློ་ཐམས་ཅད་དེ་ལ་སྣང་བའི་ཕྱིར་ན། གཅིག་ཉིད་

དུ་རྟོགས་པ་འཐད་པ་ཡིན་ནོ་ཞེས་བྱ་བ་ནི་གཞན་གྱི་བསམས་པའོ། །ལན་ནི་དེ་ལྟ་ཡིན་ན་བློ་ཕྱི་མ་གཅིག་གིས་བློ་སྔ་མའི་རང་བཞིན་དུ་མ་འཛིན་པར་འགྱུར་རོ། །དེ་ལྟ་བུ་ཉིད་དུ་ཞེས་བྱ་བ་ནི། བློའི་རང་བཞིན་དུའོ། །རང་གི་གཞུང་ཉིད་སྟོན་པ་ནི་རིགས་མི་མཐུན་རྣམས་ཞེས་བྱ་བ་ལ་སོགས་པའོ། །རིགས་

མི་མཐུན་པའི་རྣལ་མ་རྣམས་ཀྱི་ལྡན་པ་གང་ཡིན་པ་དེས་བསྐྱེད་པའོ། །དེ་ནི་ཞེས་བྱ་བ་ནི་རིང་མོའི་ཡུལ་ཅན་ནོ། །ལན་ནི་དེ་ཚེ་ཡང་ཞེས་བྱ་བ་སྟེ། འཁྲུལ་པའི་ཚེ་ཡང་ངོ་། །འོན་ཏེ་བདེན་པ་མ་ཡིན་པ་འཁྲུལ་པའི་ཤེས་པ་ལ་སྣང་བ་ནི་དུ་མ་ཡང་འཛིན་པར་འགྱུར་བ་ཡིན་ནོ་ཞེ་ན། བདེན་མིན་ཞེས་

Vol. 185 · folio 190b

གསུངས་སོ། །རང་བཞིན་དེ་ནི་ཞེས་བྱ་བ་ན། རི་མོའི་ཡུལ་ཅན་གྱི་བློ་དེ་ལ་སྣང་བ་གང་ཡིན་པའི་རི་མོའོ། །དེ་ཇི་ལྟར་ཞེས་བྱ་བ་ནི་མ་ཡིན་པ་སྟེ། མི་བདེན་པའི་རང་བཞིན་ནི་བདེན་པའི་བདག་ཉིད་དུ་འགྱུར་བར་འཐད་པ་མ་ཡིན་ནོ། །མི་བདེན་པ་ཡང་ཕ་རོལ་པོ་རང་ཉིད་ཀྱིས་ཁས་བླངས་པ་ཡིན་ཏེ་

རྣམ་པ་དང་བཅས་པའི་ཤེས་པར་ཁས་མི་ལེན་པའི་ཕྱིར་རོ། །གལ་ཏེ་བློ་གཅིག་ཁོ་ན་ལ་རང་བཞིན་འགའ་ཞིག་ནི་བདེན་ལ། རང་བཞིན་འགའ་ཞིག་ནི་མི་བདེན་པ་ཡིན་ནོ་སྙམ་ན། གཅིག་ཉིད་ཡིན་ན་ཞེས་བྱ་བའོ། །བདེན་པ་དང་མི་བདེན་པའི་མཚན་ཉིད་ཀྱི་རྣམ་པར་དབྱེ་བ་འདི་ནི་བདེན་པ་མ་ཡིན་ཏེ་བློ་

གཅིག་ཉིད་ཡིན་པའི་ཕྱིར་རོ། །གཅིག་ལ་ནི་རང་བཞིན་འགའ་ཞིག་བདེན་པ་དང་མི་བདེན་པར་ཡང་མི་འཐད་དེ། ཕན་ཚུན་འགལ་བའི་ཆོས་གནས་པས་གཅིག་ཉིད་དུ་མི་འཐད་པའི་ཕྱིར་རོ། །དེ་ཉིད་ཀྱི་ཕྱིར་ཡང་ན་གཅིག་མ་ཡིན་ཏེ་བློ་དུ་མར་ཐལ་ལོ། །བརྒྱ་ལ་ཁྱེད་ཀྱི་ཐ་སྙད་འདི་མི་བདེན་པར་

འགྱུར་ཏེ་བློ་གཅིག་མིན་པའི་ཕྱིར་རོ། །འོན་ཏེ་བདེན་པ་དང་མི་བདེན་པའི་ཡུལ་ཅན་གྱི་ཐ་སྙད་ནི་བདེན་པ་ཡིན་ན། དེའི་ཚེ་དུ་མ་ཉིད་དུ་ཐལ་བར་འགྱུར་རོ་ཞེས་དགོངས་པའོ། །དེའི་ངོ་བོར་ཞེས་བྱ་བ་ནི་སེར་པོ་ལ་སོགས་པའི་ངོ་བོར་རོ། །གལ་ཏེ་སེར་པོ་ལ་སོགས་པའི་ཕྱི་རོལ་དེའི་རང་བཞིན་མ་ཡིན་ན་སྟེ།

གལ་ཏེ་བློའི་རང་བཞིན་ཁོ་ན་ཡིན་ན་ཞེས་བྱ་བའི་དོན་ཏོ། །དེའི་ཚེ་བློའི་རང་བཞིན་གྱི་སྔོན་པོ་དང་སེར་པོ་ལ་སོགས་པ་དེ་ལ། །ཅིག་ཅར་འཛིན་པའི་མཚན་ཉིད་དེ་ལྟར་རྟོགས་པ་འདི་རིགས་པ་མ་ཡིན་ནོ། །བློའི་རང་བཞིན་དེ་ཡང་དུ་མ་ཉིད་ཀྱིས་ན། ཅིག་ཅར་འཛིན་པ་མི་སྲིད་པའི་ཕྱིར་རོ། །འདི་ལ་

གཞན་གྱིས་བརྗོད་པ་ནི་ཅི་སྟེ་ཞེས་བྱ་བའོ། །ཡིད་འགྲོ་བ་ལ་སོགས་པའི་མཚན་ཉིད་ཅེས་བྱ་བ་ལ། ཡིད་ཀྱི་སྒྲས་ནི་རློམ་པར་བྱེད་ཤེས་པར་བྱེད་ཅེས་བྱ་བའི་བཤད་པས་མིག་ལ་སོགས་པ་ཉིད་ལ་བརྗོད་དོ། །ཡང་ན་མིག་ལ་སོགས་པ་མཐོང་བས་ན་ནང་གི་བྱེད་པ་ཡིན་གྱི་འཛིན་པ་ཡང་ཉེ་བར་མཚོན་

པ་ཡིན་ནོ། །དེས་ན་འབད་པ་ཆེན་པོ་ཡོད་དོ། །ཅིག་ཅར་འཛིན་པ་མི་སྲིད་དོ་ཞེས་བྱ་བའི་དོན་དུ་མའོ། །ལན་ནི་གལ་ཏེ་ཞེས་བྱ་བའོ། །ཚིག་དུམ་བུ་སྔ་མ་གཉིས་པོ་དེ་ཉིད་རིམ་པ་ཇི་ལྟ་བ་བཞིན་དུ་འཆད་པ་ནི་གལ་ཏེ་ཞེས་བྱ་བའོ། །སངས་རྒྱས་པས་མཛོད་ནས་མིག་དང་སྣང་བ་དང་ཡིད་དེ་ལུང་ལས་འབྱུང་

Vol. 185 · folio 191a

བའི་དབང་པོ་དག་ནི་མ་ཕྲད་པའི་ཡུལ་ཅན་མ་ཡིན་ནོ་ཞེས་ཇི་སྐད་བརྗོད་པ་བཞིན་ནོ། །དེའི་ཚེ་ཞེས་བྱ་བ་དེ་ལྟར་ཁས་ལེན་པ་ན་བསྒྲིབས་ཏེ། ཡོད་པ་ལས་དང་གཞན་དུ་ནི་ཞེས་བྱ་བ་ནི་སྒྲིབ་པ་མེད་པས་སོ། །འདི་ཉིད་བསྒྲུབས་པའི་དོན་དུ་ཟེར་བ་དག་ཀྱང་རེག་པར་བྱེད་པ་ཡིན་ནོ་ཞེ་ན།

ལན་ནི་དེ་ལྟ་ན་འོ་ན་ཞེས་བྱ་བའོ། །འོ་ན་ནི་མར་མེ་དང་ཆོས་མཐུན་པས་ཤིན་ཏུ་ཉེ་བར་འཛིན་པར་ཐལ་ལོ། །འདི་ཉིད་གཞུང་འཛུགས་པ་ནི་མར་མེའི་འོད་ནི་ཞེས་བྱ་བའོ། །དེ་ཉིད་ཅེས་བྱ་བ་ནི་ཆོས་གཞན་ནོ། །རེག་པ་ཉིད་དུ་འཛིན་པའི་རྒྱུའོ། །གལ་ཏེ་མིག་ལ་སོགས་པ་ལས་འོད་ཟེར་ཡོད་ལ། དེ་

དག་ཀྱང་ཕྱིས་འཕྲོས་ནས་ལྡན་པར་འགྱུར་བ་ཡིན་ན། དེའི་ཚེ་མུན་པ་ཡང་འཛིན་པར་ཐལ་ལོ། །ཤིན་ཏུ་ཐག་རིང་བ་ལ་མགྱོགས་པ་མི་སྲིད་པའི་ཕྱིར་རོ། །ཞེས་སུན་འབྱིན་པ་བརྗོད་པ་གང་ཡིན་པ་དེ་ལ་གཞན་དག་ལན་བརྗོད་པ་ནི་འོ་ན་ཞེས་བྱ་བའོ། །འབད་པས་བརྟག་པ་ཞེས་བྱ་བ་ནི་རེ་ཞིག་ནུས་པའི་

ཁྱད་པར་དང་ལྡན་པའི་ཡིད་ཁས་བླང་བར་བྱ་བ་ཡིན་ལ། དེ་ལས་ནི་མིག་ལ་སོགས་པ་རྣམས་ཀྱི་མྱུར་བ་དེ་ལས་ནི་ཅིག་ཅར་ཤེས་པ་མི་སྐྱེ་བ་ཡིན་ཞིང་། དེ་ལས་ནི་ཅིག་ཅར་སྣང་བ་འཁྲུལ་པ་ཡིན་ནོ་ཞེས་བྱ་བའོ། །དེ་ལྟར་ན་རེ་ཞིག་ཡིད་ཁས་བླངས་ནས་སུན་འབྱིན་པ་བརྗོད་པ་ཡིན་ནོ། །ད་ནི་ཡིད་

ཉིད་མེད་དོ་ཞེས་བརྗོད་པ་ནི། དེ་ལྟ་བུའི་ཞེས་བྱ་བ་སྟེ། རྟོགས་པ་དང་རྡུལ་ཕྲ་རབ་ཀྱི་ཚད་ཙམ་མོ་ཞེས་བྱ་བ་ལ་སོགས་པའི་རང་བཞིན་ནོ། །འོ་ན་ཡིད་ཇི་འདྲ་བ་ཞིག་སྙམ་ན། རྣམ་པར་ཤེས་པའི་ཞེས་བྱ་བའོ། །ཡིད་དེའི་དོན་བྱེད་པའོ། །གལ་ཏེ་རྣམ་པར་ཤེས་པ་ཅིག་ཅར་མི་སྐྱེད་པ་ལས་ཡིད་དཔག་

པ་མ་ཡིན་ནམ། དེས་ན་ཇི་ལྟར་སྤོང་ཞེ་ན། དེ་ཞེས་གསུངས་ཏེ་རྣམ་པར་ཤེས་པ་སྔ་མའི་མཚན་ཉིད་ཀྱི་ཡིད་དེའོ། །དེའི་ཕྱིར་ཞེས་བྱ་བ་ནི་རྣམ་པར་ཤེས་པ་ཅིག་ཅར་མི་སྐྱེ་བའི་མཚན་ཉིད་ཀྱི་ཕྱིར་རོ། །རྣམ་པ་གཞན་དུ་ཡང་ཞེས་བྱ་བ་ནི། ཡིད་བྱེད་གཉིས་ལས་རྣམ་པར་ཤེས་པ་ཅིག་ཅར་མི་སྐྱེ་བ་གྲུབ་

པའི་ཕྱིར་རོ། །ཇི་ལྟར་སྐམ་པས་དོན་དེ་འཛིན་པར་མཐོང་བ་དེ་ལྟར་རྣམ་པར་ཤེས་པས་མ་ཡིན་ནོ། །རིམ་ལ་ཡོད་པའི་རྣམ་པ་དུ་མ་གང་ཡིན་པ་དེ་དག་འཛིན་པ་ཅིག་ཅར་སྐྱེས་པས་ནི། མ་འཁྲུལ་པ་ཉིད་དོ་ཞེས་གནས་སོ། །དེ་ལ་ཞེས་བྱ་བ་ནི་རིམ་པའི་རྣམ་པ་དུ་མ་དག་ལའོ། །དེ་ལ་གཟུགས་ཀྱི་ཡོན་

Vol. 185 · folio 191b

ཏན་ཞེས་བྱ་བ་ནི་ལྡན་པ་ལའོ། །གཟུགས་ཀྱི་མཚན་ཉིད་ཀྱི་ཡོན་ཏན་ནི་འདུ་བ་མ་ཡིན་ཏེ། ཡོན་ཏན་ནི་ཡོན་ཏན་མེད་པའི་ཕྱིར་རོ། །གལ་ཏེ་འགྱུར་ན་ཉེས་པ་ཅིར་འགྱུར་ཞེ་ན། དེ་ལྟར་འགྱུར་ན་ཞེས་གསུངས་ཏེ་ཡོན་ཏན་དུ་ནའོ། །ཡོན་ཏན་དང་ལྡན་པ་འདུ་བ་ཅན་གྱི་རྒྱུ་ནི་རྫས་ཡིན་ནོ་ཞེས་བྱ་བའི་

རྫས་ཀྱི་ཡོན་ཏན་ནི་ཡིན་པའི་ཕྱིར་ན། ནམ་མཁའ་བཞིན་དུ་རྫས་ཉིད་དུ་ཐལ་བར་འགྱུར་རོ། །ལྡན་པ་ཡོན་ཏན་དང་ལྡན་པ་ཡིན་ན་ཉེས་པ་གཞན་ཡང་བརྗོད་པ་ནི། དེ་ལྟ་ན་ཡང་ཞེས་པ་སྟེ། ལྡན་པ་རྫས་ཡིན་ནའོ། །འདི་གཉིས་ནི་ཞེས་བྱ་བ་ནི་མེ་ཏོག་རྒྱས་པའི་ནགས་ཞེས་བྱ་བའི་བློ་དང་། རི་མོ་

དང་ལྡན་པ་ཡིན་ནོ་ཞེས་བྱ་བའི་བློ་གཉིས་སོ། །མི་མཚུངས་པ་ཉིད་གཞུང་འཛུགས་པ་ནི་མང་པོའི་གྲངས་ཉིད་ཀྱིས་བྱ་བའོ། །གྲངས་ལས་ཐ་དད་པའི་ནགས་ནི་ཁས་མི་ལེན་པའི་ཕྱིར་ན། ནགས་ཀྱི་བརྗོད་པར་བྱ་བ་ནི་གྲངས་མང་པོ་ཉིད་ཡིན་ནོ། །གང་ལ་ཞེས་བྱ་བ་ནི་ཤིང་རྣམས་ལའོ། །དེས་

ན་ཞེས་བྱ་བ་ནི་མང་པོའི་གྲངས་ཀྱི་མཚན་ཉིད་དང་། མེ་ཏོག་རྒྱས་པ་དག་ཤིང་རྣམས་ལ་འདུ་བའི་ཕྱིར་རོ། །འདིར་ཡང་རང་བཞིན་དུ་འགྱུར་རོ་སྙམ་ན་སྣ་ཚོགས་པ་ནི་འདིར་ཞེས་བྱ་བའོ། །དེ་ལྟར་འགྱུར་ཞེས་བྱ་བ་ནི། དོན་གཅིག་ལ་འདུ་བའི་སྟོབས་ཀྱིས་ཉེ་བར་བཏགས་པར་འགྱུར་བའོ། །རེ་ཞིག་

མེ་ལ་མེ་ཉིད་དུ་གཟུང་བ་ནི། ཕྱིས་བྲམ་ཟེའི་ཁྱེའུ་ལ་ཡོད་པའི་ཆོས་མཐུན་པར་རྣོ་བ་གཉི་ག་ཡིན་པ་གཟུང་བ་དེས། མེའི་བག་ཆགས་མེར་རྟོག་པ་བསྐྱེད་པའི་ནུས་པ་སད་པར་འགྱུར་བའི་སྐྱེས་བུ་གང་ཡིན་པ་དེ་ནི་དེའི་དྲན་པས་བྲམ་ཟེའི་ཁྱེའུ་ལ་ཡང་མེར་སྒྲོ་འདོགས་པར་བྱེད་དོ། །གཅིག་གཟུང་བའི་དུས་

སུ་ཞེས་བྱ་བ་ནི། སྔོན་པོ་ལ་སོགས་པ་དག་ལས་གང་ཡང་རུང་བ་ཞིག་གཟུང་བ་གང་ཡིན་པ་དེའི་དུས་སུའོ། །བཟུང་བཞིན་པ་ལ་ཞེས་བྱ་བ་ནི་གང་ཡང་རུང་བ་མདུན་ན་གནས་པ་ལའོ། །རྣམ་འགྲེལ་ཕྱིས་འཆད་པར་འགྱུར་བས་རེ་ཞིག་རང་ཉིད་ཀྱིས་བརྗོད་པ་ནི། དེ་ལ་ནི་ཞེས་བྲམ་ཟེའི་ཁྱེའུ་དག་ལའོ། །

འོན་ཏེ་ཉེ་བས་སོ་ཞེས་བྱ་བ་ལ། ཉེ་བར་ནི་ལྷག་པར་ཉེ་བ་སྟེ། གང་ལ་སྔོན་པོ་ཡོད་པ་དེ་ཉིད་ལས་སེར་པོ་ཉེ་བར་གནས་པ་སྟེ། དེ་ལྟར་ཉེ་བར་སྒྲོ་འདོགས་པར་འགྱུར་བ་ཡིན་ན་ལན་ནི་ཉེ་བར་གནས་པའི་འཛིན་པ་དེ་ནི་ཞེས་བྱ་བ་སྟེ། དང་པོ་གཅིག་ལ་མཐོང་བ་ཕྱིས་གཞན་ལ་མཐོང་བ་ན་གཟུང་བ་མ་ཡིན་ནོ། །ཡུལ་

Vol. 185 · folio 192a

དེར་ཞེས་བྱ་བ་ནི་སྔོན་པོའི་ཡུལ་དུ་སེར་པོ་གཟུང་བའི་ཕྱིར་སྒྲོ་འདོགས་པ་ཡིན་ནོ་ཞེས་འབྲེལ་ཏེ་ལན་ནི་ཡུལ་དེར་ཞེས་བྱ་བའོ། །དེ་ཉིད་ཅེས་བྱ་བ་ནི་སྒྲོ་བཏགས་པའོ། །འོན་ཏེ་ཞེས་བྱ་བ་ལ་སྔར་མཐོང་བའི་སྔོན་པོ་ལ་སོགས་པ་དྲན་པར་བྱ་བ་ནི། སེར་པོ་འཛིན་པའི་དུས་ན་གཟུང་བར་

བྱ་བ་ཉིད་དུ་སྣང་བ་ཡིན་ནོ། །ཅིའི་ཕྱིར་ཞེ་ན་སྔ་མ་དང་ཕྱི་མ་ཐ་དད་པར་མ་བཟུང་བའི་ཕྱིར་རོ་ཞེ་ན། འདི་ལ་བརྗོད་པ་ནི་ཇི་ལྟར་ཞེས་བྱ་བའོ། །གཞན་ལ་ཞེས་བྱ་བ་ནི་དྲན་པར་བྱ་བ་ལའོ། །གཞན་དུ་ཞེས་བྱ་བ་ནི་བཟུང་བཞིན་པ་ཉིད་དུའོ། །འོན་ཏེ་དྲན་པར་བྱ་བ་ནི་རང་བཞིན་དུ་མི་སྣང་བ་ཁོ་ནའོ་ཞེ་ན། དེ་ནི་

ཞེས་བྱ་བའོ། །འཛིན་པ་ཡིན་མོད་དེ་ལས་ཅིར་འགྱུར་སྙམ་ན་དེས་ན་ཞེས་བྱ་བའོ། །གཟུང་བར་བྱ་བ་ཉིད་དུ་སྣང་ན་རྣམ་པར་རྟོག་པའི་རང་བཞིན་ཉིད་ཀྱི་བསྲེ་བ་མ་ཡིན་མོད། དུ་མ་འཛིན་པའི་རང་བཞིན་ཉིད་ནི་བསྲེ་བ་ཡིན་པར་འགྱུར་རོ་ཞེས་བརྗོད་པ་ནི། འོན་ཏེ་ཞེས་བྱ་བའོ། །ལན་ནི་དེ་ལྟ་ཡིན་ན་ཞེས་བྱ་བ་

ལ་སོགས་པའོ། །འོན་ཏེ་དུ་མ་གཅིག་གིས་འཛིན་པར་ཇི་ལྟར་འགྱུར་སྙམ་ན། མིག་གི་ཞེས་བྱ་བ་སྟེ་སྔོན་པོ་དང་སེར་པོ་ཐམས་ཅད་ཀྱི་རྟོགས་པ་གང་ཡིན་པ་དེའི་རྟོགས་པའི་ཕྱིར་ཏེ་མཐོང་བའི་ཕྱིར་རོ། །དེ་ལྟར་འགྱུར་མོད་སྙམ་དུ་དོགས་ན་འདོད་པ་ནི་མ་ཡིན་ནོ་ཞེས་གོང་འོག་བསྣོལ་ཏེ་བལྟ་བར་བྱའོ། །མ་འབྲེལ་བ་

ནི་འབྲེལ་པ་མེད་པ་སྟེ། དེའི་རྟོགས་པ་གང་ཡིན་པ་ཉིད་དྲི་མ་ཡིན་ནོ། །དེས་ཉེ་བར་མཚོན་པའི་སྐྱེས་བུ་བླུན་པོ་གང་ཡིན་པ་དེ་དག་གིས་བརྟགས་པས་ནི་ཆོག་གོ་ཞེས་བྱ་བ་ཡིན་ནོ། །སྔོན་པོར་རྣམ་པར་རྟོག་པའི་དུས་ན། སེར་པོའི་རྣམ་པར་རྟོག་པ་ཡང་ཡོད་པ་ཡིན་ནོ་ཞེ་ན། རྣམ་པར་རྟོག་པ་དུ་མ་ནི་ཞེས་

གསུངས་སོ། །གཞན་དག་ཚོགས་པའི་རྣམ་པར་རྟོག་པ་བསམས་ནས་སྨྲ་བ་ནི་སྣ་ཚོགས་པ་ཞེས་བྱ་བའོ། །གཅིག་ལ་ཡང་ཞེས་བྱ་བ་ནི་སྔོན་པོ་ལ་ཡང་ངོ་། །དེས་ན་གང་གི་ཚེ་རེ་ཞིག་གཅིག་ཉིད་རྣམ་པར་རྟོག་པ་དེའི་ཚེ་གཞན་མཐོང་བ་ནི་རྣམ་པར་རྟོག་པ་མེད་པ་ཁོ་ནའོ་ཞེས་དགོངས་པའོ། །དེ་ལྟ་ན་ཡང་

ཞེས་བྱ་བ་ནི་ཅིག་ཅར་ཤེས་པ་མི་སྐྱེ་བ་བཟློག་པ་ནའོ། །འདི་སྐད་ཅེས་བྱ་བ་ནི་འཆད་བཞིན་པའོ། །སྟོན་པ་ཡང་སྟེ་ཞེས་བྱ་བ་ནི་གཞན་ནོ། །ཁྱེད་ཀྱིས་ཞེས་བྱ་བ་ནི་སངས་རྒྱས་པས་སོ། །རྣམ་དབྱེ་ཞེས་བྱ་བ་ནི་བློ་ནི་སྣ་ཚོགས་པའི་རྣམ་པ་ཅན་ཡིན་ཡང་གཅིག་ཁོ་ན་ཡིན་ལ་ཕྱི་རོལ་ནི་དུ་མར་འགྱུར་རོ་ཞེས་བྱ་

Vol. 185 · folio 192b

བ་དེ་ལྟ་བུ་ལ་སོགས་པའི་རང་བཞིན་ནོ། །སླར་ལ་བློ་ཉིད་ལ་ལྷག་པར་ཐ་དད་པར་འགྱུར་རོ་ཞེས་སྟོན་པ་ནི་གང་ལ་ཞེས་བྱ་བའོ། །དེའི་ཚེ་བློ་གནས་པའི་ངོ་བོ་ལ་སྣ་ཚོགས་པ་ཉིད་དུ་ཅི་སྟེ་འགྱུར་བ་འགྱུར་བ་ཁོ་ནའོ་ཞེས་བྱ་བའི་དོན་ཏོ། །འདི་སྐད་ཅེས་བྱ་བ་ནི་འཆད་བཞིན་པའོ། །ཇི་ལྟ་ཇི་ལྟ་ཞེས་བྱ་བ་ནི་

གཅིག་ཉིད་དམ་དུ་མ་ཉིད་དུའོ། །རྣམ་པར་འབྲེལ་ཞེས་བྱ་བ་ནི་སྟོང་པར་འགྱུར་བའོ། །དངོས་སྟོབས་ནི་ཚད་མའི་སྟོབས་ཀྱིས་སོ། །ཇི་ལྟར་ན་གཅིག་གམ་དུ་མ་ཉིད་དུ་མི་འཐད་སྙམ་ན། འདི་ལྟར་ཞེས་གསུངས་སོ། །བློ་གཅིག་ལ་སྣ་ཚོགས་ཏེ་དུ་མ་རེ་ཞིག་ཇི་ལྟར་འགྱུར། གཅིག་ལ་དུ་མ་ཉིད་མི་

འགྱུར་བ་ཁོ་ནའོ་ཞེས་བྱ་བའི་དོན་ཏོ། །འོ་ན་དུ་མ་ལ་འགྱུར་རོ་སྙམ་ན་བློ་དེ་ལ་ཡང་ཞེས་སྨོས་ཏེ། བློ་དུ་མ་ལ་ཡང་སྣ་ཚོགས་པ་ཉིད་མི་འགྱུར་རོ། །བློའི་རྡུལ་ཕྲ་རབ་རྣམས་ཕན་ཚུན་ཚུལ་ལུགས་མི་ཤེས་པའི་ཕྱིར་ན། སྣ་ཚོགས་སུ་སྣང་བ་མེད་པར་ཐལ་ལོ། །འོ་ན་སྣ་ཚོགས་སུ་སྣང་བ་འདི་ཇི་ལྟར་

ཡིན་ཞེ་ན། གལ་ཏེ་དོན་རྣམས་ཞེས་གསུངས་སོ། །འདིར་ཞེས་བྱ་བ་ནི་གཅིག་དང་དུ་མ་དང་བྲལ་ཡང་སྣང་བ་ཞེས་པ་ལྟར་རོ། །རེ་ཞིག་སྣ་ཚོགས་སུ་སྣང་བ་ནི་ཉམས་སུ་མྱོང་བ་ཁོ་ནའོ། །འདི་ནི་སྣ་ཚོགས་པར་སྣང་བ་མ་ཡིན་ནོ་ཞེས་ནི་བརྗོད་པར་ནུས་པ་མ་ཡིན་ཏེ། གལ་ཏེ་འདི་གཅིག་དང་དུ་མ་

ཉིད་དུ་མི་འཐད་པ་དེའི་ཚེ། གཅིག་དང་དུ་མ་ཉིད་དེ་མེད་མོད། ཁོ་བོ་ཅག་ལ་ནི་ཆད་པ་ཅི་ཡང་མེད་དོ། །སྣ་ཚོགས་སུ་སྣང་བ་ནི་གཅིག་དང་དུ་མ་དང་བྲལ་བ་ཡང་མེད་དོ་ཞེས་བརྗོད་པར་བྱ་བ་མ་ཡིན་ཏེ། དེ་ལྟ་མ་ཡིན་པ་གཞན་གྱིས་གཅིག་དང་དུ་མ་མེད་པ་ཉིད་དུ་འགྲུབ། དེའི་ཡན་ལག་ཅན་གྱི་སུན་

འབྱིན་པ་འཇུག་པ་ནི་བློ་སྣ་ཚོགས་སུ་སྣང་བའི་བདག་ཉིད་གཅིག་དང་དུ་མ་དང་བྲལ་བར་ཁས་བླངས་ཀྱང་ཉེས་པ་ཡང་མེད་དོ་ཞེས་བྱ་བ་ནི་གཞུང་གི་ཚོགས་ཀྱི་དོན་ཏོ། །དེ་ལ་ཡང་ཞེས་བྱ་བ་ནི་བློ་ལ་ཡང་ངོ་། །གལ་ཏེ་རྣམ་པ་སྣ་ཚོགས་པ་ལ་སྟོན་པ་ཡིན་པ་དེ་ལྟ་ན་ཡང་དེ་ལས་ཐ་དད་པའི་བློ་ནི་གཅིག་ཏུ་

འགྱུར་རོ་ཞེས་དོགས་ན་དངོས་པོའི་མཚན་ཉིད་ནི་ཞེས་བྱ་བའི་རྣམ་པ་ལས་ཐ་དད་པའི་བློ་ནི་མི་དམིགས་པས་གནོད་པའི་ཕྱིར་རོ་ཞེས་བྱ་བའོ། །དངོས་ཡང་ཞེས་བྱ་བ་ནི་བློའི་མཚན་ཉིད་ཅན་ན་ཆད་པ་ཅི་ཡོད་ཅེས་བྱ་བ་ནི་ཆད་པ་འགའ་ཡང་མེད་པའོ། །འདིར་ནི་འདིས་ནི་ཡན་ལག་ཅན་འགོག་པའི་སྐབས་

Vol. 185 · folio 193a

ཡིན་ལ་ཡན་ལག་ཅན་དེ་སེལ་བ་ན་ཡང་གལ་ཏེ་བློ་ཡང་དུ་མ་ཉིད་དུ་ཁས་ལེན་ན། དེའི་ཚེ་དེ་ལ་ཆད་པ་ཅི་ཞིག་ཡོད། གདོན་མི་ཟ་བར་བློ་གཅིག་གི་ཕྱོགས་ཁས་བླངས་ནས་ཡན་ལག་ཅན་བསླང་བར་བྱ་བ་ནི་མ་ཡིན་ཏེ། བསྟན་བཅོས་གནས་ནས་རྩོད་པ་མ་ཡིན་པའི་ཕྱིར་རོ་ཞེས་བྱ་

བའི་དོན་ཏོ། །སུན་འབྱིན་པ་གཞན་ཡང་བརྗོད་པ་ནི་རྡུལ་ཕྲ་རབ་དུ་མའི་རྟོགས་པ་གང་ཡིན་པ་དེ་མེད་པར་ཐལ་བར་འགྱུར་རོ། །བློའི་རྡུལ་ཕྲ་རབ་དེ་དག་ནི་དུ་མར་རྟོགས་པར་བཟོད་པ་མ་ཡིན་ཏེ། ཕན་ཚུན་ཚུལ་ལུགས་མི་ཤེས་པའི་ཕྱིར་རོ། །འོ་ན་གཞན་འགའ་ཞིག་གིས་དུ་མ་ཉིད་རྟོགས་པ་ཡིན་ནོ་

ཞེ་ན། རྟོག་པ་པོ་གཞན་ཡང་ཞེས་བྱ་བའོ། །འདི་ཉིད་གཞུང་འཛུགས་པ་ནི་རང་རིག་པ་ཞེས་བྱ་བའོ། །མཐོང་བ་ཉིད་ཀྱི་ཕྱིར་རོ་ཞེས་བྱ་བ་ནི་སྣ་ཚོགས་སུ་སྣང་བའོ། །འདི་ལ་གཞན་བརྗོད་པ་ནི་འོ་ན་ནི་ཞེས་བྱ་བའོ། །འདི་ཡང་ཞེས་བྱ་བ་ནི་རང་རིག་པ་མེད་པ་རིག་པ་མི་སྲིད་དོ་ཞེས་བྱ་བ་ཡང་ངོ་། །

གཞན་ཡང་རང་རིག་པ་ཡིན་ན་ནི་ཤེས་པ་གཞན་རིག་པ་ལ་དགོས་པ་ཉིད་ཡོད་པ་མ་ཡིན་ནོ། །དེས་ན་གཞན་རིག་པས་རིག་བྱ་གལ་ཏེ་རྡུལ་ཕྲ་རབ་རྣམས་རང་རིག་པ་ཉིད་ཀྱིས་ཕན་ཚུན་ཚུལ་ལུགས་མི་ཤེས་པ་ཡིན། རྟོག་པ་པོ་གཞན་ཡང་མེད་པ་ཡིན་པ་དེས་ན། གང་གིས་མང་པོ་ཉིད་རྟོགས་པ་ཡིན་ཞེས་

གཞན་དག་སྨྲ་བ་ནི་འོ་ན་ཞེས་བྱ་བའོ། །འགའ་ཡང་མ་ཡིན་ནོ་ཞེས་བྱ་བ་ནི་གྲུབ་པའི་མཐའོ། །དེ་ལ་ཐ་དད་པ་ནི་རྡུལ་ཕྲ་རབ་ལས་ཐ་དད་པའོ། །འདིས་ནི་དུ་མའི་ཕྱོགས་ལ་ཡང་དུ་མ་ཉིད་དུ་སྣང་བ་མི་འཐད་དོ་ཞེས་བསྒྲུབས་པ་ཡིན་ནོ། །གཉི་གའི་ཡང་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །

དུ་མ་ཉིད་ལ་སྣ་ཚོགས་པ་མེད་པ་འདི་ཤིན་ཏུ་གསལ་ཏེ་ཤིན་ཏུ་ཡང་གསལ་ལོ། །གང་གི་ཕྱིར་དེ་ལྟར་གཅིག་ཉིད་དམ། དུ་མ་ཉིད་དུ་དངོས་པོ་འཐད་པ་མ་ཡིན་པའི་གཏན་ཚིགས་དེའི་ཕྱིར་ན། བཅོམ་ལྡན་འདས་ཀྱིས་རྣམ་པར་ཤེས་པ་ནི་ཞེས་བྱ་བ་ལ་སོགས་པ་གསུངས་སོ། །ཅི་སྟེ་ཞེས་བྱ་བ་ནི་

དོགས་པ་བསུ་བའོ། །སྒྱུ་མ་དང་ཞེས་བྱ་བ་ནི་གྲུབ་པའི་མཐའོ། །དཔེར་ན་སྒྱུ་མ་ལ་སོགས་པ་རྣམས་མེད་ཀྱང་སྣང་བ་དེ་བཞིན་དུ། བུམ་པའམ་སྣམ་བུ་ལ་སོགས་པ་ཡང་ཡིན་ནོ་ཞེས་དགོངས་པའོ། །གཞན་གྱིས་དེ་དག་ཀྱང་ཞེས་སྨྲས་ཏེ། སྒྱུ་མ་ལ་སོགས་པ་དག་ཀྱང་ངོ་། །ལན་ནི་དོན་བྱ་བ་

Vol. 185 · folio 193b

ཞེས་བྱ་བའོ། །གལ་ཏེ་སྣང་བ་ཉིད་ལ་ཡོད་པར་བརྗོད་པ་མ་ཡིན་ནམ་དེས་ན་དོན་བྱེད་པས་ཅི་ཞིག་བྱ་ཞེ་ན། སྣང་བ་བསམ་གྱིས་ཞེས་བྱ་བའོ། །དེ་ལ་ཡང་ཞེས་བྱ་བ་ནི། དོན་བྱེད་པ་གཞན་ལ་ཡང་ངོ་། །དེ་ཉིད་ཅེས་བྱ་བ་ནི་སྣང་བའི་རང་བཞིན་ཉིད་དེ་དོན་བྱེད་པ་ཡིན་ནའོ། །འདི་ལ་ལན་

སྣང་བ་ཐམས་ཅད་ཅེས་བྱ་བའོ། །འགའ་ཞིག་ནི་བཟློག་པས་ཡིན་ཞེས་བྱ་བ་ནི། ཐ་དད་པ་ལས་བཟློག་པ་སྟེ། ཐ་མི་དད་པ་ཉིད་དོན་བྱ་བ་ཡིན་ནོ་ཞེས་བྱ་བའི་དོན་ཏོ། །དེ་ལ་བུམ་པ་དང་སྣམ་བུ་ལ་སོགས་པའི་དོན་བྱ་བ་ཆུ་འཛིན་པ་ལ་སོགས་པས་ནི་ཐ་དད་པ་ཁོ་ན་ཡིན་ལ། བདེ་བ་ལ་སོགས་

པའི་དོན་བྱེད་པ་ནི་ཐ་དད་པ་མེད་པ་ཁོ་ན་ཡིན་ཏེ། དེ་དག་གི་ཡོད་པ་ནི་ཉམས་སུ་མྱོང་བ་ཙམ་གྱིས་རྣམ་པར་འཇོག་པའི་ཕྱིར་རོ། །འདི་ཉིད་འཆད་པ་ནི་སྣང་བ་ཙམ་ཉིད་ཀྱིས་ནི་ཞེས་བྱ་བའོ། །གང་ཞིག་དོན་བྱེད་པ་ཉིད་དུ་ཞེས་བྱ་བ་ནི། ཐ་མི་དད་པའི་ཕྱོགས་ལའོ། །ཐ་དད་པའི་ཕྱོགས་ལ་ནི་

དོན་བྱེད་པ་སྒྲུབ་པ་ཉིད་དུའོ། །དོན་བྱེད་པའི་རང་བཞིན་ཡིན་ནོ་ཞེས་བྱ་བ་ནི། ཐ་མི་དད་པའི་ཕྱོགས་ལ་དོན་བྱེད་པ་ཉིད་རང་གི་ངོ་བོ་ཡིན་ལ། ཐ་དད་པའི་ཕྱོགས་ལ་ནི་དོན་བྱེད་པའི་རང་གི་ངོ་བོས་སོ། །གལ་ཏེ་འདི་དོན་བྱེད་པའི་རང་བཞིན་ཡིན་མོད། དེ་ལྟ་བུ་མེད་པ་ཉིད་དོ་ཞེ་ན། དོན་བྱེད་པའི་

རང་བཞིན་ནི་ཞེས་བྱ་བའོ། །འགའ་ཞིག་ཅེས་བྱ་བ་ནི་བུམ་པ་ལ་སོགས་པའམ་བདེ་བ་ལ་སོགས་པའོ། །གང་གི་ཕྱིར་དེ་ལྟ་ཡིན་པའི་རྒྱུ་དེས་ན། དོན་བྱེད་པ་ནི་སྣང་བ་ལས་ཐ་དད་པ་ཡོད་པར་སྨྲ་བའི་སྡེ་པ་རྣམས་ཀྱིས་ཁས་བླངས་པ་ཡིན་ནོ། །གལ་ཏེ་འགའ་ཞིག་གི་དོན་བྱེད་པ་ནི།

སྣང་བ་ལས་ཐ་དད་པ་ཁོ་ནར་ཡོད་པ་མ་ཡིན་ནམ་དེས་ཐམས་ཅད་མེད་པར་ཇི་ལྟར་འགྱུར་སྙམ་ན། སྔོན་པོ་ལ་སོགས་པའི་རང་བཞིན་ལས་ཞེས་བྱ་བ་སྟེ། སྔོན་པོ་ལ་སོགས་པས་སྣང་བའི་རང་བཞིན་ལས་སོ། །གཞན་ཡོད་པར་སྒྲུབ་པའི་དོན་དུ་དོན་བྱེད་པ་སྟོན་པ་ནི་གང་ཞིག་ཅེས་བྱ་བའོ། །

འདི་ནི་འདི་ནི་ཞེས་བྱ་བའི། །དོན་རྣམས་སྐྱེས་བུ་ལ་སོགས་པ་ལས་ཐ་དད་པ་ནི་མ་ཡིན་ཏེ། བདག་མེད་པར་ཐལ་བའི་ཕྱིར་རོ། །གཞན་གྱིས་གདུང་བ་ཞེས་སྨྲས་སོ། །ལན་ནི་མ་ཡིན་ཏེ་ཞེས་བྱ་བའོ། །དེ་ཉིད་བརྗོད་པ་ནི་གོམས་པའི་ཞེས་བྱ་བའོ། །ཐམས་ཅད་ཅེས་བྱ་བ་ནི་གདུང་བ་

Vol. 185 · folio 194a

བཟློག་པ་དང་ཚིམ་པའོ། །ལྡོག་པ་བརྗོད་པ་ནི་གོམས་པ་མེད་ན་ནི་ཞེས་བྱ་བའོ། །གལ་ཏེ་དེ་ལྟ་ན་ཞེས་བྱ་བ་ནི་གོམས་པའི་སྟོབས་ཀྱིས་ཐམས་ཅད་སྐྱེ་བ་ནའོ། །ཡང་ཇི་ལྟར་ན་མ་རིག་པའི་སྟོབས་ཀྱིས་སྐྱེས་པ་ཉིད་མེད་པ་ཉིད་ཡིན་པར་འགྱུར་རོ་ཞེ་ན། དེ་ལྟ་བུ་ཞེས་བྱ་བ་སྟེ་གོམས་

པའི་སྟོབས་ཀྱིས་སྐྱེས་པའོ། །གལ་ཏེ་དེ་ལྟར་རྣམ་པར་བརྟག་པར་བྱ་བ་དེ་ལྟར་ན་ཡང་སྣང་བ་ཡོད་པ་མ་ཡིན་ནམ། དེས་ན་མེད་པར་ཇི་ལྟར་འགྱུར་ཞེ་ན། སྣང་བ་ཙམ་ཞེས་བྱ་བའོ། །དོན་ལ་ནི་ཞེས་བྱ་བ་ནི་ཤེས་པ་ལ་ཡང་ཞེས་བྱ་བར་བལྟའོ། །དེ་བདག་ཉིད་གཅིག་ལ་བཀག་པ་ཉིད་ཀྱི་ཕྱིར་དང་ཞེས་བྱ་བ་ལ་

སོགས་པ་འཆད་པ་ནི་ཅི་སྟེ་རགས་པར་སྣང་བ་ནི་ཞེས་བྱ་བའོ། །དེ་དག་ནི་མང་པོ་ཁོ་ན་ཡིན་གྱི་རགས་པ་ནི་མ་ཡིན་ནོ། །ཅིའི་ཕྱིར་ཞེ་ན། རགས་པ་ཉིད་ཅེས་བྱ་བའོ། །དེ་དག་ལས་ཞེས་བྱ་བ་ནི་རྡུལ་ཕྲ་རབ་མང་པོ་རྣམས་ལས་སོ། །རྣམ་པ་གཞན་གྱིས་ཀྱང་རགས་པ་ཉིད་སུན་འབྱིན་པའི་དོན་དུ་བརྗོད་པ་

ནི། རགས་པའི་ཐ་སྙད་ནི་ཞེས་བྱ་བའོ། །ལིང་ལིང་པོ་གཅིག་ཅེས་བྱ་བ་ནི། བར་ཆད་དང་བྲལ་བའི་སེམས་གཅིག་གི་ཕན་ཚུན་ཐ་དད་པར་སྣང་བ་གང་ཡིན་པ་དེ་ལ་ནིའོ། །འོན་ཏེ་བར་མི་སྣང་བ་དེས་ན་རགས་པ་ཉིད་སྣང་བ་ཡིན་ནོ་ཞེ་ན། འོ་ན་ནི་ཞེས་བྱ་བའོ། །ཕན་ཚུན་རང་བཞིན་གྱིས་སྤངས་ནས་གནས་

པ་དེ་དག་ནི་གདོན་མི་ཟ་བར་བར་སྣང་བ་དང་བཅས་པར་ཁས་བླངས་དགོས་སོ། །དེ་ལྟ་ན་མ་ཡིན་ན་ཕན་ཚུན་དབེན་པ་ཉིད་དུ་མི་འཐད་པའི་ཕྱིར་རོ། །དེའི་ཕྱིར་གལ་ཏེ་བར་ཆད་དང་བཅས་པའི་རང་བཞིན་ཉིད་ཀྱིས་སྣང་བ་མིན་ན་ནི་དེ་ལྟ་ན་རང་གི་ངོ་བོས་སྣང་བར་འགྱུར་གྱི་གཞན་དུ་ནི་མ་ཡིན་ནོ། །བརྒྱ་ལ་ཕྱིའི་དོན་

དུ་སྨྲ་བ་དག་ཡན་ལག་དང་ཡན་ལག་ཅན་ཡང་སུན་ཕྱུང་བ་ན་འདི་སྐད་བརྗོད་པར་འགྱུར་ཞེས་ཡོངས་སུ་བརྟག་པའི་མཐའ་བཟུང་ནས་ཉེ་བར་འགོད་པ་ནི་ཅི་སྟེ་ཞེས་བྱ་བ་སྟེ། རྡུལ་ཕྲ་རབ་རྣམས་ངེས་ཏེ་ཞིག་པ་ན་རྡུལ་ཕྲ་རབ་དེ་དག་ལྡན་པ་ལས་སོ། །དེ་ཞེས་བྱ་བ་ནི་དེའི་ཚེ། ཡན་ལག་ཅན་གྱི་དུས་

ནའོ། །རྡུལ་ཕྲ་རབ་བམ་ཡན་ལག་ནི་ཞེས་འདིའི་སྒྲས་བརྗོད་པའམ། འདིའི་སྒྲས་ཀྱང་རུང་སྟེ། འདི་དག་ལ་དོན་ནི་ཐ་དད་པ་མ་ཡིན་ནོ་ཞེས་བྱ་བའོ། །འདི་ལྟར་འགྱུར་མོད་ཅི་སྐྱོན་ཞེ་ན། དེས་ན་ཞེས་གསུངས་སོ། །ལྡན་པ་དང་ཞེས་བྱ་བ་ནི། རང་གི་ལྡན་པ་དང་ངོ་ཞེས་བྱ་བའི་ཚུལ་འདིས་སྣལ་

Vol. 185 · folio 194b

མ་ལ་སོགས་པའི་འདུ་བ་ཅན་གྱི་རྒྱུ་ཉིད་དུ་ཁས་བླངས་པ་གང་ཡིན་པ་དེ་མི་འགྱུར་རོ། །གལ་ཏེ་དེའི་ཚེ་རྡུལ་ཕྲ་རབ་རྣམས་མེད་མོད། དེ་ལྟ་ཡང་འདུ་བ་ཅན་གྱི་རྒྱུར་འགྱུར་རོ་ཞེ་ན། འབྲེལ་བ་ནི་ཞེས་གསུངས་སོ། །ཡན་ལག་ཅན་གྱི་འདུ་བ་ནི་འབྲེལ་པ་དང་བཅས་པའི་རྒྱུ་རྣམས་ལ་འདུ་བ་ཅན་གྱི་རྒྱུ་

ཞེས་བརྗོད་པ་ཡིན་ལ་འདུ་བ་འབྲེལ་པ་ཡང་གཉིས་ལ་གནས་པར་འགྱུར་བ་ཡིན་ནོ། །ཡན་ལག་ཅན་གྱི་དུས་ན་ནི་རྡུལ་ཕྲ་རབ་སྲིད་པ་མ་ཡིན་ལ། རྡུལ་ཕྲ་རབ་ཀྱི་དུས་ན་ཡང་ཡན་ལག་ཅན་སྲིད་པ་མ་ཡིན་ནོ། །དེས་ན་གང་གིས་འདུ་བ་ཅན་གྱི་རྒྱུ་ཉིད་དུ་འགྱུར་བ་རྒྱུ་དང་འབྲས་བུ་དག་འདུ་བར་ཇི་ལྟར་འགྱུར་

ཞེས་བྱ་བའི་དོན་ཏོ། །སུན་འབྱིན་པ་གཞན་ཡང་བརྗོད་པ་ནི་འདི་ལའོ། །བདུན་པའི་དོན་ནི་རྡུལ་ཕྲ་རབ་ཀྱི་མཚན་ཉིད་དོ། །དེ་ཞེས་བྱ་བ་ནི་ཡན་ལག་ཅན་ནོ། །སོགས་པའི་སྒྲས་ནི་ལོགས་ལ་སོགས་པ་ཡང་གཟུང་བར་ཐལ་ལོ། །ཕ་རོལ་གྱི་ཆ་ཡང་མཐོང་མོད་ཅི་སྐྱོན་སྙམ་ན། ཕ་རོལ་གྱི་ཆ་གཟུང་

ན་ཞེས་བྱ་བའོ། །ཕ་རོལ་ཡང་ཞེས་བྱ་བ་ནི་གཟུང་བའི་ཕ་རོལ་གྱི་སྒྲའི་ཆས་བར་དུ་ཆོད་པའི་བུམ་པ་ཡང་མཐོང་བར་འགྱུར་རོ། །དེ་ལྟ་ཡིན་དང་ཆོད་པའི་དེ་ཡང་ཡན་ལག་ཅན་ཡིན་པའི་གཏན་ཚིགས་ཀྱི་ཕྱིར། ཕ་རོལ་གྱི་ཆ་མཐོང་བར་འགྱུར་རོ། །དེས་ན་སྐྱེས་བུ་ཐབས་དོན་ཐམས་ཅད་མཐོང་བར་

འགྱུར་རོ། །མེད་པའི་ཕྱིར་རོ་ཞེས་བྱ་བ་ནི་ཆ་མེད་པ་ཉིད་ཀྱིས་ཕ་རོལ་གྱི་ཆ་མི་སྲིད་པའི་ཕྱིར་རོ། །ལན་ནི་གཞན་གྱིས་ཞེས་བྱ་བའོ། །དེ་སྐད་དྲིས་པ་ལ་གཞན་གྱི་ལན་བརྗོད་པ་ནི་དེ་ཞེས་བྱ་བ་སྟེ་གཞན་གྱི་མཐོང་བ་ནི་ཕ་རོལ་གྱི་ཆ་ནི་གཞན་ཉིད་དོ་ཞེ་ན། འདི་ལ་བརྗོད་པ་ནི་འོ་ན་ནི་ཞེས་བྱ་བའོ། །འདི་ཞེས་

བྱ་བ་ནི་སྔ་མ་དང་ཕྱི་མའི་ཆ་དང་ལྡན་པའོ། །དེ་ལྟར་གལ་ཏེ་ཐ་དད་པར་ཁས་ལེན་ན། དེའི་ཚེ་སྐབས་ཀྱིས་སྨྲ་བ་ཉམས་སོ་ཞེས་བརྗོད་པ་ལ། གཞན་དག་ཐ་མི་དད་པར་ཁས་བླངས་ནས་བརྗོད་པ་ནི་དེ་ནི་ཞེས་བྱ་བའོ། །གལ་ཏེ་ཕ་རོལ་གྱི་ཆ་དང་ཚུ་རོལ་གྱི་ཆ་དང་གཞན་མ་ཡིན་པ་དེ་ལྟ་ན་ཚུ་

རོལ་གྱི་འཛིན་པའི་དུས་ན། ཕ་རོལ་གྱི་ཆ་ནི་མི་འཛིན་པ་ཉིད་དེ་འོན་ཀྱང་རྣམ་གྲངས་ཀྱིས་འཛིན་པ་ཡིན་ནོ་ཞེས་བྱ་བའི་དོན་ཏོ། །ལན་ནི་མ་ཡིན་ཏེ་ཞེས་བྱ་བའོ། །གཞན་འདི་ཉིད་ཡིན་ནོ་ཞེས་འདིའི་མཐོང་བ་འདི་ཉིད་ཀྱིས་ཕྱིས་མཐོང་བ་ཉིད་ཡིན་ནོ་ཞེས་རྟོགས་པར་ཡང་མི་ནུས་སོ། །གཞན་དུ་མཐོང་བ་

Vol. 185 · folio 195a

ཉིད་སྟོན་པ་ནི་མཐོང་བ་དང་ཞེས་བྱ་བའོ། །གང་བདག་གིས་མཐོང་བ་དེ་ཉིད་ལ་རེག་གོ་ཞེས་རྟོགས་པའི་ཕྱིར་རོ་ཞེས་བྱ་བའི་དོན་ཏོ། །མ་ཡིན་ཏེ་ཞེས་བྱ་བ་ནི་འགོག་པའོ། །སྔ་མ་དང་ཕྱི་མ་བལྟས་པ་དང་རེག་པ་དག་གཅིག་པ་ལ་ཚད་མ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །ཅི་སྟེ་

ཡང་བཤད་ཟིན་པའི་ཚུལ་གྱིས་གཅིག་ཉིད་དུ་རྟོགས་པ་ཡོད་དོ་ཞེ་ན། ཕན་ཚུན་ཞེས་གསུངས་སོ། །མཐོང་བ་ནི་རེག་པའི་རང་བཞིན་ཡོངས་སུ་སྤངས་པ་དང་རེག་པ་ནི་མཐོང་བའི་རང་བཞིན་སྤངས་ནས་རྟོགས་པ་ཡིན་ཏེ། དེས་ན་འདི་གཉིས་གཅིག་ཏུ་ཇི་ལྟར་འགྱུར་ཞེས་བྱ་བའོ། །དོགས་པ་བསུ་བ་ནི་

མཐོང་བ་དང་རེག་པ་དག་གི་ཕན་ཚུན་གྱི་རྣམ་པར་དབྱེ་བ་ནི་འཛིན་པ་སྟེ། ཤེས་པས་བྱས་པ་ཡིན་ནོ་ཞེ་ན། ལན་ནི་འོ་ན་ནི་ཞེས་པའོ། །ཐམས་ཅད་རྣམ་པར་དབྱེ་བ་ནི་འཛིན་པས་བྱས་པ་ཡིན་གྱི། གཟུང་བར་བྱ་བ་ནི་གཅིག་ཁོ་ནའོ་ཞེས་བརྗོད་པར་བྱ་བར་འགྱུར་རོ་ཞེས་བྱ་བའི་དོན་ཏོ། །སུན་འབྱིན་

པ་གཞན་བརྗོད་པ་ནི་དེ་ཡང་ཞེས་བྱ་བ་སྟེ་ཡན་ལག་ཅན་ཡང་ངོ་། །དེ་ལས་ཐ་དད་པའི་སྣང་བ་ལས་ཐ་དད་པར་རོ། །འོ་ན་ཅི་ཞིག་ལུས་ཤེ་ན་སྣང་བ་ཙམ་ཞེས་བྱ་བའོ། །འདིར་རྩོད་པ་ནི་གལ་ཏེ་ཞེས་བྱ་བའོ། །ཅི་གལ་ཏེ་ཤེས་པའི་རིག་པ་ཡིན་པ་དེ་ལྟ་ན་ཡང་གཞན་ཡང་རིག་པར་འགྱུར་ཏེ་དེས་

ཐ་དད་པར་སྣང་བ་ཅི་ལྟར་མི་འཐད་སྙམ་ན་རང་རིག་པ་ཡིན་ན་ནི་ཞེས་བྱ་བ་སྟེ་རང་རིག་པ་ཡིན་པར་འགྱུར་ན་ནི་གཞན་རིག་པ་མ་ཡིན་ཏེ། རང་དང་གཞན་རིག་པ་དག་ནི་ཕན་ཚུན་སྤངས་པས་འགལ་བའི་ཕྱིར་རོ། །དེས་ཞེས་བྱ་བ་ནི་ཕན་ཚུན་རིག་པས་ནའོ། །རྩོད་པ་དེ་ལ་ཡང་རྩོད་པ་ཞེས་པ་ནི་ལྷག་

མའོ། །སོ་སོར་ཞེས་བྱ་བ་ནི་སྔོན་པོས་སེར་པོ་སེར་པོས་ཀྱང་སྔོན་པོ་ཞེས་རྟོགས་པར་ཁས་བླངས་པ་ནའོ། །ཇི་ལྟར་རྒྱུད་གཞན་གྱིས་རིག་པ་ན་འདི་གཉིས་ཡིན་ནོ་ཞེས་མི་རྟོགས་པ་སྟེ་དེ་ཁོ་ན་བཞིན་ཚད་མ་ཞེས་བྱ་བ་རྟོགས་པར་ཡང་འགྱུར་རོ། །འདི་ལྟར་སྔོན་པོས་ནི་སེར་པོ་ཉིད་རིག་

གི་རང་གི་བདག་ཉིད་མ་ཡིན་ལ། སེར་པོས་ཀྱང་སྔོན་པོ་འབའ་ཞིག་རིག་གི་རང་གི་རང་བཞིན་ནི་མ་ཡིན་ནོ། །དེ་ལྟ་ན་ཡང་འདི་ནི་གཉིས་ཡིན་ནོ་ཞེས་ཇི་ལྟར་རྟོགས། རྒྱུད་གཅིག་ལ་གནས་པའི་ཤེས་པས་སྔོན་པོ་ཉམས་སུ་མྱོང་ལ་གཞན་གྱིས་ནི་སེར་པོ་རྟོགས་པ་ནི་འདི་གཉིས་

Vol. 185 · folio 195b

ཡིན་ནོ་ཞེས་བྱ་བ་ནི། རྟོགས་པར་སྲིད་པ་མ་ཡིན་ནོ། །དེ་བཞིན་དུ་བྱེད་པ་པོས་རང་རིག་པ་མ་ཡིན་པར་འགྱུར་ན། བདག་གིས་སྔོན་པོ་འདི་ཡོངས་སུ་བཅད་དེ་རིག་གོ་ཞེས་རྟོགས་པར་མི་འགྱུར་རོ། །གང་གི་ཚེ་སྔོན་པོས་སེར་པོ་རིག་པ་དེའི་ཚེའམ། སེར་པོས་སྔོན་པོ་

རིག་པ་དེའི་ཚེ་ནི་བདག་ཉིད་རྟོགས་པ་མ་ཡིན་ཏེ། དེས་ན་ཅི་ལྟར་གཞན་གྱི་རྒྱུད་ལ་ཡོད་པའི་ཤེས་པས་སྔོན་པོ་རྟོགས་པས་ན། འདི་བདག་གིས་རིག་པ་ཡིན་ནོ་ཞེས་མི་འགྱུར་བ་དེ་བཞིན་དུ། རང་ཉིད་རྟོགས་པ་ལ་ཡང་མི་འགྱུར་ཏེ་བདག་ཉིད་རྟོགས་པ་མེད་པའི་ཕྱིར་རོ། །ཚིག་

ལེའུར་བྱས་པ་རྣམ་པར་དགྲོལ་བའི་དོན་དུ་རེ་ཞིག་ཕྱོགས་གཞན་བཤད་པ་ནི་གལ་ཏེ་དེ་དག་ཅེས་བྱ་བའོ། །འོན་ཏེ་གང་གིས་རང་གི་རང་བཞིན་རིག་པ་དེ་ཉིད་ཀྱིས་གཞན་ཡང་ཡིན་ནོ། །དེས་ན་གཉིས་སུ་ཇི་ལྟར་ཐལ་ཞེ་ན་རང་གི་ངོ་བོ་རིག་ནི་ཞེས་བྱ་བའོ། །འཇུག་པ་མ་ཡིན་པ་ནི་

བདག་གིར་མི་བྱེད་པ་སྟེ། འདི་བདག་ཉིད་ལ་སྟོན་པ་ནི་མ་ཡིན་ནོ་ཞེས་བྱ་བའི་དོན་ཏོ། །རང་དང་གཞན་རིག་པ་དག་ནི་ཕན་ཚུན་སྤངས་ཏེ་གནས་པའི་མཚན་ཉིད་ཀྱིས་འགལ་བའི་ཕྱིར་རོ། །ད་ནི་ཚིག་ལེའུར་བྱས་པའི་དོན་བརྗོད་པ་ནི་འོན་ཏེ་ཞེས་བྱ་བའོ། །རང་རིག་པ་མ་ཡིན་

ན་ནི་བྱེད་པ་པོ་མི་སྣང་བའི་ཕྱོགས་གང་གི་ཕྱིར་རང་རིག་པ་དང་གཞན་རིག་པ་ཙམ་ཡང་མི་འཐད་པ་དེའི་ཕྱིར་ནའོ། །དེ་ལྟ་ཡིན་དང་ཞེས་བྱ་བ་ནི། རང་རིག་པ་ཁས་ལེན་པ་ནའོ། །ཕན་ཚུན་ཐ་དད་པའི་ཕྱིར་རྒྱུད་གཞན་རྟོགས་པ་བཞིན་དུ་གཉི་ག་ཡང་རྟོགས་པར་མི་འགྱུར་རོ། །འདིར་

ཞེས་བྱ་བ་ནི་སྣ་ཚོགས་སུ་སྣང་བ་མེད་པ་ཉིད་དུ་ཐལ་བའོ། །རང་རིག་པ་དང་གཞན་རིག་པ་ཁས་བླངས་པ་ལ་བདག་ཀྱང་སྔ་མའི་ཚུལ་ལས་མ་འདས་ཏེ། དེས་ན་བདག་དེ་ཡང་རང་རིག་པའམ་གཞན་རིག་པར་འགྱུར་ཞེས་པའི་བརྒལ་ཞིང་བརྟག་པ་འདི་ཉིད་ལས་འཕར་བ་མ་

ཡིན་ནོ། །གཞན་ཡང་ཞེས་བྱ་བ་ནི། རང་གི་རང་བཞིན་དུ་མ་ཟད་པའོ། །འདི་ལ་ལན་ནི་རང་བཞིན་དེ་ཉིད་དམ་ཞེས་བྱ་བ་སྟེ། བརྗོད་པར་འདོད་པ་འགའ་ཞིག་དངོས་པོ་དེའི་རང་བཞིན་གྱིས་སོ། །གཞན་གྱིས་ཞེས་བྱ་བ་ནི་སྐབས་སུ་བབ་པ་དེ་ལས་ཐ་དད་པའི་རང་བཞིན་གྱིས་

Vol. 185 · folio 196a

སོ། །དང་པོ་སེལ་བ་ནི་རང་ཞེས་བྱ་བའོ། །དེ་ཉིད་གསལ་བར་བྱེད་པ་ནི་རང་གི་རང་བཞིན་ཞེས་བྱ་བའོ། །རྣམ་པར་རྟོག་པ་གཉིས་པ་ལ་ཡང་བརྗོད་པ་གཞན་གྱི་སྒོ་ནས་ཞེས་བྱ་བའོ། །རང་ལ་མངོན་དུ་ཕྱོགས་པའི་རང་བཞིན་གང་ཡིན་པ་དེ་ལས་གཞན་པ་ཁོ་ནར་

འགྱུར་བ་གཞན་ལ་མངོན་དུ་ཕྱོགས་པའི་རང་བཞིན་གྱིས་གཞན་རིག་ན་ཞེས་བྱ་བའི་དོན་ཏོ། །དེས་ཞེས་བྱ་བ་ནི་གཞན་ལ་མངོན་དུ་ཕྱོགས་པའི་རང་བཞིན་གྱིས་སོ། །གང་གི་ཕྱིར་རང་ལ་ཕྱོགས་པའི་རང་བཞིན་གྱིས་ནི་རང་གི་རང་བཞིན་ཁོ་ན་རིག་ཅིང་། གཞན་ལ་ཕྱོགས་པས་ཀྱང་རང་བཞིན་

གཞན་ཁོ་ན་རིག་པ་དེས་ནའོ། །གང་ལ་ཡོད་པ་ཞེས་བྱ་བའི་བདག་གོ། །ལན་ནི་འདི་ནི་ཞེས་བྱ་བ་སྟེ་མངོན་དུ་ཕྱོགས་པའོ། །དེ་ཉིད་དོ་ཞེས་བྱ་བ་ནི་དགོས་པ་སྟེ་བདག་ཉིད་དོ། །རང་ལ་མངོན་དུ་ཕྱོགས་པ་དང་། གཞན་ལ་མངོན་དུ་ཕྱོགས་པའི་རང་བཞིན་དག་ལ་འདི་ནི་གཉིས་ཡིན་

ནོ་ཞེས་རྟོགས་པ་དང་ལྡན་པ་ནི་ཞེས་འབྲེལ་ཏོ། །རང་དང་གཞན་ལ་མངོན་དུ་ཕྱོགས་པའི་རང་བཞིན་ཕན་ཚུན་འགལ་བ་དེ་དག་ནི་རང་ལ་མངོན་པར་ཕྱོགས་པའམ། གཞན་ལ་མངོན་དུ་ཕྱོགས་པ་གཅིག་གིས་རིག་པར་མི་འཐད་དེ། དེས་ན་མངོན་དུ་ཕྱོགས་པ་གཞན་གཉིས་ཁས་

བླང་བར་བྱ་དགོས་པར་འགྱུར་རོ། །དེ་བཞིན་དུ་དེ་རིག་པའི་དོན་དུ་གཞན་ཡིན་པས་ན་ཐུག་པ་མེད་དོ། །གང་གི་ཕྱིར་དེ་ལྟར་གཞན་རིག་པ་ལ་ཉེས་པ་ཡོད་པ་དེས་ན། རང་རིག་པའི་རང་བཞིན་གསུམ་ཞེས་བྱ་བ་ནི། རང་དང་གཞན་ལ་མངོན་དུ་མ་ཕྱོགས་པ་གཉིས་བདག་དང་

གསུམ་མོ། །དེའི་ཕྱིར་གསུམ་པོ་དེ་རྣམས་ཕན་ཚུན་ལ་ལུགས་མ་ཤེས་པའི་ཕྱིར་ན། དེ་གསུམ་རིག་པར་བྱ་བའི་དོན་དུའོ། །གལ་ཏེ་རྣམ་པ་རྣམས་མི་བདེན་པ་དེ་ལྟ་ན་ཡང་ཤེས་པ་ནི་ཡོད་པ་ཁོ་ན་མ་ཡིན་ནམ་དེས་ན་སྟོང་པར་ཇི་ལྟར་འགྱུར་སྙམ་ན། འདི་ལྟར་གསུངས་སོ། །དེའི་

ཡང་ཞེས་བྱ་བ་ནི་ཤེས་པའི་ཡང་ངོ་། །གཉི་ག་ཡང་ཞེས་བྱ་བ་ནི་རྣམ་པ་དང་ཤེས་པའོ། །དེ་ལྟར་ནི་སྤང་བར་བྱ་བའོ། །གཉིས་ཀ་ཡང་ཞེས་བྱ་བ་ནི་དོགས་པ་བསུ་བ་སྟེ། རྣམ་པ་དང་ཤེས་པའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ཉིད་དྲན་པར་བྱེད་པ་ནི་རང་

Vol. 185 · folio 196b

རིག་པ་ཞེས་བྱ་བའོ། །རང་རིག་པ་ནི་མེད་དེ་སྣ་ཚོགས་པ་མ་ཡིན་པར་ཐལ་བའི་ཕྱིར་རོ། །གཞན་རིག་པ་ཡང་མ་ཡིན་ཏེ། རང་ཉིད་རིག་པ་ནི་གཞན་རིག་པར་འཇུག་པ་མ་ཡིན་ནོ་ཞེས་བརྗོད་ཟིན་པའི་ཕྱིར་རོ། །རེ་ཞིག་དབུ་མ་པའི་ཕྱོགས་ལ་བརྗོད་པ་ནི། གཟུགས་དང་ཞེས་བྱ་

བའོ། །དངོས་པོ་རྣམས་ཀྱི་རྣམ་པར་གཞག་པ་གང་ཡིན་པའི་དངོས་པོ་རྣམས་ཐ་དད་གནས་པ་འདིར་ཞེས་འབྲེལ་ཏོ། །རྣམ་པར་ཤེས་པར་བྱེད་པས་ན། རྣམ་པར་ཤེས་པ་ཞེས་བྱ་བ་སྟེ། གཟུང་བ་དང་འཛིན་པའི་རྣམ་པ་གང་དག་ཡིན་པ་དེ་དག་ལས་ཕྱི་རོལ་དུ་གྱུར་པའི་རྣམ་པར་ཤེས་པར་

བྱེད་པའི་མཚན་ཉིད་ཀྱི་རྣམ་པར་ཤེས་པ་ནི་ཡོད་པ་མ་ཡིན་ནོ། །དེ་ལྟར་རྣལ་འབྱོར་སྤྱོད་པ་མངོན་པར་འདོད་པའི་སྟོང་པ་ཉིད་བརྗོད་ནས་ཕྱིའི་དོན་དུ་སྨྲ་བས་འདོད་པའི་སྟོང་པ་ཉིད་བརྗོད་པ་ནི། ཕུང་པོ་ལ་སོགས་པ་ཞེས་བྱ་བའོ། །དེ་ལས་གཞན་དག་ཀྱང་ཞེས་བྱ་བ་རྣམ་པར་ཤེས་པར་སྨྲ་བའི་

བསྟན་པའོ། །ཆོས་ཐམས་ཅད་སྟོང་པ་ཉིད་དོན་དམ་པ་ཁོ་ན་བཅོམ་ལྡན་འདས་ཀྱིས་བསྟན་པར་རིགས་སོ་ཞེས་བྱ་བར་བསམས་སོ། །ཇི་ལྟ་བའི་རྐྱེན་ཞེས་བྱ་བ་ནི་བདག་ཉིད་ཇི་ལྟ་བའི་རྐྱེན་གྱི་ལྟོས་པ་སྟེ་ལྟོས་པར་བྱེད་པ་གང་ཡིན་པ་དེས་ན། དེ་ཉིད་དེ་ནི་རིག་མ་ཡིན། །ཞེས་བྱ་བ་ནི་རང་

བཞིན་དེ་ཉིད་མ་རིག་པ་སྟེ། དེ་ཁོ་ན་མ་ཡིན་པའི་རྣམ་པ་ཉིད་ཀྱིས་མ་ཤེས་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ནི་ཞེས་བྱ་བ་ནི་ཚུ་རོལ་མཐོང་བ་རྣམས་ཀྱི་དེའོ། །ཁོ་ན་ཉིད་ཀྱི་དོན་གང་དག་གིས་བཏང་སྙོམས་ཉིད་དུ་མཛད་པའི་བཅོམ་ལྡན་འདས་དེས་སོ། །འཇིག་རྟེན་ཐུགས་ཞེས་བྱ་བ་ནི་

འཇིག་རྟེན་གྱི་ངོར་རོ། །འདི་ཉིད་བཤད་པའི་དོན་དུ་སྔར་བཤད་པའི་རྩོད་པ་ཉིད་དྲན་པར་བྱེད་པ་ནི་གལ་ཏེ་ཞེས་བྱ་བའོ། །ཕྱི་རོལ་གྱི་ཞེས་བྱ་བ་ནི་ཆོས་ཐམས་ཅད་སྟོང་པ་ཉིད་ལས་ཕྱི་རོལ་དུ་གྱུར་པའི་དོན་རྣམ་པར་ཤེས་པ་ལ་སོགས་པ་གང་ཡིན་པ་དེས་སྟོན་པ་མཛད་པའོ། །དོན་རྗེས་སུ་

བརྗོད་པས་ཞེས་བྱ་བའི་ཕྱི་རོལ་གྱི་དོན་རྗེས་སུ་བརྗོད་པས་རྟོག་པ་ལ་སོགས་པའི་རང་བཞིན་ཅན་གྱི་བདག་འགག་པ་གང་ཡིན་པ་དེ་བརྗོད་པར་འདོད་པའི་ཕྱིར་ཏེ། འཇིག་རྟེན་ན་གྲུབ་པའི་ཕྱི་རོལ་གྱི་དོན་གང་ཡིན་པ་དེ་ལ་ནི་བདག་མེད་དོ་ཞེས་བྱ་བའོ། །རྗེས་སུ་བརྗོད་པ་ཡང་མི་འཐད་དེ་ཕྱིའི་དོན་དེ་

Vol. 185 · folio 197a

སྣང་བ་མེད་པའི་ཕྱིར་རོ་ཞེས་བརྩད་པ་ལ་མ་ཡིན་ནོ་ཞེས་གསུངས་སོ། །གང་གིས་འཇིག་རྟེན་གྱི་བསམ་པས་ཀྱང་བཅོམ་ལྡན་འདས་རྗེས་སུ་བརྗོད་པར་མཛད་པར་འཇིག་རྟེན་ཉིད་ལ་ཕྱིའི་དོན་བྱེད་བཞིན་དུ་དེར་མངོན་པར་ཞེན་པའི་བློ་ཇི་ལྟར་སྐྱེ་བར་འགྱུར་ཞེ་ན། འཇིག་རྟེན་གྱི་

ཞེས་བྱ་བའོ། །འདིར་ཡང་གཞན་གྱི་བློས་གཞན་སྟོན་པར་མཛད་པ་ཉིད་དུ་མི་རིགས་པའི་ཕྱིར། བཅོམ་ལྡན་འདས་ལ་ཡང་འཇིག་རྟེན་གྱི་བློ་མངའ་བ་ཡིན་ནོ་ཞེས་གཞན་གྱིས་རྟོགས་པ་ཡིན་ནོ། །དེ་ཉིད་བརྗོད་པ་ནི་གལ་ཏེ་ཞེས་བྱ་བའོ། །འཇིག་རྟེན་གྱི་བློ་ནི་བཅོམ་ལྡན་འདས་ལ་མི་མངའ་ལ།

གཞན་གྱི་བློས་སྟོན་པར་མཛད་པ་ཡང་མི་སྲིད་དོ་ཞེས་དགོངས་ནས་གསུངས་པ་ནི་མ་ཡིན་ཏེ་ཞེས་བྱ་བའོ། །སྔོན་གྱི་ཤུགས་ནི་སྔོན་གྱི་འདུ་བྱེད་པའོ། །འོ་ན་འཇིག་རྟེན་ཐུགས་ནི་ཞེས་བྱ་བ་འདིའི་དོན་ཅི་ཡིན་ཞེ་ན། དེས་ན་ཞེས་བྱ་བའོ། །འཇིག་རྟེན་གཞུག་པའི་དོན་དུ་ཞེས་བྱ་བ་ནི། ཇི་ལྟར་ན་

ཆོས་ཐམས་ཅད་སྟོང་པ་ལ་འཇིག་རྟེན་འཇུག་པར་འགྱུར་ཞེས་བྱ་བ་དེའི་དོན་དུའོ། །བཅོམ་ལྡན་འདས་ནི་འཇིག་རྟེན་གྱི་དེ་ཁོ་ནར་དུ་མར་སྟོན་པ་ཡིན་ནོ་ཞེས་བྱ་བའི་དོན་ཏོ། །འདྲི་བ་ཉིད་བརྗོད་པ་ནི་རྣམ་པར་དབྱེ་བར་ནུས་པའི་ཞེས་བྱ་བའོ། །སྣ་ཚོགས་ཀྱི་ཤེས་པ་ལ་སྔོན་པོ་ལ་སོགས་པར་

སྣང་བ་གང་ཡིན་པ་དེ་ནི་ཤེས་པའི་ཁྱད་པར་ཤེས་པའི་བདག་ཉིད་དུ་གྱུར་པ་ཡིན་གྱི་གཞན་ལ་སྟོན་པ་གཞན་དང་བཅས་པ་དེ་ལྟ་བུ་ནི་མ་ཡིན་ཏེ། གཞན་སྟོན་པ་མེད་པ་འབའ་ཞིག་པར་གྱུར་པ་ནི་མཐོང་བར་ནུས་པ་མ་ཡིན་ནོ། །སྔོན་པོ་ལ་སོགས་པ་སེར་པོ་ལ་སོགས་པ་དང་ལྷན་ཅིག་པར་དམིགས་

པ་གང་ཡིན་པ་དེ་ནི་འབའ་ཞིག་བལྟ་བར་ནུས་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་སེར་པོ་ལ་སོགས་པ་བཀབ་ཀྱང་སྔོན་པོ་ལ་སོགས་མཐོང་བ་མ་ཡིན་ནམ། དེས་ན་ཇི་ལྟར་འབའ་ཞིག་མི་མཐོང་ངོ་ཞེས་བརྗོད་སྙམ་ན། སྔོན་པོ་ལ་སོགས་པ་རྣམས་ལ་ནི་རྣམ་དབྱེ་སྟེ་སོ་སོར་འབྱེད་པ་ནི་

དོན་ལ་འཇུག་པར་འགྱུར་རོ། །ཤེས་པའི་ཁྱད་པར་ཞེས་བྱ་བའི་དོན་ཏོ། །སྣ་ཚོགས་པའི་ཤེས་པའི་བདག་ཉིད་དུ་གྱུར་པའི་སྔོན་པོ་ལ་སོགས་པ་གང་ཡིན་པ་ནི་ཞེས་བྱ་བའོ། །གཞན་སྟོན་མེད་ཅེས་བྱ་བ་འདིའི་དོན་ནི། ཡན་འགར་དུ་ཞེས་བྱ་བའོ། །དེ་ལ་ནི་ཞེས་བྱ་བ་ལ་སོགས་པ་བཤད་པའི་དོན་

Vol. 185 · folio 197b

དུ་ཕྱོགས་སྔ་མ་འགོད་པ་ནི་གལ་ཏེ་ཞེས་བྱ་བའོ། །གཟུགས་ལ་སོགས་པ་དང་ལྷན་ཅིག་ཏུ་འགྱུར་རོ་ཞེ་ན་གལ་ཏེ་ཞེས་བྱ་བ་ནི་ལན་ནོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །སྒྲའི་སྣང་བ་དང་བྲལ་བ་གཟུགས་ལ་སོགས་པའི་སྣང་བ་ནི་སྒྲའི་སྣང་བ་དང་ལྷན་ཅིག་ཉིད་དུ་མི་འགྱུར་རོ་ཞེས་

བྱ་བའི་དོན་ཏོ། །ལན་ནི་དེ་ཡང་མ་ཡིན་ཏེ་ཞེས་བྱ་བའོ། །ཤེས་པ་ཞེས་བྱ་བ་ནི་སྒྲ་དང་གཟུགས་ལ་སོགས་པར་སྣང་བའི་ཤེས་པ་རྣམ་པར་འབྱེད་པ་ནི་མ་ཡིན་ནོ། །ཅིའི་ཕྱིར་ཞེ་ན་དེའི་ཚེ་ཞེས་བྱ་བ་སྟེ། སྒྲར་སྣང་བ་མེད་པའི་དུས་ན་སྔར་གྱི་སྣང་བ་ཞེས་བྱ་བ་སྒྲ་དང་ལྷན་ཅིག་པ་མེད་པའི་

ཕྱིར་རོ། །གལ་ཏེ་སྣང་བ་སྔ་མ་ཉིད་འབའ་ཞིག་པར་འགྱུར་ན། དེའི་ཚེ་རྣམ་པར་འབྱེད་པར་འགྱུར་ན། དེ་ལྟར་ནི་མ་ཡིན་ནོ་ཞེས་དགོངས་པའོ། །སྒྲ་ནི་སྒྲའི་སྣང་བའོ། །དེས་ན་ཐ་དད་པ་ཡིན་ནོ་ཞེས་བྱ་བ་ནི་སྒྲར་སྣང་བ་ནི་གཟུགས་ལ་སོགས་པར་སྣང་བ་ལས་ཐ་དད་པར་འགྱུར་རོ། །

དེ་ནི་ཞེས་བྱ་བ་ནི་སྒྲའོ། །གལ་ཏེ་སྒྲར་སྣང་བ་ཡིན་པ་དེ་ལྟ་ན་ཡང་འདི་ཅི་ཇི་ལྟར་ཤེས་པ་ཡིན་སྙམ་ན། དོན་ནི་རིག་པ་མ་ཡིན་པའི་ཕྱིར་རོ་ཞེས་བྱ་བའོ། །སྒྲ་དང་ལྷན་ཅིག་ཏུ་སྣང་བ་སྔར་གྱི་ཤེས་པའི་རྣམ་པ་ཉིད་ལས་སོ། །ཡན་འགར་བ་ནི་སྒྲ་དང་བྲལ་བའོ་ཞེས་རྣམ་པ་དེ་ལྟར་རྣམ་པར་

འབྱེད་པའོ། །དེས་ན་ཇི་ལྟར་གཉིས་སུ་མེད་པ་ཡིན་ཏེ། སྔ་མ་དང་ཕྱི་མའི་ཤེས་པའི་སྣང་བ་དག་ཐ་དད་པར་ཁྱེད་ཉིད་ཀྱིས་ཁས་བླངས་པའི་ཕྱིར་རོ་ཞེས་བསམས་པའོ། །ཁྱེད་ཀྱི་ལྟ་བ་ཉིད་ཀྱིས་སྔ་མ་དང་ཕྱི་མའི་ཤེས་པ་དག་དབང་ཐ་དད་པར་ཁས་བླངས་ནས་གྲུབ་པའི་མཐའ་འདི་ཁོ་བོ་

ཅག་གིས་བརྗོད་པར་ཟད་ཀྱི། དོན་དམ་པར་ནི་འཆད་པར་འགྱུར་བ་ཉིད་གྲུབ་པའི་མཐར་འགྱུར་རོ་ཞེས་སྟོན་པས་བརྗོད་པ་ནི་དེ་ཡང་མ་ཡིན་ཏེ་ཞེས་བྱ་བའོ། །འདི་མྱོང་བར་གྱུར་ཏོ་ཞེས་བྱ་བ་ཇི་ལྟར་མི་འགྱུར་ཞེ་ན། རང་རིག་པའི་ཞེས་གསུངས་སོ། །འདས་པ་ནི་ཐམས་ཅད་ཀྱི་ཚེ་ལྐོག་

ཏུ་གྱུར་པ་ཁོ་ན་ཡིན་ཏེ། དེ་ནི་རང་རིག་པས་དམིགས་པ་མ་ཡིན་ནོ། །འོན་ཏེ་དྲན་པས་ལྐོག་ཏུ་གྱུར་པ་ཤེས་པར་བྱེད་དོ་ཞེ་ན་ཞེས་འབྲེལ་ཏོ། །ང་ལས་དྲན་པ་འདི་སྐྱེས་སོ་ཞེས་བྱ་བ་འདི་ནི་ཉམས་སུ་མྱོང་བ་ཁོ་ནས་རྟོགས་པ་ཡིན་ནོ་ཞེ་ན། ཉམས་སུ་མྱོང་བའི་ཞེས་སྨོས་སོ། །གང་ཞིག་ཉམས་

Vol. 185 · folio 198a

སུ་མྱོང་བའི་དུས་ན་ཡོད་པ་དེ་ཉིད་དེས་རྟོགས་པར་བྱ་བ་ཡིན་ལ། དྲན་པ་ནི་ཉམས་སུ་མྱོང་བའི་དུས་ན་ཡོད་པ་མ་ཡིན་ན། དེས་ན་དེ་དེས་ཇི་ལྟར་རྟོགས། གལ་ཏེ་བདག་ནི་ཉམས་སུ་མྱོང་བ་ལས་སྐྱེས་སོ་ཞེས་དྲན་པ་ཉིད་ཀྱིས་ཤེས་སོ་ཞེ་ན། དྲན་པ་འདིས་ནི་ཞེས་བྱ་བའོ། །དེས་ནི་ཞེས་བྱ་

བ་ནི་དྲན་པས་སོ། །གལ་ཏེ་ཉམས་སུ་མྱོང་བ་ཤེས་པ་ཡིན་ན། དེའི་ཚེ་བདག་ཉམས་སུ་མྱོང་བ་ལས་སྐྱེས་སོ་ཞེས་ཀྱང་ཤེས་པར་འགྱུར་བ་ཞིག་ན། ཉམས་སུ་མྱོང་བ་རིག་པ་མེད་དོ། །དེ་ཉམས་སུ་མྱོང་བ་ཉམས་སུ་མྱོང་བ་ཉིད་དོ་སྙམ་ན། ཉམས་སུ་མྱོང་བ་ཡིན་ན་ཡང་ཞེས་གསུངས་སོ། །ཉམས་སུ་

མྱོང་བ་དྲན་པས་མྱོང་བ་ཡིན་ན་ཡང་ཉམས་སུ་མྱོང་བ་ཁོ་ནར་འགྱུར་གྱི་དྲན་པ་ནི་མ་ཡིན་ནོ། །གང་གི་ཕྱིར་དེ་ལྟར་སྔ་མ་དང་ཕྱི་མར་འཛིན་པ་མི་འཐད་པ་དེའི་ཕྱིར་ཞེས་བྱ་བའོ། །དེ་ཉིད་ཀྱི་ཚེ་ཞེས་བྱ་བ་ནི། དུས་གང་གི་སེར་པོ་ལ་སོགས་པ་དང་བཅས་པའི་སྔོན་པོ་དམིགས་པའི་ཚེའོ། །གཅིག་གིས་བྱ་

བ་ནི་འབའ་ཞིག་པའོ། །མཐོང་བ་གང་ཡིན་པ་ཞེས་བྱ་བ་ནི་སྔོན་པོ་འབའ་ཞིག་པའོ། །འདི་ལ་ལན་ནི་འོ་ན་ནི་ཞེས་བྱ་བའོ། །རང་ཉིད་ཀྱིས་རྣམ་པར་དཔྱོད་པར་ཁས་བླངས་པའི་ཕྱིར་རོ། །རང་རིག་པ་ལ་ཞེས་བྱ་བ་ནི་དེ་ནི་རང་ཉིད་ཁོ་ན་རིག་པའི་ཕྱིར་རོ། །གང་ཞིག་གཞན་གྱིས་ཀྱང་དམིགས་པ་

དེ་ནི་ཕྱི་རོལ་ཉིད་དུ་ཐ་སྙད་བྱེད་པ་ཡིན་གྱི། གཞན་ནི་མ་ཡིན་ནོ་ཞེས་བྱ་བར་བསམས་པའོ། །སེམས་ཀྱི་ཞེས་བྱ་བ་ནི་སེམས་ཀྱི་རྣམ་པ་ཁོ་ན་གཅིག་ཏུ་འགྱུར་གྱི་དོན་གྱིས་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ཇི་ལྟར་ན་དོན་གྱི་ཡང་མི་འགྱུར་ཞེ་ན་ཞེས་པ་མ་གཏོགས་པར་ཞེས་བྱ་བ་ཞེས་གསུངས་

སོ། །གཟུང་བར་འདོད་པ་གང་ཡིན་པ་འཛིན་པར་འདོད་པ་གང་ཡིན་པ་དང་། དེ་བཞིན་དུ་སྔོན་པོ་དང་སེར་པོ་ལ་སོགས་པའི་རྣམ་པ་གང་ལ་ཡོད་པའི་བློ་སྣ་ཚོགས་པའི་དེ་ལ་དེ་སྐད་ཅེས་བྱ་བའོ། །དེ་ལྟར་ནི་རེ་ཞིག་དུ་མ་ཉིད་དུ་ཁས་བླངས་ནས་རྣམ་པར་དབྱེ་བར་མི་ནུས་པའི་རང་བཞིན་གྱིས་གཅིག་

ཉིད་དུ་བཤད་པ་ཡིན་ནོ། །དེ་ནི་དུ་མ་ཉིད་མེད་དོ་ཞེས་བརྗོད་པ་ནི་ཡང་ན་ཞེས་བྱ་བའོ། །སྣ་ཚོགས་མ་ཡིན་པ་ལ་ཞེས་བྱ་བ་ནི་རིག་པའི་རང་བཞིན་གཅིག་ལས་སོ། །ཕན་ཚུན་ཐ་དད་པར་གནས་པ་གང་ཡིན་པ་དེ་ནི་མེད་པའི་ཕྱིར་རོ། །རང་རིག་པ་ནི་གདོན་མི་ཟ་བར་རང་བཞིན་གཅིག་ཏུ་ཁས་བླང་བར་

Vol. 185 · folio 198b

བྱ་བ་ཡིན་ཏེ། དེ་ལྟ་མ་ཡིན་ན་རྡུལ་ཕྲ་རབ་ཀྱི་མཐར་ཐུག་པའི་ཐ་དད་པ་ནི་རང་རང་གི་རང་བཞིན་ལ་མི་གནས་པའི་ཕྱིར་མི་སྣང་བ་ཁོ་ནར་འགྱུར་རོ། །སྣང་བ་ཡང་ཡོད་དེ་དེས་ན་སྣང་བ་མེད་པའི་ཕྱིར་རིག་པ་རང་བཞིན་གཅིག་ཉིད་དོ། །རིག་པ་རང་བཞིན་གཅིག་ཡིན་པ་དེ་ལས་ཀྱང་ཇི་ལྟར་དུ་མ་ཉིད་རྣམ་

པར་གནས་པར་འགྱུར་ཏེ། ཕྱིར་ལ་གཅིག་ཉིད་གནས་པར་འཐད་པ་ཡིན་ནོ། །དེས་ནི་རང་གི་ངོ་བོ་ཁོ་ནར་རིག་པར་འགྱུར་ལ། རིག་པ་གཅིག་གི་རང་བཞིན་ཡང་གཅིག་ཁོ་ནར་འཐད་པ་ཡིན་ནོ་ཞེས་དགོངས་པའོ། །དངོས་པོ་དང་དངོས་པོ་མེད་པ་དག་གིས་ཞེས་བྱ་བ་ནི་གཉིས་མེད་པའི་དངོས་

པོ་དང་གཞན་གཉིས་ནི་དངོས་པོ་མེད་པ་སྟེ། དེ་དག་གིས་སོ། །གང་གི་ཕྱིར་ཐ་དད་པ་མེད་པ་དེའི་ཕྱིར་ཐ་དད་པའི་དངོས་པོ་མེད་པ་ལས་ཐ་མི་དད་པ་གཉིས་སུ་མེད་པའི་གཞན་དུ་རྣམ་པར་གནས་པར་མི་འགྱུར་རོ། །གལ་ཏེ་ཐ་དད་པའི་དངོས་པོ་གཉིས་དངོས་པོ་མེད་པར་མ་རྟོགས་ན་ནི་དེའི་ཚེ་གཉིས་

དངོས་པོ་མེད་པར་མ་རྟོགས་པས་ནི། གཉིས་མེད་པར་མངོན་པར་འདོད་པ་ཐ་དད་པ་ཉིད་ག་ལས་ཡིན་ཏེ་མ་ཡིན་པ་ཁོ་ནའོ། །དེ་ལྟར་རྟོགས་པར་འགྱུར་མོད། ཉེས་པ་ཅི་ཡོད་སྙམ་ན་ཡང་དེ་ལྟ་ན་ཡང་ཞེས་བྱ་བའོ། །དངོས་པོ་མེད་པ་གཉིས་དང་དངོས་གཉིས་མེད་པ་ཡང་ངོ་། །བུམ་པ་འདི་

ལ་ཀ་བ་མེད་དོ་ཞེས་བྱ་བའི་དགག་པ་ནི་མེད་ཉིད་དངོས་པོ་མེད་པ་མ་ཡིན་ཏེ། ཀ་བ་འགོག་པ་མིན་ཞེས་བྱ་བར་ལྟའོ། །གལ་ཏེ་དེ་ལས་ཀ་བའི་མེད་པ་ཡོད་ན་ནི་དེའི་ཚེ་ཀ་བ་ཡང་འགོག་པར་འགྱུར་རོ། །དེས་ན་འདི་ཡང་ཐ་དད་པ་མེད་དེ་ཞེས་ཐ་དད་པའི་མེད་པ་རྟོགས་པར་བྱ་སྟེ། དེ་ལྟ་མ་ཡིན་ན་

དེ་དགག་པ་མི་འཐད་པའི་ཕྱིར་རོ། །དེ་ལྟ་ཡིན་དང་གཉིས་མེད་དང་གཉིས་ཀྱི་དངོས་ཡོད་པ་དང་མེད་པ་གང་ཡིན་པ་དེ་དག་གི་ཐ་དད་པའི་རིག་པ་སྟེ་རྟོག་པ་འོངས་སོ། །ཅི་འདྲ་བ་ཞིག་ཅེ་ན་མེད་པ་མེད་པ་ཅན་ཏེ་གདོན་མི་ཟ་བར་འགྱུར་བའོ། །ཐ་དད་པ་མེད་ན་མི་འབྱུང་བ་ཅན་ཞེས་བྱ་བ་ནི་

དངོས་པོ་ཐ་དད་པ་མེད་ན་མི་འབྱུང་བ་ཅན་ནོ། །འོན་ཏེ་གཉིས་དགག་པ་མི་བྱེད་དོ་ཞེ་ན། དགག་པ་མ་རྟོགས་ན་ནི་ཞེས་གསུངས། ཅུང་ཟད་ཀྱང་ཞེས་བྱ་བ་ནི་གཉིས་སམ་གཉིས་མེད་པའོ། །གཉིས་པ་གཞན་ཡང་བརྗོད་པ་ནི་གཞན་ཞེས་བྱ་བའོ། །གཞན་ནི་འགའ་ཡང་རྟོགས་པར་བྱེད་

Vol. 185 · folio 199a

པ་མ་ཡིན་ཏེ། འོན་ཀྱང་རྣམ་པ་འདིས་བདག་ཉིད་ཁོ་ན་རྟོགས་པར་བྱེད་དོ་ཞེས་བྱ་བའི་དོན་ཏོ། །དེ་ལྟར་ན་ནི་ཞེས་བྱ་བ་ནི་སུན་འབྱིན་པའོ། །གང་གི་ཚེ་རྨོངས་པ་སྲིད་པ་དེའི་ཚེ་གཉིས་མེད་པ་ནི་མ་རྨོངས་པའི་རང་བཞིན་ཡིན་ནོ། །རྨོངས་པ་དང་མ་རྨོངས་པ་དག་ཀྱང་ཕན་ཚུན་ཐ་

དད་པ་དེས་ན་ཇི་ལྟར་གཉིས་མེད་པ་ཡིན། རྨོངས་པ་མེད་ན་ནི་བདག་ཉིད་རྟོགས་པར་བྱེད་པ་ཉེ་བར་མཁོ་བ་མ་ཡིན་ནོ། །དེ་ཉིད་བརྗོད་པ་ནི་རྨོངས་པ་གསལ་བས་ན་ཞེས་བྱ་བའོ། །གཞན་ནི་མ་རྨོངས་པའོ། །ཉེས་པ་གཞན་ཡང་བརྗོད་པ་ནི་སྔ་མ་དང་ཞེས་བྱ་བའོ། །དང་པོ་ནི་རྨོངས་པས་

བཟློག་པར་བྱ་བ་ཡིན་ལ། དུས་ཕྱིས་ནི་མ་རྨོངས་པས་འཇུག་པར་བྱ་བ་ཡིན་ནོ་ཞེས་སྔ་མ་དང་ཕྱི་མ་དག་ནི་ཇི་ལྟར་རྟོགས་པ་ཐ་དད་པ་ཞེས་བྱ་བ་འདི་ནི་རྣམ་པ་ཐམས་ཅད་དུ་མ་མཐོང་ངོ་ཞེས་དེ་ལྟར་གཉིས་མེད་པར་སྨྲ་བ་གང་གིས་བསྒྲུབས་པར་འགྱུར་བ་དེ་ལ་རྟོགས་པ་འདི་མ་འབྲེལ་བར་འགྱུར་རོ་

ཞེས་འབྲེལ་ཏོ། །ཡང་ཇི་ལྟར་ན་ཐ་དད་པ་མཐོང་བ་མ་ཡིན་སྙམ་ན་རེ་ཞིག་ཅེས་བྱ་བའོ། །སྔ་མ་དང་ཕྱི་མ་ནི་འདས་པ་དང་མ་འོངས་པའོ། །དེའི་ཚེ་ཞེས་ཁོང་ནས་ཕྱུང་ལ། ད་ལྟར་བ་ཉིད་དུ་འགྱུར་རོ་ཞེས་བྱ་བར་སྦྱར་རོ། །གཉིས་པ་བཞིན་ནོ་ཞེས་བྱ་བ་ནི་ད་ལྟར་བ་བཞིན་ནོ། །གལ་ཏེ་འདས་

པའི་ཕྱིར་ན། དེ་སྣང་དུ་ཟིན་ཀྱང་ད་ལྟ་བར་ཇི་ལྟར་འགྱུར་ཞེ་ན་དེའི་ཞེས་བྱ་བའོ། །འོན་ཏེ་མི་སྣང་ངོ་ཞེས་བྱ་བ་ནི་རྣལ་འབྱོར་པའི་མངོན་སུམ་ལ་སྣང་བ་ནི་འདས་པར་མངོན་པར་འདོད་པའི་ཡང་འདས་པ་ཉིད་མ་ཡིན་ན་ཞེས་བྱ་བའི་དོན་ཏོ། །དེའི་ཚེ་ཇི་ལྟར་འདས་པ་ལ་སོགས་པ་རིག་པ་དམིགས་པ་

ཡིན་ཞེས་བལྟའོ། །དེ་ནི་གནས་སྐབས་ནི་རྣལ་འབྱོར་པའི་གནས་སྐབས་སོ། །གང་དུ་ཞེས་བྱ་བ་ནི་གཉིས་སུ་མེད་པར་སྨྲ་བར་རོ། །གཞན་དག་སྣང་བ་ཉིད་དུ་སྟོན་པ་ནི། རྨི་ལམ་བདེན་པ་ཞེས་བྱ་བའོ། །སྐྱེ་བ་འདི་ཉིད་དུའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ལྟར་ཐ་སྙད་བྱེད་པའི་ཕྱིར་རོ་

ཞེས་བདག་གིས་འདས་པ་རྟོགས་སོ་ཞེས་ཐ་སྙད་བྱེད་པའི་ཕྱིར་རོ། །དམིགས་པའི་གནས་སྐབས་ནི་དེ་དག་གིས་ཀྱང་དེ་ད་ལྟར་བ་ཁོ་ནར་དམིགས་པ་ཡིན་ནོ་ཞེས་དགོངས་པའོ། །དེས་ན་ཞེས་བྱ་བ་ནི་མ་རྟོགས་པས་ནའོ། །དེ་ལས་ཞེས་བྱ་བ་ནི་འདས་པ་དང་མ་འོངས་པ་ལས་སོ། །ཁྱད་པར་མ་རྟོགས་པར་

Vol. 185 · folio 199b

ནི་ཁྱད་པར་ཅན་རྟོགས་པ་མ་ཡིན་ནོ། །འདས་པ་དང་མ་འོངས་པ་ཡང་ཐ་དད་པའི་ཁྱད་པར་ཡིན་ནོ་ཞེས་དགོངས་པའོ། །འོ་ན་ཇི་ལྟར་འཇིག་རྟེན་ན་འདས་པ་རྟོགས་པ་ཡོད་སྙམ་ན་འདས་པ་ནི་ཞེས་བྱ་བའོ། །དྲན་པ་དེ་ཉིད་ཀྱིས་འདས་པ་རྟོགས་པར་འགྱུར་རོ་སྙམ་ན་དེ་ཡང་ཞེས་གསུངས་ཏེ། དྲན་པ་

ཡང་ངོ་། །འོན་ཏེ་རྗེས་སུ་དཔག་པས་མ་འོངས་པ་ལས་ད་ལྟར་བ་ཐ་དད་པར་འགྱུར་རོ་ཞེས་བལྟའོ། །རྗེས་སུ་དཔག་པ་ཉིད་ག་ལས་སྐྱེ་སྙམ་ན་བརྟན་པ་ལ་སོགས་པའམ་ཞེས་སྨྲས་སོ། །གང་གི་ཚེ་དངོས་པོ་བརྟེན་པ་མཐོང་བ་དེའི་ཚེ་འདི་ནི་ཡུན་རིང་པོར་གནས་པར་འགྱུར་རོ་ཞེས་ཤེས་པ་ཡིན་ནོ། །

སོགས་པ་སྨོས་པ་ནི་སྙིང་མི་མཐོང་བས་ན་འདི་ནི་རིང་པོ་མི་གནས་སོ་སྙམ་དུ་ཤེས་པར་འགྱུར་རོ། །དེ་བཞིན་དུ་རྒྱུ་མཐོང་བ་ལས་ཀྱང་འབྲས་བུ་རྟོགས་པར་འགྱུར་རོ་དུས་ཕྱིས་འབྲས་བུ་འབྱུང་བར་འགྱུར་རོ་ཞེས་བྱ་བར་རོ། །དེ་ལྟ་ན་ཡང་ཐ་དད་པར་རྟོགས་པར་ནུས་པ་ཡིན་ནོ་ཞེས་བྱ་བར་བསམས་པའོ། །

འབྱུང་བར་འགྱུར་བའི་དོན་དེ་དང་འབྲེལ་པར་རིག་པའི་རྒྱུ་ལས་འབྱུང་བར་འགྱུར་བའི་དོན་རྗེས་སུ་དཔོག་པར་འགྱུར་བ་ཡིན་ནོ། །གལ་ཏེ་འདིར་ཡང་འབྲེལ་པ་རྟོགས་པ་པ་ཡོད་དོ་ཞེ་ན། རྒྱུད་དང་བརྟན་པ་ཉིད་དག་ལ་ནི་འབྱུང་བར་འགྱུར་བའི་དོན་དང་འབྲེལ་པར་མངོན་སུམ་གྱིས་རིག་པ་མེད་པ་ཉིད་དོ། །གལ་

ཏེ་གཉིས་མེད་པར་སྨྲ་བའི་ལྟར་འབྲེལ་པ་ཞེས་བྱ་བ་མེད་པ་མ་ཡིན་ནམ་དེ་ནི་གཉིས་ལ་བརྟེན་པའི་ཕྱིར་རོ། །དེས་ན་འབྲེལ་པ་ཡོད་ན་རྗེས་སུ་དཔོག་གོ་ཞེས་ཅིའི་ཕྱིར་བརྗོད་སྙམ་ན། འབྲེལ་པ་ལས་ཞེས་གསུངས་སོ། །འདིས་ནི་གཞན་གྱི་ཁས་བླངས་པ་ཁོ་ནས་དེ་སྐད་བརྗོད་པ་ཡིན་ནོ་ཞེས་བཤད་པ་ཡིན་

ནོ། །ཧ་ཅང་ཐལ་བ་ཉིད་ནི་བུམ་པ་ལས་ཀྱང་སྣམ་བུ་དཔོག་པར་ཐལ་ལོ། །འདི་ལ་གཞན་གྱིས་བརྗོད་པ་ནི་མ་མཐོང་བ་ཞེས་བྱ་བའོ། །གལ་ཏེ་ཞེས་བྱ་བ་ནི་གྲུབ་པའི་མཐའ་པའིའོ། །གལ་ཏེ་རྗེས་སུ་དཔག་པས་མཐོང་བ་ཉིད་དུ་བརྗོད་ན་ནི་དེའི་ཚེ་རྗེས་སུ་དཔག་པ་དེ་ཉིད་སེམས་པས་ན་ཇི་ལྟར་ན་རྗེས་སུ་

དཔག་པ་དེས་མཐོང་བ་ཞེས་བརྗོད། འོ་ན་མངོན་སུམ་གྱིས་མཐོང་བ་ཉིད་ཡིན་ནོ་ཞེ་ན་རྗེས་སུ་འཇུག་གོ། །དེ་ནི་ཞེས་བྱ་བ་ནི་རྗེས་སུ་དཔག་པའོ། །གལ་ཏེ་རྗེས་སུ་དཔག་པ་ལྐོག་ཏུ་གྱུར་པའི་ཡུལ་ཅན་ཡིན་མོད། དེ་ལྟ་ན་ཡང་མངོན་སུམ་གྱིས་ཇི་ལྟར་མི་རྟོགས་ཤེ་ན། ལྐོག་ཏུ་གྱུར་པ་ལ་ཡང་ཞེས་

Vol. 185 · folio 200a

གསུངས་སོ། །ལྐོག་ཏུ་གྱུར་པའི་ཡུལ་ཅན་གྱི་རང་བཞིན་གྱིས་ཇི་ལྟར་རྗེས་སུ་དཔག་པ་བདག་གིར་བྱེད་དེ་ཇི་ལྟར་མངོན་སུམ་གྱིས་རྟོགས་པའི་མཚན་ཉིད་ཡིན། ཡང་ཇི་ལྟར་ན་ལྐོག་ཏུ་གྱུར་པའི་ཡུལ་ཅན་རྗེས་སུ་དཔག་པའི་མངོན་སུམ་གྱིས་མི་རྟོགས་ཤེ་ན། ལྐོག་ཏུ་གྱུར་པ་ཞེས་

གསུངས་སོ། །ཡུལ་དུ་མི་བྱེད་པས་ནི་ཞེས་བྱ་བ་མངོན་སུམ་གྱིས་སོ། །ཡུལ་དེའི་ཁྱད་པར་ཅན་ནི་ཞེས་བྱ་བ་ནི་ལྐོག་ཏུ་གྱུར་པའི་ཡུལ་གྱི་ཁྱད་པར་ཅན་ནོ། །དེའི་ཡུལ་ཅན་གྱི་རྗེས་སུ་དཔག་པ་མངོན་སུམ་གྱིས་མི་རྟོགས་མོད། རྗེས་སུ་དཔག་པ་ཙམ་ནི་རྟོགས་སོ་ཞེ་ན། འོན་ཏེ་ཞེས་གསུངས་སོ། །

གལ་ཏེ་རྗེས་སུ་དཔག་པ་མི་རྟོགས་ན་འོ་ན་ཅི་ཞིག་ཉམས་སུ་མྱོང་སྙམ་ན་རང་གི་ངོ་བོ་ཞེས་གསུངས་སོ། །དེ་ལྟར་ཞེས་བྱ་བ་ནི་རང་གི་ངོ་བོར་རིག་པར་རོ། །འོན་ཏེ་དེ་ཁོ་ན་ལྟར་ཐ་སྙད་བྱེད་པ་ཡིན་ནོ་ཞེས་བྱ་བ་ནི་རྗེས་སུ་དཔག་པ་མཐོང་བའི་མཚན་ཉིད་ཀྱིའོ། །དེ་ལྟ་ཡིན་ནོ་ཞེས་བྱ་བ་ནི་གྲུབ་པའི་མཐའོ། །

དོགས་པ་ནི་ཐ་དད་པར་ཞེས་བྱ་བའོ། །གྲུབ་པའི་མཐའ་ནི་མཐོང་བ་ཞེས་བྱ་བའོ། །ཐ་དད་པར་མངོན་པར་ཞེན་པར་ནི་མི་རུང་བ་ཡིན་པའི་ཕྱིར་ན། སྤང་བ་ཁོ་ནར་རིགས་སོ་ཞེས་བྱ་བར་དགོངས་པའོ། །དེ་ལྟའོ་ཞེས་བྱ་བ་ནི་ཐ་དད་པར་མངོན་པར་ཞེན་པ་མཐོང་བ་ནི། སྤང་བར་མི་ནུས་སོ་ཞེས་བྱ་བ་འདིའོ། །

ཐ་དད་པ་ཡོད་དོ་ཞེས་བྱ་བ་དེ་ལྟ་བུའོ། །མཚན་ཉིད་ཅན་གྱིས་ཉེ་བར་བསྟེན་པ་གང་ཡིན་པ་དེ་བརྩོན་པའོ། །ངེད་ཀྱི་ཐ་མི་དད་པ་ལ་མངོན་པར་ཞེན་པ་ཡང་མཐོང་བ་ཉིད་ཀྱིས་སྤང་བར་མི་ནུས་པའི་ཕྱིར་ཞེས་བྱ་བའི་དོན་ཏོ། །ཁྱེད་ཀྱི་ཡང་ཞེས་བྱ་བ་ནི་ཐ་མི་དད་པར་སྨྲ་བའིའོ། །དོན་མེད་པ་ཉིད་དོ་ཞེས་བྱ་

བ་ནི་ཐ་དད་པ་ལ་མངོན་པར་ཞེན་པ་ནི་མཐོང་བའི་ཕྱིར་ན་དོར་བར་མི་ནུས་ལ་གཉིས་སུ་མེད་པར་བསྟན་པ་འདི་ཡང་ཐ་དད་པར་མངོན་པར་ཞེན་པ་ཀུན་དུ་རྨོངས་པའི་མཚན་ཉིད་སྤང་བའི་དོན་དུ་བསྟན་པ་ཡིན་ནོ་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ལྟ་བུ་བརྗོད་པའི་དོན་དུ་ཞེས་བྱ་བ་ནི་ཐ་

དད་པར་མངོན་པར་ཞེན་པ་འདི་ནི་མ་མཐོང་བ་ཁོ་ན་སྟེ། གསལ་བ་ནི་མ་ཡིན་ནོ་ཞེས་དེ་ལྟར་བསྟན་པའི་དོན་དུ་ཉེ་བར་བསྟན་པ་ཡིན་ནོ་ཞེས་བྱ་བ་ནི། གལ་ཏེ་རེ་ཞིག་མ་མཐོང་ཡང་ཐ་དད་པར་མངོན་པར་ཞེན་པ་དེ་ནི་ཡོད་པ་མ་ཡིན་ནམ། དེས་ན་ཇི་ལྟར་སྤང་ཞེ་ན། དེ་ལྟ་ཡིན་དང་ཞེས་བྱ་བའོ། །མ་

Vol. 185 · folio 200b

མཐོང་བ་ནི་མེད་པའི་ཕྱིར་ན་མ་མཐོང་བའི་ཐ་དད་པར་ཞེན་པ་ཡང་ཇི་ལྟར་བདེན་ཞེས་བསམས་པའོ། །ཡང་ཇི་ལྟར་ན་ཐ་དད་པ་མཐོང་བ་མེད་སྙམ་ན་འདི་ལྟར་ཞེས་བྱ་བའོ། །ཐ་དད་པ་བརྟེན་པ་སྟེ། རྟོགས་པ་ཡོད་པ་མ་ཡིན་པ་ན་དེ་སྐད་ཅེས་བྱ་བའོ། །གལ་ཏེ་ད་ལྟར་བའི་སྣང་བས་ཐ་དད་པ་མི་རྟོགས་

ན། དེ་ལྟར་ན་འོ་ན་འདས་པ་དང་མ་འོངས་པ་དག་གིས་རྟོགས་པར་འགྱུར་རོ་ཞེ་ན། སྔ་མ་ཕྱི་མའི་ཞེས་བྱ་བའོ། །སོ་སོར་ཞེས་བྱ་བ་ནི་རེ་རེས་ཐ་དད་པར་མི་འཛིན་ཏོ། །རེ་རེས་ཐ་དད་པར་མི་འཛིན་ཡང་འདུས་ལས་ཞེས་བྱ་བ་སྣ་ཚོགས་ནས་དེ་ལྟར་ཞེས་བྱ་བ་ཐ་དད་པར་འཛིན་པར་འགྱུར་རོ། །དཔེར་

ན་བུ་རམ་དང་དོང་གྲ་དག་རེ་རེས་བྱ་བར་མི་ནུས་པའི་འབྲས་བུ་དེ་ཚོགས་ནས་བྱེད་པ་དེ་བཞིན་ནོ་ཞེས་བྱ་བ་ནི་དཔེའི་དོན་ཏོ། །གྲུབ་པའི་མཐའ་ནི་དེར་ནི་ཞེས་བྱ་བའོ། །འབྲས་བུ་གཅིག་པ་ནི་བུ་རམ་དང་དོང་གྲ་དག་གི་ཕྱིར་ཏེ། རྒྱུ་དེས་ན་དུས་ནས་ཏེ་ལོག་ནས་བྱེད་པ་ཡིན་ནོ། །འདིར་ཡང་ཐ་དད་

པར་འཛིན་པའི་མཚན་ཉིད་ཀྱི་འབྲས་བུ་གཅིག་ཡོད་པའི་ཕྱིར་ན་ལོག་ནས་བྱེད་པར་འགྱུར་རོ་ཞེ་ན། འདིར་ནི་ཞེས་གསུངས་སོ། །དེ་ལས་ཐ་དད་པར་རང་བཞིན་ནི་གཟུང་བ་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་དྲན་པའི་མཚན་ཉིད་ཀྱི་འབྲས་བུ་ཐ་དད་པ་ཡོད་པ་མ་ཡིན་ནམ། དེས་ན་

ལོག་ནས་བྱེད་པ་ཉིད་མི་འགལ་ལོ་ཞེས་བརྗོད་པ་ནི་དེ་ལས་གཞན་པའི་ཞེས་བྱ་བའོ། །སྔ་མ་དང་ཕྱི་མའི་མྱོང་བ་དག་ལས་བྱུང་བ་གང་ཡིན་པ་སྟེ། དེས་ན་དེ་ལས་ལོག་ནས་བྱེད་པར་འགྱུར་རོ་ཞེས་བྱ་བར་བསམས་པའོ། །ལན་ནི་ཐ་དད་པར་ནི་ཞེས་བྱ་བའོ། །གལ་ཏེ་ཉམས་སུ་མྱོང་བ་དེ་ལྟ་ཡང་

དྲན་པ་ནི་ཡོད་དོ་སྙམ་ན་ཉམས་མྱོང་མེད་པར་ཞེས་གསུངས་སོ། །གཞན་ཡང་གལ་ཏེ་དྲན་པ་ཁོ་ན་ཉམས་སུ་མྱོང་བ་མེད་ཀྱང་སྔ་མ་དང་ཕྱི་མའི་སེམས་དག་ཐ་དད་པར་འཛིན་པར་བྱེད་པ་ཡིན་ན་དེའི་ཚེ་དྲན་པ་འདི་ནི་ཉམས་སུ་མྱོང་བ་ཁོ་ན་ཡིན་ཏེ་དེས་ན་དྲན་པ་དེ་དང་དུས་མཚུངས་པ་ཉིད་ཀྱིས་སེམས་སྔ་

མ་དང་ཕྱི་མ་ཉིད་ནི་རིག་པ་ཡིན་ན་དེ་ཡང་གཉིས་མེད་ཐོབ་པར་འགྱུར་རོ། །དེར་ནི་འབྲས་བུ་གཅིག་པའི་ཞེས་བྱ་བ་ལ་སོགས་པ་འཆད་པ་ནི་བུ་རམ་དང་ཞེས་བྱ་བའོ། །དེས་ཞེས་བྱ་བ་ན་བུ་རམ་དང་དོང་གྲ་དག་གིས་བཟློག་པར་བྱ་བའི་ནད་གང་ཡིན་པ་དེ་ཟློག་པར་བྱེད་པའོ། །སྔ་མ་དང་ཕྱི་མར་རྟོགས་པ་

Vol. 185 · folio 201a

འབྲས་བུ་ཡིན་ནོ་ཞེ་ན། རྟོགས་པ་ནི་ཞེས་གསུངས་སོ། །དེ་དག་གི་ཞེས་བྱ་བ་ནི་སེམས་སྔ་ཕྱི་དག་གིའོ། །དེ་ཡང་ཞེས་བྱ་བ་ནི་རྟོགས་པའོ། །ཐ་དད་པ་ན་ཞེས་བྱ་བ་ནི་སྔ་མ་དང་ཕྱི་མའི་སེམས་ཀྱི་རང་བཞིན་ལྟར་ཐ་དད་པ་ཉིད་ཡིན་ནའོ། །གཞན་གྱིས་སྨྲས་པ་ནི་སྔ་མ་དང་ཞེས་བྱ་བའོ། །

མ་ཡིན་ཏེ་ཞེས་བྱ་བ་ནི་འགོག་པའོ། །དེས་ན་དྲན་པ་ཡང་ཞེས་བྱ་བ་ནི་གཉིས་འཛིན་པའོ། །འོ་ན་སློབ་དཔོན་གྱིས་ཇི་ལྟར་དེ་སྐད་བཤད་ཅེས་ཞེས་བྱ་བར་བལྟའོ། །གཟུགས་དང་རེག་པའི་རྣམ་པར་ཤེས་པ་ཐ་དད་ཀྱང་མ་གྲུབ་པའི་ཕྱིར་རོ་ཞེས་བྱ་བའོ། །འདི་ལ་བརྗོད་པ་ནི་ཐ་དད་པར་འཛིན་པ་ཞེས་བྱ་བའོ། །

དེ་ལྟ་བུའི་ཞེས་བྱ་བ་ནི་ཐ་དད་པའིའོ། །འོན་ཏེ་སྔ་མ་དང་ཕྱི་མའི་སེམས་དག་གིས་ཐ་དད་པ་མི་འཛིན་པ་དེ་ལྟ་ན་ཡང་དྲན་པས་འཛིན་པ་ཡིན་ནོ་སྙམ་ན། །གང་གིས་གསུངས་སོ། །གལ་ཏེ་དྲན་པས་སེམས་སྔ་མ་དང་ཕྱི་མ་དག་རང་རིག་གོ་དེ་ཁོ་ནས་དངོས་སུ་བྱེད་དོ་སྙམ་ན་དུས་མཚུངས་པ་ཞེས་བྱ་

བའོ། །འདོད་པ་ཡིན་གྱི་ཞེས་བྱ་བ་ནི་ཁྱེད་འདོད་པ་ཡིན་གྱི། ཉམས་མྱོང་ནི་ཐ་དད་པའི་འཛིན་བྱེད་མིན་ནོ་ཞེས་འབྲེལ་ཏོ། །དེའི་ཕྱིར་ན་ཐ་དད་པར་རིག་པ་འདི་ནི་ཀུན་རྫོབ་ཡིན་པར་འགྱུར་རོ། །ཀུན་རྫོབ་ཉིད་བསྒྲུབ་པ་ནི་འདི་ལྟར་ཞེས་བྱ་བའོ། །ཁོ་བོ་ཅག་གིས་གཅིག་ཏུ་འདོད་པ་གང་ཡིན་པ་དེ་ནི་

སྣ་ཚོགས་ཏེ། དུ་མར་རྟོགས་པ་སྟེ་ཤེས་པར་འགྱུར་རོ། །རྣམ་པ་གང་གིས་ཤེ་ན། མངོན་སུམ་ནི་དེ་ལྟར་འཇུག་པ་ཡང་མ་ཡིན་ཏེ། དེའི་ཕྱིར་ཞེས་བྱ་བ་ལ་སོགས་པའོ། །འོན་ཏེ་རེ་ཞིག་སྣང་བ་ནི་ཡོད་པ་ཡིན་ཏེ་དེས་ན་དེ་ཙམ་ཁོ་ནས་ཐ་དད་པ་རྟོགས་པར་འགྱུར་རོ་ཞེ་ན་སྣང་བ་ཙམ་གྱིས་ཞེས་བྱ་བའོ། །

སྣ་ཚོགས་དང་སྣ་ཚོགས་མིན་ཉིད་ནི་ཐ་དད་པ་དང་ཐ་མི་དད་པར་རྟོགས་པའོ། །གང་གི་ཕྱིར་སྣང་བ་ཙམ་གྱིས་ཐ་དད་པ་དང་ཐ་མི་དད་པ་ཞེས་མི་རྟོགས་པ་དེས་ནའོ། །དྲན་པ་གོམས་པ་ལས་གསལ་བར་གྱུར་པའི་མངོན་སུམ་གང་ཡིན་པ་དེས་སོ། །གང་ཞིག་ཅེས་བྱ་བ་ནི་ཐ་དད་པ་འཛིན་པའོ། །གོམས་

ལས་ཀྱང་ཞེས་བྱ་བ་ནི་མི་གསལ་བའི་མངོན་སུམ་སྣང་བའི་རང་བཞིན་གང་ཡིན་པ་དེ་ཉིད་གོམས་པ་ལས་གསལ་བར་སྣང་བ་ཉིད་ཀྱིས་ལྷག་པར་འགྱུར་བ་ཡིན་ན། མི་གསལ་བའི་མངོན་སུམ་གྱིས་ཐ་དད་པ་གཟུང་བ་ཡང་མ་ཡིན་ནོ། །དེས་ན་གོམས་པ་ལས་སྐྱེས་པས་འཛིན་པར་འགྱུར། དེར་ཡང་ཞེས་

Vol. 185 · folio 201b

བྱ་བ་ནི་གསལ་བའི་མངོན་སུམ་ལ་ཡང་རྣམ་དབྱེ་དེས་ཞེས་བྱ་བ་ནི་ཐ་དད་པ་དང་ཐ་མི་དད་པའི་རྣམ་པར་དབྱེ་བའོ། །དྲན་པ་དེ་ལས་ནི་དྲན་པ་དང་ཉམས་སུ་མྱོང་བ་དག་ཡན་འགར་བར་མྱོང་བ་སྟེ། ཐ་དད་པར་འཛིན་ནོ་ཞེས་བྱ་བའི་དོན་ཏོ། །གལ་ཏེ་དེ་སྐད་བརྗོད་ན་དེའི་ཚེ་ཡང་དུ་མའི་རང་བཞིན་དེ་ཡང་ཁྱེད་ཀྱི་

འདོད་པས་དྲན་པ་དང་ཉམས་སུ་མྱོང་བ་དག་གི་ཡིན་པས་དེ་ལ་ཡང་རྣམ་དབེན་ཏེ་རྣམ་པར་དབྱེ་བ་ཡོད་པ་མ་ཡིན་གྱི་འོན་ཀྱང་དྲན་པ་ལ་སྣང་བའི་དྲན་པ་དང་ཉམས་སུ་མྱོང་བ་དག་ཀྱང་གཅིག་ཁོ་ནའོ་ཞེས་བྱ་བའི་དོན་ཏོ། །ཅིའི་ཕྱིར་ཐ་མི་དད་ཅེ་ན་རང་ངམ་ཞེས་བྱ་བའོ། །དེ་ཉིད་དུ་ཞེས་བྱ་བ་ནི་དོན་དམ་པར་

རོ། །གལ་ཏེ་ཡང་རྣམ་པར་གཅད་པར་བྱ་བ་མི་ནུས་པ་དེ་ལྟ་ན་ཡང་ཐ་དད་པར་འགྱུར་རོ་སྙམ་ན། གང་ཞིག་ལོགས་སུ་བཅད་ནས་སྐྱོ་བར་མི་ནུས་ཤིང་། གཞན་དུ་ཞེས་བྱ་བ་འབའ་ཞིག་བལྟ་བར་ཡང་མི་ནུས་པ་ཐ་དད་ན་ཡང་ཅི་ཞིག་བྱར་ཡོད། ཅིའི་ཕྱིར་ཞེ་ན། བླང་དང་དོར་ཉིད་བྱར་མེད་ཕྱིར་རོ། །དེ་

ནི་འགའ་ཞིག་སྤང་བའམ། བླང་བར་ནུས་པ་སྲིད་དོ། །དེ་དང་ཞེས་བྱ་བ་ནི་ཉམས་སུ་མྱོང་བ་དང་ངོ་། །དེ་ཐ་དད་པར་སྨྲ་བའི་ལུགས་ལ་ཡང་ཇི་ལྟར་དྲན་པ་གཞན་ཉིད་ཡིན་ཞེ་ན། ཐམས་ཅད་རྒྱུ་དང་ཞེས་བྱ་བ་སྟེ། རྒྱུ་སྐྱེད་བྱེད་དང་རང་གི་ངོ་བོའི་དབྱེ་བ་སྟེ། རྒྱུའི་དབྱེ་བ་དང་བཅས་པའི་རང་གི་ངོ་བོའི་

དབྱེ་བ་ལས་སོ་ཞེས་བྱ་བའི་དོན་ཏོ། །རེ་ཞིག་རྒྱུའི་དབྱེ་བ་ཉིད་བརྗོད་པ་ནི་དེ་ལ་ཞེས་བྱ་བའོ། །དབང་པོའི་ཤེས་པ་ནི་དེ་ལྟར་ཞེས་བྱ་བ་བག་ཆགས་ཙམ་ལས་སྐྱེ་བ་མ་ཡིན་ནོ། །རང་གི་ངོ་བོའི་དབྱེ་བ་བརྗོད་པ་ནི་དྲན་པ་ནི་ཞེས་བྱ་བའོ། །འདི་དག་ནི་ཞེས་བྱ་བ་ནི་དྲན་པ་དང་མྱོང་བ་དག་གོ། །ཀ་བ་ལ་

སོགས་པ་ལྟར་ཞེས་བྱ་བ་ནི་ཇི་ལྟར་ཁྱེད་ཀྱི་ལྟར་ན། ཀ་བ་ལ་སོགས་ཐ་དད་པ་དེ་བཞིན་དུ་ཞེས་སོ། །རྒྱུ་དང་ལྡན་པ་ཉིད་རིག་པ་གང་ཡིན་པ་དེ་ལ་དེ་སྐད་ཅེས་བྱ་ལ་དེ་མེད་པའོ། །དེ་མི་འཛིན་ཕྱིར་ཞེས་བྱ་བ་ནི་རྒྱུ་དེ་མི་འཛིན་པའི་ཕྱིར་གལ་ཏེ་མངོན་སུམ་གྱི་རྒྱུ་མི་འཛིན་པའོ། །དེ་ལྟ་ན་ཡང་རྗེས་སུ་

དཔག་པས་འཛིན་ཏོ་སྙམ་ན། རྗེས་སུ་དཔག་པ་ཡང་ཞེས་བྱ་བའོ། །དྲན་པ་ཙམ་དུ་ཟད་ཀྱི་འཛིན་པ་ནི་མ་ཡིན་གྱི་དེའི་རང་བཞིན་མེད་པའི་ཕྱིར་རོ། །འོན་ཏེ་གང་གི་ཚེ་རྒྱུར་མངོན་པར་འདོད་པ་འཛིན་པ་དེ་ཉིད་དུ་འཛིན་མོད་སྙམ་ན་གང་གི་ཚེ་དེ་ཞེས་གསུངས་སོ། །དེ་ནི་རྒྱུ་མངོན་པར་འདོད་པའོ། །འོ་ན་འབྲས་བུ་

Vol. 185 · folio 202a

འཛིན་པར་འགྱུར་རོ་ཞེ་ན། འབྲས་བུ་འཛིན་པའི་དུས་ན་ཡང་ཞེས་གསུངས་སོ། །འོ་ན་དྲན་པ་ཉིད་ཀྱིས་དེ་རྒྱུ་ཉིད་དུ་རྟོགས་སོ་ཞེ་ན། ཉམས་སུ་མ་མྱོང་བ་ལ་ཞེས་གསུངས་སོ། །རྒྱུ་ནི་མངོན་སུམ་གྱིས་མྱོང་བ་ཁོ་ན་ཡིན་ཏེ། དེས་ན་དྲན་པ་འབྱུང་ངོ་སྙམ་ན་རྒྱུ་ཉིད་དུ་ཞེས་གསུངས་སོ། །

དེ་ཞེས་བྱ་བ་ནི་འདས་ཟིན་པའི་རྒྱུ་ཡང་ངོ་། །གལ་ཏེ་དུས་མཚུངས་པར་མངོན་སུམ་གྱི་རྒྱུ་དང་འབྲས་བུ་ཉིད་དུ་ཉམས་སུ་མྱོང་བ་དེ་ལྟ་ཡིན་ན་ནི་སྔ་མའི་རང་བཞིན་ཞེས་བྱ་བ་ལ་སོགས་པར་སྦྱར་རོ། །འོན་ཏེ་ཞེས་བྱ་བ་ནི་དགོས་པའོ། །ཇི་ལྟར་མངོན་སུམ་མེད་པར་རྗེས་སུ་དཔག་པ་འཇུག་སྟེ། གལ་ཏེ་སྔ་མའི་རང་

བཞིན་ཉིད་ལ་ཡང་མངོན་སུམ་གྱི་སྤྱོད་ཡུལ་དུ་འགྱུར་ན། དེའི་ཚེ་རྗེས་སུ་དཔག་པས་ཀྱང་རྟོགས་པར་འགྱུར་བ་ཞིག་ན། འདི་ཡང་ཡོད་པ་མ་ཡིན་ནོ་ཞེས་སྟོན་པ་ནི། མངོན་སུམ་གྱིས་ནི་ཞེས་བྱ་བའོ། །སྔར་ཞེས་བྱ་བ་ནི་རྒྱུ་འཛིན་པའི་དུས་ནའོ། །སྔ་མ་ཉིད་དུ་ཞེས་བྱ་བ་ནི་རྒྱུའི་རང་བཞིན་སྔ་མར་གྱུར་པ་ཉིད་དོ། །

སྔར་གྱི་མངོན་སུམ་དེས་སྔ་མ་ཉིད་མ་འཛིན་པ་ཅིའི་ཕྱིར་ཞེ་ན། མངོན་སུམ་ཐམས་ཅད་ནི་ཞེས་བྱ་བའོ། །འཛིན་པ་ཕྱི་མ་ལ་ལྟོས་ནས་ཞེས་བྱ་བ་ནི། འབྲས་བུ་འཛིན་པ་ལ་ལྟོས་ནས་སོ། །དེས་ནི་ཞེས་བྱ་བ་ནི་མངོན་སུམ་སྔ་མས་སོ། །ཅིའི་ཕྱིར་མི་འཛིན་ཞེ་ན་རང་བདག་ཉིད་ལ་གནས་ཕྱིར་ཞེས་གསུངས་ཏེ་

གཞན་གྱི་ཚུལ་ལུགས་མི་ཤེས་པའི་ཕྱིར་རོ་ཞེས་དགོངས་པའོ། །རང་བདག་ཉིད་ཀྱི་དུས་གང་ཡོད་པའི་དངོས་པོ་དེའི་རང་གི་ངོ་བོ་འཛིན་པའི་མངོན་སུམ་གྱིས་སོ། །མངོན་སུམ་ཕྱི་མ་ལའང་དེ་བཞིན་ནོ་ཞེས་བྱ་བར་རང་གི་འབྲས་བུའི་རང་གི་ངོ་བོ་འཛིན་པའོ། །རང་གི་དུས་ཀྱིས་རང་ངོ་བོ་ཡོངས་སུ་གཅོད་པ་

སྔ་མ་ལ་ལྟོས་པའི་བདག་ཉིད་ཇི་ལྟར་འཛིན་པར་འགྱུར་ཞེས་རྗེས་སུ་འཇུག་གོ། །དེ་ལ་ཞེས་བྱ་བ་ནི་སྔ་མ་དང་ཕྱི་མ་ལའོ། །དྲན་པས་ཀྱང་ཞེས་བྱ་བ་ནི་རྗེས་སུ་དཔག་པའི་རང་བཞིན་གྱིས་སོ། །རིག་པ་མ་ཡིན་པ་ཞེས་བྱ་བ་ནི་མངོན་སུམ་གྱིས་སྤྱོད་ཡུལ་དུ་མ་བྱས་པ་ལའོ། །རྣམ་པར་རྟོག་པ་གཉིས་པ་

སྤང་བའི་དོན་དུ་བརྗོད་པ་ནི་འོན་ཏེ་ཞེས་བྱ་བའོ། །དྲན་པ་ཙམ་ཡིན་གྱི་དེ་ཚད་མ་ནི་མ་ཡིན་ནོ་ཞེ་ན། གང་གིས་ཞེས་བྱ་བ་སྔ་མ་དང་ཕྱི་མ་ལ་ལྟོས་པ་རིག་པ་གང་གིས་འབྲས་བུ་རིག་པར་འགྱུར་བ་དྲན་པ་ཙམ་དེ་ལས་སྔ་མ་དང་ཕྱི་མ་ལ་ལྟོས་པའི་རིག་པར་ཇི་ལྟར་འགྱུར། གཅིག་ཉིད་དུ་ཞེས་བྱ་བ་སྔ་མ་དང་ཕྱི་

Vol. 185 · folio 202b

མའི་ཞེས་པ་དག་གཅིག་ཉིད་དུ་གཟུང་བའོ། །ངས་འབའ་ཞིག་མཐོང་བ་གང་ཡིན་པ་དེ་ཉིད་ཚོགས་པ་འདི་ཡིན་ནོ་ཞེའམ་བདག་ཉིད་ཚོགས་པར་མཐོང་བ་གང་ཡིན་པ་དེ་ཉིད་འབའ་ཞིག་པ་འདི་ཡིན་ནོ་ཞེས་སྔ་མ་དང་ཕྱི་མ་དག་གཅིག་ཉིད་དུ་ངོ་ཤེས་པ་ཉིད་ལྷག་པར་ཞེན་པ་ཉིད་དེ། དེས་ནི་རྣམ་པར་འབྱེད་པ་སྟེ།

སྔོན་པོའི་རྣམ་པ་ལོགས་སུ་བྱེད་པ་ཡིན་ནོ། །དེས་ན་གཉིས་སུ་མེད་པར་ཇི་ལྟར་འགྱུར་ཞེས་བསམས་པའོ། །འདི་གྲུབ་པའི་མཐའ་པས་བརྗོད་པ་ནི་དེ་ཉིད་ཡིན་ནོ་ཞེས་བྱ་བའོ། །དེ་ཉིད་ཅེས་བྱ་བ་ནི་དྲན་པའི་རང་བཞིན་ཡིན་ལ་འདི་ཞེས་བྱ་བ་ནི་ཉམས་སུ་མྱོང་བའི་རང་བཞིན་ཡིན་ཏེ་སྐལ་ལྡན་ཆེན་པོ་བཤད་པ་

མཛད་པའི་བཞེད་པས་ནི། དེ་ཉིད་ཀྱིས་མངོན་སུམ་ཡིན་པའི་ཕྱིར་རོ། །དྲན་པ་དང་འདིའོ་ཞེས་འཛིན་པ་དག་མཐོང་བ་ཡིན་ནོ། །དྲན་པ་ཡང་ཚད་མ་མ་ཡིན་ཏེ། དེས་སྔ་མ་དང་ད་ལྟར་བ་གཅིག་ཏུ་ཇི་ལྟར་འཛིན་ཞེས་དགོས་པའོ། །འོ་ན་ཞེས་བྱ་བ་ནི་དོགས་པ་བསུ་བའོ། །ཇི་ལྟར་ཤིང་རྟ་དང་ཤིང་རྟས་

བསྐྱོད་པའི་སྐྱེས་བུ་དེ་གཉིས་ཐ་དད་པར་རྟོགས་པ་ཇི་ལྟ་བ་བཞིན་ནོ་ཞེས་བྱ་བ་ནི་དཔེའི་དོན་ཏོ། །འདི་ལ་བརྗོད་པ་ནི་གལ་ཏེ་ཞེས་བྱ་བའོ། །དེ་ལྟ་བུ་ཁོ་ནར་ཞེས་བྱ་བ་ནི་ཐ་དད་པ་ཁོ་ནར་རོ། །རྣམ་པར་དཔྱད་པ་ཉིད་བརྗོད་པ་ནི་དྲན་པ་དང་ཞེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི་གཅིག་ཏུ་རྟོགས་ནའོ། །དེ་ཉིད་དུ་

ཞེས་བྱ་བ་ནི་དྲན་པ་དང་མངོན་སུམ་གྱི་རྣམ་པ་ཅན་ཉིད་དུའོ། །དྲན་པའམ་མངོན་སུམ་གཅིག་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ལྟར་འགྱུར་མོད་ཅི་སྐྱོན་སྙམ་ན། དེ་ལྟ་ཡིན་ན་ཞེས་གསུངས་སོ། །དྲན་པའི་རྣམ་པས་ཞེས་བྱ་བ་ནི་དྲན་པར་བྱས་སོ། །མ་རྟོགས་པ་ནི་ཉམས་སུ་མ་མྱོང་བའོ། །སྔ་

མ་ཉིད་ཀྱང་མངོན་དུ་བྱེད་པའི་རྣམ་པ་ཁོ་ནས་རྟོགས་སོ་ཞེ་ན། མངོན་སུམ་དུ་ཞེས་གསུངས་སོ། །དོན་རྣམས་ཀྱིས་གཞན་དེ་སྔོན་པོའམ་སེར་པོ་ལ་སོགས་པའི་རང་བཞིན་ཐ་དད་པ་ཉིད་དམ་ཅིག་ཤོས་གཞན་མ་ཡིན་པ་ནའོ། །རྟོགས་པ་ལ་ལྟོས་ཏེ་གྲུབ་པ་མ་ཡིན་པའི་ཐ་དད་པའོ། །གྲུབ་པའི་མཐའ་པས་

བརྗོད་པ་ནི་འདི་ནི་ཞེས་བྱ་བ་སྟེ། ཐ་དད་པའི་ཐ་སྙད་མེད་པར་འགྱུར་རོ་ཞེས་བརྗོད་པ་གང་ཡིན་པའོ། །གཞན་གྱིས་མི་མཚུངས་ཏེ་ཞེས་སྨྲས་སོ། །དེ་དོན་དུ་གཉེར་བ་ཞེས་བྱ་བ་ནི་ཐོབ་པར་བྱ་བ་དོན་དུ་གཉེར་བའོ། །འདི་ཞེས་བྱ་བ་ནི་འཇུག་པའོ། །དེ་ཞེས་བྱ་བ་ནི་ཐོབ་པར་བྱ་བའོ། །ཤེས་ན་ཞེས་བྱ་བ་

Vol. 185 · folio 203a

ནི་མངོན་དུ་བྱེད་པའི་ཤེས་པས་ཉམས་སུ་མྱོང་བ་ནའོ། །འཇུག་པས་ཀྱང་དེའི་ཡུལ་ཅན་མངོན་དུ་བྱེད་པའི་ཤེས་པ་སྐྱེད་པ་ཉིད་ཐོབ་པ་ཡིན་གྱི་གཞན་ནི་མ་ཡིན་ནོ། །གལ་ཏེ་དང་པོ་སྐྱེས་ན་དེའི་ཚེ་ཅིའི་དོན་དུ་འཇུག་པར་བྱེད། མོ་གཤམ་གྱི་བུ་ལ་ཞེས་བྱ་བ་མངོན་དུ་མ་བྱས་པར་ཁྱད་

པར་མེད་པའི་ཕྱིར་རོ། །མོ་གཤམ་གྱི་བུ་དེ་དེ་མེད་པའི་ཕྱིར་དང་ཐོབ་པར་བྱ་བ་འདི་ནི་ཡོད་པའི་ཕྱིར་རོ། །འདི་ཁོ་ན་ལ་འཇུག་གི་མོ་གཤམ་གྱི་བུ་ལ་ནི་མ་ཡིན་པ་ལ་བརྗོད་པ་ནི་དེ་ཉིད་ཅེས་བྱ་བའོ། །མངོན་དུ་བྱེད་པའི་ཤེས་པ་མེད་ན་ཐོབ་པར་བྱ་བ་ནི་ཡོད་ལ་མོ་གཤམ་གྱི་བུ་ཉིད་མེད་དོ་ཞེས་བྱ་བ་འདི་ཉིད་

ཇི་ལྟར་ཤེས་དེ་ལྟར་ན་མཐོང་བ་ལ་སོགས་པ་ལས་ཡོད་པ་ཡིན་ནོ་ཞེས་ཤེས་པ་ཡིན་ནོ་ཞེ་ན། རེག་པ་ལ་སོགས་པ་ཞེས་གསུངས་སོ། །རིག་པ་མེད་པ་ནི་རིག་པ་ཡོད་པ་མ་ཡིན་པའོ། །རིག་ཅེ་ན་ཞེས་བྱ་བ་ནི་མངོན་དུ་བྱས་ཤེ་ནའོ། །འདི་ལ་བརྗོད་པ་ནི་འོ་ན་ཞེས་བྱ་བའོ། །འཇུག་པའི་འབྲས་

བུ་མངོན་དུ་བྱེད་པ་ནི་ཡོད་ཟིན་པའི་ཕྱིར་རོ་ཞེས་དགོངས་པའོ། །དེའི་ཕྱིར་ཁྱད་པར་ལ་ཐ་དད་པ་རིག་པ་ཡིན་ནོ་ཞེ་ན། དེའི་ཚེ་ཁྱད་པར་མ་རྟོགས་པའི་ཕྱིར། ཇི་ལྟར་ཁྱད་པར་ལས་འཇུག་པར་འགྱུར། གལ་ཏེ་སྤྱི་ཁྱད་པར་ལས་ཐ་མི་དད་པ་ཡིན་ན། སྤྱི་དེ་མངོན་དུ་བྱས་པ་ན་ཁྱད་པར་ཡང་མངོན་སུམ་

དུ་བྱས་པས་ནི་ཅིའི་དོན་དུ་འཇུག །སྤྱི་ཐ་དད་པ་དང་ཐ་མི་དད་པ་ཁས་ལེན་ན་ནི་ཇི་ལྟར་དེ་རང་བཞིན་གང་གིས་སྤྱི་ཐ་དད་པའི་རང་བཞིན་དེས་ནི་རྟོགས་སུ་ཟིན་ཀྱང་ཁྱད་པར་མ་རྟོགས་པའི་ཕྱིར་ན། ཁྱད་པར་ཐ་མི་དད་པ་དེ་ལ་མི་འཇུག་པ་ཁོ་ནའོ། །ཇི་ལྟར་དེ་རང་བཞིན་གང་གིས་སྤྱི་ཐ་མི་དད་པའི་རང་བཞིན་དེས་

ནི་སྤྱི་རྟོགས་པ་ན། ཁྱད་པར་ཡང་རྟོགས་པའི་ཕྱིར་ཐོབ་ཟིན་པས་དེས་ཞུགས་པ་ལ་དོན་ཅི་ཡོད། ཅི་མངོན་སུམ་ལས་འཇུག་པ་མཐོང་ངམ་འོན་ཏེ་རྗེས་སུ་དཔག་པ་ལས་ཕྱོགས་དང་པོ་ལ་རེ་ཞིག་བརྗོད་པ་ནི། རང་དོན་རིག་ཕྱིར་ཞེས་གསུངས་ཏེ། རང་གི་ཡུལ་གྱི་རང་བཞིན་ཙམ་ཞིག་མཐོང་བའི་ཕྱིར་

རོ། །འོན་ཏེ་འཇུག་པའི་ཡང་རང་གི་ཡུལ་གྱི་རང་བཞིན་ཉིད་མིན་ན་དེས་ན་དེ་ཡང་མངོན་སུམ་གྱིས་རིག་པ་ཡིན་ནོ་སྙམ་ན། འཇུག་པ་སྔ་ཕྱིའི་ཞེས་གསུངས་སོ། །དེ་ལ་ཞེས་བྱ་བ་ནི་སྔ་མ་དང་ཕྱི་མའི་རང་བཞིན་ལའོ། །དེའི་ཕྱིར་ཕྱིའི་དོན་ལ་ཡང་རྣམ་པ་ཐམས་ཅད་དུ་ཡང་འཇུག་པའི་འཐད་པ་

Vol. 185 · folio 203b

ཡིན་པའི་ཕྱིར་ན། ཕ་རོལ་པོས་བདག་ཅག་ལ་གཉིས་པ་ལ་ཡང་ཇི་ལྟར་འཇུག་པ་སྲིད་ཅེས་བྱ་བ་དེ་ལྟ་བུའི་རྣམ་པར་རྩོད་པ་གང་ཡིན་དེ་གསལ་བ་ཡིན་ནོ། །འདི་ཇི་ལྟར་གསལ་སྙམ་ན་དོན་འདི་ནི་ཞེས་བྱ་བ་སྟེ། འདི་ནི་གཞན་ཡིན་ལ་བདག་ནི་གཞན་མ་ཡིན་ནོ་ཞེས་བྱ་བའི་དོན་འདི་ནི་བདག་

དང་གཞན་ལ་ཡང་མ་གྲུབ་པའི་ཕྱིར་རོ། །དོན་འདི་རང་བཞིན་ལ་གྲུབ་པ་མ་ཡིན་ནོ་ཞེས་བྱ་བ་འདི་ཉིད་གང་ལས་གྲུབ་སྙམ་ན་འདི་ལྟར་སྐྱེ་བ་གྲུབ་པ་ནི་རང་རིག་པ་ཉིད་ཡིན་གྱི་ཞེས་གསུངས་སོ། །འདྲི་བར་བྱེད་པ་བདག་དང་འཆད་པར་བྱེད་པ་གཞན་འདི་ཞེས་དེ་ལྟར་རྣམ་པ་འདིས་རྒོལ་བ་གཉི་ག་ཡང་རང་གི་རྣམ་པར་ཉེ་

བར་བསྒྱུར་བའི་ཤེས་པ་རིག་པ་ཉིད་དཔེར་ན་རྨི་ལམ་གྱིས་རྟོགས་པ་རྒོལ་བ་དང་ཕྱིར་རྒོལ་བའི་རྣམ་པ་ཡིན་གྱི་རྟོགས་པས་ཉེ་བར་བསྒྱུར་བ་རིག་པ་ཙམ་ཡིན་པ་བཞིན་ཏེ་དོན་དམ་པར་ནི་རྣམ་པར་དབྱེ་བ་ཡོད་པ་མ་ཡིན་ནོ། །སྨྱོན་པའི་རྟོགས་པས་ཡང་མགྱོགས་འགྲོ་ལ་སོགས་པའི་རྣམ་པ་ཅན་གྱི་རྟོགས་པ་རིག་པ་ཙམ་

ཡིན་གྱི། མགྱོགས་འགྲོ་ལ་སོགས་པའི་རྣམ་པ་རྣམ་པར་དབྱེ་བ་ནི་ཡོད་པ་མ་ཡིན་པ་བཞིན་ནོ། །འོ་ན་ནི་ཞེས་བྱ་བ་ལ་སོགས་པས་དོགས་པ་བསུ་ནས་བརྗོད་པ་ནི་འདི་ཞེས་བྱ་བ་ལ་སོགས་པའོ། །གཞན་གྱིས་ཞེས་བྱ་བ་ནི་ཕྱིར་རྒོལ་བས་སོ། །འདི་ལ་བརྗོད་པ་ནི་ཅི་ཞེས་བྱ་བའོ། །ཇི་ལྟར་བྱེད་པ་མ་

མཐོང་སྙམ་ན་ཇི་ལྟར་ཞེས་བྱ་བའོ། །འོ་ན་ཇི་ལྟར་ཞེས་བྱ་བ་ནི་དགོངས་པའོ། །གྲུབ་པའི་མཐའ་ནི་ཁྱེད་ཀྱིས་ཞེས་བྱ་བའོ། །གལ་ཏེ་དུ་བ་ལ་སོགས་པ་མེ་ལ་སོགས་པ་ལ་ཡོད་པར་མངོན་སུམ་གྱིས་དམིགས་པ་ཉིད་མ་ཡིན་ནམ་སྙམ་ན། རྒྱུ་དང་འབྲས་བུའི་ཞེས་གསུངས་སོ། །དོན་ནི་འདི་ཡིན་ཏེ་རེ་ཞིག་

རིག་པ་བདག་ཉིད་ནི་ལྡོག་པ་ཉམས་སུ་མྱོང་བ་མ་ཡིན་ཏེ། ལྡོག་པའི་དུས་ན་རང་ཉིད་མེད་པའི་ཕྱིར་རོ། །རིག་པ་གཞན་གྱི་ཡང་སྤྱོད་ཡུལ་དུ་མི་འགྱུར་བ་ཉིད་དུའོ། །དེས་ཀྱང་དེ་མེད་པར་ཇི་ལྟར་འཛིན་ཞེས་བྱ་བའོ། །ཅི་སྟེ་རེས་འགའ་བ་ཉིད་དུ་ཡང་ཡོད་པ་ཁྱོད་ཀྱིས་རྟོགས་སམ་ཞེས་འབྲེལ་ཏོ། །འོ་ན་

སློབ་དཔོན་གྱིས་དེ་ཇི་ལྟར་བཤད་སྙམ་ན། ཐ་དད་པར་སྨྲ་བ་ལ་ཞེས་གསུངས་སོ། །འདིར་སྣ་ཚོགས་གཉིས་མེད་འདི་ནི་ཚིག་རེ་རེ་ལ་ཡང་ལོག་པར་རྟོགས་པ་བརྒྱ་ཕྲག་དུ་མ་དང་འབྲེལ་པ་ཡིན་མོད་ཀྱི། གཞུང་མངས་ཀྱིས་འཇིགས་པས་ན་བདག་ཅག་གིས་མ་བཀོད་དོ། །དེའི་ཕྱེད་ལ་སོགས་པར་ཞེས་བྱ་བ་ནི།

Vol. 185 · folio 204a

སྔར་མཐོང་བ་གང་ཡིན་པ་དེའི་ཕྱེད་དམ་ཅུང་ཟད་མ་རྫོགས་པར་ཞེས་བྱ་བའི་དོན་ཏོ། །སེམས་མིན་ཞེས་བྱ་བའི་ཕྱི་རོལ་བའོ། །གལ་ཏེ་དངོས་པོ་ཇི་ལྟ་ཇི་ལྟར་མཐོང་བ་དེ་དེ་ལྟ་བུ་ཁོ་ནར་སྐྱེས་པ་ཡིན་ན། དེའི་ཚེ་ལྐོག་ཏུ་གྱུར་པ་ཉིད་དང་གཞན་གྱིས་བལྟ་བར་བྱ་བ་ཉིད་དུ་ཡང་མ་མཐོང་བ་

དེས་ན་རྟོག་པ་ཉིད་དམ། གཞན་གྱིས་བལྟ་བར་བྱ་བ་ཉིད་དུ་མ་སྐྱེས་པར་འགྱུར་རོ། །སྐྱེས་པ་ཡང་མ་ཡིན་ཏེ། དེ་ལྟ་མ་ཡིན་ན་ཕྱི་རོལ་ཉིད་ཉམས་པར་འགྱུར་རོ་སྙམ་དུ་དགོངས་པའོ། །ཕྱོགས་ཉིད་ལ་གནོད་པར་བྱེད་པ་གཞན་བརྗོད་པ་ནི། རྒྱུ་གཞན་གྱིས་ནི་ཞེས་བྱ་བའོ། །ཡང་ཇི་ལྟར་ན་ལྐོག་

ཏུ་གྱུར་པ་ཉིད་དང་གཞན་གྱིས་བལྟ་བར་བྱ་བ་དངོས་པོ་མ་སྐྱེས་ཤེ་ན་དངོས་པོ་ནི་ཞེས་བྱ་བ་གསུངས་སོ། །ཚིག་ལེའུར་བྱས་པ་གཉིས་འགྲེལ་པ་ནི། རྒྱུ་གཞན་ལས་ཞེས་བྱ་བའོ། །འཛིན་པའི་རྣམ་པ་དང་འདྲ་བར་ཞེས་བྱ་བ་ནི་ཤེས་པ་བཞིན་དུའོ། །དོན་ཁོ་ནའོ་ཞེས་བྱ་བ་ནི་ཤེས་པ་མ་ཡིན་པའོ། །

རེ་ཞིག་བདེ་བ་ལ་སོགས་པ་ནི་དམིགས་པར་བྱ་བའི་རང་བཞིན་ཡིན་ཡང་རྣམ་པར་ཤེས་པའི་རང་བཞིན་ནི་མ་ཡིན་ནོ་ཞེས་བརྗོད་པ་ནི་ནེ་པ་ལས་ཞེས་བྱ་བའོ། །གལ་ཏེ་དེ་ཡང་དོན་གྱི་རང་བཞིན་ཡིན་ན་དེའི་ཚེ་སྔོན་པོ་ལ་སོགས་པ་བཞིན་གཞན་གྱིས་ཅི་སྟེ་དམིགས་ཤེ་ན། ནང་གི་ཞེས་སྨོས་ཏེ་ནང་

ཡིན་པའི་ཕྱིར་གཞན་གྱིས་དམིགས་པ་མ་ཡིན་ནོ་ཞེས་བསམས་པའོ། །གཞན་དག་ཤེས་པ་གྲུབ་པར་བྱ་བའི་དོན་དུ་ཚད་མ་ཉེ་བར་འགོད་པ་ནི་གང་གིས་ཞེས་བྱ་བའོ། །འདི་ལ་བརྗོད་པ་ནི་དེ་ཡང་མིན་ཞེས་བྱ་བའོ། །གང་གི་ཚེ་ཤེས་པ་ཞེས་བྱ་བ་མེད་པ་དེའི་ཚེ། དམིགས་པར་བྱ་བ་རང་ཉིད་

རིག་པ་ཡིན་པར་འགྱུར་རོ། །དེས་ན་ཤེས་པ་ཡོད་པ་ཉིད་སྒྲུབ་པར་བྱེད་པར་ཇི་ལྟར་འགྱུར་གཞན་དག་ཤེས་པ་ཡོད་པར་བསྒྲུབ་པའི་ཕྱིར་སྨྲ་བ་ནི་དམིགས་པར་བྱ་བ་ཉིད་དམིགས་པ་ཞེས་བྱ་བ་ལ། དམིགས་པ་པོ་ནི་བདག་ཡིན་ལ་དམིགས་པར་བྱེད་པ་ཞེས་བྱ་བ་ནི་དམིགས་པའི་བྱ་བ་སྟེ། ཤེས་པ་

ཞེས་བྱ་བའི་དོན་ཏོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཤེས་པ་ཞེས་བྱ་བ་ཡོད་པ་མ་ཡིན་ན། དེའི་ཚེ་འདི་གང་གིས་དམིགས་ཞེས་བརྒལ་ཞིང་བརྟག་པ་ན་གལ་ཏེ་དོན་གྱིས་གོ་བ་མི་འཇུག་ན་དེའི་ཚེ་ལན་ཉིད་མེད་པར་འགྱུར་རོ་ཞེས་བྱ་བ་ཡིན་ན། གལ་ཏེ་གཞན་གྱིས་དམིགས་པར་བྱ་བ་གང་

Vol. 185 · folio 204b

ཡིན་པ་དེ་གཏན་ཚིགས་ཡིན་ན་དེའི་ཚེ་གང་གིས་དམིགས་པར་བྱེད་དེ། མ་གྲུབ་པ་ནི་གཏན་ཚིགས་སུ་མི་རུང་བའི་ཕྱིར་རོ། །གལ་ཏེ་གཞན་གྱིས་དམིགས་པར་བྱ་བ་དེ་ཡང་གཞན་གྱིས་ཏེ། གཞན་གྱིས་དམིགས་པར་བྱ་བའི་མཚན་ཉིད་གཞན་དག་གིས་དམིགས་པ་ཡིན་ན། དེ་ལྟ་ཡིན་ན་རེ་ཞིག་གཞན་

གྱིས་དམིགས་པར་བྱ་བ་ཉིད་ནི་ཤེས་པའི་རྟགས་ཡིན་ལ། གཞན་གྱིས་དམིགས་པར་བྱ་བ་ཉིད་དེ་ཡང་དམིགས་པ་ཡིན་ཏེ། དེས་ན་དེ་ལ་ཡང་གཞན་གྱིས་དམིགས་པར་བྱ་བ་ཉིད་ཡོད་དེ་དེས་ན་དེ་ལ་དེ་རྗེས་སུ་དཔོག་པ་ཡིན་ནོ་ཞེ་ན། འདི་ལ་བཤད་པ་ནི་དེ་ལྟ་ན་ནི་ཞེས་བྱ་བའོ། །གཏན་ཚིགས་དེ་ཡང་གཞན་

གྱིས་དམིགས་པར་བྱ་བ་ཡིན་ལ་དེ་ཡང་གཞན་གྱིས་ཡིན་ན་ཐུག་པ་མེད་དོ། །རྣམ་པར་རྟོག་པ་གཉིས་པ་ལ་བརྗོད་པ་ནི་རང་ཉིད་ཀྱིས་ནི་ཞེས་བྱ་བའོ། །གཟུང་བ་ལ་ཡང་རང་ཉིད་དམིགས་པར་ཐལ་ལོ། །ཇི་ལྟར་འཛིན་པར་བྱེད་པ་རང་ཉིད་ཀྱིས་དམིགས་པར་བྱ་བའི་རང་བཞིན་ཡིན་པ་དེ་བཞིན་དུ་གཟུང་བར་བྱ་བ་

ཡང་ཡིན་པར་ཐལ་ལོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བས་དོགས་པ་བསུ་ནས་བརྗོད་པ་ནི་གལ་ཏེ་གཞན་ལ་ཞེས་བྱ་བའོ། །གཞན་ལ་ལྟོས་པ་གང་ཡིན་པ་དེ་གཞན་མེད་པར་གཞན་ལ་ལྟོས་པ་ཉིད་དུ་ཇི་ལྟར་འགྱུར་ཏེ། གཞན་ལ་ལྟོས་པ་མ་ཡིན་པ་ཁོ་ན་ཞེས་པའི་དོན་ཏོ། །དེས་ན་གལ་ཏེ་གཞན་ལ་

ལྟོས་པར་རིག་ན་དེའི་ཚེ་གཞན་ཡང་ཡང་རིག་པར་འགྱུར་རོ། །འོན་ཏེ་གཞན་ཐེ་ཚོམ་གྱི་ཡུལ་ཡིན་པ་དེ་ལས་གཞན་ལ་ལྟོས་པ་ཉིད་རྟོགས་པ་ཡིན་ནོ་ཞེ་ན། ཐེ་ཚོམ་ཟ་ན་ཞེས་གསུངས་སོ། །གལ་ཏེ་གཞན་ལ་ལྟོས་པ་ཉིད་ཐེ་ཚོམ་ཟ་བ་དེ་ལྟ་ན་ཡང་ཤེས་པ་ཡོད་པ་ལ་གཞན་ལ་ལྟོས་པ་ཉིད་གཏན་ཚིགས་སུ་

འགྱུར་རོ་སྙམ་ན་གཏན་ཚིགས་གཞན་ལ་ལྟོས་པ་ཉིད་མ་ངེས་པས་ན། ངེས་པར་བྱེད་པ་ཞེས་བྱ་བ་ཤེས་པ་ཡོད་པར་ངེས་པར་བྱེད་པའོ། །བུམ་པ་ལ་སོགས་པ་ལ་རང་བཞིན་གཉིས་ཡོད་དེ་བདག་ལ་ལྟོས་པའི་རིག་བྱ་ཉིད་དོ་ཞེས་ཁས་བླངས་ནས་གཞན་དག་བརྗོད་པ་ནི། འོན་ཏེ་བདག་ལྟོས་ཞེས་བྱ་བའོ། །

འདི་བརྗོད་པ་ནི་དེ་ཙམ་གྱིས་ནི་ཞེས་བྱ་བའོ། །གལ་ཏེ་བུམ་པ་དང་སྣམ་བུ་དང་ལུས་ལ་སོགས་པ་ནི་ཐམས་ཅད་བདག་རིག་པ་ཡིན་ན། དེའི་ཚེ་ཇི་ལྟར་བ་ནི་ཞེས་བྱ་བ་ལ་སོགས་པར་སྦྱར་རོ། །གལ་ཏེ་གཞི་མཐུན་དབང་གིས་ན། །ཞེས་བྱ་བ་འདི་འཇིག་རྟེན་གྱིས་བརྗོད་པ་སྟེ། དཔེར་ན་རྒྱལ་པོའི་བཀའ་དྲིན་

Vol. 185 · folio 205a

གྱིས། །ཞེས་བྱ་བ་བཞིན་ནོ། །བདག་ནི་དཀར་ཤམ་བདག་ནི་སྔོ་བསངས་ཞེས་བྱ་བ་ལ་སོགས་པའོ། །གཞན་ཡང་བརྗོད་པ་ནི་གལ་ཏེ་གང་ལ་གཞི་མཐུན་པ་ཡོད་པ་དེར་གདོན་མི་ཟ་བར་གཅིག་འགྱུར་ནའོ། །དེ་མེད་པས་ཞེས་བྱ་བ་ནི་གཅིག་ཉིད་མེད་པས་སོ། །དུ་མར་ཞེས་བྱ་བ་གཞི་

མཐུན་པ་མེད་པར་རོ། །དེའི་ཚེ་གཞི་མཐུན་པ་གཅིག་ཉིད་དང་། དེ་མེད་པ་དུ་མའི་སྒྲུབ་པར་བྱེད་པར་འགྱུར་རོ། །དེ་ལྟར་མ་གྱུར་ན་སྟེ་ཇི་སྐད་བརྗོད་པ་ཁས་མི་ལེན་ན། གྲུབ་བྱ་མ་ཡིན་ཞེས་བྱ་བ་ནི་གཞི་མཐུན་པ་ལས་གཅིག་ཉིད་མ་ཡིན་ལ། གཞི་མཐུན་པ་མེད་པ་ལས་བཟློག་པ་དུ་མ་ཉིད་ཀྱང་མ་

ཡིན་ནོ། །འོན་ཏེ་གཞི་མཐུན་པ་མེད་པ་ལས་དུ་མ་ཉིད་ཡོད་པ་ཡིན་ནོ་ཞེས་བརྒྱ་ལ་བརྗོད་པར་འོངས་པས་དེ་ལ་བརྗོད་པ་ནི་དེ་བཞིན་དུ་ཞེས་བྱ་བས་དཔེ་ཡིན་ཏེ། དེ་ལྟ་བུ་ཡང་ཞེས་བྱ་བའི་དོན་ཏོ། །གལ་ཏེ་ཐ་དད་པ་མེད་པར་མཐོང་བ་གཅིག་གིས་སྒྲ་གཅན་གྱི་མགོ་ཞེས་བྱ་བ་དེ་གཞི་མཐུན་མ་ཡིན་པས་

རབ་ཏུ་བསྒྲུབས་པའི་དུ་མ་ཉིད་ལ་གནོད་ན། དེའི་ཚེ་འདིར་ཡང་ཞེས་བྱ་བ་བུམ་པ་དང་སྣམ་བུ་དང་ལུས་ལ་སོགས་པ་ལ་ཡང་ཐ་དད་པར་ལྟ་བར་སྒྲོ་བཏགས་པ་ལ་གནོད་པར་བྱེད་པ་དང་རིག་པ་ཡོད་པ་ཡིན་ནོ། །དེ་ལས་ལོག་པར་ཞེས་བྱ་བས་ཐ་མི་དད་པར་དམིགས་པས་སོ། །སྔོན་པོ་དང་ལུས་དང་བདེ་བ་ལ་

སོགས་པ་དང་། རིག་པ་ནི་ཐ་དད་པ་དང་ལྡན་པ་ཞེས་བྱ་བ་ཐ་དད་པ་དང་བཅས་པ་ཉིད་མ་ཡིན་ནོ། །གང་གིས་ཞེས་བྱ་བ་ནི་གཞི་མཐུན་པ་མཐོང་བ་མེད་པས་སོ། །རིག་པའི་དོན་ནི་སྐྱེས་སོ་ཞེས་བྱ་བ་རྣམ་པ་འདིས་གཞི་མཐུན་པ་མཐོང་བ་མེད་དམ། ཅི་སྟེ་ཡོད་པ་ཁོ་ནའོ་ཞེས་བྱ་བའི་དོན་ཏོ། །རྗེས་འགྲོ་ཞེས་བྱ་

པ་ནི་ལུས་སྔོན་པོ་དང་སེར་པོ་ལ་སོགས་པ་རིག་པར་རྗེས་སུ་འགྲོ་བའོ། །སྔོན་པོ་ལ་སོགས་པ་ནི་དེ་དག་ལས་བཟློག་པ་ཡིན་ནོ། །གལ་ཏེ་དོན་དམ་པར་ཐ་དད་པ་མེད་ན། རྗེས་སུ་འགྲོ་བ་དང་ལྡོག་པར་རྟོགས་པ་ཡང་ཇི་ལྟར་ཞེ་ན། རྗེས་འགྲོ་ལྡོག་པར་རིག་པ་ནི། །ཞེས་གསུངས་སོ། །རྗེས་སུ་འགྲོ་བ་དག་ལྡོག་

པ་པ་ཉིད་སྒྲུབ་པར་བྱེད་པ་ནི་གཟུགས་ལ་སོགས་པ་ནི་ཞེས་བྱ་བའོ། །གཞན་ན་ཡང་ཞེས་བྱ་བ་ནི་ཡུལ་དང་དུས་གཞན་ན་ལུས་མེད་པར་ཡང་གཟུགས་ལ་སོགས་པ་ཡོད་པ་ཉིད་དོ། །འདིས་ནི་ལུས་ལྡོག་པ་དང་སྔོན་པོ་ལ་སོགས་པ་ནི་རྗེས་སུ་འགྲོ་བར་སྟོན་ཏོ། །བདག་ཁོ་ནས་སྔོན་པོ་དང་སེར་པོ་མཐོང་ངོ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words